వెలుతురు చేరని చీకటి కాలం...!: మామిడి హరికృష్ణ కవిత
By Arun Kumar P | First Published Feb 2, 2022, 2:46 PM ISTఇంకా చీకట్లు తొలగిపోలేదంటూ తెలంగాణ భాషా సాంస్కృతిక శాఖ సంచాలకులు మామిడి హరికృష్ణ కలంనుండి జాలువారిన అద్భుత కవితను ఇక్కడ చదవండి...
1. ఇంకా చీకట్లు తొలగిపోలేదు !
2. అక్కడెక్కడో మనో హర్మ్యంలో ఓ కన్ను తెరుచుకుంటుంది
గాలి అలలపై ఓ దృశ్యం గుండె గడప మీద ప్రత్యక్షం అవుతుంది
తక్షణమే కాంతి సంవత్సరాల దూరం కూడా అత్యంత సమీపమై
ఏ ఆధారమూ లేని అంతరిక్షంలో విన్యాసం మొదలెడుతుంది!
చరణ సౌందర్యం-- హసిత లాలిత్యం
ముకుళిత అధరం-- విప్పారిన నయనం
వికసిత ఆనందం-- విరహ వినోదాల మెరుపుల మధ్య
ఒడిలో Butterfly రెక్కలు అలల్లా ఆడిస్తుంది
ఒంటి కాలి తపో దీక్ష virtual స్పర్శలలో తన్మయం అవుతుంది
మోచేయిని - కాళ్ళ వేళ్ళను మాత్రమే నేలపై ఆనించి
దేహమంతా గాలిలో తేలిపోయే చిత్రం...
ఎప్పుడూ మట్టిని ముద్దాడే పాదాలు
ఈ సారి ఆకాశం వంక చూస్తూ
గాలిలో నడుస్తూ.. కదులుతూ..
వర్తులాలుగా గింగిరాలు పోయే విచిత్రం... !
Latest Videos
undefined
3. కళ్ళతో ఉచ్చ్వాస - మాటలతో నిశ్వాస
చెవులతో మువ్వల సవ్వడుల ఆస్వాదన
మస్తిష్కంలో వాయు స్థంభన
ప్రతి వేకువ చీకటి ఓ యోగ నర్తన !
The gimmick of long legs
the magic of short voices
and the one and only ప్రేమ
పద్మాసనం వేసుకుని
ప్రాణాయామ కపాల భతిలలో
దేహ చక్ర స్థానాల మధ్య తారాడుతూ ఉంటాయి !
4. ఈరోజు కూడా ఇంకా వెలుతురు చేరని చీకటి కాలం లోనే
నీ కంటి చూపు కోసం కలవరిస్తూ ఉంటాను
ఏ గ్రహణం తాకిడికో తల్లడిల్లి సొమ్మసిల్లి పడి ఉంటావు
ఇప్పుడు ఇక్కడ లోకం లోకమే
Digital Projection అయి ఉంటుంది-ఏవీ కనిపించవు
పుస్తకం లో పద్యం కనిపిస్తుంది -- భావం అర్థం కాదు
FM Radioలో పాట వస్తూ ఉంటుంది- ఏదీ వినిపించదు
OTT లో Historical Period Thriller -- ఏ భావాన్నీ కలిగించదు
podcast లో ప్రసంగం-- ఏమీ తలకెక్కదు
youtube లో Interview -- ఏకాగ్రత కుదరదు
facebook లో live show -- వాదన ఏదీ ఆకట్టుకోదు
whatsapp లో message -- చదివినా మెదడుకెక్కదు
instagram లో కళ్ళు చెదిరే photo -- Retina దాటి లోపలికి తొంగి చూడదు
భూగోళానికి అవతల అర్ధ ప్రపంచంలో నువ్వు
ఇక్కడ శూన్య విశ్వంలో అనంతంగా తప్పిపోయిన నేను !
5. అంతేనా--
చేతులు ఏవో కదులుతూ ఉంటాయి-- ఉద్దేశం ఏంటో చిక్కదు
పాదాలేవో నడుస్తుంటాయి -- గమ్యం ఉండదు
పెదాలేవో పలుకుతూ ఉంటాయి - ఏ భాషో తెలీదు
చెవులేవో వింటూ ఉంటాయి -- స్పందన ఉండదు
గాలేదో వీస్తూ ఉంటుంది -- ఊపిరి ఆడదు !
6. అలా హృదయం తెరిచి చూస్తూ ఉండగానే
చుట్టూ తెల్లవారుతుంది
మనసులో చీకటి మాత్రం వ్రేళ్ళాడుతూనే ఉంటుంది
ఏ కొమ్మ మీద నుంచో కువకువ అని పాడే పిట్ట
ఎప్పటిలాగే ఈ రోజు కూడా పాడుతుంది
ఏదైనా రాగమే-- పాడేదంతా పాటే అనుకుంటున్నావు కదా
కొంచెం ఆలకించి విను
ఆ పాట నిండా దుఃఖమే వర్షిస్తూ ఉంటుంది ...
7. వర్షాన్ని చెరిపేసి - మంచు తెరలు తుడిచేసి
మళ్ళీ వెలుతురు చేరని చీకటి కాలం కోసం కళ్ళల్లో దీపాలు వెలిగిస్తాను
ఇప్పుడు, ఇంకా చీకట్లు తొలగి పోలేదు!
కాదు కాదు... నాకే ఈ చీకట్లను తొలగించాలని లేదు
నా మనో హర్మ్యంలో ఏ క్షణమైనా
నీ దృశ్యం ప్రత్యక్షం కావచ్చు కదా!!
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి