Asianet News Telugu

తెలంగాణలో వింత ఆచారం.. దీపావళి రోజున సమాధుల వద్ద వేడుక, ఎక్కడో తెలుసా.?

Narender Vaitla — Wed, 04 Nov 2026 18:41:15 +0530

Diwali: దీపావళి అనగానే ఇళ్ల ముందు దీపాల అలంకరణలు, లక్ష్మీపూజలు, పిండివంటలు, బాణసంచా గుర్తుకొస్తాయి. అయితే తెలంగాణలోని కొన్ని ప్రాంతాల్లో మాత్రం సమాధుల వద్ద దీపాలు వెలిగించి వేడుకలు నిర్వహిస్తారు. ఇంత‌కీ అదెక్క‌డంటే.?

సాధారణంగా దీపావళి వేడుకలు ఇళ్లలోనే జరుగుతాయి. కానీ కొత్తగూడెం సింగరేణి ప్రాంతంలోని రుద్రంపూర్, రామవరం, కొత్తగూడెం పట్టణాల్లో మాత్రం పండుగకు మరో ప్రత్యేకత ఉంది. ఇక్కడ చాలామంది కుటుంబాలు తమ మరణించిన ఆత్మీయుల సమాధుల వద్దకు వెళ్లి దీపాలు వెలిగించి పండుగ జరుపుకుంటారు. కరీంనగర్ నగరంలోనూ ఈ ఆచారం కొనసాగుతోంది. కార్ఖానగడ్డ, కాశ్మీర్‌గడ్డ, ఆదర్శ్‌నగర్, సవరణ్ స్ట్రీట్ పరిధిలోని హిందూ శ్మశానవాటికల్లో కుటుంబాలు పెద్ద సంఖ్యలో చేరి తమ పూర్వీకులను స్మరించుకుంటాయి. చనిపోయినవారిని మరచిపోకుండా, వారిని కూడా పండుగలో భాగస్వాములుగా భావించడం ఈ సంప్రదాయంలోని ప్రత్యేకత.

కొత్తగూడెం కోల్‌బెల్ట్ ప్రాంతంలో ఈ సంప్రదాయం కొనసాగడానికి సింగరేణి కార్మికుల జీవితాలతో సంబంధం ఉంది. గతంలో బొగ్గు గనుల్లో పనిచేసే సమయంలో ప్రమాదాలు జరిగి ఎంతోమంది కార్మికులు ప్రాణాలు కోల్పోయేవారు. కుటుంబాల భవిష్యత్తు కోసం కష్టపడుతూ, విధి నిర్వహణలోనే ప్రాణాలు విడిచిన వారి త్యాగాలను కుటుంబ సభ్యులు ప్రత్యేకంగా గుర్తుచేసుకునేవారు. అలా మరణించిన వారిని దీపావళి రోజున స్మరించుకోవడం క్రమంగా ఒక సంప్రదాయంగా మారింది. ఉద్యోగాలు, ఉపాధి కోసం ఇతర ప్రాంతాల్లో స్థిరపడినవారు కూడా ఈ పండుగ సమయానికి స్వస్థలాలకు చేరుకుంటారు. తమకు జీవితాన్ని అందించిన తల్లిదండ్రులు, కుటుంబ పెద్దలు, ఆత్మీయుల సమాధుల వద్ద కొంత సమయం గడుపుతారు. వారి జ్ఞాపకాలను కుటుంబ సభ్యులతో పంచుకుంటారు.

దీపావళి రాకకు వారం, పది రోజుల ముందే ఈ వేడుకలకు సన్నాహాలు మొదలవుతాయి. కుటుంబ సభ్యులు శ్మశానవాటికలకు వెళ్లి తమవారి సమాధులను శుభ్రం చేస్తారు. స‌మాధుల‌కు కొత్తగా రంగులు వేస్తారు. పూలతో అలంకరించి పండుగకు సిద్ధం చేస్తారు. దీపావళి రోజున కుటుంబ సభ్యులంతా కొత్త దుస్తులు ధరించి సమాధుల వద్దకు చేరుకుంటారు. పూలు, మట్టి ప్రమిదలు, కొవ్వొత్తులతో సమాధులను అందంగా ముస్తాబు చేస్తారు. అనంతరం తమ ఆత్మీయులకు ఇష్టమైన వంటకాలు, పిండివంటలు, పండ్లు తీసుకొచ్చి సమాధుల వద్ద ఉంచుతారు. కొందరు మరణించినవారు జీవించి ఉన్నప్పుడు ఇష్టపడిన ప్రత్యేక వస్తువులను కూడా అక్కడ ఉంచి నివాళులర్పిస్తారు.

సమాధుల వద్ద ఆహార పదార్థాలను ఉంచి, దీపాలు వెలిగించిన తర్వాత కుటుంబ సభ్యులంతా కలిసి తమవారిని స్మరించుకుంటారు. మరణించినవారికి సమర్పించిన వంటకాలను అక్కడే కుటుంబ సభ్యులు కొంతమేర పంచుకుని తింటారు. ఆ తర్వాత చిన్నారులు, పెద్దలు కలిసి బాణసంచా కాలుస్తూ పండుగ ఆనందాన్ని పంచుకుంటారు. మిఠాయిలు పంచుకుంటూ చాలాసేపు అక్కడే గడుపుతారు. కొన్ని కుటుంబాలు సమాధుల వద్ద కార్యక్రమం ముగించుకుని ఇళ్లకు తిరిగి వెళ్తాయి. అక్కడ బొమ్మల కొలువు ఏర్పాటు చేసి దేవతామూర్తులను అలంకరిస్తారు. ఇంటిల్లిపాదీ కలిసి పూజలు నిర్వహించి, బాణసంచా కాల్చి సహపంక్తి భోజనాలు చేస్తారు. ఇలా మరణించినవారిని స్మరించుకోవడంతో పాటు బతికున్న కుటుంబ సభ్యుల మధ్య అనుబంధాన్ని మరింత బలపరుచుకుంటారు.

మొదట్లో కొన్ని సామాజిక వర్గాలకే పరిమితమైన ఈ ఆచారం క్రమంగా ఇతర వర్గాలకూ విస్తరించింది. ఏటా దీపావళి సమయంలో వేలాది మంది ఈ వేడుకల్లో పాల్గొంటున్నారు. తమకు జన్మనిచ్చినవారిని, జీవితంలో ఉన్నత స్థాయికి చేరుకునేందుకు తోడ్పడిన పెద్దలను ప్రత్యేకంగా గుర్తుచేసుకోవడం తమ బాధ్యతగా భావిస్తున్నారు. కరీంనగర్‌లో ఈ వేడుకలకు పెద్ద సంఖ్యలో ప్రజలు వస్తుండటంతో మున్సిపల్ కార్పొరేషన్ అధికారులు శ్మశానవాటికల్లో ప్రత్యేక ఏర్పాట్లు చేస్తున్నారు. విద్యుత్ దీపాలు, తాగునీరు, పారిశుధ్య సదుపాయాలు కల్పిస్తున్నారు. చనిపోయిన తమ కుటుంబ పెద్దలు దేవుడి రూపంలో ఆశీర్వదిస్తారని కొందరు విశ్వసిస్తారు. అందుకే పండుగ రోజున వారి సమాధుల వద్దకు వెళ్లడం ఎంతో పవిత్రమైన కార్యక్రమంగా భావిస్తారు.

కాలం మారినా, తరాలు మారినా కుటుంబ బంధాలకు విలువ తగ్గదని ఈ సంప్రదాయం గుర్తుచేస్తోంది. మనతో భౌతికంగా లేకపోయినా మనసులో చిరస్థాయిగా నిలిచిపోయిన ఆత్మీయులను పండుగ వేళ గుర్తుచేసుకోవడం ఇందులోని అసలైన సందేశం. దీపావళి అంటే కేవలం ఇళ్ల‌లో దీపాల‌ను వెలిగించడం మాత్రమే కాదు.. త‌మ‌ జీవితాల్లో వెలుగులు నింపిన వారిని జ్ఞాపకం చేసుకోవడం కూడా అని ఈ ప్రత్యేక ఆచారం చాటిచెబుతోంది.

రూ.675 కోట్లతో దేశంలోనే తొలి ప‌బ్లిక్ రోప్‌వే.. 45 నిమిషాల ప్రయాణం, ఇక 15 నిమిషాల్లోనే

Narender Vaitla — Fri, 06 Nov 2026 14:47:15 +0530

Ropeway: దేశంలో మ‌రో కొత్త ప్రయాణ సౌక‌ర్యం అందుబాటులోకి రానుంది. వార‌ణాసిలో దేశంలోనే తొలిసారిగా ప్రజా రవాణా కోసం నిర్మిస్తున్న రోప్‌వే ప్రాజెక్టు త్వ‌ర‌లోనే ప్రారంభంకానుంది. రూ. 675 కోట్ల‌తో చేప‌డుతోన్న ఈ ప్రాజెక్ట్‌కి సంబంధించిన పూర్తి వివ‌రాలు.

ఉత్తరప్రదేశ్‌లోని వారణాసి (కాశీ) పురాతన నగరంగా ప్రసిద్ధి చెందింది. ఇక్కడి ఇరుకైన రహదారులు, నిత్యం రద్దీగా ఉండే వీధుల కారణంగా ప్రయాణికులు ట్రాఫిక్ సమస్యలను ఎదుర్కొంటున్నారు. ముఖ్యంగా పర్యాటకులు, భక్తులు ప్రధాన ఆలయాలు, ఘాట్లకు వెళ్లేందుకు ఎక్కువ సమయం వెచ్చించాల్సి వస్తోంది. ఈ సమస్యకు పరిష్కారంగా కేంద్ర, రాష్ట్ర ప్రభుత్వాల సహకారంతో పబ్లిక్ ట్రాన్స్‌పోర్ట్ రోప్‌వే ప్రాజెక్టును చేపట్టారు. ఇది అందుబాటులోకి వస్తే దేశంలో ప్రజా రవాణా కోసం ఉపయోగించే తొలి రోప్‌వేగా గుర్తింపు పొందనుంది. నగరంలోని రద్దీ రహదారులతో సంబంధం లేకుండా ఆకాశమార్గంలో ప్రయాణించే అవకాశం కలుగుతుంది. ఈ ఏడాది చివరి నాటికి ఈ సేవలు అందుబాటులోకి తీసుకొచ్చేందుకు సన్నాహాలు చేస్తున్నారు.

ఈ రోప్‌వే అందుబాటులోకి వస్తే ప్రయాణికులకు సమయం ఆదా కానుంది. ప్రస్తుతం వారణాసి కంటోన్మెంట్ రైల్వే స్టేషన్ నుంచి గోదౌలియా చౌక్ వరకు రోడ్డు మార్గంలో వెళ్లాలంటే ట్రాఫిక్‌ను బట్టి సుమారు 45 నిమిషాలు పడుతోంది. అదే రోప్‌వే ద్వారా ఈ దూరాన్ని కేవలం 15 నుంచి 16 నిమిషాల్లో చేరుకోవచ్చు. మొత్తం 4.2 కిలోమీటర్ల మేర ఈ మార్గాన్ని నిర్మిస్తున్నారు. రహదారులపై వాహనాల రద్దీతో సంబంధం లేకుండా నేరుగా గమ్యస్థానానికి చేరుకునే వీలుంటుంది. దీనివల్ల స్థానిక ప్రజలతో పాటు కాశీ విశ్వనాథ ఆలయాన్ని సందర్శించే భక్తులు, పర్యాటకులకు కూడా ప్రయోజనం కలగనుంది.

ఈ ప్రాజెక్టులో భాగంగా సుమారు 220 కేబుల్ కార్లను ఏర్పాటు చేయనున్నారు. ఒక్కో కేబుల్ కారులో గరిష్ఠంగా 10 మంది ప్రయాణించవచ్చు. ఇవి సుమారు 45 మీటర్ల ఎత్తులో ప్రయాణించేలా ప్రణాళిక రూపొందించారు.

ఈ రోప్‌వే మార్గంలో వారణాసి కంటోన్మెంట్, కాశీ విద్యాపీఠ్, రథయాత్ర, గిర్జాఘర్, గోదౌలియా చౌక్ స్టేష‌న్లు ఉన్నాయి. వీటి ద్వారా నగరంలోని కీలక ప్రాంతాలకు ప్రయాణికులు సులభంగా చేరుకోవచ్చు. స్టేషన్లలో లిఫ్టులు సహా ఆధునిక సౌకర్యాలను ఏర్పాటు చేస్తున్నారు. దీంతో వృద్ధులు, ఇతర ప్రయాణికులకు కూడా రోప్‌వే ప్రయాణం సౌకర్యవంతంగా ఉండనుంది.

వారణాసి రోప్‌వే నిర్మాణానికి సుమారు రూ.675 కోట్ల వ్యయం అవుతుందని అంచనా. సుమారు 4.2 కిలోమీటర్ల మేర నిర్మిస్తున్న ఈ ప్రాజెక్టు నగర ప్రజా రవాణా వ్యవస్థలో కీలక మార్పు తీసుకురానుంది. ప్రాజెక్టు వ్యయంలో కేంద్ర ప్రభుత్వం 50 శాతం, ఉత్తరప్రదేశ్ ప్రభుత్వం 20 శాతం నిధులు సమకూర్చేలా వ్యయ భాగస్వామ్య విధానాన్ని రూపొందించారు. మిగిలిన నిధులను ప్రాజెక్టు ఆర్థిక ప్రణాళికలో భాగంగా సమకూర్చనున్నారు.

వారణాసికి ప్రతిరోజూ పెద్ద సంఖ్యలో భక్తులు, పర్యాటకులు వస్తుంటారు. ముఖ్యంగా కాశీ విశ్వనాథ ఆలయం, దశాశ్వమేథ ఘాట్ వంటి ప్రసిద్ధ పుణ్యక్షేత్రాలను సందర్శించేందుకు వివిధ ప్రాంతాల నుంచి ప్రజలు చేరుకుంటారు. రోప్‌వే అందుబాటులోకి వస్తే వీరికి ప్రయాణ సమయం తగ్గడంతో పాటు ట్రాఫిక్ ఇబ్బందుల నుంచి ఉపశమనం లభిస్తుంది. రహదారులపై వాహనాల సంఖ్య తగ్గేందుకు కూడా ఇది దోహదపడుతుంది. ప్రయాణికుల రవాణాతో పాటు వస్తువుల తరలింపునకు కూడా ఈ వ్యవస్థను ఉపయోగించే అవకాశాలను ప్రాజెక్టు ప్రణాళికలో ప్రస్తావించారు.

మొత్తంగా వారణాసిలో చేపట్టిన ఈ రోప్‌వే ప్రాజెక్టు దేశంలో ప్రజా రవాణాకు సరికొత్త దిశ చూపనుంది. భవిష్యత్తులో ట్రాఫిక్ సమస్యలు ఎక్కువగా ఉన్న ఇతర నగరాల్లోనూ ఇలాంటి రోప్‌వే వ్యవస్థలను ఏర్పాటు చేసేందుకు ఇది మార్గదర్శకంగా నిలిచే అవకాశం ఉంది.

Shakuntala Railways: దేశంలో ప్రైవేట్ యాజ‌మాన్యంలో న‌డిచే ఏకైక‌ రైల్వే లైన్ ఇదే

Narender Vaitla — Fri, 06 Nov 2026 15:38:13 +0530

Shakuntala Railways: భారతదేశంలో రైల్వే వ్యవస్థ మొత్తం కేంద్ర ప్రభుత్వ ఆధీనంలోనే ఉంటుందని తెలిసిందే. అయితే ఒక రైల్వే లైన్ మాత్రం ఇప్పటికీ ప్రైవేట్ యాజమాన్యంలో కొనసాగుతోంది. అసలేంటీ రైల్వే లైన్‌.? ఇప్పటికీ ప్రైవేట్ యాజమాన్యంలో ఎందుకు ఉంది?

శకుంతల రైల్వే చరిత్ర 1910లో ప్రారంభమైంది. అప్పట్లో బ్రిటిష్ సంస్థ కిలిక్-నిక్సన్ (Killick-Nixon) ఈ రైల్వే మార్గాన్ని ఏర్పాటు చేయడానికి ముందుకొచ్చింది. ఇందుకోసం సెంట్రల్ ప్రావిన్స్ రైల్వే కంపెనీ (CPRC) పేరుతో ఒక సంస్థను ఏర్పాటు చేశారు. ఇందులో బ్రిటిష్ ప్రభుత్వం కూడా భాగస్వామిగా ఉంది. మహారాష్ట్రలోని విదర్భ ప్రాంతం పత్తి సాగుకు ప్రసిద్ధి. ఇక్కడ పండించే పత్తిని రైళ్ల ద్వారా రవాణా చేసి, చివరకు ఇంగ్లండ్‌లోని మాంచెస్టర్‌కు తరలించాలన్నది అప్పటి ప్రధాన ఉద్దేశం. ఈ అవసరం కోసమే రైల్వే ట్రాక్ నిర్మాణం చేపట్టారు. 1916 నాటికి ఈ మార్గంలో రైళ్ల రాకపోకలు ప్రారంభమయ్యాయి. తొలుత పత్తి రవాణాకే ఉపయోగించిన ఈ రైల్వే మార్గం, ఆ తర్వాత ప్రయాణికుల రవాణాకు కూడా అందుబాటులోకి వచ్చింది. అలా శకుంతల రైల్వేస్ ప్రజలకు పరిచయమైంది.

భారతదేశానికి స్వాతంత్రం వచ్చిన తర్వాత రైల్వే వ్యవస్థలో అనేక మార్పులు చోటుచేసుకున్నాయి. 1952లో దేశంలోని రైల్వే వ్యవస్థను ప్రభుత్వం జాతీయం చేసింది. దీంతో ప్రైవేట్ సంస్థల ఆధీనంలో ఉన్న అనేక రైల్వే మార్గాలు భారతీయ రైల్వేలో విలీనమయ్యాయి. అయితే శకుంతల రైల్వే లైన్ మాత్రం ప్రైవేట్ యాజమాన్యంలోనే కొనసాగింది. దీనికి ప్రధాన కారణం అప్పటి జాతీయీకరణ ప్రక్రియలో ఈ మార్గం ప్రభుత్వ ఆధీనంలోకి రాకపోవడమేనని చెబుతారు. ఈ రైల్వే లైన్ యాజమాన్యం ఇప్పటికీ సెంట్రల్ ప్రావిన్స్ రైల్వే కంపెనీ (CPRC) చేతుల్లోనే ఉంది. ఈ సంస్థను మొదట ఏర్పాటు చేసిన కిలిక్-నిక్సన్ సంస్థ కూడా కాలక్రమంలో భారతీయుల చేతుల్లోకి మారింది. అయితే రైళ్ల నిర్వహణ మాత్రం భారతీయ రైల్వే ఆధ్వర్యంలోనే జరుగుతోంది. అంటే పట్టాలు ఒక ప్రైవేట్ సంస్థకు చెందినవి కాగా, వాటిపై రైళ్లను నడిపించే బాధ్యత భారతీయ రైల్వే తీసుకుంటోంది. ఈ ప్రత్యేక ఒప్పందం కారణంగానే శకుంతల రైల్వే ఇప్పటికీ ప్రత్యేక గుర్తింపు పొందింది.

శకుంతల ఎక్స్‌ప్రెస్‌కు మరో ప్రత్యేకత ఉంది. ఒకప్పుడు ఈ రైలును ఆవిరి ఇంజిన్‌తో నడిపించేవారు. 1921లో మాంచెస్టర్‌లో తయారైన ZD తరహా ఆవిరి ఇంజిన్‌ను 1923లో ఈ మార్గంలో ఉపయోగించడం ప్రారంభించారు. దాదాపు 70 ఏళ్లకు పైగా ఈ ఇంజిన్‌ను ఉప‌యోగించారు. చివరకు 1994 ఏప్రిల్ 15న ఆవిరి ఇంజిన్‌కు స్వస్తి పలికి, దాని స్థానంలో డీజిల్ ఇంజిన్‌ను ప్రవేశపెట్టారు. అప్పటి నుంచి డీజిల్ ఇంజిన్‌తోనే రైళ్లు నడుస్తున్నాయి. గతంలో ఈ రైలుకు మరో విచిత్రమైన ప్రత్యేకత కూడా ఉండేది.

రైల్వే స్టేషన్లలో ఆగడమే కాకుండా, ప్రయాణికులు ఎక్కడైనా చేయి ఊపితే అక్కడ కూడా రైలును ఆపేవారని అప్ప‌టి ప్రయాణికులు గుర్తుచేసుకుంటారు. ప్రస్తుతం ఈ రైల్వే మార్గం సెంట్రల్ రైల్వే పరిధిలోని భుసావల్ డివిజన్‌లో ఉంది. రైల్వే శాఖ ఈ మార్గంలో రైళ్లను నడుపుతుండగా, పట్టాల నిర్వహణ బాధ్యత మాత్రం వాటి యజమాని అయిన CPRCపై ఉంటుంది. ఈ రెండు సంస్థల మధ్య కుదిరిన ఒప్పందాన్ని ప్రతి పదేళ్లకోసారి పునరుద్ధరించే అవకాశం ఉంది. స్వాతంత్రం తర్వాత ఈ ఒప్పందాన్ని పలుమార్లు పొడిగించారు.

మహారాష్ట్రలోని మూర్తజాపూర్ నుంచి రెండు వైపులుగా ఈ రైల్వే మార్గం విస్తరించింది. మూర్తజాపూర్ నుంచి యవత్మాల్ వరకు 113 కిలోమీటర్లు, మూర్తజాపూర్ నుంచి అచల్‌పూర్ వరకు 76 కిలోమీటర్ల మేర ఈ రైల్వే లైన్లు ఉన్నాయి. మొత్తం దూరం దాదాపు 190 కిలోమీటర్లు. భారతదేశంలోని చాలా రైల్వే మార్గాలు బ్రాడ్‌గేజ్‌లోకి మారిపోయినా, శకుంతల రైల్వే మాత్రం చాలాకాలం నారో గేజ్ పట్టాలపైనే కొనసాగింది. ఈ మార్గంలో రోజుకు ఒక రౌండ్ ట్రిప్ మాత్రమే ఉండేది. మొత్తం ప్రయాణానికి దాదాపు 20 గంటల సమయం పట్టేదంటా. ఈ రైలు వేగం గంటకు సగటున 20 కిలోమీటర్లు మాత్రమే. అయినప్పటికీ స్థానిక గ్రామాల ప్రజలకు ఇది ఎంతో ఉపయోగకరంగా ఉంది. మూర్తజాపూర్ నుంచి యవత్మాల్‌కు బస్సులో వెళ్లాలంటే కొన్ని గంటలే పట్టినా, దాదాపు రూ.150 వరకు ఖర్చవుతుంది. అదే రైలులో ప్రయాణిస్తే ఆ ఖర్చులో ఆరో వంతు మాత్రమే అవుతుందని స్థానికులు చెబుతారు. అందుకే ఈ ప్రాంతంలోని పేద ప్రజలు, చిన్న వ్యాపారులు, గ్రామీణ ప్రయాణికులకు శకుంతల ఎక్స్‌ప్రెస్ ముఖ్యమైన రవాణా సాధనంగా మారింది.

కాలం మారుతున్న కొద్దీ రైల్వే వ్యవస్థలోనూ ఆధునిక మార్పులు వస్తున్నాయి. ఈ నేపథ్యంలో శకుంతల రైల్వే మార్గాన్ని కూడా ఆధునికీకరించాలనే నిర్ణయం తీసుకున్నారు. యవత్మాల్–మూర్తజాపూర్–అచల్‌పూర్ నారో గేజ్ రైల్వే మార్గాన్ని బ్రాడ్‌గేజ్‌గా మార్చేందుకు రూ.1,500 కోట్ల నిధులు మంజూరైనట్లు అప్పట్లో ప్రకటించారు. ఇప్పటికే పనులు కూడా మొదలయ్యాయి.

IRCTC Kedarnath Yatra: హెలికాప్టర్‌లో కేదార్‌నాథ్ యాత్ర.. టికెట్ బుకింగ్ ప్రాసెస్, ముఖ్యమైన విషయాలు ఇవే

Mahesh Rajamoni — Mon, 09 Nov 2026 16:29:11 +0530

IRCTC Kedarnath Yatra: పర్యాటకులకు ఐఆర్‌సీటీసీ గుడ్ న్యూస్ చెప్పింది. శ్రీ బాబా కేదార్‌నాథ్ దర్శనం కోసం ఐఆర్‌సీటీసీ హెలికాప్టర్ బుకింగ్ సర్వీస్ అందుబాటులోకి వచ్చింది. ఆ వివరాలు ఇక్కడ తెలుసుకుందాం.

ఛార్ ధామ్ యాత్రలో అత్యంత పవిత్రమైన శ్రీ బాబా కేదార్‌నాథ్ దర్శనానికి వెళ్లే భక్తుల కోసం ఐఆర్‌సీటీసీ (IRCTC) ఒక సూపర్‌ సర్వీస్‌ను అందుబాటులోకి తెచ్చింది. భక్తులు ఇప్పుడు తమ ఇంట్లోనే కూర్చుని ఐఆర్‌సీటీసీ అధికారిక వెబ్‌సైట్ ద్వారా కేదార్‌నాథ్ హెలికాప్టర్ టికెట్లను చాలా ఈజీగా బుక్ చేసుకోవచ్చు. అయితే శీతాకాలం ప్రారంభమవుతుండటంతో నవంబర్ 11న ఆలయ తలుపులు మూసివేయనున్నారు. కాబట్టి ప్రయాణం చేయాలనుకునే వారు వెంటనే టికెట్లు బుక్ చేసుకోవడం మంచిది.

ప్రభుత్వ రంగానికి చెందిన ఐఆర్‌సీటీసీ పోర్టల్‌లో అక్టోబర్ 9న మధ్యాహ్నం 3 గంటల నుంచి ఈ హెలికాప్టర్ బుకింగ్ సర్వీస్ లైవ్‌లోకి వచ్చింది. హేమకుండ్ సాహిబ్ తర్వాత హెలికాప్టర్ బుకింగ్ సదుపాయం పొందిన రెండవ పుణ్యక్షేత్రంగా కేదార్‌నాథ్ నిలిచింది. నవంబర్ 11 నుంచి శీతాకాలం కారణంగా కేదార్‌నాథ్ ఆలయం మూసివేయనున్నారు.

కేదార్‌నాథ్ హెలికాప్టర్ టికెట్ల బుకింగ్ కోసం ఐఆర్‌సీటీసీ ఒక ప్రత్యేకమైన వెబ్‌పేజీని సిద్ధం చేసింది. టికెట్లు కేవలం ఈ అధికారిక వెబ్‌సైట్‌లో మాత్రమే లభిస్తాయి. ఎలాంటి ఆఫ్‌లైన్ కౌంటర్లు అందుబాటులో ఉండవని గుర్తుంచుకోవాలి. ఉత్తరాఖండ్ ప్రభుత్వం, ఉత్తరాఖండ్ సివిల్ ఏవియేషన్ డెవలప్‌మెంట్ కార్పొరేషన్ భాగస్వామ్యంతో ఐఆర్‌సీటీసీ ఈ బుకింగ్ ప్రాసెస్‌ను నిర్వహిస్తోంది. ఇక హేమకుండ్ సాహిబ్ హెలికాప్టర్ టికెట్ల బుకింగ్ సెప్టెంబర్ 22 నుంచి ఇదే పోర్టల్‌లో ప్రారంభమైంది.

• ప్రయాణికులు ముందుగా అధికారిక వెబ్‌సైట్ https://www.heliyatra.irctc.co.in/ ని ఓపెన్ చేయాలి.

• హోమ్ పేజీలో మీకు హేమకుండ్ సాహిబ్, కేదార్‌నాథ్ హెలికాప్టర్ బుకింగ్ ఆప్షన్లు కనిపిస్తాయి.

• అందులో "Book Ticket" ఆప్షన్‌పై క్లిక్ చేయాలి.

• లాగిన్ పేజీకి వెళ్లిన తర్వాత "Create an account" ఎంచుకుని రిజిస్ట్రేషన్ పూర్తి చేయాలి.

• మీ మొబైల్ నంబర్, పాస్‌వర్డ్‌తో లాగిన్ అవ్వాలి. అక్కడ మీకు టిక్కెట్ బుక్ చేసుకునే వివరాలు వుంటాయి.

ఐఆర్‌సీటీసీ పోర్టల్‌లో రిజిస్ట్రేషన్ చేసుకోకుండా ప్రయాణ తేదీలు చూడటం సాధ్యపడదు. కాబట్టి మొదట మీ మొబైల్ నంబర్‌తో అకౌంట్ క్రియేట్ చేసుకుని, పాస్‌వర్డ్‌ను సెట్ చేసుకోవాలి. అలాగే ఆలయ మూసివేత సమయాన్ని, అందుబాటులో ఉన్న తేదీల విండోను చెక్ చేసి ప్లాన్ చేసుకోవడం చాలా ముఖ్యం.

యమునోత్రి, గంగోత్రి, కేదార్‌నాథ్, బద్రీనాథ్ క్షేత్రాలను కలిపి ఛార్ ధామ్ యాత్రగా పిలుస్తారు. కేదార్‌నాథ్ ఆలయ ద్వారాలు తెరుచుకోవడంతో ఈ యాత్ర ప్రారంభమవుతుంది. ఈ ఏడాది ఏప్రిల్ 22న కేదార్‌నాథ్ ద్వారాలు తెరుచుకున్నాయి. ఉత్తరాఖండ్‌లోని రుద్రప్రయాగ్ జిల్లాలో ఉన్న కేదార్‌నాథ్‌ను స్టేట్ ఎమర్జెన్సీ ఆపరేషన్ సెంటర్ రిపోర్టు ప్రకారం ఇప్పటివరకు 11,05,676 మంది భక్తులు దర్శించుకున్నారు.

నాలుగు ధామాల్లోకెల్లా ఇక్కడే అత్యధిక సంఖ్యలో భక్తులు రావడం విశేషం. ఏప్రిల్ 23న యాత్ర ప్రారంభమైన బద్రీనాథ్‌ను 9,08,619 మంది, గంగోత్రిని 5,28,406 మంది, యమునోత్రిని 5,07,421 మంది భక్తులు సందర్శించారు. ప్రముఖ సిక్కు పుణ్యక్షేత్రమైన హేమకుండ్ సాహిబ్‌ను 55,411 మంది సందర్శించారు.

Modi Cabinet Decisions: ప్రపంచంలోనే అతిపెద్ద మ్యూజియం.. రైతులు, బిజినెస్ చేసేవారికి పండగే !

Mahesh Rajamoni — Thu, 12 Nov 2026 09:00:55 +0530

Modi Cabinet Decisions: ప్రధాని నరేంద్ర మోదీ అధ్యక్షతన జరిగిన కేంద్ర కేబినెట్ భేటీలో రూ. 77,101 కోట్ల విలువైన 5 కీలక నిర్ణయాలు తీసుకున్నారు. రైతులకు ఎరువుల సబ్సిడీ, నోయిడా మెట్రో విస్తరణ సహా పూర్తి వివరాలు ఇలా ఉన్నాయి..

ప్రధానమంత్రి నరేంద్ర మోదీ అధ్యక్షతన బుధవారం జరిగిన కేంద్ర కేబినెట్ సమావేశంలో కీలక నిర్ణయాలు తీసుకున్నారు. ఈ భేటీలో సామాన్య ప్రజలు, రైతులు, వ్యాపారుల కోసం 5 ప్రధాన అంశాలను పరిగణలోకి తీసుకున్నారు. వీటి కోసం మొత్తం రూ. 77,101 కోట్ల బడ్జెట్‌ను కేటాయించారు. ఈ నిర్ణయాలతో దేశ మౌలిక సదుపాయాలు, వ్యవసాయ రంగం, చిన్న పరిశ్రమలకు కొత్త బలం చేకూరనుంది.

భారతదేశ గొప్ప చరిత్ర, వారసత్వాన్ని ప్రపంచానికి చూపించేందుకు ఢిల్లీలో భారీ మ్యూజియం నిర్మించనున్నారు. చరిత్రాత్మక నార్త్, సౌత్ బ్లాక్‌లలో 'యుగే యుగీన్ భారత్ మ్యూజియం' పేరుతో దీనిని ఏర్పాటు చేస్తారు. ఈ ప్రతిష్ఠాత్మక ప్రాజెక్ట్ కోసం రూ. 3,230 కోట్లు ఖర్చు చేయనున్నారు.

ఈ మ్యూజియం మొదటి గ్యాలరీని 2027లో సామాన్య ప్రజల కోసం ఓపెన్ చేస్తారు. ఇక్కడికి ఏటా కోటి మంది పర్యాటకులు వస్తారని కేంద్రం అంచనా వేస్తోంది.

రబీ సీజన్ (అక్టోబర్ నుంచి మార్చి) నేపథ్యంలో కేంద్ర మంత్రివర్గం రైతులకు భారీ ఊరటనిచ్చింది. ఎరువుల సబ్సిడీ కింద రూ. 62,370 కోట్లను కేబినెట్ ఆమోదించింది. పోషక ఆధారిత సబ్సిడీ విధానం కింద రైతులకు తక్కువ ధరలకే ఫాస్ఫేటిక్, పొటాషిక్ ఎరువులను అందిస్తారు. దీనివల్ల సాగు ఖర్చు తగ్గి అన్నదాతలకు ఎంతో మేలు జరుగుతుంది.

చిన్న వ్యాపారులను ఆర్థికంగా బలోపేతం చేసేందుకు కేబినెట్ కీలక అడుగు వేసింది. మైక్రో యూనిట్ల క్రెడిట్ గ్యారెంటీ ఫండ్‌ను కొనసాగించేందుకు ఆమోదం తెలిపింది. ఇందుకోసం రూ. 5,000 కోట్లు కేటాయించింది. ఈ ఫండ్ ద్వారా ప్రధానమంత్రి ముద్రా యోజన కింద రూ. 12.6 లక్షల కోట్ల వరకు ఇచ్చే రుణాలకు గ్యారెంటీ లభిస్తుంది. దీనివల్ల బ్యాంకులు చిన్న వ్యాపారులకు సులభంగా లోన్లు ఇచ్చే అవకాశం ఉంటుంది.

స్వయం ఉపాధి, కొత్తగా వ్యాపారం ప్రారంభించే ఎంట్రప్రెన్యూర్లను ప్రోత్సహించే 'స్టాండ్ అప్ ఇండియా' పథకానికి కేబినెట్ ఊతమిచ్చింది. ఈ స్కీమ్ కోసం రూ. 4,111 కోట్ల క్రెడిట్ గ్యారెంటీ ఫండ్‌ను మంజూరు చేసింది. దీనివల్ల కొత్తగా బిజినెస్ స్టార్ట్ చేయాలనుకునే వారికి, తమ వ్యాపారాన్ని విస్తరించాలనుకునే వారికి సంస్థాగత రుణాలు ఈజీగా దొరుకుతాయి.

నోయిడా ఆక్వా లైన్ మెట్రో రైలు కారిడార్ విస్తరణకు కేబినెట్ గ్రీన్ సిగ్నల్ ఇచ్చింది. ఈ ప్రాజెక్ట్ కింద నోయిడా సెక్టార్-51 నుంచి గ్రేటర్ నోయిడా సెక్టార్-04 మధ్య 8.449 కిలోమీటర్ల మేర కొత్త లైన్ వేస్తారు. ఇందులో 5 కొత్త మెట్రో స్టేషన్లు నిర్మిస్తారు. ఈ మొత్తం ప్రాజెక్ట్ కోసం రూ. 2,390 కోట్లు ఖర్చు చేయనున్నారు.

ఈ లైన్ అందుబాటులోకి వస్తే రెండు నగరాల్లోని మొత్తం మెట్రో నెట్‌వర్క్ 71.878 కిలోమీటర్లకు చేరుకుంటుంది. దీనివల్ల గౌర్ సిటీ మాల్, బ్లూ సఫైర్ మాల్, ఐకియా, టెక్ మహీంద్రా వంటి పెద్ద కమర్షియల్, ఆఫీస్ హబ్‌లకు డైరెక్ట్ కనెక్టివిటీ లభిస్తుంది. రోడ్లపై ట్రాఫిక్ తగ్గి, రోజువారీ ప్రయాణికులకు జర్నీ చాలా ఈజీ అవుతుంది.

Chicken Price Hike: పెట్రోల్ దెబ్బ.. పెరగనున్న గుడ్లు, చికెన్ ధరలు.. అసలు సంగతి ఇదే

Mahesh Rajamoni — Tue, 10 Nov 2026 19:45:43 +0530

Chicken Price Hike: పెట్రోల్‌లో ఇథనాల్ బ్లెండింగ్ కోసం మొక్కజొన్న వాడకం పెరగడంతో పౌల్ట్రీ పరిశ్రమకు భారీ దెబ్బ తగలనుందని రిపోర్టులు పేర్కొంటున్నాయి. రాబోయే రోజుల్లో చికెన్, గుడ్ల ధరలు విపరీతంగా పెరిగే అవకాశం ఉంది.

బైక్ లేదా కారు ట్యాంక్‌లో పోయించే పెట్రోల్ వల్ల చికెన్ ప్రియులకు పెద్ద షాక్ తగలనుంది. దేశంలో పెట్రోల్‌లో ఇథనాల్‌ను కలపడం అనే ప్రభుత్వ లక్ష్యం వేగంగా ముందుకు సాగుతోంది. అయితే ఈ క్రమంలో ఇథనాల్ తయారీకి మొక్కజొన్న వాడకం విపరీతంగా పెరిగిపోవడం పౌల్ట్రీ పరిశ్రమను కలవరపెడుతోంది. పౌల్ట్రీ ఫీడ్‌లో ప్రధాన భాగమైన మొక్కజొన్న కొరత ఏర్పడితే, కోడి దాణా ధరలు పెరిగి రాబోయే రోజుల్లో చికెన్, గుడ్ల ధరలు సామాన్యుడికి అందుబాటులో లేకుండాపోయే ప్రమాదం కనిపిస్తోంది.

ఆయిల్ మార్కెటింగ్ కంపెనీలు E20 పెట్రోల్ లక్ష్యాన్ని చేరుకోవడానికి కొత్తగా ఇథనాల్ టెండర్లను పిలిచాయి. ఈ టెండర్లలో మొక్కజొన్ననే అత్యంత ముఖ్యమైన ముడిసరుకుగా మార్చేశారు. గత ఏడాది ఇథనాల్ తయారీలో మొక్కజొన్న ఆఫర్లు 45 శాతంగా ఉంటే, ఈ సారి ఏకంగా 59 శాతానికి పెరిగాయి.

గత ఏడాది సెప్టెంబర్ నాటికి మొత్తం ఇథనాల్ సరఫరాలో మొక్కజొన్న వాటా కేవలం 41 శాతంగా మాత్రమే ఉండేది. ఈ ఏడాది ఆయిల్ మార్కెటింగ్ కంపెనీలు మొత్తం 11 బిలియన్ లీటర్ల ఇథనాల్ కొనుగోలుకు టెండర్లు జారీ చేయగా, డిస్టిల్లరీలు, తయారీదారులు అవసరానికి మించి అంటే 1.8 రెట్లు (19.35 బిలియన్ లీటర్లు) సరఫరా చేస్తామని ఆఫర్లు ఇచ్చారు.

దేశంలో కరవు పరిస్థితులు, తక్కువ ఉత్పత్తి కారణంగా ప్రభుత్వం చెరకు రసం, బి-హెవీ మోలాసెస్, షుగర్ సిరప్‌లను ఇథనాల్ ప్రోగ్రామ్ నుంచి పక్కనబెట్టింది. దీనికి తోడు ఫుడ్ కార్పొరేషన్ ఆఫ్ ఇండియా (FCI) బియ్యం వాడకంపై కూడా 7.2 మిలియన్ టన్నుల పరిమితిని విధించింది.

దీంతో ఇథనాల్ కంపెనీలన్నీ తమ దృష్టిని మొక్కజొన్న, పాడైపోయిన ధాన్యం వైపు తిప్పాయి. మొక్కజొన్న నుంచి తయారుచేసే ఇథనాల్ ధరపై ప్రభుత్వం లీటరుకు 3 రూపాయల కోత విధించినప్పటికీ, బహిరంగ మార్కెట్లో మొక్కజొన్న ధరలు గత ఏడాదితో పోలిస్తే రెట్టింపు కావడమే చికెన్ ధరల పెరుగుదలకు ప్రధాన కారణమవుతోంది.

మొక్కజొన్న ను భారీగా ఇథనాల్ వైపు మళ్లించడం వల్ల పౌల్ట్రీ ఫార్మింగ్, పశువుల దాణా పరిశ్రమ లెక్కింపులన్నీ తలకిందులయ్యాయి. కోళ్ల దాణా తయారీలో దాదాపు 60 శాతం వాటా మొక్కజొన్నదే ఉంటుంది. ఇది కాకుండా స్టార్చ్, పేపర్ పరిశ్రమలకు కూడా ఇదే ముఖ్యమైన ముడిసరుకు.

ఇప్పుడు ఇథనాల్ రంగం, పౌల్ట్రీ రంగం రెండూ మొక్కజొన్న కోసమే పోటీ పడితే, మార్కెట్లో మొక్కజొన్న ధర మరింత మండిపోతుంది. పౌల్ట్రీ రైతులకు ప్రొడక్షన్ కాస్ట్ విపరీతంగా పెరిగిపోయి, ఆ భారం చివరకు చికెన్, గుడ్లు కొనే వినియోగదారుడి పైనే పడుతుందని వ్యవసాయ రంగానికి చెందిన నిపుణులు ఆందోళన వ్యక్తం చేస్తున్నారు.

ప్రారంభంలో వస్తున్న సరఫరా ఆఫర్ల సంఖ్య పెద్దదిగా కనిపిస్తున్నప్పటికీ, తుది కేటాయింపులు అనేది కంపెనీల కెపాసిటీ, ప్రభుత్వ నిబంధనలపై ఆధారపడి ఉంటాయని పరిశ్రమ నిపుణులు చెబుతున్నారు. ఏది ఏమైనా, మొక్కజొన్న డిమాండ్, సరఫరా మధ్య ఉన్న వ్యత్యాసం రాబోయే రోజుల్లో ఆహార ద్రవ్యోల్బణాన్ని పెంచే అవకాశం వుందనే ఆందోళనలు ఉన్నాయి.

సమయానికి ప్రభుత్వం సరైన చర్యలు తీసుకోకపోతే, క్లీన్ ఎనర్జీ లక్ష్యం సాధించడం ఏమో గానీ పౌల్ట్రీ రంగం తీవ్ర నష్టాల్లో కూరుకుపోయి, చికెన్ ధరలు సామాన్యుడి వంటగది బడ్జెట్‌ను తలకిందులు చేయడం ఖాయంగా కనిపిస్తోందనే అభిప్రాయాలు వ్యక్తమవుతున్నాయి.

ఆంధ్ర‌ప్ర‌దేశ్‌లో భారీ డేటా సెంట‌ర్‌.. రూ.570 కోట్ల పెట్టుబడి, 2,565 మందికి ఉద్యోగాలు

Narender Vaitla — Tue, 10 Nov 2026 17:05:36 +0530

Andhra Pradesh: ఆంధ్రప్రదేశ్‌లో పెట్టుబడులు, పారిశ్రామిక అభివృద్ధి, ఉద్యోగ కల్పన, మౌలిక సదుపాయాల విస్తరణే లక్ష్యంగా రాష్ట్ర ప్రభుత్వం కీలక నిర్ణయాలు తీసుకుంది. చంద్ర‌బాబు అధ్యక్షతన ఈ స‌మావేశం జ‌రిగింది.

రాష్ట్రంలో అత్యాధునిక సాంకేతిక రంగాలను ప్రోత్సహించేందుకు ప్రభుత్వం ప్రత్యేక దృష్టి సారించింది. ఇందులో భాగంగా 2026–2031 కాలానికి సంబంధించిన ఏపీ ఏవీజీసీ-ఎక్స్‌ఆర్‌ పాలసీకి క్యాబినెట్ ఆమోదం తెలిపింది. యానిమేషన్, విజువల్ ఎఫెక్ట్స్, గేమింగ్, కామిక్స్, ఎక్స్‌టెండెడ్ రియాలిటీ రంగాల్లో పెట్టుబడులను ఆకర్షించడం ఈ విధానం ప్రధాన ఉద్దేశం. అలాగే 2036 వరకు అమల్లో ఉండే రోబోటిక్స్, ఫిజికల్ ఏఐ పాలసీకి కూడా ఆమోదం లభించింది. సెమీకండక్టర్, డిస్‌ప్లే ఫ్యాబ్ పాలసీ-4.0లో మార్పులు చేయాలన్న ప్రతిపాదనకు మంత్రివర్గం పచ్చజెండా ఊపింది. భవిష్యత్తులో డిజిటల్ టెక్నాలజీ, ఆర్టిఫిషియల్ ఇంటెలిజెన్స్, ఎలక్ట్రానిక్స్ తయారీ రంగాల్లో ఏపీని కీలక కేంద్రంగా తీర్చిదిద్దేందుకు ఈ నిర్ణయాలు దోహదపడనున్నాయి.

రాష్ట్రానికి పెద్ద ఎత్తున పెట్టుబడులు తీసుకొచ్చే పలు ప్రాజెక్టులపై క్యాబినెట్ కీలక నిర్ణయాలు తీసుకుంది. విశాఖ జిల్లా భీమునిపట్నం మండలం అమనాంలో 512 మెగావాట్ల సామర్థ్యంతో ఏఐ డేటా సెంటర్ ఏర్పాటు ప్రతిపాదనకు ఆమోదం తెలిపింది. ఏఎం ఇంటెలిజెన్స్ ల్యాబ్స్ చేపట్టనున్న ఈ ప్రాజెక్టు ద్వారా రూ.31,387 కోట్ల పెట్టుబడులు రావడంతో పాటు సుమారు వెయ్యి మందికి ఉద్యోగ అవకాశాలు లభించనున్నాయి. అనకాపల్లి జిల్లా రాంబిల్లిలో ఈప్యాక్ సంస్థ రూ.570.20 కోట్ల పెట్టుబడితో డేటా సెంటర్ యూనిట్ ఏర్పాటు చేయనుంది. ఈ ప్రాజెక్టు ద్వారా 2,565 మందికి ఉపాధి కల్పించనున్నారు. తిరుపతిలో డిక్సన్ టెక్నాలజీస్‌కు భూముల కేటాయింపు ప్రతిపాదనను కూడా పరిశీలించి ముందుకు తీసుకెళ్లారు. ఈ సంస్థ రూ.700 కోట్ల పెట్టుబడితో 2,300 మందికి ఉద్యోగాలు కల్పించనుంది. నాయుడుపేటలో లిథియం బ్యాటరీ తయారీకి అవసరమైన మెటీరియల్ ఉత్పత్తి పరిశ్రమ ఏర్పాటుపైనా చర్చ జరిగింది. కార్బన్ కాస్మో సంస్థ రూ.4 వేల కోట్ల పెట్టుబడితో పరిశ్రమ స్థాపించే అంశం సమావేశంలో ప్రస్తావనకు వచ్చింది. అదానీ గ్రూపు ప్రతిపాదించిన క్లౌడ్ హబ్‌పైనా ఐటీ శాఖ సమర్పించిన నివేదిక ఆధారంగా చర్చించారు.

పారిశ్రామిక రంగంలో కొత్త అవకాశాలు కల్పించడంతో పాటు మహిళా పారిశ్రామికవేత్తలను ప్రోత్సహించే దిశగా ప్రభుత్వం పలు నిర్ణయాలు తీసుకుంది. అన్నమయ్య జిల్లాలో 56.82 ఎకరాల విస్తీర్ణంలో ఫుట్‌వేర్ కాంపోనెంట్ పార్కు ఏర్పాటుకు క్యాబినెట్ ఆమోదం తెలిపింది. దీనివల్ల పాదరక్షల తయారీకి అవసరమైన విడిభాగాల పరిశ్రమలకు అవకాశాలు పెరగనున్నాయి. ఎన్టీఆర్ జిల్లా జయంతిపురంలో 30 ఎకరాల్లో ఎఫ్‌ఎల్‌వో మహిళా పారిశ్రామిక పార్కు ఏర్పాటు చేయనున్నారు. ఇందులో మహిళా పారిశ్రామికవేత్తలకు ఎకరా రూ.35.31 లక్షల చొప్పున భూములు కేటాయించే ప్రతిపాదనకు ఆమోదం లభించింది. హెటెరో గ్రూపునకు బల్క్ డ్రగ్ పార్కులో భూముల కేటాయింపు అంశం కూడా క్యాబినెట్ పరిశీలనకు వచ్చింది. వివిధ జిల్లాల్లో బయోగ్యాస్ ప్లాంట్ల ఏర్పాటుతో పాటు పలు ఇంధన ప్రాజెక్టులకు కూడా మంత్రివర్గం ఆమోదం తెలిపింది. రాష్ట్రంలో పారిశ్రామిక కార్యకలాపాలు పెరగడం ద్వారా స్థానికంగా ఉపాధి అవకాశాలు మెరుగుపడతాయని ప్రభుత్వం భావిస్తోంది.

రోడ్డు ప్రమాదాల నియంత్రణ, ట్రాఫిక్ వ్యవస్థను మరింత సమర్థంగా నిర్వహించేందుకు ఏపీ పోలీస్ శాఖలో ప్రత్యేక విభాగాన్ని ఏర్పాటు చేయాలని ప్రభుత్వం నిర్ణయించింది. ఇందుకోసం ట్రాఫిక్ మేనేజ్‌మెంట్, రోడ్ సేఫ్టీ డైరెక్టరేట్ ఏర్పాటుకు క్యాబినెట్ ఆమోదం తెలిపింది. మంగళగిరిలోని పోలీస్ ప్రధాన కార్యాలయంలో ఐజీ స్థాయి అధికారి నేతృత్వంలో ఈ కొత్త విభాగం పనిచేయనుంది. ట్రాఫిక్ నియంత్రణ, రహదారి భద్రతకు సంబంధించిన చర్యలను సమన్వయం చేయడం దీని ప్రధాన బాధ్యతగా ఉండనుంది.

మరోవైపు టీటీడీలో ప్రధాన సన్నిధి యాదవ, అదనపు సన్నిధి యాదవ పోస్టుల ఏర్పాటుకు సంబంధించిన ప్రతిపాదనలపైనా చర్చించారు. చిన్న మాడ్యులర్ రియాక్టర్ల సాంకేతికతతో రాష్ట్రంలో అణు విద్యుత్ కేంద్రాల ఏర్పాటుకు సంబంధించిన అంశాన్ని కూడా మంత్రివర్గం పరిశీలించింది. ఈ ప్రాజెక్టుల్లో ప్రైవేట్ సంస్థలకు భాగస్వామ్యం కల్పించే అవకాశాలపైనా చర్చ జరిగినట్లు సమాచారం.

కూటమి విజయంపై హర్షం.. మంత్రులకు చంద్రబాబు సూచనలు

మంత్రివర్గ సమావేశానికి ముందు ఇటీవల జరిగిన స్థానిక సంస్థల ఎన్నికల్లో కూటమి సాధించిన విజయంపై మంత్రులు సంతోషం వ్యక్తం చేశారు. ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కల్యాణ్ కలిసి సమావేశ మందిరంలోకి ప్రవేశించగా మంత్రులంతా లేచి నిలబడి అభినందనలు తెలిపారు. చప్పట్లతో సమావేశ ప్రాంగణం మార్మోగింది. చంద్రబాబు, పవన్ కల్యాణ్ కూడా పరస్పరం కరచాలనం చేసుకుంటూ ఉత్సాహంగా సమావేశానికి హాజరయ్యారు.

అయితే ఈ విజయంతో అతిగా సంబరపడకుండా మరింత బాధ్యతగా పనిచేయాలని చంద్రబాబు మంత్రులకు సూచించారు. స్థానిక ఎన్నికల్లో వచ్చిన ఫలితాలను చూసి విజయగర్వం తలకెక్కించుకోవద్దని స్పష్టం చేశారు. ప్రజలు తమపై ఉంచిన నమ్మకాన్ని నిలబెట్టుకునేలా ప్రతి మంత్రి, ప్రజాప్రతినిధి పనిచేయాలని చెప్పారు. 2029 అసెంబ్లీ ఎన్నికలను లక్ష్యంగా పెట్టుకుని ఇప్పటి నుంచే ప్రజలకు మరింత చేరువ కావాలని దిశానిర్దేశం చేశారు. అభివృద్ధి, సంక్షేమ కార్యక్రమాల అమలులో వేగం పెంచాలని సూచించారు.

Axis Bank Rules : యాక్సిస్ బ్యాంక్ కస్టమర్లకు అలర్ట్.. డిసెంబర్ 1 నుంచి కొత్త రూల్స్, ఏంటో తెలుసా?

Arun Kumar P — Fri, 06 Nov 2026 16:49:57 +0530

మీరు యాక్సిస్ బ్యాంక్ సేవింగ్స్ అకౌంట్ వాడుతున్నారా? అయితే వచ్చే నెల అంటే డిసెంబర్ 1 నుంచి కొన్ని ముఖ్యమైన మార్పులు రాబోతున్నాయి. ఆ వివరాలు ఇక్కడ చూద్దాం.

ప్రైవేట్ రంగంలోని ప్రముఖ బ్యాంకుల్లో ఒకటైన యాక్సిస్ బ్యాంక్ డిసెంబర్ 1 నుండి అంటే వచ్చే నెల నుండి కొత్త రూల్స్ అమలుచేస్తోంది. ఇందులో కీలకమైనది సేవింగ్స్ అకౌంట్స్ సర్వీస్ ఛార్జీల్లో మార్పు. దేశీయ కస్టమర్లతో పాటు ఎన్ఆర్ఐల సేవింగ్స్ అకౌంట్లకు కూడా ఇవి వర్తిస్తాయి. ముఖ్యంగా ఈజీ యాక్సెస్, కృషి, సహజ్ అకౌంట్లు వాడేవాళ్లు ఈ విషయాలు తెలుసుకోవాలి.

ప్రస్తుతం యాక్సిస్ బ్యాంక్ కస్టమర్లు నెలకు 4 సార్లు లేదా లక్ష రూపాయల వరకు ఉచితంగా క్యాష్ ట్రాన్సాక్షన్స్ చేసుకోవచ్చు. కానీ డిసెంబర్ 1 నుంచి ఈ ఉచిత లావాదేవీల సంఖ్యను 4 నుంచి 3కి తగ్గిస్తున్నారు… కానీ లక్ష రూపాయల లిమిట్‌లో ఎలాంటి మార్పు లేదు. తరచుగా అకౌంట్లో డబ్బులు వేసేవాళ్లు లేదా తీసేవాళ్లకు ఇకపై అదనపు ఛార్జీలు కట్టాల్సి రావచ్చు.

అకౌంట్‌లో మినిమమ్ బ్యాలెన్స్ మెయింటైన్ చేయని వాళ్లకు యాక్సిస్ బ్యాంక్ వేసే పెనాల్టీలు కూడా ఇకపై పెరగనున్నాయి. సెమీ అర్బన్, రూరల్ బ్రాంచ్‌లలోని ఈజీ యాక్సెస్ అకౌంట్లకు ఇది వర్తిస్తుంది. సెమీ అర్బన్ బ్రాంచ్‌లలో ఇప్పటివరకు గరిష్ఠంగా రూ.300 వసూలు చేయగా, ఇకపై రూ.600 వరకు ఛార్జ్ చేస్తారు. రూరల్ బ్రాంచ్‌లలో ఉన్న రూ.150 పెనాల్టీని కూడా రూ.600కి పెంచారు.

ఎన్ఆర్ఐ ఈజీ యాక్సెస్ అకౌంట్లకు కూడా ఈ పెనాల్టీ రూ.300 నుంచి రూ.600కి పెరిగింది. అర్బన్, మెట్రో బ్రాంచ్‌లలో ఉన్న రూ.600 పెనాల్టీలో ఎలాంటి మార్పు లేదు. షార్ట్‌ఫాల్ ఆధారంగా 6 శాతం చొప్పున ఈ ఛార్జీలు లెక్కిస్తారు. శాలరీ అకౌంట్లకు ఈ మినిమమ్ బ్యాలెన్స్ రూల్స్ వర్తించవు.

చెక్ బౌన్స్ అయితే వేసే ఛార్జీలను కూడా బ్యాంక్ పెంచింది. ప్రస్తుతం మొదటిసారి చెక్ రిటర్న్ అయితే రూ.50, ఆ తర్వాత ప్రతిసారీ రూ.100 వసూలు చేస్తున్నారు. డిసెంబర్ 1 నుంచి ప్రతి చెక్ రిటర్న్‌కు ఫిక్స్‌డ్ ఛార్జీగా రూ.200 వసూలు చేయనున్నారు. ఎన్ఆర్ఐల బర్గండీ, ప్రయారిటీ, ప్రెస్టీజ్, ప్రైమ్ అకౌంట్లలో కొన్ని రిటర్న్ ట్రాన్సాక్షన్ల ఛార్జీలను రూ.50 నుంచి రూ.500కి పెంచారు.

అలాగే బర్గండీ, ప్రయారిటీ, ప్రెస్టీజ్, ప్రైమ్ ఎన్ఆర్ఐ, ఈజీ ఎన్ఆర్ఐ అకౌంట్లకు ఇచ్చే ఎడ్జ్ రివార్డ్ పాయింట్లను కూడా నిలిపివేస్తున్నారు. ప్రీమియం అకౌంట్లకు టోటల్ రిలేషన్ షిప్ వాల్యూ కండిషన్‌ను 75 శాతం నుంచి 100 శాతానికి పెంచారు. కాబట్టి కస్టమర్లు డిసెంబర్ 1 కంటే ముందే ఈ కొత్త ఛార్జీల వివరాలు తెలుసుకోవడం మంచిది.

Delhi: ర‌ణ‌రంగాన్ని త‌ల‌పిస్తోన్న ఢిల్లీ.. దేశ రాజ‌ధానిలో అస‌లేం జ‌రుగుతోంది?

Narender Vaitla — Sun, 01 Nov 2026 18:54:07 +0530

ఓటర్ల జాబితా సవరణపై ఇండియా కూటమి నిరసన

ఓటర్ల జాబితా ప్రత్యేక సమగ్ర సవరణ ప్రక్రియలో అవకతవకలు చోటుచేసుకుంటున్నాయని ఆరోపిస్తూ ఇండియా కూటమి ‘ఓట్ బచావో.. దేశ్ బచావో’ నినాదంతో భారీ నిరసన కార్యక్రమం చేపట్టింది. ఈ వ్యవహారానికి బాధ్యత వహిస్తూ ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని ప్రతిపక్ష నేతలు డిమాండ్ చేశారు. ఈ క్రమంలోనే ‘చలో ఢిల్లీ’ పేరుతో నిర్వహించిన ర్యాలీకి వివిధ రాష్ట్రాల నుంచి నాయకులు, కార్యకర్తలు తరలివచ్చారు. కాంగ్రెస్ అధ్యక్షుడు మల్లికార్జున ఖర్గే, లోక్‌సభలో ప్రతిపక్ష నేత రాహుల్ గాంధీ, పశ్చిమ బెంగాల్ మాజీ ముఖ్యమంత్రి మమతా బెనర్జీ, అభిషేక్ బెనర్జీ, జార్ఖండ్ ముఖ్యమంత్రి హేమంత్ సోరెన్, తెలంగాణ ముఖ్యమంత్రి రేవంత్ రెడ్డి, తేజస్వీ యాదవ్, అఖిలేశ్ యాదవ్ తదితర ప్రముఖులు ఈ కార్యక్రమంలో పాల్గొన్నారు. తొలుత కాన్‌స్టిట్యూషన్ క్లబ్ వద్ద సమావేశమైన కూటమి ఎంపీలు, అనంతరం ర్యాలీగా బయలుదేరి రాంలీలా మైదానానికి చేరుకున్నారు. ఈ కార్యక్రమానికి వేలాది మంది హాజరయ్యే అవకాశం ఉందని పోలీసులు అంచనా వేశారు.

1984 సిక్కుల ఊచకోతపై బీజేపీ కౌంటర్ ర్యాలీ

ఇండియా కూటమి నిరసనకు పోటీగా బీజేపీ పశ్చిమ ఢిల్లీలో ర్యాలీ నిర్వహించింది. 1984లో సిక్కులపై జరిగిన దాడులను ప్రస్తావిస్తూ, ఆ ఘటనలకు కాంగ్రెస్ బాధ్యత వహించాలని, రాహుల్ గాంధీ క్షమాపణలు చెప్పాలని పార్టీ నేతలు డిమాండ్ చేశారు. కాంగ్రెస్ ర్యాలీ నిర్వహిస్తున్న రోజునే సిక్కుల ఊచకోత బాధితులకు న్యాయం చేయాలనే నినాదంతో కార్యక్రమాన్ని చేపట్టడం రాజకీయంగా ప్రాధాన్యం సంతరించుకుంది. హరినగర్ బస్ డిపో నుంచి ప్రారంభమైన బీజేపీ ర్యాలీ తిలక్ నగర్ మెట్రో స్టేషన్ వరకు కొనసాగింది. కేంద్ర మంత్రి హర్‌దీప్ సింగ్ పురి, ఢిల్లీ ముఖ్యమంత్రి రేఖా గుప్తా, కేంద్ర సహాయ మంత్రి హర్ష్ మల్హోత్రా, మన్‌జీందర్ సింగ్ సిర్సా, బీజేపీ ఎంపీ బాన్సురీ స్వరాజ్ తదితరులు పాల్గొన్నారు. 1984 అల్లర్లలో బాధితులైన కుటుంబ సభ్యులు కూడా నిరసనలో భాగమయ్యారు.

ఆనాటి ఘటనలను గుర్తుచేసుకున్న హర్‌దీప్ సింగ్ పురి.. సిక్కులపై జరిగిన దాడులు తీవ్ర విషాదాన్ని మిగిల్చాయని పేర్కొన్నారు. తన తల్లిదండ్రులను హిందూ స్నేహితులు ఎలా రక్షించారో వివరించారు. ఢిల్లీలో జరిగిన అల్లర్లలో 2,733 మంది సిక్కులు ప్రాణాలు కోల్పోయారని ఆయన వెల్లడించారు. ఈ అంశాన్ని ప్రస్తావిస్తూ కాంగ్రెస్‌పై బీజేపీ నేతలు విమర్శలు గుప్పించారు.

#WATCH | Delhi: On the INDIA bloc mega rally, Union Minsiter JP Nadda says, "What is unfolding today at Ramlila Maidan is not an act of respect for democracy; rather, it is a calculated conspiracy to plunge the nation into anarchy—in the name of democracy. This is a foolish, orchestrated drama staged by those who have been defeated and repeatedly rejected by the people—a fact the public understands all too well. Rahul Gandhi, I wish to explain to the nation today what your model of politics entails: the first stage is spreading lies and rumours; the second is inciting anarchy and chaos on the streets; the third is damaging the nation’s economy; and the fourth is attempting to destabilise an elected government at the behest of foreign powers. This drama by Rahul Gandhi on November 1st has four objectives: first, to rub salt into the wounds of our Sikh brothers; second, to orchestrate riots and chaos in Delhi in order to topple a democratically elected government; third, to rob the shopkeepers and traders of Delhi of their earnings during the festive season; and fourth, to bring disrepute to the nation..."

— ANI (@ANI) November 1, 2026

ఢిల్లీలో భారీ భద్రత.. 4 వేల మందికిపైగా సిబ్బంది మోహరింపు

రెండు పార్టీల ర్యాలీల నేపథ్యంలో ఢిల్లీ పోలీసులు అప్రమత్తమయ్యారు. ఎలాంటి అవాంఛనీయ ఘటనలు చోటుచేసుకోకుండా కీలక ప్రాంతాల్లో పోలీసులతో పాటు కేంద్ర సాయుధ పోలీసు బలగాలను మోహరించారు. ర్యాలీ మార్గాలు, సభా ప్రాంగణాలు, ముఖ్యమైన కూడళ్ల వద్ద బారికేడ్లు ఏర్పాటు చేశారు. రాంలీలా మైదానంలో జరిగే ఇండియా కూటమి సభకు 40 వేల నుంచి 50 వేల మంది వరకు హాజరుకావచ్చని అంచనా వేయడంతో భద్రతను మరింత కట్టుదిట్టం చేశారు.

సభా ప్రాంగణాన్ని 14 జోన్లుగా విభజించి, ప్రతి జోన్‌కు ఏసీపీ స్థాయి అధికారిని బాధ్యుడిగా నియమించారు. అదనపు డీసీపీ స్థాయి అధికారులు మొత్తం భద్రతా ఏర్పాట్లను పర్యవేక్షించారు. 250కి పైగా హై-డెఫినిషన్, ఏఐ ఆధారిత సీసీటీవీ కెమెరాలతో పాటు డ్రోన్ల ద్వారా పరిసర ప్రాంతాలను గమనించే ఏర్పాట్లు చేశారు. ఢిల్లీ పోలీస్ కమిషనర్ అనురాగ్ కుమార్ కూడా ముందుగానే రాంలీలా మైదానాన్ని సందర్శించి ఏర్పాట్లను పరిశీలించారు.

ర్యాలీ నిర్వాహకులు పోలీసుల నిబంధనలను పాటించాలని అధికారులు స్పష్టం చేశారు. సభకు నిర్ణీత సమయాల్లోనే అనుమతి ఇచ్చినట్లు పేర్కొంటూ, రెచ్చగొట్టే ప్రసంగాలు చేయరాదని సూచించారు. పాల్గొనేవారికి తాగునీరు, మరుగుదొడ్లు వంటి కనీస సదుపాయాలు కల్పించాలని ఆదేశించారు.

#WATCH | Rohtak, Haryana: BJP organises 'Loktantra Bachao, Arajakta Hatao' (Save Democracy, Remove Anarchy) march under the leadership of BJP National President Nitin Nabin. https://t.co/eHVwwGEXfL

— ANI (@ANI) November 1, 2026

ట్రాఫిక్ ఆంక్షలు.. వాహనదారులకు ప్రత్యామ్నాయ మార్గాల సూచన

ర్యాలీల కారణంగా మధ్య ఢిల్లీలో వాహనాల రాకపోకలకు అంతరాయం కలగకుండా ట్రాఫిక్ పోలీసులు ప్రత్యేక చర్యలు చేపట్టారు. ఉదయం 10 గంటల నుంచి సాయంత్రం 5 గంటల వరకు పలు ప్రాంతాల్లో ఆంక్షలు విధించారు. రాజ్‌ఘాట్, ఢిల్లీ గేట్, ఐటీవో, అజ్మేరీ గేట్ పరిసరాల్లో వాహనాలను దారి మళ్లించే ఏర్పాట్లు చేశారు. బహదూర్ షా జఫర్ మార్గ్, జవహర్‌లాల్ నెహ్రూ మార్గ్, బారాఖంబా రోడ్ సహా కీలక రహదారులపై రద్దీ పెరిగే అవకాశం ఉందని హెచ్చరించారు. కనౌట్ ప్లేస్, జంతర్ మంతర్, భగవాన్ దాస్ రోడ్, సుప్రీంకోర్టు, ఎన్నికల సంఘం కార్యాలయం పరిసరాల్లోనూ భద్రతను పెంచారు. ర్యాలీ మార్గాల్లో ప్రయాణించేవారు ముందుగానే తమ ప్రయాణాలను ప్లాన్ చేసుకోవాలని, వీలైనంతవరకు ప్రత్యామ్నాయ రహదారులను ఎంచుకోవాలని పోలీసులు సూచించారు. అదే సమయంలో ఎల్‌ఎన్‌జేపీ, జీబీ పంత్ ఆసుపత్రులకు వెళ్లే అంబులెన్సులకు ఇబ్బందులు కలగకుండా ప్రత్యేక మార్గాలను ఏర్పాటు చేశారు.

#WATCH | Delhi: Lok Sabha LoP Rahul Gandhi, Congress MP Priyanka Gandhi Vadra, National Conference MP Farooq Abdullah, Samajwadi Party Chief Akhilesh Yadav, NCP-SCP MP Supriya Sule, TMC leader Mamata Banerjee, RJD leader Tejashwi Yadav, and others move towards Ramlila Maidan for INDIA bloc's mega rally.

— ANI (@ANI) November 1, 2026

పండుగ వేళ ర్యాలీలతో వ్యాపారులకు ఇబ్బందులు

దీపావళి పండుగ సీజన్‌లో రాజకీయ ర్యాలీల నిర్వహణపై ఢిల్లీలోని వ్యాపారులు ఆందోళన వ్యక్తం చేస్తున్నారు. పండుగ కొనుగోళ్లతో వ్యాపారాలు ఊపందుకుంటున్న సమయంలో రోడ్లపై ఆంక్షలు, ట్రాఫిక్ రద్దీ కారణంగా వినియోగదారులు దుకాణాలకు రావడం తగ్గిపోతుందని అభిప్రాయపడ్డారు. ముఖ్యంగా వాణిజ్య ప్రాంతాల్లో రాకపోకలకు అంతరాయం ఏర్పడితే అమ్మకాలపై ప్రతికూల ప్రభావం పడుతుందని అంటున్నారు. ఆటోమొబైల్ పార్ట్స్ మర్చంట్ అసోసియేషన్ అధ్యక్షుడు వినయ్ నారంగ్ మాట్లాడుతూ.. నిరసన తెలిపే హక్కును గౌరవిస్తున్నామని, అయితే ర్యాలీలకు ఎంచుకున్న సమయం, ప్రాంతంపై అభ్యంతరాలు ఉన్నాయని తెలిపారు. పండుగ సమయంలో వ్యాపారులకు ఇబ్బందులు కలగకుండా రాజకీయ పార్టీలు ప్రత్యామ్నాయాలను పరిశీలించాల్సిందని అభిప్రాయపడ్డారు.

మరోవైపు, ఇండియా కూటమి ర్యాలీకి తెలంగాణ నుంచి హాజరయ్యే కార్యకర్తల రవాణా, పార్కింగ్ ఏర్పాట్లను ఎంపీలు మల్లు రవి, బలరామ్ నాయక్, వేం నరేందర్ రెడ్డి, చామల కిరణ్‌కుమార్ రెడ్డి పర్యవేక్షించారు. మొత్తంగా ఓటర్ల జాబితా సవరణ అంశం, 1984 సిక్కుల ఊచకోత ఉదంతం కేంద్రంగా సాగుతోన్న‌ ఈ రెండు ర్యాలీలతో ఢిల్లీలో రాజకీయ వాతావరణం వేడెక్కింది. ఒకవైపు ఎన్నికల ప్రక్రియపై ప్రతిపక్షాల నిరసనలు, మరోవైపు గత ఘటనలను ప్రస్తావిస్తూ బీజేపీ చేపట్టిన ఆందోళన దేశ రాజకీయాల్లో చర్చనీయాంశంగా మారాయి.

PM Modi: బ్యాలెట్ ఎన్నికల్లోనూ కాంగ్రెస్‌కు ఒక్క సీటు రాలేదు.. ప్రధాని మోదీ వ్యంగ్యాస్త్రం

Narender Vaitla — Wed, 28 Oct 2026 21:50:45 +0530

కాంగ్రెస్‌ను ప్రశ్నించిన ప్రధాని మోదీ

ఈవీఎమ్ మిషిన్ల వినియోగం మీద ప్ర‌తిప‌క్ష పార్టీలు భిన్నాభిప్రాయాలు వ్యక్తం చేస్తున్న సమయంలో ప్రధాని మోదీ కాంగ్రెస్‌ను లక్ష్యంగా చేసుకుని వ్యంగ్యంగా స్పందించారు. ఉత్తరప్రదేశ్, మహారాష్ట్ర, బీహార్, కర్ణాటక రాష్ట్రాల్లో మొత్తం 28 ఎమ్మెల్సీ స్థానాలకు ఎన్నికలు జరిగిన విషయాన్ని తన పోస్టులో ప్రస్తావించారు. ఈ ఎన్నికల్లో బ్యాలెట్ పేపర్లను ఉపయోగించారని గుర్తుచేస్తూ, కాంగ్రెస్ ఎన్ని స్థానాల్లో గెలిచిందో అంచనా వేయాలంటూ ప్రశ్నించారు. తన వ్యాఖ్యలకు ఆలోచనలో ఉన్నట్లుగా కనిపించే ఎమోజీని కూడా జత చేశారు. దీంతో ఆయన పోస్టు రాజకీయ వర్గాల్లో చర్చకు దారితీసింది.

కర్ణాటకలో కాంగ్రెస్‌కు ఎదురుదెబ్బ

కాంగ్రెస్ పార్టీ అధికారంలో ఉన్న కర్ణాటకలో జరిగిన నాలుగు ఎమ్మెల్సీ స్థానాల ఎన్నికలు రాజకీయంగా ప్రాధాన్యం సంతరించుకున్నాయి. ఈ స్థానాల్లో బీజేపీ–జేడీ(ఎస్) కూటమి విజయం సాధించగా, కాంగ్రెస్‌కు ఒక్క స్థానం కూడా దక్కలేదు. అధికారంలో ఉన్నప్పటికీ ఈ ఎన్నికల్లో కాంగ్రెస్ ఖాతా తెరవకపోవడాన్ని బీజేపీ నేతలు విమర్శలకు అస్త్రంగా ఉపయోగిస్తున్నారు. ఈ ఫలితాలను ప్రస్తావిస్తూ కాంగ్రెస్ ఎన్నికలపై చేస్తున్న ఆరోపణలను అధికార పార్టీ నేతలు ప్రశ్నిస్తున్నారు.

మిగతా రాష్ట్రాల్లోనూ భిన్నమైన ఫలితాలు

ఉత్తరప్రదేశ్‌లో జరిగిన ఎమ్మెల్సీ ఎన్నికల్లో బీజేపీ, సమాజ్‌వాదీ పార్టీలు పలు స్థానాలను దక్కించుకున్నాయి. బీహార్‌లో ఆర్జేడీ, బీజేపీ, జన సూరాజ్ పార్టీతో పాటు స్వతంత్ర అభ్యర్థులు కూడా విజయం సాధించారు. ముఖ్యంగా దర్భంగా టీచర్స్ నియోజకవర్గంలో జన సూరాజ్ పార్టీ గెలుపొందడం ఆ పార్టీకి కీలక పరిణామంగా నిలిచింది. మరోవైపు, మహారాష్ట్రలోని కొన్ని స్థానాలకు సంబంధించి ఓట్ల లెక్కింపు కొనసాగుతున్నట్లు సమాచారం. ఈ నాలుగు రాష్ట్రాల ఫలితాలను ప్రస్తావిస్తూ కాంగ్రెస్ సాధించిన విజయాలపై మోదీ ప్రశ్నలు సంధించారు.

MLC elections in 28 seats across 4 big states - Uttar Pradesh, Maharashtra, Bihar and Karnataka.

Elections held using ballot papers.

Guess how many seats Congress won?

— Narendra Modi (@narendramodi) October 28, 2026

మళ్లీ వేడెక్కిన బ్యాలెట్ పేపర్–ఈవీఎం వివాదం

ఎన్నికల నిర్వహణ, ఓట్ల లెక్కింపు ప్రక్రియపై కాంగ్రెస్‌తో పాటు పలు ప్రతిపక్ష పార్టీలు గత కొంతకాలంగా అభ్యంతరాలు వ్యక్తం చేస్తున్నాయి. ఈవీఎంల విశ్వసనీయతపై అనుమానాలు లేవనెత్తడంతో పాటు ఎన్నికల్లో అక్రమాలు జరుగుతున్నాయంటూ కాంగ్రెస్ ఆరోపిస్తోంది. అయితే బీజేపీ ఈ ఆరోపణలను ఖండిస్తోంది. ఈ నేపథ్యంలో బ్యాలెట్ పేపర్ల ద్వారా జరిగిన ఎమ్మెల్సీ ఎన్నికల్లో కాంగ్రెస్‌కు ఒక్క సీటు కూడా రాకపోవడాన్ని ప్రస్తావిస్తూ మోదీ చేసిన వ్యాఖ్యలు మరోసారి ఈ వివాదాన్ని తెరపైకి తీసుకొచ్చాయి. ఎన్నికల ఫలితాలను ఇరు పక్షాలు తమ వాదనలకు అనుగుణంగా ప్రస్తావిస్తుండటంతో రాజకీయ చర్చ మరింత ఆసక్తికరంగా మారింది.

కాంగ్రెస్ ర్యాలీకి ముందు మోదీ వ్యాఖ్యలతో రాజకీయ వేడి

నవంబర్ 1న ఢిల్లీలోని రామ్‌లీలా మైదానంలో ‘ఓటును కాపాడండి–దేశాన్ని కాపాడండి’ నినాదంతో భారీ ర్యాలీ నిర్వహించేందుకు కాంగ్రెస్, ఇండియా కూటమి సిద్ధమవుతున్నాయి. ఎన్నికల ప్రక్రియపై తమ అభ్యంతరాలను ప్రజల్లోకి తీసుకెళ్లడం ఈ కార్యక్రమం ప్రధాన ఉద్దేశం. ఈ సమయంలోనే మోదీ ఎమ్మెల్సీ ఎన్నికల ఫలితాలను ప్రస్తావిస్తూ కాంగ్రెస్‌పై విమర్శలు చేయడం రాజకీయంగా ప్రాధాన్యం సంతరించుకుంది. ఒకవైపు ఎన్నికల పారదర్శకతపై ప్రతిపక్షాల ప్రశ్నలు, మరోవైపు వాటికి బీజేపీ ఇస్తున్న సమాధానాలతో రానున్న రోజుల్లో ఈ అంశంపై రాజకీయ వాదోపవాదాలు మరింత పెరిగే అవకాశం ఉంది.

ప్ర‌ధాని మోదీ ఈసారి దీపావ‌ళి వేడుక‌లు ఎక్క‌డ జ‌రుపుకున్నారో తెలుసా.? ఒక‌ప్పుడు న‌క్స‌లైట్ల‌కు అడ్డా

Narender Vaitla — Sun, 08 Nov 2026 14:32:15 +0530

జవాన్ల మధ్య దీపావళి.. బస్తర్‌లో ప్రధాని మోదీ సందడి

ఛత్తీస్‌గఢ్‌లోని బస్తర్ ప్రాంతంలో ప్రధాని నరేంద్ర మోదీ భద్రతా బలగాలతో కలిసి దీపావళి వేడుకలు నిర్వహించారు. గతంలో నక్సలైట్ల దాడులు, హింసాత్మక ఘటనలతో వార్తల్లో నిలిచిన ఈ ప్రాంతం ప్రస్తుతం అభివృద్ధి దిశగా అడుగులు వేస్తోందని ఆయన పేర్కొన్నారు. దేశ రక్షణ కోసం కుటుంబాలకు దూరంగా ఉంటూ విధులు నిర్వర్తిస్తున్న సైనికులతో పండుగ జరుపుకోవడం తనకు ఎంతో ప్రత్యేకమని చెప్పారు. జవాన్లకు స్వయంగా స్వీట్లు తినిపించి వారితో ఆత్మీయంగా మాట్లాడారు. ఈ సందర్భంగా సైనికుల ధైర్యసాహసాలను ప్రశంసించిన మోదీ.. వారి నిరంతర కృషి వల్లే దేశంలో శాంతి, భద్రతకు బలమైన పునాది ఏర్పడిందని అన్నారు. నక్సలిజం ప్రభావం తగ్గడంతో బస్తర్‌లో అభివృద్ధికి కొత్త అవకాశాలు అందుబాటులోకి వచ్చాయని వివరించారు.

నక్సలిజం నిర్మూలనలో భద్రతా బలగాల పాత్ర కీలకం

దేశంలో నక్సలిజం సమస్య ఒకప్పుడు తీవ్ర స్థాయిలో ఉండేదని ప్రధాని గుర్తుచేశారు. దాదాపు 20 రాష్ట్రాల్లోని 230కి పైగా జిల్లాలు మావోయిస్టు ప్రభావానికి గురయ్యాయని తెలిపారు. అనేక ప్రాంతాల్లో ప్రజలు స్వేచ్ఛగా బయటకు వెళ్లలేని పరిస్థితులు ఉండేవని, ఎన్నికల్లో ఓటు వేయడానికి కూడా భయపడేవారని వివరించారు. అలాంటి పరిస్థితులను మార్చడంలో భద్రతా బలగాలు అసాధారణమైన పోరాటం చేశాయని కొనియాడారు. సీఆర్పీఎఫ్, బీఎస్ఎఫ్, ఐటీబీపీ, ఎస్ఎస్బీ, ఐఆర్బీతో పాటు రాష్ట్ర పోలీసు విభాగాలు అందించిన సేవలను ప్రత్యేకంగా ప్రస్తావించారు. బస్తర్ ఫైటర్స్ వంటి ప్రత్యేక బలగాల కమాండోలు, మహిళా సిబ్బంది కూడా నక్సలిజం వ్యతిరేక పోరాటంలో కీలక పాత్ర పోషించారని ప్రశంసించారు. దేశ అంతర్గత భద్రత కోసం ప్రాణాలను సైతం లెక్కచేయకుండా పనిచేసిన అమరవీరుల త్యాగాలను భారతదేశం ఎప్పటికీ మరిచిపోదని స్పష్టం చేశారు.

తుపాకీ నక్సలిజం ముగిసింది.. మానసిక నక్సలిజంపై పోరాటం అవసరం

నక్సలిజం వ్యతిరేక పోరాటంలో భద్రతా బలగాలు సాధించిన విజయాన్ని ప్రధాని అభినందించారు. అయితే సాయుధ నక్సలిజం తగ్గిపోయినంత మాత్రాన సమాజానికి ఎదురయ్యే అన్ని ప్రమాదాలు తొలగిపోయినట్లు కాదని వ్యాఖ్యానించారు. తుపాకులు పట్టుకుని హింసకు పాల్పడే నక్సలైట్లతో పాటు, ప్రజల మధ్య విభేదాలు సృష్టిస్తూ విద్వేష భావాలను వ్యాప్తి చేసే మానసిక నక్సలైట్లను కూడా ఎదుర్కోవాల్సిన అవసరం ఉందన్నారు. అమాయక ప్రజలను తప్పుదోవ పట్టించడం, సమాజంలో అనుమానాలు, ఘర్షణలు పెంచే ప్రయత్నాలను అడ్డుకోవాలని పిలుపునిచ్చారు. దేశ ఐక్యతకు విఘాతం కలిగించే ఇలాంటి ఆలోచనా ధోరణులను సమష్టిగా తిప్పికొట్టాలని సూచించారు. భద్రతా బలగాలు క్షేత్రస్థాయిలో సాధించిన విజయాన్ని సమాజంలోనూ కొనసాగించాల్సిన బాధ్యత ప్రతి ఒక్కరిపై ఉందని ఆయన వ్యాఖ్యల సారాంశం.

Diwali is sweeter with those who protect us! #Bastar #NaxalFreeIndia https://t.co/7Ywie7uTt4

— Narendra Modi (@narendramodi) November 8, 2026

దేశ సైనికులే నా కుటుంబం.. మోదీ భావోద్వేగ వ్యాఖ్యలు

దీపావళి సందర్భంగా ప్రధాని మోదీ సైనికులతో తనకున్న అనుబంధాన్ని ప్రత్యేకంగా ప్రస్తావించారు. సాధారణంగా పండుగల సమయంలో ప్రతి ఒక్కరూ తమ కుటుంబ సభ్యులతో కలిసి ఆనందంగా గడపాలని కోరుకుంటారని చెప్పారు. అయితే తనకు మాత్రం దేశ రక్షణ కోసం సరిహద్దుల్లో, అంతర్గత ప్రాంతాల్లో విధులు నిర్వహిస్తున్న సైనికులే కుటుంబ సభ్యులని భావోద్వేగంగా పేర్కొన్నారు. మాతృభూమి రక్షణ కోసం నిరంతరం శ్రమిస్తున్న వీర సైనికులు, మహిళా సిబ్బంది తన కుటుంబంలో భాగమని అన్నారు. అందుకే వారితో కలిసి దీపావళి జరుపుకునేందుకు బస్తర్‌కు వచ్చినట్లు వివరించారు. దేశ ప్రజలు ప్రశాంతంగా పండుగలు జరుపుకోవడానికి సైనికులు తమ వ్యక్తిగత జీవితాలను త్యాగం చేస్తున్నారని, వారి సేవలను ప్రతి ఒక్కరూ గౌరవించాలని సూచించారు.

A very special Diwali with our brave security forces in Bastar, Chhattisgarh. https://t.co/7I5aOQdMSk

— Narendra Modi (@narendramodi) November 8, 2026

12 ఏళ్లలో 50 కోట్ల మందికి పేదరికం నుంచి విముక్తి

దేశంలో శాంతిభద్రతలు మెరుగుపడటంతో పాటు ఆర్థిక, సామాజిక రంగాల్లోనూ గణనీయమైన మార్పులు చోటుచేసుకున్నాయని ప్రధాని మోదీ తెలిపారు. గత 12 ఏళ్లలో నక్సలిజం, వేర్పాటువాదం వంటి సవాళ్లను ఎదుర్కోవడంతో పాటు పేదరిక నిర్మూలనలోనూ దేశం గొప్ప పురోగతి సాధించిందన్నారు. ప్రపంచ బ్యాంకు నివేదికను ప్రస్తావిస్తూ.. ఈ కాలంలో భారత్‌లో సుమారు 50 కోట్ల మంది తీవ్ర పేదరికం నుంచి బయటపడ్డారని వెల్లడించారు. దశాబ్దాలుగా పేదరిక నిర్మూలన గురించి నినాదాలు వినిపించినప్పటికీ, గత 12 ఏళ్లలో సాధించిన పురోగతి ఎంతో ప్రత్యేకమైనదని పేర్కొన్నారు. దేశంలో భద్రత, శాంతియుత వాతావరణం నెలకొన్నప్పుడే అభివృద్ధి కార్యక్రమాలు ప్రజలకు సమర్థంగా చేరుతాయని వివరించారు. సైనికుల నిరంతర పహారా, త్యాగాల వల్లే దేశంలోని మారుమూల ప్రాంతాల్లోనూ అభివృద్ధి కార్యక్రమాలు ముందుకు సాగుతున్నాయని మోదీ స్పష్టం చేశారు.

Agniveer: అగ్నివీర్‌లకు కేంద్రం గుడ్‌న్యూస్.. సర్వీస్ కాలాన్ని పెంచుతూ నిర్ణ‌యం

Narender Vaitla — Wed, 04 Nov 2026 17:57:49 +0530

Agniveer: సాయుధ దళాల్లో యువతకు అవకాశాలు కల్పించేందుకు కేంద్ర ప్రభుత్వం అమలు చేస్తున్న అగ్నిపథ్ పథకంలో కీలక మార్పు చేసింది. సర్వీస్ కాలాన్ని మరో రెండేళ్లు పెంచుతూ నిర్ణయం తీసుకుంది.

ప్రధాని నరేంద్ర మోదీ అధ్యక్షతన జరిగిన కేంద్ర క్యాబినెట్ సమావేశంలో అగ్నివీర్‌ల సర్వీస్ కాలాన్ని పొడిగించే నిర్ణయం తీసుకుంది. ఈ విషయాన్ని చీఫ్ ఆఫ్ డిఫెన్స్ స్టాఫ్ (CDS) జనరల్ ఎన్.ఎన్. రాజా సుబ్రమణి వెల్లడించారు. ఇప్పటివరకు నాలుగేళ్ల పాటు మాత్రమే సైన్యంలో పనిచేసే అవకాశం ఉండగా, తాజా నిర్ణయంతో మరో రెండేళ్లు అదనంగా సేవలు కొనసాగించవచ్చు. ఈ వెసులుబాటు వల్ల అగ్నివీర్‌లకు సైన్యంలో మరింత అనుభవం సంపాదించడంతో పాటు శాశ్వత ఉద్యోగాల కోసం పోటీపడేందుకు అదనపు అవకాశం లభిస్తుంది. సాయుధ దళాల్లో తమ సేవలను కొనసాగించాలనుకునే వారికి ఈ నిర్ణయం ప్రయోజనకరంగా మారనుంది.

అగ్నిపథ్ విధానం ప్రకారం నాలుగేళ్ల సర్వీస్ పూర్తయిన తర్వాత అగ్నివీర్‌లలో గరిష్ఠంగా 25 శాతం మందిని మాత్రమే సైన్యం, నౌకాదళం, వైమానిక దళాల్లో శాశ్వత సిబ్బందిగా ఎంపిక చేస్తున్నారు. మిగిలిన 75 శాతం మంది సేవల నుంచి బయటకు రావాల్సి ఉంటుంది. అయితే తాజాగా పదవీకాలం రెండేళ్లు పెంచడంతో శాశ్వత కేడర్‌లో స్థానం సంపాదించాలనుకునే వారికి మరింత సమయం అందుబాటులోకి వస్తుంది. అదనపు కాలంలో అగ్నివీర్‌ల పనితీరు, సామర్థ్యం, క్రమశిక్షణతో పాటు సాయుధ దళాల అవసరాలను పరిగణనలోకి తీసుకుని ఎంపిక ప్రక్రియ చేపట్టనున్నారు. మరోవైపు సైన్యంలో శాశ్వత నియామకం పొందని వారికి పౌర రంగంలో ఉద్యోగాలు సాధించేందుకు అవసరమైన నైపుణ్య ధ్రువీకరణ పత్రాలు, ఆర్థిక ప్రయోజనాలు అందించే విధానం కొనసాగుతుంది.

2022లో అగ్నిపథ్ పథకం ప్రారంభమైన తర్వాత తొలిసారిగా నియమితులైన అగ్నివీర్‌ల సర్వీస్ గడువు ముగింపు దశకు చేరుకుంది. తొలి బ్యాచ్‌లో ఆర్మీ, నేవీ, ఎయిర్‌ఫోర్స్ విభాగాల్లో కలిపి సుమారు 24,400 మంది చేరారు. వీరిలో నౌకాదళానికి చెందిన అగ్నివీర్‌ల నాలుగేళ్ల గడువు నవంబర్ 21తో, వైమానిక దళ సిబ్బంది పదవీకాలం డిసెంబర్ 21తో, ఆర్మీ అగ్నివీర్‌ల సేవలు డిసెంబర్ 31తో ముగియనున్నాయి. ఈ ఏడాది చివరి నాటికి సుమారు 18 వేల మంది అగ్నివీర్‌లు సేవల నుంచి బయటకు రావాల్సి ఉంది. ఈ నేపథ్యంలో కేంద్రం తీసుకున్న తాజా నిర్ణయం వారికి అదనపు అవకాశాలను కల్పించనుంది.

అగ్నిపథ్ పథకం ద్వారా ఇప్పటివరకు మూడు విభాగాల్లో భారీ సంఖ్యలో యువత సాయుధ దళాల్లో చేరారు. గత నాలుగేళ్లలో సుమారు 2.70 లక్షల మంది ఆర్మీలో, 27 వేల మంది వైమానిక దళంలో, 21 వేల మంది నౌకాదళంలో అగ్నివీర్‌లుగా నియమితులయ్యారు. సైనిక శిక్షణలో కేవలం శారీరక దృఢత్వానికే పరిమితం కాకుండా నైతిక విలువలు, వృత్తిపరమైన నైపుణ్యాలు, బాధ్యతాయుతమైన ప్రవర్తనకు కూడా ప్రాధాన్యం ఇస్తున్నట్లు సీడీఎస్ జనరల్ రాజా సుబ్రమణి తెలిపారు. అగ్నివీర్‌లకు సేవా కాలం పెరగడం వల్ల ఈ శిక్షణతో పాటు క్షేత్రస్థాయి అనుభవాన్ని మరింతగా పొందే అవకాశం ఉంటుంది.

SIR: ఓటర్ల జాబితాలో మీ పేరు లేదా? గుడ్ న్యూస్ చెప్పిన కేంద్ర ఎన్నిక‌ల సంఘం

Narender Vaitla — Fri, 06 Nov 2026 18:56:59 +0530

ఏడు రాష్ట్రాల్లోని ఓటర్లకు మరో అవకాశం

SIR ప్రక్రియలో గైర్హాజరు, వలస, మరణం, డూప్లికేట్ ఓటర్లుగా (ASDD) గుర్తించిన కారణాలతో ముసాయిదా ఓటర్ల జాబితాలో కొందరి పేర్లు కనిపించలేదు. ఎన్యుమరేషన్ ఫారాలు అందకపోవడంతో అర్హులైన ఓటర్లు కూడా జాబితాలో చోటు కోల్పోయారు. ఈ నేపథ్యంలో అలాంటి వారికి మరోసారి నమోదు చేసుకునే అవకాశం ఇవ్వాలని ఈసీ నిర్ణయించింది. ఢిల్లీ, మహారాష్ట్ర, హర్యానా, ఆంధ్రప్రదేశ్, జార్ఖండ్, తెలంగాణ, నాగాలాండ్ రాష్ట్రాల్లో ఈ వెసులుబాటు అమలు చేయనున్నారు. అర్హత ఉన్నవారు మళ్లీ ఎన్యుమరేషన్ ఫారం సమర్పించి తమ ఓటు హక్కును పొందవచ్చు.

ASDD జాబితాలను మళ్లీ ప్రదర్శించాలని ఆదేశం

ముసాయిదా ఓటర్ల జాబితాలో పేర్లు లేని వారి వివరాలను ప్రజలకు అందుబాటులో ఉంచాలని ఎన్నికల సంఘం సూచించింది. ఇందుకోసం సంబంధిత పోలింగ్ కేంద్రాలు, పంచాయతీ భవనాలు, పట్టణ స్థానిక సంస్థల కార్యాలయాల్లో ASDD జాబితాలను మరోసారి ప్రదర్శించాలి. ఓటర్ల పేర్లు తొలగించడానికి లేదా చేర్చకపోవడానికి గల కారణాలను కూడా స్పష్టంగా తెలియజేయాలి. అంతేకాకుండా ఆయా రాష్ట్రాల ప్రధాన ఎన్నికల అధికారుల (CEO) అధికారిక వెబ్‌సైట్లలో ఈ జాబితాలను PDF రూపంలో అందుబాటులో ఉంచాలని ఆదేశించింది. సంబంధిత ఓటర్లకు పాక్షికంగా వివరాలు నింపిన ఎన్యుమరేషన్ ఫారాలను ECINET ద్వారా మరోసారి రూపొందించనున్నట్లు వెల్లడించింది.

BLO ద్వారా ఫారాలు.. ఆన్‌లైన్‌లోనూ డౌన్‌లోడ్ చేసుకోవచ్చు

అర్హులైన ఓటర్లను గుర్తించి ఎన్యుమరేషన్ ఫారాలు అందజేసే బాధ్యతను బూత్ స్థాయి అధికారులు (BLO) చేపట్టాలని ఈసీ సూచించింది. వారు ఇంటింటికీ వెళ్లి సంబంధిత వ్యక్తులను సంప్రదించాలి. అవసరమైతే వాట్సాప్, ఈ-మెయిల్, SMS ద్వారా కూడా ఫారాలు పంపించవచ్చు. ఓటర్లు తమ పాత EPIC నంబర్‌ను ఉపయోగించి ఎన్నికల సంఘం వెబ్‌సైట్ లేదా ECINET యాప్ నుంచి ఫారాలను డౌన్‌లోడ్ చేసుకోవచ్చు. గతంలో అదే నివాసంలో కొనసాగుతున్నవారు ఎన్యుమరేషన్ ఫారంతో పాటు ఆలస్యానికి గల కారణాలను వివరిస్తూ అనుబంధం-B ప్రకటనను సమర్పించాలి.

నివాసం మార్చుకున్నవారు, ఇల్లు లేనివారికి ప్రత్యేక వెసులుబాటు

రాష్ట్రంలోని మరో ప్రాంతానికి నివాసం మార్చుకున్నవారు పాత ప్రాంతంలో ఫారం-8 సమర్పించాల్సిన అవసరం లేదని ఈసీ స్పష్టం చేసింది. కొత్త చిరునామా, అసెంబ్లీ నియోజకవర్గ వివరాలతో ఎన్యుమరేషన్ ఫారం సమర్పించాలి. దీనికి అనుబంధం-C ప్రకటనతో పాటు కొత్త చిరునామాకు సంబంధించిన ధ్రువీకరణ పత్రాన్ని జతచేయాలి. కొత్త ప్రాంతంలోని BLOను సంప్రదించి అవసరమైన సహాయం పొందవచ్చు. ఇక ఇల్లు లేని వారికి చిరునామా ధ్రువీకరణ పత్రాలు అందుబాటులో లేకపోయినా ఇబ్బంది లేదని ఎన్నికల సంఘం తెలిపింది. అలాంటి సందర్భాల్లో BLO క్షేత్రస్థాయిలో నిర్వహించిన పరిశీలన నివేదిక ఆధారంగా వివరాలను ధ్రువీకరించవచ్చు. ECINET యాప్‌లో BLOతో మాట్లాడేందుకు 'mBook a Call with BLO' సదుపాయాన్ని కూడా వినియోగించుకోవచ్చు.

దరఖాస్తుల పరిశీలన తర్వాత తుది జాబితాలో పేరు

ఓటర్లు సమర్పించిన ఫారాలను ఎలక్టోరల్ రిజిస్ట్రేషన్ అధికారులు (ERO) పరిశీలిస్తారు. దరఖాస్తుదారుల అర్హత, సాధారణ నివాసం తదితర వివరాలను ధ్రువీకరించిన తర్వాత తుది నిర్ణయం తీసుకుంటారు. ఆమోదం పొందిన దరఖాస్తులను తుది ఓటర్ల జాబితాలో చేర్చేందుకు ప్రత్యేకంగా పరిగణనలోకి తీసుకోవాలని ఈసీ ఆదేశించింది. గతంలో కేటాయించిన EPIC నంబర్‌నే తిరిగి ఇవ్వాలని సూచించింది. మరోవైపు, SIR ప్రక్రియలో కొత్త ఓటు నమోదు కోసం ఇప్పటికే ఫారం-6 సమర్పించిన వారు తిరిగి ఎన్యుమరేషన్ ఫారం ఇవ్వాల్సిన అవసరం లేదు. ఈ కొత్త అవకాశంపై ప్రజల్లో విస్తృతంగా అవగాహన కల్పించాలని ఎన్నికల అధికారులకు సూచించింది. ఈ మేరకు ఎన్నికల సంఘం కార్యదర్శి పవన్ దివాన్ సంబంధిత రాష్ట్రాల ప్రధాన ఎన్నికల అధికారులకు లేఖ రాశారు. ముసాయిదా జాబితాలో పేరు లేకపోయినంత మాత్రాన ఓటు హక్కు కోల్పోయినట్లు కాదని, నిర్దేశించిన విధానంలో దరఖాస్తు చేసుకుని అర్హత నిరూపించుకుంటే తుది జాబితాలో పేరు పొందవచ్చని స్పష్టం చేసింది.

ఇస్రో మరో చారిత్రాత్మక విజయం.. GSLV-F18 రాకెట్‌తో మ‌న‌కు క‌లిగే ప్ర‌యోజ‌నం ఏంటంటే.?

Narender Vaitla — Sat, 31 Oct 2026 09:04:17 +0530

ISRO: భారత అంతరిక్ష పరిశోధన సంస్థ (ఇస్రో) మరో కీలక విజయాన్ని తన ఖాతాలో వేసుకుంది. GSLV-F18 రాకెట్ ప్రయోగం విజయవంతమైంది. ఇంత‌కీ రాకెట్ ఉప‌యోగం ఏంటి.? దీంతో సామాన్య ప్ర‌జ‌ల‌కు జ‌రిగే లాభం ఏంటో ఇప్పుడు తెలుసుకుందాం.

ఆంధ్రప్రదేశ్‌లోని తిరుపతి జిల్లా శ్రీహరికోటలో ఉన్న సతీశ్ ధవన్ అంతరిక్ష కేంద్రం (షార్) నుంచి శుక్రవారం రాత్రి 11.51 గంటలకు GSLV-F18 రాకెట్ నింగిలోకి దూసుకెళ్లింది. రెండో ప్రయోగ వేదిక నుంచి చేపట్టిన ఈ ప్రయోగానికి ముందు 24 గంటల పాటు కౌంట్‌డౌన్ కొనసాగింది. నిర్ణీత సమయానికి రాకెట్ నిప్పులు చిమ్ముతూ అంతరిక్షంలోకి ప్రయాణం ప్రారంభించింది. మూడు దశలు కలిగిన ఈ రాకెట్ తన ప్రయాణాన్ని విజయవంతంగా పూర్తి చేసింది. సుమారు 20 నిమిషాల ప్రయాణం తర్వాత 2,232 కిలోల బరువున్న NVS-03 ఉపగ్రహాన్ని భూస్థిర బదిలీ కక్ష్యలోకి ప్రవేశపెట్టింది. ఉపగ్రహం నిర్దేశిత కక్ష్యలోకి చేరినట్లు సంకేతాలు అందడంతో ఇస్రో శాస్త్రవేత్తలు ఆనందం వ్యక్తం చేశారు.

ఈ ప్రయోగంతో భారత్ సొంతంగా అభివృద్ధి చేసుకున్న 'నావిక్' (NavIC) వ్యవస్థ మరింత బలోపేతం కానుంది. భవిష్యత్తులో దేశీయంగా మరింత కచ్చితమైన స్థాన నిర్ధారణ, దిశానిర్దేశం, సమయ సమాచార సేవలు అందించేందుకు ఈ ఉపగ్రహం కీలకంగా మారనుంది. ప్రస్తుతం ప్రపంచవ్యాప్తంగా స్థానాన్ని గుర్తించడానికి చాలామంది అమెరికాకు చెందిన GPS వ్యవస్థను ఉపయోగిస్తున్నారు. అయితే భారత్ కూడా ఇతర దేశాల వ్యవస్థలపై ఆధారపడకుండా సొంత నావిగేషన్ సేవలను అభివృద్ధి చేసుకుంది. దీనినే 'నావిక్' (Navigation with Indian Constellation) అని పిలుస్తారు.

దేశంలోనే కాకుండా భారత సరిహద్దుల చుట్టూ కూడా ఖచ్చితమైన స్థాన సమాచారాన్ని అందించడమే దీని ప్రధాన ఉద్దేశం. ఈ వ్యవస్థలో భాగంగా రెండో తరం ఉపగ్రహాలను ఇస్రో అంతరిక్షంలోకి పంపుతోంది. NVS-03 ఈ శ్రేణిలో మూడో ఉపగ్రహం. ఇప్పటికే ఉన్న ఉపగ్రహాలకు అదనంగా ఇది సేవలు అందించడం ద్వారా నావిక్ వ్యవస్థ నిరంతరాయంగా పనిచేసేందుకు సహకరిస్తుంది. ముఖ్యంగా పాత ఉపగ్రహాల స్థానంలో కొత్త తరం సాంకేతికతను అందుబాటులోకి తీసుకురావడంలో ఇది కీలక పాత్ర పోషించనుంది.

కొత్త సిగ్నల్స్‌తో మరింత కచ్చితమైన సమాచారం

NVS-03 ఉపగ్రహంలో ఆధునిక సాంకేతిక పరిజ్ఞానాన్ని ఉపయోగించారు. ఇందులో స్వదేశీ పరిజ్ఞానంతో పాటు విదేశీ సాంకేతికత ఆధారంగా రూపొందించిన అటామిక్ క్లాక్‌లను ఏర్పాటు చేశారు. ఉపగ్రహాల నుంచి భూమికి వచ్చే సమయ సంకేతాల ఆధారంగానే మనం ఉన్న ప్రదేశాన్ని గుర్తించడం సాధ్యమవుతుంది. అందువల్ల అటామిక్ క్లాక్‌ల పనితీరు నావిగేషన్ వ్యవస్థలో ఎంతో కీలకం. ఇప్పటివరకు నావిక్ వ్యవస్థలో L5, S బ్యాండ్ల ద్వారా సంకేతాలు అందుతుండగా.. కొత్తగా NVS-03 ద్వారా L1 బ్యాండ్ సేవలు కూడా అందుబాటులోకి రానున్నాయి. దీంతో ఇప్పటికే ఉన్న సిగ్నల్స్‌కు అదనపు సామర్థ్యం చేకూరుతుంది. ముఖ్యంగా స్మార్ట్‌ఫోన్లు, నావిగేషన్ పరికరాలు వంటి వాటిలో ఈ సేవలను ఉపయోగించుకునే అవకాశాలు మెరుగుపడతాయి. భారత భూభాగంతో పాటు సరిహద్దుల వెలుపల సుమారు 1,500 కిలోమీటర్ల పరిధి వరకు సేవలు అందించేలా ఈ వ్యవస్థను రూపొందించారు.

Liftoff of GSLV-F18 carrying NVS-03 at 11:51 PM IST from Second Launch Pad, SHAR!

ISRO's rescue mission for NavIC is now underway

#ISRO | #GSLVF18 https://t.co/MizXSaUe4R

— ISRO Spaceflight (@ISROSpaceflight) October 30, 2026

నావిక్ వ్యవస్థ బలోపేతం కావడం వల్ల దేశంలోని అనేక రంగాలకు ప్రయోజనం కలగనుంది. విమానాలు ప్రయాణించే మార్గాలను గుర్తించడం, సముద్రంలో నౌకల కదలికలను పర్యవేక్షించడం, రోడ్లపై వాహనాల స్థానాన్ని తెలుసుకోవడం వంటి అవసరాలకు ఈ సేవలు ఉపయోగపడతాయి. అత్యవసర సమయాల్లో సహాయక బృందాలు, బాధితుల స్థానాన్ని గుర్తించడంలోనూ ఇది తోడ్పడుతుంది. మరోవైపు దేశ రక్షణ రంగానికి కూడా స్వదేశీ నావిగేషన్ వ్యవస్థ ఎంతో ముఖ్యం. సైనిక కార్యకలాపాలు, వ్యూహాత్మక ప్రణాళికలు, క్షిపణులు, ఇతర రక్షణ పరికరాలకు ఖచ్చితమైన స్థాన, సమయ సమాచారం అవసరం. విదేశీ వ్యవస్థలపై ఆధారపడకుండా సొంతంగా నావిగేషన్ సేవలను వినియోగించుకునే సామర్థ్యం పెరగడం దేశ భద్రత పరంగా కీలకమైన ముందడుగు. ఆపరేషన్ సిందూర్ వంటి సైనిక అవసరాల నేపథ్యంలోనూ స్వదేశీ నావిగేషన్ సాంకేతికత ప్రాధాన్యం మరింత స్పష్టమవుతోంది.

తాజా ప్రయోగంతో GSLV రాకెట్ తన 20వ మిషన్‌ను పూర్తి చేసుకుంది. గతంలో కొన్ని ప్రయోగాల్లో ఎదురైన వైఫల్యాల కారణంగా విమర్శలు ఎదుర్కొన్న ఈ రాకెట్.. వరుస విజయాలతో తన సామర్థ్యాన్ని నిరూపించుకుంటోంది. అందుకే ఒకప్పుడు 'నాటీ బాయ్'గా పిలిచిన GSLV ఇప్పుడు విజయవంతమైన ప్రయోగాలతో ప్రత్యేక గుర్తింపు పొందుతోంది. ఈ ప్రయోగాన్ని పర్యవేక్షించిన ఇస్రో చైర్మన్ డాక్టర్ వి. నారాయణన్ ఉపగ్రహాన్ని అనుకున్న లక్ష్యం ప్రకారం కక్ష్యలోకి చేర్చినట్లు ప్రకటించారు. ఈ విజయం వెనుక శాస్త్రవేత్తల కృషి, సమష్టి ప్రయత్నం ఉన్నాయని ప్రశంసించారు. మరోవైపు బెంగళూరులోని హసన్ మాస్టర్ కంట్రోల్ సెంటర్‌కు ఉపగ్రహం నుంచి సంకేతాలు అందడంతో దాని స్థితిగతులు సక్రమంగా ఉన్నట్లు నిర్ధారణ అయింది. మొత్తంగా NVS-03 ప్రయోగం భారత్ అంతరిక్ష రంగంలో సాధించిన మరో ముఖ్యమైన విజయంగా నిలిచింది. స్వదేశీ సాంకేతికతతో నావిగేషన్ సేవలను విస్తరించుకోవడంతో పాటు అంతరిక్ష రంగంలో ఇతర దేశాలపై ఆధారపడటాన్ని తగ్గించుకునే దిశగా ఈ ప్రయోగం ఉపయోగపడనుంది.

Supreme Court: దానిని అత్యాచారంగా పరిగణించలేం.. సుప్రీం సంచలన వ్యాఖ్య‌లు

Narender Vaitla — Fri, 30 Oct 2026 17:08:19 +0530

Supreme Court: ప్రేమ సంబంధాలు పెళ్లి వరకు వెళ్లకపోవడం, వ్యక్తిగత విభేదాలతో విడిపోవడం సాధారణంగా జరుగుతుంటాయి. ఇలాంటి బంధాల్లో తలెత్తే వివాదాలు ఒక్కోసారి కోర్టుల వరకు వెళ్తున్నాయి. తాజాగా ఇలాంటి ఓ కేసుకు సంబంధించి సుప్రీం కీల‌క వ్యాఖ్య‌లు చేసింది.

ఒక బంధం కొనసాగుతున్న సమయంలో ఇద్దరూ పరస్పర అంగీకారంతో సాన్నిహిత్యంగా మెలిగినప్పుడు.. ఆ తర్వాత వారి మధ్య మనస్పర్థలు ఏర్పడ్డాయని చెప్పి, గతంలో జరిగిన శారీరక సంబంధాన్ని అత్యాచారంగా అభివర్ణించలేమని సుప్రీంకోర్టు పేర్కొంది. సంబంధం సజావుగా ఉన్నప్పుడు అంగీకారంతో జరిగిన చర్యలకు, బంధం ముగిసిన తర్వాత నేరపూరితమైన ముద్ర వేయడం మధ్య స్పష్టమైన తేడా ఉండాలని తెలిపింది.

ఇటీవల వ్యక్తిగత సంబంధాలు బెడిసికొట్టిన తర్వాత ఒకరిపై మరొకరు క్రిమినల్ కేసులు నమోదు చేయించే ధోరణి పెరుగుతోందని ధర్మాసనం ఆందోళన వ్యక్తం చేసింది. విఫలమైన ప్రేమ వ్యవహారాలను నేర విచారణలుగా మార్చడం వల్ల వ్యక్తుల స్వేచ్ఛ, గౌరవం దెబ్బతినే ప్రమాదం ఉందని అభిప్రాయపడింది.

ఈ సందర్భంగా అత్యాచారం, మోసం అనే రెండు నేరారోపణల మధ్య ఉన్న వ్యత్యాసాన్ని న్యాయస్థానం ప్రత్యేకంగా ప్రస్తావించింది. ఒక వ్యక్తి మోసపూరితంగా వ్యవహరించాడనే ఆరోపణ ఉన్నంత మాత్రాన.. అందులో భాగంగా జరిగిన ప్రతి శారీరక సంబంధాన్ని అత్యాచారంగా పరిగణించడం సాధ్యం కాదని ధర్మాసనం వ్యాఖ్యానించింది. సంబంధం ప్రారంభమైనప్పటి పరిస్థితులు, ఇద్దరి మధ్య ఉన్న అంగీకారం, వివాహానికి సంబంధించిన హామీలు, వాటి వెనుక ఉన్న ఉద్దేశం వంటి అంశాలను విడివిడిగా పరిశీలించాల్సిన అవసరం ఉందని ఈ వ్యాఖ్యల సారాంశం స్పష్టం చేస్తోంది. కేవలం బంధం ముగిసిపోయిందనే కారణంతోనే ఒకరిపై అత్యాచారం కేసు నిలబడదని కోర్టు అభిప్రాయపడింది. అయితే, నిజంగా మోసం లేదా సమ్మతి లేకుండా జరిగిన చర్యలకు సంబంధించిన ఆరోపణలను కూడా ఇదే కోణంలో కొట్టివేయలేమన్న విషయం గమనించాలి.

కేరళకు చెందిన ఈ కేసులో ఓ వ్యక్తికి ఇదివరకే వివాహమైంది. అయితే, ఆ విషయాన్ని దాచిపెట్టి మరో మహిళను వివాహం చేసుకున్నాడని బాధితురాలు ఆరోపించారు. కొంతకాలం తర్వాత అతడికి గతంలోనే పెళ్లయిందనే విషయం తనకు తెలిసిందని, దీంతో అతడి నుంచి విడిపోయినట్లు ఆమె పేర్కొన్నారు. తనకు తెలియకుండా మొదటి వివాహాన్ని దాచిపెట్టి రెండో పెళ్లి చేసుకోవడం ద్వారా ఆ వ్యక్తి తనను మోసం చేశాడని బాధితురాలు ఆరోపించారు. ఈ క్రమంలో అతడిపై అత్యాచారం, మోసం, నమ్మకద్రోహం వంటి అభియోగాలతో ఫిర్యాదు చేశారు. ఈ కేసు విచారణ సందర్భంగా సంబంధంలో జరిగిన పరిణామాలను, అత్యాచారం ఆరోపణకు సంబంధించిన అంశాలను ఒకే గాటన కట్టలేమని సుప్రీంకోర్టు స్పష్టం చేసింది.

జస్టిస్ బీవీ నాగరత్న, జస్టిస్ ఆర్. మహదేవన్‌లతో కూడిన సుప్రీంకోర్టు ధర్మాసనం ఈ వ్యవహారాన్ని విచారించింది. వ్యక్తిగత సంబంధాల్లో ఏర్పడే విభేదాలు, మోసపూరిత చర్యలు, పరస్పర అంగీకారంతో కొనసాగిన శారీరక సంబంధాలు.. వీటన్నింటినీ చట్టపరంగా ఒకే విధంగా చూడకూడదని ధర్మాసనం అభిప్రాయపడింది. ముఖ్యంగా, ఒక బంధం విఫలమైందనే కారణంతో గతంలో పరస్పర అంగీకారంతో జరిగిన సాన్నిహిత్యాన్ని వెనక్కి వెళ్లి అత్యాచారంగా చిత్రీకరించడం సరికాదని స్పష్టం చేసింది. అదే సమయంలో వివాహాన్ని దాచిపెట్టి మోసం చేయడం వంటి ఆరోపణలు ఉంటే వాటి చట్టపరమైన స్వభావాన్ని ప్రత్యేకంగా పరిశీలించాల్సి ఉంటుంది. మొత్తంగా, వ్యక్తిగత సంబంధాల్లో చోటుచేసుకునే వివాదాలను క్రిమినల్ నేరాలుగా మార్చే ముందు ఆరోపణల వెనుక ఉన్న వాస్తవాలను, చట్టపరమైన అంశాలను సమగ్రంగా పరిశీలించాల్సిన అవసరాన్ని సుప్రీంకోర్టు వ్యాఖ్యలు మరోసారి గుర్తుచేశాయి.

టీవీ రంగంలో ఉద్యోగాలకు ముప్పు త‌ప్ప‌దా.. అదే జ‌రిగితే వేల మందిపై ప్రభావం

Narender Vaitla — Tue, 03 Nov 2026 16:01:18 +0530

Jobs: టీవీ మీడియా రంగంలో ఉద్యోగుల భవిష్యత్తుపై ఆందోళన పెరుగుతోంది. టెలివిజన్ ఛానళ్ల రేటింగ్స్‌ను వెల్లడించే బ్రాడ్‌కాస్ట్ ఆడియన్స్ రీసెర్చ్ కౌన్సిల్ (BARC) మూతపడే పరిస్థితి వస్తే సుమారు 1,500 మంది ఉపాధి కోల్పోయే ప్రమాదం ఉందని నిపుణులు అంటున్నారు.

టీవీ ఛానళ్ల ప్రేక్షకుల సంఖ్యను లెక్కించి రేటింగ్స్ ప్రకటించే సంస్థే BARC ఇండియా. ఈ సంస్థ కార్యకలాపాలు నిలిచిపోతే దాని పరిధిలో పనిచేస్తున్న సుమారు 1,500 మందిపై ప్రభావం పడే అవకాశం ఉంది. ఇందులో రేటింగ్స్ సేకరణ, సమాచార విశ్లేషణ, సాంకేతిక విభాగాలు, ఇతర అనుబంధ సేవల్లో పనిచేసే ఉద్యోగులు ఉన్నారు. అయితే BARC మూతపడే పరిస్థితి ఇంకా చర్చల దశలోనే ఉంది. ఇది ఒకవైపు ఉండగా, మరోవైపు ప్రముఖ టీవీ నెట్‌వర్క్‌లు కూడా తమ సంస్థల్లో ఉద్యోగుల సంఖ్యను తగ్గించేందుకు సిద్ధమవుతున్నాయి. ఈ రెండు పరిణామాలు వేర్వేరుగా చోటుచేసుకుంటున్నాయని పరిశ్రమ వర్గాలు చెబుతున్నాయి. ఇందుకు సంబంధించి ఈ e4mExclusive ప్రత్యేక కథనంలో ప్రచురించింది.

టీవీ రేటింగ్స్ నిలిచిపోవడంతో ఛానళ్ల ఆదాయంపై ప్రభావం పడుతోంది. ఏ ఛానల్‌కు ఎంత మంది ప్రేక్షకులు ఉన్నారు? ఏ కార్యక్రమానికి ఎక్కువ ఆదరణ లభిస్తోంది? ఏ సమయంలో ప్రకటనలు ఇస్తే ఎక్కువ మందికి చేరుతాయి? అనే వివరాలు తెలియకపోవడంతో ప్రకటనల వ్యాపారం కష్టంగా మారింది. సాధారణంగా ఛానళ్లకు వచ్చే ఆదాయంలో ప్రకటనలు కీలక పాత్ర పోషిస్తాయి. అయితే రేటింగ్స్ లేకపోవడంతో ప్రకటనదారులకు తమ ఛానళ్ల ప్రేక్షకుల సంఖ్యను నిరూపించడం కష్టమవుతోంది. దీంతో ప్రకటనల ధరల విషయంలోనూ సమస్యలు ఎదురవుతున్నాయి. ఈ నేపథ్యంలో ఖర్చులు తగ్గించుకునేందుకు టీవీ నెట్‌వర్క్‌లు ప్రణాళికలు సిద్ధం చేస్తున్నాయి. దీపావళి తర్వాత ఎడిటోరియల్, ప్రోగ్రామింగ్, సేల్స్, మార్కెటింగ్, డిస్ట్రిబ్యూషన్ వంటి విభాగాల్లో ఉద్యోగుల కోతలు ఉండే అవకాశం ఉందని సమాచారం.

రేటింగ్స్ నిలిచిపోవడంతో BARC కూడా ఆర్థిక ఇబ్బందులను ఎదుర్కొంటోంది. సాధారణంగా టీవీ బ్రాడ్‌కాస్టర్లు, ఇతర సబ్‌స్క్రైబర్ల నుంచి వసూలు చేసే చందాలే ఈ సంస్థకు ప్రధాన ఆదాయ మార్గాల్లో ఒకటి. అయితే రేటింగ్స్ నిలిపివేసిన సమయంలో న్యూస్ ఛానళ్ల నుంచి సబ్‌స్క్రిప్షన్ ఛార్జీలు వసూలు చేయకూడదని జూన్‌లో కేంద్ర సమాచార, ప్రసార మంత్రిత్వ శాఖ (MIB) ఆదేశించింది. ప్రేక్షకుల రేటింగ్స్ అందుబాటులో లేనప్పుడు ఛానళ్లు సేవలకు చెల్లింపులు చేయాల్సిన అవసరం లేదన్నది మంత్రిత్వ శాఖ అభిప్రాయం.

దీనిపై BARC అభ్యంతరం వ్యక్తం చేసింది. రేటింగ్స్ ప్రకటించకపోయినా సంస్థ నిర్వహణ ఖర్చులు మాత్రం ఆగవని మంత్రిత్వ శాఖకు తెలిపింది. ఇళ్లలో ఏర్పాటు చేసిన మీటర్ల నిర్వహణ, ప్రేక్షకుల వీక్షణ వివరాల సేకరణ, డేటా విశ్లేషణ, సాంకేతిక వ్యవస్థల నిర్వహణకు భారీగా ఖర్చవుతోందని వివరించింది. బిల్లింగ్‌పై ఉన్న ఆంక్షలను తొలగించాలని కూడా కోరింది. మరోవైపు, న్యూస్ ఛానళ్లకు సంబంధించిన చందాల వసూలు నిలిచిపోగా, ఇతర సబ్‌స్క్రైబర్లలోనూ కొద్దిమంది ప్రముఖ బ్రాడ్‌కాస్టర్లు మాత్రమే చెల్లింపులు కొనసాగిస్తున్నట్లు పరిశ్రమ వర్గాలు వెల్లడించాయి.

టీవీ రేటింగ్స్ తిరిగి ప్రారంభించేందుకు నవంబర్‌ను కీలక గడువుగా పరిశ్రమ వర్గాలు భావిస్తున్నాయి. కేంద్ర సమాచార, ప్రసార శాఖ మంత్రి అశ్విని వైష్ణవ్.. కొత్త టెలివిజన్ రేటింగ్స్ పాలసీ-2026 ప్రకారం అవసరమైన మార్పులు చేసి అనుమతి పొందేందుకు BARCకు నవంబర్ వరకు సమయం ఇచ్చినట్లు సమాచారం.

కొత్త విధానం ప్రకారం BARC పలు మార్పులు చేయాల్సి ఉంది. వీటిలో ప్ర‌ధానంగా.

* ప్రస్తుతం ఉన్న మీటర్లతో కూడిన ఇళ్ల సంఖ్యను 80 వేల వరకు పెంచాలి.

* సంస్థ బోర్డులో స్వతంత్ర డైరెక్టర్లను నియమించాలి.

* ప్రతి సంవత్సరం ఆడిట్ నిర్వహించాలి.

* వివిధ సాంకేతిక విధానాలను ఉపయోగించి ప్రేక్షకుల వీక్షణను కొలవాలి.

* ఛానల్ ఓపెన్ చేసిన వెంటనే కనిపించే ల్యాండింగ్ పేజీ వీక్షణలను అధికారిక రేటింగ్స్‌లో లెక్కించకూడదు.

ఈ నిబంధనల్లో భాగంగా ఇప్పటికే తమ ప్యానెల్‌ను 70,876 ఇళ్లకు పెంచినట్లు BARC మంత్రిత్వ శాఖకు తెలిపింది. డిసెంబర్ నాటికి 80 వేల ఇళ్ల లక్ష్యాన్ని చేరుకుంటామని వెల్లడించింది. అయినప్పటికీ రేటింగ్స్‌ను తిరిగి ప్రకటించేందుకు అవసరమైన అనుమతి ఇంకా లభించలేదు.

రేటింగ్స్ నిలిచిపోవడంతో టీవీ పరిశ్రమలో అనిశ్చితి పెరుగుతోంది. ఈ సమస్యకు పరిష్కారం లభించకపోతే BARC కార్యకలాపాలను పూర్తిగా నిలిపివేయాలనే అంశాన్ని కూడా పరిశ్రమ వర్గాలు చివరి మార్గంగా పరిశీలిస్తున్నాయి. ఇండియన్ బ్రాడ్‌కాస్టింగ్ అండ్ డిజిటల్ ఫౌండేషన్ (IBDF) బోర్డు సమావేశంలోనూ ఈ అంశంపై చర్చ జరిగినట్లు సమాచారం. రేటింగ్స్ ఎప్పుడు తిరిగి ప్రారంభిస్తారనే విషయంపై స్పష్టమైన గడువు ప్రకటించాలని కేంద్ర ప్రభుత్వానికి వినతిపత్రం సమర్పించే ఆలోచనలో పరిశ్రమ ఉంది.

మరోవైపు డిజిటల్ ప్లాట్‌ఫామ్‌ల వినియోగం పెరుగుతుండటంతో సంప్రదాయ టెలివిజన్ ఛానళ్లకు ఇప్పటికే పోటీ ఎక్కువైంది. ఇప్పుడు రేటింగ్స్ నిలిచిపోవడం వాటి ఆదాయంపై మరింత ఒత్తిడి పెంచుతోంది. ఈ సమస్యకు త్వరగా పరిష్కారం లభించకపోతే BARC పరిధిలోని ఉద్యోగులతో పాటు వివిధ టీవీ నెట్‌వర్క్‌లలో పనిచేసే సిబ్బంది కూడా ఇబ్బందులు ఎదుర్కోవాల్సి వస్తుంది. మొత్తంగా రేటింగ్స్ పునఃప్రారంభంపై తీసుకునే నిర్ణయం టీవీ పరిశ్రమ భవిష్యత్తుతో పాటు వేలాది మంది ఉద్యోగుల ఉపాధిని ప్రభావితం చేయనుంది.

రాహుల్ గాంధీపై అమిత్ షా సెటైర్లు.. కాంగ్రెస్ సభపై బీజేపీ నేతల విమర్శలు

Narender Vaitla — Sun, 01 Nov 2026 21:50:57 +0530

రాహుల్ గాంధీపై అమిత్ షా వ్యంగ్యాస్త్రాలు

ప్రధాని కావాలనే ఆకాంక్ష ఉంటే రాహుల్ గాంధీ జీవితాంతం మాక్ పార్లమెంటులోనే ఉండిపోవాల్సి వస్తుందని కేంద్ర హోంమంత్రి అమిత్ షా ఎద్దేవా చేశారు. చండీగఢ్‌లో జరిగిన కార్యక్రమంలో ఆయన మాట్లాడుతూ కాంగ్రెస్ నిర్వహించిన సభపై విమర్శలు గుప్పించారు. 1984లో సిక్కులపై జరిగిన హింసాకాండకు సంబంధించిన రోజునే ఢిల్లీలోని రాంలీలా మైదానంలో బహిరంగ సభ ఏర్పాటు చేయడం బాధితుల మనోభావాలను దెబ్బతీసే చర్యగా అభివర్ణించారు. విపక్షాల తీరుపై ఆగ్రహం వ్యక్తం చేసిన అమిత్ షా.. అబద్ధాలు ప్రచారం చేయడం, అశాంతిని ప్రోత్సహించడం, పార్లమెంటు కార్యకలాపాలకు ఆటంకం కలిగించడం ప్రతిపక్షాల రాజకీయ విధానంగా మారిందని ఆరోపించారు. ప్రజాస్వామ్య వ్యవస్థలో చర్చలు, ప్రజల తీర్పునకు ప్రాధాన్యం ఇవ్వాల్సి ఉండగా.. విపక్షాలు రాజకీయ గందరగోళానికి ప్రాధాన్యం ఇస్తున్నాయని విమర్శించారు.

1984 సిక్కు వ్యతిరేక అల్లర్లపై ప్రస్తావన

1984 నవంబర్ 1న దేశవ్యాప్తంగా సిక్కులపై జరిగిన దాడులను అమిత్ షా తన ప్రసంగంలో ప్రస్తావించారు. ఆ హింసాకాండలో వేలాది మంది ప్రాణాలు కోల్పోయారని పేర్కొంటూ, రాజకీయ ప్రేరేపిత అల్లర్లలో ఇదొక తీవ్రమైన ఘటనగా అభివర్ణించారు. 2014లో నరేంద్ర మోదీ ప్రభుత్వం అధికారంలోకి వచ్చిన తర్వాత అప్పటి అల్లర్లకు సంబంధించిన కేసులను తిరిగి విచారించే చర్యలు చేపట్టినట్లు తెలిపారు. హింసాకాండలో ప్రాణాలు కోల్పోయిన వారి కుటుంబాలకు ఒక్కొక్కరికి రూ.5 లక్షల పరిహారం అందించామని, ఘటనల్లో పాల్గొన్న కాంగ్రెస్ నాయకులపై చర్యలు తీసుకుని కొందరిని జైలుకు పంపినట్లు అమిత్ షా వెల్లడించారు. సిక్కు వ్యతిరేక అల్లర్ల బాధితులకు న్యాయం చేయడం తమ ప్రభుత్వ ప్రాధాన్యాల్లో ఒకటని ఆయన పేర్కొన్నారు.

మరోవైపు, కాంగ్రెస్ నిర్వహించిన 'చలో ఢిల్లీ' సభపై కేంద్ర మంత్రి జేపీ నడ్డా విమర్శలు చేశారు. ఈ కార్యక్రమం ప్రజాస్వామ్యబద్ధంగా ఎన్నికైన ప్రభుత్వాన్ని అస్థిరపరిచే ప్రయత్నమని ఆరోపించారు. పండగల సమయంలో వ్యాపారులు, దుకాణదారులకు ఇబ్బందులు కలిగించడం, దేశ ప్రతిష్ఠను దెబ్బతీయడం ఈ ర్యాలీ వెనుక ఉన్న ఉద్దేశాలుగా ఆయన పేర్కొన్నారు. భారతదేశం రాజ్యాంగం, ప్రజల నిర్ణయాల ఆధారంగా నడుస్తుందని, అల్లర్లు, రాజకీయ ఉద్రిక్తతలతో పాలన సాగదని స్పష్టం చేశారు.

రాజ్యాంగం, ఎన్నికల వ్యవస్థపై రాహుల్ ఆరోపణలు

ఢిల్లీలోని రాంలీలా మైదానంలో నిర్వహించిన బహిరంగ సభలో రాహుల్ గాంధీ కేంద్ర ప్రభుత్వంపై తీవ్ర విమర్శలు చేశారు. ప్రధాని నరేంద్ర మోదీ, అమిత్ షా, ప్రధాన ఎన్నికల కమిషనర్ జ్ఞానేశ్ కుమార్ రాజ్యాంగం, ప్రజాస్వామ్య వ్యవస్థలపై దాడి చేస్తున్నారని ఆరోపించారు. ఈ పరిణామాలను తాము ఎట్టి పరిస్థితుల్లోనూ అంగీకరించబోమని స్పష్టం చేశారు. తన ప్రసంగం కేవలం ఒక పార్టీకి లేదా నాయకుడికి పరిమితమైనది కాదని, దేశంలోని యువత, మహిళలు, రైతులు, కార్మికుల ఆకాంక్షలకు ప్రతిబింబమని రాహుల్ పేర్కొన్నారు. మతపరమైన గుర్తింపుల కంటే ప్రతి భారతీయుడి గొంతుకకు ప్రాధాన్యం ఇస్తానని చెప్పారు. రాజ్యాంగాన్ని బలహీనపరిచే ప్రయత్నాలను అడ్డుకోవాల్సిన అవసరం ఉందన్నారు.

దేశంలో చాలా కాలంగా ఓట్ల అక్రమాలు జరుగుతున్నాయని, వాటి ఆధారంగానే 2024 లోక్‌సభ ఎన్నికలతో పాటు వివిధ రాష్ట్రాల ఎన్నికల్లో విజయాలు సాధిస్తున్నారంటూ రాహుల్ ఆరోపించారు. ఈ ఆరోపణలకు సంబంధించి ఎన్నికల వ్యవస్థలో జవాబుదారీతనం ఉండాలని డిమాండ్ చేశారు. ప్రధాన ఎన్నికల కమిషనర్ జ్ఞానేశ్ కుమార్‌పై చర్యలు తీసుకోవాలని, ఆయన బాధ్యతల నుంచి తప్పుకోవాల్సిందేనని అన్నారు. ఆయనపై చట్టపరమైన చర్యలు తీసుకోవాలని, జైలుకు వెళ్లే పరిస్థితి వస్తుందని కూడా వ్యాఖ్యానించారు.

మోదీ పాలనపై రాహుల్ విమర్శలు

ప్రధాని మోదీ ఎక్కడికీ వెళ్లడం లేదంటూ అమిత్ షా చేసిన వ్యాఖ్యలపైనా రాహుల్ గాంధీ స్పందించారు. తప్పించుకోవాలని ప్రయత్నించినా బాధ్యతల నుంచి తప్పించుకోలేరని అన్నారు. మోదీ ప్రభుత్వం అధికారంలోకి వచ్చిన తర్వాత గడిచిన పన్నెండేళ్లలో సామాన్య ప్రజలకు ఒరిగిందేమిటని ప్రశ్నించారు.

దేశంలోని యువతకు తగిన ఉద్యోగాలు లభించడం లేదని, రైతుల ఆదాయం పెరగడం లేదని రాహుల్ విమర్శించారు. కొద్దిమంది సంపన్న వ్యాపారవేత్తలకు ప్రయోజనం చేకూర్చడమే కేంద్ర ప్రభుత్వ పాలనా విధానంగా మారిందని ఆరోపించారు. టెలికాం, పోర్టులు, బ్యాంకులు వంటి కీలక రంగాల్లో ఒకే వ్యక్తికి అధిక ప్రయోజనాలు కల్పిస్తున్నారని విమర్శించారు. ప్రధాని నరేంద్ర మోదీ, అమిత్ షా కలిసి దేశంలోని కీలక ఆర్థిక వ్యవస్థలను కొందరి ప్రయోజనాలకు అనుగుణంగా నడిపిస్తున్నారని రాహుల్ ఆరోపించారు. దేశ సంపద, వ్యవస్థలపై కొద్దిమందికే నియంత్రణ ఉండే విధానాన్ని కాంగ్రెస్ అంగీకరించదని స్పష్టం చేశారు.

రాజ్యాంగ పరిరక్షణ, ఎన్నికల పారదర్శకత, ఆర్థిక అసమానతలు వంటి అంశాలపై కాంగ్రెస్ లేవనెత్తిన ప్రశ్నలకు కేంద్ర ప్రభుత్వం సమాధానం చెప్పాలని రాహుల్ డిమాండ్ చేయగా.. విపక్షాలు ప్రజాస్వామ్య వ్యవస్థలను రాజకీయ ప్రయోజనాల కోసం ఉపయోగించుకుంటున్నాయని బీజేపీ నేతలు ఎదురుదాడి చేశారు. ఇరు పక్షాల పరస్పర విమర్శలతో దేశ రాజకీయాల్లో ఈ అంశాలు మరోసారి చర్చనీయాంశంగా మారాయి.

Good Governance : రాజకీయ ఆందోళనలు యువత భవిష్యత్తును ఎలా దెబ్బతీస్తున్నాయి?

Arun Kumar P — Fri, 30 Oct 2026 12:32:51 +0530

రచయిత : రాజీవ్ చంద్రశేఖర్ (కేరళ బిజెపి అధ్యక్షులు, మాజీ కేంద్రం మంత్రి)

ప్రతిసారి టెక్నాలజీ భవిష్యత్తు గురించి మాట్లాడే నేను, ఈసారి కొద్దిగా దారి మళ్లించి మరొక ముఖ్యమైన విషయం చెప్పాలనుకుంటున్నాను. ఇది మన భారతదేశ భవిష్యత్తుకు చాలా కీలకమైన అంశం. మంచి పరిపాలన వల్ల లభించే ప్రయోజనాలు ఏమిటి? అది లేకపోతే సమాజం చెల్లించే మూల్యం ఎంత? ఈ విషయం ఇప్పటి యువతకు అర్థమవుతోందా లేదా? అనేదే నా ఆలోచన.

నేను ప్రజారాజకీయంలోకి వచ్చి ఇరవై ఏళ్లు దాటింది. ఈ కాలంలో రాజకీయ చర్చలు కేవలం అరుపులు, కేకలకే పరిమితం కావడం చూస్తున్నాను. ప్రభుత్వం తన పని సరిగ్గా చేస్తోందా లేదా అనే అసలు విషయాన్ని ఎవరూ పట్టించుకోవడం లేదు. 2014 తర్వాత ఓటర్లుగా మారిన 15 కోట్ల మంది యువతకు, రాబోయే పదేళ్లలో రాబోయే కోట్లాది మందికి దీనికి సరైన సమాధానం తెలియడం అత్యవసరం.

2004 నుంచి 2014 వరకు ఉన్న కోల్పోయిన దశాబ్దానికి, ఇప్పుడు తయారవుతున్న కొత్త భారతానికి తేడా ఏంటి అనేది ఇక్కడ అసలు ప్రశ్న.ఈ తేడా కేవలం కొన్ని ప్రభుత్వ పథకాల జాబితా మాత్రమే కాదు. పౌరుడికి, ప్రభుత్వానికి మధ్య ఉన్న సంబంధంలో వచ్చిన మార్పు. ఆ పాత దశాబ్దంలో ఒక యువకుడి భవిష్యత్తు అతనికి ఉన్న ప్రతిభ మీద ఆధారపడి ఉండేది కాదు. 'నీకు ఎవరు తెలుసు?' అనే కాంటాక్టుల మీదే ఆధారపడేది. ప్రతిభ చూసి కాంట్రాక్టులు ఇచ్చేవారు కాదు. గొప్ప ఆలోచనలకు నిధులు రాకపోయేవి, కేవలం రాజకీయం ఉన్న వారికే అవకాశాలు దక్కేవి.

2012 క్రెడిట్ స్విస్ రిపోర్ట్ ప్రకారం, భారత బ్యాంకింగ్ వ్యవస్థలోని మొత్తం ఆస్తుల్లో 98 శాతాన్ని కేవలం 10 వ్యాపార సమూహాలకే అప్పుగా ఇచ్చేశారు. అదే సమయంలో త్రిస్సూర్ లో చిన్న షాపు నడుపుకునే మహిళకు గానీ, సూరత్ లో చిన్న పరిశ్రమ పెట్టాలనుకున్న యువ ఇంజనీర్‌కు గానీ రుణాలు దక్కలేదు.

ప్రభుత్వం పంపే ప్రతి రూపాయిలో పదిహేను పైసలు మాత్రమే పేదలకు చేరుతున్నాయని నాటి ప్రధానే స్వయంగా ఒప్పుకున్నారు. కానీ జామ్ (JAM - జన్ ధన్, ఆధార్, మొబైల్) విప్లవం కేవలం ఒక సాంకేతిక విప్లవం మాత్రమే కాదు. అది ఒక పాలనా విప్లవం. దళారుల వ్యవస్థను అది పూర్తిగా రద్దు చేసింది. 2014 నుంచి ఇప్పటివరకు రూ. 53 లక్షల కోట్లకు పైగా నగదు నేరుగా ప్రజల బ్యాంకు ఖాతాల్లో పడింది.

నీతి ఆయోగ్ లెక్కల ప్రకారం తొమ్మిదేళ్లలోనే దాదాపు 25 కోట్ల మంది పేదరికం నుంచి బయటపడ్డారు. దేశంలో పేదరికం 29.17 శాతం నుంచి 11.28 శాతానికి పడిపోయింది. పీఎం కిసాన్ ద్వారా 9.5 కోట్ల మంది రైతులకు రూ. 4.47 లక్షల కోట్లు నేరుగా అందాయి. మధ్యలో ఒక్క రూపాయి కూడా దళారులు నొక్కేయలేదు. మంచి పాలన ఎప్పుడూ మంచి ఫలితాలనే ఇస్తుంది. పేదరికం నుంచి బయటపడ్డ కుటుంబం మళ్లీ వెనక్కి వెళ్లకుండా నిలబడుతుంది.

కానీ తప్పుడు నిర్ణయాలు కూడా అంతే వేగంగా నష్టం చేస్తాయి. కర్ణాటక ఉదాహరణే తీసుకోండి: ఉచిత గ్యారెంటీ పథకాల కోసం రూ. 52,000 కోట్లు ఖర్చు చేయడం వల్ల, ఒకే ఏడాదిలో ఆ రాష్ట్ర అప్పు రూ. 90,280 కోట్ల నుంచి రూ. 1,04,000 కోట్లకు పెరిగింది. ఉద్దేశం మంచిదే కావచ్చు, కానీ రోడ్లు, ఆసుపత్రులు, పరిశ్రమలు కట్టాల్సిన మూలధన ఖర్చులకు డబ్బులు లేకుండా పోయాయి.

ఇక కేరళ విషయానికి వస్తే, పదేళ్ల నిరంతర వామపక్షాల పాలన వల్ల రాష్ట్ర అప్పు రూ. 5.07 లక్షల కోట్లకు చేరిందని 2026 జూన్‌లో వారి ప్రభుత్వమే శ్వేతపత్రం విడుదల చేసింది. 2025 లో కేరళ రాష్ట్రం 84 రోజుల పాటు ఆర్‌బీఐ ఓవర్‌డ్రాఫ్ట్‌లోనే ఉంది. అభివృద్ధి పనులకు చేసే ఖర్చు అక్కడ కేవలం 1.3 శాతం మాత్రమే, ఇది జాతీయ సగటులో సగం కంటే తక్కువ.

అన్యాయాలపై నిరసన తెలపడం ప్రజాస్వామ్యానికి జీవనాడి. భారత చరిత్రలో ఇటువంటి పోరాటాలు చాలా ఉన్నాయి, నేను కూడా కొన్నింటిలో పాల్గొన్నాను. ప్రభుత్వాన్ని ప్రశ్నించే హక్కు పౌరుడికి ఎప్పుడూ ఉంటుంది. కానీ ఇప్పుడు జరుగుతోంది వేరు. రాజకీయం కోసం కావాలనే పాలనను స్తంభింపజేస్తున్నారు. తమ దగ్గర సరైన ప్రత్యామ్నాయ ప్రణాళిక లేకపోవడాన్ని దాచడానికి, నిరంతరం ఏదో ఒక సంక్షోభం ఉన్నట్లు చిత్రీకరిస్తున్నారు. చట్టాలు కాకుండా పార్లమెంటును అడ్డుకోవడం, రహదారులను దిగ్బంధించడం పరిపాటిగా మారింది.

ఇది ఎంతమాత్రమూ ప్రజాస్వామ్య బాధ్యత కాదు. చర్చలకు బదులు కేకలను ప్రత్యామ్నాయంగా మార్చడమే. దీనివల్ల ఎక్కువ నష్టపోయేది యువతరం. గందరగోళం సృష్టించడమే పరిపాలన అనుకునే దుస్థితి ఏర్పడుతోంది. దీనివల్ల యువత రాజకీయంపై నమ్మకం కోల్పోయి, నాయకులను ప్రశ్నించడం మానేసే ప్రమాదం ఉంది.

ప్రపంచంలోనే అత్యధిక యువ జనాభా ఉన్న దేశం భారత్. ఈ తరం అలవర్చుకునే రాజకీయ ఆలోచనలే రాబోయే 50 ఏళ్ల భారత ప్రజాస్వామ్య భవిష్యత్తును నిర్ణయిస్తాయి.

ఉత్తర ప్రదేశ్‌ను చూడండి: తొమ్మిదేళ్లలో బిమారు (BIMARU) అంటే పేద రాష్ట్రం నుంచి రూ. 36 లక్షల కోట్ల ఆర్థిక వ్యవస్థగా మారింది. గొడవలు ఆగిపోయాయి, పెట్టుబడిదారుల్లో నమ్మకం పెరిగింది. మహారాష్ట్రను చూస్తే దేశంలోనే అత్యధిక విదేశీ పెట్టుబడులను ఆకర్షిస్తోంది. అదే సమయంలో కేరళ, కర్ణాటక పరిస్థితి చూడండి: అప్పుల భారం పెరిగిపోయి అభివృద్ధి ఆగిపోయింది.

నేటి భారతీయ యువత ముందర ఉన్నది భావజాల ప్రశ్న కాదు, వారి సొంత భవిష్యత్తు ప్రశ్న. ఏ వ్యవస్థ మీకు మంచి అవకాశం ఇస్తుంది? మీ ప్రతిభ, కష్టం మీద ఆధారపడే వ్యవస్థా? లేక నాయకులతో సంబంధాలు ఉంటేనే పనిచేసే వ్యవస్థా? గ్రామానికి రోడ్డు వేసి ఉపాధి కల్పించే ప్రభుత్వమా? లేక ఈనాటి ఉచితాల కోసం అప్పులు చేసి రేపటి అభివృద్ధిని నాశనం చేసే ప్రభుత్వమా?

నిజానికి ఈ వ్యాసం టెక్నాలజీకి దూరంగా ఏమీ లేదు. ఒక మంచి టెక్నాలజీ వ్యవస్థ ఎలా పారదర్శకంగా పనిచేస్తుందో, సుపరిపాలన కూడా ప్రజలకు అలాగే పారదర్శకంగా, బాధ్యతాయుతంగా పనిచేయాలి.

ప్రజాస్వామ్యంలో మన ఎంపిక స్పష్టంగా ఉండాలి: ఏదైనా నిర్మించే ప్రభుత్వం కావాలా? లేక రాబోయే తరాలను పేదరికంలోకి నెట్టే ప్రభుత్వం కావాలా? అదే అసలైన విషయం, మిగిలినదంతా అనవసరమైన గోల.

(రచయిత మాజీ కేంద్ర ఎలక్ట్రానిక్స్, ఐటీ, నైపుణ్యాభివృద్ధి శాఖ సహాయ మంత్రి, నేమం నియోజకవర్గ ఎమ్మెల్యే, కేరళ బీజేపీ రాష్ట్ర అధ్యక్షుడు. ఇవి ఆయన వ్యక్తిగత అభిప్రాయాలు)

Bullet Train India: సముద్రం అడుగున దూసుకెళ్లే బుల్లెట్ రైలు.. రూట్ మ్యాప్ ఇదే

Mahesh Rajamoni — Mon, 26 Oct 2026 08:34:24 +0530

Bullet Train India: భారత్ నయా హిస్టరీ క్రియేట్ చేయబోతోంది. జపాన్ సాంకేతికతతో మన దేశంలో రూపొందుతున్న డ్రీమ్ ప్రాజెక్ట్ బుల్లెట్ రైలు పట్టాలెక్కేందుకు సిద్ధమవుతోంది. భారత్ లో తొలి బుల్లెట్ రైలు 2027 చివరినాటికి ప్రారంభం కానుంది.

మన దేశంలో అత్యంత వేగంగా ప్రయాణించే డ్రీమ్ ప్రాజెక్ట్ బుల్లెట్ రైలు కల త్వరలోనే సాకారం కాబోతోంది. ఇప్పటివరకు మనం కేవలం ప్రకటనల్లోనే విన్న ఈ హైస్పీడ్ రైలు ప్రాజెక్ట్, ఇప్పుడు ప్రత్యక్షంగా రూపుదిద్దుకుంటోంది. రైల్వే శాఖ మంత్రి అశ్విని వైష్ణవ్ తెలిపిన వివరాల ప్రకారం, ఈ భారీ ప్రాజెక్ట్ పనులు ప్రస్తుతం యుద్ధ ప్రాతిపదికన జరుగుతున్నాయి. 2027 చివరి క్వార్టర్ లో భారతదేశంలో తొలి బుల్లెట్ రైలు సేవలు అధికారికంగా అందుబాటులోకి రానున్నాయి.

ఈ అద్భుతమైన ప్రాజెక్ట్ మొత్తం 508 కిలోమీటర్ల మేర విస్తరించి ఉంది. మహారాష్ట్ర, గుజరాత్, దాద్రా నగర్ హవేలీ ప్రాంతాల గుండా ఈ రైలు కారిడార్ సాగుతుంది. ఈ మార్గంలో మొత్తం 12 ప్రధాన రైల్వే స్టేషన్లను ఏర్పాటు చేస్తున్నారు.

• ఆ 12 స్టేషన్లు ఇవే: ముంబై (BKC), ఠాణే, విరార్, బోయిసర్, వాపి, బిలిమోరా, సూరత్, భరూచ్, వడోదర, ఆనంద్, అహ్మదాబాద్, సబర్మతి. రైలు గరిష్ఠంగా గంటకు 320 కిలోమీటర్ల వేగంతో ప్రయాణిస్తే, సగటు వేగం గంటకు 300 కిలోమీటర్లుగా ఉండనుంది.

ఈ ప్రాజెక్ట్‌లో అత్యంత విస్మయపరిచే అంశం ముంబైలోని బాంద్రా కుర్లా కాంప్లెక్స్ వద్ద నిర్మిస్తున్న రైల్వే స్టేషన్. ముంబై బిజినెస్ హబ్ నడిబొడ్డున భూమికి దాదాపు 32 మీటర్ల లోతులో ఈ స్టేషన్‌ను తొవ్వుతున్నారు. ఇది దాదాపు 10 అంతస్తుల భవనం లోతుతో సమానం.

• మూడు లెవల్స్: ప్లాట్‌ఫారమ్, కాన్‌కోర్స్, సర్వీసెస్ ఏరియాలుగా 3 లెవల్స్ ఉంటాయి.

• భారీ ప్లాట్‌ఫారమ్‌లు: ఇక్కడ 400 మీటర్ల కంటే ఎక్కువ పొడవు ఉండే 6 ప్లాట్‌ఫారమ్‌లను నిర్మిస్తున్నారు.

ఇంజినీరింగ్ అద్భుతానికి నిదర్శనంగా ఈ కారిడార్‌లో 21 కిలోమీటర్ల పొడవైన టన్నెల్ నిర్మాణం జరుగుతోంది. ఇందులో ఏకంగా 7 కిలోమీటర్ల భాగం సముద్రం కింద అనగా థాణే క్రీక్ అడుగున ఉన్న రాళ్లను తొలిచి తయారు చేస్తున్నారు. సముద్రం అడుగు భాగం నుంచి బుల్లెట్ రైలు గాల్లో తేలినట్లు దూసుకెళ్లడం ప్రయాణికులకు ఒక మైండ్ బ్లాకింగ్ ఎక్స్‌పీరియన్స్ ఇవ్వనుంది.

ఈ సొరంగం నిర్మాణానికి ఉపయోగిస్తున్న టన్నెల్ బోరింగ్ మిషన్లు భారతదేశ చరిత్రలోనే అతిపెద్దవి.

• జూలై 2026 నాటికి విక్రోలి, సావ్‌లి నుంచి ఈ భారీ టన్నెల్ బోరింగ్ యంత్రాలను రంగంలోకి దించారు.

• ఈ మిషన్ల కట్టర్‌హెడ్ డయామీటర్ 13.6 మీటర్లు. అంటే దాదాపు ఒక 4 అంతస్తుల భవనం అంత ఎత్తు ఉంటుంది.

• ఒక్కో యంత్రం బరువు 3,000 టన్నులకు పైమాటే. అంటే సుమారు 500 ఆసియా ఏనుగుల బరువుతో సమానం.

• ఈ మిషన్ పొడవు 96 మీటర్లు, ఇది మన క్రికెట్ స్టేడియంలోని 5 పిచ్‌ల పొడవు ఉంటుంది.

అత్యంత వేగవంతమైన ప్రయాణంతో పాటు పర్యాటక రంగం, బిజినెస్ కనెక్టివిటీకి ఈ బుల్లెట్ రైలు తిరుగులేని మైలేజ్ ఇవ్వనుంది. ముంబై నుంచి అహ్మదాబాద్‌కి గంటల్లో ప్రయాణించే రోజులు ఇక ఎంతో దూరంలో లేవు. జపాన్ షింకన్సేన్ టెక్నాలజీతో రూపుదిద్దుకుంటున్న ఈ గ్రీన్ అండ్ హైస్పీడ్ కారిడార్ భారత రవాణా వ్యవస్థ స్వరూపాన్నే మార్చేయనుంది.

మోదీతో వ్యక్తిగత విభేదాలు లేవు.. సిద్ధాంతాల పరంగానే పోరాటం.. సోనియా కీల‌క వ్యాఖ్య‌లు

Narender Vaitla — Tue, 10 Nov 2026 15:31:02 +0530

Sonia Gandhi: కాంగ్రెస్ అగ్రనాయకురాలు సోనియా గాంధీ తన రాజకీయ, వ్యక్తిగత జీవితానికి సంబంధించిన పలు ఆసక్తికర విషయాలను తాజాగా వెల్లడించారు. ఆమె రచించిన ఆత్మకథ ‘బిలాంగింగ్: ఎ జర్నీ ఆఫ్ లవ్’లో ఈ విష‌యాలు వెల్ల‌డించారు.

ప్రధాని నరేంద్ర మోదీతో తనకు పెద్దగా వ్యక్తిగత పరిచయం లేదని సోనియా గాంధీ వెల్లడించారు. మోదీ ప్రధానిగా బాధ్యతలు చేపట్టి సుమారు 12 ఏళ్లు గడిచినా, ఇద్దరి మధ్య వ్యక్తిగత సంభాషణలు చాలా తక్కువగానే జరిగాయని పేర్కొన్నారు. పార్లమెంట్ సమావేశాల ముగింపు సమయంలో స్పీకర్ ఛాంబర్‌లో జరిగే సమావేశాలు, ఇతర అధికారిక కార్యక్రమాల్లో మాత్రమే అప్పుడప్పుడు ఎదురుపడతామని తెలిపారు. అప్పుడు ఇద్దరూ నమస్కారంతో పలకరించుకుంటారని వివరించారు. తాను ఆసుపత్రి నుంచి డిశ్చార్జ్ అయిన సందర్భంలో మోదీ ఆరోగ్యం గురించి అడిగి తెలుసుకున్నారని, అందుకు కృతజ్ఞతలు తెలిపానని గుర్తుచేశారు. పుట్టినరోజు, నూతన సంవత్సర శుభాకాంక్షలు కూడా పరస్పరం తెలియజేసుకుంటామని చెప్పారు. గతంలో వివిధ రాజకీయ పార్టీలకు చెందిన నాయకుల మధ్య భిన్నాభిప్రాయాలు ఉన్నప్పటికీ పరస్పర గౌరవం ఉండేదని అభిప్రాయపడ్డారు.

దేశ భవిష్యత్తు, ప్రజాస్వామ్యం, పాలనపై తనకు మోదీకి భిన్నమైన అభిప్రాయాలు ఉన్నాయని సోనియా పేర్కొన్నారు. తన దృష్టిలో భారత్ అనేది విభిన్న భాషలు, మతాలు, సంస్కృతులు, సంప్రదాయాలు కలిగిన ప్రజలు సమాన హక్కులతో కలిసి జీవించే లౌకిక దేశమని వివరించారు. స్వేచ్ఛ, సమానత్వం, సామాజిక న్యాయం, సమ్మిళితత్వం తన రాజకీయ సిద్ధాంతాలకు పునాదులని చెప్పారు. మరోవైపు మోదీ ఆలోచనా విధానం ఆర్‌ఎస్‌ఎస్‌ సిద్ధాంతకర్తల ప్రభావం, ఆయన వ్యక్తిగత అనుభవాలు, ఎదిగిన పరిస్థితుల ఆధారంగా రూపుదిద్దుకుందని విశ్లేషించారు. ఈ రెండు దృక్కోణాల మధ్య ఉన్న వ్యత్యాసమే తమ రాజకీయ పోరాటానికి కారణమని తెలిపారు. మోదీ తన దృష్టిలో దేశం కోసం పనిచేస్తుంటే, తాను తన విశ్వాసాలు, సిద్ధాంతాల కోసం పోరాడుతున్నానని పేర్కొన్నారు. ఈ భేదాలను వ్యక్తిగత అంశాలుగా చూడకూడదని స్పష్టం చేశారు.

ఆత్మకథలో యూపీఏ ప్రభుత్వ కాలంలో చోటుచేసుకున్న రాజకీయ పరిణామాలపైనా సోనియా ఆసక్తికర విషయాలు వెల్లడించారు. అప్పటి ప్రభుత్వాన్ని తాను తెరవెనుక నుంచి నడిపిస్తున్నానంటూ వచ్చిన విమర్శలను ఆమె ఖండించారు. ఈ సందర్భంగా మాజీ రాష్ట్రపతి ప్రణబ్ ముఖర్జీతో జరిగిన ఓ సంభాషణను గుర్తుచేసుకున్నారు.

2010లో అప్పటి ఆర్థికమంత్రి పి. చిదంబరంతో ప్రణబ్ ముఖర్జీకి కొన్ని విభేదాలు తలెత్తాయని తెలిపారు. ఈ విషయంపై ప్రణబ్ తన వద్ద అసంతృప్తి వ్యక్తం చేసినట్లు చెప్పారు. ప్రభుత్వ నాయకత్వాన్ని మార్చాల్సిన సమయం వచ్చిందేమోనని ఆయన వ్యాఖ్యానించడంతో తాను ఆశ్చర్యపోయానన్నారు. ఆ మాటల వెనుక ప్రధాని పదవిని చేపట్టాలన్న ఆయన ఆకాంక్ష ఉండి ఉండవచ్చని భావించినట్లు వెల్లడించారు. అయితే ఆ విషయంపై తాను మరింత చర్చించకుండా సంభాషణను అక్కడితో ముగించినట్లు వివరించారు.

మాజీ ప్రధాని ఇందిరా గాంధీతో తనకున్న అనుబంధం గురించి కూడా సోనియా పుస్తకంలో ప్రస్తావించారు. ప్రారంభంలో ఇందిరా గాంధీ స్వభావం, ఆమె కోపాన్ని చూసి తాను చాలా భయపడిపోయేదానినని వెల్లడించారు. చిన్న విషయాలకే ఆమె తీవ్రంగా స్పందించేవారని కొన్ని సంఘటనలను గుర్తుచేసుకున్నారు. ఒకసారి సిబ్బందిలోని వ్యక్తి ముఖ్యమైన అపాయింట్‌మెంట్ గురించి చెప్పడం మర్చిపోవడంతో ఇందిరా గాంధీ తీవ్ర ఆగ్రహం వ్యక్తం చేశారట. ఆ వ్యక్తిని గదిలోని ఓ మూలన నిలబెట్టినట్లు తెలిపారు. మరో సందర్భంలో భోజనం చేసే సమయంలో ప్లేట్‌ను విసిరేయడంతో తాను కూర్చున్న చోటే భయంతో వణికిపోయానని రాసుకొచ్చారు. అప్పుడు రాజీవ్ గాంధీ తనకు ధైర్యం చెప్పారని, తల్లి కోపం ఎక్కువసేపు ఉండదని వివరించారని గుర్తుచేసుకున్నారు. కాలక్రమంలో ఇందిరా గాంధీ వ్యక్తిత్వాన్ని పూర్తిగా అర్థం చేసుకున్నానని తెలిపారు. ఆమెకు చీరలంటే ఎంతో ఇష్టమని కూడా తన జ్ఞాపకాలను పంచుకున్నారు.

"Have No Real Contact With Him, He Avoids Eye Contact": Sonia Gandhi On PM Modi

https://t.co/BOWudE5L3s

— Samiran Mishra (@scoutdesk) November 10, 2026

బీజేపీ రాజకీయ వైఖరి, జవహర్‌లాల్ నెహ్రూపై ఆ పార్టీ నేతలు చేస్తున్న విమర్శలపైనా సోనియా గాంధీ తన అభిప్రాయాలను వెల్లడించారు. భారతదేశాన్ని ప్రజాస్వామ్య, లౌకిక మార్గంలో ముందుకు తీసుకెళ్లడంలో నెహ్రూ కీలక పాత్ర పోషించారని పేర్కొన్నారు. ఆయన విధానాలు, ఆలోచనలను లక్ష్యంగా చేసుకోవడాన్ని తప్పుబట్టారు. అలాగే 'కాంగ్రెస్ ముక్త్ భారత్' అనే నినాదం కేవలం ఒక రాజకీయ పార్టీని ఓడించడానికే పరిమితం కాదని, కాంగ్రెస్ అనుసరించిన విధానాలు, సిద్ధాంతాలను కూడా అంతం చేయాలనే ఉద్దేశం ఇందులో ఉందని ఆమె అభిప్రాయపడ్డారు. ఆర్‌ఎస్‌ఎస్ భావజాలం సమాజంలో మతపరమైన విభజనలకు కారణమవుతోందని విమర్శించారు. మొత్తంగా తన ఆత్మకథలో వ్యక్తిగత జీవితంలోని అనుభవాలతో పాటు దేశ రాజకీయాలు, ప్రజాస్వామ్యం, సిద్ధాంతపరమైన పోరాటాలపై తన ఆలోచనలను సోనియా గాంధీ వివరించారు.