IPL 2023 Final CSK vs GT LIVE: ఉత్కంఠ పోరులో చెన్నైదే గెలుపు.. సీఎస్కేకు ఐదో టైటిల్

ఐపీఎల్ చరిత్రలో మొదటిసారి మూడు రోజులు జరిగిన ఐపీఎల్-16 ఫైనల్  ను చెన్నై సూపర్ కింగ్స్ గెలుచుకుంది. మే 28న  మొదలు కావాల్సిన ఫైనల్ వర్షం కారణంగా రద్దైంది.  మే 29న  మ్యాచ్ ఆరంభమై ఒక ఇన్నింగ్స్ ముగిసినా.. చెన్నై బ్యాటింగ్ కు రాగానే   వర్షం పడింది.  దీంతో  సుమారు రెండు గంటల పాటు  మ్యాచ్ నిలిచిపోయింది. ఆ తర్వాత చెన్నై  టార్గెట్ ను 15 ఓవర్లలో 171 పరుగులు  చేయాల్సి ఉండగా.. చెన్నై  బ్యాటర్లు తమ నరాల్లో కరెంట్ తీగలు నింపుకుని వచ్చారో మరేమైనా తిని వచ్చారో గానీ రెచ్చిపోయి ఆడారు. చెన్నై బ్యాటర్లు విజృంభణతో  మే 30న ఫైనల్ ఘనంగా ముగిసింది. 

ఆఖరి ఓవర్లో చెన్నై విజయానికి  13 పరుగులు అవసరం కాగా  హార్ధిక్ పాండ్యా.. మోహిత్ శర్మకు బంతినిచ్చాడు. ఫస్ట్  నాలుగు బంతుల్లో మూడు పరుగులే  వచ్చాయి. చివరి రెండు బంతుల్లో 10 పరుగులు అవసరం కాగా ఐదో బంతికి జడ్డూ సిక్స్ కొట్టాడు.  ఆఖరి బంతికి  జడ్డూ బౌండరీ బాది  చెన్నైకి ఐదో టైటిల్ అందించాడు. 

షమీ వేసిన 14వ ఓవర్లో 8 పరుగులు వచ్చాయి.  14 ఓవర్లు ముగిసేసరికి చెన్నై.. 5 వికెట్ల నష్టానికి  158 పరుగులు చేసింది.  ఇక చివరి ఓవర్లో చెన్నై గెలవాలంటే.. ఆరు బంతుల్లో 13 పరుగులు కావాలి.  

కెరీర్ లో  చివరి  మ్యాచ్ ఆడుతున్న  అంబటి రాయుడు  చెన్నైని విజయానికి దగ్గర చేశాడు. మోహిత్ శర్మ వేసిన 13వ ఓవర్లో.. 6, 4, 6 కొట్టాడు.  కానీ ఇదే ఓవర్లో  నాలుగో బంతికి   రాయుడు..  మోహిత్ కే క్యాచ్ ఇచ్చి ఔట్ అయ్యాడు. రాయుడు తర్వాత వచ్చిన ధోని (0) కూడా డకౌట్ అయ్యాడు. 13 ఓవర్లకు చెన్నై 5 వికెట్లు కోల్పోయి 150 పరుగులు చేసింది. చెన్నై విజయానికి 2 ఓవర్లలో 21 పరుగులు కావాలి. 

రహానే  ఔటయ్యాక  చెన్నైని గెలిపించే బాధ్యతను శివమ్ దూబే తలకెత్తుకున్నాడు.  రషీద్ ఖాన్ వేసిన  12వ ఓవర్లో  ఆఖరి రెండు బంతులను దూబే  భారీ సిక్సర్లుగా మార్చాడు. దీంతో చెన్నై స్కోరు 12 ఓవర్లకు 3 వికెట్ల నష్టానికి 133గా ఉంది.  ఆ జట్టు విజయానికి 3 ఓవర్లలో  38 పరుగులు రావాలి. 

ఓపెనర్లు నిష్క్రమించిన తర్వాత  బాదే బాధ్యతను తలకెత్తుకున్న అజింక్యా రహానేను మోహిత్ శర్మ ఔట్ చేశాడు. మోహిత్ వేసిన  11వ ఓవర్లో  ఐదో బంతికి  రహానే.. విజయ్ శంకర్ కు క్యాచ్ ఇచ్చి పెవిలియన్ చేరాడు.   రహానే.. 13 బంతుల్లో   2 సిక్సర్లు, 2 బౌండరీల సాయంతో 27 పరుగులు చేశాడు.  11 ఓవర్లు ముగిసేటప్పటికీ చెన్నై.. 3 వికెట్ల నష్టానికి 118 పరుగులు చేసింది. 

చెన్నై సూపర్ కింగ్స్ స్కోరు వంద పరుగులు దాటింది.  రషీద్ ఖాన్ వేసిన పదో ఓవర్లో  13 పరుగులు వచ్చాయి.  ఇక చెన్నై విజయానికి  ఐదు ఓవర్లలో 59 పరుగులు చేయాల్సి ఉంది. రహానే (26 నాటౌట్), దూబే (11 నాటౌట్) ఆడుతున్నారు. 

9 ఓవర్లు ముగిసేసరికి చెన్నై సూపర్ కింగ్స్.. 2 వికెట్ల నష్టానికి  99 పరుగులు చేసింది. శివమ్ దూబే (4 నాటౌట్), రహానే (17 నాటౌట్) క్రీజులో ఉన్నారు.  చెన్నై విజయానికి 6 ఓవర్లలో  72 పరుగులు  కావాలి. 

జోషువా లిటిల్ వేసిన 8వ ఓవర్లో అజింక్యా రహానే  రెండు భారీ సిక్సర్లు బాదాడు. దీంతో చెన్నై స్కోరు 94కు చేరింది.  

గుజరాత్ టైటాన్స్ స్పిన్నర్  నూర్ అహ్మద్ చెన్నైకి డబుల్ స్ట్రోక్ ఇచ్చాడు.  అతడు వేసిన 8వ ఓవర్లో మూడో బాల్ కు రుతురాజ్ ఔట్ కాగా ఆఖరి బంతికి  డెవాన్ కాన్వే (25 బంతుల్లో 47, 4 ఫోర్లు, 2 సిక్సర్లు)  కూడా నిష్క్రమించాడు.  ఏడు ఓవర్లు ముగిసేటప్పటికీ  చెన్నై స్కోరు.. 2 వికెట్ల నష్టానికి 78 పరుగులుగా ఉంది. 

171 పరుగుల లక్ష్య ఛేదనలో  చెన్నై సూపర్ కింగ్స్ కు ఫస్ట్ షాక్ తాకింది. నూర్ అహ్మద్ వేసిన  ఏడో ఓవర్  మూడో బాల్ కు  గైక్వాడ్ భారీ షాట్ ఆడి రషీద్ ఖాన్  చేతికి చిక్కాడు.  గైక్వాడ్.. 16 బంతుల్లో 3 బౌండరీలు, 1 సిక్సర్  సాయంతో 26 పరుగులు చేశాడు. 

ఆరు ఓవర్లు ముగిసేటప్పటికీ చెన్నై సూపర్ కింగ్స్.. వికెట్ నష్టపోకుండా 72 పరుగులు చేసింది. జోషువా లిటిల్ వేసిన ఆరో ఓవర్లో 14 పరుగులొచ్చాయి. డెవాన్ కాన్వే.. 22 బంతుల్లో 44 పరుగులు చేయగా రుతురాజ్ 14 బంతుల్లో 25 పరుగులతో ఆడుతున్నారు. చెన్నై విజయానికి 54 బంతుల్లో 99 పరుగులు కావాలి. 

15 ఓవర్లలో 171 పరుగుల లక్ష్యంతో బరిలోకి దిగిన చెన్నై సూపర్ కింగ్స్..   దూకుడుగా ఆడుతోంది. ఓవర్ల కుదింపు వల్ల నాలుగు ఓవర్లకే కుదించిన  బ్యాటింగ్ పవర్ ప్లేలో  చెన్నై  ఓపెనర్లు దంచికొట్టారు.  4 ఓవర్లలోనే చెన్నై.. వికెట్ నష్టపోకుండా 52 పరుగులు చేసింది.  ఇంకా ఆ జట్టు విజయానికి 66 బంతుల్లో 119 పరుగులు కావాలి. 

షమీ వేసిన 3 వ ఓవర్లో 11 పరుగులొచ్చాయి.  మూడు ఓవర్లు ముగిసేసరికి చెన్నై.. వికెట్ నష్టపోకుండా 35 పరుగులు చేసింది. 

వర్షం వల్ల  15 ఓవర్లలో 171 పరుగులుగా టార్గెట్ నిర్ణయించడంతో మ్యాచ్ ను మొదలుపెట్టిన చెన్నై.. ఇన్నింగ్స్ ను ధాటిగా ఆరంభించింది. షమీ బౌలింగ్ లో గైక్వాడ్ బౌండరీ బాదగా.. హార్ధిక్ పాండ్యా బౌలింగ్ లో కాన్వే.. 6, 4 తో  మెరిశాడు. 2 ఓవర్లలో చెన్నై వికెట్ నష్టపోకుండా  24 పరుగులు చేసింది.  కాన్వే (12 నాటౌట్), రుతురాజ్ (11 నాటౌట్) లు క్రీజులో ఉన్నారు. 

10:45కు ఒకసారి  పిచ్ ను పరిశీలించిన అంపైర్లు.. 11:30 కి మరోసారి  పిచ్ ను తనిఖీ చేశారు. ఆన్ ఫీల్డ్ అంపైర్లు నితిన్ మీనన్, రాడ్ టక్కర్ లు మ్యాచ్ లో ఓవర్లను కుదించారు.  చెన్నై బ్యాటింగ్  చేసేది 15 ఓవర్లుగా నిర్ణయించారు.  దీని ప్రకారం.. చెన్నై 15 ఓవర్లలో 171 పరుగులను ఛేదించాల్సి ఉంటుంది.  కానీ మ్యాచ్  ప్రారంభయ్యేది 12:10 గంటలకు.. మరి మళ్లీ వర్షం పడితే  పరిస్థితి ఏంటన్నది ఇప్పటికైతే సస్పెన్సే..! ఇక  ఈ 15 ఓవర్ల మ్యాచ్ లో 4 ఓవర్స్ పవర్ ప్లే, ఒక ఓవర్ కు మూడు ఓవర్ల  లిమిట్ మాత్రమే ఉండనుంది. 

చెన్నై సూపర్ కింగ్స్  బ్యాటింగ్ కు వచ్చిన వెంటనే  వర్షం మళ్లీ  మొదలవడంతో ఆగిన ఆట ఇంకా  స్టార్ట్ కాలేదు. 10:45కు పిచ్ తనిఖీకి వచ్చిన అంపైర్లు అవుట్ ఫీల్డ్ ఇంకా తడిగా ఉండటంతో.. తిరిగి రాత్రి 11:30 కు మరోసారి    పిచ్ పరిశీలనకు వచ్చి నిర్ణయం తీసుకుంటారు.    అప్పటిదాకా  ఓవర్ల కుదింపు లేదు. 11:30 తర్వాత   కూడా వాన రిపీట్ అయితే అప్పుడు ఓవర్ల కుదింపు మొదలవుతుంది. 

వాన ఆగినా ప్రాక్టీస్ పిచ్, అవుట్ ఫీల్డ్ తడిగా ఉండటంతో గ్రౌండ్ సిబ్బంది దానిని సిద్ధం చేసే పనిలో ఉన్నారు. 10:45 గంటలకు అంపైర్లు పిచ్‌ను తనిఖీ నిర్వహించి ఆ తర్వాత అప్డేట్స్ ఇవ్వనున్నారు. 

అహ్మదాబాద్ లో  చెన్నై బ్యాటింగ్ కు రాగానే   మూడు బంతులు పడ్డాక మొదలైన వాన.. కాస్త తెరిపినిచ్చింది. గ్రౌండ్ సిబ్బంది పిచ్ మీద కవర్లు తొలగించి అక్కడ   ఉన్న నీటిని తొలగిస్తున్నారు.  త్వరలోనే మ్యాచ్ మళ్లీ ఆరంభమయ్యే అవకాశాలున్నాయి. 

అహ్మదాబాద్ లో చెన్నై - గుజరాత్ మధ్య జరుగుతున్న ఐపీఎల్ - 16 ఫైనల్‌ను వరుణుడు మరోసారి ముంచెత్తుతున్నా ఈ మ్యాచ్  లో ఇప్పటికిప్పుడు ఓవర్లు కోల్పోయే  ప్రమాదమేమీ లేదు. మరో 2 గంటల తర్వాతే  ఓవర్ల కుదింపు మొదలవుతుంది. అదీగాక ప్రస్తుతం అహ్మదాబాద్ లో వరుణుడు కాస్త  శాంతించాడు.  వరుణుడు త్వరగా అహ్మదాబాద్ నుంచి వెళ్లిపోవాలని అభిమానులు కోరుకుంటున్నారు. 

రెండో ఇన్నింగ్స్ మొదలై  మూడు బంతులు పడకముందే అహ్మదాబాద్ లో  వర్షం మళ్లీ మొదలైంది.  గుజరాాత్ ఇన్నింగ్స్ ముగిశాక  చిన్నగా మొదలైన వాన.. ఇప్పుడు కాస్త గట్టిగానే కురుస్తోంది. చెన్నై ఇన్నింగ్స్ మొదలై షమీ మూడు బంతులు విసిరాడు. మూడో బంతికి    చెన్నై ఓపెనర్ రుతురాజ్ గైక్వాడ్.. బ్యాక్ వర్డ్ పాయింట్ దిశగా ఫోర్ కొట్టాడు.  బంతి బౌండరీ లైన్ దాటిన వెంటనే స్టేడియంలో వర్షం మొదలైంది. 

ఐపీఎల్ 2023 ఫైనల్ మ్యాచ్‌కి మరోసారి వర్షం అంతరాయం కలిగించింది. గుజరాత్ టైటాన్స్ ఇన్నింగ్స్ ముగిసిన తర్వాత ముగింపు వేడుకల్లో భాగంగా లైటింగ్ షో జరిగింది. అది ముగిసిన తర్వాత వర్షం కురవడంతో రెండో ఇన్నింగ్స్ ఆలస్యంగా ప్రారంభం కానుంది.. 

చెన్నై సూపర్ కింగ్స్‌తో అహ్మదాబాద్ వేదికగా  జరుగుతున్న ఐపీఎల్ - 16 ఫైనల్స్ లో గుజరాత్ టైటాన్స్  బ్యాటర్లు సమిష్టిగా రాణించారు.  వన్ డౌన్ బ్యాటర్ సాయి సుదర్శన్ (47 బంతుల్లో 96, 8 ఫోర్లు, 6 సిక్సర్లు)  తృటిలో సెంచరీ మిస్ చేసుకోగా ..  ఓపెనర్ వృద్ధిమాన్ సాహా (39 బంతుల్లో 54, 5 ఫోర్లు, 1 సిక్సర్), శుభ్మన్ గిల్ (20 బంతుల్లో 39, 7 ఫోర్లు), హార్ధిక్ పాండ్యా (12 బంతుల్లో 21, 2 సిక్సర్లు) రాణించారు.  తొలి వికెట్ కు  గిల్ - సాహాలు 67  పరుగులు జోడించారు.   రెండో వికెట్ కు  సాహా - సుదర్శన్ లు 64 రన్స్ జోడించారు. ఇక చివర్లో హార్ధిక్ పాండ్యాతో కలిసి  సుదర్శన్ 81 పరుగులు జోడించాడు.  దీంతో గుజరాత్.. నిర్ణీత 20 ఓవర్లలో  4 వికెట్ల నష్టానికి  214 పరుగులు చేసింది.    చెన్నై బౌలర్లలో  జడేజా, పతిరాన, చాహర్ లు తలా  ఒక వికెట్ తీశారు. మరి  20 ఓవర్లలో చెన్నై ఈ లక్ష్యాన్ని ఛేదించగలదా..? 

తుషార్ దేశ్‌పాండే వేసిన 19వ ఓవర్లో  హార్ధిక్ పాండ్యా రెండు  సిక్సర్లు  బాదగా సాయి సుదర్శన్ ఓ ఫోర్ కొట్టాడు. దీంతో గుజరాత్ స్కోరు..  మరో ఓవర్ మిగిలుండగానే 200 కు  చేరింది.   ఈ ఓవర్లో 18 పరుగులొచ్చాయి. 

18వ ఓవర్ వేసిన మతీశ పతిరాన.. 18వ ఓవర్లో 9 పరుగులే ఇచ్చాడు. గుజరాత్ వీరవిహారానికి ఇంకా 2 ఓవర్లు మాత్రమే మిగిలున్నాయి.  మరి గుజరాత్ స్కోరు 200 ప్లస్ దాటేనా..? 

హాఫ్ సెంచరీ తర్వాత  సాయి సుదర్శన్ ధాటిగా ఆడుతున్నాడు.  తుషార్ దేశ్‌పాండే వేసిన  17వ ఓవర్లో  6, 4,4,4  బాదాడు. ఈ  ఓవర్లో.. 20 పరుగులొచ్చాయి.  దీంతో గుజరాత్ స్కోరు..  170 మార్క్ దాటింది.  17 ఓవర్లు ముగిసేటప్పటికీ గుజరాత్.. 2 వికెట్లు కోల్పోయి 173  పరుగులు చేసింది. సాయి సుదర్శన్ (76 నాటౌట్), హార్ధిక్ పాండ్యా (2 నాటౌట్) క్రీజులో ఉన్నారు. 

తీక్షణ వేసిన  15వ ఓవర్లో  రెండు సిక్సర్లు కొట్టిన  సుదర్శన్.. పతిరాన వేసిన  16వ ఓవర్లో  మూడో బంతికి ఫోర్ కొట్టి ఈ సీజన్ లో మూడో అర్థ సెంచరీని పూర్తి చేసుకున్నాడు. 

గుజరాత్ టైటాన్స్  ఓపెనర్ సాహా  నిష్క్రమణ తర్వాత  ఆ జట్టు స్కోరు వేగాన్ని పెంచే  బాధ్యతను సాయి సుదర్శన్ తీసుకున్నాడు. సుదర్శన్.  తీక్షణ వేసిన  15వ ఓవర్లో  రెండు  సిక్సర్లు బాదాడు.    15 ఓవర్లు ముగిసేసరికి గుజరాత్..  2 వికెట్ల నష్టానికి  143 పరుగులు చేసింది. సాయి సుదర్శన్.. 31 బంతుల్లో 48 పరుగులతో   క్రీజులో ఉన్నాడు. హార్ధిక్ పాండ్యా  ఇంకా ఖాతా తెరవలేదు. 

హాఫ్ సెంచరీ పూర్తి చేసుకున్న గుజరాత్ టైటాన్స్ ఓపెనర్ వృద్ధిమాన్ సాహా  (39 బంతుల్లో 54, 5 ఫోర్లు, 1 సిక్స్)  ఔట్ అయ్యాడు. దీపక్ చాహర్ వేసిన  14వ ఓవర్లో అతడు భారీ షాట్ ఆడబోయి  మహేంద్ర సింగ్ ధోని క్యాచ్ పట్టడంతో నిష్క్రమించాడు. 14 ఓవర్లకు గుజరాత్.. 131  పరుగులకు 2 వికెట్లు  కోల్పోయింది. 

వరల్డ్ టెస్ట్ ఛాంపియన్‌షిప్ (డబ్ల్యూటీసీ) ఫైనల్స్ ఆడేందుకు లండన్  (ఇంగ్లాండ్) లో ఉన్న టీమిండియా.. ఐపీఎల్ -16 ఫైనల్ చూస్తోంది.  ఓ ట్రైన్ లో  టీమిండియా క్రికెటర్లతో పాటు హెడ్ కోచ్ రాహుల్ ద్రావిడ్ కూడా  మ్యాచ్ చూస్తున్నాడు. ఇందుకు సంబంధించిన ఫోటోలను బీసీసీఐ తన అధికారిక ట్విటర్ ఖాతాలో పంచుకుంది

గుజరాత్ టైటాన్స్ ఓపెనర్ వృద్దిమాన్ సాహా..   ఫైనల్ లో అర్థ సెంచరీ పూర్తి చేసుకున్నాడు.  రవీంద్ర జడేజా వేసిన  13వ ఓవర్లో  మూడో బంతిని థర్డ్ మ్యాన్ దిశగా  బౌండరీ బాదిన సాహా.. అర్థ సెంచరీ పూర్తి చేసుకున్నాడు.  సాహాకు ఐపీఎల్ 2014  ఫైనల్ లో సెంచరీ కూడా ఉంది. అప్పుడు సాహా.. పంజాబ్ కింగ్స్ కు ఆడాడు. ఇక 13 ఓవర్లు  ముగిసేటప్పటికీ గుజరాత్.. వికెట్ నష్టానికి  124 పరుగులు చేసింది. 

పవర్ ప్లే లో 62 పరుగులు చేసిన గుజరాత్ టైటాన్స్ తర్వాత నెమ్మదిగా ఆడుతోంది.  జడ్డూ వేసిన ఏడో ఓవర్లో ఐదు పరుగులు రాగా తీక్షణ 8వ ఓవర్లో ఐదు పరుగులిచ్చాడు. 9వ ఓవర్లో జడ్డూ 8 పరుగులే ఇవ్వగా పదో ఓవర్ వేసిన తీక్షణ ఆరు  పరుగులిచ్చాడు. జడ్డూ 11వ ఓవర్లో 10 పరుగులు సమర్పించుకున్నాడు.  11 ఓవర్లకు గుజరాత్.. 96 పరుగులు చేసింది. పతిరాన వేసిన 12వ ఓవర్ ఫస్ట్ బాల్ కు  సాయి సుదర్శన్ బౌండరీ బాది  గుజరాత్ స్కోరును  వందకు చేర్చాడు. 

స్పిన్నర్ల రాకతో గుజరాత్ స్కోరు నెమ్మదిస్తోంది. తీక్షణ వేసిన  పదో ఓవర్లో  కూడా  ఆరు పరుగులే రావడంతో పది ఓవర్లు ముగిసేటప్పటికీ గుజరాత్..  ఒక వికెట్ నష్టానికి  86 పరుగులు చేసింది. 

9 ఓవర్లు ముగిసేటప్పటికీ గుజరాత్ టైటాన్స్..  శుభ్‌మన్ గిల్ వికెట్ కోల్పోయి  80 పరుగులు చేసింది.  పవర్ ప్లే లో  ధాటిగా ఆడిన సాహా తర్వాత నెమ్మదించాడు. పవర్ ప్లేలో 62 పరుగులు చేసిన గుజరాత్..   స్పిన్నర్ల రాకతో చివరి 3 ఓవర్లలో  18 పరుగులు మాత్రమే చేయగలిగింది.  సాహా  (37) తో పాటు సాయి సుదర్శన్ (4)  క్రీజులో ఉన్నారు. 

గిల్ వికెట్ కోల్పోయిన తర్వాత తీక్షణ వేసిన 8వ ఓవర్లో  గుజరాత్  ఐదు పరుగులే చేయగలిగింది.  8 ఓవర్లు ముగిసేటప్పటికీ గుజరాత్.. ఒక వికెట్ నష్టానికి  72 పరుగులు చేసింది.  వృద్ధిమాన్ సాహా (31 నాటౌట్), సాయి సుదర్శన్ (2 నాటౌట్) ప్రస్తుతం క్రీజులో ఉన్నారు. 

చెన్నై సూపర్ కింగ్స్ ఆల్ రౌండర్   రవీంద్ర జడేజా సీఎస్కేకు బ్రేక్ ఇచ్చాడు. ఈ సీజన్ లో వీరబాదుడు బాదుతున్న  శుభ్‌మన్ గిల్.. జడ్డూ వేసిన   ఏడో ఓవర్లో  స్టంపౌట్ అయ్యాడు.  జడేజా వేసిన ఆఖరి బంతికి గిల్ ముందుకొచ్చి ఆడబోయాడు. కానీ  ధోని చాకచక్యంగా స్పందించి  స్టంపౌట్ చేయడంతో గుజరాత్ ఫస్ట్ వికెట్ కోల్పోయింది. 

గుజరాత్ టైటాన్స్  బ్యాటింగ్ పవర్ ప్లే లో వికెట్ నష్టపోకుండా 62 పరుగులు చేసింది.  గిల్ (26 నాటౌట్), సాహా (36 నాటౌట్) దూకుడుగా ఆడుతున్నారు. దీపక్ చాహర్.. గిల్ ఇచ్చిన రెండు క్యాచ్ లు మిస్ చేశాడు.. 

ఐదు ఓవర్లు ముగిసేనాటికి గుజరాత్ టైటాన్స్ వికెట్ నష్టపోకుండా  49 పరుగులు చేసింది.  దీపక్ చాహర్ వేసిన ఈ ఓవర్లో అతడు.. గిల్ ఇచ్చిన క్యాచ్ ను మరోసారి మిస్ చేశాడు. 

ఐపీఎల్‌లో శుభ్‌మన్ గిల్  అరుదైన ఘనత అందుకున్నాడు. ఒక సీజన్ లో అత్యధిక పరుగులు చేసిన  బ్యాటర్ల జాబితాలో  గిల్.. కోహ్లీ తర్వాత రెండో స్థానంలో నిలిచాడు. కోహ్లీ.. 2016 సీజన్ లో  973 పరుగులు చేయగా  2022 సీజన్ లో రాజస్తాన్ రాయల్స్ బ్యాటర్ జోస్ బట్లర్ 863 పరుగులు చేశాడు. 2023 సీజన్ లో గిల్.. చెన్నై సూపర్ కింగ్స్ తో జరుగుతున్న ఫైనల్ లో  తుషార్ దేశ్‌పాండే బౌలింగ్ లో హ్యాట్రిక్ ఫోర్లు బాది  బట్లర్ ను దాటేశాడు. ప్రస్తుతానికి గిల్.. కోహ్లీ తర్వాత 868*  పరుగులతో రెండో స్థానంలో ఉన్నాడు. 

రెండో ఓవర్లో  చాహర్ క్యాచ్ మిస్ చేయడంతో  లైఫ్ దొరికిన శుభ్‌మన్ గిల్.. హ్యాట్రిక్ ఫోర్లతో విరుచుకుపడ్డాడు.  తుషార్ దేశ్‌పాండే వేసిన  నాలుగో ఓవర్లో వరుసగా మూడు ఫోర్లు కొట్టాడు.   నాలుగు ఓవర్లకు గుజరాత్ నష్టపోకుండా 38 పరుగులు చేసింది.