'హీరో' ఈ టైటిల్ ఎవరికోసం..?

టాలీవుడ్ అగ్ర నిర్మాణ సంస్థల్లో ఒకటైన 'మైత్రి మూవీ మేకర్స్' బ్యానర్ పై 'శ్రీమంతుడు', 'జనతా గ్యారేజ్', 'రంగస్థలం' ఇలా ఎన్నో హిట్ సినిమాలు రూపొందాయి. ప్రస్తుతం ఈ బ్యానర్ పై రవితేజ-శ్రీనువైట్ల సినిమాతో పాటు విజయ్ దేవరకొండ 'డియర్ కామ్రేడ్' సినిమాను నిర్మిస్తున్నారు.

మహేష్ బాబు-సుకుమార్ సినిమా కూడా ఈ బ్యానర్ లోనే తెరకెక్కనుంది. ఈ సినిమాలతో పాటు పలు ప్రాజెక్టులు చర్చల దశలో ఉన్నాయి. తాజాగా ఈ బ్యానర్ పై 'హీరో' అనే టైటిల్ ని రిజిస్టర్ చేయించారు. గతంలో ఈ పేరుతో మెగాస్టార్ చిరంజీవి ఓ సినిమా చేశారు. కొన్నేళ్ల తరువాత నితిన్ తన సినిమాకు ఈ టైటిల్ ను వాడుకున్నారు. మళ్లీ ఇప్పుడు ఈ టైటిల్ ను తమ బ్యానర్ పై రిజిస్టర్ చేయించారు మైత్రి నిర్మాతలు.

అయితే ఈ టైటిల్ ఎవరి కోసమా..? అనే చర్చలు మొదలయ్యాయి, మహేష్ బాబు సినిమా కోసమైతే ఈ టైటిల్ ని వాడే ఛాన్స్ లేదు. సాయి ధరమ్ తేజ్-కిషోర్ తిరుమల సినిమా కోసం ఈ టైటిల్ ని రిజిస్టర్ చేయించారా..? అనుకుంటే ఈ సినిమాకు 'చిత్రలహరి' అనే టైటిల్ ప్రచారంలో ఉంది. మరి ఈ 'హీరో' టైటిల్ ఏ హీరో కోసమో తెలియాలంటే కొద్దిరోజులు ఆగాల్సిందే!