మునుగోడులో టీఆర్ఎస్, బిజెపి ఫైట్ ... కర్రలు, రాళ్లతో పరస్పర దాడులు

నల్గొండ : ఉపఎన్నిక ప్రచారానికి మరికొద్ది గంటల్లో సమయం ముగుస్తుందనగా మునుగోడులో ఉద్రిక్తత చోటుచేసుకుంది. పలివెలలో టీఆర్ఎస్, బిజెపి శ్రేణులు ఎదురుపడి పరస్పరం రాళ్లు, కర్రలతో దాడులకు దిగడంతో పరిస్థితి ఉద్రిక్తంగా మారింది. టీఆర్ఎస్ శ్రేణుల రాళ్లదాడిలో బిజెపి ఎమ్మెల్యే ఈటల రాజేందర్ కారుతో పాటు ఆయన కాన్వాయ్ లోని వాహనాలు కూడా ధ్వంసమయ్యాయి. అలాగే బిజెపి ప్రచార వాహనంపైనా టీఆర్ఎస్ శ్రేణులు కర్రలతో దాడికిదిగి ధ్వంసం చేసారు. బిజెపి శ్రేణుల రాళ్లదాడిలో టీఆర్ఎస్ ఎమ్మెల్యే పెద్ది సుదర్శన్ రెడ్డి, జడ్పీ ఛైర్మన్ జగదీశ్ తో పాటు మరికొందరికి గాయాలైనట్లు సమాచారం. పరిస్థితి ఉద్రిక్తంగా మారడంతో రంగంలోకి దిగిన పోలీసులు ఇరు పార్టీల నాయకులు, కార్యకర్తలను అక్కడినుండి పంపించారు.