Asianet News Telugu

రాబోయేది క‌ష్ట‌కాలం, జాగ్ర‌త్త‌గా ఉండాల్సిందే.. ప్ర‌జ‌ల‌కు సీఎం రేవంత్ రెడ్డి కీలక సూచన

Narender Vaitla — Thu, 15 Oct 2026 22:03:59 +0530

ఎల్‌నినో ప్రభావంపై సీఎం ఆందోళన

వాతావరణంలో చోటుచేసుకుంటున్న మార్పులు ప్రపంచవ్యాప్తంగా ఆందోళన కలిగిస్తున్నాయని సీఎం రేవంత్ రెడ్డి తెలిపారు. ఎల్‌నినో ప్రభావం ఈసారి మరింత తీవ్రంగా ఉండే అవకాశం ఉందని శాస్త్రవేత్తలు, వాతావరణ నిపుణులు హెచ్చరిస్తున్న నేపథ్యంలో ముందస్తు జాగ్రత్తలు తీసుకోవాల్సిన అవసరం ఉందని చెప్పారు. గతంలో కరోనా మహమ్మారి సమయంలో ఎదురైన పరిస్థితుల మాదిరిగానే, ఈసారి కూడా సంక్షోభాన్ని ఎదుర్కొనేందుకు ప్రభుత్వ యంత్రాంగం సిద్ధంగా ఉండాలని సూచించారు. వాతావరణ మార్పులు మనుషులతో పాటు పశువులు, ఇతర జీవరాశులపైనా ప్రభావం చూపే అవకాశం ఉందన్నారు. ఈ పరిస్థితుల్లో ప్రజల అవసరాలను కాపాడటంతో పాటు వ్యవసాయ రంగానికి ఎదురయ్యే ఇబ్బందులను తగ్గించడంపై ప్రభుత్వం దృష్టి సారించిందని వివరించారు. రైతులు ప్రస్తుత పరిస్థితులను అర్థం చేసుకుని సాగు ప్రణాళికల్లో మార్పులు చేసుకోవాలని, ముఖ్యంగా నీటి వినియోగం విషయంలో అప్రమత్తంగా ఉండాలని కోరారు.

అక్టోబర్‌లోనే 38 డిగ్రీల ఉష్ణోగ్రతలు

సాధారణంగా వేసవిలో నమోదయ్యే అధిక ఉష్ణోగ్రతలు అక్టోబర్‌లోనే కనిపించడం ఆందోళనకరం అని ముఖ్యమంత్రి పేర్కొన్నారు. రాష్ట్రంలోని పలు గ్రామీణ, పట్టణ ప్రాంతాల్లో ఉష్ణోగ్రతలు 38 డిగ్రీల సెల్సియస్‌కు పైగా నమోదవుతున్నాయని తెలిపారు. ఈ పరిస్థితులు వ్యవసాయ రంగంపై ఒత్తిడిని పెంచుతున్నాయని చెప్పారు. ముఖ్యంగా వరి వంటి అధిక నీటి అవసరం ఉండే పంటలకు సాగునీరు అందించడం సవాలుగా మారే అవకాశం ఉందన్నారు.

రాష్ట్రంలో వర్షపాతం సాధారణం కంటే 23 శాతం తక్కువగా నమోదవడంతో నీటి లభ్యతపై ప్రభావం పడిందని సీఎం వివరించారు. కృష్ణా బేసిన్‌లోని రిజర్వాయర్లలో నీటి నిల్వలు సుమారు 70 శాతం తక్కువగా ఉన్నాయని వెల్లడించారు. యాసంగి పంటల సాగు సమయంలోనే నీటి కొరతపై ఆందోళనలు వ్యక్తమవుతున్నాయని చెప్పారు. ప్రాజెక్టుల్లో అందుబాటులో ఉన్న నీటిని వ్యవసాయానికి మాత్రమే కాకుండా, గ్రామాలు, పట్టణాల తాగునీటి అవసరాలకు కూడా కేటాయించాల్సి ఉంటుందని స్పష్టం చేశారు.

పెరిగిన విద్యుత్ డిమాండ్.. రిజర్వాయర్ల నీటిపై ఒత్తిడి

రాష్ట్రంలో వ్యవసాయ పంపుసెట్లకు విద్యుత్ అవసరాలు పెరగడంతో కరెంట్ వినియోగం గణనీయంగా పెరిగిందని రేవంత్ రెడ్డి తెలిపారు. తెలంగాణలో సుమారు 30 లక్షల పంపుసెట్లకు విద్యుత్ సరఫరా చేయాల్సి వస్తోందని చెప్పారు. సాధారణంగా అంచనా వేసిన అవసరాలకు అదనంగా మరో 5 వేల మెగావాట్ల డిమాండ్ పెరిగిందని, మొత్తం విద్యుత్ అవసరం 20 వేల మెగావాట్లకు పైగా చేరిందని వివరించారు. రాష్ట్ర చరిత్రలోనే అత్యధిక స్థాయిలో విద్యుత్ వినియోగం నమోదైనట్లు పేర్కొన్నారు.

గత దశాబ్ద కాలంలో విద్యుత్ డిమాండ్ సుమారు 14 వేల మెగావాట్ల మేర పెరిగిందని సీఎం గుర్తుచేశారు. ఉత్పత్తి, సరఫరాపై ఒత్తిడి పెరిగినప్పటికీ రైతులకు నిరంతర విద్యుత్ అందించేందుకు కృషి చేస్తున్న ఉప ముఖ్యమంత్రి, విద్యుత్ శాఖ మంత్రి భట్టి విక్రమార్కతో పాటు శాఖ అధికారులు, సిబ్బందిని అభినందించారు. అదే సమయంలో అందుబాటులో ఉన్న విద్యుత్‌ను అవసరానికి తగినట్లుగా వినియోగించుకోవాలని రైతులకు సూచించారు. నీరు, కరెంట్‌ను వృథా చేయకుండా పొదుపుగా ఉపయోగించుకోవడం ద్వారా సంక్షోభ తీవ్రతను తగ్గించవచ్చని తెలిపారు.

రాబోయే ఎనిమిది నెలలు కీలకం.. రైతులకు భరోసా

రాబోయే ఎనిమిది నెలలు, ముఖ్యంగా జూలై వరకు ఉన్న కాలం రాష్ట్రానికి అత్యంత కీలకమని సీఎం రేవంత్ రెడ్డి పేర్కొన్నారు. రిజర్వాయర్లలో నిల్వ ఉన్న నీటిని జాగ్రత్తగా వినియోగించుకోవాలని, ప్రతి చుక్క నీటిని సద్వినియోగం చేసుకునేలా ప్రణాళికలు రూపొందించాలని అధికారులను ఆదేశించారు. సాగునీరు, తాగునీరు, విద్యుత్ అవసరాల మధ్య సమతుల్యత పాటిస్తూ ముందుకు సాగాల్సిన అవసరం ఉందన్నారు.

రైతులు ఇప్పటికే సాగు చేసిన పంటలు నష్టపోకుండా ప్రభుత్వం అవసరమైన చర్యలు తీసుకుంటుందని హామీ ఇచ్చారు. నీటి కొరతపై ఆందోళన చెందుతున్న రైతులు ధైర్యంగా ఉండాలని, కష్టకాలంలో వ్యవసాయ రంగానికి అండగా నిలిచేందుకు ప్రభుత్వం కట్టుబడి ఉందని తెలిపారు. పంటలు చేతికొచ్చే వరకు విద్యుత్ సరఫరాలో నిర్లక్ష్యం ఉండకూడదని స్పష్టం చేశారు. విద్యుత్ కొరత ఉన్నప్పటికీ రైతులకు అవసరమైన సరఫరా అందించేందుకు ఎంత ఖర్చు చేసేందుకైనా ప్రభుత్వం సిద్ధంగా ఉందని పేర్కొన్నారు. గ్రామస్థాయి నుంచి రాష్ట్రస్థాయి వరకు నీరు, విద్యుత్ పొదుపుపై ప్రజల్లో అవగాహన పెంచాలని, సంబంధిత శాఖలు సమన్వయంతో పనిచేయాలని అధికారులకు సూచించారు. అయితే, ఈసారి ఎండాకాలం పంటల సాగును వాయిదా వేసుకోవాలన్న ప్రభుత్వ విజ్ఞప్తిని రైతులు పరిగణనలోకి తీసుకోవాలని మరోసారి కోరారు.

తెలంగాణకు రూ.20 వేల కోట్ల ప్రత్యేక ప్యాకేజీ కోరిన సీఎం

రాష్ట్రంలో నెలకొన్న కరవు పరిస్థితులను ఎదుర్కొనేందుకు కేంద్ర ప్రభుత్వం నుంచి ఆర్థిక సహాయం కోరినట్లు సీఎం రేవంత్ రెడ్డి తెలిపారు. కరవు ప్రభావిత ప్రాంతాల్లో ప్రజలు, రైతులకు ఉపశమనం కల్పించేందుకు తెలంగాణకు తక్షణమే రూ.20 వేల కోట్ల ప్రత్యేక ప్యాకేజీ ప్రకటించాలని కేంద్రాన్ని డిమాండ్ చేశారు. గ్రామీణ ప్రాంతాల్లో ఉపాధి అవకాశాలు తగ్గకుండా అదనపు ఉపాధి హామీ పనులు కల్పించాలని కూడా కోరారు.

వ్యవసాయ రంగంపై ప్రభావం పడకుండా, ప్రజలకు తాగునీటి ఇబ్బందులు తలెత్తకుండా, పశుసంపదను కాపాడేలా ప్రభుత్వం ముందస్తు చర్యలు చేపడుతుందని సీఎం స్పష్టం చేశారు. ఎల్‌నినో ప్రభావంతో పరిస్థితులు సవాలుగా మారే అవకాశం ఉన్నందున రైతులు ఒక సీజన్‌ సాగును వాయిదా వేసుకోవాలన్న సూచనను ఆలోచించాలని కోరారు. ప్రభుత్వానికి సహకరిస్తూ నీరు, విద్యుత్‌ను పొదుపుగా వినియోగించుకోవాలని విజ్ఞప్తి చేశారు. ఎన్ని ఇబ్బందులు ఎదురైనా రాష్ట్రం ఈ పరిస్థితులను అధిగమించేలా అవసరమైన చర్యలు తీసుకుంటామని భరోసా ఇచ్చారు.

Weather Update : బంగాళాఖాతంలో బలపడిన ద్రోణి.. దసరా పండగపూట ఈ జిల్లాల్లో వర్షాలు

Arun Kumar P — Tue, 20 Oct 2026 08:04:54 +0530

తెలుగు రాష్ట్రాల్లో దసరా పండగపూట కూడా వర్షాలు కొనసాగే అవకాశాలున్నాయని వాతావరణ శాఖలు ప్రకటించాయి.. నేడు ఏఏ జిల్లాల్లో వర్షాలు కురిసే అవకాశాలు ఉన్నాయట తెెలుసా?

Rain Alert : బంగాళాఖాతంలో ఏర్పడిన వాతావరణ పరిస్థితుల ప్రభావంతో తెలుగు రాష్ట్రాల్లో అక్కడక్కడ వర్షాలు కురిసే అవకాశం ఉందంటోంది వాతావరణ శాఖ (IMD). ఆంధ్రప్రదేశ్‌లో పలు జిల్లాల్లో పిడుగులతో కూడిన వర్షాలు కురిసే సూచనలు ఉండగా, తెలంగాణలోనూ కొన్ని ప్రాంతాల్లో ఉరుములు, మెరుపులతో కూడిన జల్లులు పడే అవకాశం ఉందట. ఈ నెల (అక్టోబర్ 22) వరకు తెలుగు రాష్ట్రాల్లో వర్షాలు కురుస్తాయని వాతావరణ శాఖలు హెచ్చరిస్తున్నాయి.

ద్రోణి ప్రభావంతో నేడు విజయదశమి (మంగళవారం, అక్టోబర్ 20) పండగపూట కూడా ఆంధ్ర ప్రదేశ్ వర్షాలు కురిసే అవకాశాలున్నాయని రాష్ట్ర రాష్ట్ర విపత్తుల నిర్వహణ సంస్థ (APSDMA) తెలిపింది. అల్లూరి సీతారామరాజు, పశ్చిమ గోదావరి, ఏలూరు, కృష్ణా, గుంటూరు, బాపట్ల, నెల్లూరు జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందట.

రాష్ట్రంలోని మిగతా జిల్లాల్లోనూ అక్కడక్కడ తేలికపాటి నుంచి మోస్తరు వర్షాలు పడవచ్చని అంచనా వేస్తోంది. ఇలా కొన్ని చోట్ల వర్షాలు పడుతుండగా, మరికొన్ని ప్రాంతాల్లో పొడి వాతావరణం కొనసాగవచ్చని తెలిపింది..

పిడుగులు పడే అవకాశం ఉన్నందున రైతులు, వ్యవసాయ కూలీలు, పశువుల కాపరులు జాగ్రత్తగా ఉండాలని APSDMA హెచ్చరిస్తోంది. ఉరుములు ప్రారంభమైనప్పుడు బహిరంగ ప్రదేశాల్లో ఉండకూడదు... చెట్ల కింద, విద్యుత్ స్తంభాల సమీపంలో ఆశ్రయం పొందడం ప్రమాదకరం… జాగ్రత్తగా ఉండాలని ప్రజలను సూచిస్తోంది.

తెలంగాణలోనూ ఇవాళ (మంగళవారం) కొన్ని జిల్లాల్లో వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. నాగర్‌కర్నూల్, నల్గొండ, సూర్యాపేట, ఖమ్మం, భద్రాద్రి కొత్తగూడెం, మహబూబాబాద్, యాదాద్రి భువనగిరి జిల్లాల్లో మధ్యాహ్నం నుంచి రాత్రి వరకు అక్కడక్కడ వర్షాలు పడవచ్చని అంచనా.

ఈ ప్రాంతాల్లోని అన్ని చోట్ల వర్షాలు కురవకపోవచ్చు. ఒకటి రెండు ప్రాంతాల్లో మాత్రమే వర్షాలు పడే అవకాశం ఉండగా, మిగతా చోట్ల పొడి వాతావరణం కొనసాగవచ్చట. హైదరాబాద్ నగరంతో పాటు రాష్ట్రంలోని ఇతర ప్రాంతాల్లోనూ ప్రధానంగా పొడి వాతావరణం ఉండే సూచనలు ఉన్నాయంటోంది.

కొన్ని ప్రాంతాల్లో ఉరుములు, మెరుపులతో కూడిన వర్షాలు, గంటకు 30–40 కిలోమీటర్ల వేగంతో ఈదురుగాలులు వీచే అవకాశం ఉందని వాతావరణ హెచ్చరికలు సూచిస్తున్నాయి. సంబంధిత ప్రాంతాల్లో పరిస్థితులకు అనుగుణంగా అప్రమత్తంగా ఉండాలి.

పగటిపూట వేడి.. రాత్రి ఉష్ణోగ్రతల్లో మార్పులు

తెలంగాణలో వర్ష సూచనలు ఉన్నప్పటికీ పగటిపూట ఎండ, వేడి సాధారణంగానే కొనసాగవచ్చని అంచనా. అయితే మంగళవారం నుంచి రాత్రి, తెల్లవారుజామున ఉష్ణోగ్రతలు కొంత తగ్గే అవకాశం ఉంది. దీంతో ఉదయం, రాత్రి వేళల్లో స్వల్పంగా చల్లదనం పెరగవచ్చు. వర్షాలు కురిసే ప్రాంతాల్లో మేఘావృత వాతావరణం, ఈదురుగాలుల కారణంగా స్థానికంగా ఉష్ణోగ్రతల్లో మార్పులు కనిపించవచ్చు. అయితే రాష్ట్రవ్యాప్తంగా ఒకే రకమైన వాతావరణం ఉండకపోవచ్చని గుర్తించాలి.

మరోవైపు తమిళనాడు రాజధాని చెన్నైలో భారీ వర్షాలు తీవ్ర ప్రభావం చూపుతున్నాయి. ముఖ్యంగా ఉత్తర చెన్నైలోని పలు ప్రాంతాలు నీటమునిగాయి. రోడ్లపైకి వర్షపు నీరు చేరడంతో వాహనాల రాకపోకలకు అంతరాయం ఏర్పడింది. కొన్ని ప్రాంతాల్లో నివాస ప్రాంతాలు కూడా జలమయమయ్యాయి.నగరంలోని పారీస్ ప్రాంతంలో 24 గంటల్లో సుమారు 36.3 సెంటీమీటర్ల వర్షపాతం నమోదైంది. కాతివాక్కం ప్రాంతంలోనూ అత్యంత భారీ వర్షం కురిసింది.

తమిళనాడులో ఈశాన్య రుతుపవనాలు చురుగ్గా మారడంతో చెన్నైతో పాటు రాష్ట్రంలోని పలు జిల్లాల్లో భారీ వర్షాలు కురిసే అవకాశం ఉందని భారత వాతావరణ శాఖ హెచ్చరించింది. అక్టోబర్ 21 వరకు కొన్ని ప్రాంతాల్లో భారీ నుంచి అతి భారీ వర్షాలు కురిసే సూచనలు ఉండగా, ఆ తర్వాత కూడా కొన్ని చోట్ల వర్షాలు కొనసాగవచ్చు. అక్టోబర్ 22 వరకు చెన్నై పరిసర ప్రాంతాల్లో వర్షాల ప్రభావం ఉండే అవకాశం ఉందని వాతావరణ అంచనాలు సూచిస్తున్నాయి.

తెలుగు రాష్ట్రాల్లోనూ, తమిళనాడులోనూ వర్ష సూచనలు ఉన్న నేపథ్యంలో ప్రజలు కొన్ని జాగ్రత్తలు పాటించాలి.

- పిడుగులు పడే సమయంలో చెట్ల కింద, విద్యుత్ స్తంభాల దగ్గర నిలబడకూడదు.

- ఉరుములు, మెరుపులు వస్తున్నప్పుడు బహిరంగ ప్రదేశాల్లో ఉండకుండా సురక్షితమైన భవనంలోకి వెళ్లాలి.

- భారీ వర్షాలు కురిసే ప్రాంతాల్లో నీరు నిలిచిన రోడ్లపై ప్రయాణించేటప్పుడు అప్రమత్తంగా ఉండాలి.

- రైతులు, వ్యవసాయ కూలీలు వాతావరణ పరిస్థితులను గమనిస్తూ వ్యవసాయ పనులు చేపట్టాలి.

మొత్తంగా చూస్తే.. మంగళవారం ఏపీలో పలు జిల్లాలకు వర్ష సూచనలు ఉండగా, తెలంగాణలో కొన్ని జిల్లాల్లో మాత్రమే అక్కడక్కడ వర్షాలు కురిసే అవకాశం ఉంది. చెన్నైలో మాత్రం భారీ వర్షాలు ఇప్పటికే తీవ్ర ప్రభావం చూపుతున్నాయి. వాతావరణ పరిస్థితులు వేగంగా మారే అవకాశం ఉన్నందున APSDMA, IMD జారీ చేసే తాజా హెచ్చరికలను గమనించడం మంచిది.

AP Telangana Weather:బంగాళాఖాతంలో కొత్త అల్పపీడనం ఏపీ, తెలంగాణకు భారీ వర్షాల అలర్ట్ | Asianet Telugu

Galam Venkata Rao — Thu, 22 Oct 2026 14:21:24 +0530

Dasara Holidays 2026 : దసరా హాలిడేస్ అక్టోబర్ 25 వరకు పొడిగిస్తారా? 13 కాదు 16 రోజులు సెలవులేనా?

Arun Kumar P — Thu, 15 Oct 2026 16:23:40 +0530

తెలంగాణలో అక్టోబర్ 22 వరకు దసరా సెలవులున్నాయి… ఈ హాలిడేస్ ను అక్టోబర్ 25 వరకు పొడిగిస్తారనే ప్రచారం సాగుతోంది. నిజంగానే సెలవులు పొడిగించే అవకాశాలున్నాయా?

ప్రస్తుతం తెలుగు రాష్ట్రాల్లో దసరా సెలవులు కొనసాగుతున్నాయి. ఇరు తెలుగు రాష్ట్రాల్లోని విద్యాసంస్థలకు అక్టోబర్ 10 నుండి హాలిడేస్ ప్రారంభమయ్యాయి. అయితే ఆంధ్ర ప్రదేశ్ లో అక్టోబర్ 21 (వచ్చే బుధవారం) వరకు ఈ సెలవులు కొనసాగనున్నాయి... అక్టోబర్ 22 (గురువారం) స్కూళ్లు పున:ప్రారంభం కానున్నాయి. ఇక తెలంగాణలో అక్టోబర్ 22 వరకు సెలవులు కొనసాగున్నాయి... అక్టోబర్ 23న (శుక్రవారం) బడులు తిరిగి తెరుచుకుంటాయి. అయితే విద్యాసంస్థలకు దసరా సెలవులు పొడిగించే అవకాశాలున్నాయనే ప్రచారం జోరుగా సాగుతోంది. ఇప్పటికయితే ఇరు రాష్ట్రాల ప్రభుత్వాలు సెలవుల పొడిగింపుపై ఎలాంటి ప్రకటన చేయలేదు... కానీ విద్యార్థులు, వారి పేరెంట్స్ లో సెలవులపై ఆశలు సజీవంగానే ఉన్నాయి.

తెలంగాణలో దసరా సెలవుల పొడిగింపుకు అవకాశాలు ఎక్కువగా ఉన్నాయి. ఎందుకంటే సరిగ్గా వీకెండ్ సమయంలో ఇప్పుడిచ్చిన సెలవులు ముగుస్తాయి... కాబట్టి ఒకటి రెండ్రోజులు పొడిగిస్తే ఆదివారం కూడా కలిసివస్తుంది. ఇలా మరో మూడ్రోజులు సెలవులు వస్తాయి... సోమవారం నుండి ప్రెష్ గా స్కూళ్లు తెరవాలని పేరెంట్స్ డిమాండ్ చేసే అవకాశాలున్నాయి.

తెలంగాణలో దసరా సెలవులు అక్టోబర్ 22న (గురువారం) ముగుస్తాయి... అక్టోబర్ 23న అంటే శుక్రవారం స్కూళ్లు తెరుచుకోవాలి. అయితే హైదరాబాద్ లో ఐటీ, కార్పోరేట్ ఉద్యోగుల పిల్లలు ఎక్కువగా చదివే స్కూల్స్ కి ప్రతి శని, ఆదివారం సెలవు ఉంటుంది. అంటే ఇలాంటి స్కూల్స్ దసరా సెలవులు ముగిశాక ఒక్కరోజే నడుస్తాయి... తిరిగి అక్టోబర్ 24, 25 (శని, ఆదివారం) మళ్లీ సెలవులే.

ఇక ఇతర స్కూల్స్ కి కూడా దసరా సెలవులు ముగిశాక రెండ్రోజులు స్కూళ్లు నడుస్తాయో లేదో ఆదివారం సెలవు వస్తుంది. కాబట్టి దసరా సెలవులు రెండ్రోజులు పొడిగిస్తే సండే కలిసివస్తుంది... మొత్తంగా మరో మూడ్రోజులు సెలవులు వస్తాయని విద్యార్థులు, వారి తల్లిదండ్రులు భావిస్తున్నారు. అందుకే అక్టోబర్ 22 వరకు ఇచ్చిన దసరా సెలవులను అక్టోబర్ 25 వరకు పొడిగించాలనే డిమాండ్ చేయవచ్చు. ప్రభుత్వం ఒప్పుకుంటే మాత్రం 13 రోజుల దసరా సెలవులు కాస్త 16 రోజులు కానున్నాయి.

ఆంధ్ర ప్రదేశ్ లో దసరా సెలవుల పొడిగింపు ఉండకపోవచ్చు. తెలంగాణలో బతుకమ్మ, దసరా పండగలను ఘనంగా జరుపుకుంటారు... ఏపీలో దసరాను సాధారణ పండగలాగే చేసుకుంటారు... వీరికి సంక్రాంతి పెద్దపండగ. అందుకే ముందుగానే తెలంగాణ కంటే ఓరోజు తక్కువగానే ఏపీలో దసరా సెలవులు ఇచ్చారు. దీన్నిబట్టి సెలవులను పొడిగించే అవకాశాలు లేవని అర్థమవుతుంది... విద్యార్థులు, పేరెంట్స్ నుండి కూడా ఈ డిమాండ్ రాకపోవచ్చు.

అయితే పండగ సెలవుల్లో హైదరాబాద్ నుండి తమ స్వస్థలాలకు వెళ్లిన ఆంధ్ర విద్యార్థులు, తల్లిదండ్రులు మాత్రం అక్టోబర్ 25 వరకు అక్కడే ఉండనున్నారు. అక్టోబర్ 26 వరకు హైదరాబాద్ కు చేరుకుని పిల్లలను స్కూళ్లకు పంపిస్తారు. ఒకవేళ తెలంగాణ ప్రభుత్వం సెలవులు పొడిగిస్తే ఇలాంటివారికి ఊరట లభించనుంది.

తెలంగాణలో కేవలం ప్రభుత్వ, ప్రైవేట్ స్కూల్స్ కి మాత్రమే దసరా సెలవులు అక్టోబర్ 10 నుండి 22 వరకు ఇచ్చారు. అదే యువతకు అంటే ఇంటర్మీడియట్ విద్యార్థులకు అక్టోబర్ 21 వరకు మాత్రమే సెలవులున్నాయి. అంటే ఇంటర్ విద్యార్థులకు స్కూల్ స్టూడెంట్స్ కంటే ఓరోజు ముందుగానే సెలవులు ముగుస్తాయి... వీరికి హాలిడేస్ పొడిగించే అవకాశాలు లేవు. కాలేజీ విద్యార్ధులు 12 రోజుల సెలవులతోనే సరిపెట్టుకోవాల్సి ఉంటుంది.

ఆంధ్ర ప్రదేశ్ లో స్కూళ్లతో పాటు ఇంటర్ కాలేజీలకు కూడా అక్టోబర్ 21 వరకే దసరా సెలవులు ఇచ్చారు. కాబట్టి అన్ని విద్యాసంస్థలకు అక్టోబర్ 22న తెరుచుకుంటాయి.. ఇక్కడ సెలవుల పొడిగింపు అనే అంశమే ఉండకపోవచ్చు. మొత్తంగా చూసుకుంటే తెలంగాణలో స్కూళ్లకి దసరా సెలవులు పొడిగించే అవకాశాలున్నాయి… ఏపీలో మాత్రం అస్సలు అవకాశం లేదు.

తెలంగాణ ఇంటర్ పరీక్షల ఫీజు షెడ్యూల్ విడుదల.. తేదీలు, రుసుముల పూర్తి వివరాలు

Narender Vaitla — Thu, 15 Oct 2026 21:20:32 +0530

TG Inter Exams 2027: తెలంగాణలో ఇంటర్మీడియట్ చదువుతున్న విద్యార్థులకు కీలక సమాచారం. మార్చి 2027లో నిర్వహించనున్న ఇంటర్మీడియట్ పబ్లిక్ పరీక్షలకు సంబంధించి పరీక్ష ఫీజు చెల్లింపు గడువులను తెలంగాణ ఇంటర్మీడియట్ విద్యా మండలి (TGBIE) ప్రకటించింది.

తెలంగాణ ఇంటర్మీడియట్ విద్యా మండలి విడుదల చేసిన ప్రకటన ప్రకారం, మార్చి 2027లో జరగనున్న ఇంటర్ పబ్లిక్ పరీక్షలకు సంబంధించిన ఫీజు వసూళ్ల ప్రక్రియ అక్టోబర్ 26, 2026 నుంచి ప్రారంభం కానుంది. ఫ‌స్ట్ ఇయ‌ర్‌, సెకండ్ ఇయ‌ర్ విద్యార్థులు తమ కళాశాలల ద్వారా ఈ ప్రక్రియను పూర్తి చేయాలి. రెగ్యులర్ విద్యార్థులతో పాటు గతంలో పరీక్షల్లో ఉత్తీర్ణత సాధించని అభ్యర్థులు కూడా ఈ షెడ్యూల్ పరిధిలోకి వస్తారు. జనరల్, ఒకేషనల్ కోర్సులకు చెందిన విద్యార్థులు తమకు వర్తించే పరీక్ష ఫీజును చెల్లించాల్సి ఉంటుంది. నిబంధనల ప్రకారం హాజరు నుంచి మినహాయింపు పొందిన ప్రైవేట్ అభ్యర్థులకు కూడా ఈ షెడ్యూల్ వర్తిస్తుంది.

విద్యార్థులు అదనపు భారం లేకుండా పరీక్ష ఫీజు చెల్లించేందుకు ఇంటర్ బోర్డు నిర్దిష్ట గడువును కేటాయించింది. అక్టోబర్ 26 నుంచి నవంబర్ 9, 2026 వరకు ఎలాంటి ఆలస్య రుసుము లేకుండా ఫీజు చెల్లించవచ్చు. ఈ అవకాశాన్ని వినియోగించుకోవడం ద్వారా విద్యార్థులు అదనపు ఖర్చును నివారించవచ్చు. సాధారణ గడువులోగా ఫీజు చెల్లించలేని వారి కోసం దశలవారీగా ఆలస్య రుసుములతో కూడిన తేదీలను ప్రకటించారు. ఆలస్య రుసుము పెరిగే కొద్దీ విద్యార్థులు చెల్లించాల్సిన మొత్తం కూడా పెరుగుతుంది. అందువల్ల చివరి తేదీ వరకు వేచి చూడకుండా ముందుగానే ఫీజు చెల్లించడం ఉత్తమం.

సాధారణ గడువు దాటిన విద్యార్థులు కింది తేదీల్లో నిర్ణీత ఆలస్య రుసుముతో పరీక్ష ఫీజు చెల్లించవచ్చు.

* నవంబర్ 11 నుంచి నవంబర్ 20, 2026 వరకు తెలంగాణ ఇంటర్ పరీక్షల ఫీజు షెడ్యూల్ విడుదల

* నవంబర్ 22 నుంచి నవంబర్ 29, 2026 వరకు రూ.500 ఆలస్య రుసుము.

* డిసెంబర్ 1 నుంచి డిసెంబర్ 7, 2026 వరకు రూ.1,000 ఆలస్య రుసుము.

* డిసెంబర్ 9 నుంచి డిసెంబర్ 14, 2026 వరకు రూ.2,000 ఆలస్య రుసుము.

ఈ గడువులను దృష్టిలో ఉంచుకుని విద్యార్థులు తమ పరీక్ష ఫీజును సకాలంలో చెల్లించాలి. ఆలస్య రుసుముతో చెల్లించే అవకాశం ఉన్నప్పటికీ, అదనపు మొత్తాన్ని భరించాల్సి వస్తుంది. కాబట్టి నవంబర్ 9లోపే ఫీజు చెల్లించేలా ప్రణాళిక చేసుకోవడం ప్రయోజనకరం.

ప్రథమ, ద్వితీయ సంవత్సరాల విద్యార్థులకు కోర్సు, ప్రాక్టికల్స్ ఆధారంగా పరీక్ష ఫీజులో తేడా ఉంటుంది. బోర్డు ప్రకటించిన వివరాల ప్రకారం ఫీజుల జాబితా ఇలా ఉంది.

* ఇంటర్ ఫస్ట్ ఇయర్ జనరల్ రెగ్యులర్‌ రూ.540.

* ఇంటర్ ఫస్ట్ ఇయర్ ఒకేషనల్ రెగ్యులర్ రూ.890.

* ఇంటర్ సెకండ్ ఇయర్ జనరల్ ఆర్ట్స్ రూ.540.

* ఇంటర్ సెకండ్ ఇయర్ జనరల్ సైన్స్ రూ.890.

* ఇంటర్ సెకండ్ ఇయర్ ఒకేషనల్ రూ.890.

జనరల్ సైన్స్, ఒకేషనల్ కోర్సులకు వర్తించే రూ.890 ఫీజులో థియరీ పరీక్షలకు రూ.540, ప్రాక్టికల్స్‌కు రూ.250, ఇంగ్లీష్ ప్రాక్టికల్స్‌కు రూ.100 చొప్పున ఉన్నాయి. జనరల్ ఆర్ట్స్ విద్యార్థులకు పరీక్ష ఫీజు రూ.540గా నిర్ణయించారు. విద్యార్థులు తమ కోర్సుకు వర్తించే మొత్తాన్ని కళాశాల ద్వారా నిర్ధారించుకోవాలి.

Weather Update: అల్పపీడనం, ఈశాన్య రుతుపవనాల ఎంట్రీతో దంచికొట్టనున్న వానలు.. ఈ ప్రాంతాలకు అలర్ట్

Mahesh Rajamoni — Thu, 15 Oct 2026 10:50:23 +0530

Heavy Rain Alert: ఆంధ్రప్రదేశ్, తెలంగాణలో వాతావరణం మారుతోంది. ఒకవైపు నైరుతి రుతుపవనాలు నిష్క్రమిస్తుండగా, మరోవైపు ఈశాన్య రుతుపవనాల ప్రవేశం, బంగాళాఖాతంలో ఏర్పడిన మార్పులతో 5 రోజుల పాటు పలు జిల్లాల్లో భారీ వర్షాలు కురిసే అవకాశం ఉందని ఐఎండీ తెలిపింది.

అక్టోబర్ నెలలోనూ వేసవిని తలపించే ఎండలు, ఉక్కపోతతో అల్లాడిపోతున్న ప్రజలకు వాతావరణ శాఖ ఎట్టకేలకు చల్లని కబురు అందించింది. బంగాళాఖాతంలో ఏర్పడిన వాతావరణ మార్పుల కారణంగా ఆంధ్రప్రదేశ్, తెలంగాణలో రానున్న ఐదు రోజుల పాటు విస్తారంగా వర్షాలు కురిసే అవకాశం ఉందని అధికారులు వెల్లడించారు.

ఈ ఏడాది నైరుతి రుతుపవనాలు కొంత నిరాశపరిచినప్పటికీ, ఇప్పుడు బంగాళాఖాతంలో ఏర్పడిన ఉపరితల ద్రోణి, ఈశాన్య రుతుపవనాల రాకతో వాతావరణం పూర్తిగా మారిపోతోంది. మహబూబ్‌నగర్, ఖమ్మం, హైదరాబాద్ వంటి ప్రాంతాల్లో సాధారణం కంటే అధిక ఉష్ణోగ్రతలు నమోదై ఉక్కపోత పెరిగిన తరుణంలో, ఈ వర్షాలు ప్రజలకు ఎంతో ఊరటనివ్వనున్నాయి.

ఆంధ్రప్రదేశ్‌లో మన్నార్ గల్ఫ్ నుంచి నైరుతి, వాయువ్య బంగాళాఖాతం వరకు ఉపరితల ద్రోణి విస్తరించి ఉంది. దీనికి ఈశాన్య రుతుపవనాలు తోడవడంతో రాష్ట్రంలోని ఉత్తరాంధ్ర, కోస్తా తీర ప్రాంతాలు, రాయలసీమ జిల్లాల్లో వాతావరణం కూల్ అయింది.

పార్వతీపురం మన్యం, అల్లూరి సీతారామరాజు, విశాఖపట్నం, కాకినాడ, కోనసీమ, తూర్పుగోదావరి, ఏలూరు, కృష్ణా, ఎన్టీఆర్, గుంటూరు, ప్రకాశం, అనంతపురం, శ్రీసత్యసాయి, కడప జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉంది. తిరుపతి, విశాఖ, విజయనగరం, నెల్లూరు జిల్లాల్లోనూ వర్షాలు కురుస్తాయని ఐఎండీ తెలిపింది.

తెలంగాణలోనూ ఈశాన్య రుతుపవనాల ప్రవేశానికి వాతావరణ పరిస్థితులు పూర్తిగా అనుకూలంగా మారాయి. ఈ నేపథ్యంలో రాగల ఐదారు రోజుల పాటు రాష్ట్రవ్యాప్తంగా పలు జిల్లాల్లో ఉరుములు, మెరుపులు, ఈదురుగాలులతో కూడిన వర్షాలు కురుస్తాయని హైదరాబాద్ వాతావరణ కేంద్రం స్పష్టం చేసింది.

ముఖ్యంగా భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ జిల్లాలతో పాటు గ్రేటర్ హైదరాబాద్ పరిధిలోని రంగారెడ్డి, హైదరాబాద్, మేడ్చల్-మల్కాజిగిరి జిల్లాలకు వాతావరణ శాఖ ఎల్లో అలర్ట్ జారీ చేసింది. గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉండటంతో అధికారులు తగిన హెచ్చరికలు జారీ చేశారు.

ఒకవైపు తెలుగు రాష్ట్రాల్లో అక్కడక్కడ వర్షాలు కురుస్తుండగా, మరోవైపు కొన్ని ప్రాంతాల్లో ఎండల తీవ్రత ఇంకా కొనసాగుతూనే ఉంది. మహబూబ్‌నగర్‌లో సాధారణం కంటే దాదాపు 6 డిగ్రీలు ఎక్కువగా 37.9 డిగ్రీల ఉష్ణోగ్రత నమోదు కాగా, ఖమ్మం, హైదరాబాద్‌లలో కూడా సాధారణం కంటే ఉష్ణోగ్రతలు పెరిగి జనాన్ని ఉక్కిరిబిక్కిరి చేస్తున్నాయి.

అయితే, రానున్న రోజుల్లో రుతుపవనాల ప్రభావం మరింత బలపడటంతో ఈ ఉష్ణోగ్రతలు క్రమంగా తగ్గుముఖం పట్టి, రాష్ట్రవ్యాప్తంగా చల్లటి వాతావరణం ఏర్పడే అవకాశం ఉందని వాతావరణ నిపుణులు అంచనా వేస్తున్నారు.

భారీ వర్షాలు, ఈదురుగాలులు, పిడుగుపాటు హెచ్చరికల నేపథ్యంలో ప్రజలు అత్యంత అప్రమత్తంగా ఉండాలని విపత్తుల నిర్వహణ శాఖ సూచించింది. వర్షం కురిసే సమయంలో ఎవరూ చెట్ల కింద, విద్యుత్ స్తంభాల వద్ద, లేదా శిథిలావస్థలో ఉన్న భవనాల సమీపంలో ఆశ్రయం పొందరాదు. అలాగే రోడ్ల పక్కన ఉండే భారీ హోర్డింగుల కింద నిలబడటం ప్రమాదకరం. పొలాల్లో పనిచేసే రైతులు, వ్యవసాయ కూలీలు, పశువుల కాపరులు పిడుగుల పట్ల తగిన జాగ్రత్తలు తీసుకోవాలని, ప్రయాణికులు అలాగే వాహనదారులు వాతావరణ పరిస్థితులను గమనిస్తూ ప్రయాణాలు సాగించాలని అధికారులు విజ్ఞప్తి చేశారు.

ఆటో డ్రైవ‌ర్ చేసిన ప‌నికి స‌జ్జ‌నార్ స్ట్రాంగ్‌ రియాక్ష‌న్‌.. అత‌న్ని వెంట‌నే ప‌ట్టుకోమ‌ని ఆదేశాలు

Narender Vaitla — Wed, 14 Oct 2026 17:34:22 +0530

Viral Video: హైదరాబాద్‌లో ఓ ఆటో డ్రైవర్ చేసిన ప్రమాదకరమైన పని ఇప్పుడు సోషల్ మీడియాలో చర్చకు దారితీసింది. దీనిపై హైదరాబాద్ సిటీ పోలీస్ కమిషనర్ వీసీ సజ్జనార్ తీవ్రంగా స్పందించారు. అత‌న్ని వెంట‌నే గుర్తించ‌మ‌ని ట్రాఫిక్ పోలీసులను ఆదేశించారు.

వైరల్ అవుతున్న వీడియోలో ఆటో డ్రైవర్ వాహనం నడుపుతూనే రెండు మొబైల్ ఫోన్లను ఉపయోగిస్తున్నట్లు కనిపిస్తోంది. ఒక ఫోన్‌లో తాను చేరుకోవాల్సిన గమ్యస్థానానికి సంబంధించిన నావిగేషన్ మార్గాన్ని చూస్తుండగా, మరో ఫోన్‌లో సినిమా చూస్తున్నాడు. అంతటితో ఆగకుండా చెవులకు రంగురంగుల లైట్లు వెలిగే పెద్ద హెడ్‌ఫోన్లు కూడా ధరించాడు. సాధారణంగా రోడ్డుపై ఎదురయ్యే పరిస్థితులను గమనిస్తూ, ఇతర వాహనాల కదలికలకు అనుగుణంగా ఆటోను నడపాల్సిన వ్యక్తి ఇలా పలు అంశాలపై దృష్టి మళ్లించడం ప్రమాదకరమనే అభిప్రాయాలు వ్యక్తమవుతున్నాయి.

ఈ వీడియోను ఓ నెటిజన్ హైదరాబాద్ సిటీ పోలీస్ కమిషనర్ వీసీ సజ్జనార్ దృష్టికి తీసుకెళ్లారు. దీనిపై స్పందించిన ఆయన, ఆటో డ్రైవర్ ప్రవర్తనను తీవ్రంగా తప్పుబట్టారు. చూడటానికి ఒకేసారి పలు స్క్రీన్లను ఉపయోగించే విన్యాసంలా కనిపించినా, ఆటోలో ప్రయాణిస్తున్నవారికి మాత్రం ఇది ప్రాణాపాయంగా మారే ప్రమాదం ఉందని హెచ్చరించారు. డ్రైవింగ్ సమయంలో క్షణకాలం పాటు కూడా రోడ్డుపై నుంచి దృష్టి మళ్లితే ప్రమాదాలు జరిగే అవకాశం ఉంటుందని పేర్కొన్నారు. అలాంటిది సినిమా చూస్తూ, హెడ్‌ఫోన్లు ధరించి వాహనం నడపడం సాధారణ నిర్లక్ష్యం కాదని, ఇతరుల ప్రాణాలను ప్రమాదంలోకి నెట్టే బాధ్యతారాహిత్యమని స్పష్టం చేశారు. ఈ ఘటనలో డ్రైవర్‌ను గుర్తించి, చట్టప్రకారం కఠిన చర్యలు తీసుకోవాలని సంబంధిత ట్రాఫిక్ అధికారులను ఆదేశించారు.

మోటారు వాహనాల చట్టం ప్రకారం ప్రమాదకరంగా వాహనం నడపడం చట్టపరమైన చర్యలకు దారితీస్తుంది. రోడ్డుపై ఇతర వాహనదారులకు, ప్రయాణికులకు ముప్పు కలిగించేలా డ్రైవింగ్ చేస్తే జరిమానాలతో పాటు ఇతర చర్యలు కూడా ఎదురయ్యే అవకాశం ఉంది. నిబంధనల ఉల్లంఘన తీవ్రత, వర్తించే చట్టపరమైన నిబంధనలను బట్టి డ్రైవింగ్ లైసెన్స్‌పై కూడా చర్యలు తీసుకోవచ్చు. ఆటోలో ప్రయాణికులను తీసుకెళ్తున్నప్పుడు డ్రైవర్ మరింత బాధ్యతగా వ్యవహరించాల్సి ఉంటుంది.

ఈ వీడియోపై నెటిజన్లు కూడా ఆగ్రహం వ్యక్తం చేస్తున్నారు. డ్రైవర్ నిర్లక్ష్యం వల్ల ఆటోలో ఉన్న ప్రయాణికులే కాకుండా, రోడ్డుపై వెళ్తున్న ద్విచక్ర వాహనదారులు, కార్లలో ప్రయాణిస్తున్నవారు, పాదచారులు సైతం ప్రమాదంలో పడే అవకాశం ఉందని ఆందోళన వ్యక్తం చేస్తున్నారు. ఇలాంటి పరిస్థితులు ఎదురైనప్పుడు ప్రయాణికులు సాధ్యమైనంత సురక్షితంగా డ్రైవర్‌ను హెచ్చరించాలని, అతను స్పందించకపోతే పోలీసులకు సమాచారం ఇవ్వాలని సజ్జనార్ సూచించారు. అత్యవసర పరిస్థితుల్లో డయల్ 112కు కాల్ చేసి సహాయం కోరవచ్చు. డ్రైవింగ్ చేసేటప్పుడు మొబైల్ వినియోగం, వీడియోలు చూడటం, హెడ్‌ఫోన్ల వల్ల పరిసరాలపై అవగాహన తగ్గడం వంటి వాటికి దూరంగా ఉండాలి. రోడ్డు భద్రత అనేది ఒక్క డ్రైవర్ బాధ్యత మాత్రమే కాదు.. ప్రయాణికులు, ఇతర వాహనదారులు సహా ప్రతి ఒక్కరి ప్రాణాలకు సంబంధించిన విషయం.

రెండు కళ్లకు ఎదురుగా రెండు ఫోన్లు.. ఒకదాంట్లో గమ్యం చూపించే నేవిగేషన్ రూట్, మరోదాంట్లో నాన్‌స్టాప్ వినోదాన్ని పంచే సినిమా! ఇక చెవులకేమో బాహ్య ప్రపంచంతో సంబంధం లేకుండా రంగురంగుల లైట్లు వెలిగే పెద్ద హెడ్‌ఫోన్లు!

ఇది ఒక ఆటో డ్రైవర్ అధునాతన సెటప్. ఒక నెటిజన్ సోషల్ మీడియా ద్వారా ఈ వీడియోను నాకు పంపించారు.

చూడటానికి ఇది మల్టీ-స్క్రీన్ గేమింగ్ విన్యాసంలా అనిపించినా, వెనుక కూర్చున్న ప్రయాణికుల పాలిట మాత్రం ఇది నడుస్తున్న మృత్యుశకటం.

డ్రైవింగ్ చేస్తున్నప్పుడు దృష్టి క్షణకాలం రోడ్డుపై నుంచి పక్కకు మళ్లినా ఘోర ప్రమాదాలు ముంచుకొస్తాయి.

అలాంటిది నేరుగా సినిమా చూస్తూ, చెవుల్లో హెడ్‌ఫోన్లు పెట్టుకుని వాహనం నడపడం కేవలం నిర్లక్ష్యం మాత్రమే కాదు.. క్షమించరాని నేరం.

ఎంవీ యాక్ట్ ప్రకారం ఇది డేంజరస్ డ్రైవింగ్ కిందకు వస్తుంది. దీనికి భారీ జరిమానాతో పాటు డ్రైవింగ్ లైసెన్స్ రద్దయ్యే అవకాశమూ ఉంది.

వినోదం కోసం ప్రయాణికుల ప్రాణాలను పణంగా పెట్టడం భావ్యం కాదు. ఆటోను థియేటర్‌గా మార్చి జీవితాలకు ది ఎండ్ కార్డు వేయొద్దని గుర్తుంచుకోవాలి.

వాహనం ఏదైనా.. టూవీలర్, కారు, ఆటో, బస్, లారీ.. డ్రైవింగ్ సమయంలో మొబైల్, హెడ్ ఫోన్స్, ఇయర్ బడ్స్ వాడకం ప్రాణాంతకం.

ఈ క్రమంలో ప్రయాణం ఆటో అయినా, కారు అయినా, బస్సు అయినా ప్రయాణికులు కూడా ఎల్లప్పుడూ అప్రమత్తంగా ఉండాలి.

డ్రైవర్ ఫోన్ చూస్తున్నా, చెవుల్లో హెడ్‌ఫోన్లు లేదా ఇయర్‌బడ్స్ పెట్టుకున్నా చూస్తూ మౌనంగా ఉండిపోకండి. అది ప్రాణాలకే ప్రమాదమని వెంటనే ప్రశ్నించండి, వారించండి.

ఒకవేళ వారు వినకపోతే ఏమాత్రం నిర్లక్ష్యం చేయకుండా వెంటనే డయల్ 112కు కాల్ చేసి పోలీసులకు సమాచారం అందించండి.

ప్రయాణంలో మీ నిర్లక్ష్యం మీ ప్రాణాలకే ముప్పు తెస్తుంది.. అదే సమయంలో మీ అప్రమత్తత మీతో పాటు ఎందరో అమాయకుల ప్రాణాలను కాపాడుతుందని గ్రహించాలి.

Instructed @HYDTP to trace the auto (TG15U2657) driver and take stringent legal action as per the law.

#RoadSafety #HyderabadTraffic #PassengerSafety #Dial112 #DriveSafe

— V.C. Sajjanar, IPS (@SajjanarVC_IPS) October 14, 2026

అనిరుధ్, కావ్య పెళ్ళికి ముహూర్తం ఫిక్స్.. ఎప్పుడు, ఎక్కడో రివీల్ చేసిన తెలంగాణ సీఎం

Arun Kumar P — Sat, 17 Oct 2026 20:06:12 +0530

మ్యూజిక్ డైరెక్టర్ అనిరుధ్ రవించంద్రన్, వ్యాపార కుటుంబానికి చెందిన కావ్య మారన్ పెళ్లి చేసుకోబోతున్నారు. అయితే వీరి పెళ్లి విందు గురించి తెలంగాణ ముఖ్యమంత్రి కార్యాలయం ఆసక్తికర అప్ డేట్ ఇచ్చింది.

సినీ సంగీత ప్రపంచంలో తనదైన గుర్తింపు తెచ్చుకున్న యువ సంగీత దర్శకుడు అనిరుధ్ రవిచందర్ ఓ ఇంటివాడు కాబోతున్నాడు. ఇండియన్ ప్రీమియర్ లీగ్ (IPL) లో తెలుగు టీం సన్‌రైజర్స్ హైదరాబాద్ జట్టు ఓనర్ గా తెలుగువారికి సుపరిచితమైన కావ్య మారన్ ను అతడు పెళ్లాడబోతున్నాడు. వీరి పెళ్లి వార్త ఇటు సినీరంగంలో, అటు క్రీడా రంగంలో హాట్ టాపిక్‌గా మారింది. వీరిద్దరి వివాహంపై గత కొంతకాలంగా ప్రచారం జరుగుతుండగా... తాజాగా తెలంగాణ ముఖ్యమంత్రి రేవంత్ రెడ్డి కార్యాలయం చేసిన ప్రకటనతో ఈ వార్తకు మరింత ప్రాధాన్యం ఏర్పడింది. వీరి వివాహ రిసెప్షన్ ఎప్పుడు జరగనుందో తెలంగాణ సీఎంవో వెల్లడించింది.

అనిరుధ్-కావ్య పెళ్ళి విందు ఎప్పుడు, ఎక్కడ?

అనిరుధ్, కావ్య వివాహ పనులు మొదలయ్యాయి.... రాజకీయ, సినీ, వ్యాపార రంగాలకు చెందిన పలువురు ప్రముఖులకు ఆహ్వానాలు అందుతున్నాయి. సన్ గ్రూప్ ఛైర్మన్ కళానిధి మారన్, ఆయన భార్య కావేరి మారన్ స్వయంగా ప్రముఖులను కలిసి కూతురు పెళ్లి విందుకు రావాలని ఆహ్వానాలు అందిస్తున్నారు. ప్రధానమంత్రి నరేంద్ర మోదీ, తమిళనాడు ముఖ్యమంత్రి సి. జోసెఫ్ విజయ్ లతో పాటు తెలంగాణ సీఎం రేవంత్ రెడ్డి, బిఆర్ఎస్ నేత కేటీఆర్ లకు ఆహ్వానం అందించారు.

అనిరుధ్ రవిచందర్, కావ్య మారన్ వివాహ రిసెప్షన్ నవంబర్ 21న చెన్నైలో జరగనుంది. ఈ విషయాన్ని తెలంగాణ ముఖ్యమంత్రి కార్యాలయం తన అధికారిక ఎక్స్ ఖాతాలో వెల్లడించింది. హైదరాబాద్‌లోని రేవంత్ రెడ్డి నివాసానికి కళానిధి మారన్, కావేరి మారన్ దంపతులు స్వయంగా వెళ్లి తమ కుమార్తె వివాహ రిసెప్షన్‌కు హాజరు కావాలని ఆహ్వానించారు. ఈ సందర్భంగా మారన్ దంపతులు, రేవంత్ దంపతులను కలిసిన ఫొటోలు, వీడియోలను సీఎంవో సోషల్ మీడియాలో పోస్ట్ చేసింది. వాటితో పాటు చెన్నైలో నవంబర్ 21న వివాహ రిసెప్షన్ నిర్వహించనున్నట్లు పేర్కొంది. దీంతో ఈ వేడుక తేదీపై అధికారిక స్పష్టత వచ్చింది.

Sun Group Chairman Shri Kalanithi Maran and his wife, Smt. Kavery Maran, met Hon’ble Chief Minister Shri A. Revanth Reddy at his residence in Jubilee Hills and invited him to the wedding reception of their daughter, Kavya Maran.

The wedding reception of Kavya Maran and Anirudh Ravichander is scheduled to be held in Chennai on November 21.

#KalanithiMaran #KavyaMaran

— Telangana CMO (@TelanganaCMO) October 16, 2026

తెలంగాణ రాజకీయాల్లో కీలక నేతగా ఉన్న బీఆర్ఎస్ వర్కింగ్ ప్రెసిడెంట్ కేటీఆర్‌ను కూడా కళానిధి మారన్ దంపతులు కలిశారు. హైదరాబాద్‌లోని కేటీఆర్ నివాసానికి వెళ్లి తమ కుమార్తె వివాహ రిసెప్షన్‌కు రావాలని ఆహ్వానించారు. ఈ సందర్భంగా కేటీఆర్ దంపతులకు వివాహ ఆహ్వాన పత్రికను అందించారు.

ప్రధానమంత్రి నరేంద్ర మోదీ, తమిళనాడు ముఖ్యమంత్రిని విజయ్ ని కూడా అనిరుధ్, కావ్య పెళ్ళికి ఆహ్వానించారు మారన్ దంపతులు. కొందరు సినీ, వ్యాపార ప్రముఖులకు కూడా ఇప్పటికే ఈ పెళ్లి విందుకు పిలుపు అందింది. కాబట్టి సినీ, క్రికెట్, వ్యాపార రంగాలకు చెందిన ప్రముఖులు కూడా ఈ వేడుకకు హాజరయ్యే అవకాశం ఉంది.

అనిరుధ్, కావ్య మారన్ వివాహం గ్రీస్‌లో జరగనున్నట్లు ప్రచారం జరుగుతోంది. నవంబర్ 10 లేదా 11న అక్కడ వివాహ వేడుక నిర్వహించనున్నట్లు వార్తలు వెలువడుతున్నాయి. వధూవరుల కుటుంబ సభ్యులు, అత్యంత సన్నిహితుల సమక్షంలో ప్రైవేట్ వేడుకగా పెళ్లి జరగవచ్చని సమాచారం. ఆ తర్వాత చెన్నైలో సినీ, రాజకీయ, వ్యాపార ప్రముఖుల కోసం భారీ స్థాయిలో రిసెప్షన్ నిర్వహించనున్నట్లు తెలుస్తోంది.

అయితే గ్రీస్‌లో వివాహం జరిగే తేదీ, స్థలం, వేడుకల వివరాలను అనిరుధ్ లేదా కావ్య మారన్ కుటుంబసభ్యులు అధికారికంగా ప్రకటించాల్సి ఉంది. ఇలా పెళ్లిపై క్లారిటీ లేకున్నా నవంబర్ 21న రిసెప్షన్ ఉంటుందని తెలంగాణ సీఎంవో ప్రకటన ద్వారా స్పష్టమవుతోంది.

కేవలం తమిళనాడు కాదు ఇండియన్ సినీ పరిశ్రమలో ప్రముఖ సంగీత దర్శకుడు, గాయకుడిగా అనిరుధ్ రవిచందర్ గుర్తింపు పొందారు. 2012లో విడుదలైన 3 సినిమాలోని ‘వై దిస్ కొలవెరి డి’ పాటతో ఆయన దేశవ్యాప్తంగా పాపులర్ అయ్యారు. ఆ పాటకు లభించిన ఆదరణతో యువ సంగీత దర్శకుడిగా ఆయన పేరు మారుమోగింది. ఆ తర్వాత విక్రమ్, జైలర్, జవాన్ వంటి సినిమాలకు అందించిన సంగీతంతో మరింత గుర్తింపు సంపాదించారు. తమిళంతో పాటు తెలుగు, హిందీ చిత్ర పరిశ్రమల్లోనూ ఆయనకు మంచి క్రేజ్ ఉంది.

ఎవరీ కావ్య మారన్?

కావ్య మారన్ సన్ గ్రూప్ ఛైర్మన్ కళానిధి మారన్, కావేరి మారన్ దంపతుల కుమార్తె. ఆమె సన్‌రైజర్స్ హైదరాబాద్ ఐపీఎల్ జట్టుకు సీఈవోగా వ్యవహరిస్తున్నారు. మ్యాచ్‌ల సమయంలో స్టేడియంలో కనిపిస్తూ క్రికెట్ అభిమానుల్లో ప్రత్యేక గుర్తింపు పొందారు... మరీముఖ్యంగా తెలుగువారికి దగ్గరయ్యారు. క్రికెట్‌పై ఆసక్తి, జట్టు నిర్వహణలో ఆమె పాత్ర కారణంగా ఐపీఎల్ అభిమానులకు కావ్య సుపరిచితురాలు. మరోవైపు ఆమె కుటుంబం మీడియా, టెలివిజన్, వినోద రంగాల్లో వ్యాపార కార్యకలాపాలు నిర్వహిస్తోంది.

సినీ, క్రికెట్ అభిమానుల్లో పెరిగిన ఆసక్తి

అనిరుధ్‌కు సినీ సంగీత అభిమానుల్లో విపరీతమైన క్రేజ్ ఉండగా, కావ్య మారన్ ఐపీఎల్ అభిమానులకు సుపరిచితురాలు. ఈ ఇద్దరూ వివాహ బంధంలోకి అడుగుపెట్టనున్నారన్న వార్తతో రెండు రంగాలకు చెందిన అభిమానుల్లో ఆసక్తి పెరిగింది. గతంలో వీరిద్దరి సంబంధంపై అనేక ఊహాగానాలు వచ్చినప్పటికీ, ఇప్పుడు వివాహ రిసెప్షన్ తేదీపై తెలంగాణ సీఎంవో ప్రకటన వెలువడటంతో ఈ వార్తకు మరింత ప్రాధాన్యం ఏర్పడింది. నవంబర్‌లో జరగనున్న వివాహ వేడుకలు, చెన్నై రిసెప్షన్‌కు హాజరయ్యే ప్రముఖుల వివరాలపై తదుపరి రోజుల్లో మరింత స్పష్టత వచ్చే అవకాశం ఉంది.

డీమార్ట్‌లు, మెట్రోలే కాదు.. హైద‌రాబాద్‌లో త‌క్కువ ధ‌ర‌ల‌కు స‌రుకులు దొరికే మార్కెట్లు ఇవే

Narender Vaitla — Wed, 14 Oct 2026 18:54:44 +0530

Hyderabad: హైదరాబాద్‌లో నెలవారీ సరుకులు కొనాలంటే చాలామంది ముందుగా డీమార్ట్‌, మెట్రో వంటి సూపర్‌మార్కెట్లకు వెళ్తుంటారు. అయితే వీటికంటే త‌క్కువ ధ‌ర‌కు స‌రుకులు ల‌భించే మార్కెట్లు న‌గ‌రంలో ఎన్నో ఉన్నాయ‌ని మీకు తెలుసా.?

నెలవారీ ఇంటి సరుకుల్లో బియ్యం, పప్పులు, పసుపు, కారం, చింతపండు వంటి వాటికే ఎక్కువ ఖర్చవుతుంది. వీటిని సూపర్‌మార్కెట్లలో చిన్న చిన్న ప్యాకెట్లలో కొనడం కంటే, అవసరాన్ని బట్టి టోకు దుకాణాల్లో ఎక్కువ మొత్తంలో కొనుగోలు చేస్తే డబ్బు ఆదా అయ్యే అవకాశం ఉంటుంది.

మలక్‌పేట మార్కెట్‌: బియ్యం, పప్పు దినుసులు, పసుపు, చింతపండు, ఎండుమిర్చి, ఉల్లిపాయలు, అల్లం, వెల్లుల్లి వంటి వస్తువుల కోసం మలక్‌పేట మార్కెట్‌ను పరిశీలించవచ్చు. ఇంటి అవసరాలతో పాటు హోటళ్లు, భోజనశాలలకు అవసరమైన సరుకులను కొనుగోలు చేసేవారికి ఈ ప్రాంతం బెస్ట్ ఆప్ష‌న్‌గా చెప్పొచ్చు.

మహారాజ్‌గంజ్‌, ముక్త్యార్‌గంజ్‌: వివిధ రకాల పప్పులు, ఇతర కిరాణా వస్తువుల కోసం ఈ ప్రాంతాల్లోని టోకు దుకాణాలను సంప్రదించవచ్చు. ఒకటి కంటే ఎక్కువ దుకాణాల్లో ధరలు తెలుసుకుని కొనుగోలు చేస్తే మంచి ధరకు సరుకులు లభించే అవకాశం ఉంటుంది.

గౌలీపురాలోని దాల్‌ మిల్లులు: పప్పులను ఎక్కువ మొత్తంలో కొనాలనుకునేవారు ఈ ప్రాంతంలోని దాల్‌ మిల్లులు, టోకు వ్యాపారుల వద్ద ధరలు తెలుసుకోవచ్చు.

బేగంబజార్‌: మసాలా దినుసులు, డ్రైఫ్రూట్స్‌, వంటింటి సామగ్రి, ప్లాస్టిక్‌ వస్తువులు, స్టీలు, ఇత్తడి, రాగి, అల్యూమినియం పాత్రలు వంటి అనేక రకాల వస్తువులకు ఈ మార్కెట్‌ ప్రసిద్ధి చెందింది. ఇంటి అవసరాలతో పాటు వ్యాపార అవసరాల కోసం కొనుగోలు చేసేవారికి కూడా ఇక్కడ అనేక దుకాణాలు కనిపిస్తాయి.

బట్టలు, చెప్పులు, బ్యాగులు, ఇంటి అలంకరణ వస్తువులు కొనుగోలు చేసేవారికి హైదరాబాద్‌లోని పాతబస్తీ, సికింద్రాబాద్‌ ప్రాంతాల్లో అనేక టోకు మార్కెట్లు ఉన్నాయి. ఒకేసారి ఎక్కువ వస్తువులు కొనేవారికి, చిన్న వ్యాపారాలు నిర్వహించేవారికి ఈ మార్కెట్లు ఉపయోగపడవచ్చు.

పత్థర్‌ఘట్టి: రెడీమేడ్‌ దుస్తులు, హోజరీ వస్తువులు, చీరలు, సూటింగ్‌, షర్టింగ్‌ ఫ్యాబ్రిక్‌ వంటి వాటి కోసం ఈ ప్రాంతాన్ని సందర్శించవచ్చు. చెప్పులు, షూస్‌ కొనుగోలు చేయాలనుకునేవారు సమీపంలోని చత్తా బజార్‌ ప్రాంతాన్ని కూడా పరిశీలించవచ్చు.

టొబాకో బజార్‌, సికింద్రాబాద్‌: చీరలు, చేనేత వస్త్రాలు, దోతులు, లుంగీలు, బెడ్‌షీట్లు, తువ్వాళ్లు, దుస్తులకు సంబంధించిన ఇతర వస్తువుల కోసం ఇక్కడి వ్యాపారులను సంప్రదించవచ్చు. కొన్ని వస్త్ర మిల్లుల డీలర్లు, స్టాకిస్టుల దుకాణాలు కూడా ఈ ప్రాంతంలో ఉంటాయి.

బేగంబజార్‌: పర్సులు, బ్యాగులు, ఎంబ్రాయిడరీ సామగ్రి, మేకప్‌ వస్తువులు, బొమ్మలు, ప్లాస్టిక్‌ సామగ్రి వంటి వాటి కోసం ఈ మార్కెట్‌లో వివిధ రకాల దుకాణాలు ఉన్నాయి.

గోషామహల్‌ నుంచి మహారాజ్‌గంజ్‌ మార్గం: మట్టిగాజులు కొనుగోలు చేయాలనుకునేవారు ఈ ప్రాంతంలోని దుకాణాలను పరిశీలించవచ్చు.

జగదీశ్‌ మార్కెట్‌, ఆబిడ్స్‌: సెల్‌ఫోన్‌ యాక్సెసరీలు, మొబైల్‌కు సంబంధించిన చిన్న చిన్న ఉపకరణాలు కొనుగోలు చేయాలనుకునేవారికి ఈ మార్కెట్‌ ఉపయోగపడుతుంది.

ఇక్కడ కూడా దుకాణాల మధ్య ధరల్లో వ్యత్యాసం ఉండవచ్చు. కాబట్టి ఒకే వస్తువును రెండు మూడు దుకాణాల్లో చూసిన తర్వాత కొనుగోలు చేయడం మంచిది.

ఇంటి నిర్మాణం, మరమ్మతులు, ఎలక్ట్రానిక్‌ వస్తువులు, వ్యాపార అవసరాలకు సంబంధించిన సామగ్రి కొనుగోలు చేసేవారు కూడా హైదరాబాద్‌లోని ప్రత్యేక మార్కెట్లను ఉపయోగించుకోవచ్చు.

గుజరాతీగల్లీ, పార్క్‌లేన్‌: ఎలక్ట్రానిక్‌ వస్తువులు, టీవీలకు సంబంధించిన ఉపకరణాలు, కంప్యూటర్‌ యాక్సెసరీల కోసం ఈ ప్రాంతాల్లోని దుకాణాలను పరిశీలించవచ్చు. అబిడ్స్‌, కోఠీ ప్రాంతాల్లో కూడా ఈ వ‌స్తువులు ల‌భిస్తాయి.

ట్రూప్‌ బజార్‌: ఎలక్ట్రికల్‌ వస్తువులు, వైరింగ్‌ సామగ్రి, శానిటరీ వస్తువుల కోసం ఇక్కడి దుకాణాల్లో ధరలు తెలుసుకోవచ్చు.

తూర్పు బజార్‌, కింగ్స్‌వే: శానిటరీ వేర్‌, టైల్స్‌ వంటి ఇంటి నిర్మాణానికి అవసరమైన వస్తువుల కోసం ఈ ప్రాంతాలను పరిశీలించవచ్చు.

రాణీగంజ్‌: పెయింట్లు, హార్డ్‌వేర్‌, టార్పాలిన్లు, నీటి పంపులు, పంపుసెట్లు, స్టీల్‌ షీట్లు, రాడ్లు వంటి వస్తువుల కోసం ఈ ప్రాంతంలో అనేక వ్యాపార సంస్థలు ఉన్నాయి.

గోషామహల్‌: ప్లైవుడ్‌, గ్లాస్‌, డెకరేటివ్‌ లామినేట్‌ షీట్లు, పీవీసీ తలుపులు, కిటికీల కోసం ఇక్కడి దుకాణాల్లో ధరలు పోల్చుకోవచ్చు.

అశోక్‌ బజార్‌, అక్బర్‌జా బజార్‌: డిస్పోజబుల్‌ ప్లేట్లు, గ్లాసులు, టిష్యూ రోల్స్‌, పేపర్‌ న్యాప్‌కిన్లు, ప్యాకేజింగ్‌కు ఉపయోగించే వస్తువులు, పీవీసీ షీట్లు వంటి వాటి కోసం ఈ ప్రాంతాలను పరిశీలించవచ్చు.

తిలక్‌ రోడ్‌, బొగ్గులకుంట: ఫినాయిల్‌, హౌస్‌కీపింగ్‌ ఉత్పత్తులు, శుభ్రతకు ఉపయోగించే కొన్ని రకాల ద్రవాలు, పారిశ్రామిక అవసరాలకు సంబంధించిన రసాయనాల కోసం ఇక్కడి సరఫరాదారులను సంప్రదించవచ్చు.

ఇంటి అవసరాలే కాకుండా కార్యాలయాలు, విద్యాసంస్థలు, దుకాణాలు, ఇతర వ్యాపారాల కోసం సరుకులు కొనుగోలు చేసేవారికి కూడా ప్రత్యేక టోకు మార్కెట్లు ఉపయోగపడతాయి.

మహారాజ్‌గంజ్‌: స్టేషనరీ వస్తువుల కోసం ఈ ప్రాంతంలోని దుకాణాల్లో ధరలు తెలుసుకోవచ్చు.

ఇందర్‌బాగ్‌, సుల్తాన్‌బజార్‌: మెడికల్‌, ఫార్మాస్యూటికల్‌ ఉత్పత్తుల కోసం సంబంధిత లైసెన్స్‌ కలిగిన సరఫరాదారులను సంప్రదించవచ్చు. మందులు కొనుగోలు చేసేటప్పుడు గడువు తేదీ, తయారీదారు, నిల్వ పరిస్థితులు, బిల్లు వంటి వివరాలను తప్పనిసరిగా పరిశీలించాలి.

రోజువారీ ఆహార పదార్థాలు, పండ్లు, పూలు కొనుగోలు చేసేవారికి హైదరాబాద్‌లో కొన్ని ప్రత్యేక మార్కెట్లు అందుబాటులో ఉన్నాయి. ముఖ్యంగా వ్యాపార అవసరాల కోసం ఎక్కువ మొత్తంలో కొనుగోలు చేసేవారు ఈ ప్రాంతాల్లో ధరలను పోల్చుకోవచ్చు.

ఫీల్ ఖానా: చేపలు, ఎండు చేపలు వంటి వాటి కోసం ఈ ప్రాంతంలోని మార్కెట్లను పరిశీలించవచ్చు.

రాంనగర్‌: చేపల కొనుగోళ్ల కోసం స్థానికంగా ప్రసిద్ధి చెందిన ప్రాంతాల్లో రాంనగర్‌ ఒకటి.

గడ్డి అన్నారం, ఎల్‌బీ నగర్‌: వివిధ రకాల పండ్లను ఎక్కువ మొత్తంలో కొనాలనుకునేవారు ఈ ప్రాంతాల్లోని పండ్ల మార్కెట్లను పరిశీలించవచ్చు. పండ్ల దుకాణాలు నిర్వహించేవారికి, జ్యూస్‌ సెంటర్లకు, ఫంక్షన్ల కోసం పండ్లు కొనేవారికి ఇవి ఉపయోగపడవచ్చు.

ఖేలా మండీ, నయాపూల్‌ పరిసరాలు: అరటిపండ్ల టోకు కొనుగోళ్ల కోసం ఈ ప్రాంతాల్లోని వ్యాపారుల వద్ద ధరలు తెలుసుకోవచ్చు.

గుడిమల్కాపూర్‌, మెహదీపట్నం: పూల కొనుగోళ్ల కోసం ఈ ప్రాంతాల్లోని మార్కెట్లను సందర్శించవచ్చు. పూజలు, వేడుకలు, వివాహాలు, పూల వ్యాపారాల కోసం ఎక్కువ మొత్తంలో పూలు అవసరమైనవారు ధరలను పోల్చుకోవడం మంచిది.

పాన్‌ మండీ, ఘోషామహల్‌ పరిసరాలు: తమలపాకుల కొనుగోళ్ల కోసం ఈ ప్రాంతాల్లోని వ్యాపారులను సంప్రదించవచ్చు.

ఈ మార్కెట్లలో ధరలు రోజువారీ సరఫరా, సీజన్‌, నాణ్యతను బట్టి మారుతుంటాయి. అందువల్ల కొనుగోలు చేసే ముందు ధరలు తెలుసుకోవడం ముఖ్యం.

అయితే టోకు మార్కెట్‌కు వెళ్లినంత మాత్రాన ప్రతి వస్తువు డీమార్ట్‌ లేదా మెట్రో కంటే తక్కువ ధరకు లభిస్తుందని భావించకూడదు. కొన్ని వస్తువులకు మాత్రమే మంచి ధరలు ఉండవచ్చు. అందువల్ల కొనుగోలు చేసే ముందు ఈ విషయాలు గుర్తుంచుకోవాలి. అందుకే టోకు దుకాణం ధరతో పాటు డీమార్ట్‌, మెట్రో, స్థానిక కిరాణా దుకాణాల్లోని ధరలను కూడా పరిశీలించండి.

Weather Update: దంచికొడుతున్న వానలు.. రాబోయే 3 రోజులు ఈ జిల్లాల్లో భారీ వర్షాలు, ఈదురుగాలులు

Mahesh Rajamoni — Sun, 18 Oct 2026 07:05:59 +0530

Weather Update: ఉపరితల ఆవర్తనం, ద్రోణి ప్రభావంతో తెలుగు రాష్ట్రాల్లో రాబోయే 3 రోజులపాటు ఉరుములు, మెరుపులు, ఈదురుగాలులతో కూడిన మోస్తరు నుంచి భారీ వర్షాలు కురిసే అవకాశం ఉందని వాతావరణ శాఖ వెల్లడించింది. ప్రజలు, రైతులు అప్రమత్తంగా ఉండాలని హెచ్చరించింది.

తెలుగు రాష్ట్రాల్లో వాతావరణం ఒక్కసారిగా మారిపోయింది. ఉత్తర తమిళనాడు, దక్షిణ కోస్తాంధ్ర మీదుగా ఏర్పడిన ఉపరితల ఆవర్తనం అలాగే దక్షిణ కోస్తాంధ్ర నుంచి వాయవ్య బంగాళాఖాతం వరకు విస్తరించిన ద్రోణి కారణంగా వాతావరణంలో తీవ్ర మార్పులు చోటుచేసుకున్నాయి.

దీని ప్రభావంతో తెలంగాణ, ఆంధ్రప్రదేశ్ వ్యాప్తంగా రాబోయే మూడు రోజులపాటు తేలికపాటి నుంచి మోస్తరు వర్షాలు, కొన్ని ప్రాంతాల్లో భారీ వానలు కురిసే అవకాశం ఉందని భారత వాతావరణ శాఖ (IMD) స్పష్టం చేసింది. ముఖ్యంగా ఉరుములు, మెరుపులతో పాటు గంటకు 30 నుంచి 50 కిలోమీటర్ల వేగంతో ఈదురుగాలులు వీచే సూచనలు ఉండటంతో అధికార యంత్రాంగం అప్రమత్తమైంది.

ఆంధ్రప్రదేశ్‌పై ఈశాన్య రుతుపవనాల ప్రభావం బలంగా కనిపిస్తోంది. కోస్తాంధ్ర, రాయలసీమ ప్రాంతాల్లో విస్తారంగా వర్షాలు కురుస్తున్నాయి. శ్రీకాకుళం, విజయనగరం, విశాఖపట్నం, కాకినాడ, పశ్చిమ గోదావరి, కృష్ణా, గుంటూరు, బాపట్ల, ప్రకాశం, నెల్లూరు జిల్లాల్లో అక్కడక్కడ ఉరుములు, మెరుపులతో కూడిన వర్షాలు పడే ఛాన్స్ ఉంది.

తీరం వెంబడి గంటకు 40 నుంచి 50 కి.మీ వేగంతో, గరిష్ఠంగా 60 కి.మీ వేగంతో ఈదురుగాలులు వీచే అవకాశం ఉండటంతో సముద్రం అల్లకల్లోలంగా మారనుందని, కాబట్టి మత్స్యకారులు ఎవరూ వేటకు వెళ్లరాదని హెచ్చరికలు జారీ అయ్యాయి. అలాగే చిత్తూరు, తిరుపతి, వైఎస్సార్ కడప, అన్నమయ్య జిల్లాల్లో పిడుగులతో కూడిన భారీ వర్షాలు కురిసే అవకాశం ఉందని అధికారులు తెలిపారు.

తెలంగాణలోని పలు జిల్లాలకు వాతావరణ కేంద్రం ఎల్లో అలర్ట్ జారీ చేసింది. ముఖ్యంగా జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ, రంగారెడ్డి తదితర జిల్లాల్లో అక్కడక్కడ మోస్తరు నుంచి భారీ వర్షాలు కురిసే అవకాశం ఉందని ఐఎండీ వెల్లడించింది. ఈదురుగాలుల తీవ్రత గంటకు 30 నుంచి 40 కిలోమీటర్ల వరకు ఉండే అవకాశం ఉన్నందున ప్రజలు అప్రమత్తంగా ఉండాలని అధికారులు సూచించారు.

రాజధాని హైదరాబాద్‌లో ఉదయం పూట స్వల్పంగా చలిగాలులు, పొగమంచు వాతావరణం కనిపిస్తుండగా, మధ్యాహ్న సమయానికి ఎండ తీవ్రతతో ఉష్ణోగ్రతలు సుమారు 32 డిగ్రీల నుంచి 33 డిగ్రీల సెల్సియస్ వరకు నమోదవుతున్నాయి. అయితే మధ్యాహ్నం తర్వాత ఆకాశం మేఘావృతమై, సాయంత్రం లేదా రాత్రి వేళల్లో ఎల్బీనగర్, ఉప్పల్, దిల్‌సుఖ్‌నగర్, కూకట్‌పల్లి, గచ్చిబౌలి తదితర ప్రాంతాల్లో ఉరుములతో కూడిన తేలికపాటి నుంచి మోస్తరు జల్లులు కురిసే అవకాశం ఉంది.

వర్షం కారణంగా రోడ్లపై ట్రాఫిక్ జామ్‌లు ఏర్పడే ప్రమాదం ఉన్నందున వాహనదారులు ప్రయాణ సమయాల్లో తగిన జాగ్రత్తలు తీసుకోవాలని ట్రాఫిక్ పోలీసులు విజ్ఞప్తి చేశారు. ప్రజలు పిడుగుపాటు ప్రమాదాల నుంచి రక్షించుకోవడానికి చెట్లు, భారీ హోర్డింగ్‌ల కింద నిలబడవద్దని విపత్తు నిర్వహణ శాఖ స్పష్టం చేసింది.

ప్రస్తుతం చాలా ప్రాంతాలలో పంటలు కోత దశకు చేరుకున్నాయి. ఈ తరుణంలో అకస్మాత్తుగా కురుస్తున్న వర్షాలు రైతన్నలను ఆందోళనకు గురిచేస్తున్నాయి. వర్షం కురిసే సమయంలో ఉరుములు, మెరుపులు కూడా తోడుడనున్నాయి.

కాబట్టి రైతులు తమ కోతకొచ్చిన పంటలను, ధాన్యాన్ని తడవకుండా సురక్షిత ప్రాంతాలకు తరలించుకోవాలని లేదా టార్పాలిన్లు కప్పి తగు జాగ్రత్తలు తీసుకోవాలని వ్యవసాయ శాఖ అధికారులు కోరారు. పొలాల్లో పనిచేసే సమయంలో ఉరుములు మెరుపులు కనిపించగానే వెంటనే సురక్షిత భవనాల్లోకి వెళ్లాలని సూచించారు.

Top 5 Bathukamma Songs: యూట్యూబ్‌లో రికార్డులు సృష్టిస్తున్న టాప్ 5 బతుకమ్మ పాటలు ఇవే

Mahesh Rajamoni — Sat, 17 Oct 2026 11:47:21 +0530

Top 5 Bathukamma Songs: తెలంగాణ సంస్కృతికి ప్రతీకైన బతుకమ్మ పండుగ సందర్భంగా యూట్యూబ్‌లో పాటలు రికార్డులు సృష్టిస్తున్నాయి. మంగ్లీ, మధుప్రియ, గోరేటి వెంకన్న పాటలు కోట్ల వ్యూస్‌తో దూసుకుపోతున్నాయి. ఆ బతుకమ్మ పాటలు ఏంటో ఇక్కడ చూద్దాం.

తెలంగాణ ఆత్మ గౌరవానికి, అపురూపమైన సంస్కృతి సంప్రదాయాలకు ప్రతీకగా నిలిచే బతుకమ్మ పండుగ వస్తోందంటే చాలు, ఆ ప్రాంతమంతా పూల శోభతో పాటు పాటల హోరుతో మార్మోగిపోతుంది. గౌరమ్మను కొలిచే వేళ ఆడపడుచులు ఆడే ఆటపాటలు ఎంతో ప్రత్యేకమైనవి. కాలం మారుతున్న కొద్ది బతుకమ్మ వేడుకల శైలి మారుతున్నా, పండుగ జరుపుకునే విధానంలో ట్రెండ్ మారుతున్నా.. డిజిటల్ మాధ్యమాల్లో మాత్రం ఈ పాటల హవా ఎప్పుడూ తక్కువేం కాదు.

ముఖ్యంగా యూట్యూబ్‌లో బతుకమ్మ పాటలకు వస్తున్న ఆదరణ చూస్తుంటే మన సంస్కృతి ఎంత వేగంగా ప్రపంచవ్యాప్తం అవుతుందో అర్థమవుతుంది. ప్రముఖ గాయనీగాయకులు ఆలపించిన కొన్ని బతుకమ్మ పాటలు ఏకంగా కోట్లలో వ్యూస్ సాధించి సరికొత్త రికార్డులు సృష్టిస్తున్నాయి. మంగ్లీ, మధుప్రియ, గోరేటి వెంకన్న వంటి టాప్ ఆర్టిస్టుల గొంతులో నుంచి జాలువారిన పాటలు శ్రోతలను మంత్రముగ్ధులను చేస్తున్నాయి.

బతుకమ్మ పాటల ట్రెండ్‌లో నంబర్ వన్ స్థానంలో నిలిచి యూట్యూబ్‌ను షాక్ కు గురిచేసిన పాట ఇది. 2017లో విడుదలైన "ఆ సింగిడిలో రంగులనే దూసి తెచ్చి.." పాట అప్పట్లో ఒక సంచలనం సృష్టించింది. ఇప్పటికీ ఈ పాట క్రేజ్ ఏమాత్రం తగ్గలేదు. ప్రముఖ గాయని మంగ్లీ, సాకేత్ స్వరాన్ని అందించిన ఈ పాటకు దాదాపు 12 కోట్లకు పైగా భారీ వ్యూస్ రావడం విశేషం. తెలంగాణ పల్లెటూరి వాతావరణాన్ని, పూల అందాలను కళ్లకు కట్టినట్టు చూపిన ఈ సాంగ్ ప్రతి బతుకమ్మ వేడుకలోనూ తప్పనిసరిగా మార్మోగుతూనే ఉంది.

తెలంగాణ జాగృతి ఆధ్వర్యంలో రూపొందిన "అల్లిపూల వెన్నెల" పాట గురించి ప్రత్యేకంగా చెప్పాల్సిన పనిలేదు. ప్రముఖ బాలీవుడ్ గాయకుడు కైలాష్ ఖేర్, అంతడుపుల రమాదేవి కలసి ఆలపించిన ఈ అద్భుతమైన గీతం శ్రోతలను ఎంతగానో ఆకట్టుకుంది. పండుగ వాతావరణాన్ని అత్యంత వైభవంగా చాటిచెప్పే ఈ పాట యూట్యూబ్‌లో సుమారు 2.3 కోట్ల వ్యూస్‌ను సొంతం చేసుకుని, అత్యధిక ఆదరణ పొందిన బతుకమ్మ పాటల జాబితాలో నిలిచింది.

ప్రముఖ ప్రజా కవి గోరేటి వెంకన్న అందించిన అద్భుతమైన సాహిత్యంతో రూపుదిద్దుకున్న పాట "ఊరు ఊరే పూల డొంక". వీ6 మీడియా ద్వారా ప్రేక్షకుల ముందుకు వచ్చిన ఈ పాటకు కార్తీక్ కొడగండ్ల సంగీతం అందించగా, కార్తీక్, సింధుజ శ్రీనివాసన్ తమ మధురమైన గొంతుతో ప్రాణం పోశారు. పల్లెల్లో బతుకమ్మ సాగే విధానాన్ని, ప్రజల ఉత్సాహాన్ని కళ్లకు కట్టే ఈ గీతం సుమారు 68 లక్షల వ్యూస్‌తో దూసుకెళ్తూ యూట్యూబ్‌లో ప్రత్యేక గుర్తింపు సంపాదించుకుంది.

మంగ్లీ బతుకమ్మ సాంగ్ 2019 తెలంగాణ సంస్కృతికి, ఆడపడుచుల ఆత్మగౌరవానికి ప్రతీకగా నిలిచిన అద్భుతమైన జానపద గీతం. మిట్టపల్లి సురేందర్ అందించిన అపురూపమైన సాహిత్యానికి, మదీన్ ఎస్.కె. సంగీతం తోడవగా... మంగ్లీ తన మధురమైన గళంతో ఈ పాటను ప్రాణం పోశారు.

కునుకు పూలు, తంగేడు పూలతో అందంగా తీర్చిదిద్దిన బతుకమ్మను, గౌరమ్మను కొలుస్తూ సాగే ఈ పాట తెలంగాణ ఊరూవాడ పండుగ వాతావరణాన్ని కళ్లకు కడుతుంది. ఈ వీడియోలో తెలంగాణ పల్లెటూరి ప్రకృతి అందాలు, మహిళల బతుకమ్మ ఆటపాటలు ఎంతో ఆకట్టుకునేలా ఉంటాయి. యూట్యూబ్‌లో కోట్లాది మంది ప్రేక్షకుల ఆదరణ నోచుకున్న ఈ గీతం, బతుకమ్మ పండుగ వస్తే చాలు ప్రతి ఇంటా, ప్రతి వీధిలో మార్మోగే అత్యంత ప్రజాదరణ పొందిన పాటలలో ఒకటిగా నిలిచింది.

మధుప్రియ బతుకమ్మ సాంగ్ 2026 తెలంగాణ సంస్కృతి వైభవాన్ని, బతుకమ్మ సంబరాలను అత్యంత మనోహరంగా ఆవిష్కరించిన అద్భుతమైన జానపద గీతం. కమల్ ఎస్లావత్ అందించిన అందమైన సాహిత్యానికి, మదీన్ ఎస్.కె. సంగీతం తోడవగా... మధుప్రియ తన ప్రత్యేకమైన, మధురమైన గళంతో ఈ పాటకు ప్రాణం పోశారు.

అరుణ్ కొలుగూరి దర్శకత్వంలో తెరకెక్కిన ఈ వీడియోలో తెలంగాణ పల్లెటూరి వాతావరణం, ప్రకృతి అందాలు, సంప్రదాయ వస్త్రధారణలో మహిళల బతుకమ్మ ఆటపాటలు ఎంతో ఆకట్టుకుంటాయి. బతుకమ్మ పండుగ విశిష్ఠతను చాటుతూ యూట్యూబ్‌లో విడుదలైన ఈ గీతం ప్రేక్షకుల నుంచి విశేషమైన స్పందనను సొంతం చేసుకుంది.

హైదరాబాద్‌లో ఫ్లాట్ కొనేందుకు ఇదే బెస్ట్ టైమ్.. భారీ తగ్గింపును ఇస్తున్న రియల్ ఎస్టేట్ సంస్థలు

Haritha Chappa — Fri, 16 Oct 2026 11:23:24 +0530

సొంత ఇల్లు కొనుక్కోవాలని ప్రతి ఒక్కరూ కోరుకుంటారు. అయితే సొంత ఇల్లు కొనేందుకు బెస్ట్ టైమ్ ఈ దీపావళి పండగనే. పండుగ సీజన్‌లో కస్టమర్లను ఆకర్షించేందుకు రియల్ ఎస్టేట్ సంస్థలు భారీ డిస్కౌంట్లు, ఆఫర్లు ఇస్తున్నాయి.

సొంత ఇల్లు కొనాలని ప్రతి ఒక్కరూ కోరుకుంటారు. అయితే ఇల్లు కొనాలనుకుంటే ఈ దీపావళి బెస్ట్ సీజన్ అని చెప్పుకోవాలి. ఇల్లు కొనాలనుకునే వారికి ఈ పండుగ సీజన్‌లో భారీ డిస్కౌంట్లు దొరికే ఛాన్స్ ఉంది. ప్రస్తుతం హైదరాబాద్ లో రియల్ ఎస్టేట్ మార్కెట్‌లో ఇళ్ల అమ్మకాల కంటే కొత్త ప్రాజెక్టుల లాంచింగ్ వేగంగా జరుగుతోంది. దీనివల్ల లక్షలాది ఇళ్లు అమ్ముడుపోకుండా ఖాళీగా పడి ఉన్నాయి. దీంతో కొత్త ప్రాజెక్టుల నిర్మాణాలు కూడా నెమ్మదించాయి. అందుకే బిల్డర్లు ఈ పండుగ సీజన్‌ను టార్గెట్ చేసి, మిగిలిపోయిన ఇళ్లను త్వరగా అమ్మేయాలని చూస్తున్నారు.

మనదేశంలోని చెన్నై, ముంబై, బెంగళూరు, హైదరాబాద్ లాంటి ప్రధాన మెట్రో నగరాల్లో అమ్ముడుపోని ఇళ్ల సంఖ్య ఈ ఏడాది సెప్టెంబర్ నాటికి 12 శాతం పెరిగింది. అంటే 6.31 లక్షల ఇళ్లు ఖాళీగా ఉన్నాయి. గత ఏడాది ఇదే సమయానికి ఈ సంఖ్య 5.62 లక్షలుగా ఉండేది. సెప్టెంబర్ త్రైమాసికంలో కొత్త ఇళ్ల అమ్మకాలు కేవలం 3 శాతం మాత్రమే పెరిగి 1,00,220 ఇళ్లు అమ్ముడయ్యాయి. కానీ కొత్తగా మార్కెట్లోకి వచ్చిన ఇళ్ల సంఖ్య 18% పెరిగి 1.14 లక్షలకు చేరింది. అందుకే ఖాళీ ఇళ్ల సంఖ్య అమాంతం పెరిగింది.

హైదరాబాద్ లో అమ్ముడుపోని ఇళ్లు అధికంగా ఉండడంతో ఈ పండుగ సీజన్‌లో భారీ డిస్కౌంట్లు, ఆఫర్లు ఇవ్వడానికి రియల్ ఎస్టేట్ సంస్థలు సిద్ధంగా ఉన్నాయి. కాబట్టి మీరు సొంత ఇల్లు కొనాలనుకుంటే ఈ అవకాశాన్ని వాడుకోవచ్చు. అలాగే రెపో రేటు పెంపు వల్ల బ్యాంకులు హోమ్ లోన్ వడ్డీ రేట్లను పెంచే అవకాశం ఉంది.

ఇళ్ల ధరలు విపరీతంగా పెరగడమే ఇంటి అమ్మకాలు తగ్గడానికి ప్రధాన కారణం. ఉదాహరణకు బెంగళూరులో రెండేళ్ల క్రితం రూ.40-75 లక్షలు ఉన్న 2 BHK ఇళ్ల ధరలు ఇప్పుడు రూ.1 కోటి దాటాయి. చెన్నై, ముంబై, హైదరాబాద్‌లలో కూడా ఇదే పరిస్థితి ఉంది. దీంతో సామాన్యులు ఇల్లు కొనే ఆలోచనను వాయిదా వేసుకుంటున్నారు. హైదరాబాద్ లో కూడా ఇళ్ల ధరలు విపరీతంగా పెరిగిపోవడం వల్ల ఎంతో మంది ఇల్లు కొనే ఆలోచనను పక్కన పెడుతున్నారు.

Vegetable Prices Hike: వంటింట్లో ఉల్లి ఘాటు.. టమాటా హాట్.. పెరుగుతున్న కూరగాయల ధరలు

Mahesh Rajamoni — Mon, 19 Oct 2026 12:31:31 +0530

Vegetable Prices Hike: తెలంగాణలో ఉల్లి, టమాటా సహా నిత్యావసర కూరగాయల ధరలు విపరీతంగా పెరిగాయి. పండుగ వేళ పెరుగుతున్న ఆహార ద్రవ్యోల్బణంతో సామాన్య గృహ బడ్జెట్‌ తలకిందులవుతోంది. అసలు ఎందుకు కూరగాయల ధరలు పెరుగుతున్నాయి?

తెలంగాణలో పండుగ వేళ సామాన్య, మధ్యతరగతి ప్రజలకు బిగ్ షాక్ తగిలింది. మార్కెట్‌లో కూరగాయల ధరలు విపరీతంగా పెరిగిపోయాయి. ఉల్లిపాయలు, టమాటాతో పాటు నిత్యం వాడే దాదాపు అన్ని రకాల కూరగాయల రేట్లు ఆకాశాన్నంటుతున్నాయి. దీంతో ఏది కొనాలన్నా, ఏం తినాలన్నా ప్రజలు తీవ్రంగా భయపడే పరిస్థితి ఏర్పడింది. పండుగ వాతావరణంలో సంతోషంగా ఉండాల్సిన ఇళ్లల్లో, ఇప్పుడు సరుకుల బడ్జెట్ చూసి గృహిణులు ఆందోళన చెందుతున్నారు.

గతంలో వారానికి సరిపడా కూరగాయలు ఒకేసారి కొనుగోలు చేసే వినియోగదారులు, ఇప్పుడు ధరల మోత తట్టుకోలేక కొనుగోళ్లను బాగా తగ్గించేసుకున్నారు. బహిరంగ మార్కెట్లలో ధరలు ఎందుకు ఇలా పెరుగుతున్నాయి? అసలు కారణం ఏంటి?

గడచిన రెండు వారాల్లో హైదరాబాద్ నగరంలో టమాటా ధరలు ఒక్కసారిగా రాకెట్ లా దూసుకెళ్లాయి. గతంలో రోడ్డు పక్కన కిలో రూ. 20కి లభించిన టమాటా, ఇప్పుడు ఏకంగా రూ. 50కి చేరింది. అదే సూపర్ మార్కెట్లలో చూస్తే కిలో ధర రూ. 60 వరకు అమ్ముతున్నారు. అంటే రోడ్డు పక్క మార్కెట్లలో 150 శాతం, సూపర్ మార్కెట్లలో 71 శాతం మేర ధరలు పెరిగాయి. తీవ్రమైన ఎండలు, నీటి కొరత, పంట నష్టం, మార్కెట్లకు సరుకు రాకపోవడమే దీనికి ప్రధాన కారణం.

మరోవైపు ఉల్లిపాయల కథ కూడా అంతే ఉంది. నెల రోజుల క్రితం రూ. 30 ఉన్న ఉల్లి ధర, అక్టోబర్ ప్రారంభానికి రూ. 65 నుంచి రూ. 70కి చేరింది. రైతుబజార్లలో రూ. 45-50కి విక్రయిస్తుండగా, క్విక్-కామర్స్ ప్లాట్‌ఫారమ్‌లలో కిలో రూ. 70 వరకు కోట్ చేస్తున్నారు. మహారాష్ట్ర, ఆంధ్రప్రదేశ్‌లోని కర్నూలు నుంచి ఉల్లి సరఫరా తగ్గిపోవడంతో మలక్‌పేట హోల్‌సేల్ మార్కెట్‌లో జూలైలో క్వింటాల్ ధర రూ. 18,000-20,000 ఉండగా, ఇప్పుడు రూ. 45,000-52,000కు ఎగబాకింది. ఆయా ప్రాంతాల్లో కురిసిన భారీ వర్షాల వల్ల పంట దెబ్బతినడం, గత సీజన్‌లో నష్టాలు రావడంతో రైతులు సాగు తగ్గించడం వల్ల ఈ కొరత ఏర్పడిందని వ్యాపారులు చెబుతున్నారు.

కేవలం ఉల్లి, టమాటా మాత్రమే కాదు, మిగతా కూరగాయల పరిస్థితి కూడా ఇలాగే ఉంది. వంకాయ, బెండకాయ, పచ్చిమిర్చి, కాకరకాయ, బీరకాయ వంటివి కూడా కిలో రూ. 50కి పైగా పలుకుతున్నాయి. సంగారెడ్డి జిల్లా సదాశివపేట వంటి ప్రాంతాల్లో వెల్లుల్లి కిలో రూ. 200, అల్లం రూ. 180, బీన్స్, చిక్కుడు ధరలు రూ. 90 వరకు విక్రయిస్తున్నారు. పచ్చిమిర్చి ధర కిలో రూ. 100 తగ్గడం లేదు. ఆకుకూరల ధరలు కూడా భారీగా పెరిగాయి.

ఇంతకుముందు మార్కెట్‌కు వెళ్తే ఒకేసారి 3 నుంచి 4 కిలోల కూరగాయలు కొనేవారు, ఇప్పుడు కేవలం ఒక కిలో లేదా అరకిలోతో సరిపెట్టుకుంటున్నారు. దానికితోడు ఎండల వల్ల కూరగాయలు త్వరగా కుళ్లిపోతాయనే భయం కూడా ప్రజల్లో ఉంది. వారానికి సరిపడా కూరగాయలు కొనాలంటే రూ. 600 దాటిపోతోందని సామాన్యులు వాపోతున్నారు.

ఈసారి కూరగాయల ఉత్పత్తి తగ్గడానికి ఎల్‌నినో ప్రభావం, వర్షాభావ పరిస్థితులే ముఖ్య కారణం. సరైన వర్షాలు లేక పంట తోటలు ఎండిపోవడం, వచ్చిన కొద్దిపాటి దిగుబడి కూడా అకాల వర్షాలకు దెబ్బతినడంతో మార్కెట్లకు సరఫరా బాగా తగ్గిపోయింది. తెలంగాణలోని నగరాలకు ఇతర రాష్ట్రాలు, సరిహద్దు జిల్లాల నుంచి నిత్యం వందలాది వాహనాల్లో రావాల్సిన సరుకు సగం కూడా రావడం లేదు.

డిమాండ్‌కు తగ్గట్టు సరఫరా లేకపోవడంతో హోల్‌సేల్, రిటైల్ వ్యాపారులు ధరలు పెంచక తప్పడం లేదు. రాబోయే రోజుల్లో ఉత్పత్తి ప్రాంతాల నుంచి సరఫరా మెరుగుపడకపోతే, రేట్లు మరిన్ని రోజులు ఇలాగే మండే అవకాశం ఉందని మార్కెట్ నిపుణులు హెచ్చరిస్తున్నారు.

పెరుగుతున్న ఈ ధరలు మధ్యతరగతి, పేద కుటుంబాలపై కోలుకోలేని దెబ్బ కొడుతున్నాయి. స్టాటిస్టిక్స్ అండ్ ప్రోగ్రామ్ ఇంప్లిమెంటేషన్ మంత్రిత్వ శాఖ అందించిన రిపోర్టు ప్రకారం.. సెప్టెంబర్ 2026 నాటికి దేశంలో రిటైల్ ద్రవ్యోల్బణం 5.54 శాతంగా నమోదు కాగా, ఆహార ద్రవ్యోల్బణం ఏకంగా 7.74 శాతానికి చేరుకుంది.

గత ఏడాదితో పోలిస్తే ఉల్లిపాయలు, వెల్లుల్లి, అల్లం వంటి నిత్యావసరాల ధరలు గణనీయంగా పెరిగాయి. రాబడి మారకపోయినా, వంటింటి ఖర్చులు మాత్రం రెట్టింపు కావడంతో నెలవారీ బడ్జెట్ పూర్తిగా తలకిందులవుతోందని ప్రజలు ఆవేదన వ్యక్తం చేస్తున్నారు. ప్రభుత్వం వెంటనే జోక్యం చేసుకుని రైతుబజార్ల ద్వారా తక్కువ ధరలకే కూరగాయలు అందేలా చర్యలు తీసుకోవాలని కోరుతున్నారు.

మార్కెట్లో కూరగాయల ధరలు రకరకాలుగా పలుకుతున్నాయి. తాజా రిపోర్టుల ప్రకారం, కిలో పెద్ద ఉల్లిపాయల హోల్‌సేల్ ధర రూ. 55 ఉండగా, రిటైల్‌లో రూ. 61 నుంచి రూ. 72 వరకు అమ్ముతున్నారు. అలాగే చిన్న ఉల్లిపాయలు హోల్‌సేల్ రూ. 67, రిటైల్ రూ. 74-87 పలుకుతుండగా, టమాటా హోల్‌సేల్ రూ. 30, రిటైల్ రూ. 33-39 మధ్య ఉంది.

పచ్చిమిర్చి హోల్‌సేల్ రూ. 53 (రిటైల్ రూ. 58-69), బీట్‌రూట్ హోల్‌సేల్ రూ. 33 (రిటైల్ రూ. 36-43), బంగాళాదుంప హోల్‌సేల్ రూ. 31 (రిటైల్ రూ. 34-40) చొప్పున విక్రయిస్తున్నారు. ఇక అరటికాయ హోల్‌సేల్ రూ. 11, తోటకూర హోల్‌సేల్ రూ. 7, అలాగే ఉసిరికాయ హోల్‌సేల్ ధర రూ. 70 (రిటైల్ రూ. 77-91) గా ఉంది.

PM Kisan: పీఎం కిసాన్ 24వ విడత డబ్బులు.. దీపావళికి ముందు గుడ్ న్యూస్.. వెంటనే ఇలా చేయండి

Mahesh Rajamoni — Thu, 22 Oct 2026 08:05:53 +0530

PM Kisan 24th Installment : పీఎం కిసాన్ 24వ విడత కోసం ఎదురుచూస్తున్న రైతులకు గుడ్‌న్యూస్. దీపావళిలోపు డబ్బులు పడే ఛాన్స్ ఉంది. లేటెస్ట్ స్టేటస్ ఇలా చెక్ చేసుకోండి.

దేశంలోని అన్నదాతలు ఇప్పుడు ప్రధాన మంత్రి కిసాన్ సమ్మాన్ నిధి 24వ విడత డబ్బుల కోసం ఎదురుచూస్తున్నారు. సరైన వర్షాల్లేక ఇబ్బందుల్లో ఉన్న కోట్లాది మంది రైతులు ఈ ఆర్థిక సహాయం ఎప్పుడు అందుతుందా అని చూస్తున్నారు. దసరా పండగ అయిపోయింది. ఇప్పుడు దీపావళి పండగ కూడా దగ్గరకు వస్తోంది. అయినా సరే, కేంద్ర వ్యవసాయ మంత్రిత్వ శాఖ నుంచి ఇప్పటివరకు 24వ విడత విడుదల తేదీకి సంబంధించి ఎలాంటి అధికారిక ప్రకటన రాలేదు.

సాధారణంగా కేంద్ర వ్యవసాయ శాఖ తమ అధికారిక వెబ్‌సైట్ ద్వారా అలాగే సోషల్ మీడియాల ద్వారా ఈ నిధుల విడుదల తేదీని ప్రకటిస్తుంది. అంతేకాకుండా, పీఎం కిసాన్ యోజన కోసం ప్రత్యేకంగా కొన్ని సోషల్ మీడియా హ్యాండిల్స్‌ను కూడా ఏర్పాటు చేశారు. వాటి ద్వారా ఎప్పటికప్పుడు తాజా సమాచారాన్ని షేర్ చేస్తుంటారు. వస్తున్న కొన్ని రిపోర్టుల ప్రకారం చూస్తే, రాబోయే కొన్ని రోజుల్లోనే దీనిపై క్లారిటీ వచ్చే అవకాశం ఉందని తెలుస్తోంది.

ఈ ఏడాది దీపావళి పండుగ నవంబర్ 8వ తేదీన రానుంది. ఈ నేపథ్యంలో పండుగకు ముందే రైతుల అకౌంట్లలోకి ఈ 24వ విడత డబ్బులు జమ కావొచ్చని గట్టి అంచనాలు ఉన్నాయి. అయితే, గత సంవత్సరంతో పోలిస్తే సీన్ కొద్దిగా మారవచ్చు. గతేడాది దీపావళి అక్టోబర్ 20న వస్తే, పీఎం కిసాన్ డబ్బులు మాత్రం నవంబర్ 19న విడుదల అయ్యాయి. ఆ సమయంలో ప్రధాని నరేంద్ర మోదీ తమిళనాడులోని కోయంబత్తూరు నుంచి ఈ నిధులను రైతుల ఖాతాలకు విడుదల చేశారు.

మీ ఖాతాలో డబ్బులు పడతాయో లేదో తెలుసుకోవడానికి స్టేటస్ చెక్ చేసుకోవడం చాలా ముఖ్యం. దీనికోసం మీరు కొన్ని సింపుల్ స్టెప్స్ ఫాలో అయితే సరిపోతుంది.

• ముందుగా పీఎం కిసాన్ అధికారిక వెబ్‌సైట్ అయిన pmkisan.gov.in ఓపెన్ చేయాలి.

• ఆ తర్వాత హోమ్‌పేజీలో కనిపించే 'Know your status' ఆప్షన్‌పై క్లిక్ చేయాలి.

• ఆ పేజీలోకి వెళ్లిన తర్వాత మీ రిజిస్ట్రేషన్ నంబర్, అక్కడ కనిపించే సెక్యూరిటీ కోడ్ ఎంటర్ చేయాలి.

• ఆ తర్వాత మీ రిజిస్టర్డ్ మొబైల్ నంబర్‌కు ఒక ఓటీపీ వస్తుంది. ఆ నంబర్‌ను అక్కడ ఎంటర్ చేయాలి.

• చివరగా మీ స్క్రీన్‌పై ఒక కొత్త పేజీ ఓపెన్ అవుతుంది. అందులో మీ విడత డబ్బులకు సంబంధించిన పూర్తి వివరాలు స్పష్టంగా కనిపిస్తాయి.

ప్రభుత్వం నుంచి త్వరలోనే దీనిపై అఫిషియల్ డేట్ రానుందని విశ్లేషకులు చెబుతున్నారు. ఎవరైతే ఈకేవైసీ, భూమికి సంబంధించిన వెరిఫికేషన్ ప్రక్రియ పూర్తి చేసుకున్నారో, ఆ రైతుల ఖాతాల్లోనే డబ్బులు జమ అవుతాయి. ఒకవేళ మీ స్టేటస్‌లో ఏవైనా సమస్యలు ఉంటే వెంటనే సరిచేసుకోవడం మంచిది. దీపావళికి ముందే అన్నదాతల జేబుల్లో డబ్బులు పడితే పండుగ సంబరాలు మరింత ఘనంగా జరుగుతాయని అందరూ ఆశిస్తున్నారు.

Ration Card: రేషన్ కార్డు ఉన్నవారికి గుడ్ న్యూస్.. ఫ్రీ బియ్యంతో పాటు మరో 6 నిత్యావసర సరుకులు

Mahesh Rajamoni — Wed, 21 Oct 2026 08:42:16 +0530

Ration Card: తెలంగాణలో రేషన్ కార్డుదారులకు ప్రభుత్వం గుడ్ న్యూస్ చెప్పింది. బియ్యంతో పాటు గోధుమపిండి, కందిపప్పు, పామాయిల్ వంటి 6 నిత్యావసర సరుకులను సబ్సిడీపై అందించేందుకు సన్నాహాలు చేస్తోంది. ఆ వివరాలు మీకోసం.

ప్రస్తుతం నిత్యావసర వస్తువుల ధరలు ఆకాశాన్నంటుతుండటంతో సామాన్యుల జేబులకు పెద్దఎత్తున చిల్లులు పడుతున్నాయి. మార్కెట్లో రోజురోజుకూ పెరుగుతున్న ధరల భారం పెరుగుతోంది. ఈ నేపథ్యంలో పేద ప్రజలకు భారీ ఊరటనిచ్చేలా తెలంగాణ ప్రభుత్వం ఓ అద్భుతమైన నిర్ణయానికి సిద్ధమవుతోంది.

కేవలం బియ్యం మాత్రమే కాకుండా, రేషన్‌ దుకాణాల ద్వారా ఇతర ముఖ్యమైన కిరాణా సరుకులను కూడా అత్యంత తక్కువ ధరలకే అందించాలని ఆలోచిస్తోంది. అవసరం అయితే, బియ్యంతో ఉచితంగా అందించేందుకు ఉన్న అంశాలను పరిశీలిస్తోంది. ఈ మేరకు పౌరసరఫరాల శాఖ అధికారులు వేగంగా కసరత్తు ప్రారంభించారు.

ప్రజా పంపిణీ వ్యవస్థ ద్వారా పేదలకు గోధుమపిండి, కందిపప్పు, పామాయిల్, చక్కెర, చింతపండు, కారం పొడి లాంటి వస్తువులను సబ్సిడీ రేట్లకు పంపిణీ చేసే అంశాన్ని పౌరసరఫరాల శాఖ పరిశీలిస్తోంది.

సచివాలయంలో పౌరసరఫరాలు, నీటిపారుదల శాఖల మంత్రి ఎన్‌.ఉత్తమ్‌కుమార్‌రెడ్డి ఈ అంశంపై అధికారులతో సుదీర్ఘంగా సమీక్షించారు. మార్కెట్లో విపరీతంగా పెరుగుతున్న ధరల భారాన్ని పేదవాడిపై పడకుండా చూడాలనే బలమైన సంకల్పంతో ఈ కార్యక్రమానికి శ్రీకారం చుట్టేందుకు అవసరమైన అన్ని సన్నాహాలు చేస్తున్నారు.

సబ్సిడీపై సరుకులు అందించాలంటే ముందుగా వాటికి సంబంధించిన సమగ్ర అంచనాలు సిద్ధం చేయాలని మంత్రి ఉన్నతాధికారులను ఆదేశించారు. ఆయా సరుకుల సేకరణ ఎక్కడినుంచి చేపట్టాలి, లబ్ధిదారులకు కుటుంబ సభ్యుల సంఖ్య ఆధారంగా ఎంత పరిమాణంలో అందించాలి, పంపిణీ విధానం ఎలా ఉండాలనే విషయాలపై స్పష్టమైన రిపోర్టులు తయారు చేయాలని కోరారు.

అదేవిధంగా ఈ సరుకుల పంపిణీతో ప్రభుత్వంపై ఏటా ఎంతమేర ఆర్థిక భారం పడుతుందనే లెక్కలు పక్కాగా తీయాలని స్పష్టం చేశారు. అధికారుల ప్రతిపాదనలు పూర్తిగా సిద్ధమైన తర్వాత ప్రభుత్వం తుది నిర్ణయం తీసుకోనుంది. ఉమ్మడి ఆంధ్రప్రదేశ్‌లో అప్పట్లో అమలు చేసిన 'అమ్మహస్తం' తరహాలోనే ఈ పథకాన్ని పునరుద్ధరించే ఆలోచనలో ప్రభుత్వం ఉంది.

ఒకవైపు నిత్యావసరాల పంపిణీపై చర్చిస్తూనే మరోవైపు రాష్ట్రంలో పేదల ఆహార భద్రతపై మంత్రి కీలక సూచనలు చేశారు. రాష్ట్రంలో రేషన్‌ ద్వారా లబ్ధి పొందుతున్న 3.42 కోట్ల మంది ప్రజలకు భవిష్యత్తులో ఎట్టి పరిస్థితుల్లోనూ ఆహార కొరత రాకూడదని తేల్చిచెప్పారు.

అకస్మాత్తుగా వర్షాభావం ఏర్పడి పంటల దిగుబడులు తగ్గినా లేదా ఆహార ధాన్యాల ధరలు అమాంతం పెరిగినా ప్రజాపంపిణీ వ్యవస్థకు ఎలాంటి ఆటంకం కలగకుండా ముందస్తు చర్యలు చేపట్టాలని సూచించారు. కష్టకాలంలోనూ ప్రజలను ఆదుకునేలా ఏకంగా 14 నెలలకు సరిపడా ఆహార ధాన్యాల నిల్వల సమీకరణకు పక్కా ప్రణాళికలు రూపొందిస్తున్నారు.

పసిఫిక్ మహా సముద్రంలో ఏర్పడిన ఎల్‌నినో ప్రభావం తెలంగాణపై గట్టిగా ఉండే అవకాశం ఉందని వాతావరణ నిపుణులు హెచ్చరిస్తున్నారు. 1951 తర్వాత తొలిసారి ఆ స్థాయిలో ఎల్ నినో ఉగ్రరూపం దాల్చినట్టు ఆందోళన వ్యక్తమవుతోంది. ఈ లోటు వర్షపాతం కారణంగా వ్యవసాయ రంగం దెబ్బతిని, సాగు దిగుబడి తగ్గి నిత్యావసర సరుకుల ధరలు విపరీతంగా పెరిగే ప్రమాదం ఉంది.

ఈ విపత్కర పరిస్థితులను సమర్థంగా ఎదుర్కొనేందుకు, డిప్యూటీ సీఎం భట్టి విక్రమార్క నేతృత్వంలో మంత్రివర్గ ఉప-సంఘం కూడా ఏర్పాటయింది. నీటి పొదుపు చర్యలతో పాటు ప్రజలను ఆదుకోవడానికి ప్రభుత్వం ముందస్తుగా పావులు కదుపుతోంది.

రాష్ట్రవ్యాప్తంగా ప్రజాపంపిణీ వ్యవస్థ, ఇతర సంక్షేమ పథకాలు, పాఠశాలల్లో మధ్యాహ్న భోజన పథకం అమలు కోసం ప్రతినెలా 2.38 లక్షల మెట్రిక్‌ టన్నుల బియ్యం అవసరమవుతాయి. పౌరసరఫరాల శాఖ ఆధ్వర్యంలో అక్టోబర్‌ 16 నాటికి బఫర్‌ గోదాముల్లో 9.64 లక్షల మెట్రిక్‌ టన్నుల బియ్యం సురక్షితంగా నిల్వ ఉన్నాయి. దీనికి తోడుగా కస్టమ్ మిల్లింగ్ రైస్, ఇతర మార్గాల ద్వారా మరో 18.39 లక్షల మెట్రిక్‌ టన్నుల బియ్యం ప్రభుత్వానికి రావాల్సి ఉంది.

ఇవన్నీ గోదాములకు చేరితే సర్కారు వద్ద మొత్తం 28.03 లక్షల మెట్రిక్‌ టన్నుల బియ్యం అందుబాటులో ఉంటాయి. ఈ భారీ నిల్వలు సుమారు 11.7 నెలల నుంచి 14 నెలల రాష్ట్ర అవసరాలకు పూర్తిగా సరిపోతాయని అధికారులు లెక్కలు వేశారు. మిల్లర్లు, ఇతర వనరుల నుంచి రావాల్సిన బియ్యం నిర్ణీత గడువులోగా ప్రభుత్వ గోదాములకు చేరేలా కఠిన చర్యలు తీసుకోవాలని మంత్రి ఆదేశించారు.

Holidays : వచ్చే సోమవారం కూడా సెలవే... ఎందుకో తెలుసా?

Arun Kumar P — Thu, 22 Oct 2026 13:29:52 +0530

ఆంధ్ర ప్రదేశ్ లో దసరా సెలవులు ముగిశాయి… తెలంగాణలో ఇవాళ్టితో ముగియనున్నాయి. అయితే పండగ హాలిడేస్ ముగిసినా అక్టోబర్ ఎండింగ్, నవంబర్ నెలల్లో విద్యార్థులు, ఉద్యోగులకు వరుస సెలవులు రాబోతున్నాయి. ఇలా వచ్చే సోమవారం కూడా సెలవుంది… ఎందుకో తెలుసా?

Holidays : తెలుగు విద్యార్థులకే కాదు ఉద్యోగులకు కూడా దసరా పండక్కి బాగానే సెలవులు వచ్చాయి. స్కూళ్ళకు 12, 13 రోజులు సెలవులు వస్తే ఆఫీసులకు మూన్నాలుగు రోజులు హాలిడేస్ వచ్చాయి. ప్రభుత్వ ఉద్యోగులకు అక్టోబర్ 18 నుండి 21 వరకు (బతుకమ్మ, మహర్నవమి, విజయదశమి, దసరా తర్వాతి రోజు) వరుస సెలవులు కలిసివచ్చాయి... ఇవాళ్టి (అక్టోబర్ 22, గురువారం) నుండి ఆఫీసులు తెరుచుకున్నాయి.

ఈ దసరా సెలవుల్లో సొంతూళ్లకు వెళ్లి కుటుంబసభ్యులు, స్నేహితులతో ఎంజాయ్ చేసిన ఉద్యోగులకు సడన్ గా ఆఫీసుకు వెళ్లాల్సిరావడం కాస్త భారంగానే ఉంటుంది. ఇలాంటివారికి ఊరటనిచ్చేలా రాబోయే రోజుల్లో వరుస సెలవులు రాబోతున్నాయి. వచ్చే ఆదివారంతో పాటు సోమవారం (అక్టోబర్ 25, 26) కూడా తెలుగు ఉద్యోగులకు సెలవు ఉంది. సోమవారం సెలవు ఎందుకో తెలుసా?

దసరా హాలిడేస్ ముగిసినా తెలుగు విద్యార్థులు, ఉద్యోగులకు వరుసగా సెలవులు రాబోతున్నాయి. తెలంగాణ ఉద్యోగులకు అక్టోబర్ 18న బతుకమ్మ పండగ సెలవు వచ్చింది... అయితే ఈరోజు ఆదివారం కావడంతో సాధారణ సెలవే వర్తించింది. ఇక అక్టోబర్ 19న మహర్నవమి సంందర్భంగా సెలవు వచ్చింది... అక్టోబర్ 20న దసరా, అక్టోబర్ 21న పండగ తర్వాతిరోజు సెలవులు వచ్చాయి.

ఇవాళ్టి (అక్టోబర్ 22, గురువారం) ఆఫీసులు తెరుచుకున్నాయి... అయితే ఇంకో మూడ్రోజులు మాత్రమే నడవనున్నాయి. మళ్లీ అక్టోబర్ 25న ఆదివారం కాబట్టి వీకెండ్ హాలిడే ఉంటుంది. అయితే అక్టోబర్ 26న (సోమవారం) కూడా ఉద్యోగులకు సెలవు ఉంది.

వచ్చే సోమవారం ముస్లింలు ఎంతో పవిత్రంగా భావించే హజ్రత్ సయ్యద్ మహ్మద్ జువన్పురి మహ్ది జయంతి ఉంది. దీంతో తెలంగాణ ప్రభుత్వం ఉద్యోగులకు ఐచ్చిక సెలవు ప్రకటించింది. అంటే ఉద్యోగులు ఈరోజు అవసరం అనుకుంటే ముందస్తు అనుమతి తీసుకుని వేతనంతో కూడిన సెలవు పొందవచ్చు. ఈ సెలవులు ముస్లిం ఉద్యోగులు ఎక్కువగా తీసుకునే అవకాశం ఉంటుంది.

అక్టోబర్ 26న ఉద్యోగులకు సెలవు ఉంది... కానీ అందరికి కాదు. కేవలం అవసరం అనుకుంటేనే సెలవు తీసుకోవచ్చు.... లేదంటే వర్కింగ్ డేనే. ఇది కేవలం ఉద్యోగులకు మాత్రమే వర్తించే సెలవు... విద్యార్థులకు ఆప్షనల్ హాలిడేస్ వర్తించవు.

దసరా సెలవుల తర్వాత కూడా ఆంధ్ర ప్రదేశ్ విద్యార్థులకు వరుస సెలవులు కొనసాగనున్నాయి. స్థానిక సంస్థల ఎన్నికల సందర్భంగా ఈ సెలవులు రానున్నాయి. మున్సిపల్ ఎన్నికల పోలింగ్ నేపథ్యంలో మున్సిపాలిటీల పరిధిలో పనిచేసే ఉద్యోగులకు అక్టోబర్ 28న సెలవుగా ప్రకటించింది ప్రభుత్వం. అయితే పోలింగ్ కేంద్రాలు ఏర్పాటుచేసే స్కూల్స్ కి అక్టోబర్ 27, 28 సెలవులే... అంటే విద్యార్థులకు వరుసగా రెండ్రోజులు సెలవులు వస్తున్నాయి.

మున్సిపల్ ఎన్నికలు ముగియగానే ఎంపిటిసి, జడ్పిటిసి ఎన్నికలున్నాయి... ఈ పోలింగ్ రోజున కూడా సెలవులుంటాయి. ఇలా నవంబర్ 3న ఉద్యోగులకు సెలవుండే అవకాశాలున్నాయి... విద్యార్థులకు నవంబర్ 2, 3 తేదీల్లో సెలవు ఉండనుంది. నవంబర్ 1 ఆదివారం కాబట్టి పోలింగ్ జరిగే ప్రాంతాల్లోని విద్యార్థులకు మూడ్రోజులు సెలవులు కలిసిరానున్నాయి.

ఇక గ్రామ పంచాయితీ ఎన్నికలు మూడు విడతల్లో జరగనున్నాయి. నవంబర్ 26, 29, డిసెంబర్ 2 న పోలింగ్ జరగనుంది. ఈ రోజుల్లో పోలింగ్ జరిగే గ్రామాల్లో విద్యాసంస్థలకు సెలవు ఉంటుంది. అలాగే ఓటుహక్కు వినియోగించుకునేందుకు ఉద్యోగులకు అవకాశం కల్పించనున్నాయి. ఇలా ఎన్నికల సందర్భంగా ఆంధ్ర ప్రదేశ్ లో వరుస సెలవులు వస్తున్నాయి.

అక్టోబర్ లో సగం పండగ సెలవులే ఉన్నాయి. నవంబర్ లో కూడా దీపావళి వంటి పెద్ద పండగలున్నాయి... దీంతో సెలవులు రానున్నాయి. దీపావళి పండగ (నవంబర్ 08) ఆదివారం రోజు వస్తోంది... అంటే అధికారిక సెలవు మిస్ అయినట్లే. ఇక నవంబర్ 24న (మంగళవారం) కార్తీక పౌర్ణమి/ గురునానక్ జయంతి సందర్భంగా సెలవు ఉంది. ఇలా రెండో శనివారం, ఆదివారాలు, పండగ సెలవులు కలిసి నవంబర్ లోనూ బాగానే సెలవులు రాబోతున్నాయి.

Voter Registration Drive: ఓటర్లకు బిగ్ అలర్ట్.. వెంటనే ఇలా చేయండి

Mahesh Rajamoni — Thu, 15 Oct 2026 12:20:44 +0530

Voter Registration Drive: ఎన్నికల సంఘం తెలంగాణ ఓటర్లకు బిగ్ అలర్ట్ ఇచ్చింది. కొత్త ఓటర్ల నమోదు, జాబితా సవరణ కోసం అన్ని పోలింగ్ కేంద్రాల్లో ప్రత్యేక శిబిరాలు నిర్వహిస్తున్నారు. అర్హులు ఈ అవకాశాన్ని సద్వినియోగం చేసుకోవాలని ఎన్నికల సంఘం సూచించింది.

ప్రజాస్వామ్య వ్యవస్థలో ఓటు హక్కు ఎంత విలువైనదో ప్రత్యేకంగా చెప్పనవసరం లేదు. దేశ భవితను మార్చే శక్తి ఒక్కో పౌరుడి ఓటుకు ఉంటుంది. ఈ నేపథ్యంలోనే తెలంగాణలోని అర్హులైన ప్రతి ఒక్కరికీ ఓటు హక్కు కల్పించేందుకు భారత ఎన్నికల సంఘం (ECI) మరో కీలక నిర్ణయం తీసుకుంది.

రాష్ట్రవ్యాప్తంగా కొనసాగుతున్న ప్రత్యేక ఇంటెన్సివ్ రివిజన్ (SIR) ప్రక్రియలో భాగంగా, ఇవాళ, రేపు (అక్టోబర్ 15, 16 తేదీల్లో) రాష్ట్రంలోని అన్ని పోలింగ్ స్టేషన్లలో ప్రత్యేక శిబిరాలు ఏర్పాటు చేశారు. ఈ రెండు రోజుల పాటు బూత్ స్థాయి అధికారులు ఉదయం నుంచి సాయంత్రం వరకు అందుబాటులో ఉండనున్నారు.

కొత్తగా 18 సంవత్సరాలు నిండిన యువతీ యువకులు, ఇప్పటివరకు ఓటరు జాబితాలో పేరు లేని ప్రతి ఒక్కరూ ఈ ప్రత్యేక అవకాశాన్ని సద్వినియోగం చేసుకోవచ్చు. పోలింగ్ కేంద్రాలకు నేరుగా వెళ్లి 'ఫారం-6' దరఖాస్తును పూర్తి చేసి, అవసరమైన ధ్రువీకరణ పత్రాలతో పాటు బీఎల్‌వోలకు అందజేయాలి. ఆన్‌లైన్ ద్వారా నేరుగా వెళ్లలేని వారు ఆఫ్‌లైన్‌లో కూడా ఈ ఫారాన్ని పొంది సమర్పించవచ్చు. ఇప్పటివరకు రాష్ట్రంలో ఫారం-6 ద్వారా లక్షలాది మంది యువత కొత్త ఓటరు నమోదుకు దరఖాస్తు చేసుకోవడం విశేషం.

కేవలం కొత్త ఓట్ల నమోదు మాత్రమే కాకుండా, ఇప్పటికే ఓటరు జాబితాలో పేరు ఉన్నప్పటికీ వివరాలలో తప్పులు ఉన్నవారు వాటిని సరిదిద్దుకోవడానికి అవకాశం కల్పించారు. ఓటర్ ఐడీ కార్డులో పేరు, వయస్సు, ఫొటో, చిరునామా, తండ్రి లేదా భర్త పేర్లలో ఏవైనా మార్పులు ఉంటే 'ఫారం-8' ద్వారా దరఖాస్తు చేసుకోవచ్చు. ఇప్పటికే ఈ ఫారం ద్వారా లక్షలాది దరఖాస్తులు రాగా, అధికారులు అనేక దరఖాస్తులను పరిశీలించి ఆమోదించారు. అలాగే ఓటర్ల జాబితా నుంచి పేర్ల తొలగింపు, అభ్యంతరాల కోసం ఫారం-7 దరఖాస్తులు కూడా భారీ సంఖ్యలో స్వీకరించారు.

మరోవైపు మహబూబ్‌నగర్ - రంగారెడ్డి - హైదరాబాద్, అలాగే వరంగల్ - ఖమ్మం - నల్గొండ పట్టభద్రుల (గ్రాడ్యుయేట్) ఎమ్మెల్సీ నియోజకవర్గాల ఓటర్ల నమోదు ప్రక్రియ కూడా వేగంగా కొనసాగుతోంది. 2023 అక్టోబర్ 31 నాటికి గుర్తింపు పొందిన యూనివర్సిటీ నుంచి డిగ్రీ లేదా అంతకంటే ఎక్కువ చదువు పూర్తి చేసిన అర్హులైన పట్టభద్రులు 'ఫారం-18' ద్వారా నవంబర్ 6వ తేదీ వరకు దరఖాస్తు చేసుకోవచ్చు. దరఖాస్తు సమయంలో ఒరిజినల్ ఎడ్యుకేషన్ సర్టిఫికెట్లు లేదా గెజిటెడ్ అధికారి అటెస్టేషన్ చేసిన పత్రాలను చూపించాల్సి ఉంటుంది. ఒక వ్యక్తి రెండు వేర్వేరు ప్రాంతాల్లో ఓటు కలిగి ఉండటానికి నిబంధనల ప్రకారం ఎలాంటి అవకాశం లేదు.

ఎన్నికల సంఘం షెడ్యూల్ ప్రకారం, క్షేత్రస్థాయిలో పరిశీలన పూర్తి చేసిన తర్వాత నవంబర్ 25వ తేదీన ఓటర్ల ముసాయిదా జాబితాను విడుదల చేయనున్నారు. ఆ తర్వాత వచ్చే అభ్యంతరాలు, సవరణలను పరిశీలించి, డిసెంబర్ 30వ తేదీన తుది ఓటర్ల జాబితాను అధికారికంగా ప్రకటించనున్నారు. ప్రజలందరూ తమ పేర్లు ఓటర్ల జాబితాలో సరిగ్గా ఉన్నాయో లేదో ఈ ప్రత్యేక శిబిరాల ద్వారా లేదా స్థానిక బీఎల్‌వోలను సంప్రదించి నిర్ధారించుకోవాలని ఎన్నికల సంఘం కోరుతోంది.

నిరుద్యోగులకు గుడ్‌న్యూస్.. అసిస్టెంట్ ప్రొఫెసర్ పోస్టుల భర్తీకి ప్ర‌భుత్వం గ్రీన్ సిగ్నల్

Narender Vaitla — Sun, 18 Oct 2026 21:10:16 +0530

Jobs: తెలంగాణలో ప్రభుత్వ ఉద్యోగాల కోసం ఎదురుచూస్తున్న నిరుద్యోగులకు రాష్ట్ర ప్రభుత్వం శుభవార్త తెలిపింది. రాష్ట్రంలోని విశ్వవిద్యాలయాల్లో ఖాళీగా ఉన్న అసిస్టెంట్ ప్రొఫెసర్ పోస్టుల భర్తీకి సీఎం రేవంత్‌రెడ్డి ప్రభుత్వం ఆమోదం తెలిపింది.

రాష్ట్రంలోని విశ్వవిద్యాలయాల్లో బోధనా సిబ్బంది కొరతను తగ్గించడంతో పాటు ఉన్నత విద్యా వ్యవస్థను మరింత బలోపేతం చేసే దిశగా ప్రభుత్వం ఈ నిర్ణయం తీసుకుంది. మొత్తం 429 అసిస్టెంట్ ప్రొఫెసర్ పోస్టులను ప్రత్యక్ష నియామకాల ద్వారా భర్తీ చేయనున్నారు. ఈ నిర్ణయంతో ఉన్నత విద్యారంగంలో ఉద్యోగ అవకాశాల కోసం ఎదురుచూస్తున్న అభ్యర్థులకు అవకాశం లభించనుంది.

తొలి విడతలో భాగంగా రాష్ట్రంలోని పలు విశ్వవిద్యాలయాలకు పోస్టులను కేటాయించారు. వీటిలో ఉస్మానియా యూనివర్సిటీలో అత్యధికంగా 252 పోస్టులను భర్తీ చేయనున్నారు. మిగిలిన పోస్టుల వివరాలు ఇలా ఉన్నాయి.

* ఉస్మానియా యూనివర్సిటీ: 252 పోస్టులు

* కాకతీయ యూనివర్సిటీ: 49 పోస్టులు

* శాతవాహన యూనివర్సిటీ: 49 పోస్టులు

* పాలమూరు యూనివర్సిటీ: 45 పోస్టులు

* అంబేడ్కర్ ఓపెన్ యూనివర్సిటీ: 16 పోస్టులు

* తెలుగు యూనివర్సిటీ: 16 పోస్టులు

* తెలంగాణ యూనివర్సిటీ: 2 పోస్టులు

ఈ పోస్టులన్నింటినీ కలిపి మొత్తం 429 అసిస్టెంట్ ప్రొఫెసర్ నియామకాలు చేపట్టనున్నారు. యూనివర్సిటీల వారీగా ఖాళీల భర్తీ పూర్తయితే ఆయా విద్యాసంస్థల్లో బోధనా కార్యకలాపాలకు మరింత తోడ్పాటు లభించే అవకాశం ఉంది.

అసిస్టెంట్ ప్రొఫెసర్ పోస్టుల భర్తీకి సంబంధించి నియామక ప్రకటనలను విడుదల చేసేందుకు వెంటనే చర్యలు చేపట్టాలని రాష్ట్ర ప్రభుత్వం ఆదేశించింది. దీంతో తదుపరి దశలో నోటిఫికేషన్ల జారీ, అర్హతలు, దరఖాస్తుల స్వీకరణ, ఎంపిక విధానం వంటి అంశాలపై స్పష్టత వచ్చే అవకాశం ఉంది. అయితే దరఖాస్తుల ప్రారంభ తేదీలు, విద్యార్హతలు, వయోపరిమితి, ఎంపిక ప్రక్రియకు సంబంధించిన పూర్తి వివరాలు అధికారిక ప్రకటనల్లో వెల్లడికావాల్సి ఉంది.

Hyderabad : హైదరాబాద్‌లో అంతరిక్షం నుండి కనిపించేంత భారీ చెత్తకొండలా..! ఎక్కడున్నాయో తెలుసా?

Arun Kumar P — Fri, 16 Oct 2026 11:54:26 +0530

హైదరాబాద్ అనగానే అభివృద్ధిలో జెట్ స్పీడ్ తో దూసుకుపోతున్న హైటెక్ సిటీ, గచ్చిబౌలి వంటి ప్రాంతాలు గుర్తుకువస్తాయి. కానీ నగరానికి మరోవైపు అంతరిక్షం నుండి కనిపించేంత పెద్ద చెత్తకొండలు ఉన్నాయని తెెలుసా?

హైదరాబాద్‌లో ఆకాశహర్మ్యాలు, ఐటీ కంపెనీలు, ఔటర్ రింగ్ రోడ్డు మాత్రమే కాదు.. నగరానికి మరోవైపు భారీ చెత్తకొండలు కూడా దాగివున్నాయి. నగరంలో ప్రతిరోజూ ఉత్పత్తయ్యే చెత్తను దశాబ్దాలుగా ఒకే ప్రాంతంలో వేస్తున్నారు... దీంతో వేల టన్నుల చెత్త కొండల మాదిరిగా పేరుకుపోయింది. ఇలా చెత్తకొండలతో దుర్గంధాన్ని వెదజల్లుతూ పూర్తిగా కాలుష్యభరితమైన ప్రదేశమే జవహర్‌నగర్‌ డంప్‌యార్డ్‌.

జవహర్ నగర్ లో పోగుపడిన వ్యర్థాలు కొండలను తలపిస్తుండగా, వాటి నుంచి వెలువడే మీథేన్‌ వాయువు పర్యావరణంపై ఆందోళన కలిగిస్తోంది. అంతరిక్షం నుంచి కూడా ఈ చెత్త ప్రాంతం కనిపిస్తుందంటేనే పరిస్థితిని అర్థం చేసుకోవచ్చు. ఈ డంప్ యార్డ్ కారణంగా చుట్టుపక్కల ప్రాంతాల్లో వాతావరమే కాదు భూమిలోపలి జలాలు కూడా కలుషితం అవుతున్నాయి. అసలు ఈ డంప్‌యార్డ్‌ ఎక్కడ ఉంది? ఇక్కడ ఎంత చెత్త పేరుకుపోయింది? పర్యావరణానికి ఎలాంటి ముప్పు ఉంది? అనే విషయాలను తెలుసుకుందాం.

హైదరాబాద్‌ శివారులోని మేడ్చల్‌–మల్కాజిగిరి జిల్లాలోని జవహర్‌నగర్‌ ప్రాంతంలో ఈ డంప్‌యార్డ్‌ ఉంది. హైదరాబాద్‌, సికింద్రాబాద్‌ జంట నగరాల నుంచి ప్రతిరోజు సేకరించే చెత్తలో భారీ భాగాన్ని ఇక్కడకే తరలిస్తారు. దశాబ్దాలుగా (దాదాపు 30 ఏళ్లుగా) నగరంలోని వ్యర్థాలన్నీ చేరుతుండటంతో ఈ ప్రాంతంలో భారీగా చెత్త పేరుకుపోయింది. విస్తీర్ణం, వ్యర్థాల పరిమాణం కారణంగా ఇది నగరంలోని ప్రధాన పర్యావరణ సమస్యల్లో ఒకటిగా మారింది.

అందుబాటులో ఉన్న వివరాల ప్రకారం... జవహర్‌నగర్‌ డంప్‌యార్డ్‌ సుమారు 340 ఎకరాల్లో విస్తరించి ఉంది. ఇక్కడికి ప్రతిరోజు దాదాపు 8,100 టన్నుల చెత్త చేరుతుందని అంచనా. అంటే సగటున ప్రతి 10 సెకన్లకు ఒక టన్ను చెత్త వస్తుందన్నమాట. ఇంత పెద్ద మొత్తంలో వ్యర్థాలు నిరంతరం పేరుకుపోవడంతో చెత్త గుట్టలుగుట్టలుగా, భారీ కొండల మాదిరిగా కనిపిస్తాయి.

ప్రపంచవ్యాప్తంగా చెత్త డంప్‌యార్డుల నుంచి వెలువడే మీథేన్‌ ఉద్గారాలను ఉపగ్రహాల సాయంతో పరిశీలిస్తున్నారు. ఈ నేపథ్యంలో హైదరాబాద్‌లోని జవహర్‌నగర్‌ డంప్‌యార్డ్‌ కూడా చర్చలోకి వచ్చింది. కొన్ని రిపోర్ట్స్ లో మీథేన్‌ ఉద్గారాల పరంగా ఇది ప్రపంచంలోని ప్రధాన చెత్త నిల్వ కేంద్రాల్లో ఒకటిగా పేర్కొంటున్నారు. అర్జెంటినా, జకార్తా, కౌలాలంపూర్ లోని డంప్ యార్ట్స్ తర్వాత స్థానం హైదరాబాద్ దే... అంటే ప్రపంచంలో నాలుగోస్థానం అన్నమాట. ఇండియాలో అయితే ఇదే టాప్.

మీథేన్‌ విడుదలతో పర్యావరణానికి ముప్పు

చెత్తలోని ఆహార వ్యర్థాలు, ఇతర సేంద్రియ పదార్థాలు కుళ్లినప్పుడు మీథేన్‌ వంటి వాయువులు విడుదలవుతాయి. మీథేన్‌ శక్తివంతమైన గ్రీన్‌హౌస్‌ వాయువు కావడంతో వాతావరణ మార్పులకు కారణమవుతుంది. డంప్‌యార్డ్‌లో వ్యర్థాల నిర్వహణ సరిగా లేకపోతే దుర్వాసన, గాలి కాలుష్యం, మంటలు చెలరేగే ప్రమాదం వంటి సమస్యలు కూడా తలెత్తవచ్చు. జవహర్‌నగర్‌ డంప్‌యార్డ్‌ నుంచి గంటకు సుమారు 5.9 టన్నుల మీథేన్‌ విడుదలవుతోందని కొన్ని రిపోర్ట్స్ పేర్కొంటున్నాయి… ఇది చాలా ప్రమాదకరమైన విషయం.

జవహర్‌నగర్‌తో పాటు దమ్మాయిగూడ, నాగారం వంటి సమీప ప్రాంతాల్లో నివసించే ప్రజలకు భూగర్భ జలాల నాణ్యతపై ఆందోళన నెలకొంది. చెత్త నుంచి వెలువడే కలుషిత ద్రవం (లీచేట్‌) భూమిలోకి ఇంకి భూగర్భ జలాలు కలుషితం అవుతున్నాయి. అయితే ఆయా ప్రాంతాల్లో నీరు కలుషితమైందని నిర్ధారించాలంటే బోరు నీటి నమూనాలను సేకరించి ప్రయోగశాలల్లో పరీక్షించాలి.

మొత్తంగా.. జవహర్‌నగర్‌ డంప్‌యార్డ్‌ హైదరాబాద్‌ వ్యర్థాల నిర్వహణలో కీలకమైన ప్రదేశం. ఇక్కడ పేరుకుపోతున్న చెత్తను శాస్త్రీయంగా నిర్వహించడం, మీథేన్‌ ఉద్గారాలను నియంత్రించడం, పరిసర ప్రాంతాల్లో భూగర్భ జలాల నాణ్యతను క్రమం తప్పకుండా పరీక్షించడం ఎంతో ముఖ్యం.

School Holidays : తెలుగు స్టూడెంట్స్ కి సెలవులే సెలవులు... దసరా తర్వాత కూడా పదిరోజుల హాలిడేస్

Arun Kumar P — Wed, 21 Oct 2026 11:43:08 +0530

దసరా హాలిడేస్ తర్వాత కూడా తెలుగు విద్యార్థులకు వరుస సెలవులు రాబోతున్నాయి. ఇలా ఆంధ్ర ప్రదేశ్, తెలంగాణ స్కూళ్లకి ఏఏ రోజుల్లో, ఎందుకు సెలవులు వస్తున్నాయో ఇక్కడ తెలుసుకుందాం.

దసరా వేడుకలు ముగిశాయి... దీంతో ఇక విద్యాసంస్థలకు సెలవులు కూడా ముగియనున్నాయి. పాఠశాలలు తిరిగి ప్రారంభమయ్యే సమయం ఆసన్నమైంది... ఇక విద్యార్థులు బడిబాట పట్టాల్సి ఉంటుంది. దాదాపు 12-13 రోజుల దసరా హాలిడేస్ ని ఎంజాయ్ చేసిన విద్యార్థులను ఒక్కసారిగా స్కూల్ కి వెళ్లమంటే బాధగానే ఉంటుంది. ఇలాంటి పిల్లలకు ఊరటనిచ్చేలా తెలుగు రాష్ట్రాల్లో వరుస సెలవులు వచ్చే అవకాశం కనిపిస్తోంది.

వీకెండ్ తో తెలంగాణలో, స్థానిక సంస్థల ఎన్నికలతో ఆంధ్ర ప్రదేశ్ లో పలు విద్యాసంస్థలకు ప్రత్యేక సెలవులు రాబోతున్నాయి. ఏపీలో మున్సిపల్ ఎన్నికలతో పాటు ఎంపీటీసీ, జెడ్పీటీసీ, గ్రామ పంచాయతీ ఎన్నికలు కూడా జరగనున్నాయి... పోలింగ్ కేంద్రాలుగా ఎంపికైన పాఠశాలలకు ఆయా తేదీల్లో సెలవులు వర్తించనున్నాయి. మరోవైపు తెలంగాణలో దసరా సెలవులు అక్టోబర్ 22తో ముగియనుండగా, కొన్ని పాఠశాలల విద్యార్థులకు వారాంతపు సెలవులు కలిసిరానున్నాయి. ఇలా ఏపీలో ఎన్నికల కారణంగా ఎప్పుడెప్పుడు సెలవులు వస్తాయి? తెలంగాణ విద్యార్థులకు ఎన్ని రోజులు విరామం లభించనుంది? వివరంగా తెలుసుకుందాం.

ఆంధ్రప్రదేశ్‌లో మున్సిపల్ ఎన్నికల ప్రక్రియ కొనసాగుతోంది… అక్టోబర్ 28న పోలింగ్ జరగనుంది. ఈ ఎన్నికల కోసం పలు పాఠశాలలు, విద్యాసంస్థలను పోలింగ్ కేంద్రాలుగా ఉపయోగించనున్నారు. దీంతో ఎన్నికల ఏర్పాట్లు, పోలింగ్ నిర్వహణకు వీలుగా ఆయా విద్యాసంస్థలకు అక్టోబర్ 27, 28 తేదీల్లో రెండు రోజుల పాటు సెలవులు ఇస్తున్నారు. ఈ మేరకు ప్రభుత్వం నుండి సెలవుల ప్రకటన కూడా వచ్చింది.

అయితే ఈ సెలవులు రాష్ట్రంలోని అన్ని పాఠశాలలకు వర్తిస్తాయని భావించకూడదు. పోలింగ్ కేంద్రాలుగా ఎంపికైన విద్యాసంస్థలకు మాత్రమే సంబంధిత ఆదేశాల ప్రకారం సెలవులు వర్తిస్తాయి. మరోవైపు ఉద్యోగులు తమ ఓటు హక్కును వినియోగించుకునేందుకు పోలింగ్ రోజైన అక్టోబర్ 28న సెలవు కల్పించనున్నారు.

గ్రామీణ ప్రాంతాల్లో స్థానిక సంస్థల ఎన్నికల ప్రక్రియ కూడా కొనసాగనుంది. ఎంపీటీసీ, జెడ్పీటీసీ ఎన్నికలకు అక్టోబర్ 20 నుంచి 23 వరకు నామినేషన్లు స్వీకరించనున్నారు. అక్టోబర్ 24న నామినేషన్ల పరిశీలన, అక్టోబర్ 27న నామినేషన్ల ఉపసంహరణ ప్రక్రియ ఉంటుంది. ఈ ఎన్నికలకు నవంబర్ 3న పోలింగ్ నిర్వహించనుండగా, నవంబర్ 5న ఓట్ల లెక్కింపు చేపట్టి ఫలితాలను ప్రకటించనున్నారు.

అయితే ఎన్నికల ఏర్పాట్లలో భాగంగా పోలింగ్ కేంద్రాలుగా ఎంపికైన ప్రభుత్వ కార్యాలయాలు, విద్యాసంస్థల్లో నవంబర్ 2న సెలవు ఇవ్వనున్నారు. ముందురోజు ఎన్నికల సామగ్రిని తరలించడం, ఇతర ఏర్పాట్లు చేయడం ఇందుకు కారణం.

నవంబర్ 3న పోలింగ్ జరిగే ప్రాంతాల్లో ఎన్నికల నిర్వహణకు సంబంధించిన నిబంధనల ప్రకారం సెలవులు వర్తిస్తాయి. నవంబర్ 1 ఆదివారం కావడంతో కొందరికి వరుసగా మూడు రోజుల విరామం లభించే అవకాశం ఉంది.

ఆంధ్రప్రదేశ్‌లో గ్రామ పంచాయతీ ఎన్నికలు మూడు విడతల్లో నిర్వహించనున్నారు. షెడ్యూల్ ప్రకారం మొదటి విడత పోలింగ్ నవంబర్ 26న, రెండో విడత నవంబర్ 29న, మూడో విడత డిసెంబర్ 2న జరగనుంది. ఈ ఎన్నికల నిర్వహణ కోసం కూడా పాఠశాలలను పోలింగ్ కేంద్రాలుగా ఉపయోగించే అవకాశం ఉంది. దీంతో ఎన్నికలు జరిగే గ్రామాల్లో పోలింగ్ కేంద్రాలుగా ఎంపికైన విద్యాసంస్థలకు సెలవులు వచ్చే అవకాశం ఉంటుంది. పోలింగ్‌కు ముందు ఏర్పాట్లు, పోలింగ్ రోజు నిర్వహణను బట్టి సంబంధిత తేదీల్లో సెలవులు ప్రకటించవచ్చు.

మూడు విడతల ఎన్నికలు వేర్వేరు తేదీల్లో జరగనున్నందున, ఆయా ప్రాంతాల్లోని విద్యార్థులకు వేర్వేరు సమయాల్లో సెలవులు రావచ్చు. ఈ విధంగా మున్సిపల్, ఎంపీటీసీ, జెడ్పీటీసీ, గ్రామ పంచాయతీ ఎన్నికల కారణంగా నవంబర్ వరకు పలు విద్యాసంస్థలకు విడతలవారీగా సెలవులు వచ్చే అవకాశం ఉంది. అయితే అన్ని పాఠశాలలకు సెలవులు ఉంటాయని భావించకుండా, సంబంధిత పాఠశాలలకు జారీ చేసే అధికారిక ఉత్తర్వులను పరిశీలించాలి.

తెలంగాణలో పాఠశాలలకు దసరా సెలవులు అక్టోబర్ 22 వరకు కొనసాగనున్నాయి. అక్టోబర్ 23, శుక్రవారం నుంచి విద్యాసంస్థలు తిరిగి ప్రారంభం కావాల్సి ఉంది. అయితే కొన్ని పాఠశాలలకు శనివారం, ఆదివారం సాధారణ సెలవులు ఉంటాయి. ఇలాంటి స్కూల్స్ విద్యార్థులు శుక్రవారం ఒక్కరోజు కవర్ చేస్తే మరో మూడ్రోజుల సెలవులు కలిసివస్తాయి. అక్టోబర్ 23,24,25 మూడ్రోజులు దసరా హాలిడేస్ లో కలిసిపోతాయి... అక్టోబర్ 26 (సోమవారం) నుండి స్కూళ్లకు వెళ్లవచ్చు.

అయితే ఈ మూడ్రోజుల (అక్టోబర్ 23,24,25) సెలవులు అందరికీ వర్తించవు. ప్రభుత్వ, ప్రైవేట్ పాఠశాలలు అక్టోబర్ 23న పున:ప్రారంభం కానున్నాయి... రెండ్రోజులు కొనసాగాక (శుక్ర, శనివారం) ఆదివారం సెలవు వస్తుంది. కానీ ఎక్కువమంది విద్యార్థులు అక్టోబర్ 26 (సోమవారం) నుండే స్కూల్ బాట పట్టే అవకాశాలున్నాయి.

సెలవులపై విద్యార్థులు ఏం గుర్తుంచుకోవాలి?

ఆంధ్రప్రదేశ్‌లో స్థానిక సంస్థల ఎన్నికల కారణంగా పోలింగ్ కేంద్రాలుగా ఎంపికైన విద్యాసంస్థలకు మాత్రమే సంబంధిత తేదీల్లో ప్రత్యేక సెలవులు వర్తిస్తాయి. మున్సిపల్ ఎన్నికల పోలింగ్ అక్టోబర్ 28న, ఎంపీటీసీ, జెడ్పీటీసీ ఎన్నికల పోలింగ్ నవంబర్ 3న జరగనున్నాయి. గ్రామ పంచాయతీ ఎన్నికలు నవంబర్ 26, 29, డిసెంబర్ 2 తేదీల్లో మూడు విడతలుగా నిర్వహించనున్నారు.

తెలంగాణలో మాత్రం దసరా సెలవుల అనంతరం అక్టోబర్ 23 నుంచి పాఠశాలలు తిరిగి ప్రారంభం కానున్నాయి. వారాంతపు సెలవులు కలిసివచ్చే విద్యార్థులకు అక్టోబర్ 23 నుంచి 25 వరకు మూడు రోజుల విరామం లభించవచ్చు. సెలవుల విషయంలో గందరగోళం లేకుండా విద్యార్థులు, తల్లిదండ్రులు తమ పాఠశాల యాజమాన్యం నుంచి వచ్చే సమాచారం, సంబంధిత ప్రభుత్వ ఉత్తర్వులను పరిశీలించడం మంచిది.