Mukesh Ambani: చిన్న కొడుకు కోసం దుబాయిలో రూ. 640 కోట్ల ఖర్చుతో విల్లా కొనుగోలు చేసిన అంబానీ, ప్రత్యేకతలు ఇవే

రిలయన్స్ అధినేత బిలియనీర్ ముకేష్ అంబానీ, ఏ పని చేసినా వార్తల్లో నిలుస్తున్నారు. తాజాగా ఆయన తన చిన్న కుమారుడు అనంత్ కోసం దుబాయిలో ఓ ఖరీదైన విల్లాను కొనుగోలు చేశాడు. దాని విశేషాలు ఏంటో తెలుసుకుందాం.  

ముకేశ్ అంబానీ సంపద, ఆయన లైఫ్ స్టైల్ అంటే ఎఫ్పుడు వార్తల్లో నిలుస్తుంది. తాజాగా ముకేష్ అంబానీ దుబాయ్‌లో అత్యంత ఖరీదైన ఇంటిని కొనుగోలు చేశారు అది ఆయన చిన్న కొడుకు అనంత్ కోసం కొనుగోలు చేసిన ఇల్లుగా ఇది భావిస్తున్నారు. 

రూ. 640 కోట్ల ఈ అపార్ట్ మెంటులో 10 బెడ్‌రూమ్‌లు, రెండు స్విమ్మింగ్ పూల్స్ ఉన్నాయి. బాలివుడ్ స్టార్ షారుఖ్ ఖాన్, సాకర్ దిగ్గజం డేవిడ్ బెక్‌హాం ​​ఇరుగు పొరుగుగా నివసించనున్నారు. 

రిలయన్స్ ఇండస్ట్రీస్ అధినేత ముఖేష్ అంబానీ దుబాయ్‌లోని అత్యంత ఖరీదైన రెసిడెన్షియల్ ప్రాపర్టీని కొనుగోలు చేశారు. వార్తల ప్రకారం, ఈ డీల్ 80 మిలియన్ డాలర్లకు అంటే భారతీయ కరెన్సీలో దాదాపు 640 కోట్ల రూపాయలకు జరిగింది. ఈ ఏడాది ప్రారంభంలో జరిగిన ఈ ఒప్పందాన్ని ముఖేష్ అంబానీ పూర్తిగా రహస్యంగా ఉంచారు. అయితే ఈ కొనుగోలుకు సంబంధించిన సమాచారం మీడియాలో పబ్లిక్‌గా మారడమే కాకుండా, కొనుగోలు చేసిన విల్లాల చిత్రాలు, వీడియోలు కూడా అందరి ముందుకు వచ్చాయి.

మీడియా నివేదికల ప్రకారం, ముఖేష్ అంబానీ తన చిన్న కుమారుడు అనంత్ అంబానీ కోసం ఈ విలాసవంతమైన విల్లాను కొనుగోలు చేశారు. ముఖేష్ అంబానీ ఈ విల్లాలో కొన్ని మార్పులు చేర్పులు చేయడంతో, విల్లా భద్రత కోసం ఎక్కువ ఖర్చులు జరుగుతున్నాయని అంటున్నారు.

ముఖేష్ అంబానీ కొనుగోలు చేసిన ఈ ఆస్తికి సమీపంలో ప్రముఖ బ్రిటిష్ ఫుట్‌బాల్ క్రీడాకారుడు డేవిడ్ బెక్‌హామ్ మరియు సినీ నటుడు షారుక్ ఖాన్ విల్లాలు ఉన్నాయి. ఈ బీచ్ సైడ్ విల్లా అరచేతి ఆకారంలో (కృత్రిమ ద్వీపం) ఉత్తర భాగంలో ఉంది. ఈ విల్లాలో 10 బెడ్‌రూమ్‌లు, ఒక ప్రైవేట్ స్పా, ఇండోర్, అవుట్‌డోర్ పూల్స్ ఉన్నాయి.

ఇటీవలి కాలంలో, ఇళ్లు కొనడానికి ఇష్టపడే అత్యంత సంపన్నులకు దుబాయ్ ఇష్టమైన గమ్యస్థానంగా మారింది. దీని వెనుక ఉన్న అతిపెద్ద కారణం దుబాయ్ ప్రభుత్వం "గోల్డెన్ వీసా"ని  ప్రవేశపెట్టడం, విదేశీయులకు ఇంటి యాజమాన్యంపై నిబంధనలను సడలించడం. బ్లూమ్‌బెర్గ్ బిలియనీర్స్ ఇండెక్స్ ప్రకారం, అంబానీ 93.3 బిలియన్ల సంపదకు ముగ్గురు వారసులలో అనంత్ ఒకరు. 65 ఏళ్ల ముఖేష్ అంబానీ ప్రపంచంలోని అత్యంత సంపన్నుల జాబితాలో 11వ స్థానంలో నిలిచారు. ముఖేష్ అంబానీ తన వ్యాపార పగ్గాలను నెమ్మదిగా తన వారసులకు అప్పగిస్తున్నాడు.

గత ఏడాది ప్రారంభంలో, బ్రిటన్‌లోని జార్జియన్ కాలం నాటి భవనాన్ని రిలయన్స్ 79 మిలియన్లకు కొనుగోలు చేసింది. ఈ భవనాన్ని ముఖేష్ అంబానీ తన పెద్ద కుమారుడు ఆకాష్ అంబానీ కోసం కొనుగోలు చేశారు.