హైదరాబాద్ లో కన్నులపండుగగా శ్రీ వేంకటేశ్వర వైభవోత్సవాలు...

హైదరాబాద్ : తిరుమల తిరుపతి దేవస్థానం ఆద్వర్యంలో హైదరాబాద్ లో శ్రీ వెంకటేశ్వర స్వామి వైభవోత్సవాలు ఘనంగా కొనసాగుతున్నాయి. ఎన్టీఆర్ స్టేడియంలో జరుగుతున్న ఈ వైభవోత్సవాలను తిలకించి, స్వామివారి పూజాదిక కార్యక్రమాల్లో పాల్గొనేందుకు హైదరాబాద్ వాసులు తరలివస్తున్నారు. వైభవోత్సవాల్లో రెండో రోజయిన ఇవాళ అర్చకులు స్వామివారికి  కలశాభిషేకం నిర్వహించారు. తిరుమలకు వచ్చే భక్తులందరూ స్వామివారికి జరిగే నిత్య, వారోత్సవాలు తిలకించడం సాధ్యం కాదు. వయోభారం, ఆర్థిక పరిస్థితుల దృష్ట్యా అనేక మంది స్వామివారిని ఎక్కువ సార్లు చూసి తరించే అవకాశం ఉండదు. అందుకే ఇలాంటి భక్తులకు ఈ లోటు తీర్చడానికి టిటిడి నిర్వహిస్తున్న కార్యక్రమమే వైభవోత్సవాలు. ఇతర ప్రాంతాల్లోని భక్తులు స్వామివారిని దర్శించేందుకు వీలుగా పలు ప్రాంతాల్లో శ్రీవేంకటేశ్వర వైభవోత్సవాలను టిటిడి నిర్వహిస్తోంది. అయితే కరోనా కారణంగా రెండున్నర ఏళ్ల విరామం తరువాత హైదరాబాద్ లో ఈ ఉత్సవాలను టిటిడి పునఃప్రారంభించింది.