IPL 2022 GT vs RR: గుజరాత్ టైటాన్స్ దే ఐపీఎల్-15 ట్రోఫీ.. రాజస్తాన్ కు నిరాశ..

ఐపీఎల్-15లో లీగ్ లోకి అడుగుపెట్టిన  గుజరాత్ టైటాన్స్ తొలి సీజన్ లోనే టైటిల్ కొట్టింది.  రాజస్తాన్  రాయల్స్ ను తొలుత 130 పరుగులకే కట్టడి చేసిన  గుజరాత్.. ఆ తర్వాత స్వల్ప లక్ష్యాన్ని మరో11 బంతులు మిగిలుండగానే ఛేదించింది. ఆ జట్టు ఓపెనర్ శుభమన్ గిల్ (45), డేవిడ్ మిల్లర్ (32) లు విజయ లాంఛనాన్ని పూర్తి చేశారు. రాజస్తాన్ పై 7 వికెట్ల తేడాతో గుజరాత్ టైటాన్స్ విజయం సాధించింది. 

ఐపీఎల్ లో ఈ సీజన్ లోనే ఎంట్రీ ఇచ్చిన గుజరాత్ టైటాన్స్ తొలి సీజన్ లోనే టైటిల్ అందుకునేందుకు సిద్ధమవుతున్నది. 17 ఓవర్లు  ముగిసేసరికి ఆ జట్టు.. 3 వికెట్ల నష్టానికి 122 పరుగులు చేసింది.  పాండ్యా స్థానంలో వచ్చిన డేవిడ్ మిల్లర్ (29 నాటౌట్) గుజరాత్ విజయాన్ని మరింత తొందర చేస్తున్నాడు. ప్రసిధ్ వేసిన 17వ ఓవర్లో డేవిడ్ మిల్లర్ బ్యాక్ టు బ్యాక్ బౌండరీలు కొట్టాడు. శుభమన్ గిల్ (37) క్రీజులో ఉన్నాడు. 

ఆశలు కోల్పోతున్న  రాజస్తాన్ రాయల్స్ కు యుజ్వేంద్ర చాహల్ కొత్త ఊపిరిలూదాడు. నిలకడగా ఆడుతున్న గుజరాత్ టైటాన్స్ సారథి హార్ధిక్ పాండ్యా (34) ను ఔట్ చేశాడు. తద్వారా ఈ సీజన్ లో పర్పుల్ క్యాప్ ను హసరంగ నుంచి దక్కించుకున్నాడు. పాండ్యాను ఔట్ చేయడంతో చాహల్.. ఒక సీజన్ లో అత్యధిక వికెట్లు దక్కించుకున్న స్పిన్నర్ (27) అయ్యాడు.  అంతకుముందు 2019 లో ఇమ్రాన్ తాహిర్ (26) ఈ రికార్డు సాధించాడు.  కాగా.. తాజాగా పాండ్యాను ఔట్ చేయడం ద్వారా చాహల్.. హసరంగ కంటే ఒక వికెట్ ఎక్కువ సాధించనవాడయ్యాడు. ఫలితంగా ఈ సీజన్ లో  ఆరెంజ్ క్యాప్, పర్పుల్  క్యాప్ రెండూ రాజస్తాన్ కే దక్కనున్నాయి. 

తొలి పది ఓవర్లు నెమ్మదిగా ఆడిన  గుజరాత్ టైటాన్స్ జోరు పెంచింది. గుజరాత్ సారథి హార్ధిక్ పాండ్యా గేర్ మార్చాడు. అశ్విన్ వేసిన 12వ ఓవర్ లో వరుస బంతుల్లో 4, 6 బాదాడు. ఆ ఓవర్ లో గుజరాత్ 15 పరుగులు పిండుకుంది.  13 ఓవర్లు ముగిసేసరికి గుజరాత్ టైటాన్స్ 2 వికెట్ల నష్టానికి 84 పరుగులు చేసింది. హార్ధిక్ పాండ్యా (31), శుభమన్ గిల్ (32) లు ఆడుతున్నారు. వీళ్లిద్దరూ  మూడో వికెట్ కు 61 పరుగులు జోడించారు. 

పది ఓవర్లు ముగిసేసరికి గుజరాత్ టైటాన్స్.. 2 వికెట్ల నష్టానికి 54 పరుగులు చేసింది. గుజరాత్ నిలకడగా ఆడుతున్నది. రాజస్తాన్ బౌలర్లు తమ శక్తి వంచన లేకుండా పోరాడుతున్నారు. హార్ధిక్ పాండ్యా (11), శుభమన్ గిల్ (23) క్రీజులో ఉన్నారు. పది ఓవర్లలో గుజరాత్.. 77 పరుగులు చేయాల్సి ఉంది. 

ఛేదించాల్సిన లక్ష్యం  స్వల్పం (131) గా ఉండటంతో గుజరాత్ టైటాన్స్ ఎలాంటి భారీ షాట్స్ కు వెళ్లకుండా నెమ్మదిగా ఆడుతున్నది. రాజస్తాన్ బౌలర్లు కట్టడి గా బౌలింగ్ చేస్తున్నారు. 8 ఓవర్లు ముగిసేసరికి రాజస్తాన్.. 2 వికెట్ల నష్టానికి 38 పరుగులు చేసింది. హార్ధిక్ పాండ్యా (4),  శుభమన్ గిల్ (14) క్రీజులో ఉన్నారు. 12 ఓవర్లలో గుజరాత్.. 93 పరుగులు చేయాల్సి ఉంది. 

బ్యాటింగ్ లో విఫలమైన రాజస్తాన్ బౌలింగ్ లో అదరగొడుతున్నది. తన రెండో ఓవర్ మెయిడిన్ వేసిన బౌల్ట్.. మూడో ఓవర్లో మాథ్యూ వేడ్ (8) ను పెవిలియన్ కు పంపాడు.  10 బంతుల్లో 8 పరుగులు చేసిన వేడ్.. బౌల్ట్ బౌలింగ్ లో రియాన్ పరాగ్ కు క్యాచ్ ఇచ్చి ఔటయ్యాడు. ఐదు ఓవర్లకు గుజరాత్.. 2 వికెట్ల నష్టానికి 25 పరుగులు చేసింది. హార్ధిక్ పాండ్యా (0), శుభమన్ గిల్ (5) క్రీజులో ఉన్నారు. 

స్వల్ప లక్ష్యాన్ని కట్టడి చేసే క్రమంలో  రాజస్తాన్ బౌలర్లు లైన్ అండ్ లెంగ్త్ తో బంతులు విసురుతున్నారు.  మూడో ఓవర్ వేసిన ట్రెంట్ బౌల్ట్ మెయిడిన్ ఓవర్ వేయగా.. నాలుగో ఓవర్ వేసిన ప్రసిధ్ 11 పరుగులిచ్చాడు. అయితే ఇందులో ఐదు ఎక్స్ట్రాల రూపంలో వచ్చినవే.  4 ఓవర్లు ముగిసేసరికి గుజరాత్ టైటాన్స్.. వికెట్ నష్టానికి 22 పరుగులు చేసింది. శుభమన్ గిల్ (4), మాథ్యూ వేడ్ (8) క్రీజులో ఉన్నారు. 

రాజస్తాన్ రాయల్స్ బౌలర్ ప్రసిధ్ కృష్ణ గుజరాత్ కు తొలి షాకిచ్చాడు.   ఫామ్ లో ఉన్న ఓపెనర్ వృద్ధిమాన్ సాహా (5) ను ప్రసిధ్ బౌల్డ్ చేశాడు. ప్రసిధ్ వేసిన రెండో ఓవర్లో  రెండో బంతిని సాహా ఫోర్ కొట్టగా.. నాలుగో బంతికి  సాహాను క్లీన్ బౌల్డ్ చేసి రాజస్తాన్ కు తొలి వికెట్  అందించాడు. రెండు ఓవర్లు  ముగిసేసరికి  గుజరాత్ టైటాన్స్.. వికెట్ నష్టానికి 11 పరుగులు చేసింది. 

తక్కువ స్కోరును కట్టడి చేసే క్రమంలో రాజస్తాన్ రాయల్స్ మంచి అవకాశం మిస్ చేసుకుంది.  గుజరాత్ ఇన్నింగ్స్ లో  ట్రెంట్ బౌల్ట్ వేసిన తొలి ఓవర్ లో నాలుగో బంతికి శుభమన్ గిల్ ఇచ్చిన క్యాచ్ ను యుజ్వేంద్ర చాహల్  జారవిడిచాడు. ఇక తర్వాత బంతికే గిల్.. ఫైన్ లెగ్  దిశగా బౌండరీ కొట్టాడు. తొలి ఓవర్ లో గుజరాత్ వికెట్లేమీ నష్టపోకుండా 5 పరుగులు చేసింది.

గుజరాత్ టైటాన్స్ - రాజస్తాన్ రాయల్స్ మధ్య జరుగుతున్న ఐపీఎల్-15 లో తొలుత బ్యాటింగ్ చేసిన రాజస్తాన్ దారుణంగా  విఫలమైంది. రాజస్తాన్ ఇన్నింగ్స్ ముగిసేసరికి 20 ఓవర్లలో 9 వికెట్ల నష్టానికి  130 పరుగులు చేసింది. జోస్ బట్లర్ (39) టాప్ స్కోరర్. యశస్వి జైస్వాల్ (22), సంజూ శాంసన్ (14), దేవదత్ పడిక్కల్ (2), హెట్మెయర్ (11), అశ్విన్ (6), రియాన్ పరాగ్ (15) విఫలమయ్యారు. హార్దిక్ పాండ్యా 3 వికెట్లు తీయగా.. సాయి కిషోర్ కు 2 వికెట్లు దక్కాయి. దయాల్, రషీద్, షమీకి తలో వికెట్ దక్కింది. గుజరాత్ టైటాన్స్.. 20 ఓవర్లలో  131 పరుగులు చేస్తే తొలి సీజన్ లోనే కప్ కొట్టిన టీమ్ గా చరిత్ర సృష్టిస్తుంది..?

ట్రెంట్ బౌల్ట్ (11) పెవిలియన్ చేరాడు. చివరి పవర్ ప్లేలో అయినా తమ ఆటగాళ్లు రాణిస్తారని అనుకున్న రాజస్తాన్ ఫ్యాన్స్ కు నిరాశను మిగుల్చుతూ ఆ బ్యాటర్లు వరుస కట్టి డగౌట్ కు చేరుకుంటున్నారు. 18 ఓవర్లు ముగిసేసరికి  రాజస్తాన్.. 7 వికెట్ల నష్టానికి 120 పరుగులు చేసింది. రియాన్ పరాగ్ (6), ఒబెడ్ మెక్ కాయ్ (7) లు క్రీజులో ఉన్నారు. మరో రెండు ఓవర్లు మాత్రమే మిగిలున్నాయి. 

ఐపీఎల్ ఫైనల్ లో రాజస్తాన్ రాయల్స్ కష్టాలు ఓవర్ ఓవర్ కు మరింత రెట్టింపవుతున్నాయి.  ప్రధాన బ్యాటర్లంతా పెవిలియన్ కు చేరిన వేళ  కాస్త మెరుపులు మెరిపిస్తాడనుకున్న  రవిచంద్రన్ అశ్విన్ (6) కూడా పెవిలియన్ చేరాడు.  సాయి కిషోర్ వేసిన 16వ ఓవర్లో  ఆఖరి బంతికి అతడు.. డేవిడ్ మిల్లర్ కు క్యాచ్ ఇచ్చి ఔటయ్యాడు.  ప్రస్తుతం రాజస్తాన్.. 16 ఓవర్లు ముగిసేసరికి 6 వికెట్ల నష్టానికి 98 పరుగులు చేసింది. 

15 ఓవర్లు ముగిసేసరికి  రాజస్తాన్ రాయల్స్ 5 వికెట్ల నష్టానికి 94 పరుగులు చేసింది. గుజరాత్ బౌలర్లు కట్టడి చేస్తుండటంతో  రాజస్తాన్ కు పరుగుల రాక కష్టమైంది. హార్దిక్ పాండ్యా వేసిన 15వ ఓవర్లో  ఆఖరి బంతికి  హెట్మెయర్ (11) అతడికే క్యాచ్ ఇచ్చి ఔటయ్యాడు.  అశ్విన్ (4), రియాన్ పరాగ్ (0) క్రీజులో ఉన్నారు. రాజస్తాన్ ఇన్నింగ్స్ కు మరో 5 ఓవర్లు మాత్రమే మిగిలున్నాయి. 

ఐపీఎల్-15లో ఆకాశమే హద్దుగా చెలరేగుతున్న జోస్ బట్లర్..  ఆస్ట్రేలియా ఓపెనర్ డేవిడ్ వార్నర్ రికార్డును బద్దలు కొట్టాడు.  ఒక సీజన్ లో అత్యధిక పరుగులు చేసిన ఆటగాళ్ల జాబితాలో బట్లర్.. వార్నర్ (848) రికార్డును బ్రేక్ చేశాడు. బట్లర్.. ఈ సీజన్ లో 863 పరుగులు చేశాడు. ప్రస్తుతం అతడు ఐపీఎల్ చరిత్రలో అత్యధిక పరుగులు చేసిన రెండో ఆటగాడిగా ఉన్నాడు. ఈ జాబితాలో విరాట్ కోహ్లి (973) అగ్రస్థానంలో ఉన్నాడు. 2016 లొో కోహ్లి  ఈ ఘనత సాధించాడు. ఇక గుజరాత్-రాజస్తాన్ మ్యాచ్ లో బట్లర్ 39 పరుగులు ఔట్ చేసిన ఔటవడంతో కోహ్లి రికార్డు బద్దలు కొట్టే అవకాశం కోల్పోయాడు. 

రాజస్తాన్ రాయల్స్  ఓపెనర్ జోస్ బట్లర్ (39) ఔటయ్యాడు. హార్ధిక్ పాండ్యా వేసిన 13.1 ఓవర్లో వికెట్ కీపర్ వృద్ధిమాన్ సాహా కు క్యాచ్ ఇచ్చి ఔటయ్యాడు. 

8 బంతులాడినా పరుగుల ఖాతా తెరవక విసిగిపోయిన రాజస్తాన్ బ్యాటర్ దేవదత్ పడిక్కల్ (10 బంతుల్లో 2) చివరికి రషీద్ ఖాన్ వేసిన 12వ ఓవర్ ఐదో బంతికి షమీకి క్యాచ్ ఇచ్చి ఔటయ్యాడు. 12 ఓవర్లు ముగిసేసరికి  రాజస్తాన్ 3 వికెట్ల నష్టానికి 79 పరుగులు చేసింది. బట్లర్ (39), హెట్మెయర్ (0) క్రీజులో ఉన్నారు.  

ఐపీఎల్ ఫైనల్ మ్యాచ్ ఆడుతున్న రాజస్తాన్ రాయల్స్ తొలి పది ఓవర్లలో ఆశించిన మేర రాణించడంలో విఫలమవుతున్నది. గుజరాత్ టైటాన్స్ కట్టుదిట్టమైన బౌలింగ్ తో రాజస్తాన్ కు పరుగుల రాకే కష్టమైంది. పది ఓవర్లు ముగసేసరికి ఆ జట్టు.. 2 వికెట్ల నష్టానికి  71 పరుగులు చేసింది. జోస్ బట్లర్ (36), దేవదత్ పడిక్కల్ (0) క్రీజులో ఉన్నారు.  

రాజస్తాన్ రాయల్స్ రెండో వికెట్ కోల్పోయింది.  హార్ధిక్ పాండ్యా వేసిన 9వ ఓవర్ రెండో బంతికి.. సాయి కిషోర్ కు క్యాచ్ ఇచ్చి పెవిలియన్ చేరాడు. శాంసన్.. 11 బంతుల్లో 14 పరుగులు చేశాడు. 9 ఓవర్లు ముగిసేసరికి రాజస్తాన్ రాయల్స్ 2 వికెట్ల నష్టానికి 60 పరుగులు చేసింది. దేవదత్ పడిక్కల్ (0), జోస్ బట్లర్ (23) క్రీజులో ఉన్నారు. 

రాజస్తాన్ రాయల్స్ ఆచితూచి బ్యాటింగ్ చేస్తున్నది.  గుజరాత్ బౌలర్లు కట్టుదిట్టంగా బౌలింగ్ చేస్తుండటంతో భారీ షాట్లు  కరువయ్యాయి.  8 ఓవర్లు ముగిసేసరికి రాజస్తాన్ వికెట్ నష్టానికి 59 పరుగులు చేసింది. సంజూ శాంసన్  (14), జోస్ బట్లర్ (22) క్రీజులో ఉన్నారు. 

ఐపీఎల్-15 లో లాకీ ఫెర్గూసన్ అత్యంత వేగవంతమైన బంతిని విసిరాడు. ఏడో ఓవర్ తొలి బంతిని బట్లర్  గంటకు 157.3 కిలోమీటర్ల వేగంతో సంధించాడు. ఈ సీజన్ లో ఉమ్రాన్ మాలిక్ చెన్నై సూపర్ కింగ్స్ పై గంటకు 157 కిలోమీటర్ల వేగంతో బంతిని విసిరి రికార్డు సృష్టించగా.. తాజాగా ఫెర్గూసన్ దానిని బ్రేక్ చేశాడు. ఐపీఎల్ చరిత్రలో ఇది రెండో అత్యంత వేగవంతమైన డెలివరీ. 

తొలి పవర్ ప్లే ముగిసేసరికి రాజస్తాన్ రాయల్స్ ఒక వికెట్ నష్టానికి 44 పరుగులు చేసింది. కెప్టెన్ సంజూ శాంసన్ (11), ఓపెనర్ జోస్ బట్లర్ (11) క్రీజులో ఉన్నారు. రషీద్ ఖాన్ వేసిన 6వ ఓవర్లో  ఏడు పరుగులొచ్చాయి. 

ఐదు ఓవర్లు ముగిసేసరికి  రాజస్తాన్ రాయల్స్ 1 వికెట్ నష్టానికి 37 పరుగులు చచేసింది. సంజూ శాంసన్ (5), జోస్ బట్లర్ (9) క్రీజులో ఉన్నారు. పవర్ ప్లే లో  రాజస్తాన్ అనుకున్నంతగా రాణించలేకపోయింది.

రెండు సిక్సర్లు కొట్టి జోరు మీద కనిపించిన రాజస్తాన్ రాయల్స్ ఓపెనర్  యశస్వి జైస్వాల్ (16 బంతుల్లో 22.. 1 ఫోర్, 2 సిక్సర్లు) ఔటయ్యాడు.  యశ్ దయాల్ వేసిన నాలుగో ఓవర్ ఐదో బంతికి సిక్సర్ కొట్టిన జైస్వాల్.. ఆరో బంతికి  స్క్వేర్ లెగ్ వద్ద సాయికిషోర్ కు క్యాచ్ ఇచ్చి ఔటయ్యాడు. వన్ డౌన్ గా సంజూ శాంసన్  క్రీజులోకి వచ్చాడు. నాలుగు ఓవర్లు ముగిసేసరికి రాజస్తాన్.. 1 వికెట్ నష్టానికి 31 పరుగులు చేసింది. 

లాకీ ఫెర్గూసన్ వేసిన రెండో ఓవర్లో ఐదు పరుగులొచ్చాయి. ఐపీఎల్-15 ఫైనల్ లో బట్లర్ తొలి ఫోర్ కొట్టాడు.  షమీ వేసిన 3వ ఓవర్లో జైస్వాల్  బంతిని బౌండరీకి దాటించాడు. మూడో బంతికి ఫోర్ కొట్టిన అతడు.. ఐదో బంతిని స్టాండ్స్ లోకి పంపాడు. బట్లర్ (7), జైస్వాల్ (13) ఆడుతున్నారు. మూడు ఓవర్లు ముగిసేసరికి రాజస్తాన్ రాయల్స్  21 పరుగులు చేసింది.

ఐపీఎల్-15 ఫైనల్స్ లో భాగంగా గుజరాత్ టైటాన్స్ - రాజస్తాన్ రాయల్స్ మధ్య జరుగుతున్న ఫైనల్ మ్యాచ్  అట్టహాసంగా ప్రారంభమైంది. అరుపులు, కేకలతో అహ్మదాబాద్ లోని నరేంద్ర మోడీ స్టేడియం దద్ధరిల్లుతున్నది.  గుజరాత్ టైటాన్స్ తరఫున తొలి ఓవర్ వేసిన మహ్మద్ షమీ బౌలింగ్ లో 2 పరుగులే వచ్చాయి. షమీ  లైన్ అండ్ లెంగ్త్ తో బంతులు విసిరాడు. జైస్వాల్ (1), బట్లర్ (1) క్రీజులో ఉన్నారు. 

ఫైనల్ లో టాస్ గెలిచిన  రాజస్తాన్ రాయుల్స్ తొలుత బ్యాటింగ్ ఎంచుకుంది. ఆ జట్టులో మార్పులేమీ లేవు. గత మ్యాచ్ (ఆర్సీబీ) లో ఆడిన జట్టుతోనే రాజస్తాన్ బరిలోకి దిగుతున్నది. గుజరాత్ టైటాన్స్ లో అల్జారీ జోసెఫ్ స్థానంలో లాకీ ఫెర్గూసన్ తుది జట్టులోకి వచ్చాడు. 

రాజస్తాన్ రాయల్స్ : జోస్ బట్లర్, యశస్వి జైస్వాల్, సంజూ శాంసన్ (కెప్టెన్), దేవదత్ పడిక్కల్,  షిమ్రాన్ హెట్మెయర్, రియాన్ పరాగ్, రవిచంద్రన్ అశ్విన్, ట్రెంట్ బౌల్ట్, ప్రసిధ్ కృష్ణ, ఒబెడ్ మెక్ కాయ్, యుజ్వేంద్ర చాహల్

గుజరాత్ టైటాన్స్ : వృద్ధిమాన్ సాహా,  శుభమన్ గిల్, మాథ్యూ వేడ్, హార్ధిక్ పాండ్యా (కెప్టెన్), డేవిడ్ మిల్లర్, రాహుల్ తెవాటియా, రషీద్ ఖాన్,  సాయి కిషోర్, లాకీ ఫెర్గూసన్, యశ్ దయాల్, మహ్మద్ షమీ 

ఐపీఎల్-15 ఫైనల్స్ లో సంజూ శాంసన్ నేతృత్వంలోని రాజస్తాన్ రాయల్స్ టాస్ గెలిచి తొలుత బ్యాటింగ్ ఎంచుకుంది. హార్ధిక్ పాండ్యా సారథ్యంలోని ద గుజరాత్ టైటాన్స్ బౌలింగ్ ఎంచుకుంది. లీగ్ లో తొలిసారిగా ఎంట్రీ ఇచ్చిన గుజరాత్ టైటాన్స్ కు ఇదే తొలి ఫైనల్ కాగా.. తొలి సీజన్ (2008) నెగ్గిన తర్వాత ఫైనల్ కు చేరడం రాజస్తాన్ రాయల్స్ కు ఇదే తొలిసారి.  సీజన్ లో నిలకడగా రాణిస్తున్న ఈ రెండు జట్లలో విజయం ఎవరిని వరిస్తుందో మరికొన్ని గంటల్లో తేలనుంది.