SGB: ఆరోజు రూ. 1 లక్ష పెట్టుబ‌డి పెడితే.. ఈరోజు రూ. 5 ల‌క్ష‌లు అయ్యేవి..

SGB: బంగారంలో పెట్టుబడి పెట్టిన వారికి సావరిన్ గోల్డ్ బాండ్స్ (SGBs) మరోసారి భారీ లాభాలను అందించాయి. 2019లో కొనుగోలు చేసిన ఒక SGB సిరీస్ ప్రస్తుతం 378 శాతం రాబడిని ఇచ్చి పెట్టుబడిదారులను ఆశ్చర్యపరుస్తోంది. 

SGB 2019-20 సిరీస్-Iకు ముందస్తు రిడెంప్షన్ అవకాశం

రిజర్వ్ బ్యాంక్ ఆఫ్ ఇండియా (RBI) విడుదల చేసిన ప్రకటన ప్రకారం, 2019-20 సిరీస్-I సావరిన్ గోల్డ్ బాండ్లను జూన్ 11, 2026 నుంచి ముందుగానే రిడీమ్ చేసుకునే అవకాశం కల్పించింది. సాధారణంగా SGBల గడువు 8 సంవత్సరాలు ఉంటుంది. అయితే బాండ్లు జారీ చేసిన తేదీ నుంచి 5 సంవత్సరాలు పూర్తైన తర్వాత, వడ్డీ చెల్లించే తేదీల్లో ముందస్తుగా నగదుగా మార్చుకునే అవకాశం ఉంటుంది. ఈ నిబంధన ప్రకారం 2019లో జారీ చేసిన ఈ సిరీస్ ఇప్పుడు ముందస్తు రిడెంప్షన్‌కు అర్హత సాధించింది.

రిడెంప్షన్ ధరను ఎలా నిర్ణయిస్తారు?

SGB రిడెంప్షన్ ధరను నిర్ణయించడానికి RBI ఒక ప్రత్యేక విధానాన్ని అనుసరిస్తుంది. 999 స్వచ్ఛత కలిగిన బంగారం ధరను ఇండియా బులియన్ అండ్ జువెలర్స్ అసోసియేషన్ (IBJA) ప్రతి రోజు ప్రకటిస్తుంది. రిడెంప్షన్ తేదీకి ముందు ఉన్న మూడు పని దినాల్లో బంగారం ముగింపు ధరల (Closing Price) సగటును తీసుకుని SGB రిడెంప్షన్ ధరను నిర్ణయిస్తారు. ఈ సిరీస్ విషయంలో జూన్ 8, 9, 10 తేదీల బంగారం ధరల సగటు ఆధారంగా ధరను ఖరారు చేశారు.

ఒక్క గ్రాము బాండ్‌పై 378% లాభం ఎలా వచ్చింది?

RBI ప్రకారం, జూన్ 11, 2026న రిడీమ్ చేసుకునే SGB 2019-20 సిరీస్-I ధరను గ్రాముకు రూ.15,038గా నిర్ణయించారు. ఈ బాండ్లు 2019లో ఆన్‌లైన్ ద్వారా కొనుగోలు చేసిన వారికి గ్రాముకు రూ.3,146 ధరకు జారీ అయ్యాయి. లాభం లెక్కిస్తే.. ప్రారంభ ధర: రూ.3,146, రిడెంప్షన్ ధర: రూ.15,038 కాగా ఒక్క గ్రాముపై లాభం: రూ.11,892గా ఉంది. దీనిపై రూ.11,892 ÷ రూ.3,146 × 100 = 377.99% రాబ‌డి వ‌చ్చింది. అంటే దాదాపు 378% రాబడి లభించినట్లే. ఆఫ్‌లైన్‌లో కొనుగోలు చేసిన వారికి గ్రాము ధర రూ.3,196 కాగా, ఆన్‌లైన్ కొనుగోలు చేసిన వారికి రూ.50 డిస్కౌంట్ ఇచ్చారు.

రూ.1 లక్ష పెట్టుబడి ఎంత అయింది?

2019లో ఎవరైనా ఈ SGB సిరీస్‌లో రూ.1 లక్ష పెట్టుబడి పెట్టి ఉంటే, వారికి ఇప్పుడు భారీ లాభం వ‌చ్చి ఉండేది. పెట్టుబడి మొత్తం రూ.1,00,000 కాగా రాబడి 377.99%తో మూలధన లాభం సుమారు రూ.3,77,990గా వ‌చ్చింది. అంటే మొత్తం విలువ రూ.1,00,000 + రూ.3,77,990 = రూ.4,77,990గా మారింది. ఇది కేవలం బంగారం ధర పెరగడం వల్ల వచ్చిన మూలధన లాభం మాత్రమే. దీనికి అదనంగా పెట్టుబడిదారులు పొందిన వడ్డీని కలపలేదు.

సావరిన్ గోల్డ్ బాండ్ అంటే ఏమిటి? వడ్డీ ఎంత వస్తుంది?

సావరిన్ గోల్డ్ బాండ్లు (SGBs) అనేవి కేంద్ర ప్రభుత్వం తరఫున RBI జారీ చేసే బంగారం ఆధారిత పెట్టుబడి పథకాలు. ఇవి భౌతిక బంగారం కొనుగోలు చేయడానికి ప్రత్యామ్నాయంగా ఉంటాయి. పెట్టుబడిదారులు నగదు రూపంలో పెట్టుబడి పెడతారు. గడువు పూర్తయ్యాక లేదా ముందస్తు రిడెంప్షన్ సమయంలో నగదు రూపంలోనే డబ్బు తిరిగి పొందుతారు. SGBల ప్రత్యేకత ఏమిటంటే, బంగారం ధర పెరిగితే లాభం రావడమే కాకుండా ఏటా 2.5 శాతం స్థిర వడ్డీ కూడా లభిస్తుంది. ఈ వడ్డీని ప్రతి ఆరు నెలలకు ఒకసారి పెట్టుబడిదారుల బ్యాంక్ ఖాతాలో జమ చేస్తారు. చివరి వడ్డీ చెల్లింపు బాండ్ మెచ్యూరిటీ సమయంలో అసలు పెట్టుబడితో పాటు అందుతుంది.