సౌత్ స్టార్ హీరోయిన్ అనుష్క నటించిన తాజా చిత్రం నిశ్శబ్దం. బాహుబలి తర్వాత అనుష్క చాలా నెమ్మదిగా చిత్రాలు ఎంచుకుంటోంది. బాహుబలి తర్వాత అనుష్క భాగమతి చిత్రంలో మాత్రమే నటించింది. దీనితో అనుష్క నుంచి మరో మూవీ ఎప్పుడు వస్తుందా అని ఆమె అభిమానులు ఎదురుచూస్తున్నారు.
భాగమతి తర్వాత అనుష్క లాంగ్ గ్యాప్ తీసుకుంది.విదేశాలకు వెళ్లి బరువు తగ్గాక నిశ్శబ్దం చిత్రాన్ని ప్రారంభించింది. ప్రముఖ రచయిత కోన వెంకట్ ఈ చిత్రాన్ని కోన ఫిలిం కార్పొరేషన్ బ్యానర్ పై నిర్మిస్తున్నారు. హేమంత్ మధుకర్ ఈ చిత్రానికి దర్శకుడు.
సస్పెన్స్ థ్రిల్లర్ గా నిశ్శబ్దం చిత్రం తెరకెక్కుతోంది. గురువారం రోజు అనుష్క పుట్టినరోజు సంధర్భంగా చిత్ర యూనిట్ నేడు నిశ్శబ్దం టీజర్ రిలీజ్ చేశారు. టీజర్ ఉత్కంఠభరితంగా సాగుతూ సినిమాపై అంచనాలు పెంచే విధంగా ఉంది. ఈ చిత్రంలో అనుష్క మాటలు రాని, వినికిడి లోపం ఉన్న దివ్యాంగురాలి పాత్రలో నటిస్తోంది.
టీజర్ లో అనుష్క దివ్యాంగురాలిగా పలికిస్తున్న హావా భావాలు అద్భుతంగా ఉన్నాయి. మంచి పాత్ర దొరికితే అనుష్క ఎలా నటిస్తుందో ప్రత్యేకంగా చెప్పనవసరం లేదు. ఈ ఛాలెంజింగ్ రోల్ లో కూడా అనుష్క తన నటనతో మెప్పించింది. అనుష్క ఏదో చెప్పడానికి ప్రయత్నిస్తున్నట్లు ఉన్న షాట్స్ టీజర్ లో ఆకట్టుకుంటున్నాయి.
ఓ వెకేషన్ అనుష్క జీవితాన్ని మార్చేస్తుంది. అక్కడ జరిగిన సంఘటనలు ఏంటి అనే విషయాన్ని సస్పెన్స్ ఎలిమెంట్స్ తో దర్శకుడు చిత్రీకరించినట్లు ఉన్నారు. ఈ చిత్రంలో క్రేజీ హీరో మాధవన్ కీలక పాత్రలో నటించాడు. ఇక అంజలి, షాలిని పాండే కూడా కీలక పాత్రల్లో నటించారు.
కథా పరంగా ఈ చిత్ర షూటింగ్ ఎక్కువగా అమెరికాలో జరిగింది. డిసెంబర్ లో నిశ్శబ్దం చిత్రం విడుదలయ్యే అవకాశాలు ఉన్నాయి. గోపి సుందర్ ఈ చిత్రానికి సంగీత దర్శకుడు. తెలుగుతో పాటు తమిళం, మలయాళం, హిందీ భాషల్లో కూడా నిశ్శబ్దం చిత్రాన్ని విడుదల చేయనున్నారు. తాజాగా టీజర్ ని డాషింగ్ డైరెక్టర్ పూరి జగన్నాధ్ లాంచ్ చేశారు.