రమాదేవి బాలబోయిన కవిత: స్వప్న సమీరం
By telugu team | First Published Nov 21, 2019, 3:20 PM ISTతెలుగు సాహిత్యంలో కవిత్వానికి ఉన్న ప్రత్యేకత విశేషమైంది. బాలబోయిన రమాదేవి రాసిన స్వప్న సమీరం కవితను తెలుగు సాహిత్య పాఠకుల కోసం అందిస్తున్నాం
గమ్మత్తుగా ప్రతీరేయి
నా కళ్ళతలుపులు మూసీమూయంగానే
ఇంకో లోకానికి ద్వారాలు తెరువబడుతాయి
దినమంతా శ్రమించిన తనువునుండి
నాకు నేనుగా వేరైపోయినట్లు
నిశిరాతిరి దారుల్లో ప్రయాణిస్తూనే
వెలుగులోకాల సందర్శనం చేస్తూంటాను
Latest Videos
undefined
అక్కడక్కడ తారసపడేవాళ్ళు
లోకంలో నాతో ఉండేవాళ్ళు
నన్నిడిచిపెట్టిపోయినోళ్ళూ
సమావేశమైనట్లు సందడిచెస్తారు
ఓసారి గతానికీ
మరోసారి వర్తమానానికి
ఇంకోసారి భవిష్యత్తుకూ
మధ్యన తిరుగుతూ
వాస్తవాస్తవాలను గ్రహిస్తూంటాను
అదేమిటో గతం మధురంగా
ప్రస్తుతం కఠినంగా
భవిష్యత్తు ఆశాజనకంగా
దృశ్యమానమై కళ్ళవెనుక తెరపైఆడుతుంటుంది
సరిగ్గా అప్పుడే...
తెల్లారింది లెమ్మంటూ
అమ్మ కుదిపిన కుదుపుకి
ఆలోచనలన్ని అదుపులోకి వచ్చి
వర్తమానమంతా స్వప్నదూరమై
మళ్ళీఈలోకంలోకి వచ్చిపడతాను....
రాత్రి నాలో వీచిన స్వప్నసమీరాల హాయిలో నిజంచేయాలన్నతపనతో!!
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి