Indian Economy: కొవిడ్​ నష్టం రూ. 52 లక్షల కోట్లు.. ఆర్థిక వ్యవస్థ కోలుకోవాలంటే 12 ఏళ్లు..!

కొవిడ్-19 మహమ్మారి వల్ల సంభవించిన నష్టాల నుంచి భారత దేశ ఆర్థిక వ్యవస్థ కోలుకోవాలంటే దాదాపు 10 సంవత్సరాలు పడుతుందని భారతీయ రిజర్వు బ్యాంకు (ఆర్బీఐ) నివేదిక అంచనా వేసింది. ఈ మహమ్మారి వల్ల ఆర్థిక వ్యవస్థపై పడిన ప్రభావాన్ని విశ్లేషిస్తూ ఈ నివేదికను రూపొందించింది.   

కరోనా మహమ్మారి మిగిల్చిన నష్టం గురించి కొత్తగా చెప్పాల్సిన అవసరం లేదు. రెండేళ్ల వ్యవధిలో ఎందరో ప్రాణాలు కోల్పోయారు. ముఖ్యంగా ప్రపంచ దేశాల ఆర్థిక వ్యవస్థ.. ఎన్నడూ లేని విధంగా దెబ్బతింది. భారత ఆర్థిక వ్యవస్థపైనా కొవిడ్​ ప్రభావం దారుణంగానే పడింది. అయితే.. కొవిడ్​ సృష్టించిన అల్లకల్లోలం నుంచి పూర్తిగా కోలుకునేందుకు.. భారత ఆర్థిక వ్యవస్థకు 12 ఏళ్లు పడుతుందని ఆర్​బీఐ నివేదిక వెల్లడించింది.

భారత ఆర్థిక వ్యవస్థపై కొవిడ్​ ప్రభావం అనే అంశం మీద 'స్కార్స ఆఫ్​ పాండెమిక్​' అనే పేరుతో ఆర్​బీఐ ఈ నివేదికను రూపొందించింది. కరోనా కాలంలో దేశానికి రూ. 52 లక్షల కోట్ల నష్టం వాటిల్లిందని అంచనా వేసింది.2020 మార్చిలో కొవిడ్​ తొలిసారి దేశం తలుపుతట్టింది. ఫలితంగా ప్రభుత్వం లాక్​డౌన్​ అస్త్రాన్ని ప్రయోగించింది. ఇక కోలుకుంటున్న దశలో రెండో వేవ్​.. 2021 ఏప్రిల్​లో దేశాన్ని ఉక్కిరిబిక్కిరి చేసింది. అంతా బాగానే ఉంది అనుకున్నప్పుడు.. మూడో వేవ్​ కారణంగా 2022 జనవరిలో వ్యాపారాలు మళ్లీ మూతపడ్డాయి. ఇలా కొవిడ్​ వేవ్​లతో భారత జీడీపీ వృద్ధి సైతం దెబ్బతిందని ఆర్​బీఐ నివేదిక పేర్కొంది.
కరోనాతో భారత్​కు 2020-21లో రూ. 19.1లక్షల కోట్లు, 2021-22లో 17.1లక్షల కోట్లు, 2022-23లో 16.4లక్షల కోట్ల రూపాయల నష్టం వాటిల్లిందని నివేదిక పేర్కొంది. 

అయితే కరోనాకు అడ్డుకట్టవేసేందుకు ప్రయోగించిన అస్త్రాల ఫలితాలు.. భవిష్యత్తులో దేశానికి అందుతాయని ఆర్​బీఐ నివేదిక అభిప్రాయపడింది. కొవిడ్​ ముందున్న ప్రపంచాన్ని తీసుకురావడం కష్టమని, కరోనా అనంతరం ఏర్పడిన మార్పులతోనే జీవించాలని స్పష్టం చేసింది. ఈ నివేదికను ఆర్​బీఐకు చెందిన డీఈపీఆర్​(డిపార్టమెంట్​ ఆఫ్​ ఎకనామిక్​ అండ్​ పాలసీ రీసెర్చ్​) రూపొందించింది. రిపోర్టులోని అంశాలు పూర్తిగా డీఆర్​పీఆర్​దేనని, తమకు సంబంధం లేదని ఆర్​బీఐ వెల్లడించింది.

కొవిడ్-19 మహమ్మారి సమయంలో భారత దేశ ఆర్థిక వ్యవస్థకు జరిగిన ఆదాయ నష్టం దాదాపు రూ.52 లక్షల కోట్లు అని అంచనా వేసింది. 2021-22 ఆర్థిక సంవత్సరానికి రిపోర్ట్ ఆన్ కరెన్సీ అండ్ ఫైనాన్స్ (ఆర్‌సీఎఫ్)లో ‘మహమ్మారి మచ్చలు’ అనే అధ్యాయంలో ఈ మహమ్మారి ప్రభంజనాలు పదే పదే రావడం వల్ల నిలకడగా ఆర్థిక వ్యవస్థ కోలుకోవడానికి ఆటంకాలు ఏర్పడినట్లు తెలిపింది. జీడీపీ (స్థూల దేశీయోత్పత్తి)లో త్రైమాసిక ధోరణులు ఈ మహమ్మారి ఆటుపోట్లకు గురైనట్లు పేర్కొంది. 2020-21 తొలి త్రైమాసికంలో తీవ్రమైన క్షీణత నమోదైన తర్వాత 2021-22 ఏప్రిల్-జూన్ మధ్య కాలంలో రెండో ప్రభంజనం వచ్చే వరకు ఆర్థిక వ్యవస్థ వేగం క్రమంగా పుంజుకుందని తెలిపింది. అదే విధంగా 2022 జనవరిలో మూడో ప్రభంజనం వల్ల ఆర్థిక వ్యవస్థ కోలుకునే ప్రక్రియకు పాక్షికంగా దెబ్బతగిలిందని పేర్కొంది.