Car Purchase: కారు కొనేటప్పుడు ఇలా చేస్తే మీరు చాలా డబ్బు ఆదా చేస్తారు

Car Purchase: మీరు కారు కొంటున్నారా? దాని ధర రూ.10 లక్షలకు పైగా ఉంటే మీరు 1 % టీసీఎస్ కట్టాల్సి ఉంటుంది. అయితే దీన్ని మీరు తిరిగి పొందొచ్చు. అదెలాగో ఇక్కడ తెలుసుకోండి. 

ఈ సంవత్సరం మీరు కారు కొనాలని ప్లాన్ చేస్తున్నారా? ముఖ్యంగా కారు ధర రూ.10-14 లక్షల మధ్య ఉంటే మీరు కట్టాల్సిన వివిధ ఛార్జీలు, పన్నుల గురించి మీకు తెలిసి ఉండాలి. అలాంటి పన్నులలో ఒకటి TCS. ఈ ట్యాక్స్ ని మీరు కారు కొనే షోరూమ్ యాజమాన్యం వసూలు చేస్తుంది. గుడ్ న్యూస్ ఏమిటంటే ఈ మొత్తాన్ని మీరు తిరిగి పొందొచ్చు. 

అయితే టీసీఎస్ రీఫండ్‌ కావాలంటే కొన్ని షరతులు వర్తిస్తాయి. వాటిని అర్థం చేసుకుంటే ఈ 1 % టీసీఎస్ ట్యాక్స్ ని మీరు ఆదాయపు పన్ను రిటర్న్ (ITR) దాఖలు చేసేటప్పుడు తిరిగి పొందొచ్చు. 

టీసీఎస్ అంటే ఏమిటి? 
ఒక నిర్దిష్ట ధర కంటే ఎక్కువ పెట్టి వాహనం కొనుగోలు చేసినప్పుడు కార్ డీలర్లు కస్టమర్ల నుండి వసూలు చేసే పన్నునే టీసీఎస్ అంటారు. కారు ఎక్స్ షోరూమ్ ధర రూ.10 లక్షల కంటే తక్కువ ఉంటే టీసీఎస్ వర్తించదు. 

అయితే రూ.10 లక్షలకు పైగా ధర ఉన్న కార్లకు, డీలర్లు ఎక్స్ షోరూమ్ ధరలో 1 % టీసీఎస్‌గా తీసివేసి మీ పాన్ నంబర్ కింద ప్రభుత్వానికి జమ చేస్తారు. ఈ పన్ను ఉద్దేశం ఏంటంటే.. అధిక విలువైన లావాదేవీలను ట్రాక్ చేయడం, పన్ను ఎగవేతను తగ్గించడం, సకాలంలో పన్ను వసూలును నిర్ధారించడం. టీసీఎస్ రేటు సాధారణంగా 1% గానే ఉంటుంది. కానీ కొన్ని సందర్భాల్లో అది 5%కి కూడా  పెరుగుతుంది. 

టీసీఎస్ 5% వసూలు ఎప్పుడంటే..
మీ వద్ద పాన్ కార్డ్ లేకపోయినా, గత రెండు సంవత్సరాలుగా ఐటీఆర్ దాఖలు చేయకపోయినా, లాస్ట్ ఫైనాన్షియల్ ఇయర్ లో మీ మొత్తం లావాదేవీలు రూ.50 లక్షలు దాటితే 1%కి బదులుగా 5% టీసీఎస్ వసూలు చేస్తారు. 

ఉదాహరణకు మీరు రూ.15 లక్షల కారు కొనుగోలు చేస్తే 1% టీసీఎస్ రూ.15,000 అవుతుంది. కానీ పాన్ లేకుండా 5% టీసీఎస్ అంటే రూ.75,000 అవుతుంది. అదేవిధంగా రూ.50 లక్షల లగ్జరీ కారుకు 1% టీసీఎస్ రూ.50,000 అవుతుంది.

మీ పన్ను బాధ్యత(Tax liability) టీసీఎస్ మొత్తం కంటే తక్కువగా ఉంటే టీసీఎస్ డబ్బును తిరిగి పొందవచ్చు. ఉదాహరణకు మీ పన్ను బాధ్యత రూ.10,000 అని, టీసీఎస్ వసూలు రూ.15,000 అని అనుకుందాం. అప్పుడు మీకు రూ.5,000 తిరిగి వస్తుంది. మీ మొత్తం పన్ను బాధ్యత సున్నా అయితే రూ.15,000 మొత్తం డబ్బు తిరిగి వస్తుంది. అయితే మీ పన్ను బాధ్యత టీసీఎస్ మొత్తం కంటే ఎక్కువగా ఉంటే వసూలు చేసిన పన్ను మీ చెల్లించాల్సిన పన్నుకు ఎటువంటి వాపసు ఉండదు.

ఏ డాక్యుమెంట్స్ కావాలి?
టీసీఎస్ డబ్బును తిరిగి పొందడానికి మీకు మూడు ముఖ్యమైన డాక్యుమెంట్లు అవసరం. కారు కొనుగోలు ఇన్వాయిస్, డీలర్ నుండి టీసీఎస్ సర్టిఫికెట్ (ఫారం 27D), మీ పాన్ కార్డ్. మీ ఐటీఆర్ దాఖలు చేసేటప్పుడు 'Tax paid' విభాగంలో టీసీఎస్ వివరాలను నమోదు చేసి, టీసీఎస్ వరుస కింద మొత్తాన్ని పొందండి. ఆదాయపు పన్ను రిటర్న్‌ను సమర్పించండి. అర్హత ఉంటే కొన్ని వారాల్లో రీఫండ్ మీ బ్యాంక్ ఖాతాలో జమ అవుతుంది.