ఈ బిజినెస్ చేస్తే రోజుకు రూ.3 వేలు లాభం

సెల్ఫ్‌ ఎంప్లాయిమెంట్ మీ లక్ష్యమైతే మీ కోసం ఓ చక్కటి బిజినెస్‌ ఐడియా ఇక్కడ ఉంది. ఉద్యోగం చేయాల్సిన అవసరం లేదు. తక్కువ పెట్టుబడితో ఈ బిజినెస్‌ స్టార్ట్‌ చేయవచ్చు. ఈ వ్యాపారం సరిగ్గా చేస్తే మీరు రోజుకు రూ.3 వేల వరకు లాభం పొందవచ్చు. ఈ బిజినెస్‌ గురించి పూర్తి వివరాలు తెలుసుకోండి.    

పిల్లల నుంచి పెద్దల వరకు అందరూ ఇష్టపడేవి ఐస్‌క్రీమ్స్‌. కాస్త ఎండగా ఉంటే వెంటనే ఐస్‌ క్రీమ్‌ తినాలనిపిస్తుంది కదా. పిల్లలైతే ఎక్కడికి వెళ్లినా ముందు వారు కొనమనేవి ఐస్‌క్రీములే. ఇప్పుడు ప్రతి ఫంక్షన్‌లోనూ ఐస్‌క్రీమ్‌లు లేకుండా భోజనం పెట్టడం లేదు. సీజన్‌తో సంబంధం లేకుండా ఎల్లప్పుడూ వీటికి మంచి డిమాండ్‌ ఉంటుంది. ఇంత డిమాండ్‌ ఉన్న ఐస్‌క్రీమ్‌ కోన్లు, కప్పుల తయారీ బిజినెస్‌ మీరు పెడితే మంచి లాభాలు పొందవచ్చు. 

ఐస్ క్రీమ్ కోన్ తయారీ బిజినెస్ ప్రారంభించేందుకు కొంత ప్లానింగ్‌, కమిట్‌మెంట్‌ కచ్చితంగా ఉండాలి. దీనిలో ప్రధానంగా రా మెటీరియల్స్‌, మెషీన్స్‌, మార్కెటింగ్, లైసెన్సులు వంటి అంశాలపై అవగాహన కలిగి ఉండాలి. ముందుగా మీరున్న ప్రాంతంలో ఈ బిజినెస్‌ చేస్తున్న వారు ఎవరు? ఎలా నిర్వహిస్తున్నారు? లాభాల్లో నడుస్తోందా? తదితర విషయాలు తెలుసుకోవాలి. కస్టమర్ అవసరాలు తెలుసుకోవాలి. మార్కెట్ ధరలపై సర్వే చేయాలి. 

* ముడి సరుకులు, ఖర్చులు ఇలా..
ఐస్‌క్రీమ్‌ కోన్లు, కప్పుల తయారీకి ముఖ్యంగా కావాల్సినవి మైదా, పంచదార, నెయ్యి, పాల ఉత్పత్తులు, ఫ్లేవర్ ఎసెన్సులు. వీటిని మార్కెట్‌లో బల్క్‌గా కొనుగోలు చేసుకోవాలి. దీని వల్ల పెట్టుబడి వ్యయం తగ్గుతుంది. కోన్లు, కప్పులు తయారు చేసిన తర్వాత ప్యాకేజింగ్ ఖర్చు సుమారు రూ.5 నుంచి రూ.15 వరకు ఉంటుంది. ఇవి కాకుండా కరెంట్‌, నీరు, కార్మికుల జీతాలు మొదలైన ఖర్చులుంటాయి. 

* యంత్రాలు, పరికరాలు..
ఐస్ క్రీమ్ కోన్ తయారీకి కోన్ మేకింగ్ యంత్రాలు కొనుగోలు చేయాలి. మీరు కొనుగోలు చేసే యంత్రం సెకన్లలో చాలా కోన్లు తయారు చేయగలిగే సామర్థ్యం కలిగి ఉండాలి. శీతలీకరణ పరికరాలు, ప్యాకేజింగ్ మెషీన్స్ కూడా అవసరం ఉంటుంది. ఐస్ క్రీమ్ కోన్ మేకింగ్, కప్పుల తయారీకి చిన్నస్థాయి యంత్రాలైతే రూ.2 లక్షల నుంచి లభిస్తాయి. ఎక్కువ సామర్థ్యం కలిగిన యంత్రాలైతే రూ.10 లక్షల వరకు ఉంటాయి.

ఉత్పత్తిని నిల్వ చేయడానికి స్టోరేజ్ యూనిట్లు ఏర్పాటు చేయాలి. వాటి కోసం సుమారు రూ.50 వేల నుంచి రూ.2 లక్షల వరకు ఖర్చవుతుంది. స్మాల్‌ స్కేల్‌ ఇండస్ట్రీస్‌ పెట్టడానికి బ్యాంకులు లోన్లు ఇస్తాయి. మైక్రో ఫైనాన్స్ సంస్థల ద్వారా పెట్టుబడి సేకరించవచ్చు.

* లైసెన్సులు, రిజిస్ట్రేషన్లు..
ఐస్‌క్రీమ్‌ కోన్‌, కప్పుల తయారీ యూనిట్‌ పెట్టాలనుకుంటే తప్పకుండా FSSAI లైసెన్స్(Food Safety and Standards Authority of India) పొందాలి. వీటితో పాటు పంచాయతీ అయితే పంచాయతీ పర్మీషన్‌, టౌన్‌ అయితే మున్సిపాలిటీ అనుమతులు తీసుకోవాలి. 

* మార్కెటింగ్, విక్రయాలు..
స్థానిక మార్కెట్లలో రిటైల్ స్టోర్లలో కాంట్రాక్టులు తీసుకోవాలి. సోషల్ మీడియా, వెబ్‌సైట్ ద్వారా ఆన్‌లైన్  మీ ప్రోడక్ట్‌ను ప్రకారం చేయవచ్చు. మంచి ప్యాకేజింగ్, లేబెలింగ్ ఉత్పత్తికి మార్కెట్లో ప్రాముఖ్యత కలిగిస్తుంది.

ఐస్ క్రీమ్ కోన్, కప్పుల తయారీ వ్యాపారంలో ఖర్చులు, లాభాలు అనేవి వ్యాపార పరిమాణం, ఉత్పత్తి సామర్థ్యం, మార్కెట్ పరిస్థితులపై ఆధారపడి ఉంటుంది. 

* ప్రొడక్షన్‌ ఇలా..
ఒక చిన్న కోన్‌ల తయారీ యంత్రం సెకనుకి సుమారు 10-30 కోన్ల వరకు తయారు చేస్తుంది.  ఉత్పత్తి వ్యయం ప్రతీ కోన్‌కు సుమారు రూ.50 పైసల నుంచి రూ.2 అవుతుంది. మార్కెట్‌లో ఒక్కో కోన్‌ను సుమారు రూ.2 నుంచి రూ.5 వరకు విక్రయించవచ్చు. కప్పుల తయారీలో ఒక్కో  కప్పుకు సుమారు రూ.75 పైసల నుంచి రూ.2 ఖర్చు అవుతుంది. వీటిని మార్కెట్‌లో సుమారు రూ.3 నుంచి రూ.6 విక్రయించవచ్చు. 

* లాభాలు..
మీరు ఒక కోన్‌ను రూ.2 కి తయారు చేస్తే మార్కెట్‌లో దానిని రూ.5 వరకు విక్రయించవచ్చు. అంటే ప్రతి కోన్ పై సుమారు రూ.3 లాభం ఉంటుంది. ఒక కప్పును రూ.2 లో తయారు చేస్తే దానిని రూ.6 వరకు విక్రయించవచ్చు. అంటే ప్రతి కప్పుపై సుమారు రూ.4 లాభం వస్తుంది. 

ఇలా రోజుకు 1000 కోన్లు లేదా కప్పులు అమ్మినట్లయితే కోన్ల నుండి లాభం సుమారు రూ.3,000 వరకు సంపాదించవచ్చు. కప్పుల నుండి లాభం సుమారు రూ.4,000 మీ జేబులో వేసుకోవచ్చు. ఈ లెక్కన నెలకు రూ.90 వేల నుంచి రూ.1.20 లక్షలు వరకు సంపాదించవచ్చు.