Hyderabad
ప్రజా రవాణా రంగంలో సరికొత్త విప్లవంగా దూసుకొచ్చింది హైదరాబాద్ మట్రో. 3 కారిడార్లు, 66 స్టేషన్లతో వేలాది మంది ప్రయాణికులు ప్రతీ రోజూ నగరంలో ప్రయాణం చేస్తున్నారు.
కారిడార్‌ 1లో భాగంగా ఎల్బీనగర్ నుంచి మియాపూర్‌ వరకు, కారిడార్‌ 2లో భాగంగా జేబీఎస్‌ నుంచి ఎంజీబీఎస్‌, కారిడార్‌ 3లో భాగంగా నాగోల్‌ నుంచి రాయదుర్గం వరకు మెట్రో అందుబాటులో ఉంది.
రెండో దశలో పలు మార్గాల్లో మెట్రో విస్తరణకు శ్రీకారం చుట్టారు. ఎంజీబీఎస్‌ నుంచి చాంద్రాయణగుట్ట, నాగోల్‌-ఎల్బీనగర్-చాంద్రాయణగుట్ట- ఆరాంఘర్‌-శంషాబాద్‌ వరకు నిర్మాణం జరగాల్సి ఉంది.
రాయదుర్గం - కోకాపేట నియోపోలిస్‌, మియాపూర్‌ - పటాన్‌చెరు, ఎల్బీనగర్ - హయత్‌నగర్‌, శంషాబాద్‌ ఎయిర్‌పోర్టు - ఓఆర్‌ఆర్‌ మీదుగా కొంగరకలాన్‌- ఫోర్త్‌ సిటీ వరకు నిర్మాణం జరగాల్సి ఉంది.
సీఎం రేవంత్‌ రెడ్డి మెట్రోను మరింత విస్తరించే నేపథ్యంలో రెండో దశలో పార్ట్‌ బిని ప్రాతి పదించారు. ప్యారడైజ్‌- మేడ్చల్‌, జేబీఎస్‌ - శామీర్‌పేట వరకు మెట్రో నిర్మాణం చేపట్టనున్నారు.
మెట్రో రెండో దశ పార్ట్‌ బి సాకారమైతే హైదరాబాద్ ముఖ చిత్రం పూర్తిగా మారనుంది. ఇటు శామిర్‌ పేట, అటు మేడ్చల్‌ వరకు మెట్రో విస్తరణ జరిగే నగర విస్తృతి మరింత పెరగడం ఖాయం.
ఈ కొత్త లైన్స్‌ అందుబాటులోకి వస్తే నగరశివారులతో పాటు కరీంనగర్ హైవే, అటు నిజామాబాద్ హైవేలపై రియల్ ఎస్టేట్‌ వృద్ధి చెందే అవకాశాలు ఉంటాయని నిపుణులు అంచనా వేస్తున్నారు.