బిగ్ బాస్ తెలుగు 7 ముగిసింది. టైటిల్ విన్నర్ గా పల్లవి ప్రశాంత్ నిలిచాడు. ఒక సామాన్యుడు టైటిల్ గెలవడం ఇదే మొదటిసారి. పల్లవి ప్రశాంత్ గురించి ఆసక్తికర విషయాలు చూద్దాం...
కృషి ఉంటే మనుషులు ఋషులు అవుతారు అన్నట్లు. బిగ్ బాస్ షోకి వెళితే చాలు అనుకున్న పల్లవి ప్రశాంత్ ఏకంగా టైటిల్ విన్నర్ అయ్యాడు. ఇది అద్భుతమైన విజయం. ఊహించని పరిణామం. తన ఆటతో పల్లవి ప్రశాంత్ అభిమానులను సొంతం చేసుకున్నాడు.
పల్లవి ప్రశాంత్ పై ఎలాంటి అంచనాలు లేవు. అతడు రెండు మూడు వారాలు హౌస్లో ఉంటమే ఎక్కువ అనుకున్నారు. అయితే పల్లవి ప్రశాంత్ తన గ్రాఫ్ పెంచుకుంటూ వచ్చాడు. పల్లవి ప్రశాంత్ టాస్క్ లలో విజృభించేవాడు. అతడితో పోటీ పడాలంటే ప్రత్యర్ధులు భయపడేవారు. ప్రశాంత్ పవర్ అస్త్ర గెలిచాడు, బిగ్ బాస్ హౌస్ మొదటి కెప్టెన్ అయ్యాడు. అవిక్షన్ పాస్ కూడా గెలిచాడు.
ఎన్ని విజయాలు సాధించినా పల్లవి ప్రశాంత్ అణగిమణిగి ఉండేవాడు. నామినేషన్స్ తో తప్పితే తోటి కంటెస్టెంట్స్ పట్ల అగ్రెసివ్ గా ప్రవర్తించేవాడు కాదు. అందరికీ చాలా గౌరవం ఇచ్చేవాడు. సింపథీ గేమ్ ఆడుతున్నాడని విమర్శలు చేసినా భరించాడు. చివరికి తాను అనుకున్నది సాధించాడు.
పల్లవి ప్రశాంత్ సక్సెస్ జర్నీ చూస్తే ఆశ్చర్యం వేయకమానదు. ఎక్కడో మారుమూల పల్లెటూరులో పుట్టిన పల్లవి ప్రశాంత్ టైటిల్ కొట్టి చూపించాడు. కాగా పల్లవి ప్రశాంత్ గురించి కొని ఆసక్తికర విషయాలు తెలుసుకుందాం. ప్రశాంత్ పేరు చాలా మందికి ఆశ్చర్యం కలిగిస్తుంది. పల్లవి ప్రశాంత్ ఏమిటీ? అమ్మాయి పేరు ఎందుకు పెట్టుకున్నాడు? అని సందేహాలు వస్తాయి.
పల్లవి ప్రశాంత్ అసలు పేరు పల్లవి రాజు. వాళ్ళ ప్రాంతంలో పల్లవి రాజు అనే దేవుడి గుడి ఉంది. అబ్బాయి పుట్టాలని అక్కడ పేరెంట్స్ మొక్కుకున్నారట. కోరుకున్నట్లు అబ్బాయి పుట్టడంతో పల్లవి రాజు అని పేరు పెట్టుకున్నారు. ఆ పేరును పల్లవి ప్రశాంత్ గా రైతుబిడ్డ మార్చుకున్నాడు.
చాలా మంది సోషల్ మీడియా సెలెబ్స్ ని చూసి స్ఫూర్తి పొందిన పల్లవి ప్రశాంత్ తాను కూడా ఫేమస్ కావాలి అనుకున్నాడు. తండ్రి వద్ద డబ్బులు తీసుకుని స్మార్ట్ ఫోన్ కొన్నాడు. అందులో రైతుబిడ్డ ట్యాగ్ తో వీడియో చేయడం స్టార్ట్ చేశాడు. రైతుల జీవన విధానం, కష్టనష్టాలు, వ్యవసాయానికి సంబంధించిన వీడియోలు పోస్ట్ చేసేవాడు.
మెల్లగా పల్లవి ప్రశాంత్ వీడియోలకు ఆదరణ పెరిగింది. అతన్ని వేలల్లో, ఆపై లక్షల్లో ఫాలో అవడం మొదలైంది. అదే సమయంలో బిగ్ బాస్ షోలో పాల్గొనాలని ప్రయత్నాలు మొదలుపెట్టాడు. తాను బిగ్ బాస్ హౌస్ కి వెళ్ళాలి అనుకుంటున్నాను, ఈ వీడియో హోస్ట్ నాగార్జున వరకు చేరాలని ఒక పోస్ట్ పెట్టాడు. అది వైరల్ అయ్యింది.
ఎట్టకేలకు పల్లవి ప్రశాంత్ కోరిక నెరవేరింది. బిగ్ బాస్ సీజన్ 7లో అతడికి అవకాశం వచ్చింది. తనని తాను నిరూపించుకున్న పల్లవి ప్రశాంత్ అన్ని అవరోధాలను ఎదుర్కొని బిగ్ బాస్ టైటిల్ విన్నర్ అయ్యాడు. అమర్-ప్రశాంత్ టైటిల్ రేసులో నిలవగా పల్లవి ప్రశాంత్ టైటిల్ గెలిచినట్లు నాగార్జున ప్రకటించారు.