మంకీ పాక్స్ వైరస్ కలకలం.. యూకేలో కేసు నమోదు.. ఈ వైరస్ వ్యాప్తి, లక్షణాలు, చికిత్స, ఇతర వివరాలు ఇవే

యూకేలో మరోసారి మంకీ పాక్స్ వైరస్ కలకలం రేపింది. నైజీరియాకు వెళ్లి వచ్చిన ఓ వ్యక్తికి మంకీ పాక్స్ వైరస్ సోకినట్టు తేలింది. ఈ విషయాన్ని యూకే హెల్త్ సెక్యూరిటీ ఏజెన్సీ ధ్రువీకరించింది. ఈ నేపథ్యంలోనే మంకీ పాక్స్ వైరస్ పుట్టుక, వ్యాప్తి, లక్షణాలు, చికిత్సల గురించి రేఖామాత్రంగా తెలుసుకుందాం.

న్యూఢిల్లీ: కరోనాతో విలవిల్లాడిన దేశాలకు మరో డేంజర్ న్యూస్ ఎదురైంది. తాజాగా, యూకేలో మంకీ పాక్స్ వైరస్ కలకలం రేపింది. నైజీరియాకు వెళ్లి వచ్చిన యూకే వ్యక్తిలో మంకీ పాక్స్ వైరస్ రిపోర్ట్ అయింది. యూకే హెల్త్ సెక్యూరిటీ ఏజెన్సీ ఈ విషయాన్ని ధ్రువీకరించింది. మంకీ పాక్స్ వైరస్ ఇన్ఫెక్షన్ చాలా అరుదుగా జరుగుతాయని, భయపడాల్సిన అవసరం లేదని వివరించింది. ఇది అంత సులువుగా వ్యాపించే వైరస్ కాదని తెలిపింది. ఈ వైరస్ సాధారణంగా ఎక్కువగా వ్యాప్తి చెందే వైరస్ కాదని, ఇది చాలా తక్కువ మందిలో మాత్రమే ఎక్కువ తీవ్రత కలిగిస్తుందని వివరించింది. ఈ వైరస్‌ బారిన పడ్డ చాలా మంది పేషెంట్లు కూడా సులువగా రికవరీ అయ్యారని పేర్కొంది.

మంకీ పాక్స్ కేసు 2018లో కూడా యూకేలో వెలుగులోకి వచ్చింది. అప్పటి నుంచి ఈ వైరస్ కేసులు వేళ్ల మీద లెక్కించిన స్థాయిలో తక్కువగానే రిపోర్టు అయ్యాయి.

మంకీ పాక్స్ లక్షణాలు
స్మాల్ పాక్స్‌కు ఉండే లక్షణాలే చాలా వరకు మంకీ పాక్స్ వైరస్ లక్షణాలుగా ఉంటాయి. జ్వరం, ఒళ్లు నొప్పులు, తలనొప్పి, కండరాల్లో నొప్పి, తీవ్ర నీరసం వంటివి మంకీ పాక్స్ లక్షణాలుగా చెప్పొచ్చు. ముఖం, చేతులపై చర్మంపై దద్దుర్లు వస్తాయి. సాధారణంగా ఈ వైరస్ మన బాడీలోకి చేరిన ఆరు నుంచి 13 రోజుల్లో లక్షణాలు కనిపిస్తాయి. ఒక్కోసారి 5 నుంచి 21 రోజుల వ్యవధి కూడా పడుతుంది. 

ఈ మంకీ పాక్స్ వైరస్ తొలి సారి 1958లో కనిపించింది. కోతులను కొన్ని కాలనీలుగా విభజించి వాటిపై పరిశోధనలు చేశారు. ఆ రీసెర్చ్ జరుగుతున్న సమయంలోనే ఈ వైరస్ వెలుగులోకి వచ్చింది. దీంతో దీనికి మంకీ పాక్స్ అనే పేరే పెట్టేశారు.

కాగా, ఈ వైరస్ తొలిసారి డెమోక్రటిక్ రిపబ్లిక్ ఆఫ్ ద కాంగో‌లో 1970లో చోటుచేసుకుంది. 50 ఏళ్ల క్కరితం తొలిసారి ఈ వైరస్ మనుషఉల్లో కనిపించింది. 

ఈ వైరస్ సోకిన వ్యక్తుల నుంచి ఇతరులకు వైరస్ సోకవచ్చు. ఈ వైరస్ మనిషి ద్రవాల నుంచి ఇతరులకు సోకే అవకాశం ఉన్నది. రక్తం ద్వారా కూడా వ్యాపించవచ్చు. 

ఎలుకలు, ఉడుతల వంటి జాతులతో ఈ వైరస్ ఇతరులకు వ్యాపించే అవకాశం ఉన్నది. అలాగే, ఈ వైరస్ సోకిన జంతువును సరిపడా ఉష్ణోగ్రతల వద్ద ఉడకబెట్టకుంటే కూడా మనిషికి ఈ వైరస్ సోకే ముప్పు ఉన్నది.

మంకీ పాక్స్ వైరస్‌కు ప్రత్యేకమైన చికిత్స అందుబాటులో లేదని ప్రపంచ ఆరోగ్య సంస్థ తెలిపింది. స్మాల్ పాక్స్ వైరస్‌ నివారణకు ఇచ్చే టీకాను మంకీ పాక్స్ వైరస్‌కు కూడా ఇవ్వొచ్చు. ఈ టీకా 85 శాతం మంకీ పాక్స్ వైరస్‌ను ఎదుర్కొంటుందని నిపుణులు చెప్పారు.