Asianet News Telugu

Milk Cake: కేవలం ఈ రెండు పదార్థాలు ఉంటే చాలు..నోట్లో కరిగిపోయే మిల్క్ కేక్ రెడీ

Nandini Arava — Tue, 27 Oct 2026 18:50:00 +0530

Milk Cake: ఇంట్లో ఉండే కేవలం రెండు పదార్థాలతోనే అదిరిపోయే స్వీట్ చేయొచ్చంటే ఎవరికి ఇష్టం ఉండదు చెప్పండి. స్టవ్ మీద ఈజీగా టేస్టీ మిల్క్ కేక్ తయారు చేయొచ్చు. సాఫ్ట్‌గా, రుచిగా ఉండే ఈ స్వీట్ ఎలా చేయాలో ఇప్పుడు చూద్దాం.

ఇంట్లో ఉండే కేవలం రెండు పదార్థాలతోనే అదిరిపోయే స్వీట్ చేయొచ్చంటే ఎవరికి ఇష్టం ఉండదు చెప్పండి. పాలు, చక్కెర.. ఈ రెండింటితో పెద్దగా ఖర్చు లేకుండా ఇంట్లోనే సాఫ్ట్ మిల్క్ కేక్ తయారు చేయొచ్చు. పండుగ రోజుల్లో, ఇంటికి చుట్టాలు వచ్చినప్పుడు లేదా పిల్లలకు ఏదైనా స్వీట్ చేసి పెట్టాలనుకున్నప్పుడు ఈ సింపుల్ రెసిపీ బెస్ట్ ఆప్షన్.

సాధారణంగా మిల్క్ కేక్ చేసేటప్పుడు నెయ్యి, యాలకుల పొడి, మిల్క్ పౌడర్ లాంటివి వాడుతుంటారు. కానీ అవేవీ లేకుండానే పాలను బాగా మరిగించి, నాటు చక్కెర కలిపి టేస్టీ మిల్క్ స్వీట్ చేయొచ్చు. దీనికి కావాల్సిందల్లా కాస్త ఓపిక, సరైన పద్ధతి మాత్రమే.

పాలు – 1 లీటర్

ఫుల్ క్రీమ్ పాలు వాడితే స్వీట్ టేస్ట్, టెక్స్చర్ చాలా బాగుంటుంది.

నాటు చక్కెర – 100 నుంచి 150 గ్రాముల వరకు. మీకు ఎంత తీపి కావాలో దాన్ని బట్టి ఈ కొలతను మార్చుకోవచ్చు. ఈ రెండు పదార్థాలు తప్ప నెయ్యి, మిల్క్ పౌడర్, మైదా లాంటివేవీ ఈ రెసిపీకి అవసరం లేదు. అయితే పాలను మరిగించే విధానం, చివరగా వచ్చే పాకం మీదే ఈ స్వీట్ రుచి ఆధారపడి ఉంటుంది.

1. పాలను బాగా మరిగించాలి

అడుగు మందంగా ఉండే గిన్నెలో ఒక లీటర్ పాలు పోసి మీడియం మంట మీద మరిగించండి. పాలు పొంగిపోకుండా చూసుకోండి.

2. పాలు చిక్కబడేలా కాచాలి

పాలు అడుగంటకుండా గరిటెతో కలుపుతూనే ఉండాలి. గిన్నె అంచులకు అంటుకునే మీగడను కూడా తీసి పాలలో కలపాలి. పాలు బాగా తగ్గి, చిక్కబడే వరకు ఇలా చేస్తూనే ఉండాలి.

3. నాటు చక్కెర కలపాలి

పాలు బాగా చిక్కబడ్డాక మంట తగ్గించి నాటు చక్కెర వేయాలి. అది పూర్తిగా కరిగేలా కలపాలి. చక్కెర వేయగానే పాలు కాస్త పల్చబడతాయి; కానీ ఉడికించే కొద్దీ మళ్లీ చిక్కబడతాయి.

4. సరైన పాకం వచ్చే వరకు కలపాలి

ఈ మిశ్రమం గిన్నె అంచుల నుంచి విడిపోతూ, తడి తగ్గి ముద్దలా అయ్యే వరకు చిన్న మంట మీద కలుపుతూనే ఉండాలి. అడుగంటకుండా, మాడిపోకుండా చూసుకోవాలి. మరీ ఎక్కువసేపు ఉడికిస్తే స్వీట్ గట్టిగా అయిపోతుంది.

5. చల్లార్చి ముక్కలుగా కోయాలి

ఈ మిశ్రమాన్ని ఒక ప్లేట్‌లోకి తీసుకుని సమానంగా పరచాలి. పూర్తిగా చల్లారాక ముక్కలుగా కోసి సర్వ్ చేయాలి. ఒకవేళ మిశ్రమం మరీ మెత్తగా ఉంటే ఇంకొద్దిసేపు చల్లారనివ్వాలి.

పాల పరిమాణం, గిన్నె వెడల్పు, మంటను బట్టి ఇది ఉడకడానికి పట్టే సమయం మారుతుంది. పాలను మరిగించి చేసే ఇలాంటి స్వీట్లకు సుమారు గంట లేదా అంతకంటే ఎక్కువే సమయం పట్టొచ్చు. కాబట్టి, టైమ్ కంటే కూడా పాకం చూసుకుని స్టవ్ ఆఫ్ చేయడం ముఖ్యం.

• ఫుల్ క్రీమ్ పాలు: ఇవి స్వీట్‌కు మంచి రుచిని, సాఫ్ట్‌నెస్‌ను ఇస్తాయి.

• వెడల్పాటి గిన్నె: పాలు త్వరగా చిక్కబడటానికి, నీరు త్వరగా ఆవిరైపోవడానికి ఇది సాయపడుతుంది.

• కలుపుతూనే ఉండాలి: ఇలా చేస్తే అడుగంటదు, మాడిన వాసన రాదు.

• చక్కెర కొలత: ముందు కొద్దిగా వేసుకుని, తీపి సరిపోకపోతే తర్వాత పెంచుకోవచ్చు.

• సరైన పాకం: మిశ్రమం చిక్కబడి ముద్దలా అవ్వాలి; అలాగని పూర్తిగా డ్రై అయిపోయి రాయిలా మారకూడదు.

ఇది నిజంగానే మిల్క్ కేకా?

ఇక్కడో చిన్న విషయం తెలుసుకోవాలి. పాలు, నాటు చక్కెర మాత్రమే వేసి మరిగిస్తే వచ్చేది పాలకోవా లేదా తెరట్టుపాల్ లాంటి స్వీట్. బయట స్వీట్ షాపుల్లో దొరికే నార్త్ ఇండియన్ మిల్క్ కేక్ తయారీ విధానం వేరుగా ఉంటుంది. దానికి ఆ రంగు, టెక్స్చర్ రావడానికి వేరే పద్ధతి వాడతారు.

కాబట్టి, ఈ రెండు పదార్థాలతో చేసే రెసిపీ అచ్చం కేక్ లాగా గట్టిగా వస్తుందని చెప్పలేం. కానీ, నాటు చక్కెర సువాసన, చిక్కటి పాల రుచితో ఇంట్లోనే అదిరిపోయే స్వీట్ అయితే రెడీ అవుతుంది.

ఒక లీటర్ పాలు, కొద్దిగా నాటు చక్కెర ఉంటే చాలు.. కాస్త ఓపికగా వండితే ఇంట్లోనే టేస్టీ మిల్క్ స్వీట్ రెడీ చేసుకోవచ్చు. బోలెడు వస్తువులు కొనాల్సిన పనే లేదు; సరైన పాకం వచ్చే వరకు జాగ్రత్తగా కలుపుకోవడమే ఈ రెసిపీ సీక్రెట్!

Kitchen Hack: ఎండు ద్రాక్ష జిగురుగా మారుతోందా? డబ్బా మూతకు ఇది అతికించి చూడండి

Nandini Arava — Wed, 16 Sep 2026 17:30:24 +0530

Store Raisins Fresh: వానాకాలం వచ్చిందంటే చాలు, గాలిలోని తేమకు డ్రై ఫ్రూట్స్ త్వరగా పాడవుతాయి. ఎండు ద్రాక్ష (కిస్మిస్) జిగురుగా, పుల్లగా మారకుండా ఎప్పటిలాగే ఫ్రెష్‌గా, తియ్యగా ఉండాలంటే ఒక సింపుల్ కిచెన్ చిట్కా ఉంది. అదేంటో ఇక్కడ చూద్దాం.

వానాకాలంలో వాతావరణంలో తేమ ఎక్కువగా ఉంటుంది. దీనివల్ల డబ్బాలో నిల్వ చేసిన ఎండు ద్రాక్ష త్వరగా జిగురుగా మారి, పుల్లటి వాసన వస్తుంది. ఇకపై ఆ టెన్షన్ వద్దు, దీన్ని ఆపేందుకు ఒక సింపుల్ ట్రిక్ ఉంది.

మనం కొత్త వాటర్ బాటిల్, బ్యాగ్ లేదా ఎలక్ట్రానిక్ వస్తువులు కొన్నప్పుడు వాటిలో చిన్న 'సిలికా జెల్' (Silica Gel) ప్యాకెట్లు వస్తాయి. వాటిని చెత్తలో పడేయకుండా జాగ్రత్తగా పక్కన పెట్టుకోండి.

సిలికా జెల్ డబ్బాలోని తేమను పూర్తిగా పీల్చుకుంటుంది. దీనివల్ల ఎండు ద్రాక్ష జిగురుగా మారదు, పుల్లటి వాసన రాదు. నెలల తరబడి కొత్తవాటిలాగే ఫ్రెష్‌గా ఉంటాయి.

సిలికా జెల్ ప్యాకెట్‌ను ఎట్టి పరిస్థితుల్లోనూ చింపకండి. అలాగే అది నేరుగా ఎండు ద్రాక్షపై పడకుండా, మూతకు గట్టిగా అతుక్కుని ఉందో లేదో ఒకసారి చెక్ చేసుకోండి.

ఎండు ద్రాక్షను నిల్వ చేసే గాలి చొరబడని (Air-tight) గాజు లేదా ప్లాస్టిక్ డబ్బాను తీసుకోండి. ఆ డబ్బా మూత లోపలి వైపు డబుల్ సైడ్ టేప్ వేసి, దానిపై ఈ సిలికా జెల్ ప్యాకెట్‌ను గట్టిగా అతికించండి.

Crab Omelette: పీతలతో క్రేజీ ఆమ్లెట్.. ఇలా ఎప్పుడైనా ట్రై చేశారా? అస్సలు వదలరు

Nandini Arava — Mon, 26 Oct 2026 16:04:16 +0530

Crab Omelette: పీతలతో ఆమ్లెట్ ఎప్పుడైనా ట్రై చేశారా? అసలు ఎలా చేయాలో ఎప్పుడైనా ఆలోచించారా? పీతలను శుభ్రం చేయడం దగ్గరి నుంచి నోరూరించే ఆమ్లెట్ వేయడం వరకు కావాల్సిన పదార్థాలు, తయారీ విధానం ఇక్కడ తెలుసుకోండి.

మనం సాధారణంగా కోడిగుడ్డు ఆమ్లెట్, ఉల్లిపాయ ఆమ్లెట్ తిని ఉంటాం. కానీ పీత మాంసం తీసి, మసాలాలు దట్టించి గుడ్డుతో కలిపి ఆమ్లెట్ వేస్తే ఎలా ఉంటుందో తెలుసా? సీఫుడ్ లవర్స్‌ దీన్ని బాగా ఎంజాయ్ చేస్తారు. పీతల రుచి, మిరియాల ఘాటు,తో నోరూరించే ఈ క్రాబ్ ఆమ్లెట్ ఎలా చేయాలో చూద్దాం.

క్రాబ్ ఆమ్లెట్ తయారీకి కావాల్సిన పదార్థాలు:

పీతలు - 2 నుంచి 3
గుడ్లు - 2
చిన్న ఉల్లిపాయలు - 10
పచ్చిమిర్చి - 2
టమాటా - 1 (చిన్నది)
కొత్తిమీర - కొద్దిగా
కరివేపాకు - కొద్దిగా
పసుపు - 1/4 టీస్పూన్
మిరియాల పొడి - 1/2 టీస్పూన్
జీలకర్ర పొడి - 1/4 టీస్పూన్
ఉప్పు - తగినంత
నూనె - తగినంత

ముందుగా పీతలను బాగా శుభ్రం చేయాలి. ఆ తర్వాత ఆవిరి మీద సుమారు 5 నిమిషాల పాటు ఉడికించాలి. పీతలు పూర్తిగా ఉడికాయో లేదో చెక్ చేసుకోవాలి. ఉడికిన పీతలు చల్లారాక, పెంకు నుంచి మాంసాన్ని మాత్రమే జాగ్రత్తగా విడదీసి పక్కన పెట్టుకోవాలి. పెంకు ముక్కలు మాంసంలో కలవకుండా చూసుకోవాలి.

ఒక గిన్నెలో పీత మాంసం, సన్నగా తరిగిన చిన్న ఉల్లిపాయలు, పచ్చిమిర్చి, టమాటా, కొత్తిమీర, కరివేపాకు వేసుకోవాలి. అందులోనే ఉప్పు, పసుపు, మిరియాల పొడి, జీలకర్ర పొడి, గుడ్లు వేసి బాగా కలుపుకోవాలి.

శుభ్రంగా, పగలకుండా ఉన్న పీత పెంకుల్లో మనం తయారు చేసుకున్న మిశ్రమాన్ని నింపుకోవాలి. ఇప్పుడు స్టవ్ మీద పాన్ పెట్టి కొద్దిగా నూనె వేడి చేయాలి. నూనె వేడెక్కాక మిశ్రమం నింపిన పెంకులను అందులో పెట్టాలి. మంటను మీడియంలో ఉంచి ఒకవైపు ఉడికాక, రెండో వైపు తిప్పి బాగా కాల్చుకోవాలి.

ఒకవేళ పెంకులను వాడటం ఇష్టం లేకపోతే, మామూలుగానే దోశ పెనం మీద నేరుగా ఆమ్లెట్ వేసుకోవచ్చు. అంతే, ఘాటైన, కమ్మటి వాసన వచ్చే క్రాబ్ ఆమ్లెట్ రెడీ. వేడివేడి అన్నం, రసం అన్నంతో పాటు లేదా సాయంత్రం స్నాక్ లాగా కూడా దీన్ని లాగించేయొచ్చు. మిరియాల ఘాటు, పీతల రుచి కలిసి ఈ ఆమ్లెట్‌కు అదిరిపోయే టేస్ట్ ఇస్తాయి.

పీతలను బాగా శుభ్రం చేయాలి. పెంకు మీద ఉన్న మురికిని, అవసరం లేని భాగాలను తీసేయాలి. తర్వాత పూర్తిగా ఉడికించాలి. కారం ఎక్కువగా కావాలంటే మిరియాల పొడి లేదా పచ్చిమిర్చిని కాస్త పెంచుకోవచ్చు. పెంకుల్లో కాల్చడం కష్టంగా అనిపిస్తే, దోశ పెనం మీద ఆమ్లెట్ వేసుకోవడం చాలా సులువైన పద్ధతి.

Egg Myths : కోడిగుడ్ల గురించి మీరు నమ్ముతున్న 5 అబద్ధాలు ఇవే..

Arun Kumar P — Fri, 16 Oct 2026 15:52:16 +0530

గుడ్లు ఆరోగ్యానికి చాలా మంచివి. వీటిలో ప్రోటీన్ పుష్కలంగా ఉంటుంది. కానీ గుడ్ల గురించి మనలో చాలా అపోహలు ఉన్నాయి. మీరు రోజూ గుడ్లు తినే వారైతే ఈ నిజాలు కచ్చితంగా తెలుసుకోవాలి.

Swiggy : స్విగ్గీ ఆర్డర్స్ లో మన హైదరబాదీ వంటకమే టాప్.. ఏదో తెలుసా?

Arun Kumar P — Sat, 03 Oct 2026 15:28:25 +0530

2025లో భారతీయులు స్విగ్గీ యాప్‌లో అత్యధికంగా ఏ వంటకాలు ఆర్డర్ చేశారో తెలుసా? టాప్ లో హైదరబాదీ స్ఫెషల్ వంటకమే నిలిచింది. స్విగ్గీ విడుదల చేసిన 'హౌ ఇండియా స్విగ్గీడ్' రిపోర్ట్ ఇలా ఉంది.

Fish Curry: చేపలపులుసులో ఇదొక్కటి వేయండి రుచి అదిరిపోతుంది

Nandini Arava — Sat, 03 Oct 2026 16:36:34 +0530

Fish Curry: చేపల పులుసు అంటేనే నోరూరిపోద్ది. కారం, పులుపు, మసాలాల ఘుమఘుమలతో వేడి అన్నంలో కలుపుకుని తింటే అదిరిపోద్ది. అయితే ఎప్పుడూ చేసుకునేలా కాకుండా ఈ తమిళనాడు స్టైల్ లో ఒకసారి చేసుకుని తినండి. ఇలా చేస్తే ప్లేట్ కడగాల్సిన పనే ఉండదు. అంత బాగుంటుంది.

చేపల పులుసు ఒక్కో దగ్గర ఒక్కోలా చేస్తారు. నెల్లూరు చేపల పులుసు, తమిళనాడు చేపలపులుసు, ఆంధ్రా స్టైల్ పులుసు...ఇలా రెసిపీ ఎదైనా సరే దాని రుచి మాత్రం అద్భుతం. ప్రాంతానికో పద్ధతి ఉంటుంది. అందుకే ఎప్పుడూ మనం చేసుకునే చేపల పులుసులా కాకుండా ఈ సండే రోజు ఈ తమిళనాడు చేపల పులుసు ట్రై చేయండి. చేపలు ఇష్టపడని వాళ్లు కూడా పులుసుతో లాగించేస్తారు. అంత బాగుంటుంది. అయితే రెసిపీ చూసేయండి.

చేపలు – 750 గ్రాములు, ఉప్పు – తగినంత, పసుపు – 1/4 టీస్పూన్, నల్ల మిరియాలు – 1 టేబుల్‌స్పూన్, 10 మెంతులు తాళింపు కోసం, ఉల్లిపాయ – 1, పచ్చిమిరపకాయలు – 3, వెల్లుల్లి రెబ్బలు – 15, టమాటాలు – 3, నూనె – సుమారు ⅔ కప్పు, ఆవాలు– 1/2 టీస్పూన్, కరివేపాకు – 2 రెమ్మలు, కారం – 2 టేబుల్‌స్పూన్లు, ధనియాల పొడి – 2 టేబుల్‌స్పూన్లు, చింతపండు – 50 గ్రాములు, కొబ్బరి పాలు – 2 కప్పులు, కొత్తిమీర – కొద్దిగా

పులుసు మసాలా కోసం.. మెంతులు – కాసింత సోంపు – 1/4 టీస్పూన్ జీలకర్ర – 1 టీస్పూన్ ఎండు మిరపకాయలు – 3–4. ఇప్పుడు ఒక పాన్‌లో మెంతులు, సోంపు, జీలకర్ర, ఎండు మిరపకాయలు వేసి మీడియం మంటపై వేయించాలి. మంచి వాసన వచ్చి మసాలాలు చిటపటలాడిన తర్వాత దించుకుని చల్లార్చాలి. వీటిని మెత్తని పొడిగా చేసుకుని పక్కన పెట్టాలి.

తయారీ విధానం

ముందుగా చేప ముక్కలను శుభ్రంగా కడిగి వాటికి ఉప్పు, 1/4 టీస్పూన్ పసుపు పట్టించాలి. 30 నిమిషాల పాటు పక్కన పెట్టాలి. తర్వాత పాన్‌లో కొద్దిగా నూనె వేసి నల్ల మిరియాలు, పెద్ద ఉల్లిపాయ ముక్కలు, పచ్చిమిరపకాయలు, వెల్లుల్లి రెబ్బలు వేయాలి. ఉల్లిపాయలు వేగాక టమాటాలు కూడా వేసి వేయించాలి. దీన్ని చల్లార్చి మెత్తని పేస్ట్ చేసుకోవాలి.

ఇప్పుడు మరోసారి పాన్‌లో నూనె వేడి చేసి కొద్దిగా మెంతులు, ఆవాలు, ఎండు మిరపకాయలు, కరివేపాకు వేసి తాలింపు పెట్టాలి. ఆ తర్వాత ఉల్లిపాయ-టమాటా పేస్ట్ వేసి బాగా కలపాలి. నూనె పైకి తేలేక ఉప్పు, పసుపు, కారం, ధనియాల పొడి వేసి బాగా కలిపి కొద్దిసేపు ఉడికించాలి. ముందుగా నానబెట్టిన చింతపండును పిండి సుమారు 1/3 కప్పు చిక్కటి చింతపండు రసాన్ని తీసుకోవాలి. దీన్ని పాన్‌లో పోసి బాగా కలపాలి. మళ్లీ నూనె పైకి తేలే వరకు ఉడికించాలి.

ఇప్పుడు చేప ముక్కలను జాగ్రత్తగా గ్రేవీలో వేయాలి. తర్వాత 2 కప్పుల పలుచని కొబ్బరి పాలు పోసి మూత పెట్టి మీడియం మంటపై చేపలు ఉడికే వరకు ఉంచాలి. చివరగా ముందుగా తయారు చేసుకున్న సోంపు-జీలకర్ర పొడిని చల్లి, కొత్తిమీర తరుగు వేయాలి. మరికొద్దిసేపు ఉడికించి స్టవ్ ఆఫ్ చేయాలి.

ఈ చేపల పులుసును వెంటనే తినడం కంటే 3–4 గంటలు చల్లారనిస్తే మసాలాల రుచి చేపలకు బాగా పడుతుంది. వేడి వేడి అన్నంలో నెయ్యితో కలుపుకుని తింటే తమిళనాడు స్టైల్ చేపల పులుసు రుచి అదిరిపోతుంది.

Tribal Style Fish Fry: ఎప్పుడూ తినే చేపల వేపుడు కాదు..ఉసిరితో చేసే ఈ రెసిపీ తింటే మైమరిచిపోతారు

Nandini Arava — Sat, 31 Oct 2026 10:15:07 +0530

Tribal Style Fish Fry: ఫిష్ ఫ్రై అంటే ఉప్పు, కారం, మసాలా, అల్లం వెల్లుల్లి పేస్ట్ వేస్తాం. కానీ ఆదివాసీలు చేసుకునే ఉసిరికాయ ఫిష్ ఫ్రై ఎప్పుడైనా ట్రై చేశారా? ఇందులో మరో ముఖ్యమైన పదార్థం కూడా ఉంది. దానివల్ల అద్భుతమైన రుచిని ఇస్తుంది. రెసిపీ చూద్దాం.

చేపల వేపుడు అనగానే సాధారణంగా కారం, పసుపు, అల్లం వెల్లుల్లి పేస్ట్, నిమ్మరసం లేదా చింతపండుతో చేసే మసాలా గుర్తుకొస్తుంది. కానీ ఈ ఆదివాసీలు చేసుకునే ఫిష్ ఫ్రై మాత్రం కాస్త వెరైటీగా ఉంటుంది. ఇందులో ఎండిన ఉసిరికాయలు, మిరియాలు, మెంతులు, వెల్లుల్లి, కొబ్బరి నూనెతో ప్రత్యేకమైన మసాలా తయారుచేస్తారు. ఈ మసాలాలో చేప ముక్కలను నానబెట్టి పెనం మీద నెమ్మదిగా కాల్చితే.. బయట క్రిస్పీగా, లోపల మెత్తగా ఉండే రుచికరమైన ఫిష్ ఫ్రై రెడీ అవుతుంది.

750 గ్రాముల చేప ముక్కలు, మూడో వంతు కప్పు ఎండిన ఉసిరికాయలు, రెండు టేబుల్ స్పూన్ల మిరియాలు, పావు టీ స్పూన్ మెంతులు, 12 నుంచి 15 వెల్లుల్లి రెబ్బలు, రెండు టేబుల్ స్పూన్ల కొబ్బరి నూనె, కరివేపాకు, ఉప్పు తీసుకోవాలి. మరింత కారం కావాలనుకుంటే పచ్చిమిర్చి కూడా వాడుకోవచ్చు.

ముందుగా ఎండిన ఉసిరికాయలను ఒక గిన్నెలో వేసి నీళ్లు పోసి కనీసం గంట నుంచి రెండు గంటల పాటు నానబెట్టాలి. వీలైతే రాత్రంతా నానబెట్టుకోవచ్చు. అవి మెత్తగా అయ్యాక నీటిని వంపేసి మిక్సీ జార్‌లో వేసుకోవాలి. అందులో మిరియాలు, కొద్దిగా ఉప్పు వేసి మెత్తని పేస్ట్‌లా గ్రైండ్ చేసుకోవాలి. కారం ఎక్కువగా కావాలనుకునేవారు ఇదే సమయంలో కొన్ని పచ్చిమిర్చి ముక్కలు కూడా వేసుకోవచ్చు.

ఇప్పుడు ఒక చిన్న పాన్‌లో మెంతులు వేసి మీడియం మంటపై ముదురు రంగు వచ్చే వరకు వేయించాలి. అవి చల్లారిన తర్వాత మెత్తని పొడిలా దంచుకోవాలి. మరో పాన్‌లో రెండు టేబుల్ స్పూన్ల కొబ్బరి నూనె వేసి వేడయ్యాక వెల్లుల్లి రెబ్బలు వేసి లేత బంగారు రంగు వచ్చే వరకు వేయించాలి.

వెల్లుల్లి వేగిన తర్వాత ముందుగా తయారుచేసుకున్న ఉసిరికాయల పేస్ట్‌ను అందులో వేసి నిమిషం పాటు వేయించాలి. ఆ తర్వాత మెంతుల పొడి, మూడో వంతు కప్పు నీళ్లు, కరివేపాకు వేసి బాగా కలపాలి. ఈ మిశ్రమం కొద్దిగా మరిగిన తర్వాత స్టవ్ ఆఫ్ చేసి పూర్తిగా చల్లారనివ్వాలి.

ఇప్పుడు శుభ్రం చేసి పెట్టుకున్న చేప ముక్కలను ఈ మసాలాలో వేసి ప్రతి ముక్కకూ మసాలా పట్టేలా కలపాలి. కనీసం 30 నిమిషాల పాటు పక్కన పెట్టాలి. ఇలా చేయడం వల్ల చేప ముక్కలకు ఉసిరి, మిరియాలు, మెంతులు, వెల్లుల్లి రుచులు బాగా పడతాయి.

తర్వాత పెనం మీద ఐదు నుంచి ఆరు టేబుల్ స్పూన్ల కొబ్బరి నూనె వేసి వేడిచేయాలి. మసాలా పట్టిన చేప ముక్కలను పెనం మీద ఒకదానికొకటి తగలకుండా అమర్చాలి. మీడియం మంటపై మూత పెట్టి సుమారు 12 నుంచి 15 నిమిషాల పాటు కాల్చాలి. ఆ తర్వాత మూత తీసి చేప ముక్కలు విరిగిపోకుండా జాగ్రత్తగా మరోవైపు తిప్పాలి.

పైన కొద్దిగా కరివేపాకు చల్లి, అవసరమైతే మరికొంత నూనె వేసి రెండు వైపులా బాగా కాల్చుకోవాలి. చేప ముక్కలు బయటకు క్రిస్పీగా, లోపల మెత్తగా ఉడికిన తర్వాత స్టవ్ ఆఫ్ చేయాలి. ప్రత్యేకమైన ఉసిరి మసాలాతో తయారైన ఆదివాసీల ఫిష్ ఫ్రై రెడీ. వేడివేడిగా స్టార్టర్‌గా లేదా అన్నంలోకి సైడ్ డిష్‌గా కూడా తీసుకోవచ్చు.

Curd: ఫ్రిడ్జ్ లో పెట్టిన పెరుగు పాడవ్వదని తింటున్నారా? మీరు మాత్రం ఈ తప్పు చేయకండి

Nandini Arava — Thu, 17 Sep 2026 12:42:10 +0530

Curd: ఫ్రిడ్జ్ లో పెట్టిన పదార్థాలు చెడిపోవని చెప్పి…రోజుల తరబడి తింటుంటారు. కొందరైతే పెరుగును ఫ్రిడ్జ్ లో పెట్టి అదే పనిగా వాడుతూ ఉంటారు. పెరుగు పాడైనా తెలియదు. కానీ ఆ పెరుగును ఎన్ని రోజుల వరకు తినొచ్చో తెలుసా? పెరుగు పాడైందని ఎలా గుర్తించాలి?

ఫ్రిడ్జ్ లో పెట్టిన పదార్థాలు చెడిపోవని చెప్పి…రోజుల తరబడి తింటుంటారు. కొందరైతే పెరుగును ఫ్రిడ్జ్ లో పెట్టి అదే పనిగా వాడుతూ ఉంటారు. పెరుగు పాడైనా తెలియదు. కానీ ఆ పెరుగును ఎన్ని రోజుల వరకు తినొచ్చో తెలుసా? పెరుగు పాడైందని ఎలా గుర్తించాలో ఇక్కడ చూద్దాం. ముందుగా

ఎన్ని రోజులు నిల్వ చేయొచ్చు?ఎండాకాలమైనా, చలికాలమైనా మన ఇళ్లలో ఫ్రిజ్‌లో పెరుగు కచ్చితంగా ఉంటుంది. అన్నంలోకి, మజ్జిగ కోసం అని పెట్టిన పెరుగు కొన్నిసార్లు రోజుల తరబడి ఫ్రిజ్‌లోనే ఉండిపోతుంది. ఫ్రిజ్‌లో పెట్టాం కదా పాడవదులే అని చాలామంది ఎన్ని రోజులైనా దాన్ని తింటుంటారు. కానీ పెరుగును ఫ్రిజ్‌లో పెట్టినంత మాత్రాన ఎప్పటికీ తాజాగా ఉండదు. మరి పెరుగును ఎన్ని రోజులు నిల్వ చేయొచ్చు? పాడైన పెరుగును ఎలా గుర్తించాలి? ఇక్కడ తెలుసుకోండి.

ఇంట్లో తోడుపెట్టిన పెరుగును 2-4 రోజుల్లోపు వాడేయడం మంచిది. రోజులు గడిచేకొద్దీ పెరుగు బాగా పుల్లగా మారిపోయి, దాని రుచి, టెక్స్చర్ మారిపోతుంది. ఒకవేళ బయట కొన్న పెరుగు అయితే ప్యాకెట్ మీద ఉన్న 'Best Before'ను కచ్చితంగా చూడాలి. ప్యాకెట్ ఓపెన్ చేశాక దాన్ని ఎక్కువ రోజులు ఉంచకుండా వీలైనంత త్వరగా వాడేయాలి.

చాలామంది పెరుగు గిన్నెను ఫ్రిజ్ డోర్ షెల్ఫ్‌లో పెడుతుంటారు. మనం ఫ్రిజ్ డోర్ పదే పదే తీయడం వల్ల అక్కడ ఉష్ణోగ్రతలో మార్పులు వస్తుంటాయి. అందుకే పెరుగును ఎప్పుడూ ఫ్రిజ్ లోపలి షెల్ఫ్‌లలో మాత్రమే పెట్టాలి. అక్కడ ఉష్ణోగ్రత 4°C లేదా అంతకంటే తక్కువగా స్థిరంగా ఉంటుంది. పెరుగును బయటకు తీసి ఎక్కువసేపు రూమ్ టెంపరేచర్‌లో ఉంచి, మళ్లీ ఫ్రిజ్‌లో పెట్టే తప్పు అస్సలు చేయకండి.

పెరుగు తీయడానికి ఎప్పుడూ పొడిగా, శుభ్రంగా ఉన్న స్పూన్‌ మాత్రమే వాడాలి. వేరే పదార్థాలు తిన్న లేదా తడిగా ఉన్న స్పూన్‌ను పెరుగులో అస్సలు పెట్టకండి. గిన్నెలోకి తీసుకున్న పెరుగు మిగిలిపోతే, దాన్ని తిరిగి మళ్లీ పెరుగు గిన్నెలోనే వేయడం వల్ల బయటి బ్యాక్టీరియా మొత్తం పెరుగు గిన్నెలోకి చేరి, కొద్ది గంటల్లోనే పెరుగు మొత్తం పాడవుతుంది.

కాదు, పెరుగు మీద తేట నీరు (Whey water) నిలవడం చాలా సహజం. పెరుగు రంగు, వాసన బాగుంటే, ఆ నీటిని పెరుగుతో బాగా కలిపి వాడుకోవచ్చు. దీనివల్ల ఎలాంటి ప్రమాదం లేదు.

పెరుగు మీద తెలుపు, ఆకుపచ్చ లేదా నలుపు రంగులో బూజు వస్తే వెంటనే పడేయండి. పసుపు రంగులోకి మారినా లేదా విపరీతమైన పులుపు, చెడు వాసన వస్తున్నా వాడకండి.పెరుగు జిగటగా లేదా అంటుకునేలా ఉంటే అది విషపూరితంగా మారిందని అర్థం. పాడైన పెరుగును టేస్ట్ చూసి చెక్ చేయకండి, దీనివల్ల ఫుడ్ పాయిజనింగ్ అయ్యే ప్రమాదం ఉంది.

Paneer: ఇంట్లో చేసిన పనీర్ ఎన్ని రోజులైనా ఫ్రెష్ గా ఉండాలంటే ఈ సింపుల్ టిప్ ట్రై చేయండి

Nandini Arava — Fri, 25 Sep 2026 12:02:06 +0530

Paneer: పాల ప్రొడక్ట్ పనీర్‌లో చాలా పోషకాలు ఉంటాయి. ప్రోటీన్ ఎక్కువగా ఉండటం వల్ల జిమ్ చేసేవాళ్లకి, పిల్లలకు మంచి పోషకాహారంగా పనిచేస్తుంది. హెల్దీగా ఉంటారు. మరీ ఇంట్లో చేసిన పనీర్…ఎక్కువ రోజులు ఫ్రెష్ గా ఉండాలంటే…ఈ సింపుల్ టిప్ ట్రై చేయండి. పాడవ్వదు.

పాల ప్రొడక్ట్ పనీర్‌లో చాలా పోషకాలు ఉంటాయి. ప్రోటీన్ ఎక్కువగా ఉండటం వల్ల జిమ్ చేసేవాళ్లకి, పిల్లలకు మంచి పోషకాహారంగా పనిచేస్తుంది. హెల్దీగా ఉంటారు. ఏ కూరలో వేసినా దాని రుచి అమాంతం పెరిగిపోతుంది. ఇందులో ప్రొటీన్ ఎక్కువగా ఉండటం వల్ల చాలామంది తమ రోజువారీ డైట్‌లో పనీర్‌ను తప్పకుండా చేర్చుకుంటారు. మరీ ఇంట్లో చేసిన పనీర్…ఎక్కువ రోజులు ఫ్రెష్ గా ఉండాలంటే…ఇలా చేయండి.

పనీర్‌ రెసిపీస్ చాలా బాగుంటాయి. చేయడం చాలా సులువు. కానీ దాని రుచి, ఫ్రెష్ నెస్ తగ్గకుండా చూసుకోవడం చాలా ముఖ్యం. సరిగ్గా నిల్వ చేయకపోతే పనీర్ పసుపు రంగులోకి మారి పుల్లగా అయిపోతుంది. అప్పుడది వృథాగా పడేయాల్సిందే. పనీర్ పాడవకుండా ఈ మూడు పద్ధతులు ట్రై చేయండి.

పనీర్‌ను నిల్వ చేయడానికి అత్యంత ఈజీ మార్గం దాన్ని నీళ్లలో ముంచడం. ఒక గిన్నెలో పనీర్ ముక్కను ఉంచి, అది మునిగేలా నీళ్లు పోసి ఫ్రిజ్‌లో పెట్టండి. పనీర్ రెండు మూడు రోజుల పాటు ఫ్రెష్‌గా ఉండాలంటే రోజూ ఆ నీటిని మారుస్తూ ఉండాలి.

పనీర్ ఎండిపోకుండా ఉండాలంటే, దాన్ని ఒక తడి మస్లిన్ వస్త్రంలో చుట్టి గిన్నెలో పెట్టండి. తేమను నిలుపుకోవడానికి ప్రతి 4-5 గంటలకు ఒకసారి ఆ గుడ్డపై కొద్దిగా నీళ్లు చల్లండి. ఇలా చేసిన పనీర్‌ను ఫ్రిజ్‌లో పెడితే ఎక్కువ కాలం నిల్వ ఉంటుంది.

పనీర్ పాడవకుండా ఉండటానికి ఉప్పు నీరు బాగా సహాయపడుతుంది. ఒక గిన్నెలో నీళ్లు తీసుకుని అందులో ఒక టీస్పూన్ ఉప్పు కలపండి. ఆ నీటిలో పనీర్ ముక్కను ముంచి ఫ్రిజ్‌లో పెట్టండి. రెండు రోజులకోసారి నీళ్లు మారుస్తుంటే పనీర్ వారం రోజుల పాటు ఫ్రెష్‌గా ఉంటుంది.

గాలి చొరబడని (ఎయిర్‌టైట్) డబ్బాలో పనీర్‌ను ఉంచి ఫ్రీజర్‌లో పెడితే 6 నెలల వరకు పాడవకుండా ఉంటుంది. అయితే, ఇంత ఎక్కువ కాలం నిల్వ ఉంచితే పనీర్ సహజత్వంలో కొద్దిగా మార్పు రావచ్చు. మంచి రుచి కోసం ఫ్రీజర్‌లో పెట్టిన 3 నెలల్లోపు దీన్ని వాడేయడం ఉత్తమం.

మీరు ప్యాకెట్ పనీర్ తెచ్చుకుంటే దాన్ని అలాగే ఫ్రీజర్‌లో పెట్టేయండి. వంటలో వాడే ముందు, ఆ పనీర్ ముక్కను కనీసం 15 నిమిషాల పాటు గోరువెచ్చని నీటిలో నానబెట్టండి. ఆ తర్వాత మీకు కావాల్సిన సైజులో ముక్కలు కోసుకుని వాడుకోవచ్చు. ఇలా చేస్తే పనీర్ ఎక్కువ కాలం నిల్వ ఉండటమే కాకుండా రుచిగా కూడా ఉంటుంది.

Butterfly Chicken: పండగ విందులో అదిరిపోయే చికెన్ స్టార్టర్..రెసిపీ చాలా సింపుల్

Nandini Arava — Tue, 20 Oct 2026 20:50:09 +0530

Butterfly Chicken: దసరా అంటే కక్కా, ముక్కా ఉండాల్సిందే. అలా అని ఎప్పుడూ చేసే నాన్ వెజ్ ఏం తింటాం. ఈ పండక్కి కొత్తగా ఇలా బటర్‌ఫ్లై చికెన్ ట్రై చేయండి. రెస్టారెంట్లలో దొరికే ఈ క్రిస్పీ చికెన్ స్టార్టర్‌ను ఈజీగా చేసుకోవచ్చు. రెసిపీని చూద్దాం.

దసరా పండగ అంటే కక్కా, ముక్కా ఉండాల్సిందే. అల్లుళ్లు, కూతుర్లతో ఇళ్లు కళకళలాడిపోతుంది. కోడూ, మేకూ తెగాల్సిందే. అందుకని వాటితో ఎప్పుడూ చేసే నాన్ వెజ్ రెసిపీస్ చేస్తే ఎవ్వరికైనా బోర్ కొడుతుంది. అయితే చికెన్‌తో కొత్తగా ఏదైనా ట్రై చేయాలనుకుంటున్నారా? దానికి బటర్‌ఫ్లై చికెన్ బెస్ట్ ఆప్షన్. బయట రెస్టారెంట్లలో దొరికే ఈ క్రిస్పీ చికెన్ స్టార్టర్‌ను ఇంట్లోనే ఈజీగా తయారు చేసుకోవచ్చు. చికెన్ ముక్కలకు మసాలాలు పట్టించి, బంగాళాదుంప ముక్కల మధ్య పెట్టి వేయించడం దీని ప్రత్యేకత. మరి ఈ రెసిపీని ఎలా తయారు చేసుకోవాలో చూద్దాం.

బోన్‌లెస్ చికెన్ – 800 గ్రాములు

బంగాళాదుంపలు – 3 (మీడియం సైజులో)

గుడ్లు – 2

అల్లం వెల్లుల్లి పేస్ట్ – 2 టేబుల్ స్పూన్లు

వెనిగర్ – 2 టీస్పూన్లు

కారం – 1 టీస్పూన్

చాట్ మసాలా – 1 టీస్పూన్

సోయా సాస్ – 1½ టీస్పూన్లు

రెడ్ చిల్లీ పేస్ట్ – 1 టేబుల్ స్పూన్

కార్న్ ఫ్లోర్ – 3 టేబుల్ స్పూన్లు (మారినేషన్ కోసం), కొద్దిగా (బంగాళాదుంపల కోసం)

మైదా – 3 టేబుల్ స్పూన్లు

నల్ల మిరియాల పొడి – 1 టేబుల్ స్పూన్

నిమ్మరసం – 2 టేబుల్ స్పూన్లు

నల్ల ఉప్పు, మామూలు ఉప్పు – తగినంత

నువ్వులు – కొద్దిగా

నూనె – డీప్ ఫ్రై చేయడానికి సరిపడా

టూత్‌పిక్స్ – చికెన్, బంగాళాదుంప ముక్కలను కలిపి ఉంచడానికి

ముందుగా ఒక పెద్ద గిన్నెలో చిన్న ముక్కలుగా కట్ చేసిన బోన్‌లెస్ చికెన్ తీసుకోవాలి. అందులో అల్లం వెల్లుల్లి పేస్ట్, కారం, చాట్ మసాలా, నల్ల మిరియాల పొడి, ఉప్పు వేసి కలపాలి. ఆ తర్వాత గుడ్లు, సోయా సాస్, రెడ్ చిల్లీ పేస్ట్, వెనిగర్, నిమ్మరసం, కార్న్ ఫ్లోర్, మైదా వేసి చికెన్ ముక్కలకు బాగా పట్టేలా కలపాలి. గిన్నెపై మూత పెట్టి 3 నుంచి 4 గంటల పాటు ఫ్రిజ్‌లో ఉంచి మారినేట్ చేయాలి.

బంగాళాదుంపలను పొట్టు తీసి పలుచటి ముక్కలుగా కట్ చేసుకోవాలి. వాటిని నీటితో శుభ్రంగా కడగాలి. ఒక గిన్నెలో కొద్దిగా కార్న్ ఫ్లోర్ తీసుకుని నీళ్లు పోసి పలుచటి మిశ్రమంలా తయారు చేయాలి. అందులో బంగాళాదుంప ముక్కలను వేసి సుమారు 10 నిమిషాల పాటు నానబెట్టాలి.

బటర్‌ఫ్లై ఆకారంలో తయారు చేయాలి

ఇప్పుడు బంగాళాదుంప ముక్కలను బయటకు తీసి, వాటి మధ్యలో మారినేట్ చేసిన చికెన్ ముక్కను పెట్టాలి. బంగాళాదుంప ముక్కలను చికెన్‌కు ఇరువైపులా మడిచి, టూత్‌పిక్‌తో గట్టిగా కాకుండా జాగ్రత్తగా బిగించాలి. ఇలా చేయడం వల్ల చికెన్, బంగాళాదుంప ముక్కలు విడిపోకుండా ఉంటాయి.

బాణలిలో డీప్ ఫ్రై చేయడానికి సరిపడా నూనె పోసి వేడి చేయాలి. నూనె వేడెక్కిన తర్వాత మంటను మీడియం స్థాయికి తగ్గించాలి. సిద్ధం చేసుకున్న బటర్‌ఫ్లై చికెన్ ముక్కలను నెమ్మదిగా నూనెలో వేయాలి. బయట బంగారు రంగులోకి మారి క్రిస్పీగా అయ్యే వరకు, లోపల చికెన్ పూర్తిగా ఉడికేలా వేయించాలి. పైన కొద్దిగా నువ్వులు చల్లి వేడివేడిగా సర్వ్ చేయాలి. టమాటో సాస్ లేదా మీకు నచ్చిన డిప్‌తో తింటే అదిరిపోద్ది.

చిన్న చిట్కా

చికెన్‌కు మసాలాలు బాగా పట్టాలంటే కనీసం 3 గంటలు మారినేట్ చేయడం మంచిది. బంగాళాదుంప ముక్కలు మరీ మందంగా ఉంటే సరిగా వేగకపోవచ్చు. అందుకే వీలైనంత పలుచగా కట్ చేసుకోవాలి. నూనె మరీ ఎక్కువ వేడిగా ఉంటే బయట త్వరగా రంగు మారి, లోపల చికెన్ ఉడకకపోవచ్చు. కాబట్టి మీడియం మంటపై వేయించాలి. చికెన్ పూర్తిగా ఉడికిందో లేదో తప్పనిసరిగా చూసుకోవాలి. అంతే.. క్రిస్పీగా, మసాలా రుచితో ఉండే బటర్‌ఫ్లై చికెన్ రెడీ. సాయంత్రం స్నాక్స్‌గా, ఇంట్లో జరిగే చిన్నపాటి పార్టీల్లో స్టార్టర్‌గా దీన్ని తయారు చేసుకోవచ్చు.

Ghee: మీగడతో చేసే నెయ్యి ఫ్రెష్ గా ఉండాలంటే ఇదొక్కటి ట్రై చేయండి

Nandini Arava — Thu, 01 Oct 2026 17:39:51 +0530

Ghee: పాలు మరిగించి చల్లార్చిన తర్వాత మీగడతో నెయ్యి తయారు చేయడం చాలా మందికి తెలుసు. అయితే నెయ్యి ఎక్కువ రోజులు తాజాగా ఉండాలంటే కొన్ని టిప్స్ తప్పనిసరి. రుచి, నాణ్యతలోనూ రాజీ పడక్కర్లేదు.

French Fries: నూనె లేకుండా ఫ్రెంచ్ ఫ్రైస్‌.. ఇలా చేస్తే క్రిస్పీతో పాటు టేస్ట్ ఖాయం

Narender Vaitla — Tue, 29 Sep 2026 17:47:49 +0530

French Fries: ఫ్రెంచ్ ఫ్రైస్‌ని సాధారణంగా ఎక్కువ నూనెలో డీప్ ఫ్రై చేస్తారు. అయితే ఆయిల్ ఫుడ్ ఆరోగ్యానికి మంచిది కాద‌ని తెలిసిందే. నూనె లేకుండానే ఇంట్లో క్రిస్పీగా ఫ్రెంచ్ ఫ్రైస్ తయారు చేసుకోవచ్చు. అదెలాగో ఇప్పుడు తెలుసుకుందాం.

ముందుగా మంచి నాణ్యత ఉన్న బంగాళాదుంపలను తీసుకుని తొక్క తీసేయాలి. వాటిని పొడవుగా, ఒకే పరిమాణంలో ఉండేలా ఫ్రెంచ్ ఫ్రైస్ ఆకారంలో కట్ చేసుకోవాలి. అన్ని ముక్కలు దాదాపు ఒకే మందంతో ఉంటే ఒకేసారి సమానంగా ఉడుకుతాయి. చాలా పలుచగా లేదా చాలా మందంగా కట్ చేస్తే కొన్ని ముక్కలు ఎక్కువగా, మరికొన్ని తక్కువగా ఉడికే అవకాశం ఉంటుంది.

కట్ చేసిన బంగాళాదుంప ముక్కలను ఒక గిన్నెలో నీటిలో కొంతసేపు నానబెట్టాలి. ఇలా చేయడం వల్ల వాటిపై ఉండే అదనపు స్టార్చ్ (పిండి పదార్థం) కొంత వరకు తొలగిపోతుంది. దీంతో ఫ్రెంచ్ ఫ్రైస్ బేక్ చేసినప్పుడు మరింత క్రిస్పీగా మారేందుకు సహాయపడుతుంది. నానబెట్టిన తర్వాత ముక్కలను నీటి నుంచి తీసి శుభ్రమైన కిచెన్ టవల్ లేదా కాటన్ క్లాత్‌తో పూర్తిగా తుడవాలి. ముక్కలపై నీరు లేదా తేమ ఎక్కువగా ఉంటే అవి క్రిస్పీగా కాకుండా మెత్తగా మారవచ్చు.

ఇప్పుడు బేకింగ్ ట్రే తీసుకుని దానిపై బంగాళాదుంప ముక్కలను ఒక్కొక్కటి విడిగా పరచాలి. ముక్కలు ఒకదానిపై ఒకటి పడకుండా తగినంత గ్యాప్ ఉండేలా చూసుకోవాలి. ఓవెన్‌ను ముందుగానే వేడి చేసి, అధిక ఉష్ణోగ్రత వద్ద ఫ్రైస్‌ను బేక్ చేయాలి. ఇలా చేయడం వల్ల బయట ఉన్న తేమ త్వరగా తగ్గి, పై పొర క్రిస్పీగా మారుతుంది. బేక్ చేస్తున్న సమయంలో మధ్యలో ఒకసారి ట్రేను బయటకు తీసి ఫ్రైస్‌ను తిప్పాలి. దీంతో రెండు వైపులా సమానంగా క్రిస్పీగా తయారవుతాయి.

ఫ్రెంచ్ ఫ్రైస్ తయారీలో కొన్ని చిన్న విషయాలు చాలా ముఖ్యం. బంగాళాదుంప ముక్కలను ఒకే పరిమాణంలో కట్ చేయాలి. నీటిలో నానబెట్టిన తర్వాత వాటిని పూర్తిగా పొడిగా చేయాలి. బేకింగ్ ట్రేలో ముక్కలను ఎక్కువగా కుప్పగా వేయకూడదు. వాటి మధ్య గాలి తిరిగేంత స్థలం ఉండాలి. ఈ జాగ్రత్తలు పాటిస్తే డీప్ ఫ్రై చేయకుండానే బయట క్రిస్పీగా, లోపల మెత్తగా ఉండే ఫ్రెంచ్ ఫ్రైస్‌ను ఇంట్లోనే తయారు చేసుకోవచ్చు.

ఓవెన్‌లో బేక్ చేసే సమయం, ఉష్ణోగ్రత ఓవెన్ మోడల్, ఫ్రెంచ్ ఫ్రైస్ ముక్కల పరిమాణాన్ని బట్టి మారవచ్చు. కాబట్టి బేక్ చేస్తున్నప్పుడు మధ్యలో ఒకసారి పరిశీలించడం మంచిది. నూనె లేకుండా చేసే ఈ విధానంలో కూడా బంగాళాదుంపలు క్రిస్పీగా మారేందుకు సరైన తేమ తొలగించడం, ముక్కల మధ్య గ్యాప్ ఉంచడం చాలా కీలకం. ఫ్రెంచ్ ఫ్రైస్‌పై ఉప్పు, మసాలా వంటి వాటిని మీ రుచికి తగినంత మాత్రమే వేసుకోవాలి.

Fish : చేపలు తినడంలో నంబర్ 1 దేశం ఏది? ఇండియా స్థానమెంత?

Arun Kumar P — Sat, 26 Sep 2026 13:45:07 +0530

ప్రపంచంలో ఓ దేశానికి చెందిన ప్రజలు చికెన్, మటన్ కంటే చేపలనే ఎక్కువగా తింటారు. ఇంతకీ ఆ దేశం ఏది? అసలు చేపలు తినడం వల్ల కలిగే ఆరోగ్య ప్రయోజనాలు ఏంటో ఇక్కడ తెలుసుకోండి.

Curd Storage: ఇలా చేస్తే.. ఫ్రిజ్ లో పెట్టకపోయినా పెరుగు పులవదు

Nandini Arava — Fri, 23 Oct 2026 21:57:38 +0530

Curd Storage: ఫ్రిజ్ లేనప్పుడు పెరుగును ఫ్రెష్‌గా ఎలా ఉంచాలి? పచ్చి కొబ్బరి ముక్క వేస్తే 3 రోజుల పాటు పెరుగు పాడవకుండా ఉంటుందా? పెరుగు నిల్వ చేసేటప్పుడు గుర్తుంచుకోవాల్సిన ముఖ్యమైన విషయాలు ఇవే!

Curd Vada: ఈ గారెలంటే సమంతకి చాలా ఇష్టమట..మరి ఎలా చేయాలో రెసిపీ చూసేయండి

Nandini Arava — Fri, 23 Oct 2026 16:39:58 +0530

Curd Vada: నటి సమంతకు ఎంతో ఇష్టమైన పెరుగు గారెలను (పెరుగు వడ) హోటల్ రుచితో ఇంట్లోనే ఈజీగా చేసుకోవచ్చు. మెత్తటి మినప గారెలు, కమ్మటి పెరుగు, కమ్మని తాలింపుతో అదిరిపోయే పెరుగు గారెల్ని ఎలా చేయాలో ఇక్కడ రెసిపీ చూసేద్దాం.

స్కూల్ రోజుల్లో తిన్న ఫుడ్ ఎప్పటికీ గుర్తిండిపోతుంది కదా. నటి సమంతకు కూడా పెరుగు గారెలతో అలాంటి తీపి గుర్తే ఉంది. రీసెంట్‌గా ఆమె ఓ కుకింగ్ షోలో పాల్గొన్నారు. దాంట్లో తాను తిన్న పెరుగు గారెలను గుర్తుచేసుకుని ఆమె ఎమోషనల్ అయ్యారు.

మెత్తటి మినప గారెలు, అందులో నానిన కమ్మటి పెరుగు, పైన చల్లిన కారం, కమ్మని తాలింపు చూస్తేనే నోరూరిపోతుంది. హోటల్ రుచితో ఇంట్లోనే దీన్ని ఎలా చేయాలో ఇప్పుడు చూద్దాం.

కావాల్సిన పదార్థాలు:

పొట్టులేని మినప్పప్పు - 1 కప్పు
ఉప్పు - తగినంత
నూనె - డీప్ ఫ్రైకి సరిపడా
గట్టి పెరుగు (పుల్లగా ఉండకూడదు) - 2 కప్పులు

తాలింపు కోసం:

నూనె - 1 టేబుల్ స్పూన్
ఆవాలు - 1/2 టీస్పూన్
మినప్పప్పు - 1/2 టీస్పూన్
కరివేపాకు - ఒక రెమ్మ
ఇంగువ - చిటికెడు
జీడిపప్పు - 5 నుంచి 6 (ఇష్టమైతే)

ముందుగా మినప్పప్పును శుభ్రంగా కడిగి, 4 నుంచి 5 గంటల పాటు నీళ్లలో నానబెట్టాలి. ఆ తర్వాత నీళ్లన్నీ వంపేసి, మెత్తగా రుబ్బుకోవాలి. పిండి మరీ పల్చగా ఉండకూడదు. గట్టిగా, ప్లఫ్ఫీగా ఉంటేనే గారెలు మెత్తగా వస్తాయి. రుబ్బుకున్న పిండిలో తగినంత ఉప్పు కలపాలి.

కడాయిలో నూనె పోసి మీడియం మంట మీద వేడి చేయాలి. చేతిని కొద్దిగా నీళ్లతో తడుపుకుని, పిండిని తీసుకుని మధ్యలో రంధ్రం చేసి నూనెలో వేయాలి. రెండు వైపులా గోల్డెన్ బ్రౌన్ కలర్ వచ్చే వరకు మీడియం మంట మీదే వేయించాలి. మంట పెంచితే పైన రంగు మారుతుంది కానీ లోపల ఉడకదు.

పెరుగు గారెలు పర్ఫెక్ట్‌గా రావాలంటే ఇదే అసలైన సీక్రెట్. ఒక గిన్నెలో కొద్దిగా పెరుగు తీసుకుని, నీళ్లు కలిపి మజ్జిగలా చేసుకోవాలి. వేయించిన గారెలను అందులో సుమారు 2 నిమిషాలు నానబెట్టాలి.

ఆ తర్వాత ఒక్కో గారెను విరిగిపోకుండా నెమ్మదిగా నొక్కి, అదనపు నీటిని తీసేయాలి. ఇలా చేయడం వల్ల గారెలు మెత్తబడి, పెరుగును బాగా పీల్చుకుంటాయి.

ఇష్టమైతే కొబ్బరి, పచ్చిమిర్చి, జీలకర్రను కొద్దిగా నీళ్లు పోసి మెత్తగా రుబ్బి మజ్జిగలో కలుపుకోవచ్చు. ఇది పూర్తిగా ఆప్షనల్.

మరొక గిన్నెలో గట్టి పెరుగును తీసుకుని ఉండలు లేకుండా బాగా చిలకాలి. అందులో తగినంత ఉప్పు కలపాలి. బాగా పులిసిన పెరుగును అస్సలు వాడొద్దు. అలా వాడితే పెరుగు గారెల రుచి పూర్తిగా మారిపోతుంది.

చిన్న కడాయిలో నూనె వేడి చేయాలి. ముందుగా ఆవాలు వేసి చిటపటలాడనివ్వాలి. ఆ తర్వాత మినప్పప్పు, జీలకర్ర, ఇష్టమైతే జీడిపప్పు, కరివేపాకు వేసి దోరగా వేయించాలి. చివరగా ఇంగువ వేసి స్టవ్ ఆఫ్ చేయాలి. ఈ తాలింపును పెరుగు మిశ్రమంలో వేసి కలపాలి. ఆవాలు, కరివేపాకు సువాసన పెరుగు గారెలకు అదనపు రుచిని ఇస్తుంది.

క వెడల్పాటి గిన్నెలో నానబెట్టిన గారెలను పేర్చాలి. వాటి మీద పెరుగు మిశ్రమాన్ని నిండుగా పోయాలి. గారెలు పెరుగులో పూర్తిగా మునిగేలా చూసుకోవాలి. సర్వ్ చేసే ముందు తురిమిన క్యారెట్, కొత్తిమీర, కారాబూందీ చల్లితే రుచితో పాటు చూడటానికి కూడా భలేగా ఉంటాయి.

సమంతకు పాత జ్ఞాపకాలను గుర్తుచేసిన ఈ పెరుగు గారెలను, మీరు కూడా ఇంట్లో చేసి ఫ్యామిలీతో ఎంజాయ్ చేయండి. ఇది సాయంత్రం పూట స్నాక్‌గానే కాకుండా, ఇంటికి చుట్టాలు వచ్చినప్పుడు చేసి పెట్టడానికి కూడా బెస్ట్ ఆప్షన్.

Sweet Corn Vs Native Corn : విదేశీ స్వీట్ కార్న్, స్వదేశీ మొక్కజొన్నల్లో ఏది బెస్ట్ ఫుడ్? దేంట్లో బలం ఎక్కువ?

Arun Kumar P — Fri, 25 Sep 2026 17:28:56 +0530

విదేశాలకు చెందిన స్వీట్ కార్న్, దేశీయ నాటు మొక్కజొన్నలు.. ఈ రెండింటిలో ప్రోటీన్లు, ఫైబర్, మినరల్స్ దేంట్లో ఎక్కువ ఉంటాయి? రెండింటిని 100 గ్రాముల చొప్పున తీసుకుని దేనిలో ఏ పోషకాలు, ఏ స్థాయిలో ఉన్నాయో తెలుసుకుందాం.

Sweet Corn Vs Native Corn : మొక్కజొన్న అంటే మనకు ముందుగా గుర్తొచ్చేది కాస్త గట్టిగా ఉండే దేశీయ మొక్కజొన్నే. కాానీ ఇప్పుడు పట్టణాల్లో, సూపర్ మార్కెట్లలో, ఫుడ్ స్టాళ్లలో స్వీట్ కార్న్‌కు కూడా భారీగా డిమాండ్ ఉంది. ఉడికించి, నేరుగా మంటలో కాల్చి తినడమేకాదు సలాడ్లు, సూప్‌లు, పిజ్జాలు, చాట్‌లలోనూ స్వీట్ కార్న్‌ వాడుతున్నారు. తియ్యగా, మెత్తగా ఉండటంతో పిల్లలు కూడా దీన్ని ఇష్టంగా తింటారు. మరోవైపు మన దేశీయ మొక్కజొన్నను కూడా కాల్చుకుని తినడం నుంచి పిండి, రొట్టెలు, వివిధ వంటకాల తయారీ వరకు ఎన్నో విధాలుగా ఉపయోగిస్తారు.

అయితే రుచి, వాడకం విషయంలోనే కాదు.. పోషక విలువల పరంగా ఈ రెండింటి మధ్య తేడా ఉందా? విదేశీ స్వీట్ కార్న్‌లో ఎక్కువ బలం ఉంటుందా? లేక మన దేశీయ మొక్కజొన్నలోనే ఎక్కువ పోషకాలు ఉంటాయా? అసలు ఈ రెండింటిలో ఏది ఆరోగ్యానికి మంచిది? ఈ విషయాలన్నీ తెలుసుకుంటే ఈ రెండు రకాల మొక్కజొన్నల మధ్య అసలు తేడా ఏమిటో స్పష్టంగా అర్థమవుతుంది.

100 గ్రాములు వండిన తర్వాత…

నాటు మొక్కజొన్నలు : సుమారు 4.4 గ్రాముల ప్రోటీన్ ఉంటుంది.

స్వీట్ కార్న్: సుమారు 3.4 గ్రాముల ప్రోటీన్ ఉంటుంది.

అంటే నాటు మొక్కజొన్నల్లో ప్రోటీన్ కాస్త ఎక్కువ ఉంటుందన్నమాట. కానీ ఇది మరీ అంత పెద్ద తేడా ఏమీ కాదు. మనం తినే ఆహారాన్ని ఎంచుకునేటప్పుడు కేవలం ప్రోటీన్ మాత్రమే చూడకూడదు. మన రోజువారీ భోజనంలో పప్పులు, గుడ్లు, పాలు, పెరుగు లాంటి ఇతర ప్రోటీన్ ఫుడ్స్ ఎంత తీసుకుంటున్నామనేది కూడా ముఖ్యమే.

ఇక్కడా నాటు మొక్కజొన్నలు పైచేయి సాధిస్తాయి. 100 గ్రాములు వండిన దేశీయ మొక్కజొన్నల్లో సుమారు 4.1 గ్రాముల ఫైబర్ (పీచు పదార్థం) ఉంటుంది. అదే వండిన స్వీట్ కార్న్‌లో అయితే 2.4 గ్రాముల ఫైబర్ మాత్రమే ఉంటుంది.

ఫైబర్ మన జీర్ణక్రియను నెమ్మదిగా జరిగేలా చేస్తుంది. దీనివల్ల కడుపు నిండిన ఫీలింగ్ ఎక్కువసేపు ఉంటుంది. తృణధాన్యాల్లో ఉండే ఫైబర్.. పిండిపదార్థాలు త్వరగా అరిగిపోకుండా అడ్డుకుంటుంది. కాబట్టి మీకు ఫైబర్ ఎక్కువగా కావాలంటే నాటు మొక్కజొన్నలు తినడమే బెస్ట్.

ఇక్కడ మనం ఊహించని తేడా ఒకటి ఉంది.

100 గ్రాములు వండిన తర్వాత…

నాటు మొక్కజొన్నలు : సుమారు 143 క్యాలరీలు ఉంటాయి.

స్వీట్ కార్న్ : సుమారు 96 క్యాలరీలు ఉంటాయి.

అంటే ఒకే బరువు తీసుకున్నా నాటు మొక్కజొన్నల్లోనే క్యాలరీలు ఎక్కువ ఉంటాయి. ఎందుకంటే నాటు జొన్నలను ఎండిన తర్వాత వండుతారు. వండిన తర్వాత అందులో ఉండే నీటి శాతం, వండే విధానం బట్టి పోషకాల స్థాయి మారుతుంది.

నాటు మొక్కజొన్నల్లో మెగ్నీషియం, ఐరన్, ఫాస్పరస్, పొటాషియం, బి-విటమిన్లు లాంటి పోషకాలు చాలానే ఉంటాయి. ఇది తృణధాన్యం కాబట్టి పొట్టు, మొలక లాంటి భాగాలు కూడా ఇందులో ఉంటాయి.

స్వీట్ కార్న్‌లో కూడా పొటాషియం, ఫాస్పరస్, విటమిన్ సి, కొన్ని బి-విటమిన్లు దొరుకుతాయి. కాబట్టి ఈ రెండూ బలమైన ఆహారాలే. కానీ, తృణధాన్యంగా తినే నాటు మొక్కజొన్నల్లో ఫైబర్, కొన్ని రకాల మినరల్స్ కాస్త ఎక్కువగా దొరుకుతాయి.

మరి దేన్ని తినడం బెస్ట్?

ఫైబర్ + ప్రోటీన్ + తృణధాన్యాల బలం కావాలంటే - నాటు మొక్కజొన్నలు తినండి.

క్యాలరీలు తక్కువగా ఉండి, కూరగాయల్లా తినే ఫుడ్ కావాలంటే - స్వీట్ కార్న్ ఎంచుకోండి.

అయితే ఒకదాని కంటే మరొకటి మంచిది, చెడ్డది అని మనం చెప్పలేం. స్వీట్ కార్న్ తియ్యగా ఉంటుంది కాబట్టి అది ఆరోగ్యానికి మంచిది కాదనుకోవడం కూడా పొరపాటే. మనం ఎంత తింటున్నాం, ఎలా వండుతున్నాం అనేదే ఇక్కడ ముఖ్యం. ప్రాసెస్ చేయని తృణధాన్యాలు, కూరగాయలు లాంటి మంచి కార్బోహైడ్రేట్స్ ఉన్న ఫుడ్స్ తీసుకోవడం ఎప్పుడూ మంచిదే.

ఒక్క మాటలో చెప్పాలంటే

స్వీట్ కార్న్ - తక్కువ క్యాలరీలు ఉండే టేస్టీ కూరగాయ.

నాటు మొక్కజొన్నలు - ఎక్కువ ఫైబర్, ఎక్కువ ప్రోటీన్ ఇచ్చే తృణధాన్యం.

ఈ రెండింటినీ సరైన మోతాదులో మీ డైట్‌లో చేర్చుకోవచ్చు.

Cucumber Benefits: దోసకాయ తొక్క తీసి తింటున్నారా? అసలు ఏ టైంలో తినాలి?

Nandini Arava — Thu, 22 Oct 2026 16:20:07 +0530

Cucumber Benefits: సలాడ్‌లోనో, భోజనంతోనో దోసకాయ తింటున్నారా? అయితే మీకు తెలియని కొన్ని విషయాలు ఉన్నాయి. శరీరానికి నీటిని అందించడం, బరువు తగ్గడానికి ఉపయోగపడే దోసకాయ.. కొన్ని ఆరోగ్య సమస్యలు ఉన్నవారికి ఇబ్బంది పెట్టొచ్చు. అసలు ఎవరు తినాలి? తినకూడదు?

ఎండాకాలంలోనే కాదు.. ఏడాది పొడవునా చాలామంది ఇష్టంగా తినే వేజిటేబుల్.. దోసకాయ. భోజనంలో సలాడ్‌గా, పెరుగులో కలిపి లేదా స్నాక్‌గా తీసుకుంటుంటారు. ఇందులో నీటి శాతం ఎక్కువగా ఉండటంతో శరీరానికి నీటిని అందించడంలో సహాయపడుతుంది. క్యాలరీలు తక్కువగా ఉండటం వల్ల బరువు తగ్గాలనుకునేవారికి మంచి ఆప్షన్. అయితే దోసకాయను రోజూ తింటే ఎలాంటి ప్రయోజనాలు ఉంటాయి? అందరూ తినొచ్చా?

దోసకాయలో సుమారు 95 శాతం నీరు ఉంటుంది. ఇందులో విటమిన్ కె, కొంత విటమిన్ సి, పొటాషియం, ఫైబర్ వంటి పోషకాలు ఉంటాయి. ముఖ్యంగా క్యాలరీలు తక్కువగా ఉండటం, నీటి శాతం ఎక్కువగా ఉండటం దీని ప్రత్యేకత. అయితే శరీరానికి అవసరమైన అన్ని పోషకాలు దోసకాయ ఒక్కదాని నుంచే దొరకవు. కూరగాయలు, ఫ్రూట్స్ కూడా ఆహారంలో భాగంగా ఉండాలి.

1. శరీరానికి తగినంత నీరు అందించడంలో సహాయం

మన శరీరం సక్రమంగా పనిచేయడానికి నీరు చాలా అవసరం. దోసకాయలో నీటి శాతం ఎక్కువగా ఉండటంతో రోజువారీ ద్రవాల అవసరాన్ని తీర్చుకోవడంలో కొంత సహాయపడుతుంది. ముఖ్యంగా ఎండలో తిరిగేవారు, ఎక్కువగా చెమట పట్టేవారు దోసకాయను ఆహారంలో చేర్చుకోవచ్చు. అయితే నీటికి బదులుగా దోసకాయపై మాత్రమే ఆధారపడకూడదు.

2. బరువు నియంత్రణకు ఉపయోగపడుతుంది

బరువు తగ్గాలనుకునేవారు తక్కువ క్యాలరీలు ఉండే ఆహారాన్ని ఎంచుకోవడం ముఖ్యం. దోసకాయలో క్యాలరీలు తక్కువగా ఉంటాయి. చిప్స్, బిస్కెట్లు వంటి అధిక క్యాలరీల స్నాక్స్‌కు బదులుగా దోసకాయ ముక్కలు తింటే మొత్తం క్యాలరీల వినియోగాన్ని తగ్గించుకోవచ్చు. అయితే దోసకాయ తినడం వల్ల మాత్రమే బరువు తగ్గరు. సమతుల్య ఆహారం, వ్యాయామం కూడా అవసరం.

3. జీర్ణక్రియకు తోడ్పడుతుంది

దోసకాయలో కొంత ఫైబర్ ఉంటుంది. ముఖ్యంగా తొక్కతో తినడం వల్ల ఫైబర్‌తో పాటు ఇతర పోషకాలు కూడా అందుతాయి. ఫైబర్ అధికంగా ఉండే ఇతర ఆహారాలు, తగినంత నీటితో కలిపి తీసుకుంటే సాధారణ ప్రేగు కదలికలకు సహాయపడుతుంది. అయితే గ్యాస్ లేదా కడుపు ఉబ్బరం సమస్య ఉన్న కొంతమందికి పచ్చి దోసకాయ ఇబ్బంది కలిగించవచ్చు.

4. ఎముకల ఆరోగ్యానికి అవసరమైన విటమిన్ కె

దోసకాయలో విటమిన్ కె ఉంటుంది. ఇది రక్తం గడ్డకట్టే ప్రక్రియలో కీలక పాత్ర పోషించడంతో పాటు ఎముకల ఆరోగ్యానికి కూడా అవసరం. అయితే ఎముకలు బలంగా ఉండాలంటే కాల్షియం, విటమిన్ డి, తగినంత ప్రోటీన్‌తో కూడిన సమతుల్య ఆహారం కూడా ముఖ్యం.

5. డయాబెటిస్ ఉన్నవారికి మంచి ఆహార ఎంపిక

దోసకాయలో కార్బోహైడ్రేట్లు, క్యాలరీలు తక్కువగా ఉంటాయి. అందువల్ల మధుమేహం ఉన్నవారు సాధారణంగా తమ ఆహారంలో దీన్ని చేర్చుకోవచ్చు. ఇతర కూరగాయలతో కలిపి సలాడ్‌గా తీసుకోవడం మంచి ఎంపిక. అయితే దోసకాయ తినడం వల్ల రక్తంలో చక్కెర తగ్గిపోతుందని లేదా డయాబెటిస్ నయమవుతుందని భావించకూడదు.

సాధారణంగా ఆరోగ్యవంతులైన చాలామంది దోసకాయను ఆహారంలో భాగంగా తీసుకోవచ్చు. అయితే కొన్ని పరిస్థితుల్లో జాగ్రత్త అవసరం. దోసకాయ తిన్న తర్వాత గ్యాస్, కడుపు ఉబ్బరం లేదా అసౌకర్యం కలిగితే తినడం తగ్గించాలి.

వార్ఫరిన్ వంటి మందులు తీసుకునేవారు విటమిన్ కె ఉన్న ఆహారాన్ని పూర్తిగా మానేయాల్సిన అవసరం లేదు. అయితే రోజూ కన్సిస్టెన్సీ పాటించాలి.

దోసకాయ తిన్న తర్వాత నోరు దురద పెట్టడం, పెదవులు వాపడం వంటి లక్షణాలు కనిపిస్తే దాన్ని నిర్లక్ష్యం చేయకూడదు. శ్వాస తీసుకోవడంలో ఇబ్బంది లేదా గొంతు వాపు ఉంటే వెంటనే అత్యవసర వైద్య సహాయం తీసుకోవాలి.

దోసకాయ చేదుగా ఉంటే తినకూడదు. కొన్ని దోసకాయల్లో కుకుర్బిటాసిన్స్ అనే సహజ సమ్మేళనాలు అధికంగా ఉండవచ్చు. ఇవి కడుపునొప్పి, వాంతులు వంటి సమస్యలకు కారణమవుతాయి.

దోసకాయను తినే ముందు శుభ్రమైన నీటితో బాగా కడగాలి. తొక్కతో తినాలనుకుంటే మరింత జాగ్రత్తగా శుభ్రం చేయాలి. సలాడ్‌గా, పెరుగుతో కలిపి లేదా భోజనంలో భాగంగా తీసుకోవచ్చు. అయితే ఉప్పు ఎక్కువగా వేసి తినడం అలవాటు చేసుకోకూడదు. దోసకాయను కోసిన తర్వాత ఎక్కువసేపు బయట ఉంచకుండా, వీలైనంత త్వరగా తినడం మంచిది.

Protein Idli: ఈజీగా వెయిట్ లాస్‌ అవ్వాలంటే ఈ ప్రోటీన్ ఇడ్లీ ట్రై చేయండి..

Nandini Arava — Fri, 02 Oct 2026 19:01:12 +0530

Protein Idli: బరువు తగ్గాలని అనుకునేవారికి ప్రోటీన్ ఇడ్లీ చాలా బెస్ట్ ఆప్షన్. మొలకలు, నట్స్ తో తయారు చేసే ఈ ఇడ్లీలు రుచిగా, మెత్తగా ఉంటాయి. ఇంట్లోనే ఈజీగా, క్విక్ గా ఎలా తయారు చేయాలో ఇప్పుడు చూద్దాం.

రోజూ తినే ఇడ్లీలకు బదులు, ఈ ప్రోటీన్ ఇడ్లీని ట్రై చేయండి. ఇది రోజంతా మిమ్మల్ని యాక్టివ్‌గా ఉంచుతుంది. బరువు తగ్గాలనుకునే వారు, జిమ్‌కు వెళ్లే వారు, ఎదిగే పిల్లలకు అవసరమైన పోషకాలన్నీ ఇందులో ఉన్నాయి. దూదిలాంటి మెత్తటి ఇడ్లీలను భలే రుచిగా, చాలా ఈజీగా ఇంట్లోనే చేసుకోవచ్చు.

బరువు తగ్గాలని అనుకునేవారికి ప్రోటీన్ ఇడ్లీ చాలా బెస్ట్ ఆప్షన్. మొలకలు, నట్స్ తో తయారు చేసే ఈ ఇడ్లీలు రుచిగా, మెత్తగా ఉంటాయి. ఇంట్లోనే ఈజీగా, క్విక్ గా తయారైపోతాయి.

మొలకలు వచ్చిన పెసలు - 1 కప్పు

మినపప్పు - 1 కప్పు

బాదం - 10

నల్ల శనగలు - 1 కప్పు

మఖానా (తామర గింజలు) - 1/2 కప్పు

అటుకులు - 1 కప్పు

ఉప్పు - తగినంత

ముందుగా మినపప్పు, నల్ల శనగలు, మఖానా, బాదం, అటుకులను శుభ్రంగా కడగాలి. వీటిని ఒక గిన్నెలో వేసి 3 నుంచి 4 గంటల పాటు నీటిలో నానబెట్టాలి. ఇవి బాగా నానిన తర్వాత, ముందుగా సిద్ధం చేసుకున్న పెసల మొలకలను కూడా కలపాలి. ఆ తర్వాత మిక్సీ లేదా గ్రైండర్‌లో వేసి, తగినన్ని నీళ్లు పోసి ఇడ్లీ పిండిలా మెత్తగా రుబ్బుకోవాలి.

రుబ్బుకున్న పిండిలో తగినంత ఉప్పు వేసి చేత్తో బాగా కలపాలి. దీనిపై మూత పెట్టి రాత్రంతా పులియబెట్టాలి. మరుసటి రోజు ఉదయం పిండి బాగా పొంగుతుంది. అప్పుడు పిండిని నెమ్మదిగా కలిపి, నూనె రాసిన ఇడ్లీ ప్లేట్లలో వేసుకోవాలి. ఆవిరి మీద ఉడికిస్తే ఎంతో బలాన్నిచ్చే రుచికరమైన ప్రోటీన్ ఇడ్లీ రెడీ. కొబ్బరి చట్నీ లేదా కారం చట్నీతో వేడివేడిగా తింటే భలే రుచిగా ఉంటుంది.

హైద‌రాబాద్‌లో మాత్ర‌మే ల‌భించే స్పెష‌ల్ ఫుడ్‌.. లుఖ్నీని ఎప్పుడైనా ట్రై చేశారా.?

Narender Vaitla — Sat, 31 Oct 2026 07:02:49 +0530

Hyderabad: హైదరాబాద్ అనగానే బిర్యానీ, హలీమ్, ఇరానీ చాయ్ మాత్రమే చాలామందికి గుర్తొస్తాయి. కానీ భాగ్యనగరానికి ప్రత్యేకమైన మరో రుచికరమైన వంటకం కూడా ఉంది. అదే 'లుఖ్మీస‌. హైదరాబాద్ పాతకాలపు ఫుడ్ క‌ల్చ‌ర్‌లో భాగ‌మైన ఈ డిష్ గురించి ఇప్పుడు తెలుసుకుందాం.

లుఖ్మీ అనేది హైదరాబాద్ దక్కన్ ప్రాంతానికి చెందిన సంప్రదాయ వంటకం. ఇది చూడటానికి సమోసాలా అనిపించినా, తయారీ విధానం, ఆకారం, రుచి విషయంలో చాలా భిన్నంగా ఉంటుంది. సమోసా త్రిభుజాకారంలో ఉంటే.. లుఖ్మీ మాత్రం చదరపు ఆకారంలో ఉంటుంది. చిన్న చిన్న చపాతీ ముక్కల్లా కనిపించే వీటిని లోపల కీమా లేదా ఆలూ కుర్మ‌ నింపి తయారు చేస్తారు. లుఖ్మీ అనే పేరు ఉర్దూలోని 'లుక్మా' అనే పదం నుంచి వచ్చింది. అరబిక్ భాషలో ఈ పదానికి ఒక ముద్ద లేదా ఒక చిన్న ముక్క అనే అర్థం ఉంది. తినడానికి చిన్నగా ఉండటం, ఒక్కో ముక్కలో మంచి రుచి ఉండటంతో ఈ పేరు వచ్చిందని చెబుతారు.

లుఖ్మీ తయారీకి ప్రధానంగా మైదా, పెరుగు, నెయ్యి లేదా వెన్న, మటన్ కీమా ఉపయోగిస్తారు. ముందుగా మైదా పిండిలో పెరుగు కలిపి మెత్తగా పిసుకుతారు. కొంతసేపు పక్కన ఉంచి పిండి బాగా మృదువుగా అయ్యేలా చేస్తారు. మరోవైపు మటన్ కీమాను ఉల్లిపాయలు, అల్లం వెల్లుల్లి పేస్ట్, పచ్చిమిర్చి, కారం, పసుపు, గరం మసాలా వంటి పదార్థాలతో కలిపి ఉడికిస్తారు. తర్వాత పిండిని పలుచగా ఒత్తి చదరపు ఆకారంలో కట్ చేస్తారు. మధ్యలో తయారు చేసుకున్న కీమాను పెట్టి మరో పిండి ముక్కతో కప్పి అంచులను గట్టిగా మూసేస్తారు. అనంతరం నూనెలో వేయిస్తారు. కొన్ని సంప్రదాయ పద్ధతుల్లో పిండిని పొరలుగా తయారు చేసి వేయించడం వల్ల బయటివైపు కరకరలాడే ఆకృతి వస్తుంది. లోపల మసాలా కీమా మెత్తగా ఉండటంతో ప్రతి ముక్క ప్రత్యేకమైన రుచిని అందిస్తుంది.

చాలామంది లుఖ్మీని సమోసాకు మరో రూపంగా భావిస్తుంటారు. కానీ ఈ రెండింటి మధ్య కొన్ని ముఖ్యమైన తేడాలున్నాయి. సమోసాలో సాధారణంగా బంగాళాదుంపలు, బఠానీలు వంటి కూరగాయలతో పాటు మాంసం కూరను కూడా నింపుతారు. లుఖ్మీలో మాత్రం సంప్రదాయంగా మటన్ కీమాకే ఎక్కువ ప్రాధాన్యం ఉంటుంది. అయితే కొన్ని చోట్ల ఆలు కుర్మ కూడా ఉప‌యోగిస్తుంటారు.

అలాగే సమోసా త్రిభుజాకారంలో ఉంటే, లుఖ్మీ చదరపు ఆకారంలో ఉంటుంది. లుఖ్మీ పిండి పొరలు కూడా ప్రత్యేకంగా ఉంటాయి. బయటివైపు కరకరలాడుతూ, లోపల కీమా మసాలాల రుచి నిండుగా ఉండటం దీని ప్రత్యేకత. అందుకే సమోసా తిన్న రుచికి, లుఖ్మీ తిన్న రుచికి చాలా తేడా ఉంటుంది.

హైదరాబాద్‌కు ప్రత్యేకమైన ఆహార సంస్కృతి ఉంది. మొఘలాయ్, దక్కనీ వంటకాల ప్రభావంతో ఇక్కడ ఎన్నో ప్రత్యేకమైన వంటకాలు ప్రాచుర్యంలోకి వచ్చాయి. వాటిలో లుఖ్మీ కూడా ఒకటి. ముఖ్యంగా ఓల్డ్ సిటీలోని కుటుంబాలు తరతరాలుగా ఈ వంటకాన్ని తయారు చేసుకుంటూ వస్తున్నాయి. హైదరాబాద్ పెళ్లిళ్లలో లుఖ్మీకి ప్రత్యేక స్థానం ఉంటుంది. భోజనానికి ముందు అతిథులకు స్టార్టర్‌గా వేడివేడిగా వడ్డిస్తారు. రంజాన్ మాసం, పండుగలు, కుటుంబ వేడుకల్లో కూడా దీనికి మంచి ఆదరణ ఉంటుంది. తక్కువ పరిమాణంలోనే ఎక్కువ రుచి అందించడం, మాంసం ప్రియులకు నచ్చేలా ఉండటం దీని ప్రత్యేకత. ముఖ్యంగా బయట కరకరలాడే పిండి, లోపల ఘాటైన కీమా కలిసినప్పుడు వచ్చే రుచి లుఖ్మీని ప్రత్యేకంగా నిలబెడుతుంది. అందుకే హైదరాబాద్ సంప్రదాయ వంటకాల జాబితాలో దీనికి ప్రత్యేక గుర్తింపు ఉంది.

హైదరాబాద్‌లోని పాతబస్తీ ప్రాంతంలో ఉన్న పలు హోటళ్లు, ఇరానీ కేఫ్‌లు, బేకరీల్లో లుఖ్మీ అందుబాటులో ఉంటుంది. ముఖ్యంగా మటన్ లుఖ్మీ కోసం ఆహార ప్రియులు కొన్ని ప్రసిద్ధ హోటళ్లను సందర్శిస్తుంటారు. పిస్తా హౌస్, గ్రాండ్ హోటల్, ఆల్ఫా హోట‌ల్‌, హోటల్ షాదాబ్, బిస్మిల్లా హోటల్ వంటి చోట్ల లుఖ్మీ రుచులను ఆస్వాదించవచ్చు. వీటితో పాటు రుమాన్ కేఫ్, మౌంటెన్ బేకరీ, సికింద్రాబాద్‌లోని ప్యారడైజ్ వంటి ప్రాంతాల్లోనూ లభించే రకాలను ప్రయత్నించవచ్చు.

ప్రస్తుతం మటన్‌తో పాటు చికెన్ కీమాతో తయారు చేసే లుఖ్మీలు కూడా అందుబాటులో ఉన్నాయి. శాకాహారులకు అనుగుణంగా కొన్ని చోట్ల వెజిటేరియన్ రకాలను కూడా తయారు చేస్తున్నారు. అయితే అసలైన హైదరాబాద్ రుచిని ఆస్వాదించాలనుకునేవారు సంప్రదాయ మటన్ కీమా లుఖ్మీని తప్పకుండా ప్రయత్నించవచ్చు.

డిన్నర్ చేశాక పాత్ర‌ల‌ను క‌డ‌గ‌కుండా.. రాత్రంతా సింక్‌లో అలాగే వ‌దిలేస్తున్నారా.?

Narender Vaitla — Fri, 25 Sep 2026 14:43:44 +0530

Dirty Dishes: రాత్రి భోజ‌నం చేసిన త‌ర్వాత గిన్నెలను వెంటనే శుభ్రం చేయకుండా నీళ్లు, డిష్‌ సోప్‌ వేసి సింక్‌లో రాత్రంతా నానబెట్టడం చాలామందికి అలవాటు. కానీ ఇలా పాత్ర‌ల‌ను ఉంచ‌డం మంచిది కాదని నిపుణులు చెబుతున్నారు.

గిన్నెలకు బాగా అంటుకున్న ఆహారాన్ని తొలగించేందుకు కొంతసేపు నీటిలో నానబెట్టడం తప్పు కాదు. అయితే వాటిని రాత్రంతా నీటిలో ముంచి ఉంచడం అవసరం లేదు. గిన్నెలపై మిగిలిన ఆహార పదార్థాలు నీటిలో కలుస్తాయి. ఎక్కువసేపు అలాగే ఉంటే ఆ నీటిలో సూక్ష్మజీవులు పెరిగే అవకాశం ఉంటుంది. దీంతో నీరు మురికిగా మారడంతో పాటు గిన్నెలపై జిగట పొర ఏర్పడొచ్చు. ఫలితంగా ఉదయం గిన్నెలు సులభంగా శుభ్రం కావాల్సింది పోయి, మరింతగా రుద్దాల్సిన పరిస్థితి రావచ్చు.

మురికి గిన్నెలు, వాటిలో మిగిలిపోయిన ఆహార పదార్థాలను రాత్రంతా సింక్‌లో ఉంచితే కిచెన్‌లో దుర్వాసన రావచ్చు. ముఖ్యంగా మసాలాలు, మాంసాహారం, పాలు వంటి వాటి అవశేషాలు ఎక్కువసేపు అలాగే ఉంటే వాసన మరింత పెరిగే అవకాశం ఉంటుంది. ఈ వాసన సింక్‌ దగ్గర ఉండే స్పాంజ్‌లు, కిచెన్‌ క్లాత్స్‌, చెక్క వస్తువులకు కూడా అంటుకోవచ్చు. చెక్క వస్తువుల్లో తేమ ఎక్కువసేపు ఉండటం వల్ల సూక్ష్మజీవులు పెరగడానికి అనుకూల పరిస్థితులు ఏర్పడవచ్చు. అందుకే గిన్నెలను ఎక్కువసేపు సింక్‌లో వదిలేయకుండా శుభ్రం చేయడం మంచిది.

సింక్‌లో రాత్రంతా గిన్నెలు ఉంటే వాటిపై మిగిలిన ఆహార ముక్కలు చీమలు, బొద్దింకలు వంటి కీటకాలను ఆకర్షించవచ్చు. గిన్నెల్లోని ఆహార వాసన వాటిని కిచెన్‌ వైపు రప్పించే అవకాశం ఉంటుంది. గిన్నెలతో పాటు సింక్‌లో నీరు కూడా ఉండటంతో కీటకాలకు ఆహారం, నీరు రెండూ లభిస్తాయి. కిచెన్‌లో దాక్కునే ప్రదేశాలు కూడా ఉంటే అవి అక్కడే తిరుగుతూ ఉండే అవకాశం పెరుగుతుంది. అందుకే కేవలం గిన్నెలను శుభ్రం చేయడం మాత్రమే కాకుండా సింక్‌ చుట్టుపక్కల ఆహార అవశేషాలు లేకుండా చూసుకోవాలి.

సాధ్యమైనంత వరకు భోజనం చేసిన వెంటనే గిన్నెలను శుభ్రం చేయడం మంచిది. వెంటనే కడగడం కుదరకపోతే కనీసం వాటిని నీటితో బాగా కడిగి, మిగిలిన ఆహారాన్ని తొలగించాలి. గిన్నెకు ఆహారం గట్టిగా అంటుకుని ఉంటే కొంతసేపు గోరువెచ్చని నీటిలో డిష్‌ సోప్‌తో నానబెట్టవచ్చు. అయితే గంటల తరబడి లేదా రాత్రంతా అలాగే ఉంచాల్సిన అవసరం లేదు. ఇంట్లో డిష్‌వాషర్‌ ఉంటే మురికి గిన్నెలను సింక్‌లో పేర్చకుండా నేరుగా అందులో పెట్టడం మరో మంచి మార్గం.

రాత్రి పడుకునే ముందు సింక్‌ను ఖాళీగా ఉంచడం కిచెన్‌ పరిశుభ్రతకు ఉపయోగపడుతుంది. గిన్నెలను కడిగిన తర్వాత సింక్‌లో పడిన ఆహార ముక్కలను కూడా తొలగించాలి. మాంసం తాకిన ప్రదేశాలను సబ్బు, నీటితో బాగా శుభ్రం చేసి అవసరమైతే శానిటైజ్‌ చేయాలి. స్పాంజ్‌లు, కిచెన్‌ క్లాత్స్‌ను కూడా క్రమం తప్పకుండా శుభ్రం చేయాలి. సింక్‌ డ్రెయిన్‌లో ఆహార అవశేషాలు పేరుకుపోకుండా చూసుకోవాలి. కిచెన్‌లో చిన్న చిన్న ఆహార ముక్కలు పడినా వెంటనే శుభ్రం చేయాలి. చెత్త బుట్టను కూడా తరచుగా ఖాళీ చేస్తే కీటకాల సమస్యను తగ్గించుకోవచ్చు.