ఎంవీ రామిరెడ్డి రచించిన కథల సంపుటి ‘స్పర్శవేది’కి శ్రీ మక్కెన రామసుబ్బయ్య కధా పురస్కారం.. ఒద్దిరాజు ప్రవీణ్ కుమార్ రచించిన "పరావలయం"కవితా సంపుటికి ఆచార్య నెల్లుట్ల కవితా పురస్కారం లభించింది.
శ్రీ మక్కెన రామసుబ్బయ్య ఫౌండేషన్, విజయవాడవారు ప్రతి ఏడాదిలాగే ఈ సంవత్సరం కూడా కథ, కవిత, ఇతర సాహితీ ప్రక్రియలలో బహుమతి పొందిన రచయితలకు 24 -11-22 గురువారం సాయంత్రం 4 గంటలకు గుంటూరు బ్రాడీపేటలో పురస్కార ప్రదానోత్సవం నిర్వహించారు. ఈ ఏడాది "శ్రీ మక్కెన రామసుబ్బయ్య కధా పురస్కారం" ఎంవీ రామిరెడ్డి రచించిన కథల సంపుటి "స్పర్శవేది "కి బహుకరించారు. "ఆచార్య నెల్లుట్ల కవితా పురస్కారం " ఒద్దిరాజు ప్రవీణ్ కుమార్ రచించిన "పరావలయం" అనే కవితా సంపుటికి పురస్కారాన్ని అందజేశారు. " డా. కె వి రావు సాహితి పురస్కారం" డా. చెన్నకేశవ రచించిన "కోకిల పాటలు" అనే బాల సాహిత్యం పుస్తకానికి అందచేశారు.
ఈ పురస్కారాల ప్రదానోత్సవానికి సభాధ్యక్షులుగా రాయవరపు లక్ష్మి శ్రీనివాస్, ముఖ్య అతిథిగా ఆంధ్రప్రదేశ్ రాష్ట్ర తెలుగు సంస్కృత అకాడమీ అధ్యక్షురాలు డా. నందమూరి లక్ష్మి పార్వతి , విశిష్ట అతిథులుగా రాష్ట్ర గ్రంథాలయ చైర్మన్ మందపాటి శేషగిరిరావు, ఆంధ్రా బ్యాంకు పూర్వ డిజిఎం గంధం రవికుమార్, సభ నిర్వాహకులుగా పట్టాభి కళా పీఠము అధ్యక్షులు డా. తూములూరి రాజేంద్ర ప్రసాద్ పాల్గొని విజేతలను అభినందిస్తూ రూ.7,000/ -ల నగదు, జ్ఞాపిక, ప్రశంసాపత్రం అందజేశారు. ఈ కార్యక్రమంలో శ్రీ మక్కెన రామసుబ్బయ్య ఫౌండేషన్ అధ్యక్షులు డాక్టర్ మక్కెన శ్రీను, రావి రంగారావు, ఆత్మకూరు రామకృష్ణ , పాలేరు పోతురాజు, శిఖా ఆకాశ్, పి. శ్రీనివాస్ గౌడ్ పలువురు సాహితీవేత్తలు పాల్గొన్నారు.