వార్నీ.. కింగ్ కోబ్రాతోనే గేమ్స్.. తికమక పెట్టి, కాటునుంచి తప్పించుకుంటూ.. ఒళ్ళు జలదరించే ఫీట్...వీడియో వైరల్
పాముతో పరాచికాలాడారు ఇద్దరు యువకులు.. కింగ్ కోబ్రాను తికమకపెడుతూ కాసేపు కోపం తెప్పించారు. ఈ వీడియో ఇప్పుడు వైరల్ గా మారింది.
పాము కనిపిస్తే ఏం చేస్తాం? బాబోయ్ అంటూ.. ప్రాణ భయంతో పరుగులు తీస్తాం.. కాస్త ధైర్యవంతులైతే.. కర్ర పట్టుకుని పామును తరిమికొట్టడమో.. చంపడమో చేస్తుంటారు. ఇక అత్యంత విషపూరితమైన పామైన కింగ్ కోబ్రా.. ఎదురుపడితే?.. ఒక్కసారిగా వెన్నులో నుంచి జలదరింపు మొదలవుతుంది. అత్యంత వేగవంతమైన కదలికలతో ఒక్క కాటుతో మనిషి ప్రాణాల్ని క్షణాల్లో అనంతవాయువుల్లో కలిసిపోయేలా చేస్తుంది.
అలాంటి పాముతో ఇద్దరు వ్యక్తులు ఆటలాడారు. ఆ పామును.. అటుఇటు పిలుస్తూ…దాన్ని ఏమారుస్తూ.. కాటు నుంచి తప్పించుకుంటూ.. కాసేపు ఆడుకున్నారు. ఆ తరువాత నెమ్మదిగా కింగ్ కోబ్రా తల మీద ముద్దు పెట్టారు. అది కూడా చక్కగా పెంపుడు పాములా తలవంచి.. ముద్దందుకుంది. ఇది చూడడానికి చాలా సరదాగా ఉన్నప్పటికీ.. వాళ్ళు ఆడుకునేది కుక్కపిల్లతో కాదు.. నిలువెత్తు పాముతో అనేది గుర్తొచ్చినప్పుడు.. భయం నరాలను తెగేలా చేస్తుంది.
ఇప్పుడు దీనికి సంబంధించిన వీడియో ఒకటి నెట్టింట్లో వైరల్ గా మారడంతో అది చూసిన నెటిజన్లు అవాక్కవుతున్నారు. గుర్తుతెలియని అటవీ ప్రాంతంలో ఓ ఇద్దరు యువకులకు కింగ్ కోబ్రా తారసపడింది. అది మనుషుల్లా తన జోలికి రాకపోయినా హాని చేసే గుణం లేనిది కావడంతో… తన దారిన తాను వెళ్ళిపోతుంది. అయితే వీరు మనుషులు కాబట్టి…దాన్ని ఆటపట్టించాలనుకున్నారు.
ఒకరు వెనుక వైపు నుంచి తోక పట్టుకుని లాగారు. మరొకరు ముందువైపు నుంచి పామును పిలుస్తూ దాన్ని కన్ఫ్యూజ్ చేశారు. దీంతో ఆత్మ రక్షణలో భాగంగా ఆ పాము కాటు వేయాలని ప్రయత్నించింది. కానీ అది ఎన్నిసార్లు కాటు వేయాలని వారిద్దరి వైపు తిరిగినా.. వారు తెలివిగా తప్పించుకున్నారు. అలా చాలా సేపు పామును ఇబ్బంది పెడుతూ ఆటాడుకున్నారు. తన స్ట్రాటజీలో భాగంగానో… మరే కారణం చేతనో పాము కాసేపు సైలెంట్ గా మారిపోయింది.
దీంతో ఇద్దరిలో ఓ యువకుడు రెచ్చిపోయాడు. పాము తలపై ముద్దు పెట్టుకున్నాడు. దీన్నంతా మరో వ్యక్తి వీడియో తీశాడు. సోషల్ మీడియాలో షేర్ చేశారు. ఈ వీడియో ప్రస్తుతం సోషల్ మీడియాలో వైరల్ గా మారింది. దీనిమీద రకరకాల కామెంట్లతో నెటిజెన్లు రెచ్చిపోతున్నారు. ‘పాములని ఇలా ఇబ్బంది పెట్టడం చాలా పాపం’ అని ఒకరు కామెంట్ చేస్తే… ‘ఇంత ప్రమాదకరమైన ఫీట్ చేయడం అవసరమా’ అంటూ మరొకరు.. ‘పాముని ఇలా ఇబ్బంది పెట్టడం బాలేదు. ఇలాంటి ఘటనలు మరోసారి జరగకుండా చర్యలు చేపట్టాలి’.. అంటూ ఇంకొకరు కామెంట్ చేశారు. ఈ వీడియో అత్యంత సాహసోపేతంగా ఉండడంతో దీనికి వేలల్లో లైక్స్ వస్తున్నాయి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
