ప్రో కబడ్డి 2019: జైపూర్ పింక్ పాంథర్స్ అదుర్స్... యూ ముంబాపై ఘన విజయం
హైదరాబాద్ వేదికన జరుగుతున్న ప్రో కబడ్డి లీగ్ సీజన్ 7 లో జైపూర్ పింక్ పాంథర్స్ జట్టు అదరగొట్టింది. గచ్చిబౌలి ఇండోర్ స్టేడియంలో యూ ముంబాతో తలపడి ఏకంగా 19 పాయింట్స్ తేడాతో జైపూర్ విజయాన్ని అందుకుంది.
హైదరాబాద్ గచ్చిబౌలి స్టేడియంలో జరుగుతున్న ప్రో కబడ్డి లీగ్ లో జైపూర్ పింక్ పాంథర్స్ అదరగొట్టింది. మొదటి మ్యాచ్ లో తెలుగు టైటాన్స్ పై విజయంతో ఘనంగా టోర్నీని ప్రారంభించిన యూ ముంబాను పాంథర్స్ మట్టికరిపించింది. ఏకంగా 23-42 పాయింట్ల తేడాతో జైపూర్ జట్టు ఘన విజయం సాధించింది.
ఈ మ్యాచ్ ఆరంభం నుండి జైపూర్ జట్టు ఆధిక్యాన్ని ప్రదర్శించింది. ముఖ్యంగా స్టార్ రైడర్ దీపక్ హుడా 10 రైడ్, 1 బోనస్ పాయింట్ తో ఏకంగా 11 పాయింట్స్ సాధించాడు. అతడికి తోడుగా నితిన్ రావల్ 7, దీపక్ నర్వాల్ 6, డిఫెండర్స్ అమిత్ హుడా 5, విశాల్ 3 పాయింట్లతో ఆకట్టుకున్నారు. ఇక సచిన్ నర్వాల్ 2, సందీప్ 1, అంజింక్య 1 పాయింట్ తో తమవంతు సహకారం అందించారు. ముంబైని ఆలౌట్ చేయడం ద్వారా పింక్ పాంథర్స్ మరో ఆరు పాయింట్లతో మొత్తం 42 పాయింట్స్ తో అదరగొట్టింది.
ఇక మొదటి మ్యాచ్ లో తెలుగు టైటాన్స్ ను ఓడించిన యూ ముంబా ఈ మ్యాచ్ లో మాత్రం ఆకట్టుకోలేకపోయింది. రైడర్స్ పరవాలేదనిపించిన డిఫెండర్స్ ఆకట్టుకోలేకపోయారు. అభిషేక్ సింగ్ అత్యధికంగా 7 పాయింట్స్ సాధించాడు. లీ డాంగ్ 6, సురేందర్ సింగ్ 3, ఫజల్ 2, అతుల్ 2, రోహిత్ 1, సందీప్ 1, అజింక్య 1 పాయింట్స్ సాధించారు. ముంబై జట్టు ఒక్కసారి కూడా జైపూర్ ను ఆలౌట్ చేయలేకపోయింది.
ఈ మ్యాచ్ ను ప్రత్యక్షంగా వీక్షించేందుకు బాలీవుడ్ స్టార్ అభిషేక్ బచ్చన్ మైదానానికి విచ్చేశాడు. తమ జట్టు జైపూర్ పింక్ పాంథర్స్ కు అతడు మద్దతుగా కాస్సేపు సందడి చేశారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
