డిజాస్టర్ డైరక్టర్ తో అఖిల్...తొందపడటం లేదు కదా?
By Surya Prakash | First Published Sep 24, 2023, 11:25 AM ISTఏజెంట్ దారుణంగా నిరాశ పరచడంతో అఖిల్ నెలల తరబడి అజ్ఞాతంలోనే ఉండి ఇప్పుడు బయిటకు వచ్చి కొత్త సినిమా సైన్ చేయబోతున్నారు.
తాను పెద్ద యాక్షన్ హీరో కావచ్చు అని ఎన్నో ఆశ‌లు పెట్టుకుని, చేసిన ఏజెంట్ సినిమా డిజాస్టర్ అవటం అఖిల్ కు పెద్ద దెబ్బే. ఆ ఘోర ప‌రాజ‌యం ఇచ్చిన నిరాశ‌తో అఖిల్ నెలల తరబడి క‌నిపించ‌కుండా పోయాడు. మ‌ళ్లీ రీసెంట్‌గా అఖిల్ క‌నిపించింది మొన్న జ‌రిగిన ఏఎన్నార్ శ‌త‌జ‌యంతి వేడుకల్లోనే అని అందరికీ తెలుసు. ఈ నేపధ్యంలో అఖిల్ కొత్త సినిమా గురించి టాక్ బయిటకువచ్చింది. అయితే ఆ దర్శకుడు పేరు వినగానే అభిమానులు కంగారుపడుతున్నారు. వార్తలో నిజమెంత ఉందో కానీ ఫ్యాన్స్ సోషల్ మీడియా లో ఆ డైరక్టర్ తో చేయద్దు అంటున్నారు. ఇంతకీ ఆ దర్శకుడు ఎవరూ అంటే...
అతను మరెవరో కాదు తమిళ దర్శకుడు లింగు స్వామి. రీసెంట్ గా అఖిల్ ని కలిసి లింగుస్వామి ఓ లైన్ చెప్పారని తెలుస్తోంది. ఆ స్టోరీ లైన్ చెప్పిన విధానానికి ఫిదా అయ్యాడ‌ని, ఈ కాంబోలో సినిమా వ‌చ్చే ఛాన్సుంద‌ని మీడియాలో వార్తలు మొదలయ్యాయి. ఈ వార్తలు విని అక్కినేని ఫ్యాన్స్ ఇప్పుడు తెగ టెన్ష‌న్ ప‌డుతున్నారు. లింగుస్వామితో తమిళ హీరోలే చేయడానికి ఇంట్రెస్టింగ్ చూపించ‌డం లేదు.ఒకప్పుడు 'రన్', 'పందెం కోడి', 'ఆవారా' సినిమాలతో దుమ్ము రేపిన లింగుసామి ఆయన దగ్గర స్టఫ్ అయ్యిందా అనే అనుమానం వచ్చేలా సినిమాలు తీస్తున్నారు. రీసెంట్ గా తెలుగు హీరో రామ్ పోతినేనితో 'ది వారియర్' చేశారు ఆయన. అది ఏజెంట్ తో పోటీ పడే స్దాయి డిజాస్టర్. ఆ తర్వాత చేయబోయే సినిమా అఖిల్ అక్కినేనితో అనే తమిళ సినిమావర్గాల టాక్. తమిళంలో మాధవన్, ఆర్య హీరోలుగా లింగుసామి దర్శకత్వం వహించిన తమిళ సినిమా 'వెట్టై' చిత్రాన్ని తెలుగులో అక్కినేని నాగ చైతన్య రీమేక్ చేశారు. కానీ వర్కవుట్ కాలేదు. ఇప్పుడు చైతూ తమ్ముడితో సినిమా చేయనున్నారని టాక్.
మరో ప్రక్క అనిల్ అనే డైరెక్ట‌ర్ తో యువి క్రియేష‌న్స్ బ్యాన‌ర్‌లో సినిమా చేయ‌నున్నారంటూ వార్తలు వచ్చిన సంగ‌తి తెలిసిందే. ఈ సినిమా ఫాంట‌సీ జాన‌ర్ లో తెర‌కెక్క‌నుంద‌ని తెలుస్తోంది.'సాహో' చిత్రానికి దర్శకత్వ శాఖలో పని చేసిన అనిల్ కుమార్ దర్శకుడిగా పరిచయం కానున్నారని సమాచారం. ఆయన అఖిల్ క్లోజ్ ఫ్రెండ్ అట.
అఖిల్, అనిల్ కుమార్ సినిమాకు 'ధీర' టైటిల్ ఫిక్స్ చేశారని తెలిసింది. అందులో కథానాయికగా జాన్వీ కపూర్ (Janhvi Kapoor) అఖిల్ సరసన నటించనున్నారట. అయితే యువి బ్యానర్ ఇప్పుడు చిరంజీవి తో సినిమా బిజీలో ఉంది. దాంతో ఈ మూవీ ఎప్పుడు స్టార్ట్ అవుతుంద‌నేది మాత్రం క‌న్ఫర్మ్ కాలేదు. ప్ర‌స్తుతం అఖిల్ ముందు ఓ కొత్త సినిమా ప్రారంభించాలనే ఉత్సాహంతో ఉన్నట్లు తెలుస్తోంది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి