Asianet News Telugu

Mutton Health Risks: మీరు తినే మటన్‌లో ఈ పార్ట్స్ ఉన్నాయా? అయితే మీ హెల్త్ రిస్క్‌లో పడినట్లే

Mahesh Rajamoni — Sun, 12 Jul 2026 09:07:43 +0530

Mutton Health Risks: మటన్ ఆరోగ్యానికి మంచిది. మటన్ తినడం వల్ల శరీరానికి కావాల్సిన అనేక రకాలు పోషకాలు అందుతాయి. అయితే, మటన్ లోని కొన్ని భాగాలు తింటే మాత్రం తీవ్ర అనారోగ్యం తప్పదు. అసలు మటన్ లోని ఏ భాగాలను తినకుండా దూరంగా ఉండాలో ఇప్పుడు తెలుసుకుందాం.

నాన్‌వెజ్ ప్రియులకు వీకెండ్ వస్తే చాలు.. ప్లేట్‌లో మటన్ ముక్క పడాల్సిందే. గొర్రె లేదా మేక మాంసం మన శరీరానికి కావాల్సిన ప్రోటీన్లు, ఐరన్‌ను పుష్కలంగా అందిస్తుంది. ఇది హెల్త్‌కు చాలా మంచిదే అయినప్పటికీ, మేక శరీరంలోని కొన్ని నిర్దిష్ట భాగాలను తినడం వల్ల తీవ్రమైన ఆరోగ్య సమస్యలు వస్తాయని నిపుణులు హెచ్చరిస్తున్నారు.

వీటిలో బ్యాక్టీరియా, టాక్సిన్స్ ఎక్కువగా ఉండటంతో పాటు, బ్యాడ్ కొలెస్ట్రాల్ లెవెల్స్ చాలా ఎక్కువగా ఉంటాయి. అందుకే మటన్ తినేటప్పుడు ఏ భాగాలు తినకూడదో కచ్చితంగా తెలుసుకోవాలి. మేక శరీరంలో మనం అస్సలు ముట్టుకోకూడదని 7 ముఖ్యమైన భాగాల గురించి ఇప్పుడు క్లియర్ గా తెలుసుకుందాం.

మేక మెడ లేదా గొంతు భాగంలో ఉండే లింఫ్ గ్రంథులు శరీరంలోకి వచ్చే క్రిములను, బ్యాక్టీరియాను ఫిల్టర్ చేస్తుంటాయి. అంటే ఇవి ఒక రకంగా మేక శరీరంలోని వ్యర్థాలను ఆపే రక్షణ కవచాలు అన్నమాట. వీటిని మనం ఆహారంగా తీసుకున్నప్పుడు, ఆ గ్రంథుల్లో పేరుకుపోయిన బ్యాక్టీరియా లేదా వైరల్ ఇన్‌ఫెక్షన్లు నేరుగా మన శరీరంలోకి ప్రవేశిస్తాయి. దీనివల్ల మనకు తీవ్రమైన అనారోగ్య సమస్యలు వచ్చే ఛాన్స్ ఉంది.

చాలామంది మటన్ వండేటప్పుడు టేస్ట్ కోసం మేక పేగులు, పొట్ట భాగాల చుట్టూ ఉండే కొవ్వును కూడా కలిపి వండుతుంటారు. కానీ, ఈ భాగంలో శాచురేటెడ్ ఫ్యాట్ అంటే శరీరానికి హాని చేసే కొవ్వు ఎక్కువగా ఉంటుంది. ఈ రకమైన బ్యాడ్ ఫ్యాట్ మన శరీరంలో కొలెస్ట్రాల్‌ను విపరీతంగా పెంచేస్తుంది. అంతేకాదు, ఇది రక్తనాళాల్లో పేరుకుపోయి, రక్తం సరఫరాకు అడ్డంకులు సృష్టిస్తుంది. ఇది గుండె ఆరోగ్యానికి అస్సలు మంచిది కాదు.

మనుషుల లాగే మేకలు కూడా శ్వాస తీసుకునేటప్పుడు గాలిలోని ధూళి, కాలుష్య కారకాలను లోపలికి పీల్చుకుంటాయి. మేక ఊపిరితిత్తులు ఈ కాలుష్య కణాలను, మైక్రోబ్స్‌ను ఫిల్టర్ చేసి లోపలే ట్రాప్ చేస్తాయి. అందువల్ల ఊపిరితిత్తుల భాగంలో ఇన్ఫెక్షన్లు ఎక్కువగా ఉండే అవకాశం ఉంది. ఈ భాగాలను మనం తింటే, ఆ కాలుష్య కారకాలు మన శరీరంలోకి చేరి శ్వాసకోస సంబంధిత ఇన్ఫెక్షన్లకు దారితీస్తాయి.

మేక చిన్న పేగులు, పెద్ద పేగులు అనేవి జీర్ణవ్యవస్థలో భాగం. సహజంగానే వీటిలో జంతువుల మలమూత్ర వ్యర్థాలు, సగం అరిగిన ఆహార పదార్థాలు ఉంటాయి. ఒకవేళ వీటిని తినాలనుకుంటే చాలా జాగ్రత్తగా ఉండాలి. వేడి నీళ్లు, పసుపు వేసి చాలా పర్‌ఫెక్ట్‌గా క్లీన్ చేయకపోతే, వాటిలో ఉండే ప్రమాదకర క్రిములు మన పొట్టలోకి చేరతాయి. దీనివల్ల తీవ్రమైన ఫుడ్ పాయిజనింగ్ అవ్వడమే కాకుండా, విరేచనాలు వంటి సమస్యలు వస్తాయి.

మేక మెదడు: మేక మెదడులో కొలెస్ట్రాల్ లెవెల్స్ చాలా ఎక్కువగా ఉంటాయి. అంతేకాకుండా, నెమరువేసే జంతువులలో వచ్చే కొన్ని రకాల ప్రమాదకరమైన మెదడు వ్యాధులు ఈ కణజాలం ద్వారా మనుషులకు సోకే ప్రమాదం ఉంది.
వెన్నెముక: మెదడు లాగే వెన్నెముక కూడా నరాల కణజాలంతో కూడుకున్నది. జంతువులకు ఉండే కొన్ని రకాల వ్యాధులు ఈ వెన్నెముక భాగంలో ఎక్కువగా ఉంటాయి. అందుకే దీన్ని కూడా తినకుండా దూరంగా ఉంచడమే సేఫ్.
పచ్చి రక్తం: సరిగ్గా ఉడకని రక్తం లేదా గడ్డకట్టిన పచ్చి రక్తంలో అత్యంత ప్రమాదకరమైన బ్యాక్టీరియా ఉంటుంది. దీన్ని తీసుకోవడం వల్ల ఫుడ్ సేఫ్టీ పరంగా మేజర్ హెల్త్ రిస్క్‌లు ఎదుర్కోవాల్సి వస్తుంది.

మటన్ కొనేటప్పుడు ఎప్పుడైనా సరే నమ్మకమైన దుకాణం నుంచి మాత్రమే ఫ్రెష్‌గా ఉండే షోల్డర్, వెనుక కాలు లేదా రిబ్స్ వంటి సురక్షితమైన భాగాలను మాత్రమే ఎంచుకోవాలని నిపుణులు చెబుతున్నారు.

Cancer Risk Habits: మీరు రోజు చేసే ఈ 5 తప్పులే క్యాన్సర్‌కు కారణం.. వెంటనే మారకపోతే డేంజరే !

Mahesh Rajamoni — Mon, 13 Jul 2026 10:36:47 +0530

Cancer Risk Habits: భారతీయుల్లో క్యాన్సర్ ముప్పు పెరుగుతోంది. దీనికి కొన్ని రోజువారీ అలవాట్లు కారణం అవుతున్నాయని రిపోర్టులు పేర్కొంటున్నాయి. క్యాన్సర్ రిస్క్ పెంచుతున్న 5 రోజువారీ అలవాట్లు, నివారణల గురించి డబ్ల్యూహెచ్‌ఓ చెప్పిన పూర్తి వివరాలు మీకోసం.

ప్రస్తుతం క్యాన్సర్ మహమ్మారి చాలా వేగంగా విస్తరిస్తోంది. మన జీవనశైలిలో జరుగుతున్న మార్పులు, కొన్ని చెడు అలవాట్లు ఈ ప్రమాదాన్ని మరింత పెంచుతున్నాయి. దీనిపై ప్రపంచ ఆరోగ్య సంస్థ (WHO) ఒక షాకింగ్ రిపోర్టును విడుదల చేసింది. ఆ వివరాలు ఏంటి? మనం మార్చుకోవాల్సిన ఐదు రోజువారీ అలవాట్ల గురించిన వివరాలు గమనిస్తే..

ప్రపంచ ఆరోగ్య సంస్థ రిపోర్టు ప్రకారం.. 75 సంవత్సరాల వయస్సు కంటే ముందే ప్రతి 10 మందిలో ఒకరికి క్యాన్సర్ వచ్చే అవకాశం ఉంది. భారతీయుల విషయానికి వస్తే, 10 మంది భారతీయ పౌరులలో ఒకరు 75 ఏళ్ల లోపే ఈ మహమ్మారి బారిన పడే ప్రమాదాన్ని ఎదుర్కొంటున్నారు. మారుతున్న జీవనశైలి, పర్యావరణ కారకాలు, సకాలంలో వ్యాధి నిర్ధారణ కాకపోవడం వల్ల ఈ ముప్పు పెరుగుతోంది.

ఇదే పరిస్థితి కొనసాగితే, 2050 నాటికి ప్రతి సంవత్సరం కొత్తగా 2.8 మిలియన్ల క్యాన్సర్ కేసులు నమోదయ్యే అవకాశం ఉందని రిపోర్టు హెచ్చరిస్తోంది. భారత్‌లో 2022 లోనే దాదాపు 1.41 మిలియన్ల కొత్త కేసులు నమోదు కాగా, 9,16,000 కంటే ఎక్కువ మంది మరణించారు. మహిళల్లో బ్రెస్ట్ క్యాన్సర్ మొదటి స్థానంలో ఉండగా, గర్భాశయ ముఖద్వార క్యాన్సర్ రెండో స్థానంలో ఉంది. పురుషులలో నోటి క్యాన్సర్ కేసులు విపరీతంగా పెరుగుతున్నాయి.

మనం రోజూ చూసే చెడు అలవాట్లలో పొగాకు వాడకం అత్యంత ప్రమాదకరం. సిగరెట్, బీడీలు తాగడం వల్ల ఊపిరితిత్తుల క్యాన్సర్ వస్తుంది. లంగ్ క్యాన్సర్ కేసుల్లో దాదాపు 85% కేవలం ధూమపానం వల్లే వస్తున్నాయని అంచనా. అంతేకాదు, పొగాకు నమలడం, గుట్కా తినడం, తమలపాకులతో పాటు పొగాకు కలిపి చుట్టడం వంటి అలవాట్ల వల్ల నోటి క్యాన్సర్ వచ్చే రిస్క్ చాలా ఎక్కువ.

పొగాకు వాడకం వల్ల కేవలం ఊపిరితిత్తులు, నోరే కాకుండా గొంతు, అన్నవాహిక, మూత్రాశయం, కాలేయం సహా కనీసం 15 రకాల క్యాన్సర్లు వచ్చే ఛాన్స్ ఉంది. ఈ ముప్పును తగ్గించుకోవడానికి పొగాకు అలవాట్లను పూర్తిగా మానేయడమే ఏకైక మార్గం.

కంప్యూటర్ల ముందు గంటల తరబడి కూర్చోవడం, అస్సలు శారీరక శ్రమ లేకపోవడం క్యాన్సర్‌కు మరో ముఖ్య కారణం. రోజంతా ఒకే చోట కూర్చోవడం, వ్యాయామం చేయకపోవడం వల్ల శరీరంలో కొవ్వు పెరిగి ఊబకాయం వస్తుంది. ఈ ఊబకాయం అనేది బ్రెస్ట్ క్యాన్సర్, కోలన్ క్యాన్సర్, ఎండోమెట్రియల్ క్యాన్సర్‌లకు దారితీస్తుంది. బరువును అదుపులో ఉంచుకోవడానికి, శరీరంలో వాపులను తగ్గించుకోవడానికి వారానికి కనీసం 150 నిమిషాల పాటు వ్యాయామం చేయడం అలవాటు చేసుకోవాలి.

మనం తినే ఆహారం కూడా మన ఆరోగ్యం తీవ్ర ప్రభావం చూపుతుంది. ప్రస్తుతం చాలా మంది పండ్లు, కూరగాయలు, ఫైబర్ ఉన్న ఆహారాన్ని పక్కన పెట్టేస్తున్నారు. వీటికి బదులుగా ప్రాసెస్డ్ ఫుడ్స్, ప్యాక్ చేసిన ఆహారాలు, రిఫైన్డ్ షుగర్, రెడ్ మీట్ ఎక్కువగా తింటున్నారు. ఈ విధమైన అనారోగ్యకరమైన డైట్ వల్ల పెద్దపేగు క్యాన్సర్, ఇతర రకాల క్యాన్సర్లు వచ్చే ప్రమాదం చాలా ఎక్కువగా ఉంటుంది.

రెగ్యులర్‌గా, ఎక్కువగా ఆల్కహాల్ సేవించడం క్యాన్సర్ రిస్క్‌ను విపరీతంగా పెంచుతుంది. తాగుడు అలవాటు వల్ల ముఖ్యంగా లివర్, నోరు, అన్నవాహిక క్యాన్సర్లు వచ్చే అవకాశం ఉంది. ఆల్కహాల్ తీసుకోవడం పూర్తిగా ఆపేయడం లేదా బాగా తగ్గించడం ద్వారా క్యాన్సర్‌తో పాటు ఇతర ప్రాణాంతక వ్యాధుల నుండి మనల్ని మనం కాపాడుకోవచ్చు.

అన్ని రకాల క్యాన్సర్లను పూర్తిగా అడ్డుకోలేకపోయినా, కొన్ని లైఫ్‌స్టైల్ మార్పుల ద్వారా ప్రమాదాన్ని చాలా వరకు తగ్గించుకోవచ్చు.

• మీ రోజువారీ ఆహారంలో పండ్లు, ఆకుకూరలు, కూరగాయలు, తృణధాన్యాలు ఉండేలా చూసుకోండి.

• ఎల్లప్పుడూ యాక్టివ్‌గా ఉంటూ, బరువు పెరగకుండా కంట్రోల్ చేసుకోండి.

• క్యాన్సర్ నివారణకు సహాయపడే హెచ్‌పీవీ, హెపటైటిస్ బి వ్యాక్సిన్‌లను తీసుకోండి.

• వయస్సును బట్టి రెగ్యులర్ హెల్త్ చెకప్స్, క్యాన్సర్ స్క్రీనింగ్ టెస్టులు చేయించుకోవడం చాలా అవసరం.

Heartburn: ఇదొక్కటి తినడం తగ్గిస్తే చాలు..ఛాతీలో మంట కంట్రోల్ అవుతుంది

Nandini Arava — Sat, 13 Jun 2026 19:23:07 +0530

Heartburn: తిన్నాక చాలా మందికి గుండెలో మంటగా అనిపిస్తుంది. సరిగ్గా జీర్ణం కాక ఇబ్బంది పడుతూ ఉంటారు. వెంటనే గ్యాస్ ట్యాబ్లెట్స్, ఉప్పు నీళ్లు తాగేస్తారు. అంతకన్నా ముందు ఈ ఆహారాలు అస్సలు తినకండి.

ఆపరేషన్ అయిన వారికి, జ్వరం వచ్చిన వారికి బ్రెడ్ ప్యాకెట్లే ఎందుకు తీసుకెళ్తారో తెలుసా.?

Narender Vaitla — Wed, 05 Aug 2026 14:48:01 +0530

Bread packet: ఎవరైనా అనారోగ్యంతో ఆస్పత్రిలో చేరినా, ఆపరేషన్ చేయించుకున్నా.. వారిని పరామర్శించడానికి వెళ్లేటప్పుడు ఎక్కువ మంది బ్రెడ్ ప్యాకెట్ల‌ను తీసుకెళ్ల‌డం చూసేం ఉంటాం. అయితే బ్రెడ్ ప్యాకెట్ల‌నే తీసుకెళ్ల‌డం వెన‌కాల ఉన్న లాజిక్ ఏంటో తెలుసా.?

జ్వరం వచ్చినప్పుడు లేదా శస్త్రచికిత్స తర్వాత శరీరంలో ఆకలి తగ్గడం సాధారణమే. అలాంటి సమయంలో ఎక్కువ మసాలాలు, నూనెతో కూడిన ఆహారం తినడం కొందరికి ఇబ్బందిగా అనిపించవచ్చు. సాధారణంగా టోస్ట్ చేసిన తెల్ల బ్రెడ్ వంటి తేలికపాటి ఆహారాన్ని కొద్దిమొత్తంలో తీసుకోవడం సులభంగా ఉంటుంది. మెత్తగా ఉండటం, నమలడానికి పెద్దగా శ్రమ అవసరం లేకపోవడం వల్ల కూడా చాలామంది దీనిని ఎంచుకుంటారు. అయితే ఇక్కడ ఒక విషయం గుర్తుంచుకోవాలి. ప్రతి ఆపరేషన్ తర్వాత బ్రెడ్ తినడం అందరికీ సరిపోతుందని చెప్పలేం. ఆపరేషన్ రకం, రోగి ఆరోగ్య పరిస్థితి, వైద్యుల సూచనలను బట్టి ఆహారం మారుతుంది.

జ్వరం వచ్చినప్పుడు శరీరానికి విశ్రాంతితో పాటు తగినంత డ్రింక్స్‌, శక్తి అవసరం. కానీ జ్వరం కారణంగా ఆకలి తగ్గిపోవడం, నోటికి రుచి త‌గ్గుతుంది. ఇలాంటి సమయంలో హెవీ మీల్స్ కంటే కొద్దికొద్దిగా తినడం కొంత సులభంగా ఉంటుంది. బ్రెడ్‌లో ప్రధానంగా కార్బోహైడ్రేట్లు ఉండటంతో కొంత శక్తిని అందిస్తుంది. అందుకే టీ, పాలు లేదా ఇతర తేలికపాటి పదార్థాలతో బ్రెడ్ తినడం చాలామందికి సులభంగా అనిపిస్తుంది. అయితే జ్వరం ఉన్న వ్యక్తికి బ్రెడ్ ఒక్కటే సరిపోదు. శరీరానికి అవసరమైన ప్రోటీన్, విటమిన్లు, ఖనిజాలు, ద్రవాలు కూడా అవసరమే.

శస్త్రచికిత్స తర్వాత రోగికి ఆహారం విషయంలో ప్రత్యేక జాగ్రత్తలు అవసరం. ముఖ్యంగా కొన్ని ఆపరేషన్ల తర్వాత జీర్ణవ్యవస్థ సాధారణ స్థితికి రావడానికి కొంత సమయం పడుతుంది. అందుకే వైద్యులు రోగి పరిస్థితిని బట్టి మొదట డ్రింక్స్‌, ఆ తర్వాత తేలికపాటి ఆహారం, అనంతరం సాధారణ ఆహారం వైపు తీసుకెళ్లవచ్చు. ఈ నేపథ్యంలో బ్రెడ్ వంటి సులభమైన ఆహార పదార్థాలు కొందరికి ఉపయోగపడవచ్చు. అయితే ఆపరేషన్ అయిన వెంటనే మన ఇష్టానుసారం బ్రెడ్, బిస్కెట్లు లేదా ఇతర ఆహార పదార్థాలు ఇవ్వడం సరికాదు. డాక్టర్ లేదా డైటీషియన్ సూచించిన ఆహారాన్నే ఇవ్వాలి. ముఖ్యంగా పేగులు, కడుపు, నోరు, గొంతుకు సంబంధించిన శస్త్రచికిత్సల తర్వాత ఆహార నియమాలు వేర్వేరుగా ఉండవచ్చు.

బ్రెడ్‌ను రోగిని పరామర్శించడానికి తీసుకెళ్లడం వెనుక కేవలం ఆరోగ్య కారణమే ఉండదు. ఇది చాలా సౌకర్యవంతమైన ఆహార పదార్థం కూడా. ప్యాకెట్‌లో లభిస్తుంది కాబట్టి ప్రత్యేకంగా వండాల్సిన అవసరం ఉండదు. తీసుకెళ్లడం, నిల్వ చేయడం కూడా సులభం. ఒకేసారి మొత్తం తినాల్సిన అవసరం లేకుండా అవసరమైనంత మాత్రమే ఉపయోగించుకోవచ్చు.

అదే సమయంలో ఆస్పత్రిలో ఉన్నవారికి ఇంట్లో తయారు చేసిన వంటకాలు తీసుకెళ్లడం ప్రతిసారీ సాధ్యం కాదు. రోగి ఏం తినగలడో కూడా స్పష్టంగా తెలియకపోవచ్చు. అందుకే ఎక్కువగా పరిచయం ఉన్న, సులభంగా ఉపయోగించగల ఆహార పదార్థంగా బ్రెడ్‌ను ఎంచుకుంటారు. ఈ కారణంగానే అనారోగ్యంతో ఉన్నవారిని పరామర్శించేటప్పుడు బ్రెడ్ ప్యాకెట్ ఒక సాధారణ ‘గెట్ వెల్ సూన్’ కానుకగా మారిపోయింది.

బ్రెడ్ తీసుకెళ్లడం అనేది ఒక సామాజిక అలవాటుగా మారిపోయింది కానీ బ్రెడ్ అనేది జ్వరం లేదా ఆపరేషన్‌కు ప్రత్యేకమైన మందు కాదు. అలాగే బ్రెడ్ తింటే రోగి త్వరగా కోలుకుంటాడని చెప్పడానికి కూడా ఆధారం లేదు. సాధారణ బ్రెడ్ ప్రధానంగా కార్బోహైడ్రేట్లను అందిస్తుంది. ఆపరేషన్ తర్వాత గాయం మానడానికి, కండరాల పునరుద్ధరణకు ప్రోటీన్ వంటి పోషకాలు కూడా ఎంతో ముఖ్యమైనవి.

అందుకే రోగి పరిస్థితిని బట్టి గుడ్లు, పాలు, పెరుగు, పప్పులు, చేపలు, చికెన్ వంటి ప్రోటీన్ వనరులు లేదా వైద్యులు సూచించిన ఇతర పోషకాహారం అవసరం కావచ్చు. జ్వరం ఉన్నవారికి కూడా తగినంత నీరు, ద్రవాలు, సులభంగా జీర్ణమయ్యే సమతుల ఆహారం ముఖ్యం.

గ‌మ‌నిక‌: పైన తెలిపిన విష‌యాలు కేవ‌లం ప్రాథ‌మిక స‌మాచారం మేర‌కు మాత్ర‌మే. ఆరోగ్యానికి సంబంధించి వైద్యుల సూచ‌న‌లు పాటించ‌డ‌మే ఉత్త‌మం.

Street Food: రోడ్డు మీద సమోసాలు, బజ్జీలు ఫాస్ట్ ఫుడ్ తింటున్నారా? నూనె బాగుందో లేదో 10 సెకన్లలో ఎలా గుర్తించాలి?

Mahesh Jujjuri — Tue, 04 Aug 2026 17:56:45 +0530

Fast Food: వాతావరణం చల్లగా ఉందని అలా బయటకు వెళ్లి ఫాస్ట్ ఫుడ్ తింటున్నారా? వేడి వేడిగా బజ్జీలు, పునుగులు, పకోడీలు నోరూరిస్తున్నాయా..? ఆగండాగండి అవి తినేముందు అవి వేగుతున్న నూనెను ఒక్క సారి గమనించండి.

ఈరోజుల్లో ఇంట్లో వండుకుని తినే ఓపిక చాలా మందిలో ఉండటంలేదు. బయట తిండికి బాగా అలవాటు పడిపోతున్నారు. ఉదయం వేడి వేడిగా బ్రేక్ ఫాస్ట్ లు.. సాయంత్రం వేడి వేడి బజ్జీలు, బోండాలు అన్నీ బయట నుంచి తెచ్చుకుని తినడానికి అలవాటు పడుతున్నారు. కానీ అది ఎంత ప్రమాదమో మాత్రం గమనించడంలేదు. మన రోజువారీ వంటకాల్లో వంటనూనె పాత్ర అత్యంత కీలకమైనది.

అయితే, నేటి వేగవంతమైన జీవితంలో వీధి దుకాణాల్లో, హోటళ్లలో లేదా ఇళ్లలోనే పదేపదే మరిగించిన నూనెను వాడటం మనం చూస్తుంటాం. ఇది ఆరోగ్యానికి తీవ్ర హాని కలిగిస్తుంది. భారత ఆహార భద్రత మరియు ప్రమాణాల ప్రాధికార సంస్థ (FSSAI) ప్రకారం, మనం వాడే నూనె నాణ్యతను కేవలం 10 సెకన్లలో గుర్తించడానికి కొన్ని సులభమైన మార్గాలు ఉన్నాయి. మీ ఆరోగ్యాన్ని కాపాడుకోవడానికి ఈ 10 సెకన్ల చెక్‌లిస్ట్ ఎంతగానో ఉపయోగపడుతుంది.

మీరు ఫాస్ట్ ఫఉడ్ తినడానికి వెళ్లినప్పుడు అక్కడ పదార్ధాలు రుచి మాత్రమే కాదు నూనె ఎలా ఉందా అనేది కూడా చూడండి. తాజా మంచి నూనె ఎల్లప్పుడూ బంగారు పసుపు (Golden Yellow) లేదా లేత గోధుమ రంగులో ఉంటుంది. నూనె చాలా నల్లగా లేదా ముదురు గోధుమ రంగులోకి మారితే అది పాడైపోయిందని అర్థం. అంతే కాదు ఆహార పదార్థాలు నూనెలో వేయకముందే నూనె నుంచి పొగ వస్తుంటే, అది అధిక ఉష్ణోగ్రతకు చేరిందని లేదా నూనెలోని పోషకాలు దెబ్బతిని పాడవుతోందని గ్రహించడండి. ఇది ఒక్కటే కాదు నూనెను వేడిచేస్తున్నప్పుడు దాని ఉపరితలంపై నిరంతరం ఎక్కువ నురుగు కనిపిస్తే, అది పదేపదే వాడిన నూనె కావచ్చు. అటువంటి చోట అసలు తినకపోవడం ఉత్తమం.

తాజా నూనెకు ఎటువంటి దుర్వాసన ఉండదు. కానీ కాలిన వాసన, పులిసిన వాసన లేదా అసహజమైన వాసన వస్తే ఆ నూనె వాడుతున్న చోట పదార్ధాలు తినకపోవడం చాలా మంచిది. ఈ విషయంలో వారిని మీరు హెచ్చరించవచ్చు కూడా. అంతే కాదు నూనెలో వేయించిన పదార్థాలు బయట నల్లగా ఉండి, లోపల సరిగా ఉడకకపోతే నూనె ఉష్ణోగ్రత లేదా నాణ్యత లోపించిందని గ్రహించాలి. అలాగే పదార్థాలు ఎక్కువ నూనెను పీల్చుకుని జిడ్డుగా మారినా నూనె నాణ్యత సరిగా లేదని అర్థం.

ఒక సారి వాడిన నూనెను రోజంతా మాత్రమే కాకుండా మరుసటి రోజు కూడా వాడుతున్నట్లు అనిపిస్తే అటువంటి చోట ఆహారం తినకపోవడం మంచిది. రోజువారీగా కొత్త నూనె పోస్తూ, నూనెను తరచూ వడకట్టి పరిశుభ్రంగా ఉంచే దుకాణాలనే ఎంచుకోండి. నూనెను ఎప్పుడు వాడకూడదొ తెలిపేందుకు కొన్ని సూచనలు ఉన్నాయి. నూనె ముదురు నలుపు రంగులోకి మారినప్పుడు కానీ..

వేడి చేస్తున్నప్పుడు నీలం-బూడిద రంగు పొగ వస్తున్నప్పుడు విపరీతమైన నురుగు, దుర్వాసన వస్తున్నప్పుడు..నూనె బాగా చిక్కబడి జిడ్డుగా (Sticky) మారినప్పుడు. ఆ నూనె వాడకానికి పనికి రాదు అని గుర్తించాలి.

FSSAI ముఖ్యమైన మార్గదర్శకాల ప్రకారం డీప్ ఫ్రై కోసం ఒకే నూనెను 3 సార్లకు మించి మళ్లీ ఉపయోగించవద్దు. నూనెలో TPC (Total Polar Compounds) విలువ 25% దాటితే అది మానవ వినియోగానికి హానికరం. పదేపదే మరిగించిన నూనెలో టాక్సిక్ కాంపౌండ్లు పెరుగుతాయి. దీనివల్ల చెడు కొలెస్ట్రాల్ పెరిగి రక్తనాళాలు మూసుకుపోతాయి దాంతో గుండె జబ్బుల ప్రమాదం పెరుగుతుంది. అంతే కాదు కాలేయంపై తీవ్ర ఒత్తిడి పడి కాలేయ సంబంధిత వ్యాధులు వస్తాయి. ఇటువంటి నూనెతో చేసిన పదార్ధాలు తింటే తీవ్రమైన అసిడిటీ, గ్యాస్, కడుపులో మంట వస్తాయి. ఇవి మాత్రే కాదు క్యాన్సర్ వంటి ప్రాణాంతక వ్యాధుల ముప్పు పెరుగుతుంది.

నూనెను అతిగా వేడి చేయకూడదు. ఒకసారి వాడిన నూనెను వడకట్టి, మూత ఉన్న పాత్రలో చల్లని ప్రదేశంలో నిల్వ చేయాలి. పొగ వచ్చేంత వరకు వేడి చేయకుండా, తరచూ కొత్త నూనెను వాడుతూ ఉండాలి. గుర్తుంచుకోండి ఈ 10 సెకన్ల సూచికలు ప్రాథమిక జాగ్రత్తల కోసం మాత్రమే. మీ ఆరోగ్యం మీ చేతుల్లోనే ఉంచుకోండి, జాగ్రత్తగా ఎంచుకోండి, ఆరోగ్యంగా ఉండండి

Egg Storage: గుడ్లు ఫ్రిడ్జ్ లో పెట్టినా పాడవుతున్నాయా? ఎన్ని రోజులు ఉంటే సేఫ్?

Nandini Arava — Wed, 03 Jun 2026 17:31:06 +0530

Egg Storage: ఎండాకాలంలో గుడ్లు బయట ఉంటే త్వరగా పాడైపోతాయి. కొంతమంది ఎక్కువగా తెచ్చుకుని ఫ్రిడ్జ్ లో పెట్టుకుంటారు. అయినా కూడా కుళ్లిపోతుంటాయి. అసలు ఎన్నిరోజులు గుడ్లు ఫ్రిడ్జ్ లో ఉంటే సేఫ్. ఎలా, ఎక్కడ నిల్వ చేయాలి?

గుడ్లు ఆరోగ్యానికి మంచివే. పిల్లలు, జిమ్ చేసేవాళ్లు ఇంట్లో ఉంటే ట్రేలకు ట్రేలు తెచ్చిపెట్టుకుంటారు. అందులోనూ ఈ వేసవిలో అయితే గుడ్లు బయట ఉంటే మాత్రం కచ్చితంగా పాడైపోవడమో, కుళ్లిపోవడమో జరుగుతాయి. అందుకే చాలామంది ఒకేసారి ఎక్కువగా కొని ఫ్రిజ్‌లో నిల్వ చేసుకుంటారు. కానీ వాటిని ఫ్రిజ్‌లో ఎక్కడ పడితే అక్కడ పెట్టకూడదు. సరైన చోట పెట్టకపోతే త్వరగా పాడైపోతాయి.

ఫ్రిడ్జ్ లో డోర్ దగ్గరే ఎగ్ ట్రే ఉంటుంది. కానీ గుడ్లు అక్కడైతే మాత్రం పెట్టకూడదు. ఎందుకంటే ఫ్రిజ్ డోర్ తెరిచిన ప్రతిసారీ బయటి వేడి గాలి మొదట తగిలేది డోర్‌కే. దానివల్ల గుడ్డు పెంకుపై తేమ చేరి బ్యాక్టీరియా వేగంగా పెరుగుతుంది. గుడ్లు పాడైపోతాయి.

ఫ్రిజ్ డోర్ వద్ద ఉష్ణోగ్రత నిరంతరం మారుతూ ఉంటుంది. ఈ మార్పుల వల్ల సాల్మొనెల్లా వంటి బ్యాక్టీరియా వేగంగా వృద్ధి చెందుతుంది. ఇది గుడ్లు త్వరగా పాడవడానికి కారణమవుతుంది. ఇలా పాడైన గుడ్లు తింటే ఫుడ్ పాయిజనింగ్, వాంతులు, విరేచనాలు, కడుపునొప్పి వస్తాయి.

గుడ్లు ఎక్కువ కాలం తాజాగా, పాడవకుండా ఉండాలంటే వాటిని ఫ్రిజ్‌లోని మధ్య లేదా కింది షెల్ఫ్‌లలో పెట్టాలి. ఆ ప్రదేశాలలో ఉష్ణోగ్రత ఎప్పుడూ స్థిరంగా, చల్లగా ఉంటుంది. ఇది గుడ్లు పాడవకుండా ఎక్కువ కాలం ఫ్రెష్‍గా ఉండేలా చేస్తుంది.

Phone Before Bed: పడుకునే ముందు ఫోన్ వాడుతున్నారా? ఇది మీరు తప్పకుండా తెలుసుకోవాల్సిందే !

Mahesh Rajamoni — Sun, 02 Aug 2026 10:48:46 +0530

Using Phone Before Bed: రాత్రి పడుకునే ముందు ఫోన్ వాడితే మెదడుపై తీవ్ర ప్రభావం పడుతుందని నిపుణులు హెచ్చరిస్తున్నారు. దీని వల్ల కలిగే ప్రమాదాలు, లక్షణాలు ఏంటో ఇక్కడ తెలుసుకుందాం.

రాత్రి పడుకునే ముందు బెడ్‌పై వాలి సోషల్ మీడియా పేజీలు స్క్రోల్ చేయడం, గంటల తరబడి వీడియాలు చూడటం మీకు అలవాటా? రోజువారీ మానసిక ఒత్తిడి నుంచి ఉపశమనం పొందడానికి మీరు ఇలా చేస్తుండవచ్చు. కానీ, ఈ అలవాటు మీ ఆరోగ్యానికి, ముఖ్యంగా మీ మెదడు పనితీరుకు తీవ్ర హాని కలిగిస్తుందని నిపుణులు గట్టిగా హెచ్చరిస్తున్నారు.

రాత్రి ఆలస్యంగా పడుకుని, ఉదయాన్నే కాసేపు ఎక్కువ సేపు నిద్రపోవడం వల్ల ఈ సమస్య తీరిపోతుందని చాలామంది అనుకుంటారు. కానీ అది పూర్తిగా పొరపాటు. అలా చేయడం వల్ల మెదడుకు జరిగిన నష్టాన్ని పూడ్చలేమని నిపుణులు చెబుతున్నారు. మెదడు సరైన రీతిలో పనిచేయడానికి మంచి నిద్ర చాలా అవసరం. నిద్రపోయే సమయంలోనే మన మెదడు కొత్త సమాచారాన్ని ప్రాసెస్ చేయడం, జ్ఞాపకాలను క్రమబద్ధీకరించడం, కణాలను పునరుద్ధరించడం, మానసిక స్థితిని నియంత్రించడం, రోజంతా పేరుకుపోయిన టాక్సిన్లను బయటకు పంపే పనులను పూర్తి చేస్తుంది.

• మెదడుపై మితిమీరిన ఒత్తిడి: నిద్రపోయే సమయంలో కూడా మెసేజ్లు పంపడం, వీడియోలు చూడటం వల్ల మెదడు విశ్రాంతి తీసుకోలేదు. ఫలితంగా అది నిరంతరం ఉత్తేజితమవుతూనే ఉంటుంది.

• మెలటోనిన్ లోపం: స్మార్ట్‌ఫోన్ స్క్రీన్ల నుంచి వచ్చే బ్లూ లైట్ శరీరంలో నిద్రకు సహాయపడే మెలటోనిన్ అనే హార్మోన్ ఉత్పత్తిని నిరోధిస్తుంది.

• బాడీ క్లాక్ దెబ్బతినడం: రాత్రి సమయంలో శరీరం సహజంగానే విశ్రాంతి స్థితిలోకి వెళ్లాల్సి ఉంటుంది. కానీ ఈ బ్లూ లైట్ మెదడును నిరంతరం అలర్ట్‌గా ఉంచుతుంది. దీనివల్ల మీరు ఎనిమిది గంటలు నిద్రపోయినా కూడా ఉదయం లేవగానే అలసట, అసౌకర్యంగానే అనిపిస్తుంది.

1. జ్ఞాపకశక్తి, తెలివితేటలపై ప్రభావం: విషయాలను గుర్తుంచుకునే సామర్థ్యం తగ్గుతుంది. ఏదైనా విషయంపై దృష్టి పెట్టడం, నిర్ణయాలు తీసుకునే సామర్థ్యం నెమ్మదిస్తాయి. ఇది మీ చదువు, ఉద్యోగ పనితీరుపై తీవ్ర ప్రభావం చూపుతుంది.

2. భావోద్వేగాలలో మార్పులు: మానసిక స్థితిని నియంత్రించడం కష్టమవుతుంది. కోపం, ఆందోళన, అనవసరమైన మానసిక ఒత్తిడి పెరుగుతాయి. అలాగే బ్రెయిన్ ఫాగ్ అంటే ఆలోచనల్లో స్పష్టత లేని పరిస్థితి ఏర్పడుతుంది.

3. శారీరక సమస్యలు: తలనొప్పి పెరుగుతుంది. ముఖ్యంగా మైగ్రేన్ ఉన్నవారికి ఆ లక్షణాలు మరింత తీవ్రంగా మారతాయి.

మీకు ఈ కింద పేర్కొన్న లక్షణాలు ఉన్నాయో లేదో ఒకసారి సరిచూసుకోండి:

• తీవ్రమైన అలసటగా ఉన్నప్పటికీ నిద్ర పట్టకపోవడం

• రాత్రి వేళల్లో పదే పదే నిద్ర నుంచి మేల్కోవడం

• ఉదయాన్నే నిద్రలేచినప్పుడు ఉత్సాహం లేకపోవడం

• ఉదయం పూట తలనొప్పిగా అనిపించడం

• ఏకాగ్రత లోపించడం, తరచూ మరచిపోవడం

• పగటిపూట పనిలో ఉత్పాదకత లేదా సామర్థ్యం తగ్గడం

• సడన్‌గా కోపం రావడమే కాకుండా తీవ్ర ఆందోళన కలగడం

• పగటి సమయంలో విపరీతంగా నిద్రరావడం

పైన పేర్కొన్న లక్షణాలు గనుక మీకు వారాల పాటు వరుసగా కనిపిస్తుంటే నిర్లక్ష్యం చేయవద్దు. సరైన వైద్య సలహాలు, చికిత్స కోసం వెంటనే ఒక న్యూరాలజిస్ట్ లేదా స్లీప్ స్పెషలిస్ట్‌ను సంప్రదించడం చాలా అత్యవసరం.

Hypnic Jerk: నిద్రలో సడెన్ గా జారిపడ్డట్టు అనిపిస్తుందా? ఉలిక్కిపడి లేస్తున్నారా? ఏందుకిలా జరుగుతుంది?

Mahesh Jujjuri — Fri, 31 Jul 2026 11:12:50 +0530

Hypnic Jerk:నిద్రలో ఒక్కసారిగా ఉలిక్కిపడి లేస్తున్నారా? ఎత్తులో నుంచి కింద పడ్డట్టు ఫీల్ అవుతున్నారా? ఎందుకు ఇలా జరుగుతుంది. దానికి కారణం ఏంటి? నివారించడానికి ఏం చేయాలి అసలు ఈ పరిస్థితిని ఏమని పిలుస్తారు?

రాత్రి వేళ ప్రశాంతంగా నిద్రపోతున్న సమయంలో హఠాత్తుగా ఎత్తు నుండి కింద పడిపోతున్నట్లు అనిపించి ఉలిక్కిపడి లేచారా? కాలు లేదా చేయి సడన్‌గా కదలడంతో మెలకువ వచ్చిందా? వైద్య పరిభాషలో ఈ పరిస్థితిని 'హిప్నిక్ జర్క్' (Hypnic Jerk) లేదా 'స్లీప్ స్టార్ట్' అని పిలుస్తారు. అసలు ఈ పరిస్థితి ఎందుకు వస్తుంది. దాని నుంచి బయటపడటానికి ఏం చేయాలి అనే విషయాలను ప్రముఖ వైద్యురాలు డాక్టర్ మల్లిక (Dr. Mallika) తన వీడియో ద్వారా ఈ సమస్యకు గల కారణాలు, నివారణా మార్గాలను స్పష్టంగా వివరించారు.

మనం పడుకుని నిద్రపోయినప్పుడు మన మెదడు శరీర కండరాలకు విశ్రాంతి తీసుకోమని (Relax) సంకేతాలను పంపుతుంది. అయితే కొన్నిసార్లు మెదడు కన్ఫ్యూజ్ అయి, శరీరం కింద పడిపోతోందేమోనని భావించి కండరాలను ఒక్కసారిగా సంకోచింపజేస్తుంది (Muscle Contraction). అప్పుడే ఈ సడన్ జర్క్ లేదా జంప్ వస్తుంది. సాధారణంగా ఇది భయపడాల్సిన విషయం కాదు. అయితే కొందరిలో ఇది తరచుగా పునరావృతమవుతుంది.

ఈ ఉలిక్కిపడే సమస్య కొందరిలో ఎక్కువగా రావడానికి ముఖ్యమైన కారణాలు కొన్ని ఉన్నాయి. అందులో మరీ ముఖ్యమైనది అధిక మానసిక ఒత్తిడి (Stress). రోజూవారీ జీవితంలో ఒత్తిడి ఎక్కువగా ఉండటం. సరైన వేళల్లో Lack of Sleep తగినంత సేపు నిద్రపోకపోవడం కారణం కావచ్చు. అంతే కాదు దీనికి మరో ముఖ్య కారణం అయితే.. టీ, కాఫీలు అతిగా తాగడం. మెగ్నీషియం లోపం (Magnesium Deficiency) శరీరానికి మెగ్నీషియం అందకపోవడం కూడా ఇందుకు కారణం.

ఈ సమస్య నుంచి ఉపశమనం పొందడానికి డాక్టర్లు కొన్ని సులభమైన చిట్కాలను పాటించాలని సూచిస్తున్నారు. అందులో మరీ ముఖ్యమైనది టీ/కాఫీలు తగ్గించడం. సాయంత్రం 5 గంటల (5 PM) తర్వాత టీ లేదా కాఫీ తాగడం కంప్లీట్‌గా అవాయిడ్ చేయాలి. శరీరంలో మెగ్నీషియం పెంచే అరటిపండ్లు (Bananas), ఆకుకూరలు (Green Leafy Vegetables), గుమ్మడి గింజలు (Pumpkin Seeds) వంటి వాటిని రోజువారీ ఆహారంలో భాగం చేసుకోవాలి. మరీ ముఖ్యంగా ఒత్తిడి తగ్గించుకోవాలి. ప్రశాంతమైన నిద్ర వాతావరణాన్ని ఏర్పరచుకుని క్రమబద్ధమైన సమయానికి పడుకోవాలి. మానసిక ఒత్తిడిని తగ్గించుకుని, టీ/కాఫీలను అదుపులో ఉంచుకుంటూ మెగ్నీషియం కలిగిన ఆహారాన్ని తీసుకోవడం వల్ల నిద్రలో వచ్చే ఈ 'హిప్నిక్ జర్క్' సమస్య నుండి సులభంగా ఉపశమనం పొందవచ్చు.

Constipation: మలబద్ధకం బాగా వేధిస్తోందా? రోజూ ఈ 3 అలవాట్లు పాటిస్తే మాయం

Nandini Arava — Sun, 14 Jun 2026 18:04:39 +0530

Constipation: ఇప్పుడు మలబద్ధకం సమస్య చాలా మందికి కామన్ అయిపోయింది. కానీ దాన్ని లైట్ తీసుకుంటే మాత్రం ఫైల్స్ వచ్చే ప్రమాదం ఉంది. చిన్న సమస్యే అనుకున్నా…సర్వరోగాలకు కారణమిదే. దానికి సింపుల్ సొల్యూషన్ ఇదే.

మలబద్ధకం అని సింపుల్ గా తీసుకోకండి. అది శరీరంలో సర్వ రోగాలకు కారణం. కడుపు ఉబ్బరం, ఆకలి వేయకపోవడం, చికాకు, శరీరమంతా మెలిపట్టేసినట్లు ఉంటుంది. ఇంట్లో పనులపై శ్రద్ధ పెట్టలేరు, ఆఫీసులో వర్క్ చేయడానికి అసౌకర్యంగా ఉంటుంది. పదే పదే వాష్ రూంకు వెళ్లాల్సి ఉంటుంది. అందుకే పీచు పదార్థాలు ఎక్కువగా తినాలి. అది శరీరంలో వ్యర్థాలను బయటకు పంపించడానికి చాలా సహాయపడుతుంది.

మలవిసర్జన సరిగ్గా జరగనప్పుడు లేదా కష్టంగా ఉన్నప్పుడు మలబద్ధకం సమస్య వస్తుంది. సాధారణంగా, వారానికి మూడుసార్ల కంటే తక్కువ విరేచనాలు అయితే దానిని మలబద్ధకంగా పరిగణిస్తారు. కడుపంతా పట్టేసినట్లు ఉంటుంది.

సాధారణంగా మలవిసర్జన అలవాట్లు వ్యక్తిని బట్టి మారుతూ ఉంటాయి. అందరికీ ఒకేలా ఉండదు. కొందరికి రోజుకు ఎక్కువసార్లు విరేచనం అవుతుంది. మరికొందరికి వారానికి ఒకటి లేదా రెండుసార్లు మాత్రమే అవుతుంది. అదుపు చేయకపోతే…దీర్ఘకాల సమస్యలకు తెచ్చుకున్నవారవుతారు.

మలం గట్టిగా, పొడిగా రావడం, విరేచనం సమయంలో బాగా ముక్కాల్సి రావడం, నొప్పిగా ఉండటం వంటివి మలబద్ధకం సాధారణ లక్షణాలు. గట్టిగా రావడం వల్ల చర్మం చీలిపోయి రక్తం వచ్చే ప్రమాదం ఉంది. దానివల్ల విపరీతమైన నొప్పి ఉంటుంది. కూర్చోలేరు, నిల్చోలేరు.

ఆహారంలో ఫైబర్ తక్కువగా ఉండటం, సరిపడా నీళ్లు తాగకపోవడం, వ్యాయామం చేయకపోవడం, ఒత్తిడి, రోజువారీ పనుల్లో మార్పులు.. ఇవన్నీ మలబద్ధకానికి ప్రధాన కారణాలు. కొన్ని మందులు, ఆరోగ్య సమస్యలు కూడా ఈ ఇబ్బందికి దారితీస్తాయి.

ఆహారం, జీవనశైలిలో మార్పులు చేసుకుంటే ఈ సమస్య నుంచి బయటపడొచ్చు. మనం తినే ఫుడ్ జీర్ణవ్యవస్థపై చాలా ప్రభావం చూపుతుంది. అందుకే సరైన ఆహారం ఎంచుకోవడం ముఖ్యం. మలబద్ధకాన్ని తగ్గించే, పెంచే ఆహారాల గురించి తెలుసుకోవాలి.

కివి, అవిసె గింజలు, చిలగడదుంప, ప్లమ్స్, పాలకూర, కాఫీ, ఓట్స్, పియర్ పండు, చియా సీడ్స్ వంటివి మలబద్ధకం నుండి ఉపశమనం కలిగిస్తాయి. వీటిలో ఫైబర్ ఎక్కువగా ఉంటుంది. ఇది మలాన్ని మృదువుగా చేసి, విరేచనం సాఫీగా అయ్యేలా చేస్తుంది. అంతేకాకుండా బెండకాయ, అరటికంద, చిక్కుళ్లు ఎక్కువగా తినాలి. దాంట్లో ఫైబర్ ఎక్కువగా ఉంటుంది.

చీజ్, చాక్లెట్, నూనెలో వేయించిన పదార్థాలు, ఆల్కహాల్, వైట్ బ్రెడ్, ఫాస్ట్ ఫుడ్ వంటివి మలబద్ధకం సమస్యను మరింత పెంచుతాయి. వీటిలో ఫైబర్ తక్కువగా, కొవ్వు ఎక్కువగా ఉండటంతో జీర్ణం కావడం కష్టం.

Jaggery: బెల్లం ఎలా తింటున్నారు..? ఇలా తింటేనే ప్రయోజనం ఉంటుంది

Nandini Arava — Tue, 09 Jun 2026 12:55:30 +0530

Jaggery: బెల్లం ఆరోగ్యానికి చాలా మంచిది. రోజూ ఒక చిన్న ముక్క తింటే శరీరానికి కావాల్సిన మినరల్స్, ఐరన్ అందుతాయని తెలిసిందే. కాఫీ, టీల్లో పంచదారకు బదులు బెల్లం వాడితే బెటర్. కానీ అంతకన్నా జరిగే మేలు ఏంటో తెలుసా?

Milk Benefits: నైట్ నిద్రపట్టడం లేదా? అమ్మమ్మల నాటి ఈ చిట్కా ట్రై చేయండి, హాయిగా నిద్రపట్టేస్తుంది

Nandini Arava — Tue, 02 Jun 2026 11:46:08 +0530

Milk Benefits: కొందరికి ఎంత ట్రై చేసినా నైట్ నిద్రపట్టదు. అందుకని స్లీపింగ్ ట్యాబ్లెట్లు వేస్తారు. లేదా నిద్రపట్టడం లేదని ఫోన్‍తో గడిపేస్తారు. చక్కగా వేడి పాలు ట్రై చేయండి. మెదడులో సెరటోనిన్, మెలటోనిన్ హార్మోన్లు రిలీజ్ చేసి నిద్రపోయేలా చేస్తుంది.

జనరల్‍గా చాలా మందికి ఏ ఇంత నొప్పొచ్చినా, నిద్ర పట్టకపోయినా, నీరసంగా ఉన్నా ట్యాబ్లెట్లు వాడేయడం, ప్రోటీన్ షేకులు తాగేస్తారు. లేదంటే సోషల్ మీడియాలో వచ్చే రకరకాలు ట్రై చేస్తారు. కానీ ఇవేమీ లేని పాత రోజుల్లో ఏం చేసేవారో అసలు గుర్తుందా? చక్కగా ఇంట్లో అమ్మమ్మో, నాన్నమ్మో..వేడి వేడి పాలు కలిపి ఇచ్చేది. దాంట్లో కాసింత మిరియాల పొడి, పసుపు కలిపి ఇస్తే...పొద్దున్న కల్లా బోలెడంత ఎనర్జీ వచ్చేసేది. ఈ రోజు 'ప్రపంచ పాల దినోత్సవం' (World Milk Day). ఈ సందర్భంగా, మనం మరిచిపోతున్న అమ్మమ్మల కాలం నాటి పాల చిట్కాల వెనుక ఉన్న అసలు సైన్స్ ఏంటో ఇక్కడ చూద్దాం.

ఫోన్ చూస్తూ గడిపేసేవాళ్లకి రాత్రంతా నిద్రపట్టదు. అలాంటప్పుడు ట్యాబ్లెట్లకు బదులు వేడి పాలు తాగండి. పాలలో ఉండే ట్రిప్టోఫాన్ అనే అమైనో యాసిడ్ మన మెదడులో సెరటోనిన్, మెలటోనిన్ అనే హార్మోన్లను ఉత్పత్తి చేస్తుంది. ఇవి మనసును ప్రశాంతంగా ఉంచి, పడుకునేందుకు శరీరానికి సిగ్నల్ ఇస్తుంది. అందుకే రాత్రి పడుకునే ముందు వేడి పాలు తాగడం కేవలం అలవాటు కాదు, అదొక సైంటిఫిక్ స్లీప్ థెరపీ. దానివల్ల ఫలితమే ఉంటుంది గానీ..సైడ్ ఎఫెక్ట్ ఉండదు.

మన దేశ 'నేచురల్ యాంటీబయాటిక్': జలుబు, కాస్త దగ్గు రాగానే అమ్మమ్మ పసుపు పాలు పట్టుకొచ్చేది గుర్తుందా? దీన్నే ఇప్పుడు ప్రపంచం 'టర్మరిక్ లాటే' అని ముద్దుగా పిలుస్తోంది! పసుపులో ఉండే కర్కుమిన్ (Curcumin) అనే పదార్థానికి యాంటీ-ఇన్‌ఫ్లమేటరీ, యాంటీఆక్సిడెంట్ గుణాలు ఎక్కువ. ఇది శరీర రోగనిరోధక శక్తిని పెంచి చిన్న చిన్న ఇన్ఫెక్షన్లను తరిమికొడుతుంది.

గొంతులో గరగర లేదా దురదగా ఉన్నప్పుడు తేనె కలిపిన వేడి పాలు తాగడం చాలా మంచి రిజల్ట్ ఇస్తుంది. తేనె గొంతుకు ఒక రక్షణ పొరలా పనిచేస్తే, వేడి పాలు నొప్పిని తగ్గిస్తాయి. అయితే, ఏడాది లోపు పిల్లలకు తేనె ఇవ్వకూడదని గుర్తుంచుకోండి.

జలుబు చేసినప్పుడు పాలు తాగితే కఫం ఎక్కువవుతుందని చాలామంది నమ్ముతారు. కానీ దీనికి ఎలాంటి శాస్త్రీయ ఆధారం లేదని నిపుణులు స్పష్టం చేస్తున్నారు. పాలు కాస్త చిక్కగా ఉండటం వల్ల గొంతులో ఒక పొరలా ఏర్పడిన ఫీలింగ్ వస్తుంది తప్ప, పాలు కఫాన్ని ఉత్పత్తి చేయవు. కాబట్టి జలుబు చేసినప్పుడు కూడా మితంగా పాలు తాగడం సురక్షితమే.

అనారోగ్యం నుంచి కోలుకుంటున్నప్పుడు లేదా బాగా నీరసంగా ఉన్నప్పుడు పాలు బెస్ట్ ఎనర్జీ డ్రింక్. ఇందులో ఉండే హై-క్వాలిటీ ప్రొటీన్, కాల్షియం, విటమిన్లు శరీరానికి అవసరమైన పోషణను అందిస్తాయి. జిమ్‌కు వెళ్లేవాళ్లు ఇప్పటికీ పాలను తమ ఫేవరెట్ 'పోస్ట్-వర్కౌట్' డ్రింక్‌గా తాగడానికి ఇదే కారణం.

అమ్మమ్మలు చెప్పిన ఈ ఇంటి చిట్కాలన్నీ కేవలం పాత నమ్మకాలు కావు, వాటి వెనుక కచ్చితమైన సైన్స్ ఉంది. ఒక గ్లాసు పాలలో పోషకాలతో పాటు ఇంట్లో వాళ్ల ప్రేమ, కేరింగ్ కూడా కలిసి ఉంటాయి. ఈ ప్రపంచ పాల దినోత్సవం నాడు, కెమికల్ డ్రింక్స్ పక్కనపెట్టి, సహజమైన పాలను మీ లైఫ్‌స్టైల్‌లో భాగం చేసుకోండి. గుర్తుంచుకోండి, అమ్మమ్మ ప్రేమ, పాల పోషణకు మించిన వెల్‌నెస్ డ్రింక్ మరొకటి లేదు.

Banana: పండిపోయిందని అరటిపండును పడేస్తున్నారా? ఈ విషయం తెలిస్తే అస్సలు ఆ పనిచేయరు?

Mahesh Jujjuri — Mon, 03 Aug 2026 08:29:10 +0530

Banana: ఇంట్లో ఉన్న అరటిపండ్లు బాగా పండాయా? నల్లటి మచ్చలు వచ్చాయని వాటిని పారేస్తున్నారా? ఆగండాగండి.. బాగా పండిన అరటిపండ్ల వల్ల ఎన్ని ఉపయోగాలు ఉన్నాయో తెలిస్తే మీరు ఆ పని చేయరు. పండిన అరటిపండ్ల గురించి డాక్టర్లు ఏమంటున్నారంటే?

మనలో చాలామంది మార్కెట్‌లో లేదా ఇంట్లో పైన డార్క్ బ్రౌన్ మచ్చలు (Dark Brown Spots) ఉన్న అరటిపండ్లను చూడగానే అవి పండిపోయాయని, పండితే పాడైపోయాయని భావించి పడేస్తుంటారు. పైన ఎలాంటి మచ్చలు లేకుండా శుభ్రంగా ఉండే పండ్లనే తినడానికి ఇష్టపడతారు. కానీ, బయట చూడటానికి కాస్త నల్లగా, బ్రౌన్ మచ్చలతో, కాస్త పండినట్టు కనిపించే ఆ అరటిపండే నిజానికి మన ఆరోగ్యానికి 'సూపర్ ఫుడ్' అని వైద్య నిపుణులు చెబుతున్నారు.

బాగా పండిన, బ్రౌన్ మచ్చలున్న అరటిపండులో TNF (Tumor Necrosis Factor) లాంటి ఆక్టివ్ కాంపౌండ్స్ లభిస్తాయి. ఇవి మన శరీరంలోని రోగనిరోధక వ్యవస్థను (Immune System) విపరీతంగా బూస్ట్ చేయడానికి ఎంతగానో తోడ్పడతాయి. అరటిపండు ఎంతగా పండితే, దానిలోని యాంటీఆక్సిడెంట్ శక్తి (Antioxidant Power) అంతగా పెరుగుతుంది. ఇవి శరీరంలో ఉండే ఫ్రీ రాడికల్స్‌తో పోరాడి, కణాలను రక్షిస్తాయి.

అరటిపండు బాగా పండే క్రమంలో అందులో ఉండే సంక్లిష్టమైన 'స్టార్చ్' కాస్త సులభంగా జీర్ణమయ్యే 'సహజమైన చక్కెర'గా (Natural Sugar) మారుతుంది. పండిన అరటిపండులోని పోషక విలువలను (Nutrients) మన శరీరం చాలా సులభంగా గ్రహిస్తుంది (Easy Absorption). జీర్ణ వ్యవస్థపై భారం పడకుండా, శరీరానికి తక్షణ శక్తిని (Better Energy) , ఆరోగ్య రక్షణను ఇది అందిస్తుంది.

పైన మచ్చలు వచ్చి బాగా మెత్తబడినంత మాత్రాన అరటిపండు పాడైపోయినట్లు కాదు. వీటిని నేరుగా తినడానికి ఇష్టపడకపోతే..మిల్క్ షేక్‌లు లేదా స్మూతీలలో సహజమైన తీపి కోసం వాడవచ్చు. హెల్తీ బనానా పాన్‌కేక్స్, కేక్‌లు లేదా ఓట్స్ ఐటమ్స్‌ తయారీలో తీపి పదార్థాలకు ప్రత్యామ్నాయంగా ఉపయోగించవచ్చు. కాబట్టి, తదుపరిసారి డార్క్ బ్రౌన్ మచ్చలున్న అరటిపండు కనిపిస్తే అనవసరంగా చెత్తబుట్టలో పారేయకండి! అది మీ శరీరానికి ఒక హెల్త్ అప్‌గ్రేడ్ అని గుర్తించండి.

Earbuds : వైర్‌లెస్ ఇయర్‌బడ్స్‌ వాడుతున్నారా? అయితే వరల్డ్ హెల్త్ ఆర్గనైజేషన్ ఈ వార్నింగ్ మీకే

Arun Kumar P — Wed, 24 Jun 2026 20:21:26 +0530

వైర్‌లెస్ ఇయర్‌బడ్స్ తక్కువ స్థాయిలో రేడియో ఫ్రీక్వెన్సీ రేడియేషన్‌ను విడుదల చేస్తాయి. అయినా వీటివల్ల తీవ్రమైన ఆరోగ్య సమస్యలు వచ్చే అవకాశాలు లేకపోలేవు అంటోంది ప్రపంచ ఆరోగ్య సంస్థ (wHO).

ఈ డిజిటల్ యుగంలో వైర్‌లెస్ ఇయర్‌బడ్స్ (Wireless Earbuds or Bluetooth) మన జీవితంలో ఒక భాగమైపోయాయి. ప్రయాణంలో, వ్యాయామం చేసేటప్పుడు, ఆఫీస్ పనిలో.. ఇలా ప్రతీచోట వీటి వాడకం కామన్ అయిపోయింది. అయితే వీటి నుంచి వచ్చే రేడియేషన్ (Radiation) మన మెదడుపై ప్రభావం చూపుతుందా అనే ఆందోళన చాలామందిలో ఉంది. దీనిపై సైన్స్ ఏం చెబుతోందో చూద్దాం.

వైర్‌లెస్ ఇయర్‌బడ్స్ బ్లూటూత్ టెక్నాలజీతో పనిచేస్తాయి. ఇవి పనిచేస్తున్నప్పుడు తక్కువ స్థాయిలో రేడియో ఫ్రీక్వెన్సీ (RF) తరంగాలను విడుదల చేస్తాయి. అదే వైర్డ్ (Wired) హెడ్‌ఫోన్‌లు కేబుల్ ద్వారా సిగ్నల్స్ పంపిస్తాయి కాబట్టి వాటి నుంచి ఎలాంటి రేడియేషన్ రాదు. ఇక్కడ మనం గమనించాల్సిన విషయం ఏంటంటే.. ఇయర్‌బడ్స్ నుంచి వచ్చే రేడియేషన్, అంతర్జాతీయ భద్రతా ప్రమాణాల కన్నా చాలా తక్కువగా ఉంటుంది.

ప్రపంచ ఆరోగ్య సంస్థ (WHO), ఇంటర్నేషనల్ ఏజెన్సీ ఫర్ రీసెర్చ్ ఆన్ క్యాన్సర్ (IARC) రేడియో ఫ్రీక్వెన్సీ రేడియేషన్‌ను 'ప్రమాదకారి కావొచ్చు' (Possibly Carcinogenic - Group 2B) కేటగిరీలో చేర్చాయి. అంటే ఇది హానికరం అని నిరూపించడానికి ప్రస్తుతానికి పరిమిత ఆధారాలు మాత్రమే ఉన్నాయని అర్థం. ఎక్కువ కాలం వాడితే వచ్చే ప్రభావాలపై అధ్యయనాలు ఇంకా జరుగుతూనే ఉన్నాయి. కానీ ఇయర్‌బడ్స్ నేరుగా బ్రెయిన్ క్యాన్సర్‌కు కారణమవుతాయని చెప్పడానికి కచ్చితమైన ఆధారాలు ఇప్పటివరకూ లేవు.

సాధారణ వాడకంలో వైర్‌లెస్ ఇయర్‌బడ్స్‌ను ప్రమాదకరమైనవిగా పరిగణించరు. వీటి నుంచి వెలువడే రేడియేషన్ మన స్మార్ట్‌ఫోన్‌ల కంటే కూడా తక్కువగా ఉంటుంది. అయినప్పటికీ భద్రత కోసం కొన్ని జాగ్రత్తలు తీసుకోవడం మంచిది. అవసరం ఉన్నా, లేకపోయినా చెవిలో ఇయర్ బడ్స్ పెట్టుకోవడం మంచిదికాదు.. ఇది ప్రమాదానికి దారితీయవచ్చు.

విరామం ఇవ్వండి : గంటల తరబడి ఇయర్‌బడ్స్ పెట్టుకోవద్దు. మధ్యమధ్యలో విరామం తీసుకోండి.

వైర్డ్ హెడ్‌ఫోన్‌లు వాడండి : ఇంట్లో లేదా ఆఫీసులో ఎక్కువ సేపు పాటలు వినేటప్పుడు వైర్డ్ హెడ్‌ఫోన్‌లు వాడటం మంచిది.

నిద్రపోయేటప్పుడు వాడొద్దు : ఇయర్‌బడ్స్ పెట్టుకుని నిద్రపోయే అలవాటు మానుకోండి. ఇది చెవి ఆరోగ్యానికి, రేడియేషన్ పరంగా కూడా మంచిది కాదు.

మొత్తంగా చెప్పాలంటే వైర్‌లెస్ ఇయర్‌బడ్స్‌పై అనవసరమైన భయం వద్దు, కానీ జాగ్రత్తగా వాడటం ఎప్పుడూ మంచిదే. అవసరం ఉంటేనే వీటిని వాడండి... బ్లూటూత్ ఇయర్ బర్డ్స్ కాకుండా వైర్డ్స్ ఇయర్ ఫోన్స్ వాడటం ఉత్తమం.

Chicken Biryani: 30 నిమిషాల్లో ఘుమఘుమలాడే పొట్లం బిర్యానీ.. ఎవరైనా ఫిదా అవ్వాల్సిందే..

Nandini Arava — Tue, 09 Jun 2026 14:23:20 +0530

Chicken Biryani: రెగ్యూలర్ గా చేసే దమ్ బిర్యానీ కాకుండా ఇలా చేసుకుని తినండి. బిర్యానీని సగం కుక్ చేసి చేసే పొట్లం బిర్యానీ ఇది. దీని అరోమాకే సగం కడుపునిండిపోద్ది. ఈజీగా ఎలా చేయాలో ఇక్కడ రెసిపీ చూద్దాం.

ఎప్పుడూ అదే బిర్యానీ ఏం తింటారు? రుచిగా, జ్యూసీగా, చూడగానే తినబుల్ అనేపించేలా ఉండే ఈ బిర్యానీ ట్రై చేసి ఉండండి. మిగతా బిర్యానీలకు గుడ్ బై చెప్పేస్తారు. అంత బాగుంటుంది. ఒక్కసారి తింటే మళ్లీ మళ్లీ తినాలనిపించే రుచి, అరోమా, ఘుమఘుమ. బిర్యానీ ఎవరైనా చేస్తారు. కానీ నోటికి రుచిగా చేయడంలోనే ఆ కిక్ ఉంది. అయితే ఈ పొట్లం బిర్యానీ ఎలా చేయాలో స్టెప్ బై స్టెప్ ఉంది. లాగించేయండి.

ఆయిల్, టేబుల్ స్పూన్ షాజీరా, 3-4 యాలకులు, 4-5 లవంగాలు, చిన్న ముక్క దాల్చినచెక్క, ఒకటి బిర్యానీ ఆకు. అరకప్పు ఉల్లిపాయ ముక్కలు, 3 పచ్చిమిర్చి, అల్లంవెల్లుల్లి పేస్ట్., రెండున్నర కప్పుల నీళ్లు, రుచికి సరిపడా ఉప్పు. కొంచెం కొత్తిమీర, పుదీనా. కప్పున్నర బాస్మతీ రైస్, స్టార్ పువ్వు, మరాఠీ మొగ్గ, బిర్యానీ ఆకులు, చిన్న ముక్క దాల్చినచెక్క, 4-5 లవంగాలు, 4-5 యాలకులు, కప్ ఉల్లి తరుగు, టేబుల్ స్పూన్ అల్లంవెల్లుల్లి పేస్ట్, అరకేజీ చికెన్, పెరుగు, జీడిపప్పు, కొబ్బరి పాలు, బనానా ఆకు, నెయ్యి.

ముందుగా పాన్ లో నూనె వేసి 3-4 టేబుల్ స్పూన్ల ఆయిల్ వేసి వేడెక్కాక..అందులో టేబుల్ స్పూన్ షాజీరా, 3-4 యాలకులు, 4-5 లవంగాలు, చిన్న ముక్క దాల్చినచెక్క, ఒకటి బిర్యానీ ఆకు వేసి వేయించండి, ఆ తర్వాత అందులో ఉల్లిపాయ ముక్కలు, 3 పచ్చిమిర్చి, అల్లంవెల్లుల్లి పేస్ట్ వేసి వేయించండి. అందులో రెండూ ముప్పావు కప్పుల వేడి నీళ్లు వేయండి. ఉప్పు కూడా వేసి మరిగించాక అందులో ఒక్కటిన్నర కప్పు నానబెట్టిన బియ్యం వేసుకోండి. అన్నం పొడపొడిగా ఉండేలా చూసుకోవాలి.

పాన్ లో నూనె వేసి స్టార్ పువ్వు, మరాఠీ మొగ్గ, బిర్యానీ ఆకులు, చిన్న ముక్క దాల్చినచెక్క, 4-5 లవంగాలు, 4-5 యాలకులు ఇవన్నీ వేసి పొంగించండి. కప్ ఉల్లి తరుగు, టేబుల్ స్పూన్ అల్లంవెల్లుల్లి పేస్ట్ వేసి వేయించండి. అందులో అరకిలో చికెన్ వేసి కాస్త ఉప్పు వేసి పెద్ద మంట మీద వేపాలి. నీరు ఇగిరి నూనె తేలాక అరకప్పు పెరుగు, పుదీనా, కొత్తిమీర తరుగు, 3-4 పచ్చిమిర్చి వేసి కలపండి. బిర్యానీ మసాలా లేదా గరం మసాలా వేసుకోండి. పక్కన మరో మిక్సీజార్ లో జీడిపప్పు, నీళ్లు వేసి పేస్ట్ చేయండి. ఆ పేస్ట్ వేసి చికెన్ లో వేసి ఉడికించండి.ముప్పావు కప్పు నీళ్లు వేస్తే అంటకుండా ఉడుకుతుంది. అప్పుడు చికెన్ గ్రేవీ అయిపోయాక స్టవ్ కట్టేయండి. ఇప్పుడు అందులో కొబ్బరి పాలు వేసుకుని పక్కన పెట్టుకోండి.

ఇప్పుడు అరటి ఆకుని కాస్త వేడి చేస్తే మెత్తగా అవుతుంది. అప్పుడు ఎలా అంటే అలా పొట్లం కట్టుకోవడానికి వీలు పడుతుంది. ఇప్పుడు అందులో కాస్త బిర్యానీ రైస్, దానిపై చికెన్ గ్రేవీ, మరో బిర్యానీ రైస్ వేసి ఆపైన వేయించిన ఉల్లిపాయలు, పుదీనా, కొత్తిమీర తరుగు, నెయ్యి వేసి తాడుతో పొట్లం కట్టేయండి.

వాటిని స్టీమర్ లో 10 నిమిషాలు స్టీమ్ చేయండి. ఆ తర్వాత 10 నిమిషాలు అలానే వదిలేయండి. ఘుమఘుమలాడే పొట్లం బిర్యానీ రెడీ, వేడివేడిగా తింటుంటే ఎంత బాగుంటుందో. ట్రై చేసేయండి.

Alcohol: నెల రోజుల పాటు ఆల్కహాల్ మానేస్తే.. మీ శరీరంలో ఏం జరుగుతుందో తెలుసా.?

Narender Vaitla — Sat, 01 Aug 2026 17:51:42 +0530

Alcohol: ఆల్కహాల్ ఆరోగ్యానికి మంచిది కాదని తెలిసినా చాలా మంది ఆ వ్యసనాన్ని వదులుకోరు. అయితే ఒక నెలపాటు ఆల్కహాల్‌కు దూరంగా ఉండటం వల్ల శరీరంలో జరిగే మార్పుల గురించి ఇప్పుడు తెలుసుకుందాం.

కేవలం 30 రోజులు ఆల్కహాల్ తాగడం మానేయడం మీ జీవితంలో గణనీయమైన సానుకూల మార్పులను తీసుకురాగలదు. ఈ చిన్న ప్రయత్నం మీ శరీరంపై, ముఖ్యంగా కాలేయంపై కలిగే ఒత్తిడిని తగ్గిస్తుంది. మీ నిద్ర నాణ్యత మెరుగుపడుతుంది, మానసిక స్థితిలో స్పష్టమైన మార్పు కనిపిస్తుంది. చాలా మంది మొదటి వారంలోనే శక్తి స్థాయిలు పెరిగినట్లు, చర్మం ప్రకాశవంతంగా మారినట్లు గమనిస్తారు. ఒక నెలలో, మీ శరీరం విషాన్ని తొలగించుకుని, కొత్త శక్తితో నిండిపోతుంది. వైద్య నిపుణులు కూడా ఈ నిర్ణయాన్ని ప్రశంసిస్తారు, ఎందుకంటే ఇది దీర్ఘకాలిక ఆరోగ్య సమస్యలను నివారించడానికి ఇది మొదటి అడుగు.

ఆల్కహాల్ మానేసిన నెల రోజుల్లో కాలేయం తనను తాను పునరుద్ధరించుకోవడం ప్రారంభిస్తుంది. ఆల్కహాల్ వల్ల కాలేయంపై పడే ఒత్తిడి తగ్గి, కొవ్వు నిల్వలు క్రమంగా తగ్గుతాయి, ఇది ఫ్యాటీ లివర్ రిస్క్‌ను తగ్గిస్తుంది. వైద్య అధ్యయనాల ప్రకారం, 30 రోజుల పాటు ఆల్కహాల్‌ను దూరంగా ఉంచిన వారికి కాలేయ ఎంజైమ్‌ల స్థాయిలు మెరుగుపడతాయి. ఇది కేవలం కాలేయానికి మాత్రమే కాదు, గుండె ఆరోగ్యానికి కూడా మేలు చేస్తుంది. రక్తపోటు సాధారణ స్థాయికి వస్తుంది, గుండె సంబంధిత వ్యాధుల ప్రమాదం తగ్గుతుంది. గుండె మరింత సమర్థంగా పనిచేస్తుంది.

ఆల్కహాల్‌ను మానేయడం వల్ల నిద్ర నాణ్యతలో గణనీయమైన మెరుగుదల కనిపిస్తుంది. మందు మొదట్లో నిద్రకు సహాయపడినట్లు అనిపించినా, అది లోతైన నిద్ర దశలకు ఆటంకం కలిగిస్తుంది. 30 రోజుల తర్వాత, మీరు ఎక్కువసేపు గాఢ నిద్రను అనుభవిస్తారు, ఉదయం తాజాగా మేల్కొంటారు. మానసిక ఆందోళన, డిప్రెషన్ లక్షణాలు తగ్గుతాయి, మీ మానసిక స్పష్టత పెరుగుతుంది. అంతేకాకుండా, ఆల్కహాల్‌లో కేలరీలు అధికంగా ఉంటాయి, వాటిని నివారించడం వల్ల బరువు తగ్గడంలో సహాయపడుతుంది. సగటున, ఒక వ్యక్తి నెలకు 1-2 కిలోల బరువు తగ్గే అవకాశం ఉంది. మీ శరీరం దృఢంగా మారుతుంది.

మందు మానేయడం కేవలం ఆరోగ్యానికి మాత్రమే కాదు, మీ ఆర్థిక స్థితికి కూడా చాలా లాభదాయకం. ఆల్కహాల్ అనేది ఖరీదైన అలవాటు; రెస్టారెంట్లు, బార్‌లలో తాగేందుకు లేదా ఇంట్లో నిల్వ ఉంచుకోవడానికి చాలా డబ్బు ఖర్చవుతుంది. సాధారణంగా, ఒక నెలలో మందు కోసం చేసే ఖర్చు గణనీయంగా ఉంటుంది. ఉదాహరణకు, సగటు మందుబాబు నెలకు రూ. 5,000 నుంచి రూ. 15,000 వరకు ఖర్చు చేస్తుంటారని అంచనా. ఈ ఖర్చును ఆదా చేయడం ద్వారా మీరు అనుకోని ఖర్చులను తీర్చుకోవచ్చు, పొదుపు చేసుకోవచ్చు లేదా ఇతర అవసరాలకు ఉపయోగించుకోవచ్చు. ఈ డబ్బు మీ జేబులో మిగులుతుంది, మీ ఆర్థిక భద్రతను పెంచుతుంది.

ఒక నెల పాటు ఆల్కహాల్ విరామం తీసుకోవడం అనేది కేవలం తాత్కాలిక మార్పు కాదు. ఇది మీ జీవనశైలిలో దీర్ఘకాలిక సానుకూల ప్రభావాలను చూపగలదు. ఈ 30 రోజులు మీకు ఆల్కహాల్‌తో మీ సంబంధాన్ని పునరాలోచించుకునే అవకాశాన్ని కల్పిస్తుంది. ఈ విరామం తరువాత చాలా మంది తమ ఆల్కహాల్ అలవాట్లను మార్చుకుంటారని, లేదా పూర్తిగా మానేస్తారని వైద్యులు చెబుతున్నారు. మీరు మీ శరీరంపై, మనస్సుపై నియంత్రణను తిరిగి పొందుతారు. ఇది ఆరోగ్యం, ఆర్థిక లాభాలను స్థిరంగా ఉంచుకోవడానికి ఒక బలమైన పునాది వేస్తుంది. మరెందుకు ఆలస్యం మందు తాగే అలవాటు ఉన్నవారు వెంటనే ఈ 30 రోజుల ఛాలెంజ్ ను స్వీకరించి, ఆల్కహాల్ కు దూరంగా ఉండండి.

షుగర్ పేషెంట్స్ కి బంపరాఫర్.. ఇక వారానికి ఒక్కసారే..

Arun Kumar P — Fri, 10 Jul 2026 18:10:00 +0530

ప్రముఖ ఫార్మా సంస్థ నోవో నార్డిస్క్ వారానికి ఒకసారి తీసుకునే బేసల్ ఇన్సులిన్ 'అవిక్లీ' (ఇన్సులిన్ ఐకోడెక్)ని ఇండియాలో విడుదల చేసింది. ఈ నూతన ఆవిష్కరణ మధుమేహ రోగులకు రోజువారీ ఇంజెక్షన్ల బాధను తప్పించి, చికిత్సను సరళతరం చేస్తుంది.

మధుమేహ చికిత్సలో గణనీయమైన ముందడుగు పడింది. ప్రముఖ ఫార్మా సంస్థ నోవో నార్డిస్క్ కేవలం వారానికి ఒకసారి తీసుకునే బేసల్ ఇన్సులిన్ 'అవిక్లీ' (ఇన్సులిన్ ఐకోడెక్)ని భారత్‌లో విడుదల చేసింది.

ప్రస్తుతం మధుమేహ బాధితులు తమ రక్తంలో గ్లూకోజ్ స్థాయిలను నియంత్రించడానికి రోజుకు ఒకటి లేదా రెండుసార్లు ఇన్సులిన్ ఇంజెక్షన్లు తీసుకోవాల్సిన అవసరం ఉంది. ఇది రోగులకు శారీరకంగా, మానసికంగా ఇబ్బందికరంగా మారుతోంది. ఈ క్రమంలోనే సంవత్సరానికి 365 సార్లు సూదులు గుచ్చుకునే బాధ నుండి ఈ అవిక్లీ ఇన్సులిన్ విముక్తి కల్పిస్తుంది.

ఏడు రోజుల పాటు పనిచేసే ఈ సరికొత్త వీక్లీ ఇన్సులిన్ ఇంజెక్షన్ శరీరంలో ప్రత్యేకంగా పనిచేస్తుంది. ఇంజెక్షన్ తీసుకున్న తర్వాత అది రక్తంలో ఉండే ఆల్బుమిన్ అనే ప్రొటీన్‌తో బంధాన్ని ఏర్పరచుకుంటుంది. ఈ బంధం కారణంగా ఇన్సులిన్ శరీరంలో చాలా నెమ్మదిగా, క్రమ పద్ధతిలో ఏడు రోజుల పాటు నిరంతరాయంగా విడుదల అవుతుంది. ఫలితంగా వారం పొడుగునా బ్లడ్ షుగర్ స్థాయిలు అకస్మాత్తుగా పెరగకుండా స్థిరంగా నియంత్రించబడతాయి.

అంతర్జాతీయ క్లినికల్ ట్రయల్స్‌ ప్రకారం... ఈ వీక్లీ ఇన్సులిన్ ముఖ్యంగా టైప్-1, టైప్-2 డయాబెటిస్ ఉన్న పెద్దవారికి అత్యంత ప్రభావవంతంగా పనిచేస్తుంది. ఇది రోజువారీ ఇన్సులిన్‌తో పోలిస్తే HbA1c స్థాయిలను మెరుగ్గా తగ్గిస్తుంది. అలాగే రక్తంలో చక్కెర స్థాయిలు ఎక్కువసేపు లక్ష్య పరిధిలో ఉండేలా చేస్తుంది

క్లినికల్ పరీక్షల్లో రక్తంలో చక్కెర నియంత్రణలో ఇది రోజువారీ ఇన్సులిన్‌తో పోలిస్తే మెరుగైన ఫలితాలను ఇచ్చినట్లు తెలుస్తోంది. భద్రతలోనూ ఇదే స్థాయి ఫలితాలు నమోదయ్యాయి. ఇది హైపోగ్లైసీమియా ప్రమాదాన్ని తగ్గిస్తుంది.

ఆఫీసు పనుల వల్ల లేదా ప్రయాణాల వల్ల రోజువారీ ఇన్సులిన్ తీసుకోవడం మర్చిపోయే వారికి, వృద్ధులకు ఈ వీక్లీ ఇన్సులిన్ ఒక వరంగా మారబోతుందని నిపుణులు అభిప్రాయపడుతున్నారు. దీనివల్ల చికిత్సను మధ్యలో ఆపేసే సమస్యలు తగ్గుతాయి, తద్వారా మధుమేహ నియంత్రణ మరింత సులభతరం అవుతుంది.

ఈ వీక్లీ ఇన్సులిన్ సాంకేతికంగా ఎంతో అధునాతనమైనది అయినప్పటికీ, దీనిని రోగులు సొంతంగా మెడికల్ షాపుల నుండి కొనుగోలు చేసి వాడకూడదు. రోగి ప్రస్తుత ఆరోగ్య స్థితిని బట్టి డోసేజీని వైద్యులే నిర్ణయించాల్సి ఉంటుంది. ఈ కొత్త ఇన్సులిన్ లభ్యత భారతదేశంలో మధుమేహ నియంత్రణలో ఒక కీలకమైన మైలురాయిగా నిలవనుంది.

Husband Health: మీ భర్త హెల్తీగా ఉండాలంటే.. భార్యలు తప్పక తెలుసుకోవాల్సిన 5 ఆరోగ్య సూత్రాలు

Mahesh Jujjuri — Sun, 02 Aug 2026 13:15:53 +0530

Husband Health: కుటుంబ భారాన్ని మోస్తూ, నిరంతరం శ్రమించే భర్త ఆరోగ్యంపై ప్రత్యేక శ్రద్ధ వహించడం ప్రతి భార్య బాధ్యత. అందుకోసం ఫ్యామిలీ డాక్టర్లు సూచించే మంచి సమాచారంతో.. మీ భర్త ఫిట్‌గా, ఆరోగ్యంగా ఉండటానికి అలవాటు చేసుకోవాల్సిన 5 ముఖ్యమైన నియమాలు

మీ భర్త ఆరోగ్యంగా ఉండాలంటే ప్రతీ భార్య పాటించవలసిన మొదటి సూత్రం ప్రోటీన్ ఫుడ్ అందించడం. ప్రతిరోజు వారి ఆహారంలో గుడ్లు, పప్పులు, పనీర్, చేపలు లేదా చికెన్ వంటి ప్రొటీన్ సమృద్ధిగా ఉండే పదార్థాలు ఉండేలా చూడాలి. ప్రొటీన్లు కండరాలను బలంగా ఉంచి, శరీరానికి అవసరమైన నిరంతర శక్తిని అందిస్తాయి.

భర్త ఆఫీస్ నుంచి వచ్చాక సోఫాకే పరిమితం కాకుండా, 'పదండి కాసేపు వాకింగ్‌కు వెళ్దాం' అంటూ ప్రోత్సహించాలి. కొన్నిసార్లు ప్రేమతో ఇచ్చే చిన్న ప్రోత్సాహమే శారీరక ఆరోగ్యానికి పెద్ద మందులా పనిచేస్తుంది. భర్త ఫిట్ గా ఉంటే ఫ్యామిలీని చూసుకునేు శక్తి వారికి వస్తుంది. ప్రేమగా చెప్పి భర్తను తోడుగా వాకింగ్ కు తీసుకెళ్లాలి.

రాత్రివేళల్లో మొబైల్ ఎక్కువగా చూడకుండా నివారించి, రోజుకు 7 నుండి 9 గంటల ప్రశాంతమైన నిద్ర ఉండేలా జాగ్రత్త పడాలి. ఇలా చేయడం ద్వారా గుండె ఆరోగ్యం, మెదడు పనితీరు, రోగనిరోధక శక్తి పెరుగుతుంది. ప్రతీ మనిషి యాక్టీవ్ గా ఉండాలన్నా.. ప్రతీ మనిషికి సరైన నిద్ర చాలా అవసరం.

ఎలాంటి అనారోగ్య లక్షణాలు కనిపించకపోయినా బీపీ, షుగర్, కొలెస్ట్రాల్ వంటి సమస్యలు నిశ్శబ్దంగా పెరుగుతుంటాయి. మీ భర్త పని ఒత్తిడిలో మర్చిపోయినా సరే క్రమం తప్పకుండా చెకప్‌లు చేయించడం ద్వారా పెద్ద సమస్యలను ముందుగానే నివారించవచ్చు.

మగవారికి ఎన్నో సమస్యలు ఉన్నా.. ఇంటికి రాగానే భార్య ప్రేమగా పలకరిస్తే ఇట్టే మర్చిపోతారు. వారి ప్రతి సమస్యకు వెంటనే పరిష్కారం చెప్పాల్సిన అవసరం లేదు. వారు చెప్పేది ఓపికగా, ప్రశాంతంగా వింటే చాలు. ఒత్తిడి తగ్గినప్పుడు శరీరం కూడా దానంతటదే ఆరోగ్యంగా ఉంటుంది.చిన్న చిన్న అలవాట్లే జీవితంలో పెద్ద మార్పులు తెస్తాయి. ఈ సూత్రాలను పాటించి మీ భాగస్వామి ఆరోగ్యాన్ని కాపాడుకోండి!

Barley Water: ఉదయాన్నే బార్లీ తాగితే శరీరంలో ఏం జరుగుతుందో తెలుసా?

Nandini Arava — Thu, 04 Jun 2026 17:34:23 +0530

Barley Water: బార్లీ..శరీరానికి శక్తినిచ్చే గొప్ప దివ్యౌషధం. అనారోగ్యంగా ఉన్నవారు తాగితే నీరసంగా అనిపించదు. బరువు తగ్గాలనుకునేవారికి ఇది చాలా ఫలితం చూపిస్తుంది. ఇన్ స్టంట్ ఎనర్జీ ఇస్తుంది కూడా.

Sleep: మీకు కూడా నిద్రలో ఛాతిపై దెయ్యం కూర్చున్నట్లు అనిపించిందా.? అస‌లు నిజం ఏంటో తెలుసా?

Narender Vaitla — Tue, 02 Jun 2026 15:08:44 +0530

Sleep: చాలా మందికి ఒక్కసారైనా ఈ విచిత్రమైన అనుభవాన్ని ఎదుర్కొంటారు. నిద్రలో చేతులు, కాళ్లు కదలవు, మాట బ‌య‌ట‌కు రాదు కొందరికి ఛాతిపై ఏదో బరువైన వస్తువు ఉన్నట్లు అనిపిస్తుంది. దీంతో ఇది దెయ్యం ప‌ని అనుకుంటారు. కానీ దీనికి కార‌ణం స్లీప్ ప్యారాలిసిస్.

ఈ పరిస్థితిని వైద్య భాషలో స్లీప్ ప్యారాలిసిస్ (Sleep Paralysis) అంటారు. ఇది నిద్ర నుంచి మేల్కొనే సమయంలో లేదా నిద్రలోకి వెళ్లే సమయంలో సంభవించే తాత్కాలిక పరిస్థితి. ఈ సమయంలో మెదడు మెలకువలోకి వచ్చినా శరీరం మాత్రం ఇంకా నిద్ర స్థితిలోనే ఉంటుంది. అందువల్ల కొన్ని సెకన్ల నుంచి కొన్ని నిమిషాల వరకు వ్యక్తి కదలలేడు, మాట్లాడలేడు. సాధారణంగా ఇది ప్రమాదకరమైన వ్యాధి కాదు. అయితే అనుభవిస్తున్న వ్యక్తికి మాత్రం చాలా భయాన్ని కలిగిస్తుంది.

స్లీప్ ప్యారాలిసిస్ సమయంలో చాలామందికి ఛాతిపై బరువు ఉన్నట్లు అనిపిస్తుంది. దీనికి ప్రధాన కారణం శ్వాసలో వచ్చే స్వల్ప మార్పులు. నిద్రలో శరీరం విశ్రాంతి స్థితిలో ఉండటంతో శ్వాస నెమ్మదిగా సాగుతుంది. అయితే మెలకువ వచ్చిన తర్వాత కూడా శరీరం పూర్తిగా స్పందించకపోవడం వల్ల శ్వాస సరిగా తీసుకోలేకపోతున్నామనే భావన కలుగుతుంది. దీంతో మెదడు భయాందోళనకు గురై, గదిలో ఎవరో ఉన్నట్లు లేదా ఛాతిపై ఏదో ఒత్తిడి చేస్తున్నట్లు ఊహాత్మక అనుభూతులను సృష్టిస్తుంది. దీనిని "హాల్యూసినేషన్" అని పిలుస్తారు. ఇది నిజంగా జరుగుతున్నది కాదు. మెదడు సృష్టించే తాత్కాలిక భావన మాత్రమే.

స్లీప్ ప్యారాలిసిస్ రావడానికి అనేక కారణాలు ఉన్నాయి. సరైన నిద్ర లేకపోవడం, రాత్రిళ్లు ఎక్కువసేపు మేల్కొని ఉండటం, అధిక ఒత్తిడి, ఆందోళన, పని భారం ఎక్కువగా ఉండటం, నిద్ర సమయాల్లో తరచూ మార్పులు రావడం,

వెన్నుపైన పడుకుని నిద్రించడం, కొన్ని నిద్ర రుగ్మతలు వంటివి ప్ర‌ధాన కార‌ణాలుగా చెప్పొచ్చు. ప్రత్యేకంగా నార్కోలెప్సీ (Narcolepsy) అనే నిద్ర సంబంధిత రుగ్మత ఉన్నవారిలో ఈ సమస్య ఎక్కువగా కనిపిస్తుంది. అయితే స్లీప్ ప్యారాలిసిస్ వచ్చిన ప్రతి ఒక్కరికీ నార్కోలెప్సీ ఉందని అర్థం కాదు. చాలామందికి కేవలం నిద్రలేమి లేదా ఒత్తిడి వల్ల కూడా ఈ పరిస్థితి ఎదురవుతుంది.

ఈ పరిస్థితి ఎదురైనప్పుడు భయపడకుండా ఉండటం చాలా ముఖ్యం. ఎందుకంటే భయం పెరిగితే అనుభవం మరింత తీవ్రంగా అనిపిస్తుంది. ఆ సమయంలో ఇది తాత్కాలిక పరిస్థితి అని గుర్తుంచుకోండి. శ్వాసపై దృష్టి పెట్టండి. చేతి వేళ్లు లేదా కాలి వేళ్లను కదిలించే ప్రయత్నం చేయండి. భ‌య‌ప‌డ‌కుండా ప్రశాంతంగా ఉండండి. కొన్ని సెకన్లు లేదా నిమిషాల్లోనే పరిస్థితి సాధారణంగా మారిపోతుంది. చాలా సందర్భాల్లో ఎలాంటి వైద్య చికిత్స అవసరం ఉండదు.

స్లీప్ ప్యారాలిసిస్‌ను పూర్తిగా నివారించడం ఎల్లప్పుడూ సాధ్యం కాకపోయినా, కొన్ని అలవాట్లు ప్రమాదాన్ని తగ్గిస్తాయి. తగినంత నిద్ర ఉండేలా చూసుకోండి. రోజుకు కనీసం 7 నుంచి 9 గంటల నాణ్యమైన నిద్ర అవసరం. నిద్ర సమయాన్ని ప్రతిరోజూ ఒకేలా ఉంచడం మంచిది. ఒత్తిడిని త‌గ్గించుకోండి, ధ్యానం, యోగా, శ్వాస వ్యాయామాలు మానసిక ప్రశాంతతను పెంచుతాయి. మొబైల్ వినియోగాన్ని తగ్గించండి. నిద్రకు గంట ముందు మొబైల్, ల్యాప్‌టాప్ వంటి స్క్రీన్‌లను దూరంగా ఉంచడం మంచిది.

గది ప్రశాంతంగా, చల్లగా ఉండేలా చూసుకోవాలి. లావెండర్ వంటి సువాసనల ఎసెన్షియల్ ఆయిల్స్ కొందరిలో నిద్ర నాణ్యతను మెరుగుపరచడంలో సహాయపడవచ్చు. శారీరక విశ్రాంతి అవసరం, రోజంతా శరీరానికి, మెదడుకు తగిన విశ్రాంతి లభించేలా చూసుకోవాలి.

నిద్రలో కదలలేకపోవడం, మాట్లాడలేకపోవడం, ఛాతిపై ఎవరో కూర్చున్నట్లు అనిపించడం వంటి అనుభవాలు చాలా భయానకంగా ఉంటాయి. కానీ ఇవి దెయ్యాలు, ఆత్మలు లేదా ఇతర అతీంద్రియ శక్తులతో సంబంధం ఉన్నవి కావు. చాలా సందర్భాల్లో ఇవి స్లీప్ ప్యారాలిసిస్ అనే సాధారణ నిద్ర సంబంధిత పరిస్థితి వల్లే సంభవిస్తాయి. తరచూ ఈ సమస్య ఎదురవుతుంటే లేదా నిద్ర నాణ్యత తీవ్రంగా దెబ్బతింటే మాత్రం నిద్ర నిపుణుడు లేదా వైద్యుడిని సంప్రదించడం మంచిది.

అంగస్తంభన సమస్య గుండె జబ్బుకు సంకేతమా? పురుషులు నిర్ల‌క్ష్యం చేయ‌కూడ‌ని హెచ్చ‌రిక‌లివే

Narender Vaitla — Wed, 03 Jun 2026 20:39:06 +0530

Men Health: వయసు పెరిగే కొద్దీ శరీరంలో మార్పులు రావడం సహజం. అలసట, సరిగా నిద్ర పట్టకపోవడం, గురక పెట్టడం లేదా లైంగిక ఆరోగ్యానికి సంబంధించిన సమస్యలను చాలా మంది పురుషులు సాధారణ విషయాలుగా భావిస్తారు. కానీ దీనిని లైట్ తీసుకోకూడ‌ద‌ని నిపుణులు చెబుతున్నారు.

అంగస్తంభన లోపం (Erectile Dysfunction) అనేది కేవలం లైంగిక సమస్య మాత్రమే కాదని వైద్యులు చెబుతున్నారు. పురుషాంగానికి రక్తాన్ని సరఫరా చేసే ధమనులు శరీరంలోని అత్యంత సన్నని రక్తనాళాల్లో ఒకటిగా ఉంటాయి. ఈ రక్తనాళాల్లో అడ్డంకులు ఏర్పడినా లేదా రక్తప్రసరణ తగ్గినా, దాని ప్రభావం మొదటగా అంగస్తంభనపై కనిపించే అవకాశం ఉంటుంది. అందుకే కొన్నిసార్లు ఛాతినొప్పి, గుండెపోటు వంటి లక్షణాలు కనిపించడానికి చాలా సంవత్సరాల ముందే అంగస్తంభన సమస్య మొదలవుతుంది. ఒకవేళ అకస్మాత్తుగా ఈ సమస్య ప్రారంభమైతే, కేవలం మందులు వాడటంతో సరిపెట్టకుండా గుండె ఆరోగ్య పరీక్షలు కూడా చేయించుకోవడం మంచిదని నిపుణులు సూచిస్తున్నారు.

చాలా మంది పురుషులు టెస్టోస్టెరాన్ హార్మోన్ తగ్గిపోవడాన్ని వయసు ప్రభావంగా భావిస్తారు. కానీ దీని వెనుక ఇతర కారణాలు కూడా ఉండొచ్చు. పొట్ట చుట్టూ అధిక కొవ్వు పేరుకుపోవడం, సరైన నిద్ర లేకపోవడం, శారీరక శ్రమ తగ్గిపోవడం, వ్యాయామం చేయకపోవడం. ఇలాంటి కారణాల వల్ల టెస్టోస్టెరాన్ స్థాయిలు తగ్గే అవకాశం ఉంటుంది. జీవనశైలిలో మార్పులు చేసి, క్రమం తప్పకుండా వ్యాయామం చేస్తే హార్మోన్ల ఆరోగ్యం మెరుగుపడే అవకాశం ఉందని వైద్యులు చెబుతున్నారు.

మహిళలతో పోలిస్తే పురుషుల్లో గుండె సంబంధిత వ్యాధులు సుమారు పదేళ్లు ముందుగానే వచ్చే అవకాశం ఉందని నిపుణులు చెబుతున్నారు. మహిళల్లో మెనోపాజ్ వచ్చే వరకు ఈస్ట్రోజెన్ హార్మోన్ గుండెకు కొంత రక్షణ కల్పిస్తుంది. అయితే పురుషులకు అలాంటి సహజ రక్షణ ఉండదు. అందువల్ల గుండె ఆరోగ్యంపై శ్రద్ధ 60 ఏళ్ల తర్వాత కాదు, 30 నుంచి 40 ఏళ్ల వయసులోనే ప్రారంభించాలి. క్రమం తప్పకుండా ఆరోగ్య పరీక్షలు చేయించుకోవడం, రక్తపోటు, కొలెస్ట్రాల్ స్థాయిలను పర్యవేక్షించడం చాలా ముఖ్యం.

రాత్రి సమయంలో ఎక్కువగా గురక పెట్టడం, తరచూ నిద్ర మధ్యలో మేల్కొనడం లేదా తగినంత నిద్రపోయినా అలసటగా అనిపించడం వంటి లక్షణాలు స్లీప్ అప్నియా (Sleep Apnea) సమస్యకు సంకేతాలు కావచ్చు. స్లీప్ అప్నియా వల్ల అధిక రక్తపోటు వచ్చే ప్రమాదం పెరుగుతుంది, గుండె స్పందనలో అసమతుల్యత ఏర్పడవచ్చు, గుండెపై అదనపు ఒత్తిడి పడుతుంది, భవిష్యత్తులో గుండె జబ్బుల ప్రమాదం పెరుగుతుంది. ఆందోళనకర విషయం ఏమిటంటే, చాలా మంది పురుషులకు ఈ సమస్య ఉన్నా దాని గురించి తెలియదు.

గుండె ఆరోగ్యాన్ని కాపాడుకోవాలంటే శరీరం ఇచ్చే చిన్నచిన్న హెచ్చరికలను కూడా నిర్లక్ష్యం చేయకూడదు. ముఖ్యంగా అంగస్తంభన సమస్య, తక్కువ టెస్టోస్టెరాన్, అధిక గురక, నిద్ర సమస్యలు వంటి లక్షణాలు కనిపిస్తే వైద్యులను సంప్రదించడం మంచిది. అలాగే ప్రతిరోజూ కనీసం 30 నిమిషాలు వ్యాయామం చేయాలి, ఆరోగ్యకరమైన ఆహారం తీసుకోవాలి, ధూమపానం, ఆల్కహాల్ అలవాట్లకు దూరంగా ఉండాలి, సరైన నిద్రపోవాలి, గుండె ఆరోగ్య పరీక్షలను క్రమం తప్పకుండా చేయించుకోవాలి. ఈ చిన్న జాగ్రత్తలు భవిష్యత్తులో గుండెపోటు, గుండె జబ్బుల ప్రమాదాన్ని గణనీయంగా తగ్గించడంలో సహాయపడతాయి. శరీరం ఇచ్చే సంకేతాలను సమయానికి గుర్తిస్తే అనేక ప్రాణాంతక సమస్యలను ముందుగానే నివారించవచ్చు.