Asianet News Telugu

మీ భార్య‌తో గొడ‌వ జ‌రిగేప్పుడు ఈ 4 మాట‌లు అస్స‌లు మాట్లాడ‌కండి. ఇంట్లో యుద్ధం ఖాయం

Narender Vaitla — Wed, 22 Apr 2026 17:20:43 +0530

Relationship: ఇద్దరు మనుషులు కలిసి ఒక బంధాన్ని నిర్మించుకుంటే, ఆ బంధం చాలా సున్నితంగా ఉంటుంది. ఒక మంచి మాట సంబంధాన్ని బలపరుస్తే, ఒక తప్పు మాట దాన్ని బలహీనపరచగలదు. అందుకే భాగ‌స్వాముల మ‌ధ్య కొన్ని మాటలు అస్స‌లు రాకూడ‌దు అవేంటంటే.?

గొడ‌వ‌లు ఎక్కడైనా ఉంటాయి. కానీ కోపంలో “నిన్ను ప్రేమించడం నా తప్పు” లేదా “నిన్ను కలవకపోయుంటే బాగుండేది” అనే మాటలు ఎప్పుడూ చెప్పకూడదు. ఈ మాటలు కేవలం కోపం వల్ల వచ్చినా, ఎదుటివారికి అది నిజంగానే అనిపిస్తుంది. ఒకసారి ఇలా చెప్పితే, తిరిగి నమ్మకం తెచ్చుకోవడం చాలా కష్టం అవుతుంది.

పార్ట్‌నర్ దగ్గర డబ్బు ఎంత ఉంది? వారి ఫ్యామిలీ బ్యాక్‌గ్రౌండ్ ఏంటి? ఇవి చాలా వ్యక్తిగత విషయాలు. వీటిపై సరదాగా అయినా, కోపంతో అయినా తక్కువగా మాట్లాడటం తప్పు. డబ్బు గురించి అవమానించడం అంటే వారి గౌరవాన్ని దెబ్బతీయడం. ఇది సంబంధంలో చీలికలు తీసుకురాగలదు.

ప్రతి ఒక్కరికీ తమ కుటుంబం, స్నేహితులు చాలా ముఖ్యమైనవారు. మీకు వాళ్లలో ఎవరో నచ్చకపోవచ్చు. కానీ అందుకని వాళ్లను దూషించడం సరికాదు. ఒక అప్రకటిత నియమం ఉంది.. తనవాళ్ల గురించి చెడు మాట్లాడే హక్కు ఆ వ్యక్తికే ఉంటుంది, కానీ మీకు కాదు. ఈ లైన్ దాటితే సంబంధం దెబ్బతింటుంది.

ప్రతి మనిషికి కొన్ని బలహీనతలు ఉంటాయి. వాటిని అర్థం చేసుకోవడం ప్రేమలో భాగం. కానీ వాటిపై జోక్ చేయడం, ఎగతాళి చేయడం చాలా ప్రమాదకరం. ఇది ఎదుటివారి ఆత్మవిశ్వాసాన్ని నెమ్మదిగా తగ్గిస్తుంది. చివరికి సంబంధంలో దూరం పెరుగుతుంది.ప్రేమ అంటే అర్థం చేసుకోవడం

ప్రేమ అంటే కేవలం మంచి రోజుల్లో కలిసి ఉండటం కాదు. కష్ట సమయంలో కూడా ఒకరికొకరు అండగా ఉండటం. గొడ‌వ‌లు వచ్చినప్పుడు జాగ్రత్తగా మాట్లాడ‌డం చాలా ముఖ్యం. ఎందుకంటే కొన్ని మాటలు ఒకసారి బయటకు వచ్చాక తిరిగి తీసుకోలేము. అందుకే కోపంలో మాట్లాడే ముందు ఒకసారి ఆలోచించండి. మీ మాటలు సంబంధాన్ని కాపాడాలా? లేక పాడుచేయాలా? అన్నది మీ చేతుల్లోనే ఉంది.

పెళ్లి వద్దు, రొమాన్స్ ముద్దు.. అమ్మాయిల సుఖంకోసమే అక్కడ బాయ్స్ స్ట్రీట్స్

Amarnath Vasireddy — Mon, 30 Mar 2026 20:39:01 +0530

"పెళ్లి మెడకు జంజాటం. లైఫ్ లో రొమాన్స్ ఉంటే చాలు"అనుకొనే వారి సంఖ్య పెరిగిపోతోంది. కొరియన్ యువతుల ఎంజాయ్మెంట్ కోసం కొన్ని పొరుగు దేశాల్లో బాయ్స్ స్ట్రీట్స్ వెలుస్తున్నాయి.

1. మీ ఇంట్లో 15-30 ఏళ్ళ అమ్మాయి/యువతి ఉందా?

2. పది... ఇంటర్ దాక ఆమె చదువులో చురుకయ్యిందా?

3.తెలివితేటలు, independent భావాలు ఆమెలో మెండుగా ఉన్నాయా..?

4. గత కొంత కాలంగా ఆమె ప్రవర్తన చిత్రంగా మారిందా?

5. గది తలుపేసుకొని, ఒంటరిగా గడపడానికి ఇష్టపడుతోందా?

6. మీ పై కోపం చిరాకు ప్రదర్శిస్తోందా..?

7. అబద్దాలు చెప్పడం, ఆత్మ హత్య చేసుకొంటానని బెదిరిస్తోందా..?

అయితే ఆమె ఆమెకు కొరియన్ దెయ్యం పట్టినట్టే..!

దెయ్యాలు లేవు .

ఇది వేరే రకం దెయ్యం..!

ఇప్పటిదాకా పెద్దగా ఎవరూ రాయని, మాట్లాడని భూతం.

భారత దేశం లో లక్షలాది మంది యువ మహిళలకు పట్టిన దెయ్యం.

మీ వయసు .. 40 ప్లస్..

చెప్పండి .. కొరియా గురించి మీకు ఏమి తెలుసు..?

జస్ట్ ఒకటి రెండు పాయింట్స్ కదా..?

మీకు తెలియని ఎన్నో విషయాలు ఇవిగో...

భారతీయ అమ్మాయిలు కొరియా డ్రామాలకు, పాప్ మ్యూజిక్ కు పిచ్చ అభిమానులు.

పచ్చ బొట్టు పొడిపించుకొన్న వారు .. కొరియా భాషను నేర్చుకొంటున్న వారు..

కొరియా అభిమానుల కమ్యూనిటీ, ఆన్లైన్ గ్రూప్స్ తో ఇన్స్టాగ్రామ్, ట్విట్టర్, రెడ్దిట్ నిండి పోయింది.

ఈ అభిమానుల గ్రూప్స్ ఈవెంట్స్ నిర్వహిస్తారు.

ప్రసంగాలిస్తారు.

ఇదొక మేనియా .. పెద్దవారికి పెద్దగా తెలియని మేనియా..

సమస్యకు మూలం..!

ఇండియన్ మెయిన్ స్ట్రీమ్ సినిమా హీరో ఓరియెంటెడ్.

కాలం మారింది.

చదువుల్లో, కాంపిటేటివ్ పరీక్షల్లో, ఉద్యోగాల్లో మహిళలదే పైచేయి.

అయినా భారతీయ సినిమా మారలేదు.

హీరో తెలివైనోడు..

హీరోయిన్ జస్ట్ ఒక అందాల బొమ్మ..

ఆమెకు వ్యక్తిత్వం ఉండదు, తెలివి ఉండదు .

రాస్తూ పొతే భారతీయ సినిమా లో పురుషాధిక్య సంస్కృతి గురించి ఒక పుస్తకం అవుతుంది.

కొరియన్ సినిమా.. పాప్ మ్యూజిక్..

అమ్మాయి తెలివైంది, ధైర్యవంతురాలు, సమస్యల్ని ఎదిరిస్తుంది.. పోరాడుతుంది..

ఎక్కడైతే భారతీయ సినిమాలో గ్యాప్ ఉందో.. కొరియన్ డ్రామా అక్కడే దూరింది.

కొరియన్ సినిమాలో చూపించే సమస్యలు నిజం..

యువ మహిళా కోణంలో ఈ సినిమాలు, డ్రామాలు... అద్భుత చిత్రీకరణలు.

హీరో హీరోయిన్ స్లిమ్ గా అందంగా ఉంటారు..

చిత్రీకరణ సూపర్ రిచ్. లేటెస్ట్ కెమెరాలు .. ట్రేండింగ్ మ్యూజిక్ .. స్టూడియోస్ ..

మగాళ్లకు హింసంటే ఇష్టం.

మహిళలకు అది పెద్దగా నచ్చదు.

ఫామిలీ డ్రామా,

రొమాన్స్

చదువు ..

ఉద్యోగం ..

అక్కడ మహిళా ఎదుర్కొనే సమస్యలు ..

పురుషాధిక్యత ...

వాటిని ఎదిరించడం..

ఇలా యువ మహిళ ఆలోచించే ప్రతి అంశం ఇందులో ఉంటుంది.

ఒక్క మాటలో చెప్పాలి అంటే యువ మహిళ మనోగతానికి కొరియన్ డ్రామా ప్రతిబింబం.

1. ఇందులో చూపే సమస్యలు నిజం.

దానికి వారు చూపే పరిష్కారం డ్రమాటిక్ గా వాస్తవానికి ఆమడ దూరంలో ఉంటుంది.

యువమహిళల్లో ఇది పలాయన వాదానికి దారి తీస్తోంది.

2. ఇదొక పెద్ద అడిక్షన్. ఒక్కసారి దూరితే బయటకు రాలేరు. అదేపనిగా గంటలు గంటలు చూస్తూ కాలం గడిపేస్తారు.

4. విపరీత భావోద్వేగాలు వచ్చేస్తాయి. కోపం.. మానసిక కుంగుబాటు.. స్ట్రెస్.. ఆత్మహత్య ఆలోచనలు.. నేల విడిచి సాము చెయ్యడం.. పలాయనవాదం.

5. మనం కూడా కొరియన్ బ్యూటీ లా మారాలి..! వారిది మంగోలాయిడ్ జాతి..! ఇక్కడ బయాలజీ వేరు..!

ప్లాస్టిక్ సర్జరీలు .. సిలికాన్ ఇంజెక్షన్స్

మన బాయ్ ఫ్రెండ్ కొరియన్ అబ్బాయిలా హ్యాండ్సమ్ గా ఉండాలి.. బ్రాడ్ మైండెడ్ గా ఉండాలి. ఇక్కడ సరుకు వేరు

వాస్తవానికి వెయ్యి మైళ్ళ దూరంలో ఆలోచనలు ఆకాంక్షలు..!

అవి తీరక నిరాశా నిస్పృహలు..

ఈ సినిమాలు తీసే దక్షిణ కొరియా కు ఒక్కసారి వెళదాము .

అమ్మాయిలు పెళ్ళొద్దు అంటున్నారు. పెళ్లి నాటికి సగటు వయస్సు 32.

"పెళ్లి మెడకు జంజాటం. లైఫ్ లో రొమాన్స్ ఉంటే చాలు"అనుకొనే వారి సంఖ్య పెరిగిపోతోంది.

కొరియన్ యువతుల ఎంజోయ్మెంట్ కోసం కొన్ని పొరుగు దేశాల్లో బాయ్స్ స్త్రీట్స్ వెలుస్తున్నాయి.

2.1 ఉండాల్సిన జనన రేట్ 0.75 కి పడిపోయింది.

వృద్ధుల శాతం పెరిగిపోతోంది. పని చేసే వారి సంఖ్య భారీగా తగ్గి ఆర్థిక మాంద్యం.

కొరియన్ డ్రామాకు పాప్ మ్యూజిక్ కు ... అమ్మాయిలేనా అభిమానులు..?

అబ్బాయిల/యువకులకు పట్టిన దెయ్యాలు వేరు .. బెట్టింగ్.. గంజాయి.. హింస.. శాడిజం.. బుల్లియింగ్.

కొరియన్ అభిమానుల్లో 90 శాతం అమ్మాయిలే.. !

సమాజం నిద్ర లేవాలి.

మహిళకు సముచిత స్థానం ఇవ్వాలి.

సమస్యల చిత్రీకరణ సరే... సరైన పరిష్కారం ఇచ్చే సినిమాలు రావాలి.

సినిమా వేరు... జీవితం వేరు... సమస్య వాస్తవం అయితే పరిష్కారం కూడా వాస్తవం కావాలి అనే ఇంగిత జ్ఞానం అందరికీ ముఖ్యంగా యువతకు విద్యార్థులకు రావాలి.

విద్య వ్యవస్థ మారాలి.

ముగింపు :

ఇంజనీరింగ్ మూడో సంవత్సరం చదువుతున్న అమ్మాయి కాలేజీ కి పోనంటోంది. ఇంజనీరింగ్ అంటే నాకు ఇష్టం లేదు. బెంగుళూరు లో బేకరీ కోర్స్ చేస్తా. ఆరు నెలల కోర్స్... జస్ట్ అయిదు లక్షలు ఫీజ్. అంటోంది.

తల్లితండ్రి బతిమాలాడారు. ఇంజనీరింగ్ జస్ట్ ఒక ఇయర్. ఇది కంప్లీట్ చెయ్యి. అటుపైన హోటల్ మానేజ్మెంట్ పీజీ చేద్దువు అన్నారు.

ఒప్పుకోదు. కోపం... అన్నం తినడానికి మాత్రం తలుపు తీసి బయటకు వస్తుంది. మానసిక వైద్యుడి వద్దకు తీసుకొని వెళ్లారు. ఆయన నాలుగు పేజీల లిస్ట్ రాశారు.. పరిష్కారం కాదు. నాలుగు పేజీల వ్యాసం.. సమస్య గురించి.

పరిష్కారం ఒక్కటీ అడక్కు అన్నాడేమో ..

పేరెంట్స్ నిరాశా నిస్పృహల్లో .. ఆరోగ్యం చెడగొట్టు కొంటూ..

కొరియన్ దెయ్యం దించాలి.

వేప మండలు కాదు..

కీలెరిగి వాత పెట్టాలి ..

Relationship Tips: ఈ 5 సంకేతాలు కనిపిస్తే మీ రిలేషన్‌షిప్ ప్రమాదంలో ఉన్నట్లే!

Kavitha G — Tue, 17 Mar 2026 17:49:40 +0530

సాధారణంగా రిలేషన్‌షిప్ ప్రారంభంలో అన్నీ బాగుంటాయి. కానీ కాలం గడిచే కొద్దీ చిన్న మార్పులు కూడా పెద్ద దూరాలకు దారి తీస్తాయి. కొన్ని స్పష్టమైన సంకేతాలు రిలేషన్ షిప్ ప్రమాదంలో ఉన్నట్లు తెలియజేస్తాయి అంటున్నారు నిపుణులు. అవేంటో ఇక్కడ చూద్దాం.

ఏ రిలేషన్‌షిప్ అయినా ప్రారంభంలో ఎంతో మధురంగా, ఆనందంగా ఉంటుంది. కానీ కాలక్రమేణా చిన్న చిన్న మార్పులు కూడా పెద్ద సమస్యలకు దారి తీసే అవకాశం ఉంటుంది. చాలాసార్లు మనం ఆ మార్పులను గుర్తించకుండా వదిలేస్తాం, కానీ కొన్ని స్పష్టమైన సంకేతాలు కనిపిస్తే ఆ రిలేషన్‌షిప్ ప్రమాదంలో ఉన్నట్లు అర్థం చేసుకోవాలని చెబుతున్నారు నిపుణులు. అవేంటో ఇక్కడ వివరంగా తెలుసుకుందాం.

రిలేషన్ షిప్ ప్రారంభంలో గంటలకొద్దీ మాట్లాడుకునే జంటలు, తర్వాత అవసరమైన మాటలకే పరిమితం కావడం లేదా ఒకరితో ఒకరు తమ భావాలను పంచుకోకపోవడం, సంబంధంలో దూరం పెరుగుతోందని సూచిస్తుంది. నిపుణుల ప్రకారం హెల్తీ రిలేషన్‌షిప్‌కు ఓపెన్, నిజాయతీగల కమ్యూనికేషన్ చాలా అవసరం. అది లేకపోతే అపార్థాలు పెరిగి సంబంధం బలహీనపడుతుంది.

ప్రతి జంటలో విభేదాలు సహజమే అయినా, తరచూ జరిగే తగాదాలు, పరస్పర గౌరవం లేకుండా మాట్లాడటం లేదా ఒకరిని ఒకరు నిందించడం వంటి అలవాట్లు పెరిగితే అవి సంబంధాన్ని నెమ్మదిగా దెబ్బతీస్తాయి. నిపుణుల ప్రకారం సమస్యలను ప్రశాంతంగా చర్చించడం నేర్చుకోకపోతే, అవి పెద్ద విభేదాలకు దారి తీస్తాయి.

ఒకసారి నమ్మకం దెబ్బతింటే దాన్ని తిరిగి పొందడం చాలా కష్టం. పార్ట్నర్ మాటలు, చర్యలపై అనుమానాలు రావడం, ఫోన్ లేదా సోషల్ మీడియా చెక్ చేయాలనే కోరిక పెరగడం వంటి లక్షణాలు కనిపిస్తే అది రిలేషన్‌షిప్‌లో అస్థిరతను సూచిస్తుంది. నిపుణుల ప్రకారం నమ్మకం అనేది సంబంధానికి పునాది వంటిది. అది బలహీనపడితే సంబంధం నిలబడటం కష్టం.

ముందుగా ఒకరితో ఒకరు సమయం గడపాలని అనిపించినా.. రాను రాను కలిసి ఉండాలనే ఆసక్తి తగ్గిపోవడం, వ్యక్తిగతంగా దూరం పెరగడం వంటి మార్పులు కనిపిస్తే అది భావోద్వేగ దూరాన్ని సూచిస్తుంది. ఇది కొనసాగితే ఇద్దరి మధ్య అనుబంధం నెమ్మదిగా క్షీణిస్తుంది.

ఒకప్పుడు కలిసి ప్లాన్ చేసిన విషయాలు మళ్లీ చర్చకు రాకపోవడం కూడా సంబంధంలో దూరాన్ని తెలియజేస్తుంది. భవిష్యత్తు గురించి మాట్లాడటానికి ఇష్టపడకపోవడం వంటివి ఆ సంబంధంపై ఒకరికి లేదా ఇద్దరికీ నమ్మకం తగ్గిపోయిందని సూచిస్తాయి.

నిపుణుల ప్రకారం ఈ సంకేతాలు కనిపించాయి అంటే సంబంధం పూర్తిగా ముగిసిపోయిందని కాదు, కానీ అది ప్రమాదంలో ఉందని హెచ్చరికగా తీసుకోవాలి. ఇలాంటి పరిస్థితుల్లో మొదటగా చేయాల్సింది ఓపెన్‌గా మాట్లాడటం. ఒకరిపై ఒకరు నిందలు వేయకుండా, తమ భావాలను స్పష్టంగా చెప్పడం చాలా ముఖ్యం. అలాగే ఒకరిని ఒకరు అర్థం చేసుకోవడానికి ప్రయత్నించడం, సమయం కేటాయించడం, చిన్న చిన్న విషయాల్లో కృతజ్ఞత చూపించడం వంటి చర్యలు సంబంధాన్ని మళ్లీ బలోపేతం చేయడంలో సహాయపడతాయి.

Illicit Affair : భార్య వివాహేతర సంబంధం .. పిల్లల DNA టెస్ట్ ద్వారా భర్త నిరూపించవచ్చా..? ఎవిడెన్స్ యాక్ట్ ఏం చెబుతోంది..?

Arun Kumar P — Wed, 01 Apr 2026 11:30:55 +0530

భార్య వివాహేతర సంబంధం కలిగివుంటే ఆ భర్త విడాకులు కోరవచ్చు. కానీ దీన్ని నిరూపించేందుకు పిల్లల DNA Test కోరవచ్చా..? ఇండియన్ ఎవిడెన్స్ యాక్ట్ ఏం చెబుతోంది..?

Illicit Affair : ఈ కలికాలంలో మానవ బంధాలకు విలువే లేకుండా పోయింది. ముఖ్యంగా భార్యాభర్తల మధ్య అనుబంధం బాగా తగ్గిపోయింది... చివరకు ఒకరిని ఒకరు మోసం చేసుకునే స్థాయికి చేరింది. కొందరు భార్యలు భర్తకు తెలియకుండా... కొందరు భర్తలు భార్యకు తెలియకుండా ఇతరకులతో శారీరక సంబంధాలు కొనసాగిస్తున్నారు... ఇలాంటి ఘటనలు అనేకం వెలుగుచూస్తున్నాయి. ఈ వివాహేతర సంబంధాలు పచ్చని సంసారాల్లో చిచ్చు పెడుతున్నాయి... చివరకు విడాకులు తీసుకునేలా చేస్తున్నాయి.

అయితే భార్యపై అనుమానంతో భర్త విడాకులు కోరవచ్చా..? భార్య వివాహేతర సంబంధాన్ని కలిగివుందని నిరూపించేందుకు పిల్లల డిఎన్ఏ టెస్ట్ కోరవచ్చా..? ఇలాంటి సమయంలో కోర్టు ఎలా వ్యవహరిస్తుంది.. న్యాయశాస్త్రం ఏం చెబుతోంది అనేది ఇక్కడ తెలుసుకుందాం.

భార్యాభర్తల గొడవలోకి పిల్లలను లాగడం మంచిది కాదు.. ఇదే విషయాన్ని న్యాయశాస్త్రం కూడా చెబుతోంది. భార్య వివాహేతర సంబంధాన్ని నిరూపించేందుకు భర్త DNA టెస్ట్ కోరలేడని ఇప్పటికే పలు కేసుల్లో కోర్టులు తేల్చాయి. పిల్లలు తనకు పుట్టలేరంటూ... తన భార్య ఇతరులతో పిల్లలను కందని వాదించినా కోర్టు దాన్ని పరిగణలోకి తీసుకోదు. పిల్లలను వాడకుండా ఇతర మార్గాల్లో భార్య వివాహేతర సంబంధాన్ని నిరూపిస్తే విడాకులు మంజూరు చేసే అవకాశాలుంటాయి.

కోర్టు ఏ నిర్ణయం తీసుకోవాలన్నా ఎవిడెన్స్ తప్పనిసరి... అయితే దీని ప్రకారం విడాకుల కేసులో పిల్లలను ఆధారంగా వాడలేమని ఇది చెబుతోంది. ముఖ్యంగా వివాహేతర సంబంధాలను నిరూపించేందుకు పిల్లలను ఎవిడెన్స్ టూల్ గా ఉపయోగించలేమని చెబుతోంది. ఇది పిల్లల వ్యక్తిగత ప్రతిష్ఠకు భంగం కలిగిస్తుంది.. కాబట్టి స్వయంగా తండ్రి DNA టెస్ట్ కోరినా కోర్టు అనుమతించదు. చిన్నపిల్లల గౌరవం, ప్రైవసీకి భంగం కలిగించే ఏ చర్యలనైనా కోర్టు వ్యతిరేకిస్తుంది.

ఇటీవల ఓ వ్యక్తి తన భార్యకు వివాహేతర సంబంధం ఉంది... కాబట్టి విడాకులు మంజూరు చేయాలని కోర్టును కోరాడు. ఈ క్రమంలోనే అతడు పిల్లలు కూడా తనకు పుట్టలేదని కోర్టుకు తెలియజేశాడు... DNA టెస్ట్ చేయాలని పిటిషన్ దాఖలుచేశాడు. కానీ ఎవిడెన్స్ యాక్ట్ దీన్ని అనుమతించదని కోర్టు స్పష్టం చేసింది. దీన్ని కోరిన సదరు పిటిషనర్ కి రూ.3000 జరిమానా విధించింది. DNA టెస్ట్ ద్వారా కాకుండా ఇతర మార్గాల్లో అక్రమ సంబంధాన్ని నిరూపించాలి... అంతేగానీ పిల్లలను ఉపయోగించరాదని కోర్టు సూచించింది.

Relationship: సోషల్ మీడియా భార్యా భర్తల మధ్య చిచ్చు పెడుతోందా? నిపుణుల మాట ఇదే!

Kavitha G — Fri, 13 Mar 2026 15:46:58 +0530

ప్రస్తుతం సోషల్ మీడియా మన జీవితంలో భాగమైపోయింది. ఉదయం నుంచి రాత్రి వరకు చాలామంది జీవితాలు సోషల్ మీడియా చుట్టూ తిరుగుతున్నాయి. అయితే ఇది భార్యాభర్తల మధ్య దూరం పెంచుతోందా అనే డౌట్ చాలామందిలో ఉంటుంది. దానిపై సైకాలజీ నిపుణులు ఏం చెబుతున్నారో చూద్దాం.

ఫేస్‌బుక్, ఇన్‌స్టాగ్రామ్, వాట్సాప్, ట్విట్టర్ వంటి సోషల్ మీడియా ప్లాట్‌ఫారమ్‌లు సమాచారాన్ని పంచుకోవడానికి, స్నేహాలను కొనసాగించడానికి, వినోదం పొందడానికి ఎంతగానో ఉపయోగపడతాయి. కానీ ఇదే సోషల్ మీడియా భార్యాభర్తల మధ్య అనుకోని దూరాలను సృష్టిస్తోందా అనే ప్రశ్న ప్రస్తుతం ఎక్కువగా వినిపిస్తోంది. మరి దాంపత్య జీవితం మీద సోషల్ మీడియా ప్రభావం ఎంతవరకు ఉందో, సైకాలజీ నిపుణులు ఏం చెబుతున్నారో ఇక్కడ వివరంగా తెలుసుకుందాం.

సైకాలజీ నిపుణుల ప్రకారం, సోషల్ మీడియాలో ఎక్కువ సమయం గడపడం వల్ల దంపతుల మధ్య ప్రత్యక్ష సంభాషణలు తగ్గిపోతాయి. ఒకప్పుడు రోజువారీ విషయాలు, భావాలు, సమస్యలు గురించి మాట్లాడుకునే సమయం ఉండేది. కానీ ఇప్పుడు చాలా మంది భాగస్వాములు ఫోన్‌లలో మునిగిపోయి ఉండటం వల్ల ఆ సంభాషణలు తగ్గిపోతున్నాయి.

దీనివల్ల ఒకరిపై ఒకరికి ఉన్న భావోద్వేగ అనుబంధం కొద్ది కొద్దిగా తగ్గే ప్రమాదం ఉందని నిపుణులు చెబుతున్నారు. ముఖ్యంగా ఒకరు మాట్లాడాలనుకునే సమయంలో మరొకరు ఫోన్‌లో బిజీగా ఉంటే, నన్ను పట్టించుకోవడం లేదు అనే భావన కలగడం సహజం. ఆ భావన క్రమంగా అసంతృప్తికి, తర్వాత చిన్న చిన్న గొడవలకు దారి తీస్తుందని చెబుతున్నారు.

చాలామంది తమ జీవితంలోని సంతోషకరమైన క్షణాలను మాత్రమే సోషల్ మీడియాలో పోస్ట్ చేస్తుంటారు. ఆ ఫోటోలు, వీడియోలు చూస్తున్నప్పుడు వేరే వాళ్ల జీవితం చాలా పర్ఫెక్ట్‌గా ఉందనే భావన కలగవచ్చు. సైకాలజీ నిపుణుల ప్రకారం ఈ పోలికలు మనసులో అసంతృప్తిని పెంచుతాయి. “వాళ్లు సంతోషంగా ఉన్నారు. మనం ఎందుకు లేము?” అనే ఆలోచన తెలియకుండానే మనసులోకి వస్తుంది. ఈ విధమైన పోలికలు భార్యాభర్తల మధ్య అసహనం, అసంతృప్తి పెరగడానికి కారణం కావచ్చని నిపుణులు హెచ్చరిస్తున్నారు.

అలాగే సోషల్ మీడియాలో అనవసరమైన అనుమానాలు కూడా సంబంధాలపై ప్రభావం చూపుతాయి. ఎవరో వ్యక్తి చేసిన కామెంట్, లైక్ లేదా చాట్‌ను తప్పుగా అర్థం చేసుకోవడం వల్ల అనుమానాలు మొదలయ్యే అవకాశముంటుంది. సైకాలజీ నిపుణుల ప్రకారం, మనసులో ఒకసారి అనుమానం మొదలైతే అది పెరుగుతూ ఉంటుంది తప్ప తగ్గదు. సరైన కమ్యూనికేషన్ లేకపోతే చిన్న విషయం కూడా పెద్ద సమస్యగా మారే అవకాశం ఉంటుంది.

మరోవైపు, సోషల్ మీడియా వల్ల మంచి ప్రయోజనాలు కూడా ఉన్నాయి. దూరంగా ఉన్నప్పుడు ఒకరితో ఒకరు కనెక్ట్‌ కావడానికి ఇది సహాయపడుతుంది. ముఖ్యంగా ఉద్యోగాల వల్ల వేర్వేరు నగరాల్లో ఉండే దంపతులకు ఇది అనుబంధాన్ని కొనసాగించడానికి ఉపయోగపడుతుంది. కానీ ఆన్‌లైన్‌లో గడిపే సమయాన్ని పరిమితం చేయడం చాలా అవసరం. ఇంట్లో కలిసి ఉన్నప్పుడు ఫోన్‌లను పక్కన పెట్టి మాట్లాడుకోవడం, కలిసి సమయం గడపడం వంటి అలవాట్లు బంధాన్ని బలోపేతం చేస్తాయని నిపుణులు సూచిస్తున్నారు.

కుటుంబంతో ఉండే సమయాల్లో సోషల్ మీడియాను తగ్గించడం చాలా అవసరం. అంటే భోజనం చేసే సమయంలో లేదా నిద్రపోయే ముందు కొంత సమయం ఫోన్‌లను దూరంగా పెట్టడం మంచిది. ఇలా చేయడం వల్ల దంపతుల మధ్య సంభాషణలు పెరుగుతాయి, పరస్పర అవగాహన మెరుగుపడుతుంది. అలాగే సోషల్ మీడియాలో చూసిన విషయాల వల్ల మనసులో సందేహాలు కలిగితే వెంటనే గొడవపడకుండా, ప్రశాంతంగా మాట్లాడుకోవడం మంచిదని నిపుణులు సూచిస్తున్నారు.

Relationship Tips: రిలేషన్ షిప్‌లో ఈ 3 తప్పులు చేశారంటే.. బంధం తెగిపోవడం ఖాయం!

Kavitha G — Thu, 23 Apr 2026 15:33:39 +0530

ప్రేమ బంధం నిలబడాలంటే కొన్ని విషయాల్లో జాగ్రత్త అవసరం. ముఖ్యంగా ప్రవర్తన. కొన్ని చిన్నచిన్న అలవాట్లు, మాటలు, స్పందన ఒక బంధాన్ని బలంగా మార్చగలవు, లేదా దెబ్బతీయగలవు. మనం తెలియక చేసే కొన్ని చిన్న తప్పులు సంబంధంలో దూరాన్ని పెంచుతాయి. అవేంటో చూద్దాం.

ప్రేమ బంధం అనేది ఇద్దరు వ్యక్తుల భావోద్వేగాలు, నమ్మకం, పరస్పర గౌరవం, నిజాయతీతో నిర్మించబడే ఒక బలమైన బంధం. అయితే ఒక వ్యక్తి అలవాట్లు లేదా నిర్లక్ష్యపు ప్రవర్తన ఈ బంధాన్ని క్రమంగా దెబ్బతీయవచ్చు. ముఖ్యంగా మూడు సాధారణ తప్పులు చాలా సంబంధాలను దెబ్బతీస్తాయి. అవి చిన్న తప్పులుగా అనిపించినా వాటి ప్రభావం మాత్రం చాలా లోతుగా ఉంటుంది. మరి రిలేషన్ షిప్ లో అస్సలు చేయకూడని తప్పులేంటో తెలుసుకుందామా…

చాలామంది తమ భావాలను, ఆలోచనలను లేదా సమస్యలను చెప్పకుండా మనసులోనే దాచుకుంటారు. మొదట్లో ఇది గొడవలు తప్పించుకోవడానికి అనిపించినా, దీర్ఘకాలంలో అది అపార్థాలకు దారి తీస్తుంది. మీ భాగస్వామి మీలో ఏం జరుగుతోందో అర్థం చేసుకోలేకపోతారు. దాంతో దూరం పెరుగుతుంది. నిజానికి, ఓపెన్ కమ్యూనికేషన్ అనేది ఏ సంబంధానికైనా పునాది లాంటిది. మనసులో ఉన్నది స్పష్టంగా, గౌరవంగా చెప్పడం వల్ల మాత్రమే ఒకరినొకరు బాగా అర్థం చేసుకునే అవకాశం ఉంటుంది.

గతంలో చేసిన తప్పులను పదేపదే ఎత్తిచూపడం కూడా సంబంధాన్ని తీవ్రంగా దెబ్బతీస్తుంది. ఒకసారి జరిగిన తప్పును క్షమించి ముందుకు సాగాలి. కానీ కొందరు చిన్న గొడవ వచ్చినా, పాత విషయాలను తిరిగి తెరపైకి తీసుకొస్తారు. ఇది భాగస్వామికి బాధ కలిగించడమే కాకుండా, సంబంధంలో నమ్మకాన్ని కూడా తగ్గిస్తుంది. ప్రతిసారి పాత విషయాన్ని గుర్తుచేయడం వల్ల, ఎదుటివారు తమను తాము మార్చుకోవడానికి ఆసక్తి కోల్పోతారు. ఒక సంబంధం ఆరోగ్యంగా ఉండాలంటే, క్షమించడం నేర్చుకోవాలి. గతాన్ని గతంగా వదిలేయాలి.

భాగస్వామి భావాలను నిర్లక్ష్యం చేయడం అత్యంత ప్రమాదకరమైన తప్పుల్లో ఒకటి. ఒక వ్యక్తి తన భావాలను వ్యక్తపరిచినప్పుడు, వాటిని గౌరవంగా వినడం అవసరం. కానీ కొందరు ఎదుటి వారు చెప్పిన విషయాన్ని చాలా తేలికగా తీసుకుంటారు. ఇది భాగస్వామికి తమ భావాలకు విలువ లేదనే భావనను కలిగిస్తుంది. దీర్ఘకాలంలో ఇది భావోద్వేగ దూరాన్ని పెంచుతుంది. ప్రతి వ్యక్తి భావాలు ముఖ్యమైనవే, అవి చిన్నవైనా పెద్దవైనా. వినడం, అర్థం చేసుకోవడం, సహానుభూతితో స్పందించడం వల్ల బంధం బలంగా ఉంటుంది.

ఒక సంబంధాన్ని నిలబెట్టుకోవడం అనేది ప్రేమతో మాత్రమే సాధ్యం కాదు. సరైన ప్రవర్తన, పరస్పర గౌరవం, జాగ్రత్తలతో కలిసి ఉంటుంది. మనసు విప్పి మాట్లాడటం, గతాన్ని వదిలేయడం, భాగస్వామి భావాలను గౌరవించడం వంటి చిన్న మార్పులు పెద్ద ఫలితాలను ఇస్తాయి. ఈ మూడు తప్పులకు దూరంగా ఉంటే మీ సంబంధం మరింత బలంగా, ఆనందంగా మారుతుంది.

వివాహేత‌ర సంబంధాల్లో దేశంలో ఏ న‌గ‌రం మొద‌టి స్థానంలో ఉందో తెలుసా.? తెలుగు వారు కూడా

Narender Vaitla — Thu, 12 Mar 2026 10:03:10 +0530

Extramarital Affair: స‌మాజంలో వివాహేత‌ర సంబంధాలు పెరుగుతున్నాయి. ఇలాంటి వారి కోసం ఆన్‌లైన్ సేవ‌లు కూడా అందుబాటులోకి వ‌స్తున్నాయి. ఇలాంటి ఓ డేటింగ్ ప్లాట్‌ఫామ్ తాజాగా విడుద‌ల చేసిన రిపోర్ట్‌లో సంచ‌ల‌న విష‌యాలు వెలుగులోకి వ‌చ్చాయి.

వివాహితుల కోసం రూపొందించిన డేటింగ్ ప్లాట్‌ఫారమ్ Ashley Madison విడుదల చేసిన 2025 రిపోర్ట్‌లో భారతదేశంలో వివాహేత‌ర సంబంధాల‌పై ఉన్న‌ ఆసక్తికర విషయాలు బయటపడ్డాయి. ఈ ప్లాట్‌ఫామ్ యూజర్ డేటా ఆధారంగా రూపొందించిన రిపోర్ట్ ప్రకారం, వివాహితులు బయట సంబంధాలు పెట్టుకునే ట్రెండ్ భారత్‌లో వేగంగా పెరుగుతోంది. ముఖ్యంగా చిన్న పట్టణాల్లో కూడా ఈ ట్రెండ్ పెరుగుతున్నట్టు రిపోర్ట్ చెబుతోంది. ఈ రిపోర్ట్ ప్రకారం ప్లాట్‌ఫామ్‌లో సైన్‌అప్స్, యూజర్ల యాక్టివిటీ ఆధారంగా కొన్ని నగరాలు, జిల్లాల్లో ఎక్కువగా ఈ తరహా యాక్టివిటీ ఉన్నట్టు గుర్తించారు.

సాధారణంగా పెద్ద నగరాల్లో లైఫ్‌స్టైల్, సంబంధాల తీరు భిన్నంగా ఉంటుందని భావిస్తారు. కానీ తాజా రిపోర్ట్ ఆ అభిప్రాయాన్ని కొంతవరకు మార్చింది. వివాహేత‌ర సంబంధాలు పెద్ద నగరాలకే పరిమితం కాకుండా చిన్న పట్టణాల్లో కూడా పెరుగుతున్నట్టు తెలిసింది. ఇటీవల కాలంలో చిన్న పట్టణాల నుంచి ఈ డేటింగ్ ప్లాట్‌ఫామ్‌కు కొత్తగా చేరుతున్న యూజర్ల సంఖ్య గణనీయంగా పెరిగిందని రిపోర్ట్‌ పేర్కొంది.

ఈ జాబితాలో తమిళనాడులోని కాంచీపురం నగరం మొదటి స్థానంలో నిలిచింది. గత సంవత్సరం ఈ నగరం 17వ స్థానంలో ఉండగా, ఒక్క ఏడాదిలోనే నేరుగా మొదటి స్థానానికి చేరడం గ‌మ‌నార్హం. సాధారణంగా దేవాలయాలు, పట్టు చీరల తయారీకి ప్రసిద్ధి చెందిన ఈ నగరం ఇప్పుడు ఈ రిపోర్ట్ కారణంగా మరో కోణంలో చర్చకు వచ్చింది.

ఈ జాబితాలో రెండో స్థానంలో సెంట్రల్ ఢిల్లీ ఉంది. అదే విధంగా ఢిల్లీలోని మరికొన్ని ప్రాంతాలు కూడా టాప్-20 జాబితాలో చోటు దక్కించుకున్నాయి. వాటిలో సౌత్ వెస్ట్ ఢిల్లీ, ఈస్ట్ ఢిల్లీ, సౌత్ ఢిల్లీ, వెస్ట్ ఢిల్లీ, నార్త్ వెస్ట్ ఢిల్లీ లాంటి ప్రాంతాలు ఉన్నాయి. అలాగే ఎన్‌సీఆర్ ప్రాంతాల్లోని గురుగ్రామ్, నోయిడా, గాజియాబాద్ నగరాలు కూడా ఈ జాబితాలో ఉన్నాయి. మొత్తం టాప్-20లో ఢిల్లీ–ఎన్‌సీఆర్ ప్రాంతాల నుంచి 9 ప్రాంతాలు ఉండటం గమనార్హం.

ఈ రిపోర్ట్ ప్రకారం ఎక్కువ యాక్టివిటీ ఉన్న ప్రాంతాలు ఇవే. కాంచీపురం, సెంట్రల్ ఢిల్లీ, గురుగ్రామ్, గౌతమ్ బుద్ధ నగర్ (నోయిడా), సౌత్ వెస్ట్ ఢిల్లీ, డెహ్రాడూన్, ఈస్ట్ ఢిల్లీ, పుణే, బెంగళూరు, సౌత్ ఢిల్లీ, చండీగఢ్, లక్నో, కోల్‌కతా, వెస్ట్ ఢిల్లీ, కామరూప్, నార్త్ వెస్ట్ ఢిల్లీ, రాయగఢ్, హైదరాబాద్, గాజియాబాద్, జైపూర్. ఈ జాబితాలో ఒక ఆసక్తికర విషయం ఏమిటంటే సాధారణంగా పెద్ద నగరంగా గుర్తింపు ఉన్న ముంబై మాత్రం టాప్-20లో కనిపించలేదు.

నిపుణుల అభిప్రాయం ప్రకారం ఇలాంటి సంబంధాలు పెరగడానికి అనేక కారణాలు ఉన్నాయి. పెరుగుతోన్న ప‌ని గంట‌లు, దాంపత్యంలో భావోద్వేగ దూరం పెర‌గ‌డం, జంట‌ల్లో వ్యక్తిగత స్వేచ్ఛ పెరగడం, పెద్ద నగరాల్లో గోప్యత ఎక్కువగా ఉండటం వంటివి ఈ ట్రెండ్ పెర‌గ‌డానికి కార‌ణాలుగా చెబుతున్నారు. అలాగే ఆన్‌లైన్ ప్లాట్‌ఫామ్‌లు రావడంతో కొత్త వ్యక్తులను గోప్యంగా కలుసుకోవడం చాలా సులభమైందని నిపుణులు చెబుతున్నారు. ఒక సర్వే ప్రకారం భారత్, బ్రెజిల్ దేశాల్లో ఎక్కువ మంది తమ జీవితంలో ఎప్పుడో ఒక సమయంలో ఎక్స్‌ట్రా మ్యారిటల్ రిలేషన్ ఉన్నట్టు అంగీకరించారు. సర్వేలో పాల్గొన్న భారతీయుల్లో సుమారు 53 శాతం మంది తమకు ఎప్పుడో ఒకసారి బయట సంబంధం ఉన్నట్టు చెప్పారు.

Relationship: 90 శాతం మందికి ప్రేమ‌కు అస‌లైన‌ అర్థం ఏంటో తెలియ‌దు.. మీకు తెలుసా.?

Narender Vaitla — Sat, 11 Apr 2026 08:03:10 +0530

Relationship: భార్య‌భ‌ర్త‌ల సంబంధం అంటే కేవ‌లం క‌లిసి జీవించ‌డమే కాదు. అది ఒకరికొకరు అండగా నిలబడే, ఒకరినొకరు మెరుగుపరుచుకునే పవిత్రమైన బంధం. ఈ సంబంధంలో ధర్మం, నమ్మకం, గౌరవం, త్యాగం ఉంటేనే నిజమైన ప్రేమ మొదలవుతుంది.

భార్యాభర్తల సంబంధాన్ని ఒక రథానికి ఉన్న రెండు చక్రాలతో పోలుస్తారు. ఒక చక్రం సరిగా పనిచేయకపోతే రథం ముందుకు వెళ్లదు. అదే విధంగా భార్యాభర్తలు ఇద్దరూ కలిసి నడిస్తేనే కుటుంబ జీవితం సాఫీగా సాగుతుంది. ఈ బంధంలో ఒకరు మరొకరికి పోటీగా కాకుండా, పరస్పరం సహకరించే భాగస్వాములుగా ఉండాలి. బాధ్యతలు పంచుకుంటేనే కుటుంబం బలంగా నిలుస్తుంది.

చాలామంది ప్రేమ అంటే కేవలం భావోద్వేగం లేదా ఆకర్షణ అని భావిస్తారు. కానీ నిజమైన ప్రేమకు కొన్ని ముఖ్యమైన లక్షణాలు ఉన్నాయి. ఎలాంటి షరతులు లేకుండా ఒకరినొకరు అంగీకరించడం, కష్టసమయంలో అండగా నిలబడటం, అహంకారాన్ని పక్కనపెట్టి బంధాన్ని ముందుకు పెట్టడం, ఒకరి భావాలను మరొకరు అర్థం చేసుకోవడం వంటి లక్షణాలు ఉన్నప్పుడు మాత్రమే భార్యాభర్తల మధ్య ప్రేమ బలంగా ఉంటుంది.

అథర్వవేదంలో భార్యాభర్తల బంధం గురించి ఒక ముఖ్యమైన సందేశం ఉంది. “త‌ల్లి తన పిల్లను ఎలా ప్రేమిస్తుందో, అలాగే భార్యాభర్తలు ఒకరినొకరు ప్రేమించాలి. భూమిలా స్థిరంగా ఉండాలి. కష్టాల్లో కూడా ధర్మం వదలకుండా నిలబడాలి” అనే భావం ఈ మంత్రంలో ఉంది. దీనిలో చెప్పిన ముఖ్యమైన విషయం ఏమిటంటే ప్రేమ కేవలం ఆకర్షణ కాదు. అది తల్లిప్రేమలాంటిది – స్వార్థం లేకుండా ఉండే ప్రేమ.

హిందూ సంప్రదాయంలో వివాహాన్ని కేవలం ఒక సామాజిక ఒప్పందంగా చూడరు. దాన్ని గృహస్థాశ్రమం అని పిలుస్తారు. ఈ దశలో భార్యాభర్తలు ఇద్దరూ కలిసి జీవితం నిర్మించాలి. ఒకరి విజయానికి మరొకరు తోడుగా ఉండాలి. భగవాన్ శివుడు, పార్వతి దేవి దాంపత్యం దీనికి మంచి ఉదాహరణగా చెప్తారు. వారు ఒకరికి ఒకరు బలంగా నిలబడి కుటుంబ జీవనానికి ఆదర్శంగా నిలిచారు.

ధార్మిక గ్రంథాల ప్రకారం ప్రేమ నిలవాలంటే గౌరవం, నమ్మకం చాలా అవసరం. ఒకరిపై ఒకరికి విశ్వాసం లేకపోతే బంధం బలహీనమవుతుంది. రాముడు, సీతాదేవి దాంపత్య జీవితం ఈ విషయాన్ని స్పష్టంగా చూపిస్తుంది. వారి బంధంలో గౌరవం, నమ్మకం, ధర్మం ప్రధానంగా ఉన్నాయి. అందుకే భార్యాభర్తలు ఒకరి భావాలను మరొకరు అర్థం చేసుకోవాలి. పరస్పరం గౌరవించాలి. అదే నిజమైన ప్రేమకు పునాది.

Husband Names in India: భర్తలను ఏ రాష్ట్రంలో ఎలా పిలుస్తారో తెలుసా?

Kavitha G — Wed, 01 Apr 2026 13:12:43 +0530

మన దేశం సాంస్కృతిక వైవిధ్యంతో నిండిన దేశం. ప్రతి రాష్ట్రానికి ప్రత్యేకమైన భాష, సంప్రదాయం ఉంటాయి. అదే విధంగా భర్తలను పిలిచే తీరు కూడా భిన్నంగా ఉంటుంది. ఏయే రాష్ట్రాల్లో భార్యలు, భర్తలను ఏ పేర్లతో పిలుస్తారో ఇక్కడ తెలుసుకుందాం.

Sudha Murty Tips : ఈ టైమ్ లో భర్తను ఏదడిగినా కాదనరు..: భార్యలకు సుధామూర్తి చిట్కాలు

Arun Kumar P — Sat, 25 Apr 2026 21:17:24 +0530

ఇన్ఫోసిస్ నారాయణ మూర్తి, సుధా దంపతులు తమ నిరాడంబరమైన జీవితానికి, అన్యోన్య దాంపత్యానికి పెట్టింది పేరు. అయితే తాజాగా భార్యలు తమకు ఏదైనా కావాలన్నప్పుడు భర్తను ఏ సమయంలో అడగాలో సుధామూర్తి తెలిపారు... తాను నారాయణమూర్తిని అలాగే అడుగుతానని వెల్లడించారు.

ఇన్ఫోసిస్ నారాయణ మూర్తి, సుధా మూర్తి దంపతులు కోటీశ్వరులైనా తమ సింపుల్ లైఫ్ స్టైల్ తో ఆకట్టుకుంటారు. ఇన్ఫోసిస్‌లో ఈ దంపతులు, వారి పిల్లలందరి వాటా కలిపి సుమారు 30 వేల కోట్ల రూపాయలు ఉంటుంది. అయినా వారు చాలా సాధారణ జీవితం గడుపుతారు.

సుధామూర్తి అయితే సింపుల్ చీరలు కట్టుకుంటారు… ఎలాంటి బంగారు నగలు ధరించరు. ఎంత డబ్బు, ఆస్తి, హోదా ఉన్నా కూడా వాటిని ఎప్పుడూ బయటకు చూపించకుండా అందరితో కలిసిపోతారు. తన సాధారణ జీవితంలోనే ఆనందాన్ని వెతుక్కుంటూ అందరికీ ఆదర్శంగా నిలుస్తున్నారు. ఆమె మనసు పెడితే కోట్లు విలువ చేసే వజ్రాభరణాలు ధరించగలరు… కానీ ఆడంబరాలకు ఆమె చాలా దూరం.

అయితే అప్పుడప్పుడు సంతోషకరమైన వైవాహిక జీవితానికి కొన్ని చిట్కాలు ఇస్తుంటారు సుధామూర్తి. తాజాగా ఓ సరదా విషయాన్ని ఆమె పంచుకున్నారు. భర్తలు తమ భార్యల మాటలు వినకుండానే 'సరే' అని ఎప్పుడు అంటారో ఆమె చెప్పేశారు.

సుధా మూర్తి ప్రకారం... భర్త పేపర్ చదువుతున్నప్పుడు భార్య ఏం అడిగినా అస్సలు పట్టించుకోరట. వారి పూర్తి ధ్యాస పేపర్ చదవడంపైనే ఉంటుంది.... కాబట్టి భార్య ఏమైనా అడిగితే వెంటనే 'సరే' అనేస్తారట. తాను కూడా ఇలాగే చాలాసార్లు చేశానని చెప్పుకొచ్చారు సుధామూర్తి.

అయితే ఓసారి ఇలాగే నారాయణమూర్తి పేపర్ చదువుతుండగా ఓ గిప్ట్ అడిగానని... కానీ ఆయనతో సరే అనిపించుకోలేకపోయానని ఓ సరదా సంఘటనను సుధామూర్తి బైటపెట్టారు. ‘’'ఎప్పటిలాగే మూర్తి పేపర్ చదువుతుండగా నేను మూడు కోట్ల రూపాయల నగల కొంటానని చెప్పాను. కానీ ఈసారి నేను అనుకున్నది జరగలేదు. నా మాటలు విని వెంటనే మూర్తి పేపర్ పక్కన పెట్టి నాకు చిన్న క్లాప్ పీకారు. ఇంత డబ్బుపెట్టి కొంటే నష్టం ఏమీ లేదు... కానీ నువ్వు 30 రూపాయల వస్తువు కొనడానికే ఆలోచిస్తావు. అలాంటిది 3 కోట్ల రూపాయల నగలు కొంటావా..? అస్సలు కొనవులే..'' అన్నారని సుధామూర్తి తెలిపారు.

గతంలో దాంపత్య జీవితం గురించి సుధా మూర్తి ఓ మంచి సలహా ఇచ్చారు. భార్యాభర్తల గొడవలో ఒకరు కోపంగా ఉన్నప్పుడు, మరొకరు ప్రశాంతంగా ఉండాలి… అస్సలు నోరు తెరవకూడదు. 'మూర్తి (నారాయణ్) కోపంగా ఉన్నప్పుడు, నేను మౌనంగా ఉంటాను. ఆయన ఏది చెప్పాలనుకుంటే అది చెప్పనిస్తాను. నేను మాత్రం మాట్లాడను' అని సుధామూర్తి పేర్కొన్నారు.

Relationships: మూడేళ్ల మా ప్రేమను అబ్బాయి అమ్మానాన్న ఎంత దారుణంగా చంపేశారో తెలుసా?

Haritha Chappa — Fri, 06 Mar 2026 20:00:50 +0530

Relationships: మూడేళ్ల ప్రేమను ఎంత తెలివిగా అబ్బాయి తల్లిదండ్రులు దూరం చేశారో ఒక అమ్మాయి మనతో షేర్ చేసుకుంది. చివరికి వారి ప్రేమకథ కంచికి చేరిందా? లేక కథగానే మిగిలిపోయిందా తెలుసుకోండి.

మూడు సంవత్సరాలుగా నేను ప్రేమలో ఉన్నాను. ఆ అబ్బాయి కూడా ఎంతో నిజాయితీ ఉన్న వ్యక్తి. మొదట మా పరిచయం సాధారణంగానే సాగింది. కొద్దిగా మాట్లాడుకుంటూ.. అర్థం చేసుకున్నాం. ఆ తర్వాతే ప్రేమికులుగా మారాము. ఒకరిపై ఒకరికి ఎంతో నమ్మకం. ఎలాంటి పరిస్థితి వచ్చినా జీవితంలో ఎదుర్కొవాలని నిర్ణయించుకున్నాం. నేను ప్రేమించిన అబ్బాయి కష్టపడి చదివి బెంగళూరులో మంచి ఉద్యోగం సంపాదించాడు. అతను ఐటి ఉద్యోగం చేస్తూ ఎక్కువ జీతమే ఆర్జిస్తున్నాడు. నేను కూడా నా ఉద్యోగ జీవితాన్ని నిర్మించుకునే ప్రయత్నం మొదలు పెట్టాను. మా భవిష్యత్తు అందంగా ఉండాలంటే ఇద్దరం సంపాదించాల్సిందేనని ప్లాన్ చేసుకున్నాం. కాకపోతే మా కులమే పెద్ద అడ్డుగోడగా మారిపోయింది. మాది తక్కువ జాతి కులంగా చెప్పుకుంటారు. ఇక ఆయన ఒక పెద్ద కులానికి చెందిన వ్యక్తి. మేము మాంసాహారం తింటాం, వారు వాళ్లు మాత్రం తినరు. అయినా కూడా మా ప్రేమకు అవన్నీ అడ్డు కాలేదు. ఒకరోజు అనుకోకుండా మా ప్రేమ విషయం అతని అమ్మానాన్నకు తెలిసిపోయింది. ఇక మా జీవితంలో తుఫాను మొదలైంది.

నేను తక్కువ జాతి కులానికి చెందిన అమ్మాయినని తెలిశాక అతని తల్లిదండ్రులు మా అనుబంధాన్ని పూర్తిగా చెడగొట్టడానికి నిర్ణయించుకున్నారు. మా ప్రేమను అంగీకరించలేదు. అతడిని ఉద్యోగం మానిపించి ఇంటికి రప్పించేందుకు ఎన్నో ప్రయత్నాలు చేశారు. ‘అమ్మ ఏడుస్తోంది, అమ్మ మందులు తీసుకోవడం లేదు’ అంటూ ప్రతిరోజు వేధించేవారు. ఇక అతని తాతగారు మనసు బాధగా ఉంది నేను ఎప్పుడు పోతానో ఏంటో ఇంటికి రారా అని పదే పదే పిలిచేవారు. కుటుంబం ప్రతిరోజు భావోద్వేగాలకు గురి చేయడంతో అతను గందరగోళానికి గురయ్యేవాడు. చివరికి ఇంటికి వెళ్ళాలని నిర్ణయించుకున్నాడు. అతను ఎప్పుడైతే ఆఫీసులో సెలవు అడిగి కొన్ని రోజులు ఇంటికి వెళ్ళాడో.. అతడి తల్లితండ్రి అతడిని ఇంట్లోనే ఉంచి బెంగళూరు వచ్చారు. అతను ఉంటున్న హాస్టల్ గదిని ఖాళీ చేయించి వస్తువులన్నీ తీసుకెళ్లిపోయారు. కనీసం అతనికి ఆ విషయం కూడా చెప్పలేదు. నేను పీజీ హాస్టల్ కి వెళ్ళినప్పుడు నాకు ఆ విషయం తెలిసింది.

ఇక అతను ఇంటికి చేరుకున్న తర్వాత పరిస్థితి దారుణంగా మారిపోయింది. మా ప్రేమకు ముగింపు పలకాల్సిందేనని అతనిపై ఒత్తిడి తెచ్చారు. ‘నీకు ఉద్యోగం ఉంది కాబట్టే మమ్మల్ని పట్టించుకోవడం లేదు’ అని ఉద్యోగానికి రాజీనామా కూడా చేయించారు. ఇంట్లోనే ఉంచి హౌస్ అరెస్ట్ చేశారు. ఆ సమయంలో అతను తీవ్రమైన మానసిక ఒత్తిడికి గురయ్యాడు.ఇంట్లో పరిస్థితులు చూశాక అతడు ఇలా బతకడం చాలా కష్టమేమో అని భావించాడు. ఒకరోజు నాకు ఫోన్ చేసి ఇక్కడితో మన ప్రయాణం ఆపేద్దామని చెప్పాడు. ఆ మాట విన్నాక నా హృదయం పగిలిపోయినట్లు అయింది. ఎంత ఏడ్చానో తెలియదు. అతడిని ఎంతగానో రిక్వెస్ట్ చేశాను. కానీ అతను ఇంట్లో ఉన్న పరిస్థితుల వల్ల మా ప్రేమను ముందుకు కొనసాగించేందుకు ఒప్పుకోలేదు. దాంతో మేము పూర్తిగా కొంతకాలం దూరం అయిపోయాము.

మనుషులమైతే దూరమయ్యాం.. కానీ మా మనసులు దూరం కాలేదు. ఒకరోజు మళ్ళీ అతను నాతో మాట్లాడాడు. అప్పుడు తన తల్లిదండ్రులకు చెప్పి మళ్ళీ ఉద్యోగంలో చేరానని చెప్పాడు. కొన్ని షరతులు పెట్టి మరీ వాళ్ళు ఉద్యోగానికి పంపించారని వివరించాడు. అయితే ఈసారి బెంగళూరుకు కాదు చెన్నైకి పంపించారు. కాలం గడుస్తూ ఉంది. మా ఇద్దరం కేవలం ఫోన్లలో కాసేపు మాట్లాడుకుంటున్నాం. ఒకరోజు ఏమైందో ఏమో తెలియదు నాకు ఫోన్ చేశాడు. మనిద్దరం రిజిస్టర్ మ్యారేజ్ చేసుకుంటే ఎవరు మనల్ని విడదీయలేరు అని చెప్పాడు. ఆ మాట వినగానే నాకు ఎంతో సంతోషంగా అనిపించింది. అప్పటి నుంచి మళ్లీ మా ఇద్దరం ఎక్కువగా మాట్లాడుకోవడం ప్రారంభించాం. భవిష్యత్తు గురించి ఆలోచించడం మొదలుపెట్టాం. రిజిస్టర్ మ్యారేజ్ చేసుకునేందుకు ప్లాన్ చేసుకున్నాం. కానీ నా మనసులో భయం మాత్రం పెరిగిపోయింది. అతని కుటుంబానికి ఈ విషయం తెలిస్తే ఎన్ని సమస్యలు సృష్టిస్తారో తెలియదు. మమ్మల్ని విడదీయడానికి వాళ్ళు ఏ స్థాయికి అయినా చేరుకుంటారు. చివరికి వాళ్లని వాళ్లు చంపుకోవడానికి కూడా వెనుకాడరు.

ప్రేమలో ఇన్ని అడ్డంకులు వస్తాయని నేను ముందు ఊహించలేదు. కులానికి, ప్రేమకు సంబంధం ఏమిటో నాకు అర్థం కావట్లేదు. నా జీవితంలో జరిగిన ఈ అనుభవం మీ అందరికీ తెలియాలని ఇలా చెబుతున్నా. నా కథ ఇంకా ముగిసిపోలేదు. కానీ ఏదో ఒక రోజు మంచి ముగింపు వస్తుందని.. మా ఇద్దరం సంతోషంగా జీవిస్తామని కోరుకుంటున్నా. మా పెళ్లి విషయం వాళ్ళ అమ్మా నాన్నకు తెలిశాక మా జీవితం ఎలా ఉంటుందో ఊహించడానికే భయమేస్తోంది.

Relationship : అంతరిక్షంలో శృంగారం సాధ్యమేనా..? నాసా ఏం చెబుతోంది?

Arun Kumar P — Tue, 07 Apr 2026 08:41:40 +0530

మనిషికి అత్యంత సహజమైన శారీరక అవసరాల్లో శృంగారం ఒకటి. మరి అంతరిక్షంలో వ్యోమగాములకు దీనికి అవకాశం ఉంటుందా..? ఈ విషయంపై సైన్స్, నాసా (NASA) ఏం చెబుతున్నాయో ఈ గ్యాలరీలో చూద్దాం.

స్పేస్ మిషన్లు ఇప్పుడు కేవలం పరిశోధనలకే పరిమితం కాలేదు. అంతరిక్షంలో మానవ నివాసాలను ఏర్పాటు చేసే దిశగా సాగుతున్నాయి. అయితే భూమిపై మాదిరిగానే అంతరిక్షంలో మనిషి సౌకర్యవంతంగా జీవించగలడా..? అన్న అనుమానం చాలామందిలో ఉంది. ముఖ్యంగా అంతరిక్షంలో సంసార జీవితం అంటే శృంగారం సాధ్యమేనా..? అనే ప్రశ్న తలెత్తుతోంది.

ఇప్పటివరకు ఏ వ్యోమగామి (Astronaut) అంతరిక్షంలో శారీరక సంబంధం పెట్టుకున్నట్లు అధికారికంగా ధృవీకరించలేదు. దీనికి సంబంధించిన ఎలాంటి రికార్డులు అందుబాటులో లేవు. అయితే అంతరిక్షంలో శారీరకంగా కలవకూడదని… వ్యోమగాముల వ్యక్తిగత ప్రవర్తనపై ఎలాంటి కఠినమైన నిబంధనలు లేవని నాసా ప్రతినిధి సాండ్రా జోన్స్ చెబుతున్నారు. అంటే అంతరిక్షంలో వ్యోమగాములు శృంగారంలో పాల్గొనకూడదనే ఆంక్షలు లేవు.

అయితే అంతరిక్షంలో గర్భం దాల్చడాన్ని మాత్రం నాసా పూర్తిగా నిషేధించింది. అక్కడి పరిస్థితులు గర్భధారణకు అనుకూలంగా ఉండవు… మైక్రోగ్రావిటీ, రేడియేషన్ (Radiation) కారణంగా తల్లి, బిడ్డ ఇద్దరికీ ప్రమాదకరమే. వ్యోమగాముల భద్రతను దృష్టిలో ఉంచుకుని నాసా గర్భధారణ అంతరిక్షంలో వద్దంటోంది.

అంతరిక్షంలో గురుత్వాకర్షణ లేకపోవడం వల్ల ఇద్దరు వ్యక్తులు స్థిరంగా ఉండటం చాలా కష్టం. కొద్దిగా ముందుకు కదలడానికి ప్రయత్నించినా, అంతే వేగంతో వెనక్కి నెట్టబడతారు. ఇది శారీరకంగా చాలా సవాలుతో కూడుకున్నది.

ఇక అంతరిక్షంలో రక్త ప్రసరణ (Blood Flow), హార్మోన్లు, టెస్టోస్టెరాన్ స్థాయిలు మారొచ్చు. ఈ మార్పులు మనిషి లైంగిక కోరికలపై ప్రభావం చూపుతాయి. కాబట్టి అంతరిక్షంలో శృంగారం కష్టతరమైన పని.

అంతరిక్ష కేంద్రంలో (Space Station) స్థలం చాలా పరిమితంగా ఉంటుంది. పైగా, వ్యోమగాముల దినచర్య (Routine) ఎంత బిజీగా ఉంటుందంటే, వారికి వ్యక్తిగత క్షణాలకు సమయమే దొరకదు. ఇలా అక్కడి పరిస్థితులు, వ్యోమగాముల పనిఒత్తిడి కారణంగా శృంగారం సాధ్యం కాదనే చెప్పవచ్చు.

Illicit Relationship : ఐదుగురు పిల్లలకు నిద్రమాత్రలిచ్చి.. 10 ఏళ్లు చిన్నోడితో తల్లి జంప్..!

Arun Kumar P — Tue, 31 Mar 2026 16:45:11 +0530

సభ్యసమాజం తలదించుకునే ఘటన ఉత్తర ప్రదేశ్ లో వెలుగుచూసింది. ఐదుగురు పిల్లల తల్లి తనకంటే చిన్నవాడిని ప్రేమించింది… భర్త కళ్లుగప్పి, పిల్లల ప్రాణాలతో చెలగాటం ఆడి ప్రియుడితో లేచిపోయింది.

ఈ కలికాలంలో మానవ సంబంధాలకు విలువన్నదే లేదు… ఇందుకు నిదర్శనమే ఈ ఘటన. ఓ మహిళ అమ్మతనాన్ని మరిచి అమానుషంగా ప్రవర్తించింది. కట్టుకున్నవాడిని వదిలించుకుని ప్రియుడితో లేచిపోయేందుకు కన్న బిడ్డల ప్రాణాలతో చెలగాటం ఆడింది. తన ఐదుగురు పిల్లల తిండిలో నిద్రమాత్రలు కలిపి తనకంటే 10 ఏళ్లు చిన్నవాడైన యువకుడితో పారిపోయింది. భర్త ఫిర్యాదు చేయడంతో ఈ విషయం బయటపడింది. పోలీసులు కేసు నమోదు చేసి 24 గంటల్లోనే ఆ జంటను పట్టుకున్నారు.

ఈ ఘటన ఉత్తరప్రదేశ్‌లోని రాంపూర్‌లో జరిగింది. ఈ మహిళ ఉదంతం సోషల్ మీడియాలో పెద్ద చర్చకు దారితీసింది. ప్రస్తుతం ఆమె పోలీసులకు ఇస్తున్న వాంగ్మూలం వీడియో వైరల్ అవుతోంది. 33 ఏళ్ల మిథిలేశ అనే ఐదుగురు పిల్లల తల్లి, 22 ఏళ్ల సురేంద్ర అలియాస్ ఖన్నాతో ప్రేమలో పడింది. భర్త, పిల్లలను కాాదని అతడితో జీవించేందుకు సిద్దమయ్యింది.

సురేంద్రతో వెళ్లే ముందు మిథిలేశ తన ఐదుగురు పిల్లలకు నిద్రమాత్రలు ఇచ్చింది. పిల్లలు పూర్తిగా స్పృహ కోల్పోగానే, ఇంట్లో ఉన్న డబ్బు, నగలు, ఇతర విలువైన వస్తువులు తీసుకుని పారిపోయింది. పిల్లలు ఇంట్లో అపస్మారక స్థితిలో ఉండగానే తలుపుకు తాళం వేసి వెళ్లిపోయింది.

మిథిలేశ భర్త రూప్ కిశోర్ ఢిల్లీలో టైలర్‌గా పనిచేస్తున్నాడు. విషయం తెలియగానే గ్రామానికి వచ్చి స్థానిక పోలీస్ స్టేషన్‌లో ఫిర్యాదు చేశాడు. పోలీసులు కేసు నమోదు చేసుకుని 24 గంటల్లోనే మిథిలేశ, ఆమె ప్రియుడు సురేంద్రను పట్టుకున్నారు. నిద్రమాత్రల కారణంగా అపస్మారక స్థితిలోకి వెళ్లిన పిల్లలను ఆస్పత్రికి తరలించి చికిత్స అందించారు. వారు ప్రాణాపాయం నుంచి బయటపడ్డారు.

రాంపూర్ పోలీస్ స్టేషన్‌లో కూర్చుని మహిళ వాంగ్మూలం ఇస్తున్న వీడియో వేగంగా వైరల్ అయింది. 'ఐదుగురు పిల్లలున్నా మరో వ్యక్తితో ప్రేమ ఏంటి? ఒకవేళ పిల్లలకు ఏమైనా జరిగి ఉంటే పరిస్థితి ఏంటి? దేవుడు గొప్పవాడు, పిల్లలకు ఏమీ కాలేదు' అని నెటిజన్లు కామెంట్ చేస్తున్నారు. భర్త తోడుగా లేకపోవడం వల్లే ఆమె ఇలా చేసి ఉండొచ్చని, లేదా వారి వైవాహిక జీవితం సరిగా లేకపోవడం కూడా కారణం కావొచ్చని కొందరు నెటిజన్లు అభిప్రాయపడుతున్నారు.

Saying: అత్త‌లేని కోడ‌లు ఎలా ఉత్త‌మురాలు అవుతుంది.? దీని లాజిక్ ఏంటో ఎప్పుడైనా ఆలోచించారా?

Narender Vaitla — Sun, 12 Apr 2026 07:12:31 +0530

Saying: అత్తలేని కోడలు ఉత్తమురాలు… కోడలు లేని అత్త గుణవంతురాలు అనే మాట చాలా మంది వినే ఉంటారు. కానీ ఈ సామెత వెనుక ఉన్న నిజ‌మైన భావం ఏంటో మ‌న‌లో చాలా మందికి తెలిసి ఉండ‌దు. ఇంత‌కీ సామెతకు అస‌లు అర్థం ఏంటో ఇప్పుడు తెలుసుకుందాం.

ఒక ఇంట్లో కొత్త వ్యక్తి అడుగుపెడితే మార్పు సహజం. కోడలు ఒక కొత్త ప్రపంచం నుంచి వచ్చి, కొత్త ఇంట్లో తన స్థానం సంపాదించుకోవాలి. అదే సమయంలో అత్త ఆ ఇంటి బాధ్యతలు, గౌరవం తన చేతుల్లోనే ఉండాలని భావిస్తుంది. ఇక్కడే చిన్నపాటి పోటీ మొదలవుతుంది. ఇది తప్పు కాదు… ఇది మనిషి సహజ స్వభావం. “ఇది నా ఇల్లు” అనే భావన ఇద్దరిలోనూ ఉంటుంది. ఒకరు ఇప్పటి యజమానురాలు… ఇంకొకరు రాబోయే యజమానురాలు. ఈ భావనల మధ్యే చిన్న చిన్న విభేదాలు మొదలవుతాయి.

అత్త–కోడళ్ళ మధ్య అసలు కేంద్రబిందువు కొడుకే. తల్లికి అతను జీవితాంతం చిన్నబిడ్డే. భార్యకు అతను జీవిత భాగస్వామి. ఈ రెండు భావోద్వేగాల మధ్య సమతుల్యత లేకపోతే సమస్యలు మొదలవుతాయి. కొడుకు ఎవరి వైపు నిలబడతాడు? లేక ఇద్దరినీ ఎలా సమన్వయం చేస్తాడు? అన్నది చాలా కీలకం. చాలాసార్లు అతను మౌనం ఎంచుకుంటాడు. కానీ ఆ మౌనం సమస్యను తగ్గించదు… మరింత పెంచుతుంది.

అత్తలో ఒక భయం ఉంటుంది – “నా కొడుకు దూరమవుతాడేమో?” కోడలిలో ఒక అనుమానం ఉంటుంది – “ఈ ఇంట్లో నాకు నిజంగా స్థానం దక్కుతుందా?” ఈ చిన్న చిన్న ఆలోచనలు పెద్ద సంఘర్షణలకు దారితీస్తాయి. చెప్పుకోకుండా మనసులో పెట్టుకోవడం వల్ల సమస్యలు పెరుగుతాయి. నిజానికి ఇక్కడ ఎవ్వరూ చెడ్డవారు కాదు… పరిస్థితులు, భావాలు కలిసి సమస్యలు సృష్టిస్తాయి.

చాలా అత్తలు ఒకప్పుడు కోడళ్ళే. వాళ్లు ఎదుర్కొన్న కష్టాలు, అనుభవాలు వారి ప్రవర్తనలో కనిపిస్తాయి. కొందరు “నాకు జరిగింది ఆమెకు జరగకూడదు” అనుకుంటారు. ఇంకొందరు “నేను అనుభవించాను… ఆమె కూడా అనుభవించాలి” అనే భావనలో ఉంటారు. అలాగే కోడలు కూడా తన ఇంట్లో నేర్చుకున్న అలవాట్లతో కొత్త ఇంట్లోకి వస్తుంది. ఈ రెండు ప్రపంచాలు కలిసే సమయంలో ఘర్షణలు రావడం సహజం.

అత్త ఉంటే కోడలిపై విమర్శలు ఎక్కువగా కనిపిస్తాయి. కోడలు చేసే ప్రతి పనిని ఎవరో ఒకరు పరిశీలిస్తారు. అందుకే ఆమెకు “ఉత్తమురాలు” అనే పేరు రావడం కష్టం. అత్త లేకపోతే? కోడలు చేసే పనిని ఎవరూ అంతగా విచారించరు. బయట వాళ్లకు ఆమె మంచితనం మాత్రమే కనిపిస్తుంది. అందుకే ఆమె “ఉత్తమురాలు”గా కనిపిస్తుంది. అదే విధంగా, కోడలు లేకపోతే అత్త గురించి విమర్శించేవాళ్లు ఉండరు. ఆమె చెప్పే మాటలు, ఇచ్చే సలహాలు మాత్రమే కనిపిస్తాయి. అందుకే ఆమె “గుణవంతురాలు”గా మారుతుంది.

ఈ సామెత ఎవ్వరినీ తక్కువ చేయడానికి కాదు. ఇది మనిషి స్వభావాన్ని అర్థం చేసుకోవడానికి ఒక చిన్న ఉదాహరణ మాత్రమే. నిజంగా చూస్తే, అత్త మంచిదైనా, కోడలు మంచిదైనా… ఇద్దరూ కలిసి ఉన్నప్పుడే ఆ మంచితనం పరీక్షకు వస్తుంది. ఒకరిని తీసేస్తే సమస్యలే ఉండవు… కానీ బంధాల విలువ కూడా కనిపించదు. కాబట్టి పరిష్కారం ఒక్కటే.. అర్థం చేసుకోవడం, సర్దుకుపోవడం, ఒకరిని ఒకరు గౌరవించడం. అప్పుడు అత్త కూడా ఉత్తమురాలే… కోడలు కూడా ఉత్తమురాలే అవుతుంది.

Relationship Psychology: పదే పదే తప్పుడు వ్యక్తులనే సెలెక్ట్ చేసుకుంటున్నారా? కారణం ఇదే!

Kavitha G — Fri, 03 Apr 2026 14:40:20 +0530

Relationship Psychology: చాలామంది జీవితాల్లో కొత్త బంధం మొదట్లో అద్భుతంగా అనిపిస్తుంది. కానీ రోజులు గడిచే కొద్దీ పాత కథే రిపీట్ అవుతుంటుంది. భాగస్వామి ప్రవర్తనలో మార్పు, అర్థం చేసుకోకపోవడం, చివరికి మనస్పర్థలతో ఆ బంధం ముగిసిపోవడం వంటివి జరుగుతుంటాయి. మీ జీవితంలో కూడా ఇలా పదే పదే జరుగుతుంటే, అది మీ దురదృష్టం కాదు. మీ మనస్తత్వం, చిన్ననాటి అనుభవాలే కారణమంటున్నారు సైకాలజీ నిపుణులు. ఎందుకో ఇక్కడ తెలుసుకుందాం.

తప్పుడు వ్యక్తిని ఎంచుకోవడానికి కారణాలు

సైకాలజీ ప్రకారం చిన్నప్పుడు ఇంట్లో చూసిన వాతావరణమే మన భవిష్యత్ సంబంధాలకు బ్లూప్రింట్ లాంటిది. తల్లిదండ్రుల మధ్య ప్రేమ, గౌరవం చూస్తూ పెరిగిన పిల్లలు.. పెద్దయ్యాక తమ భాగస్వామిలో అవే గుణాలను వెతుకుతారు. కానీ, చిన్నప్పుడు గొడవలు, ప్రేమ లేని వాతావరణంలో పెరిగినవాళ్లు, తెలియకుండానే అలాంటి క్లిష్టమైన బంధాల వైపే ఆకర్షితులవుతారు.

నిపుణుల ప్రకారం మన మనసు ఎప్పుడూ తనకు పరిచయమైన భావోద్వేగాలనే వెతుకుతుంది. ఒకవేళ మీరు చిన్నప్పుడు ఇంట్లో గొడవలు, అరుపులు, ప్రేమ లోపం చూసి పెరిగితే.. మీ మెదడుకు అలాంటి అశాంతి వాతావరణమే నార్మల్ అనిపిస్తుంది. అందుకే పెద్దయ్యాక ఎవరైనా మిమ్మల్ని ప్రేమగా, గౌరవంగా చూసుకుంటే అది బోరింగ్ గా కూడా అనిపించవచ్చు. తెలియకుండానే మీ మనసు పాత గాయాన్ని గుర్తుచేసే కోపిష్టి, ఎమోషన్స్ లేని వ్యక్తుల వైపే మిమ్మల్ని లాగుతుంది.

నిజానికి చాలా సార్లు మన మీద మనకే నమ్మకం ఉండదు. నాకు నిజమైన ప్రేమకు, గౌరవానికి అర్హత ఉందా అనే తప్పుడు భావన మనల్ని వెంటాడుతుంది. దానివల్ల మనల్ని సరిగ్గా చూసుకోని వాళ్లను కూడా భరించాల్సి వస్తుంది. ఇది ఒక విష వలయం లాంటిది. ఆత్మవిశ్వాసం తగ్గిపోవడం వల్ల చెడు బంధంలోకి వెళ్లే అవకాశం ఎక్కువగా ఉంటుంది.

ఈ విష వలయం నుంచి బయటపడాలంటే, ముందు పాత సంబంధాలను విశ్లేషించుకోవాలి. మీరు ఎలాంటి వాళ్లను ఎంచుకుంటున్నారు, ఏ తప్పులు రిపీట్ అవుతున్నాయో గుర్తించాలి. అవసరమైతే స్నేహితులు లేదా సైకాలజిస్టుల సహాయం తీసుకోవాలి. అన్నింటికంటే ముందు మిమ్మల్ని మీరు ప్రేమించడం, గౌరవించడం నేర్చుకున్నప్పుడే.. సరైన భాగస్వామిని ఎంచుకునే అవకాశం ఉంటుందని సైకాలజీ నిపుణులు సూచిస్తున్నారు.

Relationship Tips: భార్యాభర్తల మధ్య గొడవలు తగ్గాలంటే ఈ 5 టిప్స్ ఫాలో అయితే చాలు!

Kavitha G — Mon, 16 Mar 2026 18:21:20 +0530

పెళ్లి బంధం.. ప్రేమ, నమ్మకం, అర్థం చేసుకోవడంపై నిలబడుతుంది. కానీ ఎంత మంచి దంపతులైనా కొన్నిసార్లు అభిప్రాయ భేదాలు రావడం సహజం. అయితే అవి ఎక్కువ కాలం కొనసాగితే సంబంధంలో దూరం పెరిగే అవకాశం ఉంటుంది. మరి దాంపత్య జీవితం సంతోషంగా ఉండాలంటే ఏం చేయాలో చూద్దాం.

ఒక ఆడ, మగ కలిసి చేసే అందమైన ప్రయాణమే పెళ్లి. అయితే భార్యాభర్తల మధ్య చిన్న చిన్న విభేదాలు, అభిప్రాయ భేదాలు రావడం సహజం. లైఫ్ స్టైల్, పని ఒత్తిడి, ఆర్థిక సమస్యలు, కుటుంబ బాధ్యతలు వంటి అనేక కారణాల వల్ల కొన్నిసార్లు గొడవలు జరుగుతుంటాయి. కానీ ఆ గొడవలు ఎక్కువ కాలం కొనసాగితే దంపతుల మధ్య దూరం పెరిగే ప్రమాదం ఉంటుంది. అందుకే సంబంధాన్ని ఆరోగ్యంగా, సంతోషంగా కొనసాగించాలంటే కొన్ని చిన్నచిన్న చిట్కాలు పాటించడం తప్పనిసరి అవేంటో చూద్దాం.

చాలా సందర్భాల్లో గొడవలు పెరగడానికి ప్రధాన కారణం ఒకరి మాట మరొకరు వినకపోవడం. ఒకరు మాట్లాడుతున్నప్పుడు మరొకరు పూర్తిగా వినకుండా వెంటనే స్పందించడం వల్ల అపార్థాలు పెరుగుతాయి. కాబట్టి మీ జీవిత భాగస్వామి ఏం చెబుతున్నారో శాంతంగా వినడం చాలా అవసరం. వారు చెప్పే భావాలను అర్థం చేసుకోవడానికి ప్రయత్నిస్తే చాలా సమస్యలు అక్కడికక్కడే పరిష్కారమవుతాయి. మాట్లాడేటప్పుడు మధ్యలో అడ్డుకోవడం, కోపంగా స్పందించడం వంటివి తగ్గించుకుంటే గొడవలు తగ్గిపోతాయి.

భార్యాభర్తల మధ్య ప్రేమ ఎంత ముఖ్యమో గౌరవం కూడా అంతే ముఖ్యం. ఒకరిని మరొకరు చిన్నచూపు చూడటం, ఇతరుల ముందు అవమానించడం, తక్కువ చేసి మాట్లాడడం వంటి విషయాలు సంబంధాన్ని దెబ్బతీస్తాయి. దంపతులు ఒకరినొకరు గౌరవంగా చూడటం, వారి అభిప్రాయాలకు విలువ ఇవ్వడం వల్ల సంబంధం బలపడుతుంది. గౌరవం ఉన్న చోట గొడవలు వచ్చినా అవి ఎక్కువ కాలం కొనసాగవు.

చాలా గొడవలు కోపం వల్లే పెద్ద సమస్యలుగా మారుతాయి. చిన్న విషయం కూడా ఆ సమయంలో పెద్దగా కనిపిస్తుంది. అందుకే కోపం వచ్చినప్పుడు కొద్దిసేపు ఆగి ఆలోచించడం మంచిది. వెంటనే కఠినమైన మాటలు మాట్లాడితే ఎదుటి వ్యక్తి మనసు గాయపడే ప్రమాదం ఉంటుంది. కొంత సమయం తీసుకుని ప్రశాంతంగా మాట్లాడితే సమస్యను సులభంగా పరిష్కరించుకోవచ్చు. ఈ అలవాటు దంపతుల మధ్య అనవసర గొడవలను తగ్గించడంలో సహాయపడుతుంది.

ప్రస్తుత జీవనశైలిలో చాలా మంది పని ఒత్తిడి వల్ల కుటుంబానికి సమయం ఇవ్వలేకపోతున్నారు. దీనివల్ల భార్యాభర్తల మధ్య దూరం పెరిగే అవకాశం ఉంటుంది. రోజులో కొద్దిసేపైనా కలిసి మాట్లాడుకోవడం, వాకింగ్ కి వెళ్లడం, కలిసి భోజనం చేయడం వంటి చిన్న అలవాట్లు సంబంధాన్ని బలంగా ఉంచుతాయి. కలిసి గడిపే సమయం పెరిగితే ఒకరినొకరు మరింతగా అర్థం చేసుకునే అవకాశం ఉంటుంది.

ప్రతి కుటుంబంలో చిన్న చిన్న సమస్యలు రావడం సహజం. కానీ వాటిని పెద్దగా తీసుకొని రోజుల తరబడి గొడవపడితే సంబంధం బలహీనపడుతుంది. కొన్ని విషయాలను పట్టించుకోకుండా వదిలేయడం కూడా అవసరమే. ఎప్పుడూ గెలవాలనే భావనతో కాకుండా సంబంధం నిలబడాలని ఆలోచిస్తే చాలా సమస్యలు సులభంగా పరిష్కారమవుతాయి. పరస్పరం క్షమించుకోవడం కూడా దాంపత్య జీవితంలో చాలా ముఖ్యమైన లక్షణం.

Relationship: సిట్యుయేషన్‌షిప్ అంటే ఏంటి.? Gen Z జ‌మానాలో కొత్త ప్రేమ క‌థ‌లు

Narender Vaitla — Sat, 28 Mar 2026 17:52:03 +0530

Relationship: కాలంతోపాటు సంబంధాలు కూడా మారుతున్నాయి. ముందు ప్రేమ, పెళ్లి వంటి స్పష్టమైన సంబంధాలు ఎక్కువగా కనిపించేవి. కానీ ఇప్పుడు “సిట్యుయేషన్‌షిప్” (Situationship) అనే కొత్త రకమైన సంబంధం గురించి ఎక్కువగా వినిపిస్తోంది. ఇంత‌కీ ఇది ఏంటంటే?

సిట్యుయేషన్‌షిప్ అనేది ఇద్ద‌రి మ‌న‌సుల మ‌ధ్య ఉండే సంబంధమే. కానీ అందులో స్పష్టమైన కమిట్‌మెంట్ ఉండదు. ఉదాహరణకు, ఇద్దరూ మాట్లాడుకుంటారు, కలుస్తారు, దగ్గరగా ఉంటారు. కానీ “మనం రిలేషన్‌లో ఉన్నాం” అని చెప్పే స్థాయి మాత్రం ఉండదు. ఈ కారణంగా ఆ సంబంధం ఏ దిశగా వెళ్తుందో అర్థం కాకపోవచ్చు. ఇది ప్రేమలాగా కనిపించినా, అసలు సంబంధానికి స్పష్టమైన నిర్వచనం ఉండదు.

ఒక స్థిరమైన సంబంధంలో ఇద్దరికీ స్పష్టత, నమ్మకం, భవిష్యత్తు గురించి ఆలోచనలు ఉంటాయి. కానీ సిట్యుయేషన్‌షిప్‌లో పరిస్థితి వేరుగా ఉంటుంది. సంబంధానికి స్పష్టమైన పేరు ఉండదు. ఒక రోజు చాలా దగ్గరగా ఉంటారు, మరో రోజు దూరంగా ఉంటారు. ఈ విధంగా వచ్చే మిక్స్‌డ్ సిగ్నల్స్ వల్ల చాలా మందికి గందరగోళం ఏర్పడుతుంది.

మీరు కూడా ఈ తరహా సంబంధంలో ఉన్నారా అనేది కొన్ని ప్ర‌శ్న‌ల ద్వారా తెలుసుకోవ‌చ్చు. మీ ఇద్దరి మధ్య సంబంధం స్పష్టంగా ఉందా? కలుసుకునే ప్లాన్లు ఎప్పుడూ చివరి నిమిషంలోనే జరుగుతున్నాయా? చాలా కాలం అయినా మీ భాగస్వామి తన స్నేహితులకు పరిచయం చేయలేదా? ప్రేమగా మాట్లాడుతున్నా, “గర్ల్‌ఫ్రెండ్” లేదా “బాయ్‌ఫ్రెండ్” అని ఎప్పుడూ చెప్పలేదా? ఈ ప్రశ్నలకు ఎక్కువగా “అవును” అనే సమాధానం వస్తే, మీరు సిట్యుయేషన్‌షిప్‌లో ఉండే అవకాశముంది.

ఇలాంటి సంబంధాలు మొదట్లో సరదాగా అనిపించినా, తరువాత మానసిక ఒత్తిడిని పెంచవచ్చు. ఇది జంక్ ఫుడ్‌లాంటిదని నిపుణులు చెబుతున్నారు. మొదట్లో ఆనందంగా అనిపించినా, చివరికి సంతృప్తి ఇవ్వదు. సంబంధంలో స్పష్టత లేకపోవడం వల్ల.. అసురక్షిత భావన, ఆత్మవిశ్వాసం తగ్గడం, భావోద్వేగ గందరగోళం లాంటి సమస్యలు వ‌చ్చే అవ‌కాశం ఉంది.

సిట్యుయేషన్‌షిప్‌లో ఎక్కువగా ఒకరు మాత్రమే ఎక్కువగా అనుబంధం పెంచుకుంటారు. మరో వ్యక్తి మాత్రం దూరంగా ఉంటూ తన అవసరాలకే ప్రాధాన్యం ఇస్తాడు. అందుకే ఇలాంటి పరిస్థితుల్లో కొన్ని విషయాలు గుర్తుంచుకోవాలి. మీ భావాలను స్పష్టంగా చెప్పాలి, సంబంధం గురించి క్లారిటీ అడగాలి, కమిట్‌మెంట్ లేకపోతే ముందుకు వెళ్లకుండా ఆలోచించాలి. ఎవరైనా వ్యక్తి సంబంధానికి స్పష్టత ఇవ్వకుండా ఉంటే, అది కూడా ఒక సమాధానమే అని గుర్తించాలి.

Love: పురుషులా.? స్త్రీలా.? ప్రేమ‌లో ముందుగా ప‌డేది ఎవ‌రో తెలుసా.?

Narender Vaitla — Sun, 22 Mar 2026 16:08:26 +0530

Love: ప్రేమ అనేది మాట‌ల్లో వ‌ర్ణించ‌లేని గొప్ప అనుభూతి. చ‌రిత్రలో ఎంతో మంది గొప్ప ప్రేమికుల‌ను చూశాం. ఇక ప్రేమ‌కు సంబంధించి మాన‌సిక నిపుణులు సైతం ఎన్నో ఆస‌క్తిక‌ర విష‌యాలు చెబుతుంటారు. అలాంటి ఓ ఇంట్రెస్టింగ్ టాపిక్ గురించి ఈరోజు తెలుసుకుందాం.

సాంప్రదాయంగా మహిళలు భావోద్వేగాలకు ఎక్కువ ప్రాధాన్యం ఇస్తారని చాలా మంది నమ్ముతారు. ప్రేమలో త్వరగా మమేకం అవుతారని, సంబంధాన్ని కాపాడేందుకు ఎక్కువ కృషి చేస్తారని చెబుతారు. పురుషులు మాత్రం భావాలను అంతగా బయటపెట్టరని, ప్రేమ విషయాల్లో కొంచెం దూరంగా ఉంటారని అనుకునే ధోరణి ఉంది. అందుకే “మహిళలే ముందుగా ప్రేమలో పడతారు” అనే అభిప్రాయం చాలామందిలో ఉంది.

ఈ అభిప్రాయాన్ని పరీక్షించేందుకు ఇటీవల రెండు మానసిక శాస్త్ర అధ్యయనాలు నిర్వ‌హించారు. 2025లో బీఎమ్‌సీ జ‌ర్న‌ల్స్‌లో ప్రచురితమైన ఒక పరిశోధనలో 18 నుంచి 25 సంవత్సరాల మధ్య వయసున్న 808 మంది యువతపై అధ్యయనం చేశారు. ఈ పరిశోధనలో ఆశ్చర్యకరమైన విషయం బయటపడింది. సాధారణంగా పురుషులు మహిళల కంటే సుమారు ఒక నెల ముందుగానే ప్రేమలో పడే అవకాశం ఎక్కువగా ఉంది అని తేలింది. అదే సమయంలో మహిళలు ప్రేమను మరింత ఎక్కువ‌గా ఆస్వాదిస్తార‌ని, తమ భాగస్వామి గురించి ఎక్కువగా ఆలోచిస్తారని కూడా అధ్యయనం వెల్లడించింది.

పరిశోధకుల అభిప్రాయం ప్రకారం ఈ తేడా మనిషి అభివృద్ధి (Evolution)తో సంబంధం ఉండొచ్చు. గతంలో పురుషులు త్వరగా ప్రేమలో పడటం, సంబంధానికి కట్టుబడి ఉండేవారు. మరోవైపు మహిళలు జీవిత భాగస్వామిని ఎన్నుకునే విషయంలో ఎక్కువ జాగ్రత్తగా ఉండే లక్షణాన్ని అభివృద్ధి చేసుకున్నారని భావిస్తున్నారు. అందుకే చాలాసార్లు పురుషులే ముందుగా “ఐ ల‌వ్ యూ” అని చెప్పడం స‌హ‌జంగా మారింది.

2024లో జరిగిన మరో అధ్యయనం సంబంధంలోని వివిధ దశల్లో ప్రేమ ఎలా మారుతుందో తెలుసుకోవడానికి ప్రయత్నించింది. వేలాది మంది భావోద్వేగాలను రియల్ టైమ్‌లో పరిశీలించిన ఈ పరిశోధనలో కొన్ని ఆసక్తికరమైన విషయాలు బయటపడ్డాయి. నిశ్చితార్థం సమయంలో మహిళలు పురుషుల కంటే ఎక్కువ ప్రేమను అనుభవిస్తారు. కానీ పెళ్లి తర్వాత మొదటి రెండు సంవత్సరాల్లో వారి భావోద్వేగాల్లో కొంత తగ్గుదల కనిపించవచ్చు. పురుషుల ప్రేమ మాత్రం నెమ్మదిగా పెరిగి స్థిరంగా కొనసాగుతుంది. ఇది మహిళలు పెళ్లి తర్వాత ప్రేమ తగ్గిస్తారని కాదు. కుటుంబ బాధ్యతలు, రోజువారీ జీవితం మొదలైనవి మొదట్లో ఉన్న ఉత్సాహాన్ని కొంచెం తగ్గించవచ్చు.

ఈ రెండు పరిశోధనలు ఒక ముఖ్యమైన విషయాన్ని స్పష్టంగా చెబుతున్నాయి. పురుషులు, మహిళలు ఇద్దరూ ప్రేమను లోతుగా అనుభవిస్తారు. కానీ వారి ప్రేమను వ్యక్తపరిచే విధానం, సమయం మాత్రమే వేర్వేరుగా ఉంటుంది. ప్రతి సంబంధం ప్రత్యేకమైనది. ఎవరో ఒకరు త్వరగా ప్రేమలో పడవచ్చు, మరొకరు కొంచెం ఆలస్యంగా ఆ భావాన్ని గుర్తించవచ్చు. సంబంధం బలంగా ఉండాలంటే భాగస్వామి ప్రేమను వ్యక్తపరిచే విధానాన్ని అర్థం చేసుకోవడం చాలా ముఖ్యమైంది. అదే ఒక మంచి సంబంధానికి నిజమైన బలం.

Relationship Psychology: ఓవర్ థింకింగ్ రిలేషన్ షిప్‍ని దెబ్బతీస్తుందా? సైకాలజీ ఏం చెబుతోంది?

Kavitha G — Tue, 07 Apr 2026 16:16:41 +0530

ప్రస్తుత కాలంలో రిలేషన్‌షిప్‌లు బాగుండాలంటే ప్రేమ ఒక్కటే సరిపోదు. మన ఆలోచనా విధానం కూడా బంధం నిలబడటంలో ముఖ్య పాత్ర పోషిస్తుంది. కొందరు చిన్న విషయం గురించి కూడా ఓవర్ గా ఆలోచిస్తుంటారు. ఇది ప్రేమను కాపాడుతుందా లేక దెబ్బతీస్తుందా? సైకాలజీ ఏం చెబుతోంది?

ఓవర్ థింకింగ్ అనేది మనిషి సహజమైన ఆలోచనా ప్రక్రియలో భాగమే అయినప్పటికీ, అది నియంత్రణలో లేకపోతే వ్యక్తిగత జీవితాన్ని, ముఖ్యంగా రిలేషన్‌షిప్‌లను తీవ్రంగా ప్రభావితం చేసే శక్తి కలిగి ఉంటుంది. సైకాలజీ ప్రకారం, ఓవర్ థింకింగ్ అంటే ఒక సంఘటన, మాట, లేదా ప్రవర్తన గురించి మళ్లీ మళ్లీ ఆలోచించడం, దానిలో అర్థాలు వెతకడం, అసలు లేని సందేహాలను సృష్టించడం.

ముఖ్యంగా ప్రేమ సంబంధాలలో ఇది ఎక్కువగా కనిపిస్తుంది. ఒక భాగస్వామి చెప్పిన చిన్న మాటను పెద్దగా భావించడం, రిప్లై ఆలస్యమైతే దాన్ని నిర్లక్ష్యంగా భావించడం, గతంలో జరిగిన విషయాలను వర్తమానానికి లింక్ చేయడం వంటి అలవాట్లు సంబంధంలో అనవసరమైన ఉద్రిక్తతను పెంచుతాయి.

సైకాలజీ ప్రకారం ఓవర్ థింకింగ్ ఎక్కువగా ఆందోళన, తక్కువ ఆత్మవిశ్వాసం, అభద్రతా భావం వల్ల వస్తుంది. ఈ భావాలు మనలో ఉండటం వల్ల మనం నిజమైన పరిస్థితిని అర్థం చేసుకోకుండా, మన ఊహలను నిజమని నమ్మడం ప్రారంభిస్తాం. ఫలితంగా, భాగస్వామిపై అనుమానం పెరుగుతుంది. కమ్యూనికేషన్ గ్యాప్ వస్తుంది. చిన్న విషయాలే పెద్ద గొడవలకు దారితీస్తాయి.

రిలేషన్‌షిప్‌లో నమ్మకం, స్పష్టమైన సంభాషణ చాలా ముఖ్యమైనవి. అయితే ఓవర్ థింకింగ్ ఈ రెండింటినీ దెబ్బతీస్తుంది. ఒక వ్యక్తికి తమ భాగస్వామికి తనపై ప్రేమ తగ్గిందేమో అని అనుమానం పెంచుకుంటే, తన ప్రవర్తనలో మార్పు వస్తుంది. అతిగా ప్రశ్నించడం, కంట్రోల్ చేయాలని ప్రయత్నించడం లేదా ఎమోషనల్ గా దూరమవ్వడం వంటివి చేస్తుంటారు.

ఈ మార్పులు మరో భాగస్వామికి ఒత్తిడిగా మారి, సంబంధం బలహీనపడే అవకాశాలు పెరుగుతాయి. సైకాలజీ ప్రకారం, ఓవర్ థింకింగ్ చేసే వ్యక్తులు సాధారణంగా మంచి జరుగుతుందనే కంటే చెడు జరుగుతుందనే ఊహలను ఎక్కువగా నిర్మించుకుంటారు. ఈ నెగిటివ్ ఆలోచనలు సంబంధంలో ఆనందాన్ని తగ్గించి, భయాన్ని పెంచుతాయి.

మరో ముఖ్యమైన విషయం ఏమిటంటే, ఓవర్ థింకింగ్ వల్ల వ్యక్తి తన భావాలను సరైన విధంగా వ్యక్తపరచలేరు. మనసులో అనేక అనుమానాలు, ప్రశ్నలు తిరుగుతుండటంతో, చెప్పాల్సిన విషయాన్ని క్లియర్‌గా చెప్పలేరు. ఫలితంగా, అపార్థాలు పెరుగుతాయి. సైకాలజీ ప్రకారం మనం ఆలోచనలపై ఎంత ఎక్కువగా ఫోకస్ చేస్తే, అవి అంత ఎక్కువగా మనపై ప్రభావం చూపిస్తాయి.

నిపుణుల ప్రకారం ఓవర్ థింకింగ్ పూర్తిగా చెడు కాదు. నిజానికి కొంతవరకు ఆలోచించడం వల్ల మనం జాగ్రత్తగా ఉంటాం, నిర్ణయాలు మెరుగ్గా తీసుకుంటాం. కానీ అది హద్దులు దాటితేనే సమస్య. నేను ఇప్పుడు అవసరానికి మించి ఆలోచిస్తున్నానా? అనే ప్రశ్న ఎవరికి వారు వేసుకోవడం చాలా ముఖ్యం. భాగస్వామితో మన భావాలను నేరుగా, నెమ్మదిగా పంచుకుంటున్నామా అనే దానిపై కూడా దృష్టి పెట్టాలి. గతం లేదా భవిష్యత్తు గురించి కాకుండా, ప్రస్తుత పరిస్థితిపై దృష్టి పెట్టడం వల్ల ఓవర్ థింకింగ్ తగ్గుతుంది. రిలేషన్ షిప్ హెల్తీగా ఉంటుంది.