పవన్, చిరంజీవితో జీవితా రాజశేఖర్ విభేదాలు.. జస్ట్ ఆస్కింగ్ అంటూ బండ్ల గణేష్ వరుస ట్వీట్స్

ఈసారి ఎలాంటి విభేదాలు లేకుండా మా ఎన్నికలు నిర్వహించాలని టాలీవుడ్ ప్రముఖులు ప్రతి ఏడాది భావిస్తుంటారు. కానీ ఎన్నికలు వచ్చే సమయానికి చిత్ర పరిశ్రమలో ఉన్న విభేదాలన్నీ ఒక్కసారిగా తెరపైకి వచ్చేస్తున్నాయి. 

మొన్నటివరకు ప్రకాష్ రాజ్ కు సపోర్ట్ చేసిన బండ్ల గణేష్.. తాజాగా ఆయన ప్యానల్ నుంచి బయటకు వచ్చేశారు. జీవితా రాజశేఖర్ ని ప్రకాష్ రాజ్ తన ప్యానల్ లోకి తీసుకోవడంతో బండ్ల గణేష్ ఈ నిర్ణయం తీసుకున్నారు. తన ప్యానల్ తరుపున జీవితా రాజశేఖర్ జనరల్ సెక్రెటరీగా పోటీ చేస్తున్నట్లు ప్రకాష్ రాజ్ ప్రకటించారు. 

దీనితో బండ్ల గణేష్ తాను సొంతంగా జనరల్ సెక్రటరీ పదవికి పోటీ చేస్తున్నట్లు ప్రకటించి కొత్త చర్చకు దారి తీశారు. అంతటితో ఆగని బండ్ల గణేష్.. జీవితా రాజశేఖర్ పై వరుస ట్వీట్స్ వేస్తున్నాడు. 

జీవితా రాజశేఖర్ ప్రకాష్ రాజ్ ప్యానల్ లోకి రావడం బండ్ల గణేష్ కు అసలు ఇష్టం లేదు. బండ్ల గణేష్ మెగా ఫ్యామిలీకి విధేయుడు. గతంలో జీవితా రాజశేఖర్.. చిరంజీవి, పవన్ కళ్యాణ్ పై చేసిన విమర్శల వీడియోల్ని గణేష్ ట్వీట్ చేస్తూ కొత్త చర్చకు దారి తీశాడు. 

గతంలో చిరంజీవి, మోహన్ బాబు, కృష్ణం రాజు లాంటి సినీ పెద్దల సమక్షంలో సమావేశం జరిగింది. ఆ సమావేశంలో రాజశేఖర్ చిరంజీవికి వ్యతిరేకంగా కామెంట్స్ చేసిన సంగతి తెలిసిందే. ఆ వీడియోను బండ్ల గణేష్ ట్వీట్ చేస్తూ.. చిరంజీవిపై రాజశేఖర్ ఫైర్.. జస్ట్ ఆస్కింగ్ అని కామెంట్ చేశాడు. 

మరో ఇక జీవిత చిరంజీవిని ఉద్దేశిస్తూ మాట్లాడిన వీడియో కూడా పోస్ట్ చేశాడు. అలాగే గత సార్వత్రిక ఎన్నికల సమయంలో జీవిత, రాజశేఖర్ వైసిపి తరుపున ప్రచారం చేసిన సంగతి తెలిసిందే. 

అప్పట్లో మీడియా సమావేశంలో జీవిత, రాజశేఖర్ మాట్లాడుతూ పవన్ కళ్యాణ్ బాహుబలి కంటే పెద్ద ప్యాకేజీకి అమ్ముడు పోయాడని సంచలన వ్యాఖ్యలు చేశారు. ఆ వీడియోను కూడా బండ్ల గణేష్ ట్వీట్ చేసి.. తన దేవుడు ఏదో ఒక రోజు సీఎం అవుతాడని తెలిపాడు. 

మా ఎన్నికల నేపథ్యంలో బండ్ల గణేష్, జీవిత మధ్య విభేదాలు ఎక్కువయ్యేలా ఉన్నాయి. కానీ బండ్ల గణేష్ మాత్రం తనకు ఎవరితోనూ విభేదాలు లేవని అంటున్నాడు.