Asianet News Telugu

Air Pollution: గాలి కాలుష్యంతో సూసైడ్ ఆలోచనలు.. రీసెర్చ్‌ లో మైండ్ బ్లాకింగ్ విషయాలు

Mahesh Rajamoni — Thu, 17 Sep 2026 12:36:37 +0530

Air Pollution: వాయు కాలుష్యం కేవలం ఊపిరితిత్తులు, గుండె సంబంధిత సమస్యలనే కాకుండా మానసిక ఆరోగ్యాన్ని తీవ్రంగా దెబ్బతీస్తుందని అంతర్జాతీయ పరిశోధకులు వెల్లడించారు. ఆ షాకింగ్ విషయాలు ఇక్కడ తెలుసుకుందాం.

బాస్‌ల ప్రెజర్, ఫైనాన్షియల్ ప్రాబ్లెమ్స్, పర్సనల్ లైఫ్ టెన్షన్స్.. మనోళ్లు డిప్రెషన్‌లోకి వెళ్ళడానికి ఇవే రీజన్స్ అనుకుంటే పప్పులో కాలేసినట్లే. మనం పీల్చే గాలి కూడా మన మానసిక ప్రశాంతతను దెబ్బతీస్తోందట. వినడానికి షాకింగ్‌గా ఉన్నా ఇది నిజం. మన చుట్టూ పెరుగుతున్న వాయు కాలుష్యం కేవలం ఊపిరితిత్తులు, గుండెకే కాదు.. చివరికి ప్రాణాలు తీసుకునే ఆలోచనలు రావడానికి కూడా ఒక కారణం అవుతోందని ఒక ఇంటర్నేషనల్ రీసెర్చ్ వెల్లడించింది.

'జర్నల్ ఆఫ్ ఎపిడెమియాలజీ అండ్ కమ్యూనిటీ హెల్త్' లో పబ్లిష్ అయిన ఈ స్టడీ ఇప్పుడు అందరినీ షాక్‌కి గురిచేస్తోంది. క్వీన్స్ యూనివర్సిటీ బెలఫాస్ట్ సైంటిస్టులు ప్రపంచవ్యాప్తంగా జరిగిన 29 అధ్యయనాలను లోతుగా విశ్లేషించి (మెటా-అనాలిసిస్) ఈ సంచలన విషయాలను బయటపెట్టారు.

మనం రోజూ సిటీ రోడ్లపై చూసే పొగ, దుమ్ము వెనుక ఎంత పెద్ద డేంజర్ దాగుందో ఈ రీసెర్చ్ తేల్చింది. గాలిలో తేలియాడే అతి సూక్ష్మ ధూళి కణాలు (పీఎం 2.5) అలాగే వాహనాల పొగ నుంచి వచ్చే నైట్రోజన్ డయాక్సైడ్ (NO2) వల్ల ఆత్మహత్యాయత్నాలు, డిప్రెషన్ ఆలోచనలు విపరీతంగా పెరుగుతున్నాయని పరిశోధకులు గుర్తించారు. పీఎం 2.5 ఎంత చిన్నగా ఉంటుందంటే.. శ్వాస ద్వారా నేరుగా మన ఊపిరితిత్తులు, బ్లడ్‌లోకి ఈజీగా వెళ్లిపోతుంది. ఇవే కాకుండా సల్ఫర్ డయాక్సైడ్, ఓజోన్, సౌండ్ పొల్యూషన్ కూడా సైకలాజికల్ హెల్త్‌ను డ్యామేజ్ చేస్తున్నాయని తేలింది. అయితే లైట్, వాటర్ పొల్యూషన్ ప్రభావంపై మాత్రం క్లారిటీ రాలేదు.

ఈ రిపోర్ట్‌పై మెడికల్ ఎక్స్‌పర్ట్స్ కీలక కామెంట్స్ చేశారు. వాయు కాలుష్యానికి, మానసిక ఒత్తిడికి మధ్య కనెక్షన్ ఉన్న మాట వాస్తవమే అయినా.. కాలుష్యమే నేరుగా సూసైడ్‌కు మెయిన్ రీజన్ అని చెప్పలేమంటున్నారు. కేంబ్రిడ్జ్ యూనివర్సిటీ ప్రొఫెసర్ స్టీఫెన్ బర్గెస్ ప్రకారం.. ఇక్కడ కేవలం ఒక 'అసోసియేషన్' మాత్రమే కనిపిస్తోంది గానీ ప్రత్యక్ష కారణం అని ప్రూవ్ అవ్వలేదు. పొల్యూషన్ ఎక్కువగా ఉండే అర్బన్ ఏరియాల్లో ఆర్థిక ఇబ్బందులు, పేదరికం, లైఫ్‌స్టయిల్ ప్రాబ్లెమ్స్ కూడా ఎక్కువగా ఉంటాయి కాబట్టి, అవన్నీ కలిసి మానసిక ఆరోగ్యంపై ఇంపాక్ట్ చూపుతుండవచ్చు.

ప్రపంచ ఆరోగ్య సంస్థ (WHO) డెడ్లీ ఫ్యాక్ట్స్ ప్రకారం.. వరల్డ్ వైడ్‌గా ప్రతి సంవత్సరం 7,20,000 మందికి పైగా ఆత్మహత్యలతో ప్రాణాలు కోల్పోతున్నారు. ముఖ్యంగా 15 నుంచి 29 ఏళ్ల లోపు ఉన్నవారు, యంగ్ జనరేషన్‌లో చావులకు మూడో అతిపెద్ద కారణం ఈ సూసైడ్స్ కావడం విచారకరం.

గాలి శుద్ధి మాత్రమే సరిపోదు

ఈ రీసెర్చ్ అందించిన డేటాను బట్టి ప్రభుత్వాలు కొత్త రూల్స్ తీసుకురావాలని సైంటిస్టులు కోరుతున్నారు. సూసైడ్ ప్రివెన్షన్ ప్లాన్స్‌లో కేవలం కౌన్సెలింగ్ మాత్రమే కాకుండా, పర్యావరణ కాలుష్యాన్ని తగ్గించే స్ట్రాటజీలను కూడా ఇంక్లూడ్ చేయాలి. అయితే, ప్యూర్ ఎయిర్ ఒక్కటే ఆత్మహత్యలను ఆపేస్తుందని అనుకోవడం పొరపాటని, మెంటల్ హెల్త్ పాలిసీలతో ఎన్విరాన్‌మెంటల్ హెల్త్‌ను కూడా మిక్స్ చేసి పనిచేస్తేనే అనుకున్న రిజల్ట్స్ వస్తాయని నిపుణులు స్పష్టం చేస్తున్నారు.

US India Trade: అమెరికా-ఇండియా ట్రేడ్ పెరిగితే భారతీయులకు ఏం ప్రయోజనం?

Mahesh Rajamoni — Sun, 20 Sep 2026 16:07:46 +0530

US India Trade: అమెరికా-భారత్‌ ల ద్వైపాక్షిక వాణిజ్యం పెరిగితే, దాని వల్ల భారత ఆర్థిక వ్యవస్థకు మాత్రమే కాకుండా సామాన్య పౌరులు, ఉద్యోగులు, వ్యాపారులకు నేరుగా పలు కీలక ప్రయోజనాలు చేకూరుతాయి. ఆ వివరాలు ఇక్కడ తెలుసుకుందాం.

అమెరికా, భారతదేశం మధ్య వాణిజ్య సంబంధాలు ట్రంప్ నిర్ణయాలతో అటుఇటుగా మారుతున్నాయి. అయితే, 2025లో రెండు దేశాల మధ్య వస్తువులు, సేవల మొత్తం వాణిజ్యం ఏకంగా $239.6 బిలియన్ డాలర్లకు చేరి రికార్డు సృష్టించింది. ఇందులో ఒక్క సేవల రంగం వాణిజ్యమే ఏకంగా $90.4 బిలియన్ డాలర్లుగా నమోదైంది.

అయితే ఇది కేవలం ప్రభుత్వాల మధ్య నడిచే రెండు దేశాల ఎగుమతులు-దిగుమతుల లెక్క మాత్రమేనా? లేక ఒక సామాన్య భారతీయ పౌరుడికి, ఉద్యోగాల కోసం చూస్తున్న యువతకు, రోజూ వ్యాపారం చేసుకునే వారికి నిజంగా ఏమైనా ఉపయోగపడుతుందా? అనే సందేహాలు రావడం సహజం. అమెరికా మార్కెట్‌లో భారత ఉత్పత్తులకు డిమాండ్ పెరిగినప్పుడు అది మన దేశీయ ఆర్థిక వ్యవస్థను ఏ విధంగా మారుస్తుందో తెలుసా?

యూఎస్ మార్కెట్‌లో మన దేశానికి చెందిన వస్తువులకు డిమాండ్ పెరిగినప్పుడు, ఇక్కడ ఉత్పత్తి సామర్థ్యాన్ని భారీగా పెంచాల్సి వస్తుంది. ముఖ్యంగా టెక్స్‌టైల్స్, జెమ్స్ అండ్ జ్యువెలరీ, ఫార్మా, ఇంజినీరింగ్ రంగాల్లో ఆర్డర్లు వెల్లువలా వస్తాయి. దీనివల్ల కంపెనీలు కొత్త ప్లాంట్లను ఏర్పాటు చేయడం లేదా ఉన్న ప్లాంట్లను విస్తరించడం ద్వారా నియామకాలను వేగవంతం చేస్తాయి.

అంతేకాకుండా ఎగుమతులను మరింత ప్రోత్సహించడానికి ప్రభుత్వం ప్రత్యేకంగా ఎక్స్‌పోర్ట్ ప్రమోషన్ మిషన్ ద్వారా MSMEలకు, ఎగుమతిదారులకు సపోర్టు అందిస్తోంది. యూఎస్ టారిఫ్‌లు తగ్గడం వల్ల మన దేశీయ ఎగుమతులు చైనా, వియత్నాం వంటి ఇతర దేశాల ఉత్పత్తులతో పోటీపడి భారీ ఆర్డర్లను సాధించగలుగుతాయి.

భారతదేశం నుంచి అమెరికాకు జరిగే ఎగుమతుల్లో సర్వీసెస్ రంగానిది అత్యంత కీలక పాత్ర. టీసీఎస్, ఇన్ఫోసిస్, విప్రో వంటి దిగ్గజ ఐటీ కంపెనీలతో పాటు టెక్ స్టార్టప్‌లకు అమెరికన్ కార్పొరేట్ కంపెనీల నుంచే ఎక్కువ ప్రాజెక్టులు వస్తుంటాయి. ట్రేడ్ రిలేషన్స్ బలంగా ఉంటే కొత్త ప్రాజెక్టుల కాంట్రాక్టులు సులభంగా దక్కుతాయి.

దీని ప్రభావం హైదరాబాద్, బెంగళూరు, విశాఖపట్నం వంటి ఐటీ హబ్‌లలో పనిచేసే డెవలపర్లు, ఇంజినీర్లపై స్పష్టంగా కనిపిస్తుంది. బెంచ్ కాలిక్యులేషన్స్ తగ్గి కొత్త రిక్రూట్‌మెంట్లు పెరగడం, మంచి శాలరీ హైక్స్ లభించడం, ఆన్-సైట్ ప్రాజెక్టుల కోసం అమెరికా వెళ్లే అవకాశాలు మెరుగవడం వంటి స్పష్టమైన మార్పులు ఉంటాయి.

రెండు దేశాల నడుమ కుదిరే మిడ్ టెర్మ్ వాణిజ్య ఒప్పందాల వల్ల దిగుమతి పన్నులు గణనీయంగా తగ్గుతాయి. భారత్ అమెరికా నుంచి వచ్చే పారిశ్రామిక ఉత్పత్తులు, అత్యాధునిక టెక్నాలజీ గ్యాడ్జెట్లు, మెడికల్ పరికరాలు, కొన్ని రకాల వ్యవసాయ ఆధారిత ఆహార పదార్థాలపైపన్నులను సడలించినప్పుడు, ఆ ఉత్పత్తులు భారతీయ మార్కెట్‌లో తక్కువ ధరలకే లభించే అవకాశం ఉంటుంది. దీనివల్ల వినియోగదారులకు మెరుగైన నాణ్యత కలిగిన అంతర్జాతీయ ఉత్పత్తులు తక్కువ వ్యయానికే అందుబాటులోకి వస్తాయి.

ప్రస్తుతం ప్రపంచవ్యాప్తంగా వ్యాపార దిగ్గజాలు తమ సప్లై చైన్ కోసం చైనాపై మాత్రమే ఆధారపడకుండా 'చైనా ప్లస్ వన్' వ్యూహాన్ని అమలు చేస్తున్నాయి. అమెరికాతో మన సంబంధాలు బలపడటం వల్ల ఆపిల్ వంటి దిగ్గజ కంపెనీలు తమ మాన్యుఫ్యాక్చరింగ్ యూనిట్లను భారత్‌కు తరలిస్తున్నాయి. దేశంలో గ్లోబల్ ప్లాంట్లు ఏర్పాటు కావడం వల్ల లోకల్ ఇండస్ట్రీస్ రూపురేఖలు మారిపోతాయి. అంతేకాకుండా విదేశీ నేరుగా పెట్టుబడులు రూపంలో డాలర్ల ప్రవాహం పెరిగితే, మన విదేశీ మార్పిడి నిల్వలు బలపడి రూపాయి విలువ పడిపోకుండా స్థిరంగా ఉండేందుకు దోహదపడుతుంది.

కానీ ఇక్కడ గుర్తుంచుకోవాల్సిన ముఖ్యమైన విషయం ఏమిటంటే.. ట్రేడ్ పెరిగినంత మాత్రాన సమాజంలోని ప్రతి ఒక్కరికీ రాత్రికి రాత్రే లాభాలు రావు. విదేశీ ఉత్పత్తులు ఎక్కువగా దేశంలోకి వస్తే కొన్ని రకాల స్థానిక చిన్న పరిశ్రమలకు పోటీ పెరుగుతుంది. ఏ ఏ రంగానికి పన్ను మినహాయింపులు లభిస్తాయనే దానిపైనే వ్యాపారుల లాభనష్టాలు ఆధారపడి ఉంటాయి. అమెరికా మార్కెట్‌లో భారత కంపెనీలకు దక్కే అవకాశాలు పెరిగితే.. అది ఎగుమతులు, ఉత్పత్తి, ఉద్యోగ కల్పనల ద్వారా మన దేశీయ సామాన్యుడి ఆర్థిక పరిస్థితిని మెరుగుపరచడానికి దోహదపడుతుంది. కానీ, ప్రస్తుత అమెరికా అధ్యక్షుడు డొనాల్డ్ ట్రంప్ తీసుకునే నిర్ణయాలు రెండు దేశాల సంబంధాల పై ప్రభావం చూపుతున్నాయి. ట్రేడ్ విషయంలో కూడా ఊహించని పరిణామాలు చోటుచేసుకుంటున్నాయి.

రూ. 25 వేల‌కి పెరిగిన పీఎఫ్ సాల‌రీ లిమిట్‌.. దీంతో ఉద్యోగుల‌కు జ‌రిగే ప్ర‌యోజ‌నం ఏంటో తెలుసా?

Narender Vaitla — Wed, 16 Sep 2026 20:27:40 +0530

EPFO: ఉద్యోగుల ప్రావిడెంట్ ఫండ్‌కు సంబంధించి కేంద్ర ప్రభుత్వం కీలక నిర్ణయం తీసుకుంది. ఎంప్లాయీస్ ప్రావిడెంట్ ఫండ్ (EPF)లో చేరేందుకు ప్రస్తుతం ఉన్న వేతన పరిమితిని పెంచేందుకు కేంద్ర కేబినెట్ ఆమోదం తెలిపింది.

పీఎఫ్ వేతన పరిమితిలో మార్పు వచ్చి దాదాపు 12 సంవత్సరాలు అవుతోంది. 2014కు ముందు నెలకు రూ.6,500 వరకు ఉన్న వేతన పరిమితిని అప్పట్లో రూ.15 వేలకు పెంచారు. అప్పటి నుంచి అదే పరిమితి కొనసాగుతోంది. ఈ మధ్య కాలంలో ఉద్యోగుల వేతనాలు, జీవన వ్యయాలు గణనీయంగా పెరిగిన నేపథ్యంలో పీఎఫ్ పరిమితిని కూడా సవరించాలనే డిమాండ్లు వినిపించాయి. ఉద్యోగ సంఘాలు కూడా ఈ అంశాన్ని పలుమార్లు కేంద్రం దృష్టికి తీసుకెళ్లాయి. తాజాగా రూ.15 వేల పరిమితిని రూ.25 వేలకు పెంచే ప్రతిపాదనకు కేబినెట్ ఆమోదం లభించడంతో దీర్ఘకాలంగా ఎదురుచూస్తున్న మార్పుకు మార్గం సుగమమైంది.

వేతన పరిమితిని రూ.25 వేలకు పెంచడం వల్ల అదనంగా సుమారు 51 లక్షల మంది ఉద్యోగులు పీఎఫ్ ప్రయోజనాల పరిధిలోకి వచ్చే అవకాశం ఉంది. ఈ మార్పు ద్వారా ముఖ్యంగా ప్రైవేట్ రంగంలో పనిచేస్తున్న, ఇప్పటివరకు పీఎఫ్ సామాజిక భద్రతకు పూర్తిస్థాయిలో అందుబాటులో లేని ఉద్యోగులకు ప్రయోజనం కలగనుంది. ఈ పథకం అమలుకు రూ.11,339 కోట్లను కేటాయించనున్నట్లు కేంద్రం వెల్లడించింది. పీఎఫ్ అనేది ఉద్యోగి భవిష్యత్ అవసరాలకు ఉపయోగపడే దీర్ఘకాలిక పొదుపు సాధనం కావడంతో, మరింత మంది కార్మికులు ఈ వ్యవస్థలోకి రావడం ద్వారా వారి సామాజిక భద్రత పరిధి విస్తరించనుంది.

వేతన పరిమితి పెరగడం వల్ల ఉద్యోగుల పీఎఫ్ ఖాతాలో ప్రతి నెల జమ అయ్యే మొత్తం కూడా పెరిగే అవకాశం ఉంటుంది. ప్రస్తుతం రూ.15 వేల పరిమితిని ప్రాతిపదికగా తీసుకుంటే ఉద్యోగి వాటా 12 శాతం గరిష్ఠంగా రూ.1,800 వరకు ఉంటుంది. కొత్త పరిమితి రూ.25 వేలకు అమల్లోకి వస్తే, అదే 12 శాతం లెక్కన ఉద్యోగి వాటా గరిష్ఠంగా రూ.3,000 వరకు ఉండొచ్చు. అంటే ప్రతి నెల పీఎఫ్ ఖాతాలో ఎక్కువ మొత్తంలో పొదుపు అవుతుంది. దీర్ఘకాలంలో ఈ మొత్తంపై వడ్డీతో పాటు పదవీ విరమణ సమయంలో ఉద్యోగికి పెద్ద మొత్తంలో నిధి సమకూరే అవకాశం ఉంటుంది. పీఎఫ్‌తో అనుసంధానమైన ఇతర సామాజిక భద్రతా ప్రయోజనాలు కూడా అర్హత నిబంధనలకు లోబడి మరింత మంది ఉద్యోగులకు అందుబాటులోకి రావచ్చు.

పీఎఫ్ పరిమితి పెంపుతో ఉద్యోగుల నెలవారీ చందా మాత్రమే కాకుండా యాజమాన్యాల వాటాపైనా ప్రభావం ఉంటుంది. ప్రస్తుతం ఉన్న పరిమితికి అనుగుణంగా ఉద్యోగి, సంస్థ తరఫున చెల్లించే పీఎఫ్ మొత్తాలు లెక్కిస్తారు. కొత్త పరిమితి అమల్లోకి వచ్చిన తర్వాత వర్తించే నిబంధనల ప్రకారం కంపెనీలు కూడా అధిక మొత్తాన్ని చెల్లించాల్సి రావచ్చు. దీంతో ఉద్యోగి భవిష్యత్ పొదుపు పెరిగే అవకాశం ఉన్నప్పటికీ, సంస్థలపై అదనపు ఆర్థిక బాధ్యత ఏర్పడుతుంది.

PMAY: తెలుగు ప్ర‌జ‌ల‌కు కేంద్ర ప్ర‌భుత్వం గుడ్ న్యూస్‌.. 5 ల‌క్ష‌ల ఇళ్లు కేటాయింపు

Narender Vaitla — Tue, 15 Sep 2026 17:55:18 +0530

PMAY: ఇళ్లు లేని పేద కుటుంబాలకు కేంద్ర ప్రభుత్వం శుభవార్త తెలిపింది. ప్రధానమంత్రి ఆవాస్ యోజన (PMAY) కింద ఆంధ్రప్రదేశ్, తెలంగాణ రాష్ట్రాలకు అదనంగా 5 లక్షల ఇళ్లను కేటాయించినట్లు కేంద్ర గ్రామీణాభివృద్ధి శాఖ సహాయ మంత్రి పెమ్మసాని చంద్రశేఖర్ వెల్లడించారు.

గ్రామీణాభివృద్ధి శాఖ ద్వారా తెలుగు రాష్ట్రాలకు ఒకేసారి ఇంత పెద్ద సంఖ్యలో ఇళ్లు మంజూరు చేయడం ఇదే తొలిసారి అని పెమ్మసాని చంద్రశేఖర్ తెలిపారు. ఈ కేటాయింపుల ద్వారా రెండు రాష్ట్రాల్లో సొంత ఇల్లు లేని అర్హులైన పేద కుటుంబాలకు ప్రయోజనం కలగనుంది. గతంలో మంజూరైన ఇళ్లకు అదనంగా తాజా కేటాయింపులు ఉంటాయని చెప్పారు. రాష్ట్ర ప్రభుత్వాలు గుర్తించే అర్హత కలిగిన కుటుంబాలకు పథకం నిబంధనల ప్రకారం ఆర్థిక సాయం అందుతుంది. గ్రామీణ ప్రాంతాల్లో ఇళ్ల నిర్మాణానికి ఈ పథకం ద్వారా కేంద్రం నుంచి నిధులు సమకూరనున్నాయి.

2019 నుంచి 2024 మధ్య ఆంధ్రప్రదేశ్‌కు 1.78 లక్షల ఇళ్లు కేటాయించినట్లు కేంద్ర మంత్రి తెలిపారు. అయితే ఆ సమయంలో కేటాయించిన వాటిలో 42 వేల ఇళ్ల నిర్మాణం మాత్రమే పూర్తయిందని వివరించారు. 2024 తర్వాత రాష్ట్రానికి ఇళ్ల కేటాయింపును గణనీయంగా పెంచినట్లు చెప్పారు. తాజా మంజూరుతో ఏపీలో మరింత మంది పేద కుటుంబాలు సొంతింటి నిర్మాణానికి కేంద్ర సహాయం పొందే అవకాశం ఏర్పడింది. గతంలో పూర్తికాని ఇళ్లతో పాటు కొత్తగా మంజూరయ్యే ఇళ్ల నిర్మాణాన్ని కూడా వేగంగా పూర్తి చేయాలని కేంద్రం లక్ష్యంగా పెట్టుకున్నట్లు మంత్రి పేర్కొన్నారు.

2019-24 మధ్యకాలంలో తెలంగాణ ప్రధానమంత్రి ఆవాస్ యోజన గ్రామీణ పథకంలో భాగస్వామిగా లేదని పెమ్మసాని చంద్రశేఖర్ తెలిపారు. రాష్ట్రంలో కాంగ్రెస్ ప్రభుత్వం అధికారంలోకి వచ్చిన తర్వాత సీఎం రేవంత్‌రెడ్డి ఇళ్ల కేటాయింపుపై కేంద్రాన్ని పలుమార్లు కోరారని చెప్పారు. ఈ నేపథ్యంలో తెలంగాణ ప్రభుత్వం కోరిన సంఖ్య కంటే ఎక్కువగానే ఇళ్లు మంజూరు చేసినట్లు వెల్లడించారు. తాజా కేటాయింపులో తెలంగాణకు 2 లక్షల ఇళ్లు దక్కాయి. దీంతో రాష్ట్రంలోని సొంత ఇల్లు లేని అర్హులైన కుటుంబాలకు కొత్తగా అవకాశం లభించనుంది.

ప్రధానమంత్రి ఆవాస్ యోజన కింద ఒక్కో ఇంటి నిర్మాణానికి కేంద్రం నుంచి రూ.1.20 లక్షల ప్రాథమిక ఆర్థిక సహాయం అందుతుంది. ఇతర ప్రభుత్వ సహాయాలను కలుపుకుంటే లబ్ధిదారుడికి దాదాపు రూ.1.80 లక్షల వరకు ప్రయోజనం లభించే అవకాశం ఉందని మంత్రి వివరించారు. స్వచ్ఛ భారత్ కార్యక్రమం కింద మరుగుదొడ్డి నిర్మాణానికి రూ.12 వేల ఆర్థిక సాయం అందుతుంది. లబ్ధిదారుల ఎంపికలో పారదర్శకత కోసం ఆవాస్ ప్లస్ యాప్‌ను వినియోగించనున్నట్లు తెలిపారు. జియో ట్యాగింగ్‌తో వివరాల నమోదు చేపట్టడంతో పాటు లబ్ధిదారులే తమ వివరాలను నమోదు చేసుకునేలా సెల్ఫ్ సర్వే సదుపాయం కూడా కల్పించినట్లు చెప్పారు.

పథకం అర్హత నిబంధనల్లో కేంద్రం కొన్ని మార్పులు చేసినట్లు పెమ్మసాని చంద్రశేఖర్ తెలిపారు. కుటుంబ నెలవారీ ఆదాయ అర్హత పరిమితిని రూ.10 వేల నుంచి రూ.15 వేలకు పెంచినట్లు చెప్పారు. మోటార్ బైక్ లేదా ఫ్రిజ్ ఉన్నంత మాత్రాన పథకం ప్రయోజనం కోల్పోకుండా నిబంధనలను సవరించినట్లు వివరించారు. ఇప్పటికే మంజూరైన ఇళ్లు, తాజాగా కేటాయించిన గృహాల నిర్మాణాన్ని రెండు నుంచి మూడేళ్లలోపు పూర్తి చేయాలన్నది కేంద్రం లక్ష్యమని తెలిపారు. లబ్ధిదారుల ఎంపికలో రాజకీయాలకు తావు లేకుండా అర్హత ఉన్న ప్రతి కుటుంబానికి అవకాశం కల్పిస్తామని స్పష్టం చేశారు.

రెండు రోజుల్లో ఆయ‌న రాజీనామా చేయ‌క‌పోతే మ‌రో పోరాటం.. కాక్రోచ్ పార్టీ వార్నింగ్

Narender Vaitla — Fri, 25 Sep 2026 19:32:53 +0530

ఈసీఐపై ఎందుకు వివాదం మొదలైంది?

ఎన్నికల ఓటర్ల జాబితా సవరణకు సంబంధించి ఈసీఐ చేపట్టిన SIR ప్రక్రియే తాజా వివాదానికి ప్రధాన కారణంగా మారింది. దీనికి తోడు ఎన్నికల సంఘంలోని ముగ్గురు సభ్యుల మధ్య నిర్ణయాలపై భిన్నాభిప్రాయాలు ఉన్నాయన్న రిపోర్టులు రాజకీయంగా చర్చకు దారితీశాయి. ఎన్నికల కమిషనర్లు సుఖ్‌బీర్ సింగ్ సంధూ, వివేక్ జోషి గత 10 నెలల్లో కనీసం 14 సందర్భాల్లో ఎన్నికల సంఘం తీసుకున్న కొన్ని నిర్ణయాలపై రికార్డులో అభ్యంతరాలు వ్యక్తం చేశారు. కొత్త ఓటర్ల నమోదు, ఓటర్ల పేర్ల తొలగింపు, పునరుద్ధరణ, ఓటర్ల డేటా నిర్వహణ వంటి అంశాలు ఇందులో ఉన్నాయి.

SIRపై ప్రతిపక్షాల ఆరోపణలు

SIR ప్రక్రియలో ఓటర్ల పేర్ల తొలగింపు, కొత్త ఓటర్ల నమోదు విధానంలో మార్పులు, డేటా నిర్వహణపై ప్రతిపక్షాలు తీవ్ర అభ్యంతరాలు వ్యక్తం చేస్తున్నాయి. కొత్త ఓటర్ల కోసం ఉపయోగించే ఫామ్-6లో SIRకు సంబంధించిన అదనపు వివరాలను చేర్చడంపైనా ఎన్నికల కమిషనర్లు అభ్యంతరం తెలిపినట్లు తెలుస్తోంది. మరోవైపు, SIR సహా ఎన్నికల సంఘం తీసుకున్న నిర్ణయాలన్నీ కమిషన్‌లోని ముగ్గురు సభ్యుల ఆమోదంతోనే జరిగాయని ఈసీఐ స్పష్టం చేస్తోంది.

ఇదే అంశాన్ని ఆధారంగా చేసుకుని కాంగ్రెస్ సహా ప్రతిపక్షాలు జ్ఞానేష్ కుమార్‌పై విమర్శలు చేస్తున్నాయి. 2024 లోక్‌సభ ఎన్నికలతో పాటు పలు రాష్ట్రాల ఎన్నికల్లో అక్రమాలు జరిగాయని కాంగ్రెస్ అగ్రనేత రాహుల్ గాంధీ ఆరోపించిన నేపథ్యంలో ఈ వివాదం మరింత రాజకీయ ప్రాధాన్యం సంతరించుకుంది. తమిళనాడు మాజీ ముఖ్యమంత్రి, డీఎంకే నేత ఎం.కె. స్టాలిన్ కూడా జ్ఞానేష్ కుమార్ రాజీనామా చేయాలని డిమాండ్ చేశారు.

పలు రాష్ట్రాల్లో నిరసనలు..

జ్ఞానేష్ కుమార్‌ను పదవి నుంచి తప్పుకోవాలని కోరుతూ కాంగ్రెస్ నేతలు, కార్యకర్తలు పలు రాష్ట్రాల్లో ఆందోళనలు నిర్వహిస్తున్నారు. జమ్మూకశ్మీర్‌లో కాంగ్రెస్ ఎమ్మెల్యేలు నిరసన చేపట్టగా, ఇతర ప్రాంతాల్లోనూ ఈసీఐ కార్యాలయాల వైపు ర్యాలీలు నిర్వహించే ప్రయత్నాలు జరిగాయి. కొన్ని చోట్ల పోలీసులు నిరసనకారులను అదుపులోకి తీసుకున్నారు. ఇదే సమయంలో జ్ఞానేష్ కుమార్‌పై పార్లమెంట్‌లో అభిశంసన ప్రక్రియకు సంబంధించిన చర్యలను చేపట్టాలని ప్రతిపక్షాలు పరిశీలిస్తున్నాయి. కర్ణాటకలో కాంగ్రెస్ నేతలు ఎన్నికల సంఘం పనితీరుపై పోలీసులకు ఫిర్యాదు చేసినట్లు కూడా వార్తలు వచ్చాయి.

48 గంటల గడువు విధించిన సీజేపీ

ఈ వివాదంలో ‘కాక్రోచ్ జనతా పార్టీ’ (CJP) కూడా జోక్యం చేసుకుంది. పార్టీ వ్యవస్థాపకుడు అభిజీత్ దీప్కే.. జ్ఞానేష్ కుమార్ 48 గంటల్లోగా రాజీనామా చేయాలని డిమాండ్ చేశారు. రాజీనామా చేయకపోతే ‘జంతర్ మంతర్ 2.0’ తరహాలో నిరసన చేపడతామని హెచ్చరించారు. అక్టోబర్ 2, గాంధీ జయంతి నుంచి దేశవ్యాప్త ఉద్యమాన్ని ప్రారంభిస్తామని కూడా ప్రకటించారు. తొలి నిరసన ముంబయిలో నిర్వహించి, అనంతరం ఇతర నగరాలకు విస్తరిస్తామని ఆయన వెల్లడించారు.

ఎన్నికల ప్రక్రియలో అక్రమాలు జరుగుతున్నాయని ఆరోపిస్తూనే ప్రతిపక్షాలు ఎన్నికల్లో పాల్గొనడాన్ని కూడా దీప్కే ప్రశ్నించారు. ఎన్నికలను బహిష్కరించకుండా పోటీ చేయడం ద్వారా అదే ప్రక్రియకు రాజకీయ చెల్లుబాటు లభిస్తోందని ఆయన అభిప్రాయపడ్డారు. ఈ వ్యాఖ్యలు కూడా ప్రస్తుతం కొనసాగుతున్న ఈసీఐ వివాదంలో చర్చనీయాంశంగా మారాయి.

ఢిల్లీలో ఈసీఐ కార్యాలయం వద్ద భద్రత పెంపు

వరుస నిరసనలు, ఆందోళనలకు పిలుపుల నేపథ్యంలో ఢిల్లీలోని కేంద్ర ఎన్నికల సంఘం కార్యాలయం వద్ద భద్రతను కట్టుదిట్టం చేశారు. కాంగ్రెస్, యూత్ కాంగ్రెస్ కార్యకర్తలు నిరసనలకు సిద్ధమవుతున్న నేపథ్యంలో పోలీసులు అదనపు బలగాలను మోహరించారు. దేశంలోని ఇతర ప్రాంతాల్లోనూ నిరసనలు కొనసాగుతున్నాయి.

ఎల్‌నినో ప్ర‌భావంతో వ‌ర్షాలు పడకపోవడమే కాదు.. ల‌క్ష‌ల మంది చ‌నిపోనున్నారు. భార‌త్‌లో కూడా

Narender Vaitla — Wed, 23 Sep 2026 16:51:14 +0530

Super El Nino: ప్రపంచవ్యాప్తంగా వాతావరణ పరిస్థితులు వేగంగా మారుతున్నాయి. ప్రస్తుతం బలపడుతున్న ఎల్‌నినో ప్రభావంతో తీవ్రమైన వేడి పెరిగే అవకాశం ఉందని వాతావరణ నిపుణులు హెచ్చరిస్తున్నారు. దీంతో ఏకంగా 4.51 ల‌క్ష‌ల మంది మ‌ర‌ణించే అవ‌కాశం ఉంద‌ని అంటున్నారు.

ఎల్‌నినో ప్ర‌భావంతో 2026 సెప్టెంబర్ నుంచి 2027 ఫిబ్రవరి మధ్య ప్రపంచవ్యాప్తంగా సాధారణ సంవత్సరంతో పోలిస్తే సుమారు 4.51 లక్షల అదనపు వేడి సంబంధిత మరణాలు సంభవించే అవకాశం ఉందని క్లైమెట్ ఇంపాక్ట్ ల్యాబ్ అంచనా వేసింది. సాధారణంగా ఉండే ఉష్ణోగ్రతలతో పోలిస్తే రాబోయే కాలంలో అధిక వేడి కారణంగా ఎక్కువగా సంభవించే అవకాశం ఉన్న మరణాలను ఈ అంచనా సూచిస్తోంది. ఇందుకోసం 1996–2025 మధ్య కాలాన్ని సాధారణ పరిస్థితులకు ప్రాతిపదికగా తీసుకున్నారు. ఈ ప్రమాదం ముఖ్యంగా అభివృద్ధి చెందుతున్న దేశాలపై ఎక్కువగా ఉండొచ్చని రిపోర్టు పేర్కొంది. అధిక ఉష్ణోగ్రతలు వృద్ధులు, చిన్నారులు, బయట పనిచేసే కార్మికులు, ఇప్పటికే ఆరోగ్య సమస్యలు ఉన్నవారిపై ఎక్కువ ప్రభావం చూపే అవకాశం ఉంది.

ఎల్‌నినో ప్రభావంతో భారత్‌లో 2026 సెప్టెంబర్ నుంచి 2027 ఫిబ్రవరి మధ్య సుమారు 15,800 అదనపు వేడి సంబంధిత మరణాలు సంభవించే అవకాశం ఉందని అంచనా. ముఖ్యంగా భారత్‌లో ఈ ప్రభావం వచ్చే ఏడాది వేసవిలో కూడా కొనసాగవచ్చని పరిశోధకులు పేర్కొన్నారు. అంటే ఎల్‌నినో ప్రభావం ఫిబ్రవరితోనే పూర్తిగా ముగిసిపోతుందని భావించలేం. వేసవి కాలంలో అధిక ఉష్ణోగ్రతల ముప్పు మరింత పెరగవచ్చు.

ఈ అంచనా ప్రకారం ఆఫ్రికాలోని సాహెల్ ప్రాంతంపై ప్రభావం చాలా ఎక్కువగా ఉండొచ్చు. నైజీరియాలో 31,400, సూడాన్‌లో 17,500, నైజర్‌లో 10,000, చాద్‌లో 8,000 అదనపు వేడి సంబంధిత మరణాలు సంభవించే అవకాశం ఉందని అంచనా వేశారు. ఆగ్నేయాసియాలో ఫిలిప్పీన్స్, వియత్నాం, థాయ్‌లాండ్, కంబోడియా కలిపి సుమారు 19,400 అదనపు మరణాలు, ఇండోనేషియాలో 19,300, బ్రెజిల్‌లో 13,300 మరణాలు సంభవించే అవకాశం ఉందని రిపోర్టు పేర్కొంది.

ఎల్‌నినో అంటే పసిఫిక్ మహాసముద్రంలోని మధ్య, తూర్పు ప్రాంతాల్లో సముద్ర ఉపరితల నీటి ఉష్ణోగ్రతలు సాధారణం కంటే ఎక్కువగా పెరగడం. దీనివల్ల ప్రపంచంలోని అనేక ప్రాంతాల్లో వర్షపాతం, ఉష్ణోగ్రతలు మారిపోతాయి. ప్రస్తుతం ఎల్‌నినో మరింత బలపడుతోందని ప్రపంచ వాతావరణ సంస్థ (WMO) తెలిపింది. ఇది 2026 చివర్లో అత్యంత బలమైన స్థాయికి చేరుకునే అవకాశం ఉందని, 2027 ఫిబ్రవరి వరకు కొనసాగేందుకు దాదాపు 100 శాతం అవకాశం ఉందని WMO పేర్కొంది. అమెరికా వాతావరణ సంస్థ NOAA కూడా 2026 శీతాకాలంలో చాలా బలమైన ఎల్‌నినో ఏర్పడే అవకాశం 90 శాతానికి పైగా ఉందని తెలిపింది. తూర్పు భూమధ్యరేఖ పసిఫిక్ ప్రాంతంలో సముద్ర ఉష్ణోగ్రతలు సాధారణం కంటే 3°Cకిపైగా పెరిగినట్లు పేర్కొంది.

తీవ్రమైన వేడి పరిస్థితులు ఏర్పడితే ముందస్తు హెచ్చరికలు ఇవ్వడం, కూలింగ్ సెంటర్లను ఏర్పాటు చేయడం, తాగునీరు అందుబాటులో ఉంచడం, ఎండలో పనిచేసే కార్మికులకు రక్షణ కల్పించడం వంటి చర్యలు ప్రాణాలను కాపాడటంలో కీలకంగా మారతాయి. ఆరోగ్య వ్యవస్థలు కూడా హీట్‌వేవ్ పరిస్థితులను ఎదుర్కొనేలా సిద్ధంగా ఉండాలని నిపుణులు సూచిస్తున్నారు.

అయితే 4.51 లక్షల సంఖ్య కచ్చితంగా జరిగే మరణాల సంఖ్య కాదు. ఇది ప్రస్తుత వాతావరణ పరిస్థితులు, చారిత్రక డేటా ఆధారంగా రూపొందించిన అంచనా. ఎల్‌నినో ఎంత బలంగా కొనసాగుతుంది, ప్రాంతాల వారీగా ఉష్ణోగ్రతలు ఎలా మారుతాయి, ప్రభుత్వాలు ఎలాంటి ముందస్తు చర్యలు తీసుకుంటాయి అనే అంశాలపై వాస్తవ ప్రభావం ఆధారపడి ఉంటుంది.

ఈ ఫొటోలో ఉన్న వ్య‌క్తి ఆస్తి ల‌క్ష‌రాల రూ. 3 వేల కోట్లు.. ఇంత‌కీ ఎందుకిలా మారాడంటే

Narender Vaitla — Wed, 16 Sep 2026 16:57:17 +0530

Viral News: ముంబయి వీధుల్లో ఓ వ్యక్తి సాధారణ బిచ్చగాడిలా తిరుగుతూ కనిపించాడు. అయితే అతడెవరో తెలిసిన తర్వాత మాత్రం చాలామంది ఆశ్చర్యపోయారు. ఎందుకంటే ఆయన సామాన్య వ్యక్తి కాదు.. మహారాష్ట్రలో అత్యంత సంపన్న ఎమ్మెల్యేలలో ఒకరైన బీజేపీ నేత పరాగ్ షా.

ఘాట్‌కోపర్ ఈస్ట్ నియోజకవర్గానికి ప్రాతినిధ్యం వహిస్తున్న పరాగ్ షా రాజకీయ నాయకుడిగానే కాకుండా వ్యాపారవేత్తగా కూడా గుర్తింపు పొందారు. 2024 మహారాష్ట్ర అసెంబ్లీ ఎన్నికల సందర్భంగా సమర్పించిన అఫిడవిట్‌లో తన ఆస్తుల విలువ రూ.3,383 కోట్లకు పైగా ఉన్నట్లు ఆయన వెల్లడించారు. అలాంటి వ్యక్తి ఒక్కరోజు భిక్షాటన చేస్తూ కనిపించడంతో దీనికి కారణమేంటనే ఆసక్తి అందరిలోనూ నెలకొంది. సోషల్ మీడియాలో వైరల్ అయిన వీడియోలతో ఈ విషయం మరింత చర్చనీయాంశమైంది.

ఆధ్యాత్మిక సాధనలో భాగంగానే భిక్షాటన

పరాగ్ షా భిక్షగాడిగా మారడానికి వెనుక ఎలాంటి ఆర్థిక ఇబ్బంది లేదు. ఇది పూర్తిగా ఆధ్యాత్మిక సాధనలో భాగంగా ఆయన చేపట్టిన కార్యక్రమం. జైన సంప్రదాయంలోని ప్రత్యేక మాసం సందర్భంగా తన ఆధ్యాత్మిక గురువు సూచన మేరకు ఈ అనుభవాన్ని పొందాలని నిర్ణయించుకున్నట్లు ఆయన వెల్లడించారు. సంపద, హోదా, అధికారంతో సంబంధం లేకుండా ఒక సాధారణ వ్యక్తి జీవితాన్ని ప్రత్యక్షంగా అనుభవించడమే దీని ఉద్దేశంగా చెప్పవచ్చు. అందుకే తన భద్రతా సిబ్బందిని కూడా వెంట తీసుకెళ్లకుండా, సాధారణ వ్యక్తిగా జనంలో కలిసిపోయారు. ఎవరూ తనను గుర్తించకుండా ప్రత్యేకంగా రూపాన్ని మార్చుకుని ఘాట్‌కోపర్ ప్రాంతంలోని వీధుల్లో సంచరించారు.

ఈ అనుభవంలో తనను ఎక్కువగా కదిలించిన సంఘటనల్లో ఒకదాన్ని పరాగ్ షా ప్రత్యేకంగా గుర్తుచేసుకున్నారు. ఓ వ్యక్తి తనకు రూ.20 ఇచ్చి భోజనం చేయ‌మ‌ని చెప్పినట్లు తెలిపారు. ఆ డబ్బులు తీసుకుని సమోసాలు విక్రయించే వ్యక్తి వద్దకు వెళ్లారు. తన వద్ద డబ్బులు లేవని చెప్పడంతో ఆ వ్యాపారి ఎలాంటి అసహనం చూపకుండా సమోసాలు ఇచ్చినట్లు ఆయన వివరించారు.

సమోసాలు అమ్మే వ్యక్తి కూడా ఆర్థికంగా సాధారణ స్థితిలో ఉన్నప్పటికీ, తనకు సహాయం చేయడానికి ముందుకు రావడం పరాగ్ షాను ఆకట్టుకుంది. ముంబయి ప్రజల్లో ఇతరులకు సాయం చేసే మనస్తత్వాన్ని ఈ సంఘటన ద్వారా ప్రత్యక్షంగా చూశానని ఆయన పేర్కొన్నారు.

భిక్షగాడి రూపంలో తాను కలిసిన వ్యక్తులే తనకు ఆ రోజు ఆహారం, సహాయం అందించారని చెప్పారు. దీక్ష పూర్తయిన తర్వాత తన రూపాన్ని మార్చి మేకప్‌ను తొలగించుకుని, గతంలో తనకు సహాయం చేసిన కొందరిని మళ్లీ కలిశారు. వారితో మాట్లాడి తన అనుభవాన్ని వివరించి కృతజ్ఞతలు తెలిపారు.

దీని ద్వారా తనకు జీవితాన్ని చూసే విధానం మారిందని పరాగ్ షా తెలిపారు. ఎమ్మెల్యేగా ఉన్న సమయంలో ప్రజలు తనను కలవడానికి వస్తారని, ఆ సమయంలో తనకు లభించే గౌరవం, మర్యాదలు ప్రత్యేకంగా ఉంటాయని చెప్పారు. అదే వ్యక్తుల వద్దకు తాను ఒక సాధారణ బిచ్చగాడి రూపంలో వెళ్లినప్పుడు పరిస్థితి పూర్తిగా భిన్నంగా అనిపించిందని వివరించారు.

తన హోదా, ఆస్తులు, రాజకీయ స్థానం ఏవీ తెలియని సమయంలో ప్రజలు తనను కేవలం సహాయం అవసరమైన వ్యక్తిగానే చూశారని ఆయన పేర్కొన్నారు. ఒక వ్యక్తి విలువను మనం చూసే దృష్టికోణం ఎంత ప్రభావితం చేస్తుందో ఈ అనుభవం తనకు అర్థమయ్యేలా చేసిందన్నారు.

ప్రజల నుంచి వచ్చే గౌరవం శాశ్వతం కాదని, పరిస్థితులు మారితే మనిషిని చూసే విధానం కూడా మారుతుందని ఆయన అభిప్రాయపడ్డారు. తనకు లభించిన ఈ అనుభవాన్ని జీవితంలో మరిచిపోలేనిదిగా ఆయన అభివర్ణించారు.

పరాగ్ షా భిక్షగాడి వేషంలో కనిపించడంతో కొందరికి తెలుగు సినిమా ‘బిచ్చగాడు’ కథ గుర్తుకొచ్చింది. ఆ సినిమాలో సంపన్నుడైన అరుల్ తన తల్లి ఆరోగ్యం కోసం ఒక స్వామీజీ సూచన మేరకు నిర్దిష్ట కాలం ఎవరికీ తెలియకుండా బిచ్చగాడిగా జీవిస్తాడు. ఆ సమయంలో ఎదురయ్యే కష్టాలను అనుభవిస్తూ సాధారణ ప్రజల జీవితాన్ని దగ్గరగా చూస్తాడు.

ముంబయిలో జరిగిన పరాగ్ షా ఘటన కూడా పైకి చూస్తే ఆ సినిమా సన్నివేశాన్ని తలపించినప్పటికీ, ఆయన చేపట్టిన కార్యక్రమానికి సినిమా కథతో సంబంధం లేదు. జైన సంప్రదాయంలోని ఆధ్యాత్మిక సాధనలో భాగంగానే ఒకరోజు ఈ అనుభవాన్ని పొందినట్లు ఆయన వెల్లడించారు. తన ఆధ్యాత్మిక గురువు మార్గదర్శకత్వంలో దీనిని చేపట్టినట్లు స్పష్టం చేశారు.

भाजपा विधायक प्राग शाह भिखारी के रूप में सड़क किनारे बैठे और लोगों के बीच घूमते नजर आए ,,,वीडियो में मुंबई के घाटकोपर पूर्व विधानसभा क्षेत्र के विधायक पराग शाह भिखारी के वेश में देखकर हर कोई हैरान रह गया कि आखिर करोड़ों की संपत्ति वाले विधायक ने भिखारी का रूप क्यों धारण किया?… pic.twitter.com/gFNX9nPKmx

— TANVIR RANGREZ (@virjust18) September 14, 2026

రియల్ ఎస్టేట్ రంగం నుంచి రాజకీయాల్లోకి వచ్చిన పరాగ్ షా తొలుత కార్పొరేటర్‌గా రాజకీయ ప్రస్థానం ప్రారంభించి, అనంతరం ఘాట్‌కోపర్ ఈస్ట్ నుంచి ఎమ్మెల్యేగా ఎన్నికయ్యారు. 2024 అసెంబ్లీ ఎన్నికల అఫిడవిట్‌లో రూ.3,383 కోట్లకు పైగా ఆస్తులను ప్రకటించడంతో ఆయన దేశవ్యాప్తంగా కూడా వార్తల్లో నిలిచారు.

అలాంటి సంపన్న ప్రజాప్రతినిధి ఎలాంటి ఆడంబరం లేకుండా ఒకరోజు వీధుల్లో భిక్షాటన చేయడం ఇప్పుడు వైరల్‌గా మారింది. అయితే పరాగ్ షా దృష్టిలో ఇది ప్రచారం కోసం చేసిన కార్యక్రమం కాదని, తన జీవితాన్ని మరో కోణంలో అర్థం చేసుకునే ఆధ్యాత్మిక అనుభవమని ఆయన చెప్పుకొచ్చారు.

ఒకరోజు సాధారణ భిక్షగాడిగా జీవించడం ద్వారా ప్రజల దయ, ఆహారం విలువ, గౌరవం వెనుక ఉన్న సామాజిక దృష్టికోణం వంటి అంశాలను దగ్గరగా తెలుసుకున్నానని తెలిపారు. ముఖ్యంగా తనకు తెలియని వ్యక్తులు సైతం ఎలాంటి ప్రతిఫలం ఆశించకుండా ఆహారం, డబ్బు అందించడం మానవత్వంపై తన నమ్మకాన్ని మరింత పెంచిందని పరాగ్ షా వెల్లడించారు.

Kalki Bhagavan: ఎల్‌ఐసీ క్లర్క్ నుంచి రూ. 200 కోట్ల ఏకం సామ్రాజ్యం వరకు.. కల్కి భగవాన్ సంచలన లైఫ్ స్టోరీ ఇది

Mahesh Rajamoni — Wed, 30 Sep 2026 11:14:16 +0530

Spiritual Leader Kalki Bhagavan: ప్రముఖ ఆధ్యాత్మిక గురువు కల్కి భగవాన్ (77) చెన్నైలో కన్నుమూశారు. వరదయ్యపాళెంలోని ఏకం క్షేత్రంలో శనివారం ఆయన అంత్యక్రియలు జరగనున్నాయి.

సాధారణ కుటుంబంలో పుట్టి, క్లర్క్‌గా కెరీర్ స్టార్ట్ చేసి, ప్రపంచవ్యాప్తంగా లక్షలాది మంది అనుచరులను సంపాదించుకున్న ప్రముఖ ఆధ్యాత్మిక గురువు కల్కి భగవాన్ (77) ఇకలేరు. గత పది రోజులుగా ఆరోగ్య సమస్యలతో చెన్నైలోని ఒక ప్రైవేటు ఆసుపత్రిలో చికిత్స పొందుతున్న ఆయన మంగళవారం మధ్యాహ్నం 3 గంటలకు తుదిశ్వాస విడిచారు.

ఈ విషయాన్ని ఆయన కుమారుడు కృష్ణాజీ ఒక వీడియో మెసేజ్ ద్వారా అధికారికంగా కన్ఫర్మ్ చేశారు. ఆయన అసలు పేరు విజయ్ కుమార్ నాయుడు. 1949 మార్చి 7న తమిళనాడులోని వెల్లూరు జిల్లా నాథం గ్రామంలో జన్మించిన ఆయన, చెన్నై డి.జి. వైష్ణవ్ కాలేజీలో చదువు పూర్తి చేశాక ఎల్‌ఐసీ (LIC) క్లర్క్‌గా ఉద్యోగంలో చేరారు. కొన్ని రోజులు నేషనల్ ఇన్సూరెన్స్ ఏజెంట్‌గా, టీచర్‌గా కూడా బాధ్యతలు నిర్వహించారు.

1980ల చివర్లో కుప్పం నియోజకవర్గం శాంతిపురంలో ఆశ్రమాన్ని ఏర్పాటు చేసిన ఆయన, ఆ తర్వాత చిత్తూరు జిల్లాలో ప్రత్యామ్నాయ విద్యా విధానం కోసం ‘జీవాశ్రమ్’ అనే స్కూల్ ప్రారంభించారు. పిల్లల్లో ఆత్మపరిశీలన పెంపొందించడమే లక్ష్యంగా ఇది సాగింది. 1990ల ప్రారంభంలో (1992-1994 ప్రాంతంలో) తనను తాను విష్ణుమూర్తి పదో అవతారమైన ‘కల్కి’గా ప్రకటించుకున్నారు.

ఆ తర్వాత తన కేంద్రాలను తమిళనాడులోని నేమం, ఆంధ్రప్రదేశ్‌లోని వరదయ్యపాళేనికి విస్తరించారు. ధ్యానం, ‘ముక్తి దీక్ష’ (ఒనెనెస్ బ్లెస్సింగ్) పేరుతో సరికొత్త ఆధ్యాత్మిక కార్యక్రమాలను డిజైన్ చేసి, కేవలం ఇండియాలోనే కాకుండా విదేశీయులను కూడా భారీగా ఆకర్షించారు.

వరదయ్యపాళెం మండలం బత్తులవల్లం దగ్గర సుమారు రూ.200 కోట్ల అంచనా వ్యయంతో నిర్మించిన పాలరాతి నిర్మాణం ‘గోల్డెన్ సిటీ’ (ఏకం ఆలయం/వన్‌నెస్‌ టెంపుల్) ఆయన ఆధ్యాత్మిక కార్యకలాపాలకు మెయిన్ హబ్‌గా మారింది. కల్కి గ్రామీణాభివృద్ధి ట్రస్ట్, వన్నెస్ హ్యూమన్, లోకా ఫౌండేషన్, ముక్తి వంటి సంస్థల ద్వారా తాగునీరు, ఉచిత కంటి వైద్యశిబిరాలు, విద్యా సాయం వంటి సామాజిక కార్యక్రమాలు కూడా చేపట్టారు.

అయితే, ఆయన ఆధ్యాత్మిక ప్రయాణంతో పాటు వివాదాలు కూడా నడిచాయి. కమర్షియలైజేషన్, భూ వివాదాలతో పాటు 2019 అక్టోబర్‌లో ఐటీ శాఖ జరిపిన సోదాలు దేశవ్యాప్తంగా పెద్ద సంచలనం సృష్టించాయి. ఈ దాడుల్లో పెద్ద ఎత్తున నగదు, విదేశీ కరెన్సీ, బంగారం లభ్యమైనట్లు అప్పట్లో అధికారులు వెల్లడించారు. 2017 నుంచే సంస్థల బాధ్యతలను తన కుమారుడు ఎన్.కె.వి. కృష్ణ, కోడలు ప్రీతా కృష్ణలకు అప్పగించి ఆయన విశ్రాంతి తీసుకుంటున్నారు.

కల్కి భగవాన్ భౌతికకాయాన్ని బుధవారం ఉదయం తిరుపతి జిల్లా వరదయ్యపాళెం మండలంలోని ఏకం క్షేత్రానికి తీసుకువచ్చారు. బుధవారం నుంచి శుక్రవారం మధ్యాహ్నం వరకు మూడు రోజుల పాటు భక్తుల సందర్శనార్థం పార్థివదేహాన్ని ఇక్కడే ఉంచనున్నారు. ప్రపంచవ్యాప్తంగా ఉన్న భక్తుల కోసం ఆన్‌లైన్ ద్వారా లైవ్ దర్శన ఏర్పాట్లు కూడా చేశారు.

విదేశాల నుంచి, ఇతర రాష్ట్రాల నుంచి భక్తులు భారీగా తరలివచ్చే అవకాశం ఉండటంతో పోలీసు భద్రతను కట్టుదిట్టం చేశారు. శనివారం ఏకం ఆలయ ప్రాంగణంలోనే అధికారిక లాంఛనాలు, సాంప్రదాయాల ప్రకారం అంత్యక్రియలు నిర్వహించి, సమాధి నిర్మాణం చేపడతామని ట్రస్ట్ నిర్వాహకులు తెలిపారు.

Bank Holidays : ఈ శనివారం బ్యాంకులకు సెలవుందా? రేపట్నుంచి వరుసగా మూడ్రోజులు సెలవేనా?

Arun Kumar P — Thu, 01 Oct 2026 15:30:29 +0530

అక్టోబర్ 2 గాంధీ జయంతి, అక్టోబర్ 3 శనివారం, అక్టోబర్ 4 ఆదివారం… వరుసగా మూడ్రోజులు బ్యాంక్ ఉద్యోగులకు సెలవులు ఉన్నట్లు ప్రచారం జరుగుతోంది. మరి నిజంగానే ఈ శనివారం బ్యాంకులకు సెలవుందా?

Bank Holidays : బ్యాంకు ఖాతాదారులకు ముఖ్యమైన అలర్ట్. బ్యాంకులు వారానికి ఐదు రోజులు మాత్రమే పనిచేయనున్నాయని, ఇకపై ప్రతి శనివారం బ్యాంకులకు సెలవు ఉంటుందని సోషల్ మీడియాలో ఓ వార్త వైరల్ అవుతోంది. దీనికి సంబంధించినట్లుగా కనిపిస్తున్న ఓ గెజిట్ నోటిఫికేషన్ కూడా సోషల్ మీడియాలో విపరీతంగా షేర్ అవుతోంది. దీంతో అక్టోబర్ నుంచి బ్యాంకుల పని విధానంలో మార్పులు వచ్చేశాయా? ఈ శనివారం బ్యాంకులు తెరుచుకుంటాయా? లేదా? అనే సందేహాలు కస్టమర్లలో మొదలయ్యాయి.

అయితే ఈ ప్రచారంపై కేంద్ర ప్రభుత్వం స్పష్టత ఇచ్చింది. ప్రతి శనివారం బ్యాంకులకు సెలవు ప్రకటిస్తూ కేంద్ర ఆర్థిక శాఖ ఎలాంటి ఉత్తర్వులు జారీ చేయలేదని PIB Fact Check వెల్లడించింది. సోషల్ మీడియాలో చక్కర్లు కొడుతున్న గెజిట్ నోటిఫికేషన్ నకిలీదని స్పష్టం చేసింది. కాబట్టి ప్రస్తుతానికి బ్యాంకుల సెలవుల విషయంలో ఎలాంటి కొత్త మార్పు లేదని గుర్తుంచుకోవాలి.

బ్యాంకు ఉద్యోగులు చాలా కాలంగా వారానికి ఐదు రోజుల పని విధానాన్ని అమలు చేయాలని డిమాండ్ చేస్తున్నారు. అంటే సోమవారం నుంచి శుక్రవారం వరకు మాత్రమే బ్యాంకులు పనిచేయాలని.. శని, ఆదివారాలు వారాంతపు సెలవులుగా ప్రకటించాలని ఉద్యోగ సంఘాలు కోరుతున్నాయి.

ఇటీవల ఈ డిమాండ్‌పై బ్యాంకు ఉద్యోగుల సంఘాలు దేశవ్యాప్త సమ్మెకు కూడా పిలుపునిచ్చాయి. సెప్టెంబర్ 28 నుంచి 30 వరకు మూడు రోజుల సమ్మె నిర్వహించాలని యునైటెడ్ ఫోరం ఆఫ్ బ్యాంక్ యూనియన్స్ (UFBU) నిర్ణయించింది.. అయితే ఈ డిమాండ్ పై చర్చించేందుకు కేంద్ర ప్రభుత్వం సిద్దమవడంతో సమ్మె వాయిదా పడింది. ఈ నేపథ్యంలోనే ఐదు రోజుల బ్యాంకింగ్‌పై కేంద్రం నిర్ణయం తీసుకుందంటూ సోషల్ మీడియాలో ప్రచారం ఊపందుకుంది.

ప్రతి శనివారం సెలవు అంటూ ఫేక్ గెజిట్

ఇలా కేంద్ర ఆర్థిక శాఖ పేరుతో ఓ పేక్ గెజిట్ నోటిఫికేషన్ వైరల్ అయింది. స్టేట్ బ్యాంక్ ఆఫ్ ఇండియా (SBI) సహా అన్ని ప్రభుత్వ రంగ బ్యాంకులకు ఇకపై ప్రతి శనివారం సెలవు ఉంటుందని అందులో పేర్కొన్నట్లు ప్రచారం జరుగుతోంది.

ప్రభుత్వ ఉత్తర్వులా కనిపించేలా రూపొందించిన ఈ పత్రాన్ని చూసి చాలామంది ఇది నిజమైన గెజిట్ అని భావిస్తున్నారు. ముఖ్యంగా బ్యాంకు ఉద్యోగుల ఐదు రోజుల పని వారంపై డిమాండ్, తాజాగా జరిగిన సమ్మె నేపథ్యంలో ఈ ప్రచారం మరింత నమ్మదగినదిగా కనిపించింది. కానీ ఇందులో వాస్తవం లేదు.

PIB Fact Check ఏం చెప్పింది?

వైరల్ అవుతున్న గెజిట్ నోటిఫికేషన్‌ను PIB Fact Check నకిలీదిగా తేల్చింది. ప్రతి శనివారం బ్యాంకులకు సెలవు ప్రకటిస్తూ కేంద్ర ఆర్థిక శాఖ ఎలాంటి నోటిఫికేషన్ జారీ చేయలేదని స్పష్టం చేసింది. అంటే సోషల్ మీడియాలో కనిపిస్తున్న గెజిట్‌ను ఆధారంగా చేసుకుని బ్యాంకుల పని విధానంలో మార్పు వచ్చిందని భావించకూడదు.

అక్టోబర్ నుండి బ్యాంక్ ఉద్యోగులకు వారానికి రెండ్రోజుల సెలవుల విధానం అమలు అవుతుందనే ప్రచారం సాగుతోంది. అంటే ఈ వారాంతం వరుసగా మూడ్రోజులు (అక్టోబర్ 2,3,4) బ్యాంకులకు సెలవు అనే ప్రచారం సాగుతోంది. అక్టోబర్ 2న గాంధీ జయంతి, అక్టోబర్ 3న శనివారం, అక్టోబర్ 4 ఆదివారం సెలవులు ఉంటాయంటున్నారు.... కానీ అక్టోబర్ 3న బ్యాంకులు యదావిధిగా నడుస్తాయి... శనివారం సెలవు లేదని PIB Fact Check స్పష్టం చేసింది.

A Gazette circulating on social media , purportedly issued by the Ministry of Finance (Department of Financial Services), claims that the Central Government has declared every Saturday a public holiday for all Public Sector Banks , including SBI.#PIBFactCheck:❌ The document… pic.twitter.com/ClCqEt2UAX

— PIB Fact Check (@PIBFactCheck) October 1, 2026

వారానికి ఐదు రోజుల పని విధానం బ్యాంకు ఉద్యోగుల ప్రధాన డిమాండ్లలో ఒకటి. ప్రస్తుతం నెలలో రెండో, నాలుగో శనివారాలు బ్యాంకులకు సెలవు. మిగతా శనివారాల్లో సాధారణంగా బ్యాంకు శాఖలు పనిచేస్తాయి. ఈ శనివారాలు కూడా సెలవు ఇవ్వాలని బ్యాంక్ ఉద్యోగులు కోరుతున్నారు. మొత్తంలో నెలలో ప్రతి శని, ఆదివారం సెలవు కావాలని కోరుతున్నారన్నమాట. దీనితో పాటు పెన్షన్ సంబంధిత అంశాలు, పనితీరు ఆధారిత ప్రోత్సాహక పథకం (PLI) తదితర సమస్యలను కూడా బ్యాంకు ఉద్యోగుల యూనియన్లు ప్రస్తావించాయి.

సెప్టెంబర్ 28 నుంచి మూడు రోజుల పాటు జరగాల్సిన సమ్మె చివరి నిమిషంలో వాయిదా పడింది. ఐదు రోజుల బ్యాంకింగ్‌పై, శనివారం సెలవుల అంశాన్ని పరిశీలించేందుకు ఉన్నతస్థాయి కమిటీ ఏర్పాటు చేయాలని ప్రభుత్వం నిర్ణయించారు. దీంతో UFBU మూడు రోజుల సమ్మెను వాయిదా వేసింది. ఫలితంగా సెప్టెంబర్ 28, 29, 30 తేదీల్లో బ్యాంకు శాఖలు సమ్మె కారణంగా మూసివేయాల్సిన పరిస్థితి తప్పింది.

ప్రస్తుతం బ్యాంకులకు శనివారం సెలవులు ఎలా ఉన్నాయి?

ప్రస్తుతం అమల్లో ఉన్న విధానం ప్రకారం నెలలో రెండో, నాలుగో శనివారాలు బ్యాంకులకు సెలవు ఉంటుంది. మిగతా శనివారాలు సాధారణంగా బ్యాంకులు పనిచేస్తాయి. అంటే మొదటి, మూడో శనివారాలు సాధారణ పని దినాలుగా ఉంటాయి. ఐదో శనివారం ఉన్న నెలల్లో ఆ రోజు కూడా బ్యాంకులు సాధారణంగా పనిచేస్తాయి. ఈ విధానంలో మార్పు రావాలంటే సంబంధిత అధికారిక నిర్ణయం, నోటిఫికేషన్ అవసరం.

ఇదే ఇప్పుడు అందరి ముందున్న అసలు ప్రశ్న. బ్యాంకు ఉద్యోగుల సంఘాలు ఐదు రోజుల పని వారాన్ని చాలా కాలంగా డిమాండ్ చేస్తున్నాయి. 2024లో జరిగిన బ్యాంకింగ్ రంగంలోని ద్వైపాక్షిక ఒప్పంద ప్రక్రియలో కూడా అన్ని శనివారాలను సెలవులుగా మార్చే అంశం ప్రస్తావనకు వచ్చింది. అయితే దానిని అమలు చేయడానికి ప్రభుత్వ ఆమోదం అవసరం.

తాజా చర్చల తర్వాత IBA, UFBU కలిసి ఉన్నతస్థాయి కమిటీ ద్వారా మిగిలిన శనివారాల సెలవు అంశాన్ని పరిశీలించేందుకు అంగీకరించాయి. కానీ ఇది ఇప్పటికే ఐదు రోజుల బ్యాంకింగ్ వారం అమల్లోకి వచ్చిందని అర్థం కాదు. ప్రభుత్వం అధికారికంగా నిర్ణయం తీసుకునే వరకు ప్రస్తుత విధానమే కొనసాగుతుంది.

కస్టమర్లు ఏం గుర్తుంచుకోవాలి?

ప్రస్తుతం బ్యాంకులకు ప్రతి శనివారం సెలవు వచ్చిందనే వార్తను నమ్మాల్సిన అవసరం లేదు. సోషల్ మీడియాలో వైరల్ అవుతున్న గెజిట్‌ను చూసి బ్యాంకు పని దినాల గురించి నిర్ణయం తీసుకోవడం సరికాదు. బ్యాంకుకు వెళ్లాల్సినప్పుడు సంబంధిత బ్యాంకు శాఖ పని దినాన్ని ముందుగానే చెక్ చేసుకోవడం మంచిది. సెలవులు, శాఖల పని వేళలకు సంబంధించిన తాజా సమాచారాన్ని బ్యాంకు అధికారిక వెబ్‌సైట్, RBI లేదా కేంద్ర ప్రభుత్వ అధికారిక ప్రకటనల ద్వారా నిర్ధారించుకోవచ్చు.

అందువల్ల “ఇకపై ప్రతి శనివారం బ్యాంకులకు సెలవు” అనే ప్రచారం ప్రస్తుతం నిజం కాదు. ఐదు రోజుల బ్యాంకింగ్ వారంపై ఉద్యోగ సంఘాల డిమాండ్ మాత్రం కొనసాగుతోంది. ఈ అంశంపై భవిష్యత్తులో ప్రభుత్వం తీసుకునే అధికారిక నిర్ణయం మాత్రమే తుది మార్పును నిర్ధారిస్తుంది.

Delhi: కీలక నిర్ణయాలను ఆమోదించిన కేంద్ర కేబినెట్.. వారికి గుడ్ న్యూస్

Narender Vaitla — Wed, 30 Sep 2026 17:18:30 +0530

ఆరు రబీ పంటలకు పెరిగిన MSP

2027-28 రబీ మార్కెటింగ్ సీజన్ కోసం ఆరు పంటల కనీస మద్ధతు ధరలను కేంద్రం పెంచింది. రైతులకు ఉత్పత్తి వ్యయానికి తగిన ప్రతిఫలం అందించడంతో పాటు పప్పుధాన్యాలు, నూనెగింజల సాగును ప్రోత్సహించడం ఈ నిర్ణయం వెనుక ప్రధాన ఉద్దేశంగా ప్రభుత్వం పేర్కొంది. తాజా పెంపులో కుసుమకు క్వింటాల్‌కు రూ.675 అత్యధికంగా లభించింది. ఆవాలు-రాప్‌సీడ్‌కు రూ.413, మసూర్‌కు రూ.390, బార్లీకి రూ.136, శనగకు రూ.83, గోధుమకు రూ.25 చొప్పున MSP పెరిగింది.

ఏ పంటకు ఎంత MSP?

తాజా నిర్ణయం తర్వాత గోధుమ MSP క్వింటాల్‌కు రూ.2,610కి చేరింది. బార్లీ రూ.2,286, శనగ రూ.5,958, మసూర్ రూ.7,390, ఆవాలు-రాప్‌సీడ్ రూ.6,613, కుసుమ రూ.7,215గా నిర్ణయించారు. ఈ ధరల ద్వారా రైతులకు మార్కెట్ పరిస్థితులతో సంబంధం లేకుండా కనీస ధరకు సంబంధించిన ఒక విధమైన భరోసా లభించాలన్నది MSP విధానం ఉద్దేశం. పంటల సాగులో వైవిధ్యం తీసుకురావడానికి కూడా తాజా పెంపు దోహదపడుతుందని కేంద్రం తెలిపింది.

ఢిల్లీలో 42 కారిడార్లకు స్మార్ట్ ట్రాఫిక్ వ్యవస్థ

దేశ రాజధానిలో ట్రాఫిక్ నిర్వహణను సాంకేతికత ఆధారంగా మార్చేందుకు రూ.1,789.52 కోట్లతో ఇంటెలిజెంట్ ట్రాఫిక్ మేనేజ్‌మెంట్ సిస్టమ్‌కు కేంద్ర కేబినెట్ ఆమోదం తెలిపింది. మూడు దశల్లో 24 నెలల వ్యవధిలో ఢిల్లీలోని 42 ప్రధాన ట్రాఫిక్ కారిడార్లను ఈ వ్యవస్థ పరిధిలోకి తీసుకురానున్నారు. AI ఆధారిత అడాప్టివ్ సిగ్నల్స్, రియల్‌టైమ్ ట్రాఫిక్ సమాచారం, ట్రాఫిక్ కమాండ్ అండ్ కంట్రోల్ వ్యవస్థలతో వాహనాల రద్దీని పర్యవేక్షించనున్నారు. అత్యవసర పరిస్థితుల్లో అంబులెన్సులు, ఇతర ఎమర్జెన్సీ వాహనాలకు సిగ్నల్ ప్రాధాన్యం కల్పించే విధానాన్ని కూడా ఇందులో పొందుపరిచారు.

ట్రాఫిక్ ఉల్లంఘనలపై టెక్నాలజీతో నిఘా

కొత్త ITMSలో కేవలం ట్రాఫిక్ ప్రవాహాన్ని నియంత్రించడమే కాకుండా ఉల్లంఘనలను గుర్తించే ఆటోమేటెడ్ ఎన్‌ఫోర్స్‌మెంట్ వ్యవస్థలు కూడా ఉంటాయి. రాంగ్ రూట్ డ్రైవింగ్, అతివేగం, రెడ్‌లైట్ జంపింగ్, హెల్మెట్ లేకుండా ప్రయాణించడం, సీట్‌బెల్ట్ వినియోగించకపోవడం వంటి ఉల్లంఘనలను సాంకేతికత ద్వారా గుర్తించేలా వ్యవస్థను రూపొందించనున్నారు. ప్రమాదాలు, ట్రాఫిక్ జామ్‌లను వేగంగా గుర్తించి సంబంధిత విభాగాలకు సమాచారం అందించడం ద్వారా స్పందన సమయాన్ని తగ్గించే లక్ష్యం ఉంది.

గ్రీన్ ఎనర్జీ కారిడార్-3కు భారీ కేటాయింపు

పునరుత్పాదక విద్యుత్‌ను దేశ విద్యుత్ గ్రిడ్‌లోకి మరింత సమర్థంగా తీసుకురావడానికి గ్రీన్ ఎనర్జీ కారిడార్ ఫేజ్-3కు కేంద్రం ఆమోదం తెలిపింది. ఈ ప్రాజెక్టు అంచనా వ్యయం రూ.1,86,405 కోట్లు. సుమారు 135 గిగావాట్ల వరకు పునరుత్పాదక విద్యుత్‌ను గ్రిడ్‌తో అనుసంధానించే సామర్థ్యాన్ని అభివృద్ధి చేయనున్నారు. ఇందులో 50 GWh బ్యాటరీ ఎనర్జీ స్టోరేజ్ సిస్టమ్స్ ఏర్పాటు కూడా ప్రతిపాదించారు. కేంద్ర ఆర్థిక సహాయం రూ.54,082 కోట్లుగా ఉండనుంది. 2032-33 ఆర్థిక సంవత్సరం నాటికి ప్రాజెక్టును పూర్తి చేయాలని లక్ష్యంగా పెట్టుకున్నారు. దేశంలో పెరుగుతున్న సౌర, పవన విద్యుత్ ఉత్పత్తిని గ్రిడ్‌లోకి తీసుకురావడానికి అవసరమైన ప్రసార మౌలిక వసతులను బలోపేతం చేయడం ఈ కార్యక్రమం ప్రధాన ఉద్దేశం.

Indian Railways Free Travel: నవంబర్ 1 నుంచి రైల్వే కొత్త రూల్.. వారికి ఉచితంగా ఏసీ ట్రావెల్ !

Mahesh Rajamoni — Thu, 17 Sep 2026 08:04:23 +0530

Indian Railways Free AC Travel: భారతీయ సైనికులకు రక్షణ శాఖ బిగ్ గిఫ్ట్ ప్రకటించింది. నవంబర్ 1 నుంచి వీర పురస్కార గ్రహీతలకు రైళ్లలో ఉచిత 1st, 2nd ఏసీ ప్రయాణ సదుపాయం కల్పించనున్నారు. ఆ వివరాలు ఇక్కడ చూద్దాం.

దేశ రక్షణ కోసం తమ ప్రాణాలను పణంగా పెట్టి అసాధారణ ధైర్యసాహసాలను ప్రదర్శించిన వీర జవాన్లకు కేంద్ర రక్షణ మంత్రిత్వ శాఖ ఒక సూపర్ గిఫ్ట్ ప్రకటించింది. దేశ సరిహద్దుల్లో అతులిత త్యాగాలు చేసిన సైనికులను, వారి కుటుంబాలను గౌరవించేందుకు కేంద్రం ఒక ముఖ్యమైన నిర్ణయం తీసుకుంది.

ఇకపై సేనా పతక్, నౌసేనా పతక్, వాయుసేనా పతక్ పురస్కారాలు అందుకున్న యోధులకు భారతీయ రైల్వేలో జీవితాంతం ఉచితంగా ప్రయాణించే సదుపాయం లభించనుంది. ఈ కొత్త నిబంధనలు, డిజిటల్ సేవలు ఈ ఏడాది నవంబర్ 1వ తేదీ నుంచి అమలులోకి రానున్నాయి. ఈ ప్రక్రియ మొత్తాన్ని చాలా సులభంగా, పూర్తి డిజిటల్ రూపంలో అందుబాటులోకి తెచ్చారు.

ఈ పథకం కింద అర్హులైన లబ్ధిదారులు భారతీయ రైల్వేలోని ఫస్ట్ క్లాస్ ఏసీ, సెకండ్ ఏసీ, ఏసీ ఛైర్ కార్‌లలో ఉచితంగా ప్రయాణించవచ్చు. ఈ లైఫ్‌టైమ్ ఫ్రీ ట్రావెల్ వెసులుబాటు వీరత్వ పురస్కార గ్రహీతలతో పాటు వారి జీవిత భాగస్వాములకు (భార్య లేదా భర్త) కూడా జీవితాంతం వర్తిస్తుంది. ఒకవేళ పురస్కార గ్రహీత మరణించి, వారి భాగస్వామి మిగిలి ఉంటే.. వారు రెండో పెళ్లి చేసుకునే వరకు ఈ సౌకర్యం చెల్లుబాటులో ఉంటుంది. అంతేకాకుండా, చాలా చిన్న వయస్సులోనే దేశం కోసం అత్యున్నత త్యాగం చేసిన అమరవీరుల త్యాగాన్ని కూడా ప్రభుత్వం ప్రత్యేకంగా గుర్తించింది. పెళ్లి కాకుండానే మరణానంతరం వీరత్వ పురస్కారం పొందిన సైనికుల తల్లిదండ్రులను కూడా ఈ పథకంలో లబ్ధిదారులుగా చేర్చారు.

ఈ సదుపాయాన్ని వినియోగించుకునే పద్ధతిని రక్షణ మంత్రిత్వ శాఖ అత్యంత సులభంగా, పారదర్శకంగా తీర్చిదిద్దింది. ఈ లబ్ధిని పొందడానికి లబ్ధిదారులు ఎలాంటి ప్రభుత్వ ఆఫీసుల చుట్టూ తిరగాల్సిన అవసరం లేదు. అర్హులైన వారు భారతీయ రైల్వే కన్సెషన్ కార్డ్ పోర్టల్‌లోకి వెళ్లి ఆన్‌లైన్‌లో ఉచితంగా రిజిస్ట్రేషన్ చేసుకోవాల్సి ఉంటుంది. పోర్టల్‌లో డాక్యుమెంట్ల వెరిఫికేషన్, ధృవీకరణ పూర్తయిన వెంటనే, అభ్యర్థులకు ఆన్‌లైన్ ఎలక్ట్రానిక్ ట్రావెల్ పాస్ జారీ అవుతుంది. దీనివల్ల ప్రయాణికులకు సమయం ఆదా అవ్వడంతో పాటు ఎలాంటి పేపర్ వర్క్ ఉండదు.

డిజిటల్ ట్రావెల్ పాస్ పొందిన తర్వాత అర్హులైన లబ్ధిదారులు తమ రైలు టికెట్లను చాలా ఈజీగా బుక్ చేసుకోవచ్చు. ఎలక్ట్రానిక్ పాస్ ఆధారంగా టికెట్లు బుక్ చేసుకునే ఆన్‌లైన్ సౌకర్యం నవంబర్ 1 నుంచి భారతీయ రైల్వే ఐఆర్‌సీసీపీ (IRCCP) వెబ్ పోర్టల్‌లో అందుబాటులోకి వస్తుంది. ఈ పూర్తి డిజిటల్ పేపర్‌లెస్ సిస్టమ్ వల్ల అనవసర ఆలస్యం తగ్గుతుంది. ఆఫీసుల చుట్టూ తిరిగే తిప్పలు తప్పడమే కాకుండా, సైనికులు వారి ఇంట్లో నుంచే ఎలాంటి పేపర్ వర్క్ అవసరం లేకుండా క్షణాల్లో ఉచిత రైలు టికెట్ పొందే వెసులుబాటు లభిస్తుంది.

సైనికులు, వారి కుటుంబాల సంక్షేమం పట్ల ప్రభుత్వానికి ఉన్న నిబద్ధతకు ఈ నిర్ణయం ఒక నిదర్శనమని రక్షణ రంగానికి చెందిన నిపుణులు భావిస్తున్నారు. అత్యంత కఠినమైన పరిస్థితుల్లో, ప్రాణాలకు తెగించి సైనికులు సరిహద్దులను ఎలాగైతే కాపాడారో.. వారి త్యాగాలను స్మరించుకోవడం, గౌరవించడం ప్రతి పౌరుడి, దేశం బాధ్యత. ప్రభుత్వం తీసుకున్న ఈ చరిత్రాత్మక అడుగు ప్రస్తుతం విధుల్లో ఉన్న సైనికులకు, రిటైర్డ్ జవాన్లకు మరింత మనోధైర్యాన్ని ఇస్తుంది. అంతేకాకుండా, రాబోయే తరాలకు, నేటి యువతకు దేశభక్తి భావనను నింపడానికి, సైన్యంలో చేరేందుకు ఇదొక గొప్ప ప్రేరణగా నిలుస్తుందని చెప్పవచ్చు.

పై నుంచి చూస్తే ఇడ్లీ, రాగి పిండి క‌వ‌ర్లు.. ఓపెన్ చేసి చూడ‌గా అధికారుల‌ ఫ్యూజులు అవుట్

Narender Vaitla — Sat, 26 Sep 2026 18:08:27 +0530

Gold Smuggling: అధికారులు ఎన్ని జాగ్ర‌త్త‌లు తీసుకుంటున్నా అక్ర‌మ ర‌వాణా మాత్రం ఆగ‌డం లేదు. ర‌క‌ర‌కాల మార్గాల్లో బంగారాన్ని ఇత‌ర దేశాల నుంచి భార‌త‌దేశానికి తీసుకొస్తున్నారు కేటుగాళ్లు. తాజాగా ముంబైలో విస్తుపోయే విష‌యం ఒక‌టి వెలుగులోకి వ‌చ్చింది.

ముంబై ఛత్రపతి శివాజీ మహారాజ్ అంతర్జాతీయ విమానాశ్రయంలో భారీ బంగారం అక్రమ రవాణా వ్యవహారం బయటపడింది. సాధారణంగా ఇంట్లో వంటకు ఉపయోగించే ఆహార పదార్థాల రూపంలో బంగారాన్ని దాచిపెట్టి తరలించిన ఘటన కలకలం రేపుతోంది. దుబాయ్ నుంచి ముంబైకి వచ్చిన ముగ్గురు ప్రయాణికుల లగేజీని తనిఖీ చేసిన డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు ఈ అక్రమ రవాణాను గుర్తించారు. ఇడ్లీ రవ్వ, రాగి పిండి, కార్న్‌ఫ్లోర్, పాల పొడి, ఓట్స్, బియ్యపు పిండి, నుటెల్లా, కొబ్బరి పాల పొడి, కేక్ మిక్స్ వంటి పదార్థాల్లో బంగారాన్ని కలిపి తీసుకొచ్చినట్లు అధికారులు గుర్తించారు.

సెప్టెంబర్ 23 తెల్లవారుజామున దుబాయ్ నుంచి వచ్చిన ముగ్గురు ప్రయాణికులపై డీఆర్ఐ అధికారులకు ముందుగానే సమాచారం అందింది. దీంతో ముంబై జోనల్ యూనిట్ అధికారులు, ఎయిర్‌పోర్ట్ కస్టమ్స్ ఎయిర్ ఇంటెలిజెన్స్ యూనిట్ సిబ్బందితో కలిసి తనిఖీలు చేపట్టారు. ప్రయాణికుల లగేజీని పరిశీలించిన సమయంలో సాధారణంగా కనిపించే ఆహార పదార్థాల ప్యాకెట్లపై అనుమానం కలిగింది. వాటిని తెరిచి పరీక్షించగా అసలు విషయం బయటపడింది. బయటికి చూస్తే పిండి, పొడి పదార్థాల్లా కనిపించినప్పటికీ వాటిలో విలువైన లోహం ఉన్నట్లు పరీక్షల్లో తేలింది.

ఈ స్మగ్లింగ్‌లో ఉపయోగించిన పద్ధతి అధికారులను కూడా షాక్‌కి గురి చేసింది. బంగారాన్ని చిన్న ముక్కలుగా లేదా ఆభరణాల రూపంలో కాకుండా అత్యంత మెత్తటి పొడి రూపంలోకి మార్చి ఆహార పదార్థాల్లో కలిపినట్లు గుర్తించారు. ఇడ్లీ రవ్వ, రాగి పిండి, కార్న్‌ఫ్లోర్, పాల పొడి, ఓట్స్, బియ్యపు పిండి వంటి పదార్థాలతో పాటు న్యుటెల్లా, కొబ్బరి పాల పొడి, కేక్ మిక్స్‌లోనూ ఈ మిశ్రమాన్ని దాచారు. మొత్తం 33.50 కిలోల ఆహార పదార్థాలను అధికారులు స్వాధీనం చేసుకుని వాటిని విడిగా పరిశీలించారు. ప్రత్యేక పరీక్షల అనంతరం ఆ మిశ్రమంలో 24 క్యారెట్ల బంగారం ఉన్నట్లు నిర్ధారించారు.

అధికారుల వివరాల ప్రకారం, స్వాధీనం చేసుకున్న మిశ్రమాల నుంచి మొత్తం 9.40 కిలోల విదేశీ బంగారాన్ని వెలికితీశారు. ఇది 24 క్యారెట్ల బంగారం కాగా, దాని స్వచ్ఛత 99.99 శాతంగా ఉన్నట్లు నిర్ధారణ అయింది. పట్టుబడిన బంగారం విలువ సుమారు రూ.14.81 కోట్లుగా అధికారులు వెల్లడించారు. గతంలో బంగారాన్ని దుస్తులు, షూస్, లగేజీ భాగాలు, ఇతర వస్తువుల్లో దాచిన ఘటనలు వెలుగులోకి వచ్చినప్పటికీ.. ఇది పూర్తిగా భిన్నంగా ఉండ‌డం అధికారుల‌ను సైతం విస్తుపోయేలా చేసింది.

ఈ వ్యవహారంలో పట్టుబడిన ముగ్గురు ప్రయాణికులను కస్టమ్స్ చట్టం-1962 కింద అధికారులు అరెస్ట్ చేశారు. ప్రాథమిక దర్యాప్తులో వీరికి ఒక వ్యవస్థీకృత బంగారం అక్రమ రవాణా ముఠాతో సంబంధాలు ఉన్నట్లు అధికారులు గుర్తించినట్లు తెలిపారు. దుబాయ్ నుంచి తీసుకొచ్చిన బంగారాన్ని ముంబైలో ఎవరికి అప్పగించాల్సి ఉంది? ఈ వ్యవహారం వెనుక ఉన్న ప్రధాన వ్యక్తులు ఎవరు? గతంలోనూ ఇదే తరహాలో బంగారాన్ని తరలించారా? అనే అంశాలపై విచారణ కొనసాగుతోంది.

ఇక ఓటర్లు BLOల వద్దకు వెళ్లాల్సిన అవసరం లేదు.. SIRపై ఎన్నికల సంఘం కీలక నిర్ణయం

Narender Vaitla — Sat, 26 Sep 2026 22:38:14 +0530

ఇంటి వద్దకే BLOలు, పత్రాల సేకరణ

SIR నోటీసు అందుకున్న ఓటర్లకు ప్రక్రియను సులభతరం చేసేలా ఈ నిర్ణయం తీసుకున్నట్లు ఎన్నికల సంఘం వెల్లడించింది. నోటీసులో పేర్కొన్న అంశాలకు సంబంధించి అవసరమైన పత్రాలను సిద్ధంగా ఉంచితే.. వాటిని పరిశీలించేందుకు BLOలు ఓటర్ల నివాసానికి వెళ్లనున్నారు. పత్రాలను సేకరించిన తర్వాత వాటిని ECINET వ్యవస్థలో ఆన్‌లైన్‌లో అప్‌లోడ్ చేసే బాధ్యత కూడా BLOలదే. దీంతో నోటీసు వచ్చిన ప్రతి వ్యక్తి ఎన్నికల కార్యాలయం లేదా BLOను వెతుక్కుంటూ వెళ్లాల్సిన పరిస్థితి ఉండదు. ముఖ్యంగా వృద్ధులు, బయటకు వెళ్లలేని వారు, ఇతర కారణాలతో కార్యాలయాలకు చేరుకోలేని ఓటర్లకు ఈ విధానం ఉపయోగపడే అవకాశం ఉంది.

వ్యక్తిగత విచారణకు హాజరు కావాల్సిన అవసరం లేదు

SIR నోటీసు అందుకున్నవారంతా వ్యక్తిగత విచారణకు తప్పనిసరిగా హాజరు కావాలనే నిబంధనను ఈసీ సడలించింది. సాధారణ కేసుల్లో సంబంధిత పత్రాలను BLO ద్వారా అందించడం సరిపోతుందని తెలిపింది. అయితే అవసరమైన సందర్భాల్లో మాత్రమే వ్యక్తిగత విచారణకు పిలిచే అవకాశం ఉంటుందని స్పష్టం చేసింది. అర్హతకు సంబంధించిన వివరాలను పరిశీలించిన అనంతరం తుది నిర్ణయం ఎల‌క్ట్రోర‌ల్ రిజిస్ట్రేష‌న్ ఆఫీస‌ర్ (ERO) తీసుకుంటారు. అంటే BLOలు పత్రాలను సేకరించి, ప్రక్రియను ముందుకు తీసుకెళ్తారు కానీ ఓటరు అర్హతపై తుది నిర్ణయం తీసుకునే అధికారం ERO వద్దే ఉంటుంది.

A press note from the Election Commission of India (@ECISVEEP) reads:The meeting of the Commission was held today i.e. 26.09.2026 at 3:00 PM. The following decisions were taken in the meeting:i. In case of any person to whom notice has been issued during the ongoing SIR, for… pic.twitter.com/4Axd8wEOVM

— Press Trust of India (@PTI_News) September 26, 2026

Form-6 డిక్లరేషన్‌పైనా ఈసీ స్పష్టత

SIR ప్రక్రియలో అవసరమైన సందర్భాల్లో Form-6తో పాటు సంబంధిత డిక్లరేషన్‌ను సమర్పించే విధానాన్ని కూడా ఈసీ సమర్థించింది. ఓటర్ల నమోదు, అర్హత నిర్ధారణకు సంబంధించిన ఈ ప్రక్రియను సుప్రీంకోర్టు కూడా సమర్థించిందని ఎన్నికల సంఘం తన తాజా ప్రకటనలో పేర్కొంది. ఇప్పటికే ఎన్నికల సంఘం అధికారిక ఓటర్ సర్వీస్ పోర్టల్‌లో SIR-2026 కోసం నోటీసుకు సంబంధించిన పత్రాలను సమర్పించే సదుపాయం, Form-6, డిక్లరేషన్ ఫారమ్ వంటి ఆప్షన్లు అందుబాటులో ఉన్నాయి.

ఢిల్లీ, మహారాష్ట్ర గడువుల్లో మార్పులు

SIRకు సంబంధించి కొన్ని ప్రాంతాల్లో గడువులను కూడా ఎన్నికల సంఘం సవరించింది. తాజా రిపోర్టుల ప్రకారం ఢిల్లీలో అభ్యంతరాలు, క్లెయిమ్‌ల ప్రక్రియకు గడువును అక్టోబర్ 30 వరకు పొడిగించారు. మహారాష్ట్రలో ఈ గడువు అక్టోబర్ 12 వరకు కొనసాగనుంది.

ముగ్గురు కమిషనర్ల సమావేశం.. విభేదాలపై ఈసీ వివరణ

న్యూఢిల్లీలోని నిర్వచన్ సదన్‌లో శనివారం ప్రధాన ఎన్నికల కమిషనర్ జ్ఞానేష్ కుమార్, ఎన్నికల కమిషనర్లు సుఖ్బీర్ సింగ్ సంధు, వివేక్ జోషీతో కూడిన పూర్తి కమిషన్ సమావేశమైంది. SIRపై అంతర్గతంగా విభేదాలు ఉన్నాయంటూ వచ్చిన వార్తల నేపథ్యంలో ఈ భేటీకి ప్రాధాన్యం ఏర్పడింది. అయితే SIRకు సంబంధించిన నిర్ణయాలు పూర్తి కమిషన్ ఏకగ్రీవ ఆమోదంతోనే తీసుకున్నామని ఈసీ స్పష్టం చేసింది. SIRపై వస్తున్న అభ్యంతరాలు, ఓటర్ల జాబితా సవరణ, నోటీసుల ప్రక్రియ వంటి అంశాలపై ఎన్నికల సంఘం తన తాజా వైఖరిని వెల్లడించింది. దీంతో నోటీసులు అందుకున్న ఓటర్లకు వ్యక్తిగతంగా కార్యాలయాలకు వెళ్లాల్సిన భారం తగ్గించడంతో పాటు, పత్రాల పరిశీలనను ఇంటి వద్దే నిర్వహించే అవకాశం ఏర్పడింది.

Bank Holidays: అక్టోబర్‌లో బ్యాంకులకు వరుస సెలవులు.. ఏకంగా 16 రోజులు హాలిడేస్.. ఫుల్ లిస్ట్ ఇదిగో

Mahesh Rajamoni — Wed, 30 Sep 2026 13:50:09 +0530

Bank Holidays: వచ్చే దసరా, దీపావళి వంటి ప్రధాన పండుగలు, వారాంతపు లీవ్‌లతో అక్టోబర్ నెలలో బ్యాంకులకు భారీగా సెలవులు రానున్నాయి. ఆర్‌బీఐ విడుదల చేసిన హాలిడే క్యాలెండర్ ప్రకారం, వివిధ రాష్ట్రాల్లో పండుగలను బట్టి 15 రోజులు బ్యాంకులకు సెలవులున్నాయి.

అక్టోబర్ నెలలో దసరా, దుర్గాపూజ, గాంధీ జయంతి వంటి పెద్ద పండుగలు వరుసకట్టాయి. పండుగల హడావుడితో పాటు బ్యాంక్ పనులు కూడా చాలా మందికి ఉంటాయి. అయితే ఈ అక్టోబర్‌లో బ్యాంకులకు వెళ్లి పనులు పూర్తి చేసుకోవాలనుకునే వారికి ఒక ముఖ్యమైన అలర్ట్. రిజర్వ్ బ్యాంక్ ఆఫ్ ఇండియా (RBI) హాలిడే క్యాలెండర్ ప్రకారం.. అక్టోబర్ 2026లో శని, ఆదివారాలు, పండుగల సెలవులతో కలిపి మొత్తం 15 రోజుల పాటు బ్యాంకులు మూసివుండనున్నాయి. దేశంలోని వివిధ ప్రాంతాలను బట్టి ఈ సెలవులలో మార్పులు కూడా ఉంటాయి.

మరి ఏ ఏ రోజుల్లో బ్యాంకులు బంద్ ఉంటాయి? ఏపీ,తెలంగాణతో పాటు దేశవ్యాప్తంగా బ్యాంక్ సెలవుల వివరాలు ఏంటి? డిజిటల్ సేవలు అందుబాటులో ఉంటాయా లేదా? అనే వివరాలు ఇప్పుడు వివరంగా తెలుసుకుందాం.

ఏపీ, తెలంగాణ ప్రాంతాల్లో అక్టోబర్ నెలలో వచ్చే ప్రధాన సెలవులు చాలానే ఉన్నాయి. బ్రాంచ్‌కు వెళ్లే ముందు ఈ తేదీలను ఒకసారి చెక్ చేసుకోవడం మంచిది.

• అక్టోబర్ 2 (శుక్రవారం): మహాత్మా గాంధీ జయంతి (దేశవ్యాప్తంగా జాతీయ సెలవు)

• అక్టోబర్ 4 (ఆదివారం): వారంతపు సెలవు

• అక్టోబర్ 10 (రెండో శనివారం): బ్యాంకులకు సాధారణ సెలవు

• అక్టోబర్ 11 (ఆదివారం): వారంతపు సెలవు (బతుకమ్మ పండుగ ప్రారంభం)

• అక్టోబర్ 18 (ఆదివారం): వారంతపు సెలవు

• అక్టోబర్ 19 (సోమవారం): మహా అష్టమి / దుర్గాపూజ / దసరా సెలవు (పలు ప్రాంతాల్లో)

• అక్టోబర్ 20 (మంగళవారం): దసరా / విజయదశమి (దేశంలో దాదాపు అన్ని రాష్ట్రాల్లో బంద్)

• అక్టోబర్ 21 (బుధవారం): విజయదశమి / దుర్గాపూజ (పలు ప్రాంతాల్లో)

• అక్టోబర్ 24 (నాలుగో శనివారం): దేశవ్యాప్తంగా బ్యాంకులకు మూసివేత

• అక్టోబర్ 25 (ఆదివారం): వారంతపు సెలవు

బ్యాంక్ సెలవులు దేశవ్యాప్తంగా ఒకేలా ఉండవు. ప్రాంతీయ పండుగలను బట్టి ఆయా రాష్ట్రాల్లో వేర్వేరు తేదీల్లో ఆర్బీఐ సెలవులను ప్రకటిస్తుంది.

• అక్టోబర్ 17: మహా సప్తమి సందర్భంగా అగర్తలాలో సెలవు.

• అక్టోబర్ 22, 23: దుర్గాపూజ / దసైన్ పండుగ వల్ల గ్యాంగ్‌టక్‌లో వరుసగా రెండు రోజులు బ్యాంకులు బంద్.

• అక్టోబర్ 26: లక్ష్మీపూజ, మహర్షి వాల్మీకి జయంతి, యాక్సెసిబిలిటీ డే సందర్భంగా జమ్మూ, శ్రీనగర్, చండీగఢ్, సిమ్లా, అగర్తలాలో సెలవు.

• అక్టోబర్ 29: కర్వా చౌత్ సందర్భంగా సిమ్లాలో బ్యాంకులకు సెలవు.

• అక్టోబర్ 31: సర్దార్ వల్లభ్‌భాయ్ పటేల్ జయంతి సందర్భంగా అహ్మదాబాద్‌లో బ్యాంకులు పనిచేయవు.

పండుగల సీజన్ కావడంతో బ్యాంకులకు సెలవులు ఎక్కువగానే ఉన్నాయి. కానీ, సాధారణ కస్టమర్లు అసలు ఆందోళన చెందాల్సిన పనిలేదు. బ్రాంచ్ తలుపులు మూసి ఉన్నప్పటికీ డిజిటల్ సేవలు 24 గంటలూ అందుబాటులో ఉంటాయి.

• యూపీఐ, మొబైల్ బ్యాంకింగ్: గూగుల్ పే, ఫోన్ పే, పేటీఎం వంటి యూపీఐ సేవలు, మొబైల్ బ్యాంకింగ్ యాప్స్ యథావిధిగా పనిచేస్తాయి.

• నెట్ బ్యాంకింగ్: ఆన్‌లైన్ ద్వారా డబ్బులు ట్రాన్స్‌ఫర్ చేయడం, బిల్లులు చెల్లించడం వెంటనే పూర్తవుతాయి.

• ఏటీఎంలు: నగదు ఉపసంహరణ కోసం ఏటీఎం సేవలు నిరంతరం అందుబాటులో ఉంటాయి.

ఆన్‌లైన్ సేవలు పనిచేసినా, కొన్ని ప్రత్యక్ష బ్రాంచ్ పనులకు మాత్రం ఆటంకం కలగవచ్చు. బ్యాంక్ బ్రాంచ్‌కి నేరుగా వెళ్లి చేయాల్సిన పనులను ముందే ప్లాన్ చేసుకోవడం బెస్ట్.

• పెద్ద మొత్తంలో నగదు డిపాజిట్లు లేదా విత్‌డ్రాయల్స్

• డిమాండ్ డ్రాఫ్ట్ (DD) తీయడం

• బ్యాంక్ లాకర్ యాక్సెస్ చేయడం

• కేవైసీ (KYC) అప్‌డేట్, చెక్ క్లియరింగ్ పనులు

చెక్ క్లియరింగ్ వంటి సేవల్లో సెలవుల వల్ల కొంత జాప్యం జరిగే అవకాశం ఉంది. కాబట్టి ఈ అక్టోబర్ నెలలో మీ ఆర్థిక లావాదేవీలు, బ్యాంక్ పనులను పైన పేర్కొన్న హాలిడే లిస్ట్ ఆధారంగా ముందే పూర్తి చేసుకుంటే ఎలాంటి ఇబ్బందులు ఉండవు.

ముంబై, బెంగళూరు కాదు బాసు.. ఇండియాలో ఇప్పుడు జాబ్స్ ఎక్కువగా ఇస్తున్న టాప్ 10 నగరాల ఇవే

Mahesh Rajamoni — Fri, 18 Sep 2026 12:57:47 +0530

Jobs: లింక్డ్‌ఇన్ రిపోర్టుల ప్రకారం భారత్‌లో ఉద్యోగాల వృద్ధి టైర్ 1 మెట్రోల నుండి విశాఖ, విజయవాడ వంటి టైర్ 2 నగరాలకు వేగంగా మారుతోంది. ఇండియాలో ప్రస్తుతం ఎక్కువగా ఉద్యోగాలు అందిస్తున్న టాప్ 10 నగరాలు ఏవో ఇక్కడ తెలుసుకుందాం.

ఇండియాలో టైర్ 2 నగరాలు ప్రగతిలో వేగంగా దూసుకుపోతున్నాయి. దేశంలో డిగ్రీలు పూర్తి చేసిన గ్రాడ్యుయేట్లలో నిరుద్యోగ రేటు రోజురోజుకూ పెరుగుతోంది. ఇటువంటి పరిస్థితుల్లో కొత్త ఉద్యోగాలు ఎక్కడ వస్తున్నాయి, ఏ నగరాల్లో ఎక్కువ అవకాశాలు లభిస్తున్నాయి అనే దానిపై జరిగిన ఒక తాజా విశ్లేషణలో ఆసక్తికరమైన విషయాలు వెల్లడయ్యాయి. ఇప్పటివరకు ఉద్యోగాలకు చిరునామాగా ఉన్న ఢిల్లీ, గుర్గావ్, ముంబై, బెంగళూరు, పుణే వంటి టైర్ 1 మెట్రో నగరాల్లో ఉద్యోగాల వృద్ధి మందగించినట్లు ఈ రిపోర్ట్ స్పష్టం చేస్తోంది.

తాజాగా వెలువడిన డేటా ప్రకారం, దేశంలో అత్యధికంగా ఉద్యోగ అవకాశాలు పెరుగుతున్న టాప్ 10 నగరాల జాబితాలో ఒక్క టైర్ 1 మెట్రో కూడా స్థానం సంపాదించుకోలేకపోవడం అందరినీ ఆశ్చర్యానికి గురిచేస్తోంది. ప్రతి ఒక్కరూ హైదరాబాద్, బెంగళూరు లేదా ముంబై వైపు పరుగులు తీయడం మానేసి, అభివృద్ధి చెందుతున్న కొత్త నగరాలపై దృష్టి పెట్టాల్సిన సమయం వచ్చిందని విశ్లేషణలు పేర్కొంటున్నాయి.

ప్రస్తుతం ప్రపంచవ్యాప్తంగా ట్రెండింగ్‌లో ఉన్న ఆర్టిఫిషియల్ ఇంటెలిజెన్స్ (AI), మ్యానుఫ్యాక్చరింగ్, డిజైన్ రంగాల్లో వస్తున్న కొత్త ఉద్యోగాలన్నీ కూడా వేగంగా టైర్ 2 నగరాలకు తరలిపోతున్నాయి. బహుళ జాతి కంపెనీలు, స్టార్టప్‌లు తమ కార్యకలాపాలను విస్తరించడానికి పెద్ద మెట్రో నగరాల కంటే ఈ చిన్న నగరాలనే ఎక్కువగా ఎంచుకుంటున్నాయి. తక్కువ నిర్వహణ వ్యయం, మెరుగైన మౌలిక వసతులు, నిపుణులైన ప్రతిభ లభ్యత వంటి అంశాలు కంపెనీలను ఈ వైపు ఆకర్షిస్తున్నాయి.

దీనివల్ల రాబోయే రోజుల్లో సాంకేతిక, ఉత్పాదన రంగాల్లో కెరీర్ ప్రారంభించాలనుకునే వారికి టైర్ 2 నగరాలు ప్రధాన కేంద్రాలుగా మారబోతున్నాయి. యువతకు సైతం సొంత ప్రాంతాలకు దగ్గరగా, తక్కువ జీవన వ్యయంతో మంచి ఉద్యోగాలు లభించే వాతావరణం ఏర్పడుతోంది.

ప్రముఖ ప్రొఫెషనల్ నెట్‌వర్కింగ్ ప్లాట్‌ఫామ్ లింక్డ్‌ఇన్ నమోదు చేసిన జాబ్ పోస్టింగ్స్, మౌలిక సదుపాయాల అభివృద్ధి ఆధారంగా "సిటీస్ ఆన్ ది రైజ్ ఇన్ 2026" (Cities on the Rise in 2026) పేరిట ఒక సమగ్ర రిపోర్టును రూపొందింది. ఈ రిపోర్ట్ భారత్‌లోని ఏ ఏ నగరాల్లో ఉద్యోగాల వృద్ధి ఎక్కువగా ఉందో, ఎక్కడ టాలెంట్ అవసరం అధికంగా ఉందో స్పష్టంగా వివరించింది.

ఈ డేటా ప్రకారం దేశంలోని వివిధ రాష్ట్రాల్లోని ద్వితీయ శ్రేణి నగరాలు అనూహ్య వృద్ధిని నమోదు చేస్తున్నాయి. కంపెనీలు తమ వ్యాపార విస్తరణకు ఈ నగరాలనే ప్రాథమికంగా ఎంచుకుంటున్నాయని ఈ రిపోర్టు నిరూపిస్తోంది.

'సిటీస్ ఆన్ ది రైజ్ ఇన్ 2026' రిపోర్టు ప్రకారం భారత్‌లో ఉద్యోగ అవకాశాల వృద్ధిలో మొదటి 10 స్థానాల్లో నిలిచిన నగరాల జాబితా గమనిస్తే..

1. విశాఖపట్నం

2. లుధియానా

3. సూరత్

4. వడోదర

5. ప్రయాగ్‌రాజ్

6. రాజ్‌కోట్

7. జబల్‌పూర్

8. రాంచీ

9. రాయ్‌పూర్

10. విజయవాడ

ఆంధ్రప్రదేశ్ నుండి విశాఖపట్నం మొదటి స్థానంలో నిలవగా, విజయవాడ పదో స్థానంలో నిలిచి ఉద్యోగ కల్పనలో తమ ఆధిక్యతను చాటుకున్నాయి.

ఈ కీలక మార్పుల వల్ల రాబోయే పదేళ్లలో భారత్‌లోని టైర్ 1 నగరాల్లో రియల్ ఎస్టేట్ ధరల భారం తగ్గుముఖం పట్టే అవకాశం ఉందని నిపుణులు భావిస్తున్నారు. బెంగళూరు, ముంబై, ఢిల్లీ వంటి నగరాల్లో ఇళ్ల అద్దెలు, రియల్ ఎస్టేట్ ధరలు విపరీతంగా పెరగడంతో సగటు ఉద్యోగికి జీవన వ్యయం భారంగా మారింది.

ఉద్యోగాలు ఇప్పుడు ఈ కొత్త నగరాలకు విస్తరిస్తుండటంతో, రాబోయే దశాబ్ద కాలంలో అసలైన ఆర్థిక, మౌలిక సదుపాయాల అభివృద్ధి ఈ టైర్ 2 నగరాల్లోనే కనిపిస్తుందని స్పష్టమవుతోంది. అందుకే ఉద్యోగార్థులు ఇకపై కేవలం మెట్రో నగరాల పైనే ఆధారపడకుండా ఈ కొత్త అభివృద్ధి కేంద్రాల వైపు చూడటం మంచిదని సూచిస్తున్నారు.

LPG Subsidy: ఎల్పీజీ గ్యాస్ వినియోగదారులకు బిగ్ అలర్ట్.. అక్టోబర్ 1 నుంచి కొత్త రూల్ !

Mahesh Rajamoni — Sun, 20 Sep 2026 12:29:46 +0530

LPG Subsidy: ఎల్పీజీ గ్యాస్ సిలిండర్ వినియోగదారులకు కేంద్ర ప్రభుత్వం బిగ్ అలర్ట్ జారీ చేసింది. వంట గ్యాస్ సబ్సిడీని పొందుతున్న వినియోగదారులందరికీ అక్టోబర్ 1 నుంచి కొత్త నిబంధన అమలులోకి రానుంది. సబ్సిడీ సొమ్ము ఖాతాల్లో జమకావాలంటే ఏం చేయాలో తెలుసా?

దేశంలో డొమెస్టిక్ ఎల్పీజీ వినియోగదారులకు కేంద్ర ప్రభుత్వం కీలక ఆదేశాలు జారీ చేసింది. అక్టోబర్ 1 నుండి సబ్సిడీ ధరకు గ్యాస్ రీఫిల్స్ పొందాలంటే ఆధార్ బయోమెట్రిక్ ఆథెంటికేషన్ తప్పనిసరి. ఇప్పటివరకు ఈ ప్రక్రియ పూర్తి చేయని వారు వెంటనే దీనిని పూర్తి చేసుకోవాలని పెట్రోలియం అండ్ నేచురల్ గ్యాస్ మంత్రిత్వ శాఖ స్పష్టం చేసింది. ఒకవేళ ఈ బయోమెట్రిక్ పూర్తి చేయకపోతే సబ్సిడీ లేని సాధారణ మార్కెట్ ధరకే సిలిండర్లను కొనుగోలు చేయాల్సి ఉంటుంది.

కేంద్ర మంత్రిత్వ శాఖ వెల్లడించిన గణాంకాల ప్రకారం సెప్టెంబర్ 19 నాటికి దేశవ్యాప్తంగా 27.43 కోట్ల మంది క్రియాశీల వినియోగదారులు బయోమెట్రిక్ ప్రాసెస్ పూర్తి చేశారు. అంటే దాదాపు 89.9 శాతం మంది వినియోగదారులు ఇప్పటికే ఈ ప్రక్రియను విజయవంతంగా ముగించారు. గతంలో జూన్ 30 నాటికి ఈ ప్రక్రియ పూర్తి చేయాలని కోరగా, ఆ తర్వాత జూలై 31, ఆగస్టు 7, 15, 23, 31, సెప్టెంబర్ 7 నుండి సెప్టెంబర్ 14 వరకు గడువును పొడిగించారు. ఆల్ రెడీ బయోమెట్రిక్ పూర్తి చేసిన వారు మళ్లీ చేయాల్సిన పనిలేదని ప్రభుత్వం తెలిపింది.

ఇంకా బయోమెట్రిక్ ఆథెంటికేషన్ పూర్తి చేయని వారి కోసం కేంద్రం సులువైన మార్గాలను అందుబాటులోకి తెచ్చింది.

• డెలివరీ సమయంలో: సిలిండర్ డెలివరీ ఇవ్వడానికి వచ్చే సిబ్బంది వద్ద ఉండే మొబైల్ యాప్ ద్వారా స్పాట్‌లోనే ప్రాసెస్ పూర్తి చేయవచ్చు.

• డిస్ట్రిబ్యూటర్ వద్ద: నేరుగా మీ గ్యాస్ ఏజెన్సీ / డిస్ట్రిబ్యూటర్ షోరూమ్‌కు వెళ్లి ఆధార్ ధ్రువీకరణ చేసుకోవచ్చు.

• ఆయిల్ కంపెనీల యాప్‌లు: ఇంట్లోనే ఉండి మీ స్మార్ట్‌ఫోన్ ద్వారా కూడా చేసుకోవచ్చు. ఇండేన్ వినియోగదారులు IndianOil ONE, భారత్ గ్యాస్ వినియోగదారులు HelloBPCL, హెచ్ పీ గ్యాస్ వినియోగదారులు HP PAY యాప్‌లను వాడి ప్రాసెస్ పూర్తి చేయవచ్చు.

ఆధార్ ఆథెంటికేషన్ పూర్తి చేయడానికి ఇష్టం లేని లేదా చేయలేని వినియోగదారులకు గ్యాస్ సేవలు నిలిచిపోవు. కానీ, వారు మార్కెట్ ధర చెల్లించి సబ్సిడీ లేని సిలిండర్లను మాత్రమే పొందగలరు. ఇలాంటి వారు తమ ఆప్షన్‌ను వెబ్‌సైట్, మొబైల్ యాప్, వాట్సాప్ చాట్‌బాట్ లేదా ఐవీఆర్ఎస్ ద్వారా నమోదు చేసుకోవాల్సి ఉంటుంది. వారికి స్థానిక లభ్యతను బట్టి 5 కేజీలు లేదా 10 కేజీల సిలిండర్లు లభిస్తాయి. నకిలీ కనెక్షన్లను తొలగించడం, వాణిజ్య అవసరాలకు సబ్సిడీ సిలిండర్లను మళ్లించకుండా అడ్డుకోవడమే ఈ నిర్ణయం ప్రధాన ఉద్దేశం.

ప్రభుత్వ లెక్కల ప్రకారం 14.2 కేజీల సిలిండర్‌పై ఈ ఏడాది సెప్టెంబర్ నాటికి రూ.210 దాకా సబ్సిడీ భారాన్ని ప్రభుత్వం భరిస్తోంది. జూన్ లో ఈ భారం ఏకంగా రూ.721 వరకు ఉంది. ఆయిల్ మార్కెటింగ్ కంపెనీల నష్టాలను పూడ్చడానికి ప్రభుత్వం 2022-23లో రూ.22,000 కోట్లు విడుదల చేయగా, 2025-26, 2026-27 ఆర్థిక సంవత్సరాల్లో ఏడాదికి రూ.30,000 కోట్ల చొప్పున చెల్లిస్తోంది. అయినా కూడా ఆగస్టు 31 నాటికి కంపెనీల బకాయిలు రూ.62,000 కోట్లు దాటాయి. మరోవైపు పైప్డ్ నేచురల్ గ్యాస్ కి మారాలని ప్రభుత్వం విస్తృతంగా ప్రచారం చేస్తున్నప్పటికీ, మౌలిక వసతులు అందుబాటులో ఉన్న 21.7 లక్షల మంది వినియోగదారుల్లో కేవలం 20 శాతం మాత్రమే పీఎన్‌జీ కనెక్షన్లకు దరఖాస్తు చేసుకున్నారు.

Nepal Floods: కొండచరియలు ఎందుకు విరిగిపడతాయి? అసలు కారణమిదే..నేపాల్ లో మరోసారి బీభత్సం

Nandini Arava — Mon, 28 Sep 2026 19:05:10 +0530

Nepal Floods: ప్రకృతి ప్రకోపానికి ఉత్తర భారతం అల్లకల్లోలమవుతోంది. ఎప్పుడు ఏ కొండచరియలు విరిగిపడతాయో అని అక్కడి ప్రజలు ఆందోళన చెందుతున్నారు. నెల క్రితం నేపాల్ లో జరిగిన ప్రమాదం మరవకముందే మరో ఘోరం జరిగింది. అసలు కొండ చరియలు ఎందుకు విరిగిపడుతున్నాయి?

నేపాల్‌లో మరోసారి ప్రకృతి బీభత్సం సృష్టించింది. వారం రోజులుగా వర్షాలు కురుస్తుండటంతో రోడ్లు, వంతెనలు దెబ్బతిన్నాయి. ఇళ్లు నేలమట్టమయ్యాయి. వర్షాల వల్ల కాళి, గండకి, సున్ కోషి, మహాకాళి నదులు పొంగిపొర్లుతున్నాయి. ఓ చోట కొండచరియ విరిగిపడి అక్కడి గ్రామాలపైకి దూసుకొచ్చింది. సోషల్ మీడియాలో వైరలవుతున్న వీడియోలు చూస్తే ఒళ్లు గగుర్పొడుస్తుంది. గత నెల జరిగిన ప్రమాదం మరువకముందే మరో ప్రకృతి విపత్తు ఎదురవడటంతో నేపాల్ ప్రజలు ఉక్కిరిబిక్కిరి అవుతున్నారు. గత నెలలో వచ్చిన ఆకస్మిక వరదలతో ఇప్పటివరకూ దాదాపు 1500 వందలకుపైగా చనిపోయారు. 5 వేలకు పైగా గల్లంతయ్యారు.

హిమాలయ ప్రాంతాల్లో తరచూ కొండచరియలు విరిగిపడటం చూస్తుంటాం. భారీ వర్షాలు కురిసినప్పుడు ఒక్కసారిగా మట్టి, రాళ్లు కొండపై నుంచి కిందకు జారిపడుతుంటాయి. దీంతో రోడ్లు మూసుకుపోవడం, ఇళ్లు దెబ్బతినడం, రాకపోకలకు అంతరాయం కలగడం వంటి ఘటనలు జరుగుతాయి.

హిమాలయాలు భౌగోళికంగా పర్వత ప్రాంతం. భారత భూఫలకం ఉత్తర దిశగా కదులుతూ యూరేషియన్ భూఫలకంతో ఢీకొంటోంది. ఈ నిరంతర భౌగోళిక కదలికల కారణంగా హిమాలయ ప్రాంతంలోని అనేక కొండలు సహజంగానే బలహీనంగా, అస్థిరంగా ఉంటాయి. అందుకే ఇక్కడ నేల కదలికలు, రాళ్లు విరిగిపడే అవకాశాలు ఎక్కువగా ఉంటాయి.

వర్షాకాలంలో కురిసే భారీ వర్షాలు కొండచరియలకు ప్రధాన ట్రిగ్గర్‌గా పనిచేస్తాయి. వర్షపు నీరు మట్టిలోకి వెళ్లి నేల బరువు పెరుగుతుంది. అదే సమయంలో మట్టి పొరల మధ్య ఉండే పట్టుదల తగ్గి కొండ వాలుపై ఉన్న మట్టి, రాళ్లు గురుత్వాకర్షణకు లోనై కిందకు జారిపడవచ్చు.

కొండ ప్రాంతాల్లో రోడ్లు, రైల్వే మార్గాలు, సొరంగాలు, భవనాల నిర్మాణం కోసం కొండలను తవ్వడం జరుగుతుంది. ఇలా కొండ వాలును కోయడం వల్ల సహజమైన స్థిరత్వం దెబ్బతినవచ్చు. సరైన డ్రైనేజీ వ్యవస్థ, రక్షణ చర్యలు లేకపోతే వర్షాల సమయంలో ఈ ప్రాంతాలు ల్యాండ్‌స్లైడ్స్‌కు గురయ్యే అవకాశం ఉంటుంది. కొండ ప్రాంతాల్లో చెట్లు, వృక్షాల వేర్లు మట్టిని పట్టి ఉంచడంలో కీలక పాత్ర పోషిస్తాయి. అడవులు తగ్గడం లేదా వృక్ష సంపద దెబ్బతినడం వల్ల మట్టి కోతకు గురయ్యే అవకాశం పెరుగుతుంది. భారీ వర్షాలు పడినప్పుడు ఈ వదులైన మట్టి సులభంగా కొండపై నుంచి జారిపోవచ్చు.

హిమాలయ ప్రాంతం భూకంపాలకు కూడా సున్నితమైన ప్రాంతం. భూకంపం సంభవించినప్పుడు కొండల్లోని రాళ్లు, మట్టి పొరలు కదిలిపోతాయి. ఇప్పటికే బలహీనంగా ఉన్న కొండ ప్రాంతాల్లో భూకంపం తర్వాత కొండచరియలు విరిగిపడే అవకాశం మరింత పెరుగుతుంది.

హిమాలయాల్లోని నదులు వేగంగా ప్రవహిస్తుంటాయి. ఇవి కొండల అడుగు భాగాన్ని నిరంతరం కోస్తూ ఉంటాయి. అడుగు భాగం బలహీనపడితే పైభాగంలోని మట్టి, రాళ్లకు ఆధారం తగ్గుతుంది. దీంతో కొండచరియలు విరిగిపడే ప్రమాదం ఏర్పడుతుంది.

అందుకే ఉత్తర భారతదేశంలోని హిమాలయ ప్రాంతాల్లో కొండచరియలు విరిగిపడటానికి ఒకే ఒక్క కారణం ఉండదు. పర్వతాల భౌగోళిక స్వభావం, భారీ వర్షాలు, భూకంపాలు, మంచు కరగడం, నదుల కోత, అడవుల తగ్గుదల, నిర్మాణ కార్యకలాపాలు వంటి అనేక అంశాలు కలిసి ల్యాండ్‌స్లైడ్ ప్రమాదాన్ని పెంచుతాయి.

8th Pay Commission: 8వ పే కమిషన్ వస్తే పెన్షన్ 50 శాతం పెరగడం పక్కానా? జీతాలు డబుల్?

Haritha Chappa — Wed, 16 Sep 2026 11:13:38 +0530

8th Pay Commission: 8వ వేతన సంఘం కోసం కేంద్ర ప్రభుత్వ ఉద్యోగులు, పెన్షనర్లు ఎదురుచూస్తున్నారు. జీతాలు ఎంత పెరుగుతాయి? పెన్షన్ నిజంగానే 50 శాతం పెరుగుతుందా? ఇలాంటి సందేహాలు వారిలో అధికంగానే ఉన్నాయి.

8వ వేతన సంఘం కోసం కేంద్ర ప్రభుత్వ ఉద్యోగులు, పెన్షనర్లు ఎంతో ఆశతో ఎదురుచూస్తున్నారు. వారి జీతభత్యాలు ఎంత పెరుగుతాయో తెలుసుకునేందుకు ఆసక్తిగా ఉన్నారు. 8వ వేతన సంఘం ప్రస్తుతం డేటా సేకరించే పనిలో ఉంది. కేంద్ర ప్రభుత్వం 2025 నవంబర్ 3న ఈ కమిషన్‌ను ఏర్పాటు చేసింది. జస్టిస్ రంజనా ప్రకాష్ దేశాయ్ నేతృత్వంలోని ఈ కమిషన్‌లో ప్రొఫెసర్ పులక్ ఘోష్ పార్ట్ టైమ్ మెంబర్‌గా, పంకజ్ జైన్ మెంబర్-సెక్రటరీగా ఉన్నారు. కమిషన్ ఏర్పాటైన 18 నెలల్లోపు వీళ్లు తమ రిపోర్ట్‌ను ప్రభుత్వానికి ఇవ్వాలి. ఇంకా రిపోర్టు ప్రభుత్వానికి అందలేదు. అది అందిన తరువాత కేంద్ర ప్రభుత్వం వేతన సంఘం సిఫార్సులను అమల్లోకి తెస్తుంది. వచ్చే ఏడాది పెరిగిన జీతాలు ఉద్యోగులు, పెన్షనర్లు అందుకునే అవకాశం ఉంది.

8వ వేతన సంఘం అమల్లోకి వచ్చాక ఫిట్‌మెంట్ ఫ్యాక్టర్ (Fitment Factor) పైనే జీతం పెరుగుదల ఆధారపడి ఉంటుంది. 7వ వేతన సంఘంలో 2.57 ఫిట్‌మెంట్ ఫ్యాక్టర్‌ను వాడారు. ఇప్పుడు అంతకంటే ఎక్కువ కావాలని ఉద్యోగ సంఘాలు అడుగుతున్నాయి. కొన్ని సంఘాలు 3.61, 3.83, 4.00 ఇవ్వాలని డిమాండ్ చేస్తున్నాయి. కానీ, ప్రభుత్వం లేదా 8వ వేతన సంఘం ఇంకా ఏ ఫిట్‌మెంట్ ఫ్యాక్టర్‌ను ఫైనల్ చేయలేదు.

ఉదాహరణకు, బేసిక్ పేకి 2.57 లేదా 3.83 ఫ్యాక్టర్లను అప్లై చేస్తే లెక్కలు మారుతాయి. కానీ ఇది కేవలం అంచనా మాత్రమే. ఫైనల్ రిపోర్ట్ వచ్చాకే అసలు జీతం ఎంత పెరుగుతుందో తెలుస్తుంది.

పెన్షనర్లు తమ పెన్షన్ ఎంత పెరుగుతుందో తెలుసుకునేందుకు ఆత్రుతగా ఉన్నారు. పెన్షన్ రివిజన్, ఫ్యామిలీ పెన్షన్, పాత పెన్షనర్ల భద్రత లాంటి చాలా డిమాండ్లు వినిపిస్తున్నాయి. ముఖ్యంగా 2026 జనవరి 1 కంటే ముందు రిటైర్ అయిన వాళ్లను కూడా కొత్త పెన్షన్ రివిజన్‌లో చేర్చాలని పెన్షనర్ల సంఘాలు గట్టిగా అడుగుతున్నాయి. దీనికోసం 8వ వేతన సంఘం టర్మ్స్ ఆఫ్ రిఫరెన్స్ (Terms of Reference)లో స్పష్టమైన మార్పులు చేయాలని కోరుతున్నాయి.

అలాగే, చెన్నైలో జరిగిన మీటింగ్‌లో కనీస వేతనం, ఫిట్‌మెంట్ ఫ్యాక్టర్, పెన్షన్ పెంపుపై పలు డిమాండ్లు పెట్టారు. ఒక పెన్షనర్ల సంఘం అయితే 3.83 ఫిట్‌మెంట్ ఫ్యాక్టర్, ₹69,000 కనీస బేసిక్ పే ఇవ్వాలని అడిగింది. అయితే ఇవన్నీ వాళ్ల డిమాండ్లు మాత్రమే, ప్రభుత్వం ఇంకా ఏదీ ఓకే చేయలేదు.

West Bengal Byelection : వెస్ట్ బెంగాల్ లో అసలేం జరుగుతోంది? మాజీ సీఎం మమతకు ఏమిటీ పరిస్థితి?

Arun Kumar P — Sat, 19 Sep 2026 13:45:42 +0530

West Bengal Byelections : ఇప్పటికే అధికారాన్ని కోల్పోయిన తృణమూల్ కాంగ్రెస్ (TMC) కు దెబ్బ మీద దెబ్బ తగులుతోంది. మాజీ ముఖ్యమంత్రి, టిఎంసి చీఫ్ మమత బెనర్జీ పొలిటికల్ గా గడ్డుకాలాన్ని ఎదుర్కొంటున్నారు. చివరికి ఆమె పరిస్థితి ఎంత దయనీయంగా తయారయ్యిందంటే కనీసం ఉపఎన్నికల్లో బరిలోకి దింపేందుకు అభ్యర్థులు కూడా కరువయ్యారు.

నందిగ్రామ్ ఉపఎన్నికల రాజకీయం రోజుకో మలుపు తిరుగుతోంది. పోలింగ్ సమయం దగ్గరపడుతున్న కొద్దీ అక్కడ ఆసక్తికర పరిణామాలు జరుగుతున్నాయి. మొదట్లో టీఎంసీ పేరు, గుర్తుపై పెద్ద చర్చే జరిగింది. ఎన్నికల సంఘం టీఎంసీ పేరు, గుర్తును ఫ్రీజ్ చేసి.. మమతా బెనర్జీ, రుతబ్రత బెనర్జీ వర్గాలకు వేర్వేరు పేర్లు, గుర్తులు కేటాయించింది. అయితే ఇప్పుడు నందిగ్రామ్‌లో అభ్యర్థి విషయంలో మరో కొత్త డ్రామా మొదలైంది.

నందిగ్రామ్‌లో మమతకు అభ్యర్థే లేరా..!

నందిగ్రామ్, రెజీనగర్ ఉపఎన్నికల వేళ మమతా బెనర్జీకి మొదట తన సొంత పార్టీ గుర్తు, పేరు చేజారిపోయాయి. ఇప్పుడు ఏకంగా అభ్యర్థే లేకుండా పోయారు. నందిగ్రామ్ బరిలో సంచితా దేని మమతా బెనర్జీ నిలబెట్టారు. కానీ శుక్రవారం ఆమె ముఖ్యమంత్రి సువేందు అధికారిని కలిశారు. ఇద్దరి మధ్య చాలాసేపు చర్చలు జరిగాయి. అయితే వాళ్లు ఏం మాట్లాడుకున్నారనేది మాత్రం బయటకు రాలేదు.

ముఖ్యమంత్రితో భేటీ అనంతరం టిఎంసి అభ్యర్థి సంచితా దే తన నామినేషన్‌ను వెనక్కి తీసుకున్నారు. కొద్ది రోజుల క్రితమే అఖిల్ గిరితో కలిసి వెళ్లి ఆమె నామినేషన్ వేసిన విషయం తెలిసిందే. ఇవాళ (సెప్టెంబర్ 19, శనివారం) నామినేషన్ల ఉపసంహరణ గడువు ముగియనుండగా.. ఆలోపే ఆమె తప్పుకున్నారు.

కాంగ్రెస్‌కు మమత సపోర్ట్

ఈ పరిణామాల మధ్య నందిగ్రామ్‌లో కాంగ్రెస్ అభ్యర్థికి సపోర్ట్ ఇస్తున్నట్లు మమతా బెనర్జీ ప్రకటించారు. "గురువారం రాహుల్ గాంధీ, అరవింద్ కేజ్రీవాల్ నాకు ఫోన్ చేశారు. మేమంతా కలిసే పోరాడుతాం. బీజేపీని వదిలిపెట్టే ప్రసక్తే లేదు. మా మిత్రపక్షాలకు, సహజ కూటమికి సపోర్ట్ ఇస్తాం కానీ బీజేపీకి కాదు" అని మమత స్పష్టం చేశారు. ఆమె ప్రకటనతో నందిగ్రామ్ రాజకీయం ఒక్కసారిగా వేడెక్కింది.

అయితే మమత సపోర్ట్ ప్రకటించిన వెంటనే నందిగ్రామ్ పాలిటిక్స్ మరో మలుపు తిరిగాయి. శుక్రవారం సాయంత్రం నందిగ్రామ్ కాంగ్రెస్ అభ్యర్థి మిలన్ ప్రధాన్‌ను పోలీసులు అరెస్ట్ చేశారు. పాత కేసుకు సంబంధించే ఆయన్ను అరెస్ట్ చేసినట్లు పోలీసు వర్గాలు చెబుతున్నాయి. మరోవైపు మిలన్‌పై తామే ఫిర్యాదు చేశామని రుతబ్రత బెనర్జీ వర్గం చెబుతోంది. కాగా రాజకీయ కక్షసాధింపు చర్యల్లో భాగంగానే ఈ అరెస్ట్ జరిగిందని రాహుల్ గాంధీ సోషల్ మీడియాలో మండిపడ్డారు.

రెజీనగర్ లోనూ ఇదే సీన్ రిపీట్

పశ్చిమ బెంగాల్ లో నందిగ్రామ్ తో పాటు రెజీనగర్ అసెంబ్లీకి ఉప ఎన్నికలు జరుగుతున్నాయి. ఇక్కడ కూడా టీఎంసికి అభ్యర్థి లేకుండా పోయాడు… ఈ పార్టీ అభ్యర్థి రబీ ఉల్ ఆలమ్ చౌద్రీ కూడా నామినేషన్ ను వెనక్కి తీసుకుని పోటీనుండి తప్పుకున్నాడు. ఈ నియోజకవర్గం నుండి మూడుసార్లు ఎమ్మెల్యేగా పనిచేసిన అనుభవం ఆలమ్ చౌద్రీకి ఉంది… అందుకే ఆయన బలమైన అభ్యర్థిగా ఉంటాడని మమత బరిలోకి దింపింది. కానీ అనూహ్యంగా అతడు పోటీనుండి తప్పుకోవడంతో మాజీ సీఎంకు షాక్ తప్పలేదు.

India Bullet Train: రూ. 2 లక్షల కోట్ల ప్రాజెక్ట్.. 350 కిమీ స్పీడ్‌తో భారత్ సొంత బుల్లెట్ ట్రైన్ చూశారా?

Mahesh Rajamoni — Mon, 21 Sep 2026 14:01:44 +0530

India Bullet Train: భారతీయ రైల్వే రంగంలో సరికొత్త విప్లవానికి కేంద్ర ప్రభుత్వం శ్రీకారం చుట్టింది. గంటకు 350 కిలోమీటర్ల వేగంతో ప్రయాణించే 'మేడ్ ఇన్ ఇండియా' (B35) స్వదేశీ బుల్లెట్ ట్రైన్‌ను అందుబాటులోకి తీసుకురావాలని నిర్ణయించింది.

భారతదేశం కేవలం బుల్లెట్ ట్రైన్‌ను నడపడమే కాకుండా, సొంతంగా తయారు చేసేందుకు సిద్ధమవుతోంది. వచ్చే ఏడాది నుంచి దేశంలో బుల్లెట్ రైళ్లు పట్టాలెక్కనున్నాయి. దీనికి తోడు 'మేడ్ ఇన్ ఇండియా' ముద్రతో స్వదేశీ బుల్లెట్ ట్రైన్‌ను రూపొందించేందుకు భారత్ కసరత్తు చేస్తోంది. 2030 సంవత్సరం నాటికి ఈ స్వదేశీ బుల్లెట్ ట్రైన్ల తయారీని ప్రారంభించాలని లక్ష్యంగా పెట్టుకున్నారు. రైల్వే మంత్రిత్వ శాఖ క్యాబినెట్ ప్రతిపాదన ప్రకారం ఈ పనులు వేగవంతం అయ్యాయి.

ముంబై నుంచి అహ్మదాబాద్ మధ్య 2027 ఆగస్టులో తొలి బుల్లెట్ ట్రైన్ నడవనుంది. ఈ ప్రాజెక్ట్‌ను రెండు విడతల్లో అందుబాటులోకి తీసుకురావడానికి అధికారులు ప్లాన్ చేస్తున్నారు. ముంబై-అహ్మదాబాద్ హై-స్పీడ్ రైల్ ప్రాజెక్ట్ కోసం దాదాపు 2 లక్షల కోట్ల రూపాయల వ్యయం అవుతోంది. ప్రస్తుతం ఈ రూట్‌కు సంబంధించిన పనులు చాలా వేగంగా జరుగుతున్నాయి. ప్రారంభంలో ఈ ట్రాక్‌పై B28 సిరీస్‌కు చెందిన హై-స్పీడ్ రైళ్లు పరుగులు తీయనున్నాయి.

భారత్ తయారు చేయబోయే B35 మోడల్ స్వదేశీ బుల్లెట్ ట్రైన్ గంటకు 350 కిలోమీటర్ల గరిష్ట వేగంతో ప్రయాణిస్తుంది. ఇది జపాన్‌కు చెందిన E10 సిరీస్ బుల్లెట్ ట్రైన్‌కు నేరుగా పోటీ ఇవ్వనుంది. జపాన్ ప్రస్తుతం తన E5 సిరీస్ ట్రైన్ల తయారీని ప్రాసెస్ వారీగా నిలిపివేస్తోంది. వాటి స్థానంలో E10 సిరీస్ ట్రైన్ల ఉత్పత్తిని మొదలుపెట్టనుంది. జపాన్ 2030లో E10 తయారీ ప్రారంభించి, 2034 నాటికి పట్టాలెక్కించాలని చూస్తోంది. అదే సమయంలో భారత్ కూడా తన స్వదేశీ సాంకేతికతతో రంగంలోకి దిగుతోంది.

దేశంలో B28 హై-స్పీడ్ రైళ్ల తయారీ ఇప్పటికే ప్రారంభమైంది. బిఈఎంఎల్ (BEML) సంస్థకు 32 B28 ట్రైన్లను తయారు చేసే కాంట్రాక్ట్ లభించింది. ముంబై-అహ్మదాబాద్ కారిడార్‌లో మొదట ఈ రైళ్లే తిరుగుతాయి. ఈ B28 ట్రైన్ గరిష్ఠ వేగం గంటకు 280 కిలోమీటర్లు కాగా, ఆపరేషనల్ వేగం గంటకు 249 కిలోమీటర్లుగా ఉంటుంది. భారత్ కేవలం రైళ్లను మాత్రమే కాకుండా, వాటికి కావలసిన కంట్రోలింగ్ సిస్టమ్‌ను కూడా సొంతంగానే డెవలప్ చేస్తోంది.

నిజానికి ఈ బుల్లెట్ ట్రైన్ ప్రాజెక్ట్ 2015లో ప్రారంభమైంది. అయితే భూసేకరణ సమస్యలు, టర్బైన్ యంత్రాల సరఫరాలో ఆలస్యం కారణంగా ప్రాజెక్ట్ నిర్ణీత గడువు కంటే చాలా వెనుకబడింది. అనుకున్న బడ్జెట్ కంటే వ్యయం రెట్టింపు అయింది. అనివార్య కారణాల వల్ల ఆలస్యమైనప్పటికీ, ప్రస్తుతం భారత్ సొంతంగా తయారు చేసే బుల్లెట్ ట్రైన్ ట్రాక్‌పై భారతీయ రైళ్లే పరిగెత్తనున్నాయి.