గ్రామీ నామినేటెడ్ సింగర్ వరిజాశ్రీ, ప్రముఖ గాయకుడు రఘు దీక్షిత్ 2025లో పెళ్లి చేసుకున్నారు. అప్పుడు రఘు వయసు 50 కాగా, వరిజాశ్రీకి 34. తమ మధ్య ఉన్న 16 ఏళ్ల వయసు తేడాపై రఘు దీక్షిత్ 'హిందుస్థాన్ టైమ్స్'కు ఇచ్చిన ఇంటర్వ్యూలో మొదటిసారి మాట్లాడారు.
"మేమిద్దరం కలిసి బాగా నవ్వుకుంటాం, సంగీతం సృష్టిస్తాం, ప్రయాణాలు చేస్తాం. ఒకరికొకరం స్పేస్ ఇచ్చుకుంటాం. దాన్ని నేను గౌరవిస్తాను. ఇద్దరికీ సంగీతం అంటే ప్రాణం. కానీ మా బంధం కేవలం సంగీతానికే పరిమితం కాదు. ఒకరి ఎదుగుదలకు మరొకరం ప్రోత్సాహం ఇచ్చుకుంటాం" అని రఘు దీక్షిత్ చెప్పారు.
24
అందరి కళ్లు మాపైనే ఉంటాయి
"వరిజాశ్రీ అద్భుతమైన సంగీతకారిణి, అంతకుమించి మంచి మనిషి. పబ్లిక్ ఫిగర్స్గా ఉన్నప్పుడు అందరి కళ్లూ మాపైనే ఉంటాయని తెలుసు. మొదట్లో ఇది మాకు చాలా బాధ కలిగించింది. కానీ ఇంటర్నెట్ను సీరియస్గా తీసుకోకూడదని అర్థమైంది. అప్పుడే సంతోషంగా ఉండగలం" అని ఆయన అన్నారు.
34
ఎవరికీ వివరణ ఇవ్వాల్సిన పనిలేదు
"మాకు ముఖ్యమైన వాళ్లు మాతోనే ఉన్నారు. నిజమైన అభిమానులు మాకు ప్రేమను, ఆశీర్వాదాలను అందించారు. ఇంతకంటే ఇంకేం కావాలి? వీటన్నింటినీ మించి, మేమిద్దరం ఎవరికీ వివరణ ఇవ్వాల్సిన అవసరం ఉందని అనుకోలేదు" అని రఘు దీక్షిత్ స్పష్టం చేశారు. రఘు దీక్షిత్ చేసిన ఈ వ్యాఖ్యలు వరిజాతో ఏజ్ గ్యాప్ గురించే.
"ప్రేమ అనేది ఓ విచిత్రమైన విషయం. అది ఇతరులకు కనిపించని అందాన్ని చూస్తుంది. మేమిద్దరం చాలా కాలంగా స్నేహితులం. ఆ తర్వాత పెళ్లి చేసుకోవాలని నిర్ణయించుకున్నాం. ప్రేమ, గౌరవం, నమ్మకంపై ఆధారపడినప్పుడు బయట వచ్చే గాసిప్లు మమ్మల్ని ఏమీ చేయలేవు. నేను వరిజాతో నా జీవితాన్ని పంచుకుంటున్నాను. ఇది నా జీవితంలో అత్యంత సంతృప్తినిచ్చిన ప్రయాణం" అని ఆయన చెప్పారు.
రఘు దీక్షిత్ సింగర్ గా, మ్యూజిక్ కంపోజర్ గా రాణిస్తున్నారు. రఘు దీక్షిత్ తెలుగులో మహేష్ బాబు శ్రీమంతుడు, అల్లు అర్జున్ సన్నాఫ్ సత్యమూర్తి, ఎన్టీఆర్ నాన్నకు ప్రేమతో లాంటి చిత్రాల్లో సూపర్ హిట్ సాంగ్స్ పాడారు.
