Asianet News Telugu

Srivari naivedyam: శ్రీవారికి సుప్రభాత సేవ నుంచి రాత్రి ఏకాంత సేవ వరకు ఎన్ని నైవేద్యాలు పెడతారో తెలుసా?

Nandini Arava — Sat, 26 Sep 2026 16:17:35 +0530

TTD: తిరుమల శ్రీవారిని దర్శించుకునేందుకు భక్తులు తరలివస్తుంటారు. స్వామి వారికి సమర్పించే లడ్డూ ప్రసాదం అందరికీ తెలుసు. స్వామివారికి అనునిత్యం నైవేద్యాలు పెడతారు. కానీ సుప్రభాత సేవ నుంచి రాత్రి ఏకాంత సేవ వరకూ ఎన్ని నైవేద్యాలు సమర్పిస్తారో తెలుసా?

తిరుమల ఆలయంలో నైవేద్య సమర్పణకు ఎంతో ప్రాధాన్యం ఉంది. వైఖానస ఆగమ సంప్రదాయం ప్రకారం నిర్ణీత సమయాల్లో వివిధ రకాల అన్న ప్రసాదాలు, పిండి వంటలు శ్రీవారికి నివేదిస్తారు. ఉదయం నైవేద్యం, మధ్యాహ్నం రాజభోగం, రాత్రి శయన భోగం సందర్భాల్లో ఈ నైవేద్య కైంకర్యం జరుగుతుంది. ఏకంగా 45 రకాల నైవేద్యాలను స్వామివారికి సమర్పిస్తారు.

ప్రసాదాలను వరుస క్రమంలో చూసుకుంటే గోక్షీరం, నవనీతం, ప్రాతఃకాల ఆరాధనలో భాగంగా స్వామివారికి శుద్ధాన్నం, మాతృప్రసాదం, చక్రపొంగలి, పొంగలి, కదంబం, పులిహోర.

రెండో గంట నైవేద్యంలో క్షీరాన్నం పెడతారు. తర్వాత ప్రత్యేక పర్వదినాల్లో స్వామివారికి క్షీరాన్నం, వడ, అప్పం, జిలేబీ, మురుకు, పాయసం, వడపప్పు, పానకం..ఇలా రకరకాల ప్రసాదాలు పెడతారు.

కల్యాణమహోత్సవాలు, కొన్ని ఇతర ప్రత్యేక సందర్భాల్లో చక్కెర, జీడిపప్పు, యాలకులు కలిపిన ప్రసాదం పెడతారు. పెద్దలడ్డూ, దోశ, కదంబం, అప్పం, క్షీరాన్నం, వడ, దద్యోదనం పెడతారు. సుప్రభాత సేవలో గోక్షీరం, నవనీతం సమర్పిస్తారు. అనంతరం జరిగే కొలువులో నువ్వుల పొడి, బెల్లంపొడి, సొంటి కలిపిన మిశ్రమాన్ని పెడతారు.

ప్రాతఃకాల ఆరాధనలో భాగంగా అన్నప్రసాదాలు, పణ్యారాలు సమర్పిస్తారు. అన్న ప్రసాదాల్లో శుద్ధాన్నం, పెరుగన్నం, లడ్డూ గర్భాలయంలో పెడతారు. ముద్గాన్నం, తింత్రిణీరసాన్నం, దధ్యోదనం, గుడాన్నం, మిరియాల పొంగల, శాకాన్నం వంటి రకాలు ఉంటాయి. వీటిలో ముద్గాన్నం అంటే నెయ్యి పొంగలి, తింత్రిణీరసాన్నం అంటే పులిహోర, దధ్యోదనం అంటే పెరుగన్నం. గుడాన్నం బెల్లంతో తయారు చేసే అన్నం కాగా, శాకాన్నం కూరగాయలతో తయారు చేసే అన్నం.

ఇవే ప్రసాదాలను బ్రహ్మోత్సవాల్లో రెండింతలు ఎక్కువ చేసి పెడతారు. రెండో అర్చన తర్వాత షీరా, పొంగలి, పులిహోర పెడతారు.

ఉంజల్ సేవలో చక్కెర, జీడిపప్పు, యాలకులు, కొబ్బరి పొడి కలిపిన నైవేద్యం పెడతారు. సాయంత్రం సహస్ర దీపాలంకరణ సేవలో ఇదే నైవేద్యం పెడతారు. రాత్రి సేవలో శుద్ధానం, దద్యోదనం, కదంబం, ములహోర, పొంగలి, దోశే పెడతారు. అర్థరాత్రి నైవేద్యంలో బెల్లం పొంగలి పెడతారు. ఏకాంత సేవలో జీడిపప్పు, ద్రాక్ష, కలకండ, బాదంపప్పు కలిపిన మిశ్రమం పెడతారు. రకరకాల పండ్లు, గో క్షీరం పెడతారు.

Vastu Plants: మనీ ప్లాంట్ ఒక్కటే కాదు.. ఇంట్లో ఈ మొక్కలున్నా అదృష్టమే!

Kavitha G — Mon, 27 Jul 2026 14:40:27 +0530

Vastu Plants: వాస్తు ప్రకారం కొన్ని మొక్కలను ఇంట్లో పెంచుకుంటే సుఖ సంతోషాలు, సిరి సంపదలు వెల్లివిరుస్తాయి. ఇంట్లో డబ్బుకు లోటు రావద్దంటే మనీ ప్లాంట్ తో పాటు పెంచాల్సిన కొన్ని మొక్కలున్నాయి. అవేంటో చూద్దాం.

Monday Facts: సోమవారానికి ఆ పేరు ఎలా వచ్చింది? ఆరోజు శివుడినే ఎందుకు పూజించాలి?

Nandini Arava — Tue, 14 Jul 2026 16:06:08 +0530

Monday Facts: వారానికి ఉన్న 7 రోజుల్లో సోమవారానికి చాలా ప్రాముఖ్యత ఉంది. ఈ రోజున పరమశివుడిని దర్శించుకుని ప్రత్యేక పూజలు, అభిషేకాలు చేస్తారు. ఉపవాసాలు ఉంటారు. అసలు సోమవారానికి ఆ పేరు ఎలా వచ్చింది? ఇదే రోజున మహాదేవుడిని ఎందుకు పూజిస్తారో తెలుసా?

సోమవారం వచ్చిందంటే చాలు….శివాలయాలకు జనం పోటెత్తుతారు. ఎంత పనిలో ఉన్నా సరే…ఉదయాన్నే లేచి తలంటుకుని కోవెళ్లకు వెళ్తారు. ప్రత్యేక పూజలు, అభిషేకాలు చేస్తారు. ఉపవాసాలు ఉంటారు.వారానికి ఉన్న 7 రోజుల్లో ఈ సోమవారానికి చాలా ప్రాముఖ్యత ఉంది. అసలు సోమవారానికి ఆ పేరు ఎలా వచ్చింది? ఇదే రోజున మహాదేవుడిని ఎందుకు పూజిస్తారో తెలుసా?వారంలో మొదటి రోజు సోమవారం. ఈ రోజు శివుడికి, చంద్రుడికి పూజలు చేయడం చాలా ప్రత్యేకం. సోమవారానికి సంబంధించి మన పురాణాల్లో చాలా నియమాలు, సంప్రదాయాలు ఉన్నాయి. వీటిని పాటిస్తే జీవితంలో సుఖసంతోషాలు ఉంటాయని నమ్ముతారు. అసలు వారంలో మొదటి రోజుకు సోమవారం అనే పేరే ఎందుకు వచ్చింది? దీనికి జ్యోతిష్య శాస్త్రంలో సమాధానం ఉంది. ఆ ఆసక్తికరమైన విషయాలు ఇక్కడ తెలుసుకుందాం.

జ్యోతిష్య శాస్త్రం ప్రకారం, ఒక రోజుకు 24 గంటలు ఉంటాయి. ఈ గంటలను జ్యోతిషంలో 'హోర' అంటారు. ప్రతి హోరకు ఒక గ్రహంతో సంబంధం ఉంటుంది. హోర నియమం ప్రకారం, రోజులోని మొదటి గంటకు (సూర్యోదయం సమయంలో) ఏ గ్రహం అధిపతిగా ఉంటుందో, ఆ రోజంతటికీ అదే అధిపతి అవుతుంది. ఆదివారం తర్వాత వచ్చే రోజున (సూర్యోదయం) 25వ గంట చంద్రుడి హోరలోకి వస్తుంది. చంద్రుడికి 'సోముడు' అనే మరో పేరు కూడా ఉంది. అందుకే వారంలో మొదటి రోజుకు సోమవారం అని పేరు వచ్చింది.

సోమవారం శివ పూజకు చాలా ప్రాముఖ్యత ఉంది. దీనికి కారణం ఏంటంటే, ఈ రోజు చంద్రుడి ప్రభావం ఎక్కువగా ఉంటుంది. ఆ చంద్రుడు మహాదేవుడి తలపై అలంకారంగా ఉన్నాడు. అందుకే సోమవారం శివుడిని పూజిస్తే, చంద్రుడిని కూడా పూజించినట్లే అవుతుంది. మన పురాణాలు సోమవారం శివ పూజకు ఇంత ప్రాధాన్యత ఇవ్వడానికి ఇదే కారణం.

- సోమవారం ఉదయాన్నే లేచి స్నానం చేసి, వ్రతం, పూజ చేస్తానని సంకల్పం చెప్పుకోవాలి.- రోజంతా సాత్విక జీవితం గడపాలి. అంటే, ఎవరిపైనా కోపం తెచ్చుకోకూడదు, చెడుగా ఆలోచించకూడదు.- దగ్గర్లోని శివాలయానికి వెళ్లొచ్చు లేదా ఇంట్లోని పూజ గదిలోనైనా శివుడికి పూజ చేయవచ్చు.- శివలింగానికి మొదట శుద్ధమైన నీటితో, తర్వాత పాలతో, మళ్లీ నీటితో అభిషేకం చేయాలి.- శివుడికి బిల్వపత్రాలు, తెల్ల చందనం, మారేడు, జిల్లేడు పూలు, పండ్లు సమర్పించాలి.- ఆ తర్వాత నైవేద్యం పెట్టి, హారతి ఇవ్వాలి. ఇలా చేస్తే మీ కోరికలు తప్పక నెరవేరుతాయి.

సోమవారం శివుడికి ఇష్టమైన రోజు కాబట్టి, ఈ రోజు మహాదేవుడి మంత్రాలను జపించడం వల్ల మంచి ఫలితాలు వస్తాయి. కింద ఇచ్చిన మంత్రాలలో దేన్నైనా జపించవచ్చు-- ఓం నమః శివాయ- ఓం త్ర్యంబకం యజామహే సుగంధిం పుష్టివర్ధనమ్।ఉర్వారుకమివ బంధనాన్మృత్యోర్ముక్షీయ మామృతాత్॥- ఓం తత్పురుషాయ విద్మహే మహాదేవాయ ధీమహి తన్నో రుద్రః ప్రచోదయాత్॥

జ్యోతిష్య శాస్త్రంలో ప్రతి రోజు కొన్ని ప్రత్యేక వస్తువులను దానం చేయడం వల్ల మంచి జరుగుతుందని చెబుతారు. ఈ వస్తువులను దానం చేస్తే జీవితంలో సుఖసంతోషాలు వెల్లివిరుస్తాయి. సోమవారం రోజున తెల్లని వస్త్రాలు, బియ్యం, పాలు, పటికబెల్లం, పెరుగు, తెల్లని పువ్వులు, వెండి వంటి వాటిని దానం చేయడం చాలా శుభప్రదంగా భావిస్తారు. ఈ వస్తువులన్నీ చంద్రుడికి సంబంధించినవి.

గమనిక: ఈ ఆర్టికల్‌లోని సమాచారం మత గ్రంథాలు, పండితులు, జ్యోతిష్యుల నుంచి సేకరించబడింది. మేము ఈ సమాచారాన్ని మీ ముందుకు తీసుకురావడానికి ఒక మాధ్యమం మాత్రమే. పాఠకులు ఈ సమాచారాన్ని కేవలం సూచనగా మాత్రమే పరిగణించాలి.

Evil Eye: దిష్టి తీయడానికి ఉప్పు, మిరపకాయలనే ఎందుకు వాడతారు? అసలు ఈ అలవాటు ఎలా మొదలైంది?

Nandini Arava — Thu, 16 Jul 2026 12:58:15 +0530

Evil Eye: ఊరంతా తిరిగి ఇంటికి వచ్చాక..అమ్మో, నాన్నమ్మో దిష్టి తీస్తారు. దానికి కచ్చితంగా ఉప్పు, మిరపకాయలు పట్టుకుని మూడు సార్లు తిప్పి దిష్టి తీసి వాటిని బయటపడేస్తారు. ఇది మూఢనమ్మకమా? తరతరాలుగా వస్తున్న ఈ ఆచారం వెనుక ఓ సీక్రెట్ ఉంది.

ఊరంతా తిరిగి ఇంటికి వచ్చాక..అమ్మో, నాన్నమ్మో దిష్టి తీస్తారు. దానికి కచ్చితంగా ఉప్పు, మిరపకాయలు పట్టుకుని మూడు సార్లు తిప్పి దిష్టి తీసి వాటిని బయటపడేస్తారు. ఇది మూఢనమ్మకమా? తరతరాలుగా వస్తున్న ఈ ఆచారం వెనుక ఓ సీక్రెట్ ఉంది.

ఒక వ్యక్తికి ఉన్నట్టుండి నీరసం, మానసిక అశాంతి, ఇంట్లో వరుసగా సమస్యలు లేదా ఏ పనిలోనైనా ఆటంకాలు ఎదురైనప్పుడు, 'దిష్టి తగిలింది' అని చాలామంది నమ్ముతారు. ముఖ్యంగా భారతీయులు…దిష్టి పోవాలని ఉప్పు, మిరపకాయలు వాడుతారు. అయితే, ఈ ఆచారం వెనుక ఉన్న ఆధ్యాత్మిక కారణాలు ఏంటి? ప్రత్యేకంగా ఉప్పు, మిరపకాయలనే ఎందుకు వాడతారు? చాలామందికి తెలియని కొన్ని ఆసక్తికరమైన విషయాలు ఇప్పుడు చూద్దాం.

మామూలుగా ఉప్పును కేవలం వంటల్లో వాడుతారు. అయితే ఇది నెగటివ్ ఎనర్జీని ఆకర్షించి, గ్రహించే గుణం కలిగి ఉంటుందని భావిస్తారు. అందుకే ఇంట్లో ఉండే నెగటివ్ శక్తులను ఉప్పు గ్రహిస్తుందని నమ్ముతారు. మానసిక ఒత్తిడి, చెడు వైబ్రేషన్స్‌ను తొలగించడంలో ఇది సహాయపడుతుందని చాలామంది భావిస్తారు. వాస్తు, పరిహార పద్ధతుల్లో ఉప్పుకు ముఖ్యమైన స్థానం ఉంది. కొందరు ఇంటి మూలల్లో ఉప్పు పెట్టి నెగటివ్ ఎనర్జీని తగ్గించుకోవడానికి ప్రయత్నిస్తారు. అందుకే, దిష్టి తీసేటప్పుడు చేతిలో ఉప్పు పట్టుకుని తిప్పే అలవాటు వచ్చిందని చెబుతారు.

పచ్చి లేదా ఎండు మిరపకాయలను, చెడు శక్తులను తరిమికొట్టే చిహ్నంగా చాలా సంస్కృతులలో చూస్తారు. ప్రాచీన నమ్మకాల ప్రకారం, మిరపకాయల ఘాటు నెగటివ్ శక్తులను నాశనం చేస్తుంది. శరీరం చుట్టూ ఉన్న చెడు వైబ్రేషన్స్‌ను బయటకు పంపే శక్తి దానికి ఉందని నమ్ముతారు. కొందరు ఏడు మిరపకాయలు, కొద్దిగా ఉప్పు కలిపి ఒక వ్యక్తి తల చుట్టూ తిప్పి నిప్పులో వేస్తారు. ఈ ఆచారాన్ని భారతదేశంలోని చాలా రాష్ట్రాల్లో నేటికీ పాటిస్తున్నారు.

దిష్టి తీసే అలవాటు ఎలా మొదలైంది? మానవులు జీవించడం ప్రారంభించినప్పటి నుంచే 'కంటి దిష్టి' గురించిన నమ్మకం ప్రపంచంలోని చాలా ప్రాంతాల్లో ఉంది. ప్రాచీన కాలంలో ఎక్కువ సంపద ఉన్నవాళ్లు. కొత్తగా పెళ్లయిన జంటలు. అప్పుడే పుట్టిన పిల్లలు. కొత్త ఇల్లు లేదా వాహనం కొన్నవాళ్లు. వీరికి నరదిష్టి వల్ల హాని కలుగుతుందని నమ్మేవారు. ఈ కారణంగానే దిష్టి తీసే ఆచారాలు పుట్టుకొచ్చాయి.

చాలా దుకాణాలు, ఇళ్ల గుమ్మాలకు నిమ్మకాయలు, మిరపకాయలు కట్టి ఉండటం మనం చూస్తూనే ఉంటాం. దీనికి సంబంధించిన సంప్రదాయ నమ్మకాలు- చెడు శక్తులు ఇంట్లోకి రాకుండా ఇది అడ్డుకుంటుంది. వ్యాపారంలో అభివృద్ధి కలుగుతుందని నమ్ముతారు. కుటుంబంలో శాంతి, శ్రేయస్సు నిలుస్తాయని భావిస్తారు. దీనికి కచ్చితమైన శాస్త్రీయ ఆధారాలు లేకపోయినా, ఇది శతాబ్దాలుగా ప్రజల నమ్మకంగా కొనసాగుతోంది.

దిష్టి తీసేటప్పుడు నిప్పులో ఎందుకు వేస్తారు? ఉప్పు, మిరపకాయలను ఒక వ్యక్తి చుట్టూ తిప్పి నిప్పులో వేయడం ఒక సాధారణ పద్ధతి. దీని వెనుక ఉన్న ఆధ్యాత్మిక కథ ఏంటంటే..శరీరంలోని నెగటివ్ ఎనర్జీ నిప్పు ద్వారా నాశనం అవుతుందని నమ్ముతారు. నిప్పును స్వచ్ఛతకు చిహ్నంగా భావిస్తారు. చాలా వేద కర్మలలో కూడా అగ్నికి ముఖ్యమైన స్థానం ఇచ్చారు.

ఉప్పు, మిరపకాయలతో దిష్టి తీయడానికి ప్రత్యక్ష శాస్త్రీయ ఆధారాలు ఇప్పటివరకు నిరూపించబడలేదు. అయినప్పటికీ, మానసిక ప్రశాంతత, నమ్మకం అనేవి మనుషుల మానసిక స్థితిని మెరుగుపరుస్తాయని మానసిక శాస్త్ర అధ్యయనాల్లో పేర్కొన్నారు. కొన్నిసార్లు, ఇలాంటి సంప్రదాయ ఆచారాలు ప్రజలకు మానసిక సాంత్వనను, పాజిటివ్ ఆలోచనలను అందించగలవు.

తరతరాలుగా కొనసాగుతున్న నమ్మకం ఏంటంటే..దిష్టి తీయడానికి ఉప్పు, మిరపకాయలు వాడటం కేవలం మూఢనమ్మకం అని కొందరు భావించినా, చాలా కుటుంబాల్లో అది నేటికీ సంప్రదాయంలో ఒక భాగంగానే చూస్తున్నారు. శాస్త్రీయ ఆధారాలు తక్కువగా ఉన్నప్పటికీ, నమ్మకం, సంస్కృతి, ఆధ్యాత్మిక సంప్రదాయాల కలయికగా ఈ ఆచారం శతాబ్దాలుగా ప్రజల జీవితంలో కొనసాగుతోంది. ముఖ్యంగా, 'చెడును తొలగించి మంచిని ఆహ్వానించాలి' అనే ఆలోచనే ఈ ఆచారం వెనుక ఉన్న అసలు ఉద్దేశం.

Diwali Traditions: జైనులకు దీపావళి ఎందుకు ప్రత్యేకం? దేశమంతా దీపావళిని ఒకేలా ఎందుకు జరుపుకోరు?

Nandini Arava — Thu, 29 Oct 2026 18:55:17 +0530

Diwali Traditions: దీపావళి అనగానే దీపాలు, టపాసులు గుర్తుకొస్తాయి. కానీ మన దేశంలో దీపావళిని ఒక్కో రాష్ట్రంలో ఒక్కోలా జరుపుకుంటారు. అయోధ్యలో దీపోత్సవం, బెంగాల్‌లో కాళీపూజ, ఇంకా వివిధ ప్రాంతాల సంప్రదాయాలు, ప్రత్యేకతలు తెలుసుకోండి.

దీపావళి అనగానే దీపాలు, టపాసులు, లక్ష్మీ పూజ గుర్తుకొస్తాయి. కానీ దేశంలోని ప్రతి రాష్ట్రంలో ఈ పండుగను ఒకే విధంగా జరుపుకోరు. ఎక్కడో కాళీమాతను పూజిస్తే.. మరికొన్ని ప్రాంతాల్లో రాజుల విజయానికి గుర్తుగా, ఇంకొన్ని చోట్ల కొత్త ఆర్థిక సంవత్సరానికి ఆరంభంగా భావిస్తారు. అసలు ఏ రాష్ట్రంలో ఎలాంటి సంప్రదాయాలు పాటిస్తారో తెలుసా?

ఉత్తరప్రదేశ్‌లోని అయోధ్యలో దీపావళికి ప్రత్యేక ప్రాధాన్యం ఉంది. 14 ఏళ్ల వనవాసం తర్వాత శ్రీరాముడు సీత, లక్ష్మణుడితో కలిసి అయోధ్యకు తిరిగి వచ్చిన సందర్భాన్ని గుర్తుచేసుకుంటూ దీపాలు వెలిగిస్తారని చెప్తారు. అయోధ్యలోని ఘాట్లు, ఆలయాలు, వీధులు దీపాలతో కళకళలాడుతాయి. ఇక్కడ జరిగే దీపోత్సవం దేశవ్యాప్తంగా ప్రత్యేక గుర్తింపు పొందింది.

దేశంలోని అనేక ప్రాంతాల్లో దీపావళి రోజు లక్ష్మీదేవిని పూజిస్తే, పశ్చిమ బెంగాల్‌లో అదే రాత్రి కాళీమాత పూజకు ఎంతో ప్రాధాన్యం ఇస్తారు. కాళీపూజ సందర్భంగా అమ్మవారి విగ్రహాలను ప్రత్యేకంగా అలంకరించి, ఆలయాలు, మండపాల్లో పూజలు నిర్వహిస్తారు. కొన్ని బెంగాలీ కుటుంబాల్లో దీపావళికి ముందు వచ్చే భూత చతుర్దశి రోజున 14 దీపాలు వెలిగించే ఆచారం కూడా ఉంది.

గుజరాత్: దీపావళి తర్వాత కొత్త సంవత్సరం

గుజరాత్‌లో దీపావళి కేవలం పండుగ మాత్రమే కాదు.. కొత్త ఆర్థిక, వ్యాపార సంవత్సరానికి సంబంధించిన సందర్భం కూడా. దీపావళి తర్వాత వచ్చే రోజును బెస్తు వర్ష్‌ (Bestu Varas)గా జరుపుకుంటారు. వ్యాపారులు కొత్త ఖాతా పుస్తకాలను ప్రారంభించే చోపడా పూజ నిర్వహిస్తారు. కుటుంబ సభ్యులు, స్నేహితులు ఒకరికొకరు నూతన సంవత్సర శుభాకాంక్షలు చెప్పుకుంటారు.

దక్షిణ భారతదేశంలోని తమిళనాడు, కర్ణాటక రాష్ట్రాల్లో నరక చతుర్దశికి ప్రత్యేక ప్రాధాన్యం ఉంటుంది. నరకాసురుడిపై శ్రీకృష్ణుడి విజయాన్ని గుర్తుచేసుకుంటూ దీపావళిని జరుపుకునే సంప్రదాయం ఉంది. కొన్ని కుటుంబాల్లో తెల్లవారుజామునే నూనెతో స్నానం చేసి, కొత్త బట్టలు ధరించి, స్వీట్లు పంచుకుంటారు. కర్ణాటకలో బలి పాడ్యమికి కూడా ప్రాధాన్యం ఉంది. ఈ రోజున రంగవల్లులు వేయడం, బలి చక్రవర్తికి సంబంధించిన సంప్రదాయాలను గుర్తుచేసుకోవడం వంటి ఆచారాలు కనిపిస్తాయి.

మహారాష్ట్ర: ఐదు రోజుల పండుగ.. ఒక్కో రోజుకు ఒక్కో ప్రత్యేకత

మహారాష్ట్రలో దీపావళి పండుగను పలు దశల్లో జరుపుకుంటారు. ధనత్రయోదశి, నరక చతుర్దశి, లక్ష్మీ పూజ, బలిప్రతిపద, భాయ్ దూజ్‌ వంటి రోజులకు ప్రత్యేక ప్రాధాన్యం ఉంటుంది. ఇంట్లో తయారు చేసే ఫరాల్‌ పేరుతో పిలిచే చిరుతిళ్లు, స్వీట్లు ఈ పండుగలో ముఖ్యమైన భాగం. కొన్ని ప్రాంతాల్లో దీపావళి సందర్భంగా తెల్లవారుజామునే నూనెతో అభ్యంగన స్నానం చేసే సంప్రదాయం ఉంది.

ఆంధ్రప్రదేశ్‌, తెలంగాణలోనూ దీపావళి సందర్భంగా నరక చతుర్దశి, లక్ష్మీ పూజ, దీపాలు వెలిగించడం, స్వీట్లు పంచుకోవడం వంటి సంప్రదాయాలు కనిపిస్తాయి. నరకాసురుడిపై శ్రీకృష్ణుడి విజయాన్ని గుర్తుచేసుకోవడం ముఖ్యమైన అంశం. ఆంధ్రప్రదేశ్‌లోని కొన్ని ప్రాంతాల్లో నరకాసుర వధ కథను హరికథల ద్వారా వివరించే సంప్రదాయం ఉంది. సత్యభామ నరకాసురుడిని సంహరించిందనే పురాణ గాథకు కూడా ప్రాధాన్యం ఇస్తారు. అయితే ఆచారాలు కుటుంబాలు, ప్రాంతాలవారీగా మారవచ్చు.

పంజాబ్‌లోని సిక్కు సమాజానికి దీపావళి సమయంలో బందీ ఛోర్ దివస్‌ ప్రత్యేక ప్రాధాన్యం కలిగి ఉంటుంది. సిక్కుల ఆరవ గురువు గురు హర్‌గోబింద్ సాహిబ్‌ జైలు నుంచి విడుదలైన సందర్భాన్ని ఈ పండుగ గుర్తుచేస్తుంది. అమృత్‌సర్‌లోని స్వర్ణ దేవాలయాన్ని దీపాలతో అలంకరించి, ప్రార్థనలు నిర్వహిస్తారు. ఈ వేడుక సిక్కుల చరిత్రలో స్వేచ్ఛ, న్యాయానికి సంబంధించిన ముఖ్యమైన సందర్భంగా భావిస్తారు.

జైనులకు దీపావళి ఎందుకు ప్రత్యేకం?

దీపావళికి హిందూ సంప్రదాయాలతో పాటు జైన మతంలోనూ ప్రత్యేక ప్రాధాన్యం ఉంది. జైన సంప్రదాయం ప్రకారం, 24వ తీర్థంకరుడైన మహావీరుడు దీపావళి రోజున నిర్వాణం పొందారు. అందుకే ఈ రోజును ఆయన ఆధ్యాత్మిక విముక్తిని స్మరించుకునే సందర్భంగా జైనులు భావిస్తారు. ఈ విధంగా ఒకే పండుగకు వేర్వేరు మతాల్లో భిన్నమైన చారిత్రక, ఆధ్యాత్మిక అర్థాలు ఉన్నాయి.

Kedarnath Trip : కేవలం రూ.5 వేలలో కేదార్‌నాథ్ యాత్ర.. పూర్తి ప్లాన్ ఇదే

Arun Kumar P — Sat, 25 Jul 2026 15:05:25 +0530

మీరు కేదార్‌నాథ్ ఆలయాన్ని సందర్శించాలని ప్లాన్ చేస్తున్నారా? అయితే మీకోసమే ఈ బెస్ట్ బడ్జెట్ ట్రావెల్ ప్లాన్. కేవలం 5 నుంచి 7 వేల రూపాయల్లోనే రెండుమూడు రోజుల కేదార్‌నాథ్ యాత్ర పూర్తి చేయొచ్చు.

Bonedi Barir Durga Puja: వందల ఏళ్లుగా మారని ఆచారం..ఇప్పటికీ సంప్రదాయాన్ని పాటిస్తున్న బెంగాల్ ప్రజలు

Nandini Arava — Thu, 22 Oct 2026 18:24:01 +0530

Bonedi Barir Durga Puja: బెంగాల్ లో దుర్గాపూజ అనగానే భారీ పందిళ్లు, డెకరేషన్లు గుర్తుకొస్తాయి. కానీ వందల ఏళ్లుగా కొనసాగుతున్న మరో సంప్రదాయం ఉంది. రాజభవనాల్లో జరిగే ఈ పూజల్లో ఒక్కో కుటుంబానికీ ఓ చరిత్ర, ఒక్కో ఆచారానికీ ప్రత్యేకత ఉంది. అదేంటో తెలుసా?

పశ్చిమ బెంగాల్‌లో దుర్గాపూజ అనగానే మనకు భారీ పూజా మండపాలు, అందమైన దుర్గాదేవి విగ్రహాలు, ధునుచి నృత్యాలు, నోరూరించే వంటకాలు గుర్తుకొస్తాయి. పండుగ సమయంలో కొత్త బట్టలు ధరించి, ఒక్కో పందిరినీ సందర్శిస్తూ సందడి చేయడం అక్కడి ప్రజలకు ఎంతో ప్రత్యేకం. అయితే, ఈ వేడుకలకు మించిన మరో ఆసక్తికరమైన సంప్రదాయం కూడా బెంగాల్‌లో ఉంది. వందల ఏళ్ల చరిత్ర కలిగిన పాత రాజభవనాలు, జమీందారుల పూర్వీకుల ఇళ్లలో ఇప్పటికీ కొనసాగుతున్న ఈ వేడుకల గురించి చాలామందికి తెలియదు. అదే ‘బోనేది బారిర్ దుర్గాపూజ’ (Bonedi Barir Durga Puja).

బెంగాల్‌లోని సంపన్న కుటుంబాలు, జమీందారులు, వ్యాపార వర్గాల వారు తమ పూర్వీకుల ఇళ్లలో దుర్గాపూజను నిర్వహించే సంప్రదాయాన్ని బోనేది బారిర్ పూజ అంటారు. బెంగాలీ భాషలో ‘బోనేది బారి’ అంటే సంప్రదాయ నేపథ్యం ఉన్న సంపన్న కుటుంబానికి చెందిన పూర్వీకుల ఇల్లు అని అర్థం.

ఇప్పటిలా భారీ పందిళ్లు, డెకరేషన్స్ అందుబాటులో లేని కాలంలోనే ఈ కుటుంబాలు తమ ఇళ్లలో దుర్గాదేవిని ప్రతిష్ఠించి ఘనంగా పూజలు నిర్వహించేవి. ఇందుకోసం ప్రత్యేకంగా నిర్మించిన స్తంభాలతో కూడిన ప్రాంగణాలను ‘ఠాకుర్ దలాన్’ (Thakur Dalan) అంటారు. ఈ ప్రదేశాల్లోనే కుటుంబ సభ్యులంతా కలిసి అమ్మవారికి పూజలు చేసేవారు.

కాలక్రమంలో ఈ వేడుకలు కేవలం మతపరమైన కార్యక్రమాలకే పరిమితం కాలేదు. బ్రిటిష్ పాలన సమయంలో సంపన్న కుటుంబాల ఇళ్లలో జరిగే దుర్గాపూజలకు విదేశీ అధికారులు, వ్యాపారులు, ఇతర ప్రముఖులు కూడా హాజరయ్యేవారు.

బోనేది బారిర్ దుర్గాపూజలో అత్యంత ఆసక్తికరమైన విషయం ఏమిటంటే.. ప్రతి ఇంటికీ తనదైన ప్రత్యేకత ఉంటుంది. విగ్రహాల తయారీ నుంచి అమ్మవారికి సమర్పించే పూలు, ఆభరణాలు, నైవేద్యాల వరకు ఒక్కో కుటుంబం ఒక్కో సంప్రదాయాన్ని పాటిస్తుంది. తరతరాలుగా వస్తున్న ఈ ఆచారాలను నేటికీ కొనసాగించడం విశేషం.

ఉదాహరణకు, కోల్‌కతాలోని దర్జిపారా మిత్రా బారిలో దుర్గాపూజ సందర్భంగా సాధారణంగా సమర్పించే తామర పూలకు బదులుగా 108 అపరాజిత పూలను సమర్పించే ప్రత్యేక సంప్రదాయం ఉంది. ఇలా ఒక్కో కుటుంబం పాటించే ఆచారాలు ఈ వేడుకలకు ప్రత్యేక గుర్తింపును తీసుకొస్తాయి.

కొన్ని ఇళ్లలో అమ్మవారి విగ్రహానికి అలంకరించే ఆభరణాలు ప్రత్యేక ఆకర్షణగా నిలిస్తే, మరికొన్ని చోట్ల విగ్రహాల రూపకల్పన, నైవేద్యాలు సందర్శకులను ఆకట్టుకుంటాయి. అందుకే ఈ పూజలను సందర్శించడం అంటే కేవలం దేవీ దర్శనం చేసుకోవడమే కాదు.. బెంగాల్ చరిత్ర, కుటుంబ సంప్రదాయాలు, కళా వైభవాన్ని దగ్గరగా చూడటంతో సమానం.

శోభాబజార్ రాజ్‌బరి (Shobhabazar Rajbari)

కోల్‌కతాలోని ప్రసిద్ధ చారిత్రక భవనాల్లో ఇది ఒకటి. రాజ కుటుంబ సంప్రదాయాలు, వలస పాలన కాలంతో ఉన్న చారిత్రక సంబంధాలు, ఘనంగా జరిగే దుర్గాపూజ ఈ ఇంటికి ప్రత్యేక గుర్తింపును తెచ్చాయి.

సబర్ణ రాయ్ చౌధురీ ఆట్‌చాలా బారి

కోల్‌కతాలోని బరిషా ప్రాంతంలో ఉన్న ఈ కుటుంబం దుర్గాపూజ సంప్రదాయాలకు ప్రసిద్ధి చెందింది. తరతరాలుగా కొనసాగుతున్న పూజా విధానాలు బెంగాల్ వారసత్వాన్ని ప్రతిబింబిస్తాయి.

ఛాటు బాబు–లాటు బాబు బారి

ఈ ఇంట్లోని దుర్గాదేవి విగ్రహం ప్రత్యేక రూపకల్పనతో ఆకట్టుకుంటుంది. అమ్మవారి పరివారంలోని జయ, విజయలకు సంబంధించిన ప్రత్యేకతలు ఈ విగ్రహాన్ని ఇతర విగ్రహాల నుంచి భిన్నంగా నిలుపుతాయి.

శివ్ కృష్ణ దావ్ బారి

కోల్‌కతాలోని జోరాసంకో ప్రాంతంలో ఉన్న ఈ పాత కుటుంబానికి చెందిన దుర్గాపూజలో అమ్మవారి అలంకరణ, ఆభరణాలు ప్రత్యేక ఆకర్షణగా నిలుస్తాయి.

ఈ సంప్రదాయాన్ని దగ్గరగా చూడాలనుకునే పర్యాటకుల కోసం కోల్‌కతాలో హెరిటేజ్ వాక్‌లు, గైడెడ్ టూర్లు, బస్సులు కూడా అందుబాటులో ఉంటాయి. వీటి ద్వారా ఒకే పర్యటనలో పలు పూర్వీకుల ఇళ్లను సందర్శించవచ్చు. ఆయా కుటుంబాల చరిత్ర, భవనాల నిర్మాణ శైలి, పూజా సంప్రదాయాల గురించి తెలుసుకోవచ్చు.

పర్యటనల వ్యవధి, సందర్శించే ప్రదేశాలు, గైడ్ సేవలను బట్టి ధరలు మారుతాయి. కొన్ని పర్యటనలకు ఒక్కొక్కరికి సుమారు రూ.1,000 లేదా అంతకంటే ఎక్కువ ఖర్చవుతుంది. అయితే, ధరలు, అందుబాటులో ఉన్న తేదీలు నిర్వాహకులను బట్టి మారుతాయి.

కాలం మారినా బోనేది బారిల్లో దుర్గాపూజ సంప్రదాయం కొనసాగుతూనే ఉంది. ఆధునిక పందిళ్లలో కనిపించే భారీ అలంకరణలు ఇక్కడ ఉండకపోవచ్చు. కానీ పూర్వీకుల నుంచి అందిన ఆచారాలు, కుటుంబ సభ్యుల భాగస్వామ్యం, చారిత్రక భవనాల ప్రత్యేకత ఈ వేడుకలకు ప్రత్యేకమైన అందాన్ని తీసుకొస్తాయి.

దుర్గాపూజ సమయంలో వినిపించే ఢాక్ వాయిద్యాల శబ్దాలు, అమ్మవారి రాక కోసం ఎదురుచూసే కుటుంబ సభ్యుల సందడి, తరతరాలుగా వస్తున్న ఆచారాలు ఈ ఇళ్లలో ఒక ప్రత్యేకమైన వాతావరణాన్ని సృష్టిస్తాయి.

Puri Jagannath Temple: లవర్స్ ఈ గుడికి వెళ్లకూడదా? వెళ్తే ఏం జరుగుతుంది?

ramya Sridhar — Thu, 16 Jul 2026 16:34:09 +0530

Puri Jagannath Temple: ప్రపంచ ప్రసిద్ధి చెందిన పూరీ జగన్నాథుని యాత్ర మొదలైంది. అయితే, పెళ్లి కాని జంటలు ఈ ఆలయానికి కలిసి వెళ్లకూడదు అనే ప్రచారం ఉంది. దీనిలో నిజం ఎంత? దీని వెనక ఉన్న కథేంటి?

లక్షలాది మంది భక్తులు ఎదురుచూసే పూరీ జగన్నాథుని రథ యాత్ర జులై 16న మొదలైంది. ఒడిశాలోని పూరీలో ఉన్న ఈ ఆలయాన్ని దర్శించుకోవడానికి లక్షలాది మంది భక్తులు తరలి వెళ్తుంటారు. ఆ స్వామి దర్శన భాగ్యం కోసం ఎదురుచూస్తూ ఉంటారు. స్వామి వారు స్వయంగా వెలసిన ఈ పూరీ ఆలయానికి ఎన్నో ప్రత్యేకతలు ఉన్నాయి. వాటి ప్రకారం, ఈ ఆలయానికి పెళ్లి కానివారు జంటగా వెళ్లకూడదనే నమ్మకం ఉంది.

స్థానిక కథనాల ప్రకారం, పెళ్లికాని వారు జంటగా ఈ ఆలయం గర్భగుడిలోకి అడుగుపెట్టకూడదు. అలా వెళ్తే.. వారి బంధంలో సమస్యలు వస్తాయని.. వారికి వివాహ కూడా జరగే అవకాశాలు తగ్గుతాయని అక్కడివారు నమ్ముతారు. అందుకే చాలా మంది ఈ సంప్రదాయాన్ని పాటిస్తూ.. వేర్వేరుగా ఈ ఆలయానికి వెళతారు కానీ, జంటగా మాత్రం వెళ్లరు. కానీ.. ఇది అక్కడివారి నమ్మకం. ఆలయ నిబంధనల్లో అలాంటి రూల్స్ ఏమీ లేకపోవడం గమనార్హం.

పురాణాల ప్రకారం, ఓసారి రాధ.. జగన్నాథుని రూపంలో ఉన్న శ్రీ కృష్ణుడిని చూడటానికి పూరీ వచ్చింది. అయితే.. ఆలయంలోకి… ఆయన భార్యలకు మాత్రమే ప్రవేశం ఉందని.. రాధను అక్కడి పూజారులు లోపలికి అనుమతించలేదట. దీంతో… పెళ్లికాని వారు జంటగా వస్తే.. వారు విడిపోతారు అని రాధ శాపం ఇచ్చిందని.. అక్కడి ప్రజలు నమ్ముతారు. దీనినే ఇప్పటికీ ఫాలో అవుతున్నారు.

జగన్నాథ రథయాత్ర ప్రపంచంలోనే అతిపెద్ద మతపరమైన వేడుకల్లో ఒకటి. ఈ యాత్రలో జగన్నాథుడు, ఆయన అన్న బలభద్రుడు, సోదరి సుభద్రతో కలిసి శ్రీ గుండిచా ఆలయానికి రథాలపై ఊరేగింపుగా వెళ్తారు. ఈ అద్భుతమైన దృశ్యాన్ని చూసేందుకు దేశవిదేశాల నుంచి లక్షలాది మంది భక్తులు పూరీకి తరలివస్తారు.

Bonalu: తెలంగాణలో ఆడపడుచులు.. అమ్మవారికి బోనం ఎందుకు సమర్పిస్తారు..?

ramya Sridhar — Fri, 07 Aug 2026 15:48:19 +0530

Bonalu: ఆషాఢం వస్తే చాలు తెలంగాణలో ఆడపడుచులు అందరూ అమ్మవారికి బోనాలు సమర్పిస్తూ ఉంటారు. అసలు బోనం అంటే ఏంటి? ఈ బోనంలో అసలు ఏం సమర్పిస్తారు? దీని వెనక కథ ఏంటి?

తెలంగాణ సంస్కృతి, సాంప్రదాయాలకు నిలువెత్తు నిదర్శనం 'బోనాలు'. ఆషాఢ మాసంలో వీధి వీధినా పోతురాజుల విన్యాసాలు, డప్పు చప్పుళ్లతో ఊరంతా ఆధ్యాత్మిక శోభతో నిండిపోతుంది. గ్రామ దేవతలైన మహంకాళి అమ్మవారికీ భక్తిశ్రద్ధలతో సమర్పించే ఈ బోనాల పండుగకు ఘనమైన చరిత్ర ఉంది.అసలు బోనం అంటే ఏమిటి? బోనాల్లో ఎన్ని రకాలు ఉంటాయి? ఈ పండుగను ఎందుకు జరుపుకుంటారు? వంటి విషయాలను వివరంగా తెలుసుకుందాం.

'బోనం' అనే పదం 'భోజనం' అనే సంస్కృత పదం నుండి ఉద్భవించింది. అమ్మవారికి భక్తితో సమర్పించే నివేదన లేదా నైవేద్యాన్నే 'బోనం' అంటారు.

తయారీ విధానం: కొత్త మట్టి కుండలో బియ్యం, పాలు, బెల్లం, కలగలిపి వండిన 'పరాన్నం' (పాయసం/అన్నం) ఉంచుతారు.

అలంకరణ: ఆ కుండకు బయట వైపు పసుపు పూసి, కుంకుమ బొట్లు పెట్టి, వేపాకులు కడతారు. కుండపై చిన్న దీపం (ప్రమిద) వెలిగిస్తారు.

మహిళలు ఈ బోనం కుండను తలపై పెట్టుకుని, మంగళవాయిద్యాల నడుమ ఊరేగింపుగా వెళ్లి ఆలయంలో అమ్మవారికి సమర్పిస్తారు.

2. బోనాల పండుగ వెనుక ఉన్న చారిత్రక & పౌరాణిక కారణాలు బోనాల ఉత్సవాలకు ప్రధానంగా రెండు రకాల కారణాలు చెబుతారు:

పౌరాణిక నమ్మకం: ఆషాఢ మాసంలో అమ్మవారు తన పుట్టింటికి (భూలోకానికి) వస్తుందని నమ్ముతారు. తమ ఇంటికి వచ్చిన కుమార్తెను ఎంతో ఆప్యాయంగా చూసుకుంటూ, ఆమెకు ఇష్టమైన పిండివంటలు, పాయసాన్ని బోనంగా సమర్పించి ఆరాధిస్తారు.

చారిత్రక కారణం: 1813వ సంవత్సరంలో హైదరాబాద్, సికింద్రాబాద్ జంట నగరాల్లో 'ప్లేగు' వ్యాధి తీవ్రంగా వ్యాపించి వేలాది మంది ప్రాణాలు కోల్పోయారు. ఆ సమయంలో సైనిక బెటాలియన్‌లో ఉన్న లష్కర్ (సికింద్రాబాద్) వాసులు మధ్యప్రదేశ్‌లోని ఉజ్జయిని మహంకాళి అమ్మవారిని దర్శించుకుని, హైదరాబాద్‌ను ఈ మహమ్మారి నుండి కాపాడితే ప్రతి ఏటా బోనాలు సమర్పిస్తామని మొక్కుకున్నారు.

ఆశ్చర్యకరంగా వ్యాధి అదుపులోకి రావడంతో, ఆషాఢ మాసంలో సికింద్రాబాద్‌లో అమ్మవారి విగ్రహాన్ని ప్రతిష్టించి బోనాల సమర్పణ ప్రారంభించారు. నాటి నుండి ఈ సాంప్రదాయం కొనసాగుతోంది.

బోనాలు సమర్పించే విధానంలో ప్రాంతాన్ని బట్టి, ఆచారాన్ని బట్టి కొన్ని రకాలు ఉన్నాయి:

1. మట్టి బోనం (సాధారణ బోనం): పవిత్రమైన మట్టి కుండలో పాలు, బెల్లం, బియ్యంతో వండిన ప్రసాదాన్ని ఉంచి సమర్పిస్తారు. ఇది అత్యంత సాధారణమైన, ప్రాచీనమైన పద్ధతి.

2. ఇత్తడి / రాగి బోనాలు: ప్రస్తుత కాలంలో మట్టి కుండలతో పాటు ఇత్తడి లేదా రాగి పాత్రలను కూడా అలంకరించి బోనంగా తీసుకెళ్తున్నారు.

3. బంగారు బోనం: సికింద్రాబాద్ ఉజ్జయిని మహంకాళి , లాల్ దర్వాజా ఆలయాల్లో ప్రభుత్వం , విఐపిల తరఫున అత్యంత నిష్టతో సమర్పించేది. బంగారు పాత్రలో బోనాన్ని సిద్ధం చేసి అమ్మవారికి నివేదిస్తారు.

4. తొట్టెల ఊరేగింపు (తొట్టెల బోనం): కాగితాలు, మూగ వెదురు పుల్లలతో రంగురంగుల చిన్న గోపురం/గోపురాల నమూనాగా 'తొట్టెలు' తయారు చేస్తారు. వీటిని అమ్మవారికి కానుకగా సమర్పించడం ఒక ముఖ్యమైన ఆచారం.

5. సాక బోనం: కుండలో ప్రసాదంతో పాటు నీళ్ళు లేదా కల్లు (పురాతన గ్రామ దేవతల ఆచారం ప్రకారం) ఉపయోగించి అమ్మవారి పోచమ్మ, ఎల్లమ్మ రూపాలకు నైవేద్యం పెడతారు.

4. బోనాల ఉత్సవంలో ముఖ్యమైన ఘట్టాలు ఫలహారం బండ్లు: రంగురంగుల విద్యుత్ దీపాలు, అలంకరణలతో ఫలహార బండ్లను ఊరేగింపుగా ఆలయానికి తీసుకెళ్తారు.

పోతురాజుల విన్యాసాలు: అమ్మవారి సోదరుడిగా భావించే 'పోతురాజు' వేషధారణ, డప్పు చప్పుళ్లకు అనుగుణంగా చేసే నృత్యం, తాళ్లతో కొట్టుకునే విన్యాసాలు ప్రత్యేక ఆకర్షణగా నిలుస్తాయి.

రంగం (భవిష్యవాణి): పండుగ ముగింపు రోజున 'రంగం' అనే కార్యక్రమం జరుగుతుంది. ఇందులో ఒక శివసత్తు (మహిళ) పచ్చి మట్టికుండపై నిలబడి ఆవాహన చెంది, రాబోయే ఏడాదిలో వర్షాలు, పంటలు, ప్రజల క్షేమం గురించి భవిష్యవాణి చెప్తుంది. ఉత్సవాల చివరిలో ఏనుగుపై అమ్మవారి ఘటాల ఊరేగింపు వైభవంగా జరుగుతుంది.

బోనాలు కేవలం ఒక పూజ మాత్రమే కాదు, ప్రకృతిని, మాతృశక్తిని ఆరాధించే ఒక గొప్ప పండుగ. సమాజంలోని ప్రజలందరూ ఒకటై, ఆరోగ్యాన్ని, ఐశ్వర్యాన్ని ప్రసాదించమని జగన్మాతను వేడుకునే తెలంగాణ విశిష్ట సంస్కృతికి బోనాలు ప్రతీక.

Rudraksha Mala : ఏ ముఖి రుద్రాక్ష ధరిస్తే ఏం లాభం? వేసుకునే ముందు ఈ విషయాలు తెలుసుకోండి

Arun Kumar P — Thu, 22 Oct 2026 16:24:21 +0530

హిందూ మతంలో రుద్రాక్షకు చాలా ప్రాముఖ్యత ఉంది. పరమశివుడి కన్నీటి బిందువుల నుంచే ఈ పవిత్రమైన రుద్రాక్షలు పుట్టాయని భక్తులు నమ్ముతారు. ఒకటి నుంచి 14 ముఖాల వరకు రకరకాల రుద్రాక్షలు ఉంటాయి. ఒక్కో దానికి ఒక్కో ప్రత్యేకత, ఆధ్యాత్మిక ప్రాధాన్యం ఉన్నాయి.

రుద్రాక్షను కేవలం భక్తికి ప్రతీకగానే కాదు, రక్షణ కవచంగా కూడా భావిస్తారు. హిందూ మతంలో 1 నుంచి 21 ముఖాల రుద్రాక్షల ప్రస్తావన ఉంది. శివపురాణంలో 1 నుంచి 14 ముఖాల రుద్రాక్షలకు ప్రత్యేక ప్రాముఖ్యత ఇచ్చారు.

అయితే ఏకముఖి రుద్రాక్ష చాలా అరుదుగా దొరుకుతుంది. దీన్ని ధరిస్తే మనస్సుకు ప్రశాంతత లభిస్తుందని భక్తుల నమ్మకం. పూజలు, ధ్యానంపై ఏకాగ్రత పెంచేందుకు ఇది బాగా సాయపడుతుంది. సాక్షాత్తూ ఆ శివుడి అనుగ్రహం పొందడానికి దీన్ని ప్రతీకగా చెబుతారు.

ద్విముఖి రుద్రాక్ష

ద్విముఖి రుద్రాక్షకు రెండు ముఖాలు ఉంటాయి. ఇది ఐక్యత, సామరస్యం, బంధాల్లో సర్దుబాటుకు ప్రతీక. దీన్ని ధరిస్తే మనశ్శాంతి లభించడంతో పాటు కుటుంబ సభ్యులు, బంధువుల మధ్య అనుబంధం మరింత బలపడుతుందని ఆధ్యాత్మిక పండితులు చెబుతారు.

మూడు ముఖాలు ఉండే త్రిముఖి రుద్రాక్షకు హిందూ మతంలో ప్రత్యేక స్థానం ఉంది. దీన్ని ధరించడం వల్ల మనిషిలో ఆత్మవిశ్వాసం, సానుకూల ఆలోచనలు పెరుగుతాయని భక్తులు బలంగా నమ్ముతారు.

చతుర్ముఖి రుద్రాక్ష

నాలుగు ముఖాలు ఉండే చతుర్ముఖి రుద్రాక్షను జ్ఞానానికి, తెలివితేటలకు ప్రతీకగా భావిస్తారు. దీన్ని మెడలో వేసుకుంటే ఏకాగ్రతతో పాటు జ్ఞాపకశక్తి కూడా అద్భుతంగా పెరుగుతుందని ఆధ్యాత్మిక నమ్మకం.

పంచముఖి రుద్రాక్ష

భక్తులు ఎక్కువగా ధరించే వాటిలో పంచముఖి రుద్రాక్ష ఒకటి. ఐదు ముఖాలు ఉండే ఈ రుద్రాక్షను శాంతి, సానుకూలతకు ప్రతీకగా చూస్తారు. మతపరమైన ఆచారాల ప్రకారం పురుషులు, మహిళలు, పిల్లలు ఎవరైనా సరే దీన్ని ఎలాంటి సందేహం లేకుండా ధరించవచ్చు.

ఆరు ముఖాలు ఉండే షణ్ముఖి రుద్రాక్షను ముఖ్యంగా ఏకాగ్రత, ఆత్మవిశ్వాసంతో ముడిపెట్టి చూస్తారు. దీన్ని ధరిస్తే మనస్సు ప్రశాంతంగా ఉంటుందని, చేసే పనిపై పూర్తి దృష్టి పెట్టడానికి ఇది సాయపడుతుందని భక్తుల విశ్వాసం.

సప్తముఖి రుద్రాక్ష

ఏడు ముఖాలు ఉండే సప్తముఖి రుద్రాక్షను ఒత్తిడి, మానసిక ఆందోళనల నుంచి ఉపశమనం కలిగించే సాధనంగా భావిస్తారు. దీన్ని ధరించడం వల్ల వృత్తి, ఉద్యోగాలపై మరింత బాగా దృష్టి పెట్టవచ్చని ఆధ్యాత్మిక గ్రంథాలు చెబుతున్నాయి.

అష్టముఖి రుద్రాక్ష

ఎనిమిది ముఖాలు ఉండే అష్టముఖి రుద్రాక్షకు కూడా ఎంతో ఆధ్యాత్మిక ప్రాధాన్యం ఉంది. దీన్ని ధరించిన వారికి మానసిక ప్రశాంతత, నెమ్మది లభిస్తాయని భక్తులు నమ్ముతారు.

తొమ్మిది ముఖాలు ఉండే నవముఖి రుద్రాక్షను ఆధ్యాత్మికంగా చాలా పవిత్రమైనదిగా పరిగణిస్తారు. దీన్ని ధరిస్తే శరీరంలో సానుకూల శక్తి ప్రవహిస్తుందని, మనోధైర్యం అమాంతం పెరుగుతుందని చెబుతారు.

దశముఖి రుద్రాక్ష

పది ముఖాలు ఉండే దశముఖి రుద్రాక్షను రక్షణకు ప్రతీకగా చూస్తారు. ప్రతికూల శక్తులు, చెడు ప్రభావాల నుంచి ఇది మనల్ని కాపాడుతుందని ఆధ్యాత్మిక విశ్వాసం.

ఏకాదశముఖి రుద్రాక్ష

పదకొండు ముఖాలు ఉండే ఏకాదశముఖి రుద్రాక్షను ధైర్యం, ఆత్మవిశ్వాసం, మనోధైర్యానికి ప్రతీకగా భావిస్తారు. దీన్ని ధరించడం వల్ల మనస్సుపై పూర్తి నియంత్రణ సాధించవచ్చని భక్తులు నమ్ముతారు.

ద్వాదశముఖి రుద్రాక్ష

పన్నెండు ముఖాలు ఉండే ద్వాదశముఖి రుద్రాక్షను శక్తి, తేజస్సు, ఆత్మవిశ్వాసానికి ప్రతీకగా చూస్తారు. ఇది మనిషిలో సానుకూల భావాలను, ఉత్సాహాన్ని రెట్టింపు చేస్తుందని ఆధ్యాత్మిక పండితులు చెబుతారు.

పదమూడు ముఖాలు ఉండే త్రయోదశముఖి రుద్రాక్షకు ఆధ్యాత్మిక సంప్రదాయాల్లో ప్రత్యేక స్థానం ఉంది. దీన్ని ధరిస్తే ఆత్మవిశ్వాసం పెరగడంతో పాటు మనస్సుకు ఎంతో నెమ్మది దొరుకుతుందని నమ్ముతారు.

చతుర్దశముఖి రుద్రాక్ష

పద్నాలుగు ముఖాలు ఉండే చతుర్దశముఖి రుద్రాక్షను అత్యంత విశేషమైన రుద్రాక్షల్లో ఒకటిగా పరిగణిస్తారు. దీన్ని ధరించడం వల్ల అపారమైన ధైర్యం, మనోధైర్యం, మానసిక ప్రశాంతత లభిస్తాయని ఆధ్యాత్మిక విశ్వాసం.

IRCTC సప్త జ్యోతిర్లింగ మహాయాత్ర: ఒక్క ట్రిప్‌లో 7 జ్యోతిర్లింగాల దర్శనం.. ప్యాకేజీ వివరాలు ఇవే

Mahesh Rajamoni — Thu, 06 Aug 2026 07:02:39 +0530

IRCTC Sapta Jyotirlinga Mahayatra: ఐఆర్‌సీటీసీ భక్తుల కోసం అత్యంత ప్రాచుర్యం పొందిన సప్త జ్యోతిర్లింగ మహాయాత్ర భారత్ గౌరవ్ టూరిస్ట్ రైలు ప్యాకేజీని అందుబాటులోకి తెచ్చింది. ఈ ఆధ్యాత్మిక ప్రయాణంలో 7 జ్యోతిర్లింగాలను సందర్శించే అవకాశాన్ని కల్పిస్తోంది.

దేవాలయాల దర్శనం, ఆధ్యాత్మిక ప్రయాణాలు చేయాలనుకునే భక్తులకు ఇండియన్ రైల్వే కేటరింగ్ అండ్ టూరిజం కార్పొరేషన్ (IRCTC) గుడ్ న్యూస్ చెప్పింది. "సప్త జ్యోతిర్లింగ మహాయాత్ర" పేరిట ఒక ప్రత్యేకమైన ఆధ్యాత్మిక టూర్ ప్యాకేజీని తీసుకొచ్చింది. ఈ ప్యాకేజీ ద్వారా భక్తులు ఏకంగా ఏడు ప్రముఖ జ్యోతిర్లింగాలను దర్శించుకోవచ్చు. భారత్ గౌరవ్ డిలక్స్ ఏసీ టూరిస్ట్ రైలు ద్వారా ప్రయాణికులకు ఈ సేవలు అందిస్తారు. రైలు టూరిజాన్ని ప్రోత్సహించడానికి భారత రైల్వే ఈ ప్యాకేజీలో సుమారు 33 శాతం రాయితీని ఇప్పటికే కలిపినట్లు తెలిపింది.

ఈ యాత్రలో భాగంగా భక్తులు భారతదేశంలోని ప్రముఖ పుణ్యక్షేత్రాలను సందర్శించవచ్చు. ఉజ్జయినిలోని మహాకాళేశ్వర్ జ్యోతిర్లింగం, మహాకాల్ లోక్ కారిడార్, రామ్ ఘాట్ సందర్శన ఉంటుంది. ఆ తర్వాత ఓంకారేశ్వర్ జ్యోతిర్లింగం, ద్వారకలోని ద్వారకాధీష్ ఆలయం, రుక్మిణీ దేవి ఆలయం, నాగేశ్వర్ జ్యోతిర్లింగం, భేట్ ద్వారకలకు వెళ్తారు. అలాగే సోమనాథ్ ఆలయం, సోమనాథ్ బీచ్, భాల్కా తీర్థం, పుణేలోని భీమాశంకర్ జ్యోతిర్లింగం కవర్ అవుతాయి.

ఛత్రపతి శంభాజీనగర్ (ఔరంగాబాద్) లోని ప్రపంచ వారసత్వ ప్రదేశమైన ఎల్లోరా కైలాస మందిరం, గృష్ణేశ్వర్ జ్యోతిర్లింగం, నాసిక్‌లోని త్రయంబకేశ్వర్ జ్యోతిర్లింగంతో పాటు పంచవటిని కూడా దర్శించుకోవచ్చు. ప్రయాణికులు ఎక్కడానికి ఢిల్లీ సఫ్దర్‌జంగ్, మధుర జంక్షన్, ఆగ్రా కాంట్, విరాంగన లక్ష్మీబాయి (ఝాన్సీ), భోపాల్ జంక్షన్ స్టేషన్లలో సౌకర్యం ఉంది. యాత్ర ముగిసాక దిగడానికి భోపాల్, ఝాన్సీ, ఆగ్రా కాంట్, మధుర, ఢిల్లీ సఫ్దర్‌జంగ్ స్టేషన్లు అందుబాటులో ఉన్నాయి.

ఈ రైలులో మొత్తం 150 సీట్లు మాత్రమే అందుబాటులో ఉన్నాయి. ఇందులో సుపీరియర్ ఏసీ 1 30 సీట్లు, సుపీరియర్ ఏసీ 1 (కేబిన్) 45 సీట్లు, డిలక్స్ ఏసీ 2 టైర్ 45 సీట్లు, కంఫర్ట్ ఏసీ 3 టైర్ 30 సీట్లు ఉన్నాయి. ప్రయాణ క్లాస్, రూమ్ షేరింగ్ ఆధారంగా ఛార్జీలు వేర్వేరుగా ఉంటాయి.

• సుపీరియర్ (ఏసీ I): సింగిల్ షేరింగ్‌కు ₹1,34,255, డబుల్ షేరింగ్‌కు ₹1,19,425, ట్రిపుల్ షేరింగ్‌కు ₹1,17,305 గా నిర్ణయించారు. 5 నుండి 11 ఏళ్ల పిల్లలకు ₹1,09,910 ఛార్జ్ చేస్తారు.

• డిలక్స్ (ఏసీ II): సింగిల్ షేరింగ్‌కు ₹1,24,755, డబుల్ షేరింగ్‌కు ₹1,09,925, ట్రిపుల్ షేరింగ్‌కు ₹1,07,805 గా ఉంది. పిల్లలకు ₹1,00,410 ఛార్జ్ ఉంటుంది.

• కంఫర్ట్ (ఏసీ III): సింగిల్ షేరింగ్‌కు ₹1,05,760, డబుల్ షేరింగ్‌కు ₹90,930, ట్రిపుల్ షేరింగ్‌కు ₹88,810 కాగా, పిల్లలకు ₹81,415 గా ఛార్జ్ నిర్ణయించారు.

టికెట్ బుక్ చేసుకున్న ప్రతి ఇద్దరు వ్యక్తులకు ఒక లోయర్ బెర్త్ కేటాయిస్తారు. ప్రయాణానికి 3 రోజుల ముందు బెర్త్ కేటాయింపులు పూర్తవుతాయి.

ప్యాకేజీ ప్రయాణికులకు అనేక సౌకర్యాలను అందిస్తుంది. భారత్ గౌరవ్ డిలక్స్ ఏసీ టూరిస్ట్ రైలులో ప్రయాణంతో పాటు ఉజ్జయిని (1 రాత్రి), ద్వారక (1 రాత్రి), పుణే (1 రాత్రి) లలో 3-స్టార్ హోటళ్లలో బస సౌకర్యం కల్పిస్తారు. నాసిక్‌లో వాష్ అండ్ ఛేంజ్ సౌకర్యం ఉంటుంది. మిగిలిన 7 రాత్రులు రైలు కోచ్‌లలోనే బస ఉంటుంది. ప్రయాణంలో ఉదయం టీ, టిఫిన్, మధ్యాహ్న భోజనం, రాత్రి భోజనం (కేవలం శాకాహారం) అందిస్తారు.

ఏసీ I, ఏసీ II ప్రయాణికులకు రైలులోని రెస్టారెంట్‌లో, ఏసీ III ప్రయాణికులకు వారి బెర్త్‌ల వద్ద భోజనం వడ్డిస్తారు. స్థానిక సందర్శనల కోసం ఏసీ బస్సు రవాణా, మ్యూజియం/స్మారక చిహ్నాల ప్రవేశ రుసుములు, గైడ్ సేవలు, ప్రయాణ ప్రమాద ఇన్సూరెన్స్, సెక్యూరిటీ, టూర్ మేనేజర్ సహాయం ఉంటాయి. అయితే, వ్యక్తిగత ఖర్చులు (లాండ్రీ, మినరల్ వాటర్), ప్రత్యేక దర్శన రుసుములు, ప్యాకేజీలో పేర్కొనని అదనపు సైట్‌సీయింగ్ ఖర్చులు ప్రయాణికులే భరించాల్సి ఉంటుంది.

ప్రయాణం రద్దు చేసుకోవాలనుకుంటే ఐఆర్‌సీటీసీ కొన్ని క్యాన్సిలేషన్ రూల్స్ ఉంచింది. ట్రిప్ ప్రారంభానికి 15 రోజుల కంటే ముందు రద్దు చేసుకుంటే ప్రయాణికుడికి ₹250 మినహాయించి మిగిలిన మొత్తం రీఫండ్ చేస్తారు. 8 నుండి 14 రోజుల ముందు రద్దు చేస్తే ప్యాకేజీ ధరలో 25 శాతం, 4 నుండి 7 రోజుల ముందు రద్దు చేస్తే 50 శాతం మినహాయిస్తారు. ప్రయాణానికి 4 రోజుల కంటే తక్కువ వ్యవధిలో రద్దు చేస్తే రూపాయి కూడా రీఫండ్ లభించదు. ప్రయాణికులు ప్రయాణ సమయంలో అధికారిక గుర్తింపు కార్డును తప్పనిసరిగా ఉంచుకోవాలి.

యాత్రకు సంబంధించిన మరింత సమాచారం, బుకింగ్ కోసం న్యూఢిల్లీలోని వరల్డ్ ట్రేడ్ సెంటర్‌లో ఉన్న ఐఆర్‌సీటీసీ కార్యాలయాన్ని ఫోన్ నంబర్లు (011-35464059, 8287930484, 8287930739, 8595931047, 8287930032, 8287930299, 8882826357) ద్వారా ఉదయం 9:30 నుండి సాయంత్రం 7:00 గంటల మధ్య సంప్రదించవచ్చు. ఈ ప్యాకేజీ మొత్తం 10 రాత్రులు, 11 రోజుల పాటు కొనసాగుతుంది. ఈ యాత్ర సెప్టెంబర్ 25న ప్రారంభం అవుతుంది.

Life Lessons : దశావతారాల నుంచి Gen-Z నేర్చుకోవాల్సిన 10 జీవిత పాఠాలు

Arun Kumar P — Mon, 14 Sep 2026 21:24:27 +0530

విష్ణుమూర్తి దశావతారాల గురించి మనందరికీ తెలుసు. కానీ విష్ణువు ప్రతి అవతారం ఇప్పటి Gen-Z తరానికి ఎలాంటి జీవిత పాఠాలు నేర్పుతుందో మీకు తెలుసా? ఆ విశేషాలు ఈ వెబ్ స్టోరీలో చూద్దాం.

Negative Energy: ఇంట్లో నెగెటివ్ ఎనర్జీ ఉందని ఎలా తెలుసుకోవాలి? ఉంటే ఏమవుతుంది?

Kavitha G — Thu, 23 Jul 2026 18:08:50 +0530

Negative Energy: జ్యోతిష్య, వాస్తు శాస్త్రాల ప్రకారం.. ఇంటి వాతావరణం మన జీవితంపై లోతైన ప్రభావం చూపుతుంది. ముఖ్యంగా ఇంట్లో నెగెటివ్ ఎనర్జీ పెరిగితే ఇబ్బందులు తప్పవు అంటున్నారు పండితులు. అసలు ఇంట్లో నెగెటివ్ ఎనర్జీ ఉందని ఎలా తెలుసుకోవాలో ఇక్కడ చూద్దాం.

జ్యోతిష్య, వాస్తు శాస్త్రం ప్రకారం ప్రతి ఇంట్లో ఒక ప్రత్యేకమైన శక్తి ప్రవాహం ఉంటుంది. ఆ శక్తి సానుకూలంగా ఉంటే ఇంట్లో శాంతి, ఆరోగ్యం, ఆనందం పెరుగుతాయి. కానీ కొన్ని కారణాల వల్ల అదే ఇంట్లో నెగెటివ్ ఎనర్జీ పెరిగితే, అది కుటుంబ సభ్యుల మానసిక స్థితి, ఆరోగ్యం, ఆర్థిక పరిస్థితులపై ప్రభావం చూపుతుంది. పండితుల ప్రకారం, ఇంట్లో నెగెటివ్ ఎనర్జీ ఉందని ఎలా గుర్తించాలో ఇక్కడ వివరంగా తెలుసుకుందాం.

ఇంట్లో చిన్న విషయాలకే పెద్ద గొడవలు జరగడం, కుటుంబ సభ్యుల మధ్య సఖ్యత తగ్గిపోవడం నెగెటివ్ ఎనర్జీ సూచనగా పండితులు చెబుతున్నారు. సాధారణంగా శాంతిగా ఉన్న కుటుంబంలో కూడా ఆకస్మికంగా ఆందోళన పెరిగితే, వాతావరణంలో శక్తి అసమతుల్యత ఉందని భావించవచ్చు. ఇది ఎక్కువకాలం కొనసాగితే మానసిక ఒత్తిడి కూడా పెరుగుతుంది.

ఇంట్లో ఉన్నప్పుడు ఎప్పుడూ అలసిపోయినట్లు అనిపించడం, బయటకు వెళ్లినప్పుడు కొంత రిలీఫ్‌గా ఫీల్ అవ్వడం కూడా నెగెటివ్ ఎనర్జీ సూచనగా జ్యోతిష్య పండితులు చెబుతున్నారు. అలాగే రాత్రిపూట నిద్ర సరిగా రాకపోవడం, చెడు కలలు రావడం కూడా ఈ ప్రభావంలో భాగంగా చెబుతున్నారు.

తగిన ఆదాయం ఉన్నప్పటికీ ఇంట్లో డబ్బు నిల్వకపోవడం, తరచుగా ఏదో ఒక రూపంలో ఖర్చులు రావడం వంటివి వాస్తు శాస్త్రంలో అసమతుల్య శక్తి సూచనగా చెబుతారు. ఇది నేరుగా నెగెటివ్ ఎనర్జీ కాకపోయినా, ఇంటి వాతావరణం అస్థిరంగా ఉంటే నిర్ణయాలపై ప్రభావం చూపే అవకాశం ఉందని పండితులు సూచిస్తున్నారు.

ఎలక్ట్రానిక్ వస్తువులు, గడియారాలు, లైట్లు తరచుగా పాడవడం లేదా వస్తువులు పడిపోవడం వంటి సంఘటనలు ఎక్కువగా జరుగుతుంటే అది నెగిటివ్ ఎనర్జీకి సూచనగా పండితులు చెబుతున్నారు. అలాగే ఇంట్లో ఉన్నా కూడా మనసుకు ప్రశాంతత లేకపోవడం, ఇంట్లో ఉండాలని అనిపించకపోవడం, కుటుంబ సభ్యుల మధ్య దూరం పెరగడం వంటి భావనలు నెగెటివ్ ఎనర్జీ పెరిగినప్పుడు కనిపిస్తాయని జ్యోతిష్య శాస్త్రం చెబుతోంది.

ఇంట్లో నెగెటివ్ ఎనర్జీ పోయి, పాజిటివ్ ఎనర్జీ పెరగాలంటే ఇంటిని శుభ్రంగా ఉంచుకోవడం, గాలి, వెలుతురు సరిగా వచ్చేలా చూసుకోవడం ముఖ్యం. ఉదయం సమయంలో సూర్యరశ్మి ఇంట్లోకి రావడం పాజిటివ్ ఎనర్జీని పెంచుతుందని వాస్తు నిపుణులు చెబుతున్నారు. అలాగే దీపం వెలిగించడం, గణపతి లేదా లక్ష్మీ దేవి ప్రార్థనలు చేయడం వంటి ఆధ్యాత్మిక పద్ధతులు మనసుకు శాంతిని ఇస్తాయని సూచిస్తున్నారు.

Rain : పెళ్లి రోజున వర్షం పడితే మంచిదా? చెడ్డదా?

Arun Kumar P — Sat, 24 Oct 2026 14:04:20 +0530

పెళ్లి జరుగుతున్నప్పుడు అకస్మాత్తుగా వర్షం పడితే కొందరు శుభసూచకంగా, మరికొందరు అశుభంగా భావిస్తారు. మరి అది మంచి శకునమా? లేక చెడ్డదా? ఈ స్టోరీలో తెలుసుకుందాం.

Goa Temple: గోవా వెళ్తే బీచ్ కాదు.. ఈ 400 ఏళ్ల నాటి టెంపుల్ చూడాలి.. అక్కడ స్పెషాలిటీ ఇదే

Nandini Arava — Tue, 21 Jul 2026 17:25:58 +0530

Goa Temple: గోవా అంటే బీచ్‍లు, నైట్ లైఫ్, పర్యాటక ప్రదేశాలే. కానీ ఏళ్ల చరిత్రను చెప్పే ఎన్నో పురాతన ఆలయాలూ ఉన్నాయి. గోవా వారసత్వానికి సజీవ సాక్ష్యాలు. బాలీవుడ్ బామ భూమి గోవాలోని పురాతన అమ్మవారిని దర్శించడంతో వాటి గురించి తెలుసుకునే పనిలో పడ్డారు.

గోవా అంటే చాలా మందికి గుర్తొచ్చేవి బీచ్‍లు, నైట్ లైఫ్, వాటర్ స్పోర్ట్స్, పర్యాటక ప్రదేశాలే. కానీ గోవాలో వందల ఏళ్ల చరిత్రను చెప్పే ఎన్నో పురాతన దేవాలయాలు కూడా ఉన్నాయి. వాటిలో ఉత్తర గోవాలోని పెడ్నే ప్రాంతంలో ఉన్న శ్రీ దేవి మౌళి ఆలయం ఒకటి. సుమారు 400 ఏళ్ల చరిత్ర కలిగిన ఈ ఆలయం కేవలం ఆధ్యాత్మిక కేంద్రం మాత్రమే కాదు...గోవా సంస్కృతి, వారసత్వానికి కూడా ప్రతీకగా నిలుస్తోంది.

ఈ ఆలయం దుర్గాదేవి అవతారంగా భావించే మౌళి దేవికి అంకితం చేశారు. ఫెడ్నేకర్ కుటుంబాలతో పాటు ఆ ప్రాంతంలోని అనేక కుటుంబాలు ఈ అమ్మవారిని తమ కులదేవతగా ఆరాధిస్తారు. ఆలయంలోని ప్రధాన ఆకర్షణల్లో ఒకటి సుమారు 400 ఏళ్లనాటి రాతి విగ్రహం. స్వచ్ఛమైన మంచినీటి ప్రవాహం పక్కనే ఈ విగ్రహం ఉంటుంది. ఆ నీటికి ఔషధ గుణాలు ఉన్నాయని స్థానికులు చెబుతారు.

బాలీవుడ్ నటి భూమి పెడ్నేకర్ తన 37వ పుట్టినరోజు సందర్భంగా తమ కులదేవత శ్రీ దేవి మౌళి ఆలయాన్ని దర్శించారు. ప్రత్యేక పూజలు చేశారు. ఆ ఫొటోలను ఇన్ స్టాలో షేర్ చేసుకోవడంతో..ఆలయం గురించి తెలుసుకునే పనిలో పడ్డారు నెటిజన్లు.

ఇండో-పోర్చుగీస్ నిర్మాణశైలిలో రూపొందిన ఈ ఆలయంలో కొంకణ్ ప్రాంతానికి ప్రత్యేకమైన కావి కళ అలకరణలు కనిపిస్తాయి. ఎర్రటి మట్టి పూతతో రూపొంది ఈ సంప్రదాయ కళ ఆలయానికి ప్రత్యేక ఆకర్షణను తీసుకొచ్చింది. ఆలయ ప్రాంగణంలోని చిన్న జలపాతం కూడా సందర్శకులను ఆకట్టుకుంటుంది.

మహిషాసుర మర్దిని శిల్పం, పురాతన విగ్రహాలు, నంది సమేతంగా ఉన్న శ్రీ రామేశ్వర స్వామి ఆలయం ఈ క్షేత్రానికి మరింత చారిత్రక ప్రాధాన్యం కల్పిస్తున్నాయి. పెడ్నే ప్రాంతంలో భక్తులు సాధారణంగా మూడు ఆలయాలను దర్శించడం సంప్రదాయం. రావళ్నాథ్ ఆలయం. మౌళి దేవి ఆలయం, భగవతి దేవి ఆలయాలను వరుసగా దర్శిస్తేనే యాత్ర పూర్తైనట్లు భావిస్తారు. గ్రామ రక్షక దైవంగా భావించే రావళ్నాథ్ స్వామిని కొత్త ఇల్లు, కొత్తగా పెళ్లైన వారు లేదా కొత్త వ్యాపారం ప్రారంభించే ముందు తప్పకుండా దర్శించుకోవడం ఆనవాయితీ.

భగవతి దేవి ఆలయాన్ని సందర్శించి ఈ ఆధ్యాత్మిక యాత్రను పూర్తి చేస్తారు. ఈ మూడు ఆలయాలు గోవా ఆధ్మాత్మిక సంప్రదాయానికి, సాంస్కృతిక వారసత్వానికి నేటికీ సజీవ సాక్ష్యాలుగా నిలుస్తున్నాయి.

శివుడు పార్వతీ దేవి ఒడిలో నిద్రిస్తూ దర్శనమిచ్చే ఏకైక ఆలయం ఎక్కడ ఉందో తెలుసా?

ramya Sridhar — Fri, 02 Oct 2026 12:04:56 +0530

విష్ణు మూర్తి చాలా ఆలయాల్లో మనకు నిద్రిస్తూ దర్శనమిస్తూ కనిపిస్తారు. కానీ, శివుడు మాత్రం ఎప్పుడూ లింగ రూపంలోనే కనిపిస్తారు. కానీ, ఆయన తన నిజ రూపంలో అందులోనూ నిద్రిస్తూ కనిపించే ఏకైక ఆలయం మన దేశంలోనే ఉంది

భారత దేశంలో చాలా శివాలయాలు ఉన్నాయి. ఏ ఆలయానికి వెళ్లినా భక్తులు సాధారణంగా శివయ్యను లింగ రూపంలోనే దర్శించుకుంటారు. శివయ్య లింగ రూపంలో కాకుండా, మానవ రూపంలో దర్శనమిచ్చే ఆలయాలు చాలా అరుదు. ఒకవేళ ఉన్నా.. గర్భ గుడిలో మాత్రం శివ లింగమే ఉంటుంది. కానీ, గర్భ గుడిలో శివయ్య మానవ రూపంలో అది కూడా.. పార్వతి దేవి ఒడిలో నిద్రిస్తున్నట్లుగా ఉండే ఆలయాన్ని చూశారా? మన దేశం మొత్తం ఇలాంటి ఆలయం ఒకటే ఉంది. అక్కడ మాత్రమే.. ఆయన అలా ఎందుకు దర్శనమిస్తున్నారు? దాని వెనక కథ ఏంటి?

ఈ ఆలయం ఎక్కడ ఉంది?

ఈ అరుదైన ఆలయం మన తెలుగు రాష్ట్రాల్లోనే ఉంది. అది కూడా ప్రముఖ పుణ్యక్షేత్రం తిరుపతికి దగ్గరలోనే ఉంది.తిరుపతి దగ్గరలోని శైవ క్షేత్రం అంటే అందరికీ శ్రీశైలమే గుర్తుకు వస్తుంది. కానీ, అక్కడికి దగ్గరలోనే ఈ అరుదైన శివాలయం ఉంది. ఆ దివ్య క్షేత్రమే సురుటపల్లి. ఇక్కడ శివయ్యను పల్లికొండేశ్వరుడు అని పిలుస్తారు.

అమృతం కోసం.. దేవతలు, రాక్షసులు క్షీరసాగర మథనం చేసిన సంగతి తెలిసిందే. అయితే.. అమృతం రావడానికి ముందు.. చాలానే భయటకు వస్తాయి. అందులో ముందుగా బయటకు వచ్చింది విషం. ఈ విషాన్ని స్వీకరించడానికి ఎవరూ ముందుకు రాకపోవడంతో.. పరమ శివుడు దానిని అందుకొని.. దానిని తాగేస్తాడు. ఆ విషాన్ని తన కంఠంలో దాచుకున్నాడు కాబట్టే.. ఆయనను మనం నీలకంఠుడు అని పిలుస్తాం.

అయితే, ఆ విష ప్రభావం స్వామి వారిపై పడకుండా ఉండేందుకు పార్వతి దేవి ఆయన గళాన్ని గట్టిగా పట్టుకుందట. ఆ విష తీవ్రతకు శివయ్య ఒంటి నొప్పులతో, తీవ్రమైన అలసటతో ఇబ్బంది పడ్డారు. కైలాసానికి తిరిగి వెళ్లే మార్గంలో స్వామి వారి అలసట తీర్చడానికి ఇక్కడే విశ్రాంతి తీసుకున్నారు. అలా పార్వతి దేవి ఒడిలో శివుడు సేదదీరిన ప్రాంతమే నేడు 'సురుటపల్లి' గా ప్రసిద్ధి చెందింది.

ఈ ఆలయంలో ప్రత్యేకతలు...

శయనించిన భంగిమలో శివుడు: ప్రపంచంలోనే శివుడు నిద్రిస్తున్నట్లుగా మానవ రూపంలో దర్శనమిచ్చే ఏకైక ఆలయం ఇదే కావడం విశేషం. ఇక్కడ స్వామివారిని 'పల్లికొండేశ్వరుడు' అని పిలుస్తారు.

దేవతల ఆరాధన: శివుడు అలసిపోయి విశ్రాంతి తీసుకుంటున్న సమయంలో దేవతలందరూ ఆయన చుట్టూ కాపలాగా ఉన్నట్లు ఇక్కడి శిల్పాలు ,పురాణ కథనం ద్వారా తెలుస్తుంది.

ప్రశాంతతకు నిలయం: ఈ దివ్యక్షేత్రాన్ని దర్శించుకుంటే మనసులోని అశాంతి తొలగిపోయి, అంతులేని ప్రశాంతత లభిస్తుందని భక్తుల ప్రగాఢ నమ్మకం.

మీకు ఎప్పుడైనా తిరుపతి వైపు వెళ్లే అవకాశం వస్తే, ఈ అద్భుతమైన, చారిత్రాత్మక సురుటపల్లి పల్లికొండేశ్వరుడి ఆలయాన్ని దర్శించుకోవడం మాత్రం మరువకండి!

Van Devi Temple: సాయంత్రమైతే ఈ ఆలయానికి నో ఎంట్రీ.. 400 ఏళ్ల నాటి గుడి కథేంటో తెలుసా?

Nandini Arava — Fri, 02 Oct 2026 17:52:33 +0530

Van Devi Temple: ఓ ఆలయంలో సూర్యాస్తమయం అక్కడికి భక్తులు ఎవరూ వెళ్లరు. 400 ఏళ్ల నుంచి కొనసాగుతున్న ఈ సంప్రదాయం గురించి తెలిస్తే ఎవరైనా షాక్ అవ్వాల్సిందే. బాలీవుడ్ సినిమాలో ఈ ఆలయం ప్రస్తావన రావడంతో సోషల్ మీడియాలో గుడి విశేషాలు వెతికే పనిలో పడ్డారు.

బీహార్‌లోని ఓ పురాతన ఆలయం ఇప్పుడు బాలీవుడ్ సినిమా 'ది వ్యాన్' కారణంగా మరోసారి వార్తల్లోకి వచ్చింది. పాట్నాకు సమీపంలోని బిహ్తా ప్రాంతంలో ఉన్న మా వాన్ దేవి ఆలయం చుట్టూ ఎన్నో ఏళ్లుగా స్థానిక జానపద కథలు, ఆచారాలు, నమ్మకాలు కొనసాగుతున్నాయి. ముఖ్యంగా సూర్యాస్తమయం తర్వాత ఆలయం చుట్టుపక్కల అడవిలోకి వెళ్లకూడదనే సంప్రదాయం ఈ ఆలయంపై ఆసక్తిని పెంచుతోంది. సాయంత్రం హారతి ఇచ్చాక పూజారులు కూడా ఆలయానికి తలుపులు వేసి వెళ్లిపోతారు.

మా వాన్ దేవి ఆలయం బీహార్‌లోని పాట్నా జిల్లాలో బిహ్తా సమీపంలో ఉంది. పాట్నా నుంచి సుమారు 35 కిలోమీటర్ల దూరంలో అమ్హారా, రాఘోపూర్, కంచన్‌పూర్ గ్రామాల పరిసర ప్రాంతంలో ఈ ఆలయం ఉంది. ఒకప్పుడు ఈ ప్రాంతం దట్టమైన అడవులతో ఉండేదని స్థానిక కథనాలు చెబుతున్నాయి. ఈ ఆలయం దాదాపు 400 ఏళ్ల నాటిదిగా అక్కడి పురాణాలు చెబుతున్నాయి.

ఈ ఆలయానికి మరో ప్రత్యేకత ఉంది. సాధారణంగా ఆలయాల్లో దేవతల విగ్రహాలను ప్రతిష్ఠించి పూజలు చేస్తుంటారు. కానీ వాన్ దేవి ఆలయంలో అమ్మవారిని సంప్రదాయ విగ్రహం రూపంలో కాకుండా పవిత్ర పిండ్ అంటే పిందే రూపంలో పూజిస్తారు. స్థానిక ఆచారాల ప్రకారం వాన్ దేవిని అడవికి రక్షక దేవతగా భావిస్తారు.

ఈ ఆలయానికి సంబంధించి ఒక ఆసక్తికరమైన జానపద కథ ప్రచారంలో ఉంది. రాఘోపూర్‌కు చెందిన విద్యానంద్ మిశ్రా అనే వ్యక్తి అమ్మవారి భక్తుడని స్థానిక కథనం. ఆయన తరచూ వింధ్యాచల్‌కు వెళ్లి అమ్మవారిని దర్శించుకునేవారని చెబుతారు.

వయసు పెరిగిన తర్వాత అక్కడికి వెళ్లడం కష్టంగా మారడంతో.. ఒకరోజు అమ్మవారు ఆయనకు కలలో కనిపించి పవిత్ర పిండ్‌లోని ఒక భాగాన్ని తన ప్రాంతానికి తీసుకెళ్లి ప్రతిష్ఠించమని సూచించారని నమ్మకం. ఆ తర్వాత గ్రామాల పరిసరాల్లోని అటవీ ప్రాంతంలో ఆ పిండ్‌ను ప్రతిష్ఠించి పూజలు ప్రారంభించారని స్థానిక కథనం చెబుతోంది. కాలక్రమంలో అదే ప్రాంతంలో వాన్ దేవి ఆలయం ఏర్పడిందని చెబుతారు.

ఈ ఆలయానికి సంబంధించిన అత్యంత ఆసక్తికరమైన విషయం సూర్యాస్తమయం తర్వాత అడవిలోకి వెళ్లకూడదనే సంప్రదాయం ఉంది. స్థానిక జానపద కథల ప్రకారం.. గతంలో ఈ అడవిలో కొన్ని అనూహ్యమైన ఘటనలు జరిగేవని, వాటితో చుట్టుపక్కల ప్రజలు ఇబ్బందులు ఎదుర్కొన్నారని చెబుతారు. దీంతో చీకటి పడిన తర్వాత అడవిలోకి వెళ్లకుండా ప్రజలను ఆపే సంప్రదాయం ఏర్పడిందని కథనాలు ఉన్నాయి.

ఇప్పుడు ఈ ఆలయానికి సంబంధించిన జానపద కథ బాలీవుడ్‌ వరకు వెళ్లింది. సిద్ధార్థ్ మల్హోత్రా, తమన్నా భాటియా నటించిన ‘ది వ్వాన్: ఫోర్స్ ఆఫ్ ది ఫారెస్ట్’ సినిమా కథకు వాన్ దేవి ఆలయం చుట్టూ ఉన్న జానపద కథలు నిలిచినట్లు చిత్ర బృందం తెలిపింది.

సినిమా రచయిత అరుణాభ్ కుమార్ ఆలయాన్ని సందర్శించి అక్కడి పూజారులు, గ్రామస్తులతో మాట్లాడిన తర్వాత ఈ కథపై ఆసక్తి పెరిగిందని వెల్లడించారు. దీంతో ఇప్పటివరకు స్థానికులకు మాత్రమే తెలిసిన ఈ ఆలయం గురించి దేశవ్యాప్తంగా చర్చ మొదలైంది. భారీ నిర్మాణాలు, పెద్ద విగ్రహాలు ఉన్న ప్రసిద్ధ ఆలయాల తరహాలో కాకుండా, అడవి ప్రాంతం మధ్య స్థానిక విశ్వాసాలు, పాత సంప్రదాయాలతో కొనసాగుతున్న చిన్న ఆలయం కావడం వాన్ దేవి ఆలయానికి ప్రత్యేక గుర్తింపును తెచ్చింది.

Bommala Koluvu Decoration : ఈ నవరాత్రికి బొమ్మల కొలువును ఇలా ప్లాన్ చేయండి..అదిరిపోయే డెకరేషన్ ఐడియాస్

Nandini Arava — Mon, 05 Oct 2026 10:58:26 +0530

Bommala Koluvu Decoration : ఈసారి బొమ్మల కొలువును రొటీన్ గా కాకుండా కాస్త కొత్తగా ప్లాన్ చేస్తున్నారా? అయితే థీమ్ సెటప్ నుంచి విలేజ్ లుక్ వరకు మినిమల్ డెకరేషన్, పొటో కార్నర్ లాంటి అదిరిపోయే ఐడియాస్ మీ కోసం. ఓ లుక్కేయండి.

ఈసారి బొమ్మల కొలువును రొటీన్ గా కాకుండా కాస్త కొత్తగా ప్లాన్ చేస్తున్నారా? బొమ్మల కొలువు అంటే అదో సందడి. ఆట పాటలు, పేరాంటాల పాటలతో…ఇంట్లోనే చిన్న పాటి జాతర వాతావరణంలా ఉంటుంది. అయితే ఈ నవరాత్రికి కాస్త వెరైటీగా ట్రై చేయండి. మీ ఇంటి కొలువును ఒక చిన్న గ్రామంగా, గుడి జాతరగా, లేదా పాతకాలం నాటి జీవనశైలి ఉట్టిపడేలా మార్చేయొచ్చు. అది కూడా ఇంట్లో ఉన్న వస్తువులతోనే.

సోషల్ మీడియాలో ఇప్పుడు థీమ్ కొలువు, మినిమల్ కొలువు, నేచురల్ కొలువు, విలేజ్ కొలువు లాంటి ఐడియాలు బాగా ట్రెండ్ అవుతున్నాయి. చాలామంది ఇలాగే కొత్తగా అలంకరిస్తున్నారు. ఈ నవరాత్రికి మీ ఇంటి కొలువు కూడా విలేజ్ లుక్ తో అదిరిపోవాలంటే ఈ ఐడియాలను ఓసారి ట్రై చేసి చూడండి.

ఈ ఏడాది నవరాత్రి కొలువు అక్టోబర్ 11, ఆదివారం నాడు మొదలై, అక్టోబర్ 19, 2026 సోమవారం విజయదశమితో ముగుస్తుంది.

సాధారణంగా నవరాత్రులు మొదలయ్యే ముందు రోజే బొమ్మలను పేర్చి, మొదటి రోజు పూజతో కొలువును ప్రారంభిస్తారు. కాబట్టి, ఇంట్లో కొలువు పెట్టాలనుకునే వాళ్లు ముందుగానే మెట్లు, బొమ్మలు, అలంకరణ వస్తువులన్నీ సిద్ధం చేసుకుంటే చాలా ఈజీగా ఉంటుంది.

ఈ నవరాత్రికి మీ ఇంటి కొలువును చూడగానే అందరూ ఫిదా అయ్యేలా ఒక అందమైన చిన్న గ్రామంగా మార్చి చూడండి. రొటీన్‌గా బొమ్మలు పేర్చడానికి బదులు, పల్లెటూరి జీవితాన్ని కళ్లముందు ఉంచేలా ఈ థీమ్ సెట్ చేయొచ్చు.

ఒక చిన్న మట్టి ఇల్లు, పక్కనే పొలం, బావి, ఎద్దుల బండి, రైతులు, ఆవులు, మేకలు.. ఇలా చిన్న చిన్న బొమ్మలతో పల్లెటూరి అందాన్ని తీసుకురావచ్చు. చూసేవాళ్లు 'అరె.. ఒక చిన్న పల్లెటూరినే ఇక్కడ దించేశారు కదా' అని ఆశ్చర్యపోయేలా ఈ అలంకరణ ఉంటుంది.

పల్లెటూరి వాతావరణం కోసం ఆకుపచ్చని క్లాత్, ఆర్టిఫిషియల్ గడ్డి, చిన్న చెట్లు, మొక్కలు వాడొచ్చు. పొలాన్ని చూపించడానికి ఆకుపచ్చని వస్తువులు, మట్టి రోడ్డు కోసం చిన్న రాళ్లు లేదా ఇసుకను వాడితే సీన్ ఇంకా నాచురల్‌గా ఉంటుంది.

స్థలం తక్కువగా ఉన్నా పర్వాలేదు. కాస్త క్రియేటివిటీ, కొన్ని బుజ్జి బొమ్మలు, నాచురల్ లుక్ ఇచ్చే వస్తువులు ఉంటే చాలు. మీ ఇంట్లోనే ఒక అందమైన పల్లెటూరిని క్రియేట్ చేయొచ్చు.

మీ బొమ్మల కొలువును కాస్త వెరైటీగా, సంప్రదాయం ఉట్టిపడేలా అలంకరించాలనుకుంటున్నారా? అయితే "టెంపుల్ ఫెస్టివల్" థీమ్ మీకు పర్ఫెక్ట్ ఛాయిస్.

కొలువు మధ్యలో ఒక అందమైన చిన్న గుడి గోపురాన్ని ఏర్పాటు చేయండి. దాని ముందు దేవుడి విగ్రహాలు, భక్తులు, గుడి వాకిలి పెట్టి ఒక చిన్న గుడి వాతావరణాన్ని సృష్టించండి. పక్కనే ఒక చిన్న రథాన్ని పెడితే అచ్చం గుడిలో జాతర జరుగుతున్నట్లే ఉంటుంది.

దీన్ని మరింత సహజంగా మార్చడానికి గుడి చుట్టూ పూల దుకాణాలు, గాజుల షాపులు, బొమ్మల కొట్లు, పండ్ల దుకాణాలు లాంటి చిన్న చిన్న బొమ్మలను పెట్టండి. భక్తుల రద్దీ, పిల్లలు జాతరను ఎంజాయ్ చేస్తున్నట్లుగా సెటప్ చేస్తే చూసేవాళ్ల దృష్టిని ఇట్టే ఆకర్షిస్తుంది.

రాత్రి పూట ఈ కొలువు అందాన్ని పెంచడానికి చిన్న ఎల్ఈడీ లైట్లను వాడండి. గుడి గోపురం చుట్టూ, రథం దగ్గర, దుకాణాల ముందు లైట్లు పెడితే సాయంత్రం వేళ మీ కొలువు ఒక చిన్న జాతరలా మెరిసిపోతుంది.

దీనికోసం పెద్దగా ఖర్చు చేయాల్సిన పనిలేదు. ఇంట్లో ఉన్న పాత బొమ్మలు, చిన్న లైట్లు, కొన్ని క్రాఫ్ట్ వస్తువులతోనే ఈ థీమ్‌ను రెడీ చేయొచ్చు. సంప్రదాయం, భక్తి, పండుగ ఉత్సాహం.. ఈ మూడూ ఒకేచోట కనిపించాలంటే ఈ టెంపుల్ ఫెస్టివల్ థీమ్ సూపర్ ఛాయిస్.

ఈ నవరాత్రికి మీ కొలువులో కేవలం బొమ్మలు మాత్రమే కాకుండా, మన పూర్వీకుల జీవనశైలి ఎలా ఉండేదో ఇప్పటి తరానికి పరిచయం చేసేలా ఒక అందమైన సంప్రదాయ థీమ్‌ను ప్లాన్ చేయండి.

కొలువులో ఒకవైపు పాతకాలం నాటి పెంకుటిల్లు లేదా సంప్రదాయ ఇల్లు, అరుగు, వాకిలి, ముంగిలి లాంటివి సెట్ చేయండి. ఇంటి ముందు చిన్న రోలు, రోకలి, తిరగలి, మట్టి కుండ, రాగి పాత్రలు లాంటివి పెడితే.. ఏళ్ల కిందటి మన ఇళ్ల వాతావరణం కళ్లముందు కదలాడుతుంది.

నీళ్లు మోస్తున్న మహిళలు, చేటలో ధాన్యం చెరుగుతున్న దృశ్యం, రోట్లో పచ్చడి నూరుతున్నట్లుగా చిన్న బొమ్మలను పెట్టి.. అమ్మమ్మల కాలం నాటి రోజువారీ జీవితాన్ని ఒక చిన్న కథలా కొలువులో చెప్పొచ్చు.

వాకిట్లో చిన్న ముగ్గు, అరుగు మీద కూర్చున్న తాతయ్య-నానమ్మ బొమ్మలు, పక్కనే ఆడుకుంటున్న పిల్లలు.. ఇలా ప్రతి సీన్‌ను డీటెయిల్‌గా సెట్ చేస్తే, కొలువు చూసే పెద్దవాళ్లకు వాళ్ల చిన్ననాటి జ్ఞాపకాలు కచ్చితంగా గుర్తొస్తాయి.

కేవలం బొమ్మలకే పరిమితం కాకుండా, మన మట్టి వాసనను, సంస్కృతిని చాటిచెప్పే కొలువుగా మార్చాలంటే ఈ సంప్రదాయ థీమ్ కచ్చితంగా మనసు దోచుకుంటుంది.

కొలువు మెట్ల అలంకరణలో ప్లాస్టిక్ వస్తువులు ఎక్కువగా వాడటానికి బదులు.. వెదురు బుట్టలు, జనపనార తాడు, చెక్క వస్తువులు, ఎండిన పూలు, ఆకులు, చిన్న కొమ్మలు లాంటి సహజమైన వస్తువులను వాడొచ్చు. ఇవి కొలువుకు చాలా నాచురల్ లుక్‌ను ఇస్తాయి.

కొలువు మెట్ల చివరల్లో చిన్న వెదురు బుట్టలు పెట్టి, అందులో ఎండిన పూలు లేదా ఆకులతో డెకరేట్ చేయొచ్చు. జనపనార తాడు చుట్టి, చిన్న చెక్క ముక్కలు వాడి బొమ్మలకు స్టాండ్స్ లాగా సెట్ చేయొచ్చు. దీనివల్ల ప్రతి స్టెప్ చాలా వెరైటీగా కనిపిస్తుంది.

పచ్చని ఆకులు, చిన్న మొక్కలు, కొబ్బరి ఆకులతో చేసిన వస్తువులు కూడా వాడితే కొలువుకు ఇంకా మంచి నాచురల్ లుక్ వస్తుంది. ముఖ్యంగా మట్టి బొమ్మలు, చెక్క బొమ్మలకు ఈ అలంకరణ పర్ఫెక్ట్‌గా సెట్ అవుతుంది.

ఈ థీమ్ స్పెషాలిటీ ఏంటంటే.. పెద్దగా ఖర్చు లేకుండానే అందమైన కొలువును రెడీ చేయొచ్చు. సింపుల్‌గా ఉండాలనుకునే వాళ్లకు, సంప్రదాయానికి మోడ్రన్ టచ్ ఇవ్వాలనుకునే వాళ్లకు ఈ నేచురల్ కొలువు బాగా నచ్చుతుంది.

ఈ నవరాత్రికి పిల్లలను కూడా కొలువు అలంకరణలో ఉత్సాహంగా పాల్గొనేలా చేయాలా? అయితే, కొలువులో వాళ్ల కోసమే ఒక ప్రత్యేకమైన ప్లేస్ కేటాయించి, వాళ్లకు నచ్చిన ప్రపంచాన్ని క్రియేట్ చేసి చూడండి.

పిల్లల ఊహలకు తగ్గట్టుగా స్పేస్ (అంతరిక్షం), సముద్ర ప్రపంచం, జంతువులు, స్కూల్, రైల్వే స్టేషన్ లాంటి థీమ్స్ సెలెక్ట్ చేసుకోవచ్చు.

స్పేస్ థీమ్ అయితే సూర్యుడు, చంద్రుడు, నక్షత్రాలు, రాకెట్, వ్యోమగాములు లాంటివి సెట్ చేయొచ్చు. సముద్ర ప్రపంచం కోసం చేపలు, తిమింగలం, ఆక్టోపస్, పడవ లాంటి బొమ్మలు వాడొచ్చు. స్కూల్ థీమ్‌లో టీచర్, స్టూడెంట్స్, క్లాస్‌రూమ్, బ్లాక్‌బోర్డ్ లాంటివి చిన్న బొమ్మలతో రెడీ చేయొచ్చు.

ఇందులో స్పెషల్ ఏంటంటే.. థీమ్ సెలెక్ట్ చేసుకోవడం దగ్గర్నుంచి బొమ్మలు పేర్చడం, చిన్న చిన్న డెకరేషన్స్ చేయడం వరకు పిల్లలనే ఇన్వాల్వ్ చేయొచ్చు. దీనివల్ల కొలువు వాళ్లకు ఒక ఆటలాగా, ఫ్యామిలీతో కలిసి ఎంజాయ్ చేసే మంచి సమయంగా మారుతుంది.

ఇంట్లో స్థలం తక్కువగా ఉన్నా కొలువు పెట్టుకోవచ్చు. పెద్ద సంఖ్యలో బొమ్మలు పేర్చాల్సిన పనేమీ లేదు. 3 లేదా 5 మెట్లతో చిన్న కొలువు ఏర్పాటు చేసి, ముఖ్యమైన బొమ్మలకు మాత్రమే ఇంపార్టెన్స్ ఇవ్వొచ్చు.

ప్రతి బొమ్మకు మధ్య కాస్త గ్యాప్ ఇచ్చి పేర్చితే చాలా నీట్‌గా కనిపిస్తుంది. బ్యాక్‌గ్రౌండ్‌లో తెలుపు, క్రీమ్ లేదా లైట్ కలర్ క్లాత్ వాడి, చిన్న పూల అలంకరణలు యాడ్ చేయొచ్చు. సాయంత్రం వేళ ఎల్ఈడీ లైట్స్ వేస్తే కొలువు అందం మరింత పెరుగుతుంది. తక్కువ స్థలం, తక్కువ అలంకరణ.. కానీ చూడ్డానికి మాత్రం చాలా అందంగా ఉంటుంది.

ఈ నవరాత్రికి ఎక్కువ డెకరేషన్ ఐటమ్స్ లేకుండానే కొలువును అందంగా మార్చాలా? అయితే, సహజమైన పూలతో కొలువు మెట్లను అలంకరించి చూడండి.

కొలువు మెట్ల చివరల్లో మల్లె, బంతి, గులాబీ, చామంతి లాంటి పూలను చిన్న దండలుగా కట్టి వేలాడదీయొచ్చు. మెట్ల ముందు లేదా కొన్ని ముఖ్యమైన చోట్ల మాత్రమే పూలు పెట్టి డెకరేట్ చేస్తే, కొలువు చాలా నీట్‌గా కనిపిస్తుంది.

బొమ్మలకు అడ్డం పడకుండా కొన్ని చోట్ల మాత్రమే పూల అలంకరణ చేయడం మంచిది. దీనివల్ల పూల అందం కూడా సెపరేట్‌గా హైలైట్ అవుతుంది.

తెల్లటి మల్లెలతో పాటు పసుపు బంతి, ఎర్ర గులాబీ లాంటి వేర్వేరు రంగుల పూలను కలిపితే కొలువుకు మంచి కలర్‌ఫుల్ లుక్ వస్తుంది. చిన్న పూల బుట్టలు లేదా పూల తోరణాలు కూడా యాడ్ చేసుకోవచ్చు.

పగటిపూట అందంగా కనిపించే కొలువు, సాయంత్రం లైట్లు వేయగానే ఇంకా అద్భుతంగా అనిపిస్తుంది. అందుకే ఈ నవరాత్రికి కొలువు అలంకరణలో లైటింగ్ మీద కాస్త ఎక్కువ ఫోకస్ పెట్టండి. కొలువు మెట్ల వెనుక లేదా చివరల్లో చిన్న ఎల్ఈడీ లైట్లు సెట్ చేయొచ్చు.

ముఖ్యంగా బొమ్మలు ఉన్న చోట లైట్లను డైరెక్ట్‌గా ఎక్కువగా పెట్టకుండా, సాఫ్ట్‌గా వెలుతురు పడేలా సెట్ చేయాలి. దీనివల్ల మెయిన్ బొమ్మలు చాలా క్లియర్‌గా కనిపిస్తాయి.

చిన్న లైట్లను పూల అలంకరణ, సంప్రదాయ బొమ్మలు లేదా కొలువు బ్యాక్‌గ్రౌండ్‌తో కలిపి సెట్ చేస్తే మంచి లుక్ వస్తుంది. సాయంత్రం వేళ గదిలోని మెయిన్ లైట్ కాస్త తగ్గించి, కొలువు లైట్లను మాత్రమే ఆన్ చేస్తే చూడ్డానికి చాలా అందంగా ఉంటుంది.

కొలువు పక్కనే ఒక అందమైన ఫోటో కార్నర్ సెట్ చేసి చూడండి. కొలువును చూడటంతో పాటు, ఇంటికి వచ్చే గెస్ట్‌లు ఫోటోలు దిగడానికి ఇది ఒక మంచి స్పాట్‌లా మారుతుంది.

కొలువు దగ్గర ఒక చిన్న బ్యాక్‌గ్రౌండ్ సెట్ చేసి, దాని చుట్టూ మల్లె, బంతి, గులాబీ లాంటి పూలు, అందమైన తోరణాలు, చిన్న ఎల్ఈడీ లైట్లతో డెకరేట్ చేయొచ్చు.

బ్యాక్‌గ్రౌండ్‌లో "నవరాత్రి శుభాకాంక్షలు", "కొలువు 2026" లాంటి చిన్న అక్షరాల డెకరేషన్స్ కూడా యాడ్ చేయొచ్చు. ట్రెడిషనల్ లుక్ కావాలంటే అరిటాకు, మామిడి ఆకుల తోరణం, పూల దండలు లాంటివి కూడా వాడొచ్చు.

ఇంటికి వచ్చే మహిళలు సంప్రదాయ చీరకట్టులో ఫోటోలు దిగొచ్చు. పిల్లలు వాళ్లకు నచ్చిన బొమ్మలతో నిలబడి ఫోటోలు తీసుకోవచ్చు. ఫ్యామిలీ, ఫ్రెండ్స్‌తో కలిసి ఫోటోలు దిగడానికి ఈ ఫోటో కార్నర్ ఒక బెస్ట్ ప్లేస్ అవుతుంది.

కొలువును చూసి ఆనందించడమే కాకుండా, ఆ నవరాత్రి క్షణాలను అందమైన ఫోటోలుగా కూడా దాచుకోవచ్చు.

ముఖ్యమైన విషయం ఏంటంటే.. కొలువు అందంగా ఉండటం కోసం ఎక్కువ ఖర్చు చేయాల్సిన పనేమీ లేదు. ఇంట్లో అప్పటికే ఉన్న బొమ్మలు, బట్టలు, పూలు, చెక్క వస్తువులు, చిన్న లైట్లు లాంటివి వాడి కాస్త క్రియేటివ్‌గా ఆలోచిస్తే చాలు.. అందమైన కొలువును రెడీ చేయొచ్చు.

ఈ నవరాత్రికి రొటీన్ కొలువుకు చిన్న బ్రేక్ ఇచ్చి, మీకు నచ్చిన ఒక థీమ్‌ను సెలెక్ట్ చేసుకుని డెకరేట్ చేసి చూడండి. ఈసారి మీ ఇంటి కొలువు కచ్చితంగా అందరి దృష్టిని ఆకర్షిస్తుందనడంలో ఎలాంటి సందేహం లేదు.

9 రోజులు.. కానీ 8 నైవేద్యాలే.. బతుకమ్మ వేడుకల్లో ఒక రోజు నైవేద్యం ఎందుకు ఉండదో తెలుసా?

Narender Vaitla — Fri, 09 Oct 2026 14:52:06 +0530

Bathukamma: తెలంగాణ సంస్కృతి, సంప్రదాయాలకు అద్దం పట్టే పూల పండుగ బతుకమ్మ. తొమ్మిది రోజుల పాటు జరిగే ఈ పండుగలో రోజుకో విశేషం. ఈ ఏడాది అక్టోబర్ 10 నుంచి వేడుకలు ప్రారంభం కానున్న నేపథ్యంలో విశేషాలు తెలుసుకుందాం.

బతుకమ్మను తెలంగాణ ఆడపడుచుల ఆత్మీయతకు, ప్రకృతిపై ప్రేమకు ప్రతీకగా భావిస్తారు. తంగేడు, గునుగు, బంతి, చామంతి వంటి స్థానికంగా లభించే పూలతో బతుకమ్మను అందంగా అలంకరిస్తారు. పూలను వరుసలుగా పేర్చి మధ్యలో గౌరమ్మను ప్రతిష్ఠించి పూజలు చేస్తారు. సాయంత్రం వేళ మహిళలంతా ఒకచోట చేరి బతుకమ్మ చుట్టూ తిరుగుతూ సంప్రదాయ పాటలు పాడతారు.

మహాలయ అమావాస్యతో ప్రారంభమయ్యే బతుకమ్మ వేడుకలు దుర్గాష్టమి నాటికి సద్దుల బతుకమ్మతో ముగుస్తాయి. ఈ తొమ్మిది రోజుల పండుగలో మొదటి రోజును ఎంగిలిపూల బతుకమ్మగా, చివరి రోజును సద్దుల బతుకమ్మగా జరుపుకుంటారు. మధ్యలో వచ్చే ప్రతి రోజుకూ ప్రత్యేకమైన పేరు ఉంటుంది. అలిగిన బతుకమ్మ రోజున మాత్రం బతుకమ్మను పేర్చకపోవడం మరో విశేషం.

ఎంగిలిపూల బతుకమ్మ: పండుగ మొదటి రోజును ఎంగిలిపూల బతుకమ్మగా పిలుస్తారు. కొన్ని ప్రాంతాల్లో దీనిని పెత్రామాస అని కూడా అంటారు. ఈ రోజున మహిళలు పూలతో బతుకమ్మను పేర్చి పూజలు చేస్తారు. బియ్యంపిండి లేదా తడి బియ్యంతో పాటు నువ్వులను నైవేద్యంగా సమర్పించడం సంప్రదాయం.

అటుకుల బతుకమ్మ: రెండో రోజును అటుకుల బతుకమ్మగా జరుపుకుంటారు. ఈ రోజున అటుకులు, సప్పిడి పప్పు, బెల్లంతో నైవేద్యం తయారు చేస్తారు. కుటుంబ సభ్యులంతా కలిసి పండుగలో పాల్గొంటూ ఆనందంగా గడుపుతారు.

ముద్దపప్పు బతుకమ్మ: మూడో రోజు ముద్దపప్పు బతుకమ్మ. ఉడికించిన పప్పు, పాలు, బెల్లం కలిపి నైవేద్యంగా సమర్పిస్తారు. సంప్రదాయ పూజలతో పాటు బతుకమ్మ పాటలు, ఆటలతో ఈ రోజు వేడుకలు సాగుతాయి.

నానబియ్యం బతుకమ్మ: నాలుగో రోజు నానబియ్యం బతుకమ్మను జరుపుకుంటారు. ముందుగా బియ్యాన్ని నానబెట్టి, వాటిని పాలు, బెల్లంతో కలిపి నైవేద్యంగా సమర్పిస్తారు. ఈ రోజున కూడా పూలతో బతుకమ్మను అలంకరించి సంప్రదాయ పద్ధతిలో పూజలు నిర్వహిస్తారు.

అట్ల బతుకమ్మ: ఐదో రోజు అట్ల బతుకమ్మ. ఈ సందర్భంగా గోధుమపిండితో లేదా బియ్యంపిండితో అట్లు తయారు చేసి అమ్మవారికి నైవేద్యంగా పెడతారు. ఇంట్లో తయారు చేసిన వంటకాలను కుటుంబ సభ్యులతో పంచుకుంటూ పండుగను జరుపుకోవడం ఈ రోజు ప్రత్యేకత.

అలిగిన బతుకమ్మ: ఆరో రోజును అలిగిన బతుకమ్మగా పిలుస్తారు. సంప్రదాయం ప్రకారం ఈ రోజున బతుకమ్మను పేర్చరు. ప్రత్యేకంగా నైవేద్యం కూడా సమర్పించరు. మిగిలిన రోజుల మాదిరిగా కాకుండా ఈ రోజు విరామంగా ఉండటం బతుకమ్మ పండుగలోని ప్రత్యేక ఆచారాల్లో ఒకటి.

వేపకాయల బతుకమ్మ: ఏడో రోజు వేపకాయల బతుకమ్మ. ఈ రోజున వేపకాయల ఆకారంలో ఉండే సకినాల పిండితో వంటకాలు తయారు చేస్తారు. వాటిని అమ్మవారికి నైవేద్యంగా సమర్పిస్తారు. పూలతో బతుకమ్మను పేర్చి మహిళలు పాటలు పాడుతూ వేడుకల్లో పాల్గొంటారు.

వెన్నముద్దల బతుకమ్మ: ఎనిమిదో రోజును వెన్నముద్దల బతుకమ్మగా జరుపుకుంటారు. నువ్వులు, వెన్నతో తయారు చేసిన పదార్థాలను నైవేద్యంగా పెడతారు. పండుగ చివరి రోజు అయిన సద్దుల బతుకమ్మకు ముందు వచ్చే ఈ రోజు కూడా ప్రత్యేక పూజలు, సంప్రదాయ వేడుకలతో సాగుతుంది.

సద్దుల బతుకమ్మ: తొమ్మిదో రోజు బతుకమ్మ పండుగలో అత్యంత సందడిగా జరిగే సద్దుల బతుకమ్మ వేడుకలు నిర్వహిస్తారు. ఈ రోజున మహిళలు పెద్ద బతుకమ్మలను అందంగా అలంకరించి సామూహికంగా పూజలు చేస్తారు. పెరుగన్నం, చింతపండు పులిహోర, నిమ్మకాయ పులిహోర, కొబ్బరి అన్నం, నువ్వుల సద్ది వంటి వంటకాలను తయారు చేసి నైవేద్యంగా సమర్పిస్తారు. అనంతరం బతుకమ్మలను ఊరేగింపుగా తీసుకెళ్లి సంప్రదాయం ప్రకారం నీటిలో నిమజ్జనం చేస్తారు.

బతుకమ్మ పండుగలో తొమ్మిది రోజులకూ తొమ్మిది పేర్లు ఉండటం, రోజుకో ప్రత్యేక ఆచారం పాటించడం విశేషం. ఆరో రోజైన అలిగిన బతుకమ్మ మినహా మిగిలిన ఎనిమిది రోజుల్లో ప్రత్యేక నైవేద్యాలు సమర్పిస్తారు. స్థానిక సంప్రదాయాలను బట్టి కొన్ని ప్రాంతాల్లో పేర్లు, నైవేద్యాల తయారీలో స్వల్ప మార్పులు కనిపించవచ్చు.

ఈ పండుగ కేవలం పూలతో చేసే పూజ మాత్రమే కాదు. కుటుంబ బంధాలను బలోపేతం చేయడం, ఆడపడుచులంతా ఒక్కచోట చేరడం, తెలంగాణ జానపద పాటలు, సంప్రదాయాలను తరువాతి తరాలకు అందించడం వంటి ఎన్నో ప్రత్యేకతలు ఇందులో ఉన్నాయి. అందుకే బతుకమ్మ తెలంగాణ ప్రజల జీవితాల్లో ప్రత్యేకమైన స్థానం సంపాదించుకుంది. పూల అందాలు, పాటల సందడి, సంప్రదాయాల మేళవింపుతో తొమ్మిది రోజుల పాటు సాగే ఈ వేడుకలు తెలంగాణ సంస్కృతికి ప్రతిబింబంగా నిలుస్తాయి.

Inspiring Story: కలియుగంలోనూ ఇలాంటి కొడుకులున్నారా? తల్లి కోసం చెప్పుల్లేకుండా జ్యోతిర్లింగాల యాత్ర!

Nandini Arava — Sat, 24 Oct 2026 16:51:09 +0530

Inspiring Story: ఆస్తి కోసం తల్లిదండ్రులని రోడ్డున పడేసే పిల్లల్ని చూశాం. కానీ ఓ కుర్రాడు తల్లి ప్రాణాలకై ఏం చేశాడో తెలిస్తే ఒళ్లు పులకరిస్తుంది. ఏ యుగంలోనూ ఇలాంటి సాహసం ఉండదేమో. తల్లిని బ్రతికించడానికి ఈ బీహార్ కుర్రాడు చేసిన ప్రతిజ్ఞ ఏంటో తెలుసా?

భారతీయ ఇతిహాసాలు, పురాణాల్లో తల్లిదండ్రుల కోసం త్యాగం చేసిన పాత్రలకు కొదవలేదు. చూపులేని తల్లిదండ్రులను తీర్థయాత్రలకు తీసుకెళ్లిన శ్రవణ కుమారుడు, తండ్రి మాట కోసం రాజ్యాన్ని వదులుకున్న శ్రీరాముడు, తండ్రి కోసం రాజ్యాధికారాన్ని వదిలి బ్రహ్మచర్యం తీసుకున్నాడు భీష్ముడు. ఇవన్నీ ఈ కలియుగంలో సాధ్యమేనా? ఆస్తి కోసం, ప్రేమ కోసం తల్లిదండ్రులను రోడ్డున పడేస్తున్నారు. కానీ బీహార్‌కు చెందిన ఈ 19 ఏళ్ల యువకుడు తల్లి కోలుకోవాలని చేసిన ప్రతిజ్ఞను నిలబెట్టుకునేందుకు 12 జ్యోతిర్లింగాల యాత్ర చేపట్టాడు. ఇప్పటికే ఆరు క్షేత్రాలను దర్శించుకున్నాడు.

తల్లి అనారోగ్యంతో బాధపడుతున్న సమయంలో చేసిన ఓ ప్రతిజ్ఞ.. ఇప్పుడు అతడిని వేల కిలోమీటర్ల ప్రయాణం వైపు నడిపిస్తోంది. అమ్మ ఆరోగ్యం మెరుగుపడితే దేశంలోని 12 జ్యోతిర్లింగాలను పరిగెత్తుతూ దర్శించుకుంటానని మొక్కుకున్నాడు.. బీహార్‌కు చెందిన 19 ఏళ్ల మోను. ఆ మాట నిలబెట్టుకునేందుకు తన యాత్రను కొనసాగిస్తున్నాడు. ఇప్పటివరకు సుమారు 8,000 కిలోమీటర్లు ప్రయాణించి, ఆరు జ్యోతిర్లింగాలను దర్శించుకున్నాడు.

బీహార్‌లోని అరారియా జిల్లాకు చెందిన మోను తల్లి లాల్తీ దేవి అనారోగ్యానికి గురయ్యారు. ఆహారం తింటున్న సమయంలో గొంతులో చేప ముల్లు ఇరుక్కోవడంతో ఆమె ఆరోగ్యం దెబ్బతింది. ఎన్నో చోట్ల వైద్యం చేయించినా తగ్గలేదు.

ఆ సమయంలో మోను జెహనాబాద్‌లోని బరాబర్ కొండపై ఉన్న బాబా సిద్ధేశ్వర్ నాథ్ ఆలయంలో శివుడిని ప్రార్థించి ఓ మొక్కు మొక్కుకున్నాడు. తల్లి కోలుకుంటే దేశంలోని 12 జ్యోతిర్లింగాలను పరిగెత్తుతూ దర్శించుకుంటానని మోను మొక్కుకున్నాడు. లాల్తీ దేవి ఆరోగ్యం మెరుగుపడిన తర్వాత మోను తన మొక్కును నెరవేర్చుకోవాలని నిర్ణయించుకున్నాడు. మార్చి 15న పాట్నా నుంచి యాత్ర ప్రారంభించాడు.

మోను తన యాత్రలో రోజుకు సుమారు 50 కిలోమీటర్లు పరిగెత్తాలని లక్ష్యంగా పెట్టుకున్నాడు. ఇప్పటివరకు దాదాపు 8,000 కిలోమీటర్లు ప్రయాణించి ఆరు జ్యోతిర్లింగాలను దర్శించుకున్నాడు. ప్రస్తుతం మహారాష్ట్రలో ఉన్న అతను మిగిలిన క్షేత్రాలను కూడా సందర్శించి తన ప్రతిజ్ఞను పూర్తి చేసేందుకు ప్రయత్నిస్తున్నాడు. ఈ ప్రయాణంలో మరో ఇద్దరు యువకులు అతనితో కలిసి వెళ్తున్నారు.

మోను ఆరో తరగతి నుంచే క్రికెట్ ఆడేవాడట. కుటుంబానికి ఆర్థికంగా తోడ్పడేందుకు గోల్‌గప్పాలు, చాట్ అమ్మడంతో పాటు ఎలక్ట్రికల్ పనులు కూడా చేసేవాడు. మోను తండ్రి మహేశ్ చౌహాన్ ఎలక్ట్రీషియన్‌గా పనిచేస్తున్నారు. మోను చిన్నప్పటి నుంచే భక్తి ఉందని తెలుసుకానీ...ఇంత పెద్ద యాత్ర చేపడతాడని ఊహించలేదని ఆయన తండ్రి తెలిపారు. యాత్ర ప్రారంభంలో కుటుంబ సభ్యులు కొంత డబ్బు ఇవ్వగా, మిగతా ఖర్చులను మోను చూసుకుంటున్నాడట.

తన కుమారుడు ఇచ్చిన మాటను నిలబెట్టుకునేందుకు ఇంతటి ప్రయాణం చేయడం గర్వంగా ఉందని లాల్తీ దేవి చెబుతున్నారు. మోను తండ్రి, సోదరుడు కూడా అతని పట్టుదలను ప్రశంసిస్తున్నారు. యాత్ర పూర్తిచేసుకుని క్షేమంగా ఇంటికి తిరిగి రావాలని కుటుంబ సభ్యులు ఎదురుచూస్తున్నారు.

ఆస్తి కోసం తల్లిదండ్రులను చంపేసి, రోడ్డన పడేసే పిల్లలెక్కడ? ఈ మోను ఎక్కడ? ఇలాంటి వాళ్లను పురాణాల్లోనో, కథల్లోనో చూసే ఉంటాం. కానీ ఈ కలియుగంలో చూడటం అద్భుతమనే చెప్పాలి.