Asianet News Telugu

Elon Musk: ముఖేష్ అంబానీని ప్ర‌ధానితో పోల్చిన మ‌స్క్‌.. అస‌లేంటీ వివాదం.?

Narender Vaitla — Sat, 10 Oct 2026 16:01:49 +0530

Elon Musk: ఎలన్ మస్క్, ముఖేష్ అంబానీ మధ్య భార‌త్‌లో శాటిలైట్ ఇంటర్నెట్ వ్యాపారానికి సంబంధించిన వివాదం పెరుగుతోంది. భార‌త్‌లో స్టార్‌లింక్‌ను ప్రారంభించేందుకు అనుమ‌తులు రావ‌డంలో ఆల‌స్య‌మ‌వుతుండ‌డంతో మ‌స్క్ సంచ‌ల‌న ఆరోప‌ణ‌లు చేస్తున్నారు.

ఎలన్ మస్క్ తన ఎక్స్ అకౌంట్‌లో ముఖేష్ అంబానీని ఉద్దేశించి ‘డియర్ ప్రైమ్ మినిస్టర్ అంబానీ’ అంటూ వ్యాఖ్యానించారు. భారత్‌లో స్టార్‌లింక్ పోటీ పడేందుకు అంబానీ అనుమతిస్తారా? అన్నట్లుగా ప్రశ్నించారు. భారత మార్కెట్‌లో తమ కంపెనీకి అవకాశాలు దక్కడం లేదన్న అసంతృప్తిని ఈ వ్యాఖ్యల ద్వారా బయటపెట్టారు. అయితే ఒక వ్యాపారవేత్తను దేశ ప్రధాని స్థాయితో పోలుస్తూ వ్యాఖ్యానించడం వివాదానికి మరింత ఆజ్యం పోసింది. మస్క్ మాటలను కొందరు వ్యాపార పోటీపై తన అసహనంగా చూస్తుంటే, మరికొందరు భారత మార్కెట్‌లోకి ప్రవేశించేందుకు ఒత్తిడి పెంచే వ్యూహంగా భావిస్తున్నారు.

Dear Prime Minister Ambani,

Please accept my humble apologies for not realizing that you are the real boss of India.

Naturally, you would prefer to maintain your monopolistic exploitation of the great people of India, but would you nonetheless consider allowing Starlink to compete?

There are many areas of India, as there are in all countries, with no Internet access, which denies children the opportunity for education and for small businesses the opportunity to sell their goods to a global market. Starlink would change their lives for the better.

Thank you

— Elon Musk (@elonmusk) October 9, 2026

ముఖేష్ అంబానీపై వ్యాఖ్యలు చేసిన కొన్ని గంటల్లోనే మస్క్ మరో అడుగు ముందుకేశారు. రిలయన్స్‌కు సంబంధించిన సంస్థలు బీజేపీకి విరాళాలు ఇచ్చినట్లు గతంలో ప‌బ్లిష్ అయిన‌ వార్తల స్క్రీన్‌షాట్లను షేర్ చేశారు. 2024లో ఎన్నికల బాండ్ల వివరాలు బయటకు వచ్చినప్పుడు వివిధ కంపెనీలు, వ్యక్తులు రాజకీయ పార్టీలకు ఇచ్చిన విరాళాలపై దేశవ్యాప్తంగా చర్చ జరిగింది.

ఈ నేపథ్యంలో మస్క్ ఆ వార్తలను మళ్లీ ప్రస్తావించడం రాజకీయ, వ్యాపార వర్గాల్లో ఆసక్తిని పెంచింది. అయితే ఒక కంపెనీ రాజకీయ పార్టీకి విరాళం ఇవ్వడం, మరో కంపెనీకి వ్యాపార అనుమతులు ఆలస్యమవడం రెండూ వేర్వేరు అంశాలు. ఈ రెండింటి మధ్య సంబంధం ఉందని నిర్ధారించే ఆధారాలు మస్క్ తాజాగా వెల్లడించలేదు. కేవలం వార్తలను షేర్ చేసినంత మాత్రాన ఆయన ఆరోపణలు నిజమని నిర్ధారించలేం. ఈ విషయంలో భావోద్వేగాల కంటే వాస్తవాలు, ఆధారాలకే ప్రాధాన్యం ఇవ్వాలి.

https://t.co/DJYynAyO0W

— Elon Musk (@elonmusk) October 10, 2026

ఎలన్ మస్క్‌కు చెందిన స్పేస్‌ఎక్స్ సంస్థ స్టార్‌లింక్ పేరుతో శాటిలైట్ ఇంటర్నెట్ సేవలను అందించేందుకు సిద్ధ‌మ‌వుతోంది. సాధారణంగా మొబైల్ టవర్లు లేదా భూమిపై వేసే ఫైబర్ కేబుళ్లపై ఆధారపడకుండా ఉపగ్రహాల ద్వారా ఇంటర్నెట్‌ను అందించడం ఈ సేవ ప్రత్యేకత. మారుమూల గ్రామాలు, కొండ ప్రాంతాలు, నెట్‌వర్క్ సరిగా అందని ప్రాంతాలకు ఇది ఉపయోగపడే అవకాశం ఉంది.

భారత్‌లో ఈ రంగంలో రిలయన్స్ జియోకు సంబంధించిన జియో శాటిలైట్ సేవల విభాగం, భారతీ గ్రూప్ మ‌ద్ధ‌తున్న‌ యూటెల్‌శాట్ వన్‌వెబ్ వంటి సంస్థలు కూడా పోటీకి సిద్ధమవుతున్నాయి. అందువల్ల స్టార్‌లింక్ ప్రవేశిస్తే శాటిలైట్ ఇంటర్నెట్ మార్కెట్‌లో పోటీ పెరిగే అవకాశం ఉంది.

మస్క్ వాదన ప్రకారం, కొన్ని పెద్ద సంస్థలు తమ మార్కెట్ ఆధిపత్యాన్ని కొనసాగించాలనుకుంటున్నాయి. అయితే ఈ ఆరోపణకు సంబంధించి ఆయన బహిరంగంగా నిర్దిష్టమైన ఆధారాలు చూపించలేదు. కాబట్టి అనుమానాలను నిజాలుగా పరిగణించడం సరికాదు. అదే సమయంలో కొత్త సంస్థలకు సమాన అవకాశాలు కల్పించడం ద్వారా వినియోగదారులకు మెరుగైన సేవలు అందేలా చూడాల్సిన బాధ్యత ప్రభుత్వంపై ఉంటుంది.

భారత్‌లో శాటిలైట్ ఇంటర్నెట్ సేవలు ప్రారంభించడానికి కేవలం లైసెన్స్ పొందితే సరిపోదు. భద్రతా నిబంధనలు, అవసరమైన అనుమతులు, స్పెక్ట్రమ్ కేటాయింపు వంటి అంశాలను కూడా పూర్తి చేయాలి. స్టార్‌లింక్‌తో పాటు జియో శాటిలైట్ సేవలు, యూటెల్‌శాట్ వన్‌వెబ్ సంస్థలు కూడా ఈ రంగంలో కార్యకలాపాలు ప్రారంభించేందుకు సంబంధిత ప్రక్రియలను పూర్తి చేయాల్సి ఉంటుంది.

మస్క్ ఆరోపణలపై స్పందించిన కేంద్ర ప్రభుత్వం, శాటిలైట్ కమ్యూనికేషన్ రంగంలో పలు సంస్థలకు లైసెన్సులు ఇచ్చినట్లు స్పష్టం చేసింది. అయితే లైసెన్స్ రావడం అంటే వెంటనే యూజ‌ర్ల‌కు సేవలు అందించవచ్చని కాదు. భద్రతా పరిశీలనలు, స్పెక్ట్రమ్‌కు సంబంధించిన ఏర్పాట్లు పూర్తి కావాల్సి ఉంటుంది.

మస్క్, అంబానీ మధ్య జరుగుతున్న ఈ వివాదాన్ని కేవలం ఇద్దరు సంపన్న వ్యాపారవేత్తల మధ్య పోటీగా మాత్రమే చూడకూడదు. భారత్‌లో ఇంటర్నెట్ సేవల భవిష్యత్తుకు కూడా దీనికి సంబంధం ఉంది. స్టార్‌లింక్ వంటి సంస్థలు మార్కెట్‌లోకి వస్తే మారుమూల ప్రాంతాల్లో కనెక్టివిటీ మెరుగుపడే అవకాశం ఉంది. ముఖ్యంగా ఆన్‌లైన్ విద్య, చిన్న వ్యాపారాలు, డిజిటల్ సేవలకు ఇది ఉపయోగపడవచ్చు.

అయితే శాటిలైట్ ఇంటర్నెట్ సేవలు అందరికీ అందుబాటు ధరల్లో లభిస్తాయా? సాధారణ మొబైల్ ఇంటర్నెట్‌తో పోలిస్తే ఖర్చు ఎంత ఉంటుంది? గ్రామీణ ప్రాంతాల్లో దీని వల్ల నిజంగా ఎంత ప్రయోజనం కలుగుతుంది? అన్న ప్రశ్నలకు సమాధానాలు కూడా కీలకమే. పోటీ పెరగడం మంచిదే కానీ, దాని ప్రయోజనం సామాన్య వినియోగదారుడికి చేరినప్పుడే దానికి నిజమైన విలువ ఉంటుంది.

మరోవైపు, వ్యాపార పోటీని రాజకీయ ఆరోపణలతో ముడిపెట్టడం కంటే పారదర్శకమైన అనుమతుల విధానం, స్పష్టమైన నిబంధనలు అవసరం. మస్క్ తన ఆరోపణలకు ఆధారాలు చూపించాలి. ప్రభుత్వం అన్ని కంపెనీలకు సమాన అవకాశాలు కల్పిస్తున్నట్లు స్పష్టత ఇవ్వాలి. అంబానీ వంటి పెద్ద వ్యాపార సంస్థలతో పాటు కొత్తగా ప్రవేశించే కంపెనీలకూ న్యాయమైన పోటీ వాతావరణం ఉండాలి. చివరికి ఈ పోటీలో ఎవరు గెలిచారన్నదానికంటే, భారతీయ వినియోగదారులకు మెరుగైన ఇంటర్నెట్ సేవలు తక్కువ ఖర్చుతో అందుతున్నాయా లేదా అన్నదే అసలైన ప్రశ్న.

New Telecom Rule: నవంబర్ 1 నుంచి కొత్త రూల్.. మారనున్న కాలింగ్ రూల్స్ !

Mahesh Rajamoni — Thu, 15 Oct 2026 23:11:55 +0530

New Telecom Rule: నవంబర్ 1 మరో కొత్త రూల్ అమల్లోకి రానుంది. ఫోన్ స్క్రీన్ పై కాలర్ అసలు పేరు డిస్ప్లే అయ్యేలా కొత్త రూల్ వస్తోంది. ఫేక్ కాల్స్ కు చెక్ పెట్టేందుకు కేంద్రం ఈ నిర్ణయం తీసుకుంది. ఆ వివరాలు ఇలా ఉన్నాయి..

మీ ఫోన్ లో ఎవరిదైనా కాల్ వస్తే, ఇకపై నంబర్ తో పాటు వారి అసలు పేరు కూడా స్క్రీన్ పై స్పష్టంగా కనిపిస్తుంది. మీరు ఎవరిదైనా సిమ్ తీసుకునేటప్పుడు ఏ ఐడీ ప్రూఫ్ ఇచ్చారో, ఆ ఐడీలో ఉన్న పేరే అవతల వాళ్ళ ఫోన్ లో డిస్ప్లే అవుతుంది. సైబర్ మోసాలు, ఫేక్ కాల్స్ ను ఈజీగా గుర్తించడానికి కేంద్ర ప్రభుత్వం ఈ కొత్త నిబంధనను తీసుకువచ్చింది.

టెలికాం శాఖ టెలికాం ఆపరేటర్లకు స్పష్టమైన ఆదేశాలు జారీ చేసింది. నవంబర్ 1 నుంచి ఈ కొత్త సర్వీస్ ను కంపెనీలు తప్పనిసరిగా ప్రారంభించాలని ఆదేశాల్లో పేర్కొన్నారు. ఈ సర్వీస్ ను వాడడానికి యూజర్లు ఎలాంటి యాప్స్ డౌన్ లోడ్ చేసుకోవాల్సిన పని లేదు. అలాగే ఫోన్ లో ఎలాంటి సెట్టింగ్స్ మార్చుకోవాల్సిన అవసరం కూడా ఉండదు. ఇది ఆటోమేటిక్ గా పనిచేస్తుంది.

ప్రభుత్వం టెలికాం కంపెనీలకు 4జీ, 5జీ నెట్వర్క్ లలో కాలింగ్ నేమ్ ప్రెజెంటేషన్ ను తప్పనిసరి చేసింది. దీన్నే షార్ట్ కట్ లో సీఎన్ఏపీ అని పిలుస్తారు. దీనివల్ల ఏ అన్ నోన్ నంబర్ నుంచి ఫోన్ వచ్చినా, ఆ నంబర్ ఎవరి పేరు మీద రిజిస్టర్ అయిందో ఆ పేరు స్క్రీన్ పై ప్రత్యక్షమవుతుంది.

ఒకవేళ ఆ నంబర్ గనుక మీ కాంటాక్ట్ లిస్ట్ లో ఉంటే మీరు సేవ్ చేసిన పేరే కనిపిస్తుంది. నంబర్ సేవ్ చేయకపోయినా సరే, సిమ్ తీసుకునేటప్పుడు ఇతరులు ఇచ్చిన ఒరిజినల్ నేమ్ స్క్రీన్ పై కనిపిస్తుంది. ఒకవేళ విదేశాల నుంచి అంటే ఇంటర్నేషనల్ కాల్స్ వస్తే మాత్రం ఎలాంటి పేర్లు చూపించవు. కేవలం ఇంటర్నేషనల్ కాల్ అని మాత్రమే స్క్రీన్ పై వస్తుంది.

యూజర్ల ప్రైవసీ భద్రత కోసం ప్రభుత్వం తగు జాగ్రత్తలు తీసుకుంది. ఎప్పుడైతే కాల్ కట్ అయిపోతుందో, ఆటోమేటిక్ గా ఆ పేరు టెలికాం సిస్టమ్ మెమరీ నుంచి డిలీట్ అయిపోతుంది. దీనివల్ల మీ పర్సనల్ డేటా ఎక్కడా లీక్ కాదు. ఒకవేళ ఎవరైనా సీఎల్ఐఆర్ సర్వీస్ తీసుకొని తమ పేరును గోప్యంగా ఉంచితే, వారి పేర్లు మాత్రం స్క్రీన్ పై చూపించవు.

బిజినెస్, బల్క్ కనెక్షన్లు వాడేవారికి కొన్ని ప్రత్యేక వెసులుబాట్లు కల్పించారు. వ్యాపార సంస్థలు తమ ట్రేడ్ మార్క్ లేదా రిజిస్టర్డ్ బిజినెస్ నేమ్ ను స్క్రీన్ పై చూపించుకోవచ్చు. దీనికోసం జీఎస్టీ పోర్టల్ లేదా ట్రేడ్ మార్క్ రిజిస్ట్రీ డాక్యుమెంట్లను టెలికాం ఆపరేటర్లకు ఇచ్చి వెరిఫై చేయించుకోవాల్సి ఉంటుంది. ప్రస్తుతం ఈ రూల్ కేవలం 4జీ, 5జీ నెట్వర్క్ లకూ మాత్రమే వర్తిస్తుంది. 2జీ, 3జీ, ల్యాండ్ లైన్ లపై త్వరలో నిర్ణయం తీసుకుంటారు.

ఈ కొత్త సిస్టమ్ రావడం వల్ల చాలా లాభాలున్నాయి. ట్రాయ్ గత కొన్ని నెలలుగా దీనిపై ట్రయల్స్ నిర్వహించి అక్టోబర్ 2025 లో దీనికి ఆమోదం తెలిపింది. దీనివల్ల సైబర్ ఫ్రాడ్స్, స్పామ్ కాల్స్, బెదిరింపు కాల్స్ కు పూర్తిగా అడ్డుకట్ట వేయవచ్చు. ప్రజలు ఇకపై ట్రూకాలర్ లాంటి థర్డ్ పార్టీ యాప్స్ పై పూర్తిగా ఆధారపడాల్సిన అవసరం ఉండదు.

యూజర్లు అందరూ ఒక చిన్న విషయం గుర్తుంచుకోవాలి. మీ సిమ్ కార్డ్ మీ పేరు మీదో లేక మీ కుటుంబ సభ్యుల పేరు మీదో ఉంటే, నవంబర్ 1 నుంచి అడ్రస్ లో ఉన్న అవే పేర్లు ఇతరులకు కనిపిస్తాయి. అందువల్ల మీ సిమ్ కు సంబంధించిన కేవైసీ వివరాలను ఎప్పటికప్పుడు అప్డేట్ చేసుకోవడం మంచిది. బిజినెస్ ఓనర్లు కూడా తమ జీఎస్టీ డాక్యుమెంట్లతో బ్రాండ్ నేమ్ ను వెంటనే అప్డేట్ చేసుకోవాలి.

తీవ్ర అస్వ‌స్థ‌త‌కు గురైన ఎల్‌కే అద్వానీ.. ప్ర‌స్తుతం ఆయ‌న ఆరోగ్యం ఎలా ఉందంటే.?

Narender Vaitla — Sat, 17 Oct 2026 12:32:00 +0530

శుక్రవారం రాత్రి ఆసుపత్రిలో చేరిక

లాల్ కృష్ణ అద్వానీని శుక్రవారం రాత్రి సుమారు 7.30 గంటలకు ఇంద్రప్రస్థ అపోలో ఆసుపత్రికి తీసుకెళ్లారు. ఛాతీ ఇన్‌ఫెక్షన్‌కు సంబంధించిన సమస్యలతో ఆయనను పల్మనరీ విభాగంలో చేర్చారు. సంబంధిత వైద్య నిపుణులు ఆయనకు అవసరమైన పరీక్షలు నిర్వహిస్తూ ఆరోగ్య పరిస్థితిని అంచనా వేస్తున్నారు. ప్రస్తుతం ఆయన వైద్యుల పర్యవేక్షణలో ఉన్నారు. ఆరోగ్య పరిస్థితి నిలకడగా ఉన్నప్పటికీ, వయసును దృష్టిలో ఉంచుకుని వైద్యులు తగిన జాగ్రత్తలు తీసుకుంటున్నారు.

గతంలోనూ పలుమార్లు వైద్య చికిత్స

ఇటీవలి కాలంలో అద్వానీ ఆరోగ్య సమస్యల కారణంగా ఆసుపత్రిలో చేరడం ఇది మొదటిసారి కాదు. ఈ ఏడాది మే నెలలో వయసు సంబంధిత అనారోగ్య సమస్యలతో ఆయన ఇదే ఆసుపత్రిలో చికిత్స పొందారు. కొన్ని రోజుల పాటు వైద్యుల పర్యవేక్షణలో ఉన్న అనంతరం డిశ్చార్జ్ అయ్యారు. అంతకుముందు 2024 డిసెంబర్‌లోనూ ఆయనను ఇంద్రప్రస్థ అపోలో ఆసుపత్రిలోని ఇంటెన్సివ్ కేర్ యూనిట్‌ (ఐసీయూ)లో చేర్చి చికిత్స అందించారు. ఆ సమయంలో నిపుణుల పర్యవేక్షణలో వైద్య సేవలు అందించారు.

భారత రాజకీయాల్లో కీలక పాత్ర

లాల్ కృష్ణ అద్వానీ భారత రాజకీయాల్లో అత్యంత ప్రముఖ నేతల్లో ఒకరు. భారతీయ జనతా పార్టీ ఎదుగుదలలో ఆయన కీలక పాత్ర పోషించారు. పార్టీని దేశవ్యాప్తంగా విస్తరించడంలోనూ, జాతీయ రాజకీయాల్లో బీజేపీ బలమైన శక్తిగా ఎదగడంలోనూ ఆయన కృషి ముఖ్యమైనది. అటల్ బిహారీ వాజ్‌పేయి ప్రధానిగా ఉన్న సమయంలో 2002 నుంచి 2004 వరకు దేశ ఉప ప్రధానిగా బాధ్యతలు నిర్వర్తించారు. అంతకుముందు కేంద్ర హోంమంత్రిగా కూడా పనిచేశారు. దశాబ్దాల పాటు రాజకీయాల్లో కొనసాగిన ఆయనకు దేశవ్యాప్తంగా గుర్తింపు ఉంది.

2024లో భారతరత్న పురస్కారం

దేశానికి, ప్రజా జీవితానికి అద్వానీ అందించిన సేవలకు గుర్తింపుగా కేంద్ర ప్రభుత్వం 2024లో ఆయనకు భారత అత్యున్నత పౌర పురస్కారమైన భారతరత్నను ప్రకటించింది. బీజేపీ వ్యవస్థాపక నేతల్లో ఒకరిగా, పార్టీ సైద్ధాంతిక ప్రస్థానంలో కీలక వ్యక్తిగా ఆయన ప్రత్యేక గుర్తింపు పొందారు. ప్రస్తుతం ఛాతీ ఇన్‌ఫెక్షన్‌తో ఆసుపత్రిలో చికిత్స పొందుతున్న ఆయన త్వరగా కోలుకోవాలని పార్టీ నాయకులు, అభిమానులు ఆకాంక్షిస్తున్నారు.

భారత్‌లో సీజేపీ నిరసనలపై స్పందించిన అమెరికా .. విదేశాంగ మంత్రి కీల‌క వ్యాఖ్య‌లు

Narender Vaitla — Wed, 21 Oct 2026 18:41:14 +0530

భారత్ అంతర్గత వ్యవహారమన్న మార్కో రూబియో

ప్ర‌స్తుతం భార‌త్ ప‌ర్య‌ట‌న‌లో అమెరికా విదేశాంగ మంత్రి మార్కో రూబియో భారత్‌లో జరుగుతున్న నిరసనలపై ప్రశ్నించగా కీలక వ్యాఖ్యలు చేశారు. ఇది భారతదేశానికి సంబంధించిన అంతర్గత విష‌య‌మ‌ని, ఇందులో అమెరికా జోక్యం చేసుకోదని తెలిపారు. భారత్ ఒక ప్రజాస్వామ్య దేశమని, ఇక్కడ ఎన్నికలు జరుగుతాయని పేర్కొన్నారు. అమెరికాలోనూ ప్రతిరోజూ వివిధ అంశాలపై ప్రజలు నిరసనలు చేపడుతుంటారని ఆయన గుర్తు చేశారు. ప్రజాస్వామ్య దేశాల్లో నిరసనలు సాధారణమేనన్న అభిప్రాయాన్ని ఆయన వ్యక్తం చేశారు.

భారత్‌కు మద్ధతుగా అమెరికా వైఖరి

భారత్‌లో నిరసనలపై కొందరు అమెరికా చట్టసభ సభ్యులు విమర్శలు చేస్తున్నారు. పోలీసుల చర్యలు, మానవ హక్కులకు సంబంధించిన అంశాలపై కూడా కొందరు ఆందోళన వ్యక్తం చేస్తున్నారు. ఐక్యరాజ్యసమితికి సంబంధించిన కొందరు వ్యక్తులు సైతం ఈ అంశాలను ప్రస్తావించారు. అయితే, ఈ విమర్శలపై మార్కో రూబియో స్పందించిన తీరు ప్రాధాన్యం సంతరించుకుంది. భారత్‌లో జరుగుతున్న పరిణామాలను ఆ దేశ అంతర్గత రాజకీయ అంశంగా అభివర్ణించారు.

మానవ హక్కుల అంశంపై భారత్ అభ్యంతరం

భారత్‌లో నిరసనల సందర్భంగా పోలీసుల చర్యలు, మానవ హక్కుల పరిస్థితులపై ఐక్యరాజ్యసమితికి చెందిన కొందరు ప్రత్యేక ప్రతినిధులు ఆందోళన వ్యక్తం చేశారు. అయితే, ఈ అభ్యంతరాలను భారత ప్రభుత్వం తీవ్రంగా వ్యతిరేకించింది. మానవ హక్కుల అంశాలను కొన్ని దేశాలపై రాజకీయ ఒత్తిడి తీసుకురావడానికి ఉపయోగించకూడదని భారత్ అభిప్రాయపడింది. కొన్ని దేశాలను లక్ష్యంగా చేసుకుని విమర్శలు చేయడం సరికాదని పేర్కొంది. సరైన విచారణ జరగని ఆరోపణల ఆధారంగా ఒక దేశ పరిస్థితులపై నిర్ణయానికి రావడం సమంజసం కాదని స్పష్టం చేసింది. మానవ హక్కులపై చర్చలు వాస్తవాలు, ఆధారాల ఆధారంగా జరగాలని భారత్ చెబుతోంది.

ఇంత‌కీ సీజేపీ నిరసనలు ఎందుకు జరుగుతున్నాయి?

కాక్‌రోచ్ జనతా పార్టీ (CJP) ఆధ్వర్యంలో భారత్‌లోని పలు నగరాల్లో నిరసనలు జరుగుతున్న విష‌యం తెలిసిందే. ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని నిరసనకారులు డిమాండ్ చేస్తున్నారు. ఎన్నికల ఓటర్ల జాబితాల ప్రత్యేక సమగ్ర సవరణ (Special Intensive Revision - SIR)లో త‌ప్పులు జ‌రిగాయ‌ని సీజేపీ ఆరోపిస్తోంది. ఓటర్ల జాబితాల సవరణ ప్రక్రియపై ఆందోళనలు వ్యక్తం చేస్తూ నిరసనకారులు తమ నిరసనను కొనసాగిస్తున్నారు. ఎన్నికల నిర్వహణ, ఓటర్ల జాబితాల ప్రక్రియపై ప్రశ్నలు లేవనెత్తుతున్నారు. ఈ నేపథ్యంలో ప్రధాన ఎన్నికల కమిషనర్ రాజీనామా చేయాలన్న డిమాండ్ ముందుకు వచ్చింది.

నిరసనలకు ప్రతిపక్ష పార్టీల మద్దతు

సీజేపీ చేపడుతున్న నిరసనలకు ప్రతిపక్ష పార్టీలు కూడా మద్దతు ఇస్తున్నాయి. ప్రధాన ఎన్నికల కమిషనర్ రాజీనామా చేయాలన్న డిమాండ్‌తో పాటు ఎన్నికల ప్రక్రియపై తమ అభ్యంతరాలను వ్యక్తం చేస్తున్నాయి. మరోవైపు, ఈ నిరసనలు, పోలీసుల చర్యలు, మానవ హక్కుల అంశాలు అంతర్జాతీయ స్థాయిలోనూ చర్చకు వస్తున్నాయి. ఇలాంటి సమయంలో మార్కో రూబియో చేసిన వ్యాఖ్యలు చర్చనీయాంశంగా మారాయి. భారత్‌లోని నిరసనలను అంతర్గత రాజకీయ వ్యవహారంగా పేర్కొంటూ, ఈ విషయంలో అమెరికా జోక్యం చేసుకోదని ఆయన స్పష్టం చేయడం గమనార్హం.

Diwali Bonus: పండుగ వేళ ఉద్యోగులకు అదిరిపోయే గిఫ్ట్.. అకౌంట్లోకి రూ. 7000

Mahesh Rajamoni — Fri, 16 Oct 2026 11:00:26 +0530

Diwali Bonus: దీపావళికి ముందే కేంద్ర ప్రభుత్వ ఉద్యోగులకు భారీ గుడ్ న్యూస్ అందింది. రూ 6,908 వరకు అడ్హాక్ బోనస్ అందనుంది. ఆ పూర్తి వివరాలు ఇక్కడ తెలుసుకుందాం.

దీపావళి పండుగ సమీపిస్తున్న వేళ ప్రభుత్వ ఉద్యోగులకు కేంద్ర ప్రభుత్వం అదిరిపోయే గుడ్ న్యూస్ అందించింది. ఆర్థిక సంవత్సరం 2025-26 కోసం నాన్-ప్రొడక్టివిటీ లింక్డ్ బోనస్ లేదా అడ్హాక్ బోనస్ మంజూరు చేస్తూ ప్రభుత్వం అధికారికంగా నిర్ణయం తీసుకుంది.

ఈ మేరకు కేంద్ర ఆర్థిక మంత్రిత్వ శాఖకు చెందిన వ్యయ విభాగం అక్టోబర్ 15న ఒక ముఖ్యమైన నోట్ జారీ చేసింది. ఈ నిర్ణయంతో లక్షలాది మంది ఉద్యోగుల ముఖాల్లో చిరునవ్వు వెలిసింది. పండుగ ఖర్చుల కోసం ఈ డబ్బులు ఉద్యోగులకు ఎంతో ఉపయోగపడతాయని చెప్పవచ్చు.

ప్రభుత్వ ఉత్తర్వుల ప్రకారం అర్హులైన ఉద్యోగులకు 30 రోజుల వేతనానికి సమానమైన బోనస్ అందనుంది. దీనికి సంబంధించి గరిష్ఠ నెలసరి వేతన పరిమితిని రూ. 7,000 గా నిర్ణయించారు. తాజా లెక్కల ప్రకారం అర్హులైన ఉద్యోగుల ఖాతాల్లో సుమారు రూ. 6,908 వరకు బోనస్ మొత్తం జమ కానుంది. గత కొద్ది సంవత్సరాలుగా ఈ సీలింగ్ లిమిట్ అలాగే కొనసాగుతోంది. ఈ బోనస్ లెక్కింపు పద్ధతి సులభంగానే ఉంటుంది. గరిష్ఠ పరిమితిని ప్రాతిపదికగా తీసుకుని ఈ మొత్తాన్ని ఉద్యోగులకు నేరుగా చెల్లిస్తారు.

ఈ తాజా నిర్ణయంతో గ్రూప్ సీ, గ్రూప్ బీ కి చెందిన నాన్-గెజిటెడ్ ఉద్యోగులకు పూర్తి ప్రయోజనం లభిస్తుంది. అయితే వీరు ఎలాంటి ఇతర ప్రొడక్టివిటీ లింక్డ్ బోనస్ పథకం పరిధిలో ఉండకూడదు. దీనితో పాటు కేంద్ర సాయుధ పోలీసు బలగాలు అలాగే సాయుధ బలగాల సిబ్బంది కూడా ఈ బోనస్ కు అర్హులే.

కేంద్ర ప్రభుత్వ వేతన విధానాన్ని అనుసరించే కేంద్రపాలిత ప్రాంతాల ఉద్యోగులు కూడా ఈ జాబితాలో ఉంటారు. అయితే వేరే ఇతర బోనస్ లేదా గ్రాటిట్యూడ్ పథకం పొందుతున్నవారు దీనికి అనర్హులు.

ఈ బోనస్ సొమ్ము పొందడానికి ఉద్యోగులు కొన్ని కచ్చితమైన షరతులు పూర్తి చేయాలి. ముఖ్యంగా మార్చి 31 నాటికి ఉద్యోగి సర్వీసులో ఉండటం చాలా ముఖ్యం. అలాగే 2025-26 ఆర్థిక సంవత్సరంలో కనీసం ఆరు నెలల పాటు నిరంతరం సేవలు అందించి ఉండాలి. ఆరు నెలల నుంచి ఏడాది మధ్య సర్వీసు ఉన్నవారికి నిష్పత్తి ప్రకారం బోనస్ డబ్బులు అందుతాయి. ఇక సాధారణ వేతనం లేదా రూ. 7,000 సీలింగ్ లిమిట్ లో ఏది తక్కువైతే దాని ఆధారంగానే బోనస్ లెక్కిస్తారు.

కేవలం రెగ్యులర్ ఉద్యోగులే కాకుండా అర్హులైన క్యాజువల్ లేబర్స్ లేదా ఉద్యోగులకు కూడా ప్రభుత్వం ఈ బోనస్ సౌకర్యం కల్పించింది. ఆరు రోజులు పని చేసే ఆఫీసుల్లో ఏడాదికి కనీసం 240 రోజులు, అలాగే వరుసగా మూడేళ్లు లేదా అంతకంటే ఎక్కువ కాలం పని చేసిన వారు దీనికి అర్హులు.

ఇక ఐదు రోజులు పని చేసే ఆఫీసుల్లో ఏడాదికి కనీసం 206 రోజులు పని చేయాలనే నిబంధన పెట్టారు. వీరికి రూ. 1,200 నెలసరి పరిమితి ఆధారంగా 30 రోజుల బోనస్ కింద రూ. 1,184 అందజేస్తారు. నిజమైన జీతం దీనికంటే తక్కువ ఉంటే దాని ఆధారంగానే లెక్కింపు జరుగుతుంది.

Kolkata Stampede: దుర్గామాత మండపంలో 19 మంది మృతి.. కోల్‌కతా విషాదానికి కారణం ఏమిటి?

Mahesh Rajamoni — Sun, 18 Oct 2026 07:46:14 +0530

Kolkata Stampede: కోల్‌కతా దుర్గామండపంలో ఘోర విషాదం చోటుచేసుకుంది. చోర్‌బగాన్ దుర్గాపూజ పండల్‌లో భారీ వర్షం, తప్పుడు ప్రకటనల వల్ల జరిగిన తొక్కిసలాటలో 19 మంది మృతి చెందగా, 25 మంది గాయపడ్డారు. ప్రభుత్వం ₹25 లక్షల పరిహారం ప్రకటించింది.

పశ్చిమ బెంగాల్ రాజధాని కోల్‌కతాలో అత్యంత వైభవంగా జరిగే దుర్గాపూజ ఉత్సవాలు ఒక్కసారిగా తీవ్ర విషాదంగా మారాయి. మహా సప్తమి వేడుకల వేళ చోర్‌బగాన్ సర్వజనీన్ దుర్గాపూజ పండల్ వద్ద ఊహించని రీతిలో భారీ తొక్కిసలాట జరిగింది.

శనివారం సాయంత్రం సుమారు 7:15 గంటలకు చోటుచేసుకున్న ఈ ప్రమాదంలో 13 మంది మహిళలు, ఒక చిన్నారి సహా మొత్తం 19 మంది ప్రాణాలు కోల్పోయారు. మరొక 25 మంది తీవ్రంగా గాయపడి ఆసుపత్రిలో చికిత్స పొందుతున్నారు. గాయపడిన వారిలో ఒకరి పరిస్థితి అత్యంత విషమంగా ఉంది.

ఉత్తర కోల్‌కతాలోని రాధా మాధవ్ సాహా లేన్‌లోని ఇరుకైన మార్గంలో వేలాది మంది భక్తులు పండల్‌లోకి వెళ్లేందుకు వేచి చూస్తున్నారు. సరిగ్గా అదే సమయంలో ఒక్కసారిగా భారీ వర్షం ప్రారంభమైంది. వర్షం కారణంగా బయట ఉన్న భక్తులు ఒకేసారి ముందుకు కదిలారు.

అదే సమయంలో పూజ కమిటీ మైకులో చేసిన ఒక తప్పుడు ప్రకటన, ప్రైవేట్ సెక్యూరిటీ గార్డుల ఈలల శబ్దాలు భక్తులలో తీవ్ర అయోమయాన్ని సృష్టించాయి. బయటకు వెళ్లే దారి సమీపంలోని మెట్ల వద్ద చాలా మంది కిందపడిపోవడంతో వెనుక ఉన్నవారు వారిపై నుంచి తొక్కుకుంటూ ముందుకు పరిగెత్తారు.

సమాచారం అందుకున్న వెంటనే పశ్చిమ బెంగాల్ ముఖ్యమంత్రి సువేందు అధికారి, సీఎస్ మనోజ్ అగర్వాల్‌తో కలిసి ఆసుపత్రులను సందర్శించారు. బాధితులను పరామర్శించి వైద్య సేవలను సమీక్షించారు. మృతుల కుటుంబాలకు ₹25 లక్షల పరిహారంతో పాటు గ్రూప్-డి ప్రభుత్వ ఉద్యోగం అందిస్తామని సీఎం ప్రకటించారు.

ప్రమాదంపై విచారణకు కలకత్తా హైకోర్టు సిట్టింగ్ జడ్జి నేతృత్వంలో ప్రత్యేక దర్యాప్తు బృందాన్ని ఏర్పాటు చేశారు. ప్రధాని నరేంద్ర మోదీ మృతుల కుటుంబాలకు ₹2 లక్షలు, గాయపడిన వారికి ₹50,000 ఎక్స్‌గ్రేషియా ప్రకటించారు.

ఈ ఘటనకు సంబంధించి చోర్‌బగాన్ పూజ కమిటీ నిర్వాహకులు, ప్రైవేట్ సెక్యూరిటీ గార్డులు సహా 12 మందిని పోలీసులు అదుపులోకి తీసుకున్నారు. సంఘటనా స్థలంలో సీసీటీవీ ఫుటేజ్‌ను సేకరించిన అధికారులు లోతుగా పరిశీలిస్తున్నారు.

భద్రతా లోపాలు, నిర్లక్ష్యానికి కారణమైన వారిపై కఠిన చర్యలు తీసుకుంటామని ప్రభుత్వం తెలిపింది. ప్రస్తుతం పండల్‌ను మూసివేసి ఫోరెన్సిక్, ఎస్‌టిఎఫ్, ఫైర్ విభాగాల ఆధీనంలోకి తీసుకున్నారు.

కోల్‌కతా పోలీసులు సహాయం కోరే వారి కోసం ప్రత్యేక టోల్ ఫ్రీ హెల్ప్‌లైన్ నంబర్లను అందుబాటులోకి తెచ్చారు..

• 18003455678

• 03322141310

రాష్ట్రపతి ద్రౌపది ముర్ము, కేంద్ర హోంశాఖ మంత్రి అమిత్ షా, మాజీ సీఎం మమతా బెనర్జీ ఈ ఘోర ప్రమాదంపై తీవ్ర దిగ్భ్రాంతి వ్యక్తం చేశారు. కేంద్ర మంత్రి అమిత్ షా బెంగాల్‌లో తన పర్యటనలను రద్దు చేసుకుని ఆసుపత్రిలో గాయపడిన వారిని పరామర్శించనున్నారు.

PM Kisan 24th Installment: రైతులకు గుడ్ న్యూస్.. పీఎం కిసాన్ 24వ విడత డబ్బులు ఖాతాలోకి ఎప్పుడంటే?

Mahesh Rajamoni — Tue, 13 Oct 2026 10:33:09 +0530

PM Kisan 24th Installment: ప్రధాన మంత్రి కిసాన్ సమ్మాన్ నిధి 24వ విడత నిధులు త్వరలో విడుదల కానున్నాయి. అర్హులైన రైతులు తమ మొబైల్ నంబర్, ఈ-కేవైసీ వివరాలను ఆన్‌లైన్‌లో త్వరగా అప్‌డేట్ చేసుకోవాలని అధికారులు తెలిపారు.

ప్రధాన మంత్రి కిసాన్ సమ్మాన్ నిధి యోజన 24వ విడత డబ్బుల కోసం దేశవ్యాప్తంగా కోట్లాది మంది రైతులు ఎదురుచూస్తున్నారు. కేంద్ర ప్రభుత్వం ఈ పథకం కింద అర్హులైన రైతు కుటుంబాలకు ఏడాదికి రూ. 6,000 చొప్పున ఆర్థిక సాయం అందిస్తోంది. ఈ మొత్తాన్ని ప్రతి నాలుగు నెలలకు ఒకసారి రూ. 2,000 చొప్పున మూడు విడతలుగా నేరుగా రైతుల బ్యాంక్ ఖాతాల్లో జమ చేస్తారు.

గతేడాది లేదా గత విడతల నిబంధనలను చూస్తే, అక్టోబర్ చివరి వారం నుంచి నవంబర్ మధ్యలో ఈ నిధులు విడుదలయ్యే అవకాశం ఉంది. నవంబర్ 15 లోపు పీఎం కిసాన్ 24వ విడత డబ్బులు రైతులు అకౌంట్లలో జమ అయ్యే అవకాశాలు ఉన్నాయి. అయితే, ప్రభుత్వం తరఫున అధికారిక తేదీ ఇంకా వెల్లడి కాలేదు. అయతే, సంబంధిత వర్గాలు రైతులకు పలు సూచనలు చేశాయి.

రైతులు తమ పీఎం కిసాన్ పోర్టల్‌లో మొబైల్ నంబర్‌ను సరిగ్గా ఉంచుకోవడం చాలా ముఖ్యం. రికార్డుల్లో పాత లేదా తప్పు నంబర్ ఉంటే, ప్రభుత్వానికి సంబంధించిన ముఖ్యమైన మెసేజ్‌లు, అలర్ట్‌లు అందవు. ఖాతాలో రూ. 2,000 జమ అయిన వెంటనే బ్యాంకు నుంచి మెసేజ్ రావాలంటే మొబైల్ నంబర్ లింక్ అయి ఉండాలి.

ఒకవేళ నంబర్ మారిపోతే వెంటనే ఆన్‌లైన్‌లో మార్చుకోవాలి. లేదంటే రాబోయే విడత సమాచారం తెలియక ఇబ్బంది పడాల్సి వస్తుంది. ఎన్‌పీసీఐ మ్యాపింగ్, ఆధార్ లింకింగ్ సరిగ్గా ఉన్నాయో లేదో ముందే చెక్ చేసుకోవడం మంచిది.

పీఎం కిసాన్ ఖాతాలో మొబైల్ నంబర్ మార్చడం చాలా ఈజీ. ఈ కింద చెప్పిన స్టెప్స్ ఫాలో అయితే సరిపోతుంది..

• ముందుగా మీ మొబైల్ లేదా లాప్‌టాప్‌లో అధికారిక వెబ్‌సైట్ pmkisan.gov.in ఓపెన్ చేయండి.

• హోమ్‌పేజీలో మొబైల్ నంబర్ అప్‌డేట్ చేసే ఆప్షన్ వెతకండి.

• మీ ఆధార్ నంబర్ లేదా రిజిస్ట్రేషన్ నంబర్ ఎంటర్ చేయండి.

• స్క్రీన్ మీద వచ్చే ఇన్ స్ట్రక్షన్స్ ఫాలో అవ్వండి.

• కొత్త మొబైల్ నంబర్ ఎంటర్ చేసి, ఓటీపీ వెరిఫికేషన్ పూర్తి చేయండి.

• ప్రాసెస్ పూర్తయిన తర్వాత మీ నంబర్ అప్‌డేట్ అయిందో లేదో కన్ఫర్మ్ చేసుకోండి. ఒకవేళ ఆన్‌లైన్‌లో ఆప్షన్ కనిపించకపోతే, దగ్గర్లోని కామన్ సర్వీస్ సెంటర్ లేదా వ్యవసాయ శాఖ కార్యాలయాన్ని సంప్రదించవచ్చు.

కొంతమంది రైతులకు గత విడత డబ్బులు నిలిచిపోయి ఉంటాయి. ఒకవేళ మీ 23వ విడత డబ్బులు టెక్నికల్ ప్రాబ్లమ్స్ వల్ల ఆగిపోయి ఉంటే, అవి క్లియర్ అయిన తర్వాత 24వ విడత డబ్బులతో కలిపి మొత్తం రూ. 4,000 ఖాతాలో జమ అయ్యే ఛాన్స్ ఉంది. అయితే ఇది అందరికీ వర్తించదు.

ఎవరికైతే గతంలో డబ్బులు ఆగిపోయాయో, వారి రీజన్ బట్టి ఇది మారుతుంది. అలాగే, కొన్ని ప్రాంతాల్లో తనిఖీల సమయంలో వేలాది మంది అనర్హులుగా తేలినట్లు రిపోర్టులు వచ్చాయి. కాబట్టి ఎటువంటి తప్పులు లేకుండా చూసుకోవడం ముఖ్యం.

మీ పేరు లబ్ధిదారుల జాబితాలో ఉందో లేదో ఇంట్లోనే ఇలా చెక్ చేసుకోవచ్చు..

• pmkisan.gov.in వెబ్‌సైట్‌లోకి వెళ్లండి.

• హోమ్‌పేజీలో 'Know Your Status' ఆప్షన్ మీద క్లిక్ చేయండి.

• మీ రిజిస్ట్రేషన్ నంబర్, క్యాప్చా కోడ్ ఎంటర్ చేయండి.

• 'Get Data' పైన క్లిక్ చేస్తే మీ ఈ-కేవైసి స్టేటస్, ఎలిజిబిలిటీ వివరాలు కనిపిస్తాయి.

అర్హత ఉండి కూడా డబ్బులు రావాలంటే రైతులు ఈ-కేవైసి, ల్యాండ్ రికార్డ్ వెరిఫికేషన్, ఆధార్- బ్యాంకు అకౌంట్ లింకింగ్ కచ్చితంగా పూర్తి చేసి ఉంచుకోవాలి.

Puducherry: రా.. రమ్మంటోన్న పుదుచ్చేరి.. పాండీ మెలాంజ్ పేరుతో మ‌ర్చిపోలేని అనుభూతి

Narender Vaitla — Sat, 17 Oct 2026 16:03:29 +0530

Puducherry: దేశంలోని వివిధ రాష్ట్రాల నుంచి పర్యాటకులను ఆకర్షిస్తున్న పుదుచ్చేరిలో పర్యాటక రంగాన్ని మరింత అభివృద్ధి చేసేందుకు ప్రభుత్వం చర్యలు చేపడుతోంది. ఇందులో భాగంగా పాండీ మెలాంజ్ పేరుతో కార్య‌క్ర‌మానికి శ్రీకారం చుట్టింది.

పుదుచ్చేరిలోని గాంధీ తిడల్‌లో శుక్రవారం (అక్టోబర్ 16) నిర్వహించిన కార్యక్రమంలో ముఖ్యమంత్రి ఎన్. రంగసామి ‘పాండీ మెలాంజ్‌ 2027’ అధికారిక లోగో, చిహ్నాన్ని ఆవిష్కరించారు. పుదుచ్చేరి పర్యాటక శాఖ, టెక్‌షాట్‌ (TEKSHOT) సంయుక్తంగా ఈ కార్యక్రమాన్ని నిర్వహించాయి. ఈ సందర్భంగా పాండీ మెలాంజ్‌ 2027 లక్ష్యాలు, భవిష్యత్తులో నిర్వహించనున్న కార్యక్రమాలకు సంబంధించిన ప్రత్యేక ప్రచార వీడియోను పర్యాటక, పౌర విమానయాన శాఖ మంత్రి మల్లాడి కృష్ణారావు విడుదల చేశారు.

‘కల్చర్‌.. క్రియేటివిటీ.. సెలబ్రేషన్‌’ (సంస్కృతి.. సృజనాత్మకత.. వేడుకలు) అనే ప్రధాన ఇతివృత్తంతో పాండీ మెలాంజ్‌ కార్యక్రమాలను రూపొందించారు. ఇందులో కళలు, సంగీతం, ఫ్యాషన్‌, ఆహారం, ఆరోగ్య సంరక్షణ, వారసత్వ సంపద, వినోదానికి సంబంధించిన అంశాలకు ప్రాధాన్యం ఇవ్వనున్నారు. పుదుచ్చేరి ప్రత్యేక సంస్కృతి, సంప్రదాయాలను ప్రజలకు పరిచయం చేయడంతో పాటు స్థానికంగా ఉన్న పర్యాటక ఆకర్షణలను మరింత ప్రాచుర్యంలోకి తీసుకురావడం ఈ కార్యక్రమం ప్రధాన ఉద్దేశం.

జనవరిలో విద్య, ఆధ్యాత్మికత, వైద్య రంగాలపై సదస్సులు

పాండీ మెలాంజ్‌ 2027లో భాగంగా జనవరిలో విద్య, ఆధ్యాత్మికత, వైద్య రంగాలకు సంబంధించిన సదస్సులను నిర్వహించనున్నారు. ఆయా రంగాలకు చెందిన ప్రముఖులు, నిపుణులు, వృత్తి నిపుణులు, వివిధ సంస్థల ప్రతినిధులు ఈ సదస్సుల్లో పాల్గొంటారు. తమ అనుభవాలను పంచుకోవడంతో పాటు ఆయా రంగాల్లోని ముఖ్యమైన అంశాలపై చర్చించేందుకు ఈ సమావేశాలు అడ్డాగా నిలవనున్నాయి.

జనవరిలో సదస్సులు ముగిసిన తర్వాత ఫిబ్రవరిలో వినోద కార్యక్రమాలను నిర్వహించనున్నారు. ఇందులో భాగంగా ప్రత్యక్ష సంగీత కచేరీలు, అంతర్జాతీయ నృత్య ప్రదర్శనలు ఏర్పాటు చేయనున్నారు. స్థానిక ప్రజలతో పాటు వివిధ ప్రాంతాల నుంచి వచ్చే పర్యాటకులకు ఆహ్లాదకరమైన అనుభూతిని అందించేలా ఈ కార్యక్రమాలను రూపొందిస్తున్నారు. పుదుచ్చేరిలోని వివిధ ప్రాంతాల్లో ఈ వేడుకలు నిర్వహించేందుకు ప్రణాళిక సిద్ధం చేశారు.

పుదుచ్చేరి దేశంలోని వివిధ రాష్ట్రాల ప్రజలను ఆకర్షిస్తున్న పర్యాటక ప్రాంతమని ముఖ్యమంత్రి ఎన్. రంగసామి తెలిపారు. సాంస్కృతిక కార్యక్రమాలు, వినోద వేడుకల ద్వారా పర్యాటకుల సంఖ్యను మరింత పెంచవచ్చని పేర్కొన్నారు. వివిధ ప్రాంతాల్లో కార్యక్రమాలు నిర్వహించడం వల్ల పర్యాటకుల రాక పెరిగి, పర్యాటక రంగం అభివృద్ధి చెందుతుందని ఆశాభావం వ్యక్తం చేశారు. పాండీ మెలాంజ్‌ 2027ను విజయవంతం చేసేందుకు ప్రభుత్వం పూర్తి సహకారం అందిస్తుందని నిర్వాహకులకు హామీ ఇచ్చారు. ప్రపంచవ్యాప్తంగా పర్యాటకులను ఆకర్షించి, పుదుచ్చేరిని ప్రముఖ అంతర్జాతీయ పర్యాటక కేంద్రంగా నిలబెట్టడమే లక్ష్యమని వెల్లడించారు.

INDIA Bloc Protest: సీజేఐ నో చెప్పినా ఆగని ఇండియా కూటమి నిరసనలు.. ఢిల్లీలో ఏం జరుగుతోంది?

Mahesh Rajamoni — Mon, 12 Oct 2026 12:22:22 +0530

INDIA Bloc Protest: దేశరాజధానిలో హై అలర్ట్ నెలకొంది. రాహుల్ గాంధీ నాయకత్వంలో ఢిల్లీలో ఇండియా కూటమి సుప్రీంకోర్టు మార్చ్ నేపథ్యంలో భారీ భద్రత ఏర్పాటు చేశారు. సీజేఐ అనుమతి నిరాకరించినా కాంగ్రెస్ నిరసనలు కొనసాగుతున్నాయి.

ఢిల్లీలో ఇండియా కూటమి నాయకులు సుప్రీంకోర్టు వరకు పెద్ద ఎత్తున మార్చ్ కు సిద్ధమయ్యారు. 24 అక్బర్ రోడ్ వద్ద ఉన్న కాంగ్రెస్ ప్రధాన కార్యాలయంలో దీనికి సంబంధించిన ఏర్పాట్లు చేశారు. ఈ మార్చ్‌లో పాల్గొనేందుకు ఉదయం నుంచే వివిధ రాష్ట్రాల నుంచి నాయకులు, కార్యకర్తలు కాంగ్రెస్ కార్యాలయానికి చేరుకుంటున్నారు.

అయితే, ఇండియా కూటమి నాయకులు, నేతలతో భేటీకి ప్రధాన న్యాయమూర్తి సూర్యకాంత్ నో చెప్పారు. విపక్షాలు లేవనెత్తాలనుకుంటున్న అంశాలు ఇప్పటికే సుప్రీంకోర్టులో విచారణలో ఉన్నందున ఈ నిర్ణయం తీసుకున్నట్లు సమాచారం. అయినప్పటికీ, ప్రజలు పెద్ద ఎత్తున ఈ మార్చ్‌లో పాల్గొనాలని కాంగ్రెస్ పిలుపునిచ్చింది.

ఇండియా కూటమి మార్చ్ దృష్ట్యా ఢిల్లీ వ్యాప్తంగా భద్రతను కట్టుదిట్టం చేశారు. ఢిల్లీ మెట్రో రెల్ కార్పొరేషన్ (DMRC) సోమవారం ఉదయం 6 గంటల నుంచి సాయంత్రం 4 గంటల వరకు ఆరు ముఖ్యమైన మెట్రో స్టేషన్ల ఎంట్రీ, ఎగ్జిట్ గేట్లను మూసివేసింది. పటేల్ చౌక్, జనపత్, రాజీవ్ చౌక్, మండి హౌస్, సెంట్రల్ సెక్రటేరియేట్, బరాఖంబా రోడ్ స్టేషన్లు ఇందులో ఉన్నాయి.

మరోవైపు, కన్నాట్ ప్లేస్, జంతర్ మంతర్, మండి హౌస్ పరిసర ప్రాంతాల్లో ఢిల్లీ పోలీసులతో పాటు ర్యాపిడ్ యాక్షన్ ఫోర్స్ (RAF), సీఆర్పీఎఫ్ (CRPF) బలగాలను భారీగా మోహరించారు. బారికేడ్లు ఏర్పాటు చేసి తనిఖీలు నిర్వహిస్తున్నారు. ప్రయాణికుల సౌలభ్యం కోసం ఢిల్లీ ట్రాఫిక్ పోలీసులు ప్రత్యేక అడ్వైజరీ జారీ చేశారు.

ఈ భారీ నిరసన ప్రదర్శనకు ముందు, లోక్‌సభలో ప్రతిపక్ష నాయకుడు రాహుల్ గాంధీ ప్రత్యేకంగా ప్రెస్ మీట్ నిర్వహించనున్నారు. ప్రజాస్వామ్యాన్ని పరిరక్షించేందుకు ప్రతి ఒక్కరూ 'చలో ఢిల్లీ' మార్చ్‌లో పాల్గొనాలని ఆయన ఆదివారం సోషల్ మీడియా నుంచి కోరారు.

మరోవైపు, కాంగ్రెస్ జాతీయ అధ్యక్షుడు మల్లికార్జున ఖర్గే మధ్యాహ్నం 1 గంటకు కాన్‌స్టిట్యూషన్ క్లబ్‌లో అందరూ సమావేశం కావాలని విజ్ఞప్తి చేశారు. ఆదివారం రాత్రే వివిధ రాష్ట్రాల నుంచి వచ్చిన నాయకులు, కార్యకర్తలు కర్ణాటక భవన్, హిమాచల్ భవన్, నేతల నివాసాలలో సమావేశమై వ్యూహాలు చర్చించారు.

ఈ నిరసనలో పాల్గొనేందుకు ఢిల్లీకి చేరుకున్న కర్ణాటక ముఖ్యమంత్రి డి.కె. శివకుమార్ మాట్లాడుతూ, ప్రజల గొంతును ఎట్టి పరిస్థితుల్లోనూ వినాల్సిందేనని స్పష్టం చేశారు. ప్రస్తుత పరిస్థితుల్లో సీజేఐని ఆశ్రయించడం మినహా తమకు వేరే మార్గం లేదని, దేశంలో ఓటు హక్కును కాపాడుకునేందుకు పోరాటం ఆగదని చెప్పారు.

హిమాచల్ ప్రదేశ్ ముఖ్యమంత్రి సుఖ్‌విందర్ సింగ్ మాట్లాడుతూ, గత రెండేళ్లుగా కాంగ్రెస్ ఈ అంశంపై గళం విప్పుతోందని, బీజేపీ ఓట్లను చోరీ చేసి అధికారాన్ని హస్తగతం చేసుకుంటోందని ఆరోపించారు. రాజ్యాంగ సంస్థలకు వినతిపత్రాలు సమర్పించనున్నట్లు తెలిపారు. హర్యానా మాజీ సీఎం భూపిందర్ సింగ్ హుడా మాట్లాడుతూ, ప్రధాన ఎన్నికల కమిషనర్ (CEC) జ్ఞానేష్ కుమార్ రాజీనామా చేసే వరకు ఈ ఆందోళనలు కొనసాగుతాయని స్పష్టం చేశారు.

మరోవైపు, కాక్రోచ్ జనత పార్టీ (CJP) నేతలు మాట్లాడుతూ.. జంతర్ మంతర్ వద్ద శాంతియుత నిరసన తెలిపేందుకు పోలీసుల అనుమతి కోరనున్నట్లు తెలిపారు. లేనిపక్షంలో మళ్లీ ఆందోళన చేపడతామని అల్టిమేటం జారీ చేశారు. అలాగే, జంతర్ మంతర్‌ వద్ద ప్రధాన ఎన్నికల కమిషనర్ జ్ఞానేష్ కుమార్ కు వ్యతిరేకంగా నిరసన తెలిపేందుకు అనుమతి నిరాకరించడాన్ని సవాల్ చేస్తూ ఇండియన్ యూత్ కాంగ్రెస్ ఢిల్లీ హైకోర్టులో పిటిషన్ దాఖలు చేసింది. జస్టిస్ అమిత్ మహాజన్ బెంచ్ ఈ పిటిషన్‌పై విచారణ జరపనుంది.

Delhi: ఇది మ‌నం కోరుకునే భార‌త్ కాదు.. రాహుల్ గాంధీ కీల‌క వ్యాఖ్య‌లు

Narender Vaitla — Sun, 11 Oct 2026 21:12:21 +0530

ప్రజల గొంతును అణచలేరు.. రాహుల్ గాంధీ వ్యాఖ్యలు

ప్రధాని నరేంద్ర మోదీ, కేంద్ర హోంమంత్రి అమిత్ షా, జాతీయ భద్రతా సలహాదారు అజిత్ డొభాల్, ఆర్ఎస్ఎస్ చీఫ్ మోహన్ భాగవత్‌లు ప్రజల గొంతును నొక్కలేరని రాహుల్ గాంధీ పేర్కొన్నారు. బెదిరింపులతో తమ పోరాటాన్ని ఆపలేరని స్పష్టం చేశారు. ప్రజాస్వామ్యంపై నమ్మకం ఉన్నవారు, రాజ్యాంగ విలువలను గౌరవించేవారు ఈ ఉద్యమంలో భాగస్వాములు కావాలని కోరారు. ఎన్నికల వ్యవస్థలో పారదర్శకత ఉండాలని, ఓటర్ల హక్కులకు రక్షణ కల్పించాలని డిమాండ్ చేశారు. ఈ అంశాలపై ప్రధాన న్యాయమూర్తికి వినతిపత్రం అందజేయనున్నట్లు తెలిపారు. రాజకీయ విభేదాలను పక్కనపెట్టి దేశ ప్రజలంతా ఐక్యంగా ముందుకు రావాల్సిన సమయమిదని పిలుపునిచ్చారు. ఈ క్రమంలోనే ఈ నెల 12న (సోమవారం) పార్టీలు, వర్గాలకు అతీతంగా దేశమంతా కలిసి సుప్రీంకోర్టు వరకు పాదయాత్ర నిర్వహించనున్నట్లు ప్రకటించారు.

పోలీసులు తమను బలవంతంగా తరలించారు.. సీజేపీ ప్రతినిధుల ఆరోపణ

దిల్లీలో జరిగిన పరిణామాలపై కాక్రోచ్ జనతా పార్టీ (సీజేపీ) ప్రతినిధి సౌరవ్ దాస్ తీవ్ర ఆరోపణలు చేశారు. పోలీసులు బలవంతంగా విమానంలోకి ప్రవేశించి తమను కిడ్నాప్ చేసినట్లు వ్యవహరించారని అన్నారు. తమను అదుపులోకి తీసుకునే సమయంలో ఎలాంటి నోటీసులు ఇవ్వలేదని, మొబైల్ ఫోన్లను స్వాధీనం చేసుకున్నారని ఆరోపించారు. న్యాయవాదిని సంప్రదించేందుకు కూడా అనుమతి ఇవ్వలేదని వెల్లడించారు. ఆదివారం విడుదలైన అనంతరం సీజేపీ ప్రతినిధులు దిల్లీలో మీడియాతో మాట్లాడారు. దేశంలో భయాందోళనలకు గురిచేసే వాతావరణం నెలకొందని సౌరవ్ దాస్ విమర్శించారు. ప్రధాన ఎన్నికల కమిషనర్ జ్ఞానేశ్ కుమార్‌ను కాపాడేందుకు ఇంతగా ప్రయత్నించడం వెనుక కారణమేంటని ప్రశ్నించారు. తమ ఉద్యమాన్ని ఎట్టి పరిస్థితుల్లోనూ విరమించబోమని స్పష్టం చేశారు.

ఎమర్జెన్సీ తరహా పరిస్థితులు.. సీజేపీ నేతల విమర్శలు

దిల్లీలో శనివారం చోటుచేసుకున్న పరిణామాలు గతంలో ఎమర్జెన్సీ సమయంలో నెలకొన్న పరిస్థితులను గుర్తుచేశాయని సీజేపీ నేత అశుతోష్ రాంకా వ్యాఖ్యానించారు. నిరసనలను అడ్డుకునే క్రమంలో రైలు రాకపోకలు, ఇంటర్నెట్ సేవలకు అంతరాయం కలిగించడంతో ప్రజలు ఇబ్బందులు ఎదుర్కొన్నారని ఆరోపించారు. ప్రజాస్వామ్యబద్ధంగా తమ అభ్యంతరాలను తెలియజేయాలనుకున్న వారిపై కఠినంగా వ్యవహరించడం సరైన పద్ధతి కాదని విమర్శించారు. జ్ఞానేశ్ కుమార్‌ను రక్షించేందుకు ప్రధాని మోదీ, అమిత్ షా ప్రయత్నిస్తున్నారని, ఈ క్రమంలో ప్రజలతోనే ఘర్షణకు దిగుతున్నారని ఆరోపించారు. ఎన్నికల వ్యవస్థపై తమకు ఉన్న అభ్యంతరాలను పరిష్కరించే వరకు పోరాటం కొనసాగిస్తామని సీజేపీ ప్రతినిధులు స్పష్టం చేశారు.

నిరసనలపై 20 కేసులు.. 15 మందికి పైగా పోలీసులకు గాయాలు

శనివారం దిల్లీలో జరిగిన ఆందోళనలకు సంబంధించి మొత్తం 20 కేసులు నమోదు చేసినట్లు పోలీసులు వెల్లడించారు. భద్రతా సిబ్బందిపై దాడి చేయడం, ప్రభుత్వ ఉద్యోగులు విధులు నిర్వర్తించకుండా అడ్డుకోవడం వంటి ఆరోపణలపై కేసులు నమోదయ్యాయని తెలిపారు. విద్యార్థులపై దాడి చేయడం, మహిళలను దుర్భాషలాడటం వంటి అభియోగాలకు సంబంధించి అదుపులోకి తీసుకున్న నలుగురిపై కూడా కేసులు నమోదు చేసినట్లు పేర్కొన్నారు. నిరసనల సమయంలో చోటుచేసుకున్న ఘటనల్లో 15 మందికి పైగా పోలీసు సిబ్బంది గాయపడినట్లు వెల్లడించారు.

Rahul Gandhi: సీఈసీకి మోదీ రక్షణ.. ఢిల్లీని జైలుగా మార్చేశారు.. రాహుల్ గాంధీ సంచలన వ్యాఖ్యలు

Mahesh Rajamoni — Mon, 12 Oct 2026 12:55:46 +0530

Rahul Gandhi: సీఈసీ జ్ఞానేష్ కుమార్‌ను ప్రధాని మోదీ కాపాడుతున్నారని రాహుల్ గాంధీ ఆరోపించారు. దేశరాజధాని ఢిల్లీని జైలుగా మార్చేసింది ఎవరు? అంటూ ప్రశ్నించారు. ఇండియా కూటమి సుప్రీంకోర్టు వైపు మార్చ్‌కు సిద్ధమైందనీ, ఇందులో పాల్గొనాలని పిలుపునిచ్చారు.

దేశ రాజధాని ఢిల్లీలో రాజకీయ వేడి తీవ్రస్థాయికి చేరింది. చీఫ్ ఎలక్షన్ కమీషనర్ (సీఈసీ) జ్ఞానేష్ కుమార్‌పై విపక్షాలు చేపడుతున్న నిరసనలు మరింత ఉధృతమయ్యాయి. లోక్‌సభ ప్రతిపక్ష నేత రాహుల్ గాంధీ ఢిల్లీలోని ఏఐసీసీ హెడ్‌క్వార్టర్స్‌లో మీడియా సమావేశం ఏర్పాటు చేసి కేంద్ర ప్రభుత్వంపై విరుచుకుపడ్డారు. దేశ రాజధానిని కేంద్ర ప్రభుత్వం ఒక జైలుగా మార్చేసిందని, ప్రజలు ఢిల్లీకి రాకుండా బస్సులు, రైళ్లను నిలిపివేస్తున్నారని మండిపడ్డారు. సీఈసీ జ్ఞానేష్ కుమార్‌ను ప్రధాని నరేంద్ర మోదీ నేరుగా రక్షిస్తున్నారని రాహుల్ గాంధీ ఆరోపించారు.

ఈ నిరసనల నేపథ్యంలో ఢిల్లీ మెట్రో రైల్ కార్పొరేషన్ (DMRC) కీలక నిర్ణయం తీసుకుంది. సోమవారం ఉదయం 6 గంటల నుంచి సాయంత్రం 4 గంటల వరకు ఆరు ప్రధాన మెట్రో స్టేషన్లలో ఎంట్రీ, ఎగ్జిట్ ద్వారాలను మూసివేస్తున్నట్లు వెల్లడించింది. అలాగే ముంబైలోని దాదర్, శివాజీ పార్క్ సమీపంలో నిరసన తెలిపేందుకు సిద్ధమైన పలువురు ఆందోళనకారులను ముంబై పోలీసులు అదుపులోకి తీసుకున్నారు.

ప్రెస్ కాన్ఫరెన్స్‌లో రాహుల్ గాంధీ మాట్లాడుతూ కేంద్రంపై తీవ్రస్థాయిలో ధ్వజమెత్తారు. "మేము కొన్ని రోజులుగా నిరసన తెలుపుతున్నాం. కానీ ఢిల్లీ నగరాన్ని ఎందుకు బంధించారు? సీఈసీ జ్ఞానేష్ కుమార్‌ను కాపాడేందుకు ప్రభుత్వం సుమారు 30,000 మంది పోలీసులను మోహరించింది. ఇది ప్రభుత్వం చేస్తున్న పెద్ద తప్పు. జ్ఞానేష్ కుమార్‌ను ప్రభుత్వం ఎలా కాపాడుతుందో దేశ ప్రజలందరికీ చూపించాలనుకుంటున్నాం. ఎంత రక్షించినా చివరికి ఈ వ్యవహారాన్ని నడిపిస్తున్న అసలు హ్యాండ్లర్ వద్దకే మేము వెళ్తాం" అని వ్యాఖ్యానించారు.

అలాగే ప్రభుత్వం వద్ద పనిచేస్తున్న 200 మందికి పైగా అధికారులు తమతో నిరంతరం టచ్‌లో ఉన్నారని, నిమిషానికో సమాచారం ఇస్తున్నారని రాహుల్ సంచలన వ్యాఖ్యలు చేశారు. న్యాయం జరిగే వరకు, ఎలక్షన్ సిస్టమ్‌లో మార్పులు వచ్చే వరకు తమ పోరాటం ఆగేదే లేదని స్పష్టం చేశారు.

పోలీసు బలగాల మోహరింపుపై స్పందిస్తూ, "పోలీసులు కూడా ఈ పరిస్థితితో విసిగిపోయారు. ఒక దొంగను, దేశద్రోహులను తాము ఎందుకు కాపాడుతున్నామో అని వారి మనస్సులోనే సందేహాలు వస్తున్నాయి. పోలీసు శాఖలో ఉన్న 50 శాతం మంది సిబ్బంది విపక్షాలు చేస్తున్న పోరాటం సరైనదే అని అంగీకరిస్తున్నారు" అని రాహుల్ పేర్కొన్నారు. బిజెపి, ఆర్ఎస్ఎస్ వాళ్లు మహిళలను, యువకులను తీవ్రంగా వేధిస్తున్నారని ఆయన విమర్శించారు.

గతంలో ఎలక్షన్ కమిషన్ ఆఫీస్‌కు వెళ్తే పోలీసులు తమను బస్సుల్లో పడేసి జంతర్ మంతర్ వద్దకు పంపారని, అక్కడ కూర్చుంటే లాఠీఛార్జ్ చేశారని, రాజ్‌ఘాట్ వద్ద కూడా కొట్టారని రాహుల్ గుర్తుచేశారు. ఈ భయాందోళనలకు లొంగిపోయేది లేదని, ఎంత సమయం పట్టినా పోరాటం కొనసాగిస్తామని చెప్పారు.

ఇండియా కూటమి నేతలు సుప్రీంకోర్టు వైపు మార్చ్ నిర్వహించేందుకు పిలుపునిచ్చారు. కాంగ్రెస్ అధ్యక్షుడు మల్లికార్జున ఖర్గే విపక్ష ఎంపీలందరినీ కాన్స్టిట్యూషన్ క్లబ్‌లో సమావేశమవ్వాలని సూచించారు. ఈ నేపథ్యంలో విపక్ష నేత రాహుల్ గాంధీ, ఖర్గే కలిసి సీజేఐ జస్టిస్ సూర్య కాంత్‌ను కలవడానికి సమయం కోరారు. అయితే, ప్రొటెస్ట్‌కు సంబంధించి ఇప్పటికే సుప్రీంకోర్టులో కేసులు విచారణలో ఉన్నందున, అలాగే పాలనాపరమైన అంశాల్లో కోర్టు నేరుగా జోక్యం చేసుకోలేదని స్పష్టం చేస్తూ సీజేఐ ఈ భేటీని నిరాకరించారు.

దీనిపై రాహుల్ గాంధీ స్పందిస్తూ, సీజేఐ సూచనల మేరకు తాము సుప్రీంకోర్టులో పిటిషన్ దాఖలు చేయనున్నట్లు తెలిపారు. ప్రజాస్వామ్యం, రాజ్యాంగాన్ని కాపాడుకోవడానికి ఎంత దూరమైనా వెళ్తామని చెప్పారు.

ఢిల్లీలో జరుగుతున్న సీఈసీ నిరసనలు, ట్రాఫిక్ ఆంక్షలు, 45 మెట్రో స్టేషన్ల మూసివేతపై విలేకరులు అడిగిన ప్రశ్నలకు సీజేఐ జస్టిస్ సూర్య కాంత్ స్పందించారు. జాతీయ మానవ హక్కుల కమిషన్ (NHRC) 33వ వార్షికోత్సవ కార్యక్రమంలో పాల్గొన్న ఆయన, "యే మేరా ముద్దా నహీ హై" (ఇది నా పరిధిలోని అంశం కాదు) అని వ్యాఖ్యానించారు. శాంతియుత నిరసనలు, ప్రజల హక్కులకు సంబంధించి గత కొన్ని రోజులుగా ఢిల్లీ కంటోన్మెంట్‌గా మారిన సంగతి తెలిసిందే.

గతంలో అక్టోబర్ 10న కాక్‌రోచ్ జనతా పార్టీ (CJP) చేపట్టిన నిరసనల సమయంలోనే ప్రభుత్వం తీవ్ర ఆంక్షలు విధించింది. అప్పట్లో సిజెపి నాయకులు అభిజీత్ దిప్కే, అశుతోష్ రాంకా, సౌరవ్ దాస్‌లను విమానం దిగగానే పోలీసులు అరెస్ట్ చేశారు. ఇప్పుడు లోక్‌సభ ప్రతిపక్ష నేత రాహుల్ గాంధీ స్వయంగా రంగంలోకి దిగి 'చలో ఢిల్లీ మార్చ్ ఫర్ డెమోక్రసీ' పిలుపునివ్వడంతో రాజధాని సరిహద్దుల్లో తనిఖీలను తీవ్రతరం చేశారు. సీఈసీ రాజీనామా చేసే వరకు ఈ పోరాటం ఆగేది లేదని విపక్షాలు స్పష్టం చేస్తున్నాయి.

Delhi Protest : సుప్రీంకోర్టుకు ఇండియా కూటమి మార్చ్.. రాహుల్, ప్రియాంకను అడ్డుకున్న పోలీసులు, ఉద్రిక్తత

Arun Kumar P — Mon, 12 Oct 2026 17:54:56 +0530

భారతదేశ ప్రధాన ఎన్నికల కమిషనర్ జ్ఞానేష్ కుమార్ రాజీనామా చేయాలని… SIR (సర్) పేరిట జరుగుతున్న ఓట్ల చోరీని ఆపాలని డిమాండ్ చేస్తు ఇండి కూటమి సుప్రీంకోర్టుకు మార్చ్ చేపట్టింది. ఇవాళ (అక్టోబర్ 12) మధ్యాహ్నం 2 గంటల ప్రాంతంలో కాన్‌స్టిట్యూషన్ క్లబ్ నుంచి బస్సులో బయలుదేరిన ఇండి కూటమి నేతలు.. బారాఖంబా జంక్షన్ దగ్గర దిగి అక్కడి నుంచి సుప్రీంకోర్టు వైపు నడక ప్రారంభించారు.

లోక్‌సభ ప్రతిపక్ష నేత రాహుల్ గాంధీ, ఎంపీ ప్రియాంక గాంధీ, విద్యార్థి నాయకురాలు నేహా బోరా తదితరులు ఈ నిరసనలో ముందు వరుసలో ఉన్నారు. కాంగ్రెస్ అధ్యక్షుడు మల్లికార్జున్ ఖర్గే, కర్ణాటక సీఎం డీకే శివకుమార్, తెలంగాణ సీఎం రేవంత్ రెడ్డి, సీపీఎం జనరల్ సెక్రటరీ ఎంఏ బేబీలతో పాటు ఇండి కూటమిలోని పార్టీల తరపున అఖిలేష్ యాదవ్, తేజస్వి యాదవ్, యోగేంద్ర యాదవ్ లాంటి కీలక నేతలు ఈ మార్చ్‌లో పాల్గొన్నారు. నేతలతో పాటు భారీ సంఖ్యలో కార్యకర్తలు కూడా సుప్రీంకోర్టు పరిసరాలకు చేరుకుంటున్నారు… దీంతో ఉద్రిక్త పరిస్థితులు నెలకొన్నాయి.

అయితే కాంగ్రెస్ నాయకులు, కార్యకర్తలు సుప్రీంకోర్టు వైపు దూసుకెళ్లకుండా పొలీసులు ముందస్తుగానే భారీ బందోబస్తు చేపట్టారు. ఈ క్రమంలో భారీబంఖా జంక్షన్ నుండి సుప్రీంకోర్టువైపు వెళుతున్న ఇండి కూటమి ర్యాలీని భగవాన్ దాస్ రోడ్డు వద్ద పోలీసులు అడ్డుకున్నారు. ముందుగానే ఏర్పాటుచేసిన బారీకేడ్లను అడ్డుపెట్టారు… దీంతోో కాంగ్రెస్ శ్రేణులు, పోలీసుల మధ్య తోపులాట జరిగింది. కొందరు నాయకులు బారీకేడ్ల పైకెక్కి నినాదాలు చేశారు.

సుప్రీంకోర్టులో ఇండి కూటమి పిటిషన్

సుప్రీంకోర్టు ప్రధాన న్యాయమూర్తిని (సీజేఐ) నేరుగా కలిసి వినతిపత్రం ఇవ్వాలని ఇండియా కూటమి భావించింది. అయితే పోలీసులు ఈ ర్యాలీని అడ్డుకోవడంతో కోర్టు వద్దకు చేరుకోలేని పరిస్థితి నెలకొంది... దీంతో తమ లాయర్లతో పిటిషన్ వేయించింది కాంగ్రెస్. సుప్రీంకోర్టు వెబ్ సైట్ లో కూడా ఈ పిటిషన్ గురించి పేర్కొన్నారు.

రాజ్యాంగాన్ని కాపాడుకునేందుకు దేశంలోని యువత, పౌర హక్కుల సంఘాలు, ప్రతిపక్ష పార్టీలు.. రాజకీయాలు, కుల, మతాలకు అతీతంగా తమతో కలిసి రోడ్లపైకి వచ్చిందని రాహుల్ గాంధీ పేర్కొన్నారు. శాంతియుతంగా నిరసన తెలుపుతున్న యువతపై పోలీసులు, బీజేపీ గుండాలు దారుణంగా దాడులకు పాల్పడ్డారని… దీన్ని అస్సలు సహించబోమని రాహుల్ గాంధీ మండిపడ్డారు.

అనుమతి నిరాకరించిన సీజేఐ

చట్టప్రకారం సుప్రీంకోర్టును ఆశ్రయిస్తే ఏ ఫిర్యాదునైనా విచారించేందుకు సిద్ధంగా ఉన్నామని స్పష్టం చేశారు సీజేఐ జస్టిన్ సూర్యకాంత్. ర్యాాలీగా సుప్రీంకోర్టుకు వచ్చిన ప్రతిపక్ష నేతలను కలిసేందుకు మాత్రం ఆయన నిరాకరించారు. కోర్టు విచారణలో ఉన్న అంశంపై ప్రతిపక్ష నేతలను ప్రత్యేకంగా కలిసి వినతిపత్రం తీసుకోవడం సరికాదని ఆయన అభిప్రాయపడ్డారు.

గతవారం ఇండియా కూటమి ఆధ్వర్యంలో ఢిల్లీలో నాలుగు మార్చ్‌లు జరిగాయి. శుక్రవారం నాడు రాష్ట్రపతిని కలిసి ఇండియా కూటమి నేతలు వినతిపత్రం సమర్పించారు. పార్లమెంట్‌లో జరిగిన ప్రతిపక్షాల సమావేశంలోనే సుప్రీంకోర్టును ఆశ్రయించాలని నిర్ణయం తీసుకున్నారు. సీజేఐకి వినతిపత్రం ఇవ్వాలనే ప్రతిపాదనను మమతా బెనర్జీ తెరపైకి తెచ్చినట్లు తెలుస్తోంది.

అయితే ఎస్ఐఆర్ పిటిషన్ల వంటి అంశాలను కోర్టు విచారిస్తున్న సమయంలో.. ఇలాంటి అసాధారణ భేటీకి కోర్టు ఒప్పుకుంటుందా అని కూటమిలోని కొందరు నేతలు అనుమానం వ్యక్తం చేశారు. సీజేఐతో భేటీ కావడం చరిత్రలో ఇదే తొలిసారి అని మల్లికార్జున్ ఖర్గే లాంటి నేతలు వ్యాఖ్యానించారు. కానీ నాలుగు కారణాలను చూపుతూ సీజేఐ నిన్న రాత్రి ఈ భేటీకి అనుమతి నిరాకరించారు.

ప్రతిపక్షాలు లేవనెత్తాలనుకుంటున్న అంశాలను తాను కూడా ఉన్న ధర్మాసనం విచారిస్తోందని సీజేఐ సూర్యకాంత్ స్పష్టం చేశారు. కాబట్టి నేతలను ప్రత్యేకంగా కలవడం కరెక్ట్ కాదన్నారు. పరిపాలనాపరంగా తీసుకోవాల్సిన నిర్ణయాలను తనకు చెప్పడం వల్ల ఎలాంటి ఉపయోగం ఉండదని తేల్చిచెప్పారు. రాజ్యాంగంలోని ఆర్టికల్ 32 ప్రకారం సుప్రీంకోర్టును ఆశ్రయించే హక్కు ప్రతిపక్షాలకు ఉందని, వారు పిటిషన్ వేస్తే వీలైనంత త్వరగా దాన్ని లిస్ట్ చేస్తామని సీజేఐ వివరించారు. ప్రాథమిక హక్కులను కాపాడేందుకు సుప్రీంకోర్టు తలుపులు ఎప్పుడూ తెరిచే ఉంటాయని ఆయన స్పష్టం చేశారు.

శనివారం ఏం జరగనుంది.? లాక్‌డౌన్‌ త‌ర‌హా నిబంధ‌న‌లు ఎందుకు విధించారు.?

Narender Vaitla — Fri, 09 Oct 2026 20:25:50 +0530

Delhi: ప్రధాన ఎన్నికల కమిషనర్ (CEC) జ్ఞానేష్ కుమార్ రాజీనామా చేయాలని డిమాండ్ చేస్తూ కాక్రోచ్ జనతా పార్టీ (CJP) జంతర్ మంతర్ వద్ద అక్టోబ‌ర్ 10న‌ నిరసనకు పిలుపునిచ్చింది. ఈ నేప‌థ్యంలో భద్రతను కట్టుదిట్టం చేయ‌డం దేశ‌వ్యాప్తంగా చ‌ర్చ‌నీయాంశంగా మారింది.

ప్రధాన ఎన్నికల కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ కాక్రోచ్ జనతా పార్టీ (CJP) అక్టోబర్ 10న జంతర్ మంతర్ వద్ద నిరసనకు పిలుపునిచ్చింది. ఓటర్ల జాబితా సవరణ ప్రక్రియలో అక్రమాలు జరిగాయన్న ఆరోపణల నేపథ్యంలో ఈ ఆందోళన చేపడుతున్నట్లు ప్ర‌క‌టించారు. ఈ కార్యక్రమానికి ఇతర సంఘాలు, విద్యార్థి సంఘాలు కూడా మద్ధతు తెలిపే అవకాశం ఉండటంతో పోలీసులు భద్రతపై ప్రత్యేక దృష్టి పెట్టారు.

నిరసనల నేపథ్యంలో ఢిల్లీ మెట్రో రైల్ కార్పొరేషన్ (DMRC) కీలక నిర్ణయం తీసుకుంది. అక్టోబర్ 9 రాత్రి 9 గంటల నుంచి 57 మెట్రో స్టేషన్ల ఎంట్రీ, ఎగ్జిట్ ద్వారాలను మూసివేస్తున్నట్లు ప్రకటించింది. పరిస్థితులు సాధారణ స్థితికి వచ్చే వరకు ఈ ఆంక్షలు కొనసాగవచ్చని తెలిపింది. రాజీవ్ చౌక్, సెంట్రల్ సెక్రటేరియట్, పటేల్ చౌక్, జనపథ్, ఐటీఓ, కాశ్మీర్ గేట్ వంటి కీలక స్టేషన్లపై ఈ నిర్ణయం ప్రభావం చూపనుంది. కొన్ని స్టేషన్లలో రైళ్ల మార్పిడి సదుపాయాలు అందుబాటులో ఉండనున్నాయి. అయితే, న్యూఢిల్లీ మెట్రో స్టేషన్‌కు సంబంధించి ప్రత్యేక ఆంక్షలు ఉంటాయని అధికారులు వెల్లడించారు.

నిరసనల ప్రభావం సెంట్రల్ ఢిల్లీలోని వ్యాపార ప్రాంతాలపైనా పడనుంది. ముఖ్యంగా కనాట్ ప్లేస్ పరిసరాల్లో దుకాణాలు, రెస్టారెంట్లు, ప్రభుత్వ, ప్రైవేట్ కార్యాలయాల కార్యకలాపాలపై ఆంక్షలు విధించినట్లు స‌మాచారం. మరోవైపు, నిరసనకారులు పెద్ద సంఖ్యలో తరలివచ్చే అవకాశం ఉండటంతో ప్రధాన రహదారులపై బారికేడ్లు ఏర్పాటు చేసి తనిఖీలు చేపట్టారు. కొన్ని రైళ్ల రాకపోకలను కూడా రద్దు చేయడం లేదా నియంత్రించడం వల్ల ఢిల్లీకి వెళ్లే ప్రయాణికులు తమ ప్రయాణ వివరాలను ముందుగానే పరిశీలించుకోవాల్సిన పరిస్థితి ఏర్పడింది. అయితే, దేశ రాజధాని మొత్తం పూర్తిగా బంద్ అవుతుందని అధికారిక ప్రకటన వెలువడలేదు.

భద్రతా చర్యల్లో భాగంగా సెంట్రల్ ఢిల్లీలోని నిర్దిష్ట ప్రాంతంలో మొబైల్ ఇంటర్నెట్ సేవలను నిలిపివేయాలని అధికారులు ఆదేశించారు. అక్టోబర్ 9 రాత్రి 10 గంటల నుంచి 24 గంటల పాటు, జనపథ్‌–కర్తవ్య పథ్ కూడలిని కేంద్రంగా చేసుకుని నాలుగు కిలోమీటర్ల పరిధిలో ఈ ఆంక్షలు అమల్లో ఉండనున్నట్లు తెలుస్తోంది. నిరసనల సమయంలో అవాంఛనీయ ఘటనలు జరగకుండా ముందస్తు చర్యల్లో భాగంగా ఈ నిర్ణయం తీసుకున్నట్లు సమాచారం. ఈ ఆంక్షలు ఢిల్లీ మొత్తం కాకుండా నిర్దిష్ట పరిధిలో అమలు కానున్నాయి.

భారీగా పోలీసు బలగాల మోహరింపు..

నిరసనల సందర్భంగా శాంతిభద్రతల సమస్యలు తలెత్తకుండా ఢిల్లీలో భారీగా పోలీసు, పారామిలిటరీ బలగాలను మోహరించినట్లు సమాచారం. జంతర్ మంతర్, న్యూఢిల్లీ జిల్లాలోని కీలక ప్రాంతాలతో పాటు నగర సరిహద్దుల వద్ద కూడా భద్రతను పెంచారు. రైల్వే స్టేషన్ల వద్ద తనిఖీలు, రాకపోకల నియంత్రణ చర్యలు చేపట్టారు.

CJP Protest: ఢిల్లీ నిరసనల నేపథ్యంలో.. కేంద్రానికి సుప్రీం కోర్టు కీలక ఆదేశాలు

Narender Vaitla — Sun, 11 Oct 2026 14:04:18 +0530

నిరసనలతో ఢిల్లీలో ఆంక్షలు

ప్రధాన ఎన్నికల కమిషనర్‌కు సంబంధించిన డిమాండ్లతో సీజీపీ ఆధ్వర్యంలో జంతర్‌మంతర్ వద్ద నిరసనలకు పిలుపునివ్వడంతో ఢిల్లీలో భద్రతా చర్యలను అధికారులు కట్టుదిట్టం చేశారు. పలుచోట్ల బారికేడ్లు ఏర్పాటు చేయడంతో పాటు కొన్ని మెట్రో స్టేషన్లను మూసివేసినట్లు సమాచారం. రాజధానికి వచ్చే రైళ్ల రాకపోకలపైనా ఆంక్షలు విధించినట్లు వార్తలు వెలువడ్డాయి. నిరసనల్లో పాల్గొన్న వారిని అదుపులోకి తీసుకున్నారన్న ఆరోపణలు కూడా తెరపైకి వచ్చాయి. దీంతో ప్రజా రవాణా, ఇంటర్నెట్ సేవలపై ఆంక్షలను సవాల్ చేస్తూ సుప్రీంకోర్టులో పిటిషన్లు దాఖలయ్యాయి.

సెలవు రోజున ప్రత్యేక విచారణ

ఈ పిటిషన్ల ప్రాధాన్యాన్ని దృష్టిలో ఉంచుకుని ఆదివారం సెలవు రోజైనప్పటికీ సుప్రీంకోర్టు ప్రత్యేకంగా విచారణ చేపట్టింది. జస్టిస్ జాయ్‌మాల్య బాగ్చి, జస్టిస్ వి. మోహన్‌లతో కూడిన ధర్మాసనం ఇరుపక్షాల వాదనలను పరిశీలించింది. ప్రజల స్వేచ్ఛాయుత రాకపోకలు, శాంతియుత నిరసనల హక్కు, శాంతిభద్రతల పరిరక్షణ మధ్య సమతుల్యత ఉండాలని ఈ సందర్భంగా న్యాయస్థానం స్పష్టం చేసింది. ప్రభుత్వ అధికారులు ఏ చర్య తీసుకున్నా అది చట్టానికి అనుగుణంగా ఉండాలని పేర్కొంది. ప్రజలకు ఇబ్బందులు కలిగించే ఆంక్షలను అవసరానికి మించి కొనసాగించకూడదని సూచించింది.

మెట్రో, రైలు సేవలపై స్పష్టమైన ఆదేశాలు

ఢిల్లీలో ప్రజా రవాణా వ్యవస్థ సాధారణంగా పనిచేసేలా చూడాలని సుప్రీంకోర్టు ఆదేశించింది. మెట్రో రైళ్లు, రైల్వే సేవలను నిలిపివేయడం వల్ల సామాన్య ప్రజలు, ఉద్యోగులు, ప్రయాణికులు ఇబ్బందులు ఎదుర్కోవాల్సి వస్తుందని పేర్కొంది. అందువల్ల చట్టబద్ధమైన, అత్యవసరమైన కారణాలు ఉన్నప్పుడే పరిమితులు విధించాలని సూచించింది. నగరంలో ప్రజలు, వాహనాలు సాఫీగా ప్రయాణించేలా చర్యలు తీసుకోవాలని అధికారులకు తెలిపింది. ట్రాఫిక్ నియంత్రణ, శాంతిభద్రతల అవసరాలను అంచనా వేసి బారికేడ్ల ఏర్పాటు కొనసాగించాలా? తొలగించాలా? అనే అంశాన్ని సమీక్షించాలని ఆదేశించింది.

ఇంటర్నెట్ నిలిపివేతపై స్పందించిన‌ న్యాయస్థానం

ప్రజల రోజువారీ అవసరాలు, సమాచార మార్పిడి, అత్యవసర సేవలకు ఇంటర్నెట్ కీలకంగా మారిన నేపథ్యంలో దాని వినియోగంపై అనవసర ఆంక్షలు విధించకూడదని ధర్మాసనం స్పష్టం చేసింది. చట్టంలో నిర్దేశించిన విధానాలను అనుసరించకుండా ఇంటర్నెట్ సేవలను నిలిపివేయడం సరికాదని పేర్కొంది. తీవ్రమైన శాంతిభద్రతల సమస్యలు తలెత్తినప్పుడు వర్తించే చట్టపరమైన నిబంధనలకు అనుగుణంగానే అధికారులు నిర్ణయాలు తీసుకోవాలని సూచించింది. మరోవైపు, నిర్దిష్ట ప్రాంతాల్లో చట్టబద్ధంగా ఆంక్షలు అమల్లో ఉన్న సందర్భాలను మినహాయించి, శాంతియుతంగా సమావేశమయ్యే వారిని అక్రమంగా నిర్బంధించకూడదని స్పష్టం చేసింది. భారతీయ నాగరిక్ సురక్ష సంహిత (BNSS) సెక్షన్ 163 కింద విధించే ఆంక్షలు కూడా చట్టపరమైన ప్రమాణాలకు లోబడి ఉండాలని పేర్కొంది.

కేంద్రం వివరణ.. తదుపరి విచారణ మంగళవారానికి

విచారణ సందర్భంగా కేంద్ర ప్రభుత్వం తన వాదనలను ధర్మాసనం ముందు ఉంచింది. ఢిల్లీలో ఇంటర్నెట్ సేవలను ఇప్పటికే పునరుద్ధరించామని, మెట్రో కార్యకలాపాలు కూడా సాధారణ స్థితికి చేరుకున్నాయని కోర్టుకు తెలిపింది. అయితే, మెట్రో స్టేషన్ల మూసివేత, ప్రజా రవాణాపై విధించిన ఆంక్షలకు సంబంధించి వ్యక్తమైన ఆందోళనలను ధర్మాసనం పరిగణనలోకి తీసుకుంది. ఈ అంశాలపై మరిన్ని వివరాలు సమర్పించాలని కోరింది. తదుపరి విచారణను మంగళవారానికి వాయిదా వేసింది.

PM Kisan: పీఎం కిసాన్ 24వ విడత డబ్బులు.. దీపావళికి ముందు గుడ్ న్యూస్.. వెంటనే ఇలా చేయండి

Mahesh Rajamoni — Thu, 22 Oct 2026 08:05:53 +0530

PM Kisan 24th Installment : పీఎం కిసాన్ 24వ విడత కోసం ఎదురుచూస్తున్న రైతులకు గుడ్‌న్యూస్. దీపావళిలోపు డబ్బులు పడే ఛాన్స్ ఉంది. లేటెస్ట్ స్టేటస్ ఇలా చెక్ చేసుకోండి.

దేశంలోని అన్నదాతలు ఇప్పుడు ప్రధాన మంత్రి కిసాన్ సమ్మాన్ నిధి 24వ విడత డబ్బుల కోసం ఎదురుచూస్తున్నారు. సరైన వర్షాల్లేక ఇబ్బందుల్లో ఉన్న కోట్లాది మంది రైతులు ఈ ఆర్థిక సహాయం ఎప్పుడు అందుతుందా అని చూస్తున్నారు. దసరా పండగ అయిపోయింది. ఇప్పుడు దీపావళి పండగ కూడా దగ్గరకు వస్తోంది. అయినా సరే, కేంద్ర వ్యవసాయ మంత్రిత్వ శాఖ నుంచి ఇప్పటివరకు 24వ విడత విడుదల తేదీకి సంబంధించి ఎలాంటి అధికారిక ప్రకటన రాలేదు.

సాధారణంగా కేంద్ర వ్యవసాయ శాఖ తమ అధికారిక వెబ్‌సైట్ ద్వారా అలాగే సోషల్ మీడియాల ద్వారా ఈ నిధుల విడుదల తేదీని ప్రకటిస్తుంది. అంతేకాకుండా, పీఎం కిసాన్ యోజన కోసం ప్రత్యేకంగా కొన్ని సోషల్ మీడియా హ్యాండిల్స్‌ను కూడా ఏర్పాటు చేశారు. వాటి ద్వారా ఎప్పటికప్పుడు తాజా సమాచారాన్ని షేర్ చేస్తుంటారు. వస్తున్న కొన్ని రిపోర్టుల ప్రకారం చూస్తే, రాబోయే కొన్ని రోజుల్లోనే దీనిపై క్లారిటీ వచ్చే అవకాశం ఉందని తెలుస్తోంది.

ఈ ఏడాది దీపావళి పండుగ నవంబర్ 8వ తేదీన రానుంది. ఈ నేపథ్యంలో పండుగకు ముందే రైతుల అకౌంట్లలోకి ఈ 24వ విడత డబ్బులు జమ కావొచ్చని గట్టి అంచనాలు ఉన్నాయి. అయితే, గత సంవత్సరంతో పోలిస్తే సీన్ కొద్దిగా మారవచ్చు. గతేడాది దీపావళి అక్టోబర్ 20న వస్తే, పీఎం కిసాన్ డబ్బులు మాత్రం నవంబర్ 19న విడుదల అయ్యాయి. ఆ సమయంలో ప్రధాని నరేంద్ర మోదీ తమిళనాడులోని కోయంబత్తూరు నుంచి ఈ నిధులను రైతుల ఖాతాలకు విడుదల చేశారు.

మీ ఖాతాలో డబ్బులు పడతాయో లేదో తెలుసుకోవడానికి స్టేటస్ చెక్ చేసుకోవడం చాలా ముఖ్యం. దీనికోసం మీరు కొన్ని సింపుల్ స్టెప్స్ ఫాలో అయితే సరిపోతుంది.

• ముందుగా పీఎం కిసాన్ అధికారిక వెబ్‌సైట్ అయిన pmkisan.gov.in ఓపెన్ చేయాలి.

• ఆ తర్వాత హోమ్‌పేజీలో కనిపించే 'Know your status' ఆప్షన్‌పై క్లిక్ చేయాలి.

• ఆ పేజీలోకి వెళ్లిన తర్వాత మీ రిజిస్ట్రేషన్ నంబర్, అక్కడ కనిపించే సెక్యూరిటీ కోడ్ ఎంటర్ చేయాలి.

• ఆ తర్వాత మీ రిజిస్టర్డ్ మొబైల్ నంబర్‌కు ఒక ఓటీపీ వస్తుంది. ఆ నంబర్‌ను అక్కడ ఎంటర్ చేయాలి.

• చివరగా మీ స్క్రీన్‌పై ఒక కొత్త పేజీ ఓపెన్ అవుతుంది. అందులో మీ విడత డబ్బులకు సంబంధించిన పూర్తి వివరాలు స్పష్టంగా కనిపిస్తాయి.

ప్రభుత్వం నుంచి త్వరలోనే దీనిపై అఫిషియల్ డేట్ రానుందని విశ్లేషకులు చెబుతున్నారు. ఎవరైతే ఈకేవైసీ, భూమికి సంబంధించిన వెరిఫికేషన్ ప్రక్రియ పూర్తి చేసుకున్నారో, ఆ రైతుల ఖాతాల్లోనే డబ్బులు జమ అవుతాయి. ఒకవేళ మీ స్టేటస్‌లో ఏవైనా సమస్యలు ఉంటే వెంటనే సరిచేసుకోవడం మంచిది. దీపావళికి ముందే అన్నదాతల జేబుల్లో డబ్బులు పడితే పండుగ సంబరాలు మరింత ఘనంగా జరుగుతాయని అందరూ ఆశిస్తున్నారు.

అప్ప‌టి వరకు నిరసనలు వద్దు.. కుటుంబాలతో గ‌డ‌పండి: అభిజీత్ దీప్కే

Narender Vaitla — Tue, 20 Oct 2026 21:21:47 +0530

కుటుంబ సభ్యులతో సమయం గడపండి

CJP మద్దతుదారులను అభిజీత్ దీప్కే 'కాక్రోచెస్' (బొద్దింకలు) అని పిలుస్తుంటారు. వారిని ఉద్దేశించి ఆయన ఓ వీడియో సందేశం విడుదల చేశారు. గత కొన్ని రోజులుగా జరిగిన పరిణామాలతో వారి కుటుంబ సభ్యులు ఆందోళన చెందుతున్నారని తెలిపారు. అందుకే కొద్ది రోజుల పాటు నిరసనలకు దూరంగా ఉండి, కుటుంబ సభ్యులతో కలిసి పండుగలు జరుపుకోవాలని సూచించారు. కుటుంబ సభ్యులతో ఉండాలని, తమను ప్రేమించే వారితో సమయం గడపాలని కోరారు. తన తల్లిదండ్రులతో పాటు CJP నాయకులు సౌరవ్ దాస్, ఆశుతోష్ రంకా తల్లిదండ్రులు కూడా ఆందోళన చెందుతున్నారని దీప్కే పేర్కొన్నారు.

ఎన్నికల సంఘం ప్రధాన అధికారికి వ్యతిరేకంగా నిరసనలు

ఓటర్ల జాబితా ప్రత్యేక సమగ్ర సవరణ (SIR) అంశంపై ప్రధాన ఎన్నికల కమిషనర్ జ్ఞానేశ్ కుమార్‌కు వ్యతిరేకంగా CJP, ప్రతిపక్ష పార్టీల నేతలు ఢిల్లీలో నిరసనలు చేప‌ట్టిన విష‌యం తెలిసిందే. ఈ క్రమంలో పోలీసులు నిరసనకారులపై చర్యలు తీసుకున్నారు. గత కొన్ని రోజులుగా చోటుచేసుకున్న ఈ పరిణామాలను ప్రస్తావిస్తూ దీప్కే తన మద్దతుదారులు కొంతకాలం విశ్రాంతి తీసుకోవాలని కోరారు. జంతర్ మంతర్ వద్ద నిరసనలకు సంబంధించి పోలీసులు తీసుకున్న చర్యల నేపథ్యంలో CJP నాయకులు సౌరవ్ దాస్, ఆశుతోష్ రంకా జైలుకు వెళ్లాల్సి వచ్చింది. ఈ పరిణామాలు వారి కుటుంబాల్లో ఆందోళనకు కారణమయ్యాయని దీప్కే తన సందేశంలో వివరించారు.

ప్రధాని మోదీపై దీప్కే ఆరోపణలు

సౌరవ్ దాస్, ఆశుతోష్ రంకాలను జైలులో ఉంచేందుకు ప్రధాని నరేంద్ర మోదీ మొత్తం ప్రభుత్వ యంత్రాంగాన్ని ఉపయోగిస్తున్నారని దీప్కే ఆరోపించారు. అయితే, జైలులో ఉన్నప్పటికీ ఆ ఇద్దరు నాయకులు ధైర్యంగా ఉన్నారని పేర్కొన్నారు. ఐదు రోజులుగా జైలులో ఉన్న సౌరవ్ దాస్ కోర్టుకు వచ్చినప్పుడు నవ్వుతూ కనిపించారని, జ్యుడీషియల్ కస్టడీని మరోసారి పొడిగించినా భయపడలేదని దీప్కే చెప్పారు. అలాగే, ఐదు రోజులుగా జైలులో ఉన్న ఆశుతోష్ రంకా ముఖంలోనూ భయం కనిపించలేదని అన్నారు. ఇలాంటి పరిస్థితుల్లోనూ ధైర్యంగా ఉండటమే నిజమైన బలమని వ్యాఖ్యానించారు.

జ్యుడీషియల్ కస్టడీ మరో రెండు రోజులు పొడిగింపు

అక్టోబర్ 19, సోమవారం సౌరవ్ దాస్, ఆశుతోష్ రంకాలను ఢిల్లీలోని మందిర్ మార్గ్ పోలీస్ స్టేషన్‌లో నియమితులైన ప్రత్యేక ఎగ్జిక్యూటివ్ మేజిస్ట్రేట్ ఎదుట హాజరుపరిచారు. అనంతరం వారిని మరో రెండు రోజుల పాటు జ్యుడీషియల్ కస్టడీకి పంపించారు. అక్టోబర్ 13న ఈ ఇద్దరిని ఐదు రోజుల జ్యుడీషియల్ కస్టడీకి పంపించారు. అంతకుముందు రోజు నిరసనలకు కేటాయించిన ప్రదేశంగా జంతర్ మంతర్‌ను తొలగించడంతో, అక్కడి తాళం వేసిన గేటు దాటి లోపలికి ప్రవేశించారనే ఆరోపణలు వారిపై ఉన్నాయి. ఇతర CJP సభ్యులతో కలిసి జాతీయ జెండాను ప్రదర్శిస్తూ, ప్రధాన ఎన్నికల కమిషనర్ జ్ఞానేశ్ కుమార్‌కు వ్యతిరేకంగా నినాదాలు చేసిన అనంతరం వారిని పోలీసులు అదుపులోకి తీసుకున్నారు.

Supreme Court: పిల్లల విషయంలో సుప్రీం కోర్టు చెప్పినట్లు జరుగుతుందా?

Nandini Arava — Sat, 17 Oct 2026 15:30:43 +0530

Supreme Court: పిల్లలు సోషల్ మీడియా వాడకంపై సుప్రీంకోర్టు కీలక వ్యాఖ్యలు చేసింది. ఆన్‌లైన్ ప్రమాదాల నుంచి పిల్లలను కాపాడాలంటే ఇంటర్నెట్‌కు దూరం చేయడం పరిష్కారం కాదని స్పష్టం చేసింది. పిల్లల భద్రతతో పాటు వారి స్వేచ్ఛను కాపాడాల్సిందేనని పేర్కొంది.

ఈరోజుల్లో ఇంటర్నెట్ లేనిదే పని జరగదు. తినడానికి అన్నం లేకపోయినా కుదురుతుంది గానీ....ఇంటర్నెట్ లేకపోతే కుదరదు. అలా ఉంది పరిస్థితి. పెద్దవాళ్లైనా, చిన్న పిల్లలైనా ఫోన్ ఉండాల్సిందే. పిల్లలు అన్నం తినాలంటే నెట్, వర్క్ చేయాలంటే నెట్.. ఇంకా ఫోన్ అనేది ఎక్కువగా పిల్లల దగ్గరే ఉంటోంది. అయితే ఇదే విషయంలో ఇంటర్నెట్ వినియోగం ప్రతి వ్యక్తికి ప్రాథమిక హక్కు అని సుప్రీంకోర్టు పేర్కొంది. రాజ్యాంగంలోని ఆర్టికల్ 21, ఆర్టికల్ 19(1)(a) ప్రకారం ఈ హక్కు పిల్లలకూ వర్తిస్తుందని తెలిపింది. పిల్లల భద్రత, వారి స్వేచ్ఛ ఒకదానికొకటి విరుద్ధమైనవి కావని ధర్మాసనం వ్యాఖ్యానించింది. ఆన్‌లైన్ వేదికల్లో ప్రమాదాలు ఉన్నాయనే కారణంతో పిల్లలకు ఇంటర్నెట్‌ను పూర్తిగా నిరాకరించడం సరైన విధానం కాదని అభిప్రాయపడింది.

జస్టిస్ జేబీ పార్దివాలా, జస్టిస్ కే వినోద్ చంద్రన్‌లతో కూడిన ధర్మాసనం ఈ వ్యాఖ్యలు చేసింది. సోషల్ మీడియా, ఇతర ఆన్‌లైన్ వేదికల్లో పిల్లలపై లైంగిక దోపిడీ, వేధింపులకు సంబంధించిన కంటెంట్‌ను గుర్తించి తొలగించే వ్యవస్థలను బలోపేతం చేయడానికి ఆదేశాలు జారీ చేసే క్రమంలో ఈ అంశాలను ప్రస్తావించింది.

పిల్లలు ఇంటర్నెట్‌ను ఉపయోగించకుండా అడ్డుకోవడం కంటే, వారు సురక్షితంగా వినియోగించుకునేలా చర్యలు తీసుకోవడం అవసరం అని సుప్రీంకోర్టు సూచించింది. ఇందులో భాగంగా సోషల్ మీడియా ఖాతాలకు ‘చైల్డ్ మోడ్’ వంటివి పెట్టాలని సూచించింది. దీనివల్ల పిల్లలకు ఆన్‌లైన్‌లో ఎదురయ్యే ప్రమాదాలను తగ్గించడంతో పాటు, వారి సమాచార హక్కును కూడా కాపాడవచ్చనే దిశగా కోర్టు వ్యాఖ్యలు ఉన్నాయి.

ఆన్‌లైన్ వేదికల్లో హానికరమైన కంటెంట్‌ను గుర్తించి తొలగించడంలో ఆయా ప్లాట్‌ఫామ్‌లు విఫలమైతే, దాని ప్రభావాన్ని పిల్లలపై ఆంక్షలు విధించడం ద్వారా పరిష్కరించలేమని ధర్మాసనం పేర్కొంది. సమస్యను సృష్టిస్తున్న వ్యవస్థల్లో మార్పులు తీసుకురావడంపైనే దృష్టి పెట్టాలని స్పష్టం చేసింది.

ఇంటర్నెట్ అనేది కేవలం సోషల్ మీడియా కోసం మాత్రమే కాదని సుప్రీంకోర్టు గుర్తుచేసింది. చదువు, సమాచారం, సృజనాత్మకత, భావప్రకటనకు ఇది కీలక వేదికగా మారిందని పేర్కొంది. ముఖ్యంగా మారుమూల ప్రాంతాల్లో నివసించే పిల్లలకు ఇంటర్నెట్ ఒక్కటే విద్య, సమాచారానికి ప్రధాన ఆధారంగా ఉండే సందర్భాలున్నాయని తెలిపింది.

ప్రత్యేక అవసరాలు కలిగిన పిల్లలకు కూడా ఆన్‌లైన్ వేదికలు ఉపయోగకరంగా ఉంటాయని ధర్మాసనం అభిప్రాయపడింది. తమలాంటి పరిస్థితులను ఎదుర్కొంటున్న వారితో మాట్లాడేందుకు, పరిచయాలు పెంచుకునేందుకు ఇవి అవకాశం కల్పిస్తాయని పేర్కొంది. అందువల్ల పిల్లల భద్రత పేరుతో వారి స్వేచ్ఛను పూర్తిగా పరిమితం చేయడం సరికాదని స్పష్టం చేసింది.

2020లో అనురాధ భాసిన్ వర్సెస్ యూనియన్ ఆఫ్ ఇండియా కేసులో ఇంటర్నెట్ ద్వారా భావప్రకటన స్వేచ్ఛ, వ్యాపారం నిర్వహించే స్వేచ్ఛకు రాజ్యాంగ రక్షణ ఉంటుందని సుప్రీంకోర్టు పేర్కొన్న విషయాన్ని ధర్మాసనం ప్రస్తావించింది. అలాగే, 2025లో ప్రగ్యా ప్రసూన్ తదితరులు వర్సెస్ యూనియన్ ఆఫ్ ఇండియా కేసులో డిజిటల్ యాక్సెస్ హక్కును ఆర్టికల్ 21 కింద ప్రాథమిక హక్కుగా గుర్తించిన అంశాన్ని కూడా ప్రస్తావించింది.

మొత్తంగా, పిల్లలను ఆన్‌లైన్ ప్రపంచం నుంచి పూర్తిగా దూరం చేయడం కాకుండా.. ఇంటర్నెట్‌లో వారి భద్రతకు తగిన రక్షణలు కల్పించాలని సుప్రీంకోర్టు సూచించింది. సోషల్ మీడియా వేదికలు పిల్లలకు సురక్షితమైన డిజిటల్ వాతావరణాన్ని కల్పించడంలో మరింత బాధ్యత తీసుకోవాల్సిన అవసరాన్ని ఈ వ్యాఖ్యలు మరోసారి ముందుకు తెచ్చాయి.

CJP Protest : సిజెపి ఆందోళనలతో డిల్లీలో హైఅలర్ట్.. విమానంలో అభిజిత్ దీప్కే, ఇంట్లో ధ్రువ్ రాఠీ అరెస్ట్

Arun Kumar P — Sat, 10 Oct 2026 10:48:47 +0530

దేశ రాజధాని ఢిల్లీలో కాక్రోచ్ జనతా పార్టీ (CJP) చేపట్టిన నిరసన మరోసారి ఉద్రిక్తతకు దారితీసింది. ప్రధాన ఎన్నికల కమిషనర్ (CEC) జ్ఞానేశ్ కుమార్ రాజీనామా చేయాలని డిమాండ్ చేస్తూ అక్టోబర్ 10న అంటే ఇవాళ (శనివారం) జంతర్ మంతర్ వద్ద ఆందోళనకు సిజెపి పిలుపునిచ్చింది. అయితే ఈ నిరసనకు ఢిల్లీ పోలీసులు అనుమతి నిరాకరించడంతో రాజధానిలో భద్రతను కట్టుదిట్టం చేశారు. మరోవైపు నిరసనకు సపోర్ట్ తెలిపిన ప్రముఖ యూట్యూబర్ ధ్రువ్ రాఠీని గురుగ్రామ్‌లోని ఆయన నివాసం నుంచి పోలీసులు అదుపులోకి తీసుకున్నారు. సిజెపి లీడర్ అభిజిత్ దీప్కేను కూడా అరెస్ట్ చేశారు. ఈ పరిణామాలతో ఢిల్లీలో రాజకీయంగా ఉత్కంఠ నెలకొంది.

జంతర్ మంతర్ నిరసనకు నో పర్మిషన్

ఓటర్ల జాబితాల ప్రత్యేక సమగ్ర సవరణ (Special Intensive Revision – SIR) ప్రక్రియపై సిజెపి తీవ్ర అభ్యంతరాలు వ్యక్తం చేస్తోంది. ఈ ప్రక్రియలో పెద్ద సంఖ్యలో ఓటర్ల పేర్లు తొలగించడంపై అనుమానాలు ఉన్నాయని, దీనిపై ఎన్నికల సంఘం జవాబుదారీతనంతో వ్యవహరించాలని నిరసనకారులు డిమాండ్ చేస్తున్నారు. దీనికి బాధ్యత వహిస్తూ ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తోంది.

అయితే సిజెపి నిరసనకు అనుమతి ఇవ్వలేమని ఢిల్లీ పోలీసులు స్పష్టం చేశారు. ముందస్తుగా అనుమతి కోసం దరఖాస్తు చేయాల్సిన గడువును పాటించలేదని, గతంలో జరిగిన ఆందోళన సందర్భంగా శాంతిభద్రతల సమస్యలు తలెత్తిన విషయాన్ని కూడా అధికారులు ప్రస్తావించారు. అందుకే అనుమతి నిరాకరించామని... ప్రజలు గుమిగూడితే చట్టప్రకారం చర్యలు తీసుకుంటామని పోలీసులు హెచ్చరించారు. CJP నాయకులు మాత్రం శాంతియుతంగా నిరసన తెలిపే హక్కు తమకు ఉందని పేర్కొంటూ వెనక్కి తగ్గేది లేదని ప్రకటించారు.

ధ్రువ్ రాఠీని అదుపులోకి తీసుకున్న పోలీసులు

CJP నిరసనకు సపోర్ట్ తెలిపిన ప్రముఖ యూట్యూబర్ ధ్రువ్ రాఠీని పోలీసులు అదుపులోకి తీసుకోవడం చర్చనీయాంశమైంది. గురుగ్రామ్‌లోని ఆయన నివాసానికి వెళ్లిన పోలీసులు శనివారం ఉదయమే ఆయనను అదుపులోకి తీసుకున్నారు. నిరసనలో పాల్గొనే ఉద్దేశంతో ఆయన ఢిల్లీకి వచ్చినట్లు తెలుస్తోంది.

ఢిల్లీలో భారీ భద్రత..

సిజెపి నిరసన నేపథ్యంలో ఢిల్లీలో పోలీసులు భారీ భద్రతా ఏర్పాట్లు చేశారు. ఢిల్లీ పోలీసులతో పాటు పారామిలిటరీ బలగాలు కలిపి 35 వేల మందికి పైగా భద్రతా సిబ్బందిని మోహరించారు. ప్రధాన రహదారులు, రైల్వే స్టేషన్లు, కీలక ప్రభుత్వ ప్రాంతాల్లో తనిఖీలు పెంచారు. నిరసనకారులు జంతర్ మంతర్ వైపు వెళ్లకుండా అడ్డుకునేందుకు బారికేడ్లు ఏర్పాటు చేశారు.

జంతర్ మంతర్‌తో పాటు పార్లమెంట్, ఇండియా గేట్ పరిసరాల్లోనూ భద్రతను పెంచారు. అనుమతి లేని ప్రాంతాల్లో గుమిగూడే వారిని అదుపులోకి తీసుకునే చర్యలు చేపట్టారు. నిరసనకు పెద్ద సంఖ్యలో యువత, విద్యార్థులు తరలివచ్చే అవకాశం ఉందన్న అంచనాతో పోలీసులు ముందస్తు చర్యలు చేపట్టారు. ఇవాళ ఉదయం ఢిల్లీలోని కొన్ని ప్రాంతాల్లో నిరసనకారులను పోలీసులు అదుపులోకి తీసుకున్నారు.

మెట్రో స్టేషన్ల మూసివేత

నిరసన నేపథ్యంలో ఢిల్లీ మెట్రో రైల్ కార్పొరేషన్ తొలుత 57 మెట్రో స్టేషన్ల ప్రవేశ, నిష్క్రమణ ద్వారాలను మూసివేయనున్నట్లు ప్రకటించింది. అయితే సుప్రీంకోర్టు జోక్యం చేసుకుని ప్రజా రవాణాను పూర్తిగా నిలిపివేయకుండా, అవసరమైన నియంత్రణలతో కొనసాగించాలని సూచించింది. ఆ తర్వాత మూసివేతకు సంబంధించిన జాబితాను 45 స్టేషన్లకు తగ్గించారు. అక్టోబర్ 10న సాయంత్రం 6 గంటల వరకు ఈ స్టేషన్లలో ప్రవేశ, నిష్క్రమణలపై ఆంక్షలు కొనసాగనున్నట్లు సమాచారం.

కేంద్ర ఢిల్లీలోని కొన్ని ప్రాంతాల్లో మొబైల్ ఇంటర్నెట్ సేవలపై కూడా తాత్కాలిక ఆంక్షలు విధించారు. రహదారులపై వాహనాల రాకపోకలను మళ్లించే ఏర్పాట్లు చేశారు. రైల్వే సేవలపైనా ఆంక్షలు విధించడంతో ప్రయాణికులకు ఇబ్బందులు ఎదురయ్యాయి. అయితే ప్రజలకు అనవసర అసౌకర్యం కలగకుండా రైలు, మెట్రో సేవలను నియంత్రిత పద్ధతిలో కొనసాగించాలని సుప్రీంకోర్టు ఆదేశించడం ఈ పరిణామాల్లో కీలకంగా మారింది.

అభిజీత్ దీప్కేను అరెస్ట్?

CJP వ్యవస్థాపకుడు అభిజీత్ దీప్కే సహా పార్టీ నాయకులు నిరసనలో పాల్గొనేందుకు బయలుదేరారు. ఈ క్రమంలోనే ఆయనను విమానంలోనే పోలీసులు అరెస్ట్ చేశారు. నాటకీయ పరిణామాల మధ్య ఆయన్ని కస్టడీలోకి తీసుకున్నారు.

నిరసనకు అనుమతి నిరాకరించినప్పటికీ ఆందోళన కొనసాగిస్తామని పార్టీ నాయకులు ప్రకటించారు. మరోవైపు నిరసనకారుల కదలికలను నియంత్రించేందుకు పోలీసులు చర్యలు చేపట్టారు. ఈ నేపథ్యంలో మరింత మందిని అదుపులోకి తీసుకునే అవకాశాలపై ఉత్కంఠ నెలకొంది.

మొత్తంగా జ్ఞానేశ్ కుమార్ రాజీనామా డిమాండ్‌తో ప్రారంభమైన CJP ఆందోళన ఇప్పుడు ఓటర్ల జాబితాల సవరణ, ఎన్నికల సంఘం జవాబుదారీతనం, శాంతియుత నిరసన హక్కు వంటి అంశాల చుట్టూ దేశవ్యాప్తంగా చర్చకు దారితీసింది. ఢిల్లీలో నిరసన ఎలా ముందుకు సాగుతుంది, CJP తదుపరి కార్యాచరణ ఏమిటన్నది ఆసక్తికరంగా మారింది.

Indian Railways: రూ. 1628 కోట్ల బిగ్ ప్రాజెక్టు.. స్వాతంత్య్రం తర్వాత తొలిసారి.. రౌఘాట్‌కు రైల్వే కనెక్టివిటీ

Mahesh Rajamoni — Thu, 22 Oct 2026 09:10:04 +0530

Indian Railways: భారతదేశ స్వాతంత్య్రం తర్వాత తొలిసారిగా ఛత్తీస్‌గఢ్‌లోని రౌఘాట్ రైలు నెట్‌వర్క్‌తో అనుసంధానం అయింది. రూ.1,628 కోట్లతో తడకి-రౌఘాట్ లైన్ ప్రారంభమైంది. ఈ బిగ్ ప్రాజెక్టుతో ఛత్తీస్‌గఢ్‌లోని ఆ మారుమూల ప్రాంతానికి రైలు అడుగుపెట్టింది.

స్వాతంత్య్రం వచ్చిన 79 ఏళ్ల తర్వాత ఛత్తీస్‌గఢ్‌లోని మారుమూల ప్రాంతమైన రౌఘాట్‌ను ఇండియన్ రైల్వేస్ జాతీయ రైలు నెట్‌వర్క్‌తో అనుసంధానించింది. తడకి-రౌఘాట్ రైల్వే లైన్ ప్రారంభంతో ఈ చరిత్రాత్మక మైలురాయి నమోదైంది. 17.5 కిలోమీటర్ల మేర సాగిన ఈ మార్గంతో 95 కిలోమీటర్ల దల్లీ-రాజహారా-రౌఘాట్ ప్రాజెక్ట్ పూర్తయింది. ఈ కార్యక్రమంలో భాగంగా రౌఘాట్-రాయ్‌పూర్, రాయ్‌పూర్-కురుద్ అనే రెండు కొత్త ప్యాసింజర్ రైలు సర్వీసులను కూడా జెండా ఊపి ప్రారంభించారు. దీనివల్ల ఆ ప్రాంతంలో రవాణా సౌకర్యాలు మెరుగుపడటంతో పాటు పారిశ్రామిక, ఆర్థిక అవకాశాలు పెరుగుతాయి.

ఈ ప్రారంభోత్సవ కార్యక్రమంలో ఛత్తీస్‌గఢ్ ముఖ్యమంత్రి విష్ణుదేవ్ సాయి ప్రత్యక్షంగా పాల్గొన్నారు. కేంద్ర రైల్వే మంత్రి అశ్విని వైష్ణవ్ వీడియో కాన్ఫరెన్స్ ద్వారా ఈ వేడుకలో పాలుపంచుకున్నారు. అలాగే, రాయ్‌పూర్‌లో ఎలక్ట్రిక్ లోకోమోటివ్ మెయింటెనెన్స్ ఫెసిలిటీ ఏర్పాటుకు శంకుస్థాపన కూడా జరిగింది.

దక్షిణ ఛత్తీస్‌గఢ్‌లో రౌఘాట్‌కు రైలు రావడంతో స్థానికుల దశాబ్దాల కష్టాలు తీరాయి. ఇప్పటివరకు ఈ ప్రాంత ప్రజలకు రవాణా సౌకర్యాలు చాలా పరిమితంగా ఉండేవి. కొత్త రైల్వే మార్గం రాకతో ప్రయాణాలు సులభం కానున్నాయి. విద్య, వైద్యం, ఉద్యోగాలు, మార్కెట్లకు వెళ్లేందుకు ప్రజలకు మరింత మెరుగైన అవకాశాలు లభిస్తాయి.

రూ. 1,628 కోట్ల వ్యయంతో చేపట్టిన 95 కిలోమీటర్ల దల్లీ-రాజహారా-రౌఘాట్ రైల్వే ప్రాజెక్ట్ తడకి-రౌఘాట్ మధ్య ఉన్న చివరి 17.5 కిలోమీటర్ల సెక్షన్ పూర్తి కావడంతో కొలిక్కి వచ్చింది. ఈ సందర్భంగా మాట్లాడిన ముఖ్యమంత్రి విష్ణుదేవ్ సాయి.. రాష్ట్రంలో రైల్వే రంగంతో పాటు అన్ని అభివృద్ధి పనులు వేగంగా సాగుతున్నాయని తెలిపారు. ప్రస్తుత రైల్వే బడ్జెట్‌లో ఛత్తీస్‌గఢ్‌కు రూ. 7,000 కోట్లకు పైగా కేటాయింపులు లభించినట్లు ఆయన గుర్తుచేశారు.

ఈ ప్రారంభోత్సవ కార్యక్రమంలో భాగంగా రౌఘాట్-రాయ్‌పూర్, రాయ్‌పూర్-కురుద్ అనే రెండు ప్యాసింజర్ రైళ్లను ప్రారంభించారు. ఈ రైళ్ల ద్వారా రాష్ట్ర రాజధాని రాయ్‌పూర్‌కు ప్రయాణం మరింత సులభం కానుంది. ఈ మార్గాల్లో ప్రయాణించే స్థానికులకు ఇది ఎంతో సౌకర్యవంతంగా ఉంటుంది.

చిన్న పట్టణాలు, పెద్ద వాణిజ్య కేంద్రాల మధ్య ప్రజలు, వస్తువుల రవాణా సులభం కావడం వల్ల రోజువారీ ప్రయాణికులకు, ప్రాంతీయ వ్యాపారాలకు ఈ కొత్త కనెక్టివిటీ ఎంతో అండగా నిలుస్తుంది.

కేవలం ప్రయాణికులే కాకుండా, రౌఘాట్ ప్రాంతం నుంచి ఇనుప ఖనిజం రవాణాకు ఈ రైల్వే మార్గం ఎంతగానో ఉపయోగపడనుంది. భిలాయ్ స్టీల్ ప్లాంట్ సహా భారతదేశ ఉక్కు పరిశ్రమ అవసరాలకు ఈ ప్రాంతం ఇనుప ఖనిజం పరంగా చాలా ముఖ్యమైనది.

రైల్వే కనెక్టివిటీ వల్ల ముడి సరుకుల రవాణా వేగవంతం అవుతుంది. దీనివల్ల పారిశ్రామిక డిమాండ్ తీర్చడానికి, సప్లై చైన్ మెరుగుపరచడానికి వీలవుతుంది. ఈ మెరుగైన రవాణా సౌకర్యాల ద్వారా చుట్టుపక్కల ప్రాంతాల్లో ఆర్థిక కార్యకలాపాలు పెరిగి, కొత్త ఉపాధి అవకాశాలు వస్తాయి.

ఛత్తీస్‌గఢ్‌లో పూర్తయిన ప్రాజెక్టులు, కొత్త ప్యాసింజర్ సర్వీసుల ప్రారంభంపై కేంద్ర రైల్వే మంత్రి అశ్విని వైష్ణవ్ రాష్ట్ర ప్రజలకు అభినందనలు తెలిపారు. కొత్త లైన్లు, గేజ్ మార్పిడి, అదనపు ట్రాక్‌ల ద్వారా రాష్ట్రంలో రైల్వే మౌలిక వసతులు వేగంగా విస్తరిస్తున్నాయని ఆయన పేర్కొన్నారు.

దల్లీ-రాజహారా-రౌఘాట్ రైల్వే లైన్‌తో పాటు, కేంద్రి-అభన్‌పూర్-రాజిమ్-ధమ్తరి సెక్షన్‌లో గేజ్ మార్పిడి పనులు పూర్తయినట్లు తెలిపారు. ప్రస్తుతం ఖర్సియా-పర్మల్కసా డబుల్ లైన్ ప్రాజెక్ట్ పనులు వేగంగా జరుగుతున్నాయి. పెండ్రా రోడ్, బిలాస్‌పూర్, ఉస్లాపూర్ మధ్య మూడో రైల్వే లైన్‌కు కూడా కేంద్ర కేబినెట్ ఇటీవల ఆమోదం తెలిపింది. ఈ ప్రాజెక్టుల ద్వారా నెట్‌వర్క్ సామర్థ్యం పెరిగి, ప్రయాణికులకు మెరుగైన సౌకర్యాలు అందడంతో పాటు పారిశ్రామిక వృద్ధికి ఊతమిస్తుందని తెలిపారు. ఇదే కార్యక్రమంలో భాగంగా అభన్‌పూర్-కురుద్ బ్రాడ్-గేజ్ రైల్వే లైన్ కూడా ప్రారంభించారు.

బ్లింకిట్‌లో ఇంత ఆదాయమా.. 6.5 గంటల్లో 19 బ్లింకిట్ ఆర్డర్లు.. లా స్టూడెంట్ సంపాదన ఎంతంటే?

Narender Vaitla — Thu, 15 Oct 2026 18:46:02 +0530

Viral News: ప్రస్తుత రోజుల్లో చదువుకుంటూనే తమ ఖర్చుల కోసం పార్ట్‌టైమ్ ఉద్యోగాలు చేసే విద్యార్థులు చాలామంది ఉన్నారు. ఈ క్రమంలో ఎల్‌ఎల్‌బీ చదువుతున్న ఓ విద్యార్థి బ్లింకిట్‌లో డెలివరీ పార్ట్‌టైమ్ పని చేస్తూ సంపాదించిన తీరు వైర‌ల్ అవుతోంది.

కవల్ దేశాయ్ అనే విద్యార్థి ఎల్‌ఎల్‌బీ చదువుతున్నాడు. తన వ్యక్తిగత ఖర్చులను తానే సంపాదించుకోవాలనే ఉద్దేశంతో బ్లింకిట్‌లో డెలివరీ పని ప్రారంభించాడు. చదువుకు ఇబ్బంది కలగకుండా ఖాళీ సమయంలో ఈ పని చేయాలని నిర్ణయించుకున్నాడు. తన మొదటి రోజు అనుభవాన్ని ఎక్స్‌ (ట్విట్టర్)లో పంచుకున్నాడు. చదువుకుంటూనే కొంత ఆదాయం సంపాదించేందుకు ఈ ఉద్యోగం ఉపయోగపడుతుందని వివరించాడు.

ఆరు గంటల్లో 19 ఆర్డర్లు పూర్తి

కవల్ దేశాయ్ మొదటి రోజు సుమారు 6 గంటల 30 నిమిషాల పాటు డెలివరీ పని చేశాడు. ఈ సమయంలో మొత్తం 19 ఆర్డర్లను కస్టమర్లకు అందించాడు. ఇందుకోసం దాదాపు 51 కిలోమీటర్లు ప్రయాణించినట్లు వెల్లడించాడు. అయితే డెలివరీ ఇచ్చిన తర్వాత తిరిగి వచ్చే సమయంలో ప్రయాణించిన దూరం ఇందులో కలపలేదని తెలిపాడు. తక్కువ సమయంలోనే ఇన్ని ఆర్డర్లు పూర్తి చేయడం తన మొదటి రోజు అనుభవంలో ముఖ్యమైన విషయంగా పేర్కొన్నాడు.

19 ఆర్డర్లను పూర్తి చేసినందుకు కవల్‌కు రూ.508 ఆదాయం వచ్చింది. ఇందులో రూ.75 ఇన్సెంటివ్ కూడా ఉంది. ఒక నిర్దిష్ట లక్ష్యాన్ని చేరుకున్నందుకు అదనంగా రూ.100 బోనస్ లభించింది. దీంతో మొదటి రోజు అతడి మొత్తం సంపాదన రూ.608కి చేరింది. అయితే ఇది ఒక రోజు సంపాదన మాత్రమే. ప్రతిరోజూ ఇంతే ఆదాయం వస్తుందని చెప్పలేం. ఆర్డర్ల సంఖ్య, ప్రయాణ దూరం, ఇన్సెంటివ్‌లు, పని చేసే సమయం వంటి అంశాలపై డెలివరీ సిబ్బంది సంపాదన ఆధారపడి ఉంటుంది.

This is a part time gig I am doing for some obvious reasons. I’m pursing LLB as my primary profession. Along side working to support some obvious expenses incurred.

Day 1 ended on a good note.

Ended up delivering 19 orders in ~ 6:30 hours.

Did around ~51 kms just for the order delivery (return kms not counted).

Earned : ₹508 (₹75 incentive included) and ₹100 as bonus for achieving target.

Cost - ₹0 (I own Ather EV and charging costed me ₹0 home charging still 0)

Had to end the gig due to commitment to studies and at the same time battery was about to die.

@letsblinkit @deepigoyal @albinder You guys really made Blinkit a boon for people like me. It’s just so efficient to work with it and it’s smooth too.

— Kaval Desai (@thecurious_12) October 13, 2026

కవల్ దగ్గర ఏథర్ ఎలక్ట్రిక్ స్కూటర్ ఉంది. దాన్ని ఇంట్లోనే ఛార్జింగ్ చేసుకోవడంతో ఆ రోజు పనికి వెళ్లేందుకు ప్రత్యేకంగా ఛార్జింగ్ ఖర్చు కాలేదని తెలిపాడు. దీంతో సంపాదనలో కొంత మొత్తాన్ని ఆదా చేసుకునే అవకాశం కలిగింది. అయితే ఆరు గంటలన్నర పాటు పనిచేసిన తర్వాత చదువుపై దృష్టి పెట్టాల్సి ఉండటంతో డెలివరీ పనిని ఆపేశాడు. అదే సమయంలో స్కూటర్ బ్యాటరీ కూడా తగ్గిపోవడంతో ఇంటికి తిరిగి వెళ్లాలని నిర్ణయించుకున్నాడు. తన డెలివరీ బ్యాగ్ ఫొటోతో పాటు సంపాదన వివరాలు కనిపించే స్క్రీన్‌షాట్‌ను కూడా సోషల్ మీడియాలో పంచుకున్నాడు. బ్లింకిట్‌లో పని చేసే విధానం సులభంగా ఉండటంతో విద్యార్థులకు పార్ట్‌టైమ్ ఉద్యోగంగా ఉపయోగపడుతుందని అభిప్రాయపడ్డాడు.

కవల్ పోస్ట్‌పై పలువురు నెటిజన్లు స్పందించారు. డెలివరీ ఉద్యోగాలు వాస్తవానికి పార్ట్‌టైమ్ ఆదాయం కోసం ఉపయోగపడాల్సినవని, కానీ భారత్‌లో చాలామంది వీటినే పూర్తిస్థాయి వృత్తిగా చేసుకుంటున్నారని ఓ వ్యక్తి అభిప్రాయపడ్డాడు. మరో వ్యక్తి తన అనుభవాన్ని పంచుకుంటూ, గతంలో ఉబర్ బైక్ రైడర్‌గా, స్విగ్గీ డెలివరీ పార్ట్‌నర్‌గా పనిచేసినట్లు తెలిపాడు. అయినప్పటికీ ఎల్‌ఎల్‌బీ కోర్సులో చేరేందుకు అవసరమైన ఫీజులను సమకూర్చుకోలేకపోయానని పేర్కొన్నాడు.

ఇంకొకరు అదనపు ఆదాయం కోసం క్యాటరింగ్ పనులను కూడా పరిశీలించాలని సూచించారు. ఆరు గంటల పాటు బైక్‌పై తిరుగుతూ డెలివరీలు చేయడంతో పోలిస్తే క్యాటరింగ్ పనిలో అలసట తక్కువగా ఉండొచ్చని, మంచి సంపాదనతో పాటు భోజనం కూడా లభించే అవకాశం ఉంటుందని అభిప్రాయపడ్డారు. మొత్తంగా చూస్తే, చదువుకుంటూనే సంపాదించాలనుకునే విద్యార్థులకు పార్ట్‌టైమ్ ఉద్యోగాలు కొంత ఆర్థికంగా తోడ్పడతాయి. అయితే వచ్చే ఆదాయంతో పాటు ప్రయాణ ఖర్చులు, పని గంటలు, చదువుకు కేటాయించే సమయాన్ని కూడా లెక్కలోకి తీసుకోవడం అవసరం.