మీకు తెలుసా? ఆర్టిఫీషియల్ ఇంటెలిజెన్స్ (AI) 2025లో మీ ప్రపంచాన్ని మార్చేయగలదు. AI సహాయంతో మీ పనులన్నీ చిటికెలో పూర్తి చేసే అనేక ఆవిష్కరణలు జరగబోతున్నాయి. AI మన జీవితాల్లో తీసుకొచ్చే మార్పులేంటో తెలుసుకుందాం రండి.
ఆర్టిఫీషియల్ ఇంటెలిజెన్స్ ప్రపంచాన్ని ఒక్కసారిగా వేగంగా పరిగెత్తేలా చేస్తోంది. ఊహకందని విషయాలను సింపుల్ గా వివరిస్తోంది. టెక్నాలజీని స్మార్ట్ ఫోన్ గా మార్చి చేతి వేళ్ల మీదకు తీసుకొచ్చేసింది. ఒక్క స్మార్ట్ ఫోన్ తో ప్రపంచం మొత్తాన్ని చూసేలా చేస్తోంది. విశ్వంలోని రహస్యాలను సైతం కనిపెట్టేందుకు ప్రయత్నిస్తోంది. ఇవన్నీ AIకి ఒకవైపు మాత్రమే కనిపించే మంచి విషయాలు. AI వల్ల సమస్యలు కూడా అదే రేంజ్ లో పెరుగుతున్నాయి. మరి 2025లో AI మన జీవితాల్లో తెచ్చే మార్పుల గురించి వివరంగా తెలుసుకుందాం.
1. సెల్ఫ్ డ్రైవింగ్ కార్లు పెరుగుతాయి
ఇప్పటికే సెల్ఫ్ డ్రైవింగ్ కార్లు విదేశీ మార్కెట్లోకి వచ్చేశాయి. 2025లో ఇవి మరింత స్మార్ట్ గా మారి మార్కెట్లో సెల్ఫ్ డ్రైవింగ్ కార్ల సంఖ్య పెరిగే అవకాశాలు కనిపిస్తున్నాయి. ఇవి ఎంత సౌకర్యవంతంగా ఉంటాయో అంతే సురక్షితంగా కూడా ఉంటాయి. అయితే మన దేశంలో ట్రాఫిక్, రద్దీ సమస్యలను అధిగమించాల్సిన అవసరం ఉంది.
2. స్మార్ట్ఫోన్లు మరింత స్మార్ట్‌గా..
ఈ సంవత్సరం మీ స్మార్ట్ఫోన్లు మరింత స్మార్ట్‌గా మారతాయి. ఎంతలా అంటే.. అవి మీతో ఒక స్నేహితుడిగా మాట్లాడతాయి. మీ ఇష్టాయిష్టాలను అర్థం చేసుకొని మీ మూడ్ కి తగ్గట్టుగా పనిచేస్తాయి. విశ్లేషణాత్మక డేటా ఆధారంగా ఈ స్మార్ట్ఫోన్లు మీరు ఏమి చేయాలో, ఏమి చేయకూడదో కూడా మీకే చెబుతాయి. సలహాలు ఇస్తాయి.
3. ఒక్క సైగతో పనులన్నీ..
ఇప్పటికే స్మార్ట్ టెక్నాలజీని ఉపయోగించుకొని ఇంటి పనులను సులభంగా చేసే అనేక గృహోపకరణాలు మార్కెట్లోకి వచ్చేశాయి. 2025 సంవత్సరంలో అలాంటి మరిన్ని పరికరాలు కూడా రావడానికి అవకాశాలున్నాయి. ఇల్లు కూడా AI ఉపయోగించి నిర్మించే రోజులు రాబోతున్నాయి. దీంతో ఒకే వాయిస్ లేదా సైగతో పనులన్నీ క్షణంలో అయిపోతాయి.
4. ఎడ్యుకేషన్ సిస్టమ్ లో భారీ మార్పులు
విద్యా రంగంలో AI వినియోగం పెరుగుతోంది. ఇప్పుడు ప్రత్యేకంగా AI కోర్సులు కూడా వచ్చేశాయి. భవిష్యత్తులో విద్యార్థులు కేవలం AI నేర్చుకుంటే సరిపోతుంది. 2025లో AI ఉపయోగించి విద్యా బోధన మారేందుకు అవకాశాలున్నాయి. కేంద్ర, రాష్ట్ర ప్రభుత్వాలు ఇప్పటికే ఆ దిశగా ఆలోచనలు చేస్తున్నాయి. ఉపాధ్యాయులకు AI పాఠాలు చెప్పే రోజులు రానున్నాయి.
5. వైద్య రంగంలో కీలక మార్పులు
కొత్త సంవత్సరంలో AI వ్యాధులను గుర్తించడం, నిర్ధారించడంలో మరింత మెరుగైన సేవలు అందించనుంది. చికిత్సలో కూడా కీలకంగా మారనుంది. AI ప్రమాదకరమైన, ప్రాణాంతక వ్యాధులకు చికిత్సను కనుగొనడంలో కూడా సహాయపడుతుంది. డాక్టర్ల కంటే యాక్యురేట్ గా చికిత్స చేయడంలో AI మెషీన్లు కీలకంగా మారనున్నాయి.
6. నైపుణ్యాలను పెంచుతుంది
AI సహాయంతో నైపుణ్యాలను మెరుగుపరచడంపై ప్రపంచ వ్యాప్తంగా ఆలోచనలు జరుగుతున్నాయి. 2025లో AI పుస్తకాలు రాయడం, సంగీతం కంపోజ్ చేయడం, డిజిటల్ గేమ్‌లు, అనేక ఇతర రంగాల్లో కీలకంగా మారనుంది. మనుషులు టాలెంట్ ను పెంచుకోవాల్సిన అవసరం లేకుండానే AI వారి ఆలోచనలను క్షణాల్లోనే కళ్లముందు ఆవిష్కరించనుంది.
7. ఉద్యోగాలు పెరగవచ్చు
AI వల్ల ఇప్పటికే ఎన్నో రంగాల్లో ఉద్యోగాలు పోతున్నాయి. అయితే AI ను ఉపయోగించే వారికి అవకాశాలు పెరుగుతాయి. ఆర్టిఫీషియల్ ఇంటెలిజెన్స్
డెవలపర్లు, డేటా శాస్త్రవేత్తలు, AI నిపుణులు వంటి కొత్త ఉద్యోగాలు 2025 సంవత్సరం మార్కెట్లో పెరిగేందుకు అవకాశాలు చాలా ఉన్నాయి. వీటికి ఇప్పటికే చాలా డిమాండ్ ఉంది.
8. AIతో ప్రమాదాలు కూడా..
AI వల్ల ఎంత అద్భుతమైన ప్రయోజనాలు ఉన్నాయో, నష్టాలు కూడా అదే రేంజ్ లో ఉన్నాయి. 2025లో AI వినియోగం పెరగడం వల్ల సాధారణ ఉద్యోగాలు లక్షల్లో పోవచ్చని నిపుణులు అంచనా వేస్తున్నారు. మోసాలు పెరిగే ఛాన్స్ కనిపిస్తోంది. మనుషుల వ్యక్తిగత విషయాలకు భద్రత తగ్గే అవకాశాలు కూడా ఉన్నాయి. వారి డేటాను ఉపయోగించి జరిగే మోసాలు పెరిగే అవకాశాలున్నాయి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి