ఆఫీసుపై జన సైనికుల దాడి: వాళ్లని ముద్దు పెట్టుకోవాలనిపిస్తోందంటూ వర్మ ట్వీట్

సంచలన దర్శకుడు రామ్‌గోపాల్ వర్మ మరోసారి వివాదానికి తెరదీశారు. సినీనటుడు, జనసేన అధినేత పవన్ కల్యాణ్ రాజకీయ జీవితంపై వ్యంగ్యాత్మకంగా తెరకెక్కిస్తున్న ‘‘ పవర్ స్టార్: ఎన్నికల ఫలితాల తర్వాత కథ’’ సినిమాపై వివాదం నెలకొంది.

ఈ సినిమాపై పవన్ అభిమానులు అభ్యంతరం వ్యక్తం చేస్తూ వర్మపై యుద్ధం ప్రకటించారు. ఇప్పటికే సోషల్ మీడియాలో రామూను ట్రోల్ చేస్తున్న పవన్ ఫ్యాన్స్ తాజాగా హైదరాబాద్‌ జూబ్లీహిల్స్‌లోని వర్మ ఆఫీసుపై దాడికి పాల్పడ్డారు. జనసేన కార్యకర్తలు ఈ దాడికి దిగినట్లుగా తెలుస్తోంది.

ఈ నేపథ్యంలో రామ్‌గోపాల్ వర్మ స్పందించారు. ‘‘ జనసేన కార్యకర్తలుగా చెప్పుకునే పీకే అభిమానులు నా కార్యాలయంపై దాడి చేశారు. ఈ దాడికి పాల్పడిన వారిని సెక్యూరిటీ గార్డులు, పోలీసులు అరెస్ట్ చేశారు. అయితే ‘‘ పవర్‌స్టార్’’కు ఇంకా ఎక్కువ పబ్లిసిటీ కల్పించినందుకు పవన్ ఫ్యాన్స్‌ను ముద్దు పెట్టుకోవాలనిపిస్తోందని రామూ ట్వీట్ చేశారు.