డా. తిరునగరి శ్రీనివాస్ కవిత: అంగ‌డి...

రాజ్యం సామాన్యుడి వశమై మరో చరిత్ర ఆరంభమవుతుంది అంటూ డా. తిరునగరి శ్రీనివాస్ రాసిన కవిత ' అంగ‌డి... ' ఇక్కడ చదవండి :

First Published Feb 28, 2024, 1:59 PM IST

చెమటోడ్చి కష్టంతో
శ్రమకోర్చి యంత్రంతో
రూపొందిన వస్తువులన్నీ
ఒకచోట చేరి కనిపించే
వినిమయ దృశ్య సంచయం
పట్నంలో పెద్ద అంగడి
అన్ని కొనేయాలనిపించినా
ఆర్ధికం సహకరించాలి కదా..!
వస్తువులేమో బోలెడు
కోర్కెలేమో బారెడు
స్థోమతేమో చారెడు
ఏదైనా కొనే స్థాయి
ఎప్పుడొస్తుందో ఈ చేతికి
కొనుగోలు ప్రపంచంలో
నా పేరుకొక అవకాశం ఎప్పటికో...!
ధరల ధరణిలో
వినియోగదారుడిగా నాకు
సముచిత స్థానం ఎప్పుడో..!
గుండె మూలలో ఎప్పుడూ
ఒక ధీమా పోరాడుతూనే ఉంటుంది
మార్పు జరిగి తీరుతుంది
ధరాజ్యం సామాన్యుడి
వశమై మరో చరిత్ర ఆరంభమవుతుంది