రివ్యూ: లవర్
| First Published Jul 20, 2018, 12:23 PM IST'అలా ఎలా' వంటి హిట్ సినిమాను రూపొందించిన దర్శకుడు అనీష్ కృష్ణతో రాజ్ తరుణ్ 'లవర్' అనే సినిమాలో నటించాడు. ఈ సినిమా హీరోగా తనకు మంచి బ్రేక్ ఇస్తుందనే నమ్మకంతో ఉన్నాడు
నటీనటులు: రాజ్ తరుణ్, రిద్ధి కుమార్, అజయ్, రాజీవ్ కనకాల, సచిన్ ఖేడ్కర్ తదితరులు
కెమెరా: స‌మీర్ రెడ్డి
మ్యూజిక్‌: అంకిత్ తివారి, రిషి రిచ్‌, అర్కో, త‌నీశ్ బాగ్చి, సాయికార్తీక్‌
బ్యాగ్రౌండ్ స్కోర్‌: జె.బి
ఎడిటింగ్: ప్ర‌వీణ్ పూడి
నిర్మాత: హ‌ర్షిత్ రెడ్డి
ర‌చ‌న, ద‌ర్శ‌క‌త్వం: అనీశ్ కృష్ణ
'ఉయ్యాలా జంపాలా' చిత్రంతో కెరీర్ మొదలుపెట్టిన హీరో రాజ్ తరుణ్ కి వరుసగా విజయాలు దక్కాయి. కానీ గత రెండేళ్లుగా ఆయన ఎలాంటి సినిమా చేస్తున్నా.. హీరోగా తనకు సక్సెస్ మాత్రం రావడం లేదు. వరుస పరాజయాలతో డీలా పడ్డాడు. రీసెంట్ గా విడుదలైన 'రాజుగాడు' సినిమా కూడా బాక్సాఫీస్ వద్ద ఫెయిల్ కావడంతో రాజ్ తరుణ్ సినిమాల పట్ల ప్రేక్షకుల్లో ఆసక్తి సన్నగిల్లుతోంది. ఇటువంటి సమయంలో 'అలా ఎలా' వంటి హిట్ సినిమాను రూపొందించిన దర్శకుడు అనీష్ కృష్ణతో రాజ్ తరుణ్ 'లవర్' అనే సినిమాలో నటించాడు. ఈ సినిమా హీరోగా తనకు మంచి బ్రేక్ ఇస్తుందనే నమ్మకంతో ఉన్నాడు. శుక్రవారం ప్రేక్షకుల ముందుకు వచ్చిన ఈ సినిమా ఎలా ఉందొ సమీక్షలోకి వెళ్లి తెలుసుకుందాం!
Latest Videos
undefined
కథ:
రాజ్(రాజ్ తరుణ్) తన స్నేహితులతో కలిసి గ్యారేజీ నడుపుతుంటాడు. ట్రిప్ కోసం బ్యాంకాక్ వెళ్లాలనుకుంటాడు. అదే సమయంలో తను అన్నయ్య(రాజీవ్ కనకాల)గా భావించే వ్యక్తి సమస్యలో ఉన్నాడని అతడికి సహాయంలో చేసే సమయంలో రాజ్ చేతికి బుల్లెట్ తగులుతుంది. దీంతో అతడిని హాస్పిటల్ లో జాయిన్ చేస్తారు. అక్కడ చరిత(రిద్ధి కుమార్) అనే నర్స్ తో ప్రేమలో పడతాడు. మొదట్లో అతడి ప్రేమను కాదన్నా.. మెల్లగా చరిత కూడా రాజ్ ను ప్రేమించడం మొదలుపెడుతుంది. చరిత పని చేసే ప్రభుత్వ ఆసుపత్రిలో ఇల్లీగల్ గా ఏదో జరుగుతుందని తెలుసుకుంటుంది. అధికారులను అదే విషయంపై ప్రశ్నిస్తే ఆమె మాటలను వారు లెక్క చేయరు. మరోపక్క కోయింబత్తూర్ లో పెద్ద మనిషిగా పేరుగాంచిన వరదరాజులు(సచిన్ ఖేడ్కర్) అనే వ్యక్తికి లివర్ సమస్య వస్తుంది. అతడిది అరుదైన బ్లడ్ గ్రూప్ కావడంతో లివర్ డోనర్ ఎవరూ దొరకరు. చివరకు చరిత పని చేసే హాస్పిటల్ లోనే లక్ష్మి అనే బ్లడ్ గ్రూప్ వరదరాజులు సరిపోతుంది. దీంతో ఆమె బ్రెయిన్ పనిచేయకుండా చేసి ఆమె లివర్ ను వరదరాజులకు పెట్టాలని చూస్తారు. ఈ విషయం తెలుసుకున్న చరిత.. లక్ష్మిని ఎవరికీ తెలియకుండా తన సొంతూరు కేరళలో దాచేస్తుంది. మరి ఈ విషయం వరదరాజులు మనుషులకు తెలిస్తే.. ఎలా రియాక్ట్ అవుతారు..? లక్ష్మి కోసం చరిత ఇబ్బందుల్లో పడిందా..? తన లవర్ ను కాపాడడం కోసం రాజ్ ఎలాంటి సాహసం చేశాడు..? అనే విషయాలు సినిమా చూసి తెలుసుకోవాల్సిందే!
విశ్లేషణ:
'అలా ఎలా' సినిమా వచ్చి సరిగ్గా నాలుగేళ్లు అయింది. అప్పటినుండి ఈ 'లవర్' సినిమా కోసం స్క్రిప్ట్ రాసుకున్నాడు దర్శకుడు అనీష్ కృష్ణ. తీరా సినిమా చూసిన తరువాత నాలుగేళ్ల పాటు రాసిన కథ ఇదేనా అనిపించకమానదు. హీరో, హీరోయిన్ ప్రేమించుకోవడం.. హీరోయిన్ ఓ సమస్యలో ఇరుక్కోవడం.. హీరో ఆ సమస్య నుండి ఆమెను బయటపడేయడం.. చివరికి హ్యాపీ ఎండింగ్. టాలీవుడ్ లో చాలా ఏళ్లుగా ఈ తరహా కథలతో సినిమాలు వస్తూనే ఉన్నాయి. మరి ఇక్కడ డైరెక్టర్ కొత్తగా ఆలోచించి ఏం తీశానని అనుకుంటున్నాడో.. అతడికే తెలియాలి.
ఫస్ట్ హాఫ్ మొత్తం హీరోయిన్ ను పడేయడానికి తన ఫ్రెండ్స్ గ్యాంగ్ తో కలిసి హీరో వేసే స్కెచ్ లు.. అన్ని సినిమాల్లో మాదిరి హీరో చేసిన మంచి పని చూసి హీరోయిన్ ప్రేమలో పడిపోవడం వంటి సన్నివేశాలతో సినిమా నడిచింది. సరైన ఇంటర్వెల్ బ్యాంగ్ కూడా రాసుకోలేకపోయారు. కథలో సత్తా లేనప్పుడు సన్నివేశాలు మాత్రం బలంగా ఎలా ఉంటాయి. ఇక సెకండ్ హాఫ్ మొదలైన తరువాత స్టోరీ అనంతపురం నుండి కేరళకు షిఫ్ట్ అవుతుంది. హీరోయిన్ ఇంట్లో హీరో చేసే అల్లరి, వారి ప్రేమను ఇంట్లో వాళ్లు అంగీకరించడం నిశ్చితార్ధం వంటి సన్నివేశాల తరువాత ప్రీక్లైమాక్స్ లో విలన్ హీరోయిన్ ను కిడ్నాప్ చేస్తాడు. విలన్ నుండి హీరోయిన్ ను కాపాడుకోవడం కోసం హీరో వేసే స్కెచ్ లు మాములుగా ఉండవు. తెలుగు వాళ్లకు పరిచయం లేని కార్ హ్యాకింగ్ ను ఈ సినిమా ద్వారా పరిచయం చేశారు. మొత్తానికి హీరో.. విలన్ నుండి హీరోయిన్ ను కాపాడుకుంటాడు. అక్కడితో సినిమా ముగిసిపోతుంది. ఈ మొత్తం ప్రాసెస్ లో ఆడియన్స్ ను ఆకట్టుకునే విధంగా ఒక్క సీన్ కూడా లేకపోవడం బాధాకరం.
ఇదివరకే చాలా మంది హీరోలు ఈ తరహా కథల్లో నటించడంతో తన పాత్ర ద్వారా కొత్తదనాన్ని తీసుకురావాలనుకున్న రాజ్ తరుణ్ ప్రయత్నం బెడిసికొట్టింది. అతడి పోనీటైల్ తప్ప మరేదీ కొత్తగా అనిపించడం కానీ గత చిత్రాలతో పోలిస్తే ఈ సినిమాలో రాజ్ తరుణ్ కాస్త అందంగా కనిపించాడు. నటన పరంగా కొత్తగా చెప్పుకునేలా ఏం లేదు. అనంతపురం యాసలో మాట్లాడడానికి అతడు పడ్డ కష్టం వృధా అయింది. హీరోయిన్ గా నటించిన రిద్ధి కుమార్ సినిమా మొత్తం ఒకటే ఎక్స్ ప్రెషన్ క్యారీ చేసింది. లవ్, ఎమోషన్ ఇలా ఏ సీన్ లో అయినా అమ్మడి ఎక్స్ ప్రెషన్ మాత్రం ఒకటే. తెరపై అంత అందంగా కూడా ఏం కనిపించలేదు. రాజీవ్ కనకాల పాత్ర కొత్తగా అనిపిస్తుంది. ఇక మెయిన్ విలన్ సచిన్ ఖేడ్కర్ కు సినిమాలో ఒక్క డైలాగ్ కూడా లేకపోవడం ఆశ్చర్యాన్ని కలిగిస్తుంది. ఆ మాత్రం దానికి అంత పెద్ద నటుడుని పెట్టుకోవడం ఎందుకో దర్శకనిర్మాతలకే తెలియాలి. ఫస్ట్ హాఫ్ లో సత్యం చేసే కామెడీ కాస్త నవ్విస్తుంది. మిగిలిన నటీనటులు తమ పాత్రల పరిధుల్లో బాగానే నటించారు.
నిర్మాత దిల్ రాజు ఎనిమిది కోట్లు ఈ సినిమాపై పెట్టామని చెబుతున్నప్పటికీ తెరపై మాత్రం ఆ ఖర్చు కనిపించదు. ఫారెన్ లొకేషన్స్ కూడా లేవు. అనంతపురం, కేరళ ఈ రెండు ప్రాంతాల్లో చిత్రీకరించేశారు. మరి ఏ రకంగా ఎనిమిది కోట్లు ఖర్చయిందని చెబుతున్నాడో ఆయనకే తెలియాలి. సినిమాటోగ్రఫీ వర్క్ బాగుంది. నేపధ్య సంగీతం మెప్పిస్తుంది. ఒక పాట వినడానికి చాలా బాగుంది. ఎడిటింగ్ వర్క్ పర్వాలేదనిపిస్తుంది. ఈ సినిమా కథ చాలా మంది హీరోలు రిజెక్ట్ చేసిన తరువాత రాజ్ తరుణ్ దగ్గరకి వెళ్లింది. అందరూ ఎందుకు రిజెక్ట్ చేస్తున్నారని కనీసం ఆలోచించినా.. ఈ ఫ్లాప్ నుండి రాజ్ తరుణ్ తప్పించుకునేవాడు. కానీ ఇప్పుడు వరుస ఫ్లాప్ లతో ఉన్న ఆయన లిస్ట్ లో మరో ఫ్లాప్ వచ్చి చేసింది. ఇకనైనా కాన్సెప్ట్ ఓరియెంటెడ్ సినిమాలను నమ్ముకుంటే కెరీర్ లో ముందుకువెళ్లొచ్చు. లేదంటే మాత్రం టాలీవుడ్ లో హీరోగా కొనసాగించడం కష్టమే..
రేటింగ్: 1.75/5
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
