కేంద్రం ప్రభుత్వం 8వ జీతం కమిషన్‌ను ఏర్పాటు చేయడం లేదా? జీతం కమిషన్ విధానానికి ప్రత్యామ్నాయంగా కొత్త విధానాన్ని తీసుకురావాలని ఆలోచిస్తోందా? సోషల్ మీడియాలో వైరల్ అయిన ఈ వార్తతో కేంద్ర ప్రభుత్వ ఉద్యోగులు, పింఛనుదారులు తీవ్ర ఆందోళన చెందుతున్నారు. ఈ వార్తల్లో నిజమెంతో తెలుసుకుందాం రండి.
కేంద్రం 8వ జీతం కమిషన్‌ను ఏర్పాటు చేయకపోవచ్చని కేంద్ర మంత్రుల మాటల ద్వారా తెలుస్తోంది. అసలు జీతం కమిషన్ విధానాన్నే రద్దు చేయవచ్చనే వార్త కూడా చక్కర్లు కొడుతోంది. దీంతో కోట్లాది మంది కేంద్ర ప్రభుత్వ ఉద్యోగులు, పింఛనుదారులు అసహనం వ్యక్తం చేస్తున్నారు. ఇదే జరిగితే దేశవ్యాప్తంగా ఉద్యోగులు ఆందోళనకు దిగుతారని ఆయా సంఘాలు ఇప్పటికే ప్రకటించాయి. అసలు కేంద్ర ప్రభుత్వం ఏం చెప్పిందో తెలుసుకుందాం.
అసలేం విషయం ఏంటంటే.. ప్రతి పదేళ్లకు జీతం కమిషన్ ఏర్పాటు జరుగుతుంది. ఒకసారి ఏర్పాటైన జీతం కమిషన్ పదేళ్లపాటు అమలవుతుంది. అలా ప్రస్తుతం 7వ జీతం కమిషన్ అమలులో ఉంది. ఈ 7వ కమిషన్ సిఫార్సులను కేంద్రం 2016 జనవరి నుంచి అమలు చేస్తోంది. 7వ జీతం కమిషన్ గడువు 2025 డిసెంబర్ 31న ముగుస్తుంది. అందుకే 8వ జీతం కమిషన్ ఏర్పాటుకు ఉద్యోగులు, సంఘాలు డిమాండ్ చేస్తున్నాయి.
అయితే ప్రస్తుతం అమలులో ఉన్న 7వ జీతం కమిషన్ గడువు నిర్ణయించలేదని ప్రభుత్వం చెబుతోంది. ఇదే కాకుండా కేంద్రం కొత్త విధానాన్ని పరిశీలిస్తోందనే వార్త కూడా హల్ చల్ చేస్తోంది. దీంతో ఉద్యోగుల్లో ఆందోళన నెలకొంది.
కొత్త జీతం కమిషన్‌కు బదులుగా ఉద్యోగులు, పింఛనుదారుల జీతాలు, పింఛన్లను సవరించేందుకు ప్రత్యామ్నాయ మార్గాలను ప్రభుత్వం అన్వేషిస్తోందని తెలుస్తోంది. ఇటీవల ఉద్యోగ సంఘాలతో జరిగిన సమావేశాల్లో ఈ విషయం చర్చకు వచ్చిందని సమాచారం.
8వ జీతం కమిషన్ ఏర్పాటుపై కేంద్ర ప్రభుత్వ వైఖరిని ఆర్థిక శాఖ సహాయ మంత్రి పంకజ్ చౌదరి పార్లమెంటులో వెల్లడించారు. ప్రస్తుతం 8వ జీతం కమిషన్ ఏర్పాటు ప్రతిపాదన ప్రభుత్వం వద్ద లేదని చెప్పారు. 7వ కమిషన్ గడువు విషయం గురించి కూడా ఇంకా ఆలోచించలేదని స్పష్టం చేశారు.
కొత్త జీతం కమిషన్ ఏర్పాటు ప్రతిపాదనను ప్రభుత్వం తోసిపుచ్చడంతో గత నెలలో అఖిల భారత రాష్ట్ర ప్రభుత్వ ఉద్యోగుల సమాఖ్య, తమ డిమాండ్ నెరవేరకపోతే కొత్త సంవత్సరంలో దేశవ్యాప్త ఆందోళన చేస్తామని ప్రకటించింది.
8వ జీతం కమిషన్ ఏర్పాటు ప్రతిపాదన పరిశీలనలో లేదని ఆర్థిక మంత్రిత్వ శాఖ గత నెలలో చెప్పిన కొన్ని రోజుల తర్వాత NC JCM కేంద్ర కేబినెట్ కార్యదర్శికి లేఖ రాసింది. వెంటనే కొత్త జీతం కమిషన్ ఏర్పాటు చేయాలని డిమాండ్ చేసింది.
డిసెంబర్ 3న రాసిన లేఖలో 7వ జీతం కమిషన్ సిఫార్సులు అమలై తొమ్మిదేళ్లు అవుతోందని, తదుపరి జీతం, పింఛను సవరణ 2026 జనవరి 1 నుంచి అమలు కావాలని పేర్కొంది. ఈ విషయంపై కేంద్రం ఎలా స్పందిస్తుందో చూసి తదుపరి కార్యాచరణకు ఉద్యోగ సంఘాలు దిగుతాయని సమాచారం. ఏది ఏదైనా పింఛనుదారుల్లో మాత్రం ఆందోళన నెలకొంది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి