Asianet News Telugu

Gang Leader Review: చిరంజీవి కోసం కెరీర్‌ను పణంగా పెట్టిన నాగబాబు, మెగాస్టార్ రఫ్ఫాడించి 35 ఏళ్లు.. గ్యాంగ్ లీడర్ రివ్యూ

Mahesh Jujjuri — Sat, 22 Aug 2026 08:48:42 +0530

Gang Leader Review: మెగాస్టార్ చిరంజీవికి మాస్ ఇమేజ్ తీసుకువచ్చిన సినిమాల్లో 'గ్యాంగ్ లీడర్' ఒకటి. యాక్షన్, సెంటిమెంట్, డ్యాన్స్, మ్యూజిక్.. ఇలా అన్ని విభాగాల్లో రఫ్ఫాడించిన ఈ సినిమా విడుదలయ్యి 35 ఏళ్లు పూర్తవుతోంది. గ్యాంగ్ లీడర్ రివ్యూ మీకోసం..

తెలుగు ఫిల్మ్ ఇండస్ట్రీ హిస్టరీలో సంచలనాలకు మారుపేరుగా నిలిచిన సినిమాలు ఎన్నో ఉన్నాయి. వాటిలో ఎక్కువగా చిరంజీవి సినిమాలే కనిపిస్తుంటాయి. మాస్ డైలాగ్స్, యాక్షన్, ఎంటర్‌టైన్‌మెంట్‌కు సరికొత్త నిర్వచనం చెప్పిన ఆల్‌టైమ్ క్లాసిక్ సినిమాల్లో ‘గ్యాంగ్ లీడర్’ ముందు వరుసలో ఉంటుంది. ఈసినిమా రిలీజ్ అయ్యి 35 ఏళ్లు పూర్తి అయ్యింది. 1991 మే 9న విడుదలైన గ్యాంగ్ లీడర్.. మెగాస్టార్ చిరంజీవిని తిరుగులేని "నంబర్ వన్" సింహాసనంపై కూర్చోబెట్టింది. దర్శకుడు విజయ బాపినీడు సృజనాత్మకత, పరుచూరి సోదరుల మాస్ డైలాగ్స్, బప్పీలహరి సంగీతం కలగలిసి ఈ చిత్రాన్ని ఇండస్ట్రీ హిట్‌గా నిలబెట్టాయి. చిరంజీవి, విజయశాంతి, రావు గోపాల్ రావు, ఆనందరాజ్, శరత్ కుమార్, మురళీ మోహన్, నిర్మలమ్మ లాంటి స్టార్ తారాగణం నటించిన ఈ సినిమా బ్లాక్ బస్టర్‌గా నిలవడానికి గల కారణాలేంటో చూద్దాం.

రఘుపతి (మురళీ మోహన్), రాఘవ (శరత్ కుమార్), రాజారామ్ (చిరంజీవి) ముగ్గురు అన్నదమ్ములు. రఘుపతి బాధ్యతాయుతమైన అన్నగా కుటుంబాన్ని పోషిస్తుంటే, రాఘవ ఐఏఎస్ (IAS) కు సిద్ధమవుతుంటాడు. రాజారామ్ బాధ్యతారాహిత్యంగా నలుగురు స్నేహితుల గ్యాంగ్‌తో జాలీగా తిరుగుతుంటాడు. తమ్ముడి ఐఏఎస్ ప్రిపరేషన్ కోసం డబ్బు కావాల్సి వస్తే, రాజారామ్ జైలుకు వెళ్లడానికి కూడా వెనుకాడడు. అయితే, నగరంలో అరాచకాలు సాగించే ఏకాంబరం (రావు గోపాల్ రావు), కనకాంబరం (ఆనందరాజ్) చేతిలో రఘుపతి దారుణంగా హత్యకు గురవుతాడు. ప్రమాదవశాత్తు జరిగిందనుకున్న అన్న మరణం వెనుక ఉన్న కుట్రను రాజారామ్ ఎలా బయటపెట్టాడు? తన కుటుంబానికి దూరమైన పరిస్థితి నుండి, తన గ్యాంగ్, ప్రియురాలు కన్యాకుమారి (విజయశాంతి) సహాయంతో విలన్ల అంతం ఎలా చూశాడు? తమతోనే ఎంతో సరదాగా ఉంటూ.. హీరోకి లైన్ వేసే కన్యాకుమారి బ్యాక్‌గ్రౌండ్‌లో ఉన్న విషాదం ఏంటి? అది ఎప్పుడు రివీల్ అవుతుంది? అనేదే మిగతా కథ.

రాజారామ్ పాత్రలో చిరంజీవి నటన, ఆటిట్యూడ్, డ్యాన్సులు, ఫైట్లు ప్రేక్షకులకు పూనకాలు తెప్పించాయని చెప్పవచ్చు. మరీ ముఖ్యంగా ఆయన మేనరిజం, "చెయ్యి చూశావా ఎంత రఫ్‌గా ఉందో.. రఫ్ ఆడించేస్తాను" అనే డైలాగ్ తెలుగు చిత్రసీమలో ఎప్పటికీ నిలిచిపోతుంది. ఇక హీరోయిన్ విజయశాంతి విషయానికి వస్తే.. కన్యాకుమారిగా ఆమె చిరంజీవితో సరిసమానమైన టైమింగ్‌తో పోటీపడి నటించారు. వీరిద్దరి కెమిస్ట్రీ సినిమాకు ప్రధాన ఆకర్షణ. డ్యాన్స్, డైలాగ్స్ విషయంలో చిరంజీవికి ఎక్కడా తగ్గలేదు విజయశాంతి. ఇక మురళీమోహన్, శరత్ కుమార్, సుమలత, సుధ, నిర్మలమ్మ, రావుగోపాల్ రావు లాంటి నటులు తమ పాత్రల పరిధిమేర అలరించారు.

సినిమాను నిలబెట్టిన సంగీతం:

'గ్యాంగ్ లీడర్' సినిమాకు చిరంజీవి మాస్ యాక్షన్ ఎంత హైలైట్ అయిందో, బప్పీలహరి అందించిన సంగీతం కూడా అంతే ప్లస్ అయింది. ఈ మూవీలో చిరంజీవి డైలాగ్స్‌కు, యాక్షన్ సన్నివేశాలకు అదిరిపోయే బ్యాక్‌గ్రౌండ్ మ్యూజిక్‌ను బప్పీలహరి అందించారు. దాంతో పాటు పాటలు కూడా సంచలనం సృష్టించాయి. ముఖ్యంగా "వానా వాన వెల్లువాయే" పాట ఇప్పటికీ ఎవర్‌గ్రీన్ చార్ట్‌బస్టర్. లోక్ సింగ్ సినిమాటోగ్రఫీ, విజయ బాపినీడు గ్రిప్పింగ్ స్క్రీన్‌ప్లే సినిమాను సూపర్ ఫాస్ట్ పేస్‌లో నడిపించాయి.

ఈ సినిమా మొదట చిరంజీవి కోసం కాదు.. ఆయన సోదరుడు నాగబాబు కోసం అనుకున్నది. విజయ బాపినీడు మొదట నాగబాబుతో 'బొమ్మరిల్లు' తరహా ఫ్యామిలీ డ్రామా తీయాలనుకున్నారు. అందుకోసం ఈ కథను రాసుకుని 'అరేవో సాంబ' అనే టైటిల్ కూడా అనుకున్నారట. కానీ ఈ రేంజ్ మాస్ మూవీ చిరంజీవికి అయితేనే బాగుంటుందని నాగబాబు పట్టుపట్టి మెగాస్టార్‌తో ఈ సినిమా చేయించారట. అయితే మెగాస్టార్‌కి మొదట సిద్ధం చేసిన లైన్ నచ్చకపోవడంతో పరుచూరి సోదరులు రంగంలోకి దిగి కథను పూర్తిగా మాస్ ఎంటర్‌టైనర్‌గా మలిచారు. ఈ సినిమా నాగబాబు చేసి..హిట్ అయ్యి ఉంటే ఆయన కూడా కమర్షియల్ హీరోగా బిజీ అయ్యేవారేమో. కానీ ఈ విషయంపై అధికారికంగా మెగా హీరోలు మాత్రం ఎప్పుడు మాట్లాడలేదు.

కథలో మార్పులు చేర్పులు..

ముందుగా అనుకున్న టైటిల్ సెట్ అవ్వదని భావించి, రచయిత సత్యమూర్తి (దేవిశ్రీ ప్రసాద్ తండ్రి) అప్పట్లో 'మెగాస్టార్' పత్రికలో 'గ్యాంగ్ లీడర్' పేరుతో రాసే సీరియల్ క్యాచీ టైటిల్‌ను బాపినీడు గారు ఈ సినిమాకు ఖరారు చేశారు. ఈ సినిమాలో "వానా వాన వెల్లువాయే" పాట చిత్రీకరణ సమయంలో చిరంజీవి 104 డిగ్రీల జ్వరంతో బాధపడుతున్నప్పటికీ, షూటింగ్ ఆపకుండా వర్షంలో డ్యాన్స్ చేసి తన ప్రొఫెషనలిజాన్ని చాటుకున్నారు.

'గ్యాంగ్ లీడర్' సినిమా రిలీజ్ అవ్వడంతోనే మాస్ ఆడియన్స్ తండోపతండాలుగా థియేటర్లకు పోటెత్తారు. 1991లో రిలీజ్ అయిన ఈ సినిమా ప్రపంచవ్యాప్తంగా దాదాపు రూ. 10 కోట్ల షేర్ సాధించి, అప్పట్లో అత్యధిక వసూళ్లు సాధించిన తెలుగు చిత్రంగా చరిత్రకెక్కింది. 50కి పైగా కేంద్రాల్లో 100 రోజులు, పలు ప్రధాన కేంద్రాల్లో 200 రోజులకు పైగా ప్రదర్శితమైంది. ఇక ఈ మూవీ 100 రోజుల వేడుకను చిరంజీవి పుట్టినరోజున తిరుపతి, హైదరాబాద్, ఏలూరు, విజయవాడలలో ఒకేరోజు నిర్వహించారు. మూవీ టీమ్ ప్రత్యేక హెలికాప్టర్‌లో ఆ నగరాలన్నీ తిరుగుతూ వేడుకల్లో పాల్గొనడం టాలీవుడ్‌లో సరికొత్త రికార్డు.

చిరంజీవి రెమ్యునరేషన్ రికార్డు..

ఈ సినిమా సంచలన విజయం తర్వాత చిరంజీవి రూ. 1.25 కోట్ల పారితోషికం అందుకొని, అప్పట్లో అమితాబ్ బచ్చన్ కంటే ఎక్కువ రెమ్యునరేషన్ తీసుకున్న భారతీయ హీరోగా జాతీయ మీడియా దృష్టిని ఆకర్షించారు. 'గ్యాంగ్ లీడర్' ఘనవిజయంతో ఈ చిత్రాన్ని హిందీలో చిరంజీవి హీరోగానే 'ఆజ్ కా గూండారాజ్' పేరుతో పునర్నిర్మించగా, అక్కడ కూడా బాక్సాఫీస్ వద్ద విజయం సాధించింది.

'గ్యాంగ్ లీడర్' కేవలం ఒక సినిమా కాదు, తెలుగు సినీ రంగాన్ని శాసించిన ఒక మాస్ సంచలనం. ఇప్పటికీ మాస్ సినిమాలకు ఇది ఒక రోల్‌మోడల్. ఈ తరం యూత్ కూడా చూసి ఎంజాయ్ చేయగలిగే ఈ సినిమా యూట్యూబ్‌లో కూడా అందుబాటులో ఉంది.

Samarasimha Reddy Review: చిరంజీవికి ఎంతో ఇష్టమైన బాలకృష్ణ సినిమా, 365 రోజులు ఆడిన ట్రెండ్ సెట్టర్, సమరసింహా రెడ్డి రివ్యూ

Mahesh Jujjuri — Wed, 26 Aug 2026 08:00:43 +0530

Samarasimha Reddy Review: కొన్ని సినిమాలు చరిత్రలో నిలిచిపోతాయి; మరికొన్ని ట్రెండ్ సెట్టర్స్‌గా మారతాయి. అటువంటి ట్రెండ్స్ సృష్టించడంలో బాలకృష్ణ రూటే వేరు. ఆయన నటించి ఆల్-టైమ్ ఇండస్ట్రీ హిట్‌గా నిలిచిన ‘సమరసింహారెడ్డి’ సినిమా రివ్యూ చూద్దాం.

తెలుగు సినీ చరిత్రలో "ఫ్యాక్షన్ యాక్షన్ డ్రామా" జానర్‌కు శంఖారావం పూరించిన సినిమా ‘సమరసింహారెడ్డి’. 1999 సంక్రాంతి కానుకగా జనవరి 13న విడుదలైన ఈ సినిమా టాలీవుడ్ బాక్సాఫీస్ చరిత్రను తిరగరాసింది. ‘గాడ్ ఆఫ్ మాసెస్’ నందమూరి బాలకృష్ణ మాస్ ఇమేజ్‌ను శిఖరాగ్రానికి తీసుకెళ్లడమే కాకుండా, ఆ తర్వాత రెండు దశాబ్దాల పాటు రాయలసీమ ఫ్యాక్షన్ నేపథ్య సినిమాలకు సరికొత్త బాటలు వేసింది.

ఈ సినిమాలో వాసుదేవ్ (నందమూరి బాలకృష్ణ) ఒక హోటల్ సర్వెంట్‌గా, సాధారణ అమాయక వ్యక్తిగా పరిచయమవుతాడు. కాంతమ్మ (జయచిత్ర) వద్ద హోటల్ పనిలో చేరి, మంచి సలహాలు ఇస్తూ ఆమె వ్యాపారాన్ని వృద్ధి చేస్తాడు. ఆ హోటల్ యజమాని కాంతమ్మ దగ్గర ఉన్న ముగ్గురు ఆడపిల్లలను ఎంతో ఆప్యాయంగా చూసుకుంటాడు. అతడు చిన్నతనంలో ఇంట్లోంచి వెళ్లిపోయిన తమ సొంత అన్నయ్యేనని తెలుసుకుని ఆ పిల్లలు ఆనందాన్ని తట్టుకోలేరు.

మరోవైపు కాంతమ్మ హోటల్ ఎదురుగానే చిట్టెమ్మ (సిమ్రాన్) హోటల్ ఉంటుంది. ఆమెతో నిత్యం గొడవపడుతూనే సరదాగా రొమాన్స్ చేస్తుంటాడు హీరో. కొన్ని ఊహించని పరిణామాల వల్ల హీరో అసలు పేరు వాసుదేవ్ కాదని తెలుస్తుంది. అదే సమయంలో అంజలి (అంజలా జవేరి) ఎంట్రీ ఇస్తుంది.

అతడు సాధారణ వాసుదేవ్ కాదని, రాయలసీమలో శత్రువుల గుండెల్లో నిద్రపోయే ధైర్యశాలి ‘సమరసింహారెడ్డి’ అని ఇంటర్వెల్ ముందు రివీల్ అవుతుంది. అసలు సమరసింహారెడ్డి ఎందుకు మారువేషంలో నగరానికి వచ్చాడు? ఆయన కుటుంబం ఏమైపోయింది? సీమ ప్రాంతంలో వీరరాఘవరెడ్డి (జయప్రకాశ్ రెడ్డి) కుటుంబం చేసే అరాచకాలు, కక్షల వల్ల సమరసింహారెడ్డి కుటుంబం ఎలాంటి నష్టాన్ని చవిచూసింది? తన చెల్లెళ్లను కాపాడుకోవడానికి, ప్రజలకు న్యాయం చేయడానికి సమరసింహారెడ్డి శత్రువులపై ఎలా తిరుగుబాటు చేశాడు? అసలు వాసు ఎవరు అనేది మిగతా కథ.

ఈ సినిమాకు ప్రాణం పోసింది బాలయ్య బాబు నటన. ఫస్ట్ హాఫ్ లో సాప్ట్ క్యారెక్టర్ గా కనిపించిన నందమూరి బాలకృష్ణ.. ఆతరువాత సమరసింహారెడ్డి పాత్రలో విశ్వరూపం చూపించారు. ఫ్యాక్షన్ లీడర్‌గా బాలయ్య దుమ్ముదులిపాడు. ఆయన చెప్పే డైలాగులు, గంభీరమైన బాడీ లాంగ్వేజ్ థియేటర్లను హోరెత్తించాయి. నీ ఇంటికొచ్చా.. నట్టింటికొచ్చ లాంటి డైలాగ్స్ అభిమానులకు పూనకాలు తెప్పించింది. ఇప్పటికీ ఈ సినిమా డైలాగ్స్ వినిపిస్తూనే ఉంటాయి. ఆ డైలాగ్స్ లో పవర్ ఏమాత్రం తగ్గలేదు.

ఇక హీరోయిన్లు సిమ్రాన్ అండ్ అంజలా జవేరి అద్భుతంగా నటించి మెప్పించారు. ఫస్ట్ హాఫ్ లో సిమ్రాన్ గ్లామర్ సినిమాకు బాగా ఉపయోగపడింది. ఇక నెగెటీవ్ షేడ్స్ ఉన్న పాత్రలో అంజలా జావేరి కూడా అద్భుతం చేసింది. సిమ్రాన్ హోమ్‌లీ , ఎమోషనల్ పర్ఫార్మెన్స్‌తో మెప్పించగా, అంజలా జవేరి గ్లామర్‌తో పాటు కథకు కీలక మలుపుగా నిలిచారు.

జయప్రకాశ్ రెడ్డి, కోట శ్రీనివాసరావు లాంటి సీనియర్ నటులు ఈసినిమాకు ప్రాణం పోశారు. ఇక రాయలసీమ యాసలో జయప్రకాశ్ రెడ్డి చెప్పే విలనిజం డైలాగ్స్ కు ఆడియన్స్ కు పిచ్చెక్కిపోయింది. అవే సినిమాకు ప్రధాన బలంగా నిలిచాయి. బ్రహ్మానందం, ఎం.ఎస్. నారాయణ, ఏవీఎస్ కమెడియన్ గ్రూప్ కామెడీ సస్నివేశాలతో చక్కటి వినోదాన్ని పంచారు. ఇతర నటీనటులు తమ పాత్రల పరిదిమేర అద్భుతంగా నటించి మెప్పించారు.

మాస్ పల్స్ తెలిసిన దర్శకుడు బి. గోపాల్ ప్రతి సన్నివేశాన్ని అద్భుతంగా తెరకెక్కించారు. ముఖ్యంగా ఇంటర్వెల్ బ్యాంక్ సీన్, క్లైమాక్స్ యాక్షన్ ఎపిసోడ్స్ ఆ రోజుల్లో సంచలనం సృష్టించాయి. విజయేంద్రప్రసాద్ అందించిన గ్రిప్పింగ్ కథకు పరుచూరి బ్రదర్స్ రాసిన థండరస్ డైలాగులు ప్రాణం పోశాయి. ఇక ఈసినిమాకు పెద్ద బలం సంగతం. పాటలు బాలయ్య అభిమానులతో పాటు సంగీత ప్రియులను కూడా అలరించాయి. మణిశర్మ అందించిన పాటలు (“అందాల ఆడబొమ్మ”, “నందమూరి నాయకా”, “అడ్డీస్ అబ్బబ్బా”) ప్రతి ఒక్కటి చార్ట్‌బస్టర్‌గా నిలిచాయి. బ్యాక్‌గ్రౌండ్ స్కోర్ (BGM) ప్రతి మాస్ సన్నివేశాన్ని పీక్స్‌కు తీసుకెళ్లింది.

నిజానికి ఈసినిమాను ముందుగా బాలయ్య కోసం రాసుకోలేదట గోపాల్. విక్టరీ వెంకటేష్ తో ఈమూవీ ప్లాన్ చేశాడట. కానీ అది కుదరకపోవడంతో.. బాలయ్య వైపు టార్న్ అయినట్టు సమాచారం. అయితే ముందుగా అనుకున్న కథను బాలయ్య మాస్ ఇమేజ్ కు తగ్గట్టుగా మార్చేశారట పరుచూరి సోదరులు. ఈసినిమాలో వాసుదేవ్ పాత్ర సమరసింహారెడ్డిగా రూపాంతరం చెందే సన్నివేశం తెలుగు సినిమా చరిత్రలోనే అత్యంత ఉత్కంఠభరితమైన ఇంటర్వెల్ సీన్లలో ఒకటి. "నీ ఇంటికి వస్తా.. వీరరాఘవరెడ్డి..!" వంటి సంభాషణలు థియేటర్లను ఊపేసాయి. ఈ సినిమాలో సీమ ఫ్యాక్షనిజం వెనుక ఉన్న కుటుంబ బంధాలు, చెల్లెళ్ల సెంటిమెంట్ ప్రేక్షకులను కట్టిపడేసాయి.

ఈసినిమా రచయిత విజయేంద్ర ప్రసాద్ మొదట ఈ సినిమా కథను ముంబై మాఫియా నేపథ్యంలో రాసుకున్నారు. అయితే ఆ సమయంలో ఆయన సహాయకుడిగా ఉన్న రత్నం సలహా మేరకు ఆ కథను ‘రాయలసీమ ఫ్యాక్షన్’ నేపథ్యానికి మార్చారు. విజయేంద్ర ప్రసాద్ ప్రకారం ఈ సినిమాలోని సవతి తల్లులు, చెల్లెళ్ల సెంటిమెంట్ ఎపిసోడ్‌కు తమిళ చిత్రం సిందూర పువ్వు కోర్ పాయింట్ స్ఫూర్తిగా నిలిచింది. ఇక దర్శకుడు బి. గోపాల్, పరుచూరి బ్రదర్స్ , విజయేంద్ర ప్రసాద్‌లతో కలిసి ఈ సినిమా కోసం సుమారు 25 నుండి 30 కథల వరకు చర్చించాక చివరికి ఈ ఫ్యాక్షన్ కథను ఖరారు చేశారు.

సమరసింహారెడ్డి సినిమా సుమారు 6 కోట్ల బడ్జెట్‌తో నిర్మితమైంది. దాదాపు 30 కోట్ల గ్రాస్ కలెక్షన్లను వసూలు చేసి ఆల్-టైమ్ ‘ఇండస్ట్రీ హిట్’గా నిలిచింది. ఈమూవీ అత్యంత వేగంగా 73 కేంద్రాల్లో నేరుగా 100 రోజులు ఆడి సరికొత్త రికార్డు నమోదు చేసింది. 29 కేంద్రాల్లో నేరుగా 175 రోజులు (Silver Jubilee) ఆడిన తొలి తెలుగు చిత్రంగా ఘనత సాధించింది. 3 థియేటర్లలో ఏకంగా 227 రోజులకు పైగా ఆడి సరికొత్త మైలురాయిని తాకింది. అంతే కాదు డిస్ట్రిబ్యూటర్ షేర్‌గా 14 కోట్లకు పైగా రాబట్టిన మొదటి తెలుగు సినిమాగా చరిత్ర పుటలకెక్కింది. అంతే కాదు ఒక థియేటర్ లో ఏకంగా ఈ సినిమా ఏకంగా 365 రోజులు (వన్ ఇయర్) ప్రదర్శించబడి రికార్డు సృష్టించింది. ఈ సినిమా అంటే మెగాస్టార్ చిరంజీవికి చాలా ఇష్టమట. సమరసింహా రెడ్డి మూవీని ఖాళీగా ఉన్న చాలా సందర్భాల్లో మెగాస్టార్ ఈమూవీ చూసినట్టు.. గతంలో చెప్పుకొచ్చారు.

సినిమా మాత్రమే కాదు (Final Verdict)

‘సమరసింహారెడ్డి’ కేవలం ఒక సినిమా మాత్రమే కాదు, తెలుగు సినీ వర్గాల్లో ఒక ట్రెండ్‌సెట్టర్. నందమూరి బాలకృష్ణ నటన, బి. గోపాల్ మేకింగ్, మణిశర్మ సంగీతం, పరుచూరి సోదరుల మాటలు కలగలసిన ఈ చిత్రం మాస్ సినిమాలకు కేరాఫ్ అడ్రస్‌గా నిలిచింది. సినిమా ప్రేమికులను మరీ ముఖ్యంగా మాస్ అభిమానులు ఎప్పటికీ మరచిపోలేని ఒక ‘ఎవర్‌గ్రీన్ మాస్టర్‌పీస్’ సమరసింహారెడ్డి.

Pandanti Kapuram Review: ఏఎన్నార్ దసరాబుల్లోడికి షాక్ ఇచ్చిన కృష్ణ, సూపర్ స్టార్ ఫస్ట్ గోల్డెన్ జూబ్లీ మూవీ, పండంటి కాపురం రివ్యూ..

Mahesh Jujjuri — Sun, 06 Sep 2026 07:30:33 +0530

Pandanti Kapuram Review: సూపర్ స్టార్ కృష్ణకు స్టార్ డమ్ తెచ్చిన సినిమాల్లో పండంటి కాపురం కూడా ఉంది. ఎన్టీఆర్,ఏఎన్నార్ ల స్థాయికి కృష్ణను తీసుకెళ్ళిన చిత్రం ఇది. పెద్ద హీరోలకు కూడా సవాలు విసిరి. కృష్ణ కెరీర్ లో తొలి గెల్డెన్ జూబ్లీ మూవీగా నిలిచింది.

తెలుగు సినీ చరిత్రలో కొన్ని చిత్రాలు బాక్సాఫీస్ వద్ద విజయం సాధించడమే కాకుండా, ప్రేక్షకుల గుండెల్లో శాశ్వత స్థానాన్ని సంపాదించుకుంటాయి. అలాంటి మహోన్నత చిత్రాలలో నటశేఖర, సూపర్ స్టార్ కృష్ణ హీరోగా నటించిన 'పండంటి కాపురం' ఒకటి. 1972 జూలై 21న విడుదలైన ఈ సినిమా.. కృష్ణ నటజీవితంలో తొలి స్వర్ణోత్సవం (Golden Jubilee) జరుపుకున్న చిత్రంగా ఘనచరిత్ర సృష్టించింది.

సొంత చిత్రాల నిర్మాణంతో తనకంటూ ఒక ప్రత్యేక గుర్తింపు తెచ్చుకునే క్రమంలో, నటుడు డాక్టర్ ఎమ్. ప్రభాకరరెడ్డితో కలిసి కృష్ణ సమర్పణలో 'జయప్రద పిక్చర్స్' పతాకంపై జి. హనుమంతరావు పండంటి కాపురం సినిమాను నిర్మించారు. పి. లక్ష్మీదీపక్ దర్శకత్వం వహించిన ఈ చిత్రం అప్పట్లో బ్లాక్ బస్టర్ హిట్ అయ్యింది. నేటికీ ఆల్ టైమ్ క్లాసిక్‌గా నిలిచిపోయింది.

'పండంటి కాపురం' పేరుకు తగ్గట్టే ఒక సమిష్టి కుటుంబం, వారి మధ్య ఉండే అనురాగాలు, విధి ఆడే వింత నాటకాలు, పగ-ప్రతీకారాల చుట్టూ తిరిగే దివ్యమైన కుటుంబ కథా చిత్రం.

కథలోకి వెళ్తే... నారాయణరావు (ఎస్.వి. రంగారావు), శ్రీనివాసరావు (గుమ్మడి), మధు (ప్రభాకరరెడ్డి), రవి (కృష్ణ) నలుగురు అన్నదమ్ములు. పెద్దన్న నారాయణరావు కుటుంబానికి ప్రాణం, ఆయన మాట మిగిలిన ముగ్గురు సోదరులకు వేదవాక్కు. ఇల్లు గడవడానికి నారాయణరావే మూలస్తంభంగా ఉంటాడు. రెండో తమ్ముడు శ్రీనివాసరావు క్లర్క్‌గా పనిచేస్తుంటాడు. మూడో తమ్ముడు మధు కలెక్టర్ అవుతాడు. నాలుగో తమ్ముడు రవి (కృష్ణ) అల్లరి చిల్లరగా ఉంటూనే ఇంటి బాధ్యతలను నెరవేరుస్తుంటాడు.

ఈ ఆనందకరమైన పండంటి కాపురంలోకి 'రాణీ మాలినీ దేవి' (జమున) ప్రవేశంతో ఊహించని కలతలు మొదలవుతాయి. గతం లో శ్రీనివాసరావు మాలినిని ప్రేమించి, పరిస్థితుల వల్ల దూరమవుతాడు. వారికి ఒక పాప కూడా ఉంటుంది. ఆ పాప ఎక్కడుందో తెలియక, తన జీవితాన్ని నాశనం చేశాడనే పగతో కోటీశ్వరురాలైన మాలిని ఈ ఉమ్మడి కుటుంబంపై పగబడుతుంది. తన ధనబలంతో శ్రీనివాసరావు ఉద్యోగం తీయించడం, వారి ఆస్తిని దక్కించుకోవడం ద్వారా ఆ కుటుంబాన్ని కష్టాల పాలు చేస్తుంది.

వైద్యం అందక శ్రీనివాసరావు చిన్న కుమారుడు మరణించడంతో రవి నేరుగా వెళ్లి మాలినిని నిలదీస్తాడు. ఆ తర్వాత నారాయణరావు ద్వారా తన కూతురు మరెవరో కాదు, ఆ ఇంట్లోనే పెరిగిన 'శాంతి' అని మాలిని తెలుసుకుంటుంది. తన తొందరపాటు వల్ల ఒక పండంటి కుటుంబం విచ్ఛిన్నమైందని పశ్చాత్తాపపడి, ఆస్తిని తిరిగి ఇచ్చేసి ఆధ్యాత్మిక మార్గంలో వెళ్ళిపోతుంది. చివరికి రవి, సుశీల (విజయనిర్మల)ల కళ్యాణంతో కథ సుఖాంతమవుతుంది.

కృష్ణ (రవి): యంగ్, డైనమిక్ లుక్‌లో కృష్ణ తన నటనతో ఆకట్టుకున్నారు. అన్నల పట్ల గౌరవం, వదినల పట్ల ఆప్యాయత, పగబట్టిన మాలినిని ధైర్యంగా ఎదుర్కొనే సన్నివేశాలలో ఆయన నటన అద్భుతం.అంతే కాదు హీరో కాబట్టి.. విజయనిర్మలతో డ్యూయెట్లు.. విలన్లతో యాక్షన్ సీన్స్ కూడా సినిమాలో అద్భుతంగా పండాయని చెప్పవచ్చు.

ఎస్.వి. రంగారావు నారాయణరావు పాత్ర గురించి చెప్పుకుంటే.. పెద్దన్నగా ఎస్వీఆర్ జీవించేశారని చెప్పవచ్చు. కుటుంబ గౌరవాన్ని నిలబెట్టే సన్నివేశాల్లో ఆయన గంభీరమైన నటన సినిమాకు ప్రాణంపోసింది. ఇక ఈ సినిమాలో అందరు సీనియర్ నటీనటులే.. స్టార్స్ అంతా తెరపై కనిపించడం.. అప్పటి ఆడియన్స్ కు కన్నుల పండగా అనిపించింది. గుమ్మడి, ప్రభాకరరెడ్డి, జమున, దేవిక, బి. సరోజాదేవి: మహానటులందరూ తమ పాత్రలకు నూటికి నూరు శాతం న్యాయం చేశారు. నెగెటివ్ షేడ్స్ ఉన్న రాణీ మాలినీ దేవి పాత్రలో జమున నటన అద్భుతం. ఇక ఈ సినిమాకు తమ కామెడీ టైమింగ్, పంచ్ లతో రాజబాబు, అల్లు రామలింగయ్యల కితకితలు పెట్టాడని చెప్పవచ్చు.

ఇంత మంది స్టార్లు.. పెద్ద పెద్ద తారలను హ్యాండిల్ చేయడం అంత ఈజీకాదు.. దర్శకుడు పి. లక్ష్మీదీపక్ ఈ భారీ తారాగణాన్ని బ్యాలెన్స్ చేస్తూ.. ఎవరిని నొప్పించకుండా.. ఎవరి పాత్రకు ఇంపార్టెన్స్ తగ్గకుండా.. సెంటిమెంట్, డ్రామా, కామెడీలను సమపాళ్ళలో మేళవించి చిత్రాన్ని అద్భుతంగా మలిచారు. ఆయన దర్వకత్వానికి.. కథకు తగ్గట్టు ఎస్.పి. కోదండపాణి అందించిన సంగీతం ఈ సినిమాకు ప్రధాన బలం. పాటలు దశాబ్దాలు గడిచినా నేటికీ శ్రోతలను అలరిస్తూనే ఉన్నాయి. మరీ ముఖ్యంగా..

“బాబూ…వినరా… అన్నాదమ్ముల కథ ఒకటి…”

“ఈ నాడు కట్టుకున్న బొమ్మరిల్లు…”

“ఇదిగో దేవుడు చేసిన బొమ్మా…”

“ఏమమ్మో జగడాల వదినమ్మో…” పాటలు ఇప్పటికి సంగీత ప్రియులను అలరిస్తూనే ఉన్నాయి. ఈ పాటలకు ఘంటసాల, బాలు ప్రాణం పోశారని చెప్పవచ్చు. ఇక ఈ కుటంబ కమద్దిపట్ల సూరి రాసిన సంభాషణలు కుటుంబ భావోద్వేగాలను పండించడంలో కీలక పాత్ర పోషించాయి.

ఎన్టీఆర్ ఏఎన్నార్ స్థాయికి తీసుకెళ్లింది..

సూపర్ స్టార్ కృష్ణ కెరీర్‌ను ఎన్.టి. రామారావు, అక్కినేని నాగేశ్వరరావు స్థాయికి తీసుకెళ్లడంలో ఈ సినిమా కీలక పాత్ర పోషించింది. 1971లో వచ్చిన “దసరా బుల్లోడు” కలెక్షన్లను మించి వసూళ్లను సాధించి, ఆనాటి ఇండస్ట్రీ హిట్లలో ఒకటిగా నిలిచింది. “మోసగాళ్ళకి మోసగాడు” వంటి మాస్ చిత్రం తర్వాత, కుటుంబ ప్రేక్షకులను ఆకట్టుకోవడానికి “పండంటి కాపురం”ను ఎంచుకున్నారు.

కృష్ణ నటజీవితంలో తొలి గోల్డెన్ జూబ్లీ

అప్పటివరకు యన్టీఆర్ 'ఉమ్మడికుటుంబం', ఏయన్నార్ 'తోడికోడళ్ళు' వంటి కుటుంబ కథా చిత్రాలు రాజ్యమేలుతున్న కాలంలో, మాస్ ఇమేజ్ ఉన్న కృష్ణ సెంటిమెంట్ కథతో వచ్చి అనూహ్య విజయాన్ని సాధించారు. ఈ సినిమా కృష్ణ నటజీవితంలో తొలి గోల్డెన్ జూబ్లీ సినిమాగా చరిత్ర సృష్టించింది. ఈ చిత్రం తొలి విడుదలలో 25 ప్రింట్లతో ప్రారంభమై, తర్వాత 31 ప్రింట్లకు పెరిగింది. ఇది 27 కేంద్రాల్లో 100 రోజులు, 6 కేంద్రాల్లో జూబ్లీ, 3 కేంద్రాల్లో ఒక సంవత్సరం పాటు విజయవంతంగా ప్రదర్శించారు.

జయసుధకు నటిగా లైఫ్ ఇచ్చిన సినిమా

పండంటి కాపురం సినిమాతో 'సుజాత' అనే పేరుతో పరిచయమైన నటి, తర్వాత కాలంలో సహజనటి జయసుధగా టాలీవుడ్‌లో తిరుగులేని స్థానాన్ని సంపాదించుకున్నారు. జయసుధ మాత్రమే కాదు చైల్డ్ ఆర్టిస్ట్‌గా 'నరేష్ కుమార్' అనే పేరుతో నరేష్ ఈ సినిమాలో నటించారు. ఆయన తర్వాత కాలంలో హీరోగా, క్యారెక్టర్ ఆర్టిస్ట్‌గా రాణించారు.

ఈ సినిమా కథాబలం వల్ల తమిళంలో జయశంకర్ హీరోగా 'అన్బు సహోదరగల్' పేరుతోనూ (ఇందులోనూ ఎస్వీఆర్ నటించారు), హిందీలో ఆదుర్తి సుబ్బారావు దర్శకత్వంలో రాజేంద్రకుమార్‌తో 'సున్హేరా సన్సార్' పేరుతో రీమేక్ అయి అన్ని భాషల్లోనూ ఘనవిజయం సాధించింది.

ప్లస్ పాయింట్స్:

నటీనటులందరి అత్యుత్తమ నటన

గుండెలను పిండేసే కుటుంబ భావోద్వేగాలు - అనుబంధాలు

ఎస్.పి. కోదండపాణి అద్భుతమైన సంగీతం - హిట్ పాటలు

పి. లక్ష్మీదీపక్ అద్భుతమైన దర్శకత్వ ప్రతిభ

మైనస్ పాయింట్స్:

నేటి తరం లెక్కల ప్రకారం కథలో కొంత పాతకాలపు సెంటిమెంట్ డ్రామా ఎక్కువగా అనిపించవచ్చు. ఇక ఫైనల్ గా చెప్పాలంటే.. తెలుగు సినిమా చరిత్రలో 'పండంటి కాపురం' ఒక ఆణిముత్యం. సమిష్టి కుటుంబ వ్యవస్థలోని గొప్పతనాన్ని, అనుబంధాల విలువను చాటిచెప్పిన ఈ చిత్రం ఎప్పటికీ నిలిచిపోతుంది. కృష్ణ కెరీర్‌లో మాత్రమే కాకుండా, తెలుగు ఫ్యామిలీ డ్రామా చిత్రాలలో ఇది ఒక నభూతో న భవిష్యత్ అని చెప్పవచ్చు.

Pahalgam Love Story Review: 'పహల్‌గామ్ లవ్ స్టోరీ' మూవీ రివ్యూ..లవ్ స్టోరీలో దేశభక్తి

Tirumala Dornala — Fri, 21 Aug 2026 13:24:22 +0530

దేశభక్తి, ప్రేమ కథ అంశాలని మిళితం చేసి తెరకెక్కనుంచి చిత్రం పహల్‌గామ్ లవ్ స్టోరీ. ఈ చిత్రం నేడు ఆగష్టు 21న ప్రేక్షకుల ముందుకు వచ్చింది. సినిమా ఎలా ఉందొ రివ్యూలో తెలుసుకుందాం.

దేశభక్తి సినిమాలు ఒకప్పుడు వరసగా వచ్చేవి. పెద్ద హీరోలు సైతం ఆ తరహా సినిమాలు చేసేవారు. అయితే ఆ తరహా కథల పట్ల బోర్ కొట్టిందో, ట్రెండ్ అయ్యిపోయిందనుకున్నారో, లేక దేశం బాగానే ఉందనుకున్నారో కానీ తగ్గించేశారు. అయితే సీనియర్ దర్శకుడు పి.ఎన్ రామచంద్రరావు మాత్రం ఇలాంటి కథతోనే తన రీఎంట్రీ ఇవ్వాలనుకున్నారు. అలా వచ్చిన సినిమానే ‘ పహల్‌గామ్ లవ్ స్టోరీ’.జాతీయ భద్రత, దేశభక్తి, నిఘా వర్గాల వ్యూహాల నేపథ్యంలో సాగే ఈ సినిమా ఎలా ఉంది. చూడదగినదేనా వంటి విషయాలు చూద్దాం.

సాగర్ (కృష్ణబాబు), చిత్ర (చిత్ర శుక్ల) ఒకరినొకరు ప్రాణంగా ప్రేమించుకుంటూంటారు. తమ ప్రయాణంలో భాగంగా కాశ్మీర్ పర్యటనకు వెళ్తారు. అక్కడ మంచు కొండల నడుమ ఫోటోలు, వీడియోలు తీసుకుంటున్న సమయంలో, వాళ్లకు తెలియకుండానే ఒక హత్య దృశ్యం కెమెరాలో రికార్డ్ అవుతుంది.

అయితే అది సాధారణ నేరం కాదు... సరిహద్దు దాటి వచ్చి మన దేశంలో పెద్ద విధ్వంసానికి ప్లాన్ చేస్తున్న ఒక ప్రమాదకరమైన ఉగ్రవాద ముఠా చేసిన హత్య. కెమెరాలోని ఆ ఫుటేజ్ బయటపడితే తమ కుట్ర బయటపడుతుందని భావించిన ఆ గ్యాంగ్, ఈ ప్రేమికులపై వేట మొదలుపెడుతుంది. చిత్రను కాపాడేందుకు సాగర్ ఆమెను ముందుగా స్వగ్రామానికి పంపించి, తాను మాత్రం ఆ ముఠా పన్నిన వలలో చిక్కుకుంటాడు. అమాయకుడైన సాగర్‌పై తీవ్రమైన నేరాలు మోపబడి, పోలీసుల దృష్టిలో అతడే ప్రధాన నిందితుడిగా మారతాడు.

మరోవైపు, ఆ ఉగ్రవాద ముఠా చిత్ర ఊరికి కూడా చేరుకుని ఆమె కుటుంబాన్ని బందీగా చేయడంతో అసలు ప్రమాదం అర్దం అవుతుంది.అప్పుడు ఆమె ఏం చేసింది. తన ప్రేమికుడిని, తన కుటుంబాన్ని చిత్ర ఎలా కాపాడుకుంది? తనపై పడిన దేశద్రోహి అనే నిందను సాగర్ ఎలా తుడిచేసుకున్నాడు? చివరకు ఏమైందో తెలియాలంటే సినిమా చూడాల్సిందే.

స్క్రీన్‌ప్లే పరంగా సినిమా ఓ థ్రిల్లర్ డిజైన్ లో నడుస్తుంది.అలాగే ప్రేమ, కాశ్మీర్ ట్రిప్, ఫొటోగ్రఫీ, ఆ తర్వాత అనుకోకుండా మర్డర్ క్యాప్చర్ కావడం.. ఇలా ఒక సంఘటన నుంచి మరో సంఘటనకు వెళ్లే విధానం ఆసక్తిని పెంచుతుంది. ముఖ్యంగా ప్రేమకథ నుంచి ఒక్కసారిగా ప్రమాదంలోకి కథ మారే పాయింట్ మంచి స్క్రీన్‌ప్లే టర్న్.

ఇక్కడ కెమెరా ఒక ‘ప్లాట్ డివైస్’గా పనిచేయడం ఇంట్రస్టింగ్ గా ఉంటుంది. అదే కెమెరా మొదట ప్రేమ జ్ఞాపకాలను రికార్డ్ చేస్తుంది. తర్వాత ఉగ్రవాదుల వేటకు కారణమవుతుంది. చివరికి నిజాన్ని బయటపెట్టే కీలక ఆధారంగా మారుతుంది. ఈ కనెక్టింగ్ థ్రెడ్ స్క్రీన్‌ప్లేకు మంచి బేస్ ఇచ్చింది.

కానీ సెకండ్ హాఫ్‌లో స్క్రీన్‌ప్లే కొంత పరుగు పెడుతుంది. హీరోపై తప్పుడు కేసులు, హీరోయిన్ హీరోను వెతుక్కుంటూ వెళ్లడం, ఉగ్రవాదుల వేట..వీటితో ఇంట్రస్టింగ్ గా నడుస్తుంది. అయితే ఈ ట్రాక్‌లలో మరిన్ని ట్విస్టులు, రివర్సల్స్ ఉంటే ఉత్కంఠ మరింత పెరిగేది. ప్రేక్షకుడికి సమాచారం ముందుగానే ఎక్కువగా తెలిసిపోవడం వల్ల కొన్ని సందర్భాల్లో సస్పెన్స్ తగ్గినట్లు అనిపించింది.

హీరో-విలన్ క్యాట్ అండ్ మౌస్ గేమ్ కూడా మరింత బలంగా ఉండాల్సింది. విలన్ ఒక అడుగు వేస్తే హీరో దాన్ని తెలివితో ఎదుర్కోవడం, హీరో వేసిన ప్లాన్‌ను విలన్ ఊహించడం.. ఇలా ఇద్దరి మధ్య మైండ్ గేమ్ పెరిగి ఉంటే క్లైమాక్స్‌కు మంచి బిల్డ్-అప్ వచ్చేది.

అయితే హీరోయిన్ పాత్రలో మాత్రం స్క్రీన్‌ప్లే ఒక మంచి మార్పును తీసుకొచ్చింది. మొదట ప్రేమకథలో భాగంగా కనిపించే చిత్ర.. తర్వాత పరిస్థితులు మారినప్పుడు తానే యాక్షన్ తీసుకుని సాగర్‌ను వెతుక్కుంటూ వెళ్లడం కథకు ఎమోషనల్ డ్రైవ్ ఇస్తుంది.

టెక్నికల్ గా ఈ సినిమా కు ఏది ఎంతవరకూ అవసరమో అన్నట్లుగా ఉంది. కాశ్మీర్ లొకేషన్స్ ని కెమెరా అందంగా చిత్రీకరించింది. ప్రొడక్షన్ వాల్యూస్ బాగున్నాయి. విఎఫ్ ఎక్స్ వర్క్ చాలా వరకూ సినిమాకు మ్యాచ్ చేసుకుంటూ వెళ్లింది. ఎక్కడా తేడా లేకుండా కలిసిపోయింది.

ప్లస్ లు :

కాశ్మీర్ అందాలు

నేచురల్ నేరేషన్ , ట్విస్ట్ లు

హీరోయిన్ ఎమోషన్ యాక్షన్

మైనస్ లు:

క్లైమాక్స్

కమర్షియల్ ఎలిమెంట్స్ తగ్గటం

‘పహల్‌గామ్ లవ్ స్టోరీ’ అనేది ఒక స్పష్టమైన ఆలోచనతో, మంచి ఉద్దేశంతో తెరకెక్కిన సస్పెన్స్ పేట్రియాటిక్ థ్రిల్లర్. కథనంలో అక్కడక్కడా కొన్ని లోపాలు ఉన్నప్పటికీ... కాశ్మీర్ అందాలు, థ్రిల్లింగ్ ఎలిమెంట్స్, దేశభక్తి కోణం కోసం ఈ చిత్రాన్ని వీకెండ్‌లో ఒకసారి హ్యాపీగా చూడవచ్చు.

రేటింగ్: 2.75/5

Maremma Movie Review: మారెమ్మ మూవీ రివ్యూ.. రవితేజ తమ్ముడి కొడుకు హీరోగా ఎంట్రీ సినిమా ఎలా ఉందంటే?

Aithagoni Raju — Thu, 10 Sep 2026 06:32:25 +0530

రవితేజ తమ్ముడి కొడుకు మాధవ్‌ హీరోగా పరిచయం అవుతూ నటించిన `మారెమ్మ` మూవీ గురువారం విడుదలైంది. కానీ ముందుగానే ప్రీమియర్స్ ప్రదర్శించారు. మరి సినిమా ఎలా ఉందంటే?

మాస్‌ మహారాజా రవితేజ తమ్ముడు రఘు కొడుకు మాధవ్‌ భూపతిరాజు హీరోగా పరిచయం అవుతూ `మారెమ్మ` చిత్రంలో నటించాడు. దీపా బాలు హీరోయిన్‌గా తెలుగు తెరకు పరిచయం అవుతుంది. ఈ మూవీకి మంచాల నాగరాజు దర్శకుడు. మోక్ష ఆర్ట్స్ పతాకంపై మయూర్‌ రెడ్డి బండారు నిర్మించారు. ఇందులో వికాస్‌ వశిష్ట, వినోద్‌ కుమార్‌, వీఎస్‌ రూపాలక్ష్మి, దయానంద్‌ రెడ్డి వంటి వారు ఇతర పాత్రలు పోషిస్తున్నారు. ఇది నేడు గురువారం(సెప్టెంబర్‌ 10)న విడుదలయ్యింది. కానీ ముందుగానే బుధవారం రాత్రి పెయిడ్‌ ప్రీమియర్స్ ప్రదర్శించారు. మరి వీటికి ఎలాంటి రెస్పాన్స్ వచ్చింది? మూవీ ఎలా ఉందనేది రివ్యూలో తెలుసుకుందాం.

వరంగల్‌లోని మహిషాపురం అనే గ్రామంలో గత్తర వచ్చి చాలా మంది జనం రోగాలబారినపడతారు. అదే సమయంలో వర్షాలు, వరదలతో ఊరంతా వల్లకాడు అవుతుంది. ఆ సమయంలోనే ఊరి ప్రజలకు మారెమ్మ విగ్రహం దొరుకుతుంది. ఆమెని గ్రామ దేవతగా భావించి పూజలు చేస్తారు. అమ్మవారికి దున్మపోతుని బలివ్వడంతో గత్తర పోతుంది. వరదలు తగ్గిపోతాయి. ప్రజలు సంతోషంగా ఉంటారు. ఈ క్రమంలోనే ఒంటికన్ను పూజారి ఊర్లో దున్నపోతు జన్మిస్తుందని, దాన్ని బాగా చూసుకోవాలని వచ్చే పదేళ్లకి అమ్మవారికి బలి ఇవ్వాలని చెబుతాడు. ఆ దున్నపోతుని పెంచే బాధ్యత కర్ణి(మాధవ్‌) కి అప్పగిస్తారు. ఆ దున్నపోతుకి మారెమ్మ అనే పేరు పెడతారు. ఊర్లో ఏ చెడు జరిగినా, ఎవరైనా చెడుగా ప్రవర్తించినా మారెమ్మకి కోపం వస్తుంది. వారి అంతు చూస్తుంది. అయితే జలేంధర్‌(వికాస్‌ వశిష్ట) మాత్రం మారెమ్మపై పగపెంచుకుంటాడు. దాన్ని చంపేయాలనుకుంటాడు. ఈ క్రమంలో దాన్ని చంపేందుకు ఒక మాంత్రికురాలు వద్దకు వెళ్తాడు. దానికి తాయత్తు కడతాడు. మరోవైపు అమ్మవారి జాతరకి ఊరంత సన్నద్ధమవుతుంది. జాతరకు మరో నాలుగు రోజులే ఉంటుంది. జాతరకి దున్నపోతుని బలివ్వాల్సి ఉంటుంది. ఈ క్రమంలో ఉన్నట్నుంచి మారెమ్మ కనిపించదు. మరి అది ఎటుపోయింది. ఊర్లో జరిగే సంఘటనలకు కారణం ఎవరు? మారెమ్మని పెంచిన కర్ణి ఏం చేశాడు? ఈ ఏడాది జాతర సవ్యంగా జరిగిందా? లేదా? ఈ క్రమంలో ఎలాంటి ఆశ్చర్యకరమైన సంఘటనలు చోటు చేసుకున్నాయి? ఊరి ప్రజల పరిస్థితేంటి? మారెమ్మ కోసం కర్ణి చేసిన పోరాటమేంటి? తన మరదలు(దీపా బాలు)తో ఆయన ప్రేమాయణం ఎలా సాగిందనేది మిగిలిన కథ.

గ్రామ దేవతలు, అమ్మోరుని బేస్‌ చేసుకొని ఆనాటిగా సినిమాలు అదపాదడపా వస్తూనే ఉన్నాయి. ఆకట్టుకుంటున్నాయి. ఇటీవల కూడా హర్రర్‌, డివోషనల్‌ ఎలిమెంట్లతో మూవీస్‌ వస్తున్నాయి. అందులో భాగంగా మారెమ్మ అనే గ్రామ దేవతకి సంబంధించిన కథతో ఈ `మారెమ్మ` మూవీని రూపొందించారు. ఊరికి గత్తర వస్తే.. మారెమ్మ అమ్మవారు ఎలా కాపాడుకున్నారు? ఆమెకి దున్నపోతు బలి ఇవ్వడం, ఆ దున్నపోతుని హీరో పెంచడం, దానితో మంచి అనుబంధం ఏర్పడటం వంటి అంశాలను బేస్‌ చేసుకొని ఈ మూవీని తెరకెక్కించారు. ప్రారంభంలో బ్యాక్‌ స్టోరీ చెప్పి మూవీపై ఆసక్తిని పెంచారు. దున్నపోతు జన్మించడం వరకు కథ ఇంట్రెస్టింగ్‌గా అనిపిస్తుంది. ఆ తర్వాత రెగ్యూలర్‌గా సాగుతుంది. దున్నపోతు ఊర్లో రచ్చ చేయడం, దాన్ని మాధవ్‌ పెంచడం, మరోవైపు తన మరదలితో ప్రేమాయణం నడిపించడం వంటి సీన్లతో రన్‌ అవుతుంది. విలేజ్‌లోనూ కొంత కమర్షియల్‌ యాంగిల్‌ పెట్టారు. అది ఏమాత్రం సెట్‌ కాలేదు. వెళ్లే కథకి, హీరో లవ్‌ ట్రాక్‌ బలవంతంగా ఇరికించినట్టుగానే ఉంటుంది. మారెమ్మపై విలన్‌ కుట్ర చేయడం నుంచి కథ సీరియస్‌గా మారుతుంది. థ్రిల్లర్‌ జోన్‌లోకి వెళ్తుంది. కానీ మారెమ్మ శత్రువులను గుర్తించి వారిపై ఎటాక్‌ చేయడం వంటి సీన్లు కొంత వరకు బాగున్నాయి. కానీ ఆ తర్వాత కథ గాడి తప్పింది. ఇంటర్వెల్‌కి వచ్చే సీన్లు ట్విస్ట్ లతో ఇంట్రెస్టింగ్‌ అనిపిస్తాయి. సెకండాఫ్‌ మొత్తం మారెమ్మని వెతకడంతోనే సరిపోతుంది. మధ్యలో అమ్మవారి ఎఫెక్ట్ లు ఇచ్చారు. మాంత్రికురాలు చేసే మాయలతో రన్‌ అవుతుంది. ఆ తర్వాత మారెమ్మ ఎటుపోయిందనే సస్పెన్స్ నెలకొంటుంది. చూసే ఆడియెన్స్ కూడా అదే ఫీల్‌ అవుతారు. క్లైమాక్స్ కొంత ఇంట్రెస్టింగ్‌ మారి రెగ్యూలర్‌ చప్పగా కన్‌ క్లూజన్‌ తీసుకుంది.

సినిమాలో ప్లస్ ఏదైనా ఉందంటే అది తెలంగాణ నేపథ్యంలో, మారెమ్మ కథని ఎంచుకోవడం. ఇక దర్శకుడు సినిమాని నడిపించిన తీరు, ఆర్టిస్ట్ లతోపాటు చాలా వరకు అన్నీ మైనస్‌గానే చెప్పాలి. కథలో బలమైన కాన్ల్ఫిక్ట్ ని బాగా ఎస్టాబ్లిష్‌ చేయలేకపోయారు. కట్టే కొట్టే తెచ్చే అనేలా మూవీని తీశారు. సినిమా మొత్తం అతుకుల బొంతలా ఉంది. ఒక సీన్‌కి, తర్వాత వచ్చే సీన్‌కి సంబంధం లేదు. సీన్లు కూడా ప్రాపర్‌గా కంప్లీట్‌ కాలేదు. సినిమా నత్తనడకనా సాగుతుంది. ఎంత సేపు అక్కడే తిరుగుతుంది. సినిమాలో మాధవ్‌ హీరో కాదు, దున్నపోతే హీరో. మాధవ్‌ది సెకండ్‌ లీడ్‌ రోల్‌ అనేలా ఉంటుంది. నటుడిగానూ ఏమాత్రం మెప్పించలేకపోయాడు. ఆయన పాత్ర నిడివి కూడా చాలా తక్కువగా ఉంది. సినిమాని నడిపించే ఒక త్రెడ్‌ ఉంటుంది. దాని చుట్టూనే ఎమోషన్స్ అల్లుకుంటాయి. కానీ ఇందులో అదే మిస్‌ అయ్యింది. ప్రేమ కథ ఏమాత్రం సెట్‌ కాలేదు, ఫన్‌ లేదు. ఎమోషన్స్ అంతకంటే లేవు. అమ్మవారి మహిమలు కూడా క్లారిటీగా చూపించలేదు. దున్నుపోతు కథ కూడా లాజిక్ లెస్‌గా ఉంది. సినిమాని నడిపించే భావోద్వేగాలు లేకపోవడం పెద్ద మైనస్‌గా చెప్పొచ్చు. వాటెంట్‌గా సీన్లు వస్తున్నట్టుగా ఉన్నాయి. సహజత్వం మిస్‌అయ్యింది. తెలంగాణ యాస ఏమాత్రం సెట్‌ కాలేదు. హీరోకి అస్సలు సెట్‌ కాలేదు. ఫస్టాఫ్‌ స్లో అంటే, సెకండాఫ్‌ కథ లేక అక్కడక్కడే తిరుగుతుంది. దీంతో బోర్‌ ఫీలింగ్‌ తెప్పిస్తుంది. ముగింపు కూడా ఏమాత్రం కిక్‌ ఇవ్వలేకపోయింది. ఏదో ముగించాలి కదా అన్నట్టుగా క్లోజ్‌ చేశారు.

కర్ణి పాత్రలో మాధవ్‌ భూపతిరాజు కొంత వరకు మెప్పించాడు. స్క్రీన్‌పై ప్రామిసింగ్‌గా ఉన్నాడు. కానీ నటుడిగా ఇంకా బెటర్ కావాల్సింది. డైలాగ్‌లు చెప్పడంలో తడబాటు కనిపిస్తుంది. నటుడిగా ఇంకా చాలా హార్డ్ వర్క్ చేయాలి. ఎక్స్ ప్రెషన్స్ పరంగా తేలిపోయాడు. యాక్టింగ్‌ పరంగా ఆయన్ని చాలా వరకు కెమెరాలతో మ్యానేజ్‌ చేశారు. అంతేకాదు పాత్రకి పెద్దగా ప్రయారిటీ కూడా ఇవ్వలేదు. దున్నపోతు పాత్రని హీరోని చేశారు. ఇక ఆయన మరదలి పాత్రలో హీరోయిన్‌గా దీపా బాలు ఫ్రెష్ గా ఉంది. ఉన్నంతలో మెప్పించింది. అందంగానూ ఉంది. ఊరి పెద్దగా వినోద్‌ కుమార్‌ పాత్రలో ఒదిగిపోయారు. హీరో ఫ్రెండ్స్ గా మైవిలేష్‌ షో అనిల్‌, యాదమ్మ రాజు ఓకే అనిపించారు. కానీ వీరి నుంచి కామెడీని రాబట్టుకోలేకపోయారు. అలాగే సదానందం ద్వారా కూడా కామెడీ పెద్దగా వర్కౌట్‌ కాలేదు. నెగటివ్‌ రోల్ లో వికాస్‌ రెడ్డి అదరగొట్టాడు. రూపాలక్ష్మి, దయానంద్‌ రెడ్డి వంటి వారు ఉన్నంతలో ఫర్వాలేదనిపించారు.

సినిమాకి ప్రశాంత్‌ విహారి మ్యూజిక్‌ ఏమాత్రం హెల్ప్ కాలేదు. కొన్ని చోట్ల ఫర్వాలేదనిపించింది. కానీ చాలా వరకు తేలిపోయింది. ప్రశాంత్‌ అంకిరెడ్డి కెమెరా వర్క్ ఓకే అని చెప్పొచ్చు. ముప్పై ఏళ్ల నాటి లుక్‌ని తీసుకొచ్చారు. ఆర్ట్ వర్క్ కూడా చాలా బాగుంది. సాయి బాబు తలారి ఎడిటింగ్‌ పెద్ద మైనస్‌. సీన్‌ సీన్‌కి సంబంధం లేదు. సినిమా ముక్కలు ముక్కలుగా ఉంది. నిర్మాణ విలువలు సినిమా పరిధి మేరకు ఓకే. కాకపోతే పెద్దగా ఖర్చు పెట్టినట్టుగా కూడా లేదు. చాలా వరకు దులిపేసినట్టు ఉంది. క్వాలిటీ మిస్‌ అయ్యింది. దర్శకుడు మంచాల నాగరాజు ఎంచుకున్న కథ బాగానే ఉంది. కానీ దాన్ని తెరపై ఆవిష్కరించడంలో సక్సెస్‌ కాలేకపోయారు. ఆయన డైలాగ్‌ల్లో పస లేదు. స్క్రీన్‌ ప్లే పెద్ద మైనస్‌. కట్‌ పేస్ట్ లా మూవీని తీసినట్టు ఉంది. సీన్‌ సీన్‌కి సంబంధం లేకుండా ఉంది. దీంతో ఆడియెన్ మూవీతో కనెక్ట్ కాలేకపోతారు. ఎమోషన్‌ మిస్‌ కావడంతో సీన్లు వచ్చి పోతున్నాయి తప్ప, ఆ సోల్‌ కనెక్ట్ కావడం లేదు. చాలా లాజిక్స్ కూడా మిస్‌ అయ్యాయి. ఇదే ఈ మూవీకి పెద్ద మైనస్‌గా చెప్పొచ్చు. కథకి మధ్యలో లవ్‌ ట్రాక్‌, ఇతర పాత్రలకు సంబంధించిన సీన్లు, సదానందం సీన్లు ఇలా చాలా వరకు సీన్లు ఇరికించినట్టుగా ఉన్నాయి. కథ ఫ్లోని దెబ్బతీశాయి. సినిమా రూపమే మారిపోయింది. ఈ విషయంలో దర్శక నిర్మాతలు మరింత కేర్‌ తీసుకోవాల్సింది.

ఆకట్టుకోవడంలో విఫలమైన మారెమ్మ. సినిమాలో గత్తర రావడం కాదు, సినిమా చూస్తే గత్తర వచ్చేలా ఉంది. తెలంగాణ నేపథ్యంలో, అమ్మోరు నేపథ్యంలో కథలు కమర్షియల్‌గా వర్కౌట్‌ అవుతున్నాయని చేసిన ప్రయత్నంగానే ఉంది తప్ప, ఇందులో సిన్సియారిటీ, జెన్యూనిటీ ఏమాత్రం కనిపించడం లేదు.

రేటింగ్‌: 1.75

Sahaa Movie Review: సహ మూవీ రివ్యూ.. హీరోయిన్‌ గుండు కొట్టించుకోవాలా? వద్దా?

Aithagoni Raju — Fri, 04 Sep 2026 08:07:11 +0530

శివకుమార్‌ కాసారం, శ్వేత లక్ష్మణ్‌ జంటగా నటించిన మూవీ `సహ`. హీరోహీరోయిన్ల సవాళ్లతో హాట్‌ టాపిక్‌గా మారిన ఈ మూవీ నేడు విడుదలైంది. మరి తోపు సినిమా అనిపించుకుందా?

కొత్త నటులు శివకుమార్‌ కాసారం, శ్వేత లక్ష్మణ్‌ జంటగా నటించిన చిత్రం `సహ`. లైఫ్‌ ఆఫ్‌ సంజు అనేది ట్యాగ్‌ లైన్‌. నిశాంత్‌ దోటి దర్శకత్వంలో రూపొందిన ఈ చిత్రాన్ని సుమైరా స్టూడియోస్‌ పతాకంపై తేజ వెల్పుచర్ల నిర్మించారు. ఇందులో వ్రజనా పాండ్యా, మహిపాల్‌, అప్పాజీ, భారతి, మేఘన సునీల్‌, బాంబే పద్మ, కోండా రెడ్డి, హర్ష వర్ధన్‌ వంటి వారు ఇతర పాత్రలు పోషించారు. ఈ చిత్రం నేడు శుక్రవారం(సెప్టెంబర్‌ 4)న విడుదలైంది. అయితే ఈ మూవీ ప్రమోషన్స్ లో సినిమా నచ్చకపోతే ఇష్టం వచ్చినట్టు తిట్టమని హీరో, అమీర్‌ పేట సెంటర్లో గుండు గీయించుకుంటానని హీరోయిన్‌ సవాల్‌ విసిరారు. మరి వాళ్లు చెప్పింది నిజమేనా? హీరోయిన్‌ గుండు గీయించుకోవాల్సిన అవసరం లేదా? అనేది రివ్యూలో తెలుసుకుందాం.

సంజీవ్ కుమార్‌(శివ కుమార్‌ కాసారం)కి చిన్నప్పట్నుంచి సహస్త్ర(శ్వేత లక్ష్మణ్‌) అంటే ఇష్టం. చిన్నప్పట్నుంచి కలిసి చదువుకుంటారు. రోజూ ఆమెని ఇంప్రెస్‌ చేయడానికి ప్రయత్నిస్తుంటాడు. అయితే హైస్కూల్‌లో కాంపిటీషన్‌ వస్తుంది. మరో ఇద్దరు ముగ్గురు కుర్రాళ్లు ఆమె కోసం ప్రయత్నిస్తుంటారు. దీంతో ఆమెకి మొదట ప్రపోజ్‌ చేయడానికి టాస్‌ వేయగా సంజుకి మొదట ఛాన్స్ వస్తుంది. అతను ఆమెకి ప్రపోజ్‌ చేయడం కాకుండా ఏకంగా ముద్దు పెడతాడు. ఆ తర్వాత ఆమె కొడుతుంది. కానీ మరోసారి ముద్దు పెడతాడు. ఇలా ప్రయత్నాలు చేస్తున్న క్రమంలో ఎట్టకేలకు ఆమె ఇంటర్‌కి వెళ్లేసరికి లైన్‌లో పడుతుంది. ఆమెకోసం ఎంసెట్‌ని కూడా త్యాగం చేస్తాడు సంజు. బిటెక్‌ వచ్చేసరికి అతను ఎంసెట్‌ పాస్‌ కాలేకపోతాడు. దీంతో అక్కడే ఆగిపోతాడు. కానీ ఆమె కోసం దొంగ ఐడీ కార్డ్ తో రోజూ కాలేజీకి వెళ్తుంటాడు. కాలేజీలో వీరి లవ్ స్టోరీ బహిరంగం అవుతుంది. దొరికిపోతారు. ఇక పెద్దలకు తెలిస్తే ప్రాబ్లమ్ అవుతుందని తెలిసి పెళ్లి చేసుకుంటారు. సహస్త్ర ప్రెగ్నెంట్‌ అయ్యాక ఆసుపత్రిలో ఆమె తండ్రి కంటపడుతుంది. కూతురు కనిపించడంతో తండ్రి కరిగిపోతాడు. ఇంటికి తీసుకెళ్లి చేరదీస్తారు. ప్రెగ్నెంట్‌ కావడంతో తన ఇంట్లోనే ఉంచుకొంటారు. సంజీవ్‌ సెలవు రోజు వచ్చిపోతుంటాడు. కానీ ఉన్నట్టుండి సంజు జాబ్‌ పోతుంది. దీంతో లైఫ్‌ అంతా తలక్రిందులవుతుంది. అత్తారింట్లో అవమానాలు ఫేస్‌ చేయాల్సి వస్తుంది. ఈ క్రమంలో సంజు ఎలాంటి స్ట్రగుల్స్ ఫేస్‌ చేశాడు? తను సబ్‌ రిజిస్టార్ ఎలా అయ్యాడు? తన వైఫ్‌ని బాగా చూసుకున్నాడా? సంజు రోజూ తన భార్యతోనే ఫోన్‌లో ఎందుకు మాట్లాడుతున్నాడు? ఆమె ఇప్పుడు ఎక్కడుంది? సంజు లైఫ్‌ ఎలాంటి మలుపులు తీసుకుంది? చివరికి ఏం జరిగిందనేది సినిమా.

సాడ్‌ ఎండింగ్ తో ఇటీవల చాలా సినిమాలు వస్తున్నాయి. అందులో కొన్నింటిని ఆడియెన్స్ యాక్సెప్ట్ చేస్తున్నారు. `సహ` ఏ సైడ్‌ ఉంటుందనేది సస్పెన్స్. అయితే ఇదొక లవ్‌ అండ్‌ ఎమోషనల్‌ డ్రామా. టీనేజ్‌లో ప్రేమలో పడటం, పెద్దలను ఎదిరించి పెళ్లి చేసుకోవడం, ఆ తర్వాత రియాలిటీలోకి వచ్చాక కుటుంబాన్ని పోషించాలన్నప్పుడు డబ్బులు లేక, జాబ్ లేక ఇబ్బంది పడటం, ఈ క్రమంలో ఎదురయ్యే అవమానాలు, చోటు చేసుకునే సంఘటనల సమాహారమే ఈ మూవీ. ఇందులో హీరో ఒక్కో సంఘటనతో తన గతంలోకి వెళ్లి తన మెమొరీస్‌ని రీకలెక్ట్ చేసుకుంటాడు. అయితే ఈ మూవీ క్లైమాక్స్ ఏంటో ప్రారంభంలోనే అర్థమయ్యేలా ఉంది. హీరో ఫోన్‌ మాట్లాడటంతోనే ఇది మరో `7/జి బృందావన కాలనీ` అవుతుందనిపిస్తుంది. చివరికి అదే జరిగింది. అయితే ఇందులో చిన్న మార్పు ఉంటుంది. సాడ్‌ ఎండింగ్‌ ఎమోషనల్‌గా ఉంటుంది. ప్రారంభంలో రెగ్యూలర్‌ లవ్‌ ట్రాక్‌తోనే సాగుతుంది. అమ్మాయికి ప్రపోజ్‌ చేసే విషయంలో టాస్‌ వేయడం ఇంట్రెస్టింగ్‌గా అనిపిస్తుంది. ముద్దు పెట్టడం ఆకట్టుకుంటుంది. ఆ తర్వాత వెంటపడే సీన్లు, ఆమె అసహ్యించుకోవడం కామన్‌గానే సాగుతాయి. అనంతరం ఇంటర్‌ వచ్చాక ఆమె ప్రేమలో పడటం, దీన్ని ట్విస్ట్ లాగా చూపించడం ఓకే, కానీ ఆ ట్విస్ట్ వర్కౌట్‌ కాలేదు. ఊహించేలా ఉంది. సినిమాలో ప్రతిదీ ఊహించేలా సాగుతుంది. అదే సమయంలో రెగ్యూలర్‌గా సాగుతుంది. కాకపోతే ఆర్‌ఆర్‌ కొన్ని సీన్లని హైలైట్‌ చేసింది. కొంత వరకు ఆకట్టుకునేలా ఉంది. అయితే పొయెటిక్‌ సెన్స్ కోసమని ప్రతి సీన్‌ని డెటెయిలింగ్‌గా, సాగదీసినట్టుగా చూపించారు. దీంతో అవి బోరింగ్‌గా అనిపిస్తాయి. ఇప్పుడు ఆడియెన్స్ మరీ ఇలాంటి పోయెటిక్‌ ని ఎంజాయ్‌ చేయడం కష్టమే, అంత ఓపిక జనాలకు లేదు. ఇక న్నపాటి సస్పెన్స్, ట్విస్ట్ తో ఇంటర్వెల్‌ పడుతుంది. ఆ తర్వాత అది తేలిపోతుంది. వీరిద్దరు పెళ్లి చేసుకోవడం, లైఫ్‌ని ఎంజాయ్‌ చేయడం వరకు బాగానే ఉంది. ప్రెగ్నెంట్‌ తర్వాత హీరో జాబ్‌ పోవడంతో అసలు కష్టాలు స్టార్ట్ అవుతాయి. హీరో స్ట్రగుల్స్.. ఒక్కోటి రివీల్‌ అవుతుంది. దాన్ని మరీ డీటెయిలింగ్‌తో చూపించారు. దీంతో కథ ఎంత సేపు అక్కడక్కడే తిరుగుతుంది. ముందుకు అస్సలు కదలదు. సబ్‌ రిజిస్టర్‌ కార్యాలయంలో సహ అనే మరో అమ్మాయి వచ్చినప్పుడు ఆమెకి సంబంధించిన సీన్లు కొంత వరకు ఆకట్టుకుంటాయి. అనంతరం క్లైమాక్స్ ఎమోషనల్ గా ఉంటుంది. అది కూడా ఊహించినట్టే ఉంటుంది. కాకపోతే ఆయా సీన్లు కొంత వరకు హార్ట్ టచ్చింగ్‌గా ఉంటాయి.

సహ మూవీలో ప్లస్‌, మైనస్‌లు

సినిమాలో మెయిన్‌గా ఆర్టిస్ట్ ల నటన, సంగీతం, ఆర్‌ఆర్‌ బాగుంది. విజువల్స్ ఆకట్టుకుంటున్నాయి. విజువల్స్, స్క్రీన్‌ ప్లే బ్లెండ్‌ చేసిన తీరు బాగుంది. మిగిలినదంతా రొటీన్‌గానే అనిపిస్తుంది. ఎమోషనల్ సీన్లు అంతగా వర్కౌట్‌ కాలేదు. నెక్ట్స్ ఏం జరుగుతుందనేది ముందే అర్థం కావడంతో కిక్‌ పోయింది. ట్విస్ట్ లు, మలుపులు, సస్పెన్స్ అంశాలు తేలిపోయాయి. అదే ఇందులో పెద్ద మైనస్‌గా చెప్పొచ్చు. స్లోగా సాగడం, కొంత రొటీన్‌ ఫీలింగ్‌ని తెప్పిస్తుంది. సినిమాలో ఎంటర్‌టైన్‌మెంట్‌ లేదు, దీంతో డ్రై ఫీలింగ్‌ని తెప్పిస్తుంది.

సంజీవ్‌ కుమార్ గా శివకుమార్‌ కాసారం అదరగొట్టాడు. నటుడిగా మెప్పించాడు. ప్రేమికుడిగా అలరించాడు. కొత్త సినిమా అయినా బాగా చేశాడు. అనుభవం ఉన్న నటుడిగా కనిపించాడు. ఎక్స్ ప్రెషన్స్ పరంగా కొంత రెగ్యూలర్‌గా అనిపించింది. ఎమోషనల్‌ సీన్లలో అదరగొట్టాడు. ఆయన పాత్ర సాగిన తీరు బాగుంది. ఇక సహస్రగా శ్వేత లక్ష్మణ్‌ సైతం బాగా చేసింది. ఆమె కూడా కొత్త అనే ఫీలింగ్‌ లేకుండా చేసి మెప్పించింది. వీరి మధ్య కెమిస్ట్రీ బాగా వర్కౌట్‌ అయ్యింది. మరో సహస్త్రగా చేసిన వ్రజనా పాండ్య సైతం నటనతో మెప్పించింది. మిగిలిన పాత్రధారులు ఓకే అనిపించారు.

టెక్నీకల్‌గా మూవీ ఎలా ఉందంటే?

టెక్నీకల్‌గా సినిమా బాగుంది. శేఖర్‌ చంద్ర సంగీతం ఆకట్టుకుంది. ఆర్‌ఆర్‌ సినిమాకి హైలైట్‌గా నిలుస్తుంది. అదే సినిమాకి కొంత వరకు ప్రాణం పోసిందని చెప్పొచ్చు. ఎమోషనల్‌ టచ్‌ తెచ్చింది. ఇక కరుణాకర్‌ కొట్టేటి విజువల్స్ బాగున్నాయి. కలర్‌ఫుల్‌గా ఉన్నాయి. విజువల్స్ పరంగా చేసిన మ్యాజిక్‌ కూడా బాగుంది. తేజ వేల్పుచర్ల నిర్మాణ విలువలకు కొదవ లేదు. రాజీపడకుండా నిర్మించారు. నిశాంత్‌ దోటి ఎంచుకున్న కథ రెగ్యూలర్‌గానే ఉంది, కాకపోతే స్క్రీన్‌ప్లేతో మ్యాజిక్ చేసే ప్రయత్నం చేశాడు. కవితాత్మకంగా మూవీని నడిపించాలనుకున్నారు. అదే ఇందులో మైనస్‌గా చెప్పొచ్చు. అది సీరియల్‌ ఫీలింగ్ ని తెప్పిస్తుంది. అంతేకాదు ట్విస్ట్ రివీల్‌ అయ్యేలా మూవీ సాగడం పెద్ద మైనస్‌. ఇప్పుడు ఆడియెన్స్ అంత ఓపిక చూసే పరిస్థితి లేదు. ఫీల్‌గుడ్‌ ఎమోషనల్‌ మూవీ తీయాలంటే ప్రారంభం నుంచే దాన్ని ఎస్లాబ్లిష్‌ చేయాలి. ఇందులో అది మిస్‌ అయ్యింది. స్లోగా నడిపించడంతో బోర్‌ తెప్పిస్తుంది. ఎంటర్‌టైన్‌మెంట్‌ లేకపోవడం మరో పెద్ద మైనస్‌. ఆర్‌ఆర్‌, ఆర్టిస్ట్ ల నటన, అక్కడక్కడ చిన్నపాటి మలుపులు కొంత వరకు ఫర్వాలేదనిపించాయి.

స్లోగా, ఊహించేలా సాగే లవ్‌ అండ్‌ ఎమోషనల్‌ డ్రామా `సహ`. కొంత వరకు 7/జి బృందావన కాలనీని తలపిస్తుంది. హీరోహీరోయిన్లు సవాల్‌ విసిరి సినిమాపై అంచనాలు పెంచే ప్రయత్నం చేశారు. కానీ అదే ఈ మూవీకి పెద్ద మైనస్‌.

రేటింగ్‌: 2.25

Toxic Movie Review: టాక్సిక్‌ మూవీ రివ్యూ.. యష్‌, నయనతార, రుక్మిణి వసంత్‌ నటించిన సినిమా ఎలా ఉందంటే?

Aithagoni Raju — Wed, 26 Aug 2026 12:06:24 +0530

రాకింగ్‌ స్టార్‌ యష్‌ హీరోగా నటించిన లేటెస్ట్ ఫిల్మ్ `టాక్సిక్‌`. `కేజీఎఫ్‌ 2` తర్వాత యష్‌ నుంచి వస్తోన్న సినిమా ఇది. భారీ అంచనాల మధ్య ఈ బుధవారం ఈ సినిమా విడుదలైంది. మరి మూవీ ఎలా ఉందంటే?

`కేజీఎఫ్‌` చిత్రాలతో కన్నడ సినిమా రూపురేఖలు మార్చేసిన హీరో యష్‌. ఆయన ఇప్పుడు `టాక్సిక్‌` చిత్రంతో ఆడియెన్స్ ముందుకు వచ్చాడు. లేడీ డైరెక్టర్‌ గీతూ మోహన్‌ దాస్‌ దర్శకత్వంలో తెరకెక్కిన చిత్రమిది. నయనతార, రుక్మిణి వసంత్‌, కియారా అద్వానీ, హ్యూమా ఖురేషి, తారా సుతారియా హీరోయిన్లుగా నటించారు. యష్‌ ద్విపాత్రాభినయం చేయడం విశేషం. కేవీఎన్‌ ప్రొడక్షన్స్, మాంస్టర్‌ మైండ్ క్రియేషన్స్ పతాకాలపై వెంకట్‌ కే నారాయణ, యష్‌ సంయుక్తంగా నిర్మించారు. ఇప్పటికే విడుదలైన పాటలు, టీజర్‌, ట్రైలర్ సినిమాపై భారీ అంచనాలు నెలకొన్నాయి. ఏ సర్టిఫికెట్‌ పొందడంతో 18ఏళ్లు నిండిన వాళ్లే ఈ సినిమా చూడాలి. చాలా వాయిలెన్స్, రొమాన్స్ తో కూడిన ఈ మూవీ నేడు బుధవారం(ఆగస్ట్ 26న) విడుదలైంది. మరి ఈ చిత్రం ఎలా ఉంది? యష్‌ ఎలా చేశారు? అనేది రివ్యూలో తెలుసుకుందాం.

1947లో దేశానికి స్వాతంత్య్రం వస్తుంది, కానీ గోవాకి రాదు. ఫోర్చుగ్రీస్‌ వారి ఆధీనంలో ఉంటుంది. అక్కడ మాఫియాదే రాజ్యం. దాన్ని చేజిక్కుంచుకునేందుకు అనేక మంది పోటీపడుతుంటారు. అయితే సాల్వడర్‌(డర్రెల్‌ డి సిల్వ) దాన్ని శాసిస్తుంటాడు. ఆయనే చీకటి ప్రపంచానికి రాజు లాంటివాడు. చిన్నప్పట్నుంచి తన అక్క గంగ(నయనతార)తో అనాథగా పెరుగుతాడు రాయా(యష్‌). ఎన్నో బాధలు పడుతూ ఈ చీకటి ప్రపంచంలోకి వస్తారు. ఒకరి తర్వాత ఒకరిని అంతం చేసుకుంటూ చివరికి సాల్వడర్‌కి దగ్గరవుతాడు. తన నాన్నకి గతంలో ఈ సాల్వడర్‌తో రిలేషన్‌ ఉంటుంది. ఆ రిలేషన్‌ వీరిని సాల్వడర్‌కి దగ్గర చేస్తుంది. ఒకరు వేసిన దారిలో నడవడం కాదు, తానే కొత్తగా దారి వేసుకుంటాను అని చెప్పి అక్కతో కలిసి రాయా తనకంటూ ఒక సామ్రాజ్యాన్ని సృష్టించుకుంటాడు. అలా సాల్వడర్‌కి దగ్గరవుతాడు. రాయా.. సాల్వడర్‌ కూతురు రెబెక్కా(తారా సుతారియా)పై మనసు పడతాడు. ఆమె కూడా రాయాకి ఇంప్రెస్‌ అవుతుంది. ఇద్దరు ఫిజికల్‌గా కలుస్తారు. రాయాని తన అల్లుడిని చేసుకొని తన సామ్రాజ్యానికి అధిపతిని చేయాలనుకుంటాడు సాల్వడర్‌. కానీ మధ్యలో నడియా(కియారా అద్వానీ) ఎంట్రీ ఇస్తుంది. ఆమె ఒక సర్కస్‌ డాన్సర్‌. అందంలో ఆమె తర్వాతే ఎవరైనా. ఆమెకి ముగ్దుడయిన రాయా.. దగ్గరవుతాడు. ఆమె మాయలో, ప్రేమలో పడిపోతాడు. దీంతో సాల్వడర్‌ని ఎదురిస్తాడు. అంతేకాదు.. ఏకంగా రెబెక్కాతో పెళ్లి రోజే సాల్వడర్‌ని చంపేస్తాడు. సాల్వడర్‌ కీప్‌.. ఎలిజిబెత్‌(హ్యూమా ఖురేషీ) పగతీర్చుకోవాలనుకుంటుంది. అనంతరం ఎలాంటి పరిణమాలు చోటు చేసుకున్నాయి? నడియా రాయాకి ఎందుకు దూరం కావాలనుకుంటుంది? ఆమెపై రాయా కోపం ఎందుకు? నడియా కొడుకుని చూసి రాయా రియాక్షన్‌ ఏంటి? రాయా కోసం గంగ చేసిన త్యాగం ఏంటి? ఇందులో మెలిసా(రుక్మిణి వసంత్‌) పాత్ర ఏంటి? ఆమె రాయా లైఫ్‌లోకి ఎలా వచ్చింది? రాయా కొడుకు టికెట్‌(యష్‌).. రాయాపై ఎందుకు పగ తీర్చుకోవాలనుకుంటాడు? ఫైనల్‌గా కథ ఎలాంటి ముగింపు తీసుకుందనేది సినిమా.

సినిమాకి ఎంత ఖర్చు పెట్టారు? ఎంత గ్రాండియర్‌గా తీశారనేది ఆడియెన్స్ కి అవసరం లేదు. ఎంత కనెక్టింగ్‌గా తీశారు. ఎంతగా ఆకట్టుకుంది? ఆడియెన్స్ ఎంజాయ్‌ చేసేలా ఉందా? లేదా అనేదే ముఖ్యం. అలా లేకపోతే ఎన్ని వందల కోట్లు పెట్టి సినిమా తీసినా అది బూడిదలో పోసిన పన్నీరులాగే మిగిలిపోతుంది. `టాక్సిక్‌` సినిమా చూశాక అలాంటి ఫీలింగ్‌ కలగక మానదు. కథగా ఇది చాలా డెప్త్ ఉన్న స్టోరీ. కాకపోతే అది మనకు అర్థమయ్యేలా చెప్పడంలోనే తడబాటు కనిపిస్తుంది. సినిమా చాలా గ్రాండియర్‌గా ఉంది. లావిష్‌గా ఉంది. విజువల్‌ గా కనువిందు చేస్తుంది. టెక్నీకల్‌గా చాలా బ్రిలియంట్‌గా ఉంది. ఆకట్టుకుంటుంది. కానీ కథ, కథనం విషయంలోనే ఆ ఫోకస్‌ తప్పిందనిపిస్తుంది. ఇక సినిమాగా చూసినప్పుడు గోవాలో 1947లో స్టార్ట్ అవుతుంది. అక్కడ మాఫియా, ఇల్లీగల్‌ వ్యవహారాలు, మందు, కాసినో, బెట్టింగ్‌ వంటివి రాజ్యమేలుతున్న నేపథ్యంలో తాను కూడా గొప్పగా ఎదగాలని యష్‌, నయనతార కలలు కంటారు. కింద నుంచి ఒక్కొక్కరిని వేసుకుంటూ, తన స్థాయిని పెంచుకొని కింగ్‌ మేకర్‌ వద్దకు చేరుకోవడం చూపించారు. ఈ క్రమంలో వరుసగా యాక్షన్‌ సీన్లతోనే సినిమా నడుస్తుంది. ప్రారంభంలో సమాధిలో వచ్చే యాక్షన్‌ సీన్‌ మాత్రం అదిరిపోయేలా ఉంది. యష్‌ ఎంట్రీ వాహ్‌ అనిపిస్తుంది. ఎలివేషన్లు గూస్‌ బంమ్స్ తెప్పిస్తుంది. కారులో సీన్‌, అనంతరం ఆయన చేసే యాక్షన్‌ అదిరిపోయింది. ఆ తర్వాత గతంలోకి వెళ్తుంది. తాను ఎదిగిన తీరుని చూపించారు. గోవాని తమ గుప్పిట్లోకి తీసుకునే క్రమంలో వరుసగా యాక్షన్‌ సన్నివేశాలు వస్తుంటాయి. మరోవైపు కింగ్‌ మేకర్‌ కూతురుకి హీరో పడిపోవడం, ఆమెతో రొమాన్స్ ని ఎక్కువగా చూపించారు. స్టయిలీష్‌ లుక్స్, రొమాన్స్, ఇంటెన్స్ సీన్లు, ఎలివేషన్లతో కథనం రన్‌ అవుతుంది. సీన్‌ బై సీన్‌ ఫాస్ట్ ఫాస్ట్ గా వస్తూ పోతుంటాయి. అనంతరం కియారా అద్వానీతో యష్‌ ప్రేమాయణం వైపు తిరుగుతుంది. ఆయా సన్నివేశాలు కొంత వరకు ఆకట్టుకుంటాయి. యాక్షన్‌ నుంచి, ఎలివేషన్ల నుంచి రిలీఫ్‌నిస్తాయి. కాకపోతే ఆమెతోనూ రొమాన్స్ నే ఎక్కువగా చూపించారు.

ఇంటర్వెల్‌ కియారా పాత్ర చుట్టూనే కథ తిరుగుతుంది. ఇంటర్వెల్‌ కొంత వరకు ఆకట్టుకుంటుంది. నెక్ట్స్ ఏం జరుగుతుందనే క్యూరియాసిటీని, యష్‌, నయనతార, కియారా పాత్రల్లోని కీలక పరిణామాలు ఆసక్తికరంగా ఉంటాయి. కొడుకుని కాపాడుకోలేకపోవడం, యష్‌ పడే బాధ వంటివి ఎమోషనల్‌గా ఉంటాయి. సెకండాఫ్‌ అంతా వేరే కంట్రీకి షిఫ్ట్ అవుతుంది. అక్కడ మరో కింగ్‌ మేకర్‌కి సపోర్ట్ గా ఉంటాడు హీరో. కానీ ఆయన్ని కియారా పాత్ర, అతని కొడుకుకి సంబంధించిన సంఘటనలు వెంటాడుతుంటాయి. ఎవరో తనని వెంటాడుతున్న ఫీలింగ్‌లో హీరో ఉంటాడు. అయా సీన్లు థ్రిల్లర్‌ ని గుర్తు చేస్తాయి. ఇంకోవైపు రుక్మిణి వసంత్‌ పాత్ర ఎంట్రీ ఉంటుంది. ఆమె తన లైఫ్‌లోకి రావడం అనేది క్లారిటీ లేదు. ఆ తర్వాత నుంచి హీరో లైఫ్‌లో అనేక పరిణామాలు చోటు చేసుకుంటాయి. అవి ఉత్కంఠభరితంగా ఉంటాయి. అదే సమయంలో విసిగించేలా ఉంటాయి. కథ ఎటువెళ్తుందో అర్థం కాదు. క్లైమాక్స్ లెన్తీగా ఉంది. క్లైమాక్స్ ట్విస్ట్ కథ మొత్తాన్ని మార్చేస్తుంది. సినిమా మొత్తంగా సిగరేట్‌, మందు, అమ్మాయిలతో రొమాన్స్ లేదంటే యాక్షన్‌.. వీటితోనే నడుస్తుంది. రెండు మూడు చోట్ల మాత్రమే కొంత కామెడీ, కియారా పాత్రకి సంబంధించిన ఎమోషనల్‌ సీన్లు మాత్రమే ఆకట్టుకునేలా ఉంటాయి.

సినిమా విజువల్‌గా గ్రాండియర్‌గా ఉంది. వీఎఫ్‌ఎక్స్ అదిరిపోయాయి. నిర్మాణ విలువలు బాగున్నాయి. అమ్మాయిలకు సంబంధించిన యష్‌ చెప్పే డైలాగులు నవ్విస్తాయి. ప్రేమకి సంబంధించిన సీన్లు ఆకట్టుకుంటాయి. కొడుక్కి సంబంధించిన సీన్లు ఎమోషనల్‌కి గురి చేస్తాయి. బీజీఎం అదిరిపోయింది. యష్‌ నటన పీక్‌లో చూడొచ్చు. ఇవి సినిమాకి ప్లస్‌గా నిలుస్తాయి.

ఇక మైనస్‌లు చెప్పాల్సి వస్తే.. కథ, కథనంలో క్లారిటీ లేదు. ఏం చెప్పాలనుకున్నారో, ఏం చూపించాలనుకున్నారో క్లారిటీ మిస్‌ అయ్యింది. సాధారణ ఆడియెన్స్ కి కథ అర్థమయ్యేలా లేదు. సినిమాలో ఎమోషనల్‌, సోల్‌ అంతగా పండలేదు. దీంతో ఆడియెన్స్ మూవీతో కనెక్ట్ కాలేకపోతారు. దీని కారణంగా ప్రతి సీన్‌ వచ్చిపోతుంటాయి తప్ప, వాటితో రిలేట్‌ కాలేకపోతాం. ధూమపానం, మందు తీసుకోవడం, రొమాన్స్ అతిగా ఉంది. ఎలివేషన్లు, యాక్షన్‌ కూడా ఓవర్‌ డోస్‌ అయ్యింది. ఏది ఎందుకు వస్తుందో అర్థం కానట్టుగా ఉంది. నిడివి మరో మైనస్‌. క్లైమాక్స్ కొంత విసిగించినా, ఎమోషనల్‌ సీన్లతో కొంత రిలీఫ్‌ నిచ్చారని చెప్పొచ్చు.

రాయాగా యష్‌ నటన ఇందులో పీక్‌లో చూడొచ్చు. స్ట్రగుల్స్ పడే వ్యక్తిగా, డేరింగ్‌ పర్సన్‌గా, అక్క విషయంలో ఎమోషనల్‌గా, అమ్మాయి విషయంలో ప్రేమికుడిగా, తండ్రిగా ఇలా విభిన్నమైన భావోద్వేగాలను తెరపై ఆయన ఆవిష్కరించిన తీరు బాగుంది. అదే సినిమాకి హైలైట్‌గా నిలుస్తుంది. యష్‌ పాత్ర ముందు అందరు తేలిపోతారని చెప్పొచ్చు. ఎలివేషన్లలో, యాటిట్యూడ్‌ చూపించే విషయంలో, యాక్షన్‌ సీన్లలోనూ తన బెస్ట్ ఇచ్చాడు యష్‌. దీనికితోడు యంగ్‌ యష్‌గానూ కనిపించి అలరించాడు. మొత్తంగా ఆయన విశ్వరూపం చూపించాడు. ఇక నడియాగా కియారా సెటిల్డ్ గా చేసింది. గ్లామర్‌తో కనువిందు చేసింది. ఆమె పాత్ర హార్ట్ ని టచ్‌ చేస్తుంది. యష్‌ అక్క గంగ పాత్రలో నయనతార ఫర్వాలేదనిపించింది. కాకపోతే ఆమె లుక్స్ యాక్షన్‌.. రియాలిటీగా లేదు. ఎలిజబెత్‌ గా హ్యూమా ఖురేషి ఉన్నంతలో మెప్పించింది. పాత్రలో జీవించింది. యష్‌ భార్యగా రుక్మిణి పాత్ర ఓకే అనిపిస్తుంది. అదే సమయంలో ఆమె పాత్రలో క్లారిటీ మిస్‌ అయ్యింది. రెబెక్కా పాత్రలో తారా సుతారియా బాగా చేసింది. గ్లామర్‌ ట్రీట్‌ ఇచ్చింది.తనలో డిఫరెంట్‌ షేడ్స్ చూపించింది. మిగిలిన పాత్రధారులు ఓకే అనిపించారు. నటులు తమ బెస్ట్ ఇచ్చారు.

టాక్సిక్‌ మూవీ టెక్నీకల్‌గా చాలా సాలిడ్‌గా ఉంది. రాజీవ్‌ రవి విజువల్స్ అయితే కనువిందు చేస్తాయి. ప్రతి ఫ్రేమ్‌ ఆకట్టుకుంటుంది. రిచ్‌గా ఉంటుంది. ఆర్ట్‌ వర్క్ అదిరిపోయింది. ఉజ్వల్‌ కులకర్ణి ఎడిటింగ్‌ వీక్‌గా ఉంది. చాలా సీన్లు లేపేయోచ్చు. కథనం స్పీడ్‌ చేస్తే బాగుండేది. లెన్త్ కూడా సమస్యనే. మ్యూజిక్‌ బాగుంది. తాబాయి పాట అదిరిపోయింది. మిగిలిన పాటలు ఓకే అనిపిస్తాయి. రవి బస్రూర్‌ బీజీఎం అదిరిపోయింది. కొత్తగా ఉంది. చాలా వరకు యాక్షన్‌ సీన్లని ఎలివేట్‌ చేసింది. హీరోకి అదిరిపోయే ఎలివేషన్లని ఇచ్చింది. సీన్లల్లో అంత మ్యాటర్‌ లేకపోవడంతో అవి తేలిపోయాయి. నిర్మాత వెంకట్‌ కే నారాయణ, యష్‌ కలిసి సినిమాని చాలా రిచ్‌గా నిర్మించారు. నిర్మాణం విషయంలో రాజీపడకుండా చేశారు. దర్శకురాలు గీతూ మోహన్‌ దాస్‌ కథలోనే అంత మ్యాటర్‌ లేదు. మరీ సంక్లిష్టంగా రాసుకున్నారు. అది ఆడియెన్స్ కి కనెక్ట్ చేయడంలో తడబాటు కనిపిస్తుంది. తెలుగు డబ్బింగ్‌ కూడా బాగా లేదు. గూగుల్‌ ట్రాన్స్ లేషన్‌ కనిపిస్తుంది. ఆ విషయంలో మేకర్స్ మరింత జాగ్రత్త పడాల్సింది. సినిమాలో చాలా వరకు సాగదీత ఎక్కువైంది. మొత్తంగా చూస్తే మూవీని చాలా స్టయిలీష్‌గా తీశారు. ఎలివేషన్లకి తగ్గట్టుగా స్టయిలీష్‌గా సినిమా ఉండటం కొంత వరకు చూడగలిగేలా ఉంటుంది. యష్‌ అభిమానులు ఎంజాయ్‌ చేసేలా ఉంటుంది.

గ్రాండియర్‌గా యాక్షన్‌ సీన్లు, ఎలివేషన్లు, రొమాన్స్, స్టయిలీష్‌ మూవీని తీయడంపై పెట్టిన ఫోకస్‌.. కథ, కథనంపై పెడితే బాగుండేది. సినిమాగా నిరాశ తప్పదు. నటుడిగా యష్‌ ఆకట్టుకుంటాడు. విజువల్స్ కనువిందు చేస్తాయి.

రేటింగ్‌: 2

Ramba Oorvasi Menaka Movie Review: రంభ ఊర్వశి మేనక మూవీ రివ్యూ.. అల్లరి నరేష్‌ కామెడీ వర్కౌట్‌ అయ్యిందా?

Aithagoni Raju — Fri, 04 Sep 2026 13:10:15 +0530

అల్లరి నరేష్‌ తాజాగా `రంభ ఊర్వశి మేనక` అనే సినిమాతో ఆడియెన్స్ ముందుకు వచ్చాడు. మళ్లీ తన కామెడీ జోనర్‌లో చేసిన చిత్రమిది. మరి మరోసారి ఆయన హిట్ అందుకున్నాడా? ఈ మూవీ ఎలా ఉందంటే?

ఒకప్పుడు కామెడీ సినిమాలతో వరుస విజయాలు అందుకున్నాడు అల్లరి నరేష్‌. ఏడాదికి మూడు నాలుగు సినిమాలు చేసి ఆకట్టుకున్నాడు. స్టార్‌ ఇమేజ్‌ని సొంతం చేసుకున్నాడు. అయితే కామెడీ సినిమాలు ఆడకపోవడంతో యాక్షన్‌ థ్రిల్లర్స్ వైపు టర్న్ తీసుకున్నాడు. ఇవి ఫర్వాలేదనిపించాయి. కానీ ఇటీవల అవి కూడా ఆడటం లేదు. దీంతో మళ్లీ తన కామెడీ జోనర్‌లోకి వచ్చాడు. ఇప్పుడు `రంభ ఊర్వశి మేనక` అనే చిత్రంలో నటించాడు. సురభి, రాశీ సింగ్‌, విష్ణు ప్రియా భీమనేని, ప్రిషా సింగ్‌ హీరోయిన్లుగా నటించారు. వెన్నెల కిశోర్‌, నరేష్‌ వీకే, శ్రీనివాస్‌ రెడ్డి వంటి వారు ఇతర పాత్రలు పోషిస్తున్నారు. చంద్రమోహన్‌ చింతాడ దర్శకత్వం వహించారు. హాస్య మూవీస్‌, అన్నపూర్ణ స్టూడియోస్‌ పతాకాలపై రాజేష్‌ దండా, నిమ్మకాయల ప్రసాద్‌ నిర్మించారు. ఈ మూవీ నేడు శుక్రవారం(సెప్టెంబర్‌ 4న) విడుదలైంది. మరి మూవీ ఎలా ఉంది? అల్లరి నరేష్‌కి హిట్‌ పడిందా? అనేది రివ్యూలో తెలుసుకుందాం.

సూరి(అల్లరి నరేష్‌)కి చిన్నప్పట్నుంచి హీరో కావాలనే కోరిక ఉంటుంది. అది వాళ్ల నాన్న కోరిక. ఆయన హీరో కాలేక రంభ ఊర్వశి మేనకు డ్రామా కంపెనీ పెట్టి నాటకాలు వేస్తుంటాడు. దీంతో తాను హీరో అవ్వాలనుకుంటాడు సూరి. అయితే వాళ్ల ఇంట్లో వంశపారపర్యం ఒక మ్యాజిక్‌ బుక్ ఉంటుంది. దాంట్లో సరైన ముగ్గు వేస్తే రంభ ఊర్వశి మేనకు దిగి వస్తారని, వాళ్లు కోరిన కోరికలు తీరుస్తారని అంటారు. ఎవరికీ అది కలిసి రాలేదు. దీంతో సూరి దాన్ని నమ్ముకొని 25ఏళ్లుగా ముగ్గులు వేస్తుంటాడు. కానీ అది ఓపెన్‌ కాదు. దాని పేరు చెప్పి ఊర్లో అప్పులు చేస్తాడు. అప్పుల వాళ్లు రోజూ ఇంటిమీదికొస్తుంటారు. వారికి ఏదో మాయ మాటలు చెప్పి కాలం వెళ్లదీస్తుంటారు. ఇంతలో వాళ్ల ఊరిలోకి తన చిన్నప్పటి లవర్‌ చిన్ని(సురభి) వస్తుంది. ఆమె అనాథ ఆశ్రమాన్ని నిర్వహిస్తుంటుంది. కానీ సూరి కోసమే వస్తుంది. అయితే వాళ్ల నాన్న(గోపరాజు రమణ)కి సూరి అప్పుల విషయం తెలిసి పెళ్లికి నో చెబుతాడు. నెల రోజుల్లో అప్పులన్నీ తీరిస్తే అమ్మాయిని ఇస్తానని కండీషన్‌ పెడతాడు. నెల కాదు ఐదు రోజుల్లో తీరుస్తానని సవాల్‌ విసురుతాడు సూరి. మళ్లీ రంభ ఊర్వశి మేనక విగ్రహాల వద్దకు వెళ్లి చివరి ప్రయత్నంగా మ్యాజిక్‌ బుక్‌పై ముగ్గువేయగా అది వర్కౌట్‌ అవుతుంది. నిజంగానే రంభ(రాశిసింగ్‌), ఊర్వశి(విష్ణు ప్రియా), మేనక(ప్రిషా సింగ్‌) వస్తారు. కానీ ఆ కంగారులో తన కోరికలు కోరలేకపోతాడు సూరి. రేపు రమ్మని చెప్పగా, వాళ్లు రేపు వస్తారు, కానీ ఈ విషయం ఇంద్రుడికి తెలిసి దేవకన్యలకు పవర్స్ ఉండే చేతి కడియాలు లేకుండా పంపిస్తాడు. దీంతో వాళ్లు సూరి కోరికలు తీర్చలేకపోతారు. తమకి పవర్స్ రావాలంటే చైత్ర పౌర్ణమి వరకు ఆగాల్సి వస్తుంది. మరోవైపు సూరి అమ్మ అరుదైన జబ్బుతో ఆసుపత్రి పాలవుతుంది. ఆమెని బతకాలంటే 60లక్షలు ఖర్చు అవుతుంది. దేవకన్యలు కోరికలు తీర్చలేరు, మరోవైపు అమ్మ ఆసుపత్రిలో ఉంటుంది. ఇంకోవైపు అప్పుల వాళ్ల బాధలు ఎక్కువవుతాయి. మరి సూరి ఏం చేశాడు? అప్పులవాళ్లంతా ఒక్కొక్కరుగా ఎందుకు చనిపోయారు? సూరి అమ్మ బతికిందా? సూరి కోరికలు తీరాయా? ఇంద్రుడుతో సూరికి గొడవేంటి? అనేది మిగిలిన కథ.

ఇంద్రలోకం, దేవలోకం, యమలోకంతో ముడిపెడుతూ కామెడీ ప్రధానంగా చాలా సినిమాలు వచ్చాయి. కాకపోతే ఇది చాలా కాలం తర్వాత వచ్చిన మూవీ అని చెప్పొచ్చు. దేవకన్యలు రంభ ఊర్వశి మేనకలతో హీరో పాత్రకి లింక్‌ చేస్తూ కామెడీ ప్రధానంగా ఈ మూవీని రూపొందించారు. అల్లరి నరేష్‌ అంటే కామెడీ సినిమాలకు పెట్టింది పేరు. ఈ మధ్య గ్యాప్‌ వచ్చిన నేపథ్యంలో మళ్లీ అలాంటి జోనర్‌లో ఈ మూవీ చేశాడు. చేస్తే చేశాడు కానీ, నేటి ట్రెండ్‌కి తగ్గట్టుగా కామెడీ ఉండాలి, కానీ ఆయన తన ఇరవై ఏళ్ల క్రితం స్టయిల్‌ కామెడీతోనే రావడం, అదే ఫార్మాట్‌లో ఈ మూవీ చేయడం గమనార్హం. అల్లరి నరేష్‌.. ఏం చేసినా అలానే ఉంటాయా? లేక ఆయన అప్‌ డేట్‌ కాలేకపోతున్నారా? అనే సందేహం ఈ మూవీ చూశాక కలుగుతుంది. మళ్లీ ఇరవై ఏళ్లనాటి తన సినిమాలు చూసినట్టుగానే ఈ చిత్రం ఉంది. అదేస్టయిల్‌ కామెడీ, అదే స్టయిల్‌ యాక్టింగ్‌ తో ఈ సినిమాని తెరకెక్కించడం గమనార్హం. సినిమా ప్రారంభం నుంచి అల్లరి నరేష్‌ మార్క్ రొటీన్‌ కామెడీ డైలాగ్‌లు, సీన్లతో సాగుతుంది. సీన్లలో మ్యాటర్‌ లేదు, డైలాగ్‌ల్లో కామెడీ లేదు. పైగా నాయిస్‌ ఎక్కువగా ఉంటుంది. దీంతో నవ్వు రాదు కదా, చిరాకు తెప్పిస్తుంది. ఒక్కో సీన్‌ వచ్చిపోతుంటాయి. అల్లరి నరేష్‌, వీకే నరేష్‌, శ్రీనివాస్‌ రెడ్డి ముగ్గురు ఇందులో ఫ్రెండ్స్. వాళ్లు తాము పెద్ద వాళ్లం కావాలనే కలల్లో ఉంటారు. ఈ ముగ్గురు చేసే అల్లరి చిల్లర పనులు ఫన్నీగా ఉన్నా, కామెడీ పండలేదు. దీంతో డ్రైగా వెళ్తుంది. అదే సమయంలో చాలా సన్నివేశాలు సిల్లీగా ఉంటాయి. సీన్లలో క్వాలిటీ లేదు. అంతా ఊహించినట్టుగా, మరోవైపు రొటీన్‌గా నడుస్తుంటాయి. ఇంటర్వెల్‌ ట్విస్ట్ కొంత ఆకట్టుకుంటుంది. ఆ తర్వాత మళ్లీ అదే రొటీన్‌గా మారుతుంది. సెకండాఫ్‌ సైతం అదే నాయిస్‌తో, పేలవమైన కామెడీ సీన్లతో రన్‌ అవుతుంది. దేవతలను పట్టుకొంటే చనిపోవడమనేది కొత్తగా ఉంది. కానీ అందులోనూ ఫన్‌ పండలేదు. శవాలను దాచే సన్నివేశాలు కూడా ఓవర్‌గా ఉంటాయి. విలన్‌ పాత్ర అయిన తారక్‌ పొన్నప్పతో సవాల్‌ సీన్లలోనూ పస లేదు. అయితే చివర్లో మదర్‌ సెంటిమెంట్‌కి సంబంధించిన సీన్లు కొంత వరకు ఎమోషనల్‌గా కనెక్ట్ అవుతాయి. అదే సమయంలో దేవకన్యలను అల్లరి నరేష్‌, శ్రీనివాస్‌ రెడ్డి, నరేష్‌ ముట్టుకునే సీన్‌లో వచ్చే పాటలు అలరిస్తాయి. ఇంద్రుడికి సంబంధించిన సీన్‌ కూడా ఫర్వాలేదనిపిస్తుంది. ఓవరాల్‌గా క్లైమాక్స్ ఉన్నంతలో బెటర్‌గా ఉంటుంది. మిగిలిన సినిమా మొత్తం రొటీన్‌ రొడ్డకొట్టుడు, అరిగిపోయిన ఓల్డ్ ఫార్మాట్‌లో సాగే కామెడీ మూవీగా చెప్పొచ్చు.

సూరి పాత్రలో ఎప్పటిలాగే అల్లరి నరేష్‌ నటుడిగా ఆకట్టుకున్నాడు. కానీ ఆయన పాత్రలో కామెడీ ఏమాత్రం వర్కౌట్‌ కాలేదు. ఆయన యాక్టింగ్‌ కూడా రొటీన్‌గానే అనిపిస్తుంది. కాకపోతే ఎమోషనల్‌ సీన్ లో, మదర్‌ సెంటిమెంట్‌ సీన్లలో మాత్రం ఇరగదీశాడు. అదే హైలైట్‌. ఇక చిన్ని పాత్రలో సురభి మెరిసింది. కనిపించిన కాసేపు ఆకట్టుకునే ప్రయత్నం చేసింది. ఇక రంభ ఊర్వశి మేనకలుగా రాశీ సింగ్‌, విష్ణు ప్రియా, ప్రిషా సింగ్‌ లు కూడా ఉన్నంతలో మెప్పించారు. అందంతో ఆకట్టుకునే ప్రయత్నం చేశారు. శ్రీనివాస్‌ రెడ్డి తనదైన కామెడీతో అలరించే ప్రయత్నం చేశాడు. వీకే నరేష్‌ నటన, కామెడీ నవ్విస్తుంది. ఇంద్రుడుగా వెన్నెల కిశోర్‌ పాత్రలో ఒదిగిపోయాడు. ఆయనలో మార్పు ఆకట్టుకుంటుంది. సూరి తల్లిగా చేసిన నటి బాగానే మెప్పించింది. గోపరాజు రమణ ఆకట్టుకున్నాడు. ఎస్‌ఐగా నెగటివ్‌ రోల్‌లో తారక్‌ పొన్నప్ప మెప్పించే ప్రయత్నం చేశాడు. మిగిలిన వారు ఓకే అనిపించారు.

చైతన్య భరద్వాజ్‌ మ్యూజిక్‌ రొటీన్‌గానే ఉంది. పాటలు ఆకట్టుకునేలా లేవు. ఆర్‌ఆర్‌ కూడా పరమ రొటీన్‌గా ఉంది. కెమెరా వర్క్ బాగుంది. విజువల్‌గా సినిమా కలర్‌ఫుల్‌గా ఆకట్టుకుంది. ఎడిటింగ్‌ పరంగా ఇంకా చేయడానికి ఏం లేదు. నిర్మాణ విలువలకు కొదవలేదు. రాజేష్‌ దండా, నిమ్మకాయల ప్రసాద్‌ రాజీ లేకుండా నిర్మించారు. దర్శకుడు చంద్రమోహన్‌ చింతాడ ఎంచుకున్న కథ బాగానే ఉంది. కానీ దాన్ని తీసుకెళ్లిన తీరు ఏమాత్రం ఆకట్టుకోలేకపోయింది. కామెడీని వర్కౌట్‌ చేయడంలో విఫలమయ్యారు. రొటీన్‌ అల్లరి నరేష్‌ కామెడీ ట్రాక్‌లో పడిపోయినట్టుగా ఉంది. ట్రెండీ డైలాగ్‌లు ఉన్నా, అవి థియేటర్లో పేలలేదు. సీన్లలో పసలేకపోవడంతో అవి తేలిపోయాయి. మదర్‌ సెంటిమెంట్‌ ని బాగానే వర్కౌట్‌ చేశారు. అది తప్ప సినిమాలో చెప్పుకోదగ్గది, ఎంటర్‌టైన్‌ చేసే అంశాలు ఇంకా ఏం లేకపోవడం పెద్ద మైనస్‌.

ఇది అల్లరి నరేష్‌ మార్క్ పరమ రొటీన్‌ కామెడీ సినిమా. నవ్వులు తక్కువ గోల ఎక్కువ. అల్లరి నరేష్‌ తన బలమైన గ్రౌండ్‌(కామెడీ)లోనూ సిక్స్ కాదు కదా, కనీసం ఫోర్‌ కూడా కొట్టలేకపోయారు.

రేటింగ్‌: 2

Irumudi Review: ఇరుముడి మూవీ రివ్యూ... రవితేజకి ఎట్టకేలకు హిట్‌ పడిందా?

Aithagoni Raju — Fri, 21 Aug 2026 12:01:39 +0530

మాస్‌ మహారాజా రవితేజ తన ఇమేజ్‌ని పక్కన పెట్టిన చేసిన మూవీ `ఇరుముడి`. అయ్యప్పస్వామి భక్తుల కథా నేపథ్యంలో రూపొందిన ఈ చిత్రం ఎలా ఉందో రివ్యూలో తెలుసుకుందాం.

మాస్‌ మహారాజా రవితేజ హీరోగా రూపొందిన మూవీ `ఇరుముడి`. శివ నిర్వాణ దర్శకత్వంలో తెరకెక్కిన ఈ చిత్రంలో ప్రియా భవానీ శంకర్‌ హీరోయిన్‌గా నటించింది. సాయికుమార్‌, బేబీ నక్షత్ర, రమేష్‌ ఇందిరా, స్వసికా విజయ్‌, మీసాలా లక్ష్మణ్‌, అజయ్‌ ఘోష్‌ వంటి వారు కీలక పాత్రలు పోషించారు. మైత్రీ మూవీ మేకర్స్ పతాకంపై రవిశంకర్‌, నవీన్‌ యెర్నేని నిర్మించారు. ఈ చిత్రం నేడు శుక్రవారం(ఆగస్ట్ 21) న విడుదలైంది. వరుస పరాజయాల్లో ఉన్న రవితేజకి హిట్‌ పడిందా? సినిమా ఎలా ఉందనేది రివ్యూలో తెలుసుకుందాం.

పొల్లూరు విలేజ్‌లో త్రినాథ్‌(రవితేజ), తన భార్య కావేరి(ప్రియా భవానీ శంకర్‌), కూతురు మణియమ్మ(బేబీ నక్షత్ర)తో హ్యాపీ లైఫ్‌ని లీడ్‌ చేస్తుంటాడు. ఆయనకు ఆటో ఉంటుంది. అరటితోటని నిర్వహిస్తున్నారు. త్రినాథ్‌ ప్రతిఏడాది అయ్యప్ప మాల వేస్తుంటాడు. ఆ సమయంలో నిబద్ధతతో ఉంటాడు. మందుకు దూరంగా ఉంటాడు. కానీ మాల అయిపోయిందంటే వరుసగా తాగుతూనే ఉంటాడు. తనకు కూతురు అంటే ప్రాణం. ఆ దేవుడే కూతురు రూపంలో వచ్చాడని భావిస్తాడు. గారాభంగా పెంచుతాడు. తను ఊర్లో ఏం జరిగినా చూసింది చూసినట్టు చెబుతుంది. ఆ ఊరికి బస్‌ లేకపోవడంతో ఎమ్మెల్యే(రమేష్‌ ఇందిరా).. గురుస్వామి(సాయికుమార్‌) రిక్వెస్ట్ మేరకు బస్‌ వేయిస్తాడు. దీంతో ఊర్లో అమ్మాయిలు వేరే ఊరికి వెళ్లి హైస్కూల్‌ చదువుకుంటారు. అయితే సడెన్‌గా ఒక అమ్మాయి చనిపోతుంది. ఆ తర్వాత బస్‌లో అమ్మాయిలను కొందరు కుర్రాళ్ల వేధించడంతో మణియమ్మ చెబుతుంది. వారిని చితకబాదుతాడు త్రినాథ్‌. గురుస్వామి కూతురు గాయత్రి పదో క్లాస్‌ చదువుతుంది. ఆమెకి మెరిట్‌ స్టూడెంట్‌ అని టీచర్‌ స్పెషల్‌ క్లాస్‌లు చెబుతుంది. అంతకు ముందే ఆ టీచర్‌ ఒక అమ్మాయిని చితకబాదినందుకు ఆ అమ్మాయి ఆత్మహత్య చేసుకుంటుంది. ఆమె మళ్లీ రావడంతో స్టూడెంట్స్ భయపడుతుంటారు. గాయత్రి కూడా భయపడుతుంది. ఎక్స్ ట్రా క్లాస్‌ లు అని గాయత్రిని ఇంటికి పిలిపించుకుంటుంది. మరి ఇంటికి పిలిపించి ఆ టీచర్‌ ఏం చేసింది? టీచర్‌ని చూసి ఇతర అమ్మాయిలు ఎందుకు స్కూల్‌ మానేశారు. గాయత్రి రోజూ ఎందుకు టెన్షన్‌ పడుతుంది? ఎప్పుడూ నవ్వుతూ కనిపించే ఎమ్మెల్యేలోని మరో రూపం ఏంటి? గాయత్రికి సంబంధించి, టీచర్‌కి సంబంధించి, ఎమ్మెల్యేకి సంబంధించి మణియమ్మ చూసిన నిజం ఏంటి? ఆ విషయాన్ని తండ్రి త్రినాథ్‌కి చెప్పిందా? గురుస్వామి పాత్రలోని ట్విస్ట్ ఏంటి? ఆ తర్వాత ఎలాంటి ఆసక్తికర, భయానక సంఘటనలు చోటు చేసుకున్నాయి? కథ ఎలాంటి మలుపులు తీసుకుందనేది మిగిలిన కథ.

రవితేజ సినిమా అంటే మాస్‌, కామెడీ, రొమాన్స్, మంచి పాటలు, డాన్సులు, అదిరిపోయే యాక్షన్‌ సీన్లు ఉంటాయి. చాలా కాలంగా ఇలాంటి సినిమాలు చేస్తూ వస్తున్నారు. కానీ అవి బాక్సాఫీసు వద్ద బోల్తా కొడుతున్నాయి. ఈ క్రమంలో తాను రూట్‌ మార్చి చేసిన మూవీ `ఇరుముడి`. అయ్యప్ప స్వామి భక్తుల నేపథ్యంలో ఇది సాగుతుంది. ముఖ్యంగా తండ్రీ కూతురు మధ్య బాండింగ్‌,, ఎమోషన్స్ ని ఆవిష్కరించే మూవీ ఇది. సినిమాలో రవితేజ కనిపించరు, త్రినాథ్‌ మాత్రమే కనిపిస్తాడు. అంతగా పాత్రలో ఒదిగిపోయి నటించాడు. ఆకట్టుకున్నాడు. సినిమా ప్రారంభంలో అయ్యప్పస్వామి మాల ధరించడం, వాళ్లు చేసే పూజలు, కూతురుతో రవితేజకి ఉన్న బాండింగ్‌ని ఆవిష్కరించారు. దాన్ని బాగా ఎస్టాబ్లిష్‌ చేశారు. సెంటిమెంట్‌, ఎమోషనల్‌గా కనెక్ట్ చేయడంలో దర్శకుడు శివ నిర్వాణ సక్సెస్‌ అయ్యారు. అదే సమయంలో ఊర్లో జరిగే గొడవలు, అమ్మాయిలకు ఏమైనా జరిగితే, వారిని ఎవరైనా అల్లరి చేస్తే త్రినాథ్‌ రియాక్ట్ అయిన తీరుని, అమ్మాయిలపై తనకున్న ప్రేమని ఆవిష్కరించారు. ఆయా సీన్లు ఆకట్టుకునేలా ఉన్నాయి. ఎమోషనల్‌గానూ ఉన్నాయి. దీనికితోడు భక్తిరస అంశాలు కనెక్టింగ్‌గా ఉంటాయి. సినిమా సీరియస్‌గా సాగుతున్నా, మధ్య మధ్యలో రవితేజ మార్క్ ఫన్‌ కూడా ఉంటుంది. తాగే విషయంలో కొంత కామెడీని జోడించారు. మరోవైపు కూతురుకి ఏ బాధా రానివ్వకుండా, జాగ్రత్తగా చూసుకునే విషయంలో తండ్రికూతురు మధ్య ఉన్న కెమిస్ట్రీని బలంగా చూపించారు. దీనికితోడు మధ్య మధ్యలో కొన్ని థ్రిల్లింగ్‌ అంశాలుంటాయి. గంజాయి మత్తులో కొందరు కుర్రాళ్లు చేసే ఎదవ పనులు, టీచర్‌ ప్రవర్తన, ఎమ్మెల్యే నవ్వుల్లో ఊహించని సస్పెన్స్ ని క్రియేట్‌ చేశారు. పారలల్‌గా దాన్ని రన్‌ చేశారు. వీళ్ల ఊరికి బస్‌ వచ్చినప్పట్నుంచి అనేక సస్పెన్స్ అంశాలు చోటు చేసుకుంటాయి. అవి ఎంగేజ్‌ చేస్తాయి. ఏం జరగబోతుందనే క్యూరియాసిటీని క్రియేట్‌ చేస్తుంటాయి. అయితే అంతా ఊహించేది ఒకటి, అక్కడ జరుగుతున్నది మరోటి. ఆ సస్పెన్స్ ని చివరి వరకు మెయింటేన్‌ చేశారు. క్లైమాక్స్ మాత్రం కొంత రెగ్యూలర్‌గానే ఉంది. పెద్దగా వాహ్‌ ఫ్యాక్టర్స్ ఏం లేదు. కాకపోతే సినిమా మొత్తం శివ నిర్వాణ మార్క్ ఎమోషన్స్, ఇంటెన్సిటితో రన్‌ చేశారు. అవి కొత్తగా ఉంటాయి. ఆకట్టుకుంటాయి. ఆడియెన్స్ ని ఎంగేజ్‌ చేస్తాయి. కొన్ని సీన్ల వరకు సస్పెన్స్ ని మెయింటేన్‌ చేయగలిగారు, ఆడియెన్స్ ని డైవర్ట్ చేశారు, కానీ ఓవరాల్‌గా మాత్రం ఊహించేలా ఉండటం మైనస్‌గా చెప్పొచ్చు. కొన్ని ట్విస్ట్ లు కూడా పెద్దగా పేలలేదు. అంతగా వర్కౌట్‌ కాలేదు. ఎమోషనల్‌ సీన్లు మాత్రం అదిరిపోయాయి. ఉత్కంఠకు గురి చేసే సీన్లు బాగున్నాయి. క్లైమాక్స్ లో రవితేజ రియాక్షన్‌ ఊహించేలా ఉంది. ఫినిషింగ్‌ని బాగా ఎమోషనల్‌గా ప్లాన్‌ చేశారు, ఆ సీన్లు అంతగా వర్కౌట్‌ కాలేదు. రెగ్యూలర్‌ ఫీలింగ్‌ ని తెప్పిస్తాయి. డ్రామా సినిమాకి హైలైట్‌గా నిలుస్తుంది. అమ్మాయిలను ధైర్యంగా పెంచాలనే సందేశం బాగుంది.

త్రినాథ్‌ పాత్రలో రవితేజ ఒదిగిపోయి చేశాడు. పాత్రలో జీవించాడు. ఎక్కడా రవితేజ కనిపించడు అనేంతగా ఆయన చేయడం విశేషం. పూర్తిగా పాత్రకి, దర్శకుడికి బ్లెండ్‌ అయి చేశాడు. చాలా బాగా నటించాడు. అదే సమయంలో బేబీ నక్షత్ర కూడా అంతే బాగా చేసింది. ఫాదర్‌ సెంటిమెంట్‌తో మెప్పించింది. వీరిద్దరి బాండింగ్‌ సినిమాకి హైలైట్‌గా నిలుస్తుంది. సెంటిమెంట్‌ ఎమోషనల్‌ సీన్లలో రవితేజ వాహ్‌ అనిపించాడు. ఇక ఎమ్మెల్యేగా రమేష్‌ ఇందిరా ఆకట్టుకున్నారు, ఊహించేలా ఆయన పాత్ర ఉంది. టీచర్‌ పాత్రలోని ట్విస్ట్ కూడా ఫర్వాలేదు. ఆ పాత్రలో స్వసిక విజయ్‌ చాలా బాగా చేసింది. తనలోని మరో యాంగిల్‌ని చూపించింది. నెగటివ్‌ షేడ్‌ ఉన్న పాత్రలో అజయ్‌ ఘోష్‌ అదరగొట్టారు. తన మార్క్ గాంభీర్యంతో మెప్పించాడు. ఆయన కొడుకుగా కొమరం కూడా బాగా చేశాడు. రవితేజ భార్యగా ప్రియా భవానీ శంకర్‌ ఆకట్టుకుంది. పాత్రలో ఒదిగిపోయింది. గురుస్వామిగా సాయికుమార్‌ మెప్పించారు. పాత్రలోని ట్విస్ట్ బాగుంది. కాకపోతే కన్విన్సింగ్‌గా లేదు. మిగిలిన పాత్రధారులు ఓకే అనిపించారు.

జీవీ ప్రకాష్‌ మ్యూజిక్‌ సినిమాకి హెల్ప్ అయ్యింది. అయ్యప్ప పాటలు బాగున్నాయి. మిగిలిన పాటలు అంతగా ఆకట్టుకోలేదు. కెమెరా వర్క్ ఆకట్టుకునేలా ఉంది. ఎడిటింగ్‌ పరంగా మరింత వర్క్ చేయాల్సింది. దర్శకుడు శివ నిర్వాణ మంచి కథ రాసుకున్నాడు. కాకపోతే రెగ్యూలర్‌ స్టోరీనే. ఇలాంటి కథలు చాలానే వచ్చాయి. వస్తున్నాయి. కథనాన్ని నడిపించిన తీరు బాగుంది.ఎంగేజ్‌ చేసేలా ఉంది. అదే సమయంలో ఊహించేలా ఉంది. రొటీన్‌ ఫీలింగ్‌ తెప్పిస్తుంది. అయ్యప్ప స్వామి భక్తులకు సంబంధించిన అంశాలు కొత్తగా ఉంటాయి. అవి, తండ్రి కూతుర్ల సెంటిమెంట్‌, ఎమోషనల్‌గా కథని నడిపించిన తీరు బాగుంది. అదే ఈ సినిమాకి ప్లస్‌గా నిలుస్తాయి.

అయ్యప్పస్వామి భక్తుల బ్యాక్‌ డ్రాప్‌లో తండ్రికూతుళ్ల సెంటిమెంట్‌ నేపథ్యంలో సాగిన ఎమోషనల్‌ యాక్షన్‌ డ్రామా ఇరుముడి. రవితేజ చేసిన కొత్త ప్రయత్నమని చెప్పొచ్చు. ఫ్యామిలీతో కలిసి చూడగలిగే మూవీ. అమ్మాయిలను, ముఖ్యంగా ఆడ పిల్లల్ని భయంతో కాదు, ధైర్యంతో పెంచాలని చెప్పడం బాగుంది.

రేటింగ్‌: 3

The Red Bag Movie Review: ది రెడ్ బ్యాగ్ మూవీ రివ్యూ, మహిళా నేపథ్యంలో సాగే క్రైమ్‌ థ్రిల్లర్‌ ఎలా ఉందంటే?

Aithagoni Raju — Fri, 21 Aug 2026 21:44:25 +0530

The Red Bag Movie Review: మహిళా నేపథ్యంలో రూపొందిన స్టయిలీష్‌ ఫిల్మ్ `ది రెడ్‌ బ్యాగ్‌`. మహిళలకు సంబంధించి మంచి సందేశం అందించిన ఈ చిత్రం ఎలా ఉందనేది రివ్యూలో తెలుసుకుందాం.

మహిళా నేపథ్యంలో సినిమాలు అడపాదడపా వస్తున్నాయి. తాజాగా `ది రెడ్‌ బ్యాగ్‌` అనే చిత్రం రూపొందింది. ఇందులో హీరోయిన్లు రాధ్య, మోనిక, ఆకాంక్ష ప్రధాన పాత్రల్లో నటించగా సీనియర్ హీరోయిన్ రాశి కీలక పాత్రలో కనిపించారు. క్రైమ్ మిస్టరీ, సస్పెన్స్, రివేంజ్ థ్రిల్లర్ మూవీ `ది రెడ్ బ్యాగ్`ని రూపొందించారు దర్శకుడు రవి కుమార్ సీరపు. మెమొరీ మేకర్స్ పతాకంపై ఈ చిత్రం తెరకెక్కింది. క్రైమ్, గ్లామర్, సస్పెన్స్‌తోపాటు మహిళా శక్తి, మాతృత్వం వంటి అంశాలను మేళవించి ఈ చిత్రాన్ని తెరకెక్కించారు. నేడు శుక్రవారం(ఆగస్ట్ 21)న ప్రేక్షకుల ముందుకు వచ్చింది. మరి ఈ రివేంజ్ డ్రామా ఎలా ఉంది? ప్రేక్షకులను ఎంతవరకు మెప్పించింది? అనేది రివ్యూలో చూద్దాం.

అమెరికాలోని అరిజోనా ప్రాంతంలో ఉన్న ఓ పబ్‌లో విన్ని (రాధ్య) డ్యాన్సర్‌గా పనిచేస్తుంటుంది. అయితే ఆ పబ్ సాధారణమైనది కాదు. దాని యజమాని మైక్ (కబీర్ సింగ్) అత్యంత క్రూరమైన వ్యక్తి. తన స్వార్థ ప్రయోజనాల కోసం అమ్మాయిలను అడ్డుపెట్టుకుని అక్రమ కార్యకలాపాలు సాగిస్తుంటాడు. ఓ ద్వీపంలో భారీ రిసార్ట్, పబ్ ఏర్పాటు చేయాలనే లక్ష్యంతో తన చీకటి సామ్రాజ్యాన్ని విస్తరించేందుకు ప్రయత్నిస్తుంటాడు. మరోవైపు ఈషా, ఈవ్, బేబ్ అనే ముగ్గురు భారతీయ అమ్మాయిలు కూడా మైక్ నిర్వహించే చీకటి ప్రపంచంలోకి అడుగుపెడతారు. అసలు వీరు భారతదేశం నుంచి అరిజోనాకు ఎందుకు వెళ్లారు? విన్ని ఈ చీకటి ప్రపంచంలోకి ఎలా వచ్చింది? మైక్ చేతిలో బంధీలుగా మారిన ఈ నలుగురు యువతులు అతడి చెర నుంచి ఎలా బయటపడ్డారు? వారి జీవితాల్లోకి వచ్చిన ‘రెడ్ బ్యాగ్’ అసలు ఏమిటి? ఆ బ్యాగ్‌ కథేంటి? ఇందులో సీనియర్‌ నటి రాశీ పాత్రేంటి? మహిళలకు సంబంధించి ఇచ్చిన సందేశమేంటి? అనేది మిగిలిన సినిమా కథ.

నలుగురు అమ్మాయిలు లైఫ్‌ కోసం చేసిన పోరాటాన్ని, ఓ తల్లిని కాపాడేందుకు పడ్డ స్ట్రగుల్స్ ని ఆవిష్కరించే మూవీ `ది రెడ్‌ బ్యాగ్‌`. అయితే కుటుంబ పోషణ కోసం ఒక తల్లి పడ్డ బాధని ఆవిష్కరించే మూవీ, అమ్మ విలువని తెలియజేసే మూవీ అవుతుంది. క్రైమ్, సస్పెన్స్, మిస్టరీ, థ్రిల్లర్ అంశాలతో పాటు రివేంజ్ డ్రామాను కలిపి దీన్ని రూపొందించారు. కథాంశం కొత్తగా అనిపించకపోయినా దర్శకుడు రవి కుమార్ సీరపు దాన్ని ప్రెజెంట్ చేసిన విధానం సినిమాకు ప్రత్యేకతను తీసుకొచ్చింది. ముఖ్యంగా ప్రస్తుత ట్రెండ్‌కు అనుగుణంగా స్టైలిష్ టేకింగ్, గ్లామర్ ఎలిమెంట్స్, యాక్షన్, సస్పెన్స్‌ను కథలో మిక్స్ చేశారు. సినిమా ప్రారంభం కాస్త నెమ్మదిగా సాగుతుంది. పబ్ వాతావరణం, అక్కడ జరుగుతున్న అక్రమ కార్యకలాపాలను ప్రేక్షకులకు పరిచయం చేస్తూ దర్శకుడు కథను నెమ్మదిగా ముందుకు తీసుకెళ్తారు. అయితే కథలోకి ముగ్గురు అమ్మాయిల ఫ్లాష్‌బ్యాక్ ఎంట్రీ ఇచ్చిన తర్వాత సినిమా వేగం పుంజుకుంటుంది. ప్రస్తుతం జరుగుతున్న సంఘటనలను, గతంలో జరిగిన సంఘటనలను కలుపుతూ సాగే స్క్రీన్‌ప్లే ఆసక్తిని పెంచుతుంది. ముఖ్యంగా ఇంటర్వెల్‌కు ముందు వచ్చే ట్విస్ట్ కథపై మరింత క్యూరియాసిటీని పెంచుతుంది. ఆ ట్విస్ట్ తర్వాత సెకండాఫ్‌లో ఏం జరుగుతుందనే ఆసక్తి ప్రేక్షకుల్లో ఏర్పడుతుంది. ఫ్లాష్‌బ్యాక్, ప్రెజెంట్ టైమ్ మధ్య సాగే బ్యాక్ అండ్ ఫోర్త్ నెరేషన్ కథను ఆసక్తికరంగా నడిపిస్తుంది.

సెకండాఫ్‌ ఛేజింగ్ సీన్లు, యాక్షన్ సీక్వెన్సులతో సాగుతుంది. విలన్‌ చెర నుంచి బయటపడేందుకు వాళ్లు పడే బాధని ఆవిష్కరిస్తుంది. ఆయా సీన్లు ఎంగేజింగ్‌గా, ఏం జరుగుతుందనే క్యూరియాసిటీని క్రియేట్ చేస్తాయి. నలుగురు మహిళలు తమపై జరిగిన అన్యాయానికి ఎదురు నిలిచే విధానాన్ని దర్శకుడు ఆసక్తికరంగా చూపించారు. రివేంజ్ డ్రామాతో పాటు మహిళా శక్తిని ప్రధానంగా ప్రొజెక్ట్ చేయడం ఆకట్టుకుంటుంది. క్లైమాక్స్‌లో మాతృత్వానికి ఉన్న విలువను దర్శకుడు సున్నితంగా ఆవిష్కరించారు. ఒక తల్లి జీవితంలో ఎదుర్కొనే పరిస్థితులు, ఆమె తీసుకునే నిర్ణయాలను సమాజం ఏ విధంగా చూస్తుంది అనే అంశాలను భావోద్వేగంతో చూపించే ప్రయత్నం చేశారు. అయితే సినిమా చాలా స్లోగా రన్‌ అవుతుంది. కమర్షియల్‌ అంశాలు మిస్‌ అయ్యాయి. డ్రామా, ఎమోషన్స్ పండలేదు. చాలా డ్రైగా ఉంటుంది. ఎంతసేపు కథ అక్కడక్కడే తిరుగుతున్నట్టుగా ఉంటుంది. టేకింగ్‌ పరంగా వీక్‌గా ఉంది. సస్పెన్స్ అంశాలు తేలిపోయాయి. చెప్పాలనుకున్న విషయం పక్కదారిపట్టేలా ఉంది. కథనంలో క్లారిటీ మిస్‌ అయిన ఫీలింగ్‌ కలుగుతుంది. ఆర్టిస్ట్ లు కూడా నటన పరంగా ఇంకా బాగా చేయాల్సింది. డబ్బింగ్‌ పరంగా లోపాలున్నాయి. బీజీఎం అంతగా లేదు. పాటలు బాగున్నాయి. కాకపోతే ఇదొక స్టయిలీష్‌ ఫిల్మ్ గా నిలుస్తుంది.

విన్ని పాత్రలో రాధ్య తన నటనతో ఆకట్టుకుంది. గ్లామర్ సన్నివేశాలతో పాటు భావోద్వేగ సన్నివేశాల్లోనూ తన మార్క్ చూపించింది. మిగతా ముగ్గురు హీరోయిన్లు మోనిక, ఆకాంక్ష కూడా తమ పాత్రలకు తగ్గట్టుగా నటించారు. తెరపై గ్లామరస్‌గా కనిపించడంతో పాటు ఎమోషనల్ సీన్లలో కూడా తమ పెర్ఫార్మెన్స్‌తో మెప్పించే ప్రయత్నం చేశారు. విలన్ మైక్ పాత్రలో కబీర్ సింగ్ తనదైన శైలిలో విలనిజాన్ని పండించారు. క్రూరమైన వ్యక్తిగా ఆయన నటన కథకు తగ్గట్టుగా సాగింది. ప్రసాద్ బెహరా తన కామెడీ టైమింగ్‌తో ప్రేక్షకులను నవ్వించే ప్రయత్నం చేశారు. కానీ కామెడీ పండలేదు. గాయత్రి భార్గవి నటించిన సన్నివేశాలు ఎమోషనల్‌గా ఉంటాయి. సీనియర్ హీరోయిన్ రాశి పాత్ర నిడివి తక్కువగా ఉన్నప్పటికీ.. కథపై బలమైన ప్రభావం చూపిస్తుంది. మిగిలిన వారు ఓకే అనిపించారు. కాకపోతే ప్రధాన పాత్రల్లో నటించిన అమ్మాయిలు కొత్త కావడంతో కనెక్ట్ కావడానికి టైమ్‌ పడుతుంది.

టెక్నీకల్‌గా సినిమా బాగుంది. విజువల్స్ బాగున్నాయి. రిచ్‌గా ఉన్నాయి. యాక్షన్, ఛేజింగ్ సీన్లలో కూడా కెమెరా వర్క్ ఆకట్టుకుంటుంది. ఎడిటింగ్‌ లోపాలున్నాయి. చాలా వీక్‌గా ఉంది. మ్యూజిక్‌ బాగుంది. పాటలు అదిరిపోయాయి. పెద్ద సినిమా స్థాయిలో ఉన్నాయి. నిర్మాణ విలువలకు కొదవ లేదు. సినిమా చాలా రిచ్‌గా ఉంది. దర్శకుడు మంచి పాయింట్‌ తీసుకున్నారు. కానీ దాన్ని అంతే బాగా, ఎమోషనల్‌గా, నాటకీయంగా తెరకెక్కించడంలో కొంత తడబాటు కనిపిస్తుంది. కాకపోతే ఇచ్చిన సందేశం బాగుంది. అమ్మాయిలకు, మహిళలకు నచ్చేలా తెరకెక్కించారు. మొత్తంగా చూస్తే ది రెడ్ బ్యాగ్ క్రైమ్, మిస్టరీ, సస్పెన్స్, రివేంజ్, థ్రిల్లర్ అంశాలను కలిపి రూపొందించిన సినిమా. గ్లామర్, యాక్షన్, సస్పెన్స్‌తో ప్రేక్షకులను ఆకట్టుకునే ప్రయత్నం చేస్తూనే మహిళా శక్తి, మాతృత్వం, సమాజం తీరు వంటి భావోద్వేగ అంశాలను కూడా కథలో భాగం చేశారు.

గ్లామర్‌తో పాటు క్రైమ్, సస్పెన్స్, రివేంజ్, థ్రిల్లర్ ఎలిమెంట్స్‌ను ఇష్టపడే ప్రేక్షకులకు ఇది మెప్పించే మూవీ అవుతుంది. చివర్లో మహిళల పోరాటం, మాతృత్వం చుట్టూ దర్శకుడు తీసుకున్న ఎమోషనల్‌ పాయింట్ ప్రేక్షకులను ఆలోచింపజేస్తుంది.

రేటింగ్‌: 2.5

Gharana Mogudu Review: చిరంజీవి దెబ్బకు అమితాబచ్చన్ కు షాక్, మెగాస్టార్ మాస్ ఫాలోయింగ్ నిరూపించిన సినిమా.. ఘరానా మొగుడు రివ్యూ

Mahesh Jujjuri — Wed, 09 Sep 2026 08:03:41 +0530

Gharana Mogudu Review: మెగాస్టార్ చిరంజీవి మాస్ ఇమేజ్ తో పాటు రెమ్యునరేషన్ కూడా డబుల్ చేసిన మూవీ ఘరానా మొగుడు. ఈ సినిమాతో బిగ్ బీ అమితాబ్ ను కూడా సెకండ్ ప్లేస్ కు పడేశాడు చిరంజీవి. ఇంతకీ విషయం ఏంటి? ఘరానా మొగుడు రివ్యూలో తెలుసుకుందాం?

తెలుగు ఫిల్మ్ ఇండస్ట్రీ చరిత్రలో కొన్ని సినిమాలు మాత్రమే బాక్సాఫీస్ వద్ద రికార్డులను తిరగరాసి, ట్రెండ్ సెట్టర్లుగా నిలుస్తాయి. అలాంటి సంచలనాల్లో టాప్ ప్లేస్ లో నిలిచే సినిమా ఏదైనా ఉందంటే అది ఘరానా మొగుడు. మెగాస్టార్ చిరంజీవి, నగ్మ జంటగా.. దర్శకేంద్రుడు కె. రాఘవేంద్రరావు తెరకెక్కించిన ఈ మాస్ ఎంటర్‌టైనర్, తెలుగు సినిమా స్థాయిని పాన్-ఇండియా రేంజ్‌కు పెంచడమే కాకుండా రూ. 10 కోట్లకు పైగా గ్రాస్ వసూలు చేసిన మొదటి తెలుగు సినిమాగా చరిత్ర సృష్టించింది.

విశాఖపట్టణం పోర్టులో పని చేస్తున్న రాజు (చిరంజీవి) తోటి ఉద్యోగులకి సహాయపడుతూ అందరి మెప్పు పొందుతుంటాడు. తన తల్లి (శుభ) కి పక్షవాతం రావటంతో హైదరాబాదుకి తిరిగివచ్చి అక్కడ ఉద్యోగ ప్రయత్నాలు చేస్తుంటాడు. ప్రత్యర్థుల దాడిలో గాయపడిన పారిశ్రామికవేత్త అయిన బాపినీడు (రావు గోపాలరావు) ని రాజు రక్షిస్తాడు. అతని మంచితనాన్ని మెచ్చిన బాపినీడు తన సంస్థలోని ఒక ఉద్యోగానికి సిఫారసు పత్రాన్ని రాజుకి ఇస్తాడు. పొగరుబోతు అయిన బాపినీడు కుమార్తె ఉమాదేవి (నగ్మా) వ్యక్తిత్వం రాజుకి మొదటి నుండి నచ్చదు. సంస్థలో ఉద్యోగుల వద్ద మంచి పేరును సంపాదించిన రాజు వారికి నాయకత్వం వహిస్తూ ఉండటం ఉమాదేవికి నచ్చదు. అతనిని పెళ్ళి చేస్కొని అతని నోరు మూయించాలి అని ఎత్తు వేస్తుంది. కాని పెళ్ళి తర్వాత రాజు ఉమాదేవికి మరింత పెద్ద సమస్యగా మారతాడు. తన సెక్రటరీ అయిన భవాని (వాణీ విశ్వనాథ్) తో రాజు చనువుని ఉమాదేవి అపార్థం చేస్కొంటుంది. తన కొడుకుతో సంబంధాన్ని నిరాకరించిన ఉమాదేవిని అంతం చేయాలన్న రంగనాయకులు (కైకాల సత్యనారాయణ) ఎత్తుని చిత్తు చేస్తూ రాజు తన భార్యని రక్షించుకోవటంతో ఉమాదేవి రాజులోని మంచితనాన్ని గుర్తిస్తుంది. చివరికి ఉమాదేవి రాజుకు ఎలా దగ్గరవుతుంది.. క్లైమాక్స్ లో జరిగే ట్విస్ట్ ఏంటి? అనేది అసలు కథ.

రాజు పాత్రలో మెగాస్టార్ చిరంజీవి నటన అద్భుతం. ఆయన మాస్ మ్యానరిజమ్స్, ''కాస్త ఫేస్ లెప్ట్ టర్న్ ఇచ్చుకోండి..'' "బంగాళాఖాతంలో..." డైలాగ్ డెలివరీ, డ్యాన్సులు థియేటర్లలో ఈలలు వేయించాయి. కమెడీ, యాక్షన్, ఎమోషన్స్ అన్నింటినీ సరిగ్గా సమతుల్యం చేస్తూ సినిమా మొత్తాన్ని తన భుజాలపై నడిపించారు.

ఇక నగ్మ విషయానికి వస్తే.. పొగరుబోతు ధనవంతురాలిగా ఉమాదేవి పాత్రలో నగ్మ ఒదిగిపోయారు. ఆమె గ్లామర్, చిరంజీవితో ఉన్న ఆన్-స్క్రీన్ కెమిస్ట్రీ ఈ సినిమాకి ప్రధాన ఆకర్షణగా నిలిచాయి. మెగాస్టార్ కుపోటీ పడి ఈసినిమాలో నగ్మ నటించారు. సెకండ్ హీరోయిన్ గా నటించిన వాణి విశ్వనాథ్ విషయానికి వస్తే.. చిరంజీవితో ఆమె సన్నివేశాలు ప్రేక్షకులను అలరిస్తాయి. ఇద్దరి మధ్య రొమాంటిక్ సాంగ్ ఈసినిమాకు హైలెట్ గా నిలిచింది అని చెప్పాలి.

ఎప్పుడు విలన్ గా నటించే రావు గోపాలరావు పాజిటీవ్ పాత్రలో అద్బుతం చేశారు. ఈసినిమాలో ఆయన్ను చూసి ఆడియన్స్ తెగ సంతోషపడ్డారని చెప్పుకోవచ్చు. ఇక విలన్ గా కైకాల సత్యనారాయణ గురించి ప్రత్యేకంగా చెప్పనక్కర్లేదు. తన అనుభవంతో విలన్ పాత్రలకు సంపూర్ణ న్యాయం చేశారు. ఇక కామెడీ విషయానికి వస్తే.. బ్రహ్మానందం కామెడీ కడుపునొప్పి రావడంఖాయం.. రిక్షాకార్మికుడిగా బ్రహ్మీ పెర్ఫామెన్స్ అదరిపోయింది. ఇక సాక్షి రంగారావు, రమాప్రభ లాంటి ఇతర నటీనటులు తమ పాత్రల పరిధిమేరకు అద్భుతంగా నటించారు అని చెప్పాలి.

దర్శకుడు కె. రాఘవేంద్రరావు కమర్షియల్ ఎలిమెంట్స్‌ను హ్యాండిల్ చేయడంలో దిట్ట. కన్నడ చిత్రం 'అనురాగ అరళితూ' కథను తెలుగు ప్రేక్షకుల అభిరుచికి తగ్గట్టుగా పూర్తి మాస్ యాక్షన్ ఎంటర్‌టైనర్‌గా మలచడంలో ఆయన 100% విజయం సాధించారు. ఈ సినిమాకు దర్శకేంద్రుడు రూపం తెస్తే.. తన సంగీతంతో ఎం. ఎం. కీరవాణి ప్రాణం పోశారు. ఆయన అందించిన ట్యూన్స్ చిరంజీవి మాస్ ఇమేజ్ ను డబుల్ చేశాయి. బ్యాక్ గ్రౌండ్ మ్యూజిక్ అయితే ఆడియన్స్ ను సీన్ల నుంచి కదలనీయకుండా చేస్తుంది. ఇక పాటల విషయానికి వస్తే.. "బంగారు కోడి పెట్ట" పాట ఒక ట్రెండ్ సెట్టర్‌గా నిలిచింది. "కిలాడి బుల్లోడ" , "హే పిల్లా హలో పిల్లా" ''ఏందిబే ఎట్టాగ ఉంది'' వంటి పాటలు ఇప్పటికీ పాపులర్.

అమితాబ్ కు షాక్ ఇచ్చిన చిరంజీవి..

ఘరానా మొగుడు సినిమా రాజ్ కుమార్ నటించిన కన్నడ హిట్ 'అనురాగ అరళితూ'కి అధికారిక రీమేక్. అయితే తెలుగు ప్రేక్షకుల అభిరుచికి తగ్గట్టుగా రాఘవేంద్రరావు మాస్ ఎలిమెంట్స్, యాక్షన్ జోడించి దీనిని పూర్తి స్థాయి ఎంటర్‌టైనర్‌గా మార్చారు.

రూ. 10 కోట్ల గ్రాస్ వసూళ్లను సాధించిన మొదటి తెలుగు సినిమాగా ఘరానా మొగుడు రికార్డు సృష్టించింది. ఈ చిత్రం 39 కేంద్రాల్లో 100 రోజులు, 184 రోజులు (అంటే అర్ధ శతాధిక దినోత్సవం) పైగా ప్రదర్శించబడింది.

ఈ సినిమా సాధించిన సంచలన విజయంతో ' అప్పట్లో ప్రముఖ పత్రిక తన మేగజైన్ లో చిరంజీవి ఫోటోతో "బిగ్గర్ దాన్ అమితాబ్" (అమితాబ్ బచ్చన్ కంటే పెద్ద స్టార్) అనే శీర్షికతో కవర్ స్టోరీ ప్రచురించింది. ఈ సినిమా విజయం తర్వాత చిరంజీవికి రూ. 1.25 కోట్ల రెమ్యూనరేషన్ లభించింది. దాంతో ఆ సమయంలో భారతదేశంలోనే అత్యధిక పారితోషికం తీసుకున్న నటుడిగా ఆయన వార్తల్లో నిలిచారు.

ఎం. ఎం. కీరవాణి సంగీతం ఈ సినిమాకి ప్రధాన బలం. ముఖ్యంగా "బంగారు కోడి పెట్ట" పాట తెలుగు రాష్ట్రాలను ఊపేసింది. ఈ పాట కొరియోగ్రఫీ, చిరంజీవి డాన్స్ మూవ్స్ థియేటర్లలో ప్రేక్షకులతో ఈలలు వేయించాయి. చిరంజీవి చెప్పిన "బంగాళాఖాతంలో..." అనే డైలాగ్, ఆయన మాస్ మ్యానరిజమ్స్ అప్పట్లో చిన్నపిల్లల నుండి పెద్దల వరకు అందరి నోళ్లలో నానాయి.

సినిమా విడుదలైన సమయంలో వైజాగ్ , హైదరాబాద్‌లలో అభిమానులు థియేటర్ల దగ్గర భారీ ఎత్తున కటౌట్లు పెట్టి, క్షీరాభిషేకాలు చేశారు. చిరంజీవి కటౌట్‌కు పూలదండలు వేయడానికి క్రేన్లు ఉపయోగించడం అప్పట్లో పెద్ద వింతగా మాట్లాడుకున్నారు. ఈ సినిమా టికెట్ల కోసం థియేటర్ల వద్ద తొక్కిసలాటలు జరిగాయి. రూపాయి టికెట్ బ్లాక్‌లో రూ. 50 నుండి రూ. 100 వరకు అమ్ముడవ్వడం ఆ రోజుల్లో ఒక సంచలనం.

ప్లస్ పాయింట్స్:

చిరంజీవి ఎనర్జిటిక్ పర్ఫార్మెన్స్, డాన్సులు ,మ్యానరిజమ్స్.

చిరంజీవి-నగ్మ మధ్య ఆన్-స్క్రీన్ కెమిస్ట్రీ.

ఎం. ఎం. కీరవాణి చార్ట్ బస్టర్ మ్యూజిక్.

కె. రాఘవేంద్రరావు మార్క్ కమర్షియల్ టేకింగ్.

మైనస్ పాయింట్స్:

రొటీన్ మాస్ స్టోరీ.

సెకండాఫ్‌లో కొన్ని సీన్లు కాస్త ఊహించదగినవిగా ఉండటం.

ఫైనల్ గా..

ఘరానా మొగుడు అనేది తెలుగు సినిమా చరిత్రలో ఒక ల్యాండ్‌మార్క్ మూవీ. మెగాస్టార్ చిరంజీవి మాస్ ఇమేజ్‌ను శిఖరాగ్రానికి తీసుకెళ్లిన చిత్రం ఇది. డ్యాన్సులు, ఫైట్లు, కామెడీ, రొమాన్స్ అన్ని సమపాళ్లలో కుదిరిన పక్కా కమర్షియల్ ఎంటర్‌టైనర్. ఇప్పటి ఆడియన్స్ ను కూడా ఈసినిమా అలరించగలదు. ఈమూవీ చూడాలంటే యూట్యూబ్ లో అందుబాటులో ఉంది.

Bethlehem Kutumba Unit Movie Review: బెత్లెహెమ్‌ కుటుంబ యూనిట్‌ మూవీ రివ్యూ, మమితా బైజు సినిమా ఎలా ఉందంటే?

Aithagoni Raju — Fri, 04 Sep 2026 01:13:55 +0530

మమితా బైజు, నివిన్‌ పౌలీ జంటగా, ఫహద్‌ ఫాజిల్‌ నిర్మాణంలో తెరకెక్కిన `బెత్లెహెమ్‌ కుటుంబ యూనిట్‌` మూవీ మలయాళంలో బ్లాక్‌ బస్టర్ అయ్యింది. మరి తెలుగు ఆడియెన్స్ ని ఆకట్టుకోవడంలో సక్సెస్‌ అయ్యిందా?

మమితా బైజు.. తెలుగు ఆడియెన్స్ కి ఇప్పటికే పరిచయమైంది. `ప్రేమలు` చిత్రంతో ఆకట్టుకుంది. ఇటీవల `విశ్వనాథ్‌ అండ్‌ సన్స్` మూవీతో తెలుగు ఆడియెన్స్ కి మరింత దగ్గరయ్యింది. ఇప్పుడు ఆమె మలయాళం `బెత్లెహెమ్‌ కుటుంబ యూనిట్‌` చిత్రంతో దుమ్మురేపుతోంది. ఈ చిత్రం ఆగస్ట్ 21న మలయాళంలో విడుదలై బ్లాక్‌ బస్టర్‌గా నిలిచింది. రెండు వందల కోట్లకుపైగా కలెక్షన్లని సాధించింది. ఇందులో నివిన్‌ పౌలీ హీరో కావడం విశేషం. గిరిష్‌ ఏడీ దర్శకత్వం వహించారు. ఫహద్‌ ఫాజిల్‌, దిలేష్‌ పోతన్‌, శ్యామ్‌ పుష్కరన్‌ నిర్మించారు. మలయాళంలో సూపర్‌ హిట్‌ అయిన ఈ మూవీని నేడు శుక్రవారం(సెప్టెంబర్‌ 4) తెలుగు రాష్ట్రాల్లో డబ్‌ చేసి రిలీజ్‌ చేశారు. మరి అక్కడ హిట్‌ అయిన ఈ మూవీ తెలుగు ఆడియెన్స్ ని ఆకట్టుకుందా అనేది రివ్యూలో తెలుసుకుందాం.

ఆష్లే (మమితా బైజు) కాలేజీ స్టూడెంట్. గిటార్ ప్లే చేయడం తన హాబీ. ఆష్లే కుటుంబం ఇల్లు మారడంతో పక్క ఇంట్లో జస్టిన్ (నివిన్ పౌలీ) ఫ్యామిలీ ఉంటుంది. వయసుపైబడినా గానీ జస్టిన్‌కు పెళ్లి చేసుకోకుండా బ్రహ్మచారిగానే ఉంటూ.. క్యాటరింగ్ బిజినెస్ చేస్తుంటాడు. అలాంటి జస్టిన్‌తో అష్లేకి పరిచయం ఏర్పడి తొలుత స్నేహంగాను, ప్రేమగాను మారుతుంది. అయితే ఏజ్ గ్యాప్ కారణంగా పెళ్లికి ఆష్లే, బెత్లెహెమ్‌ కుటుంబం నుంచి అభ్యంతరాలు వ్యక్తం కావడంతో వారి లవ్ బ్రేకప్ జరిగి పై చదువులకు విదేశాలకు వెళ్లిపోతుంది. ఆ తర్వాత ఓ పెళ్లి కోసం మళ్లీ తన ఊరికి రావడంతో జస్టిన్‌కు చేరువ అవుతుంది. మరి వీరిద్దరు లవ్‌ ట్రాక్ మళ్లీ మొదలైందా? అది ఎలాంటి పరిణామాలకు దారితీసింది. ఆష్లే ఫ్యామిలీ కట్టుబాట్లు ఎలా ఉన్నాయి? ఆమె కాలేజ్ లైఫ్ ఎలా సాగింది? జస్టిన్ ఎందుకు పెళ్లి చేసుకోకుండా ఒంటరిగా ఉండిపోయాడు? ఆష్లే, జస్టిన్ మధ్య పరిచయం, ప్రేమ ఎలా స్టార్ట్ అయ్యింది? లేటు వయసులో ప్రేమలో పడిన జస్టిన్ ఫీలింగ్స్ ఏమిటి? వీరి ప్రేమకు అసలు అడ్డంకి ఏంటి? విదేశాలకు వెళ్లి పెళ్లి కోసం వచ్చిన ఆష్లే లైఫ్‌లో మళ్లీ ఎలాంటి సంఘటనలు చోటు చేసుకొన్నాయి? బెత్లెహోం కుటుంబ యూనిట్ అంటే ఏమిటి? అనే ప్రశ్నలకు సమాధానమే ఈ సినిమా కథ.

ఏజ్‌ గ్యాప్‌ లవ్‌ స్టోరీ, ఫన్‌ ప్రధానంగా సాగే ఫ్యామిలీ ఎంటర్‌టైనర్‌ చిత్రమిది. హీరోయిన్‌ విదేశాల నుంచి ఇంటికి వచ్చాక గతాన్ని గుర్తు చేసుకోవడంతో కథ స్టార్ట్ అవుతుంది. ప్రారంభంలో అష్లే పాత్ర తీరుతెన్నులు, వారి ఫ్యామిలీ బ్యాక్‌ గ్రౌండ్‌ని పరిచయం చేశారు. ఆ తర్వాత జస్టిన్‌ క్యారెక్టర్‌ని, అతను చేసే పనులను చూపించారు. అనంతరం జస్టిన్‌ ఇంటి పక్కనే అష్లే ఫ్యామిలీ షిఫ్ట్ కావడంతో అసలు కథ స్టార్ట్ అవుతుంది. ప్రారంభంలోనే జస్టిన్‌ని చూసి అష్లే ఆశ్చర్యపోవడం, షాక్‌ గురి కావడంతో కథపై ఆసక్తి పెరుగుతుంది. ఈ క్రమంలో ఇద్దరి మధ్య పరిచయం ఆ తర్వాత ప్రేమగా మారిన సన్నివేశాలతో సాగుతుంది. అయితే ఇది రెగ్యూలర్‌ లవ్‌ స్టోరీ కాదు, ఆ లవ్‌ ట్రాక్‌ విభిన్నంగా ప్రారంభమవుతుంది. హీరో తమ్ముడు తీసే షార్ట్ ఫిల్మ్ హడావుడి కూడా ఇందులో కీలక పాత్ర పోషిస్తుంది. ఓ వైపు జస్టిన్‌ తమ్ముడు చేసే రచ్చ నవ్విస్తుంది. మరోవైపు అష్లే, జస్టిన్‌ మధ్య లవ్‌ ట్రాక్‌ దోబూచులాడుతుంది. ఫీల్‌ గుడ్‌గా ఫన్నీగా సాగుతుంది. ఇలా మొదటి భాగం వరకు లవ్‌ ట్రాకులు, కామెడీ, పంచ్‌ డైలాగ్‌లతో నవ్విస్తూ అలరిస్తుంది. సెకండాఫ్‌ తర్వాత సినిమా ఎమోషనల్ సైడ్‌ వెళ్తుంది. హీరోహీరోయిన్లు ప్రేమని ఎక్స్ ప్రెస్‌ చేసుకోవడం ఫీల్‌గుడ్‌గా సాగుతుంది. ఉత్కంఠభరితంగా ఉంటుంది. అయితే వీరి ప్రేమ పెద్దలకు తెలిశాక చోటు చేసుకునే సన్నివేశాలు ఎంగేజింగ్‌గా ఉంటాయి. నెక్ట్స్ ఏం జరుగుతుందనే ఉత్కంఠని పెంచుతాయి. అందులోనూ జస్టిన్‌ తమ్ముడి లవ్‌ ట్రాక్‌ పంచాయితీ నవ్వులు పూయిస్తుంది. మరోవైపు అమ్మాయి విషయంలో హీరో చేసే పనులు ఇంట్రెస్టింగ్‌గా ఉంటాయి. సెకండాఫ్‌లో కొంత ఫన్, ఇంకొంత ఎమోషనల్‌గా, అలాగే ఫీల్‌ గుడ్‌ లవ్‌ ట్రాక్‌ మేళవింపుగా రన్‌ అవుతుంది. లవ్‌ బ్రేకప్‌ సీన్లు హార్ట్ ని టచ్‌ చేస్తాయి. ఏజ్‌ గ్యాప్‌ సీన్లు నవ్విస్తాయి. దీనిపై కుర్రాళ్లు వేసే పంచ్‌లు నవ్విస్తాయి. ఓవరాల్‌గా ఎమోషనల్‌ వైపు తీసుకెళ్లి ముగించిన తీరు బాగుంది. సినిమాలో కామెడీ, లవ్‌ ట్రాక్‌లు, ట్రెండీ, పంచ్‌ డైలాగ్‌లు, జెంజీ, ఓల్డ్ కి సంబంధించిన సీన్లు హైలైట్‌గా నిలుస్తాయి. పాటలు అదిరిపోయాయి. ఆర్‌ఆర్‌ ఆకట్టుకుంది. విజువల్‌గా బాగుంది. కానీ సినిమా చాలా ల్యాగ్‌ అనిపిస్తుంది. లెన్తీ ఫీలింగ్‌ కలుగుతుంది. కొంత ట్రిమ్‌ చేయోచ్చు. కామెడీ అన్ని చోట్ల ఆశించిన స్థాయిలో పండలేదు. కాకపోతే కామెడీ సహజంగా ఉండటం విశేషం. ఇదే సినిమాకి హైలైట్‌గా నిలుస్తుంది. ఇదొక క్లీన్‌ ఫ్యామిలీ ఎంటర్‌టైనర్‌ కావడం మరో విశేషం.

జస్టిన్‌ పాత్రలో నివిన్ పౌలీ ఇరగదీశాడు. సెటిల్డ్ గా చేసి మెప్పించాడు. ఏజ్డ్ పర్సన్‌ అనిపిస్తూనే ట్రెండ్‌ని ఫాలో కావడం, బాధ్యతగా వ్యవహరించే తీరు ఆకట్టుకుంటుంది. ఎమోషనల్‌ సీన్లలో దుమ్ములేపాడు. ఇంకా చెప్పాలంటే పాత్రలో నివిన్‌ జీవించేశాడు. ఎక్కడా నివిన్‌ కనిపించడు జస్టిన్‌ పాత్రనే కనిపిస్తుంది. అంత బాగా చేశాడు. అష్లే పాత్రలో మమితా బైజు పోటీ పడి నటించింది. కొంత ఫన్నీగా, మంచి అమ్మాయిగా, ప్రేమికురాలిగా, డేరింగ్‌ పర్సన్‌గా ఆకట్టుకుంది. పాత్రలో పరకాయ ప్రవేశం చేసింది. నివిన్‌, మమితా బైజు మధ్య కెమిస్ట్రీ సూపర్‌గా వర్కవుట్ అయింది. గిరీష్ రాసిన డైలాగ్స్ ఇద్దరి పాత్రలను బాగా పండించేలా చేసింది. తమ్ముడి పాత్రలో సంగీత్ ప్రతాప్ ఈ సినిమాకు స్పెషల్ ఎట్రాక్షన్. తనదైన బాడీ లాంగ్వేజ్‌తో మంచి హ్యుమర్‌ను సినిమాకు అందించాడు. సినిమాకి మరో హైలైట్‌గా నిలిచాడు. అలాగే హీరోయిన్‌ మేనమామ, హీరోయిన్‌కి లైన్‌ వేసే కుర్రాడు, హీరో తండ్రి, హీరోయిన్‌ తండ్రి పాత్రలు చేసిన వారు కూడా నవ్వించారు. వారి పాత్రలు ఆకట్టుకుంటాయి. మిగిలిన వారు ఓకే అనిపించారు.

సాంకేతిక విభాగాల పనితీరు విషయానికి వస్తే.. ఈ సినిమాకు సినిమాటోగ్రఫి, మ్యూజిక్, స్క్రీన్ ప్లే, డైలాగ్స్ హైలైట్స్ గా నిలిచాయి. విష్ణు విజయ్ అందించిన పాటలు, బ్యాక్ గ్రౌండ్ మ్యూజిక్ ఫీల్‌గుడ్ ఫ్యాక్టర్స్‌ను పెంచింది. ఆడియెన్స్ ని కట్టిపడేసేలా ఉన్నాయి. కెమెరామెన్‌ అజ్మల్ సాబు సినిమాను విజువల్‌ ట్రీట్‌గా మార్చారు. ఎడిటింగ్‌ పరంగా కొంత జాగ్రత్త తీసుకోవాల్సింది. ఫాహద్ ఫాజిల్, దిలీష్ పోతన్, శ్యామ్ పుష్కరన్, భవన్ స్టూడియోస్ నిర్మాణ విలువలు టాప్ క్లాస్‌గా ఉన్నాయి. దర్శకుడు గిరీష్‌ ఎంచుకున్న కథ బాగుంది. దాన్ని అంతే బాగా తెరపై ఆవిష్కరించారు. కొంత డిటెయిలింగ్‌ పోయే క్రమంలో ల్యాగ్‌ ఫీలింగ్‌ కలుగుతుంది. తెలుగు డైలాగ్‌లు సినిమాకి హైలైట్‌గా నిలుస్తాయి. ఓవరాల్‌గా మూవీ అన్ని వర్గాల వారికి నచ్చే మూవీ అవుతుంది. ఫన్‌ని ఎంజాయ్‌ చేస్తారు. లవ్‌ని, ఎమోషన్స్ ని ఫీలవుతారు.

ఆద్యంతం నవ్విస్తూ, హృదయాన్ని కదిలిస్తూ, కట్టిపడేసే ఫీల్‌గుడ్‌ లవ్‌, కామెడీ, ఫ్యామిలీ ఎంటర్‌టైనర్‌. యూత్‌తోపాటు ఫ్యామిలీ ఆడియెన్స్ కూడా ఎంజాయ్‌ చేస్తారు.

రేటింగ్‌: 3

Sardar 2 Movie Review: సర్దార్‌ 2 మూవీ రివ్యూ.. కార్తి, ఎస్‌ జే సూర్య నటించిన మూవీ ఎలా ఉందంటే?

Aithagoni Raju — Thu, 10 Sep 2026 17:39:22 +0530

Sardar 2 Movie Review: పి.ఎస్. మిత్రన్ దర్శకత్వంలో కార్తి, ఎస్.జె. సూర్య నటించిన 'సర్దార్ 2' సినిమా ప్రపంచవ్యాప్తంగా గురువారం రిలీజైంది. ఈ స్పై థ్రిల్లర్ మూవీ ఎలా ఉందో రివ్యూలో తెలుసుకుందాం.

2022లో వచ్చిన 'సర్దార్' సినిమాకు ప్రేక్షకుల నుంచి మంచి రెస్పాన్స్ వచ్చింది. దానికి కొనసాగింపుగా ఇప్పుడు 'సర్దార్ 2' వచ్చింది. పి.ఎస్. మిత్రన్ డైరెక్షన్‌లో కార్తి డ్యూయల్ రోల్‌లో నటించగా, ఎస్.జె. సూర్య విలన్‌గా కనిపించారు. భారీ అంచనాల మధ్య గురువారం(సెప్టెంబర్‌ 10)న రిలీజైన ఈ సినిమా ఎలా ఉందో రివ్యూలో చూద్దాం.

'వాల్రస్' అనే ఓ సీక్రెట్ ఏజెంట్ కోసం మన గూఢచార సంస్థ వెతుకుతుండటంతో సినిమా స్టార్ట్ అవుతుంది. కార్తి అతన్ని వెతుక్కుంటూ వెళ్తే, ఎస్.జె. సూర్య మనుషులు కూడా అతన్ని ఫాలో అవుతారు. చివరికి వాల్రస్ చనిపోతూ, కత్తి ఆకారంలో ఉన్న ఒక తాళాన్ని కార్తికి అప్పగిస్తాడు. ఆ తాళం వెనుక ఉన్న రహస్యాన్ని ఛేదించడానికి కార్తి రంగంలోకి దిగుతాడు. అప్పుడే అలాంటివి మరో రెండు తాళాలు ఉన్నాయని, ఆ మూడు కలిస్తే ఒక పెద్ద 'బయో-అపోకలిప్స్'కు దారితీసే ప్రమాదకరమైన దాన్ని తెరవొచ్చని తెలుస్తుంది. మానవజాతిలో చాలామందిని నాశనం చేయడమే ఎస్.జె. సూర్య ప్లాన్. కానీ ఈ కథ ఇవాళ మొదలైంది కాదు, దీని మూలాలు 1981లోనే ఉన్నాయని కార్తి కనిపెడతాడు. 1981లో జరిగిన ఓ పెద్ద బయోలాజికల్ విపత్తును ఆపి దేశాన్ని కాపాడింది సర్దార్ అని కొడుకు విజయ్ ప్రకాష్‌కి తెలుస్తుంది. కానీ ఆ ఘటనలో ఓ గ్రామం మొత్తం తీవ్రంగా నష్టపోతుంది. సుమారు 3,000 మంది ఉన్న ఆ గ్రామంలో, సర్దార్ కేవలం 54 మందిని మాత్రమే యాంటీడోట్ సహాయంతో కాపాడగలుగుతాడు. అందరినీ కాపాడతానని ఇచ్చిన మాట నిలబెట్టుకోలేకపోయాననే అపరాధభావం సర్దార్‌ను ఏళ్ల తరబడి వెంటాడుతుంది. మరి, ఎప్పుడో ఆపిన ఆ విపత్తును మళ్లీ ఎస్.జె. సూర్య ఎందుకు సృష్టించాలనుకుంటున్నాడు? అతని లక్ష్యం ఏంటి? సర్దార్ మళ్లీ ఆ ప్రమాదాన్ని ఆపాడా? అన్నదే మిగతా కథ.

మొదటి భాగంలో నీటి సమస్యపై డైరెక్టర్ పి.ఎస్. మిత్రన్ సమాజానికి ఒక ముఖ్యమైన హెచ్చరిక చేశారు. ఈ రెండో భాగంలో 'కొలిస్టిన్' అనే యాంటీబయాటిక్‌ను తప్పుగా వాడితే భవిష్యత్తులో ఎలాంటి పెను విపత్తు వస్తుందో చూపించారు. దీన్ని కేవలం సీరియస్‌గా చెప్పకుండా, ఎస్.జె. సూర్య, యోగి బాబు, నిళల్‌గళ్ రవి పాత్రల ద్వారా కామెడీతో, ఆసక్తికరంగా నడిపించడం సినిమాకు పెద్ద ప్లస్. నవ్విస్తూనే ఆలోచింపజేసేలా ఈ సీన్స్ ఉంటాయి. దర్శకుడు పీఎస్ మిత్రన్ తన సినిమాల్లో సామాజిక అంశాలను ప్రస్తావిస్తూ ప్రేక్షకులకు సందేశం ఇచ్చే ప్రయత్నం చేస్తుంటారు. ‘సర్దార్’లో ప్లాస్టిక్ బాటిల్స్ వినియోగంపై అవగాహన కల్పించిన దర్శకుడు ‘సర్దార్ 2’లో మనం తీసుకునే ఆహారం, అందులో కలిసే మందులు, యాంటీబయాటిక్స్ ప్రభావాన్ని కోలాస్టిన్ (Colastin) అంశం ద్వారా చూపించారు. పాయింట్ మంచిదే అయినా.. దాన్ని తెరపై ఆసక్తికరంగా చెప్పడంలో మాత్రం విఫలమయ్యారు.

స్పై థ్రిల్లర్‌కు కమర్షియల్ అంశాలను జోడించడంతో సినిమా బాగా సాగదీసినట్టు అనిపిస్తుంది. సీరియస్ సన్నివేశాల మధ్య వచ్చే కామెడీ కూడా కథ ఫ్లోను దెబ్బతీసింది. జపాన్ నుంచి కోలాస్టిన్ దొంగిలించే ఎపిసోడ్, ప్రీ క్లైమాక్స్, క్లైమాక్స్ సన్నివేశాలు ఆశించిన స్థాయిలో థ్రిల్ ఇవ్వవు. విలన్ ఫ్లాష్‌బ్యాక్ తర్వాత సినిమా సాధారణ రివెంజ్ డ్రామాగా మారుతుంది. మూడు గంటల నిడివి కూడా మైనస్‌గా మారింది. దానికి తోడు కామెడీ, ఎమోషనల్ ట్రాక్‌లను కూడా రొటీన్‌గా రాసుకోవడంతో సినిమా మరింత సాగతీతగా మారింది. తెలుగు డబ్బింగ్‌ కూడా దారుణంగా ఉంది. ఏమాత్రం సహజంగా అనిపించలేదు. అది పెద్ద మైనస్‌గా చెప్పొచ్చు.

కార్తి... సర్దార్, విజయ్ ప్రకాష్ అనే రెండు పాత్రల్లో తన నటనతో అదరగొట్టాడు. ముఖ్యంగా సర్దార్ ఫ్లాష్‌బ్యాక్ సీన్స్, యాక్షన్ ఎపిసోడ్స్, ఇంటర్వెల్ ఎంట్రీ అభిమానులను ఆకట్టుకుంటాయి. ఎస్.జె. సూర్య విలన్‌గా మరోసారి తన యూనిక్ యాక్టింగ్‌తో మెప్పించాడు. ఆయన కనిపించే ప్రతి సీన్‌లో విలనిజం బలంగా కనిపిస్తుంది. ముఖ్యంగా యోగి బాబు, నిళల్‌గళ్ రవితో ఆయన కాంబినేషన్ సీన్స్‌కు థియేటర్లో విజిల్స్ పడతాయి. మాళవిక మోహనన్ ఏజెంట్ పాత్రను బాగా హ్యాండిల్ చేసింది. నాజర్, అవినాష్, ఆషికా రంగనాథ్, బాబు ఆంటోనీ, యోగి బాబు వంటి మిగతా నటులు కూడా తమ పాత్రలకు పూర్తి న్యాయం చేశారు.

సినిమాలో యాక్షన్ సీన్స్ పెద్ద బలం. సినిమాటోగ్రఫీ, VFX లాంటి టెక్నికల్ అంశాలు సినిమాకు గ్రాండియర్ లుక్ ఇచ్చాయి. సామ్ సి.ఎస్. బ్యాక్‌గ్రౌండ్ మ్యూజిక్ చాలా కీలకమైన సీన్లకు బలాన్నిచ్చింది. ముఖ్యంగా యాక్షన్, మాస్ సీన్స్‌లో బీజీఎం బాగా వర్కవుట్ అయింది. కార్తి-ఎస్.జె. సూర్య నటన, బలమైన క్యారెక్టర్ డిజైన్, 'కొలిస్టిన్' పై సోషల్ మెసేజ్, యాక్షన్ సీన్స్, టెక్నికల్ వర్క్, సపోర్టింగ్ యాక్టర్స్ నటన సినిమాకు ప్లస్ పాయింట్స్. అయితే ఎమోషనల్‌గా మూవీ కనెక్ట్ కాలేదు. టెక్నీకల్‌గా బాగున్నా, దర్శకుడు సినిమాని రక్తికట్టేలా తెరకెక్కించడంలో విఫలమయ్యాడు. లాజిక్‌ లెస్‌గా, ఆకట్టుకునేలా రూపొందించడంలో తడబాటు కనిపిస్తుంది. దీంతో అది సినిమా ఫలితంపై దెబ్బ పడిందని చెప్పొచ్చు.

మొత్తంగా సందేశం బాగున్నా.. ఎగ్జిక్యూషన్ ఆకట్టుకోలేదు. కార్తీ, పీఎస్ మిత్రన్ అభిమానులను, సగటు ప్రేక్షకులను ‘సర్దార్ 2’ నిరాశపరుస్తుంది. మంచి పాయింట్‌ను ఆసక్తికరమైన స్పై థ్రిల్లర్‌గా మలచడంలో దర్శకుడు విఫలమయ్యారు.

రేటింగ్‌: 2

Hello Brother Review: ఏఎన్నార్ వద్దని మొత్తుకున్నా నాగార్జున వినకుండా చేసిన సినిమా, చిరంజీవి మిస్సైన హలో బ్రదర్ మూవీ రివ్యూ..

Mahesh Jujjuri — Wed, 02 Sep 2026 08:30:17 +0530

Hello Brother Review: అక్కినేని హీరో నాగార్జున నటించిన అద్భుతమైన సినిమాల్లో హలో బ్రదర్ ఒకటి. అక్కినేని నాగేశ్వరావుతో పాటు ఇండస్ట్రీలో చాలామంది వద్దు అన్నా సరే నాగార్జున ఏ దైర్యంతో ఈసినిమా చేశారు? చిరంజీవి ఈమూవీని రిజెక్ట్ చేయడానికి కారణం ఏంటి?

తెలుగు సినిమా చరిత్రలో 90s టైమ్ అద్భుతమనే చెప్పాలి. అప్పుడే అదిరిపోయే సినిమాలెన్నో వచ్చాయి. ఎంటర్టైన్మెంగ్ తో పాటు సెంటిమెంట్, ఎమోషనల్, యాక్షన్ మూవీస్ సందడి చేశాయి. అలాంటి సినిమాల లిస్ట్ లో ‘హలో బ్రదర్’ కచ్చితంగా ముందువరుసలో ఉంటుంది. ఈవీవీ సత్యనారాయణ దర్శకత్వంలో, అక్కినేని నాగార్జున ద్విపాత్రాభినయంలో రూపొందిన ఈ చిత్రం 1994 ఏప్రిల్ 20న విడుదలై బాక్సాఫీస్ వద్ద రికార్డు కలెక్షన్లు సాధించింది. నాగార్జున మాస్, క్లాస్ లుక్స్‌తో పాటు రమ్యకృష్ణ, సౌందర్యల గ్లామర్, రాజ్-కోటి సంగీతం ఈ చిత్రాన్ని ఆల్‌టైమ్ బ్లాక్‌బస్టర్‌గా నిలబెట్టాయి.

మిసెస్ అండ్ మిస్టర్ చక్రవర్తి (శరత్ బాబు, సంగీత) దంపతులకు కవల పిల్లలు జన్మిస్తారు. జన్మతః వీరిద్దరికీ ఒక విచిత్రమైన కనెక్షన్ (రిఫ్లెక్స్ యాక్షన్) ఉంటుంది. ఒకరికి నొప్పి కలిగితే మరొకరికి స్పందన రావడం, ఒకరు కదిలితే మరొకరు కూడా అదే పనిచేయడం వీరి ప్రత్యేకత. అయితే, విశ్వనాథ్ ఉద్యోగరీత్యా ఒక ప్రమాదకరమైన క్రిమినల్ మిట్రా (నెపోలియన్)ని అరెస్ట్ చేసే క్రమంలో, మిట్రా ఈ కవలలలో ఒకరిని ఎత్తుకెళ్లి ఆసుపత్రి నుంచి తప్పించుకుంటాడు.

ఈ క్రమంలో ఒక బాబు (దేవా) కూలిపనులు చేసుకునేవారికి దొరుకుతాడు. వారికి అప్పటికే ఓ ఆడపిల్ల కూడా ఉంటుంది. రోడ్డుపై రఫ్ అండ్ టఫ్ వాతావరణంలో దేవా (నాగార్జున) పెరిగి పెద్దవాడవుతాడు. మరో బాబు (రవి వర్మ) తన తల్లిదండ్రుల వద్దే పెరిగి విదేశాలలో చదువుకుని పెద్ద మ్యూజిషియన్‌గా ఇండియాకు తిరిగివస్తాడు.

దేవా స్థానిక రౌడీలతో గొడవపడుతూ మాస్ క్యారెక్టర్‌గా మారితే, రవి వర్మ అత్యంత సాఫ్ట్ అండ్ క్లాస్ కుర్రాడిగా ఉంటాడు. దేవాను చక్రవర్తి ఫ్రెండ్ (గిరిబాబు) కూతురు మంగ (రమ్యకృష్ణ) ప్రేమిస్తుంది. రవి వర్మను తన ఈవెంట్ మేనేజర్ అక్కమాంబ( అన్నపూర్ణమ్మ) కూతురు ఊహ (సౌందర్య) ప్రేమిస్తుంది. విధి వశాత్తూ ఈ ఇద్దరు అన్నదమ్ములు ఒకే నగరంలో కలుసుకున్నప్పుడు వారి రిఫ్లెక్స్ చర్యల వల్ల ఎలాంటి అలజడి సృష్టింపబడింది? వీరిద్దరూ తమ అసలు గుర్తింపును ఎలా తెలుసుకున్నారు? మిశ్రో(చరణ్ రాజ్) పగ నుంచి కుటుంబాని ఎలా కాపాడుకున్నారు? అనేదే మిగతా కథ. ఈ సినిమా కథలో మధ్య మధ్యలో కోటా శ్రీనివాసరావు, మల్లికార్జునరావుతో పాటు బ్రహ్మానందం కామెడీ సీన్లు కడుపు నొప్పి పుట్టించేవిధంగా నవ్విస్తాయి.

ఈ సినిమాలో నాగార్జున నటన ఆయన కెరీర్‌లోనే ఒక మైలురాయి. 'దేవా'గా మాస్ డైలాగ్ డెలివరీ, నడక, డాన్సులు, ఫైట్లలో ఈలలు వేయించారు. ఇక 'రవి వర్మ'గా సాఫ్ట్ అండ్ జెంటిల్‌మన్ క్యారెక్టర్‌లో మెప్పించారు. రెండు పాత్రల మధ్య వ్యత్యాసాన్ని బాడీ లాంగ్వేజ్‌తో చాలా స్పష్టంగా చూపించారు. కింగ్ చూపించిన వేరియేషన్స్ కు అభిమానులు ఉర్రూతలూగిపోయారు. ముఖ్యంగా మాస్ పాత్రలో సుర్రు సుమ్మైపోద్ది అంటూ నాగ్ చెప్పిన డైలాగ్స్ గట్టిగా పేలాయి.

రమ్యకృష్ణ విషయానికి వస్తే.. గ్లామర్ డోస్ పెంచి దేవా కాంబినేషన్‌లో వచ్చే సన్నివేశాల్లో జీవించింది రమ్యకృష్ణ. నాగార్జునతో ఆమె కెమిస్ట్రీ అదిరిపోయింది. ఇద్దరు పోటీ పడి మాస్ పాత్రను పండించారు. ముఖ్యంగా పాటల్లో వారి డాన్స్ మూమెంట్స్ థియేటర్లలో విపరీతమైన రచ్చ చేశాయి. ఇక సౌందర్య గురించి ప్రత్చేకంగా చెప్పాల్సింది ఏముంటుంది... రవి వర్మ సరసన హోమ్లీ అండ్ క్లాసీ లుక్‌తో ఆకట్టుకున్నారు. తన క్యూట్ ఎక్స్‌ప్రెషన్స్‌తో ప్రేక్షకులను ఆకట్టుకున్నారు.

వీరితో పాటు బ్రహ్మానందం, ఆలీ , కోటా, మల్లికార్జున రావు, సుత్తివేలు, గిరిబాబు, బాబు మోహన్ కామెడీ ట్రాక్ సినిమాకు ప్రధాన బలం. విలన్ గా చరణ్ రాజ్.. క్రూరమైన పాత్రలో అద్భుతంగా నటించాడు. ఇక అలనాటి సీనియర్ నటుడు రాజనాలకు ఇది చివరి సినిమాకాగా.. ఇతర నటీనటులు తమ పాత్ర పరిది మేరకు అలరించారు.

కామెడీ చిత్రాలను తెరకెక్కించడంలో ఈవీవీ సిద్ధహస్తుడు. ద్విపాత్రాభినయం, అందులోనూ రిఫ్లెక్స్ యాక్షన్ అనే విచిత్రమైన పాయింట్‌ను స్క్రీన్‌ప్లేలో ఎక్కడా కన్‌ఫ్యూజన్ లేకుండా లాజిక్‌ను పక్కనబెట్టి కేవలం కామెడీ, ఎమోషనల్ పాయింట్ మీదనే సినిమాను నడిపించారు. అప్పటివరకు రాజేంద్ర ప్రసాద్ తో మాత్రమే సినిమాలు చేస్తూ వచ్చిన ఈవివికి.. మొదటి అవకాశం ఇచ్చిన స్టార్ హీరో నాగార్జున. ఆయనతో సినిమా చేసేప్పుడు చాలా జాగ్రత్తగా వ్యవహరించారు.

‘హలో బ్రదర్’ సినిమాకు ప్రాణం పోసిన అంశాలలో మ్యూజిక్ కూడా ఉంది. ఈ సినిమా ఆల్బమ్ నాటి యూత్‌ను ఊపేసింది. "ప్రియరాగాలే", "కన్నెపిట్టరో కన్ను కొట్టరో", "అబ్బా ఏందెబ్బా", "క్కండయ్యా బాబు వచ్ఛిందయ్యా బండి ", "మనసిచ్చీ ఇచ్చీ బరువాయే" – ఇలా ప్రతి పాట ఒక చార్ట్‌బస్టరే. దీనితో పాటు వర్మన్ సినిమాటోగ్రఫీ ఆ కాలానికి తగినట్లుగా చాలా బ్రైట్‌గా ఉంటుంది. ఎడిటర్ రవీంద్రబాబు ఇద్దరు నాగార్జునలు ఒకే ఫ్రేమ్‌లో కనిపించే ద్విపాత్రాభినయం (Split screen / Croma) సీన్లను చాలా చక్కగా కుదిర్చారు.

బాక్సాఫీస్ బ్లాక్ బస్టర్ ..

కేవలం ₹2.5 కోట్ల బడ్జెట్‌తో తెరకెక్కిన ఈ చిత్రం, అప్పట్లో దాదాపు ₹11.25 కోట్ల గ్రాస్ వసూలు చేసి సరికొత్త రికార్డు సృష్టించింది. 1994లో అత్యధిక వసూళ్లు సాధించిన తెలుగు చిత్రంగా నిలిచింది. అంతే కాదు ఈ సినిమాకు గాను నాగార్జునకు బెస్ట్ యాక్టర్‌గా నంది అవార్డు దక్కింది. అలాగే బెస్ట్ మ్యూజిక్ డైరెక్టర్‌గా రాజ్-కోటి, బెస్ట్ ఎడిటర్‌గా రవీంద్రబాబు నంది అవార్డులు అందుకున్నారు

నాగార్జున డూప్ గా స్టార్ హీరో..

హలో బ్రదర్ సినిమా1992లో వచ్చిన హాలీవుడ్ సినిమా 'ట్విన్ డ్రాగన్స్' (జాకీచాన్ నటించిన చిత్రం) ఆధారంగా తెరకెక్కింది.

హలో బ్రదర్ సినిమా చేయొద్దని ఇండస్ట్రీలో చాలా మంది నాగార్జునకి ఫోన్ చేసి చెప్పారట. ఈ ప్రాజెక్టుని పక్కన పెట్టామని ఏఎన్నార్ కూడా గట్టిగా చెప్పారట. కానీ నాగార్జునలో ఏదో తెలీని కాన్ఫిడెన్స్ అలా ముందుకు నడిపించింది.

రమ్యకృష్ణ పోషించిన 'మంగతాయారు' పాత్ర కోసం మొదట నటి రంభను అనుకున్నారు. డేట్స్ కుదరకపోవడంతో ఆమె తప్పుకోగా, రమ్యకృష్ణ ఆ పాత్రను అద్భుతంగా పండించింది. అయితే రంభ "కన్నెపెట్టరో" పాటలో గెస్ట్ అప్పీయరెన్స్ ఇచ్చింది.

నాగార్జునకి డూప్ గా శ్రీకాంత్ నటించారు. ఇవివి గారికి ప్రియమైన శిష్యుడు శ్రీకాంత్. కాబట్టి డూప్ గా చేయడానికి వెంటనే ఒప్పుకున్నాడు.

చిరంజీవి మిస్ అయ్యాడు.. నాగార్జున హిట్ కొట్టాడు..

హలో బ్రదర్ సినిమా కథను ఈవీవీ సత్యనారాయణ నాగార్జున కోసం రాసుకోలేదు.. ఈ కథను ముందుగా చిరంజీవి కోసం తయారు చేసుకొని ఆయనకు వినిపించారట. కానీ, అప్పటికే డ్యుయల్‌ రోల్‌ సినిమాలు చేసి ఉండటంతో ఈవీవీ కథను చిరంజీవి తిరస్కరించాడు. దీంతో ఈ కథ నాగార్జున దగ్గరకు వెళ్లింది. ఆయన ఒప్పుకోవడంతో ఎవర్‌గ్రీన్‌ క్లాసిక్‌ సినిమాల్లో ఒకటిగా నిలిచింది. 'శివ', 'ప్రెసిడెంట్ గారి పెళ్లాం' తర్వాత నాగార్జునకు మాస్ ఆడియన్స్‌లో ఉన్న ఇమేజ్‌ను ఈ సినిమా మరో మెట్టు పైకి తీసుకెళ్లింది.

ఈ సినిమా తెలుగులో సాధించిన అపారమైన విజయం చూసి హిందీలో సల్మాన్ ఖాన్, కరిష్మా కపూర్, రంభ కాంబినేషన్‌లో డేవిడ్ ధావన్ ‘జుడ్వా’ (1997) పేరుతో పునర్మించారు. ఆ తర్వాత 'జుడ్వా 2' (వరlevel ధావన్) కూడా వచ్చింది. తమిళంలో కార్తీతో 'సిరుతై' దర్శకుడు శివ తీయడానికి పునాది పడింది.

ప్లస్ పాయింట్స్ :

నాగార్జున ద్విపాత్రాభినయం , కామెడీ టైమింగ్.

రాజ్-కోటి అందించిన బ్లాక్‌బస్టర్ మ్యూజిక్.

ఈవీవీ మార్కు నాన్‌స్టాప్ కామెడీ - ఎంటర్‌టైన్‌మెంట్.

రమ్యకృష్ణ, సౌందర్య గ్లామర్ ‌- పర్‌ఫార్మెన్స్.

మైనస్ పాయింట్స్:

లాజిక్‌లేని కొన్ని రిఫ్లెక్స్ యాక్షన్ సీన్లు (కామెడీ కోసం వదిలేస్తే సమస్య లేదు).

సెకండ్ హాఫ్‌లో రొటీన్ విలన్ ప్రతీకార కథనం.

‘హలో బ్రదర్’ ఒక పక్కా ఆల్ రౌండ్ కమర్షియల్ ఎంటర్‌టైనర్. ఎటువంటి గందరగోళం లేకుండా, రెండున్నర గంటల పాటు హాయిగా నవ్వుకోవడానికి అనువైన చిత్రం. నాగార్జున కెరీర్‌లో వన్ ఆఫ్ ది బెస్ట్ కామెడీ అండ్ మాస్, ఎమోషనల్ ఫిల్మ్‌గా ఇది ఎప్పటికీ నిలిచిపోతుంది. ఈ సినిమా ఎన్నిసార్లు చూసినా బోర్ కొట్టదు. చూడాలి అనుకునేవారికి యూట్యూబ్ లో కూడా అందుబాటులో ఉంది.

Kiku Chiranjeevi Movie Review: కికు చిరంజీవి మూవీ రివ్యూ, గుండె కుడివైపు ఉంటే.. సినిమా ఎలా ఉందంటే?

Aithagoni Raju — Fri, 28 Aug 2026 11:46:40 +0530

Kiku Chiranjeevi Movie Review: ఎడమవైపు ఉండాల్సిన గుండె కుడివైపు ఉంటే, దీని వల్ల వచ్చే సమస్యలేంటి? హీరో దాన్ని ఎలా ఎదుర్కొన్నాడు?.. ఈ క్రమంలో ఎలాంటి నాటకీయ పరిణామాలు చోటు చేసుకున్నాయనేదే `కికు చిరంజీవి`. ఈ రోజు విడుదలైన ఈ మూవీ ఎలా ఉందంటే?

కికు యనమల, కశిష్‌ ఖాన్‌ జంటగా నటించిన మూవీ `కికు చిరంజీవి`. దీని అసలు పేరు `చిరంజీవి`. కానీ టైటిల్‌ విషయంలో కొందరు అభ్యంతరాలు తెలియజేయడంతో `కికు చిరంజీవి`గా మార్చారు. ఈ మూవీకి శుభ సాయి వెంకట్‌ దర్శకత్వం వహించారు. కికు ఎంటర్‌టైన్‌మెంట్స్ పతాకంపై దీప్తి నడిమింటి నిర్మించారు. ఇందులో ఈశ్వరీరావు, తనికెళ్ల భరణి, శ్రీకాంత్‌ భరత్‌(అయ్యంగార్‌), వైవా రాఘవ, గోపరాజు రమణ ముఖ్య పాత్రలు పోషించారు. ప్రమోషన్స్ తో టీమ్‌ సినిమాపై అంచనాలను పెంచింది. మరి ఆ అంచనాలకు తగ్గట్టుగా సినిమా ఉందా? కంటెంట్‌ కొత్తగా ఉందా? ఆడియెన్స్ ని ఆకట్టుకుందా అనేది రివ్యూలో తెలుసుకుందాం.

చిరంజీవి(కికు యనమల) అరుదైన గుండె సమస్యతో బాధపడుతుంటాడు. తనొక ఫోటోగ్రాఫర్‌. అదే సమయంలో అనాథ. అలాగే మను(కశిష్‌ ఖాన్‌) కూడా అనాథ. ఆమెని శ్రీకాంత్ అయ్యంగార్‌ దత్తత తీసుకొని పెంచి పెద్ద చేస్తాడు. ఆమెకి పెళ్లి చేయాలని చూస్తాడు, కానీ పిల్లలు కనకుండా ఉండటానికి ఒప్పుకున్న అబ్బాయినే మ్యారేజ్‌ చేసుకోవాలనుకుంటుంది. తనలాగే మరొకరిని తాను దత్తత తీసుకోవాలనుకుంటుంది. దీంతో చాలా సంబంధాలు చెడిపోతాయి. ఫైనల్‌గా ఒక వ్యక్తి ఒప్పుకుంటాడు. అతన్ని కలిసేందుకే ఫ్రెండ్స్ తో కలిసి టూర్‌ వెళ్తుంటుంది. వీరి టూర్‌ని కవర్‌ చేయడానికి చిరంజీవి వస్తాడు. అనంతరం మనుని పెళ్లి చేసుకోవాలనుకున్న వ్యక్తి బస్‌ కింద పడి చనిపోతాడు. ఇది అందరిని షాక్‌కి గురి చేస్తుంది. అనంతరం వీరంతా ఫారెస్ట్ లోకి వెళ్తారు. అక్కడ కొందరు వీరిని వెంటాడుతుంటారు. దీంతో అంతా పారిపోతారు. పరిగెత్తడం వల్ల చిరంజీవికి ఆక్సిజన్‌ అందక ఒళ్లంతా నీలిరంగులోకి మారుతుంది. అప్పుడు ఆసుపత్రిలో చేర్పించడం వల్ల తన హార్ట్ కుడివైపు ఉందని చెబుతాడు. అనంతరం చిరు, మను ఫారెస్ట్ లో తప్పిపోతారు. వీరు ఫారెస్ట్ లో ఒక ప్రెగ్నెంట్‌ లేడీని కాపాడి, అటవి ప్రజల మన్ననలు పొందుతారు. కానీ బీచ్‌లో కొందరు దుండగులు చిరుపై దాడి చేసి కత్తిపోట్లు పొడుస్తారు. ఆ సమయంలో ఈశ్వరీరావు తన కారులో లిఫ్ట్ ఇచ్చి చిరంజీవి ప్రాణాలు కాపాడుతుంది. ఆమె కొడుకు విషయంలో బాధపడుతున్న ఒక రిచ్‌ లేడి. చిరుని చూడగానే ఆమె గుండెతరుక్కుపోతుంది. తన గతాన్ని గుర్తు చేయగా, చిరంజీవినే తన కొడుకని తెలుస్తుంది. దీంతో వీరిద్దరు కలిసిపోతారు. చిరంజీవికి మను కూడా పడిపోవడంతో పెళ్లి చేస్తారు. ఫస్ట్ నైట్‌ జరుగుతుంది. మను మార్నింగ్‌ లేచి చూస్తే, కుడివైపు ఉండాల్సిన చిరు గుండె ఎడమవైపు కొట్టుకుంటుంది. దీంతో షాక్‌ అవుతుంది. చిరు మారిపోయాడని ఆశ్చర్యపోతుంది. మరి ఒక్క రాత్రిలో కుడివైపు ఉండాల్సిన చిరు గుండె ఎడమవైపు ఎందుకు కొట్టుకుంటుంది? అనంతరం మను రియాక్షన్‌ ఏంటి? ఈశ్వరీరావు వీరి లైఫ్‌లోకి ఎందుకు వచ్చింది? బస్సు డ్రైవ్‌ చేసిన స్పైడర్‌ మ్యాన్‌ ఎవరు? అనంతరం ఎలాంటి ట్విస్టులు చోటు చేసుకున్నాయి, కథ ఎలాంటి మలుపు తీసుకుందనేది సినిమా.

గుండె ఎడవైపు కాకుండా, కుడివైపు ఉందనే కాన్సెప్ట్ తో ఇప్పటికే ఒకటి రెండు సినిమాలు వచ్చాయి. ఈ కాన్సెప్ట్ కొత్త కాకపోయినా, ఇందులో కొత్తగా ప్రజెస్ట్ చేసే ప్రయత్నం చేశారు మేకర్స్. `చిరంజీవి` అంటే మరణం లేనివారు, చచ్చిబతికిన వారిని పిలుస్తుంటారు. ఇందులో రెండో యాంగిల్‌ చూపించారు. సినిమాలో హీరోని చంపాలని విలన్లు కాలుస్తారు. కానీ అతను చనిపోడు. అది ఎలా జరిగిందనేది ఇందులో ఆసక్తికరం. అదే పెద్ద ట్విస్ట్. ఇక సినిమాగా చూసినప్పుడు ఇది ప్రారంభంలో హీరోహీరోయిన్ల పాత్రలని పరిచేస్తూ, టూర్ ద్వారా వీరిద్దరిని కలుపుతారు. ఈసన్నివేశాలు సరదాగా సాగుతాయి. ఈ క్రమంలోనే హీరోకి బ్రీతింగ్‌ సమస్య, హార్ట్ సమస్య ఉందని తెలుస్తుంది. అనంతరం ఫారెస్ట్ లో కొందరు దుండగులు వెంటాడటం, ఈ క్రమంలో పారిపోవడం, చిరుని రక్షించుకునేందుకు ఆమె బ్రీతింగ్‌ ఇవ్వడం వంటి సీన్లు ఆసక్తికరంగా ఉంటాయి. కాకపోతే అప్పటి వరకు కొంత స్లోగా సాగుతుంది. ఏం జరుగుతుందనేది క్లారిటీ మిస్‌ అవుతుంది. బీచ్‌లో హీరోకి కత్తిపోట్ల తర్వాత సినిమా సీరియస్‌గా మారుతుంది. అసలైన కథ అప్పుడు స్టార్ట్ అవుతుంది. హీరో లైఫ్‌లోకి ఈశ్వరీరావు రావడంతో కథ మరో మలుపు తీసుకుంటుంది. వీరు కలిసిపోవడం, హీరోహీరోయిన్లు పెళ్లి చేసుకోవడం, ఫస్ట్ నైట్‌ ఎపిసోడ్‌ ఆసక్తికరంగా ఉంటుంది. ఆ తర్వాత పెద్ద ట్విస్ట్‌ తో ఇంటర్వెల్‌.

కుడి వైపు ఉండాల్సిన హార్ట్ ఎడమవైపు కొట్టుకుంటే.. తాను ఫస్ట్ నైట్‌ చేసింది ఎవరితో అని హీరోయిన్‌ టెన్షన్‌ పడటంతో కథ ఉత్కంఠభరితంగా మారుతుంది. అతను ఎవరు? తన వాడు ఎవరనేది ఆమె పడే బాధ, స్ట్రగుల్‌, టెన్షన్‌ భయటం ఎంగేజ్‌ చేస్తాయి. అదే సమయంలో చిరంజీవిలో అనూహ్యమైన మార్పులు, సైకోలా ప్రవర్తించడం వంటి సీన్లు సినిమాపై క్యూరియాసిటీని, ఇంట్రెస్ట్ ని పెంచుతాయి. ఆయా సీన్లు ఎంగేజ్‌ చేస్తాయి. నెక్ట్స్ ఏం జరుగుతుందనే ఉత్కంఠకి గురి చేస్తాయి. సెకండాఫ్‌ మొత్తం థ్రిల్లర్‌గా మారిపోతుంది. ఆ తర్వాత అంతకు ముందు ఉన్న ట్విస్ట్ లు ఒక్కోటి రివీల్‌ అవుతాయి. చిరంజీవి పాత్రలోని ట్విస్ట్, మాస్క్ మ్యాన్‌ ఎవరు అనేది? తనికెళ్ల భరణి అమ్మాయిని పెళ్లి చేసుకునేవాళ్లని ఎందుకు టార్గెట్‌ చేస్తున్నాడు? ఫస్ట్ నైట్‌లో చిరంజీవి ఎలా మారిపోయాడు? అసలు హీరోయిన్‌ లైఫ్‌లో ఏం జరుగుతుందనేది ఆద్యంతం ఆకట్టుకుంటుంది. అయితే మొదటి భాగం స్లోగా ఉంటుంది. సీరియల్‌ని తలపిస్తుంది. సీన్లు వచ్చిపోతుంటాయి కానీ, అందులో ఎమోషన్‌ లేదు, ఫీల్‌ లేదు, లవ్‌ కనిపించదు. రొమాన్స్ కూడా అంతగా ఆకట్టుకోదు. డ్రామా ఓవర్‌గా ఉంటుంది. సహజత్వం మిస్‌ అయ్యింది. కానీ ఇంటర్వెల్‌ ట్విస్ట్ తో సినిమా ఆసక్తికరంగా మారింది. సెకండాఫ్‌ మాత్రం ఎంగేజ్‌ చేస్తుంది. సస్పెన్స్, థ్రిల్లర్‌ అంశాలు కనిపిస్తాయి. ట్విస్ట్ లు ఆకట్టుకుంటాయి. క్లైమాక్స్ ఎమోషనల్‌గా ముగుస్తుంది. ఓవరాల్‌గా మూవీ ఫర్వాలేదనిపించింది.

చిరంజీవిగా హీరో కికు యనమల అదరగొట్టాడు. ఆయన డిఫరెంట్‌ షేడ్స్ చూపించి మెప్పించాడు. ఫన్నీగా, సీరియస్‌గా కనిపించి ఆకట్టుకున్నాడు. ఆయన పాత్రలోని ట్విస్ట్ అదిరిపోయింది. అదే సినిమాకి హైలైట్‌గా నిలుస్తుంది. హీరోగా మొదటి సినిమా అయినా కికు యనమల మాత్రం రెచ్చిపోయి యాక్ట్ చేశాడు. ఆయనకు మంచి ప్రశంసలు దక్కుతాయి. ఇక మనుగా కశిష్‌ ఖాన్‌ ఉన్నంతలో ఫర్వాలేదు. నటిగా బాగా చేసే ప్రయత్నం చేసింది. కాకపోతే ఓవర్‌గా యాక్ట్ చేసింది. చిన్న ఎక్స్ ప్రెషన్స్ పెద్దగా ఇచ్చింది. ఆమె నటన కొంత అసహజంగా అనిపిస్తుంది. ఈశ్వరీరావు ఉన్నంతలో మెప్పించింది. ఆమె పాత్రలోని ట్విస్ట్ ఆకట్టుకుంటుంది. శ్రీకాంత్‌ అయ్యంగార్‌, గోపరాజు రమణ, వైవా రాఘవ, తనికెళ్ల భరణి ఫర్వాలేదనిపించారు. మిగిలిన పాత్రధారులు ఓకే అనిపించారు.

రామకృష్ణ కెమెరా వర్క్ బాగుంది. విజువల్స్ ఆకట్టుకుంటాయి. శేఖర్‌ చంద్ర మ్యూజిక్‌ ఫర్వాలేదు. ఆర్‌ఆర్‌ హైలైట్గా నిలుస్తుంది. సస్పెన్స్ అంశాలు, థ్రిల్లర్‌ అంశాల్లో బాగా చేశారు. ఛోటా కె ప్రసాద్‌ ఎడిటింగ్‌ ఫర్వాలేదు. ఇంకొంత కట్‌ చేయోచ్చు. ఉన్నంత షార్ప్ గా చేశారు. దీప్తి నడిమింటి నిర్మాణ విలువలకు కొదవ లేదు. చిన్న సినిమా అయినా బడ్జెట్‌ విషయంలో రాజీ లేకుండా నిర్మించారు. ఒక రిచ్‌ మూవీని అందించారు. దర్శకుడు శుభ సాయి వెంకట్‌ ఎంచుకున్న కథ బాగానే ఉంది. కథనం కూడా బాగుంది. కానీ తెరపై ఆవిష్కరించే విషయంలోనే కొంత తడబాటు కనిపిస్తుంది. సీరియల్‌ ఎఫెక్ట్ కనిపిస్తుంది. సెకండాఫ్‌ని బాగానే డీల్‌ చేశాడు. ట్విస్ట్ లు, డ్రామా, యాక్షన్‌, థ్రిల్లర్‌ అంశాలు బాగానే రాసుకున్నాడు. ఫన్‌, రొమాన్స్, యాక్షన్‌ అంశాలు బాగానే ఉన్నాయి. కాకపోతే ఎగ్జిక్యూషన్‌లోనే కొంత లోపం కనిపిస్తుంది. సెకండాఫ్‌ని కొంత వరకు బెటర్‌గానే చేయగలిగాడు, దీంతో సినిమా లెక్క మారిపోయింది. ఒక సారి చూడొచ్చు అనిపించేలా చేశాడు.

హార్ట్ కుడివైపు ఉండటమనే పాయింట్‌ కొత్తగా, ఆసక్తికరంగా ఉంది. అంచనాలు లేకుండా చూస్తే కొంత వరకు ఎంగేజ్‌ చేసే సర్వైవల్‌ డ్రామా థ్రిల్లర్‌ `కికు చిరంజీవి`.

రేటింగ్‌: 2.75

Aakali Rajyam 2026: 'ఆకలి రాజ్యం 2026' వెబ్ సిరీస్ రివ్యూ.. నిరుద్యోగుల కష్టాలతో అల్లిన కథ, ఎలా ఉందంటే

Tirumala Dornala — Fri, 28 Aug 2026 21:08:27 +0530

ఆహాలో ఆగస్టు 28 నుంచి స్ట్రీమింగ్ అవుతున్న ఆకలిరాజ్యం 2026 వెబ్‌సిరీస్‌లో నిరుద్యోగ యువత జీవితాలను వినోదం, భావోద్వేగాలతో చూపించారు. ఈ వెబ్ సిరీస్ ఎలా ఉందో రివ్యూలో తెలుసుకుందాం.

1980లో కమల్‌ హాసన్‌ నటించిన ఆకలిరాజ్యం నిరుద్యోగ యువత జీవితాలను తెరపైకి తీసుకొచ్చిన సినిమాగా గుర్తుండిపోయింది. ఇప్పుడు అదే పేరుతో ఆకలిరాజ్యం 2026 వెబ్‌సిరీస్‌ వచ్చింది. ఆహా ఓటీటీలో ఆగస్టు 28 నుంచి స్ట్రీమింగ్‌ అవుతున్న ఈ సిరీస్‌లో ఉద్యోగం కోసం ఎదురుచూస్తున్న ముగ్గురు యువత జీవితాలను ప్రధానంగా చూపించారు. ప్రస్తుతం మూడు ఎపిసోడ్లు అందుబాటులో ఉన్నాయి. మరి ఈ సిరీస్‌ ఎలా ఉంది, ప్రేక్షకులను ఎంతవరకు మెప్పిస్తుంది అనేది చూద్దాం.

రమేశ్‌ (వికాస్‌ వశిష్ఠ), అరుణ (గీతా సైనీ), అక్షయ్‌ (రాజేశ్‌ ఖన్నా) ఇంజినీరింగ్‌ చదువుకునే రోజుల నుంచే మంచి స్నేహితులు. చదువు పూర్తయ్యాక హైదరాబాద్‌లో ఒకే ఇంట్లో ఉంటూ ఉద్యోగాల కోసం ప్రయత్నిస్తుంటారు. ఉద్యోగం దొరకకపోవడంతో ఎదురయ్యే ఆర్థిక ఇబ్బందులతో పాటు వ్యక్తిగత జీవితాల్లోని సమస్యలు కూడా వీరిని వెంటాడుతుంటాయి. ఉద్యోగం కోసం ప్రయత్నిస్తూనే తమకంటూ సొంతంగా ఏదైనా చేయాలనే ఆలోచనలోనూ ఉంటారు. ఈ ముగ్గురి జీవితాల్లో ఎదురయ్యే పరిస్థితులు, వాటి నుంచి బయటపడేందుకు వారు చేసే ప్రయత్నాల చుట్టూనే కథ సాగుతుంది.

నిరుద్యోగం, ఉద్యోగం కోసం యువత పడే కష్టాలు అనే అంశం ఇప్పటికీ సమాజానికి దగ్గరగా ఉండటంతో సిరీస్‌ కథనం ప్రేక్షకులకు కనెక్ట్‌ అయ్యే అవకాశం ఉంది. అయితే ఈ నేపథ్యంలో ఇప్పటికే ఎన్నో సినిమాలు, వెబ్‌సిరీస్‌లు రావడంతో కథ పరంగా పూర్తిగా కొత్త అనుభూతిని ఇవ్వదు. దర్శకుడు నీలగిరి మామిళ్ల మాత్రం సీరియస్‌ అంశాన్ని వినోదాత్మకంగా చెప్పే ప్రయత్నం చేశారు. మొదటి రెండు ఎపిసోడ్లలో కామెడీకి ప్రాధాన్యం ఇవ్వగా, మూడో ఎపిసోడ్‌లో ఎమోషన్స్ ని హైలైట్ చేశారు. ప్రస్తుతానికి విడుదలైన మూడు ఎపిసోడ్లు ఓ మోస్తరుగా ఆకట్టుకుంటాయి. అయితే కొన్ని సన్నివేశాలను మరింత కుదించి ఉంటే కథనం వేగంగా సాగేది. అక్కడక్కడా వచ్చే డబుల్‌ మీనింగ్‌ సంభాషణలు కొంత ఇబ్బందిగా అనిపిస్తాయి. వచ్చే వారం విడుదల కానున్న ఎపిసోడ్లలో స్మార్ట్‌ ఫార్మింగ్‌ నేపథ్యంలో కథ పల్లె ప్రాంతానికి మారనుంది.

హైదరాబాద్‌లోని సహజమైన లొకేషన్లను ఉపయోగించుకోవడం సిరీస్‌కు ప్లస్‌గా నిలిచింది. కథకు తగ్గట్టుగా సన్నివేశాలను రూపొందించారు. ఒక్కో ఎపిసోడ్‌ సుమారు 35 నిమిషాల నిడివితో ఉండటంతో పెద్దగా సాగదీసిన అనుభూతి కలగదు. ప్రధాన పాత్రల్లో వికాస్‌ వశిష్ఠ, రాజేశ్‌ ఖన్నా, గీతా సైనీ తమ పరిధిలో చక్కగా నటించారు. అయితే కథలో కొత్తదనం తక్కువగా ఉండటంతో వారి పాత్రలకు బలంగా గుర్తుండిపోయే సన్నివేశాలు పెద్దగా దక్కలేదు. కొన్ని చోట్ల కథను ముందుకు తీసుకెళ్లేందుకు సౌకర్యవంతమైన రీతిలో రాసిన సన్నివేశాలు కూడా కనిపిస్తాయి.

ఆకలిరాజ్యం 2026లో ప్రధానంగా నిరుద్యోగ యువత ఎదుర్కొనే సమస్యలను వినోదం, భావోద్వేగాల మేళవింపుతో చూపించే ప్రయత్నం చేశారు. ఇప్పటివరకు వచ్చిన మూడు ఎపిసోడ్లు టైంపాస్‌గా అనిపిస్తాయి. కథాంశం కొత్తది కాకపోయినా ప్రస్తుత తరానికి సంబంధించిన అంశాలు ఉండటం కలిసొచ్చే అంశం.

Mangalya Balam Review: టాలీవుడ్ చరిత్రలో ఫస్ట్ 100 డేస్ సినిమా.. ఏఎన్నార్, సావిత్రి రొమాంటిక్ మూవీ, 'మాంగల్య బలం' రివ్యూ

Mahesh Jujjuri — Sun, 23 Aug 2026 11:19:27 +0530

Mangalya Balam Review: తెలుగు ఫిల్మ్ ఇండస్ట్రీ చరిత్రలో 100 రోజుల వేడుకను జరుపుకున్న తొలి మూవీ 'మాంగల్య బలం'. ఏఎన్నార్ - సావిత్రిల కాంబినేషన్‌లో వచ్చిన ఈ రొమాంటిక్ ఎమోషనల్ డ్రామాకు ఊహించని రెస్పాన్స్ వచ్చింది. ఈ సినిమా రివ్యూ చూస్తే..

అక్కినేని నాగేశ్వరరావు, సావిత్రి కాంబినేషన్‌లో వచ్చిన అద్భుతమైన కుటుంబ కథా చిత్రం 'మాంగల్య బలం' (1959). ఆదుర్తి సుబ్బారావు దర్శకత్వంలో, అన్నపూర్ణ పిక్చర్స్ పతాకంపై దుక్కిపాటి మధుసూదనరావు నిర్మించిన ఈ చిత్రం తెలుగు సినీ చరిత్రలోనే ఒక క్లాసిక్‌గా నిలిచిపోయింది. ఆశాపూర్ణాదేవి రాసిన ‘అగ్నిపరీక్ష’ నవల ఆధారంగా బెంగాలీలో వచ్చిన ‘అగ్నిపరీక్ష’ సినిమాకు ఇది అధికారిక రీమేక్.

చిన్నతనంలోనే సాంప్రదాయాల ప్రకారం కుటుంబాల మధ్య సరదాగా జరిగే పెళ్లితో, పాఠశాల వయసులోనే సరోజ (సావిత్రి), చంద్రం (ANR) ఒకే బంధంతో ముడిపడతారు. అయితే, కుటుంబాల మధ్య వచ్చిన విభేదాల వల్ల వీరు విడిపోతారు. పెద్దయ్యాక ఈ విషయం తెలియని సరోజ, కాలేజీ రోజుల్లో మళ్లీ చంద్రంతో ప్రేమలోపడుతుంది. అయితే, తాను చిన్నప్పుడే వేరొకరిని పెళ్లి చేసుకున్నాననే నింద తనపై ఉందని తెలుసుకుని ప్రేమను త్యాగం చేయడానికి సిద్ధపడుతుంది. చివరికి వారిద్దరి చిన్ననాటి పెళ్లి బంధం, ప్రస్తుత ప్రేమ ఒక్కటేనని తెలుసుకునే క్రమంలో సాగే ఎమోషనల్ స్టోరీ 'మాంగల్య బలం'.

అద్భుతమైన స్క్రీన్ ప్లే, సెంటిమెంట్‌తో ఈ మూవీ ఆడియన్స్ మనసు దోచేస్తుంది. ఊహ తెలియని వయసులో బంధం, ఆ తర్వాత కాలేజీలో కలుసుకుని తెలియకుండానే ప్రేమించుకోవడం, వారి ప్రేమకు మధ్యలో సమస్యలు రావడం.. ఇలా కథ ఎక్కడా బోర్ కొట్టించకుండా వరుస ట్విస్టులతో అద్భుతంగా తెరకెక్కించారు దర్శకుడు ఆదుర్తి సుబ్బారావు.

ఈ సినిమాలో దిగ్గజ నటులంతా నటించారు. ఎవరి నటనకూ వంక పెట్టడానికి లేదు. మరీ ముఖ్యంగా అక్కినేని నాగేశ్వరరావు చంద్రం పాత్రలో పరకాయ ప్రవేశం చేసినట్లు నటించారు. ప్రేమికుడిగా రొమాంటిక్ సన్నివేశాల్లో ఎంత మెప్పించారో, క్లైమాక్స్ సీన్స్‌లో ఎమోషన్స్‌ను అంతే అద్భుతంగా పండించారు.

ఇక మహానటి సావిత్రి గురించి ప్రత్యేకంగా చెప్పాల్సింది ఏముంది? ఆమె నటన వర్ణనాతీతం. ఎమోషనల్ సీన్స్‌లో ప్రేక్షకుల చేత కన్నీళ్లు పెట్టించారు. సంతోషం, బాధ, ప్రేమ.. అన్ని భావాలను కళ్లలోనే పలికించారు. వీరిద్దరితో పాటు ఎస్.వి. రంగారావు గంభీరమైన ప్రదర్శన ఇవ్వగా, సూర్యకాంతం, రమణారెడ్డి, రేలంగిల హాస్య సన్నివేశాలు కథలోని బరువును తగ్గించి ప్రేక్షకులను ఆద్యంతం అలరిస్తాయి.

ఎక్కడో బెంగాలీలో తీసిన సినిమాను తెలుగులోకి తీసుకువచ్చి, మన నెటివిటీకి తగ్గట్టు కథను మార్చిన తీరు అద్భుతం. దర్శకుడు ఆదుర్తి సుబ్బారావు కథను నడిపించిన తీరు, స్క్రీన్‌ప్లేను ఇప్పటి తరం ప్రేక్షకులు కూడా ఎంజాయ్ చేసే విధంగా తీర్చిదిద్దిన విధానం మెప్పించింది.

ఈ సినిమాకు తన సంగీతంతో ప్రాణం పోసిన మాస్టర్ వేణు గురించి ప్రత్యేకంగా చెప్పుకోవాలి. ఆయన అందించిన పాటలు చిత్రానికి అతిపెద్ద పిల్లర్. "ఆకాశవీధిలో అందాల జాబిలి", "వాడిన పూలే వికసించెనే" పాటలు ఇప్పటికీ శ్రోతలను మైమరిపిస్తాయి. ఇక ఆచార్య ఆత్రేయ రాసిన సంభాషణలు ప్రతి సన్నివేశానికి ప్రాణం పోశాయి.

తెలుగు సినీ పరిశ్రమ చరిత్రలోనే తొలిసారిగా ఈసినిమా 100 రోజుల వేడుకను ఓపెన్ గ్రౌండ్‌లో వేలాదిమంది అభిమానుల మధ్య నిర్వహించారు. విజయవాడలోని మునిసిపల్ హైస్కూల్ గ్రౌండ్స్‌లో అప్పటి ఆంధ్రప్రదేశ్ ముఖ్యమంత్రి కాసు బ్రహ్మానందరెడ్డి అధ్యక్షతన ఈ వేడుక అత్యంత వైభవంగా జరిగింది. 1959 జనవరి 7న విడుదలైన ఈ చిత్రం బాక్సాఫీస్ వద్ద వెండితెర వెలుగులు విరజిమ్మి 'సిల్వర్ జూబ్లీ' (25 వారాలు) జరుపుకుంది. అంతేకాకుండా 6వ జాతీయ చలనచిత్ర పురస్కారాలలో 'మెరిట్ సర్టిఫికెట్' (Certificate of Merit) కైవసం చేసుకుంది.

ఒక్క రోజులో సాంగ్ షూటింగ్ - ఆదుర్తి సమయస్ఫూర్తి

ఊటీ షూటింగ్ సమయంలో వర్షాలు, మబ్బుల వల్ల వరుసగా కొన్నిరోజులు సూర్యకాంతి సరిగ్గా రాలేదు. ప్రతికూల వాతావరణంలో కూడా ఆదుర్తి సుబ్బారావు పట్టువదలకుండా కేవలం ఒకే ఒక్క రోజులో "వాడిన పూలే వికసించెనే" అనే ఐకానిక్ పాట చిత్రీకరణను పూర్తి చేసి అందరినీ ఆశ్చర్యపరిచారు.

ఆచార్య ఆత్రేయ రాసిన మాటలు ఈ చిత్రానికి ప్రధాన బలంగా నిలిచాయి. సూర్యకాంతం నోటి వెంట వచ్చిన "యేనాటికైనా మీరు మీరు ఒకటే, నేనేగా పరాయిదాన్ని", రమణారెడ్డి వాడిన "ఇహపోతే.." అనే సంభాషణలు ఆ కాలంలో విశేష ప్రజాదరణ పొందాయి.

ప్లస్ పాయింట్స్:

ANR, సావిత్రి జోడీ కెమిస్ట్రీ మరియు నటన

కాలాతీతమైన మధురమైన పాటలు

కుటుంబ సమేతంగా చూడదగ్గ బలమైన ఎమోషన్స్

మైనస్ పాయింట్స్:

నేటి తరం ప్రేక్షకులకు కథనంలో కొంత నెమ్మదనం అనిపించవచ్చు

కాలం మారినా చెరిగిపోని అద్భుతమైన ప్రేమ, కుటుంబ విలువలతో కూడిన 'మాంగల్య బలం' ప్రతీ ఒక్కరూ తప్పక చూడాల్సిన తెలుగు సినిమా.

Hi Movie Review: 'హాయ్' మూవీ రివ్యూ.. నయనతార, కెవిన్ లవ్ స్టోరీ వర్కవుట్ అయిందా?

Aithagoni Raju — Fri, 28 Aug 2026 13:04:06 +0530

Hi Movie Review: విష్ణు ఎడవన్ దర్శకత్వంలో కెవిన్, నయనతార జంటగా నటించిన 'హాయ్' సినిమా ఇవాళ(శుక్రవారం ఆగస్ట్ 28న) రిలీజైంది. మరి ఈ సినిమా ఎలా ఉందో, ఆడియన్స్‌ను ఆకట్టుకుందో లేదో ఈ రివ్యూలో చూద్దాం.

కెవిన్, నయనతార కలిసి నటించిన కొత్త సినిమా 'హాయ్'. విష్ణు ఎడవన్ దర్శకత్వం వహించిన ఈ చిత్రానికి ముత్తు సెల్వన్ అదనపు స్క్రీన్‌ప్లే, డైలాగ్స్ అందించారు. సెవెన్ స్క్రీన్ స్టూడియోస్, రౌడీ పిక్చర్స్, జీ స్టూడియోస్ బ్యానర్లపై లలిత్‌కుమార్, నయనతార, విఘ్నేష్ శివన్, ఉమేష్ కుమార్ బన్సాల్ కలిసి నిర్మించారు. జెన్ మార్టిన్ సంగీతం అందించగా, ఫిలోమిన్ రాజ్ ఎడిటింగ్ చేశారు. ఈ చిత్రం నేడు శుక్రవారం(ఆగస్ట్ 28)న విడుదలైంది. మరి సినిమా ఎలా ఉంది? నయనతార, కెవిన్‌ లవ్‌ స్టోరీ సక్సెస్‌ అయ్యిందా అనేది రివ్యూలో తెలుసుకుందాం.

తల్లిదండ్రుల్లాగే ప్రేమించి పెళ్లి చేసుకోవాలని కెవిన్ ఆశపడతాడు. కానీ అతనికి ఆశించిన ప్రేమ దొరకదు. దీంతో ఇంట్లోవాళ్లు పెళ్లి సంబంధాలు చూడటం మొదలుపెడతారు. కానీ ప్రేమ పెళ్లినే చేసుకోవాలని ఫిక్స్ అయిన కెవిన్, ఓ లెటర్ రాసి ఇంట్లోంచి వెళ్లిపోతాడు. మరోవైపు, తల్లి ప్రేమ, తండ్రి అప్యాయత సరిగా దొరకకుండా నయనతార పెరుగుతుంది. పెళ్లిలో చిక్కుకోకుండా సొంత కాళ్లపై నిలబడాలని ఆమె అనుకుంటుంది. కానీ అనుకోకుండా ఆమెకు పెళ్లి ఏర్పాట్లు జరుగుతాయి. ఇష్టంలేని పెళ్లిని తప్పించుకోవడానికి ఆమె కూడా ఇంటి నుంచి చెన్నై వచ్చేస్తుంది. చెన్నైలో నయనతార, కెవిన్‌ కలుసుకుంటారు. మొదట స్నేహితులుగా ఉంటారు. తన మనసులో ఉన్న అమ్మాయి నయనతారే అని కెవిన్ అనుకుంటాడు. ఆమెతో ప్రేమలో పడతాడు. కానీ ప్రేమ, పెళ్లిపై తనకు పెద్దగా నమ్మకం లేదని నయనతార చెబుతుంది. దీంతో కెవిన్ తన ప్రేమను బయటకు చెప్పకుండా మనసులోనే దాచుకుంటాడు. అనుకోని పరిస్థితుల్లో ఇద్దరూ కొన్నాళ్లు భార్యాభర్తలుగా నటించాల్సి వస్తుంది. ఈ అవకాశాన్ని వాడుకుని నయనతార మనసు మార్చి, తన ప్రేమను గెలిపించుకోవాలని కెవిన్ ప్రయత్నిస్తాడు. అతని ప్రయత్నం ఫలించిందా? లేదా? అన్నదే 'హాయ్' మిగతా కథ.

కోయంబత్తూర్, కొంగు ప్రాంతానికి చెందిన యువకుడి పాత్రలో కవిన్ నటించాడు. ప్రేమ కోసం తపన, అది దొరకనప్పుడు నిరాశ వంటి ఎమోషన్స్‌ను తన నటనలో సహజంగా పలికించాడు. నయనతారతో వయసు తేడా కొన్నిచోట్ల కనిపించినా, కెవిన్ మెచ్యూర్డ్ యాక్టింగ్ ఆ లోటును కవర్ చేస్తుంది. లవ్ సీన్స్‌లోనే కాదు, కామెడీ టైమింగ్‌తోనూ ఆకట్టుకున్నాడు. ముఖ్యంగా కెవిన్ ఫ్రెండ్స్‌గా నటించిన సత్యన్, ఆదిత్య కతిర్, ఖురేషీ కామెడీ సినిమాకు ప్లస్ అయింది. సత్యన్ మైండ్ వాయిస్ సీన్లు థియేటర్‌లో నవ్వులు పూయిస్తాయి.

కొంగు ప్రాంతానికి చెందిన అమ్మాయిగా నయనతార నటించినా, ఆమె స్క్రీన్ ప్రెజెన్స్ ఎప్పటిలాగే స్టైలిష్‌గా ఉంది. మోడ్రన్ డ్రెస్సుల్లో, స్టైలిష్ లుక్‌తో ఆమె ప్రత్యేకంగా ఆకట్టుకుంటుంది. ఆమె అనుభవం చాలా సీన్లకు బలాన్నిచ్చింది. అయితే, కొన్ని సీన్లలో ఆమె వయసు పాత్రకు సరిపోలేదేమో అనిపిస్తుంది. ముఖ్యంగా కెవిన్‌తో కలిసి ఉన్న కొన్ని సీన్లలో ఈ తేడా కనిపిస్తుంది. అయినా, ఆమె స్క్రీన్ ప్రెజెన్స్, నటన సినిమాకు ఉన్న ముఖ్యమైన బలాల్లో ఒకటి. కవిన్ తల్లిదండ్రులుగా రాధిక, కె. భాగ్యరాజ్ నటించారు. నయనతార తండ్రిగా ప్రభు కనిపించారు. సుహాసిని మణిరత్నం ఓ స్పెషల్ రోల్‌లో మెరిశారు. ఈ సీనియర్ నటుల నటన సినిమాకు అదనపు బలం. అలాగే వీటీవీ గణేష్, ఫెప్సీ విజయన్, కావ్య అరివుమణి, మిర్చి కెమి, అమృతా శ్రీనివాసన్ తమ చిన్న పాత్రల్లో బాగా చేశారు.

సినిమాటోగ్రాఫర్ రాజేష్ శుక్లా సినిమాను చాలా కలర్‌ఫుల్‌గా చూపించారు. ముఖ్యంగా నయనతారను తెరపై చాలా అందంగా చూపించేలా సీన్లు తీశారు. జెన్ మార్టిన్ సంగీతంలో పాటలు పండగలా ఉన్నాయి. లవ్, ఎమోషనల్ సీన్లకు అతని బ్యాక్‌గ్రౌండ్ స్కోర్ అదనపు బలాన్నిచ్చింది. ఫిలోమిన్ రాజ్ ఎడిటింగ్ సింపుల్‌గా ఉన్న కథను సాఫీగా నడిపించింది. డైరెక్టర్ విష్ణు ఎడవన్ పెద్ద ట్విస్టులేవీ లేకుండా, పాత్రల మధ్య ఎమోషన్స్‌తోనే సినిమాను నడిపించారు.

'హాయ్' సినిమాలో పెద్ద ట్విస్టులు, ఊహించని మలుపులు ఆశించలేం. మొదట్నుంచి చివరి వరకు కథ ఎలా వెళ్తుందో ఈజీగా ఊహించవచ్చు. కానీ, పాత్రల సహజ నటన, కామెడీ సీన్లు, లవ్, ఫ్యామిలీ ఎమోషన్స్‌తో ప్రేక్షకులను ఎంటర్‌టైన్ చేయడానికి డైరెక్టర్ ప్రయత్నించాడు. ముఖ్యంగా కెవిన్ నటన, కామెడీ, సీనియర్ నటుల పెర్ఫార్మెన్స్ సినిమాకు బలంగా నిలిచాయి. మరోవైపు, కవిన్-నయనతార జోడీ మధ్య వయసు తేడా కొన్ని సీన్లలో సహజత్వాన్ని తగ్గించడం మైనస్‌గా అనిపిస్తుంది. పెద్దగా కాంప్లికేటెడ్ కథను ఆశించకుండా, ఓ లైట్ హార్టెడ్ లవ్, ఫ్యామిలీ కామెడీ సినిమా చూడాలనుకునేవారికి 'హాయ్' మంచి ఛాయిస్.

రేటింగ్‌ : 2.5

Romanchakam Movie Review: రోమాంచకం మూవీ రివ్యూ.. సందీప్‌ రెడ్డి వంగా నిర్మించిన మూవీ ఎలా ఉందంటే?

Aithagoni Raju — Thu, 03 Sep 2026 08:00:44 +0530

సుమంత్‌ ప్రభాస్, అనంతిక శనిల్‌ కుమార్‌ జంటగా నటించిన మూవీ `రోమాంచకం`. సందీప్‌ రెడ్డి వంగా, ప్రణయ్‌ రెడ్డి వంగా నిర్మించిన ఈ మూవీ నవ్వించడంలో సక్సెస్‌ అయ్యిందా?

సందీప్‌ రెడ్డి వంగా ఓ వైపు ప్రభాస్‌తో `స్పిరిట్‌` మూవీని రూపొందిస్తున్నారు. తన భద్రకాళి పిక్చర్స్ బ్యానర్‌లోనే ఈ చిత్రం తెరకెక్కుతుంది. ఓ వైపు భారీ పాన్‌ ఇండియా మూవీ చేస్తూనే మరోవైపు చిన్న సినిమాని నిర్మించారు. అదే `రోమాంచకం` మూవీ. దీనికి ఆయన సమర్పకులుగా వ్యవహరిస్తుండగా, ఆయన అన్న ప్రణయ్‌ రెడ్డి నిర్మించారు. వేణుగోపాల్‌ రెడ్డి దర్శకుడు. సుమంత్‌ ప్రభాస్‌, అనంతిక శనిల్‌ కుమార్‌ హీరోహీరోయిన్లుగా నటించారు. ఇందులో నరేంద్ర, మణి, ఉపేంద్ర వంటి వారు ముఖ్య పాత్రలు పోషించారు. ఈ చిత్రం నేడు గురువారం(సెప్టెంబర్‌ 3)న విడుదలైంది. మరి సినిమా ఎలా ఉంది? సుమంత్‌ ప్రభాస్‌కి హిట్‌ పడిందా ? సందీప్‌ రెడ్డి వంగా బ్రదర్స్ నిర్మాతలుగా సక్సెస్‌ అయ్యారా? అనేది రివ్యూలో తెలుసుకుందాం.

అన్వేష్‌(సుమంత్‌ ప్రభాస్‌).. సరికొత్త డేటింగ్‌ యాప్‌ క్రియేట్‌ చేసి అమ్మాయిలను, అబ్బాయిలను కలిపేందుకు ప్రయత్నిస్తుంటాడు. కానీ ప్రారంభంలోనే తనని ఎవరూ పట్టించుకోరు, ఇంట్లో కూడా మనోడి టాలెంట్ ని నమ్మరు. ఫ్రెండ్స్ కామెడీ చేస్తుంటారు. ఈ క్రమంలో డేటింగ్‌ యాప్‌ ద్వారానే చెన్నై పిల్లని పటాయిస్తాడు. ఆమె పేరు మైథిలి(అనంతిక శనిల్‌ కుమార్‌). కానీ ఆమె అనేక రకాల టెస్ట్ లు పెడుతుంది. వాటిలో మనోడు పాస్‌ అవుతాడు. నెమ్మదిగా ఫ్రెండ్స్ అయి ఆ తర్వాత ప్రేమలోకి వెళ్లిపోతారు. మైథిలి బర్త్ డే రోజు సర్‌ప్రైజ్‌ చేద్దామని హైదరాబాద్‌ నుంచి చెన్నై వెళ్తాడు అన్వేష్‌. కానీ ఆ అమ్మాయి హ్యాండిస్తుంది. దీంతో పిచ్చోడు అవుతాడు. ఆ తర్వాత కొన్నాళ్లకి ఫోన్‌ చేసి హైదరాబాద్‌ వస్తున్నా, మీ ఫ్లాట్‌ కి వస్తానని చెబుతుంది. చెప్పినట్టే వస్తుంది. అన్వేష్‌ చూపించిన కొత్త ఫ్లాట్‌లో ఉంటుంది. కానీ అన్వేష్‌ బయటకు వెళ్లి వచ్చే లోపు మాయమవుతుంది. మరి ఆమె ఎక్కడికి వెళ్లింది? ఎవరి వద్దకు వెళ్లింది? ఎందుకు వెళ్లింది? మళ్లీ అన్వేష్‌, మైథిలి కలిశారా? లేదా? వీరి ప్రేమ ఏ తీరం చేరింది? ఈ క్రమంలో ఎలాంటి సంఘటనలు చోటు చేసుకున్నాయి. ఇందులో రోమాంచకం అనిపించింది ఏంటి? అనేది సినిమా.

లౌడ్‌ కామెడీ ప్రధానంగా అడపాదడపా సినిమాలు వస్తూనే ఉన్నాయి. అందులో కొన్ని ఆడుతున్నాయి, చాలా వరకు డిజప్పాయింట్‌ చేస్తున్నాయి. ఈ చిత్రం కొంత వరకు అదే జోనర్‌లో ఉంటుంది. ఫన్‌, సిచ్చువేషన్‌ ప్రధానంగా రాసుకున్న కామెడీ కొంత వరకు బాగానే వర్కౌట్‌ అయ్యింది. కామెడీ, లవ్‌ ట్రాక్‌ చుట్టూనే మూవీ తిరుగుతుంది. డైలాగ్‌ కామెడీ ఇందులో హైలైట్‌గా నిలుస్తుంది. హీరో, తన నలుగురు ఫ్రెండ్స్ చేసే అల్లరి చిల్లర పనులు, చిల్లర డైలాగులు, కొంటె పనులను ఎస్టాబ్లిష్‌ చేస్తూ మూవీ రన్‌ అవుతుంది. అయితే హీరో డేటింగ్‌ యాప్‌ అనే స్టార్టప్‌ కంపెనీ పెట్టాలనే ప్రయత్నాల్లో ఉండటం, ఈ క్రమంలోనే ఓ చెన్నై పిల్ల టచ్‌లోకి రావడం, ఆమె విచిత్రమైన టెస్ట్ లు పెట్టడం, హీరో కిందా మీద పడి పాస్‌ కావడం ఇంట్రెస్టింగ్‌గా రన్‌ అవుతుంది. పేరు కన్నుక్కోమని చెప్పగా, మనోడు తపస్సు చేసి ఆమె పేరును కరెక్ట్ గా గెస్ చేస్తాడు. దీంతో పడిపోతుంది. ఆ తర్వాత ఫోన్‌, చాటింగ్‌ కామన్‌గా జరుగుతుంది. ఇద్దరు ప్రేమలో పడతారు. వీరి లవ్‌ ట్రాక్ పై ఫ్రెండ్స్ కామెంట్‌ చేయడం నవ్వించేలా ఉంటుంది. అమ్మాయి బర్త్ డే విషెస్‌ చెప్పడానికి చెన్నై వెళ్లగా ఆమె హ్యాండివ్వడం సస్పెన్స్ గా మారుతుంది. ఈక్రమంలో ఫ్రెండ్స్ తో కలిసి మందేయడం ఆమెని తలుచుకోవడం, ఫ్రెండ్స్ కామెడీ చేయడం హిలేరియస్‌గా ఉంటుంది. ఆ తర్వాత కొన్ని రోజులకు సడెన్‌గా అమ్మాయి ఫోన్‌ చేసి వస్తున్నా అని చెప్పి తన ఫ్లాట్‌ కి రావడంతో అసలు కథ స్టార్ట్ అవుతుంది. వచ్చిన కాసేపటికే ఆమె మిస్సింగ్‌.. ఆమెని వేతికే క్రమంలో చోటు చేసుకునే సన్నివేశాలు,ఫ్రెండ్స్ మధ్య గొడవలు, వెతుకులాట గోల గోలగా ఉంటుంది. అందులోనుంచే ఫన్‌ జనరేట్‌ అయ్యింది. ఇంటర్వెల్ ట్విస్ట్, క్లైమాక్స్ ఎపిసోడ్‌ సినిమాకి హైలైట్‌గా నిలుస్తుంది. ఎడింగ్‌లో ఓ సర్‌ప్రైజ్‌ ఉంటుంది. అనుదీప్‌ సినిమాని మరో స్థాయికి తీసుకెళ్లిపోయాడు. సినిమాపై అభిప్రాయాన్ని మార్చేశారు.

సినిమాలో ప్లస్‌లు చూస్తే, సినిమాలో సందర్భానుసారంగా వచ్చే కామెడీ, డైలాగ్‌ కామెడీ వర్కౌట్‌ అయ్యింది. హీరో పాత్ర, యాక్టింగ్‌, ఆయన తీరుతెన్నులు ప్లస్‌గా చెప్పొచ్చు. ఆయన ఫ్రెండ్‌గా చేసిన వాళ్లంతా బాగా చేశారు. అయితే నటుడు నరేంద్ర మాత్రం దుమ్ములేపాడు. సినిమాకి అతనే హీరో అని చెప్పొచ్చు. అంతగా నవ్వించాడు. డైలాగ్‌తో, ఎక్స్ ప్రెషన్స్ తో ఇరగదీశాడు. సంగీతం బాగుంది. బీజీఎం ఆకట్టుకుంది. కెమెరా వర్క్ ఓకే అనిపిస్తుంది. డైలాగ్స్, డైలాగ్‌ కామెడీ సినిమాకి ప్లస్‌గా నిలిచాయి. సెకండాఫ్‌ సినిమాకి ఆయువు పట్టుగా చెప్పొచ్చు.

మైనస్‌ విషయానికి వస్తే.. సినిమాలో కథ లేదు. సీన్లని బట్టి మూవీని నడిపించారు. చాలా చోట్ల లాజిక్‌ లెస్‌గా ఉంటుంది. లవ్‌ ట్రాక్‌ అంతగా పండలేదు కాలేదు. ఆమె కోసం హీరో అంతగా బాధపడటమనేది కన్విన్సింగ్‌గా లేదు. హీరోయిన్‌ పాత్ర తీరుతెన్నుల విషయంలో ఓ క్లారిటీ మిస్‌ అయ్యింది. సినిమాలో లౌడ్‌ కామెడీ ఎక్కువైంది. హీరో, తన ఫ్రెండ్స్ తో చేసే గోల ఎక్కువగా ఉంది. ఉపేంద్ర పాత్ర కూడా ఏమాత్రం ఆకట్టుకోలేకపోయింది. ఎమోషన్స్ అసలే లేవు.

నటీనటులు

అన్వేష్‌ పాత్రలో సుమంత్‌ ప్రభాస్‌ బాగా చేశాడు. చాలా వరకు బెటర్‌గా కనిపించాడు. అయితే ఆయన పాత్రలో యాక్టింగ్‌ కొన్ని చోట్ల మీటర్‌ దాటింది. కాకపోతే లుక్‌ పరంగా, యాక్టింగ్‌ పరంగా చాలా వరకు మెచ్యూరిటీ కనిపించింది. ఇక ఫ్రెండ్స్ కూడా బాగా నటించారు. వాళ్లు సినిమాకి ప్లస్‌గా నిలిచారు. వారిలో నరేంద్ర మాత్రం ఇరగదీశాడు. సినిమాని తన భుజాలపై మోశాడు. సినిమాలో కామెడీ చాలా వరకు వర్కౌట్‌ అయ్యిందంటే అది నరేంద్ర వల్లే అని చెప్పొచ్చు. హీరోయిన్‌గా అనంతిక శనిల్‌కుమార్‌ ఉన్నంతలో మెప్పించింది. కళ్లతోనే కట్టిపడేసింది. నటన పరంగా మెప్పించింది. కాకపోతే ఆమె పాత్ర ఆశించిన స్థాయిలో లేదు. ఆమె ఇంకా బాగా చేయగలదు. ఎస్‌ఐగా ఉపేంద్ర ఓకే అనిపించాడు. ఆయన పాత్ర నవ్వించడం కంటే ఇరిటేషన్‌ తెప్పించింది. మిగిలిన పాత్రధారులు ఓకే అనిపించారు.

వాసుకి వైభవ్‌ మ్యూజిక్‌ సినిమాకి ప్లస్ గా నిలిచింది. పాటలు బాగున్నాయి. ఆర్‌ఆర్‌ ఆకట్టుకునేలా ఉంది. కొంత లౌడ్‌నెస్ ఎక్కువైంది. పవన్‌ పప్పుల కెమెరా వర్క్ ఓకే అనిపిస్తుంది. విజువల్స్, ఫ్రేమ్స్ ఆకట్టుకుంటాయి. స్పెషల్‌గా నిలుస్తాయి. నిర్మాణ విలువలకు కొదవలేదు. ప్రణయ్‌ రెడ్డి, సందీప్‌ రెడ్డి వంగా రాజీలేకుండా నిర్మించారు. ఇక దర్శకుడు వేణుగోపాల్‌ రెడ్డి ఎంచుకున్న కథ అంటే ఓకే, ఎందుకంటే అందులో పెద్దగా కథేం లేదు. సినిమాని రాసుకోవడంలో ఫర్వాలేదు. కామెడీగా, డైలాగ్స్ పరంగా బాగా రాసుకున్నాడు. స్క్రీన్‌ ప్లే బాగుంది. కాకపోతే దాన్ని తెరపై ఆవిష్కరించే విషయంలో జడ్జ్ మెంట్‌ మిస్‌ అయ్యింది. ఫ్రెండ్స్ తో కామెడీ చేయించే క్రమంలో అది డోస్‌ పెరిగింది. అతిగా మారింది. దీంత చాలా చోట్లు నవ్వులు రావడం కాక ఇరిటేషన్‌ తెప్పిస్తుంది. కొన్ని చోట్ల మాత్రం బాగానే వర్కౌట్‌ అయ్యింది. క్లైమాక్స్ సినిమా నిలబెడుతుందని చెప్పొచ్చు. యూత్‌ కి బాగా నచ్చుతుంది. పోరగాళ్లు బాగా ఎంజాయ్‌ చేస్తారు.

ఫైనల్‌గా: లౌడ్‌ కామెడీతో ఆకట్టుకునే రోమాంచకం. యూత్‌ ఎంజాయ్‌ చేస్తారు.

రేటింగ్‌: 2.75