కరివేపాకు మొక్క గుబురుగా పెరగాలంటే ఇలా చేయండి చాలు!

కరివేపాకు మొక్క పెరుగుదలకు పుల్లటి మజ్జిగ చాలా మంచిది. కొద్దిగా పుల్లటి మజ్జిగ లేదా పెరుగును నీటిలో బాగా కలిపి మొక్క మొదట్లో పోయాలి.

గంజి నీళ్లను పారేయకుండా పక్కనపెట్టి, రెండు మూడు రోజులు పులియబెట్టాలి. ఆ తర్వాత దానికి సమానంగా నీళ్లు కలిపి కరివేపాకు మొక్క మొదట్లో పోయవచ్చు.

కరివేపాకు మొక్క పైకి పొడవుగా పెరిగిపోకుండా, పక్కలకు కొమ్మలు వచ్చి గుబురుగా మారాలంటే.. దాని చిగుళ్లను తరచుగా తుంచుతూ ఉండాలి. 

కరివేపాకు మొక్కకు సూర్యరశ్మి బాగా తగలాలి. రోజూ కనీసం 5-6 గంటల పాటు నేరుగా ఎండ తగిలే ప్రదేశంలో మొక్కను నాటడం మంచిది.

మట్టిలో ఎప్పుడూ తేమ ఉండాలి. కానీ నీరు నిలిచిపోకూడదు. నీరు నిలిస్తే వేర్లు కుళ్లిపోతాయి. కాబట్టి పైమట్టి ఆరిన తర్వాతే మళ్లీ నీళ్లు పోయాలి.

వాడిన టీ పొడిని కడిగి ఆరబెట్టాలి. గుడ్డు పెంకులను బాగా పొడి చేయాలి. ఈ రెండింటినీ కరివేపాకు మొక్క మొదట్లో మట్టిలో కలిపితే.. మొక్కకు అవసరమైన నైట్రోజన్, కాల్షియం అందుతాయి.

నెలకొకసారి కరివేపాకు మొక్క మొదట్లో మట్టిని కొద్దిగా తవ్వి, కాస్త వేప పిండి వేయాలి. ఇది మొక్కను రోగాలు, పురుగుల నుంచి కాపాడుతుంది.