స్త్రీలను ఎప్పుడు మెచ్చుకోవాలో తెలుసా?

విదురుని నీతిలో ఒక శ్లోకంలో స్త్రీలని ఎప్పుడు, ఏ సందర్భంలో ప్రశంసించాలో చెప్పారు. విదురునీతిలోని మాటలు ఇప్పటికీ మనకు చాలా ఉపయోగకరంగా ఉంటాయి. ఆ నీతి ఏంటో తెలుసుకుందాం..

జీర్ణమన్నం ప్రశంసంతి భార్యా చ గతయౌవనామ్।
శూరం విజితసంగ్రామం గతపారం తపస్వినమ్।।

మంచివాళ్ళు జీర్ణమైన అన్నాన్ని, యవ్వనం దాటిన స్త్రీని, యుద్ధంలో గెలిచిన వీరుడిని, జ్ఞానం పొందిన తపస్విని ప్రశంసిస్తారు.

చాలా మంది స్త్రీలు యవ్వనంలో ఏదో ఒక తప్పు చేసి నిందలు తెచ్చుకుంటారు. ఎలాంటి నింద లేకుండా యవ్వనం గడిపిన స్త్రీని తప్పక మెచ్చుకోవాలని విదురుడు తన నీతిలో తెలిపాడు.

భోజనం రుచిగా ఉండి, తేలిగ్గా జీర్ణం కావడం అరుదు. అందుకే ఎలాంటి ఇబ్బంది లేకుండా జీర్ణమయ్యే భోజనం ప్రశంసనీయమని విదురుడు తెలిపాడు. 

వీరులు లేకుండా యుద్ధంలో గెలవలేం. అందుకే యుద్ధంలో గెలిచాక వీరులని ప్రశంసించాలి. దీనివల్ల వాళ్ళ ఆత్మస్థైర్యం పెరుగుతుంది, గౌరవంగా భావిస్తారు.

సాధారణ తపస్వికి జ్ఞానం కలిగితే, వాళ్ళు గౌరవానికి అర్హులు. అలాంటి సాధువులని ప్రశంసించడంలో వెనుకాడకూడదు. ఇది మంచి పని అని విదురనీతి చెబుతోంది.