పవన్ కుమార్ తెలుగు కవిత: పుడమికి పర్యాయపదం
By telugu team | First Published Feb 12, 2021, 1:38 PM ISTరైతు ఉద్యమానికి సంఘీభావంగాఎన్ పవన్ కుమార్ రాసిన 'అన్నదాత' కవిత చదవండి.
అతనిదొక సామాన్య జీవితం
కానీ ప్రపంచానికి తిండి పెట్టగలడు
తానోక మురికి మనిషి
కానీ సుగంధ ద్రవ్యాలను ఉత్పత్తి చేయగలడు
ఖరీదైన దుస్తులు ధరించడతను
వాటి ముడిసరుకు పండిస్తాడు
పంచభక్ష పరమన్నాలు రుచించ వతనికి
పచ్చడి మెతుకులే తన ఆకలి
కటికోడు కాదతను జంతు ప్రేమికుడతను
పట్టు పరుపుల మీద పవలించడతను
పచ్చని వొడ్లపై సేద తీరుతాడతను
బంగళాలు, భవంతులు కావాలనుకోడు
పూరిగుడిసే తన అందాల మేడ
లగ్జరీ కార్లు నడపడతను ఎడ్లబండే తన వాహనం
సామాన్య వ్యక్తి కాదతను
ప్రపంచానికి మార్గదర్శకుడతను
పాలకుల నయ వంచనకు, దళారుల దోపిడీకి బలైపోతున్న శ్రమజీవతను
ఆత్మగౌరవం లేని వ్యక్తి కాదతను
పరువు కోసం ప్రాణం తీసుకొనే వ్యక్తతను
మోసగాడు కాదతను కలిసి రాని కాలానికి బాధ్యుడుతను
సూర్యోదయం తరువాత మొదలై సూర్యాస్తమయం లోపు ముగించే ఉద్యోగం కాదతనిది
కాలం కాటేసిన, ప్రకృతి కన్నెర్ర చేసిన
ధైర్యంగా నిలబడే గుండె నిబ్బరం అతనిది
బలహీనుడు కాదతను బీడు భూములను పచ్చని పంట పొలాలు గా మార్చే కర్షకుడతను
ఆత్మబంధువతను
జీతం లేని కూలి అతను
తనంటే పుడమి పుడమి అంటే తాను.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి