`బింబిసార2` నుంచి వశిష్ట ఔట్‌.. ఇంతకి సీక్వెల్‌ ఉంటుందా?

కళ్యాణ్‌ రామ్‌ హీరోగా రూపొందిన `బింబిసార` పెద్ద విజయం సాధించింది. దీంతో సీక్వెల్‌పై బజ్‌ ఏర్పడింది. కానీ సీక్వెల్‌ నుంచి దర్శకుడిని తప్పించాడనే వార్త ఇప్పుడు అనేక అనుమానాలకు తావిస్తుంది.

కళ్యాణ్‌ రామ్‌కి చాలా రోజుల తర్వాత సక్సెస్‌ ఇచ్చి నిలబెట్టిన చిత్రం `బింబిసార`. వశిష్ట మల్లాది దర్శకత్వం వహించిన ఈ చిత్రాన్ని కళ్యాణ్‌ రామ్‌ నిర్మించారు. గతేడాది విడుదలైన ఈ సినిమా మంచి విజయం సాధించింది. కళ్యాణ్‌ రామ్‌కి పెద్ద ఊరటనిచ్చింది. ఆ తర్వాత ఆయన్నుంచి వచ్చిన `అమిగోస్‌` షాకిచ్చింది. ఈ చిత్రం ఇటీవల విడుదలై దారుణంగా పరాజయం చెందింది. ఇదిలా ఉంటే `బింబిసార` సమయంలోనే సీక్వెల్‌ని ప్రకటించిన విషయం తెలిసిందే. సినిమా ఎండ్‌ కార్డ్ లో హింట్‌ కూడా ఇచ్చారు. అంతేకాదు ఈ సినిమాని ఓ ఫ్రాంఛైజీలా చేయాలనుకుంటున్నట్టు దర్శకుడు వశిష్ట తెలిపారు.

ఇటీవల `బింబిసార 2`పై అప్‌డేట్‌ ఇచ్చారు కళ్యాణ్‌ రామ్‌. `అమిగోస్‌` ప్రమోషన్స్ సమయంలో ఆయన రియాక్ట్ అయ్యారు. ఈ ఏడాది చివర్లో ఉంటుందన్నారు. ప్రస్తుతం ఆయన `డెవిల్‌` సినిమా చేస్తున్నట్టు చెప్పారు. ఇదిలా ఉంటే గత కొంత కాలంగా `బింబిసార2`పై రకరకాల వార్తలు చక్కర్లు కొడుతున్నాయి. దర్శకుడిని తప్పించారని, దర్శకుడు తప్పుకున్నాడనే పుకార్లు ఊపందుకున్నాయి. అయితే ఈ సీక్వెల్‌ నుంచి వశిష్ట తప్పుకున్నారనేది నిజమే అని తెలుస్తుంది. ఆయన తప్పించబడ్డారనేది కూడా నిజమే అంటున్నారు.

`బింబిసార` విజయం తర్వాత వశిష్ట.. ఇతర హీరోలకు కథలు చెప్పారు. అటు సినిమా నచ్చిన బాలయ్యకి ఓ కథ చెప్పాడు. ఆయన ఆసక్తిని వ్యక్తం చేశాడట. ఆయనతోపాటు సూపర్‌స్టార్‌ రజనీకాంత్‌ కూడా ఓ కథ నెరేట్‌ చేశాడట. రజనీ సైతం తన ఇంట్రెస్ట్‌ ని తెలియజేసినట్టు తెలుస్తుంది. అయితే ఈ విషయాలు కళ్యాణ్‌ రామ్‌ అండ్‌ టీమ్‌కి తెలియకుండా జరిగింది. ఓ వైపు `బింబిసార2` చేయాల్సి ఉండగా, ఇతర హీరోలకు కథ చెప్పడంతో వీరి మధ్య ఏర్పడిన మనస్పర్థాల కారణంగా దర్శకుడు వశిష్టని తప్పించారని, తనపై టీమ్‌ రియాక్ట్ అయిన తీరుకి తను తప్పుకున్నట్టు తెలుస్తుంది. ఏదేమైనా `బింబిసార2`కి నుంచి వశిష్ట ఔట్‌ అనేది నిజమని అంటున్నారు. 

అయితే దర్శకుడిని తప్పించడంలో మరో కారణం కూడా ఉందని తెలుస్తుంది. సీక్వెల్‌ని అయితే ప్రకటించారు గానీ, దానికి స్క్రిప్ట్ లేదు. ఆ హైప్‌ కోసం సీక్వెల్‌ ప్రకటించారు గానీ, అసలు సీక్వెల్‌కి కథే లేదని టాక్‌. ఆ స్క్రిప్ట్ పై ఫోకస్‌ చేయకుండా ఇతర హీరోల వెంటపడటం కళ్యాణ్‌ రామ్‌ టీమ్‌కి నచ్చలేదని, అందుకే తప్పించబడ్డాడని టాక్‌. మరి ఇందులో నిజమెంతా అనేది తెలియాల్సి ఉంది. కానీ ఈ వార్త చాలా రోజులుగా నెట్టింట చక్కర్లు కొడుతుంది. అయితే వశిష్ట స్థానంలో `బింబిసార2`కి మరో దర్శకుడిని ఫైనల్‌ చేశారని టాక్‌. అనిల్‌ పాడూరిని దర్శకుడిగా ఫిక్స్ చేశారని తెలుస్తుంది. కానీ కథలేకపోవడంతో ఈ సీక్వెల్‌ ఉంటుందా, ఆటకెక్కుతుందా అనే అనుమానాలు వ్యక్తమవుతున్నాయి.