Asianet News Telugu

Pakistan Economic Crisis: పాకిస్తాన్‌లో లీటర్ పెట్రోల్ రూ. 400.. దివాలా తీసినట్లేనా? అసలు ఏం జరుగుతోంది?

Mahesh Rajamoni — Tue, 22 Sep 2026 10:06:15 +0530

Pakistan Economic Crisis: పాకిస్తాన్‌లో పెట్రోల్ ధర రూ. 400కు చేరువ కావడంతో అక్కడ తీవ్ర ఆందోళన నెలకొంది. అసలు పాకిస్తాన్ లో ఇంతలా చమురు ధరలు ఎందుకు పెరిగాయి? పాక్ ఆర్థిక సంక్షోభంలో కూరుకుపోయిందా? ఆ దేశం దివాలా తీసిందా?

పాకిస్తాన్‌లో సామాన్యుడికి పెట్రోల్ లీటర్ కొనడం పెద్ద భారంగా మారింది. అక్కడ పెట్రోల్ ధర దాదాపు రూ. 400 దాకా వెళ్ళింది. ఈ వార్త వినగానే చాలామంది పాకిస్తాన్ అధికారికంగా దివాలా తీసేసిందేమో అనే చర్చ మొదలైంది. అసలు పాక్ లో ఏం జరుగుతోంది? ఈ పరిస్థితి ఎందుకు వచ్చింది? అధికారికంగా డిఫాల్ట్ లేదా దివాలా తీయలేదు కానీ, పాకిస్తాన్ ఆర్థికంగా తీవ్రమైన ముప్పులో ఉంది.

ప్రస్తుతం పాకిస్తాన్ పబ్లిక్ పెట్రోల్ ధర లీటరుకు రూ. 389.14 నుండి రూ. 393.75 మధ్యలో తిరుగుతోంది. హైస్పీడ్ డీజిల్ ధర ఏకంగా రూ. 422 దాటేసింది.

పాకిస్తాన్‌లో పెట్రోల్ ధరలు ఆకాశాన్ని తాకడానికి ముఖ్యంగా ఐదు కారణాలు ఉన్నాయి..

1. గ్లోబల్ క్రూడ్ ఆయిల్ షాక్: గల్ఫ్ ప్రాంతంలో, మిడిల్ ఈస్ట్‌లో నెలకొన్న ఉద్రిక్తతలు, షిప్పింగ్ మార్గాల్లో అంతరాయాల వల్ల అంతర్జాతీయంగా ముడిచమురు ధరలు పెరిగాయి. పాకిస్తాన్ తన అవసరాల కోసం దిగుమతులపైనే ఆధారపడుతుంది కాబట్టి, గ్లోబల్ మార్కెట్ ప్రభావం వెంటనే అక్కడ పడింది.

2. డాలర్ల కొరత: పాకిస్తాన్ ముడిచమురును అంతర్జాతీయ మార్కెట్లో యుఎస్ డాలర్లలో కొంటుంది. కానీ లోకల్ ప్రజల నుండి రూపాయల్లో వసూలు చేస్తుంది. ఆయిల్ ధరలు పెరిగినప్పుడు ఎక్కువ డాలర్లు అవసరమవుతాయి. ఇది పాకిస్తాన్ ఫారెక్స్ రిజర్వులపై విపరీతమైన ఒత్తిడి తెచ్చింది.

3. పన్నులు, లెవీలు: ఇంటర్నేషనల్ ధర మాత్రమే కాకుండా, పాకిస్తాన్ ప్రభుత్వం లీటర్ పెట్రోల్‌పై దాదాపు రూ. 114 దాకా పన్నులు, పెట్రోలియం డెవలప్‌మెంట్ లెవీ రూపంలో వసూలు చేస్తోంది.

4. భారీ అప్పుల భారం: పాకిస్తాన్ జూన్ 2025 నాటికి రూ. 80.52 ట్రిలియన్ల పబ్లిక్ అప్పుల్లో కూరుకుపోయింది. ఇది వారి జిడిపిలో 70.7 శాతానికి సమానం.

5. బహిరంగ నిధులపై ఆధారపడటం: పాకిస్తాన్ ప్రస్తుతం $7 బిలియన్ల ఐఎంఎఫ్ (IMF) ప్రోగ్రామ్ కింద నడుస్తోంది. ఐఎంఎఫ్ షరతుల ప్రకారం సబ్సిడీలను ఎత్తివేయాల్సి రావడంతో ధరలు మరింత పెరిగాయి.

సాంకేతికంగా చెప్పాలంటే లేదు. ఒక దేశం తాను తీసుకున్న విదేశీ అప్పులను చెల్లించలేక చేతులెత్తేస్తే దాన్ని 'సోవరెన్ డిఫాల్ట్' లేదా దివాలా అంటారు. పాకిస్తాన్ ఇంకా ఆ పరిస్థితికి రాలేదు. ఐఎంఎఫ్, చైనా, సౌదీ అరేబియా, యుఏఈ వంటి మిత్రదేశాల నుంచి అందుతున్న బెయిలౌట్ నిధులు, రుణాల రీ-షెడ్యూలింగ్ వల్ల పాకిస్తాన్ తాత్కాలికంగా గట్టెక్కుతోంది.

సెప్టెంబర్ 2026 నాటికి స్టేట్ బ్యాంక్ ఆఫ్ పాకిస్తాన్ వద్ద దాదాపు $23.72 బిలియన్ల విదేశీ మారక నిల్వలు ఉన్నాయి. కాబట్టి ఆ దేశం సురక్షితంగా ఉందని చెప్పలేము కానీ, అధికారికంగా దివాలా తీయలేదని అర్థం చేసుకోవచ్చు.

ప్రజలకు మాత్రం ఈ పరిస్థితి దివాలా కంటే తక్కువేమీ అనిపించడం లేదు. ఎందుకంటే..

• భారీ అప్పులుతో అప్పుల వడ్డీల చెల్లింపులు పెరుగుతూనే ఉన్నాయి.

• విదేశీ కరెన్సీ కొరత కారణంగా ఐఎంఎఫ్ వద్దకు వెళ్లడంతో ఆర్థిక ఆంక్షలు పెరిగాయి.

• ఐఎంఎఫ్ నిబంధనలతో పెట్రోల్, కరెంట్ పై పన్నుల పెంపు కొనసాగుతోంది.

• పెరిగిన ఇంధన ధరలతో రవాణా ఖర్చులు పెరిగాయి. ఇది నేరుగా ప్రజలపై ప్రభావం చూపుతోంది.

• పెరిగిన నిత్యావసరాల ధరలతో తీవ్రమైన ద్రవ్యోల్బణం ఏర్పడింది.

ఈ పరిస్థితులతో సామాన్యుడి జేబు ఖాళీ అయిపోతుండటంతో పాకిస్తాన్ దివాలా తీసిందనే చర్చ మొదలైంది.

ఈ పెట్రోల్ ధరల పెంపు ప్రభావం వాహనదారులపైనే కాదు, మొత్తం ఆర్థిక వ్యవస్థపై పడింది. బస్సులు, ఆటోల ఛార్జీలు పెరిగిపోయాయి. కూరగాయలు, నిత్యావసర వస్తువుల రవాణా ఖర్చులు పెరగడంతో ద్రవ్యోల్బణం ముదిరిపోయింది. వ్యాపారాలు నడపడం కష్టంగా మారింది. ప్రభుత్వం టూవీలర్లు, ఆటోలకు లీటరుపై రూ. 100 వరకు తాత్కాలిక సబ్సిడీ ప్రకటించినా, అది సరిపోవడం లేదు.

తీవ్రమైన అప్పుల భారం, డాలర్ల కొరత, విదేశీ నిధులపై ఆధారపడటం, గ్లోబల్ ఆయిల్ సంక్షోభం అన్నీ కలసి పాకిస్తాన్‌ను కోలుకోలేని దెబ్బతీశాయి. పన్నుల వసూళ్లు పెంచి, శక్తి రంగాన్ని పునర్నిర్మించకపోతే పాకిస్తాన్‌కు రాబోయే రోజుల్లో ఇంధన సంక్షోభాలు తప్పవని నిపుణులు హెచ్చరిస్తున్నారు. ఇప్పట్లో పాక్ ఆర్థిక సంక్షోభం నుంచి కోలుకోవడం కష్టమేనని ఆర్థిక నిపుణులు చెబుతున్నారు.

Nepal Floods: నేపాల్ వరదల్లో 3000 మంది మిస్సింగ్.. గండక్ నది ఒడ్డున మృతదేహాల కలకలం

Mahesh Rajamoni — Sun, 30 Aug 2026 08:10:57 +0530

Nepal Floods : నేపాల్-టిబెట్ సరిహద్దుల్లో ఉప్పొంగిన ఆకస్మిక వరదలు అత్యంత విషాదాన్ని మిగిల్చాయి. విపత్తు దాటికి వేలాది మంది కొట్టుకుపోగా, బాధితుల ఆచూకీ కోసం జరుగుతున్న గాలింపు చర్యల్లో కలచివేసే ఘటనాంశాలు వెలుగులోకి వస్తున్నాయి.

నేపాల్‌లో సంభవించిన భయంకరమైన జలప్రళయం ఎన్నో కుటుంబాల్లో తీవ్ర విషాదాన్ని నింపింది. ఈ విషాదంలో బీహార్‌లోని మోతిహారీకి చెందిన 11 ఏళ్ల బాలుడు తన తండ్రిని కోల్పోయాడు. శనివారం రోజు ఉత్తరప్రదేశ్‌లోని కుషీనగర్ ఖడ్డా ప్రాంతానికి చేరుకున్న ఈ చిన్నారి, నేపాల్‌లో జరిగిన ఆ భయంకర సంఘటనను కన్నీళ్లతో గుర్తుచేసుకున్నాడు. తండ్రి జాడ కోసం గండక్ నది తీరంలో వెతుకుతున్న ఆ బాలుడి ఆవేదన అక్కడ ఉన్న ప్రతి ఒక్కరినీ కంటితడి పెట్టించింది.

ఆ బాలుడు తెలిపిన వివరాల ప్రకారం, అతని తండ్రి నేపాల్‌లోని రసువా జిల్లాలో స్క్రాప్ షాప్ నడుపుతుండేవాడు. ఆ రోజు ఉదయం బాలుడు స్కూల్‌కి వెళ్లడానికి రెడీ అవుతున్నాడు. తండ్రి వంట చేస్తున్నాడు. ఇంతలోనే ఊహించని విధంగా ఒక్కసారిగా పైనుంచి ఉధృతంగా వరద నీరు దూసుకొచ్చింది. ఆ నీటి ప్రవాహంలో తండ్రి కొట్టుకుపోయారు. బాలుడు తన ముగ్గురు సోదరులతో కలిసి తృటిలో ప్రాణాలతో బయటపడ్డాడు. అక్కడి నుంచి తప్పించుకుని బీహార్‌లోని తమ స్వగ్రామానికి చేరుకున్నాడు.

సమాచారం అందుకున్న కుటుంబ సభ్యులు వెంటనే తండ్రి కోసం వెతకడం ప్రారంభించారు. బీహార్‌లోని నదీ తీర ప్రాంతాల్లో వెతికినా ఎలాంటి ఫలితం లేకపోవడంతో, తన బాబాయ్‌తో కలిసి శనివారం కుషీనగర్‌లోని ఛితౌని బంధ్, మదన్‌పూర్ సుక్రౌలీ, భైన్సా ప్రాంతాలకు చేరుకున్నాడు. గండక్ నది ఒడ్డున తన తండ్రి ఆచూకీ దొరుకుతుందనే ఆశతో ఆ చిన్నారి ఇంకా వెతుకుతూనే ఉన్నాడు.

నేపాల్ వరదల ప్రభావంతో గండక్ నదిలో నీటి ఉధృతి మళ్లీ పెరిగింది. దీంతో కుషీనగర్‌లోని ఖడ్డా ప్రాంతంలో వరద, నదీ తీర కోత ప్రమాదం ఎక్కువైంది. నది ప్రవాహం ఛితౌని ఆకట్ట వద్ద ఒత్తిడిని పెంచుతోంది. మరోవైపు, నేపాల్ నుంచి కొట్టుకువచ్చిన 6 మృతదేహాలను అధికారులు స్వాధీనం చేసుకుని జిల్లా ఆసుపత్రిలోని డిప్ ఫ్రీజర్‌లో భద్రపరిచారు. మృతదేహాలను గుర్తించడానికి నేపాల్ సరిహద్దు జిల్లాల అధికారులతో ఎడిఎమ్ వైభవ్ మిశ్రా సమన్వయం చేసుకుంటున్నారు. గుర్తింపు పూర్తయ్యాక నిబంధనల ప్రకారం బంధువులకు అప్పగిస్తామని తెలిపారు.

నేపాల్‌లో వరద ముప్పు మళ్లీ పెరిగింది. భోటేకోషి నదిలో నీటి ఉధృతి పెరగడంతో రసువా, నువాకోట్, ధాదింగ్ జిల్లాల్లో అలర్ట్ ప్రకటించారు. ఆగస్టు 26న వచ్చిన వరదల్లో ఇప్పటివరకు 691 మంది మృతి చెందగా, 3000 మందికి పైగా గల్లంతయ్యారు. వీరిలో 275 మంది భారతీయులు ఉన్నారు. భారత్ ఇప్పటివరకు 108 మందిని సురక్షితంగా రక్షించింది. చైనా నుంచి 598 మంది భారతీయులు నేపాల్ చేరుకోగా, మరో 900 మంది చైనాలో సురక్షితంగా ఉన్నారు.

అమెరికా సైనికులు ఎందుకు ఆత్మ‌హ‌త్య‌కు ప్ర‌య‌త్నిస్తున్నారు.? అస‌లేం జ‌రుగుతోంది.?

Narender Vaitla — Thu, 24 Sep 2026 16:03:02 +0530

US Iran War: పశ్చిమాసియాలో కొనసాగుతున్న యుద్ధ పరిస్థితులు కేవలం ఆ ప్రాంత దేశాలపైనే కాకుండా అక్కడ విధులు నిర్వహిస్తున్న సైనికులపైనా ప్రభావం చూపుతున్నాయి. సముద్రంలోనే ఉండాల్సి రావడంతో కొంద‌రు సైనికులు తీవ్ర‌మైన మాన‌సిక ఒత్తిడికి గుర‌వుతున్నారు.

అమెరికా సెనేట్ సాయుధ సేవల కమిటీలో సభ్యురాలిగా ఉన్న న్యూయార్క్ డెమొక్రాట్ సెనేటర్ కిర్‌స్టెన్ గిల్లిబ్రాండ్.. అబ్రహాం లింకన్‌లో పనిచేస్తున్న సిబ్బంది మానసిక ఆరోగ్యం, మనోధైర్యంపై ప్రశ్నలు సంధించారు. గతంలో రక్షణ మంత్రి పీట్ హెగ్‌సెత్‌కు ఆమె పంపిన లేఖలోనూ ఇదే అంశంపై వివరాలు కోరారు. దీనికి నేవీ తాత్కాలిక సెక్రటరీ హంగ్ కావో లిఖితపూర్వకంగా సమాధానం ఇచ్చారు.

ఇరాన్‌పై అమెరికా నిర్వహించిన పోరాట కార్యకలాపాల సమయంలో యూఎస్ నేవీ క్యారియర్ స్ట్రైక్ గ్రూప్‌కు చెందిన ఎనిమిది మంది ఆత్మహత్యకు ప్రయత్నించినట్లు ఆ సమాధానంలో పేర్కొన్నారు. అయితే ఈ సంఖ్య అబ్రహాం లింకన్ నౌకలోని సిబ్బందికి మాత్రమే సంబంధించినది కాదని స్పష్టం చేశారు. మొత్తం క్యారియర్ స్ట్రైక్ గ్రూప్ పరిధిలో నమోదైన ఘటనల సంఖ్యగా వివరించారు. ముఖ్యంగా ఈ ఘటనల్లో ఎవరూ ప్రాణాలు కోల్పోలేదని తెలిపారు.

క్యారియర్ స్ట్రైక్ గ్రూప్ అనేది ఒకే యుద్ధ నౌకతో కూడిన వ్యవస్థ కాదు. ఇందులో అబ్రహాం లింకన్ సిబ్బందితో పాటు క్యారియర్ ఎయిర్ వింగ్, స్ట్రైక్ గ్రూప్‌కు చెందిన సిబ్బంది, డిస్ట్రాయర్ స్క్వాడ్రన్, ఎస్కార్ట్ డిస్ట్రాయర్లు, వివిధ ఏవియేషన్ స్క్వాడ్రన్‌ల సిబ్బంది ఉంటారు. అందువల్ల వెల్లడైన ఎనిమిది ఆత్మహత్యాయత్నాలను కేవలం విమాన వాహక నౌకలో పనిచేసే సిబ్బందికే ఆపాదించలేమని నేవీ స్పష్టం చేసింది.

ఈ స్ట్రైక్ గ్రూప్‌లో సుమారు 7,500 మంది సైనికులు ఉన్నట్లు సమాచారం. వీరిలో ఎక్కువ మంది నావికులే. ఇరాన్‌కు సంబంధించిన సైనిక కార్యకలాపాల్లో భాగంగా ఈ బృందం సుదీర్ఘకాలం పశ్చిమాసియా ప్రాంతంలో విధులు నిర్వహించింది. యుద్ధ పరిస్థితుల్లో నిరంతర అప్రమత్తతతో పనిచేయాల్సి రావడం సిబ్బందిపై అదనపు ఒత్తిడిని పెంచినట్లు తెలుస్తోంది.

అబ్రహాం లింకన్ సాధారణ మోహరింపు కాలంతో పోలిస్తే చాలా ఎక్కువ సమయం సముద్రంలో గడిపింది. సాధారణంగా ఒక క్యారియర్ మోహరింపు ఆరు నుంచి ఏడు నెలల వరకు కొనసాగుతుంది. ఈ సమయంలో ఇంధనం, ఆహారం వంటి అవసరాలను భర్తీ చేసుకునేందుకు నిర్ణీత విరామాలు ఉంటాయి. అయితే లింకన్ విషయంలో పరిస్థితులు భిన్నంగా మారాయి.

ఈ నౌక గ‌తేడాది నవంబర్‌లో శాన్ డియాగో నుంచి బయలుదేరింది. మొదట దాని మోహరింపు మేలో ముగియాల్సి ఉంది. అయితే ఫిబ్రవరిలో యుద్ధ పరిస్థితులు తీవ్రం కావడంతో మోహరింపు కాలాన్ని పొడిగించారు. దీంతో సిబ్బంది అంచనా వేసిన దానికంటే ఎక్కువ కాలం కుటుంబాలకు దూరంగా సముద్రంలోనే విధులు నిర్వర్తించాల్సి వచ్చింది. దాదాపు 286 రోజుల పాటు ఏ ఓడరేవులోనూ ఆగకుండా సముద్రంలో ఉండటం సిబ్బందికి సవాలుగా మారింది. ప్రస్తుతం నౌక శాన్ డియాగో వైపు తిరుగు ప్రయాణంలో ఉన్నట్లు సమాచారం.

సుదీర్ఘ మోహరింపు సమయంలో సిబ్బంది ఎదుర్కొన్న సమస్యలపై వారి కుటుంబ సభ్యులు కూడా ఆందోళన వ్యక్తం చేశారు. ముఖ్యంగా ఆహార సరఫరాలకు సంబంధించిన ఇబ్బందులు ఉన్నాయని కొందరు కుటుంబ సభ్యులు పేర్కొన్నారు. ఎక్కువకాలం సముద్రంలో ఉండటం వల్ల నావికుల మానసిక స్థితిపై ప్రభావం పడుతుందనే ఆందోళన కూడా వ్యక్తమైంది.

అయితే వేసవిలో నౌకలో ఆత్మహత్య ఆలోచనలు లేదా ప్రయత్నాలు అసాధారణంగా పెరిగినట్లు తమకు ఎలాంటి సంకేతాలు కనిపించలేదని నేవీ అధికారి ఒకరు తెలిపారు. సిబ్బంది సంక్షేమానికి అత్యంత ప్రాధాన్యం ఇస్తున్నట్లు చెప్పారు. యుద్ధ పరిస్థితుల్లో విధులు నిర్వర్తిస్తున్న సైనికులకు మానసికంగా అండగా ఉండేందుకు నౌకలో ప్రత్యేక సిబ్బందిని కూడా అందుబాటులో ఉంచారు.

అబ్రహాం లింకన్‌లో సిబ్బందికి మానసిక, భావోద్వేగ సహాయం అందించేందుకు ఐదుగురు మత గురువులు ఉన్నారు. వీరితో పాటు ఒక క్లినికల్ సైకాలజిస్ట్, ఒక క్లినికల్ సోషల్ వర్కర్, బిహేవియరల్ హెల్త్ టెక్నీషియన్లు, సమగ్ర నివారణ కార్యక్రమానికి చెందిన సలహాదారు కూడా పనిచేస్తున్నారు. యుద్ధ ప్రాంతాల్లో సైనికులపై శారీరక ప్రమాదాలతో పాటు మానసిక ఒత్తిడి కూడా ప్రభావం చూపే అవకాశం ఉంటుంది. ముఖ్యంగా సుదీర్ఘ మోహరింపులు, కుటుంబాలకు దూరంగా ఉండటం, విశ్రాంతి తగ్గడం వంటి అంశాలు ఆ ఒత్తిడిని మరింత పెంచవచ్చు. అబ్రహాం లింకన్ స్ట్రైక్ గ్రూప్‌లో నమోదైన ఎనిమిది ఆత్మహత్యాయత్నాల వివరాలు కూడా ఈ అంశంపై మరోసారి దృష్టిని ఆకర్షించాయి. అయితే ఘటనల వెనుక వ్యక్తిగత కారణాలు ఏమిటన్నది ఈ లేఖలో పూర్తిగా వెల్లడించలేదు.

ఈ భార‌తీయుడు లేకపోయుంటే ఎంత దారుణం జ‌రిగేదో.. 26/11 త‌ర‌హా దాడి త‌ప్పిందా.?

Narender Vaitla — Thu, 01 Oct 2026 14:57:07 +0530

Flydubai: సెప్టెంబర్‌ 30న ఫ్లైదుబాయ్‌ FZ1073 విమానంలో చోటుచేసుకున్న తీవ్ర ఘటన ప్ర‌పంచాన్ని ఉలిక్కిప‌డేలా చేసింది. దుబాయ్ నుంచి ఇజ్రాయిల్ వెళ్తున్న విమానంలో కాక్‌పిట్‌లో చోటు చేసుకున్న ఘ‌ట‌న అంద‌రినీ షాక్‌కి గురి చేసింది.

సెప్టెంబర్‌ 30న దుబాయ్‌ నుంచి టెల్‌అవీవ్‌కు వెళ్తున్న ఫ్లైదుబాయ్‌ FZ1073 విమానంలో ప్రయాణ సమయంలో కాక్‌పిట్‌లో తీవ్ర ఘటన చోటుచేసుకుంది. విమానం సౌదీ అరేబియా గగనతలంలో ఉండగా పైలట్ల మధ్య ఘర్షణ జరిగినట్లు తొలుత సమాచారం వెలువడింది. అనంతరం కో-పైలట్‌ భారతీయ కెప్టెన్‌ స్మిత్‌ మచ్చార్‌పై కత్తితో దాడి చేసినట్లు తెలిసింది. ఈ ఘటనతో విమానంలో ఒక్కసారిగా అత్యవసర పరిస్థితి ఏర్పడింది. ఫ్లైట్‌ ట్రాకింగ్‌ డేటా ప్రకారం విమానం కొన్ని సెకన్ల వ్యవధిలోనే దాదాపు 14,300 అడుగుల ఎత్తు కోల్పోయింది. అత్యవసర పరిస్థితిని సూచించే కోడ్‌లను కూడా విమానం ప్రసారం చేసింది.

దాడిలో తీవ్రంగా గాయపడిన కెప్టెన్‌ స్మిత్‌ మచ్చార్‌ పరిస్థితి విషమంగా ఉన్నప్పటికీ కాక్‌పిట్‌ తలుపును తెరవగలిగినట్లు ప్రయాణికుల వాంగ్మూలాల ఆధారంగా రిపోర్టులు వెల్లడించాయి. దీంతో ప్రయాణికులు, సిబ్బంది కాక్‌పిట్‌లోకి ప్రవేశించి దాడి చేసిన వ్యక్తిని అదుపులోకి తీసుకునే అవకాశం లభించింది. విమానంలో ప్రయాణిస్తున్న కొందరు ఆఫ్‌-డ్యూటీ పైలట్లు కూడా పరిస్థితిని చక్కదిద్దడంలో సహకరించినట్లు సమాచారం. అనంతరం విమానాన్ని టెల్‌అవీవ్‌కు బదులుగా సౌదీ అరేబియాలోని టబుక్‌ విమానాశ్రయానికి మళ్లించారు. అక్కడ విమానం సురక్షితంగా ల్యాండ్‌ అయింది. ఫ్లైదుబాయ్‌ కూడా విమానం సురక్షితంగా టబుక్‌లో దిగిందని, ప్రయాణికులంతా సురక్షితంగా ఉన్నారని అధికారికంగా తెలిపింది.

BREAKING: A pilot aboard Flydubai flight FZ1073 from Dubai to Tel Aviv attacked the other pilot and attempted to seize control of the aircraft in terror attack.The plane, carrying 174 Israeli passengers, plunged 14,000 feet before the situation was brought under control and… pic.twitter.com/FAgyt7dOpK

— Combat Antisemitism Movement (@CombatASemitism) September 30, 2026

కాక్‌పిట్‌లో జరిగిన ఘటనపై దర్యాప్తు కొనసాగుతున్నప్పటికీ.. విమానాన్ని ఉద్దేశపూర్వకంగా కూల్చే ప్రయత్నం జరిగిందనే ఆరోపణలు తెరపైకి వచ్చాయి. ఇజ్రాయెల్‌ అధికారులు ఘటనను తీవ్ర భద్రతా ఉల్లంఘనగా పరిగణిస్తున్నారు. ఇజ్రాయెల్‌ ప్రధాని బెంజమిన్‌ నెతన్యాహు కూడా కో-పైలట్‌ విమానాన్ని కూల్చేందుకు ప్రయత్నించినట్లు పేర్కొన్నారు. అయితే ఘటనకు సంబంధించిన పూర్తి కారణాలు, దాడి వెనుక ఉద్దేశం అధికారిక దర్యాప్తు పూర్తయ్యే వరకు స్పష్టంగా తేలాల్సి ఉంది. ఈ ఘటనలో భారతీయ కెప్టెన్‌ స్మిత్‌ మచ్చార్‌ పాత్రపై అంతర్జాతీయంగా ప్రశంసలు వెల్లువెత్తాయి. మచ్చార్‌ గతంలో స్పైస్‌జెట్‌లో పనిచేశారని, 2022 నుంచి ఫ్లైదుబాయ్‌లో బోయింగ్‌ 737 విమానాలకు కెప్టెన్‌గా వ్యవహరిస్తున్నారని తెలుస్తోంది.

కాక్‌పిట్‌లో జరిగిన దాడిలో గాయపడిన కెప్టెన్‌ మచ్చార్‌ను సౌదీ అరేబియాలోని టబుక్‌ ఆసుపత్రికి తరలించారు. ఆయనకు వైద్యులు చికిత్స అందిస్తున్నారు. తాజా స‌మాచారం ప్రకారం ఆయన పరిస్థితి ప్రస్తుతం నిలకడగా ఉన్నట్లు తెలుస్తోంది. భారత అధికార యంత్రాంగం ఆయన ఆరోగ్య పరిస్థితిపై దృష్టి సారించింది. విమానం సురక్షితంగా ల్యాండ్‌ కావడంతో ప్రయాణికులందరూ ప్రాణాలతో బయటపడ్డారు. ఈ ఘటనలో కెప్టెన్‌ మచ్చార్‌తో పాటు ప్రయాణికులు, సిబ్బంది సమయస్ఫూర్తిగా వ్యవహరించడం కీలకంగా మారింది. అయితే ఘటనకు సంబంధించిన ప్రతి అంశాన్ని అధికారిక దర్యాప్తు పూర్తయిన తర్వాతే స్పష్టంగా నిర్ధారించాల్సి ఉంటుంది.

ఫ్లైదుబాయ్‌ ఘటనలో కెప్టెన్‌ స్మిత్‌ మచ్చార్‌ చూపిన ధైర్యాన్ని ప్రధాని నరేంద్ర మోదీ ప్రశంసించారు. మచ్చార్‌ సమయస్ఫూర్తి, ధైర్యంతో వ్యవహరించడం వల్ల భారీ విషాదం తప్పిందని మోదీ పేర్కొన్నారు. 9/11 తరహా పెను ప్రమాదం తప్పించడంలో ఆయన పాత్రను ప్రధాని ప్రత్యేకంగా ప్రస్తావించారు. మరోవైపు ఘటనపై దర్యాప్తు కొనసాగుతున్న నేపథ్యంలో ఇజ్రాయెల్‌కు వెళ్లే, అక్కడి నుంచి వచ్చే విమానాలను తాత్కాలికంగా నిలిపివేస్తున్నట్లు ఫ్లైదుబాయ్‌ ప్రకటించింది. సంబంధిత అధికారులు దర్యాప్తు పూర్తి చేసి ఘటనకు సంబంధించిన వాస్తవాలను నిర్ధారించే వరకు పరిస్థితిని సమీక్షిస్తామని సంస్థ తెలిపింది.

Trump Ocean: ఇకపై ఆ సముద్రం పేరు ట్రంప్.. మ‌రో సంచ‌ల‌న ప్ర‌తిపాద‌న

Narender Vaitla — Sun, 11 Oct 2026 10:21:19 +0530

Trump Ocean: అమెరికా అధ్యక్షుడు డొనాల్డ్ ట్రంప్ మరోసారి తనదైన శైలిలో సంచలన వ్యాఖ్యలు చేశారు. ప్రపంచంలోని ప్రధాన భౌగోళిక ప్రాంతాల పేర్లను మార్చే ఆలోచనలో ఉన్నట్లు వెల్లడించారు. 2028లోపు ఒక మహాసముద్రానికి కొత్త పేరు పెట్టాలని భావిస్తున్నట్లు తెలిపారు.

టెన్నెస్సీలోని క్లార్క్స్‌విల్లులో శనివారం నిర్వహించిన ర్యాలీలో ట్రంప్ ఈ ప్రతిపాదనను ప్ర‌స్తావించారు. అమెరికా అధ్యక్ష పదవి నుంచి దిగిపోయేలోపు మరో ముఖ్యమైన భౌగోళిక ప్రాంతానికి పేరు మార్చాలని భావిస్తున్నట్లు ఆయన తన మద్ధతుదారులతో అన్నారు. ఈ క్రమంలో అట్లాంటిక్, పసిఫిక్ మహాసముద్రాల్లో దేనికైనా కొత్త పేరు పెట్టే అంశాన్ని పరిశీలిస్తున్నట్లు తెలిపారు. ‘ట్రంప్ మహాసముద్రం’ లేదా ‘అమెరికాల మహాసముద్రం’ అనే పేర్లను సూచించారు. అయితే ఈ ప్రతిపాదనపై ఇప్పటివరకు అధికారికంగా పేరు మార్పు నిర్ణయం తీసుకున్నట్లు స్పష్టత లేదు.

మహాసముద్రాల పేర్ల మార్పు గురించి మాట్లాడిన ట్రంప్.. హడ్సన్, మిసిసిపి నదుల విషయంలో మాత్రం తన అభిప్రాయాన్ని స్పష్టం చేశారు. హడ్సన్ నది పేరును మార్చే ఉద్దేశం లేదని తెలిపారు. ప్రసిద్ధ అన్వేషకుడు హెన్రీ హడ్సన్‌కు గుర్తుగా ఆ నదికి ఆ పేరు వచ్చిందని, ఆయనపై తనకు గౌరవం ఉందని పేర్కొన్నారు. అందుకే ఆ పేరును మార్చబోనని చెప్పారు. మరోవైపు, మిసిసిపి నది పేరు మార్చడం కూడా తనకు ఇష్టం లేదని వ్యాఖ్యానించారు. ఎన్నికల్లో విజయం సాధించడంలో మిసిసిపి ప్రాంతం కీలక పాత్ర పోషించిందని ట్రంప్ అన్నారు. దీంతో ఏ ప్రాంతానికి పేరు మార్చాలనే విషయంలో ట్రంప్ తనదైన కారణాలను ముందుకు తెస్తున్నారని చర్చ జరుగుతోంది.

ట్రంప్ తాజా వ్యాఖ్యలు సోషల్ మీడియాలో హాస్యానికి దారితీశాయి. ఇప్పటికే పలు ప్రాంతాలు, సంస్థలకు తన పేరును జోడించేందుకు ఆసక్తి చూపుతున్నారనే విమర్శల నేపథ్యంలో నెటిజన్లు వ్యంగ్యాస్త్రాలు సంధిస్తున్నారు. ‘ఇలాగే కొనసాగితే భవిష్యత్తులో భూమి పేరును కూడా ట్రంప్ ప్లానెట్‌గా మార్చేస్తారేమో’ అంటూ ఒక యూజర్ ఎద్దేవా చేశారు. మరో వ్యక్తి వాషింగ్టన్ డీసీ పేరును ట్రంప్‌విలేజ్‌గా మార్చే రోజులు దగ్గరలోనే ఉన్నాయని వ్యంగ్యంగా వ్యాఖ్యానించారు. ట్రంప్ తన పేరు చరిత్రలో నిలిచిపోయేలా చేయాలనుకుంటున్నారని కొందరు విమర్శిస్తుండగా, మరికొందరు ఆయన వ్యాఖ్యలను రాజకీయ ప్రచారంలో భాగంగా చూస్తున్నారు. మహాసముద్రం పేరు మార్పు ప్రతిపాదనపై అధికారిక చర్యలు ఏమైనా ఉంటాయా అన్నది ఇప్పుడు ఆసక్తికరంగా మారింది.

ట్రంప్ రెండోసారి అమెరికా అధ్యక్ష బాధ్యతలు చేపట్టిన తర్వాత భౌగోళిక పేర్ల మార్పునకు సంబంధించి పలు చర్యలు తీసుకున్నారు. మెక్సికో గల్ఫ్‌ను అమెరికా ఫెడరల్ ప్రభుత్వ వినియోగంలో ‘గల్ఫ్ ఆఫ్ అమెరికా’గా పేర్కొనేలా కార్యనిర్వాహక ఆదేశం జారీ చేశారు. అలాగే అలాస్కాలోని డెనాలి పర్వతానికి గతంలో ఉపయోగించిన ‘మౌంట్ మెక్‌కిన్లీ’ పేరును తిరిగి తీసుకురావడానికి చర్యలు చేపట్టారు. సైనిక స్థావరాల పేర్ల విషయంలోనూ ఆయన ప్రభుత్వం మార్పులు చేసింది. నార్త్ కరోలినాలోని ఫోర్ట్ లిబర్టీకి తిరిగి ఫోర్ట్ బ్రాగ్ అనే పేరు పెట్టడం ఇందుకు ఉదాహరణగా చెప్పొచ్చు. ఈ నిర్ణయాలన్నీ అమెరికా ప్రభుత్వ పరిధిలో అమలయ్యే పేర్ల మార్పులకు సంబంధించినవి. అయితే అమెరికా ప్రభుత్వం ఒక పేరును అధికారికంగా ఉపయోగించడం, ప్రపంచవ్యాప్తంగా ఆ భౌగోళిక ప్రాంతానికి అదే పేరు గుర్తింపు పొందడం రెండూ ఒకటి కావు.

భౌగోళిక ప్రాంతాలకే కాకుండా పలు సంస్థలు, భవనాల పేర్ల విషయంలోనూ ట్రంప్ పేరు ప్రస్తావనకు వస్తోంది. కెన్నెడీ సెంటర్, యునైటెడ్ స్టేట్స్ ఇన్‌స్టిట్యూట్ ఆఫ్ పీస్‌కు సంబంధించిన భవనాలపై ఆయన పేరు జోడించారు. నేషనల్ రెన్యూవబుల్ ఎనర్జీ లాబొరేటరీ పేరును నేషనల్ లాబొరేటరీ ఆఫ్ ది రాకీస్‌గా మార్చే నిర్ణయం కూడా ట్రంప్ ప్రభుత్వ చర్యల్లో ఒకటిగా నిలిచింది. అంతేకాకుండా ఆయన ఫొటోతో కూడిన ప్రత్యేక పాస్‌పోర్టులు, నేషనల్ పార్క్ సర్వీస్ పాస్‌లు, ఆయన సంతకం ఉండే కరెన్సీ వంటి ప్రతిపాదనలు లేదా చర్యలపైనా చర్చ జరిగింది. ఫ్లోరిడాలోని పామ్ బీచ్ అంతర్జాతీయ విమానాశ్రయానికి ట్రంప్ పేరు పెట్టే అంశం కూడా వార్తలు వచ్చాయి. అయితే వీటిలో ప్రతి అంశం అమలు స్థితి, సంబంధిత చట్టపరమైన అనుమతులు వేర్వేరుగా ఉంటాయి. ఇప్పుడు అట్లాంటిక్ లేదా పసిఫిక్ మహాసముద్రానికి తన పేరు పెట్టాలనే ట్రంప్ తాజా ఆలోచన ఎంతవరకు ముందుకు వెళ్తుందో చూడాలి.

Trump Tariffs: రష్యా ఆయిల్ కొంటే భారత్‌పై 100% టారిఫ్? ట్రంప్ చేతికి డెడ్లీ వెపన్ ఇచ్చిన అమెరికా పార్లమెంట్

Mahesh Rajamoni — Wed, 16 Sep 2026 12:19:53 +0530

Tariffs: రష్యా నుంచి చమురు కొనుగోలు చేసే భారత్, చైనా వంటి దేశాలపై 100 శాతానికి పైగా సుంకాలు విధించేలా ట్రంప్‌కు సర్వాధికారాలు ఇచ్చే సాంక్షన్ బిల్‌ను యూఎస్ ప్రతినిధుల సభ ముందుకు తీసుకెళ్లింది. ఇప్పుడు ఇదే అంశం అంతర్జాతీయంగా హాట్ టాపిక్ గా మారింది.

రష్యా నుంచి క్రూడ్ అయిల్ దిగుమతి చేసుకుంటున్న భారత్ సహా ఇతర దేశాలకు అమెరికా పెద్ద షాక్ ఇచ్చేందుకు సిద్ధమైంది. రష్యా నుంచి ఆయిల్, గ్యాస్ కొనుగోలు చేసే దేశాలపై ఏకంగా 100 శాతం వరకు దిగుమతి సుంకాలు విధించే అధికారాన్ని అధ్యక్షుడు డోనాల్డ్ ట్రంప్‌కు కట్టబెట్టే కీలక బిల్లు అమెరికా హౌస్ ఆఫ్ రిప్రజెంటేటివ్స్‌లో ఒక అడుగు ముందుకు పడింది.

మంగళవారం సాయంత్రం జరిగిన కీలక ప్రక్రియాత్మక ఓటింగ్‌లో ఈ బిల్లు 214-211 ఓట్ల తేడాతో నెగ్గింది. డెమొక్రాట్ పార్టీ నాయకత్వాన్ని ఆశ్చర్యపరుస్తూ ఇద్దరు డెమొక్రాట్ ప్రతినిధులు రిపబ్లికన్లకు సపోర్టుగా ఓటు వేయడంతో ఈ బిల్లు క్లియర్ అయి, చివరి ఓటింగ్‌కు మార్గం సుగమమైంది.

'లిండ్సే ఓ గ్రాహం శాంక్షనింగ్ రష్యా అండ్ ఇరాన్ యాక్ట్ ఆఫ్ 2026' (Lindsey O Graham Sanctioning Russia and Iran Act of 2026) పేరుతో తీసుకొచ్చిన ఈ బిల్లు రష్యాపై ఆర్థికంగా మరింత ఒత్తిడి పెంచడమే లక్ష్యంగా పనిచేస్తుంది. ఉక్రెయిన్‌పై యుద్ధం చేయడానికి రష్యాకు ప్రధాన ఆదాయ వనరు ముడి చమురు వ్యాపారమేనని అమెరికా బలంగా నమ్ముతోంది. అందుకే రష్యా ఆయిల్ రంగంతో పాటు, ఆ ఆయిల్‌ను రహస్యంగా సరఫరా చేసే షాడో ఫ్లీట్ నౌకలపై కూడా ఆంక్షలు విధించాలని ఈ బిల్లు ప్రతిపాదిస్తోంది.

అంతేకాకుండా రష్యా నుంచి ఎక్కువ పరిమాణంలో ఇంధనాన్ని కొనుగోలు చేసే ఐదు ప్రధాన దేశాలపై 100 శాతం వరకు పెనాల్టీ టారిఫ్‌లు విధించే హక్కును యూఎస్ ప్రెసిడెంట్‌కు ఈ చట్టం ఇస్తుంది. గత ఆగస్టులో ఈ బిల్లు సెనెట్‌లో 86-11 ఓట్ల భారీ మెజారిటీతో ఇప్పటికే ఆమోదం పొందింది.

ఆగస్టు 7న సెనెట్ ఆమోదించిన వెర్షన్‌లో ఏ దేశం పేరునూ నేరుగా ప్రస్తావించకుండా "అత్యధికంగా చమురు కొనే టాప్ 5 దేశాలు" అని పేర్కొన్నారు. అయితే హౌస్ సవరణల సమయంలో భారత్, చైనాతో పాటు అజర్‌బైజాన్, హంగేరీ, స్లొవేకియా వంటి దేశాలు ఈ జాబితాలో ప్రధానంగా ఉన్నట్లు స్పష్టమైంది. రష్యా నుంచి తక్కువ ధరకు లభించే క్రూడ్ ఆయిల్‌ను కొనుగోలు చేయడంలో భారత్, చైనాలు ముందువరసలో ఉన్నాయి.

మరోవైపు ఇరాన్‌పై ఉన్న పాత ఆంక్షలను కూడా 2031 వరకు పొడిగించే నిబంధనలను ఈ బిల్‌లో చేర్చారు. మిడ్ టెర్మ్ ఎన్నికల నిమిత్తం ప్రతినిధుల సభ గురువారం నుంచి సెలవుల్లోకి వెళ్లనున్న నేపథ్యంలో, ఆలోపే ఈ బిల్లును ఆమోదించి ట్రంప్ సంతకానికి పంపాలని అమెరికా చట్టసభ సభ్యులు భావిస్తున్నారు.

ఈ బిల్లుపై అమెరికా రాజకీయంలో తీవ్ర స్థాయిలో చర్చ జరుగుతోంది. ట్రంప్‌కు చెక్‌లు, బ్యాలెన్స్‌లు లేకుండా టారిఫ్‌లు విధించే అపరిమిత అధికారాలు ఇవ్వడం సరికాదని డెమొక్రాట్ సీనియర్ నాయకుడు గ్రెగొరీ మీక్స్ తీవ్రంగా వ్యతిరేకించారు. ప్రెసిడెంట్ ఈ అధికారాలను దుర్వినియోగం చేస్తే అమెరికాలోని వినియోగదారులపైనే వస్తువుల ధరల భారం పడుతుందని, సరఫరా గొలుసు దెబ్బతింటుందని కొందరు ఆందోళన వ్యక్తం చేస్తున్నారు.

అయినప్పటికీ, ఉక్రెయిన్‌కు సపోర్టు ఇచ్చే వివిధ లాబీ గ్రూపులు వాషింగ్టన్‌లో నిరసనలు, లాబీయింగ్ వేగవంతం చేయడంతో ఈ బిల్లు ముందుకు కదిలింది.

తన నిర్ణయాన్ని భారత్ మొదటి నుంచీ చాలా స్పష్టంగా సమర్థించుకుంటోంది. దేశ ఇంధన భద్రత, భారతీయుల అవసరాలు, అంతర్జాతీయ మార్కెట్లో లభించే చమురు ధరలను బట్టే తమ నిర్ణయాలు ఉంటాయని విదేశాంగ శాఖ స్పష్టం చేసింది. రష్యాతో ఇంధన సంబంధాలు తమ ద్వైపాక్షిక బంధంలో అత్యంత కీలకమైన భాగమని భారత్ స్పష్టం చేసింది.

ఒకవేళ ఈ బిల్లు చట్టంగా మారినా, 100 శాతం టారిఫ్ అనేది గరిష్ఠ పరిమితి మాత్రమే. పరిస్థితులను బట్టి ఎంత శాతం పన్ను విధించాలి, లేదా అసలు పన్ను నుంచి మినహాయింపు ఇవ్వాలా అనేది యూఎస్ ట్రేడ్ రిప్రజెంటేటివ్, ప్రెసిడెంట్ నిర్ణయిస్తారు. మరోవైపు భారత్-అమెరికా ద్వైపాక్షిక వాణిజ్య ఒప్పందం చర్చలు ముగింపు దశలో ఉన్న వేళ ఈ టారిఫ్ హెచ్చరికలు ప్రాధాన్యం సంతరించుకున్నాయి.

అమెరికాలో ఇళ్ల బయట జనం ఎందుకు కనిపించరు.? ఇంతకీ వాళ్లేం చేస్తుంటారు.?

Narender Vaitla — Sat, 19 Sep 2026 16:21:27 +0530

USA: అమెరికా గురించి సినిమాలు, వీడియోలు చూసినప్పుడు చాలామందికి ఒక విషయం ఆసక్తిని కలిగిస్తుంది. పెద్ద పెద్ద ఇళ్లు, విశాలమైన రోడ్లు కనిపిస్తాయి కానీ ఇళ్ల బయట మన దేశంలో కనిపించేంతగా జనం కనిపించరు. ఇంత‌కీ దీనికి అస‌లు కార‌ణం ఏంటో తెలుసా.?

అమెరికాలో జనాభా విస్తీర్ణంతో పోలిస్తే తక్కువగా ఉండటం వల్ల అనేక ప్రాంతాల్లో ఇళ్లను విశాలమైన స్థలంలో నిర్మిస్తారు. ముఖ్యంగా సబర్బన్ ప్రాంతాల్లో ఒక ఇంటి నుంచి మరో ఇంటికి కొంత దూరం ఉంటుంది. మన నగరాల్లో కనిపించేలా ప్రతి కొన్ని అడుగులకు ఒక ఇల్లు, దాని పక్కనే చిన్న దుకాణం అనే విధానం అక్కడ చాలా ప్రాంతాల్లో ఉండదు. అలాగే మన దగ్గర వీధి చివర్లోనే కిరాణా దుకాణం, టీ స్టాల్, బేకరీ, కూరగాయల బండి వంటివి కనిపిస్తాయి. అమెరికాలోని అనేక నివాస ప్రాంతాల్లో మాత్రం ఇలాంటి చిన్న వ్యాపారాలు ఇళ్ల మధ్యలో ఉండవు. షాపింగ్ సెంటర్లు, సూపర్ మార్కెట్లు, రెస్టారెంట్లు వంటి వాటి కోసం కొంత దూరం ప్రయాణించాల్సి ఉంటుంది. దీంతో చిన్న అవసరం వచ్చినా చాలామంది కార్ల‌లోనే వెళ్తుంటారు. అందుకే రోడ్డు మీద నడుచుకుంటూ వెళ్లే వ్యక్తుల కంటే కార్లు కనిపించడం ఎక్కువగా ఉంటుంది.

అమెరికాలోని అనేక సబర్బన్ ప్రాంతాల జీవన విధానం కారుపై ఎక్కువగా ఆధారపడి ఉంటుంది. ఇంటి నుంచి సూపర్ మార్కెట్, ఆఫీస్, స్కూల్, రెస్టారెంట్ లేదా ఇతర అవసరాల కోసం వెళ్లాలంటే నడక కంటే కారులో వెళ్లడం సులభంగా ఉంటుంది. కొన్ని ప్రాంతాల్లో పబ్లిక్ ట్రాన్స్‌పోర్ట్ అందుబాటులో ఉన్నా, ప్రతి నివాస ప్రాంతానికి సమానంగా ఉండదు. ముఖ్యంగా పెద్ద నగరాల వెలుపల కారుతో ప్రయాణించడం చాలా కుటుంబాలకు రోజువారీ అవసరంగా మారుతుంది. అందుకే మనకు కనిపించే మరో ఆసక్తికరమైన తేడా ఏంటంటే.. అక్కడ ఇంటి ముందు జనం కనిపించకపోయినా, అదే సమయంలో రోడ్లపై కార్లు, పార్కింగ్ ప్రాంతాల్లో వాహనాలు, షాపింగ్ సెంటర్లలో మాత్రం జనసందడి కనిపిస్తుంది. అంటే ప్రజలు బయటకు రావడం లేదని కాదు.. వాళ్లు ఒక ప్రదేశం నుంచి మరో ప్రదేశానికి వాహనాల్లో వెళ్లడం ఎక్కువగా ఉంటుంది.

అమెరికాలో చాలా కుటుంబాల్లో పెద్దలు ఉద్యోగాలకు వెళ్తారు. పిల్లలు స్కూల్ లేదా ఇతర కార్యకలాపాలకు వెళ్తుంటారు. దీంతో వారంలో ఎక్కువ రోజులు ఉదయం నుంచి సాయంత్రం వరకు కుటుంబ సభ్యులు తమ తమ పనుల్లో బిజీగా ఉంటారు.

మన దగ్గర కొన్ని ప్రాంతాల్లో సాయంత్రం ఇంటి ముందు కూర్చొని పొరుగువారితో మాట్లాడటం, పిల్లలు వీధిలో ఆడుకోవడం వంటి సామాజిక జీవనం సాధారణంగా కనిపిస్తుంది. అమెరికాలోని అనేక సబర్బన్ ప్రాంతాల్లో మాత్రం సామాజిక కలయికలు వేరే విధంగా జరుగుతాయి.

కుటుంబ సభ్యులు ఇంట్లో ఉన్నప్పుడు కూడా తప్పనిసరిగా ఇంటి ముందు ఉండాల్సిన అవసరం ఉండదు. ఇంటి లోపలే టీవీ చూడటం, ఆన్‌లైన్‌లో వినోదం పొందడం, కుటుంబంతో గ‌డుపుతుంటారు. స్నేహితులను కలవాలన్నా ఇంట్లోనే లేదా రెస్టారెంట్లు, కాఫీ షాపులు, కమ్యూనిటీ ప్రదేశాల్లో కలవడం ఎక్కువగా ఉంటుంది.

అమెరికాలోని అన్ని ప్రాంతాల్లో ఒకే రకమైన వాతావరణం ఉండదు. కొన్ని ప్రాంతాల్లో శీతాకాలంలో ఉష్ణోగ్రతలు బాగా పడిపోతాయి. మంచు కురిసే ప్రాంతాల్లో బయట నడవడం కూడా ఇబ్బందిగా మారుతుంది. మంచు తొలగించడం, రోడ్ల పరిస్థితి వంటి అంశాలు కూడా రోజువారీ జీవితాన్ని ప్రభావితం చేస్తాయి. మరోవైపు కొన్ని ప్రాంతాల్లో వేసవిలో ఉష్ణోగ్రతలు ఎక్కువగా ఉంటాయి. ఇలాంటి పరిస్థితుల్లో బయట ఎక్కువసేపు ఉండటం కంటే ఇంట్లోనే ఉండటం సౌకర్యంగా భావిస్తారు.

అందుకే వ్యాయామం కోసం కూడా ప్రతి ఒక్కరూ బయట వీధుల్లో నడవడం కనిపించకపోవచ్చు. కొందరు ఇంట్లో ట్రెడ్‌మిల్ లేదా ఇతర వ్యాయామ పరికరాలను ఉపయోగిస్తారు. మరికొందరు జిమ్‌కు కారులో వెళ్లి వ్యాయామం చేసి తిరిగి ఇంటికి వస్తారు. అయితే వాకింగ్ సంస్కృతి అమెరికాలో లేదని కాదు.. వాతావరణం, ప్రాంతాన్ని బట్టి దాని విధానం మారుతుంది.

అమెరికా మొత్తం ఒకేలా ఉంటుందని అనుకోవడం తప్పు. న్యూయార్క్ వంటి నగర ప్రాంతాల్లో వీధుల్లో నడిచే ప్రజలు, రెస్టారెంట్లు, దుకాణాలు, పబ్లిక్ ట్రాన్స్‌పోర్ట్ ఉపయోగించే వారు పెద్ద సంఖ్యలో కనిపిస్తారు. ఇతర పెద్ద నగరాల్లోని డౌన్‌టౌన్ ప్రాంతాలు, టూరిస్ట్ ప్రదేశాలు, షాపింగ్ ప్రాంతాల్లో కూడా జనసందడి ఉంటుంది.

అయితే నగరాల బయట ఉన్న సబర్బన్, రెసిడెన్షియల్ ప్రాంతాల్లో పరిస్థితి భిన్నంగా ఉంటుంది. అక్కడ పెద్ద ఇళ్లు, గ్యారేజీలు, డ్రైవ్‌వేలు, విశాలమైన రోడ్లు, తక్కువగా ఉండే చిన్న వ్యాపారాలు కనిపిస్తాయి. ప్రజలు తమ అవసరాల కోసం కార్లలో బయటకు వెళ్లడం వల్ల ఇళ్ల ముందు నడిచే జనం పెద్దగా కనిపించరు.

దీనికి తోడు ఆన్‌లైన్ షాపింగ్, ఫుడ్ డెలివరీ, ఇంటి నుంచే పని చేసే అవకాశం కూడా బయటకు వెళ్లాల్సిన అవసరాన్ని కొంత తగ్గించాయి. అయితే ఇవి అమెరికాలోని ప్రతి కుటుంబానికి ఒకే విధంగా వర్తిస్తాయని చెప్పలేం.

మొత్తానికి అమెరికాలో ఇళ్ల బయట జనం తక్కువగా కనిపించడం వెనుక ఒక్క కారణం లేదు. విశాలమైన నివాస ప్రాంతాలు, కారుపై ఆధారపడే జీవన విధానం, దూరంగా ఉండే షాపింగ్ ప్రాంతాలు, ఉద్యోగాలు, వాతావరణం, ఇంటి ఆధారిత వినోదం, ఆన్‌లైన్ సేవలు వంటి అనేక అంశాలు దీనికి కార‌ణాలుగా చెప్పొచ్చు.

అందుకే అమెరికా సబర్బన్ ప్రాంతంలో ఖాళీగా కనిపించే ఒక వీధిని చూసి అక్కడి ప్రజలు ఎప్పుడూ ఇంట్లోనే ఉంటారని అనుకోవడం సరైంది కాదు. వారు ఆ సమయంలో ఆఫీసులో ఉండొచ్చు, పిల్లలను స్కూల్‌కు తీసుకెళ్లి ఉండొచ్చు, కారులో షాపింగ్‌కు వెళ్లి ఉండొచ్చు లేదా ఇంట్లోనే తమ పనుల్లో బిజీగా ఉండొచ్చు. జనం కనిపించకపోవడం కంటే.. వాళ్ల జీవన విధానం మనకు భిన్నంగా ఉండటమే అసలు విషయం.

Nepal Floods: చుట్టూ సర్వనాశనం.. ఆ పచ్చని ఇల్లు మాత్రం ఎలా నిలబడింది? నేపాల్ వరదల్లో మిరాకిల్!

Mahesh Rajamoni — Wed, 02 Sep 2026 11:46:17 +0530

Nepal Floods: నేపాల్ త్రిశూలి నది వరదల్లో అంతా కొట్టుకుపోయింది. వందల మంది చనిపోయారు. కానీ 40 ఏళ్ల నాటి గ్రీన్ హౌస్ సురక్షితంగా నిలిచింది. 6 మంది ప్రాణాలు కాపాడిన ఈ ఇల్లు ఎలా వరదలను తట్టుకోగలిగింది?

ఆగస్టు 26న నేపాల్‌లోని త్రిశూలి నది తీవ్ర రౌద్రరూపం దాల్చింది. ఉప్పొంగిన వరద నీరు తన దారిలో ఉన్న వాహనాలు, భవనాలు సర్వనాశనం చేస్తూ కొట్టుకుపోయింది. నువాకోట్ జిల్లాలోని డంగే బజార్ పరిసర ప్రాంతాలు మట్టి, రాళ్లు, మురుగుతో నిండిపోయాయి.

అయితే, ఈ విధ్వంసం మధ్య ఒక అద్భుతం జరిగింది. పచ్చ రంగులో ఉన్న ఒక 40 ఏళ్ల నాటి పాత ఇల్లు భయంకరమైన వరదలను తట్టుకుని అలాగే నిలబడింది. ఈ పచ్చని ఇల్లు సోషల్ మీడియాలో విపరీతంగా వైరల్ అయింది. చుట్టూ ఉన్న భవనాలన్నీ కొట్టుకుపోయినా, ఈ ఒక్క ఇల్లు ఎలా నిలబడిందనేది ప్రపంచవ్యాప్తంగా పెద్ద చర్చనీయాంశంగా మారింది.

వరద ఉధృతి మరింత గరిష్ఠ స్థాయికి చేరినప్పుడు ప్రకాష్, ఆయన కుటుంబంలోని ఆరుగురు సభ్యులు దాదాపు గంట నుండి గంటన్నర పాటు ఇంట్లోనే చిక్కుకుపోయారు. ప్రాణాలు కాపాడుకోవడానికి వారు భవనం పై అంతస్తుకు చేరుకుని గడిపారు. వరద నీటి మట్టం స్వల్పంగా తగ్గగానే, సమీపంలోని టోల్ ప్రాంతానికి చెందిన ప్రజలు రక్షణ చర్యలు చేపట్టారు. వారు పొరుగు భవనాల మధ్య ఒక పెద్ద పైప్‌ను ఉంచారు. ఆ పైప్‌, తాళ్ల సహాయంతో అవతలి వైపు నుంచి వచ్చి ప్రకాష్ కుటుంబాన్ని సురక్షితంగా బయటకు తీసుకువచ్చారు. సర్వస్వం కోల్పోయినా నిలిచిన ప్రాణాలు వరద రాక్షసి నుంచి కుటుంబ సభ్యులందరూ ప్రాణాలతో బయటపడ్డారు. ప్రస్తుతం వీరు ఖాట్మండ్ లో ఆశ్రయం పొందుతున్నారు. అయితే ఈ ప్రమాదంలో వారి వాహనాలు, దుకాణంలోని సరుకులు, ఇంట్లోని నిత్యావసర వస్తువులన్నీ కొట్టుకుపోయాయి.

ఇంటి గ్రౌండ్ ఫ్లోర్‌లో ఉన్న కిరాణా షాప్ వరద నీటికి తీవ్రంగా దెబ్బతింది. "అందరూ సురక్షితంగా ఉన్నారు. కానీ ఇక్కడ ఉన్నదంతా ధ్వంసమైంది లేదా మట్టిలో పూడిపోయింది. ఇప్పుడు మేమంతా మళ్లీ మొదటి నుంచి జీవితాన్ని నిర్మించుకోవాలి" అని ప్రకాష్ ఆవేదన వ్యక్తం చేశారు.

ఈ గ్రీన్ హౌస్ యజమాని ప్రకాష్. వరద తాకిడికి తన ఇల్లు ఎక్కడ కూలిపోతుందో అని ఆయన తీవ్ర భయాందోళనకు గురయ్యారు. అయితే ఈ ఇల్లు సురక్షితంగా నిలవడం ఒక అద్భుతమని ఆయన చెప్పారు. ఇల్లు ఎలా నిలబడింది అనే ప్రశ్నకు ప్రకాష్ తన అభిప్రాయాన్ని వెల్లడించారు.

"ఇది దాదాపు 40 సంవత్సరాల నాటి పాత ఇల్లు. ఆ సమయంలో వాడిన సిమెంట్, ఇతర నిర్మాణ సామగ్రి నాణ్యత చాలా బాగుండేది. ఈ భవనం నదికి చాలా దగ్గరగా ఉండటం వల్ల, నిర్మాణం సమయంలో పునాదిని చాలా జాగ్రత్తగా, బలంగా నిర్మించారు" అని ప్రకాష్ తెలిపారు. ఇంజనీరింగ్ పరమైన విశ్లేషణలు అధికారికంగా రాకపోయినా, ఇంటి నిర్మాణం, పునాది బలం, వరద ప్రవాహానికి అనుకూలంగా ఉన్న డిజైన్ దీనికి కారణమని భావిస్తున్నారు.

నువాకోట్ నుండి రసువా వెళ్లే రహదారిపై ఉన్న ఈ ఇల్లు చుట్టుపక్కల విధ్వంసం మధ్య ఏకైక ఆధారంగా నిలిచింది. ఇల్లు దెబ్బతిన్నా, ఆస్తి నష్టం తీవ్రంగా ఉన్నా ప్రకాష్ కుటుంబం అధైర్యపడలేదు. ఎంతటి నష్టం వచ్చినా మళ్లీ అదే స్థలం నుంచి తమ జీవితాన్ని పునఃప్రారంభించడానికి సిద్ధంగా ఉన్నామని ప్రకాష్ ధైర్యంగా చెప్పారు. "అవును, మేము మళ్లీ అక్కడి నుంచే కొత్తగా ప్రారంభించడానికి ప్రయత్నిస్తాము" అని ఆయన ఆశాభావం వ్యక్తం చేశారు.

Nobel Prize: భార‌త సంత‌తి మ‌హిళ‌కు నోబెల్ శాంతి బ‌హుమ‌తి.. ఇంత‌కీ ఎవ‌రీమో, ఏం చేశారు.?

Narender Vaitla — Fri, 09 Oct 2026 18:11:46 +0530

తమిళ మూలాలు.. దక్షిణాఫ్రికాలో జననం

నవనీతమ్ పిళ్లై 1941లో దక్షిణాఫ్రికాలోని డర్బన్‌లో భారతీయ తమిళ మూలాలున్న కుటుంబంలో జన్మించారు. ఆమె తల్లిదండ్రులు శాంతమ్మ నాయుడు, నారాయణస్వామి నాయుడు. ఆమె పూర్వీకులు తమిళనాడు నుంచి దక్షిణాఫ్రికాకు వలస వెళ్లారు. 1890 ప్రాంతంలో ఆమె కుటుంబ పూర్వీకులు చక్కెర తోటల్లో పనిచేయడానికి ఒప్పంద కార్మికులుగా అక్కడికి చేరుకున్నారు. వర్ణవివక్ష తీవ్రంగా ఉన్న వాతావరణంలో పెరిగిన నవీ పిళ్లై, చిన్నప్పటి నుంచే సమానత్వం, న్యాయం ప్రాముఖ్యతను గుర్తించారు. ఆమె దక్షిణాఫ్రికాలోని నాటల్ విశ్వవిద్యాలయంలో బీఏ, న్యాయశాస్త్ర పట్టాలు పూర్తి చేశారు. ఆ తర్వాత అమెరికాలోని హార్వర్డ్ విశ్వవిద్యాలయంలో ఉన్నత న్యాయ విద్యను అభ్యసించి, 1988లో జ్యూరిడికల్ సైన్స్‌లో డాక్టరేట్ పొందారు. న్యాయవిద్యను కేవలం వృత్తిగా కాకుండా, అణచివేతకు గురైన ప్రజలకు న్యాయం అందించే మార్గంగా ఆమె ఎంచుకున్నారు.

వర్ణవివక్షకు వ్యతిరేకంగా న్యాయపోరాటం

నవీ పిళ్లై తన న్యాయవృత్తిని 1967లో ప్రారంభించారు. దక్షిణాఫ్రికాలో వర్ణవివక్ష ఉన్న సమయంలో నల్లజాతీయులు, ఇతర అణగారిన వర్గాలు ఎదుర్కొన్న వివక్షకు వ్యతిరేకంగా ఆమె గళమెత్తారు. రాజకీయ కారణాలతో నిర్బంధానికి గురైనవారికి, హక్కుల కోసం పోరాడిన కార్యకర్తలకు న్యాయ సహాయం అందించారు. నెల్సన్ మండేలా సహా వర్ణవివక్ష వ్యతిరేక ఉద్యమంలో పాల్గొన్నవారి తరఫున న్యాయం కోసం నిలబడిన న్యాయవాదుల్లో ఆమె కూడా ఒకరు.

దక్షిణాఫ్రికాలో నల్లజాతి మహిళలు న్యాయరంగంలో ముందుకు రావడం కష్టంగా ఉన్న కాలంలో ఆమె అనేక అడ్డంకులను అధిగమించారు. 1995లో ఆ దేశ హైకోర్టు న్యాయమూర్తిగా నియమితులై, అక్కడ తొలి నల్లజాతి మహిళా న్యాయమూర్తిగా చరిత్ర సృష్టించారు. ఈ ప్రయాణం ఆమె వ్యక్తిగత విజయానికే పరిమితం కాలేదు. సమాజంలో వివక్షను ఎదుర్కొంటున్న మహిళలకు, అణగారిన వర్గాలకు న్యాయవ్యవస్థలోనూ సమాన అవకాశాలు ఉండాలనే సందేశాన్ని అందించింది.

అంతర్జాతీయ న్యాయస్థానాల్లో కీలక బాధ్యతలు

నవీ పిళ్లై సేవలు దక్షిణాఫ్రికాకే పరిమితం కాలేదు. 1995లో రువాండా అంతర్జాతీయ నేర ట్రిబ్యునల్‌లో న్యాయమూర్తిగా బాధ్యతలు చేపట్టారు. ఆ తర్వాత ఆ ట్రిబ్యునల్ అధ్యక్షురాలిగానూ పనిచేశారు. రువాండా మారణహోమానికి సంబంధించిన కేసుల విచారణలో ఆమె కీలక పాత్ర పోషించారు. ముఖ్యంగా అత్యాచారం, లైంగిక హింస వంటి చర్యలు యుద్ధ నేరాలు, మానవాళికి వ్యతిరేకమైన నేరాలు, మారణహోమం వంటి నేరాల పరిధిలోకి రావచ్చనే న్యాయసూత్రాల అభివృద్ధికి ఆమె కృషి చేశారు. 2003లో హేగ్‌లోని అంతర్జాతీయ క్రిమినల్ కోర్టు న్యాయమూర్తిగా నియమితులయ్యారు. ఈ పదవిలో పనిచేస్తూ అంతర్జాతీయ స్థాయిలో తీవ్రమైన నేరాలకు బాధ్యులైనవారిపై న్యాయపరమైన చర్యలు తీసుకోవాల్సిన అవసరాన్ని బలంగా సమర్థించారు. బాధితులకు న్యాయం అందించడం, నేరాలకు పాల్పడినవారు ఎంతటి అధికారంలో ఉన్నా చట్టానికి అతీతులు కారనే సూత్రాన్ని బలోపేతం చేయడం ఆమె న్యాయప్రస్థానంలో ముఖ్యమైన అంశాలుగా నిలిచాయి.

ఐక్యరాజ్యసమితి మానవ హక్కుల విభాగానికి నాయకత్వం

2008 సెప్టెంబర్ 1న నవీ పిళ్లై ఐక్యరాజ్యసమితి మానవ హక్కుల హైకమిషనర్‌గా బాధ్యతలు స్వీకరించారు. 2014 వరకు ఆ పదవిలో కొనసాగారు. ప్రపంచవ్యాప్తంగా మానవ హక్కుల ఉల్లంఘనలను వెలుగులోకి తీసుకురావడం, బాధితులకు న్యాయం అందేలా అంతర్జాతీయ సమాజం స్పందించేలా చేయడం, ప్రజల ప్రాథమిక హక్కులకు రక్షణ కల్పించడం వంటి అంశాలపై ఆమె దృష్టి సారించారు.

మహిళల హక్కులు, వివక్ష నిర్మూలన, మైనారిటీల రక్షణ, యుద్ధాల సమయంలో పౌరులపై జరిగే దాడులకు బాధ్యులను జవాబుదారీగా నిలబెట్టడం వంటి అంశాల్లో ఆమె నిరంతరం పనిచేశారు. మహిళల హక్కుల కోసం పనిచేసే అంతర్జాతీయ సంస్థ ‘ఈక్వాలిటీ నౌ’తోనూ ఆమెకు అనుబంధం ఉంది. న్యాయవ్యవస్థలో పనిచేసిన అనుభవాన్ని అంతర్జాతీయ మానవ హక్కుల పరిరక్షణకు ఉపయోగించారు. న్యాయం అనేది పత్రాల్లో ఉండే సూత్రం మాత్రమే కాకుండా, ప్రతి మనిషికి ఆచరణలో అందాల్సిన హక్కు అనే భావనను ఆమె తన పనితో చాటిచెప్పారు.

అంతర్జాతీయ చట్టాలకు గుర్తింపుగా నోబెల్ పురస్కారం

2026 నోబెల్ శాంతి బహుమతికి నవీ పిళ్లై ఎంపిక కావడం ఆమె దశాబ్దాల సేవలకు అంతర్జాతీయ గుర్తింపుగా నిలిచింది. యుద్ధాలు, రాజకీయ సంఘర్షణలు, మానవ హక్కుల ఉల్లంఘనలు పెరుగుతున్న పరిస్థితుల్లో అంతర్జాతీయ చట్టాలను బలోపేతం చేయాల్సిన అవసరాన్ని ఈ పురస్కారం మరోసారి గుర్తుచేస్తోంది. వివాదాలను పరిష్కరించడంలో దౌత్యం, చట్టబద్ధమైన వ్యవస్థలు, అంతర్జాతీయ సహకారం కీలకమని నోబెల్ కమిటీ అభిప్రాయపడింది. భారతీయ తమిళ మూలాలున్న కుటుంబంలో జన్మించి, దక్షిణాఫ్రికాలో వర్ణవివక్షకు వ్యతిరేకంగా పోరాడి, అంతర్జాతీయ న్యాయస్థానాలు, ఐక్యరాజ్యసమితిలో కీలక బాధ్యతలు నిర్వహించిన నవీ పిళ్లై ప్రస్థానం ఎంతో మందికి స్ఫూర్తిదాయకం అన‌డంలో సందేహం లేదు.

Nepal Floods: ముప్పు ఇంకా ముగిసిపోలేదు.. నేపాల్‌కు చైనా హెచ్చ‌రిక‌, మ‌రో 3 రోజుల్లో

Narender Vaitla — Thu, 27 Aug 2026 21:32:05 +0530

Nepal Floods: ప్రకృతి వైపరీత్యాలతో అతలాకుతలమైన నేపాల్‌ను మరో ప్రమాదం భయపెడుతోంది. ఇప్పటికే ఆకస్మిక వరదలు భారీ నష్టాన్ని మిగిల్చిన వేళ.. రసువా జిల్లాలో కొత్తగా ఏర్పడిన ఓ సరస్సు ఆందోళనకు కార‌ణ‌మ‌వుతోంది.

నేపాల్‌లోని రసువా జిల్లాలో భోటే కోషి నదీ ప్రవాహానికి సమీపంలో ఈ కొత్త సరస్సు ఏర్పడినట్లు సమాచారం. టిబెట్ ప్రాంతంలో పుట్టే చోచెన్ ఖోలా, పురేపు త్సాంగ్పో నదులు ముందుకు సాగుతూ పరస్పరం కలుస్తాయి. అనంతరం వాటి ప్రవాహం నేపాల్‌లోకి ప్రవేశిస్తుంది. ఈ నదులు కలిసే ప్రాంతానికి సమీపంలోనే భారీగా నీరు నిలిచి సరస్సు రూపుదిద్దుకున్నట్లు చైనా అధికారులు గుర్తించారు. గురువారం నాటికి సరస్సులో సుమారు 20 లక్షల క్యూబిక్ మీటర్ల నీరు చేరినట్లు అంచనా వేశారు. రాబోయే మూడు రోజుల్లో మరో 30 లక్షల క్యూబిక్ మీటర్ల వరకు నీరు చేరే అవకాశం ఉందని అధికారులు పేర్కొన్నారు. దీంతో నీటి ఒత్తిడి పెరిగి సరస్సు తెగిపోయే పరిస్థితి ఏర్పడొచ్చని ఆందోళన వ్యక్తం చేశారు.

కొత్తగా ఏర్పడిన సరస్సుకు గండి పడితే భారీ మొత్తంలో నీరు ఒక్కసారిగా దిగువ ప్రాంతాలకు దూసుకెళ్లే ప్రమాదం ఉంది. ముఖ్యంగా భోటేకోషి, త్రిశూలి నదుల్లో నీటి ప్రవాహం ఒక్కసారిగా పెరిగే అవకాశం ఉందని హెచ్చరికలు వెలువడ్డాయి. ఇప్పటికే వరదల కారణంగా తీవ్రంగా దెబ్బతిన్న ప్రాంతాలకు ఇది మరో పెద్ద సవాలుగా మారనుంది.

పరిస్థితిని దృష్టిలో పెట్టుకుని చైనా అధికారులు సరస్సును నిరంతరం పర్యవేక్షిస్తున్నారు. ఒకవేళ గండి పడితే నీటి ప్రవాహం ఏ ప్రాంతాలపై ప్రభావం చూపవచ్చు, ఎలాంటి అత్యవసర చర్యలు చేపట్టాలి అనే అంశాలపై అధికారులు సమీక్షిస్తున్నట్లు తెలుస్తోంది.

కొత్త సరస్సు, దాని వల్ల తలెత్తే ప్రమాదంపై చైనా ప్రభుత్వం నేపాల్‌కు అధికారికంగా సమాచారం అందించినట్లు నేపాల్ జల విజ్ఞాన, వాతావరణ విభాగం తెలిపింది. ఈ సమాచారాన్ని నేపాల్ విదేశాంగ శాఖకు కూడా చైనా అధికారులు తెలియజేసినట్లు పేర్కొంది. భోటేకోషి, త్రిశూలి నదీ పరివాహక ప్రాంతాల్లో మరోసారి వరదలు సంభవించే అవకాశం ఉన్నందున ప్రజలు అప్రమత్తంగా ఉండాలని అధికారులు సూచించారు. నదీ తీర ప్రాంతాల్లోకి వెళ్లకుండా దూరంగా ఉండాలని హెచ్చరించారు. తదుపరి అధికారిక సమాచారం వచ్చే వరకు ప్రజలు సురక్షిత ప్రాంతాల్లోనే ఉండాలని సూచించారు.

ప్రస్తుతం వరద ప్రభావిత ప్రాంతాల్లో గాలింపు, సహాయక చర్యలు కొనసాగుతున్నాయి. ఈ సమయంలో కొత్తగా వరద ముప్పు పొంచి ఉండటంతో సెర్చ్, రెస్క్యూ బృందాలు మరింత జాగ్రత్తగా వ్యవహరించాలని సూచించారు. ప్రయాణికులు, భద్రతా సిబ్బంది కూడా నదుల పరిసర ప్రాంతాల్లో అప్రమత్తంగా ఉండాలని అధికారులు కోరారు.

ఇదిలా ఉంటే.. ఇటీవల సంభవించిన భారీ వరదలు, కొండచరియలు విరిగిపడిన ఘటనలతో నేపాల్‌లో పరిస్థితి విషమంగా మారింది. తాజా సమాచారం ప్రకారం ఈ విపత్తుల్లో 359 మంది ప్రాణాలు కోల్పోయారు. చిత్వాన్ జిల్లాలోనే 132 మృతదేహాలను గుర్తించినట్లు నేపాల్ పోలీసులు వెల్లడించారు. ఇంకా పలువురి ఆచూకీ తెలియకపోవడంతో మృతుల సంఖ్య మరింత పెరిగే అవకాశం ఉందని అధికారులు భావిస్తున్నారు.

ఇప్పటికే భారీ ప్రాణ, ఆస్తి నష్టాన్ని ఎదుర్కొంటున్న నేపాల్‌కు కొత్త సరస్సు రూపంలో మరో ముప్పు ఎదురవడంతో ప్రభుత్వం, స్థానిక యంత్రాంగం అప్రమత్తమైంది. రాబోయే కొన్ని రోజులు కీలకంగా మారనున్న నేపథ్యంలో నదీ పరివాహక ప్రాంతాల్లోని ప్రజలు అధికారుల హెచ్చరికలను తప్పనిసరిగా పాటించాలని సూచిస్తున్నారు.

10 నిమిషాల్లో 1.5 లీట‌ర్ల‌ కూల్‌డ్రింక్‌ తాగిన యువ‌కుడు.. ఆ త‌ర్వాత ఏం జ‌రిగిందో తెలిస్తే మైండ్ బ్లాంక్‌

Narender Vaitla — Tue, 29 Sep 2026 20:40:03 +0530

Viral News: కూల్ డ్రింక్స్ ఆరోగ్యానికి మంచివి కావ‌ని తెలిసిందే. ఇందులోని షుగ‌ర్ కంటెంట్ ఆరోగ్యాన్ని పాడు చేస్తుంద‌ని వైద్యులు సైతం హెచ్చ‌రిస్తుంటారు. అయితే కూల్‌డ్రింక్ తాగితే మ‌నిషి చ‌నిపోతారంటే న‌మ్ముతారా.? ఈ షాకింగ్ సంఘ‌ట‌న నిజంగా జ‌రిగింది.

చైనాలోని బీజింగ్‌లో ఓ షాకింగ్ ఘటన వెలుగులోకి వచ్చింది. ఎండ వేడిమి నుంచి ఉపశమనం పొందేందుకు 22 ఏళ్ల యువకుడు కేవలం 10 నిమిషాల్లో 1.5 లీటర్ల కోకాకోలా తాగాడు. ఆ తర్వాత అతడికి తీవ్ర అనారోగ్య సమస్యలు తలెత్తి ప్రాణాలు కోల్పోయాడు. ఈ ఘటనపై వైద్య నిపుణులు పలు అంశాలను వెల్లడించారు.

మీడియా క‌థ‌నాల ప్రకారం.. యువకుడు 10 నిమిషాల వ్యవధిలోనే 1.5 లీటర్ల కోకాకోలా తాగాడు. ఆ తర్వాత సుమారు ఆరు గంటలకు అతడికి తీవ్రమైన కడుపు నొప్పి, కడుపు ఉబ్బరం మొదలయ్యాయి. పరిస్థితి విషమించడంతో అతడిని బీజింగ్‌లోని చావోయాంగ్ ఆసుపత్రికి తరలించారు.

ఆసుపత్రిలో వైద్యులు పరీక్షించగా యువకుడి గుండె వేగంగా కొట్టుకోవడం, శ్వాస నెమ్మదిగా ఉండటం, రక్తపోటు చాలా తక్కువగా ఉండటం గుర్తించారు. అలాగే అతడికి ఇస్కీమిక్ హెపటైటిస్ లేదా ‘షాక్ లివర్’ సమస్య ఉన్నట్లు తేలింది. సాధారణంగా కాలేయానికి రక్తం, ఆక్సిజన్ సరఫరా తగ్గినప్పుడు ఈ పరిస్థితి ఏర్పడుతుంది. దీంతో కాలేయ కణాలకు తీవ్రమైన నష్టం కలగొచ్చు.

‘క్లినిక్స్ అండ్ రీసెర్చ్ ఇన్ హెపటాలజీ అండ్ గ్యాస్ట్రోఎంటరాలజీ’ జర్నల్‌లో ప్రచురితమైన కేసు రిపోర్ట్ ప్రకారం.. వేగంగా పెద్ద మొత్తంలో సోడా తాగడం వల్ల జీర్ణవ్యవస్థలో అధికంగా గ్యాస్ ఏర్పడినట్లు వైద్యులు భావించారు. ఆ గ్యాస్ కారణంగా కాలేయానికి రక్తాన్ని తీసుకెళ్లే ప్రధాన రక్తనాళంలోకి గ్యాస్ చేరి, రక్తప్రసరణకు ఆటంకం ఏర్పడినట్లు రిపోర్టులో పేర్కొన్నారు. వైద్యులు మందులతో చికిత్స అందించినా, 12 గంటల తర్వాత కాలేయానికి తీవ్రమైన నష్టం జరిగినట్లు పరీక్షల్లో వెల్లడైంది.

చికిత్స ప్రారంభించిన 18 గంటల తర్వాత యువకుడు మరణించాడు. ఈ ఘటనకు ముందు అతడు పూర్తిగా ఆరోగ్యంగా ఉన్నట్లు కేసు రిపోర్ట్‌లో పేర్కొన్నారు. అయితే కేవలం కోల్డ్ డ్రింక్‌ను వేగంగా తాగడం వల్లే ఇంత తీవ్రమైన పరిస్థితి ఏర్పడిందని క‌చ్చితంగా చెప్పలేమని యూనివర్సిటీ కాలేజ్ లండన్‌కు చెందిన బయోకెమిస్ట్ ప్రొఫెసర్ నాథన్ డేవిస్ అభిప్రాయపడ్డారు. గ్యాస్ ఏర్పడటానికి ఏదైనా బ్యాక్టీరియా ఇన్ఫెక్షన్ కూడా కారణమై ఉండొచ్చని ఆయన అనుమానం వ్యక్తం చేశారు. ఈ ఘటనకు అసలు కారణాన్ని నిర్ధారించేందుకు మరిన్ని వైద్య పరీక్షలు అవసరం అని నిపుణులు చెబుతున్నారు.

Nepal Disaster: 30 ఏళ్లలో 1500 సార్లు వరదలు.. నేపాల్‌ను ప్రకృతి ఎందుకు టార్గెట్ చేస్తోంది?

Mahesh Rajamoni — Sun, 30 Aug 2026 09:56:24 +0530

Nepal Disaster: నేపాల్ లో వరదల కారణంగా ఇప్పటికే వందల మంది చనిపోయారు. వేల మంది గల్లంతయ్యారు. అంచనా వేయలేనంతగా ఆస్తినష్టం జరిగింది. అయితే, నేపాల్‌లో ఇలా పదే పదే వరదలు, కొండచరియల విధ్వంసానికి అసలు కారణాలేంటి? గత 30 ఏళ్ల డేటా ఏం చెబుతోంది?

హిమాలయ పర్వత ప్రాంతమైన నేపాల్‌లో మరోసారి భారీ జలప్రళయం ముంచెత్తింది. చైనా-టిబెట్ సరిహద్దును ఆనుకుని ఉన్న ఉత్తర నేపాల్‌ ప్రాంతంలో సంభవించిన ఘోర ప్లాష్ ఫ్లడ్స్ తీవ్ర ఆస్తి, ప్రాణ నష్టాన్ని మిగిల్చాయి. ఈ విధ్వంసంలో ఇప్పటివరకు సుమారు 675 మంది ప్రాణాలు కోల్పోయారు. మరో 3 వేల మంది గల్లంతయ్యారు. గల్లంతైన వారిలో 288 మంది భారతీయులు ఉన్నట్లు ప్రాథమిక సమాచారం ద్వారా తెలుస్తోంది. ప్రస్తుతం అక్కడ సహాయక చర్యలు ముమ్మరంగా సాగుతున్నాయి.

నేపాల్‌లో ఇలాంటి విపత్తులు రావడం ఇదే మొదటిసారి ఏమీ కాదు. గత 30 ఏళ్ల గణాంకాలను ఒకసారి పరిశీలిస్తే, దాదాపు 1,500కు పైగా భారీ వరద సంఘటనలు ఇక్కడ నమోదయ్యాయి. ఈ వరదల కారణంగా ఇప్పటివరకు 4,200 మందికి పైగా ప్రజలు ప్రాణాలు కోల్పోయారు. నిమిషాల్లో ఊళ్లకు ఊళ్లే కొట్టుకుపోయేంత స్థాయిలో ఇక్కడ ప్రళయం ఎందుకు వస్తోంది? పదే పదే కొండచరియలు విరిగిపడటానికి, వరదలు రాడానికి అసలు కారణాలు ఏంటి? ఈ అంశాలు గమనిస్తే ఆసక్తికరమైన విషయాలు వెలుగులోకి వస్తున్నాయి.

ప్రపంచంలోనే అత్యంత ఎత్తైన హిమాలయ పర్వత శ్రేణుల్లో నేపాల్ ఉంది. ఇవి భౌగోళికంగా చాలా లేత పర్వతాలు (యంగ్ మౌంటేన్స్). అందుకే ఇక్కడి నేల, రాళ్ల అమరిక చాలా లూజ్‌గా ఉంటుంది. వాలు ఎక్కువగా ఉండటం వల్ల చిన్నపాటి వర్షం పడినా నేల సులభంగా జారిపోయి కొండచరియలు విరిగిపడతాయి. దీనికి తోడు దక్షిణాసియా మాన్సూన్ ఈ కొండలను తాకినప్పుడు తక్కువ సమయంలో భారీ వర్షాలు పడతాయి. ఇటీవల క్లౌడ్ బరస్ట్‌లు పెరగడంతో నదులు ఒక్కసారిగా ఉప్పొంగి ప్రళయాన్ని సృష్టిస్తున్నాయి.

గ్లోబల్ వార్మింగ్ వల్ల హిమాలయాల్లోని మంచు నదులు వేగంగా కరిగిపోతున్నాయి. దీనివల్ల మంచు కొండల కింద పెద్ద పెద్ద సరస్సులు ఏర్పడుతున్నాయి. నీటి ఒత్తిడి ఎక్కువై ఈ సరస్సుల గట్లు తెగిపోయినప్పుడు 'గ్లేషియల్ లేక్ అవుట్‌బర్స్ట్ ఫ్లడ్' (GLOF) ఏర్పడుతుంది. ఈ నీరు ఒక్కసారిగా కింద ఉన్న గ్రామాలపై విరుచుకుపడుతుంది. నేపాల్‌లోని ప్రధాన నదులైన కోషి, గండక్, కర్నాలి ఒకేసారి ఉప్పొంగడం, ప్రవాహానికి కొండచరియల మట్టి అడ్డుపడటంతో ఈ ప్రమాద తీవ్రత రెట్టింపు అవుతోంది.

నేపాల్ అత్యంత ప్రమాదకరమైన సిస్మిక్ అంటే భూకంప జోన్‌లో ఉంది. 2015లో వచ్చిన భీకర భూకంపంతో పాటు ఇక్కడ పదే పదే వచ్చే ప్రకంపనలు పర్వతాల లోపలి నిర్మాణాన్ని బాగా బలహీనపరిచాయి. మరోవైపు నేపాల్‌లో 80 శాతానికి పైగా పర్వత ప్రాంతాలే ఉంటాయి. రోడ్లు, జలవిద్యుత్ ప్రాజెక్టులు, భవనాల నిర్మాణం కోసం విపరీతంగా అడవులను నరికివేస్తున్నారు. చెట్లు లేకపోవడంతో మట్టి పట్టు కోల్పోయి, వర్షపు నీరు నేరుగా నదుల్లోకి చేరి ఆకస్మిక వరదలకు దారితీస్తోంది. ప్రకృతి కోపానికి మానవ తప్పిదాలు తోడవడమే ఈ వరుస ప్రళయాలకు మరో కారణంగా ఉంది.

Sadhguru : భూమిపై ఇక 60 పంటలు పండుతాయి.. మట్టిసారంపై సద్గురు ఆందోళన, ప్రపంచానికి వార్నింగ్

Nandini Arava — Mon, 19 Oct 2026 19:15:08 +0530

Sadhguru: మనం తింటున్న ఈ ఆహారం..భవిష్యత్తులో పుట్టబోయే పిల్లలకు దక్కదా? ప్రపంచవ్యాప్తంగా మట్టి సారం తగ్గిపోవడంపై సద్గురు సంచలన వ్యాఖ్యలు చేశారు. భూమిపై ఇక 60 పంటలు మాత్రమే పండించగలమని చెబుతూ దేశాలన్నీ తక్షణమే చర్యలు తీసుకోవాలని పిలుపునిచ్చారు.

మనం తింటున్న ఈ ఆహారం..భవిష్యత్తులో పుట్టబోయే పిల్లలకు దక్కదా? ప్రపంచవ్యాప్తంగా మట్టి సారం తగ్గిపోతుండటంపై సద్గురు సంచలన వ్యాఖ్యలు చేశారు. భూమిపై ఇక 60 పంటలు మాత్రమే పండించగలమని చెబుతూ, మట్టిని కాపాడేందుకు దేశాలన్నీ తక్షణమే చర్యలు తీసుకోవాలని పిలుపునిచ్చారు.

మలేషియాలో జరిగిన ఓ కార్యక్రమంలో సద్గురు మాట్లాడుతూ, ప్రపంచవ్యాప్తంగా మట్టి సారం తగ్గిపోతుండటంతో భవిష్యత్తులో ఆహార ఉత్పత్తికి తీవ్ర ముప్పు పొంచి ఉందని హెచ్చరించారు. కౌలాలంపూర్‌లోఅక్టోబర్ 7న 'చైతన్యవంతమైన ప్రపంచ నిర్మాణం' అనే కార్యక్రమం జరిగింది. ఇందులో పాల్గొన్న సద్గురు.. ప్రపంచవ్యాప్తంగా మట్టి సారం వేగంగా తగ్గిపోతుండటం వల్ల భవిష్యత్తులో ఆహార ఉత్పత్తి, భద్రతకు పొంచి ఉన్న ముప్పు గురించి వివరించారు. ఈ భూమిపై ఇక 60 పంటలు మాత్రమే పండించగలమని, ఆ తర్వాత ఆహారం పండించడం చాలా కష్టంగా మారుతుందని ఐరాస చెప్పినట్లు సద్గురు తెలిపారు.

మనం మన ఆహారాన్ని కాకుండా ఇంకా పుట్టని పిల్లలకు చెందాల్సిన ఆహారాన్ని లాగేసుకుంటున్నామని, ఇది అస్సలు మంచిది కాదని సద్గురు అన్నారు. అంటే మహా అయితే మరో 40 నుంచి 45 ఏళ్లు మాత్రమే. ఆ తర్వాత ఆహారాన్ని ఉత్పత్తి చేయడం చాలా కష్టంగా మారుతుందని తెలిపారు.

నిజం చెప్పాలంటే, ఇంకా పుట్టని పిల్లల ఆహారాన్ని మనం ఇప్పుడు తినేస్తున్నామని. ఈ విషయాన్ని అందరూ అర్థం చేసుకోవాలని సూచించారు. మనం మన తిండిని గానీ, మన పిల్లల తిండిని గానీ తినడం లేదు. భవిష్యత్తులో పుట్టబోయే పిల్లలకు చెందాల్సిన ఆహారాన్ని మనం లాగేసుకుంటున్నామని వ్యాఖ్యానించారు. ఇది ఏమాత్రం మంచిది కాదు. కాబట్టి దయచేసి మట్టిని కాపాడేందుకు వెంటనే చర్యలు తీసుకోండని సూచించారు. ప్రతి దేశంలోనూ మట్టి సారాన్ని పెంచేలా కొత్త విధానాలు రావాలని, దీనిపై ప్రజలు పాలకులను నిలదీయాలని సద్గురు పిలుపునిచ్చారు.

ఇక్కడ అత్యంత ముఖ్యమైన విషయం ఏంటంటే.. ప్రతి దేశంలోనూ విధానాలు మారాలన్నారు. ఆయా దేశాల్లోని నేల సారాన్ని పెంచేలా ప్రభుత్వాల విధానాలు ఉండాలని కోరారు. మట్టి ఆరోగ్యానికి పెద్దపీట వేసేలా చర్యలు తీసుకోవాలని ప్రజలు కూడా విధాన నిర్ణేతలను నిరంతరం డిమాండ్ చేస్తూనే ఉండాలని పిలుపునిచ్చారు.

దాదాపు నాలుగేళ్ల క్రితం మేం రూపొందించిన మలేషియా మట్టి సంరక్షణ విధానాన్ని మీకు ఇస్తున్నాం. దాన్ని మీ దేశ ప్రధాని, వ్యవసాయ శాఖ మంత్రి, పర్యావరణ శాఖ మంత్రులకు అందజేయండి.

ఇలాగే ప్రపంచంలోని 192 దేశాలకు సరిపోయేలా మట్టి సంరక్షణ విధానాలను రూపొందించడానికి మాకు 2 నుంచి రెండున్నరేళ్ల సమయం పట్టిందని సద్గురు అన్నారు. ప్రతి దేశ భౌగోళిక పరిస్థితులు, మట్టి స్వభావం, ఆర్థిక పరిస్థితి, వ్యవసాయ పద్ధతులను బట్టి వీటిని తయారు చేసినట్లు తెలిపారు. వీటిని ఇప్పటికే 72 నుంచి 74 దేశాలు పూర్తిగా లేదా పాక్షికంగా ఆమోదించాయని సద్గురు చెప్పుకొచ్చారు.

USA: అమెరికాలో ఉంటున్న భార‌తీయుల‌కు ఇక క‌ష్ట‌మేనా.? మ‌రో బాంబ్ పేల్చిన ట్రంప్ స‌ర్కార్

Narender Vaitla — Sun, 11 Oct 2026 18:19:05 +0530

USA: అమెరికాలో ఉద్యోగం చేస్తూ అక్కడే శాశ్వతంగా స్థిరపడాలని భావిస్తున్న విదేశీ ఉద్యోగులకు గ్రీన్ కార్డ్ ఎంతో కీలకం. అయితే ఈ ప్రక్రియలో కంపెనీల పాత్రకు సంబంధించి అమెరికాలో కీలక పరిణామం చోటుచేసుకుంది. ఇందుకు సంబంధించిన పూర్తి వివ‌రాలు.

అమెరికాలో విదేశీ ఉద్యోగులను నియమించుకునే విధానాలు, స్థానికులకు ఉద్యోగ అవకాశాలు కల్పించే బాధ్యతలపై ట్రంప్ ప్రభుత్వం దృష్టి సారించింది. ఈ నేపథ్యంలో కొన్ని ప్రముఖ టెక్నాలజీ సంస్థలు వీసా వ్యవస్థను దుర్వినియోగం చేస్తున్నాయనే ఆరోపణలు తెరపైకి వచ్చాయి. అమెరికా ఉపాధ్యక్షుడు జేడీ వాన్స్ మైక్రోసాఫ్ట్‌ వంటి సంస్థల నియామక విధానాలపై విమర్శలు చేశారు. విదేశీ ఉద్యోగులను నియమించుకునే సమయంలో అమెరికన్లకు అందుబాటులో ఉన్న ఉద్యోగ అవకాశాలకు ప్రాధాన్యం ఇవ్వాలని ప్రభుత్వం భావిస్తోంది. ఈ నేపథ్యంలో PERM దరఖాస్తులకు సంబంధించిన చర్యలు ఐటీ కంపెనీలతో పాటు అమెరికాలో పనిచేస్తున్న విదేశీ నిపుణుల్లోనూ ఆసక్తిని పెంచాయి.

అమెరికాలో శాశ్వతంగా పనిచేయడానికి విదేశీ ఉద్యోగులకు ఉపాధి ఆధారిత గ్రీన్ కార్డ్ పొందే మార్గాల్లో PERM కీలకమైనది. PERM అంటే పర్మనెంట్ లేబర్ సర్టిఫికేషన్. సాధారణంగా ఈ ప్రక్రియలో కంపెనీ తాను భర్తీ చేయాలనుకుంటున్న ఉద్యోగానికి అర్హులైన అమెరికన్ కార్మికులు అందుబాటులో ఉన్నారా అనే అంశాన్ని పరిశీలిస్తుంది. నిర్దేశించిన నిబంధనలను పాటించిన తర్వాత సంబంధిత ధ్రువీకరణ కోసం దరఖాస్తు చేస్తుంది. ఈ ప్రక్రియ పూర్తయినంత మాత్రాన ఉద్యోగికి వెంటనే గ్రీన్ కార్డ్ రాదు. తదుపరి దశల్లో ఇమ్మిగ్రేషన్ పిటిషన్, వీసా అందుబాటు, అర్హత వంటి అంశాలు కీలకంగా ఉంటాయి. కాబట్టి PERM ప్రక్రియ నిలిచిపోతే, దాని పరిధిలోకి వచ్చే ఉద్యోగుల గ్రీన్ కార్డ్ ప్రయాణం ఆలస్యం కావచ్చు.

అమెరికాలో హెచ్‌-1బీ వీసాపై పనిచేస్తున్న భారతీయ సాఫ్ట్‌వేర్ నిపుణులు తమ ఉద్యోగంతో పాటు శాశ్వత నివాస అవకాశాలను కూడా పరిశీలిస్తుంటారు. అలాంటి ఉద్యోగులకు కంపెనీ స్పాన్సర్ చేసే గ్రీన్ కార్డ్ ప్రక్రియ ముఖ్యమైనది. సంబంధిత సంస్థల PERM దరఖాస్తులపై నిజంగా నిలిపివేత అమల్లో ఉంటే, కొత్తగా ఈ ప్రక్రియను ప్రారంభించాలనుకునే కొందరు ఉద్యోగులు ఇబ్బందులు ఎదుర్కొనే అవకాశం ఉంది. ఇప్పటికే దరఖాస్తు చేసుకున్నవారి పరిస్థితి మాత్రం ఉత్తర్వుల నిబంధనలు, దరఖాస్తు దశను బట్టి మారుతుంది. అంతేకాదు, PERM ప్రక్రియపై ఆంక్షలు ఉన్నాయని మాత్రమే ఉద్యోగుల హెచ్‌-1బీ వీసాలు రద్దవుతాయని లేదా వారు వెంటనే అమెరికా విడిచి వెళ్లాలని అర్థం చేసుకోకూడదు. వీసా స్థితి, ఉద్యోగ అర్హత, గ్రీన్ కార్డ్ ప్రక్రియ వేర్వేరు అంశాలు.

ఈ పరిణామంపై TCS, ఇన్ఫోసిస్ సంస్థలు తమ కార్యకలాపాలపై పెద్దగా ప్రభావం ఉండకపోవచ్చని వెల్ల‌డించాయి. అమెరికాలో స్థానిక ఉద్యోగుల నియామకానికి, సాంకేతిక అభివృద్ధికి ప్రాధాన్యం ఇస్తున్నామని ఇన్ఫోసిస్ తెలిపినట్లు సమాచారం. అలాగే TCS కూడా అమెరికాలో స్థానిక ప్రతిభను ప్రోత్సహించడం, అక్కడి నిబంధనలకు అనుగుణంగా పనిచేయడంపై దృష్టి సారించినట్లు కథనాలు వెల్లడించాయి. గత కొన్నేళ్లుగా కొన్ని భారతీయ ఐటీ కంపెనీలు సమర్పిస్తున్న PERM దరఖాస్తుల సంఖ్య తగ్గినట్లు కూడా రిపోర్టులు చెబుతున్నాయి. అయితే కంపెనీల వారీగా దరఖాస్తుల సంఖ్య, నిలిపివేత పరిధి, అమలు తేదీ వంటి వివరాలను సంబంధిత అధికారిక ప్రకటనలు లేదా నియంత్రణ సంస్థలకు సమర్పించిన పత్రాల ద్వారా నిర్ధారించుకోవాలి.

ఈ పరిణామం వల్ల ప్రభావితమయ్యే ఉద్యోగులకు గ్రీన్ కార్డ్ ప్రక్రియలో ఆలస్యం ఏర్పడే అవకాశం ఉంది. అయితే అమెరికాలో పనిచేస్తున్న భారతీయులందరికీ గ్రీన్ కార్డులు నిలిచిపోయాయని చెప్పడం సరైంది కాదు. PERM ప్రక్రియకు వర్తించే ఆంక్షలు ఏ సంస్థలకు, ఏ దరఖాస్తులకు, ఎంతకాలం వర్తిస్తాయనే అంశాలే అసలు ప్రభావాన్ని నిర్ణయిస్తాయి. ఇప్పటికే గ్రీన్ కార్డ్ పొందినవారికి, ఇతర అర్హతల ఆధారంగా దరఖాస్తు చేసుకునేవారికి పరిస్థితులు భిన్నంగా ఉండవచ్చు. అందువల్ల అమెరికాలో పనిచేస్తున్న ఉద్యోగులు తమ కంపెనీ మానవ వనరుల విభాగాన్ని లేదా ఇమ్మిగ్రేషన్ న్యాయ నిపుణులను సంప్రదించి తాజా వివరాలు తెలుసుకోవడం మంచిది. మొత్తంగా చూస్తే, ఈ అంశం అమెరికాలో విదేశీ ఉద్యోగుల నియామక విధానాలు, స్థానిక ఉపాధికి ప్రాధాన్యం, గ్రీన్ కార్డ్ ప్రక్రియలపై మరోసారి చర్చకు దారితీస్తోంది.

ప్రపంచ ప్రఖ్యాత సరస్సు పేరు మార్చిన ట్రంప్... ఎందుకో తెలుసా?

Arun Kumar P — Sat, 29 Aug 2026 14:02:05 +0530

నిత్యం ఏదో ఒక వివాదంలో అమెరికా అధ్యక్షుడు డొనాల్డ్ ట్రంప్ పేరు వినిపిస్తుంటుంది. తాజాగా ప్రపంచ ప్రఖ్యాతిగాంచిన ఓ సరస్సు పేరును మార్చి వార్తల్లో నిలిచారు. సరస్సుపై అతడి కన్ను ఎందుకు పడిందంటే…

కెనడాతో వాణిజ్య యుద్ధం తారస్థాయికి చేరిన వేళ అమెరికా అధ్యక్షుడు డొనాల్డ్ ట్రంప్ మరో సంచలన నిర్ణయం తీసుకున్నారు. ప్రఖ్యాత 'ఒంటారియో సరస్సు' (Lake Ontario) పేరును "లేక్ అమెరికా"గా మారుస్తూ అధికారికంగా ఆదేశాలు జారీ చేశారు. ట్రంప్ తీసుకున్న ఈ నిర్ణయం అమెరికా-కెనడా సంబంధాల్లో తీవ్ర ప్రకంపనలు సృష్టిస్తోంది. సోషల్ మీడియాలో అయితే ఈ విషయంపై మీమ్స్, జోకులు పేలుతున్నాయి.

ఈ కొత్త పేరు కేవలం అమెరికా ప్రభుత్వ రికార్డులకు మాత్రమే వర్తిస్తుంది. కెనడా గానీ, అంతర్జాతీయ సంస్థలు గానీ ఈ పేరును వాడాల్సిన అవసరం లేదు. ఒంటారియో సరస్సులో 52 శాతం కెనడా భూభాగంలో ఉండగా, మిగిలిన ప్రాంతం అమెరికాలోని న్యూయార్క్‌లో ఉంది. "ఒంటారియో సరస్సు పేరును తక్షణమే 'లేక్ అమెరికా'గా మారుస్తున్నాం. ఈ విషయం గురించి నేను చాలా కాలంగా ఆలోచిస్తున్నాను" అని ట్రంప్ మీడియాకు తెలిపారు.

ట్రంప్ ప్రకటన వెలువడిన వెంటనే 'ఎక్స్' (ట్విట్టర్) సహా ఇతర సోషల్ మీడియా ప్లాట్‌ఫామ్‌లలో మీమ్స్ వరద పారింది. కెనడా జాతీయ పక్షులైన కెనడియన్ గీస్‌ను (Canadian Geese) ఇకపై "డొనాల్డ్ డక్స్" (Donald Ducks) అని పిలవాలా? అంటూ నెటిజన్లు సెటైర్లు వేస్తున్నారు. "సరస్సు పేరునే 'లేక్ అమెరికా' అని మార్చాక, అక్కడున్న కెనడియన్ బాతులను 'డొనాల్డ్ డక్స్' అని పిలవడమే కరెక్ట్!" అంటూ యూజర్లు వ్యంగ్యాస్త్రాలు సంధిస్తున్నారు.

ట్రంప్ నిర్ణయాన్ని కెనడా ప్రధాని మార్క్ కార్నీ తీవ్రంగా వ్యతిరేకించారు. "కెనడా, అమెరికా దేశాలు పుట్టకముందు నుంచే ఈ సరస్సుకు ఒక చరిత్ర ఉంది. వాస్తవం ఏంటంటే, దీనిని అప్పుడూ, ఇప్పుడూ, ఎప్పటికీ 'ఒంటారియో సరస్సు' అనే పిలుస్తారు" అని ఆయన ఘాటుగా స్పందించారు. అమెరికాలోనూ ట్రంప్ చర్యపై వ్యతిరేకత వ్యక్తమైంది.

క్యాథీ హోచుల్ (న్యూయార్క్ గవర్నర్) : న్యూయార్క్ ఎప్పటికీ ఈ కొత్త పేరుతో పిలవదని స్పష్టం చేశారు.

ఫిల్ స్కాట్ (వెర్మాంట్ గవర్నర్) : అధ్యక్షుడి నిర్ణయం "చిల్లరగా, నిరాశపరిచేలా ఉంది" అని వ్యాఖ్యానించారు.

బెర్నీ శాండర్స్ (సెనెటర్) : అమెరికా ప్రజలకు ఉచిత వైద్యం, విద్య, ఇళ్లు కావాలి కానీ, సరస్సుల పేర్లు మార్చడం కాదని ప్రభుత్వంపై విరుచుకుపడ్డారు.

ముదిరిన అమెరికా-కెనడా వాణిజ్య యుద్ధం

ఈ పేరు మార్పు వివాదం రెండు దేశాల మధ్య జరుగుతున్న తీవ్రమైన ఆర్థిక యుద్ధంలో భాగమే. ఆగస్టులో చర్చలు విఫలమైన తర్వాత, అమెరికా సుమారు $20 బిలియన్ల విలువైన కెనడా వస్తువులపై (వైన్, పాల ఉత్పత్తులు, ఫర్నిచర్, సిమెంట్, హాకీ పరికరాలు మొదలైనవి) ఏకంగా 50% సుంకం (Tariff) విధించింది. అమెరికా చర్యను అన్యాయమన్న కెనడా, ప్రతీకారంగా 15% నుంచి 50% వరకు సుంకాలను ప్రకటించింది. ఇవి సెప్టెంబర్ 8, 2026 నుంచి అమల్లోకి రానున్నాయి. దీనికి తోడు జనవరి 1, 2027 నుంచి కెనడా వాహనాలు, ఉక్కుపై సుంకాన్ని 50%కి పెంచుతామని ట్రంప్ హెచ్చరించడంతో సరిహద్దుల్లోని ఇరు దేశాల వ్యాపారులు తీవ్ర ఇబ్బందులు పడుతున్నారు.

Paris Protests: పారిస్ నగరం ఎందుకు తగలబడుతోంది? యువకులు ఎందుకు రోడ్లెక్కారు?

Mahesh Rajamoni — Mon, 19 Oct 2026 14:33:58 +0530

Paris Protests: ఫ్రాన్స్ రాజధాని పారిస్‌తో పాటు దేశవ్యాప్తంగా నిరసనలు తీవ్రరూపం దాల్చాయి. పారిస్‌లో పాఠశాలలు, కాలేజీల దుస్థితి, పెరుగుతున్న జీవన వ్యయానికి వ్యతిరేకంగా విద్యార్థులు, కార్మికులు చేపట్టిన నిరసనలు హింసాత్మకంగా మారాయి.

ఫ్రాన్స్ రాజధాని పారిస్‌తో పాటు దేశవ్యాప్తంగా ఇప్పుడు తీవ్ర ఉద్రిక్త పరిస్థితులు నెలకొన్నాయి. కాలేజీలు, పాఠశాలల్లో అధ్వాన్నమైన పరిస్థితులు, విపరీతంగా పెరిగిపోయిన జీవన వ్యయానికి వ్యతిరేకంగా విద్యార్థులు రోడ్డెక్కడంతో ఈ ఆందోళనలు ప్రారంభమయ్యాయి.

సెప్టెంబర్ చివరి వారంలో ప్రారంభమైన ఈ నిరసన ఉద్యమం క్రమంగా ఉద్ధృతమైంది. పాఠశాలల్లో ఉపాధ్యాయుల కొరత తీవ్రంగా ఉందని, తరగతి గదులు కిక్కిరిసిపోయాయని విద్యార్థులు ఆవేదన వ్యక్తం చేశారు. శిథిలావస్థకు చేరిన పాఠశాల భవనాలు, విద్యా వ్యవస్థలో లోపాల కారణంగా తమ చదువులు సక్రమంగా సాగడం లేదని వారు వాపోయారు.

ఈ ఆందోళనలు కేవలం విద్యారంగానికే పరిమితం కాలేదు. దేశంలో విపరీతంగా పెరుగుతున్న నిత్యావసర వస్తువుల ధరలు, ఇంధన ధరలు, గృహ నిర్మాణ ఖర్చులు ప్రజల బడ్జెట్‌పై తీవ్ర ప్రభావం చూపుతున్నాయి. మెరుగైన వేతనాలు, తక్కువ ధరలు, మెరుగైన పింఛన్లు డిమాండ్ చేస్తూ కార్మిక సంఘాలు కూడా ఈ ఉద్యమంలో భాగమయ్యాయి. సమాన అవకాశాల లేమి, ప్రభుత్వ ప్రజా వ్యతిరేక విధానాలపై యువతలో తీవ్ర నిరాశ వ్యక్తమవుతోంది.

శనివారం (అక్టోబర్ 17) నాడు పారిస్ సహా పలు ఫ్రెంచ్ నగరాల్లో భారీ నిరసన ప్రదర్శనలు నిర్వహించారు. ఈ ప్రదర్శనలు ఉదయం పూట శాంతియుతంగా సాగినప్పటికీ, సాయంత్రానికి హింసాత్మక రూపు దాల్చాయి. కొంతమంది ఆందోళనకారులు పోలీసులతో ఘర్షణకు దిగారు. దుకాణాల అద్దాలను పగులగొట్టి, దోపిడీకి పాల్పడ్డారు. పలు చోట్ల వాహనాలకు, భవనాలకు నిప్పు పెట్టారు. పరిస్థితి అదుపు తప్పడంతో పోలీసులు బాష్పవాయువు గోళాలను, వాటర్ కెనాన్లను ప్రయోగించారు.

ఆదివారం (అక్టోబర్ 18 నాడు ఫ్రాన్స్ అధ్యక్షుడు ఇమ్మాన్యుయేల్ మాక్రాన్ ఈ హింసాకాండను తీవ్రంగా ఖండించారు. బాధ్యులపై కఠిన చర్యలు ఉంటాయని హెచ్చరించారు. అధికారుల బృందాలు దెబ్బతిన్న దుకాణాలు, ప్రభుత్వ భవనాల నష్టాన్ని అంచనా వేయడం ప్రారంభించాయి. సోమవారం (అక్టోబర్ 19) నాటికి పారిస్ వీధుల్లో ధ్వంసమైన స్టోర్‌ఫ్రంట్‌లు, కాలిపోయిన స్కూటర్లు, గోడలపై రాతలు స్పష్టంగా కనిపించాయి. కొన్ని కేఫ్‌లు, పర్యాటక ప్రాంతాలు తిరిగి తెరుచుకున్నప్పటికీ, నగరంలో ఉద్రిక్త వాతావరణం మాత్రం ఇంకా వీడలేదు.

తాజా రిపోర్టుల ప్రకారం ఈ ఆందోళనల్లో భారీ ఆస్తి నష్టం సంభవించడంతో పాటు పెద్ద ఎత్తున అరెస్టులు జరిగాయి. అంతర్గత మంత్రిత్వ శాఖ అంచనా ప్రకారం అక్టోబర్ 17 నాటికి దేశవ్యాప్తంగా 5,50,000 మందికి పైగా నిరసనకారులు పాల్గొన్నారు. అసోసియేటెడ్ ప్రెస్ అందించిన రిపోర్టుల ప్రకారం దేశవ్యాప్తంగా అరెస్టుల సంఖ్య 1,800 నుంచి 2,400 వరకు ఉంది. ఈ ఘర్షణల్లో 500 మందికి పైగా పోలీసులు, అగ్నిమాపక సిబ్బంది గాయపడ్డారు. పారిస్‌కు వెలుపల ఉన్న లిమోజెస్ నగరంలో చరిత్రాత్మక సిటీ హాల్‌కు దుండగులు నిప్పు పెట్టడంతో అది పూర్తిగా దగ్ధమైంది.

ఈ నిరసనలు కేవలం ఒక్క డిమాండ్‌తో కూడినవి కావు. ప్రభుత్వ ప్రజా సంక్షేమ విధానాలు, జీవన వ్యయ నియంత్రణపై ప్రజల్లో పేరుకుపోయిన అసంతృప్తికి ఇవి అద్దం పడుతున్నాయి. విద్యార్థులు తమ చదువులు, పాఠశాలల మెరుగుదలపై దృష్టి పెట్టగా, కార్మికులు వేతనాలు, పింఛన్ల గురించి పోరాడుతున్నారు.

కొన్ని రాజకీయ గ్రూపులు కూడా ప్రభుత్వ ఆర్థిక విధానాలను వ్యతిరేకిస్తూ ఈ ఆందోళనల్లో చేరాయి. అయితే హింసకు పాల్పడిన వారిని, దోపిడీదారులను అధికార వర్గాలు తీవ్రంగా ఖండించాయి. శాంతియుతంగా నిరసన తెలిపే హక్కు అందరికీ ఉందని, కానీ హింసను సహించేది లేదని ప్రభుత్వం స్పష్టం చేసింది.

శాంతిభద్రతలను పునరుద్ధరించడం, ఆస్తి నష్టాన్ని అంచనా వేయడమే ప్రస్తుతం ప్రభుత్వ ప్రధాన ప్రాధాన్యంగా అధికార వర్గాలు పేర్కొంటున్నాయి. విద్యాసంస్థలు, జీవన వ్యయం, ప్రజా సేవల విషయమై నెలకొన్న వివాదాలు ఇంకా పూర్తిగా సమసిపోలేదు. కేవలం యువత అల్లర్లు సృష్టించాలనే ఉద్దేశంతో ఈ ఉద్యమం ప్రారంభం కాలేదు. ఆర్థిక అసమానతలు, విద్యారంగ సమస్యలే ఈ సంక్షోభానికి ప్రధాన కారణమని విశ్లేషకులు భావిస్తున్నారు.

Nepal Flash Floods: నేపాల్‌లో ఘోర ప్రళయం.. 903కు పెరిగిన మృతుల సంఖ్య, 4,200 మందికి పైగా గల్లంతు

Mahesh Rajamoni — Mon, 31 Aug 2026 15:08:07 +0530

Nepal Flash Floods: నేపాల్‌లో సంభవించిన ఘోర వరదల్లో మరణాల సంఖ్య 903కు చేరింది. 4,200 మందికి పైగా గల్లంతవ్వగా, సహాయక చర్యలు ముమ్మరంగా సాగుతున్నాయి. ఇంకా వరద హెచ్చరికలు కొనసాగుతున్నాయి.

నేపాల్-టిబెట్ సరిహద్దు వద్ద ఎత్తైన ప్రాంతంలో హిమపాతం, మంచు కొండచరియలు విరిగిపడటంతో భోటే కోశి నది ఉగ్రరూపం దాల్చింది. సరిహద్దు దాటి విరుచుకుపడిన ఈ మెరుపు వరదలు, బురద నేపాల్‌లోని పలు జిల్లాలను పూర్తిగా ముంచెత్తాయి. వరదల ధాటికి అనేక గ్రామాలు, రోడ్లు, బ్రిడ్జిలు కొట్టుకుపోయాయి. ఇప్పటివరకు అందిన అధికారిక లెక్కల ప్రకారం మరణించిన వారి సంఖ్య 903కి చేరినట్లు నేపాల్ విపత్తు నిర్వహణ సంస్థ (NDRRMA) ప్రకటించింది. దట్టమైన బురద, రాయి కలిసి ముంచెత్తడంతో సహాయక చర్యలు కష్టంగా మారాయి.

ఈ ప్రకృతి విపత్తులో ఇప్పటివరకు 4,247 మంది గల్లంతైనట్లు అధికారులు గుర్తించారు. అందులో 3,655 మంది నేపాల్ పౌరులు ఉండగా, 592 మంది విదేశీయులు ఉన్నారు. అలాగే 85 మందికి పైగా భద్రతా సిబ్బంది కూడా వరదల్లో గల్లంతయ్యారు.

వివిధ జిల్లాల్లో నమోదైన మరణాల వివరాలు:

• చిత్వాన్: 272

• నవల్ పరాసి (ఈస్ట్): 207

• నవల్ పరాసి (వెస్ట్): 151

• నువాకోట్: 95

• గోర్ఖా: 62

• ధాడింగ్: 55

• తనహున్: 37

• రసువా: 24

ఇప్పటివరకు దాదాపు 10,451 మందిని రెస్క్యూ టీమ్‌లు సురక్షిత ప్రాంతాలకు తరలించాయి.

ఈ ఘోర వరదల్లో పలువురు భారతీయ యాత్రికులు కూడా చిక్కుకున్నారు. అయితే, టిబెట్ నుంచి కాట్మండు చేరుకోవడానికి ప్రయత్నించిన 20 మంది తెలుగు యాత్రికులు సురక్షితంగా కాట్మండు చేరుకున్నారని అధికారులు స్పష్టం చేశారు. అలాగే, ఆంధ్రప్రదేశ్‌కు చెందిన మరో 14 మంది యాత్రికుల ఆచూకీ ఇంకా దొరకలేదని, వారి కోసం రెస్క్యూ టీమ్‌లు ముమ్మరంగా గాలిస్తున్నాయని ఏపీ ప్రభుత్వం తెలిపింది.

వరదల వల్ల సుమారు 933 మంది హైడ్రో పవర్ ప్రాజెక్ట్ కార్మికులు టన్నెళ్లలో చిక్కుకుపోయినట్లు అనుమానిస్తున్నారు. ముఖ్యంగా రసువా జిల్లాలోని త్రిశూలి-3A, చిలిమ్ హైడ్రో పవర్ ప్రాజెక్టుల టన్నెళ్లలో కార్మికులు చిక్కుకున్నారు. భారత స్పెషల్ టన్నెల్ రెస్క్యూ టీమ్‌లు, విదేశీ నిపుణులు, నేపాల్ సైన్యం వీరిని రక్షించడానికి తీవ్రంగా శ్రమిస్తున్నాయి. టన్నెల్‌లోకి ఎయిర్ పైపులు పంపి, డ్రిల్లింగ్ యంత్రాల సహాయంతో ప్రవేశ మార్గాలు ఏర్పాటు చేస్తున్నారు.

నేపాల్ విపత్తు తీవ్రత దృష్ట్యా దాదాపు 20,000 మంది భద్రతా సిబ్బంది, 14 మిలిటరీ హెలికాప్టర్లు రంగంలోకి దిగాయి. బాధితులకు తక్షణ వైద్యాన్ని అందించడానికి 6 స్పెషల్ సర్జికల్ టీమ్‌లు పనిచేస్తున్నాయి. వరదల వల్ల 40 కి పైగా సస్పెన్షన్ బ్రిడ్జిలు, 25 మైళ్ల రోడ్లు ధ్వంసమయ్యాయి. మరోవైపు, సోషల్ మీడియాలో ఏఐ క్రియేట్ చేసిన నకిలీ వీడియోలు, భయాందోళనలు రేకెత్తించే ప్రచారాలను అడ్డుకునేందుకు నేపాల్ ప్రెస్ కౌన్సిల్ కఠిన చర్యలు చేపట్టింది.

అవును.. భార‌తీయుల‌ను ఉద్దేశించి నేను మాట్లాడింది స‌రైంది కాదు: అమెరికా ఉపాధ్య‌క్షుడు

Narender Vaitla — Sun, 18 Oct 2026 14:39:37 +0530

JD Vance: అమెరికా ఉపాధ్యక్షుడు జేడీ వాన్స్ గతంలో భారత్‌, హెచ్‌-1బీ వీసాదారులపై చేసిన వ్యాఖ్యలపై తాజాగా స్పందించారు. భారతీయ నిపుణులను ఉద్దేశించి తాను ఉపయోగించిన పదజాలం సరికాదని, భారత్‌ విషయంలో మాట్లాడేటప్పుడు హద్దులు దాటాన‌ని అన్నారు.

కొన్ని రోజుల క్రితం భారతీయ నిపుణులు, హెచ్‌-1బీ వీసా విధానంపై జేడీ వాన్స్ చేసిన వ్యాఖ్యలు తీవ్ర చర్చకు దారితీశాయి. తాజాగా ఓ సమావేశంలో ఈ అంశంపై మాట్లాడిన ఆయన.. భారత్‌ విషయంలో తాను అతిగా మాట్లాడానని అంగీకరించారు. విదేశీ ఉద్యోగులను ఉద్దేశించి గతంలో ఉపయోగించిన ‘విదేశీ ఒప్పంద పనివాళ్లు’ అనే పదం సరైనది కాదని పేర్కొన్నారు. తన ప్రసంగంలో అభ్యంతరకరమైన అంశాలు ఉంటే వాటికి తానే బాధ్యత వహిస్తానని తెలిపారు. వీసా ద్వారా అమెరికాకు వచ్చే ఉద్యోగులను కించపరచడం లేదా వారిని ప్రత్యేకంగా లక్ష్యంగా చేసుకోవడం తన ఉద్దేశం కాదని వివరించారు.

అమెరికా కంపెనీలు విదేశీ ఉద్యోగులను నియమించుకునే విధానం, హెచ్‌-1బీ వీసా వ్యవస్థ గురించి చర్చించాలనే ఉద్దేశంతోనే తాను గతంలో వ్యాఖ్యలు చేసినట్లు వాన్స్ తెలిపారు. ఈ వీసాల ద్వారా విదేశీ నిపుణులను నియమించుకునే సంస్థలు.. సంబంధిత ఉద్యోగాలకు సరిపడే అమెరికా కార్మికులు అందుబాటులో లేరని పేర్కొంటాయని అన్నారు. ఇలాంటి నియామకాల వల్ల స్థానికులకు ఉద్యోగ అవకాశాలు తగ్గే పరిస్థితులు ఉన్నాయని ఆయన అభిప్రాయపడ్డారు. అమెరికాలో తరచూ ఈ సమస్య ఎదురవుతోందని, అందుకే ఈ అంశాన్ని ప్రస్తావించినట్లు చెప్పారు. అయితే, తన అభిప్రాయాన్ని వ్యక్తం చేసిన తీరు సరిగా లేదని తాజాగా అంగీకరించడం ప్రాధాన్యం సంతరించుకుంది.

గతంలో హెచ్‌-1బీ వీసాల ద్వారా అమెరికాలో పనిచేస్తున్న విదేశీ ఉద్యోగులను వాన్స్ ‘విదేశీ ఒప్పంద పనివాళ్లు’గా అభివర్ణించారు. ఈ వీసా విధానాన్ని ఉపయోగించుకునే కంపెనీలను ‘వీసా మిల్లులు’గా పేర్కొన్నారు. విదేశీ ఉద్యోగుల నియామకంపై ఆయన చేసిన ఈ వ్యాఖ్యలు ముఖ్యంగా భారతీయ ఐటీ నిపుణుల్లో చర్చకు కారణమయ్యాయి. అమెరికా సాంకేతిక రంగంలో భారతీయులు కీలక పాత్ర పోషిస్తున్న నేపథ్యంలో ఈ వ్యాఖ్యలపై అభ్యంతరాలు వ్యక్తమయ్యాయి. తాజాగా తన పదజాలం సరైనది కాదని వాన్స్ చెప్పడంతో ఈ వివాదం మరోసారి వార్తల్లోకి వచ్చింది.

జేడీ వాన్స్ వ్యాఖ్యలపై భారత కేంద్ర విదేశాంగ శాఖ గతంలో తీవ్ర అభ్యంతరం వ్యక్తం చేసింది. భారతీయ నిపుణులు అమెరికాకు వెళ్లడం వల్ల వారికి ఉపాధి అవకాశాలు లభించడమే కాకుండా, అక్కడి కంపెనీలకు కూడా ప్రయోజనం కలుగుతుందని స్పష్టం చేసింది. అత్యాధునిక నైపుణ్యాలు కలిగిన ఉద్యోగులు సంస్థల అభివృద్ధికి దోహదపడతారని పేర్కొంది. పరిశోధన, ఆవిష్కరణలు, ఉత్పాదకత పెంపు, అంతర్జాతీయ పోటీలో నిలదొక్కుకోవడం వంటి అంశాల్లో నిపుణుల సేవలు ఎంతో ఉపయోగకరం అని వివరించింది. నైపుణ్యం కలిగిన ఉద్యోగుల రాక అమెరికా కంపెనీల వృద్ధికి, ఉద్యోగాల సృష్టికి కూడా తోడ్పడుతుందని తెలిపింది. ఈ నేపథ్యంలో వాన్స్ చేసిన వ్యాఖ్యలు అనవసరం అని భారత ప్రభుత్వం అభిప్రాయపడింది.

కాగ్నిజెంట్‌, ఇన్ఫోసిస్‌, టాటా, విప్రో, హెచ్‌సీఎల్‌, క్యాప్‌జెమిని వంటి సంస్థల పేర్లు పర్మ్‌ (PERM – ప‌ర్మినెంట్ లేబ‌ర్ స‌ర్టిపికేష‌న్ ప్రోగ్రామ్‌)కు సంబంధించిన సస్పెన్షన్‌ వ్యవహారంలో ప్రస్తావనకు వచ్చాయి. అమెరికాలో విదేశీ ఉద్యోగులను శాశ్వతంగా నియమించుకునే ప్రక్రియలో ఈ కార్యక్రమం కీలకంగా ఉంటుంది. ఈ పరిణామాల నేపథ్యంలో విదేశీ నిపుణుల నియామకాలు, అమెరికన్లకు ఉద్యోగ అవకాశాలు అనే అంశాలపై చర్చ మరింత పెరిగింది. ఈ క్రమంలోనే గతంలో చేసిన వ్యాఖ్యలపై వాన్స్ తాజాగా పశ్చాత్తాపం వ్యక్తం చేశారు. హెచ్‌-1బీ వీసాదారులపై వ్యక్తిగతంగా వ్యతిరేకత లేదని, అమెరికా ఉద్యోగ మార్కెట్‌, నియామక విధానాలపై తన ఆందోళనను తెలియజేయడమే ఉద్దేశమని స్పష్టం చేశారు. ఆయన తాజా వివరణతో భారత్‌-అమెరికా మధ్య నైపుణ్య వలసలు, ఐటీ రంగంలో భారతీయుల పాత్రపై చర్చ మళ్లీ తెరపైకి వచ్చింది.

అమెరికాలో కొరియర్ బాయ్ నెలకు ఎంత సంపాదిస్తాడో తెలుసా.? మీ ఊహ‌కు కూడా అంద‌దు

Narender Vaitla — Thu, 08 Oct 2026 17:01:58 +0530

USA: అమెరికాలో మంచి ఆదాయం పొందాలంటే తప్పనిసరిగా సాఫ్ట్‌వేర్ ఉద్యోగమే చేయాల్సిన అవసరం లేదు. డెలివరీ, కొరియర్, డ్రైవింగ్ వంటి ఉద్యోగాలకు కూడా అక్కడ డిమాండ్ ఉంది. ప్యాకేజీల డెలివరీకి సంబంధించిన ఉద్యోగాల్లో మంచి వేతనం లభిస్తుంది.

అమెరికాలో కొరియర్ లేదా డెలివరీ డ్రైవర్‌గా పనిచేసేవారి ఆదాయం భారతదేశంతో పోలిస్తే ఎక్కువగా ఉంటుంది. అమెరికా బ్యూరో ఆఫ్ లేబర్ స్టాటిస్టిక్స్ (BLS) ప్రకారం 2025లో లైట్ ట్రక్ డ్రైవర్ల సగటు వార్షిక వేతనం $48,770గా ఉంది. కొరియర్స్ అండ్ మెసెంజర్స్ రంగంలో పనిచేసే లైట్ ట్రక్ డ్రైవర్లకు సగటు వార్షిక వేతనం $47,700గా నమోదైంది. అంటే నెలకు సుమారు $3,975 స్థూల ఆదాయం వస్తుంది. మ‌న క‌రెన్సీలో చెప్పాలంటే అక్టోబర్ 8, 2026న డాలర్ విలువ సుమారు రూ.97 వద్ద ఉంది. ఆ లెక్కన $3,975 అంటే భారత కరెన్సీలో దాదాపు రూ.3.85 లక్షలు నెలకు. అయితే ఇది పన్నులు, ఇతర తగ్గింపులకు ముందు ఉండే స్థూల ఆదాయం. చేతికి వచ్చే మొత్తం దీనికంటే తక్కువగా ఉంటుంది.

ప్ర‌ముఖ కొరియర్ సంస్థ ఫెడెక్స్ కొరియర్ ఉద్యోగులకు Indeedలో పేర్కొన్న స‌మాచారం ఆధారంగా.. సగటు వేతనం గంటకు సుమారు $24.53గా ఉంది. కొన్ని ఉద్యోగ పోస్టింగ్స్‌లో గంటకు $22 నుంచి $39 వరకు కూడా అందిస్తున్న‌ట్లు ఉంది. ప్రాంతం, ఉద్యోగ స్థాయి, అనుభవం, పని రకం ఆధారంగా ఈ మొత్తం మారుతుంది. ఉదాహరణకు గంటకు $24.53 చొప్పున వారానికి 40 గంటలు పనిచేస్తే వారానికి సుమారు $981 వస్తుంది. నెలకు సగటున 4.33 వారాలు తీసుకుంటే దాదాపు $4,240, అంటే ప్రస్తుత మారకపు విలువ ప్రకారం సుమారు రూ.4.1 లక్షల స్థూల ఆదాయం వస్తుంది. అయితే ప్రతి ఉద్యోగికి ఇదే మొత్తం వస్తుందని భావించకూడదు. పార్ట్‌టైమ్ ఉద్యోగాలు, అనుభవం, నగరం, సంస్థ, కాంట్రాక్టర్ ఆధారంగా వేతనం మారుతుంది.

ఉదాహ‌ర‌ణ‌కు ఒక వ్య‌క్తి 20 డాల‌ర్ల చొప్పున రోజుకు 10 డెలివరీలు చేస్తే రోజుకు $200, అంటే సుమారు రూ.19,400 అవుతుంది. $25 చొప్పున అయితే రోజుకు $250, అంటే దాదాపు రూ.24,250 అవుతుంది. అయితే దీనిని అమెరికాలోని ప్రతి కొరియర్ ఉద్యోగానికి వర్తించే జీతంగా చూడ‌కూడ‌దు. ఉద్యోగి స్థాయి కొరియర్ ఉద్యోగాల్లో సాధారణంగా గంటల ఆధారంగా వేతనం చెల్లించే విధానం ఉంది. మరోవైపు కొన్ని కాంట్రాక్టర్ ఆధారిత డెలివరీ పనుల్లో వేతన విధానం భిన్నంగా ఉండవచ్చు. అందువల్ల “ప్రతి ప్యాకేజీకి $20–$25” అని సాధారణంగా చెప్పలేం. BLS గణాంకాలు కూడా కొరియర్ రంగంలోని డ్రైవర్ల ఆదాయాన్ని వార్షిక వేతనాల రూపంలో చూపిస్తున్నాయి. ఇంకో ముఖ్యమైన విషయం.. అమెరికాలో జీవన వ్యయం కూడా ఎక్కువే. ఇల్లు అద్దె, హెల్త్ ఇన్సూరెన్స్, పన్నులు, వాహన ఖర్చులు, ఇంధనం వంటి ఖర్చులు ఆదాయంలో గణనీయంగా ఖ‌ర్చ‌వుతాయి. కాబట్టి భారత కరెన్సీలో రూ.4 లక్షలు కనిపిస్తున్నాయని మొత్తం డబ్బు పొదుపు చేసుకోవచ్చని అనుకోవడం సరికాదు.

అమెరికాలో కొరియర్ ఉద్యోగాల్లో మరో ఆకర్షణీయమైన అంశం ఓవర్‌టైమ్. అయితే “వారానికి 40 గంటలు మాత్రమే పని చేయాలి” అనేది నిబంధన కాదు. కవర్డ్, నాన్-ఎగ్జెంప్ట్ ఉద్యోగులకు ఫెడరల్ చట్టం ప్రకారం ఒక వర్క్‌వీక్‌లో 40 గంటలకు మించి పనిచేసినప్పుడు సాధారణ వేతనానికి కనీసం 1.5 రెట్లు ఓవర్‌టైమ్ చెల్లించాలి. కొన్ని రాష్ట్రాల్లో దీనికంటే మెరుగైన రాష్ట్ర నిబంధనలు ఉండొచ్చు.

ఉదాహరణకు గంటకు $24.53 వేతనం ఉన్న ఉద్యోగికి ఓవర్‌టైమ్ రేటు సుమారు $36.80 అవుతుంది. వారానికి అదనంగా 5 గంటలు ఓవర్‌టైమ్ చేస్తే ఆ 5 గంటలకే సుమారు $184 అదనంగా రావచ్చు. అయితే ఓవర్‌టైమ్ అర్హత ఉద్యోగి వర్గీకరణ, రాష్ట్ర చట్టాలు, ఉద్యోగ ఒప్పందం వంటి అంశాలపై ఆధారపడి ఉంటుంది. వారాంతాల్లో పని చేసినంత మాత్రాన ఫెడరల్ చట్టం ప్రకారం తప్పనిసరిగా అదనపు వేతనం రావాల్సిన అవసరం లేదు; 40 గంటలు దాటినప్పుడు ఓవర్‌టైమ్ నిబంధన వర్తిస్తుంది.

కొరియర్ ఉద్యోగానికి సాధారణంగా డ్రైవింగ్‌కు సంబంధించిన అర్హతలు చాలా ముఖ్యం. FedEx అధికారిక కెరీర్ సమాచారం ప్రకారం డెలివరీ డ్రైవర్లకు చెల్లుబాటు అయ్యే డ్రైవింగ్ లైసెన్స్, మంచి డ్రైవింగ్ రికార్డు అవసరం. కొన్ని డ్రైవింగ్ పోస్టులకు వాహనం, వయసు, వైద్య పరీక్షలు, ఫెడరల్ మోటార్ క్యారియర్ సేఫ్టీ నిబంధనలకు సంబంధించిన అదనపు అర్హతలు కూడా ఉంటాయి.

అయితే విదేశీయుల విషయంలో మరో ముఖ్యమైన విషయం ఉంది. సరైన వీసా ఉన్నంత మాత్రాన అమెరికాలో ఏ ఉద్యోగమైనా చేయడానికి అనుమతి ఉంటుందని కాదు. సంబంధిత వీసా లేదా ఇమ్మిగ్రేషన్ స్టేటస్ ఆ ఉద్యోగానికి చట్టబద్ధమైన పని అనుమతి ఇస్తుందా అనేది ముందుగా చూడాలి. కాబట్టి భారతీయులు కొరియర్ ఉద్యోగం చేయాలనుకుంటే డ్రైవింగ్ లైసెన్స్‌తో పాటు అమెరికాలో చట్టబద్ధంగా పని చేసే అర్హత కూడా తప్పనిసరిగా ఉండాలి.

అమెరికాను వ‌ణించిన 9/11 అటాక్‌.. అస‌లా రోజు ఏం జ‌రిగింది? టైమ్ టూ టైమ్ పూర్తి వివ‌రాలు

Narender Vaitla — Fri, 11 Sep 2026 17:12:36 +0530

9/11 Attacks: సెప్టెంబర్ 11, 2001.. అమెరికా చరిత్రలో ఎప్పటికీ మర్చిపోలేని రోజు. న్యూయార్క్‌లోని వరల్డ్ ట్రేడ్ సెంటర్‌ జంట టవర్లు, వాషింగ్టన్‌లోని పెంటగాన్ లక్ష్యాలుగా మారాయి. అసలా ఆ రోజు ఉదయం ఏం జరిగింది.? పూర్తి వివరాలు ఇప్పుడు తెలుసుకుందాం.

సెప్టెంబర్ 11 ఉదయం దాడులకు సంబంధించిన కీలక వ్యక్తులు విమానాశ్రయాలకు చేరుకున్నారు. ఉదయం 5:45 గంటలకు మొహమ్మద్ అట్టా, అబ్దుల్ అజీజ్ అల్-ఒమారీ అనే ఇద్దరు వ్యక్తులు మైనేలోని పోర్ట్‌లాండ్ ఇంటర్నేషనల్ జెట్‌పోర్ట్‌లో భద్రతా తనిఖీలు పూర్తి చేసుకున్నారు. అక్కడి నుంచి వారు బోస్టన్‌లోని లోగన్ ఇంటర్నేషనల్ ఎయిర్‌పోర్ట్‌కు వెళ్లి అమెరికన్ ఎయిర్‌లైన్స్ ఫ్లైట్ 11లో ఎక్కారు.

ఉదయం 7:59 గంటలకు ఫ్లైట్ 11 బోస్టన్ నుంచి లాస్ ఏంజెల్స్‌కు బయలుదేరింది. అందులో 76 మంది ప్రయాణికులు, 11 మంది సిబ్బంది, ఐదుగురు హైజాకర్లు ఉన్నారు. ఉదయం 8:15 గంటలకు యునైటెడ్ ఎయిర్‌లైన్స్ ఫ్లైట్ 175 కూడా బోస్టన్ నుంచి లాస్ ఏంజెల్స్‌కు బయలుదేరింది. ఇందులో 51 మంది ప్రయాణికులు, తొమ్మిది మంది సిబ్బంది, ఐదుగురు హైజాకర్లు ఉన్నారు. మరోవైపు ఉదయం 8:20 గంటలకు ఫ్లైట్ 77 వాషింగ్టన్ సమీపంలోని డల్లాస్ నుంచి లాస్ ఏంజెల్స్‌కు బయలుదేరింది. ఇందులో 53 మంది ప్రయాణికులు, ఆరుగురు సిబ్బంది, ఐదుగురు హైజాకర్లు ఉన్నారు. ఉదయం 8:42 గంటలకు న్యూజెర్సీలోని నెవార్క్ నుంచి యునైటెడ్ ఫ్లైట్ 93 శాన్‌ఫ్రాన్సిస్కోకు బయలుదేరింది. ఇందులో 33 మంది ప్రయాణికులు, ఏడుగురు సిబ్బంది, నలుగురు హైజాకర్లు ఉన్నారు.

ఉదయం 8:19 గంటలకు ఫ్లైట్ 11లోని ఫ్లైట్ అటెండెంట్ బెట్టీ ఆన్ ఓంగ్ భూమిపై ఉన్న సిబ్బందిని సంప్రదించి విమానం హైజాక్ అయిందని సమాచారం ఇచ్చారు. కాక్‌పిట్‌ను సంప్రదించలేకపోతున్నట్లు చెప్పారు. 8:24 గంటలకు మొహమ్మద్ అట్టా చేసిన ఒక కమ్యూనికేషన్ పొరపాటుతో విమాన నియంత్రణ కేంద్రానికి హైజాకింగ్ గురించి సంకేతం అందింది.

8:37 గంటలకు బోస్టన్ ఎయిర్ ట్రాఫిక్ కంట్రోల్ అమెరికా వైమానిక దళానికి సమాచారం అందించింది. అయితే అప్పటికే పరిస్థితి చాలా వేగంగా మారిపోయింది. ఉదయం 8:46 గంటలకు అమెరికన్ ఎయిర్‌లైన్స్ ఫ్లైట్ 11 న్యూయార్క్‌లోని వరల్డ్ ట్రేడ్ సెంటర్‌ ఉత్తర టవర్‌ను ఢీకొట్టింది. విమానంలోని వారంతా ప్రాణాలు కోల్పోయారు. టవర్‌లోని పై అంతస్తుల్లో ఉన్న ఉద్యోగులు చిక్కుకుపోయారు. మొదట ఇది ఒక విమాన ప్రమాదమని చాలామంది భావించారు. కానీ 9:03 గంటలకు యునైటెడ్ ఫ్లైట్ 175 దక్షిణ టవర్‌ను ఢీకొట్టడంతో అసలు విషయం ప్రపంచానికి అర్థమైంది. ఇది ప్రమాదం కాదు.. పక్కా ప్లానింగ్‌తో జరిగిన ఉగ్రదాడి అని స్పష్టమైంది. ఈ ఘటనను ప్రపంచవ్యాప్తంగా కోట్లాది మంది ప్రత్యక్ష ప్రసారాల్లో చూశారు.

దాడులు న్యూయార్క్‌కే పరిమితం కాలేదు. ఉదయం 9:37 గంటలకు ఫ్లైట్ 77 వాషింగ్టన్‌లోని పెంటగాన్‌ను ఢీకొట్టింది. విమానంలోని వారంతా ప్రాణాలు కోల్పోగా, భవనంలో ఉన్న 125 మంది పౌరులు, సైనిక సిబ్బంది కూడా మరణించారు. ఇదే సమయంలో ఫ్లైట్ 93లో ఉన్న ప్రయాణికులకు తమ విమానం కూడా హైజాక్ అయిందని తెలిసింది.

ఉదయం 9:28 గంటలకు హైజాకర్లు విమానంపై నియంత్రణ తీసుకున్నారు. ఆ తర్వాత ప్రయాణికులు కాక్‌పిట్ వైపు వెళ్లి విమానాన్ని తిరిగి తమ ఆధీనంలోకి తీసుకునేందుకు ప్రయత్నించారు. ఉదయం 9:57 గంటలకు వారు కాక్‌పిట్‌పైకి దూసుకెళ్లడం ప్రారంభించారు. హైజాకర్ పైలట్ విమానాన్ని అటూ ఇటూ తిప్పుతూ ప్రయాణికుల ప్రయత్నాలను అడ్డుకునేందుకు ప్రయత్నించాడు.

చివరకు ఉదయం 10:02 గంటలకు ఫ్లైట్ 93 పెన్సిల్వేనియాలోని షాంక్స్‌విల్లే సమీపంలోని ఖాళీ ప్రాంతంలో కూలిపోయింది. ఆ విమానం లక్ష్యం ఏదనేది పూర్తిగా నిర్ధార‌ణ కాలేదు. అయితే వైట్‌హౌస్ లేదా అమెరికా క్యాపిటల్‌ వైపు వెళ్తుండవచ్చని భావించారు. ప్రయాణికుల తిరుగుబాటు కారణంగానే ఆ విమానం లక్ష్యాన్ని చేరుకోలేకపోయిందని భావిస్తారు.

ఉదయం 9:59 గంటలకు వరల్డ్ ట్రేడ్ సెంటర్‌ దక్షిణ టవర్ కూలిపోయింది. కాసేపటికే ఉదయం 10:28 గంటలకు ఉత్తర టవర్ కూడా కూలిపోయింది. అప్పటికే న్యూయార్క్ నగరం భారీ దుమ్ము, పొగతో నిండిపోయింది. ప్రజలు ప్రాణాలు కాపాడుకునేందుకు పరుగులు తీశారు. ఈ దాడుల నేపథ్యంలో ఉదయం 9:45 గంటలకు అమెరికా గగనతలాన్ని మూసివేశారు. దేశంలోని అన్ని పౌర విమానాలను సమీప విమానాశ్రయాల్లో ల్యాండ్ చేయాలని ఆదేశించారు. అప్ప‌టి అమెరికా అధ్యక్షుడు జార్జ్ డబ్ల్యూ. బుష్ ఆ సమయంలో ఫ్లోరిడాలోని ఓ పాఠశాలలో ఉన్నారు.

రెండో టవర్‌ను విమానం ఢీకొట్టిన విషయం ఆయనకు 9:05 గంటలకు తెలియజేశారు. అనంతరం ఎయిర్‌ఫోర్స్ వన్ ద్వారా ఆయనను సురక్షిత ప్రాంతానికి తరలించారు. మధ్యాహ్నం 3 గంటలకు నెబ్రాస్కాలోని ఆఫట్ ఎయిర్‌ఫోర్స్ బేస్‌కు చేరుకున్న ఆయనను అణు దాడిని కూడా తట్టుకునే సామర్థ్యం ఉన్న సురక్షిత బంకర్‌కు తీసుకెళ్లారు. సాయంత్రం 5:30 గంటలకు వరల్డ్ ట్రేడ్ సెంటర్‌కు చెందిన బిల్డింగ్ 7 కూడా కూలిపోయింది. రాత్రి 8:30 గంటలకు బుష్ అమెరికా ప్రజలను ఉద్దేశించి ప్రసంగించారు.

9/11 దాడులు ఒక్కరోజు జరిగిన విషాదంతో ముగియలేదు. దాని ప్రభావం అమెరికా విధానాలపై, ప్రపంచ రాజకీయాలపై చాలా కాలం కొనసాగింది. ఈ దాడులకు అల్‌ఖైదా, ఒసామా బిన్ లాడెన్ నాయకత్వం కారణమని అమెరికా గుర్తించింది. 1988లో అల్‌ఖైదా ఏర్పాటులో బిన్ లాడెన్ కీలక పాత్ర పోషించాడు. 1990లలో అమెరికాపై దాడులకు తన అనుచరులను సిద్ధం చేశాడు.

అమెరికా ఇంటెలిజెన్స్ వ్యవస్థ కూడా ఈ విమాన హైజాకింగ్ దాడిని ముందుగా గుర్తించలేకపోయింది. దాడుల తర్వాత అధ్యక్షుడు బుష్ ప్రభుత్వం ‘వార్ ఆన్ టెర్రర్’ను ప్రారంభించింది. మొదట అఫ్గానిస్థాన్‌లో అల్‌ఖైదాపై చర్యలు చేపట్టగా, తర్వాత ఇరాక్‌లోనూ యుద్ధం ప్రారంభమైంది. అమెరికాలో విమానాశ్రయ భద్రతా నిబంధనలు మరింత కఠినమయ్యాయి. దేశ భద్రత కోసం కొత్తగా డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ ఏర్పడింది. ఇంటెలిజెన్స్ సంస్థల మధ్య సమన్వయం పెంచేందుకు డైరెక్టర్ ఆఫ్ నేషనల్ ఇంటెలిజెన్స్ వ్యవస్థను తీసుకొచ్చారు. 9/11 దాడుల‌ తర్వాత గ్రౌండ్ జీరోలో విషపూరిత పదార్థాల ప్రభావంతో అనేక మంది దీర్ఘకాలిక ఆరోగ్య సమస్యలను ఎదుర్కొన్నారు. 2011 సెప్టెంబర్ 11న వరల్డ్ ట్రేడ్ సెంటర్‌ ప్రాంతంలో 9/11 మెమోరియల్ అండ్ మ్యూజియంను ప్రారంభించారు. ట్విన్ ట‌వ‌ర్లు నిలిచిన ప్రదేశాల్లో నిర్మించిన రెండు ప్రతిబింబించే నీటి కొలనులు ఆ విషాదాన్ని గుర్తు చేస్తూనే ఉన్నాయి.