ప్రపంచ సంపన్నుల జాబితా నుంచి గౌతమ్ అదానీ నాలుగో స్థానానికి పడిపోయారు. గతంలో గౌతమ్ అదానీ ప్రపంచంలోని అత్యంత సంపన్నల జాబితాలో మూడవ స్థానంలో నిలిచారు.
ప్రపంచ సంపన్నుల జాబితా నుంచి గౌతమ్ అదానీ నాలుగో స్థానానికి పడిపోయారు. అదానీ గ్రూప్ వ్యవస్థాపకుడు, బిలియనీర్ , భారతీయ వ్యాపారవేత్త గౌతమ్ అదానీ గతంలో ప్రపంచంలోని అత్యంత సంపన్నుల జాబితాలో మూడవ స్థానంలో నిలిచారు. అయితే తాజా బ్లూమ్‌బెర్గ్ బిలియనీర్స్ ఇండెక్స్‌లో అదానీ ప్రస్తుతం నాల్గవ స్థానంలో ఉన్నారు. గత 24 గంటల్లో అదానీ నికర విలువ 872 మిలియన్ డాలర్లకు పడిపోయింది. దీంతో ప్రపంచంలోని మొదటి మూడు సంపన్నుల జాబితాలో అదానీ తప్పుకున్నారు.
అమెజాన్ వ్యవస్థాపకుడు జెఫ్ బెజోస్ మూడో స్థానంలో నిలిచారు. అదే సమయంలో బెర్నార్డ్ ఆర్నాల్ట్ ప్రపంచంలోనే అత్యంత ధనవంతుడిగా నిలిచారు. ప్రఖ్యాత వ్యాపారవేత్త , పెట్టుబడిదారుడు బెర్నార్డ్ ఆర్నాల్ట్ లూయిస్ విట్టన్ అనే ప్రపంచంలోనే అతిపెద్ద లగ్జరీ వస్తువుల కంపెనీకి సహ వ్యవస్థాపకుడు, ఛైర్మన్ , చీఫ్ ఎగ్జిక్యూటివ్ గా ఉన్నారు. ఇక టెస్లా వ్యవస్థాపకుడు ఎలాన్ మస్క్ రెండో స్థానంలో ఉన్నారు. రిలయన్స్ గ్రూప్ ఛైర్మన్ , భారతదేశంలో రెండవ అత్యంత సంపన్న వ్యక్తి ముఖేష్ అంబానీ ఇప్పుడు 12వ స్థానంలో ఉన్నారు. అంతకుముందు ముఖేష్ అంబానీ తొమ్మిదో స్థానంలో ఉన్నారు.
ప్రపంచంలోని టాప్ 5 ధనవంతులు , వారి నికర ఆస్తుల విలువ
1. బెర్నార్డ్ ఆర్నాల్ట్ - 188 బిలియన్ డాలర్లు
2. ఎలోన్ మస్క్ - 145 బిలియన్ డాలర్లు
3. జెఫ్ బెజోస్ - 121 బిలియన్ డాలర్లు
4. గౌతమ్ అదానీ - 120 బిలియన్ డాలర్లు
5. బిల్ గేట్స్ - 111 బిలియన్ డాలర్లు
చైనాలో మాంద్యం దెబ్బ 93 శాతం సంపద కోల్పోయిన చైనీస్ బిలియనీర్ హుయ్ కా యాన్
చైనాలోని అత్యంత సంపన్నులలో ఒకరైన హుయ్ కా యాన్ తన సంపదలో 93 శాతం కోల్పోయాడు. హుయ్ కా యాన్ చైనాలోనే అతిపెద్ద రియల్ ఎస్టేట్ సంస్థ అయిన ఎవర్‌గ్రాండే గ్రూప్‌కు చైర్మన్. చైనా ప్రభుత్వ నూతన విధానం కారణంగా ఎవర్‌గ్రాండే భారీ క్షీణతను ఎదుర్కొంటోంది. కంపెనీ బాధ్యతలను తీర్చేందుకు అన్నీ అమ్ముడుపోవడంతో హుయ్ కా యాన్ సంపద భారీగా పడిపోయింది.
బిలియనీర్ హుయ్ కా యాన్ ఒకప్పుడు 42 బిలియన్ల విలువను కలిగి ఉన్నాడు, అతను ఆసియాలో రెండవ అత్యంత సంపన్న వ్యక్తిగా నిలిచాడు. అయితే బ్లూమ్‌బెర్గ్ బిలియనీర్స్ ఇండెక్స్ ప్రకారం హుయ్ కా యాన్ నికర విలువ ఇప్పుడు 3 బిలియన్ డాలర్ల కు పడిపోయింది.
ఎవర్‌గ్రాండే అనేది 1996లో దక్షిణ చైనాలోని గ్వాంగ్‌జౌలో హుయ్ కా యాన్ చేత స్థాపించబడిన సంస్థ. నిర్మాణ రంగంలో ఉన్న అవకాశాలను కంపెనీ ఉపయోగించుకోగలిగింది. దీంతో ప్రపంచంలోని 500 అతిపెద్ద కంపెనీల్లో ఎవర్‌గ్రాండే ఒకటిగా అవతరించింది. అయితే పెద్ద మొత్తంలో డబ్బు తీసుకున్న గుత్తాధిపత్య కంపెనీలను నియంత్రించేందుకు చైనా ప్రభుత్వం కొత్త విధానాలను ప్రవేశపెట్టడంతో ఎవర్‌గ్రాండే తన బాధ్యతలను నెరవేర్చుకోవడానికి కష్టపడింది. ఎవర్‌గ్రాండే కంపెనీ బ్యాంకు రుణం 300 బిలియన్ డాలర్ల కంటే ఎక్కువ అంటే 22 లక్షల కోట్లకు పైగా ఉంది.
తన కంపెనీని కాపాడుకోవడానికి, హుయ్ కా యాన్ తన ఇళ్లు మరియు ప్రైవేట్ జెట్‌లను విక్రయించడం ప్రారంభించాడు. తన క్షీణిస్తున్న ఆదాయంతో పాటు హుయ్ చైనీస్ పీపుల్స్ పొలిటికల్ కన్సల్టేటివ్ కాన్ఫరెన్స్ (CPPCC) నుండి రాజకీయంగా ఒంటరిగా మారాడు. రియల్ ఎస్టేట్ తో పాటు హుయ్ కా యాన్‌కు ఫైనాన్స్, ఎలక్ట్రిక్ కార్లు, ఆహారం, ఆల్కహాలిక్ పానీయాలు థీమ్ పార్కులలో కూడా వ్యాపారాలు ఉన్నాయి.