Asianet News Telugu

Lionel Messi : మెస్సీ పర్యటనలో రచ్చ రచ్చ.. మమతా బెనర్జీ క్షమాపణలు, అసలు కారణం ఇదే!

Mahesh Rajamoni — Sat, 13 Dec 2025 20:54:16 +0530

Lionel Messi : కోల్‌కతా సాల్ట్ లేక్ స్టేడియంలో లియోనెల్ మెస్సీ పర్యటనలో గందరగోళం జరిగింది. కేవలం 10 నిమిషాలే మెస్సీ కనిపించడంతో అభిమానులు ఆగ్రహించి కుర్చీలు విసిరేశారు. దీనిపై సీఎం మమతా బెనర్జీ క్షమాపణలు చెప్పారు.

ప్రపంచ ప్రఖ్యాత ఫుట్‌బాల్ ఆటగాడు లియోనెల్ మెస్సీ రాక కోసం కోల్‌కతా వాసులు ఎంతో ఆసక్తిగా ఎదురుచూశారు. కానీ, శనివారం కోల్‌కతాలోని సాల్ట్ లేక్ స్టేడియంలో జరిగిన ఘటనలు అభిమానులకు తీవ్ర నిరాశను మిగిల్చాయి. మెస్సీని చూడటానికి వచ్చిన అభిమానులు, నిర్వాహకుల తీరుపై తీవ్ర ఆగ్రహం వ్యక్తం చేస్తూ స్టేడియంలో గందరగోళం సృష్టించారు.

నెలల తరబడి తమ అభిమాన ఆటగాడిని చూడాలని ఆశపడ్డ అభిమానులు, చివరకు నిరాశతో వెనుదిరగాల్సి వచ్చింది. మెస్సీ బిజీ షెడ్యూల్ కారణంగా స్టేడియంలో కేవలం కొద్ది నిమిషాలు మాత్రమే గడిపి వెళ్లిపోయారు. దీంతో స్టేడియంలోని వేలాది మంది అభిమానులు ఆగ్రహానికి గురయ్యారు. పరిస్థితి అదుపు తప్పడంతో కుర్చీలు, బాటిళ్లను మైదానంలోకి విసిరి తమ నిరసనను వ్యక్తం చేశారు.

స్టేడియంలో జరిగిన అసలు విషయాన్ని ఒక అభిమాని వివరిస్తూ తమ ఆవేదనను వెల్లడించారు. "ఇది చాలా దురదృష్టకరమైన సంఘటన. లియోనెల్ మెస్సీ కేవలం 10 నిమిషాల పాటే అక్కడికి వచ్చారు. ఆయన వచ్చిన వెంటనే మంత్రులు, నాయకులు ఆయనను చుట్టుముట్టారు. దీంతో సామాన్య అభిమానులమైన మాకు ఆయన సరిగా కనిపించలేదు" అని వాపోయారు.

అంతేకాకుండా, "మెస్సీ కనీసం ఒక్క కిక్ కొట్టలేదు, పెనాల్టీ షాట్ కూడా చేయలేదు. కేవలం వచ్చి, 10 నిమిషాల్లోనే వెళ్లిపోయారు. మేము పెట్టిన డబ్బు, మా ఎమోషన్స్, మా సమయం అంతా వృథా అయ్యింది. మేము ఏమీ చూడలేకపోయాము" అని సదరు అభిమాని తన అసహనాన్ని వ్యక్తం చేశారు.

మరొక అభిమాని మాట్లాడుతూ ఈవెంట్ మేనేజ్‌మెంట్ తీరును ఎండగట్టారు. "అక్కడ జరిగిన గందరగోళం చూస్తుంటే నిర్వాహకుల, అధికారుల ఏర్పాట్ల వైఫల్యం స్పష్టంగా తెలుస్తోంది. ఇక్కడికి వచ్చిన వారంతా ఫుట్‌బాల్‌ను ప్రేమిస్తారు. అందరూ మెస్సీని చూడాలని వచ్చారు, కానీ మాకు ద్రోహం జరిగింది" అని అన్నారు.

"మాకు మా డబ్బులు తిరిగి కావాలి. మేనేజ్‌మెంట్ చాలా దారుణంగా ఉంది. కోల్‌కతా ఫుట్‌బాల్‌కు పెట్టింది పేరు, ఇది పూర్తిగా ఒక మోసం. మంత్రులు తమ పిల్లలతో అక్కడ ఎంజాయ్ చేశారు, కానీ మిగిలిన వారికి ఏమీ కనిపించలేదు. మాకు చాలా బాధగా ఉంది" అని సదరు అభిమాని కన్నీరు పెట్టుకున్నారు.

ఈవెంట్ కోసం భారీగా ఖర్చు చేసినా, తమ ఐకాన్‌ను సరిగా చూడలేకపోవడాన్ని అభిమానులు జీర్ణించుకోలేకపోతున్నారు. "ఇంత పెద్ద మొత్తంలో డబ్బు చెల్లించిన తర్వాత కూడా, మేము మెస్సీని ఒక్కసారి కూడా సరిగా చూడలేకపోవడం చాలా నిరాశ కలిగించింది. ఆయన కేవలం రెండు, మూడు సార్లు చేతులు ఊపారు, అంతే సంగతి" అని ఒక అభిమాని తెలిపారు.

"మెస్సీ ఈ ఈవెంట్‌కు వచ్చారు, కానీ మనం ఆయనకు ఎలాంటి సందేశం ఇచ్చాం? షారుఖ్ ఖాన్ వచ్చారో లేదో కూడా నాకు తెలియదు. ఈ మొత్తం వ్యవహారం ఈవెంట్ మేనేజ్‌మెంట్‌కు, ప్రభుత్వానికి చాలా అవమానకరమైన విషయం. కోల్‌కతా చరిత్రలో ఇది ఒక బ్లాక్ డే" అని అభిమానులు ఆగ్రహం వ్యక్తం చేశారు.

మెస్సీ వెళ్ళిపోవడంతో సహనం కోల్పోయిన అభిమానులు స్టేడియంలో వీరంగం సృష్టించారు. నిర్వాహకుల తీరుపై నినాదాలు చేస్తూ, చేతికి దొరికిన కుర్చీలను, వాటర్ బాటిళ్లను మైదానంలోకి విసిరేశారు. పోలీసులు, భద్రతా సిబ్బంది పరిస్థితిని అదుపు చేయడానికి ప్రయత్నించినప్పటికీ, అభిమానుల ఆవేదన కట్టలు తెంచుకుంది. ఈ ఘటనకు సంబంధించిన వీడియోలు సోషల్ మీడియాలో వైరల్ అవుతున్నాయి.

ఈ మొత్తం వ్యవహారంపై పశ్చిమ బెంగాల్ ముఖ్యమంత్రి మమతా బెనర్జీ స్పందించారు. ఈవెంట్‌లో జరిగిన తప్పులపై ఆమె బహిరంగంగా క్షమాపణలు చెప్పారు.

మమతా బెనర్జీ తన 'ఎక్స్'ఖాతాలో పోస్ట్ చేస్తూ, "ఈరోజు సాల్ట్ లేక్ స్టేడియంలో జరిగినది చూసి నేను చాలా బాధపడ్డాను, ఆశ్చర్యపోయాను. వేలాది మంది క్రీడాభిమానులతో కలిసి ఈవెంట్‌లో పాల్గొనడానికి నేను కూడా స్టేడియానికి వెళ్తున్నాను. ఫుట్‌బాల్ దిగ్గజం లియోనెల్ మెస్సీని చూడాలని అభిమానులు వచ్చారు. ఈ దురదృష్టకర సంఘటనకు నేను లియోనెల్ మెస్సీకి, అలాగే ఆయన అభిమానులకు, క్రీడాకారులందరికీ మనస్ఫూర్తిగా క్షమాపణలు చెబుతున్నాను" అని పేర్కొన్నారు.

ఆస్ట్రేలియన్ ఓపెన్‌ గెలిచిన లక్ష్య సేన్.. ప్రత్యేకత ఏంటో తెలుసా?

Mahesh Rajamoni — Sun, 23 Nov 2025 23:28:33 +0530

Lakshya Sen: ఆస్ట్రేలియన్ ఓపెన్ ఫైనల్‌లో యుషి తనాకాను ఓడించి లక్ష్య సేన్ మూడో సూపర్ 500 టైటిల్‌ను కైవసం చేసుకున్నాడు. 38 నిమిషాల్లోనే ఆధిపత్య విజయంతో సత్తా చాటాడు.

Lakshya Sen: భారత బ్యాడ్మింటన్‌కు మరొక గర్వకారణంగా నిలుస్తూ, యంగ్ స్టార్ లక్ష్య సేన్ ఆస్ట్రేలియన్ ఓపెన్ సూపర్ 500 టైటిల్‌ను గెలుచుకున్నాడు. సిడ్నీలో జరిగిన ఈ ఫైనల్లో జపాన్ క్రీడాకారుడు యుషి తనాకాపై సేన్ తన ఆధిపత్యం ప్రదర్శించాడు. కేవలం 38 నిమిషాల్లోనే మ్యాచ్‌ను ముగించేసి, 21-15, 21-11 తేడాతో విజేతగా నిలిచాడు. ప్రత్యర్థి చేసిన నెట్ తప్పిదాలు, షాట్లను తెలివిగా ఉపయోగించుకున్న సేన్.. తన ఆటలో వేగం, నియంత్రణ, ధైర్యాన్ని చూపిస్తూ సత్తా చాటాడు.

మొదటి గేమ్‌లో 15-13 వద్ద తనాకా కొంత పోటీ ఇచ్చినప్పటికీ, సేన్ అక్కడినుంచి పూర్తిగా మ్యాచ్‌పై పట్టు సాధించాడు. రెండో గేమ్‌లో మరింత దూకుడుతో ఆడి, పవరుఫుల్ డ్రైవ్స్, ఫ్లాట్ రిటర్న్స్, అద్భుత ప్లేస్‌మెంట్‌తో ప్రత్యర్థిని చెడుగుడు ఆడుకున్నాడు. చివరగా చేసిన పదునైన క్రాస్ రిటర్న్‌తో ట్రోఫీని సీల్ చేశాడు.

పారిస్ ఒలింపిక్స్‌లో ఆశించిన స్థాయిలో రాణించలేకపోవడంతో, గత కొన్ని నెలలుగా లక్ష్య సేన్‌పై ఒత్తిడి పెరిగింది. హాంగ్‌కాంగ్ ఓపెన్‌లో రన్నరప్‌గా నిలవడం, జపాన్ మాస్టర్స్‌లో సెమీఫైనల్‌లో నిష్క్రమించడం, హైలొ ఓపెన్‌లో క్వార్టర్స్ దాటలేకపోవడం.. ఇలా అతను చాలా కఠిన పరిస్థితులను ఎదుర్కొన్నాడు.

అయితే, ఆస్ట్రేలియన్ ఓపెన్ ఫైనల్‌కు ముందు జరిగిన సెమీ ఫైనల్‌లో ప్రపంచ ఆరో ర్యాంకర్ చౌ తిన్ చెన్‌ను 17-21, 24-22, 21-16 తేడాతో ఓడించి సేన్ తిరిగి తన సత్తా చూపించాడు. మూడు గేముల పోరులో అద్భుతంగా పుంజుకుని ఫైనల్ బెర్త్ కొట్టేసిన సేన్.. టైటిల్ మ్యాచ్‌లోనూ ఏ అవకాశమూ వదల్లేదు.

విజయం అనంతరం చేసిన ‘ఫింగర్స్ ఇన్ ఇయర్స్’ సెలబ్రేషన్.. గత కొన్ని వారాలగా ఎదుర్కొన్న ఒత్తిడి, విమర్శలకు ఇది తగిన సమాధానమని అభిమానులు భావిస్తున్నారు. ఫైనల్ అనంతరం కోచ్ యూ యాంగ్ సుంగ్, తండ్రి డీ.కే. సేన్‌లతో కలిసి సంబరాలు జరుపుకున్నప్పటి ఆనందభావాలు సోషల్ మీడియాలో వైరల్ అయ్యాయి.

మాజీ షట్లర్ పారుపల్లి కశ్యప్ కూడా సేన్ విజయంపై ప్రశంసలు కురిపించాడు. గాయం నుంచి కోలుకున్న తర్వాత సేన్ చూపిస్తున్న నిలకడ, పట్టుదల భారత బ్యాడ్మింటన్‌కు మంచి సంకేతమని కశ్యప్ అభిప్రాయపడ్డాడు. “ఈ విజయం సీజన్ చివర్లో రావడం గొప్ప విషయం. భారత బ్యాడ్మింటన్‌లో ప్రస్తుతం మిక్స్‌డ్ డబుల్స్, డబుల్స్, మహిళల సింగిల్స్, పురుషుల సింగిల్స్ అన్ని విభాగాల్లోనూ కొత్త ప్రతిభ రాబోతోంది. భవిష్యత్తు ఎంతో ఉజ్వలంగా కనిపిస్తోంది” అని ఆయన పేర్కొన్నాడు.

ఆస్ట్రేలియన్ ఓపెన్ విజయం సేన్‌కు ఈ సీజన్‌లో తొలి టైటిల్ మాత్రమే కాకుండా.. కెరీర్‌లో మూడో సూపర్ 500 ట్రోఫీ. ఈ ఘనతతో సేన్, సైనా నెహ్వాల్, కిదాంబి శ్రీకాంత్ తర్వాత ఆస్ట్రేలియా ఓపెన్ గెలిచిన మూడో భారతీయ షట్లర్‌గా చరిత్ర సృష్టించాడు.

తెలుగు టైటాన్స్ vs తమిళ్ తళైవాస్‌: ఉత్కంఠగా పీకేఎల్ సీజన్ 12 తొలి మ్యాచ్

Mahesh Rajamoni — Fri, 29 Aug 2025 23:23:49 +0530

Pro Kabaddi 2025: ప్రో కబడ్డీ 2025 లీగ్ తొలి మ్యాచ్ లో తమిళ్ తళైవాస్ 38-35తో తెలుగు టైటాన్స్‌పై విజయం సాధించింది. అరుణ్ దేశ్వాల్, పవన్ సేహ్రావత్ చివరి క్షణాల్లో సూపర్ రైడ్‌తో అదరగొట్టారు.

ప్రో కబడ్డీ లీగ్ సీజన్ 12 శుక్రవారం విశాఖపట్నంలోని రాజీవ్ గాంధీ ఇండోర్ స్టేడియంలో గ్రాండ్‌గా ప్రారంభమైంది. సదర్న్ డెర్బీగా పోరుతో పీకేఎల్ 12 ప్రారంభమైంది. తొలి పోరులో తమిల్ తళైవాస్ - తెలుగు టైటాన్స్ పోటీ పడ్డాయి. ఈ పోరులో తమిళ్ తళైవాస్ 38-35 తేడాతో తెలుగు టైటాన్స్‌పై విజయం సాధించింది. ప్రో కబడ్డీ సీజన్ 12 తొలి మ్యాచ్ ఉత్కంఠగా సాగింది. ఈ సీజన్ కు ఈ మ్యాచ్ గొప్ప ఆరంభంగా నిలిచింది.

கடைசில இறங்கி அடிச்சு முதல் வெற்றியை பிடிச்சாச்சு பவன் பவர் #PKL12 #ProKabaddi #TamilThalaivas #TeluguTitans pic.twitter.com/LZZd1zRqHy

— ProKabaddi (@ProKabaddi) August 29, 2025

మ్యాచ్ మొదటి రైడ్ నుంచే అరుణ్ దేశ్వాల్ తన దూకుడు చూపించారు. సీజన్ 11లో కొనసాగించిన ఫామ్‌ను ఇక్కడ కూడా చూపించాడు. మొదటి రైడ్‌లోనే పాయింట్ సాధించి తన జట్టుకు ఆధిక్యం ఇచ్చారు. మరోవైపు, తెలుగు టైటాన్స్ తరఫున విజయ్ మాలిక్ కూడా తొలి రైడ్ తో పాయింట్ సాధించాడు.

భారత్ హుడా డూ-ఆర్-డై రైడ్‌లో రెండు పాయింట్లు తెచ్చి టైటాన్స్‌ను ఆధిక్యంలోకి తీసుకొచ్చారు. 10 నిమిషాలకే స్కోరు 5-5 సమంగా మారింది. తొలి అర్ధభాగం ముగిసే సమయానికి తళైవాస్ 14-13తో స్వల్ప ఆధిక్యంలోకి వెళ్ళింది.

తొలి అర్ధభాగంలో భారత్ హుడా తన 600వ రైడ్ మైలురాయిని చేరుకున్నారు. రెండో అర్ధభాగం ప్రారంభంలోనే ఆయన హిమాంశు, సురేష్ జాధవ్‌లను డూ-ఆర్-డై రైడ్‌లో ఔట్ చేసి, టైటాన్స్‌కు ఆధిక్యం అందించారు. దీంతోనే సీజన్ తొలి ఆల్ ఔట్ నమోదు అయింది. టైటాన్స్ 19-14 ఆధిక్యం సాధించింది. ఈ సమయంలో టైటాన్స్ పూర్తి కంట్రోల్‌లోకి వెళ్ళారు.

అరుణ్ దేశ్వాల్ తన సూపర్ 10ను పూర్తి చేసి తళైవాస్‌ను మ్యాచ్‌లో నిలబెట్టారు. తర్వాత పవన్ సేహ్రావత్ తన అకౌంట్ తెరిచారు. ఇద్దరు రైడర్లు కలసి తళైవాస్‌ను మళ్లీ ట్రాక్ లోకి తీసుకొచ్చారు.

మ్యాచ్ చివరి ఐదు నిమిషాలు మిగిలి ఉండగా స్కోరు 28-28 సమమైంది. ఈ క్రమంలో నితేశ్ కుమార్ అశీష్ నార్వాల్‌ను ఔట్ చేసి, టైటాన్స్‌పై ఆల్ ఔట్ సాధించారు. స్కోరు 31-29తో తళైవాస్ ఆధిక్యంలోకి వెళ్లింది.

Stop him if you can - Arjun Deshwal #ProKabaddi #PKL12 #TeluguTitans #TamilThalaivas #GhusKarMaarenge pic.twitter.com/uyBiwQ2Gxs

— ProKabaddi (@ProKabaddi) August 29, 2025

భారత్ హుడా తన సూపర్ 10 పూర్తి చేసి స్కోరు తేడాను ఒక్క పాయింట్‌కు తగ్గించారు. కానీ, చివరి క్షణాల్లో పవన్ సేహ్రావత్ అద్భుతమైన సూపర్ రైడ్ చేసి తళైవాస్‌కు విజయాన్ని అందించారు. చివరి స్కోరు 38-35గా నమోదైంది.

తెలుగు టైటాన్స్ vs తమిళ్ తళైవాస్‌ మ్యాచ్ ముఖ్యాంశాలు

• తళైవాస్ విజయం: 38-35

• అరుణ్ దేశ్వాల్: సూపర్ 10 (ఈ సీజన్ లో ఫస్ట్ ప్లేయర్)

• పవన్ సేహ్రావత్: చివరి క్షణాల్లో సూపర్ రైడ్, 9 పాయింట్లు

• భారత్ హుడా: సూపర్ 10, 600వ PKL రైడ్

• ఆల్ ఔట్స్: రెండో అర్ధభాగంలో ఒక్కోసారి రెండు జట్లు సాధించాయి

ఆసియా కప్ హాకీ 2025: హర్మన్‌ప్రీత్ సింగ్ హ్యాట్రిక్.. ఉత్కంఠ పోరులో చైనాపై భారత్‌ గెలుపు

Mahesh Rajamoni — Sat, 30 Aug 2025 09:05:14 +0530

Asia Cup Hockey 2025: హర్మన్‌ప్రీత్ సింగ్ హ్యాట్రిక్, జుగ్రాజ్ సింగ్ గోల్‌తో భారత్ ఆసియా కప్ 2025 తొలి మ్యాచ్‌లో చైనాపై 4-3 తేడాతో విజయం సాధించింది. చివరి వరకు మ్యాచ్ ఉత్కంఠగా సాగింది.

ఆసియా కప్ హాకీ 2025 శుక్రవారం బీహార్‌లోని రాజ్‌గిర్ హాకీ స్టేడియంలో ప్రారంభమైంది. టోర్నమెంట్ తొలి మ్యాచ్‌లో భారత్ 4-3 తేడాతో చైనాపై విజయం సాధించింది. మొత్తం ఏడు గోల్స్‌ అన్ని పెనాల్టీ కార్నర్స్ ద్వారానే రావడం ఈ మ్యాచ్ ప్రత్యేకతగా నిలిచింది.

ప్రపంచ ర్యాంకింగ్స్‌లో ఏడో స్థానంలో ఉన్న భారత్ తరఫున కెప్టెన్ హర్మన్‌ప్రీత్ సింగ్ హ్యాట్రిక్ సాధించగా, జుగ్రాజ్ సింగ్ ఒక గోల్ చేశారు. మరోవైపు, ప్రపంచ ర్యాంకింగ్స్‌లో 23వ స్థానంలో ఉన్న చైనా తరఫున షిహావో డు, బెన్‌హై చెన్, జియెషెంగ్ గావో తలా ఒక గోల్ సాధించారు.

మ్యాచ్ ప్రారంభం నుంచే భారత్ దూకుడుగా ఆడింది. ప్రారంభ దాడులను చైనా డిఫెన్స్ తట్టుకుని, 12వ నిమిషంలో షిహావో డు పెనాల్టీ కార్నర్‌ను గోల్‌గా మార్చి చైనాకు ఆధిక్యం అందించాడు. భారత్ కౌంటర్ అటాక్ ప్రయత్నించినా తొలి క్వార్టర్ ముగిసే సరికి స్కోరు 1-0తో చైనా ఆధిక్యంలో నిలిచింది.

రెండో క్వార్టర్‌లో భారత్ మూడో నిమిషంలోనే పెనాల్టీ కార్నర్ సాధించింది. జుగ్రాజ్ సింగ్ శక్తివంతమైన డ్రాగ్ ఫ్లిక్‌తో స్కోరు 1-1గా సమం చేశారు. రెండు నిమిషాలకే మరో పెనాల్టీ కార్నర్‌ను హర్మన్‌ప్రీత్ సింగ్ గోల్‌గా మార్చి భారత్‌ను 2-1 ఆధిక్యంలోకి తీసుకెళ్లారు. ఈ ఆధిక్యాన్ని భారత్ కాపాడుకుంటూ హాఫ్‌టైమ్‌కు 2-1 స్కోరుతో ముందంజలో నిలిచింది.

హాఫ్‌టైమ్ తర్వాత భారత్ దూకుడు కొనసాగించింది. 33వ నిమిషంలో మరోసారి హర్మన్‌ప్రీత్ సింగ్ పెనాల్టీ కార్నర్‌ను గోల్‌గా మార్చి స్కోరును 3-1 చేశారు. కానీ చైనా వెనక్కి తగ్గలేదు. 35వ నిమిషంలో బెన్‌హై చెన్ పెనాల్టీ కార్నర్‌ను గోల్‌గా మార్చి స్కోరును 3-2 చేశారు.

ఆపై చైనా దాడులు మరింత ఉధృతం అయ్యాయి. 41వ నిమిషంలో జియెషెంగ్ గావో మరో పెనాల్టీ కార్నర్‌ను గోల్‌గా చేసి స్కోరును 3-3 సమం చేశారు. మూడో క్వార్టర్ ముగిసే సమయానికి రెండు జట్లు సమాన స్థాయిలో నిలిచాయి.

నాలుగో క్వార్టర్ ప్రారంభంలో భారత్ వరుసగా పెనాల్టీ కార్నర్లు సాధించింది. 47వ నిమిషంలో హర్మన్‌ప్రీత్ సింగ్ అద్భుతమైన డ్రాగ్ ఫ్లిక్‌తో తన హ్యాట్రిక్ పూర్తి చేసి భారత్‌కు 4-3 ఆధిక్యం ఇచ్చారు. ఆపై భారత్ బాల్ పాజెషన్‌ను కంట్రోల్ చేస్తూ, చైనాపై ప్రెజర్ కొనసాగించింది.

జర్మన్‌ప్రీత్ సింగ్ ఐదు నిమిషాలపాటు యెల్లో కార్డ్ కారణంగా బయటకు వెళ్ళినా, భారత్ తన దూకుడుతో బలంగా నిలిచింది. చైనాకు గోల్ చేసే అవకాశం ఇవ్వలేదు. చివరి నిమిషాల వరకు ఉత్కంఠ కొనసాగినా భారత్ 4-3 ఆధిక్యాన్ని నిలబెట్టుకుని విజయం సాధించింది.

• భారత్ గోల్స్: హర్మన్‌ప్రీత్ సింగ్ (20’, 33’, 47’), జుగ్రాజ్ సింగ్ (18’)

• చైనా గోల్స్: షిహావో డు (12’), బెన్‌హై చెన్ (35’), జియెషెంగ్ గావో (41’)

• మొత్తం 7 గోల్స్‌ అన్నీ పెనాల్టీ కార్నర్స్ ద్వారానే వచ్చాయి.

• హర్మన్‌ప్రీత్ సింగ్ ఈ మ్యాచ్‌లో హ్యాట్రిక్ నమోదు చేశారు.

• మ్యాచ్ జరిగిన స్థలం: రాజ్‌గిర్ హాకీ స్టేడియం, బీహార్

జపాన్ తో తర్వాతి మ్యాచ్ ఆడనున్న భారత్

ఈ విజయంతో భారత్ ఆసియా కప్ 2025లో విజయవంతమైన ఆరంభం చేసింది. పూల్-ఏ లో భాగంగా భారత్ తమ రెండో మ్యాచ్‌ను జపాన్ తో ఆడనుంది. ప్రతి గ్రూప్‌లో టాప్ 2 జట్లు సూపర్ 4 దశకు అర్హత సాధిస్తాయి.

వరల్డ్ బాక్సింగ్ ఛాంపియన్‌షిప్స్ 2025: లవ్లీనా, నిఖత్ జరీన్‌లతో బలంగా భారత జట్టు

Mahesh Rajamoni — Tue, 02 Sep 2025 22:51:08 +0530

World Boxing Championships 2025 India Squad: యూకే లోని లివర్‌పూల్‌లో సెప్టెంబర్ 5 నుంచి 14 వరకు వరల్డ్ బాక్సింగ్ ఛాంపియన్‌షిప్స్ 2025 జరగనుంది. దీని కోసం భారత్‌ 20 మంది బాక్సర్లతో బలమైన జట్టును ప్రకటించింది. టోక్యో 2020 ఒలింపిక్స్‌లో కాంస్యం గెలుచుకున్న లవ్లీనా బోర్గోహైన్, పారిస్ 2024 ఒలింపిక్స్‌లో అద్భుత ప్రదర్శన చేసిన నిఖత్ జరీన్, అలాగే సీనియర్ బాక్సర్ పూజా రాణి ప్రధాన ఆకర్షణలుగా నిలిచారు.

ఈ టోర్నమెంట్‌ ప్రత్యేకత ఏమిటంటే, ఇది కొత్తగా ఏర్పడిన అంతర్జాతీయ సంస్థ వరల్డ్ బాక్సింగ్ ఆధ్వర్యంలో జరుగుతున్న తొలి ఎడిషన్. మొత్తం 65 దేశాల నుండి 550కి పైగా బాక్సర్లు పాల్గొంటున్నారు. ఇందులో పారిస్ 2024 ఒలింపిక్స్‌ పతక విజేతలైన 17 మంది కూడా ఉండటం విశేషం.

భారత జట్టులో స్టార్ బాక్సర్లు

మహిళా విభాగంలో లవ్లీనా 75 కిలోల విభాగంలో, నిఖత్ 51 కిలోల విభాగంలో, పూజా రాణి 80 కిలోల విభాగంలో బరిలోకి దిగుతున్నారు. ఈ ముగ్గురు బాక్సర్లు ప్యారిస్ 2024 తర్వాత తొలిసారి అంతర్జాతీయ స్థాయిలో పోటీలో పాల్గొంటున్నారు.

పురుషుల విభాగంలో ఆసియా గేమ్స్ కాంస్య విజేత నరేందర్ బెర్వాల్ (90+kg), వరల్డ్ బాక్సింగ్ కప్ స్వర్ణ పతక విజేతలు హితేష్ గూలియా (70kg), అభినాష్ జామ్‌వాల్ (65kg) కీలక ఆటగాళ్లు.

వరల్డ్ బాక్సింగ్ ఛాంపియన్‌షిప్స్ 2025 కోసం భారత జట్టు:

మహిళలు: మీనాక్షి హూడా (48kg), నిఖత్ జరీన్ (51kg), సాక్షి (54kg), జైస్మిన్ లాంబోరియా (57kg), సంజు ఖత్రి (60kg), నీరజ్ ఫోగాట్ (60kg), సనమచా చాను (70kg), లవ్లీనా బోర్గోహైన్ (75kg), పూజా రాణి (80kg), నూపుర్ శియోరన్ (80+kg)

పురుషులు: జడుమణి సింగ్ మండెంగ్బం (50kg), పవన్ బార్ట్‌వాల్ (55kg), సచిన్ సివాచ్ జూనియర్ (60kg), అభినాష్ జామ్‌వాల్ (65kg), హితేష్ గూలియా (70kg), సుమిత్ కుందు (75kg), లక్ష్య చాహర్ (80kg), జుగ్నూ అహ్లావత్ (85kg), హర్ష్ చౌదరి (90kg), నరేందర్ బెర్వాల్ (90+kg)

Team India is Liverpool-bound!➡️After an intensive training camp in Sheffield, the Indian contingent is on its way to take part in the World Boxing Championships 2025, starting September 4! #BFI #PunchMeinHaiDum pic.twitter.com/Vi68nFgx7y

— Boxing Federation (@BFI_official) September 2, 2025

వరల్డ్ బాక్సింగ్ ఛాంపియన్‌షిప్స్ 2025 టోర్నమెంట్‌ షెడ్యూల్‌, ఫార్మాట్‌

వరల్డ్ బాక్సింగ్ ఛాంపియన్‌షిప్స్ 2025 నాకౌట్‌ ఫార్మాట్లో జరుగుతుంది. గెలుపొందినవారు తర్వాతి దశకు వెళతారు. సెమీ ఫైనల్‌ ఓడిన ఇద్దరికీ కాంస్య పతకాలు లభిస్తాయి. ప్రతి బౌట్‌లో మూడు నిమిషాల మూడు రౌండ్లు ఉంటాయి. జడ్జీలు "టెన్ పాయింట్ మస్ట్" సిస్టమ్‌తో నిర్ణయం తీసుకుంటారు.

• క్వార్టర్ ఫైనల్స్: సెప్టెంబర్ 10

• సెమీ ఫైనల్స్: సెప్టెంబర్ 12, 13

• ఫైనల్స్: సెప్టెంబర్ 14

టోర్నీ చివరి రోజు మొత్తం 20 మంది బాక్సర్లు కొత్త వరల్డ్ ఛాంపియన్ కిరీటం సొంతం చేసుకోనున్నారు. ఇక భారత్‌ తరఫున బరిలోకి దిగబోతున్న ఈ 20 మంది బాక్సర్లు లివర్‌పూల్‌లో ప్రపంచ స్థాయిలో ప్రతిభ చాటేందుకు సిద్ధమవుతున్నారు. లవ్లీనా, నిఖత్ వంటి స్టార్ బాక్సర్లు ఉండటంతో అభిమానుల్లో భారీ అంచనాలు నెలకొన్నాయి.

ప్రపంచ ఆర్చరీ ఛాంపియన్‌షిప్స్‌లో చరిత్ర సృష్టించిన భారత్

Mahesh Rajamoni — Sun, 07 Sep 2025 21:18:16 +0530

World Archery Championships: భారత పురుషుల కంపౌండ్ ఆర్చరీ జట్టు దక్షిణ కొరియా గ్వాంగ్జులో జరిగిన ప్రపంచ ఛాంపియన్‌షిప్స్‌లో చరిత్ర సృష్టించింది. తొలిసారి గోల్డ్ మెడల్ సాధించింది.

దక్షిణ కొరియాలోని గ్వాంగ్జు వేదికగా జరిగిన ప్రపంచ ఆర్చరీ ఛాంపియన్‌షిప్స్‌లో భారత పురుషుల కంపౌండ్ జట్టు ఆదివారం చరిత్ర సృష్టించింది. ఫ్రాన్స్‌పై 235-233 తేడాతో విజయం సాధించి, భారత్ తన తొలి పురుషుల జట్టు స్వర్ణ పతకం గెలుచుకుంది.

From to to & finally —Rishabh Yadav, Prathamesh Fuge & Aman Saini showed nerves of steel to clinch India’s first-ever Compound Men’s Team Gold at #WorldArcheryChampionships 2025, Gwangju! #ArcheryIndia #TeamIndia #NTPC pic.twitter.com/JIvP2cY16f

— ARCHERY ASSOCIATION OF INDIA (@india_archery) September 7, 2025

రిషభ్ యాదవ్, అమన్ సైనీ, ప్రథమేష్ భలచంద్ర ఫుగేలతో కూడిన భారత జట్టు ప్రారంభంలో 57-59తో నిలిచింది. కానీ రెండో ఎండ్‌లో వరుసగా ఆరు పర్ఫెక్ట్ 10లు సాధించి స్కోరు 117-117తో సమం చేసింది. మూడు రౌండ్ల తర్వాత 176-176 స్కోరు వద్ద నిలిచిన పోరులో చివర్లో ఫ్రాన్స్ తప్పిదాలు చేయగా, చివరి బాణాన్ని ఫుగే 10గా నమోదు చేసి భారత్‌కు చారిత్రక స్వర్ణాన్ని అందించాడు.

భారత చీఫ్ కంపౌండ్ కోచ్ జీవన్జోత్ సింగ్ తేజా మాట్లాడుతూ.. ఆస్ట్రేలియాతో జరిగిన తొలి మ్యాచ్‌లో ఆటగాళ్ల క్రమాన్ని మార్చడం కీలకంగా మారింది. రిషభ్ యాదవ్ మొదట, అమన్ సైనీ రెండవ స్థానంలో, ఫుగే చివరగా బాణం వదలడం ద్వారా జట్టు సమతుల్యత సాధించింది. ఈ వ్యూహంతో భారత్ అమెరికా, టర్కీని ఓడించి ఫైనల్‌కు చేరుకుందని తెలిపారు.

23 ఏళ్ల రిషభ్ యాదవ్ ఈ పోటీలో అద్భుత ప్రదర్శన చేశాడు. అంతకుముందు, జ్యోతి శూరేక విన్నం జతగా మిక్స్‌డ్ టీమ్ ఫైనల్‌లో నెదర్లాండ్స్‌ మ్యాచ్ లో 155-157 నిలిచి రజత పతకం సాధించాడు. తరువాత పురుషుల జట్టుతో స్వర్ణం సాధించడం ద్వారా ఒక్క ఛాంపియన్‌షిప్‌లోనే రెండు పతకాలు గెలుచుకున్నాడు. ఈ ఏడాది షాంఘై వరల్డ్ కప్‌లో మొదటి పతకం గెలిచిన రిషభ్, ఇప్పుడు ప్రపంచ ఛాంపియన్‌షిప్స్‌లో రెండు పతకాలతో తన ప్రతిభను నిరూపించాడు.

భారత మహిళల కంపౌండ్ జట్టు ప్రీక్వార్టర్‌ఫైనల్లో ఇటలీతో 229-233 తేడాతో ఓడిపోయింది. 2017 నుండి వరుసగా నాలుగు సార్లు పతకాలను సాధించిన మహిళల జట్టు ఈసారి బరిలోనుంచి ఖాళీ చేతులతో నిష్క్రమించింది. ఈసారి భారత్ గ్వాంగ్జులో ఒక స్వర్ణం, ఒక రజతాన్ని సాధించింది. ఇది దేశం కంపౌండ్ ఆర్చరీలో పెరుగుతున్న శక్తిని ప్రపంచానికి చూపించింది. రాబోయే పోటీలలో భారత్ మరిన్ని విజయాలు సాధిస్తుందనే నమ్మకం పెరిగింది.

నో షేక్ హ్యాండ్ వివాదం : భారత్–పాక్ హాకీ ఆటగాళ్ల మధ్య హై ఫైవ్

Mahesh Rajamoni — Tue, 14 Oct 2025 22:37:48 +0530

India and Pakistan hockey: ఆసియా కప్‌లో హ్యాండ్‌షేక్ వివాదం తర్వాత మలేషియాలో జరిగిన సుల్తాన్ ఆఫ్ జోహోర్ కప్ మ్యాచ్‌కు ముందు భారత్–పాక్ జూనియర్ హాకీ జట్లు హై-ఫైవ్‌తో ఆశ్చర్యపరిచాయి.

మలేషియాలోని జోహోర్ బహ్రూలో మంగళవారం జరిగిన సుల్తాన్ ఆఫ్ జోహోర్ కప్ అండర్–21 హాకీ మ్యాచ్‌లో భారత్, పాకిస్తాన్ తలపడ్డాయి. ఆటగాళ్లు మ్యాచ్ ప్రారంభానికి ముందు హై-ఫైవ్‌ చేసుకున్నారు. గత కొద్ది వారాలుగా క్రికెట్‌లో రెండు జట్ల మధ్య హ్యాండ్‌షేక్ వివాదం కొనసాగుతోంది. ఇప్పుడు ఈ స్నేహపూర్వక జెష్చర్ రెండు దేశాల మధ్య క్రీడా సంబంధాలకు సానుకూల సంకేతంగా నిలిచింది.

రెండు జట్ల జాతీయ గీతాలు పూర్తయ్యాక భారత జూనియర్ ఆటగాళ్లు పాకిస్తాన్ జట్టువైపు నడిచి, ఆట ప్రారంభానికి ముందు ప్రతి ఆటగాడితో హై-ఫైవ్‌లు చేసుకున్నారు. గత నెల ఆసియా కప్‌లో భారత క్రికెట్ జట్టు పాకిస్తాన్ ఆటగాళ్లతో హ్యాండ్‌షేక్ చేయకుండా నిరాకరించిన నేపథ్యంలో ఈ చర్య ప్రత్యేకంగా నిలిచింది.

అలాగే, మహిళల ప్రపంచకప్‌లో కూడా రెండు దేశాల మహిళా జట్లు ప్రీ-మ్యాచ్, పోస్ట్-మ్యాచ్ తర్వాత హ్యాండ్‌షేక్‌ కు నిరాకరించాయి. అయితే హాకీ ఆటగాళ్ల ఈ స్నేహపూర్వక తీరు క్రీడా విలువలను ప్రతిబింబించింది.

Pakistan and India players shook hands before their match at the Sultan of Johor Hockey Cup today Surya Kumar Yadav & BCCI should learn something from this ‼️ pic.twitter.com/siB9HxRElk

— Muzammal Shah (@imuzammalshah) October 14, 2025

మ్యాచ్‌కు ముందు పాకిస్తాన్ హాకీ ఫెడరేషన్ (PHF) తన ఆటగాళ్లకు స్పష్టమైన సూచనలు ఇచ్చింది. భారత ఆటగాళ్లు హ్యాండ్‌షేక్ చేయకపోయినా, ఏ విధమైన స్పందనలు ఇవ్వకుండా మ్యాచ్‌పై దృష్టి పెట్టాలని ఆదేశించింది. పాకిస్తాన్ హాకీ ఫెడరేషన్ కు చెందిన అధికారి మాట్లాడుతూ.. “భారత ఆటగాళ్లు హ్యాండ్‌షేక్ చేయకపోతే దానిని పట్టించుకోకండి. ఎలాంటి భావోద్వేగ ప్రతిస్పందనలు చేయకండి. మీ ఆటపై దృష్టి పెట్టండి” అని చెప్పినట్టు తెలిపారు.

ఆసియా కప్ సమయంలో భారత పురుషుల క్రికెట్ జట్టు పాకిస్తాన్ ఆటగాళ్లతో హ్యాండ్‌షేక్ చేయకపోవడం వివాదంగా మారింది. టాస్ సమయంలో, మ్యాచ్ అనంతరం కూడా పాకిస్తాన్ ఆటగాళ్లతో భారత ప్లేయర్లు చేతులు కలపలేదు. ఆ ఘటన పాకిస్తాన్‌లో ఆగ్రహం రేపింది. ఐసీసీ కి ఫిర్యాలు చేయడం వరకు చేరింది.

భారత కెప్టెన్ సూర్యకుమార్ యాదవ్ ఆ నిర్ణయం పహల్గామ్ ఉగ్రదాడిలో ప్రాణాలు కోల్పోయిన సైనికులకు అంకితం చేశామని తెలిపారు. కానీ ఈ వివరణను పాకిస్తాన్ రాజకీయ ఉద్దేశాలతోకూడినదిగా విమర్శించింది.

ఆ తర్వాత పాకిస్తాన్ ఐసీసీకి అధికారిక ఫిర్యాదు చేయగా, భారత జట్టు కూడా హారిస్ రౌఫ్, సాహిబ్‌జాదా ఫర్హాన్‌ల ప్రవర్తనపై ఫిర్యాదు చేసింది. రౌఫ్ జెట్ క్రాషింగ్ సిగ్నల్ చేయడం, ఫర్హాన్ రైఫిల్ మైమిక్ చేయడం పై భారత ప్లేయర్లకు ఆగ్రహం తెప్పించింది.

ఆసియా కప్ లో భారత జట్టు ఛాంపియన్ గా నిలిచింది. అయితే, ఈ టోర్నీ ముగింపులో కూడా వివాదం చోటుచేసుకుంది. భారత ఆటగాళ్లు పాకిస్తాన్ అంతర్గత వ్యవహారాల మంత్రి, ఏసీసీ చైర్మన్ మోహ్సిన్ నక్వీ చేతుల మీదుగా ట్రోఫీ స్వీకరించడానికి నిరాకరించారు. దీంతో ట్రోఫీ ప్రదాన కార్యక్రమం ఆలస్యమై, చివరికి ట్రోఫీని వేదిక నుండి తీసివేయాల్సి వచ్చింది.

ఈ క్రికెట్ వివాదాల అనంతరం, సుల్తాన్ ఆఫ్ జోహోర్ కప్‌లో రెండు దేశాల జూనియర్ హాకీ ఆటగాళ్లు చూపించిన స్నేహ హావభావం కొత్త ఆశలు కలిగించింది. రెండు దేశాల మధ్య క్రీడా వేదికలపై సానుకూల వాతావరణం పునరుద్ధరించడానికి ఈ చర్యలు చిన్నివే అయినా.. ప్రాధాన్యతగల అడుగని క్రీడాభిమానులు భావిస్తున్నారు.---

మొత్తం చూస్తే, హ్యాండ్‌షేక్ వివాదాల మధ్య మలేషియాలో హై-ఫైవ్‌లతో భారత్–పాక్ యువ ఆటగాళ్లు క్రీడా స్ఫూర్తిని నిలబెట్టారు. ఈ సంఘటన భవిష్యత్తులో ఇరు దేశాల మధ్య క్రీడా సంబంధాలను మరింత సానుకూల దిశగా నడిపే అవకాశం కల్పించింది.

గోల్డెన్ బాయ్ నీరజ్ చోప్రా సంపాదన ఎంతో తెలుసా?

Mahesh Rajamoni — Fri, 29 Aug 2025 22:39:23 +0530

Neeraj Chopra Net Worth: భారత స్టార్ జావెలిన్ త్రోయర్ నీరజ్ చోప్రా జావెలిన్ ను గురిపెడితే గోల్డ్ పడాల్సిందే. ఆటలోనే కాదు సంపాదనలోనూ నీరజ్ చోప్రా గోల్డెన్ బాయ్ గా ముందుకు సాగుతున్నారు. బ్రాండ్ ఎండార్స్‌మెంట్, పోటీల ద్వారా భారీగానే సంపాదిస్తున్నారు.

భారత జావెలిన్ త్రోయర్, "గోల్డెన్ బాయ్" గా ప్రసిద్ధి చెందిన నీరజ్ చోప్రా క్రీడలతో పాటు ఆదాయంలోనూ అగ్రస్థానంలో ఉన్నారు. ఆటలో తన ప్రతిభతో దేశానికి గౌరవం తెచ్చిన ఆయన, సంపాదనలోనూ అదరగొడుతూ కోట్లల్లో సంపాదిస్తున్నారు.

పలు మీడియా నివేదికల ప్రకారం.. 2025 నాటికి నీరజ్ చోప్రా నికర ఆస్తి సుమారు రూ. 37 కోట్లుగా అంచనా. చోప్రాకు ఆదాయం అనేక వనరుల నుంచి వస్తుంది. అందులో బ్రాండ్ ఎండార్స్‌మెంట్‌లు, అంతర్జాతీయ పోటీలు, భారత ఆర్మీ ఉద్యోగం, ప్రభుత్వ బహుమతులు వంటివి ఉన్నాయి.

మీడియా నివేదికల ప్రకారం, నీరజ్ చోప్రా సంవత్సరానికి సుమారు రూ. 4 కోట్లు జీతంగా పొందుతున్నారు. అయితే ఇది ఆయన మొత్తం ఆదాయంలో కేవలం 10 శాతం మాత్రమే. దేశ విదేశాల్లో జరిగే వివిధ అథ్లెటిక్స్ పోటీల్లో పాల్గొని విజయం సాధించడం ద్వారా ఆయనకు పెద్ద మొత్తంలో ఆదాయం వస్తోంది.

స్విట్జర్లాండ్‌లోని జ్యూరిక్‌లో జరిన డైమండ్ లీగ్ 2025 ఫైనల్‌లో ఇబ్బంది పడ్డారు. కానీ, రన్నరఫ్ గా సిల్వర్ మెడల్ ను సాధించారు. గ్రెనడాకు చెందిన డిఫెండింగ్ చాంపియన్ ఆండర్సన్ పీటర్స్, జర్మనీకి చెందిన జూలియర్ బేబర్ వంటి ఆటగాళ్లతో ఫైనల్ లో తలపడ్డారు.

నీరజ్ చోప్రా ఇప్పుడు బ్రాండ్ ఎండార్స్‌మెంట్ రంగంలోనూ క్రీడాకారుల జాబితాలో టాప్ లో కొనసాగుతున్నారు. భారత క్రికెట్ స్టార్ విరాట్ కోహ్లీ తర్వాత ప్రకటనల ద్వారా అత్యధికంగా సంపాదిస్తున్న క్రీడాకారుడు ఆయనే.

JSW Sports, Omega, Mobil India, Limca, Tata AIA Life Insurance, MuscleBlaze, Nike, Under Armour వంటి ప్రముఖ బ్రాండ్లతో నీరజ్ చోప్రా ఒప్పందాలు కుదుర్చుకున్నారు. పలు రిపోర్టుల ప్రకారం.. నీరజ్ చోప్రా ఎండార్స్‌మెంట్ ఫీజు సంవత్సరానికి రూ. 4 కోట్ల నుంచి రూ. 4.5 కోట్ల వరకు ఉంటుంది.

క్రీడాకారుడిగానే కాకుండా నీరజ్ చోప్రా భారత ఆర్మీలో లెఫ్టినెంట్ కర్నల్ హోదాలో కూడా కొనసాగుతున్నారు. ఇండియన్ డిఫెన్స్ అకాడమీ అధికారిక వెబ్‌సైట్ ప్రకారం, ఆయనకు రూ. 1,12,200 నుండి రూ. 2,12,400 వరకు నెలసరి జీతం లభిస్తుంది. ఇది ఆయన స్థిరమైన ఆదాయ వనరులో ఒకటిగా ఉంది.

నీరజ్ చోప్రా తన అద్భుత ప్రతిభతో దేశ విదేశాల్లో అనేక అవార్డులు, ప్రోత్సాహక బహుమతులు అందుకున్నారు. టోక్యో ఒలింపిక్స్‌లో గోల్డ్ మెడల్ సాధించిన తరువాత, హర్యానా ప్రభుత్వం, పంజాబ్ ప్రభుత్వం, ఇండియన్ రైల్వే తదితర సంస్థల నుండి భారీ మొత్తంలో నగదు బహుమతులు అందుకున్నారు. ఇలాంటి ప్రభుత్వ ప్రోత్సాహకాలు, ఇతర అవార్డులు ఆయన ఆదాయానికి ముఖ్యమైన వనరుగా నిలుస్తున్నాయి.

గోల్డెన్ బాయ్ నీరజ్ చోప్రా ఆటలోనూ, ఆదాయంలోనూ అగ్రస్థానంలో నిలుస్తూ భారత యువతకు ప్రేరణగా నిలుస్తున్నారు. అంతర్జాతీయ క్రీడా వేదికలలో విజయాలు సాధించడంతో పాటు బ్రాండ్ విలువను పెంచుకుంటూ కోట్లలో సంపాదిస్తున్నారు.

ఆసియా కప్ 2025: జపాన్‌పై భారత్ థ్రిల్లింగ్ విక్టరీ.. సూపర్-4లో స్థానం

Mahesh Rajamoni — Sun, 31 Aug 2025 22:54:10 +0530

Asia Cup Hockey 2025: రాజ్‌గిర్‌లో ఆసియా కప్ హాకీ టోర్నీ‌లో భారత్ 3-2 తేడాతో జపాన్‌ను ఓడించింది. హర్మన్‌ప్రీత్ సింగ్ రెండు గోల్స్, మన్ దీప్ సింగ్ ఒక గోల్ సాధించారు. ఈ విజయంతో భారత్ సూపర్ 4 లో స్థానం ఖాయం చేసుకుంది.

బీహార్‌లోని రాజ్‌గిర్ లో జరుగుతున్న మెన్స్ ఆసియా కప్ హాకీ 2025లో భారత్ తన రెండో పూల్ A మ్యాచ్‌లో జపాన్‌పై 3-2 తేడాతో విజయం సాధించింది. ఆదివారం రాజ్‌గిర్ హాకీ స్టేడియంలో జరిగిన ఈ మ్యాచ్‌లో భారత కెప్టెన్ హర్మన్‌ప్రీత్ సింగ్ (5వ, 46వ నిమిషాలు) రెండు గోల్స్, మన్ దీప్ సింగ్ (4వ నిమిషం) ఒక గోల్ సాధించారు. జపాన్ తరఫున కోసే కావాబే (38వ, 59వ నిమిషాలు) రెండు గోల్స్ చేశారు. ఈ విజయంతో భారత్ సూపర్ 4 దశకు అర్హత సాధించింది.

మ్యాచ్ ఆరంభం నుంచే భారత్ దూకుడుగా ఆటను మొదలుపెట్టింది. నాలుగో నిమిషంలో సుఖ్జీత్ సింగ్ అందించిన పాస్‌ను మన్ దీప్ సింగ్ గోల్‌గా మార్చాడు. వెంటనే వచ్చిన పెనాల్టీ కార్నర్‌ను హర్మన్‌ప్రీత్ సింగ్ గోల్‌గా మలిచి భారత్‌ను 2-0 ఆధిక్యంలో నిలిపాడు. జపాన్ 13వ నిమిషంలో పెనాల్టీ కార్నర్ సాధించినా, దాన్ని గోల్ గా మార్చలేకపోయింది.

జపాన్ రెండో క్వార్టర్‌లో భారత్ కు గట్టి పోటీ ఇచ్చింది. 19వ నిమిషంలో ర్యోసుకే షినోహరా చేసిన షాట్ తప్పింది. 24వ నిమిషంలో జపాన్ మరో పెనాల్టీ కార్నర్ పొందింది. కానీ జర్మన్‌ప్రీత్ అద్భుతంగా కాపాడాడు. భారత్ కూడా అర్ధభాగం ముగిసేలోపు మరో పెనాల్టీ కార్నర్ దక్కించుకుంది కానీ అమిత్ రోహిదాస్ టార్గెట్‌ను చేజార్చాడు.

38వ నిమిషంలో జపాన్ తరఫున కోసే కావాబే గోల్ చేసి స్కోరు 2-1కి చేరువ చేశాడు. ఆటలో జపాన్ దూకుడు పెంచినా, భారత్ తన పట్టును కోల్పోలేదు. 46వ నిమిషంలో భారత్ పెనాల్టీ కార్నర్ సాధించింది. హర్మన్‌ప్రీత్ సింగ్ గోల్‌కీపర్ కాళ్ల మధ్యగా బంతిని పంపి తన రెండో గోల్ ను సాధించాడు. దీంతో భారత్ 3-1 ఆధిక్యంలో నిలిచింది.

చివరి క్వార్టర్‌లో జపాన్ గోల్ అవకాశాలు కోసం గట్టిగానే ప్రయత్నించింది. 49వ నిమిషంలో వచ్చిన పెనాల్టీ కార్నర్‌ను భారత గోల్‌కీపర్ సూరజ్ కార్కెరా రెండు సార్లు అద్భుతంగా కాపాడాడు. 59వ నిమిషంలో జపాన్ ఆటగాడు కావాబే రీబౌండ్ బంతిని గోల్ చేసి స్కోరును 3-2కు తగ్గించాడు. చివరి నిమిషంలో హర్మన్‌ప్రీత్ సింగ్‌కు యెల్లో కార్డు రావడంతో భారత్ 10 మందితోనే ఆటను కొనసాగించింది. ఈ సమయంలో భారత జట్టు సమయాన్ని వృథా చేస్తూ ఆధిక్యాన్ని కాపాడుకుంది.

తర్వాతి మ్యాచ్‌లో కజకిస్తాన్ తో తలపడనున్న భారత్

జపాన్ పై విజయం తర్వాత భారత్ పూల్ Aలో అగ్రస్థానంలో నిలిచింది. భారత్ తన తదుపరి మ్యాచ్‌ను సెప్టెంబర్ 1, సోమవారం కజకస్తాన్‌తో ఆడనుంది. ఈ మ్యాచ్ గెలిస్తే భారత్ ఓటమి లేకుండా సూపర్ 4 దశలోకి ప్రవేశిస్తుంది.

కబడ్డీ వరల్డ్ కప్‌ ఛాంపియన్ గా టీమిండియా.. దుమ్మురేపుతున్న భారత మహిళలు

Mahesh Rajamoni — Mon, 24 Nov 2025 23:53:24 +0530

Kabaddi World Cup: 2025లో భారత మహిళలు దుమ్మురేపుతున్నారు. కబడ్డీ వరల్డ్ కప్‌లో చైనీస్ తైపీపై భారత్ అదిరిపోయే విజయం సాధించింది. అద్భుతమైన ఆటతో ఈ ఏడాది నాలుగు ప్రపంచకప్పులు గెలుచుకుని రికార్డు సృష్టించారు.

బంగ్లాదేశ్ రాజధాని ఢాకాలో భారత మహిళల కబడ్డీ జట్టు మరోసారి తన ఆధిపత్యాన్ని చాటింది. ఉత్కంఠభరితంగా సాగిన ఉమెన్స్ కబడ్డీ వరల్డ్ కప్ 2025 (Women’s Kabaddi World Cup 2025) ఫైనల్‌లో భారత్ 35-28 తేడాతో చైనీస్ తైపీపై ఘన విజయం సాధించింది. టోర్నమెంట్ మొత్తం అజేయంగా ముందుకు సాగిన టీమిండియా, కీలకమైన క్షణాల్లో ధైర్యంగా నిలిచి ప్రపంచకప్ ట్రోఫీని వరుసగా రెండోసారి కైవసం చేసుకుంది.

పోటీ ప్రారంభం నుంచే భారత్ తన దూకుడును చూపించింది. మొదటి అర్ధభాగం ముగిసే సరికి 20-16 ఆధిక్యంలో నిలిచి, ప్రత్యర్థిపై ఒత్తిడిని కొనసాగించింది. చివరి ఐదు నిమిషాలు మిగిలే సమయానికి భారత్ లీడ్‌ను 29-24కు చేర్చింది. తైపీ ఆటగాళ్లు ఎంతగా పోరాడినా, భారత్ ను దాటలేకపోయారు. చివరగా భారత్ 7 పాయింట్ల తేడాతో మ్యాచ్‌ను సొంతం చేసుకుంది.

టోర్నమెంట్‌లో మొత్తం 11 దేశాలు పాల్గొన్నాయి. సెమీఫైనల్‌లో ఇరాన్‌పై 33-21 తేడాతో భారత్ విజయం సాధించగా, మరోవైపు చైనీస్ తైపీ బంగ్లాదేశ్‌ను ఓడించి ఫైనల్‌కు అర్హత సాధించింది. ఈ ఢాకా వరల్డ్ కప్‌తో కలిపి ఇప్పటి వరకు మహిళల కేటగిరీలో నిర్వహించిన రెండు వరల్డ్ కప్‌లను భారత్ గెలుచుకోవడం విశేషం.

2025 సంవత్సరం భారత మహిళా క్రీడాకారిణులకు స్వర్ణయుగంగా మారింది. ఏడాది ప్రారంభం నుంచే టీమిండియా మహిళలు వరుస విజయాలతో ప్రపంచ క్రీడల్లో సత్తా చాటారు. ఈ ఏడాది మొత్తం నాలుగు ప్రధాన ప్రపంచకప్‌లు భారత్ మహిళలే గెలుచుకోవడం భారత క్రీడా చరిత్రలో అరుదైన ఘట్టంగా నిలిచింది.

ఈ ఏడాది ఆరంభంలోనే భారత U-19 మహిళల క్రికెట్ జట్టు దక్షిణాఫ్రికాపై తొమ్మిది వికెట్ల తేడాతో గెలిచి ప్రపంచకప్‌ను కైవసం చేసుకుంది. బ్యాటింగ్, బౌలింగ్ రెండు విభాగాల్లోనూ భారత యువత అద్భుత ప్రతిభ చూపించింది. భవిష్యత్ భారత క్రికెట్‌ను ముందుకు తీసుకెళ్లే శక్తి ఈ జట్టులో ఉందని ఈ విజయమే నిరూపించింది.

మహిళల 50 ఓవర్ల వన్డే వరల్డ్ కప్ 2025లో కూడా భారత్ అదరగొట్టింది. హర్మన్‌ప్రీత్ కౌర్ నాయకత్వంలోని టీమ్ దక్షిణాఫ్రికాను 52 పరుగుల తేడాతో ఓడించి మొదటిసారి వన్డే వరల్డ్ కప్‌ను గెలుచుకుంది. షెఫాలీ వర్మ, దీప్తి శర్మ వంటి ఆటగాళ్ల ఆల్‌రౌండ్ ప్రదర్శనతో అదరగొట్టారు.

అలాగే, మహిళల అంధుల టీ20 వరల్డ్ కప్లో భారత జట్టు నేపాల్‌ను చిత్తు చేసి టైటిల్‌ను దక్కించుకుంది. ఈ విజయం భారత మహిళల ప్రతిభా పరాకాష్టను మళ్లీ రుజువు చేసింది.

2025లో భారత మహిళలు గెలిచిన టైటిల్స్

• అండర్ 19 ఉమెన్స్ వరల్డ్ కప్

• ఉమెన్స్ వన్డే వరల్డ్ కప్

• ఉమెన్స్ బ్లైండ్ టీ20 వరల్డ్ కప్

• ఉమెన్స్ కబడ్డీ వరల్డ్ కప్

హైదరాబాద్ ఉప్పల్ స్టేడియంలో మెస్సీ మ్యాజిక్‌.. సీఎం రేవంత్‌తో ఫ్రెండ్లీ మ్యాచ్‌లో 2 గోల్స్‌ !

Mahesh Rajamoni — Sat, 13 Dec 2025 22:06:59 +0530

Lionel Messi : గోట్ ఇండియా టూర్ 2025లో భాగంగా హైదరాబాద్ వచ్చిన లియోనెల్ మెస్సీ ఉప్పల్ స్టేడియంలో సీఎం రేవంత్ రెడ్డితో ఫ్రెండ్లీ మ్యాచ్ ఆడి అభిమానులను ఉర్రూతలూగించారు. రెండు గోల్స్ కూడా కొట్టాడు.

ప్రపంచ ఫుట్‌బాల్ చరిత్రలో తనకంటూ ప్రత్యేక స్థానాన్ని సంపాదించుకున్న లియోనెల్ మెస్సీ, ‘గోట్ ఇండియా టూర్ 2025’లో భాగంగా శనివారం హైదరాబాద్‌కు చేరుకున్నారు. సాయంత్రం సుమారు 4.30 గంటలకు శంషాబాద్ అంతర్జాతీయ విమానాశ్రయంలో ల్యాండ్ అయిన మెస్సీకి తెలంగాణ ప్రభుత్వం ఘన స్వాగతం పలికింది. ఎయిర్‌పోర్ట్ నుంచి నేరుగా తాజ్ ఫలక్‌నుమా ప్యాలెస్‌కు వెళ్లిన మెస్సీ, అక్కడ ఏర్పాటు చేసిన ప్రత్యేక కార్యక్రమాల్లో పాల్గొన్నారు.

ఫలక్‌నుమా ప్యాలెస్‌లో నిర్వహించిన ‘మీట్ అండ్ గ్రీట్’ కార్యక్రమం ప్రత్యేక ఆకర్షణగా నిలిచింది. ఈ ఈవెంట్‌కు ఎంపికైన 100 మంది అభిమానులు ఒక్కొక్కరు రూ.10 లక్షల చొప్పున చెల్లించి మెస్సీతో ఫోటో దిగే అరుదైన అవకాశాన్ని పొందారు. ఈ కార్యక్రమంలో సీఎం రేవంత్ రెడ్డి, కాంగ్రెస్ అగ్రనేత రాహుల్ గాంధీతో పాటు పలువురు ప్రముఖులు పాల్గొన్నారు. మెస్సీతో ముఖాముఖి కావడం జీవితంలో మరచిపోలేని క్షణమని అభిమానులు భావోద్వేగంతో వెల్లడించారు.

సాయంత్రం 6.30 గంటల తర్వాత మెస్సీ బృందం ఉప్పల్ స్టేడియానికి చేరుకుంది. అప్పటికే స్టేడియం పరిసర ప్రాంతాలు అభిమానులతో కిక్కిరిసిపోయాయి. లేజర్ షోలు, లైటింగ్, మ్యూజికల్ ఈవెంట్స్‌తో ఉప్పల్ స్టేడియం పండుగ వాతావరణాన్ని సంతరించుకుంది. ప్రముఖ గాయకుడు రాహుల్ సిప్లిగంజ్ ఇచ్చిన లైవ్ పెర్ఫార్మెన్స్ అభిమానులను మరింత ఉత్సాహపరిచింది.

ఫ్రెండ్లీ మ్యాచ్‌లో అపర్ణ మెస్సీ జట్టు తరఫున లియోనెల్ మెస్సీ మైదానంలోకి దిగగా, సింగరేణి ఆర్ఆర్ జట్టుకు సీఎం రేవంత్ రెడ్డి నాయకత్వం వహించారు. మ్యాచ్‌లో మెస్సీ అద్భుత ప్రదర్శన చేసి రెండు గోల్స్ సాధించారు. మరోవైపు సీఎం రేవంత్ రెడ్డి కూడా ఒక గోల్ చేసి అభిమానులను ఆశ్చర్యానికి గురి చేశారు. ఇరు జట్లతో కలిసి మెస్సీ, రేవంత్ రెడ్డి ఫొటోలు కూడా దిగారు. ఇవి వైరల్ గా మారాయి.

కోల్‌కతాలో గతంలో జరిగిన అవాంఛనీయ ఘటనల నేపథ్యంలో హైదరాబాద్ పోలీసులు అప్రమత్తంగా వ్యవహరించారు. ఉప్పల్ స్టేడియం చుట్టూ 3 వేల మందికి పైగా పోలీసులతో కట్టుదిట్టమైన భద్రత ఏర్పాటు చేశారు. మ్యాచ్ అనంతరం తెలంగాణ ప్రభుత్వం తరఫున సీఎం రేవంత్ రెడ్డి మెస్సీని ఘనంగా సన్మానించారు. స్టేడియం మొత్తం తిరుగుతూ అభిమానులకు అభివాదం చేసిన మెస్సీ, హైదరాబాద్ ఇచ్చిన ఆతిథ్యానికి కృతజ్ఞతలు తెలిపారు.

Lionel Messi : మెస్సీతో సై అంటే సై.. సీఎం రేవంత్ రెడ్డి రచ్చ.. ఎవరు గెలిచారు?

Mahesh Rajamoni — Sat, 13 Dec 2025 22:38:13 +0530

Lionel Messi : ఉప్పల్ స్టేడియంలో జరిగిన ఫ్రెండ్లీ మ్యాచ్‌లో లియోనెల్ మెస్సీ జట్టుపై 3-0తో సింగరేణి ఆర్ ఆర్ విజయం సాధించింది. సీఎం రేవంత్ రెడ్డి, మెస్సి ఫుట్ బాల్ ఆటతో ఉప్పల్ లో సందడి నెలకొంది.

ఫుట్‌బాల్ ప్రపంచాన్ని ఏలుతున్న అర్జెంటీనా దిగ్గజం లియోనెల్ మెస్సి హైదరాబాద్‌కు రావడం నగరానికి ప్రత్యేక గుర్తింపును తీసుకొచ్చింది. ‘గోట్ టూర్ ఆఫ్ ఇండియా’లో భాగంగా శనివారం మెస్సి శంషాబాద్ విమానాశ్రయానికి చేరుకున్నారు. అక్కడి నుంచి నేరుగా ఫలక్‌నుమా ప్యాలెస్‌కు వెళ్లారు.

దాదాపు 200 మందితో కూడిన జంబో సిబ్బందితో వచ్చిన మెస్సికి తెలంగాణ ప్రభుత్వం గట్టి భద్రత కల్పించింది. ఫలక్‌నుమా ప్యాలెస్‌లో నిర్వహించిన మీట్ అండ్ గ్రీట్ కార్యక్రమంలో ఎంపిక చేసిన అభిమానులు పాల్గొన్నారు. ఒక్కో టికెట్‌కు రూ.10 లక్షలు వెచ్చించినా, మెస్సిని ప్రత్యక్షంగా చూడాలనే ఉత్సాహంతో అభిమానులు ముందుకు వచ్చారు. సీఎం రేవంత్ తో మ్యాచ్ అదిరిపోయింది.

సాయంత్రం 6.30 గంటల ప్రాంతంలో మెస్సి ఉప్పల్ స్టేడియానికి చేరుకోగానే అభిమానుల కేరింతలతో మైదానం మార్మోగింది. లేజర్ షో, మ్యూజికల్ ఈవెంట్లు స్టేడియాన్ని పండగ వాతావరణంలో ముంచెత్తాయి. కాంగ్రెస్ నేత రాహుల్ గాంధీ, తెలంగాణ సీఎం రేవంత్ రెడ్డి, ప్రియాంక గాంధీ కుటుంబ సభ్యులు మ్యాచ్‌ను వీక్షించేందుకు హాజరయ్యారు. గ్యాలరీల నిండా ఫుట్‌బాల్ అభిమానులతో ఉప్పల్ స్టేడియం కిక్కిరిసిపోయింది.

సింగరేణి ఆర్ ఆర్ జట్టు, అపర్ణ మెస్సి జట్ల మధ్య ప్రారంభమైన ఫ్రెండ్లీ మ్యాచ్ ఆద్యంతం ఉత్కంఠభరితంగా సాగింది. సింగరేణి ఆర్ ఆర్ జట్టు తరఫున సీఎం రేవంత్ రెడ్డి మైదానంలోకి దిగడం ప్రత్యేక ఆకర్షణగా నిలిచింది. మ్యాచ్ ప్రారంభంలోనే సీఎం రేవంత్ రెడ్డి గోల్ కొట్టి ప్రేక్షకులను ఆశ్చర్యపరిచారు. స్టేడియం మొత్తం చప్పట్లతో మార్మోగింది. ఆ తరువాత మెస్సి ఆటలోకి దిగుతూ తన క్లాస్‌ను చూపించారు. ఈ మ్యాచ్‌లో మెస్సి రెండు గోల్స్ సాధించి అభిమానులను ఉర్రూతలూగించారు.

మ్యాచ్ ముగిసే సమయానికి మెస్సి జట్టుపై 3-0 గోల్స్‌తో సింగరేణి ఆర్ ఆర్ జట్టు ఘన విజయం సాధించింది. ఇది కేవలం స్కోర్ పరంగా మాత్రమే కాకుండా, తెలంగాణలో ఫుట్‌బాల్‌కు వచ్చిన గుర్తింపుగా క్రీడాభిమానులు భావించారు. మ్యాచ్ అనంతరం మెస్సి, రేవంత్ రెడ్డి కలిసి ఇరు జట్ల ఆటగాళ్లతో ఫోటోలు దిగారు. సీఎం రేవంత్ రెడ్డి తన మనవడిని మెస్సికి పరిచయం చేసి, సరదాగా ఆట ఆడించిన దృశ్యాలు అభిమానులను మరింత ఆకట్టుకున్నాయి.

మ్యాచ్ పూర్తయ్యాక విన్నర్, రన్నరప్ జట్లకు మెస్సి, సీఎం రేవంత్ రెడ్డి, రాహుల్ గాంధీ కలిసి ట్రోఫీలు అందించారు. ఈ సందర్భంగా మెస్సి మాట్లాడుతూ హైదరాబాద్ వచ్చి తెలుగు ప్రజలను కలవడం ఎంతో సంతోషంగా ఉందని తెలిపారు. తెలుగు ప్రజలు చూపిన అపూర్వమైన అభిమానం తనకు మరింత శక్తిని ఇచ్చిందని అన్నారు. సీఎం రేవంత్ రెడ్డికి ప్రత్యేక కృతజ్ఞతలు తెలిపారు. మ్యాచ్ అనంతరం మెస్సి, రేవంత్ రెడ్డి స్టేడియం చుట్టూ తిరుగుతూ ప్రేక్షకులకు అభివాదం చేయడం ఈ కార్యక్రమానికి మరింత ప్రత్యేకతను తీసుకొచ్చింది.

మొత్తంగా, ఉప్పల్ స్టేడియంలో జరిగిన ఈ ఫ్రెండ్లీ మ్యాచ్ కేవలం ఒక ఆటగానికే పరిమితం కాకుండా, తెలంగాణలో ఫుట్‌బాల్ భవిష్యత్తుకు కొత్త ఉత్సాహాన్ని నింపిన క్రీడా వేడుకగా నిలిచింది.

ప్రపంచ అథ్లెటిక్స్ ఛాంపియన్‌షిప్ 2025 ఫైనల్‌ లో గోల్డెన్ బాయ్ నీరజ్ చోప్రా

Mahesh Rajamoni — Wed, 17 Sep 2025 17:07:17 +0530

Neeraj Chopra: 84.85 మీటర్ల మొదటి త్రో తో ఇండియన్ గోల్డెన్ బాయ్ నీరజ్ చోప్రా ప్రపంచ అథ్లెటిక్స్ ఛాంపియన్‌షిప్ 2025 ఫైనల్‌లోకి చేరాడు. జూలియన్ వెబర్ 87.21 మీటర్లు జావెలిన్ విసిరి అగ్రస్థానంలో నిలిచాడు. గురువారం ఫైనల్ పోరు జరగనుంది.

భారత జావెలిన్ స్టార్ నీరజ్ చోప్రా ప్రపంచ అథ్లెటిక్స్ ఛాంపియన్‌షిప్ 2025లో అద్భుతంగా రాణించాడు. టోక్యోలోని జపాన్ నేషనల్ స్టేడియం జరిగిన గ్రూప్ A క్వాలిఫయింగ్ రౌండ్‌లో 84.85 మీటర్ల తొలి త్రోతోనే ఫైనల్‌కు అర్హత సాధించాడు. ఆటోమేటిక్ క్వాలిఫికేషన్ మార్క్ 84.50 మీటర్లు. నీరజ్ చోప్రా ఈ లక్ష్యాన్ని ఈజీగానే అధిగమించాడు

నీరజ్ చోప్రా ఈ విజయంతో మరో అరుదైన రికార్డు సాధించాడు. 2021 టోక్యో ఒలింపిక్స్, 2022 వరల్డ్స్, 2023 వరల్డ్స్, 2024 ఒలింపిక్స్ తరువాత 2025 వరల్డ్స్‌లో కూడా ఒకే ప్రయత్నంలో ఫైనల్‌కు చేరాడు. ఇది వరుసగా ఐదోసారి కావడం విశేషం.

జర్మనీ ఆటగాడు జూలియన్ వెబర్ మొదటి త్రోలో 82.29 మీటర్లకే పరిమితమయ్యాడు. అయితే రెండో ప్రయత్నంలో 87.21 మీటర్ల దూరం విసరడంతో టాప్ లోకి చేరాడు. దీంతో నీరజ్ చోప్రా రెండో స్థానంలో నిలిచాడు. చెక్ రిపబ్లిక్‌కు చెందిన జకబ్ వాడ్లెజ్ 84.11 మీటర్లు జావెలిన్ విసిరి మూడో స్థానంలో నిలిచాడు.

భారత ఆటగాడు సచిన్ యాదవ్ మొదటి త్రోలో 80.16 మీటర్లు నమోదు చేశాడు. తర్వాతి ప్రయత్నంలో 83.67 మీటర్లు విసిరాడు. అతడు ప్రస్తుతం 5వ స్థానంలో ఉన్నాడు. టాప్ 12లో కొనసాగితే ఫైనల్ కు చేరే అవకాశం ఉంది. యశ్వీర్ సింగ్, రోహిత్ యాదవ్ కూడా ఈ ఈవెంట్‌లో పోటీపడుతున్నారు.

ఈ ఏడాది నీరజ్ చోప్రా ఫామ్ అద్భుతంగా ఉంది. దక్షిణాఫ్రికాలో పొచ్ ఇన్విటేషనల్ గెలిచాడు. దోహా డైమండ్ లీగ్‌లో 90.23 మీటర్ల త్రోతో కెరీర్ బెస్ట్ సాధించాడు. పోలాండ్, జ్యూరిచ్‌లో పోడియం ఫినిష్ సాధించాడు. ప్యారిస్, ఓస్ట్రావాలో టైటిల్స్ గెలిచాడు. జూలైలో బెంగళూరులో జరిగిన నీరజ్ చోప్రా క్లాసిక్ లో 86.18 మీటర్ల జవెలిన్ త్రో తో విజయం సాధించాడు.

ప్రస్తుతం నీరజ్ చోప్రా 2025 ప్రపంచ అథ్లెటిక్స్ ఛాంపియన్‌షిప్ ఫైనల్‌లో మరోసారి గోల్డ్ మెడల్ సాధించడానిక అడుగు దూరంలో ఉన్నాడు.

చైనాపై విక్టరీ.. ఆసియా కప్ 2025 ఫైనల్‌లో భారత హాకీ జట్టు

Mahesh Rajamoni — Sun, 07 Sep 2025 00:23:59 +0530

Asia Cup 2025 Hockey Final : ఆసియా కప్ 2025లో భారత హాకీ జట్టు అద్భుత ప్రదర్శన చేసింది. సూపర్-4 రౌండ్‌లో చివరి మ్యాచ్‌లో చైనాపై 7-0 తేడాతో గెలిచి ఫైనల్‌లో తన స్థానం ఖరారు చేసుకుంది. రాజగిర్‌లో జరుగుతున్న ఈ టోర్నమెంట్‌లో భారత్ తొమ్మిదోసారి ఫైనల్‌కు చేరింది.

టోర్నమెంట్ ప్రారంభం నుంచి భారత్ తన ఆధిపత్యాన్ని కొనసాగించింది. పూల్ స్టేజ్‌లో అగ్రస్థానంలో నిలిచి సూపర్-4లో ప్రవేశించింది. ఇక్కడ కూడా భారత్ మూడు మ్యాచ్‌లలో రెండు గెలిచి, ఒకటి డ్రా చేసింది. ఆరు మ్యాచ్‌లలో ఐదు విజయాలు సాధించి, ఒకదానిని సమం చేసింది. దీంతో సూపర్-4లో కూడా అగ్రస్థానంలో నిలిచింది.

చైనాపై 7-0 తో భారత్ విజయం

చైనాతో జరిగిన మ్యాచ్‌లో భారత్ ప్రారంభం నుంచే దూకుడు ప్రదర్శించింది. 3వ నిమిషంలో శిలానంద్ లక్రా తొలి గోల్ సాధించాడు. 6వ నిమిషంలో పీనాల్టీ కార్నర్‌ను ఉపయోగించి దిల్ ప్రీత్ సింగ్ రెండో గోల్ చేశాడు. 17వ నిమిషంలో మరో పీనాల్టీ కార్నర్‌ను మన్ దీప్ సింగ్ గోల్‌గా మార్చి భారత్‌కు 3-0 ఆధిక్యం ఇచ్చాడు.

రెండో అర్ధ భాగంలో కూడా భారత్ ఆధిపత్యం కొనసాగింది. 36వ నిమిషంలో రాజ్‌కుమార్ పాల్ గోల్ చేసి స్కోరును 4-0కి తీసుకెళ్లాడు. 38వ నిమిషంలో సుఖ్జీత్ సింగ్ గోల్ చేసి 5-0గా మార్చాడు. చివరి క్వార్టర్‌లో అభిషేక్ 45వ, 49వ నిమిషాల్లో రెండు గోల్స్ చేసి భారత్ స్కోర్ ను 7-0గా ఖరారు చేశాడు. చైనా ఒక్క గోల్ చేయకుండానే ఓటమిపాలైంది.

ఫైనల్‌లో కొరియాతో భారత్ పోరాటం

ఇప్పుడి వరకు ఈ టోర్నమెంట్‌ను దక్షిణ కొరియా ఐదుసార్లు గెలిచింది. భారత్ మూడు సార్లు విజేతగా నిలిచింది. ఈసారి నాలుగో టైటిల్ కోసం పోరాటం చేయనుంది. ఆసక్తికరమైన విషయం ఏమిటంటే భారత్-కొరియా ఫైనల్‌లో తలపడటం ఇది నాలుగోసారి. గత మూడు ఫైనల్స్‌లో రెండుసార్లు కొరియా, ఒకసారి భారత్ విజేతలుగా నిలిచాయి. ఈసారి భారత్‌ చరిత్ర సృష్టించాలని టార్గెట్ పెట్టుకుంది.

వరల్డ్ కప్ టోర్నీకి నేరుగా భారత్ ఎంట్రీ ఇస్తుందా?

ఆసియా కప్ విజేత జట్టుకు వచ్చే సంవత్సరం జరిగే హాకీ వరల్డ్ కప్‌లో నేరుగా ప్రవేశం లభిస్తుంది. అందువల్ల రాజగిర్‌లో జరగబోయే ఫైనల్ మ్యాచ్ భారత్ హాకీకి అత్యంత కీలకంగా నిలవనుంది. జట్టు ఇప్పటివరకు అద్భుత ప్రదర్శన చేసింది. దీంతో భారత అభిమానులు జట్టు విజయంపై నమ్మకంగా ఉన్నారు.

Final bound! India confirm their spot in the Final of the Hero Asia Cup Rajgir, Bihar 2025, after a stellar Super 4s campaign. #HockeyIndia #IndiaKaGame #HumseHaiHockey #HeroAsiaCupRajgir pic.twitter.com/nt5wlwPIxW

— Hockey India (@TheHockeyIndia) September 6, 2025

Lionel Messi : హైదరాబాద్ అభిమానులకు మెస్సీ స్పెషల్ గిఫ్ట్.. ఎమోషనల్ స్పీచ్ విన్నారా?

Mahesh Rajamoni — Sat, 13 Dec 2025 23:25:33 +0530

Lionel Messi Hyderabad Visit : హైదరాబాద్ ఉప్పల్ స్టేడియంలో జరిగిన గోట్ టూర్ ఆఫ్ ఇండియా ఫ్రెండ్లీ మ్యాచ్‌లో మెస్సి పాల్గొని సీఎం రేవంత్ రెడ్డి టీమ్ తో ఫ్రెండ్లీ మ్యాచ్ ఆడారు. ఆ తర్వాత మెస్సి మాట్లాడుతూ తెలుగు ప్రజల ప్రేమకు కృతజ్ఞతలు తెలిపారు.

అర్జెంటీనా ఫుట్‌బాల్ దిగ్గజం లియోనెల్ మెస్సి గోట్ టూర్ ఆఫ్ ఇండియా కార్యక్రమంలో భాగంగా హైదరాబాద్‌కు రావడం తెలుగు క్రీడాభిమానులకు ఓ అరుదైన అనుభూతిని ఇచ్చింది. శనివారం (డిసెంబర్ 13న) ఉప్పల్‌లోని రాజీవ్ గాంధీ అంతర్జాతీయ స్టేడియంలో నిర్వహించిన ఫుట్‌బాల్ ప్రమోషనల్ ఈవెంట్ దేశవ్యాప్తంగా ఆసక్తిని రేపింది. ప్రపంచ ఫుట్‌బాల్ చరిత్రలో తనదైన ముద్ర వేసిన మెస్సిని ప్రత్యక్షంగా చూడడానికి వేలాది మంది అభిమానులు స్టేడియానికి తరలివచ్చారు.

ఈ ఈవెంట్‌లో సింగరేణి ఆర్ఆర్ టీమ్, అపర్ణ మెస్సి టీమ్ మధ్య ఎగ్జిబిషన్ ఫ్రెండ్లీ మ్యాచ్ జరిగింది. ఏడుగురు ఆటగాళ్లతో కూడిన జట్లు 20 నిమిషాల పాటు పోటీపడ్డాయి. మ్యాచ్‌లో తెలంగాణ ముఖ్యమంత్రి రేవంత్ రెడ్డి సింగరేణి ఆర్ఆర్ టీమ్ తరఫున గ్రౌండ్ లోకి దిగడం ప్రత్యేక ఆకర్షణగా నిలిచింది. ముఖ్యమంత్రి స్వయంగా గోల్ చేయడంతో స్టేడియం మొత్తం చప్పట్లతో మార్మోగింది. మరోవైపు మెస్సి తన అనుభవాన్ని చాటుతూ రెండు గోల్స్ సాధించి అభిమానులను ఉర్రూతలూగించాడు.

✨ ✨Football's Greatest Of All Time Lionel Messi in Hyderabad. pic.twitter.com/5z5gXCKbG9

— Congress (@INCIndia) December 13, 2025

ఆసక్తికరంగా సాగిన ఈ మ్యాచ్‌లో సింగరేణి ఆర్ఆర్ జట్టు 3-0 గోల్స్ తేడాతో మెస్సి జట్టుపై విజయం సాధించింది. పెనాల్టీ షూటౌట్ సమయంలో సీఎం రేవంత్ రెడ్డి ఒక అద్భుతమైన గోల్ చేసి ప్రేక్షకులను అలరించగా, మెస్సీ తన ట్రేడ్‌మార్క్ షాట్స్‌తో రెండు గోల్స్ నమోదు చేశారు. విజేత, రన్నరప్ జట్లకు లియోనెల్ మెస్సి, సీఎం రేవంత్ రెడ్డి, కాంగ్రెస్ నేత రాహుల్ గాంధీ కలిసి ట్రోఫీలు అందజేశారు. ఈ సందర్భంగా స్టేడియంలో ఏర్పాటు చేసిన లేజర్ షో, రాహుల్ సిప్లిగంజ్, మంగ్లీ నిర్వహించిన మ్యూజికల్ ఈవెంట్ ప్రేక్షకులను మరింత ఉత్సాహపరిచాయి.

. pic.twitter.com/0oBE3ZqBKh

— Congress (@INCIndia) December 13, 2025

మ్యాచ్ అనంతరం మెస్సి మాట్లాడుతూ హైదరాబాద్ వచ్చి తెలుగు ప్రజలను కలవడం ఎంతో సంతోషంగా ఉందన్నారు. ఇక్కడి అభిమానులు చూపిన ప్రేమ, ఆప్యాయత తనకు కొత్త శక్తిని ఇచ్చిందని చెప్పారు. భారత్‌లో పర్యటించడం తనకు దక్కిన గౌరవంగా అభివర్ణించారు. ముఖ్యంగా తెలంగాణ ముఖ్యమంత్రి రేవంత్ రెడ్డికి ప్రత్యేక ధన్యవాదాలు తెలిపారు. ఈ వ్యాఖ్యలు విన్న అభిమానులు భావోద్వేగానికి లోనయ్యారు.

Lionel Messi addressing the Audience in India: “Hello everyone. Well, nothing but to extend my thanks for the love I've received today and alwaysThe truth is that I've seen a lot of things before getting here, throughout this whole time”pic.twitter.com/FyPFEWiPUX

— MC (@CrewsMat10) December 13, 2025

ఈ ఈవెంట్‌లో మెస్సి స్టేడియం అంతా తిరుగుతూ అభిమానులకు అభివాదం చేయడం మరో హైలైట్. గ్యాలరీలో ఉన్న అభిమానులకు ఫుట్‌బాల్స్‌ను కిక్ చేసి బహుమతిగా ఇచ్చారు. చిన్నారులతో సరదాగా ఫుట్‌బాల్ ఆడుతూ ఆటలోని మెలకువలు చెప్పారు. మ్యాచ్ ప్రారంభానికి ముందు ఇరు జట్లతో కలిసి ఫోటోలు దిగారు. రాహుల్ గాంధీ, ప్రియాంక గాంధీ పిల్లలు సహా పలువురు రాజకీయ, సినీ ప్రముఖులు ఈ మ్యాచ్‌ను వీక్షించారు.

గోట్ టూర్ ఆఫ్ ఇండియాలో భాగంగా జరిగిన ఈ ఉప్పల్ ఫ్రెండ్లీ మ్యాచ్ కేవలం క్రీడా ఈవెంట్‌గా మాత్రమే కాకుండా తెలుగు ప్రజల అభిమానాన్ని ప్రపంచానికి చాటిన వేడుకగా నిలిచింది. మెస్సి హైదరాబాద్ పర్యటనతో ఫుట్‌బాల్‌పై యువతలో కొత్త ఉత్సాహం వెల్లివిరిసిందని క్రీడా విశ్లేషకులు అభిప్రాయపడుతున్నారు.

250 మంది ఎంపిక చేసిన అభిమానులతో మీట్ అండ్ గ్రీట్ సెషన్‌లో పాల్గొని ఫోటోలు దిగారు. క్యూఆర్ కోడ్ ద్వారా పాసులు పొందిన అభిమానులు తమ అభిమాన స్టార్ ను దగ్గరి నుండి చూసి మురిసిపోయారు.

PKL Season 12 : ఉత్కంఠ భరిత ఫైనల్‌లో దబాంగ్ ఢిల్లీ ఘన విజయం

Mahesh Rajamoni — Fri, 31 Oct 2025 22:53:32 +0530

PKL Season 12 : ఉత్కంఠ పోరులో పుణేరి పల్టాన్‌ను 31-28 తేడాతో ఓడించి దబాంగ్ ఢిల్లీ ప్రో కబడ్డీ లీగ్ 12వ సీజన్ ఛాంపియన్ గా నిలిచింది. పీకేఎల్ టైటిల్‌ను రెండోసారి కైవసం చేసుకుంది.

ప్రో కబడ్డీ లీగ్ 2025 సీజన్ 12లో దబాంగ్ ఢిల్లీ కేసీ మళ్ళీ చరిత్ర సృష్టించింది. న్యూఢిల్లీ త్యాగరాజ్ ఇండోర్ స్టేడియంలో శుక్రవారం జరిగిన ఫైనల్ పోరులో పుణేరి పల్టాన్‌పై 31-28 తేడాతో ఘన విజయం సాధించి రెండోసారి కబడ్డీ టైటిల్ సాధించింది. ఉత్కంఠ భరితంగా ఈ మ్యాచ్ సాగింది. మొదటి అర్ధభాగంలో ఆధిపత్యం చెలాయించిన ఢిల్లీ, రెండవ భాగంలో పుణేరి ప్రతిఘటనతో కాసేపు తడబడినా చివరికి అనుభవంతో ఆధిక్యాన్ని నిలబెట్టుకుంది.

Just an image - meanwhile, the image… #PKL12 #ProKabaddi #GhusKarMaarenge #DabangDelhiKC #PuneriPaltan pic.twitter.com/Wx4LD4UsHz

— ProKabaddi (@ProKabaddi) October 31, 2025

దబాంగ్ ఢిల్లీ తరఫున నీరజ్ నర్వాల్ తొమ్మిది రైడ్ పాయింట్లు సాధించి జట్టుకు బలమైన పునాది వేశాడు. అతడితో పాటు అజింక్య పవార్ కూడా ఆరు పాయింట్లు అందించి విజయంలో కీలక పాత్ర పోషించాడు. వీరి సమన్వయమే జట్టు విజయానికి ప్రధాన కారణంగా నిలిచింది. మరోవైపు పుణేరి పల్టాన్ రైడర్ ఆదిత్య షిండే సూపర్ టెన్ సాధించి ఆఖరి వరకూ పోరాడినా ఫలితం దక్కలేదు. అభినేష్ నాలుగు టాకిల్ పాయింట్లు సాధించినా దానివల్ల స్కోరు తేడా తగ్గించలేకపోయాడు.

మ్యాచ్ ముగిసేందుకు కేవలం 40 సెకన్లు మాత్రమే మిగిలి ఉండగా సీనియర్ డిఫెండర్ ఫజల్ అట్రాచలి చేసిన అద్భుత ట్యాకిల్ ఢిల్లీకి విజయాన్ని అందించింది. ఇదే అతడి ఏకైక పాయింట్ అయినప్పటికీ, ఆ క్షణం మ్యాచ్‌ను పూర్తిగా ఢిల్లీ వైపు తిప్పింది. ఫజల్ అట్రాచలి ఇప్పుడు పీకేఎల్ చరిత్రలో అత్యంత విజయవంతమైన ఆటగాడిగా నిలిచాడు. ఈ విజయంతో అతని కెరీర్‌లో మరో మైలురాయి నమోదైంది.

మొదటి అర్ధభాగంలో ఢిల్లీ 20-14 ఆధిక్యంలో నిలిచింది. అయితే సెకండాఫ్‌లో పుణేరి పల్టాన్ గట్టి పోరాటం చేసింది. గౌరవ్ ఖత్రి రెండు సూపర్ టాకిల్స్ సాధించి తన జట్టును తిరిగి రేసులోకి తీసుకొచ్చాడు. ఒక దశలో తేడా కేవలం ఒక పాయింట్‌కు చేరింది. ఆదిత్య షిండే చివర్లో సూపర్ రైడ్‌తో ఆశలు రేపినా, తదుపరి రైడ్‌లో ట్యాకిల్ కావడంతో పుణేరికి షాక్ తగిలింది. ఫస్టాఫ్‌లో దబాంగ్ 13 రైడింగ్ పాయింట్లు సాధించగా, పుణేరి రక్షణలో పొరపాట్లు వారికి మిగిలిన మ్యాచ్ మొత్తం భారం అయ్యాయి.

దబాంగ్ ఢిల్లీ జట్టు విజయోత్సాహంతో ప్రేక్షకుల కేరింతల మధ్య ట్రోఫీని అందుకుంది. ఈ విజయంతో ఢిల్లీ సీజన్ 2లో యు ముంబా తర్వాత రెండవ టైటిల్ గెలిచిన ఘనత సాధించింది. ఫజల్ అట్రాచలి ‘మోస్ట్ వాల్యూబుల్ ప్లేయర్ (MVP)’ అవార్డును అందుకున్నాడు. అయాన్ లోహ్‌కాబ్ ‘రైడర్ ఆఫ్ ది సీజన్’గా, నవదీప్ ‘డిఫెండర్ ఆఫ్ ది సీజన్’గా నిలిచారు.

అవార్డు జాబితా

విజేత: దబాంగ్ ఢిల్లీ కేసీ – రూ. 3 కోట్లు
రన్నరప్: పుణేరి పల్టాన్ – రూ. 1.8 కోట్లు
MVP: ఫజల్ అట్రాచలి
రైడర్ ఆఫ్ ది సీజన్: అయాన్ లోహ్‌కాబ్
బెస్ట్ డిఫెండర్: నవదీప్

ఈ విజయంతో ఢిల్లీ జట్టు ఆటగాళ్లు ఆనందోత్సాహాలతో మునిగిపోయారు. అభిమానులు “దబాంగ్ దిల్, దబాంగ్ డిల్లీ” అంటూ స్టేడియం మొత్తాన్ని మార్మోగించారు. కబడ్డీ అభిమానులకు ఇది ఎప్పటికీ గుర్తుండిపోయే ఫైనల్‌గా నిలిచింది.

ఆసియా కప్ 2025: చైనాలో అడుగుపెట్టిన భారత మహిళల హాకీ జట్టు

Mahesh Rajamoni — Sun, 31 Aug 2025 16:13:27 +0530

Indian Womens Hockey Team: 2025 మహిళా హాకీ ఆసియా కప్ ఆడటానికి భారత జట్టు చైనాలోని హాంగ్‌జౌకి చేరుకుంది. శనివారం చైనాకు బయలుదేరిన భారత జట్టు.. 2026 మహిళా హాకీ ప్రపంచ కప్‌కు అర్హత సాధించడం లక్ష్యంగా పెట్టుకుంది. ఆసియా కప్‌లో మంచి ప్రదర్శన చేస్తే ప్రపంచ కప్‌కు అర్హత లభిస్తుంది.

కెప్టెన్ సలిమా టెటే నేతృత్వంలోని 20 మంది సభ్యుల భారత జట్టు చైనాకు వెళ్ళింది. ఆదివారం హాంగ్‌జౌ చేరుకున్న జట్టుకు భారత కాన్సుల్ జనరల్ ప్రతీక్ మాథుర్ స్వాగతం పలికారు. ప్రధాని నరేంద్ర మడీ మాటలను గుర్తు చేస్తూ.. 'క్రీడలు వ్యక్తిత్వాన్ని పెంపొందిస్తాయి, జట్టుకృషిని ప్రోత్సహిస్తాయి, యువతరాన్ని పెద్ద కలలు కనడానికి ప్రేరేపిస్తాయి' అని ఆయన అన్నారు.

భారత జట్టుకు ఘన స్వాగతం

హాంగ్‌జౌలో భారత మహిళా హాకీ జట్టుకు స్థానిక అధికారులు, విద్యావేత్తలు, భారతీయులు స్వాగతం పలికారు. ప్రధాని మోడీ కూడా చైనాలో ఉన్న సమయంలోనే భారత మహిళా హాకీ జట్టు అక్కడికి వెళ్లడంతో ఆసక్తికర పరిణామంగా ఉంది.

Chak De India ➡️ CG @PratikMathur1 today welcomed the Indian Women’s Hockey team to Hangzhou to participate in the World Asia Cup➡️ As the Women’s Team gets ready to start off their impressive campaign, we are proudly hosting the Men’s Tournament back home in India at… pic.twitter.com/aXGgg2TPeU

— India In Shanghai (@IndiaInShanghai) August 31, 2025

చైనీస్‌లో భగవద్గీత ఆవిష్కరణ

హాంగ్‌జౌలో జరిగిన కార్యక్రమంలో చైనీస్ భాషలోకి అనువదించిన భగవద్గీతను ఆవిష్కరించారు. ఝెజియాంగ్ విశ్వవిద్యాలయంలోని వేదాంత అధ్యయన పాఠశాల అధిపతి వాంగ్ ఝిచెంగ్ దీన్ని అనువదించారు. ఆయనకు ప్రధాని మోడీ వ్యక్తిగతంగా లేఖ రాసి అభినందించారు. ఏడేళ్ల తర్వాత చైనా పర్యటనకు వెళ్ళిన ప్రధాని మోడీ టూర్ తో భారత్-చైనా దౌత్య సంబంధాలు మెరుగుపడతాయని ఆశిస్తున్నారు. రెండు దేశాలు ద్వైపాక్షిక సంబంధాల అభివృద్ధి గురించి మాట్లాడుకుంటున్నాయి.

పూల్ బీలో భారత్

భారతదేశం పూల్ బీలో ఉంది, గ్రూప్ దశలో జపాన్, థాయిలాండ్, సింగపూర్‌లను ఎదుర్కోనుంది. సెప్టెంబర్ 5న థాయిలాండ్‌తో తమ ప్రయాణాన్ని ప్రారంభించనుంది, ఆ తర్వాత సెప్టెంబర్ 6న జపాన్‌తో తలపడనుంది. చివరగా, సెప్టెంబర్ 8న సింగపూర్‌తో తమ చివరి పూల్-స్టేజ్ మ్యాచ్ ఆడనుంది.

భారత మహిళల ఆసియా కప్‌ను రెండుసార్లు గెలుచుకుంది, మొదటిసారి 2004లో, రెండవసారి 2017లో. ఈ టోర్నమెంట్ గత ఎడిషన్‌లో భారత్ మూడో స్థానంలో నిలిచింది.

Pakistan : ఘోర అవమానం.. హోటల్ బిల్లులు కట్టలేక గిన్నెలు కడిగిన పాకిస్థాన్ ఆటగాళ్లు

Mahesh Rajamoni — Wed, 18 Feb 2026 19:19:19 +0530

Pakistan Hockey Players Wash Dishes : ఆస్ట్రేలియా పర్యటనలో పాకిస్థాన్ హాకీ జట్టుకు చేదు అనుభవం ఎదురైంది. నిధుల కొరతతో హోటల్ బిల్లులు చెల్లించలేక ఆటగాళ్లు కిచెన్ క్లీన్ చేస్తూ, గిన్నెలు కడిగిన వైనం క్రీడాలోకాన్ని దిగ్భ్రాంతికి గురిచేస్తోంది.

పాకిస్థాన్ పరువు గంగలో పాయే.. హోటల్ బిల్లులు కట్టలేక ఆటగాళ్లతో గిన్నెలు కడిగారు. పాకిస్థాన్ హాకీ రంగంలో మునుపెన్నడూ లేని విధంగా అత్యంత అవమానకరమైన ఘటన వెలుగులోకి వచ్చింది. ఆస్ట్రేలియా పర్యటనకు వెళ్లిన పాకిస్థాన్ జాతీయ హాకీ జట్టు క్రీడాకారులు మైదానంలో స్టిక్కులతో విన్యాసాలు చేయాల్సింది పోయి, హోటల్ గదుల్లో కిచెన్ క్లీన్ చేస్తూ, గిన్నెలు కడగాల్సిన దుస్థితి ఏర్పడింది. ఈ విషయాన్ని స్వయంగా ఆ జట్టు కెప్టెన్ అమ్మద్ షకీల్ బట్ మీడియా ముందు వెల్లడించడంతో ప్రపంచ క్రీడా రంగంపై పాకిస్థాన్ పరువు మరోసారి మంటగలిసింది.

బుధవారం ఉదయం లాహోర్ విమానాశ్రయానికి చేరుకున్న పాకిస్థాన్ హాకీ జట్టు సభ్యులు తమ పర్యటనలో ఎదురైన చేదు అనుభవాలను తలచుకుని కన్నీరుమున్నీరయ్యారు. మీడియా ప్రతినిధులతో మాట్లాడిన కెప్టెన్ అమ్మద్ షకీల్ బట్.. ప్రస్తుత పాకిస్థాన్ హాకీ ఫెడరేషన్ (PHF) మేనేజ్‌మెంట్‌పై తీవ్ర స్థాయిలో విరుచుకుపడ్డారు. "ఈ యాజమాన్యం కింద మేం ఇక పని చేయలేం. ఒక మ్యాచ్ ఆడటానికి వెళ్లే ముందు అంతర్జాతీయ స్థాయి ఆటగాళ్లు కిచెన్ క్లీన్ చేస్తూ, గిన్నెలు కడగాల్సి వస్తే.. ఆ జట్టు నుండి మీరు ఎలాంటి ఫలితాలను ఆశిస్తారు?" అని ఆయన నిలదీశారు. క్రీడాకారులకు కనీస గౌరవం లేని చోట ఆడటం తమ వల్ల కాదని ఆయన స్పష్టం చేశారు.

ఆస్ట్రేలియా పర్యటన ప్రారంభం నుండే తీవ్ర సమస్యలతో సాగింది. జట్టు సిడ్నీ విమానాశ్రయానికి చేరుకున్న తర్వాత దాదాపు 12 నుండి 13 గంటల పాటు అక్కడే చిక్కుకుపోయింది. ఎటువంటి సమాచారం ఇచ్చే వారు లేక, తదుపరి ప్రయాణానికి ఏర్పాట్లు లేక ఆటగాళ్లు ఇబ్బందులు పడ్డారు. అక్కడి నుండి కాన్‌బెర్రా చేరుకున్నాక పరిస్థితులు మరింత దారుణంగా మారాయి. ముందస్తుగా బుక్ చేసిన హోటల్ బిల్లులు ఫెడరేషన్ చెల్లించకపోవడంతో బుకింగ్స్ రద్దయ్యాయి. దీంతో క్రీడాకారులు తమ లగేజీతో రోడ్లపై తిరగాల్సి వచ్చింది. చివరకు ఒక ఏర్‌బీఎన్‌బీ లో 13 రోజుల పర్యటనకు గాను కేవలం 10 రోజులు మాత్రమే బస కల్పించారు. ఆ తర్వాత పర్యటన మధ్యలో అత్యంత చవకైన, సౌకర్యాలు లేని గదుల్లోకి వారిని తరలించారు.

Pakistan hockey players crying on live TV saying they haven’t received daily allowances since 2023.Just a few days ago in Australia they were reportedly asked to leave a hotel over unpaid bills.When a country spends more on Terrorism then sports and players are the first to… pic.twitter.com/uH3eErsKo4

— Ravi Ranjan Singh (@RaviRanjanIn) February 18, 2026

ఈ వ్యవహారంపై పాకిస్థాన్ స్పోర్ట్స్ బోర్డ్ (PSB) స్పందించింది. ఆస్ట్రేలియా పర్యటనలో ఆటగాళ్ల హోటల్ ఖర్చుల కోసం తాము ఇప్పటికే 10 మిలియన్ రూపాయల (భారత కరెన్సీలో సుమారు ₹30,30,000) నిధులను విడుదల చేశామని బోర్డు స్పష్టం చేసింది. ప్రభుత్వం నిధులు విడుదల చేసినప్పటికీ, ఆ డబ్బు ఏమైంది? ఆటగాళ్ల వరకు ఎందుకు చేరలేదు? అనే ప్రశ్నలు ఇప్పుడు తలెత్తుతున్నాయి. ఫెడరేషన్ అధికారుల నిర్లక్ష్యం వల్లే అంతర్జాతీయంగా దేశం తలదించుకోవాల్సి వచ్చిందని పాక్ పౌరులు, అభిమానుల నుంచి విమర్శలు వస్తున్నాయి.

జట్టు పడుతున్న ఇబ్బందులను బయటి ప్రపంచానికి చెబితే క్రమశిక్షణా చర్యలు తీసుకుంటామని మేనేజ్‌మెంట్ తమను బెదిరించినట్లు కెప్టెన్ బట్ ఆరోపించారు. "మా జట్టులో ప్రతిభావంతులైన ఆటగాళ్లు ఉన్నారు, కానీ మాకు సరైన కోచ్, మేనేజ్‌మెంట్ అవసరం. ఆస్ట్రేలియాలో మేం అనుభవించిన నరకం వల్లే నేను ఇప్పుడు గొంతు విప్పుతున్నాను. జట్టు పురోగతి సాధించాలంటే విదేశీ కోచ్‌ను నియమించాలి" అని ఆయన డిమాండ్ చేశారు. మేనేజ్‌మెంట్ వైఫల్యం వల్ల ఆటగాళ్ల ఏకాగ్రత దెబ్బతిన్నదని, అందుకే ఆస్ట్రేలియా, జర్మనీతో జరిగిన మ్యాచ్‌ల్లో ఘోరంగా ఓడిపోయామని ఆయన ఆవేదన వ్యక్తం చేశారు.

ఒకప్పుడు హాకీలో ప్రపంచ ఛాంపియన్‌గా వెలిగిపోయిన పాకిస్థాన్.. ఇప్పుడు కనీసం హోటల్ బిల్లులు కట్టలేని స్థితికి పడిపోవడం గమనార్హం. ఈ పర్యటనలో పాకిస్థాన్ ఆడిన అన్ని మ్యాచ్‌ల్లోనూ ఓటమి పాలైంది. ఆటగాళ్లు మానసికంగా కుంగిపోయి ఉండటమే దీనికి ప్రధాన కారణమని విశ్లేషకులు భావిస్తున్నారు. అంతర్జాతీయ స్థాయిలో దేశానికి ప్రాతినిధ్యం వహించే ఆటగాళ్లు గిన్నెలు కడిగారనే వార్త ఇప్పుడు సోషల్ మీడియాలో వైరల్ అవుతోంది. ఈ వ్యవహారంపై విచారణ జరిపి దోషులపై చర్యలు తీసుకోవాలని పాక్ క్రీడా అభిమానులు డిమాండ్ చేస్తున్నారు.

ఆసియా కప్ హాకీ 2025: ఛాంపియన్ గా భారత్.. కొరియాపై 4-1తో సూపర్ విక్టరీ

Mahesh Rajamoni — Sun, 07 Sep 2025 22:01:19 +0530

Asia Cup Hockey 2025: బీహార్ రాజ్‌గిర్ లో జరిగిన ఆసియా కప్ హాకీ 2025 ఫైనల్లో భారత్ 4-1తో కొరియాను ఓడించింది. ఎనిమిదేళ్ల తర్వాత నాలుగోసారి హాకీ ఆసియా కప్ ట్రోఫీని ఇండియా గెలుచుకుంది.

ఆసియా కప్ హాకీ 2025 భారత్ చరిత్ర సృష్టించింది. కొరియాన్ చిత్తు చేసి ఛాంపియన్ గా నిలిచింది. బీహార్‌లోని రాజ్‌గిర్ హాకీ స్టేడియంలో జరిగిన ఫైనల్ పోరులో అద్బుత విజయంతో భారత జట్టు అదరగొట్టింది.

ఆసియా కప్ హాకీ 2025 ఫైనల్లో డిఫెండింగ్ ఛాంపియన్స్ దక్షిణ కొరియాపై 4-1 తేడాతో ఘన విజయం సాధించింది. ఎనిమిదేళ్ల తర్వాత నాలుగోసారి కప్ గెలుచుకుంది. ఈ విజయంతో భారత్ 2026లో జరిగే FIH హాకీ వరల్డ్ కప్‌కు నేరుగా అర్హత సాధించింది.

: ! ✅ Team India books its spot at the FIH Hockey World Cup 2026 in Belgium & Netherlands. #HockeyIndia #IndiaKaGame #HumseHaiHockey pic.twitter.com/K3dibx5ZS5

— Hockey India (@TheHockeyIndia) September 7, 2025

ఆరంభం నుంచే భారత్ దూకుడు చూపించింది. మొదటి నిమిషంలోనే సుఖ్ జీత్ సింగ్ అద్భుతమైన స్ట్రైక్‌తో గోల్ చేసి భారత జట్టుకు ఆధిక్యం అందించాడు. జుగ్రాజ్ సింగ్ పెనాల్టీ స్ట్రోక్‌ను మిస్ చేసినా, భారత్ ఒత్తిడి కొనసాగించింది. హాఫ్ టైమ్‌కి ముందు దిల్ ప్రీత్ సింగ్ గోల్ చేసి స్కోరును 2-0కి చేర్చాడు.

Dominance till the very end! India beat Korea 4–1 in the Final to be crowned of the Hero Asia Cup Rajgir, Bihar 2025.#HockeyIndia #IndiaKaGame #HumseHaiHockey #HeroAsiaCupRajgir pic.twitter.com/yZQbynjxDt

— Hockey India (@TheHockeyIndia) September 7, 2025

మూడో క్వార్టర్‌లో రాజేందర్ సింగ్ శాంతంగా గోల్ చేసి భారత్ ఆధిక్యాన్ని 3-0కి పెంచాడు. నాలుగో క్వార్టర్ ప్రారంభంలో అమిత్ రోహిదాస్ పెనాల్టీ కార్నర్‌ను విజయవంతంగా మార్చి నాలుగో గోల్ సాధించాడు. కొరియా చివర్లో ఓ కాన్సొలేషన్ గోల్ సాధించినా, భారత్ ఆత్మవిశ్వాసంగా మ్యాచ్ ముగించింది.

! India reign supreme at the Hero Asia Cup Rajgir, Bihar 2025 with a stellar campaign to lift the crown — their fourth Asia Cup title. #HockeyIndia #IndiaKaGame #HumseHaiHockey #HeroAsiaCupRajgir pic.twitter.com/AOfD8wbB2K

— Hockey India (@TheHockeyIndia) September 7, 2025

దిల్ ప్రీత్ సింగ్ రెండు గోల్స్‌తో మెరిసి "ప్లేయర్ ఆఫ్ ది మ్యాచ్"గా నిలిచాడు. మ్యాచ్ అనంతరం ఆయన మాట్లాడుతూ, "ఎనిమిదేళ్ల తర్వాత ఆసియా కప్ గెలవడం ప్రత్యేకం. టోర్నీ ఆరంభం నుంచే మా ప్రధాన లక్ష్యం ఇక్కడ కప్ గెలిచి వరల్డ్ కప్ అర్హత పొందడమే" అన్నారు. సుఖ్ జీత్, అమిత్ రోహిదాస్ కీలక సమయాల్లో గోల్స్ చేసి భారత్ కు విజయాన్ని ఖరారు చేశారు.

భారత్ 2003, 2007, 2017 తర్వాత ఇప్పుడు 2025లో నాలుగోసారి ఆసియా కప్ గెలిచింది. ఈ విజయంతో ఆసియా హాకీలో భారత్ ఆధిపత్యాన్ని మరోసారి చాటింది. గతంలో పాకిస్థాన్, దక్షిణ కొరియా పలు సార్లు టైటిల్ గెలిచాయి. కానీ ఈసారి భారత జట్టు టోర్నమెంట్ అంతా అజేయంగా నిలిచి ఫైనల్లో విజేతగా నిలిచింది.

ఈ విజయం భారత్‌కు పెద్ద ఉత్సాహాన్ని అందించింది. కోచ్ క్రేగ్ ఫుల్టన్ వ్యూహాత్మక మార్పులు, ఆటగాళ్ల సమతుల్య ప్రదర్శన వల్లే ఈ ఫలితం సాధ్యమైంది. ఆసియా కప్‌లో ఆధిపత్యం చూపిన భారత్, ఇప్పుడు 2026 వరల్డ్ కప్‌లో మరింత బలంగా ముందుకు సాగనుంది.

యూఎస్ ఓపెన్ 2025 ఫైనల్: సబాలెంకా vs అనిసిమోవా.. ఎవరు ట్రోఫీ గెలుస్తారు?

Mahesh Rajamoni — Sat, 06 Sep 2025 19:29:32 +0530

US Open 2025 Final : యూఎస్ ఓపెన్ 2025 ఫైనల్‌లో అరీనా సబలెంకా, అమండా అనిసిమోవా తలపడనున్నారు. ఛాంపియన్ గా నిలిచేది ఎవరు? హెడ్ టూ హెడ్ రికార్డ్ లు, షెడ్యూల్, లైవ్ స్ట్రీమింగ్ వివరాలు ఇప్పుడు తెలుసుకుందాం.

న్యూయార్క్‌లోని ఆర్తర్ యాష్ స్టేడియం వేదికగా భారత కాలమానం ప్రకారం ఆదివారం 1:30 am యూఎస్ ఓపెన్ 2025 మహిళల సింగిల్స్ ఫైనల్ జరగనుంది. ఈ గ్రాండ్ స్లామ్ ఫైనల్‌లో ప్రపంచ నంబర్ వన్, డిఫెండింగ్ ఛాంపియన్ అరీనా సబాలెంకా, అమెరికా స్టార్ అమండా అనిసిమోవా తలపడనున్నారు. ఈ మ్యాచ్ గెలుపు ఇద్దరికీ చారిత్రాత్మకం కానుంది.

27 ఏళ్ల సబాలెంకా ఇప్పటివరకు మూడు గ్రాండ్ స్లామ్ టైటిళ్లు గెలుచుకుంది. ఈసారి ఆమె లక్ష్యం నాలుగో టైటిల్ సాధించడం. ముఖ్యంగా, 11 ఏళ్లలో ఎవరూ వరుసగా రెండు యూఎస్ ఓపెన్ టైటిళ్లు గెలవలేదు. ఆ రికార్డు బద్దలు కొట్టేందుకు సబాలెంకా కేవలం ఒక అడుగు దూరంలో ఉంది. ఈ ఏడాది రెండు మెజర్ ఫైనల్స్‌లో ఓడిపోయిన ఆమె, ఈ పోరులో తన పవర్ ను చూపిస్తూ జయకేతనం ఎగురవేయాలని చూస్తోంది.

24 ఏళ్ల ఎనిమిదో సీడ్ అమండా అనిసిమోవా వరుసగా రెండో గ్రాండ్ స్లామ్ ఫైనల్‌లో అడుగుపెట్టింది. వింబుల్డన్‌లో రన్నరప్‌గా నిలిచిన ఆమె ఈసారి టైటిల్ సాధించడమే లక్ష్యంగా ముందుకు వెళ్తోంది. 2025లో మాడిసన్ కీస్, కోకో గాఫ్ తర్వాత మూడో అమెరికన్ మహిళా క్రీడాకారిణిగా గ్రాండ్ స్లామ్ గెలిచే అవకాశాన్ని అనిసిమోవా అందుకోవచ్చు.

సబాలెంకా, అనిసిమోవా మధ్య ఇప్పటివరకు 9 మ్యాచ్‌లు జరిగాయి. వాటిలో 6-3 తేడాతో అనిసిమోవా ముందంజలో ఉంది. 2019 ఆస్ట్రేలియన్ ఓపెన్‌లో 19 ఏళ్ల అనిసిమోవా సబాలెంకాను సెట్‌ల్లో ఓడించడంతో వీరి మధ్య పోటీ ప్రారంభమైంది. ఐదో పోరులో సబాలెంకా మొదటి విజయం సాధించింది. గ్రాండ్ స్లామ్‌ల్లో కూడా అనిసిమోవా 3-1 తేడాతో ఆధిక్యం కొనసాగిస్తోంది.

హార్డ్ కోర్ట్‌లో 2-1 తేడాతో అనిసిమోవా రికార్డు బలంగా ఉంది. ఇది సబాలెంకాకు ఇష్టమైన సర్ఫేస్ అయినప్పటికీ, అమెరికన్ స్టార్ ఆధిపత్యం చూపింది. చివరి పోరు వింబుల్డన్ 2025 సెమీఫైనల్‌లో జరిగింది. ఆ మ్యాచ్‌లో అనిసిమోవా 6-4, 4-6, 6-4 తేడాతో గెలిచింది. ఆ మ్యాచ్ ఏకంగా రెండున్నర గంటల పాటు సాగింది.

యూఎస్ ఓపెన్ 2025 మహిళల ఫైనల్ సెప్టెంబర్ 6న అమెరికా స్థానిక కాలమానం ప్రకారం సాయంత్రం 4 గంటలకు (EDT, GMT-4) ప్రారంభమవుతుంది. భారత కాలమానం ప్రకారం ఆదివారం 1:30 am ఫైనల్ మ్యాచ్ ప్రారంభం కానుంది. ఆర్తర్ యాష్ స్టేడియంలో జరిగే ఈ పోరు ప్రపంచ వ్యాప్తంగా లైస్ స్ట్రీమింగ్ కానుంది.

• అమెరికా, దక్షిణ అమెరికా, కరేబియన్, న్యూజిలాండ్: ESPN లో లైవ్ వస్తుంది.

• యూరప్ (ఫ్రాన్స్ సహా): Eurosport

• యూకే, ఇటలీ, జర్మనీ: Sky Sports

• భారతదేశం: Star Sports

• ఆఫ్రికా: beIN Sports, SuperSport

• ఆస్ట్రేలియా: Nine, Stan Sport

• కెనడా: RDS, TSN