విజయ్ మాల్యాకు టీటీడీ షాక్.. గెస్ట్‌హౌస్ నిర్మాణానికి కేటాయించిన స్థలం రద్దు..

తిరుమల తిరుపతి దేవస్థానం (టీటీడీ) గతంలో అతిథి గృహం నిర్మాణం కోసం వ్యాపారవేత్త విజయ్ మాల్యాకు కేటాయించిన స్థలాన్ని రద్దు చేసింది. గతంలో తిరుమలలోని ధర్మగిరిలో విజయ్ మాల్యాకు భూమిని కేటాయించారు. అయితే టీటీడీ బోర్డు ఇప్పుడు ఆ స్థలాన్ని కాటేజ్ డొనేషన్ పథకం కింద కొత్త దాతకు కేటాయించాలని యోచిస్తోంది. వివరాలు.. 1991 నవంబర్ 27న టీటీడీ ధర్మకర్తల మండలి తీర్మానం ద్వారా విజయ్ మాల్యాకు భూమిని కేటాయించింది.టీటీడీ తీర్మానాన్ని ఆమోదించిన రెండేళ్ల తర్వాత మాల్యా 1993 డిసెంబర్ 8న టీటీడీతో ప్రాథమిక ఒప్పందాన్ని కుదుర్చుకున్నారు.

తొమ్మిది సూట్లతో అతిథి గృహం నిర్మాణాన్ని 1997 డిసెంబర్ 24న  ప్రారంభించారు. దీన్ని టీటీడీ ట్రస్టుకు అప్పగించారు. దానికి ‘‘వెంకట విజయం’’ అని పేరు పెట్టారు. అయితే.. తిరుపతి ట్రస్ట్ లేదా మాల్యా తుది ఒప్పందంపై సంతకం చేయలేదు. ఇక, 24 సంవత్సరాల తర్వాత మాత్రమే మాల్యాతో తిరిగి సంబంధాలు పెట్టుకోవాలని టీటీడీ నిర్ణయించుకుంది. 2017 అక్టోబర్ 11న తన ఉత్తర్వుల ద్వారా ఈ విషయాన్ని తెలియజేసింది. 

ఇదిలాఉంటే, కాటేజ్ డొనేషన్ పథకం కింద ఇప్పటికే ఉన్న అతిథి గృహాల పునరుద్ధరణ, పునర్నిర్మాణంపై అధ్యయనం చేసేందుకు ట్రస్ట్ బోర్డు ఇటీవల ఏర్పాటు చేసిన కమిటీ.. మాల్యాతో టీటీడీ తుది ఒప్పందం కుదుర్చుకోలేదని.. దాతకు ఎలాంటి అధికారాలు కల్పించడం లేదని బోర్డుకు తెలియజేసింది.

ఇక, ఆ అతిథి గృహాన్ని తనిఖీ చేసిన టీటీడీ ఇంజినీరింగ్ విభాగం ఏళ్ల తరబడి నిర్వహణ లేకపోవడంతో అక్కడ నివాసిత అనుకూల పరిస్థితులు లేవని ట్రస్ట్ బోర్డుకు తెలిపింది. గెస్ట్ హౌస్ ఫాల్స్ సీలింగ్ పూర్తిగా పాడైపోయిందని, స్లాబ్ లీకేజీలు ఉన్నాయని గుర్తించింది. చెక్క ప్యానలింగ్, చెక్క సీలింగ్, వాటర్ లైన్లు, శానిటరీ ఫిట్టింగ్‌లు కూడా దెబ్బతిన్నాయని ఇంజనీరింగ్ విభాగం తన నివేదికలో పేర్కొంది. ఈ క్రమంలోనే 2023 మార్చి 21 టీటీడీ ట్రస్టు బోర్డు.. విజయ్ మాల్యాకు షోకాజ్ నోటీసు జారీ చేసింది. అతిథి గృహాన్ని విడిచిపెట్టి, చాలా సంవత్సరాలుగా దాని నిర్వహణను పట్టించుకోకుండా వదిలేసినందుకు ఆయన కేటాయించిన భూమిని ఎందుకు రద్దు చేయకూడదో తెలియజేయాలని కోరింది.

అయితే ఆ నోటీసు బెంగళూరులో మాల్యా పాత చిరునామాకు పంపబడటంతో.. ఆ నోటీసు 2023 ఏప్రిల్ 3న టీటీడీకి తిరిగి వచ్చింది. మరోవైపు రుణాల ఎగ‌వేత కేసులో ఆరోప‌ణ‌లు ఎదుర్కొంటూ విదేశాల్లో త‌ల‌దాచుకుంటున్న మాల్యాతో సంప్రదింపులు జరపడానికి అన్ని దారులు మూసుకుపోయాయి. ఈ క్రమంలోనే 2023 జూన్ 19న టీటీడీ ట్రస్టు.. మాల్యాకు కేటాయించిన గెస్ట్ హౌస్ స్థలాన్ని రద్దు చేసే తీర్మానాన్ని ఆమోదించింది. వెంకట విజయం అతిథి గృహం పునర్నిర్మాణం లేదా పునర్నిర్మాణం కోసం.. కొత్త దాత నుంచి రూ. 5 కోట్లు లేదా అంతకంటే ఎక్కువ విరాళాన్ని కోరుతున్నట్లు ప్రకటించింది.