Asianet News Telugu

Top 10 Tourist Places: తెలంగాణ టాప్ 10 టూరిస్ట్ స్పాట్స్ ఇవే.. లైఫ్ లో ఒక్కసారైనా చూడాల్సిందే !

Mahesh Rajamoni — Mon, 09 Nov 2026 12:40:18 +0530

Top 10 Tourist Places Telangana: జీవితంలో ఒక్కసారైనా చూడాల్సిన పర్యాటక ప్రాంతాలు తెలంగాణలో చాలానే ఉన్నాయి. చారిత్రక కోటలు, సరస్సుల నుంచి అందమైన ప్రకృతి వరకు తెలంగాణలోని టాప్ 10 బెస్ట్ టూరిస్ట్ ప్లేసెస్ వివరాలు మీకోసం.

తెలంగాణ అనగానే మనకు చారిత్రక కట్టడాలు, నవాబుల నగర వైభవం, అందమైన సరస్సులు, ప్రాచీన ఆలయాలు, పచ్చని ప్రకృతి దృశ్యాలు గుర్తుకొస్తాయి. పర్యాటకులకు అన్ని రకాల అనుభూతులను అందించే అద్భుతమైన రాష్ట్రం తెలంగాణ. అయితే, మీరు తెలంగాణలో తప్పక విజిట్ చేయాల్సిన 10 బెస్ట్ టూరిజం డెస్టినేషన్స్ ఏవో మీకు తెలుసా? ఆ వివరాలు ఇప్పుడు చూద్దాం.

హైదరాబాద్‌ అనగానే అందరికీ ముందుగా గుర్తుకొచ్చేది చార్మినార్. నగరంలోని ప్రాచీన కట్టడమైన చార్మినార్‌తో పాటు దాని చుట్టూ ఉండే లాడ్ బజార్‌ చాలా ఫేమస్. సిటీలోని అన్ని ప్రాంతాల నుండి రోడ్డు మార్గం ద్వారా చార్మినార్ చేరుకోవడం చాలా ఈజీ. అక్టోబర్ నుంచి ఫిబ్రవరి మధ్య వాతావరణం కూల్‌గా ఉంటుంది కాబట్టి ఉదయం లేదా సాయంత్రం వేళల్లో ఇక్కడికి వెళ్లడం బెస్ట్ ఎక్స్‌పీరియన్స్ ఇస్తుంది.

అలాగే హైదరాబాద్ చరిత్రను చాటిచెప్పే మరో అద్భుతం గోల్కొండ కోట. ఇక్కడి రాయల్ ఆర్కిటెక్చర్, చారిత్రక నేపథ్యం సందర్శకులను ఎంతగానో ఆకట్టుకుంటాయి. హైదరాబాద్ సెంట్రల్ సిటీ నుంచి క్యాబ్స్ లేదా బస్సుల్లో సులభంగా కోటకు వెళ్లవచ్చు. అక్టోబర్ నుండి ఫిబ్రవరి వరకు ఇక్కడ పర్యటించడానికి వాతావరణం చాలా అనుకూలంగా ఉంటుంది.

హైదరాబాద్ నడిబొడ్డున ఉన్న హుస్సేన్ సాగర్ లేక్ వ్యూస్, బూటింగ్, మధ్యలో ఉండే ఎత్తైన బుద్ధుని విగ్రహం పర్యాటకులకు ప్రత్యేక ఆకర్షణగా నిలుస్తాయి. నగరంలోని ఏ ప్రాంతం నుంచైనా రోడ్డు మార్గంలో సులభంగా హుస్సేన్ సాగర్ చేరుకోవచ్చు. ముఖ్యంగా సన్‌సెట్ సమయంలో ఇక్కడికి వెళ్తే అద్భుతమైన వ్యూ ఆస్వాదించవచ్చు. దీనికి కూడా అక్టోబర్ - ఫిబ్రవరి మధ్య సమయం చాలా అనుకూలం.

ఫిల్మ్ లవర్స్ కోసం ప్రపంచంలోనే అతిపెద్ద ఫిల్మ్ సిటీ అయిన రామోజీ ఫిల్మ్ సిటీ సూపర్ డెస్టినేషన్. సినిమా సెట్స్, పచ్చని గార్డెన్స్, రకరకాల షోలు ఇక్కడ అందరినీ అలరిస్తాయి. హైదరాబాద్ మెయిన్ సిటీ నుంచి రోడ్డు మార్గంలో దాదాపు గంట వ్యవధిలో ఇక్కడికి చేరుకోవచ్చు. సైట్‌సీయింగ్ చేయడానికి అక్టోబర్ నుండి ఫిబ్రవరి సీజన్ పర్ఫెక్ట్.

హైదరాబాద్ నిజాం రాజుల వైభవాన్ని, రాజభవనాల అందాలను కళ్లకు కట్టినట్లు చూపిస్తుంది చౌమహల్లా ప్యాలెస్. రాయల్ పాస్ట్ ఎక్స్‌పీరియన్స్ చెయ్యడానికి ఈ ప్యాలెస్ సరైన ప్రదేశం. సెంట్రల్ హైదరాబాద్ నుండి రోడ్డు మార్గంలో ఇక్కడికి ఈజీగా వెళ్లవచ్చు. అక్టోబర్ నుంచి ఫిబ్రవరి వరకు ఇక్కడ పర్యటించడం చాలా హాయిగా ఉంటుంది.

అలాగే కాకతీయుల వైభవానికి ప్రతీకగా నిలిచే వరంగల్ కోట తెలంగాణ చరిత్రలో ప్రత్యేకమైనది. ఈ కోట హైదరాబాద్ నుంచి దాదాపు 150 కిలోమీటర్ల దూరంలో ఉంది. రోడ్డు, రైలు మార్గాల ద్వారా వరంగల్ కోటకు సులభంగా చేరుకోవచ్చు. ఇక్కడి కట్టడాలను చూడటానికి అక్టోబర్ నుండి మార్చ్ వరకు వాతావరణం ప్రశాంతంగా ఉంటుంది.

కళాత్మక చెక్కడాలు, అద్భుతమైన శిల్పకళా రీతులతో అలరించే రామప్ప దేవాలయం ప్రపంచ స్థాయి గుర్తింపు పొందింది. యునెస్కో వరల్డ్ హెరిటేజ్ సైట్‌గా నిలిచిన ఈ దేవాలయం వరంగల్ నగరం నుండి రోడ్డు మార్గంలో సుమారు 70 కిలోమీటర్ల దూరంలో ములుగు జిల్లాలో ఉంది. అక్టోబర్ నుంచి మార్చ్ మధ్య కాలంలో ఈ చారిత్రక ఆలయాన్ని సందర్శించడం చాలా అనుకూలంగా ఉంటుంది.

ములుగు జిల్లాలోనే ఉన్న లక్నవరం చెరువు ప్రకృతి ప్రేమికులకు స్వర్గధామం. ఇక్కడి చిన్న చిన్న దీవులు, ప్రసిద్ధ లక్నవరం సస్పెన్షన్ బ్రిడ్జ్ పర్యాటకులను కట్టిపడేస్తాయి. వరంగల్ నుంచి రోడ్డు మార్గంలో ఇక్కడికి వెళ్లవచ్చు. అక్టోబర్ నుంచి ఫిబ్రవరి కాలంలో ఇక్కడి వ్యూస్ చాలా అద్భుతంగా ఉంటాయి.

ప్రకృతి ప్రేమికులు, ట్రెక్కింగ్ ఇష్టపడే వారి కోసం వికారాబాద్‌లోని అనంతగిరి హిల్స్ పర్ఫెక్ట్ లొకేషన్. హైదరాబాద్ నుంచి రోడ్డు మార్గంలో చాలా తక్కువ సమయంలో ఇక్కడికి చేరుకోవచ్చు. అక్టోబర్ నుంచి ఫిబ్రవరి మధ్య వాతావరణం ప్రశాంతంగా, ఆహ్లాదకరంగా ఉంటుంది.

చివరగా, కృష్ణా నదిపై నిర్మించిన నాగార్జున సాగర్ డ్యామ్, అద్భుతమైన లేక్ వ్యూస్, బోటింగ్, బౌద్ధ వారసత్వ ప్రదేశాలకు నిలయం. హైదరాబాద్ నుండి రోడ్డు మార్గంలో సుమారు 4 గంటల ప్రయాణంతో సాగర్ చేరుకోవచ్చు. అక్టోబర్ నుండి ఫిబ్రవరి వరకు నాగార్జున సాగర్ పర్యటనకు అనువైన సమయం.

School Holidays : ఇంకో నాల్రోజులే స్కూళ్లు, కాలేజీలు నడిచేది.. తర్వాత మళ్లీ వరుసగా రెండ్రోజులు సెలవులే

Arun Kumar P — Mon, 09 Nov 2026 19:23:28 +0530

ఈ వారంలో ఇంకా నాల్రోజులే స్కూళ్లు, కాలేజీలు నడిచేది… తర్వాత వరుసగా రెండ్రోజులు సెలవులున్నాయి. ఆంధ్ర ప్రదేశ్, తెలంగాణలోని విద్యాసంస్థలకు ఏరోజు, ఎందుకు సెలవుందో తెలుసా?

School Holidays : సాధారణంగా ఆదివారం సెలవు వచ్చిందంటే చాలు సోమవారం స్కూల్ కి భారంగా వెళుతుంటారు విద్యార్థులు. అలాంటిది గత నెల రోజులుగా తెలుగు విద్యార్థులకు సెలవులే సెలవులు వచ్చాయి... ఆంధ్ర ప్రదేశ్ లో అయితే దసరా సెలవులు ముగియగానే అర్నబ్, మురసు తుపానుల కారణంగా సెలవులు వచ్చాయి. తర్వాత మున్సిపల్ ఎన్నికల సందర్భంగా సెలవులు కంటిన్యూ అయ్యాయి. తాజాగా దీపావళి పండక్కి చాలా విద్యాసంస్థలకు రెండ్రోజులు నవంబర్ 8, 9న (ఆదివారం, సోమవారం) సెలవులు వచ్చాయి.

అయితే తెలుగు విద్యార్థులకు దీపావళి సెలవులు ఇవాళ్టితో ముగిశాయి... రేపు (నవంబర్ 10) మంగళవారం స్కూళ్లు, కాలేజీలు తెరుచుకుంటాయి. కానీ ఓ నాల్రోజులు నడుస్తాయో లేదో మళ్లీ వరుసగా రెండ్రోజులు విద్యాసంస్థలు బంద్ కానున్నాయి. అంటే ఈవారం కేవలం నాల్రోజులే వర్కింగ్ డేస్ అన్నమాట. ఈ వీకెండ్ వరుస సెలవులు ఎందుకున్నాయో తెలుసా?

దీపావళి సెలవుల తర్వాత భారంగా స్కూల్ కి వెళ్లే విద్యార్థులకు గుడ్ న్యూస్. ఈ వారంలో కేవలం నాలుగురోజులు (మంగళ, బుధ, గురు, శుక్రవవారాలు) మాత్రమే స్కూళ్లు నడుస్తాయి... తర్వాత రెండురోజులు సెలవులున్నాయి.

ప్రతి నెలలో వచ్చే రెండో శనివారం ఏపీ, తెలంగాణలోని ప్రభుత్వ, ప్రైవేట్ విద్యాసంస్థలన్నింటికి సెలవు ఉంటుంది. ఇలా ఈ నవంబర్ 14న రెండో శనివారం వస్తోంది... కాబట్టి సెలవు ఉంటుంది. ఇక నవంబర్ 15 ఎలాగూ ఆదివారమే కాబట్టి సాధారణ సెలవు ఉంటుంది. ఇలా రాబోయే వీకెండ్ వరుస సెలవులున్నాయి.

ఈవారం రెండో శనివారం, ఆదివారం రెండ్రోజులే సెలవులు… కానీ ఆ తర్వాతి వారం వరుసగా మూడ్రోజులు సెలవులు పొందే ఛాన్స్ ఉంది. కార్తీక మాసంతో ఎంతో పవిత్రంగా భావించే పౌర్ణమి నవంబర్ 24 (మంగళవారం) వస్తోంది… ఈరోజు హిందూ దేవుళ్లు శివుడు, విష్ణువుకు ఎంతో ప్రీతికరమైనది భావిస్తారు. అందుకే ఆరోజు దేవాలయాలకు వెళ్లడం, పూజలు చేయడం చేస్తుంటారు. అంతేకాదు సిక్కుల ఆరాధ్యదైవం గురునానక్ జయంతి కూడా ఈరోజే ఉంది. అందుకే తెలుగు రాష్ట్రాల విద్యార్థులు, ఉద్యోగులకు ఈరోజు సెలవు ఉంటుంది.

నవంబర్ 22న ఆదివారం, నవంబర్ 24 గురుపౌర్ణమి రెండ్రోజులు సెలవులున్నాయి... మధ్యలో సోమవారం (నవంబర్ 23) మ్యానేజ్ చేయగలిగితే మూడ్రోజులు సెలవు పొందవచ్చు. అంటే ఈ ఒక్కరోజు లీవ్ పెడితే వరుసగా మూడ్రోజుల సెలవులు కలిసివస్తాయన్నమాట.

ఆంధ్ర ప్రదేశ్ లో మున్సిపల్ తో పాటు ఎంపిటిసి, జడ్పిటిసి ఎన్నికలు కూడా ముగిశాయి. ఇక మిగిలింది గ్రామ పంచాయితీ ఎన్నికలే. మూడు విడతల్లో రాష్ట్రంలోని అన్ని పంచాయితీలకు ఎన్నికలు నిర్వహించనున్నట్లు ఎన్నికల సంఘం ప్రకటించింది. ఈ క్రమంలో పోలింగ్ కేంద్రాలను ఏర్పాటుచేసే విద్యాసంస్థలకు మళ్ళీ సెలవులు రానున్నాయి.

నవంబర్ 26న మొదటి విడత పోలింగ్ జరగనుంది... ప్రభుత్వ పాఠశాలల్లోనే పోలింగ్ కేంద్రాలు ఏర్పాటుచేస్తారు కాబట్టి ఈరోజు ఆయా పంచాయితీల పరిధిలోని విద్యాసంస్థలకు సెలవు ఉంటుంది. ఇక నవంబర్ 29న రెండో విడత, డిసెంబర్ 2న మూడో విడత పోలింగ్ జరగనుంది... ఈ రోజుల్లో కూడా ఆయా గ్రామాల్లోని విద్యాసంస్థలకు సెలవు ఉంటుంది.

తెలంగాణ‌లో ఉచిత చీర‌ల పంపిణీకి డేట్ ఫిక్స్‌.. ఈసారి చీర‌లు ఎంత బాగున్నాయో చూశారా?

Narender Vaitla — Sat, 07 Nov 2026 14:43:25 +0530

Telangana: తెలంగాణలో మహిళలకు రాష్ట్ర ప్రభుత్వం మరో శుభవార్త అందించింది. ఇందిరా మహిళాశక్తి పథకం కింద ఉచితంగా చీరలు పంపిణీ చేసేందుకు ముహూర్తం ఖరారు చేసింది. నవంబర్ 19 నుంచి ఈ కార్యక్రమాన్ని ప్రారంభించాలని నిర్ణయించింది.

మాజీ ప్రధాని ఇందిరాగాంధీ జయంతిని పురస్కరించుకుని నవంబర్ 19న ఉచిత చీరల పంపిణీ కార్యక్రమాన్ని ప్రారంభించాలని ప్రభుత్వం నిర్ణయించింది. హైదరాబాద్ నెక్లెస్ రోడ్డులోని ఇందిరాగాంధీ విగ్రహం వద్ద సీఎం రేవంత్ రెడ్డి లాంఛనంగా ఈ కార్యక్రమాన్ని ప్రారంభించ‌నున్నారు. ఈ ప్రారంభోత్సవానికి మంత్రులు, ఎమ్మెల్యేలు, ఎమ్మెల్సీలు, ఎంపీలతో పాటు పలువురు ప్రజాప్రతినిధులు హాజరుకానున్నారు.

ఇందిరా మహిళాశక్తి పథకం ద్వారా రాష్ట్రంలోని సుమారు 95 లక్షల మంది మహిళలకు చీరలు అందించాలని ప్రభుత్వం లక్ష్యంగా నిర్దేశించుకుంది. ఇందుకోసం 2026 ఆర్థిక సంవత్సరంలో రూ.334 కోట్లను కేటాయించింది. అర్హులైన మహిళలందరికీ నిర్ణీత సమయంలో చీరలు అందించేందుకు జిల్లాల వారీగా పంపిణీ ప్రణాళిక రూపొందిస్తున్నారు. తెల్ల రేషన్ కార్డులు కలిగిన కుటుంబాల్లోని మహిళలకు ఈ పథకం ద్వారా ప్రయోజనం కల్పించనున్నారు. పంపిణీ ప్రక్రియ ప్రారంభమైన తర్వాత వారం రోజుల పాటు చీరలు అందించేలా ఏర్పాట్లు చేస్తున్నారు.

ఈ ఏడాది మహిళలకు అందించే చీరల విషయంలో ప్రభుత్వం ప్రత్యేకంగా రంగుల ఎంపిక చేసింది. గతంలో పాలపిట్ట రంగు చీరలను పంపిణీ చేయగా.. ఈసారి చిలకపచ్చ రంగుకు ఎరుపు రంగు జరీ అంచును జోడించారు. మహిళలకు నాణ్యమైన చీరలు అందించడంతో పాటు రాష్ట్రంలోని చేనేత, వస్త్ర పరిశ్రమలకు ఉపాధి కల్పించాలనే లక్ష్యంతో ప్రభుత్వం ఉత్పత్తికి ప్రాధాన్యం ఇచ్చింది. ఏప్రిల్ నెల నుంచే చీరల తయారీ ప్రక్రియ ప్రారంభమైంది. సిరిసిల్లతో పాటు రాష్ట్రంలోని పలు ప్రాంతాల్లో ఏర్పాటు చేసిన కేంద్రాల్లో ఉత్పత్తి చేపట్టారు.

రాష్ట్రవ్యాప్తంగా పంపిణీ చేయాల్సిన 95 లక్షల చీరల్లో ఇప్పటివరకు సుమారు 65 లక్షల చీరల తయారీ పూర్తయింది. వీటిని ఇప్పటికే వివిధ జిల్లాలకు తరలించారు. మిగిలిన చీరల తయారీ ప్రక్రియ కూడా కొనసాగుతోంది. ఉత్పత్తి పూర్తయిన వెంటనే వాటిని సంబంధిత జిల్లా కేంద్రాలకు చేరవేసేలా అధికారులు చర్యలు తీసుకుంటున్నారు. ఇందిరాగాంధీ జయంతి రోజునే పంపిణీ ప్రారంభించాలనే ఉద్దేశంతో ప్రభుత్వం ముందుగానే ఈ కార్యక్రమానికి తేదీని ఖరారు చేసింది. లక్షల సంఖ్యలో చీరలు పంపిణీ చేయాల్సి ఉండటంతో రవాణా, నిల్వ, పంపిణీ ఏర్పాట్లపై ప్రత్యేక దృష్టి సారించారు.

చీరల పంపిణీలో ఎలాంటి అవకతవకలకు అవకాశం లేకుండా ప్రభుత్వం డిజిటల్ విధానాన్ని అమలు చేయనుంది. ఇందుకోసం ప్రత్యేక మొబైల్ యాప్‌ను అందుబాటులోకి తీసుకొచ్చింది. అర్హులైన మహిళలు పంపిణీ కేంద్రాలకు వెళ్లేటప్పుడు తప్పనిసరిగా ఆధార్ కార్డు తీసుకెళ్లాలి. అక్కడ సంబంధిత పంచాయతీ అధికారులు ఆధార్ వివరాలను పరిశీలించి, యాప్ ద్వారా లబ్ధిదారుల ఫొటోలను నమోదు చేస్తారు. వివరాల ధ్రువీకరణ పూర్తయిన తర్వాత చీరను అందజేస్తారు. ఇప్పటికే చీర అందుకున్న మహిళకు మరోసారి పంపిణీ కాకుండా ఈ విధానం ఉపయోగపడుతుంది. పంచాయతీరాజ్, గ్రామీణాభివృద్ధి శాఖల సిబ్బందితో పాటు సెర్ప్ ఉద్యోగులకు పంపిణీ బాధ్యతలు అప్పగించారు. తద్వారా అర్హులైన ప్రతి మహిళకు ఈ పథకం ప్రయోజనం చేరేలా ప్రభుత్వం చర్యలు చేపట్టింది.

తెలంగాణలో డేటా సెంటర్ల ఏర్పాటుకు అమెరికా ఆసక్తి.. ఆ జిల్లాపై ప్ర‌త్యే దృష్టి

Narender Vaitla — Sat, 07 Nov 2026 18:45:28 +0530

Telangana: ఆర్టిఫిషియల్ ఇంటెలిజెన్స్ (AI) సాంకేతికత వేగంగా విస్తరిస్తుండటంతో ప్రపంచవ్యాప్తంగా డేటా సెంటర్లకు డిమాండ్ పెరుగుతోంది. ఈ నేపథ్యంలో తెలంగాణలోనూ డేటా సెంటర్ల ఏర్పాటుకు అవకాశాలను పరిశీలిస్తున్నట్లు అమెరికా కాన్సులేట్ ప్రతినిధులు వెల్లడించారు.

హైదరాబాద్‌లోని సింగరేణి భవన్‌లో శుక్రవారం అమెరికా కాన్సులేట్‌కు చెందిన ఉన్నత స్థాయి ప్రతినిధుల బృందం సింగరేణి సంస్థ సీఎండీ బుద్ధప్రకాశ్ జ్యోతితో సమావేశమైంది. హైదరాబాద్ అమెరికన్ కాన్సులేట్ పొలిటికల్ అండ్ ఎకనమిక్ చీఫ్ మెరెడిత్ మెజ్లర్ ఈ బృందానికి నాయకత్వం వహించారు. పొలిటికల్ అండ్ ఎకనమిక్ స్పెషలిస్టులు శ్రీమలి కరి, శిబా త్రిపాఠితో పాటు కమర్షియల్ స్పెషలిస్ట్ సునేల్ కుమ్మర్ సమావేశంలో పాల్గొన్నారు. సింగరేణి తరఫున సీఎండీతో పాటు పలువురు ఉన్నతాధికారులు హాజరయ్యారు. తెలంగాణలో పెట్టుబడులకు ఉన్న అవకాశాలు, ఇంధన రంగంలో సాంకేతిక పరిజ్ఞానం వినియోగం, కీలక ఖనిజాల అన్వేషణ వంటి అంశాలు చర్చకు వచ్చాయి.

ప్రపంచవ్యాప్తంగా ఏఐ వినియోగం పెరుగుతుండటంతో భారీ స్థాయిలో డేటాను నిల్వ చేయడం, ప్రాసెస్ చేయడం కోసం డేటా సెంటర్ల అవసరం పెరుగుతోంది. వీటి నిర్వహణకు నిరంతరాయంగా భారీ మొత్తంలో విద్యుత్ అవసరం. ఈ నేపథ్యంలో డేటా సెంటర్ల ఏర్పాటుకు అనువైన ప్రాంతాలను అమెరికా ప్రతినిధులు అన్వేషిస్తున్నారు. తెలంగాణలోని సింగరేణి ప్రాంతాలు కూడా ఇందుకు అనుకూలంగా ఉంటాయని భావిస్తున్నట్లు తెలిపారు. అవసరమైన మౌలిక సదుపాయాలు, విద్యుత్ లభ్యత, భవిష్యత్తులో పెట్టుబడుల అవకాశాలను పరిశీలించి ఈ దిశగా ముందుకు వెళ్లాలని ఆసక్తి వ్యక్తం చేశారు.

సింగరేణి పరిధిలో వినియోగం ముగిసిన ఓపెన్ కాస్ట్ గనులను ఇతర అవసరాలకు ఉపయోగించుకోవాలని సంస్థ ప్రణాళికలు రూపొందిస్తోంది. ఇందులో భాగంగా పలు ప్రాంతాల్లో పంప్డ్ స్టోరేజ్ పవర్ ప్లాంట్లను ఏర్పాటు చేయాలని నిర్ణయించినట్లు సీఎండీ బుద్ధప్రకాశ్ జ్యోతి వివరించారు. ఈ ప్లాంట్ల ద్వారా అవసరమైన సమయాల్లో విద్యుత్‌ను అందుబాటులోకి తీసుకురావచ్చని తెలిపారు. ముఖ్యంగా విద్యుత్ వినియోగం అధికంగా ఉండే పీక్ అవర్స్‌లో డేటా సెంటర్లకు నిరంతర విద్యుత్ సరఫరా చేసేందుకు ఈ ప్రాజెక్టులు దోహదపడతాయని పేర్కొన్నారు. ఇప్పటికే ఉన్న గనుల ప్రాంతాలను సమర్థంగా వినియోగించుకోవడంతో పాటు ఇంధన రంగంలో కొత్త అవకాశాలను అందిపుచ్చుకోవడం ఈ ప్రణాళికల ప్రధాన ఉద్దేశమని వివరించారు.

బొగ్గు తవ్వకాల్లో సుదీర్ఘ అనుభవం కలిగిన సింగరేణి సంస్థ ఇప్పుడు కీలక ఖనిజాల రంగంలోనూ విస్తరించేందుకు ప్రయత్నిస్తోంది. ఈ క్రమంలో వివిధ దేశాలకు చెందిన సంస్థలతో సాంకేతిక సహకారం, ఉమ్మడి పెట్టుబడుల అవకాశాలపై చర్చలు జరుపుతోంది. అమెరికాలోని కీలక ఖనిజ రంగ సంస్థలతో కలిసి పనిచేసేందుకు అవకాశాలు ఉన్నాయని అమెరికా ప్రతినిధులు తెలిపారు. కొత్తగూడెంలో సింగరేణి ఏర్పాటు చేసిన జియో సైన్స్ లేబొరేటరీలోని పరిశోధన సదుపాయాల గురించి వివరాలు తెలుసుకున్నారు. అలాగే ఓపెన్ కాస్ట్ గనుల్లో తవ్వకాల సమయంలో వెలికితీసే ఓవర్‌బర్డెన్‌లో రేర్ ఎర్త్ ఎలిమెంట్స్ (అరుదైన భూ మూలకాలు) ఉండే అవకాశాలపై ఆసక్తి కనబరిచారు.

కీలక ఖనిజాల రంగంలో పరిశోధనలు, ఆధునిక సాంకేతిక పరిజ్ఞానం, అంతర్జాతీయ సహకారాన్ని మరింత విస్తరించేందుకు ఇరు పక్షాలు ఆసక్తి చూపించాయి. ఇందులో భాగంగా వచ్చే ఏడాది ఏప్రిల్‌లో అమెరికాలో నిర్వహించనున్న కీలక ఖనిజాల సదస్సుకు సింగరేణి సంస్థను అమెరికా ప్రతినిధులు ఆహ్వానించారు. ఈ సదస్సు ద్వారా అంతర్జాతీయ సంస్థలతో పరిచయాలు పెంచుకోవడంతో పాటు సాంకేతిక పరిజ్ఞాన మార్పిడి, పెట్టుబడులు, ఉమ్మడి ప్రాజెక్టులకు సంబంధించిన అవకాశాలను పరిశీలించవచ్చు. ఈ పరిణామాలు కార్యరూపం దాలిస్తే తెలంగాణలో డేటా సెంటర్ల ఏర్పాటు, పునరుత్పాదక ఇంధన ప్రాజెక్టులు, కీలక ఖనిజాల అన్వేషణకు కొత్త అవకాశాలు ఏర్పడే అవకాశం ఉంది.

హైద‌రాబాద్‌లో ఈ మార్గంలో శాశ్వ‌తంగా వ‌న్‌వే రూట్‌..? ట్రాఫిక్ స‌మ‌స్య‌ల‌కు చెక్ పెట్టేలా

Narender Vaitla — Sat, 07 Nov 2026 18:03:09 +0530

Hyderabad: హైదరాబాద్‌లో పెరుగుతున్న వాహనాల రద్దీని నియంత్రించేందుకు ట్రాఫిక్ పోలీసులు మరో కీలక చర్యకు సిద్ధమవుతున్నారు. నగరంలోని అత్యంత రద్దీ ప్రాంతాల్లో ఒకటైన లక్డీకాపూల్ పరిసరాల్లో వన్‌వే ట్రాఫిక్ విధానాన్ని ప్రవేశపెట్టాలని యోచిస్తున్నారు.

లక్డీకాపూల్ పరిసరాల్లో ట్రాఫిక్ సమస్యకు పరిష్కారం కనుగొనేందుకు హైదరాబాద్ నగర పోలీస్ కమిషనర్ వీసీ సజ్జనర్ శుక్రవారం క్షేత్రస్థాయిలో పర్యటించారు. ద్విచక్రవాహనంపై వివిధ జంక్షన్లను పరిశీలించి, అక్కడి రహదారుల పరిస్థితి, వాహనాల రాకపోకలను గమనించారు. విధుల్లో ఉన్న ట్రాఫిక్ సిబ్బందితో మాట్లాడి ప్రస్తుతం ఎదురవుతున్న సమస్యలను తెలుసుకున్నారు. ట్రాఫిక్ జాయింట్ కమిషనర్ జోయెల్ డేవిస్, డీసీపీ అవినాశ్‌లతో కలిసి ప్రతిపాదిత మార్గాల్లో వన్‌వే విధానం అమలుకు ఉన్న అవకాశాలను సమీక్షించారు. ప్రయాణికులకు ఇబ్బందులు కలగకుండా ఎలాంటి ప్రత్యామ్నాయ మార్గాలు ఏర్పాటు చేయాలనే అంశంపైనా చర్చించారు. ఇటీవ‌ల కేబీఆర్ పార్క్ ద‌గ్గ‌ర వ‌న్‌వే విజ‌య‌వంత‌మైన నేప‌థ్యంలో అధికారులు ఈ దిశ‌గా అడుగులు వేస్తున్నారు.

కొత్త ప్రతిపాదన ప్రకారం ఓల్డ్ కంట్రోల్ రూమ్ నుంచి రవీంద్రభారతి మీదుగా ఇక్బాల్ మినార్ వైపు వెళ్లే వాహనాలకు నేరుగా అనుమతి ఉండదు. సికింద్రాబాద్ వైపు వెళ్లేవారు హెచ్‌డీఎఫ్‌సీ జంక్షన్, పాత సైఫాబాద్ పోలీస్ స్టేషన్, ఇక్బాల్ మినార్, సచివాలయం జంక్షన్ మీదుగా ప్రయాణించాల్సి ఉంటుంది. మరోవైపు నిరంకారి జంక్షన్ నుంచి ఓల్డ్ కంట్రోల్ రూమ్ వైపు వచ్చే వాహనాలను పాత సైఫాబాద్ పోలీస్ స్టేషన్ వద్ద మళ్లిస్తారు. అక్కడి నుంచి ఇక్బాల్ మినార్ మీదుగా కుడివైపు తిరిగి రవీంద్రభారతి మార్గంలో ఓల్డ్ కంట్రోల్ రూమ్ చేరుకునేలా ఏర్పాట్లు చేయనున్నారు.

సచివాలయం జంక్షన్, తెలంగాణ తల్లి ఫ్లైఓవర్ వైపు నుంచి పాత సైఫాబాద్ పోలీస్ స్టేషన్‌కు వెళ్లే వాహనాలకు కూడా మార్గాన్ని మార్చాలని భావిస్తున్నారు. ఈ వాహనాలు ఇక్బాల్ మినార్ నుంచి రవీంద్రభారతి వైపు వెళ్లాలి. అక్కడి నుంచి ఓల్డ్ కంట్రోల్ రూమ్ వద్ద యూటర్న్ తీసుకుని అసెంబ్లీ గేట్ నంబర్ 3, రవీంద్రభారతి, హెచ్‌డీఎఫ్‌సీ జంక్షన్ మీదుగా పాత సైఫాబాద్ పోలీస్ స్టేషన్‌కు చేరుకునేలా రూట్‌ను రూపొందించారు. మసాబ్ ట్యాంక్ వైపు వెళ్లే వాహనాలకు ద్వారకా హోటల్, కామత్ హోటల్ రోడ్డు మీదుగా ప్రత్యామ్నాయ మార్గం కల్పించే ప్రతిపాదన కూడా ఉంది. చాలాకాలంగా మూసివేసి ఉన్న గన్ పార్క్ రోటరీ యూటర్న్‌ను తిరిగి అందుబాటులోకి తీసుకురావాలని అధికారులు పరిశీలిస్తున్నారు.

వన్‌వే విధానాన్ని వెంటనే అమలు చేయకుండా ముందుగా రవాణా నిపుణుల అభిప్రాయాలు తీసుకోవాలని ట్రాఫిక్ విభాగం నిర్ణయించింది. ఇందుకోసం జీహెచ్‌ఎంసీ, హైదరాబాద్ మెట్రోపాలిటన్ వాటర్ సప్లై అండ్ సీవరేజ్ బోర్డు, విద్యుత్ పంపిణీ సంస్థల అధికారులతో సమన్వయ సమావేశం నిర్వహించనున్నారు. రహదారుల పరిస్థితి, అవసరమైన మౌలిక సదుపాయాలు, ఇతర శాఖల పరిధిలో ఉన్న పనులను పరిశీలిస్తారు. ప్రభుత్వ తుది అనుమతి వచ్చిన తర్వాత ఎంపిక చేసిన మార్గాల్లో ప్రయోగాత్మకంగా వన్‌వే విధానాన్ని అమలు చేయాలని భావిస్తున్నారు. ఈ సమయంలో వాహనదారుల నుంచి అభిప్రాయాలు సేకరించి, అవసరమైన మార్పులు చేస్తారు.

లక్డీకాపూల్ పరిసరాల్లో ప్రతిపాదిస్తున్న మార్పులు విజయవంతమైతే నగరంలోని మరికొన్ని రద్దీ కూడళ్లలోనూ ఇలాంటి ట్రాఫిక్ విధానాన్ని ప్రవేశపెట్టే అవకాశాలను పోలీసులు పరిశీలిస్తున్నారు. ఇప్పటికే కేబీఆర్ పార్క్ పరిసరాల్లో అమలవుతున్న వన్‌వే విధానం ద్వారా ట్రాఫిక్ నిర్వహణకు లభించిన అనుభవాన్ని కూడా పరిగణనలోకి తీసుకుంటున్నారు. కొత్త మార్గాల వల్ల వాహనాల మధ్య ఎదురెదురు రాకపోకలు తగ్గడంతో పాటు జంక్షన్ల వద్ద వేచి ఉండే సమయం తగ్గుతుందని అధికారులు భావిస్తున్నారు. అయితే ప్రయోగాత్మక అమలులో ఎదురయ్యే సమస్యలు, ప్రజల నుంచి వచ్చే సూచనలను బట్టి తుది మార్గదర్శకాలను రూపొందించనున్నారు. వాహనదారులు కొత్త ట్రాఫిక్ నిబంధనలను గమనించి సహకరించాలని పోలీసులు కోరుతున్నారు.

Weather Update : ఉపరితల ఆవర్తనం ఎఫెక్ట్.. ఈ తెలుగు జిల్లాల్లో వర్షాలు కంటిన్యూ

Arun Kumar P — Sat, 07 Nov 2026 07:53:49 +0530

ఇప్పటికే అర్నబ్, మురసు తుపానులు బీభత్సం సృష్టించాయి… ఆంధ్ర ప్రదేశ్ లో అయితే భారీ నుండి అతిభారీ వర్షాలు కురిశాయి, తెలంగాణలోనూ వర్షాలు పడ్డాయి. అయితే మరో మూన్నాలుగు రోజులు వర్షాలు కొనసాగుతాయని వాతావరణ శాఖ ప్రకటించింది.

బంగాళాఖాతంలో మరో ఉపరితల ఆవర్తనం ఏర్పడటంతో తెలుగు రాష్ట్రాల్లో వాతావరణం మారుతోంది. ఇప్పటికే తుపానులు, అల్పపీడనాల ప్రభావంతో ఆంధ్ర ప్రదేశ్ లో భారీ నుండి అతిభారీ వర్షాలు కురిశాయి. అయితే రాబోయే మూడు రోజుల పాటు కోస్తాంధ్ర, రాయలసీమ ప్రాంతాల్లో అక్కడక్కడ వర్షాలు కురిసే అవకాశం ఉందని వాతావరణ శాఖ అంచనా వేస్తోంది. మరోవైపు తెలంగాణలోనూ పలు జిల్లాలకు వర్ష సూచన జారీ చేసింది. హైదరాబాద్‌లో ఆకాశం మేఘావృతమై చిరుజల్లులు కురిసే అవకాశం ఉందని తెలిపింది. ఉష్ణోగ్రతలు క్రమంగా తగ్గుతుండటంతో నగరంలో చలి తీవ్రత పెరిగే సూచనలు కనిపిస్తున్నాయంటున్నారు వాతావరణ నిపుణులు.

ఆంధ్రప్రదేశ్‌లో రాబోయే మూడు రోజుల పాటు కోస్తాంధ్ర, రాయలసీమ ప్రాంతాల్లో వర్షాలు కురిసే అవకాశం ఉందని వాతావరణ శాఖ తెలిపింది. ముఖ్యంగా కొన్ని జిల్లాల్లో తేలికపాటి నుంచి మోస్తరు వర్షాలు పడే సూచనలు ఉన్నాయని ఏపీఎస్డీఎంఏ ఎండీ, ఆర్టీజీఎస్ సీఈఓ ప్రఖర్ జైన్ వెల్లడించారు. అల్లూరి సీతారామరాజు, పోలవరం, ఎన్టీఆర్, నంద్యాల, చిత్తూరు, తిరుపతి జిల్లాల్లో అక్కడక్కడ వర్షాలు కురిసే అవకాశం ఉందని తెలిపారు. ఈ జిల్లాల్లో కొన్ని ప్రాంతాల్లో తేలికపాటి నుంచి మోస్తరు వర్షాలు పడవచ్చని, రాష్ట్రంలోని మిగతా జిల్లాల్లో తేలికపాటి వర్షాలు కురిసే అవకాశం ఉందని పేర్కొన్నారు.

నవంబర్ 12 తర్వాత మరో అల్పపీడనం?

బంగాళాఖాతంలో వరుసగా వాతావరణ మార్పులు చోటుచేసుకుంటుండటం ఆందోళన కలిగిస్తోంది. నవంబర్ 12 తర్వాత దక్షిణ బంగాళాఖాతంలో మరో అల్పపీడనం ఏర్పడే అవకాశం ఉందని అంచనాలు వెలువడుతున్నాయి. అంతేకాకుండా నవంబర్ 15 తర్వాత ఇది తీవ్ర తుపానుగా మారే అవకాశం ఉందన్న అంచనాలు కూడా ఉన్నాయి.

అయితే తుపాను ఏర్పడటం, దాని తీవ్రత, దిశ, తీరం దాటే ప్రాంతం వంటి అంశాలపై ఇప్పుడే స్పష్టత లేదు. రాబోయే రోజుల్లో వాతావరణ పరిస్థితులను బట్టి మరింత సమాచారం వెల్లడయ్యే అవకాశం ఉంది. బంగాళాఖాతంలో ఏర్పడే ఈ వ్యవస్థల ప్రభావం తెలుగు రాష్ట్రాలపై ఎలా ఉంటుందన్నది ఆసక్తికరంగా మారింది.

తెలంగాణలోనూ కొన్ని జిల్లాల్లో వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. భద్రాద్రి కొత్తగూడెం, ఖమ్మం, నల్గొండ, సూర్యాపేట, నాగర్ కర్నూల్ జిల్లాల్లో అక్కడక్కడ ఉరుములు, మెరుపులతో కూడిన వర్షాలు పడవచ్చని అంచనా వేసింది.

వర్షాలు కురిసే సమయంలో గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉందని తెలిపింది. ఈ నేపథ్యంలో ఆయా జిల్లాలకు ఎల్లో అలర్ట్ జారీ చేసింది. ఉరుములు, మెరుపులతో కూడిన వర్షాలు పడే సమయంలో ప్రజలు చెట్ల కింద, విద్యుత్ స్తంభాల సమీపంలో ఉండకూడదని, అవసరమైన జాగ్రత్తలు తీసుకోవాలని సూచించింది.

హైదరాబాద్‌లో చలి పెరిగే అవకాశం

రాజధాని హైదరాబాద్‌లో ఆకాశం పాక్షికంగా మేఘావృతమై ఉంటుందని వాతావరణ శాఖ అంచనా వేస్తోంది. నగరంలోని కొన్ని ప్రాంతాల్లో చిరుజల్లులు కురిసే అవకాశం ఉంది. మరోవైపు రాత్రి ఉష్ణోగ్రతలు క్రమంగా తగ్గుతుండటంతో చలి తీవ్రత పెరిగే సూచనలు కనిపిస్తున్నాయి.

ముఖ్యంగా ఉదయం, రాత్రి వేళల్లో చల్లని వాతావరణం ఉండే అవకాశం ఉంది. దీంతో నగరవాసులు చలికి తగిన జాగ్రత్తలు తీసుకోవాల్సి ఉంటుంది. మొత్తంగా బంగాళాఖాతంలో ఏర్పడుతున్న ఉపరితల ఆవర్తనాలు, అల్పపీడనాల ప్రభావంతో తెలుగు రాష్ట్రాల్లో రాబోయే రోజుల్లో వాతావరణం మరింత మారే అవకాశం ఉంది. వాతావరణ శాఖ ఎప్పటికప్పుడు జారీ చేసే తాజా హెచ్చరికలను గమనిస్తూ ప్రజలు అప్రమత్తంగా ఉండాలి.

బంగాళాఖాతంలో మరో అల్పపీడనం.. మళ్లీ వర్షాలతో భారీ నష్టం తప్పదా?

Galam Venkata Rao — Tue, 10 Nov 2026 11:15:32 +0530

తెలంగాణ ప్రభుత్వం కీలక నిర్ణయం.. విద్యాసంస్థల్లో సినిమా ఈవెంట్లకు చెక్

Narender Vaitla — Tue, 10 Nov 2026 21:45:55 +0530

కాలేజీ క్యాంపస్‌లలో వాణిజ్య కార్యక్రమాలకు బ్రేక్

విద్యాసంస్థలు చదువుకు సంబంధించిన కార్యకలాపాలకే ప్రాధాన్యత ఇవ్వాలని తెలంగాణ ప్రభుత్వం భావిస్తోంది. ఇటీవల కొన్ని ప్రైవేట్ కళాశాలల్లో సినిమా ప్రచార కార్యక్రమాలు, భారీ ప్రైవేట్ ఈవెంట్లు నిర్వహించడం చర్చనీయాంశంగా మారింది. విద్యార్థులను ఇలాంటి కార్యక్రమాలకు పెద్ద సంఖ్యలో తరలించడం, వారి సాధారణ విద్యా కార్యకలాపాలకు అంతరాయం కలిగించడం వంటి అంశాలపై ప్రభుత్వం అభ్యంతరం వ్యక్తం చేస్తున్నట్లు తెలుస్తోంది. ఈ నేపథ్యంలో క్యాంపస్‌లను సినిమా ప్రమోషన్లు, వాణిజ్య ప్రచారాలకు వేదికలుగా ఉపయోగించకుండా నియంత్రించాలనే ప్రతిపాదన తెరపైకి వచ్చింది.

సినిమా కోసం సెలవులు ఇవ్వడంపై అభ్యంతరం

కొన్ని ప్రైవేట్ కాలేజీలు సినిమా ప్రమోషన్ల కోసం విద్యార్థులకు ప్రత్యేకంగా సెలవులు ప్రకటించడం ప్రభుత్వ దృష్టికి వెళ్లినట్లు సమాచారం. విద్యార్థులు తరగతులకు హాజరుకావాల్సిన సమయంలో వారిని సినిమా కార్యక్రమాలకు తీసుకెళ్లడం, ప్రచార కార్యక్రమాల్లో భాగస్వాములను చేయడం సరైన విధానం కాదని అధికారులు భావిస్తున్నట్లు తెలుస్తోంది. విద్యార్థుల భవిష్యత్తు, చదువుపై దృష్టి పెట్టాల్సిన విద్యాసంస్థలు వాణిజ్య ప్రయోజనాలకు ప్రాధాన్యత ఇవ్వడాన్ని ప్రభుత్వం తీవ్రంగా పరిగణిస్తోంది. ఈ తరహా చర్యలకు అడ్డుకట్ట వేసేలా కొత్త నిబంధనలు తీసుకురావాలని యోచిస్తోంది.

విద్యార్థుల భద్రతకు అత్యంత ప్రాధాన్యత

భారీ కార్యక్రమాల నిర్వహణ సమయంలో విద్యార్థుల రద్దీ పెరిగి తోపులాటలు, ఇతర అవాంఛనీయ ఘటనలు చోటుచేసుకునే ప్రమాదం ఉంది. ముఖ్యంగా సరైన భద్రతా ఏర్పాట్లు లేకుండా వేలాది మందితో ఈవెంట్లు నిర్వహిస్తే పరిస్థితులు అదుపు తప్పే అవకాశం ఉంటుంది. స్టేజీలు, సౌండ్ సిస్టమ్స్, విద్యుత్ పరికరాల ఏర్పాటు విషయంలోనూ ప్రమాదాలు తలెత్తవచ్చు. ఇలాంటి ఘటనల వల్ల విద్యార్థుల ప్రాణాలకు ముప్పు వాటిల్లకుండా ముందస్తు జాగ్రత్తలు తీసుకోవాలని ప్రభుత్వం భావిస్తోంది. అందుకే విద్యాసంస్థల్లో జరిగే కార్యక్రమాలపై కఠినమైన పర్యవేక్షణ అవసరమని యోచిస్తోంది.

కొత్త మార్గదర్శకాల్లో కీలక నిబంధనలు ఇవే

ప్రభుత్వం సిద్ధం చేస్తున్నట్లు చెబుతున్న మార్గదర్శకాల్లో పలు అంశాలకు ప్రాధాన్యత ఇవ్వనున్నట్లు సమాచారం. ముఖ్యంగా భారీ కార్యక్రమాలు నిర్వహించాలంటే ముందుగానే సంబంధిత అధికారుల అనుమతి తీసుకునే విధానాన్ని తీసుకురావాలని పరిశీలిస్తోంది. పెద్ద స్థాయి కార్యక్రమాలకు విద్యాశాఖతో పాటు పోలీసుల అనుమతి తప్పనిసరి చేసే అవకాశం ఉంది. స్టేజీల నిర్మాణం, విద్యుత్ సరఫరా, అగ్నిమాపక భద్రతపై ప్రత్యేక నిబంధనలు రూపొందించనున్నారు. కార్యక్రమాల సమయంలో విద్యార్థుల రాకపోకలు, జనసమూహాల నియంత్రణకు చర్యలు చేపట్టనున్నారు. విద్యా, క్రీడా కార్యకలాపాలకు ప్రాధాన్యతనిస్తూ ఇతర కార్యక్రమాలపై ఆంక్షలు విధించే అంశాన్ని పరిశీలిస్తున్నారు.

త్వరలో అధికారిక ఉత్తర్వులు వచ్చే అవకాశం

ఈ ప్రతిపాదనలకు సంబంధించి విద్యాశాఖ స్థాయిలో కసరత్తు జరుగుతున్నట్లు తెలుస్తోంది. కొత్త మార్గదర్శకాలు ఖరారైన తర్వాత అధికారిక ఉత్తర్వులు జారీ చేసే అవకాశం ఉంది. అయితే సినిమా ప్రీ రిలీజ్ ఈవెంట్లతో పాటు ఇతర ప్రైవేట్ కార్యక్రమాలపై ఎలాంటి పరిమితులు విధిస్తారు? ఏయే కార్యక్రమాలకు మినహాయింపులు ఉంటాయి? నిబంధనలు ఉల్లంఘించే విద్యాసంస్థలపై ఎలాంటి చర్యలు తీసుకుంటారు? అనే అంశాలపై స్పష్టత రావాల్సి ఉంది. ప్రభుత్వం అధికారికంగా ఉత్తర్వులు విడుదల చేసిన తర్వాతే పూర్తి వివరాలు వెల్లడికానున్నాయి. మొత్తంగా ఈ ప్రతిపాదనలు అమల్లోకి వస్తే విద్యాసంస్థల క్యాంపస్‌లలో నిర్వహించే ప్రైవేట్ ఈవెంట్ల విషయంలో గణనీయమైన మార్పులు వచ్చే అవకాశం ఉంది.

AQI: హైదరాబాద్‌లో ప్రమాదకర స్థాయికి వాయుకాలుష్యం.. ఎయిర్ క్వాలిటీని ఎలా కొలుస్తారో తెలుసా?

Mahesh Rajamoni — Mon, 09 Nov 2026 11:12:50 +0530

Hyderabad AQI: పలు నగరాల్లో వాయుకాలుష్యం ఊపిరాడనివ్వడం లేదు. దీపావళి వేడుకల తర్వాత హైదరాబాద్, ఢిల్లీలలో గాలి నాణ్యత తీవ్రంగా పడిపోయింది. ప్రమాదకర స్థాయికి చేరిన ఎయిర్ క్వాలిటీ ఇండెక్స్ లెక్కలు, కాలుష్యం కొలిచే విధానం ఇక్కడ తెలుసుకుందాం.

దీపావళి వేడుకల అనంతరం దేశ రాజధాని ఢిల్లీతో పాటు తెలంగాణ రాజధాని హైదరాబాద్‌ నగరం కూడా దట్టమైన పొగ కప్పేసింది. బంజారాహిల్స్, శ్రీనగర్ కాలనీ, పంజాగుట్ట, ఎస్‌ఆర్‌ నగర్, అమీర్‌పేట్, సోమాజిగూడ వంటి ప్రధాన ప్రాంతాల్లో రాత్రి 12 తర్వాత కూడా పటాకులు కాల్చడంతో గాలి నాణ్యత ఘోరంగా పడిపోయింది. రాత్రి 9:30 గంటల ప్రాంతంలో పీఎం 2.5 సాంద్రత అత్యధికంగా 392 మైక్రోగ్రాములు పర్ క్యూబిక్ మీటర్‌కు చేరగా, నగర సగటు ఎయిర్ క్వాలిటీ ఇండెక్స్ (AQI) ఏకంగా 509 ప్రమాదకర స్థాయిని తాకింది.

మసీద్ బండ సమీపంలోని రవి కాలనీలో ఏకంగా ఏక్యూఐ రికార్డు స్థాయిలో 995గా నమోదైంది. నగరంలో లోహపు, సల్ఫర్ గంధకం వాసన అలుముకోవడంతో జనాలు కంటి మంటలు, శ్వాస తీసుకోవడంలో తీవ్ర ఇబ్బందులు ఎదుర్కొన్నారు. రాత్రి 11:30 గంటలకు నగర సగటు ఏక్యూఐ 442 ఉండగా, శేరిలింగంపల్లిలో 666గా నమోదైంది. సోమవారం ఉదయానికి కూడా వాయు నాణ్యత ప్రమాదకరంగానే ఉంది.

ఢిల్లీ కాలుష్య నియంత్రణ కమిటీ రిపోర్టుల ప్రకారం, నవంబర్ 9 తెల్లవారుజామున పంజాబీ బాగ్ పరిధిలో పీఎం 2.5 సాంద్రత అత్యధికంగా 993 మైక్రోగ్రాములు పర్ క్యూబిక్ మీటర్‌గా నమోదైంది. ఇది ప్రపంచ ఆరోగ్య సంస్థ (WHO) సూచించిన 24 గంటల సురక్షిత పరిమితి (15 మైక్రోగ్రాములు) కంటే దాదాపు 66.2 రెట్లు ఎక్కువ.

అదేవిధంగా వివేక్ విహార్‌లో డబ్ల్యూహెచ్‌వో పరిమితి కంటే 58.2 రెట్లు, ఆర్.కే. పురంలో 61.6 రెట్లు ఎక్కువ కాలుష్యం నమోదైంది. ఆనంద్ విహార్, బవానా వంటి పర్యవేక్షణ కేంద్రాల డేటా కొన్ని గంటల పాటు నిలిచిపోవడం వల్ల వాస్తవ కాలుష్య స్థాయిలు ఇంకా ఎక్కువగానే ఉండవచ్చని నిపుణులు భావిస్తున్నారు. బురారీ క్రాసింగ్‌లో ఏక్యూఐ 441, రోహిణిలో 430గా రికార్డైంది.

కాలుష్య వివరాల్లో మనం తరచుగా వినే పదం 'పీఎం 2.5'. పీఎం అంటే పార్టిక్యులేట్ మ్యాటర్. గాలిలో తేలియాడే అతి సూక్ష్మమైన ధూళి, రసాయన కణాలు ఇవి. వీటి పరిమాణం 2.5 మైక్రాన్లు లేదా అంతకంటే తక్కువగా ఉంటుంది. ఇది మన తలవెంట్రుక మందం కంటే 30 రెట్లు చిన్నది.

ఇంత చిన్నగా ఉండటం వల్ల మనం శ్వాస తీసుకున్నప్పుడు ఈ కణాలు ముక్కులోని వెంట్రుకలు, ఊపిరితిత్తుల రక్షణ వ్యవస్థలను దాటుకుని నేరుగా ఊపిరితిత్తుల లోపలి భాగాలకు చేరుకుంటాయి. అంతేకాకుండా రక్తం ద్వారా శరీరంలోని వివిధ అవయవాలకు వ్యాపించి శ్వాసకోశ సమస్యలు, గుండె జబ్బులు, ఆస్తమా వంటి తీవ్రమైన ఆరోగ్య సమస్యలను కలిగిస్తాయి. పటాకులు కాల్చడం వల్ల భాగ్యనగరం, ఢిల్లీ వాతావరణంలో ఈ కణాలు భారీగా పెరిగాయి.

గాలి ఎంత స్వచ్ఛంగా ఉందో లేదా ఎంత కలుషితమైందో తెలిపే కొలమానమే ఎయిర్ క్వాలిటీ ఇండెక్స్ (ఏక్యూఐ). వాతావరణంలోని ప్రధాన కాలుష్య కారకాలను ప్రామాణికంగా తీసుకుని సాధారణ ప్రజలకు అర్థమయ్యేలా 0 నుండి 500 వరకు ఒక స్కేల్‌ రూపంలో ఏక్యూఐని లెక్కిస్తారు.

భారతదేశంలో సీపీసీబీ ముఖ్యంగా 8 రకాల కాలుష్య కారకాలను ఆధారంగా చేసుకుని ఏక్యూఐని లెక్కిస్తుంది..

• PM 2.5 (సూక్ష్మ ధూళి కణాలు)

• PM 10 (సాధారణ ధూళి కణాలు)

• నైట్రోజన్ డయాక్సైడ్ (NO2)

• సల్ఫర్ డయాక్సైడ్ (SO2)

• కార్బన్ మోనాక్సైడ్ (CO)

• ఓజోన్ (O3)

• అమ్మోనియా (NH3)

• సీసం (Lead - Pb)

పైన పేర్కొన్న కాలుష్య కారకాల 24 గంటల సగటు సాంద్రతను ఆటోమేటిక్ సెన్సార్లు నమోదు చేస్తాయి. ఆ విలువలను బట్టి సంక్లిష్టమైన గణిత సమీకరణాల ద్వారా సబ్-ఇండెక్స్‌లు లెక్కిస్తారు. వాటిలో ఏ కాలుష్య కారకం అత్యంత ప్రమాదకర స్థాయిలో ఉందో, ఆ విలువనే ఆ ప్రాంతపు తుది ఏక్యూఐగా ప్రకటిస్తారు.

సాధారణ ప్రజల ఆరోగ్య భద్రత కోసం సీపీసీబీ ఎయిర్ క్వాలిటీ ఇండెక్స్‌ను 6 విభాగాలుగా వర్గీకరించింది. అవి..

• 0 – 50 (మంచిది): గాలి అత్యంత స్వచ్ఛమైనది.

• 51 – 100 (సంతృప్తికరం): స్వల్ప మార్పులు.

• 101 – 200 (మోస్తరు): ఆస్తమా బాధితులకు ఇబ్బందికరం.

• 201 – 300 (పేలవమైనది): శ్వాస సంబంధిత ఇబ్బందులు మొదలవుతాయి.

• 301 – 400 (అత్యంత పేలవమైనది): ఆరోగ్య సమస్యలు తీవ్రమవుతాయి.

• 401 – 500 (తీవ్రమైనది): ఆరోగ్యంగా ఉన్నవారిపై కూడా తీవ్ర ప్రతికూల ప్రభావం చూపుతుంది.

వాయు కాలుష్యం పెరిగినప్పుడు అత్యవసర చర్యలు అమలు చేయడానికి 'కమిషన్ ఫర్ ఎయిర్ క్వాలిటీ మేనేజ్‌మెంట్' (CAQM) రూపొందించిన ప్లాన్ గ్రేడెడ్ రెస్పాన్స్ యాక్షన్ ప్లాన్ (GRAP).

Telangana's Ladakh: ఇది తెలంగాణ లడఖ్.. ఈ సరికొత్త టూరిస్ట్ స్పాట్ అందాలు చూశారా?

Mahesh Rajamoni — Sun, 08 Nov 2026 09:53:49 +0530

Telangana's Ladakh: హైదరాబాద్‌కు కూతవేటు దూరంలో ఉన్న వైజాగ్ కాలనీ నాగార్జునసాగర్ బ్యాక్‌వాటర్స్ అందాలతో పర్యాటకులను ఆకట్టుకుంటోంది. దీన్ని తెలంగాణ లడఖ్ లేదా మినీ గోవా అంటారు. ఈ అద్భుతమైన టూరిస్ట్ స్పాట్ వివరాలు మీకోసం.

వీకెండ్‌లో ప్రశాంతంగా గడపడానికి తెలంగాణలో ఎన్నో ప్రదేశాలు ఉన్నాయి. అయితే నల్గొండ జిల్లాలోని నాగార్జునసాగర్ బ్యాక్‌వాటర్స్ పక్కన ఉన్న వైజాగ్ కాలనీ ఇప్పుడు కొత్త టూరిస్ట్ డెస్టినేషన్‌గా మారుతోంది. చుట్టూ కొండలు, మధ్యలో నీరు, పచ్చటి ప్రకృతితో ఈ ప్రాంతం పర్యాటకులను ఎంతగానో ఆకర్షిస్తోంది. హైదరాబాద్ నుంచి సుమారు 120 నుండి 180 కిలోమీటర్ల దూరంలో ఈ ప్రదేశం ఉంది. కారులో వెళితే సుమారు మూడున్నర నుంచి నాలుగు గంటల సమయం పడుతుంది.

ఈ ప్రాంతాన్ని సోషల్ మీడియాలో చాలామంది 'తెలంగాణ లడఖ్' లేదా 'గ్రీన్ లడఖ్' అని పిలుస్తున్నారు. విశాలమైన భూభాగం, పచ్చటి తీరం, నీలి రంగు నీరు ఇక్కడ ప్రత్యేక ఆకర్షణగా నిలుస్తాయి. అలాగే బోటింగ్, రిలాక్స్డ్ వైబ్ కారణంగా కొందరు దీన్ని తెలంగాణ మినీ గోవా అని కూడా అంటుంటారు. అయితే ఇవన్నీ పర్యాటక నిపుణులు పెట్టిన పేర్లే కానీ అధికారిక పేర్లు కావు. ఇక్కడికి వెళ్లేవారు అక్టోబర్ నుంచి ఫిబ్రవరి మధ్య కాలం ఎంచుకోవడం చాలా మంచిది.

ఈ ప్రాంతం ప్రధానంగా నాగార్జునసాగర్ రిజర్వాయర్ బ్యాక్‌వాటర్స్ చుట్టూ విస్తరించి ఉంది. విశాలమైన నీటి విస్తీర్ణం, చుట్టూ ఉండే కొండలు ఫోటోగ్రఫీ ప్రేమికులను ఆకట్టుకుంటాయి. ఇక్కడ లోకల్ బోట్ రైడ్స్ అందుబాటులో ఉంటాయి. ఎల్లెశ్వరగట్టు ఐలాండ్‌కు వెళ్లడానికి స్థానిక బోట్లను ఆశ్రయించవచ్చు. సాయంత్రం వేళల్లో ఇక్కడ సూర్యాస్తమయం చూసేందుకు పర్యాటకులు ఎక్కువ ఆసక్తి చూపుతారు. అలాగే స్థానికంగా లభించే ఫ్రెష్ ఫిష్ కర్రీ, ఫిష్ ఫ్రై చాలా ఫేమస్.

శనివారం ఉదయం హైదరాబాద్ నుంచి బయలుదేరి ఉదయం 10-11 గంటలకల్లా వైజాగ్ కాలనీకి చేరుకోవచ్చు. ఆ తర్వాత స్థానిక ల్యాండ్‌స్కేప్ చూసి, బోట్ ద్వారా ఐలాండ్ పర్యటన చేయవచ్చు. మధ్యాహ్నం లంచ్ తర్వాత సాయంత్రం వరకు చుట్టుపక్కల ప్రాంతాలను చుట్టిరావచ్చు. సూర్యాస్తమయం సమయంలో బ్యాక్‌వాటర్స్ అందాలను కెమెరాలో బంధించవచ్చు. రాత్రికి అక్కడే క్యాంపింగ్ లేదా ముందస్తుగా బుక్ చేసుకున్న వసతి గృహాలలో బస చేయవచ్చు. ఆదివారం నాడు నాగార్జునసాగర్ డ్యామ్ వ్యూ పాయింట్లు, బుద్ధవనం సందర్శించి తిరిగి పయనం కావచ్చు.

View this post on Instagram

A post shared by Just Create Vibes (@just_create_vibes)

వైజాగ్ కాలనీ ట్రిప్‌కు వెళ్లేటప్పుడు కొన్ని ముఖ్యమైన విషయాలు గుర్తుంచుకోవాలి. బోటింగ్ చేసేటప్పుడు లైఫ్ జాకెట్ ధరించడం తప్పనిసరి. రిజర్వాయర్‌లో ఈత కొట్టడం లేదా ఒంటరిగా నీటిలోకి వెళ్లడం ప్రమాదకరం. తాగునీరు, స్నాక్స్, సన్ స్క్రీన్, పవర్ బ్యాంక్ వంటివి వెంట ఉంచుకోవాలి. ప్లాస్టిక్ వాడకాన్ని తగ్గించి ప్రాంతాన్ని పరిశుభ్రంగా ఉంచాలి. ప్రయాణానికి ముందు రోడ్డు పరిస్థితులు, బోటింగ్ లభ్యతను సరిచూసుకోవడం మంచిది.

View this post on Instagram

A post shared by Just Create Vibes (@just_create_vibes)

Weather Update: బంగాళాఖాతంలో మరో అల్పపీడనం.. తెలుగు రాష్ట్రాలకు మళ్లీ వర్షాలు

Mahesh Rajamoni — Tue, 10 Nov 2026 08:13:18 +0530

Weather Update: బంగాళాఖాతంలో నవంబర్ 13న మరో అల్పపీడనం ఏర్పడే అవకాశం ఉందని, దీని ప్రభావంతో ఏపీ, తెలంగాణల్లో వర్షాలు కురిసే ఛాన్స్ ఉందని వాతావరణ శాఖ వెల్లడించింది. మరోవైపు ఉష్ణోగ్రతలు పడిపోయి చలి తీవ్రత పెరుగుతోంది.

తెలుగు ప్రాంతాల్లో చలి తీవ్రత పెరుగుతోంది. ఇదే సమయంలో మరోసారి వర్షాలు కూడా పలకరించనున్నాయి. వాతావరణ శాఖ నుంచి అందుతున్న సమాచారం ప్రకారం, నవంబర్ 13వ తేదీన ఆగ్నేయ బంగాళాఖాతంలో మరో అల్పపీడనం ఏర్పడే అవకాశం ఉంది. ఈ పరిణామం పట్ల వాతావరణ నిపుణులు అప్రమత్తంగా ఉండాలని హెచ్చరిస్తున్నారు. అల్పపీడనం బలపడిన తర్వాత దాని కదలికలు, తీవ్రతను బట్టి వర్షాల ప్రభావంపై మరింత స్పష్టత రానుందని అధికారులు తెలిపారు.

ఈ అల్పపీడన ప్రభావం కారణంగా తెలంగాణ, ఆంధ్రప్రదేశ్ రాష్ట్రాలతో పాటు యానాం ప్రాంతంలోనూ వాతావరణం మారుతుంది. ఈ ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉందని వాతావరణ శాఖ అంచనా వేస్తోంది. వర్షాల సమయంలో ప్రజలు తగు జాగ్రత్తలు తీసుకోవాలని అధికారులు సూచిస్తున్నారు.

మరోవైపు తెలంగాణ వ్యాప్తంగా చలి తీవ్రత క్రమంగా పెరుగుతోంది. ఈశాన్య దిశ నుంచి వీస్తున్న పొడిగాలుల ప్రభావం వల్ల రాత్రి వేళల్లో ఉష్ణోగ్రతలు గణనీయంగా పడిపోతున్నాయి. ముఖ్యంగా భాగ్యనగరం హైదరాబాద్‌లో కనిష్ఠ ఉష్ణోగ్రతలు 17 నుంచి 19 డిగ్రీల సెల్సియస్ మధ్య నమోదవుతున్నాయి. ఉదయవేళల్లో ప్రజలు చలితో పాటు పొగమంచును కూడా ఎదుర్కొంటున్నారు.

రాజేంద్రనగర్, శంషాబాద్, మేడ్చల్, ఘట్‌కేసర్ వంటి పలు ప్రాంతాల్లో ఉదయం పూట దట్టమైన పొగమంచు కమ్ముకుంటోంది. ఇక ఆదిలాబాద్, కుమ్రం భీం ఆసిఫాబాద్, నిర్మల్, నిజామాబాద్, సంగారెడ్డి జిల్లాల్లో కనిష్ఠ ఉష్ణోగ్రతలు మరింత తక్కువగా 14 నుంచి 16 డిగ్రీల మధ్య నమోదవుతున్నాయి. ముఖ్యంగా ఏజెన్సీ ప్రాంతాల్లో సాధారణం కంటే 2 నుంచి 3 డిగ్రీలు తక్కువ ఉష్ణోగ్రతలు నమోదవుతున్నట్లు వాతావరణ గణాంకాలు స్పష్టం చేస్తున్నాయి.

వాతావరణంలో వస్తున్న ఈ మార్పుల నేపథ్యంలో ప్రజలు అప్రమత్తంగా ఉండాలని నిపుణులు సూచిస్తున్నారు. ఒకవైపు చలి తీవ్రత, మరోవైపు పొగమంచు, ఆపై ఆకస్మిక వర్షాల హెచ్చరికలరీత్యా తగిన జాగ్రత్తలు తీసుకోవాలని కోరుతున్నారు. వాతావరణ శాఖ సూచనలను ఎప్పటికప్పుడు గమనిస్తూ తదనుగుణంగా ప్రయాణాలు, దైనందిన కార్యక్రమాలు సాగించాలని సలహా ఇస్తున్నారు.

Winter Cold Alert: వణికిస్తున్న చలి.. ఈ జిల్లాలకు బిగ్ అలర్ట్.. 3 రోజులు జాగ్రత్త

Mahesh Rajamoni — Wed, 11 Nov 2026 09:28:30 +0530

Winter Cold Alert: తెలంగాణలో అకస్మాత్తుగా పెరిగిన చలి తీవ్రతపై భారత వాతావరణ శాఖ అలర్ట్ ఇచ్చింది. 21 జిల్లాల్లో 14 డిగ్రీలకు పడిపోయిన రాత్రి ఉష్ణోగ్రతల క్రమంలో, రాబోయే మూడు రోజుల్లో మరింత తగ్గే అవకాశం వుందని తెలిపింది.

తెలంగాణలో వాతావరణం ఒక్కసారిగా మారిపోయింది. మొన్నటిదాకా ఉక్కపోతతో ఇబ్బంది పడిన ప్రజలకు, ఇప్పుడు చలి వణుకు పుట్టిస్తోంది. ముఖ్యంగా రాత్రిపూట ఉష్ణోగ్రతలు భారీగా పడిపోతుండటంతో సాయంత్రం 6 గంటల నుంచే చలి తీవ్రత స్పష్టంగా కనిపిస్తోంది. గతంలో 20 డిగ్రీలకు పైగా నమోదైన రాత్రి ఉష్ణోగ్రతలు, కేవలం రెండు రోజుల్లోనే ఏకంగా 15 డిగ్రీల దిగువకు చేరడం గమనార్హం.

రాష్ట్రవ్యాప్తంగా చలి పంజా విసురుతోంది. ముఖ్యంగా 21 జిల్లాల్లో కనిష్ఠ ఉష్ణోగ్రతలు 14 డిగ్రీల రేంజ్‌లోనే నమోదవుతున్నాయి. నిర్మల్ జిల్లాలోని కుబీర్‌లో అత్యల్పంగా 14.6 డిగ్రీల సెల్సియస్ ఉష్ణోగ్రత రికార్డైంది. అలాగే సూర్యాపేట, ఆదిలాబాద్, మంచిర్యాల, నిజామాబాద్, జగిత్యాల, సిద్దిపేట, జయశంకర్ భూపాలపల్లి, మహబూబాబాద్, రాజన్న సిరిసిల్ల, వికారాబాద్ జిల్లాల్లో 14.7 డిగ్రీల చొప్పున టెంపరేచర్లు నమోదయ్యాయి. రంగారెడ్డి, కరీంనగర్, కామారెడ్డి, సంగారెడ్డి, మెదక్, ఆసిఫాబాద్, యాదాద్రి భువనగిరి జిల్లాల్లో 14.8 డిగ్రీలుగా ఉంది.

రాష్ట్ర రాజధాని హైదరాబాద్‌లోనూ చలి ప్రభావం క్రమంగా పెరుగుతోంది. నగరంలోని నాగోల్, ఆదిబట్ల, రాజేంద్రనగర్, కీసర, ఫలక్‌నుమా, అమీన్‌పూర్ ప్రాంతాలతో పాటు వెస్ట్ మారేడ్‌పల్లి, శామీర్‌పేట శివార్లలో 15 డిగ్రీల కనిష్ఠ ఉష్ణోగ్రతలు నమోదవుతున్నాయి. పగటిపూట ఎండ కాస్తున్నప్పటికీ, సాయంత్రం ఆరు గంటల నుంచి చల్లని ఈశాన్య గాలులు వీస్తున్నాయి.

వాతావరణ శాఖ, టీజీడీపీఎస్ అంచనాల ప్రకారం, రాబోయే మూడు రోజుల్లో రాష్ట్రంలో చలి తీవ్రత మరింత పెరుగుతుంది. రాత్రి ఉష్ణోగ్రతలు ఏకంగా 11 నుంచి 12 డిగ్రీల సెల్సియస్‌కు పడిపోయే అవకాశాలున్నాయని నిపుణులు హెచ్చరిస్తున్నారు. ముఖ్యంగా ఆసిఫాబాద్, గద్వాల, వరంగల్, మంచిర్యాల, జగిత్యాల, నిర్మల్, ఆదిలాబాద్, సంగారెడ్డి, మెదక్ జిల్లాల్లో ఈ ప్రభావం ఎక్కువగా ఉండే అవకాశం ఉంది.

తెల్లవారుజామున దట్టమైన పొగమంచు కమ్ముకునే అవకాశాలున్నాయని వాతావరణ శాఖ తెలిపింది. దీనివల్ల రహదారులపై విజిబిలిటీ తగ్గే ప్రమాదం ఉంది. ఉదయం వేళల్లో ఆఫీసులకు, పాఠశాలలకు వెళ్లేవారు, అలాగే హైవేలపై ప్రయాణించే వాహనదారులు తగిన జాగ్రత్తలు తీసుకోవాలని అధికారులు సూచించారు. చిన్నపిల్లలు, వృద్ధులు ఉదయం, రాత్రి సమయాల్లో బయటికి వెళ్లేటప్పుడు అప్రమత్తంగా ఉండాలి.

ఈశాన్య దిశ నుంచి తక్కువ ఎత్తులో వీస్తున్న చల్లని గాలుల వల్లే రాష్ట్రంలో ఒక్కసారిగా ఉష్ణోగ్రతలు పడిపోయినట్లు అధికారులు వెల్లడించారు. మరోవైపు, ఈ నెల 13న బంగాళాఖాతంలో అల్పపీడనం ఏర్పడే అవకాశం ఉందని, ఆ తర్వాత అది మరింత బలపడుతుందని ఐఎండీ అంచనా వేస్తోంది. పగటిపూట 31 నుంచి 32 డిగ్రీల గరిష్ఠ ఉష్ణోగ్రతలు నమోదవుతుండగా, రాత్రికి మాత్రం ఉష్ణోగ్రతలు భారీగా పడిపోతుండటంతో ఉష్ణోగ్రతల్లో వ్యత్యాసం స్పష్టంగా కనిపిస్తోంది.

మీరు తాగుతోన్న పాలు గేదె ఇచ్చినవేనా.? హైదరాబాద్‌లో వెలుగులోకి విస్తుపోయే నిజం

Narender Vaitla — Fri, 06 Nov 2026 19:40:45 +0530

Hyderabad: హైదరాబాద్‌లో కల్తీ పాల వ్యవహారం వెలుగులోకి వచ్చింది. ప్రజలకు విక్రయించే పాలలో రసాయనాలు కలిపి కృత్రిమంగా తయారు చేస్తున్న ఓ కేంద్రాన్ని పోలీసులు గుర్తించారు. అసలు గేదె పాలు ఇవ్వకుండానే పాలను తయారు చేశారు కేటుగాళ్లు.

రంగారెడ్డి జిల్లా ఇబ్రహీంపట్నం మండలం పోచారం గ్రామంలో కల్తీ పాలు తయారు చేస్తున్నారనే సమాచారంతో మహేశ్వరం జోన్ ఎస్‌వోటీ పోలీసులు రంగంలోకి దిగారు. శుక్రవారం ఓ పాల తయారీ కేంద్రంపై ఆకస్మికంగా తనిఖీలు చేపట్టారు. అక్కడి పరిస్థితులను పరిశీలించిన అధికారులు పాల తయారీలో అనుమానాస్పద పదార్థాలు ఉపయోగిస్తున్నట్లు గుర్తించారు. సాధారణ పాలకు బదులుగా పాలపొడి, రసాయనాలను కలిపి విక్రయానికి సిద్ధం చేస్తున్నట్లు ప్రాథమికంగా నిర్ధారించారు.

పోచారం గ్రామానికి చెందిన అందె శ్రీశైలం (43) పాల వ్యాపారం నిర్వహిస్తున్నాడు. అయితే అతడు ధోల్‌పూర్ బ్రాండ్ పాలపొడితో పాటు హైడ్రోజన్ పెరాక్సైడ్‌ను ఉపయోగించి కల్తీ పాలు తయారు చేస్తున్నట్లు పోలీసులు గుర్తించారు. ఈ విధంగా సిద్ధం చేసిన పాలను వినియోగదారులకు విక్రయిస్తున్నట్లు విచారణలో వెల్లడైంది. సాధారణంగా క్రిమిసంహారక, శుభ్రపరిచే అవసరాలకు ఉపయోగించే హైడ్రోజన్ పెరాక్సైడ్‌ను ఆహార పదార్థాల్లో అనుమతి లేని విధంగా కలపడం ప్రమాదకరం అని నిపుణులు హెచ్చరిస్తున్నారు.

పోలీసులు నిర్వహించిన తనిఖీల్లో కల్తీ పాల తయారీకి ఉపయోగిస్తున్న పదార్థాలను స్వాధీనం చేసుకున్నారు. మొత్తం 100 లీటర్ల అనుమానిత కల్తీ పాలను సీజ్ చేశారు. వీటితో పాటు ఒక లీటరు హైడ్రోజన్ పెరాక్సైడ్, ఒక్కోటి కిలో బరువున్న 35 ధోల్‌పూర్ పాలపొడి ప్యాకెట్లను స్వాధీనం చేసుకున్నారు. ఈ వ్యవహారంలో నిందితుడు అందె శ్రీశైలంను పోలీసులు అదుపులోకి తీసుకున్నారు. అనంతరం నిందితుడితో పాటు స్వాధీనం చేసుకున్న వస్తువులను ఇబ్రహీంపట్నం పోలీస్ స్టేషన్‌కు అప్పగించారు.

Milk meant for Hyderabad customers allegedly adulterated with hydrogen peroxide

Would you think twice before pouring that glass of milk for your family? A milk adulteration racket has been busted in Pocharam village of Ibrahimpatnam, where a businessman was allegedly mixing hydrogen peroxide and milk powder with milk before supplying it to customers in Hyderabad.

The Special Operations Team (SOT) of Maheshwaram Zone, Future City Police, raided the unit following credible information on Friday, November 6, and apprehended the alleged operator, identified as Ande Srishailam (43), a resident of Pocharam village.

According to police, Srishailam allegedly mixed hydrogen peroxide and Dholpur milk powder with milk to prepare adulterated supplies for customers in Hyderabad. The practice could pose a potential risk to public health.

What did police seize?

During the raid, police seized 100 litres of suspected adulterated milk, one litre of hydrogen peroxide and 35 packets of Dholpur milk powder, each weighing one kg.

The SOT team handed over Srishailam and the seized material to Ibrahimpatnam Police Station for further legal action.

A concern beyond one raid

Milk is a daily essential in most households, particularly for children and elderly people. The alleged use of chemicals and milk powder to adulterate supplies raises concerns about what consumers may unknowingly be bringing home.

Future City Police have urged people to remain cautious while purchasing milk and dairy products and report suspected adulteration to the authorities.

#Milkadulteration #Telangana #FutureCity #Hyderabad

— Sudhakar Udumula (@sudhakarudumula) November 6, 2026

పాలలో రసాయనాలు కలపడం వల్ల వాటిని వినియోగించే వారికి అనారోగ్య సమస్యలు తలెత్తే అవకాశం ఉంది. ముఖ్యంగా హైడ్రోజన్ పెరాక్సైడ్‌ను ఆహారంలో అనుమతి లేకుండా ఉపయోగించడం ఆరోగ్యానికి హానికరం. రసాయనం గాఢత, శరీరంలోకి చేరిన పరిమాణాన్ని బట్టి కడుపులో మంట, కడుపునొప్పి, వాంతులు, విరేచనాలు వంటి సమస్యలు రావచ్చు. అధిక మోతాదులో తీసుకుంటే జీర్ణవ్యవస్థపై తీవ్రమైన ప్రభావం పడే ప్రమాదం కూడా ఉంది. చిన్నపిల్లలు, వృద్ధుల విషయంలో మరింత జాగ్రత్త అవసరం. అందుకే పాల నాణ్యతపై అనుమానం కలిగితే వాటిని తాగకుండా ఉండటం మంచిదని నిపుణులు సూచిస్తున్నారు.

ఈ ఘటనపై ఇబ్రహీంపట్నం పోలీసులు కేసు నమోదు చేసి దర్యాప్తు ప్రారంభించారు. నిందితుడు ఎంతకాలంగా ఈ విధంగా కల్తీ పాలను తయారు చేస్తున్నాడు? హైదరాబాద్‌లోని ఏయే ప్రాంతాలకు వాటిని సరఫరా చేశాడు? ఈ అక్రమ వ్యాపారం వెనుక మరికొందరి ప్రమేయం ఉందా? అనే అంశాలపై ఆరా తీస్తున్నారు. ఇప్పటికే మార్కెట్లోకి చేరిన కల్తీ పాల వివరాలను సేకరించే ప్రయత్నం చేస్తున్నారు. ప్రజల ఆరోగ్యానికి ముప్పు కలిగించే ఇలాంటి అక్రమాలకు పాల్పడితే కఠిన చర్యలు తీసుకుంటామని పోలీసులు హెచ్చరిస్తున్నారు. రోజువారీ ఆహారంలో కీలకమైన పాలలోనే రసాయనాల వినియోగం బయటపడటంతో నగర ప్రజల్లో ఆందోళన నెలకొంది.

పాలలో కల్తీని కేవలం రంగు, రుచి, వాసన చూసి కచ్చితంగా గుర్తించడం సాధ్యం కాదు. పాలు అసహజంగా తెల్లగా కనిపించడం, వింత వాసన రావడం, రుచి తేడాగా ఉండటం వంటి లక్షణాలు అనుమానానికి తావిస్తాయి. అయితే హైడ్రోజన్ పెరాక్సైడ్ వంటి రసాయనాలను ఇంట్లో చేసే సాధారణ పరీక్షలతో గుర్తించలేం. అనుమానం ఉంటే ఆ పాలను తాగకుండా, నమూనాను ఆహార భద్రత అధికారులకు ఇచ్చి పరీక్ష చేయించాలి.

School Holidays: విద్యార్థులకు గుడ్ న్యూస్.. వారానికి 5 రోజులే స్కూల్స్.. శనివారం కూడా సెలవు? అసలు రీజన్ ఇదే

Mahesh Rajamoni — Mon, 09 Nov 2026 11:51:05 +0530

School Holidays: తెలంగాణలో స్కూళ్లకు వారానికి 5 రోజులే తరగతులు నిర్వహించి, శనివారాలు సెలవు ఇవ్వాలని ఎంఎల్‌సీ మల్కా కొమరయ్య సీఎం రేవంత్ రెడ్డికి విన్నవించారు. ప్రభుత్వం దీనిపై కసరత్తులు చేసే విషయంపై త్వరలోనే నిర్ణయం తీసుకోనుంది.

తెలంగాణలోని హైదరాబాద్‌తో పాటు అన్ని జిల్లాల్లో ఉన్న పాఠశాలలకు వారానికి ఐదు రోజులే పనిదినాలు అమల్లోకి వచ్చే అవకాశం ఉంది. శనివారాలను పూర్తిగా సెలవు దినాలుగా ప్రకటించాలని ఉపాధ్యాయ నియోజకవర్గ శాసనమండలి సభ్యుడు (ఎంఎల్‌సీ) మల్కా కొమరయ్య రాష్ట్ర ప్రభుత్వానికి ప్రతిపాదించారు. ఎల్ నినో ప్రభావం, నీటి ఎద్దడి సమస్యలు, మారుతున్న వాతావరణ పరిస్థితులను దృష్టిలో ఉంచుకుని ఆయన ఈ విజ్ఞప్తిని లేఖ రూపంలో ముఖ్యమంత్రి రేవంత్ రెడ్డికి సమర్పించారు.

వారానికి ఐదు రోజులే స్కూళ్లు నిర్వహించడం వల్ల శనివారం కోల్పోయే పని గంటలను భర్తీ చేసేందుకు ఎంఎల్‌సీ ఒక పరిష్కారాన్ని చూపారు. సోమవారం నుంచి శుక్రవారం వరకు ప్రతిరోజూ స్కూల్ వేళలను సుమారు 35 నుంచి 40 నిమిషాల పాటు పెంచాలని సూచించారు. ఈ సమయ సర్దుబాటు చేయడం వల్ల శనివారాలు సెలవులు ఇచ్చినా, విద్యార్థులకు అవసరమైన బోధనా గంటలు ఏమాత్రం తగ్గవు. హైదరాబాద్, ఇతర జిల్లాల్లోని స్కూళ్లలో సిలబస్ సకాలంలో పూర్తవుతుందని ఆయన అన్నారు.

ఐదు రోజుల స్కూల్ విధానం వల్ల అనేక అనుకూల ఫలితాలు ఉంటాయని ఎంఎల్‌సీ వివరించారు. శనివారం సెలవు ఇవ్వడం వల్ల కేవలం నీటి పొదుపే కాకుండా, ఇంధన ఆదా కూడా జరుగుతుంది. రోడ్లపై స్కూల్ బస్సులు, వాహనాల రాకపోకలు తగ్గి, ట్రాఫిక్ సమస్యలు, కాలుష్యం చెప్పుకోదగ్గ స్థాయిలో తగ్గుతాయి. అంతేకాకుండా, అధిక ఉష్ణోగ్రతలు, క్లిష్టమైన వాతావరణ పరిస్థితుల్లో విద్యార్థులకు అదనంగా ఒక రోజు విశ్రాంతి దొరుకుతుందని, ఇది వారి ఆరోగ్యానికి, శారీరక దృఢత్వానికి ఎంతో మేలు చేస్తుందని ఆయన పేర్కొన్నారు.

రాష్ట్రంలోని సాంస్కృతిక, మతపరమైన ఆచార వ్యవహారాలకు తగిన ప్రాధాన్యం ఇవ్వాలని ఎంఎల్‌సీ విజ్ఞప్తి చేశారు. రక్షాబంధన్, వరలక్ష్మి వ్రతం పండుగలకు జనరల్ హాలిడేస్ ప్రకటించాలని కోరారు. ముఖ్యంగా మహిళలు ఆచరించే వరలక్ష్మి వ్రతం, సోదరభావాన్ని చాటే రాఖీ పండుగల ప్రాముఖ్యతను వివరించారు. వీటితో పాటు తొలి ఏకాదశి, రథసప్తమి పండుగలను ఐచ్ఛిక సెలవుల జాబితాలో చేర్చాలని విజ్ఞప్తి చేశారు. ఉద్యోగులు, ఉపాధ్యాయుల భావోద్వేగాలను పరిగణనలోకి తీసుకుని ప్రభుత్వం ఈ ప్రతిపాదనలపై వీలైనంత త్వరగా సానుకూల నిర్ణయం తీసుకోవాలని ఆయన కోరారు.

పాఠశాలల పనిదినాల ప్రతిపాదనతో పాటు, 2026 ప్రభుత్వ సెలవుల క్యాలెండర్‌లో కొన్ని మార్పులు చేయాలని కోరుతూ ఎంఎల్‌సీ మల్కా కొమరయ్య నవంబర్ 7, 2026న విద్యాశాఖ కార్యదర్శికి మరొక లేఖ రాశారు. నవంబర్ 8 ఆదివారం రోజున దీపావళి పండుగ రావడం వల్ల, ఆ సాధారణ సెలవు వారాంతపు సెలవుతో కలిసిపోయిందని గుర్తుచేశారు. అమావాస్య తిథి సోమవారం వరకు ఉన్నందున, నవంబర్ 9 (సోమవారం) నాడు దీపావళికి జనరల్ హాలిడే ప్రకటించాలని కోరారు. దీనివల్ల ప్రభుత్వ ఉద్యోగులు, ఉపాధ్యాయులు తమ కుటుంబాలతో పండుగను ఆనందంగా జరుపుకునే వెసులుబాటు కలుగుతుందని తెలిపారు.

Cyclone Akvan : బంగాళాఖాతంలో అక్వాన్ తుపాను లోడింగ్.. ఎక్కడ తీరం దాటితే ఏం జరుగుతుంది?

Arun Kumar P — Wed, 11 Nov 2026 16:31:43 +0530

అర్నబ్, మురసు తుపానుల మాదిరిగానే రాబోయే అక్వాన్ తుపాను కూడా ఏపీ తీరంవైపే దూసుకువచ్చే అవకాశాలే ఎక్కువట. దీని దారి మారితే మాత్రం ఇతర తీరాలవైపు వెళుతుందట. మరి ఈ తుపాను ఏ తీరానికి చేరితే ఏం జరుగుతుంది?

Akvan Cyclone : ఇప్పటికే అర్నబ్, మురసు తుపానులు ఆంధ్ర ప్రదేశ్ ను అతలాకుతలం చేశాయి. భారీ ఈదురుగాలులతో కూడిన వర్షాలకు ఊహించని స్థాయిలో ఆస్తినష్టం మిగిల్చాయి... కొన్నిప్రాంతాల్లో ప్రాణనష్టం కూడా జరిగింది. వరదనీరు పంటపొలాల్లోకి చేరి రైతులను, జనావాసాల్లోకి చేరి ప్రజలను ఇబ్బందిపెట్టింది. ఈ తుపాను దెబ్బనుండి ఇంకా కోలుకోకముందే బంగాళాఖాతంలో మరో తుపాను లోడ్ అవుతోందన్న హెచ్చరికలు వస్తున్నాయి. మరి ఈ తుపాను కూడా ఏపీ తీరంవైపు దూసుకువస్తే మరోసారి అల్లకల్లోలం తప్పదన్నమాట.

ప్రస్తుతం దక్షిణ అండమాన్ సముద్రంలో ఉపరితల ఆవర్తనం కొనసాగుతోందని వాతావరణ శాఖ చెబుతోంది. దీని ప్రభావంతో మరో రెండ్రోజుల్లో అంటే ఈ శుక్రవారం (నవంబర్ 13న) ఆగ్నేయ బంగాళాఖాతంలో అల్పపీడనం ఏర్పడే అవకాశం ఉందని ఏపీ విపత్తు నిర్వహణ సంస్థ (APSDMA) తెలిపింది. ఇది మరింత బలపడి శనివారం (నవంబర్ 14) తీవ్ర అల్పపీడనంగా, ఆదివారం (నవంబర్ 15) వాయుగుండంగా బలపడే అవకాశం ఉందని ఏపిఎస్డిఎంఏ ఎండి, RTGS CEO ప్రఖర్ జైన్ తెలిపారు.

అయితే ఈ వాయుగుండం బలపడి తుపానుగా ఏర్పడే అవకాశాలున్నాయని వాతావరణ నిపుణులు తెలంగాణ వెదర్ మ్యాన్ చెబుతున్నారు. వాతావరణ పరిస్థితులు పూర్తిగా చేంజ్ అయితే చెప్పలేంగాని ఇప్పటికయితే తుపాను ఏర్పడే అవకాశాలు 85 శాతం ఉన్నాయంటున్నారు. తుపాను ఏర్పడితే అక్వాన్ గా పేరు పెడతారు. నవంబర్ 17న ఈ అక్వాన్ తుపాను ఏర్పడే అవకాశాలున్నాయని తెలంగాణ వెదర్ మ్యాన్ అంచనా.

బంగాళాఖాతంలో ఏర్పడే కొత్త తుపాను అక్వాన్ కూడా ఆంధ్ర ప్రదేశ్ వైపే దూసుకువచ్చే అవకాశాలున్నాయని తెలంగాణ వెదర్ మ్యాచ్ చెబుతున్నారు. ఒకవేళ ఇది రూట్ మార్చుకుంటే మాత్రం ఒడిషా, పశ్చిమ బెంగాల్ తీరాలవైపు వెళ్లవచ్చని అంటున్నారు. తుపాను ఎటువైపు వెళుతుంది అనేదాన్నిబట్టి తెలుగు రాష్ట్రాల్లో వాతావరణ పరిస్థితులు ఆదారపడి ఉంటాయి.

ఆంధ్ర ప్రదేశ్ తీరంవైపు వచ్చే అవకాశాలు 55 శాతం ఉన్నాయి... నెల్లూరు-ఒంగోలు వద్ద ఈ తుపాను తీరందాటవచ్చని అంటున్నారు. ఇదే జరిగితే నవంబర్ 19-20 తేదీల మధ్య తీరం దాటవచ్చని వెదర్ మ్యాన్ అంచనా వేస్తున్నారు. దీంతో నవంబర్ 21 నుండి 24 వరకు భారీ వర్షాలు కురుస్తాయట. తూర్పు తెలంగాణ జిల్లాల్లో కూడా భారీ వర్షాలు కురిసే అవకాశాలుంటాయని వెదన్ మ్యాన్ వెల్లడించారు.

ఇక అక్వాన్ తుపాను ఒడిషా-పశ్చిమ బెంగాల్ మధ్య తీరం దాటే అవకాశాలు 25 శాతం ఉన్నాయంటున్నారు వెదర్ మ్యాన్. ఇదే జరిగితే తెలంగాణలో వర్షాలు ఉండవని.... ఉష్ణోగ్రతలు పెరిగి నవంబర్ 20 తర్వాత చలి తగ్గుతుందని అంటున్నారు. పెరుగుతుందట.

అక్వాన్ తుపాను మయన్మార్-బంగ్లాదేశ్ మధ్య తీరందాటే అవకాశాలు 20 శాతం ఉన్నాయట. ఇదే జరిగితే తెలంగాణలో ఉష్ణోగ్రతలు గణనీయంగా తగ్గి చలి తీవ్రత పెరుగుతుందంటున్నారు. ఇలా అక్వాన్ తుపాను ఎక్కడ తీరందాటినా తెలంగాణపై ప్రభావం ఉంటుందని తెలంగాణ వెదర్ మ్యాన్ ప్రకటనను బట్టి తెలుస్తోంది.

అక్వాన్ తుపాను ప్రభావంతో ఈ శనివారం నుండి మంగళవారం వరకు సముద్రం అలజడిగా ఉంటుందని వాతావరణ శాఖ తెలిపింది. కాబట్టి మత్స్యకారులు ఆగ్నేయ, నైరుతి, మధ్య బంగాళాఖాతం వైపు వేటకు వెళ్లరాదని సూచించింది. ప్రస్తుతానికి ఆంధ్రప్రదేశ్‌పై దీని ప్రభావం లేదని... రానున్న రోజుల్లో ఇది ఏటు వైపు పయనిస్తుందనే అంశంపై స్పష్టత రానుందని విపత్తు నిర్వహణ సంస్థ ఎండి ప్రఖర్ జైన్ తెలిపారు.

ఇదిలావుంటే ఇప్పటికే తెలంగాణలో ఉష్ణోగ్రతలు పడిపోతున్నాయి... రోజురోజుకి చలి తీవ్రత పెరుగుతోంది. ఇవాళ ఉదయం (నవంబర్ 11, బుధవారం) అత్యల్పంగా మెదక్ జిల్లాల్లో 13.4 డిగ్రీలు, ఆదిలాబాద్ లో 13.5, హన్మకొండలో 14, ఖమ్మంలో 14.6 డిగ్రీల ఉష్ణోగ్రతలు నమోదయ్యాయని హైదరాబాద్ వాతావరణ కేంద్రం ప్రకటించింది.

హైదరాబాద్ లో అయితే ఉష్ణోగ్రతలు మరింత దారుణంగా పడిపోతున్నాయి. ఇవాళ రాజేంద్రనగర్ లో 12, పటాన్ చెరు (ఈక్రిశాట్ ప్రాంతంలో) 12.6, బేగంపేటలో 16.1, హయత్ నగర్ లో 17 డిగ్రీల ఉష్ణోగ్రతలు నమోదయ్యాయి. రాబోయే రెండుమూడు రోజులు ఉష్ణోగ్రతలు సాధారణం కంటే 2-3 డిగ్రీలు తక్కువగా నమోదయ్యే అవకాశం ఉదంటోంది హైదరాబాద్ వాతావరణ కేంద్రం.

బంగాళాఖాతంలో తీవ్ర అల్పపీడనం.. తెలంగాణలో పెరుగుతున్న చలి తీవ్రత | Rain Warning for AP & Telangana

Galam Venkata Rao — Mon, 09 Nov 2026 12:14:06 +0530

New Life Insurance Scheme: ప్రజలకు రేవంత్ సర్కార్ గుడ్ న్యూస్.. రూ.5 లక్షల బీమా పథకం వివరాలు ఇవే

Mahesh Rajamoni — Fri, 06 Nov 2026 11:15:23 +0530

Telangana Cabinet: తెలంగాణ కేబినెట్ సమావేశంలో కీలక నిర్ణయాలు తీసుకున్నారు. నవంబర్ 19న సిద్దిపేటలో రూ.5 లక్షల ఇందిరమ్మ కుటుంబ జీవిత బీమా పథకం ప్రారంభం కానుంది. ఆ వివరాలు మీకోసం.

సామాజిక సంక్షేమాన్ని ప్రతీ ఒక్కరికీ చేరవేయడం, ప్రభుత్వ పరిపాలనా వ్యవస్థను మరింత బాధ్యతాయుతంగా మార్చడం, రాష్ట్రంలోని మౌలిక వసతులను బలోపేతం చేయడమే లక్ష్యంగా ముఖ్యమంత్రి రేవంత్ రెడ్డి సారథ్యంలో తెలంగాణ కేబినెట్ భేటీ అయ్యింది. ఈ భేటీలో పలు ప్రాధాన్యం కలిగిన పథకాల అమలు, ఉద్యోగాల నియామకం, చట్టాల సవరణపై స్పష్టమైన రోడ్‌మ్యాప్‌ను సిద్ధం చేశారు.

దివంగత ప్రధాని ఇందిరా గాంధీ జయంతిని పురస్కరించుకుని నవంబర్ 19వ తేదీన సిద్దిపేటలో రాష్ట్ర ప్రభుత్వం తరఫున ఒక భారీ బహిరంగ సభను ఏర్పాటు చేయనున్నారు. ఇక్కడి నుంచే రెండు బిగ్ సంక్షేమ పథకాలకు శ్రీకారం చుట్టబోతున్నారు..

• ఇందిరమ్మ కుటుంబ జీవిత బీమా: రాష్ట్రంలోని ప్రతీ కుటుంబానికి రూ. 5 లక్షల లైఫ్ ఇన్సూరెన్స్ వర్తించేలా ఈ పథకాన్ని డిజైన్ చేశారు. దీనికోసం నవంబర్ 20 నుంచి 30 వరకు రాష్ట్రవ్యాప్తంగా ఇంటింటి సర్వే జరగనుంది. గ్రామాల్లోని ఇందిరమ్మ కమిటీలు నేరుగా ఇళ్లకు వెళ్లి అప్లికేషన్లు సేకరిస్తాయి. వీటిని తహశీల్దార్లు, పంచాయతీ కార్యదర్శులు వెరిఫై చేస్తారు.

• చీరల పంపిణీ: ఇదే సభ నుంచి రాష్ట్రంలోని అర్హులైన మహిళలకు ఉచిత చీరల పంపిణీ రెండో విడతను అధికారికంగా ప్రారంభించనున్నారు.

రాష్ట్రవ్యాప్తంగా నిర్మించిన ఇందిరమ్మ ఇళ్లలో దీపావళి పండుగను వినూత్నంగా జరుపుకోవాలని కేబినెట్ ఫిక్స్ అయ్యింది. ఇప్పటివరకు 2,25,000 ఇళ్ల నిర్మాణం పూర్తయింది. ప్రజాప్రతినిధులు, మంత్రులు, ఎమ్మెల్యేలు నేరుగా లబ్ధిదారుల ఇళ్లకు వెళ్లి పండుగ వేడుకల్లో పాల్గొంటారు. సీఎం రేవంత్ రెడ్డి స్వయంగా కొడంగల్‌లోని ఒక ఇందిరమ్మ ఇంట్లో జరగబోయే దీపావళి వేడుకల్లో పాల్గొననున్నారు.

అభివృద్ధి పనుల ప్రారంభోత్సవాలు, శంకుస్థాపనల కోసం ముఖ్యమంత్రి రేవంత్ రెడ్డి నవంబర్ 7 నుంచి 9 వరకు మూడు రోజుల పాటు కొడంగల్ నియోజకవర్గంలో పర్యటించనున్నారు. పర్యటన చివరి రోజున (నవంబర్ 9) భారీ రైతు బహిరంగ సభతో పాటు మెగా రైతు మేళా, ఇండస్ట్రియల్ ఎక్స్‌పో నిర్వహించనున్నారు. ఇక డిసెంబర్ 7, 8, 9 తేదీల్లో ఫ్యూచర్ సిటీలో జరగబోయే 'ఇన్వెస్ట్ తెలంగాణ గ్లోబల్ సమ్మిట్-2026'ను విజయవంతం చేయడంపై కూడా సీనియర్ అధికారులకు బాధ్యతలు కేటాయించారు.

అత్యవసర సమయంలో రక్షణ చర్యలు సులభతరం చేసేందుకు 'తెలంగాణ ఫైర్ సర్వీస్ యాక్ట్-1999'కి సవరణలు చేశారు. అలాగే భూ వివాదాల పరిష్కారాన్ని వేగవంతం చేయడానికి 'తెలంగాణ సర్వే అండ్ బౌండరీస్ యాక్ట్-1923'లోని సెక్షన్ 12(A)ను సవరించి, అప్పీల్ దాఖలు చేసే టైమ్ లిమిట్‌ను 60 రోజుల నుంచి 30 రోజులకు తగ్గించారు. ఎల్-నినో వల్ల వచ్చిన కరవు పరిస్థితులు, కాళేశ్వరం ప్రాజెక్టుపై సమగ్రంగా చర్చించేందుకు త్వరలోనే అసెంబ్లీ ప్రత్యేక సమావేశాలు నిర్వహించనున్నట్లు కేబినెట్ ప్రకటించింది.

Cold Wave Alert: తెలంగాణపై చలి పంజా.. ఉన్నట్టుండి రాత్రి ఉష్ణోగ్రతలు డౌన్... వింటర్ కేర్ టిప్స్ ఇవే

Mahesh Rajamoni — Mon, 09 Nov 2026 08:56:31 +0530

Cold Wave Alert: తెలంగాణ పై చలి పంజా విసురుతోంది. ఉష్ణోగ్రతలు వేగంగా పడిపోతున్నాయి. వాతావరణంలో వచ్చిన ఈ మార్పులతో ఆరోగ్యం కాపాడుకోవడానికి, ఈ వింటర్ సీజన్ లో తీసుకోవాల్సిన ముఖ్యమైన జాగ్రత్తలు ఏంటో ఇక్కడ తెలుసుకుందాం.

నవంబర్ నెల ప్రారంభం కావడంతోనే తెలంగాణ వ్యాప్తంగా వాతావరణం పూర్తిగా మారుతోంది. మొన్నటివరకు వరుస తుపానులు, వర్షాలు, పలు ప్రాంతాల్లో ఎండలతో ఉన్న రాష్ట్రం ఇప్పుడు చలితీవ్రతతో వణుకుతోంది. ఈశాన్య దిశ నుంచి పొడిగాలులు వీస్తుండటంతో వాతావరణం పూర్తిగా కూల్ గా మారిపోయింది. రాబోయే రోజుల్లో రాత్రి ఉష్ణోగ్రతలు మరింత పడిపోతాయని వాతావరణ కేంద్రం హెచ్చరిస్తోంది.

రాష్ట్రవ్యాప్తంగా రాత్రివేళల్లో ఉష్ణోగ్రతలు వేగంగా క్రమంగా తగ్గుతున్నాయి. ఉదయం, రాత్రి సమయాల్లో వీస్తున్న చల్లని గాలులకు జనం ఇళ్లలోనే ఉండేందుకు ప్రాధాన్యం ఇస్తున్నారు. సాయంత్రం 5:30 దాటిందంటే చాలు వాతావరణంలో చల్లదనం పెరిగిపోతోంది. రాబోయే కొద్ది రోజులు పొడి గాలుల ప్రభావం వల్ల చలి తీవ్రత ఇంకా పెరిగే అవకాశముంది. వీటితో జాగ్రత్తగా వుండాలని వైద్య నిపుణులు చెబుతున్నారు.

రాజధాని హైదరాబాద్ నగరంలో నైట్ టెంపరేచర్స్ 17 డిగ్రీల సెల్సియస్ నుంచి 19 డిగ్రీల సెల్సియస్ వరకు నమోదవుతున్నాయి. నగర శివారు ప్రాంతాలైన రాజేంద్రనగర్, శంషాబాద్, మేడ్చల్, ఘట్‌కేసర్ ప్రాంతాల్లో తెల్లవారుజామున దట్టమైన పొగమంచు అలముకుంటోంది. ఉదయం 8 గంటల వరకు చలి గాలుల ప్రభావం ఎక్కువగా ఉంటోంది. ఈ పరిస్థితులు మరింత పెరిగే అవకాశముందని వాతావరణ నిపుణులు చెబుతున్నారు.

ఉత్తర తెలంగాణ జిల్లాలైన ఆదిలాబాద్, కుమురం భీం ఆసిఫాబాద్, నిర్మల్, నిజామాబాద్, మెదక్, సంగారెడ్డిలలో చలి పంజా విసురుతోంది. అక్కడ కనిష్ఠ ఉష్ణోగ్రతలు 14 డిగ్రీల సెల్సియస్ నుంచి 16 డిగ్రీల సెల్సియస్‌కి పడిపోతున్నాయి. మరీ ముఖ్యంగా ఏజెన్సీ ప్రాంతాల్లో సాధారణం కంటే 2 నుంచి 3 డిగ్రీలు తక్కువగా ఉష్ణోగ్రతలు రికార్డవుతున్నాయి. చలి తీవ్రత మరింత పెరగనుంది.

గత వారం రోజుల వరకు కురిసిన వర్షాలు ఇప్పుడు పూర్తిగా తగ్గుముఖం పట్టాయి. ఈశాన్య దిశ నుంచి వీస్తున్న పొడిగాలుల వల్ల రాష్ట్రంలో ఎక్కడా వర్ష సూచన లేదని, రాబోయే రోజుల్లో వాతావరణం పొడిగా ఉంటుందని వాతావరణ శాఖ వెల్లడించింది. వర్షాలు తగ్గినప్పటికీ, చలి ప్రభావం పెరగడంతో ఇన్ఫెక్షన్లు వ్యాపించే అవకాశం ఉంది. ఇదే సమయంలో ఈ నెల 13న అల్పపీడనం ఏర్పడే అవకాశముందని వాతావరణ శాఖ అంచనా వేసింది. దీంతో వర్షాలు పడే అవకాశాలు కూడా ఉన్నాయి.

మారిన వాతావరణంలో చిన్నపిల్లలు, వృద్ధులు, శ్వాసకోశ సమస్యలు ఉన్నవారు జాగ్రత్తలు తీసుకోకపోతే అనారోగ్యానికి గురయ్యే ప్రమాదం ఉంది. వైద్య నిపుణులు పలు సూచనలు చేశారు. ఆ వివరాలు ఇలా ఉన్నాయి..

వెచ్చని వస్త్రాలు: తెల్లవారుజామున, రాత్రి వేళల్లో బయటకు వెళ్లేటప్పుడు స్వెట్టర్లు, మఫ్లర్లు, క్యాప్‌లు తప్పనిసరిగా వాడాలి.

గోరువెచ్చని నీరు: శీతాకాలంలో దాహం తక్కువగా వేసినప్పటికీ, శరీరం డీహైడ్రేట్ కాకుండా ఉండటానికి తగినంత గోరువెచ్చని నీటిని తాగాలి.

ఇమ్యూనిటీ ఫుడ్: విటమిన్-సి ఎక్కువగా ఉండే నిమ్మకాయ, ఉసిరి, తాజా పండ్లు తినడం ద్వారా రోగనిరోధక శక్తి పెరుగుతుంది.

చర్మ సంరక్షణ: చలిగాలులకు చర్మం పొడిబారకుండా ఉండటానికి మయిశ్చరైజర్లు లేదా కొబ్బరినూనె రాయాలి.

మాస్క్ వాడకం: పొగమంచు ఉన్న వేళల్లో ఉదయాన్నే వాకింగ్ చేసేవారు మాస్క్ ధరించడం ద్వారా డస్ట్ అలర్జీలు, శ్వాసకోశ ఇబ్బందుల నుంచి ఉపశమనం పొందవచ్చు.

ఏపీలో మరో అల్పపీడనం..తెలంగాణలో వణికిస్తున్న చలి | Asianet News Telugu

Galam Venkata Rao — Wed, 11 Nov 2026 15:18:15 +0530

Telangana: పేదలకు తెలంగాణ ప్ర‌భుత్వం దీపావళి కానుక.. కొత్త పింఛ‌న్లు

Narender Vaitla — Sun, 08 Nov 2026 21:11:28 +0530

Telangana: తెలంగాణలో సామాజిక భద్రతా పింఛన్ల కోసం ఎదురుచూస్తున్న నిరుపేదలకు రాష్ట్ర ప్రభుత్వం శుభవార్త అందించింది. ముఖ్యమంత్రి రేవంత్ రెడ్డి నేతృత్వంలోని ప్రభుత్వం 'చేయూత' పథకం ద్వారా కొత్తగా 4.50 లక్షల మందికి పింఛన్లు మంజూరు చేసింది.

రాష్ట్రంలో అర్హులైన పేదలకు సామాజిక భద్రత కల్పించాలనే ఉద్దేశంతో ప్రభుత్వం కొత్త పింఛన్ల మంజూరుకు చర్యలు చేపట్టింది. ఇందులో భాగంగా గతంలో అర్హుల నుంచి దరఖాస్తులు స్వీకరించింది. ఈ ప్రక్రియలో రాష్ట్రవ్యాప్తంగా సుమారు 5.50 లక్షల మంది పింఛన్ల కోసం దరఖాస్తు చేసుకున్నారు. వాటిని పరిశీలించిన ప్రభుత్వం చివరకు 4.50 లక్షల మందిని అర్హులుగా గుర్తించింది. వీరందరికీ ఈ నెల నుంచే పింఛన్ నగదు అందించేందుకు ఏర్పాట్లు చేసింది.

పింఛన్ల కోసం వచ్చిన దరఖాస్తులను గ్రామీణ పేదరిక నిర్మూలన సంస్థ ఆధ్వర్యంలో అధికారులు పరిశీలించారు. కేవలం దరఖాస్తుల ఆధారంగా కాకుండా క్షేత్రస్థాయిలో వివరాలను ధ్రువీకరించి అర్హులను ఎంపిక చేశారు. ప్రభుత్వ నిబంధనలు, నిర్దేశించిన ప్రమాణాలకు అనుగుణంగా ఉన్నవారికి మాత్రమే పింఛన్లు మంజూరు చేశారు. మొత్తం 5.50 లక్షల దరఖాస్తుల్లో 4.50 లక్షల మందికి అర్హత లభించింది. ఈ ఎంపిక ప్రక్రియతో చాలాకాలంగా పింఛన్ కోసం ఎదురుచూస్తున్న కుటుంబాలకు ఊరట కలగనుంది.

కొత్తగా మంజూరైన పింఛన్లలో మహిళలకు పెద్దపీట వేశారు. ఎంపిక చేసిన 4.50 లక్షల మందిలో సుమారు 3 లక్షల మంది వితంతువులు, ఒంటరి మహిళలు ఉన్నారు. వీరితో పాటు దాదాపు లక్ష మంది దివ్యాంగులకు పింఛన్లు మంజూరయ్యాయి. మరో 50 వేల మంది చేనేత, గీత కార్మికులకు కూడా ఈ పథకం ద్వారా ప్రయోజనం కలగనుంది. వివిధ కారణాలతో కుటుంబ ఆదాయానికి దూరమైనవారికి, శారీరక వైకల్యంతో ఉపాధి పొందలేని వారికి ఈ ఆర్థిక సహాయం ఉపయోగపడనుంది.

కొత్త పింఛన్ల పంపిణీకి ముఖ్యమంత్రి రేవంత్ రెడ్డి తన నియోజకవర్గమైన కొడంగల్‌ను ఎంచుకున్నారు. ఆదివారం అక్కడ నిర్వహించిన‌ కార్యక్రమంలో లబ్ధిదారులకు పింఛన్ మంజూరు పత్రాలను అందజేసి ఈ కార్యక్రమాన్ని అధికారికంగా ప్రారంభించారు. అనంతరం రాష్ట్రవ్యాప్తంగా అన్ని జిల్లాల్లోనూ పంపిణీ ప్రక్రియ కొనసాగనుంది. మంత్రులు, స్థానిక ప్రజాప్రతినిధులు, సంబంధిత అధికారులు లబ్ధిదారులకు మంజూరు పత్రాలు అందించనున్నారు. ఇందుకోసం జిల్లా యంత్రాంగాలు అవసరమైన ఏర్పాట్లు పూర్తి చేశాయి.

కొత్త పింఛన్ల మంజూరుతో ఆర్థిక ఇబ్బందులు ఎదుర్కొంటున్న బలహీన వర్గాలకు ప్రతి నెలా కొంత మేరకు ఆదాయ భద్రత లభించనుంది. వృద్ధులు, వితంతువులు, ఒంటరి మహిళలు, దివ్యాంగులతో పాటు చేనేత, గీత కార్మికుల జీవనానికి ఈ సాయం తోడ్పడనుంది. నిత్యావసర ఖర్చులు, మందులు, ఇతర వ్యక్తిగత అవసరాల కోసం ఇతరులపై ఆధారపడాల్సిన పరిస్థితి కొంత తగ్గనుంది. సామాజిక భద్రతను మరింత విస్తరించడంలో భాగంగా ప్రభుత్వం తీసుకున్న ఈ నిర్ణయం ద్వారా కొత్తగా 4.50 లక్షల కుటుంబాలకు ప్రయోజనం చేకూరనుంది. దీపావళి సమయంలో పింఛన్లు మంజూరు కావడంతో అర్హులైన లబ్ధిదారుల ఇళ్లలో సంతోషం నెలకొంది.