దేశంలోని అతిపెద్ద ప్రైవేట్ కంపెనీ అయిన రిలయన్స్ ఇండస్ట్రీస్ డీమర్జర్ ప్రతిపాదనకు వాటాదారులు, రుణదాతలు నుంచి ఆమోదం లభించింది. రిలయన్స్ ఇండస్ట్రీస్ నుంచి రిలయన్స్ స్ట్రాటజిక్ వెంచర్స్ విభజనను ఆమోదించారు. జియో ఫైనాన్షియల్ సర్వీసెస్ లిమిటెడ్ పేరిట ఏర్పాటు చేసిన కంపెనీ విభజనకు అనుకూలంగా 100 శాతం ఓట్లు పోలయ్యాయి. దీంతో జియో ఫైనాన్షియల్ సర్వీసెస్ స్టాక్ ఎక్స్ఛేంజ్‌లో లిస్టింగ్ మార్గం కూడా క్లియర్ అయ్యింది.
మార్కెట్ క్యాపిటలైజేషన్ పరంగా దేశంలోనే అతిపెద్ద కంపెనీ అయిన రిలయన్స్ ఇండస్ట్రీస్ ప్రస్తుతం డీ మర్జర్ దిశగా అడుగులు వేస్తోంది. ఈ మేరకు ఆ కంపెనీ అధినేత ముఖేష్ అంబానీ ఫైనాన్షియల్ సర్వీసెస్ సెక్టార్ పై కన్నేశారు. ముకేశ్ అంబానీ దేశంలో ఐదవ అతిపెద్ద ప్రైవేట్ ఆర్థిక సంస్థగా అవతరించడానికి సిద్ధంగా ఉన్నారు. ఈ మేరకు ఆయన రిలయన్స్ ఇండస్ట్రీస్ (ఆర్‌ఐఎల్) నుండి రిలయన్స్ స్ట్రాటజిక్ ఇన్వెస్ట్‌మెంట్స్ లిమిటెడ్ (రిలయన్స్ స్ట్రాటజిక్ వెంచర్స్)ని వేరు చేసే ప్రతిపాదనను ఆర్‌ఐఎల్ వాటాదారులు, రుణదాతలు ఆమోదించారు.
కొత్త కంపెనీ పేరు జియో ఫైనాన్షియల్ సర్వీసెస్.
మే 3న రిలయన్స్ మార్కెట్‌కు చేసిన ఫైలింగ్ ప్రకారం విభజనకు అనుకూలంగా 100 శాతం ఓట్లు పోలయ్యాయి. ఇప్పుడు రిలయన్స్ స్ట్రాటజిక్ ఇన్వెస్ట్‌మెంట్స్ లిమిటెడ్ (రిలయన్స్ స్ట్రాటజిక్ వెంచర్స్) కొత్త పేరు జియో ఫైనాన్షియల్ సర్వీసెస్ గా నిర్ణయించారు. రిలయన్స్ ఇండస్ట్రీస్ అక్టోబర్ 2022 ఫలితాల ప్రకటనతో పాటు ఫైనాన్షియల్ సర్వీసెస్ కంపెనీ విభజనను ప్రకటించింది. విభజన ఆమోదం తర్వాత, స్టాక్ ఎక్స్ఛేంజ్‌లో కొత్త కంపెనీ జియో ఫైనాన్షియల్ సర్వీసెస్ లిస్టింగ్‌కు ఇప్పుడు మార్గం క్లియర్ అయ్యింది. కొత్త కంపెనీ BSE , NSEలలో లిస్ట్ అవుతుంది.
అయతే ఈ డీమర్జర్ ద్వారా రిలయన్స్ వాటాదారులకు ఎదురుదెబ్బ తగిలే అవకాశం ఉంది. ఎందుకంటే, డీమెర్జర్ స్కీమ్ కింద, RIL షేర్ హోల్డర్లు తమ వద్ద ఉన్న ప్రతి షేరుకు జియో ఫైనాన్షియల్ సర్వీసెస్‌లో ఒక షేరును పొందుతారు. స్టాక్ మార్కెట్‌కు ఇచ్చిన ఫైలింగ్ ప్రకారం, విభజన తర్వాత ఏర్పడిన కొత్త కంపెనీ జియో ఫైనాన్షియల్ సర్వీసెస్‌కు మాజీ ఐసిఐసిఐ బ్యాంక్ బాస్ కెవి కామత్ నాన్-ఎగ్జిక్యూటివ్ ఛైర్మన్‌గా ఎన్నికయ్యారు. NBFC . ఫిన్‌టెక్ స్పేస్‌లో ఆధిపత్యం చెలాయించడానికి కంపెనీ వారి అనుభవాన్ని ఉపయోగించుకోవచ్చు.
దీపావళికి ముందు అంటే అక్టోబర్ నెలలో రిలయన్స్ ఇండస్ట్రీస్ జియో ఫైనాన్షియల్ సర్వీసెస్ లిమిటెడ్‌ను స్టాక్ ఎక్స్ఛేంజ్‌లో లిస్ట్ చేయవచ్చని ఊహిస్తున్నారు. అయితే, ఈ ప్రక్రియను పూర్తి చేయడానికి ముందు రెగ్యులేటర్ నుండి అనుమతి అవసరం. ఈ డీమర్జర్ విషయంలో బ్రోకరేజీ సంస్థలు చాలా ఉత్సాహంగా ఉన్నాయి.
జెఫరీస్ అంచనా ప్రకారం, జియో ఫైనాన్షియల్ సర్వీసెస్ నికర విలువ రూ. 28,000 కోట్లుగా అంచనా వేసింది. అలాగే కంపెనీ రిలయన్స్ ఇండస్ట్రీస్‌లో 6.1 శాతం వాటాను కలిగి ఉంది, దీని విలువ రూ. 96,000 కోట్ల కంటే ఎక్కువ. జియో ఫైనాన్షియల్ సర్వీసెస్ డిజిటల్ , రిటైల్ రంగంలో రిలయన్స్ యొక్క బలం నుండి గొప్పగా ప్రయోజనం పొందుతుందని JP మోర్గాన్ తన నోట్స్‌లో పేర్కొంది. రిలయన్స్ ఇండస్ట్రీస్ నుండి ఫైనాన్షియల్ సర్వీసెస్ కంపెనీ డీమర్జర్ ఆమోదం పొందిన తరువాత, రిలయన్స్ స్టాక్ గురువారం ర్యాలీని చూసింది. రిలయన్స్ షేరు 1.16 శాతం లాభంతో రూ.2447 వద్ద ముగిసింది.