సన్‌ఫ్లవర్స్ సూర్యుడి వైపే ఎందుకు తిరిగి ఉంటాయో తెలుసా?

ప్రపంచంలోని అందమైన పువ్వులలో పొద్దుతిరుగుడు ఒకటి. ఇది ఎన్నో ప్రయోజనాలున్న పువ్వు కూడా. వంట నూనెల కోసం దీన్ని ఎక్కువగా ఉపయోగిస్తుంటారు.

పొద్దుతిరుగుడు పువ్వులు ఎప్పుడూ సూర్యుడు ఉన్నవైపే తిరిగివుంటాయి... ఇదే వీటి ప్రత్యేకత. వీటికి సూర్యుడితో విడదీయరాని బంధం ఉంది.

సూర్యుడు తూర్పున ఉదయించి పడమరన అస్తమిస్తాడు. పొద్దుతిరుగుడు పువ్వు కూడా సూర్యుడితో పాటే తూర్పు నుంచి పడమరకు తిరుగుతుంది. రాత్రిపూట కూడా మరుసటి రోజు సూర్యుడి కోసం ఎదురుచూస్తుంది.

పొద్దుతిరుగుడు పువ్వుల ఈ ప్రవర్తనను సైన్స్ పరిభాషలో 'హీలియోట్రోపిజం' (Heliotropism) అంటారు. అంటే ఏమిటో తెలుసుకుందాం.

పొద్దుతిరుగుడు మొక్కల పెరుగుదలలో హార్మోన్లు కీలక పాత్ర పోషిస్తాయి. ఈ పువ్వు కింద ఉండే ఆకుల్లో ఈ హార్మోన్లు తయారవుతాయి. అక్కడి నుంచి పువ్వు కాడకు చేరుకుంటాయి.

సూర్యరశ్మి పడే దిశకు వ్యతిరేక దిశలో ఈ హార్మోన్లు ఎక్కువగా పోగవుతాయి. ఆ భాగంలో కణాలు వేగంగా పెరిగి కాడపై ఒత్తిడిని కలిగిస్తాయి. దీంతో పువ్వు కాంతి ఉన్న సూర్యుడి వైపు వంగుతుంది.

సూర్యుడు తూర్పున ఉన్నప్పుడు, కాడ పశ్చిమ భాగంలో కణాలు వేగంగా పెరుగుతాయి. దీంతో పువ్వు తూర్పు వైపు తిరుగుతుంది. సూర్యుడు పడమరకు వెళ్లేకొద్దీ, ఈ ప్రక్రియ కొనసాగుతుంది.