Asianet News Telugu

ఈ ఊరిలో ఏకంగా 54 హనుమంతుడి గుడులా..! 70 దేవాలయాలున్న తెలంగాణ గ్రామమేదో తెలుసా?

Arun Kumar P — Mon, 19 Oct 2026 19:50:09 +0530

తెలంగాణలోని ఓ గ్రామంలో 70 ఆలయాలు ఉన్నాయి… అందులో 54 హనుమంతుడి గుళ్లే. ఇంతకీ ఈ గ్రామం ఏది? ఇన్ని ఆలయాలు నిర్మించడం వెనకున్న ఆసక్తికరమైన స్టోరీ ఏంటి? తెలుసుకుందాం.

సాధారణంగా ఏ గ్రామంలో అయినా ఒకటిరెండు హనుమంతుడి ఆలయాలు కనిపిస్తాయి. కొంచెం పెద్దగ్రామం అయితే ఓ ఐదు లేదా పది ఆలయాలు ఉంటాయి… కానీ తెలంగాణలోని ఓ గ్రామంలో మాత్రం ఎటు చూసినా ఆంజనేయ స్వామి ఆలయాలే దర్శనమిస్తాయి. వీధుల్లో నడుస్తుంటే అడుగడుగునా హనుమంతుడి విగ్రహాలు, గుళ్లు కనిపిస్తాయి.. ఇలా ఏకంగా 70కి పైగా ఆలయాలు ఉన్న ఈ గ్రామం పేరు వెల్లుల్ల. జగిత్యాల జిల్లాలోని మెట్‌పల్లి మండలంలో ఉన్న ఈ పల్లెకు మరో ప్రత్యేకత కూడా ఉంది. ఇక్కడ ఉన్న ఆలయాల్లో సగానికి పైగా హనుమాన్ మందిరాలే కావడం విశేషం. అసలు ఈ గ్రామంలో ఇన్ని ఆలయాలు ఎందుకు నిర్మించారు? వీటి వెనుక ఉన్న కథేంటి?

జగిత్యాల జిల్లా మెట్‌పల్లి పట్టణానికి సుమారు 5 కిలోమీటర్ల దూరంలో వెల్లుల్ల గ్రామం ఉంది. గ్రామం విస్తీర్ణం, జనాభా పరంగా చూస్తే ఇది సాధారణ పల్లెగానే కనిపించినా, ఆలయాల సంఖ్య విషయంలో మాత్రం ప్రత్యేక గుర్తింపు పొందింది. 2011 జనగణన ప్రకారం ఈ గ్రామంలో 1,649 కుటుంబాలు ఉండగా, మొత్తం జనాభా 6,210 మంది. గ్రామంలో వ్యవసాయం, గ్రామీణ జీవన విధానంతో పాటు ఆధ్యాత్మిక సంప్రదాయాలకు కూడా ప్రాధాన్యం ఉంది.

ఒకే గ్రామంలో ఇన్ని దేవాలయాలు ఉండటంతో వెల్లుల్లను స్థానికంగా ఆలయాల గ్రామంగా పిలుస్తుంటారు. గ్రామంలోని వీధులు, సందుల్లో హనుమాన్ ఆలయాలు కనిపించడం ఇక్కడి ప్రత్యేకతను తెలియజేస్తుంది.

వెల్లుల్ల గ్రామంలో మొత్తం 70కి పైగా ఆలయాలు ఉన్నాయి… వాటిలో 54 హనుమాన్ ఆలయాలే. అంటే గ్రామంలో కనిపించే దేవాలయాల్లో అత్యధిక భాగం ఆంజనేయ స్వామివారికి అంకితం చేసినవే.

సాధారణంగా గ్రామాల్లో ఒక ప్రధాన హనుమాన్ ఆలయం చుట్టూ భక్తులు పూజలు చేస్తుంటారు. కానీ వెల్లుల్లలో మాత్రం వేర్వేరు వీధుల్లో, ఇళ్ల సమీపంలో ప్రత్యేక ఆలయాలు కనిపిస్తాయి. కొన్ని చోట్ల ఆలయ నిర్మాణాలు ఉండగా, మరికొన్ని ప్రాంతాల్లో హనుమంతుడి విగ్రహాలు ప్రతిష్ఠించారు. దీంతో గ్రామంలో ఎక్కడికి వెళ్లినా ఆంజనేయ స్వామి ఆరాధనకు సంబంధించిన ఆనవాళ్లు కనిపిస్తాయి.

వెల్లుల్ల గ్రామంలో ఆలయాలు ఎక్కువగా ఉండటానికి స్థానిక కుటుంబాల భక్తి సంప్రదాయమే ప్రధాన కారణంగా చెబుతారు. గతంలో గ్రామంలో బ్రాహ్మణ కుటుంబాలు గణనీయమైన సంఖ్యలో నివసించేవారట. ఆయా కుటుంబాల్లో ఎవరికైనా అనారోగ్యం ఎదురైనా, కుటుంబ సమస్యలు వచ్చినా లేదా ఏదైనా కోరిక నెరవేరాలని భావించినా ఆంజనేయ స్వామిని ప్రార్థించేవారని చెబుతారు.

తమ కోరికలు నెరవేరిన తర్వాత స్వామివారి విగ్రహాన్ని ప్రతిష్ఠించి, ఆలయాన్ని నిర్మించడం ద్వారా మొక్కు తీర్చుకునేవారట. కొందరు తమ ఇళ్ల పక్కనే చిన్న ఆలయాలను ఏర్పాటు చేసుకున్నారు… ఇలా ఒక్కో కుటుంబం నిర్మించిన ఆలయాలు కాలక్రమేణా పెరిగి, గ్రామమంతా హనుమాన్ మందిరాలు కనిపించే పరిస్థితి ఏర్పడింది. తరతరాలుగా కొనసాగిన వ్యక్తిగత భక్తి, కుటుంబ ఆచారాలు, మొక్కులు కలిసి వెల్లుల్ల గ్రామానికి ఈ ప్రత్యేక గుర్తింపును తీసుకొచ్చాయి.

గ్రామంలో ప్రతి ఆలయానికీ ప్రత్యేకత

వెల్లుల్లలోని ఆలయాలన్నీ ఒకే సమయంలో లేదా ఒకే వ్యక్తి ఆధ్వర్యంలో నిర్మించినవి కావు. వేర్వేరు కుటుంబాలు, భక్తులు తమ విశ్వాసాలకు అనుగుణంగా ఆలయాలను నిర్మించుకున్నట్లు చరిత్ర చెబుతోంది. అందువల్ల వాటి నిర్మాణ శైలి, పరిమాణం, నిర్వహణలోనూ తేడాలు కనిపించవచ్చు.

కొన్ని ఆలయాలు చిన్నవిగా ఉంటే, మరికొన్ని కొంత విస్తీర్ణంలో నిర్మించినవి. కొన్ని చోట్ల ఆలయం లేకుండానే హనుమంతుడి విగ్రహాలు కనిపిస్తాయి. ఇలాంటి విభిన్న రూపాలు ఈ గ్రామంలోని ఆరాధనా సంప్రదాయాన్ని ప్రత్యేకంగా నిలుపుతున్నాయి.

హనుమంతుడిని భక్తులు బలం, ధైర్యం, విశ్వాసానికి ప్రతీకగా భావిస్తారు. తెలంగాణలోని అనేక గ్రామాల్లో హనుమాన్ జయంతిని భక్తిశ్రద్ధలతో నిర్వహిస్తారు. వెల్లుల్లలోనూ ఈ పండుగకు ప్రత్యేక ప్రాధాన్యం ఉంది. భక్తులు హనుమాన్ దీక్ష చేపట్టడం, పూజలు చేయడం, భజనల్లో పాల్గొనడం వంటి ఆధ్యాత్మిక కార్యక్రమాలు నిర్వహిస్తుంటారు.

గ్రామంలో ఆలయాలు ఎక్కువగా ఉండటంతో పండుగ సమయంలో ఆధ్యాత్మిక వాతావరణం మరింత కనిపిస్తుంది. స్థానికులతో పాటు చుట్టుపక్కల ప్రాంతాల నుంచి కూడా భక్తులు ఈ ఆలయాలను సందర్శించేందుకు వస్తుంటారు.

తరతరాల భక్తికి నిదర్శనంగా వెల్లుల్ల

సాధారణంగా ఒక కుటుంబం తమ ఇంటి వద్ద దేవుడి విగ్రహాన్ని ప్రతిష్ఠించడం లేదా చిన్న ఆలయాన్ని నిర్మించుకోవడం వ్యక్తిగత విశ్వాసానికి సంబంధించిన విషయం. కానీ అలాంటి సంప్రదాయం ఒక గ్రామంలో అనేక కుటుంబాల ద్వారా కొనసాగితే, ఆ ప్రాంతానికే ప్రత్యేక గుర్తింపు వస్తుంది. వెల్లుల్ల గ్రామంలో కనిపించే హనుమాన్ ఆలయాల వెనుక కూడా ఇలాంటి భక్తి సంప్రదాయం ఉందని తెలుస్తోంది.

ఈ గ్రామ ప్రత్యేకత కేవలం ఆలయాల సంఖ్యలోనే లేదు. కుటుంబాల విశ్వాసాలు, తరతరాలుగా కొనసాగుతున్న పూజా పద్ధతులు, స్థానిక సమాజంలో ఆధ్యాత్మికతకు ఉన్న స్థానం కూడా ఇందులో భాగమే. అందుకే వెల్లుల్ల పేరు తెలంగాణలోని ప్రత్యేక ఆధ్యాత్మిక గ్రామాల ప్రస్తావనలో వినిపిస్తోంది.

ఒకే గ్రామంలో ఇన్ని ఆంజనేయ స్వామి ఆలయాలు కనిపించడం అరుదైన విషయమే. అందుకే వెల్లుల్ల గ్రామం కేవలం ఒక పల్లెగా కాకుండా, హనుమంతుడిపై ప్రజలకు ఉన్న విశ్వాసానికి ప్రతీకగా నిలుస్తోంది.

River : ఆంధ్రప్రదేశ్‌లో కేవలం 18 కి.మీ. మాత్రమే ప్రవహించే నది ఉంది.. ఏదో తెలుసా?

Arun Kumar P — Mon, 19 Oct 2026 17:51:27 +0530

వందలు, వేల కిలోమీటర్లు ప్రవహించే నదులే కాదు… పదుల కిలోమీటర్లు ప్రయాణించే నదులు కూడా భారతదేశంలో ఉన్నాయి. ఇలా కేవలం 18 కి.మీ దూరమే ఏపీలో ప్రవహించే నది ఒకటుంది… ఏదో తెలుసా?

సాధారణంగా ఒక నది పుట్టిన ప్రాంతం నుంచి ఎన్నో జిల్లాలు, రాష్ట్రాల మీదుగా వందల కిలోమీటర్లు ప్రయాణించి సముద్రంలో కలుస్తుంది. కానీ కొన్ని నదుల ప్రయాణం మాత్రం చాలా ప్రత్యేకంగా ఉంటుంది. అలాంటి నదుల్లో బహుదా నది ఒకటి. ఒడిశాలోని కొండ ప్రాంతాల్లో పుట్టి, అక్కడి భూభాగంలో ఎక్కువ దూరం ప్రవహించే ఈ నది ఆంధ్రప్రదేశ్‌లోకి అడుగుపెట్టిన కొద్ది దూరానికే బంగాళాఖాతంలో కలుస్తుంది. మొత్తం 96 కిలోమీటర్ల పొడవున్న ఈ నది మన రాష్ట్రంలో కేవలం 18 కిలోమీటర్లు మాత్రమే ప్రవహిస్తుంది. ఇంత చిన్న నదికి ఉత్తరాంధ్ర భౌగోళిక స్వరూపంలో ప్రత్యేక స్థానం ఉంది.

బహుదా నది ఒడిశాలోని గజపతి జిల్లాలో రామగిరి కొండల ప్రాంతంలో జన్మిస్తుంది. కొండ ప్రాంతాల్లో కురిసే వర్షాలు, చిన్నచిన్న నీటి ప్రవాహాలు కలిసి ఈ నదికి నీటిని అందిస్తాయి. ఎగువ ప్రాంతాల నుంచి దిగువకు సాగుతూ ఒడిశాలోని గజపతి, గంజాం జిల్లాల పరిధిలో ప్రవహిస్తుంది. ఆ తర్వాత ఆంధ్రప్రదేశ్ వైపు తన ప్రయాణాన్ని కొనసాగిస్తుంది.

కొండ ప్రాంతాల్లో పుట్టే నదులకు వర్షాకాలంలో నీటి ప్రవాహం పెరగడం సాధారణం. బహుదా కూడా తన పరీవాహక ప్రాంతంలో కురిసే వర్షాలపై ఆధారపడి నీటిని సేకరిస్తుంది. అందుకే వర్షపాతం, స్థానిక భౌగోళిక పరిస్థితులు ఈ నది ప్రవాహంపై ప్రభావం చూపుతాయి.

బహుదా నది ప్రయాణంలో ఆసక్తికరమైన విషయం ఏమిటంటే.. 96 కి.మీ ప్రయాణించే ఈ నదిలో ఎక్కువ భాగం ఒడిశాలోనే ఉంటుంది. సుమారు 78 కిలోమీటర్లు ఒడిశాలొ ప్రవహించిన తర్వాత, శ్రీకాకుళం జిల్లా మీదుగా ఆంధ్ర ప్రదేశ్ లో ప్రవేశిస్తుంది. అయితే ఏపీలో కేవలం 18 కిలోమీటర్లు ప్రయాణించి బంగాళాఖాతంలో కలుస్తుంది.

బహుదా నది మొత్తం పొడవులో సుమారు 81 శాతం ఒడిశాలో, మిగిలిన 19 శాతం ఆంధ్రప్రదేశ్‌లో ఉంటుంది. మన రాష్ట్ర సరిహద్దును దాటిన తర్వాత కొద్ది దూరంలోనే సముద్రాన్ని చేరడం బహుదా నది ప్రయాణంలోని ప్రత్యేకత. ఏపీలో ప్రవహించే దూరం చాలా తక్కువగా ఉండటంతో ఇది ఆసక్తికరమైన భౌగోళిక అంశంగా నిలుస్తోంది.

బహుదా నది ఆంధ్రప్రదేశ్‌లోని శ్రీకాకుళం జిల్లా ఉత్తర ప్రాంతానికి చేరుకుని, ఇచ్చాపురం పరిసర తీరప్రాంతం వైపు ప్రవహిస్తుంది. చివరకు బంగాళాఖాతంలో కలుస్తుంది. ఈ ప్రాంతం ఒడిశా, ఆంధ్రప్రదేశ్ రాష్ట్రాలకు సమీపంలో ఉండటంతో నది ప్రయాణం రెండు రాష్ట్రాల భౌగోళిక సంబంధాన్ని కూడా తెలియజేస్తుంది.

బహుదా నది పరీవాహక ప్రాంతం ఎంత?

బహుదా నది పొడవు తక్కువే అయినా, దాని నీటి పరివాహక ప్రాంతం మాత్రం కొంత ఎక్కువగానే ఉంటుంది. ఈ నది పరీవాహక ప్రాంతం మొత్తం సుమారు 1,118 చదరపు కిలోమీటర్లు. ఇందులో 890 చదరపు కిలోమీటర్లు ఒడిశాలో, 228 చదరపు కిలోమీటర్లు ఆంధ్రప్రదేశ్‌లో ఉన్నాయి. అంటే బహుదా నది ప్రవాహంలోనే కాదు దాని పరీవాహక ప్రాంతం విషయంలోనూ రెండు రాష్ట్రాలకు సంబంధం ఉంది.

పరీవాహక ప్రాంతం అంటే వర్షపు నీరు, చిన్న వాగులు వంటి ప్రవాహాల ద్వారా ఒక నదికి నీరు చేరే భూభాగం. నది పొడవు తక్కువగా ఉన్నప్పటికీ, ఈ ప్రాంతంలో కురిసే వర్షాలు, భూమి వాలు, స్థానిక వాగుల ప్రవాహం నదికి నీటిని అందిస్తాయి.

బహుదా నది వ్యవస్థలో పోయిచందియా, బోగినది, బత్రుడా నాలా వంటి ఉపనదులు, చిన్న నీటి ప్రవాహాలు ముఖ్యమైన పాత్ర పోషిస్తాయి. ఇవి వివిధ ప్రాంతాల నుంచి నీటిని ప్రధాన నదిలోకి చేరుస్తాయి. దీంతో వర్షాకాలంలో నది ప్రవాహం పెరగడానికి సహకరిస్తాయి.

చిన్న నదుల గురించి మాట్లాడేటప్పుడు వాటి పొడవుతో పాటు ఉపనదులు, నీటి సేకరణ ప్రాంతం, ప్రవాహ మార్గాన్ని కూడా పరిశీలించాలి. అప్పుడే ఆ నది స్థానిక పర్యావరణానికి, వ్యవసాయానికి, భూగర్భ జలాల పరిస్థితులకు ఎలా సంబంధం కలిగి ఉందో అర్థం చేసుకోవచ్చు.

శ్రీకాకుళం జిల్లాలో బహుదా నది ప్రాధాన్యం

శ్రీకాకుళం జిల్లాలో ప్రవహించే ముఖ్యమైన నదుల్లో బహుదా కూడా ఒకటి. ఈ నది బొడ్డపాడు గ్రామం సమీపంలో ఇచ్చాపురం మండలం పరిధిలోకి ప్రవేశించి, ఇచ్చాపురం, కవిటి, మందస మండలాల వైపు ప్రవహిస్తుంది. చివరకు డొంకూరు వద్ద బంగాళాఖాతంలో కలుస్తుంది.

ఉత్తరాంధ్ర తీరప్రాంతంలో నదులు, వాగులు స్థానిక భౌగోళిక వ్యవస్థలో భాగంగా ఉంటాయి. వర్షపు నీటిని దిగువ ప్రాంతాలకు చేరవేయడం, నదీ పరివాహక ప్రాంతంలోని నీటి ప్రవాహాన్ని సముద్రం వైపు మళ్లించడం వాటి సహజ పాత్ర.

పెద్ద నదుల గురించి ఎక్కువగా చర్చ జరుగుతుంటుంది. కానీ బహుదా వంటి చిన్న నదులు కూడా స్థానిక భౌగోళిక స్వరూపంలో ముఖ్యమైన భాగమే. కొండ ప్రాంతాల్లో పుట్టి, ఒకటి కంటే ఎక్కువ జిల్లాలు, రాష్ట్రాల మీదుగా ప్రవహించి సముద్రంలో కలిసే నదులు ప్రకృతి వ్యవస్థల మధ్య ఉన్న సంబంధాన్ని తెలియజేస్తాయి.

నదుల ప్రవాహ మార్గాలను తెలుసుకోవడం ద్వారా వర్షపు నీటి నిర్వహణ, వరదల అంచనా, నీటి వనరుల సంరక్షణ వంటి అంశాలపై అవగాహన పెరుగుతుంది. ముఖ్యంగా రాష్ట్ర సరిహద్దులను దాటి ప్రవహించే నదుల విషయంలో రెండు రాష్ట్రాల పరివాహక ప్రాంతాలను కలిపి పరిశీలించడం అవసరం.

మొత్తానికి బహుదా నది ఆంధ్రప్రదేశ్‌లో కేవలం 18 కిలోమీటర్లు మాత్రమే ప్రవహించినా, దాని మొత్తం ప్రయాణం 96 కిలోమీటర్లు. ఒడిశాలోని రామగిరి కొండల్లో పుట్టి, గజపతి, గంజాం జిల్లాల గుండా సాగి, శ్రీకాకుళం జిల్లా తీరప్రాంతంలో బంగాళాఖాతాన్ని చేరుతుంది. ఈ నది పరీవాహక ప్రాంతం 1,118 చదరపు కిలోమీటర్లుగా ఉండటం, ఉపనదుల ద్వారా నీటిని సేకరించడం వంటి అంశాలు దీని ప్రత్యేకతను తెలియజేస్తున్నాయి.

Diwali Vacation: దీపావళి లాంగ్ వీకెండ్‌కు అదిరిపోయే ట్రిప్.. 10 బెస్ట్ డెస్టినేషన్లు.. లైఫ్ టైం మెమొరీ

Nandini Arava — Mon, 19 Oct 2026 17:19:56 +0530

Diwali Vacation: దీపావళి సెలవుల్లో కుటుంబంతో కలిసి ఓ ట్రిప్‌ వేయాలని ప్లాన్ చేస్తున్నారా? అయితే దేశంలో దీపాల వెలుగులతో మెరిసే నగరాల నుంచి ప్రకృతి అందాల మధ్య సేదతీరే ప్రాంతాల వరకు.. 10 బెస్ట్ ప్లేసేస్ గురించి తెలుసుకుందాం.

దీపావళి అంటే దీపాల వెలుగులు, బాణసంచా సందడి, కుటుంబ సభ్యులతో ఆనందంగా గడిపే సమయం. పండగ సందర్భంగా వరుస సెలవులు రావడంతో చాలామంది విహారయాత్రలకు ప్లాన్ చేసుకుంటారు. కొన్ని ప్రాంతాల్లో దీపాల అలంకరణలు, ప్రత్యేక పూజలు ఆధ్యాత్మిక అనుభూతిని ఇస్తాయి. మరికొన్ని చోట్ల ప్రకృతి అందాలు, కొండలు, నదులు మనసుకు ప్రశాంతతను ఇస్తాయి. ఈ దీపావళికి పండగ సంబరాలతో పాటు కొత్త ప్రదేశాలను చూడాలనుకుంటే దేశంలోని ఈ పది ప్రాంతాలను మీ ట్రావెల్ లిస్ట్‌లో చేర్చుకోవచ్చు.

దీపావళి సమయంలో ప్రత్యేక ఆకర్షణగా నిలుస్తుంది. ఇక్కడి దీపావళి వేడుకలను చూసేందుకు పెద్ద సంఖ్యలో పర్యాటకులు వస్తుంటారు. సరయూ నది ఘాట్లపై దీపాల వెలుగులు, ఆలయాల అలంకరణలు, రామలీలా ప్రదర్శనలు పండగ వాతావరణాన్ని మరింత ప్రత్యేకంగా మారుస్తాయి. ఇంకా ఇక్కడ చూడదగిన ప్రదేశాలు..చూడదగిన ప్రదేశాలు.. రామజన్మభూమి ఆలయం, హనుమాన్ గఢీ, సరయూ నది ఘాట్లు.

గంగానది తీరంలోని వారణాసి ఆధ్యాత్మిక పర్యాటకానికి ప్రసిద్ధి. ఇక్కడి ఘాట్లు, పురాతన ఆలయాలు, సాయంత్రం జరిగే గంగా హారతి పర్యాటకులను ఆకట్టుకుంటాయి. దీపావళి సమయంలో నగరం దీపాల వెలుగులతో కళకళలాడుతుంది. దీపావళి తర్వాత కార్తీక పౌర్ణమి సందర్భంగా నిర్వహించే దేవ్ దీపావళి వేడుకలు కూడా ఎంతో ప్రసిద్ధి. చూడదగిన ప్రదేశాలు దశాశ్వమేథ ఘాట్, కాశీ విశ్వనాథ ఆలయం, అస్సీ ఘాట్.

రిషికేశ్..

ఉత్తరాఖండ్‌లోని రిషికేశ్ ఆధ్యాత్మికతతో పాటు సాహస క్రీడలను ఆస్వాదించాలనుకునేవారికి అనువైన ప్రదేశం. గంగానది ఒడ్డున జరిగే హారతి, ప్రశాంతమైన ప్రకృతి వాతావరణం పర్యాటకులకు ఆహ్లాదాన్ని అందిస్తాయి. రివర్ రాఫ్టింగ్, ప్రకృతి నడకలు, యోగా కేంద్రాలు ఈ ప్రాంతంలోని ప్రత్యేక ఆకర్షణలు. అయితే రాఫ్టింగ్ అందుబాటు వాతావరణం, స్థానిక అనుమతులపై ఆధారపడి ఉంటుంది. ఇక్కడ చూడదగిన ప్రదేశాలు..త్రివేణి ఘాట్, లక్ష్మణ్ ఝులా పరిసరాలు, బీచ్ ప్రాంతాలు, ఆశ్రమాలు.

పంజాబ్‌లోని అమృత్‌సర్‌లో దీపావళి వేడుకలకు ప్రత్యేక ప్రాధాన్యం ఉంది. ఇదే సమయంలో సిక్కులు బందీ ఛోర్ దివస్‌ను కూడా జరుపుకుంటారు. స్వర్ణ దేవాలయం దీపాలు, విద్యుత్ అలంకరణలతో ప్రకాశిస్తూ సందర్శకులను ఆకట్టుకుంటుంది. ఆలయం చుట్టూ ఉన్న పవిత్ర జలాశయంలో ప్రతిబింబించే దీపాల వెలుగులు చూడముచ్చటగా ఉంటాయి. చూడదగిన ప్రదేశాలు..స్వర్ణ దేవాలయం, జలియన్‌వాలా బాగ్, వాఘా సరిహద్దు.

రాజస్థాన్ రాజధాని జైపూర్‌ను పింక్ సిటీ అని పిలుస్తారు. దీపావళి సమయంలో ఇక్కడి మార్కెట్లు, పురాతన భవనాలు, వీధులు రంగురంగుల విద్యుత్ దీపాలతో అలంకరించి ఉంటారు. సంప్రదాయ ఆభరణాలు, దుస్తులు, హస్తకళా వస్తువులు కొనాలనుకునేవారికి ట్రావెలింగ్ కి బెస్ట్ ఆప్షన్. చారిత్రక కోటలు, రాజభవనాలు కూడా పర్యాటకులకు ప్రత్యేక అనుభూతిని అందిస్తాయి. చూడదగిన ప్రదేశాలు..హవా మహల్, అంబర్ కోట, నహర్‌గఢ్ కోట, జోహరి బజార్.

ప్రకృతి అందాల మధ్య ప్రశాంతంగా సెలవులు గడపాలనుకునేవారికి కేరళ మంచి ఎంపిక. అలెప్పీ బ్యాక్‌వాటర్స్‌లో హౌస్‌బోట్ ప్రయాణం, మున్నార్‌లో తేయాకు తోటలు, కొచ్చిలోని చారిత్రక ప్రాంతాలు పర్యాటకులను ఆకర్షిస్తాయి. కేరళలో దీపావళి వేడుకలు దేశంలోని కొన్ని ఇతర ప్రాంతాలతో పోలిస్తే భిన్నంగా ఉంటాయి. అయినప్పటికీ ప్రకృతి, స్థానిక వంటకాలు, సంస్కృతిని ఆస్వాదించేందుకు ఈ రాష్ట్రం అనువైనది. అంతేకాకుండా అలెప్పీ, మున్నార్, కొచ్చి, కుమరకోమ్ చూడొచ్చు.

కొండలు, లోయలు, చల్లని వాతావరణం ఇష్టపడేవారు హిమాచల్ ప్రదేశ్‌ను ఎంచుకోవచ్చు. షిమ్లా, మనాలి, ధర్మశాల వంటి ప్రాంతాలు ప్రకృతి అందాలకు ప్రసిద్ధి. పర్వతాల మధ్య నడకలు, స్థానిక మార్కెట్లు, పురాతన ఆలయాలు, అందమైన దృశ్యాలు ఈ ప్రయాణాన్ని ప్రత్యేకంగా మారుస్తాయి. వాతావరణాన్ని బట్టి మంచు కురుస్తుంది కాబట్టి..ఇంకా ఎంజాయ్ చేయొచ్చు. షిమ్లా మాల్ రోడ్, రిడ్జ్, మనాలిలోని హడింబా ఆలయం, ధర్మశాలను చాలా బాగుంటాయి.

దీపావళి సెలవులను ఆధ్యాత్మిక యాత్రకు ఉపయోగించుకోవాలనుకునేవారు జ్యోతిర్లింగ క్షేత్రాలను సందర్శించవచ్చు. దేశంలోని 12 జ్యోతిర్లింగాలు శివభక్తులకు ఎంతో పవిత్రమైనవి. గుజరాత్‌లోని సోమనాథ్, మధ్యప్రదేశ్‌లోని మహాకాళేశ్వర్, మహారాష్ట్రలోని భీమశంకర్, త్రయంబకేశ్వర్ వంటి క్షేత్రాలు చారిత్రక, ఆధ్యాత్మిక ప్రాధాన్యాన్ని కలిగి ఉన్నాయి. అన్ని క్షేత్రాలను ఒకే ప్రయాణంలో సందర్శించడం కష్టమవుతుంది కాబట్టి, సమయం, ప్రయాణ సౌకర్యాలను బట్టి ఒకటి లేదా రెండు ప్రాంతాలను ఎంచుకోవచ్చు. సోమనాథ్, ఉజ్జయినిలోని మహాకాళేశ్వర్, త్రయంబకేశ్వర్, భీమశంకర్ క్షేత్రాలను దర్శించవచ్చు.

కర్ణాటకలోని మైసూరు చారిత్రక కట్టడాలు, రాజభవనాలు, సంప్రదాయాలకు ప్రసిద్ధి. మైసూరు దసరా వేడుకల సమయంలో రాజభవనాన్ని వేలాది బల్బులతో అలంకరించడం ప్రత్యేక ఆకర్షణ. అయితే ఆ ప్రసిద్ధ విద్యుద్దీపాల అలంకరణ దసరా వేడుకలకు సంబంధించింది; దీపావళి సమయంలోనూ అదే స్థాయిలో అలంకరణ ఉంటుందని ముందుగా నిర్ధారించుకోవాలి. మైసూరు పట్టు చీరలు, స్థానిక మార్కెట్లు, చారిత్రక ప్రదేశాలను సందర్శిస్తూ సెలవులను ఆనందంగా గడపవచ్చు. అంతేకాకుండా మైసూరు ప్యాలెస్, చాముండేశ్వరి ఆలయం, సెయింట్ ఫిలోమినా చర్చి, స్థానిక మార్కెట్లు కూడా మెరిసిపోతుంటాయి.

సాధారణ పర్యాటక ప్రాంతాలకు భిన్నంగా కొత్త అనుభూతిని కోరుకునేవారు ఈశాన్య భారతంలోని రాష్ట్రాలను సందర్శించవచ్చు. అసోంలోని కాజిరంగా జాతీయ పార్క్, మేఘాలయలోని జీవ వేర్ల వంతెనలు, సిక్కింలోని పర్వత దృశ్యాలు, అరుణాచల్ ప్రదేశ్‌లోని ప్రకృతి అందాలు ఈ ప్రాంతానికి ప్రత్యేక ఆకర్షణ. స్థానిక గిరిజన సంస్కృతి, సంప్రదాయ ఆహారం, ప్రశాంతమైన వాతావరణం ఈ ప్రయాణాన్ని మరింత ఆసక్తికరంగా మారుస్తాయి. చూడదగిన ప్రదేశాలు...కాజిరంగా, చిరపుంజి, షిల్లాంగ్, గ్యాంగ్‌టక్.

దీపావళి ట్రిప్ ప్లాన్ చేసుకునే ముందు ఈ విషయాలు గుర్తుంచుకోండి

టికెట్లు ముందుగానే బుక్ చేసుకోండి. పండగ సెలవుల్లో రైళ్లు, విమానాలు, హోటళ్లకు డిమాండ్ ఎక్కువగా ఉంటుంది. కొండ ప్రాంతాలకు వెళ్తే చలికి తగిన దుస్తులు తీసుకెళ్లండి. దీపోత్సవం, దేవ్ దీపావళి వంటి తేదీలు ప్రతి సంవత్సరం మారవచ్చు. తెలుసుకుని వెళ్లండి. బడ్జెట్‌ను ముందే నిర్ణయించుకోండి. చిన్నపిల్లలు, వృద్ధులు ఉంటే ప్రయాణ సమయం, వాతావరణం, వైద్య సదుపాయాలను కూడా పరిగణనలోకి తీసుకోండి. దీపావళి సెలవులను ఇంట్లోనే గడపకుండా కొత్త ప్రాంతాలను సందర్శించేందుకు ఉపయోగించుకోవచ్చు. ముందస్తు ప్లాన్ ఉంటే ఈ దీపావళి సెలవులను కుటుంబంతో కలిసి మధుర జ్ఞాపకాలుగా మార్చుకోవచ్చు.

Telugu Saying: అంగట్లో అన్నీ ఉన్నా అల్లుడి నోట్లో శని ఉన్నట్లు! ఈ సామెత అసలు అర్థం ఏంటో తెలుసా?

Kavitha G — Mon, 19 Oct 2026 14:43:46 +0530

Telugu Saying: “అంగట్లో అన్నీ ఉన్నా అల్లుడి నోట్లో శని ఉన్నట్లు” అనే సామెతను మన పెద్దల దగ్గర ఎప్పుడో ఒకప్పుడు వినే ఉంటాం. ఈ సామెతలో అల్లుడు, అంగడి, శని అనే పదాల వెనుక ఆసక్తికరమైన భావం దాగి ఉంది. ఈ సామెత అర్థం ఏంటో, ఏ సందర్భాల్లో ఉపయోగిస్తారో చూద్దాం.

తెలుగు భాషలో సామెతలకు ప్రత్యేకమైన స్థానం ఉంది. మన పూర్వీకులు తమ జీవిత అనుభవాలను, సమాజంలో గమనించిన పరిస్థితులను, మనుషుల ప్రవర్తనను చిన్నచిన్న మాటల్లోనే అద్భుతంగా వివరించారు. అలాంటి సామెతల్లో ఒకటి “అంగట్లో అన్నీ ఉన్నా అల్లుడి నోట్లో శని ఉన్నట్లు” అనే సామెత. ఈ సామెతను పెద్దలు సరదాగా మాట్లాడేటప్పుడు, ఒకరి పరిస్థితిని వివరించేటప్పుడు తరచుగా ఉపయోగిస్తుంటారు. కావాల్సినవన్నీ అందుబాటులో ఉన్నా వాటిని అనుభవించలేని పరిస్థితి ఎదురైనప్పుడు ఈ మాట గుర్తుకొస్తుంది. అయితే ఈ సామెతలో అంగడి, అల్లుడు, శని అనే పదాలు ఎందుకు వచ్చాయి? వీటి వెనుక ఉన్న భావం ఏంటి? నేటి జీవితానికి ఈ సామెత ఎలా వర్తిస్తుంది? అనే విషయాలు తెలుసుకుందాం.

సామెతలోని పదాలను గమనిస్తే ముందుగా “అంగట్లో అన్నీ ఉన్నా” అనే మాట కనిపిస్తుంది. అంగడి అంటే దుకాణం లేదా మార్కెట్. అక్కడ కావాల్సిన వస్తువులన్నీ అందుబాటులో ఉన్నాయని ఈ మాట సూచిస్తుంది. అంటే కొరత ఏమీ లేదు, అవసరమైనవి పొందడానికి అవకాశాలు పుష్కలంగా ఉన్నాయి. “అల్లుడి నోట్లో శని ఉన్నట్లు” అనే మాట ఈ పరిస్థితికి ఒక ఆసక్తికరమైన మలుపు ఇస్తుంది. సాధారణంగా అల్లుడు ఇంటికి వచ్చినప్పుడు అతనికి రకరకాల వంటకాలు పెట్టి మర్యాద చేయడం మన సంప్రదాయాల్లో కనిపిస్తుంది. అలాంటి అల్లుడి ముందు ఎన్నో రుచికరమైన పదార్థాలు ఉన్నప్పటికీ, వాటిని తినలేని పరిస్థితి ఏర్పడితే ఎలా ఉంటుంది? అన్న భావాన్ని ఈ సామెత సరదాగా వ్యక్తపరుస్తుంది. ఇక్కడ శని అనే పదం అడ్డంకి, ప్రతికూల పరిస్థితి లేదా అనుకోని ఇబ్బందికి ప్రతీకగా అర్థం చేసుకోవచ్చు.

ఈ సామెతకు ప్రధాన అర్థం మన చుట్టూ అన్ని సౌకర్యాలు ఉన్నప్పటికీ వాటిని ఉపయోగించుకునే అవకాశం లేకపోవడం. కొన్నిసార్లు మనకు కావాల్సినవి అన్నీ ఉంటాయి. డబ్బు ఉంటుంది, మంచి ఉద్యోగం ఉంటుంది, సౌకర్యవంతమైన ఇల్లు ఉంటుంది, మన చుట్టూ సహకరించే వ్యక్తులు కూడా ఉంటారు. అయినప్పటికీ ఏదో ఒక కారణంతో మనం కోరుకున్న సంతోషాన్ని పొందలేకపోతాం. ఒకరికి మంచి జీతం ఉన్నా ఆరోగ్య సమస్యల వల్ల ఇష్టమైన ఆహారాన్ని తినలేకపోవచ్చు. మరొకరికి ప్రయాణాలు చేయడానికి డబ్బు ఉన్నా సమయం దొరకకపోవచ్చు. ఇంకొకరికి మంచి వ్యాపార అవకాశం ఎదురైనా సరైన సమయంలో నిర్ణయం తీసుకోలేకపోవచ్చు. ఇలాంటి సందర్భాల్లో ఈ సామెతను ఉపయోగించవచ్చు.

మన రోజువారీ జీవితంలో ఈ సామెతకు సరిపోయే ఉదాహరణలు ఎన్నో కనిపిస్తాయి. ఒక విద్యార్థికి చదువుకోవడానికి మంచి పుస్తకాలు, కంప్యూటర్, ఇంటర్నెట్ వంటి సదుపాయాలు అన్నీ ఉన్నా ఏకాగ్రత లేకపోతే ఆశించిన ఫలితాలు సాధించలేడు. మరోవైపు, తక్కువ సదుపాయాలు ఉన్న విద్యార్థి కష్టపడి చదివి మంచి ఫలితాలు సాధించవచ్చు. ఇలాంటి సందర్భాల్లో అవకాశాలు ఉన్నా వాటిని అందిపుచ్చుకోలేని పరిస్థితిని ఈ సామెత ద్వారా వివరించవచ్చు.

కుటుంబ జీవితంలోనూ ఈ సామెతను సరదాగా ఉపయోగిస్తుంటారు. ఇంట్లో ఎన్నో రకాల వంటకాలు చేసినా, వాటిని తినాల్సిన వ్యక్తికి ఉపవాసం ఉండాల్సి రావచ్చు. ఒక వేడుకకు వెళ్లాలని ఎంతో ఆశపడినా అనుకోని పని వల్ల వెళ్లలేకపోవచ్చు. ఒక పండగకు కొత్త బట్టలు కొనుక్కున్నా అనారోగ్యం కారణంగా వేడుకలో పాల్గొనలేకపోవచ్చు. ఇలాంటి సందర్భాల్లో “అంగట్లో అన్నీ ఉన్నా అల్లుడి నోట్లో శని” అని అంటారు. అయితే ఈ సామెతను ఇతరులను ఎగతాళి చేయడానికి కాకుండా, పరిస్థితిలోని వైరుధ్యాన్ని సరదాగా చెప్పడానికి ఉపయోగిస్తే మరింత సహజంగా ఉంటుంది.

నిమ్మతొనలు గుర్తున్నాయా? 90’s కిడ్స్ ఫేవరెట్‌, ఇప్పుడెక్కడ దొరుకుతున్నాయంటే

Mahesh Jujjuri — Mon, 19 Oct 2026 13:31:53 +0530

1990లలో బాల్యం గడిపిన చాలామందికి అప్పట్లో చిన్న దుకాణాల్లో దొరికే చిరుతిళ్లతో ఎన్నో మధుర జ్ఞాపకాలు ఉంటాయి. చేతిలో ఉన్న కొద్దిపాటి డబ్బులతో ఇష్టమైనవి కొనుక్కుని స్నేహితులతో పంచుకోవడం పిల్లలకు ఎంతో ఆనందం. అలాంటి చిరుతిళ్లలో ‘నిమ్మతొనలు’ కూడా ఉన్నాయి.

ఇప్పుడంటే పిల్లల కోసం మార్కెట్లో రకరకాల చాక్లెట్లు, క్యాండీలు, జెల్లీలు అందుబాటులో ఉన్నాయి. కానీ 90’s కిడ్స్‌ చిన్నతనం గుర్తుచేసే పాతకాలపు చిరుతిళ్ల రుచే వేరు. స్కూల్‌ దగ్గర చిన్న చిన్న దుకాణాల్లో, బడి బయట బడ్డీ కొట్లలో కనిపించే నిమ్మతొనలు కూడా అలాంటి జ్ఞాపకాలలో ఒకటి. అప్పట్లో జేబులో ఉన్న కొద్దిపాటి డబ్బులతో కొనుక్కుని తింటూ స్నేహితులతో సరదాగా గడిపిన రోజులు ఇప్పటికీ చాలామందికి గుర్తుండే ఉంటాయి.

నిమ్మతొనల రుచి ఎలా ఉంటుంది?

పేరు వింటేనే నిమ్మకాయ గుర్తుకొస్తుంది. నిమ్మతొనలు అనే పేరుతో గుర్తుండిపోయిన ఈ చిరుతిండి రుచిలో తీపి, పులుపు కలిసిన ప్రత్యేకమైన అనుభూతిని ఇస్తుంది. నిమ్మకాయ రుచిని ఇష్టపడేవారికి ఈ తరహా క్యాండీలు మరింత నచ్చుతాయి. కొన్ని రకాలలో పుల్లటి రుచి ఎక్కువగా ఉంటే, మరికొన్నింటిలో తీపి ఎక్కువగా ఉండొచ్చు. ఇప్పుడు మార్కెట్లో లభించే ఉత్పత్తుల తయారీ విధానం, పదార్థాలను బట్టి రుచి, రంగు, ఆకృతి మారవచ్చు.

ఒకప్పుడు చిన్న కిరాణా దుకాణాల్లో ఎక్కువగా కనిపించిన పాతకాలపు క్యాండీలు ఇప్పుడు కొన్ని సూపర్‌మార్కెట్లు, చిరుతిళ్ల దుకాణాల్లోనూ కనిపిస్తున్నాయి. నిమ్మకాయ రుచి కలిగిన క్యాండీలకు సూపర్‌మార్కెట్లలోనూ ఆదరణ ఉంది. డీమార్ట్‌తో పాటు కొన్ని కిరాణా షాపుల్లోనూ నిమ్మతొనలు వివిధ ఫ్లేవర్లలో లభిస్తున్నాయి. అయితే అన్ని డీమార్ట్‌ శాఖల్లోనూ ఇవి ఉంటాయని చెప్పలేం. షాపును బట్టి స్టాక్‌, బ్రాండ్‌, ఫ్లేవర్లు మారవచ్చు. కొనాలనుకునేవారు క్యాండీలు ఉండే విభాగంలో వెతకడం లేదా షాపు సిబ్బందిని అడగడం మంచిది.

పాతకాలపు క్యాండీలు, సంప్రదాయ చిరుతిళ్లపై పెద్దల్లో మళ్లీ ఆసక్తి పెరుగుతోంది. చిన్నప్పుడు తిన్న రుచులను తమ పిల్లలకు పరిచయం చేయాలనుకునేవారు కూడా ఉన్నారు. అందుకే పాత జ్ఞాపకాలను గుర్తుచేసే క్యాండీలు ఇప్పటికీ చాలామందిని ఆకర్షిస్తున్నాయి. అయితే నిమ్మతొనలు మొదట ఎప్పుడు తయారయ్యాయి, వాటిని తొలిసారిగా ఏ సంస్థ మార్కెట్లోకి తీసుకొచ్చింది అనే విషయాలకు సంబంధించి విశ్వసనీయమైన అధికారిక చరిత్ర అందుబాటులోలేదు. ఇవి లోకల్ గా తయారు చేసేవారు. కాబట్టి వాటి మూలాల గురించి చెప్పలేం.

నేటి పిల్లలకు కొత్త కొత్త క్యాండీలు ఎన్ని ఉన్నా, 90’s కిడ్స్‌కు నిమ్మతొనలు అంటే కేవలం ఓ చిరుతిండి కాదు.. చిన్ననాటి మధుర జ్ఞాపకం! మళ్లీ ఆ రుచిని ఆస్వాదించే అవకాశం దొరికితే, పాత రోజులు గుర్తుకు రావడం ఖాయం.

Warranty vs Guarantee: వారంటీ – గ్యారెంటీ మధ్య తేడా ఏంటి? వస్తువు కొన్నప్పుడు ఏది చూసుకోవాలి?

Mahesh Jujjuri — Mon, 19 Oct 2026 12:30:38 +0530

Warranty vs Guarantee: టీవీ, ఫ్రిజ్‌, ఫోన్‌, వాషింగ్‌ మెషీన్‌ వంటి వస్తువులు కొనేటప్పుడు వాటిపై ఒకటి లేదా రెండు సంవత్సరాల వారంటీ, గ్యారెంటీ ఉందని షాపు వాళ్లు చెబుతుంటారు. ఈ రెండింటి మధ్య తేడా ఏంటి? వస్తువు కొనేటప్పుడు ఎలాంటి జాగ్రత్తలు తీసుకోవాలి?

వారంటీ (Warranty) అంటే ఒక వస్తువు కొన్నప్పుడు కంపెనీ ఇచ్చే టైమ్ వరకు.. ఆ వస్తువులో ఏదైనా లోపాలు తలెత్తితే.. తయారీదారు లేదా సంబంధిత సంస్థ నిర్ణీత నిబంధనల ప్రకారం సరిచేస్తామని ఇచ్చే హామీ. ఉదాహరణకు, ఒక టీవీకి రెండేళ్ల వారంటీ ఉందనుకుందాం. ఆ సమయంలో తయారీ లోపం వల్ల టీవీ పనిచేయకపోతే, నిబంధనలకు అనుగుణంగా సంస్థ ఫ్రీగా రిపేర్ చేసి ఇస్తుంది. లేదా ఏదైనా పార్టు పోతే అది కొత్తది రీప్లేస్ చేస్తుంది. అయితే ప్రతి సమస్యకూ ఉచిత సేవ లభిస్తుందని అనుకోకూడదు. ప్రమాదవశాత్తు పగలడం, నీరు చేరడం, వినియోగదారుడి తప్పిదం వల్ల దెబ్బతినడం వంటి సందర్భాలు వారంటీ పరిధిలోకి రాకపోవచ్చు.

గ్యారెంటీ (Guarantee) అంటే వస్తువు నాణ్యత, పనితీరుకు ప్రమాణాలకు అనుగుణంగా ఇచ్చే హామీ. గ్యారెంటీ ఉన్న వస్తువు నిర్దేశిత సమయంలో పాడైతే, కంపెనీ దాన్ని పూర్తిగా కొత్త వస్తువుతో మార్చి ఇవ్వడం (Replacement) లేదా మీరు చెల్లించిన డబ్బును తిరిగి ఇవ్వడం (Refund) చేస్తుంది. వారంటీ అంటే ఎప్పుడూ మరమ్మతు మాత్రమే, గ్యారెంటీ అంటే ఎప్పుడూ కొత్త వస్తువు లేదా డబ్బు తిరిగి ఇవ్వడమే అని చెప్పలేం. ఈ పదాల అర్థం, వాటి కింద లభించే ప్రయోజనాలు సంస్థ ప్రకటించిన షరతులను బట్టి మారవచ్చు. కాబట్టి పేరును మాత్రమే చూసి నిర్ణయం తీసుకోకూడదు.

వస్తువు కొనేముందు ఈ విషయాలను తప్పనిసరిగా పరిశీలించాలి. వస్తువు కొన్నప్పుడు ఎన్ని నెలలు లేదా సంవత్సరాలు వారంటీ, గ్యారెంటీ వర్తిస్తుందో తెలుసుకోవాలి. అంతే కాదు మొత్తం వస్తువుకా, మోటారుకా, కంప్రెసర్‌కా, బ్యాటరీకా అనేది స్పష్టంగా తెలుసుకోవాలి. విడిభాగాలు, సర్వీస్ ఛార్జీలు, రవాణా ఖర్చులు ఉచితమా కాదా అడగాలి. ఏ కారణాల వల్ల హామీ వర్తించదో ముందుగానే చదవాలి. కొనుగోలు బిల్లు, వారంటీ కార్డు, ఆన్‌లైన్ కొనుగోలు వివరాలను భద్రపరచుకోవాలి.

అదనపు డబ్బు చెల్లించి పొడిగించిన వారంటీ తీసుకుంటే, దాని ప్రయోజనాలు, మినహాయింపులు, ఖర్చులు పరిశీలించాలి. భారత ప్రభుత్వ వినియోగదారుల వ్యవహారాల శాఖ సూచనల ప్రకారం, వస్తువు నాణ్యత, ధర, ప్రమాణాలు, హామీలకు సంబంధించిన వివరాలు తెలుసుకున్న తర్వాతే వస్తువు కొనడంపై నిర్ణయం తీసుకోవాలి.

సమస్య వస్తే ఏం చేయాలి?

కొన్న వస్తువులో లోపం తలెత్తితే ముందుగా తయారీదారు లేదా అధికారిక సర్వీస్ కేంద్రాన్ని సంప్రదించాలి. ఫిర్యాదు నంబర్, బిల్లు, మరమ్మతు వివరాలను భద్రపరచుకోవాలి. సమస్య పరిష్కారం కాకపోతే జాతీయ వినియోగదారుల హెల్ప్‌లైన్‌ 1915కు ఫిర్యాదు చేయవచ్చు. వారంటీ ఉందా, గ్యారెంటీ ఉందా అనేదానికంటే, ఆ హామీ కింద మనకు ఏ ప్రయోజనాలు లభిస్తాయనేది ముఖ్యం.

Biscuit Holes: బిస్కెట్స్‌పై చిన్న చిన్న రంధ్రాలు ఎందుకు ఉంటాయో తెలుసా?

Kavitha G — Mon, 19 Oct 2026 12:15:39 +0530

Biscuit Holes: చిన్నపిల్లల నుంచి పెద్దవాళ్ల వరకు బిస్కెట్లను ఎంతో ఇష్టంగా తింటారు. అయితే బిస్కెట్లపై చిన్న చిన్న రంధ్రాలు ఉండటం చాలామంది చూసే ఉంటారు. అసలు బిస్కెట్లపై రంధ్రాలు ఎందుకు ఉంటాయి? వాటి వెనుక ఉన్న ఆసక్తికరమైన సైన్స్ ఏంటో ఇక్కడ తెలుసుకుందాం.

చాలామంది టీతో పాటు బిస్కెట్లు తినడానికి ఇష్టపడతారు. ప్రయాణాల్లోనూ, సాయంత్రం స్నాక్స్‌గానూ, ఆకలి వేసినప్పుడు లైట్ ఫుడ్ గా బిస్కెట్లను తింటుంటారు. అయితే బిస్కెట్లను తినేటప్పుడు వాటిపై ఉండే చిన్న చిన్న రంధ్రాలను ఎప్పుడైనా గమనించారా? అసలు బిస్కెట్లపై ఈ రంధ్రాలను ఎందుకు పెడతారు? అవి కేవలం బిస్కెట్ల అందం కోసమేనా? లేక వాటి వెనుక ఏదైనా కారణం ఉందో ఇక్కడ తెలుసుకుందాం.

బిస్కెట్లపై చిన్న చిన్న రంధ్రాలు ఉండటానికి ప్రధాన కారణం, అవి ఓవెన్‌లో కాలుతున్నప్పుడు వాటి ఆకారం మారకుండా చూడటం. బిస్కెట్లను తయారు చేయడానికి పిండి, వాటర్, చక్కెర, కొవ్వు పదార్థాలను అవసరాన్ని బట్టి కలిపి ముద్దగా తయారు చేస్తారు. ఆ తర్వాత పిండిని పలుచగా చేసి, కావాల్సిన ఆకారాల్లో కట్ చేసి, బేకింగ్ కోసం ఓవెన్‌లో పెడతారు. ఈ ప్రక్రియలో బిస్కెట్లలోని తేమ వేడి కారణంగా ఆవిరిగా మారుతుంది. ఆ ఆవిరి బయటకు వెళ్లడానికి తగిన మార్గం లేకపోతే బిస్కెట్లు కొన్ని చోట్ల ఉబ్బిపోవచ్చు. వాటిపై బుడగలు ఏర్పడవచ్చు. దీంతో బిస్కెట్ల ఆకారం మారడమే కాకుండా, అవి సమానంగా కాలకపోవచ్చు. అందుకే పిండిని ఓవెన్‌లో పెట్టే ముందు దానిపై చిన్న చిన్న రంధ్రాలు చేస్తారు. వీటి ద్వారా ఆవిరి బయటకు వెళ్లేందుకు అవకాశం ఏర్పడుతుంది.

బిస్కెట్లు సమానంగా కాలడానికి కూడా ఈ రంధ్రాలు సహాయపడతాయి. బిస్కెట్ తయారీలో దాని మందం, పిండిలోని తేమ, ఉపయోగించే పదార్థాలు వంటి అంశాలు చాలా ముఖ్యమైనవి. బేకింగ్ సమయంలో ఒకే దగ్గర ఎక్కువ ఆవిరి పేరుకుపోతే అక్కడ బిస్కెట్ ఉబ్బిపోయే అవకాశం ఉంటుంది. రంధ్రాలు ఉండటం వల్ల అటువంటి సమస్యను కొంతవరకు తగ్గించవచ్చు. ఫలితంగా బిస్కెట్లు సాధ్యమైనంత వరకు సమతలంగా, ఒకే ఆకారంలో తయారవుతాయి. ముఖ్యంగా పెద్ద మొత్తంలో బిస్కెట్లను తయారు చేసే పరిశ్రమల్లో ప్రతి బిస్కెట్ ఒకే విధంగా కనిపించడం, వాటి నాణ్యత స్థిరంగా ఉండటం ముఖ్యం. ఈ చిన్న రంధ్రాలు అందుకు సహాయపడతాయి.

బిస్కెట్లు క్రిస్పీగా రావడంలో కూడా ఈ రంధ్రాలు కీలక పాత్ర పోషిస్తాయి. ముఖ్యంగా పలుచని బిస్కెట్లలో పిండిలోపలి ఆవిరి కారణంగా పెద్ద గాలి బుడగలు ఏర్పడితే వాటి నిర్మాణం దెబ్బతినవచ్చు. రంధ్రాలు చేయడం వల్ల పిండిలోని ఆవిరి బయటకు వెళ్లేందుకు మార్గం ఏర్పడుతుంది. దీంతో బిస్కెట్లు అనవసరంగా ఉబ్బిపోకుండా, కావాల్సిన ఆకారంలో కాలడానికి సహాయపడుతుంది. అయితే బిస్కెట్ కరకరలాడటానికి రంధ్రాలు ఒక్కటే కారణం కాదు. పిండిలో ఉపయోగించే పదార్థాలు, తేమ శాతం, బేకింగ్ ఉష్ణోగ్రత, కాల్చే సమయం వంటి అంశాలు కూడా అంతే ముఖ్యమైనవి.

అయితే అన్ని రకాల బిస్కెట్లపై రంధ్రాలు ఎందుకు ఉండవు అనే సందేహం రావచ్చు. దీనికి కారణం ప్రతి బిస్కెట్ తయారీ విధానం ఒకేలా ఉండకపోవడమే. కొన్ని రకాల బిస్కెట్ పై చిన్న రంధ్రాలు స్పష్టంగా కనిపిస్తాయి. కానీ క్రీమ్ బిస్కెట్లు, చాక్లెట్ కుకీలు, కొన్ని మృదువైన బిస్కెట్లపై అలాంటి రంధ్రాలు కనిపించకపోవచ్చు. ఒక్కో బిస్కెట్‌కు అవసరమైన ఆకారం, మందం, పిండి స్వభావం, తయారీ పద్ధతిని బట్టి రంధ్రాలు చేయాలా వద్దా అనేది నిర్ణయిస్తారు. కొన్ని బిస్కెట్లపై కనిపించే చుక్కలు లేదా గీతలు అలంకరణ కోసం కూడా ఉండవచ్చు. కాబట్టి బిస్కెట్‌పై కనిపించే ప్రతి రంధ్రం వెనుక ఒకే కారణం ఉంటుందని చెప్పలేం.

బిస్కెట్లను పరిశ్రమల్లో తయారు చేసేటప్పుడు ప్రత్యేకమైన రోలర్లు లేదా రంధ్రాలు చేసే పరికరాలను ఉపయోగిస్తారు. పిండిని పలుచగా చేసిన తర్వాత ఈ పరికరాల సహాయంతో ఒకే పరిమాణంలో అనేక రంధ్రాలను ఏర్పరుస్తారు. దీనివల్ల వేలాది బిస్కెట్లపై రంధ్రాలు ఒకే విధంగా ఉంటాయి. ఇలా చేయడం వల్ల తయారీ ప్రక్రియ వేగంగా సాగడమే కాకుండా, బిస్కెట్ల ఆకారం, మందం వంటి వాటిని ఈజీగా నియంత్రించవచ్చు.

ఆడపిల్లలతో పోలిస్తే మగపిల్లల్లోనే నత్తి సమస్య వస్తుందెందుకు? అలాంటప్పుడు తల్లిదండ్రులు ఏం చేయాలి?

Haritha Chappa — Mon, 19 Oct 2026 11:36:01 +0530

కొంతమంది పిల్లల్లో మాటలు సరిగా రావు. నత్తి వస్తుంది. ఇలా కొంతమంది పిల్లలకు ఎందుకు జరుగుతుంది? నత్తి రావడానికి కారణాలు ఏమిటి? నత్తి వచ్చే పిల్లలను తల్లిదండ్రులు ఎలా చూసుకోవాలి?

చిన్న పిల్లల్లో నత్తి సమస్య కనిపించినప్పుడు తల్లిదండ్రులు చాలా ఆందోళన పడతారు. అందరి పిలల్లాగే తమ పిల్లలు కూడా చక్కగా మాట్లాడాలని కోరుకుంటారు. సాధారణంగా రెండు నుంచి ఐదేళ్ల వయసులో ఈ ఇబ్బంది మొదలవుతుంది.ఆడపిల్లలతో పోలిస్తే మగపిల్లల్లో ఇది కాస్త ఎక్కువగా కనిపిస్తుంది. మాట్లాడే సమయంలో అవసరమైన నోటి కండరాల మధ్య సమన్వయం సరిగ్గా కుదరకపోవడం వల్లే కొన్ని అక్షరాలు, పదాలు పలకడం కష్టమవుతుంది.

కుటుంబంలో ఎవరికైనా ఉంటే జన్యుపరంగా కూడా పిల్లలకు ఇది వచ్చే వీలుంది. చాలామందిలో ఏడేళ్లు వచ్చేసరికి ఈ సమస్య దానంతట అదే తగ్గిపోతుంది. నూటికి ఒక్కరిలో మాత్రమే పెద్దయ్యాక కూడా ఇది కొనసాగుతుంది. నత్తి ఉన్న పిల్లలు అమాయకులని, చదువులో వెనుకబడతారని అనుకోవడం కేవలం అపోహ మాత్రమే. వారి తెలివితేటలతో దీనికి ఎలాంటి సంబంధం లేదు. ఎంతోమంది నత్తి ఉన్న పిల్లలు చురుగ్గా ఆలోచిస్తూ జీవితంలో ఉన్నత శిఖరాలను చేరుకుంటారు.

నత్తి ఉన్న పిల్లలు నలుగురిలో మాట్లాడేటప్పుడు తడబడటం, కంగారు పడటం చూస్తుంటాం. తోటి పిల్లలు హేళన చేస్తే వాళ్లు మానసికంగా కుంగిపోయి ఆత్మవిశ్వాసం కోల్పోయే ప్రమాదం ఉంది. అందుకే ఇంటి వాతావరణం ఎంతో ఆహ్లాదకరంగా ఉండాలి. పిల్లలు మాట్లాడేటప్పుడు తొందరపెట్టకుండా పూర్తిగా చెప్పే వరకు ఓపికగా వినాలి. చాలా వేగంగా మాట్లాడే అలవాటు ఉన్న పిల్లల్లో ఈ తడబాటు పెరుగుతుంది. కాబట్టి ప్రశాంతంగా, నెమ్మదిగా మాట్లాడటం నేర్పించాలి.

ఇంట్లో తల్లిదండ్రులు వారితో ఎక్కువ సమయం గడపడం మంచిది. సరిగ్గా రాని అక్షరాలను రోజూ సరదాగా పలికించడం, కొత్త పదాలను పరిచయం చేయడం వల్ల మాటల్లో స్పష్టత పెరుగుతుంది. పాటలు పాడించడం, సంగీతం నేర్పించడం వల్ల కూడా నాలుక సులువుగా తిరిగి మాట స్పష్టంగా వచ్చేందుకు దారితీస్తుంది.

నత్తి సమస్యకు ప్రత్యేకంగా మందులేవీ ఉండవు. ఐదేళ్ల లోపే గుర్తించి నిపుణులతో స్పీచ్ థెరపీ ఇప్పించడం సరైన పరిష్కారం. థెరపీ ద్వారా మాటల్లోని లోపాలను సవరించడమే కాకుండా, పిల్లల్లో లోపించిన ధైర్యాన్ని నింపవచ్చు. తల్లిదండ్రుల నిరంతర ప్రోత్సాహం, సరైన సమయానికి తీసుకునే శిక్షణ వారిని ఈ సమస్య నుంచి బయటపడేలా చేస్తాయి. పిల్లలు ఎలా మాట్లాడినా ప్రేమతో ఆదరించి, వారి భావాలను స్వేచ్ఛగా వ్యక్తం చేసే స్వేచ్ఛను ఇవ్వడమే వారికి అందించే గొప్ప మద్దతు.

Honeymoon Room: హనీమూన్ రూమ్.. ఒక్క రాత్రికి రూ.25 లక్షలు, ఆ రూమ్‌లో ఏమేమి ఉంటాయో తెలుసా?

Mahesh Jujjuri — Mon, 19 Oct 2026 11:20:56 +0530

Honeymoon Room: ఒక్క రూమ్.. ఒక్క రాత్రి.. 25 లక్షలు. సాధారణంగా హోటల్ రూమ్స్ మహా అయితే ఒక రోజుకు వెయ్యి నుంచి 10 వేల వరకు ఉంటాయి. లగ్జరీ హోటల్స్ లో 10 లక్షలు కూడా ఉండోచ్చు.. కానీ 25 లక్షల హెటల్ రూమ్ గురించి మీకు తెలుసా?

సాధారణంగా హోటల్ రూమ్స్ అంటే వేలల్లో ఉంటాయి. లక్షా.. రెండు లక్షల గదులు కూడా ఉంటాయి. కానీ మలేషియాలోని అందమైన లంకవి ఐలాండ్ (Langkawi Island) లో ఉన్న ఒక ప్రత్యేకమైన హనీమూన్ సూట్ గురించి మీకు తెలుసా? ఆ రూమ్ ధర అక్షరాలా 25 లక్షల రూపాయలు. అది కూడా ఒక రాత్రికి మాత్రమే. వినడానికే ఆశ్చర్యంగా ఉన్నా, ఈ అంతర్జాతీయ స్థాయి లగ్జరీ విల్లా వెనుక ఉన్న విశేషాలు, ప్రత్యేకతలు తెలుసుకుంటే ఆ ధర ఎందుకు అనేది అర్థమవుతుంది.

ఇది కేవలం ఒక పడుకునే గది మాత్రమే కాదు, సముద్రపు ఒడ్డున నిర్మించిన ఒక అల్ట్రా-లగ్జరీ ప్రైవేట్ రిసార్ట్ విల్లా. లంకవిలోని దట్టమైన వర్షారణ్యాలు (Rainforests), అండమాన్ సముద్రపు నీలి జలాలు కలిసే చోట ఇది ఉంటుంది. ఈ విల్లాకు అనుబంధంగా ఒక పెద్ద ప్రైవేట్ స్విమ్మింగ్ పూల్ ఉంటుంది. పూల్‌లో ఈదుకుంటూ నేరుగా సముద్రపు అందాలను, సూర్యాస్తమయాన్ని వీక్షించవచ్చు. విల్లా వెనుక తలుపు తీస్తే నేరుగా తెల్లటి ఇసుక బీచ్‌ (White Sand Beach) లోకి అడుగు పెట్టవచ్చు. ఈ బీచ్ ఏరియా కేవలం ఆ రూమ్‌లో ఉన్న వారికి మాత్రమే కేటాయించబడుతుంది.

గదిలోని ఫర్నిచర్, గ్లాస్ విండోస్, బాత్ టబ్స్ అన్నీ అంతర్జాతీయ డిజైనర్లతో రూపొందించబడ్డాయి. బెడ్‌రూమ్ నుండి చూస్తే 180 డిగ్రీల సముద్రపు వ్యూ కనిపిస్తుంది. సముద్రంలో చేపల మధ్య గదిలో కపుల్స్ క్వాలిటీ టైమ్ ను స్పెండ్ చేసే విధంగా ఈ రూమ్స్ డిజైన్ చేయబడ్డాయి. బాత్ రూమ్ లో కూడా సముద్రం లోపల వ్యూ కనిపించేలా ఈ రూమ్స్ డిజైన్ చేశారు.

ఎందుకు అంత కాస్ట్?

ఈ విల్లాకు అంత ధర ఉండటానికి ప్రధాన కారణం "ప్రైవసీ ‌- వివిఐపి (VVIP) సేవలు". మీరు రూమ్‌లోకి వచ్చినప్పటి నుండి వెళ్ళే వరకు మీ సేవ కోసం ఒక ప్రత్యేక వ్యక్తిగత అసిస్టెంట్ (Butler) అందుబాటులో ఉంటారు. మీ లగేజీ సర్దడం, మీకు ఇష్టమైన వంటకాలను ప్రైవేట్ చెఫ్‌తో చేయించడం, మీ ప్రయాణ ఏర్పాట్లు అన్నీ ఆయనే చూసుకుంటారు.ఇక్కడికి వచ్చే సెలబ్రిటీల సమాచారం అత్యంత రహస్యంగా ఉంచబడుతుంది. బయటి ప్రపంచానికి ఎలాంటి సంబంధం లేకుండా, ఎవరూ మిమ్మల్ని డిస్టర్బ్ చేయకుండా ఉండేలా ప్రత్యేక సెక్యూరిటీ ఉంటుంది.

విమానాశ్రయం నుండి నేరుగా రిసార్ట్‌కు చేరుకోవడానికి ప్రైవేట్ హెలికాప్టర్ సర్వీస్, విల్లా వద్దే హెలిప్యాడ్ సదుపాయాలు ఉంటాయి.

సాధారణ పర్యాటకులు ఇక్కడికి రావడం చాలా అరుదు. ఈ ₹25 లక్షల హనీమూన్ రూమ్‌ను/విల్లాను ఎక్కువగా ప్రపంచ స్థాయి కోటీశ్వరులు, హాలీవుడ్ సెలబ్రిటీలు, అంతర్జాతీయ బిజినెస్ టైకూన్స్, రాయల్ ఫ్యామిలీ మెంబర్స్ (రాజులు, రాకుమారులు) తమ హనీమూన్ లేదా ప్రైవేట్ హాలిడేస్ కోసం బుక్ చేసుకుంటారు. సాధారణంగా ఈ హనీమూన్ సూట్ కేవలం ఒక జంటకోసం మాత్రమే ప్రత్యేకంగా డిజైన్ చేయబడింది.

అయితే, కొన్ని ప్రెసిడెన్షియల్ విల్లాలలో ఎక్కువగా 4 నుండి 6 మంది వరకు (కుటుంబ సభ్యులు) బస చేసే సదుపాయం ఉంటుంది. ఒక తెలుగు యూట్యూబర్ తన వీడియోలో చెప్పినట్లుగా, సాధారణ పర్యాటకుల కోసం లంకవిలో ₹3,000 లకే రూములు దొరికినప్పటికీ, ప్రపంచంలోని టాప్ 1% ధనవంతుల విలాసవంతమైన జీవితం ఎలా ఉంటుందో చూపించడానికే ఆయన ఈ ప్రత్యేక రూమ్‌ను తెలుగు ప్రేక్షకులకు పరిచయం చేశారు.

India: భారతదేశానికి ‘ఇండియా’ అని పేరు పెట్టింది ఎవరు? ఇండియా అంటే అర్థం ఏమిటి?

Haritha Chappa — Mon, 19 Oct 2026 09:35:51 +0530

India: మనదేశాన్ని ఇండియా అని కూడా పిలుస్తారు. కానీ ఆ పేరును మనదేశానికి పెట్టింది ఎవరు? ఆ పదానికి అర్థం ఏమిటి? ఇలా ఎప్పుడైనా ఆలోచించారా? ఇండియా పేరు వెనుక చరిత్రను తెలుసుకోండి.

మన దేశం పేరు భారతదేశం. ఈ పేరు కన్నా 'ఇండియా' పేరే ఎక్కువగా ప్రపంచ దేశాల్లో మార్మోగిపోతుంది. ఇండియా అనే పేరు మన దేశానికి ఎలా వచ్చింది? దీనికి ముఖ్య కారణం సింధు నది. వేల సంవత్సరాల క్రితం మన దేశంలో ప్రవహించే సింధు నది తీరంలో గొప్ప నాగరికత వెలిసిల్లిన సంగతి తెలిసిందే. ఆ కాలంలో విదేశీ వ్యాపారులు, యాత్రికులు మన దేశానికి వచ్చేటప్పుడు ఈ నదినే ప్రధాన సరిహద్దుగా చూసేవారు.

ఆ సమయంలో ఇరాన్ ప్రాంతానికి చెందిన పర్షియన్లు మన దేశంతో వ్యాపారం చేసేవారు. పర్షియన్ భాషలో 'స' అనే అక్షరం పలకడం కష్టంగా ఉండేది, అందుకే వారు 'స' బదులు 'హ' అని ఉచ్ఛరించే అలవాటు చేసుకున్నారు. ఈ క్రమంలో వారు 'సింధు' నదిని 'హిందూ' అని పిలిచారు. ఆ నది దాటి ఉన్న విశాలమైన భూభాగాన్ని, అక్కడ నివసించే ప్రజలను కూడా హిందూ నది పరివాహక ప్రాంతవాసులుగా గుర్తించారు.

పర్షియన్ల ద్వారా మన దేశం గురించి ప్రాచీన గ్రీకులకు తెలిసింది. గ్రీకు భాషలో 'హ' ధ్వని పలకడం కుదరక, వారు పర్షియన్లు వాడిన 'హిందూ' పదాన్ని కాస్త మార్చి 'ఇండోస్' అని పలకడం ప్రారంభించారు. అలాగే సింధు నదికి 'ఇండస్' అని నామకరణం చేశారు. క్రీస్తుపూర్వం ఐదవ శతాబ్దంలో జీవించిన ప్రసిద్ధ గ్రీకు చరిత్రకారుడు హెరోడోటస్ తన రాతల్లో ఈ ప్రాంతాన్ని సూచించడానికి మొదటిసారిగా 'ఇండోస్' అనే పదాన్ని ప్రస్తావించారు.

ఆ తర్వాత మౌర్యుల కాలంలో మన దేశాన్ని సందర్శించిన గ్రీకు రాయబారి మెగస్తనీస్ తాను రాసిన ప్రసిద్ధ గ్రంథానికి 'ఇండికా' అని పేరు పెట్టారు. ఇలా గ్రీకులు మాట్లాడిన 'ఇండోస్' క్రమంగా లాటిన్ భాషలోకి చేరి కాలక్రమేణా 'ఇండియా'గా రూపాంతరం చెందింది.

శతాబ్దాల తర్వాత వ్యాపారం కోసం మన దేశానికి వచ్చిన బ్రిటిష్ వారు ఈ పేరును మరింత పాపులర్ చేసారు. ఈస్టిండియా కంపెనీ పాలన మొదలైన తర్వాత ప్రభుత్వ రికార్డుల్లో, ప్రపంచ పటాల్లో మన దేశాన్ని అధికారికంగా 'ఇండియా' అని నమోదు చేయడం మొదలుపెట్టారు. అలా ప్రపంచమంతటా ఈ పేరే స్థిరపడిపోయింది. అయితే మన ప్రాచీన సంస్కృతిలో ఈ గడ్డను 'భరతవర్షం' లేదా 'భారతదేశం' అని భరత చక్రవర్తి పేరు మీదుగా పిలుచుకునేవారు. స్వాతంత్ర్యం వచ్చిన తర్వాత మన రాజ్యాంగ నిర్మాతలు ఈ రెండు పేర్లను గౌరవించారు. అందుకే మన రాజ్యాంగంలోని మొదటి అధికరణంలో "ఇండియా, అనగా భారత్" అని స్పష్టంగా పొందుపరిచారు.

Pikili Pitta: ఈ బుజ్జి పికిలి పిట్టలు మామూలువి కాదు.. వీటి వల్ల ఆ దేశంలో ఎన్ని కష్టాలో

Haritha Chappa — Mon, 19 Oct 2026 08:24:56 +0530

Pikili Pitta: పికిలిపిట్ట పాట విని బాగా ఎంజాయ్ చేసి ఉంటారు.. రీల్స్ కూడా చేసి ఉంటారు. కానీ వాటి గురించి తెలుసుకోవాల్సిన విషయాల గురించి ఆలోచించారా? ఈ పికిలి పిట్టలు మామూలువి కాదు.

పికిలి పిట్ట పాట ఈ మధ్య బాగా పాపులర్ అయింది. కొంతమందికి పికిలిపిట్టలు అంటే ఏ పక్షులో కూడా తెలియదు. నిత్యం కిలకిలారావాలతో సందడి చేసే చిన్ని పక్షి 'పికిలి పిట్ట'. దీన్ని 'బుల్‌బుల్' అని కూడా పిలుచుకుంటారు.గ్రామీణ ప్రాంతాల్లో పికిలి గువ్వ అని ముద్దుగా పిలుచుకుంటారు. తలపైన చిన్న పిలకలాంటి అందమైన కిరీటం, తోక అడుగున మెరిసే ఎరుపు లేదా పసుపు రంగు మచ్చ దీని ప్రత్యేక ఆనవాలు. చూడటానికి ఎంతో ముచ్చటగా ఉండే ఈ పిట్టలు నిరంతరం చురుగ్గా చెట్ల కొమ్మల మధ్య ఎగురుతూ ఎంతో ముచ్చటగా ఉంటాయి. తెలుగు జానపద సాహిత్యంలో, పాటల్లో కూడా ఈ పిట్ట గురించి ఎన్నో రకాలుగా వర్ణించారు.

పికిలి పిట్టల జీవనశైలి ఎంతో ఆసక్తికరంగా ఉంటుంది. ఇవి పండ్ల తోటల్లోని పండిన కాయలు, పూలలోని తేనెతో పాటు పంటలకు నష్టం కలిగించే చిన్న చిన్న కీటకాలను ఆహారంగా తీసుకుంటాయి. దీనివల్ల రైతులకు, తోటల పెంపకందారులకు ఇవి ఎంతో ఉపయోగపడుతున్నాయి ఉపయోగపడుతున్నాయి. అంతేకాకుండా, తిన్న పండ్ల గింజలను వివిధ ప్రాంతాల్లో విసర్జించడం ద్వారా కొత్త చెట్లు పెరిగేందుకు తోడ్పడతాయి. పరిసరాల్లో కాస్త అలికిడి అయినా వెంటనే గట్టిగా శబ్దాలు చేస్తూ తోటి పక్షులను అప్రమత్తం చేసే అద్భుతమైన నిఘా నైపుణ్యం వీటి సొంతం.

ఆడ, మగ పిట్టలు రెండూ కలిసి ఎండుగడ్డి, చిన్న వేర్లు, సాలెగూళ్లతో చక్కటి గిన్నె ఆకారపు గూడును పొదల్లో నిర్మించుకుంటాయి. పిల్లలను పెంచడంలో రెండూ కలిసి బాధ్యతలు పంచుకుంటాయి.అయితే ఓ దేశంలో మాత్రం వీటి వల్ల ఎన్నో కష్టాలు అమెరికాలోని హవాయి దీవుల్లోకి ఈ పికిలి పిట్టలు ప్రవేశించాయి. అక్కడ ఉన్న 'మొనార్క్' రకానికి చెందిన సీతాకోకచిలుకలను విపరీతంగా వేటాడి తినడం ప్రారంభించాయి. దీంతో అక్కడ జీవ సమతుల్యత దెబ్బతింటోంది. ఏం చేయాలో తెలియక హవాయి అధికారులు కూడా తలలు పట్టుకుంటున్నారు.

రంగురంగుల్లో అందంగా ఉండే సీతాకోక చిలులు ఈ పక్షుల బారి నుంచి తప్పించుకోవడానికి తమ రంగును తెల్లగా మార్చేసుకున్నాయి. దీంతో పర్యాటకులు కూడా అక్కడికి రావడం తగ్గుతోంది. రంగురంగులో సీతాకోకచిలుకలను చూసేందుకే ఎక్కువ మంది వస్తారు. పికిలి పిట్ట చిన్నదే అయినా.. సమస్య మాత్రం పెద్దదే క్రియేట్ చేసింది.

Facts: చెట్లకు నిజంగానే డబ్బులు కాస్తే ఏమౌతుంది? మనకు తిండి కూడా దొరకదా?

ramya Sridhar — Mon, 19 Oct 2026 07:30:26 +0530

Facts: నెలంతా కష్టపడితేనే మనకు జీతం వస్తుంది. ఆ డబ్బుతోనే మనం బతుకుతూ ఉంటాం. అలాంటి డబ్బు.. ఎలాంటి కష్టం లేకుండా.. చెట్లకు డబ్బులు కాస్తే ఏం జరుగుతుంది? మన జీవితం ఎలా మారుతుంది?

మన అందరిదీ ఉరుకుల పరుగుల జీవితమే. రూపాయి సంపాదించడం కోసం ప్రతి ఒక్కరూ ఏవేవో ప్రయత్నాలు చేస్తూ ఉంటారు. రాత్రి అనకా, పగలు అనకా కష్టపడుతూనే ఉంటారు. డబ్బు ఉన్నవారు లగ్జరీ లైఫ్ గడుపుతుంటే.. పేదవాళ్లు.. మూడు పూటలా కడుపు నింపుకోవడానికి కూడా కష్టపడుతూ ఉంటారు. అంతేకాదు, మన ఇళ్ల్లో పెద్దవారి నోట్లో ఎక్కువగా ‘ డబ్బులు ఏమైనా చెట్లకు కాస్తున్నాయా?’ అనే మాట మీరు వినే ఉంటారు. ఒకవేళ.. అదే నిజమైతే.. రాత్రి పడుకొని.. ఉదయం లేచే సరికి.. మన ఇంటి చుట్టూ ఉన్న చెట్లకు పండ్లు, పూలు కాకుండా.. డబ్బులు కాస్తే ఏం జరుగుతుంది? ప్రపంచమంతా ఇదే జరిగితే... జీవితం ఎలా మారుతుంది? ప్రతి ఒక్కరూ సంతోషంగా ఉంటారా? లేక ప్రపంచమే తలకిందులు అవుతుందా?

ఒకవేళ చెట్లకు డబ్బులు వస్తే, ప్రతి ఒక్కరూ సంచులు పట్టుకెళ్లి కావాల్సినంత డబ్బు కోసుకొని ఇంటికి తెచ్చేసుకుంటారు. ఎవరి దగ్గరా డబ్బు కొరత ఉండదు. అందరూ కుబేరులే అవుతారు. పేద, ధనిక అనే తేడా ఉండదు. కానీ, ఇక్కడే అసలు సమస్య మొదలౌతుంది. ప్రతి ఒక్కరి దగ్గరా నిండుగా డబ్బు ఉన్నప్పుడు.. ఎవరూ తమ పని చేయడానికి ఇష్టపడరు. ప్రతి ఒక్కరూ డబ్బు కోసమే పని చేస్తారు.. కావాల్సినంత డబ్బు ఉన్నప్పుడు ఎవరికీ పని చేయాలి అనే ఉత్సాహం కూడా రాదు.

పంటలు పండించే రైతు "నా దగ్గర డబ్బు ఉంది కదా, నేనెందుకు ఎండనక వాననక కష్టపడి వరి వేయాలి?" అనుకుంటాడు. పాలు పోసే వ్యక్తి "నా దగ్గర డబ్బులు ఉన్నప్పుడు నేనెందుకు పొద్దున్నే లేచి పాలు అమ్మాలి?" అనుకుంటాడు. దీని వల్ల ఎవరూ పని చేయకపోతే.. ఏ పనీ ముందుకు సాగదు. ఎవరికీ తిండి దొరకదు. డబ్బు ఉన్నా కూడా.. తిండి దొరకక ప్రజలు అలమటించి పోయే అవకాశం ఉంది. అదొక్కటే కాదు.. చాలా పనులు ముందుకు సాగవు. ఎవరి కిందా ఎవరూ పని చేయడానికి కూడా ఇష్టపడరు.

డబ్బును తిని బతకలేం కదా..

మనకు ఎంత డబ్బు ఉన్నా, తిండి దొరకాలన్నా, ఇతర నిత్యవసరాలు తీరాలన్నా ఎవరో ఒకరు కష్టపడి పని చేయాల్సిందే. సమాజంలో ఎవరూ పని చేయకపోతే వ్యవస్థ అంతా స్తంభించిపోతుంది. చివరకు కోట్లకు కోట్లు డబ్బులున్నా.. కొనుక్కోవడానికి ఏమీ దొరకని పరిస్థితి వస్తుంది. మనం ఎంత ఆకలిగా ఉన్నా డబ్బును తిని బతకలేం కదా!

మనిషి శ్రమ, పనికి ఉన్న విలువే సమాజాన్ని ముందుకు నడిపిస్తుంది. డబ్బు అనేది కేవలం మనం చేసే పనికి, వస్తువులకు ఇచ్చే మార్పిడి మాత్రమే. అందుకే ప్రకృతి ధర్మం ప్రకారం డబ్బు చెట్లకు కాయదు.. కాయకూడదు కూడా. మనిషి చేసే కష్టమే అసలైన సంపద. కష్టం మీద మాత్రమే ఆధారపడాలి.

Snake Facts: ఒక పాము మరో పామును కాటేస్తే ఏమవుతుంది?

Narender Vaitla — Sun, 18 Oct 2026 19:11:04 +0530

Snake Facts: పాము కాటేస్తే ప్రాణాలు పోయే ప్రమాదం ఉంటుందని తెలిసిందే. అయితే ఒక విషపూరిత పాము మరో పామును కాటేస్తే ఏమవుతుంది? ముఖ్యంగా, ఒకే జాతికి చెందిన పామును కాటేస్తే విషం పనిచేస్తుందా? తనను తాను కాటేసుకుంటే చనిపోతుందా? తెలుసుకుందాం.

సాధారణంగా పాము విషం అనేది తన ప్రత్యర్థిని లేదా ఆహారాన్ని చంపడానికి ఉపయోగపడే పదార్థం. అయితే ఒక పాము మరో పామును కాటేసినప్పుడు దాని శరీరంలోకి వెళ్లిన విషం ఎలాంటి ప్రభావం చూపుతుందనేది కొన్ని అంశాలపై ఆధారపడి ఉంటుంది. కాటేసిన పాము ఏ జాతికి చెందినది? కాటుకు గురైన పాము ఏ జాతికి చెందినది? ఎంత మోతాదులో విషం శరీరంలోకి వెళ్లింది? వంటి అంశాలు ఇందులో కీలకం. ఒకే జాతికి చెందిన రెండు పాములు ఒకదానికొకటి కాటు వేస్తే, కొన్ని సందర్భాల్లో విషం ప్రభావం తక్కువగా ఉండవచ్చు. అయితే ఆ పాముకు విషం పూర్తిగా పనిచేయదని చెప్పలేం. కాటు వల్ల గాయాలు కావచ్చు. విషం ప్రభావం కూడా కనిపించవచ్చు.

కొన్ని పాముల శరీరంలో తమ జాతికి చెందిన పాముల విషంలోని కొన్ని పదార్థాల ప్రభావాన్ని తగ్గించే సహజ రక్షణ వ్యవస్థ ఉంటుంది. దీనిని విష నిరోధకత (Venom Resistance) అంటారు. విషంలోని కొన్ని పదార్థాలు శరీర కణాలపై దాడి చేయకుండా అడ్డుకునేలా వాటి శరీరంలో కొన్ని ప్రోటీన్లు, ఇతర జీవరసాయన లక్షణాలు పనిచేస్తాయి.

ఉదాహరణకు, కొన్ని కోబ్రా జాతుల పాముల్లో వాటి విషంలోని కొన్ని నాడీ వ్యవస్థను ప్రభావితం చేసే పదార్థాలకు నిరోధకత ఉంటుంది. అయితే అన్ని పాముల్లోనూ ఈ రక్షణ ఒకే స్థాయిలో ఉండదు. ఒకే జాతికి చెందిన పాముల మధ్య కూడా నిరోధకతలో తేడాలు ఉండవచ్చు. అందువల్ల ఒక కోబ్రా మరో కోబ్రాను కాటేస్తే విషం అసలు పనిచేయదని భావించడం సరికాదు.

అవును. ఒక జాతికి చెందిన విషపూరిత పాము మరో జాతికి చెందిన పామును కాటేస్తే, ఆ విషం తీవ్ర ప్రభావం చూపే అవకాశం ఉంది. ఎందుకంటే ప్రతి పాము విషంలో ఉండే పదార్థాలు, వాటి ప్రభావం ఒకేలా ఉండవు. కొన్ని పాముల విషం నాడీ వ్యవస్థపై ప్రభావం చూపుతుంది. మరికొన్ని పాముల విషం రక్తం గడ్డకట్టే విధానాన్ని దెబ్బతీయవచ్చు లేదా కణజాలాన్ని దెబ్బతీయవచ్చు. ఒక పాము శరీరంలో ఒక రకమైన విషాన్ని తట్టుకునే సామర్థ్యం ఉన్నప్పటికీ, మరో జాతి విషాన్ని తట్టుకోలేకపోవచ్చు. ఉదాహరణకు, కింగ్ కోబ్రా వంటి విషపూరిత పాము మరో జాతికి చెందిన పామును కాటేస్తే, ఆ పాము విష ప్రభావంతో చనిపోయే ప్రమాదం ఉంది. అయితే ఫలితం విషం స్వభావం, మోతాదు, కాటుకు గురైన పాము శరీరంలోని నిరోధకతపై ఆధారపడి ఉంటుంది.

పాములు సాధారణంగా తమను తాము కాటేసుకోవడం చాలా అరుదు. అయితే అనుకోకుండా తన శరీరాన్ని కాటేసుకున్నా, విషం వల్ల తప్పనిసరిగా చనిపోతుందని చెప్పలేం. కొన్ని పాములకు తమ విషంలోని కొన్ని పదార్థాలపై సహజ నిరోధకత ఉంటుంది. అయితే పాము తన విషానికి పూర్తిగా రోగనిరోధక శక్తి కలిగి ఉంటుందని అనుకోవడం తప్పు. విషం శరీరంలోకి ఎంత మోతాదులో వెళ్లింది, ఏ భాగంలోకి చేరింది, ఆ పాముకు ఎంత నిరోధకత ఉంది అనే అంశాలు ప్రభావం చూపుతాయి. కాటు వల్ల గాయాలు కూడా కావచ్చు. అందువల్ల పాము తనను తాను కాటేసుకున్నా ఎలాంటి ప్రమాదం ఉండదనే వాదనకు శాస్త్రీయంగా పూర్తి ఆధారాలు లేవు. పాముల విష నిరోధకత జాతిని బట్టి మారుతుంది.

పాములు తమ విషాన్ని ప్రధానంగా ఆహారాన్ని పట్టుకోవడానికి, అవసరమైనప్పుడు ఆత్మరక్షణ కోసం ఉపయోగిస్తాయి. విషం తయారు చేయడం, దాన్ని నిల్వ ఉంచడం పాముల శరీరంలో జరిగే జీవ ప్రక్రియలు. విషాన్ని ఉపయోగించిన తర్వాత దాన్ని తిరిగి ఉత్పత్తి చేయడానికి సమయం పడుతుంది. అందుకే విషపూరిత పాములు ప్రతి సందర్భంలోనూ విషాన్ని ఉపయోగించవు. కొన్ని సందర్భాల్లో విషం తక్కువగా విడుదల కావచ్చు లేదా విషం విడుదల కాకుండానే కాటు వేయవచ్చు. దీనిని సాధారణంగా డ్రై బైట్ (Dry Bite) అంటారు.

Colour: పింక్ అమ్మాయిల కలర్, బ్లూ అబ్బాయిల కలర్ గా ఎలా మారింది?ఈ నిజం తెలిస్తే నోరెళ్లపెట్టాల్సిందే

ramya Sridhar — Sun, 18 Oct 2026 17:57:42 +0530

Colour: పొరపాటున కూడా మగ పిల్లలు పింక్ కలర్ షర్ట్ కూడా వేసుకోవడానికి ఇష్టపడరు. ఎందుకు అంటే.. అది అమ్మాయిల కలర్ అని చెబుతుంటారు. అసలు.. పింక్ కలర్ అమ్మాయిలకు, బ్లూ కలర్ అబ్బాయిలకు అని ఎవరు ఫిక్స్ చేశారు?

ఇంట్లో ఆడపిల్ల పుడితే.. వెంటనే ఎవరైనా పింక్ కలర్ డ్రెస్ తెచ్చేస్తారు. అదే అబ్బాయి పుడితే వెంటనే బ్లూ కలర్ డ్రెస్సులు కొనేస్తారు. ఎందుకంటే, పింక్ అంటే అమ్మాయిల రంగు, బ్లూ అంటే అబ్బాయిల రంగు అనేది మన సమాజంలో ఒక బలమైన నియమంగా మారిపోయింది. ఎంతలా అంటే.. మగవారు కనీసం పింక్ కలర్ షర్ట్ వేసుకోవడానికి కూడా వెనుకాడే అంతలా. కనీ, అసలు.. ఈ రెండు రంగుల్లో పింక్ అమ్మాయిలకు, బ్లూ అబ్బాయిలకు అని ఎవరు ఫిక్స్ చేశారు? దీని వెనక ఉన్న కారణం ఏంటో తెలుసా?

1900ల ప్రారంభంలో అమెరికా, యూరప్ లలోని ప్రముఖ ఫ్యాషన్ మ్యాగ్నజైన్లు పింక్ రంగు అబ్బాయిలకు పర్ఫెక్ట్ అని, బ్లూ కలర్ అమ్మాయిలకు అనుకూలం అని చెప్పారు. దానికి ఒక బలమైన శాస్త్రీయ, మానసిక కారణం కూడా ఉంది.

పింక్.. 'రెడ్' కలర్ అంటే రక్తం, యుద్ధం, అగ్రెసివ్ నేచర్, పవర్‌కి ప్రతీక. ఆ రెడ్ రంగు నుంచే పింక్ పుట్టుకొచ్చింది. ఇందులో ఉండే తీవ్రత, బలం మగవారి తత్వానికి సరిపోతాయని, అందుకే పింక్ అబ్బాయిల రంగు అని భావించేవారు.

బ్లూ : 'బ్లూ' రంగు చూడగానే ప్రశాంతత, స్వచ్ఛత, నాజూకుతనం గుర్తుకొస్తాయి. అందుకే బ్లూ రంగును అమ్మాయిల మనస్తత్వానికి కనెక్ట్ చేశారు.

మరి ఇంతగా అనుసరించిన ఈ విధానం అకస్మాత్తుగా ఎలా మారిపోయిందో తెలుసా? దీని వెనుక ఉన్నది ఏ శాస్త్రీయ కారణమో కాదు.. కేవలం బట్టల కంపెనీల 'మార్గెటింగ్ స్టంట్' కూడా ఉంది.

1940ల కాలంలో పెద్ద పెద్ద దుస్తుల తయారీ సంస్థలు, డిపార్ట్‌మెంటల్ స్టోర్లు తమ వ్యాపారాన్ని, లాభాలను పెంచుకోవడానికి ఒక కొత్త ప్లాన్ వేశాయి. అంతకుముందు వరకు ఒకే ఇంట్లో ఉండే అక్కాచెల్లెళ్లు, అన్నదమ్ములు ఒకరి బట్టలు మరొకరు (జెండర్ న్యూట్రల్) వేసుకునేవారు. దీనివల్ల కంపెనీలకు సేల్స్ తగ్గేవి. ఈ పరిస్థితిని మార్చడానికి "పింక్ అమ్మాయిలది - బ్లూ అబ్బాయిలది" అని ప్రచారం చేయడం మొదలుపెట్టాయి. ఆఖరికి బొమ్మలు, బెడ్ షీట్లు, సబ్బుల నుంచి ప్రతీ వస్తువును ఈ రంగుల ఆధారంగానే విక్రయించడం ప్రారంభించాయి. ఒక అబ్బాయి పింక్ డ్రెస్ వేసుకుంటే విచిత్రంగా చూసేలా ప్రజలలో నెమ్మదిగా సైకాలజికల్ బ్రెయిన్ వాష్ చేశాయి.

ఒక్క మార్కెటింగ్ ట్రిక్.. ప్రపంచ ట్రెండ్!

కంపెనీలు స్వార్థంతో మొదలుపెట్టిన ఈ మార్కెటింగ్ గిమ్మిక్, కాలక్రమేణా ప్రపంచమంతటా ఒక బలమైన ఆచారంగా మారిపోయింది. ఈ రోజుకీ చాలామంది అబ్బాయిలు పింక్ కలర్ వేసుకోవడానికి సంకోచించడానికి కారణం శతాబ్దం కిందట జరిగిన ఈ వ్యాపార ట్రిక్కే కావడం గమనార్హం. అప్పటి నుంచి అమ్మాయిలు పింక్ కలర్, అబ్బాయిలు బ్లూ కలర్ వాడటం మొదలుపెట్టారు.

బంగారం పసుపు రంగులోనే ఎందుకు ఉంటుంది? కార‌ణం ఏంటో తెలుసా.?

Narender Vaitla — Sun, 18 Oct 2026 15:38:26 +0530

Gold Colour: బంగారం అనగానే మనకు ముందుగా గుర్తొచ్చేది దాని మెరిసే పసుపు రంగు. వేల సంవత్సరాలుగా ఈ లోహం తన ప్రత్యేకమైన రంగుతో ప్రజలను ఆకర్షిస్తోంది. బంగారానికి ప‌సుపు రంగు ఎలా వ‌చ్చింది.? దీని వెనుక ఉన్న శాస్త్రీయ కారణాలు ఏంటో తెలుసుకుందాం.

మన చుట్టూ ఉన్న వస్తువులు వేర్వేరు రంగుల్లో కనిపించడానికి ప్రధాన కారణం వాటిపై పడే కాంతి. సూర్యరశ్మిలో అనేక రంగులు కలిసిపోయి ఉంటాయి. ఈ కాంతి ఒక వస్తువుపై పడినప్పుడు అందులోని కొన్ని రంగులను ఆ వస్తువు గ్రహిస్తుంది. మరికొన్ని రంగులను తిరిగి వెనక్కి పంపిస్తుంది. ఇలా వెనక్కి వచ్చిన కాంతి మన కళ్లకు చేరుతుంది. మన మెదడు దాన్ని బట్టి ఆ వస్తువు రంగును గుర్తిస్తుంది. ఉదాహరణకు, వెండి, అల్యూమినియం వంటి లోహాలు మన కళ్లకు కనిపించే కాంతిలోని చాలా రంగులను దాదాపు సమానంగా ప్రతిబింబిస్తాయి. అందుకే అవి తెల్లగా లేదా వెండి రంగులో కనిపిస్తాయి. అయితే బంగారం మాత్రం కాంతిలోని అన్ని రంగులను ఒకే విధంగా ప్రతిబింబించదు. ఇదే దాని ప్రత్యేకమైన రంగుకు మొదటి కారణం.

బంగారం మిగతా లోహాల కంటే భిన్నంగా ప్రవర్తిస్తుంది. దానిపై కాంతి పడినప్పుడు నీలం, ఊదా రంగులకు సంబంధించిన కాంతిలో కొంత భాగాన్ని గ్రహిస్తుంది. అదే సమయంలో ఎరుపు, నారింజ, పసుపు రంగులకు సంబంధించిన కాంతిని ఎక్కువగా ప్రతిబింబిస్తుంది. ఈ రంగుల కాంతి మన కళ్లకు చేరడం వల్ల బంగారం పసుపు రంగులో కనిపిస్తుంది. అంటే బంగారానికి పసుపు రంగు రావడానికి దానిలో ప్రత్యేకమైన పసుపు పదార్థం ఉండటం కారణం కాదు. కాంతిని గ్రహించే, ప్రతిబింబించే దాని స్వభావమే అసలు కారణం. ఇదే ఇతర లోహాలతో పోలిస్తే బంగారాన్ని ప్రత్యేకంగా నిలబెడుతుంది.

బంగారం పసుపు రంగులో కనిపించడానికి దాని అణువుల నిర్మాణం కూడా ముఖ్యమైన పాత్ర పోషిస్తుంది. బంగారం పరమాణు సంఖ్య 79. అంటే ప్రతి బంగారం పరమాణువు కేంద్రకంలో 79 ప్రోటాన్లు ఉంటాయి. దీంతో బంగారం కేంద్రకం చాలా బరువుగా ఉంటుంది. కేంద్రకానికి దగ్గరగా ఉండే ఎలక్ట్రాన్లపై దాని ఆకర్షణ బలంగా ఉంటుంది. ఈ ఎలక్ట్రాన్లు ఇతర లోహాల్లోని ఎలక్ట్రాన్ల మాదిరిగా కాకుండా ప్రత్యేకమైన శక్తి స్థాయులను కలిగి ఉంటాయి. కాంతి నుంచి శక్తిని గ్రహించినప్పుడు ఈ ఎలక్ట్రాన్లు ఒక శక్తి స్థాయి నుంచి మరో శక్తి స్థాయికి మారగలవు. ఈ ప్రక్రియలో బంగారం ఏ రంగుల కాంతిని గ్రహిస్తుంది, ఏ రంగుల కాంతిని ప్రతిబింబిస్తుంది అనే విషయం నిర్ణయమవుతుంది.

బంగారం రంగు వెనుక మరో ఆసక్తికరమైన కారణం ఆల్బర్ట్ ఐన్‌స్టీన్ ప్రతిపాదించిన సాపేక్ష సిద్ధాంతం. బంగారం వంటి భారీ పరమాణువుల్లో కేంద్రకానికి దగ్గరగా ఉండే ఎలక్ట్రాన్లు చాలా ఎక్కువ వేగంతో కదులుతాయి. వాటి వేగం కాంతి వేగంలో గణనీయమైన భాగానికి చేరుతుంది. ఇలాంటి పరిస్థితుల్లో సాపేక్ష సిద్ధాంతం వివరించే ప్రభావాలు ముఖ్యమవుతాయి. ఈ ప్రభావాల వల్ల ఎలక్ట్రాన్ల ప్రవర్తన, వాటి శక్తి స్థాయులు మారతాయి. ఫలితంగా ఎలక్ట్రాన్లు కాంతిలోని నీలి రంగు భాగాన్ని గ్రహించే విధానం ప్రభావితమవుతుంది. ఈ మార్పులు లేకపోతే బంగారం రంగు కూడా వెండి వంటి ఇతర లోహాల రంగుకు దగ్గరగా ఉండే అవకాశం ఉంది. అందుకే బంగారం పసుపు రంగుకు దాని అణువుల నిర్మాణంతో పాటు సాపేక్ష సిద్ధాంతానికి సంబంధించిన ప్రభావాలు కూడా ముఖ్యమైనవిగా శాస్త్రవేత్తలు వివరిస్తారు.

బంగారం నీలి కాంతిలో కొంత భాగాన్ని గ్రహించి, మిగిలిన కాంతిని ప్రతిబింబించడం వల్ల దానికి పసుపు రంగుతో కూడిన ప్రత్యేకమైన మెరుపు వస్తుంది. ఈ రంగు దాని సహజ లక్షణం. అయితే ఆభరణాల్లో కనిపించే రంగు బంగారం స్వచ్ఛత, ఇతర లోహాలను కలిపే విధానం ఆధారంగా మారవచ్చు. ఉదాహరణకు, 24 క్యారెట్ల స్వచ్ఛమైన బంగారం సాధారణంగా గాఢమైన పసుపు రంగులో ఉంటుంది. 22 క్యారెట్ల బంగారంలో వెండి, రాగి వంటి ఇతర లోహాలను కలపడం వల్ల రంగులో స్వల్ప మార్పులు రావచ్చు. రాగి ఎక్కువగా కలిపితే గులాబీ లేదా ఎరుపు ఛాయ కనిపించవచ్చు.

Indian Tourist Places: మనదేశంలోని ఈ టూరిస్ట్ ప్రాంతాలకు వెళితే స్విట్జర్లాండ్, మాల్దీవులు వెళ్లినంత ఫీల్ కలుగుతుంది

Haritha Chappa — Sun, 18 Oct 2026 14:45:20 +0530

Indian Tourist Places: విదేశాలకు ఏమాత్రం తీసిపోని అందమైన ప్రదేశాలు మన ఇండియాలో చాలా ఉన్నాయి. పైగా తక్కువ బడ్జెట్లోనే వెళ్లి వచ్చేవిగా ఉంటాయి. ఇక్కడకు వెళితే విదేశాలకు వెళ్లిన అనుభూతిని కలిగిస్తాయి.

వెనిస్ నగరం లాంటి అందాలను ఎంజాయ్ చేయాలంటే కేరళల్లోని అలెప్పీకి వెళ్లండి. ఇక్కడ అందమైన బీచ్‌లతో పాటు కేరళకే ప్రత్యేకమైన బ్యాక్ వాటర్స్ అందాలను చూడొచ్చు. ఇక్కడి బీచ్‌లు చాలా పరిశుభ్రంగా ఉంటాయి. సూర్యాస్తమయంవేళ ఆ బీచ్ లో కూర్చుంటే ఈ విదేశీ బీచ్ కూడా దాని ముందు దిగదుడుపే అనిపిస్తుంది. పచ్చని చెట్లతో, స్వచ్ఛమైన నీటితో కనిపించే అలెప్పీ జీవితంలో ఒక్కసారైనా చూడాల్సిందే.

జమ్మూ కాశ్మీర్లో ఉంేడ గుల్మార్గ్, ఉత్తరాఖండ్ లో ఉండే ఔలీ ప్రాంతాలను ఇండియా స్విట్జర్లాండ్ అని పిలుస్తారు. మంచు బాగా కురుస్తుంది. చెట్లు, కొండలు మంచుతో కప్పుకుని కనిపిస్తాయి. వేడివేడి కాఫీ తాగుతూ అక్కడ ఎంజాయ్ చేయవచ్చు.

ఫ్రాన్స్ వీధుల్లో తిరుగుతూ ఫ్రెష్ క్రోసెంట్స్, కాఫీ టేస్ట్ చేయాలని ఉందా? అయితే వెంటనే పాండిచ్చేరి వెళ్లండి. ఇక్కడి ఫ్రెంచ్ క్వార్టర్ ఆర్కిటెక్చర్ అచ్చం యూరప్ నగరాలను గుర్తుచేస్తుంది. రంగురంగుల భవనాలు, అందమైన వీధులు, ప్రశాంతమైన వాతావరణం మిమ్మల్ని కట్టిపడేస్తాయి. విదేశాలకు వెళ్లకుండానే ఫ్రెంచ్ స్టైల్ ట్రిప్ ఎంజాయ్ చేయడానికి పాండిచ్చేరి బెస్ట్ ఛాయిస్.

అందరూ మాల్దీవులు వెళ్లాలనుకుంటారు కానీ అది ఖర్చుతో కూడుకున్నది. అంత కన్నా అందమైన ఐలాండ్లు అండమాన్ నికోబార్ దీవులు. నీలిరంగు సముద్రం, రంగురంగుల చేపలు, తెల్లటి ఇసుక తిన్నెలు, అందమైన సూర్యాస్తమయాలు ఇక్కడి స్పెషల్ అట్రాక్షన్స్. ఇక్కడ మీరు స్కూబా డైవింగ్, స్నార్కెలింగ్ లాంటి వాటర్ స్పోర్ట్స్ ఎంజాయ్ చేయొచ్చు. సముద్రం అడుగున ఉండే పగడపు దిబ్బలను, జలచరాలను దగ్గరి నుంచి చూసే ఛాన్స్ కూడా దొరుకుతుంది.

Worlds Most Expensive Luxury Bus: ప్రపంచంలోనే అత్యంత ఖరీదైన లగ్జరీ బస్సు ఇదే.. ధర తెలిస్తే షాకే !

Mahesh Rajamoni — Sun, 18 Oct 2026 12:49:48 +0530

Worlds Most Expensive Luxury Bus: ప్రపంచంలోనే అత్యంత ఖరీదైన లగ్జరీ బస్సు మార్చి మొబైల్ ఎలిమెంట్ పలాజ్జో. విమానంలాంటి కాక్‌పిట్, బెడ్‌రూమ్, టెర్రస్.. ఈ బస్సు ధర తెలిస్తే షాక్ అవుతారు.. కోట్ల విలువ కలిగిన ఈ బస్సు ప్రత్యేకతలు ఏంటో ఇక్కడ తెలుసుకుందాం.

ఆస్ట్రియన్ కంపెనీ మార్చి మొబైల్ తయారు చేసిన 40 అడుగుల పొడవున్న మార్చి మొబైల్ ఎలిమెంట్ పలాజ్జో ప్రపంచంలోనే అత్యంత ఖరీదైన లగ్జరీ బస్సుగా గుర్తింపు పొందింది. దీని ధర రూ. 18 కోట్లుగా ఉంది. చక్రాలపై తిరిగే రాజమహల్ అని చెప్పవచ్చు. అలాంటి ఈ బస్సులో ఒక లాంజ్, మాస్టర్ బెడ్‌రూమ్, ప్రత్యేకంగా టెర్రస్ కూడా ఉండటం దీని ప్రత్యేకత.

ఈ పలాజ్జో బస్సులో రాజులకు తగినట్లుగా ఉండే అద్భుతమైన మాస్టర్ బెడ్‌రూమ్ కూడా ఉంది. దీనిలో బ్రిటిష్ స్టైల్ అలంకరణతో కూడిన బెడ్, వెల్వెట్ కవర్లు, సిల్క్ షీట్లు ఉన్నాయి. అంతేకాకుండా దీని పైభాగంలో హ్యాండ్‌క్రాఫ్ట్ చేసిన ఇరానియన్ సీలింగ్ మిర్రర్ ఉండి ఎంతో ఆకర్షణీయంగా కనిపిస్తుంది.

40 అడుగుల పొడవున్న ఈ మొబైల్ హోమ్ కేవలం ఒక బటన్ ప్రెస్ చేయగానే వ్యక్తిగత రిట్రీట్‌లా మారిపోతుంది. దీనిలో పాప్-అప్ కాక్‌టెయిల్ బార్, ఫ్లోర్ హీటింగ్, ఎక్స్‌ట్రావగెంట్ మార్బుల్ లైటింగ్, వాటర్ ఫాగ్ సిస్టమ్, ఆన్‌బోర్డ్ ఎంటర్‌టైన్‌మెంట్ సిస్టమ్ వంటి అధునాతన సదుపాయాలు ఉన్నాయి.

ఈ బస్సులో ఒక ప్రత్యేకమైన స్కై లాంజ్ కూడా అందుబాటులో ఉంది. దీనిలో మీరు పార్టీలు నిర్వహించుకోవచ్చు. రాత్రి సమయంలో మెరిసే నక్షత్రాల క్రింద కూర్చుని ఒక క్యాన్ బీర్‌తో ప్రశాంతంగా సేదర తీరడానికి ఈ స్కై లాంజ్ చక్కగా సరిపోతుంది.

ఈ వాహనం భద్రత కోసం సీసీటీవీ సర్వైలెన్స్ సిస్టమ్‌తో అమర్చారు. బస్సులోకి అడుగుపెట్టకుండానే యజమాని దీన్ని రిమోట్ ద్వారా నియంత్రించవచ్చు. అలాగే ఈ లగ్జరీ బస్సు డ్రైవర్ క్యాబిన్ అచ్చం విమానం కాక్‌పిట్ లాగా డిజైన్ చేశారు.

దీనిలో లెదర్, అల్కాంటారా మెటీరియల్‌తో చేసిన ఎయిర్‌లైన్ స్టైల్ కెప్టెన్ చైర్ ఉంటుంది. ఊహకందని అన్ని రకాల విలాసాలతో కూడిన ఈ ఎలిమెంట్ పలాజ్జో నిజంగానే చక్రాలపై ఉన్న ఒక అద్భుతమైన రాజమహల్ అని చెప్పొచ్చు.

America: జాబ్స్ లేవు.. చేతిలో చిల్లిగవ్వ లేదు.. అమెరికాలో రాత్రికి రాత్రే ఫ్లైట్ ఎక్కుతున్న ఇండియన్స్

Haritha Chappa — Sun, 18 Oct 2026 12:40:46 +0530

America: అమెరికా నుంచి తిరిగి ఇండియాకు వస్తున్న భారతీయుల సంఖ్య పెరుగుతోంది.ట్రంప్ పాలనతో భారతీయులకు అక్కడ కష్టకాలం నడుస్తోంది. కంపెనీల్లో లేఆఫ్స్ కారణంగా ఎక్కువ మంది ఉద్యోగాలు కోల్పోతున్నారు. దీంతో తిరిగి స్వదేశానికి తిరిగి వస్తున్నారు.

అమెరికాలో స్థిరపడి మంచి భవిష్యత్తును అందుకోవాలని ఎంతోమంది భారతీయులు కలలు కన్నారు. అయితే అక్కడ ఐటీ కంపెనీల్లో ఆగకుండా సాగుతున్న లే-ఆఫ్స్ కారణంగా వేలాది మంది భారతీయ ఉద్యోగులు ఉపాధి కోల్పోతున్నారు. మరోవైపు కొత్త జాబ్ సంపాదించడం తలకు మించిన భారంగా మారింది. దీనికితోడు స్థానికులు విదేశీయులపై వ్యతిరేకత పెంచుకోవడం, ప్రభుత్వం వలస నిబంధనలను మరింత కఠినంగా మార్చడం వల్ల అక్కడి భారతీయుల్లో ఆందోళన పెరిగింది. H-1B వీసా నిబంధనలు మారండం, I-140 పిటిషన్లు పెద్ద ఎత్తున తిరస్కరణకు గురికావడంతో అక్కడ చట్టబద్ధంగా ఉండే దారులు మూసుకుపోతున్నాయి.

ఒకప్పుడు చేతినిండా లక్షల డాలర్ల జీతాలు అందుకున్న నిపుణులు ఇప్పుడు ఆర్ధికంగా ఇబ్బంది పడుతున్నారు. చేతిలో ఉద్యోగం లేక, నెలకు వేల డాలర్ల అద్దెలు కట్టలేక దిక్కుతోచని స్థితిలో పడుతున్నారు. లీజు గడువులు మిగిలి ఉన్నా, కార్లను కనీసం అమ్ముకునే అవకాశం కూడా లేక స్క్రాప్‌యార్డుల్లో వదిలేసి, విలువైన సామగ్రిని పారేసి రాత్రికి రాత్రే భారత్‌కు ఫ్లైట్ ఎక్కేస్తున్నారు. గతంలో తక్కువ వడ్డీలకు ఆశపడి ఇళ్లు కొన్నవారికి ఇప్పుడు వడ్డీ రేట్లు 4 శాతం నుంచి ఏకంగా 7.5 శాతానికి పెరిగిపోవడం పెనుభారంగా మారింది. ద్రవ్యోల్బణం, లోన్ ఈఎంఐల దెబ్బకు ఇళ్లు అమ్ముడుపోక చాలామంది రోడ్డున పడే దుస్థితి వచ్చింది. ఏడాదికి కోటి రూపాయల ప్యాకేజీ అందుకున్నవారు సైతం హైదరాబాద్ వంటి నగరాల్లో రూ. 35 లక్షల జీతానికే సంతృప్తి పడుతున్నారు.

ఇక ఉన్నత చదువుల కోసం వెళ్లిన తెలుగు విద్యార్థుల పరిస్థితి మరింత దయనీయంగా మారింది. వేలకు వేలు డాలర్ల ఫీజులు చెల్లించి డిగ్రీలు పూర్తి చేసినా క్యాంపస్‌లలో ఉద్యోగాలు దక్కడం లేదు. చేసిన అప్పులు తీర్చడానికి, కనీస ఖర్చుల కోసం పెట్రోల్ బంకులు, సూపర్ మార్కెట్లలో చిరుద్యోగాలు, డెలివరీ బాయ్స్‌గా మారుతున్నారు. ఈ పరిస్థితులన్నీ 2008 నాటి ఆర్థిక మాంద్యాన్ని గుర్తుచేస్తున్నాయని అక్కడి భారతీయులు చెబుతున్నారు. డాలర్ల కలలతో విమానం ఎక్కిన భారతీయులు ఇప్పుడు స్వదేశానికి తిరిగి వస్తుండటంతో, కొత్తగా అమెరికా వెళ్లాలనుకునే వారి సంఖ్య చాలా తగ్గిపోతోంది.

ఇంట్లో ఎవరైనా మరణిస్తే ఏడాది పాటు గుడికి వెళ్లకూడదా? శాస్త్రాలు ఏం చెపుతున్నాయి? గరికపాటి నరసింహారావు విశ్లేషణ

Mahesh Jujjuri — Sun, 18 Oct 2026 12:30:19 +0530

ఇంట్లో ఎవరైనా చనిపోతే ఏడాదిపాటు అంటు ఉంటుందా? గుడికి వెళ్లకూడదా.. పూజలు చేయకూడదా? ఏడాదిపాటు నియమం పాటించాల్సిందేనా? అసలు ఇందులో నిజం ఎంత? గరికపాటి నరసింహారావు చెప్పిన నిజాలేంటి?

మన సమాజంలో ఎన్నో రకాల ఆచారాలు, సాంప్రదాయాలు ఉన్నాయి. అయితే కాలక్రమేణా వాటికి కొన్ని మూఢనమ్మకాలు కూడా తోడవుతుంటాయి. ముఖ్యంగా హిందూ ధర్మంలో ఇంట్లో ఎవరైనా మరణిస్తే పాటించే పద్ధతుల విషయంలో చాలామందిలో కొన్ని పొరబడిన అభిప్రాయాలు ఉన్నాయి. ఇంట ఎవరైనా చనిపోతే ఏడాది పాటు గుడికి వెళ్లకూడదనే నియమం పెద్దలు చెపుతుంటారు. కానీ ఈ విషయంపై రీసెంట్ గా చాలాచోట్ల చర్చ జరుగుతోంది. దీనిపై ప్రముఖ ఆధ్యాత్మిక వేత్త, ప్రవచనకర్త శ్రీ గరికపాటి నరసింహారావు తన ప్రవచనం ద్వారా స్పష్టమైన , శాస్త్రబద్ధమైన అవగాహన కల్పించారు.

ఇంట్లో పెద్దవారొ ఎవరో మరణిస్తే కుటుంబ సభ్యులు ఏడాది పాటు గుళ్లకు వెళ్లకూడదని, ఎలాంటి పూజలు, యజ్ఞ యాగాలు చేయకూడదని చాలామంది భావిస్తుంటారు. అసలు ఈ నిబంధనలు ఏ శాస్త్రంలోనూ చెప్పలేదని గరికపాటి స్పష్టం చేశారు. ఎవరో ఒకరు చెప్పిన మాటలను గుడ్డిగా నమ్మి కాలం చెల్లిన ఆచారాలను పాటించడం వల్ల అనవసరమైన మానసిక వేదన కలుగుతుందే తప్ప ఎలాంటి ప్రయోజనం ఉండదు. హిందూ సనాతన ధర్మం ఎప్పుడూ మానసిక ప్రశాంతతను, దైవచింతనను ప్రోత్సహిస్తుంది కానీ, ఇలాంటి నిరుత్సాహకరమైన నిబంధనలను ఎక్కడా సూచించలేదు.

మరణం తర్వాత ఎంత కాలం గుడికి వెళ్లకూడదు?

సాధారణంగా మరణం సంభవించినప్పుడు ఆ ఇంటికి సంబంధించి పన్నెండు రోజుల పాటు కొన్ని కార్యక్రమాలు, నియమాలు ఉంటాయి. ఆ పన్నెండు రోజులు పూర్తి కాగానే పదమూడో రోజు నుంచి కుటుంబ సభ్యులు యథావిధిగా తమ రోజువారీ కార్యక్రమాలను, అన్ని రకాల యజ్ఞ యాగాధులను, పూజలను చేసుకోవచ్చని గరికపాటి వివరించారు. కేవలం పన్నెండు రోజులు మాత్రమే ఆ సూతకం లేదా నియమం వర్తిస్తుందే తప్ప, దాన్ని ఏడాది పాటు పొడిగించడం కేవలం ఒక అపోహ మాత్రమే అని అన్నారు.

ఇంట మరణం సంభవించినప్పుడు ఆ కుటుంబానికి తీవ్రమైన మానసిక బాధ, ఒంటరితనం కలుగుతాయి. సరిగ్గా అదే సమయంలో దైవ దర్శనం - గుడికి వెళ్లడం వల్ల మనస్సుకు ఎంతో కొంత ప్రశాంతత లభిస్తుంది. అయితే "సంవత్సరం పాటు గుడికి వెళ్లకూడదు" అనే నియమం పెట్టుకోవడం వల్ల, వారం వారం గుడికి వెళ్లే అలవాటు ఉన్నవారు తీవ్ర మనోవేదనకు గురవుతారు. ఆ తర్వాత కాలంలో వేరే మతాల వారు లేదా ఇతర వ్యక్తులు వచ్చి వారిని మతం మార్చుకోవాలని ప్రేరేపించే ప్రమాదం ఉందని, హిందువులలో వ్యాపిస్తున్న ఇటువంటి పిచ్చి నమ్మకాల వల్ల ఇతర మతాలకు మేలు జరుగుతోందని ఆయన ఆవేదన వ్యక్తం చేశారు.

తండ్రి పోయాడని దూరంగా ఉండాలా?

తండ్రి లేదా కుటుంబ సభ్యులు మరణిస్తే ఏడాది పాటు గుడికి వెళ్లకూడదనే నిబంధన సరికాదన్నారు. కానీ కొందరు అనారోగ్యంతోనో లేదా వయసురీత్యా గుడికి వెళ్లలేని పరిస్థితుల్లో ఉండవచ్చు. అలాంటి వారు మానసికంగా బాధపడుతూ ఉంటారు.

ఈ దశలో ఎవరో వచ్చి తప్పుదారి పట్టించే అవకాశం ఉంది కాబట్టి అప్రమత్తంగా ఉండాలి. మన సంప్రదాయాలను సరిగ్గా అర్థం చేసుకోకుండా ఇతరులు చెప్పే మాటలను గుడ్డిగా నమ్మడం వల్ల మన ధర్మంపై అనవసరమైన భయాలు పెరుగుతాయి.

మతం మారడం లేదా సంప్రదాయాలను వదిలేయడం అంటే కేవలం పూజలు ఆపడం కాదు, అసలు విషయాలు తెలియకపోవడమే. మనకు తెలియని విషయాలను పెద్దలను, శాస్త్రాలను అనుసరించి తెలుసుకోవాలి. కాబట్టి ఇంట మరణం సంభవించిన వారు పన్నెండు రోజులు మాత్రమే నియమం పాటించి, పదమూడో రోజు నుండి హాయిగా గుళ్లకు వెళ్లవచ్చని గరికపాటి స్పష్టం చేశారు.

Top 10 Countries With Most Billionaires: అత్యధిక బిలియనీర్లు ఉన్న టాప్ 10 దేశాలు ఇవే, భారత్ స్థానం ఎంతంటే?

Mahesh Rajamoni — Sun, 18 Oct 2026 11:12:31 +0530

Top 10 Countries With Most Billionaires: 2026 ఫోర్బ్స్ జాబితా ప్రకారం అత్యధిక బిలియనీర్లు ఉన్న ప్రపంచ దేశాల్లో అమెరికా అగ్రస్థానంలో కొనసాగుతోంది. మరి ఈ లిస్టులో భారత్ ఎన్నో స్థానంలో ఉంది? టాప్ 10 దేశాలు ఏవి?

ప్రపంచవ్యాప్తంగా అత్యధిక సంఖ్యలో బిలియనీర్లు నివసిస్తున్న దేశాల జాబితా విడుదలైంది. ఈ గ్లోబల్ రిచ్ లిస్ట్‌లో అమెరికా తన ఆధిపత్యాన్ని నిలబెట్టుకోగా, భారత్ సైతం ఈ లిస్టులో ఉంది. ప్రపంచంలోనే అత్యధిక కుబేరులు ఉన్న మూడో అతిపెద్ద దేశంగా ఇండియా తన స్థానాన్ని మరింత బలపరుచుకుంది.

వివిధ దేశాల్లోని ఆర్థిక వ్యవస్థల వృద్ధి, స్టాక్ మార్కెట్ల పురోగతి, సరికొత్త బిజినెస్ మోడల్స్ కారణంగా ఈ ఏడాది బిలియనీర్ల సంఖ్య భారీగా పెరిగింది. ప్రపంచవ్యాప్తంగా అత్యంత ధనవంతులు ఉన్న టాప్ 10 దేశాల వివరాలు, వారి వద్ద ఉన్న సంపద ఎంత, ఆయా దేశాల అగ్ర కుబేరుల పూర్తి వివరాలను ఇప్పుడు చూద్దాం.

ప్రపంచంలోనే అత్యధికంగా 989 మంది బిలియనీర్లతో అమెరికా మొదటి స్థానంలో నిలిచింది. ఈ కుబేరులందరి ఉమ్మడి ఆస్తి విలువ ఏకంగా $8.4 ట్రిలియన్ డాలర్లుగా నమోదైంది. దక్షిణ ఆఫ్రికా నుండి అమెరికాకు వలస వచ్చి ప్రపంచంలోనే అత్యంత ధనవంతుడిగా నిలిచిన ఎలాన్ మస్క్, యూఎస్ బిలియనీర్ల జాబితాలో అగ్రస్థానంలో కొనసాగుతున్నారు.

ఈ ఏడాది చైనాలో బిలియనీర్ల సంఖ్య రికార్డు స్థాయికి చేరింది. మొత్తం 539 మంది బిలియనీర్లతో చైనా ప్రపంచంలో రెండో స్థానాన్ని ఆక్రమించింది. వీరి మొత్తం సంపద $2.2 ట్రిలియన్ డాలర్లుగా ఉంది. గత ఏడాది నమోదైన 495 మంది బిలియనీర్ల రికార్డును దాటుకుని చైనా ఈ కొత్త మైలురాయిని అందుకుంది. టిక్‌టాక్ మాతృసంస్థ బైట్‌డాన్స్ కో-ఫౌండర్ జాంగ్ యిమింగ్ చైనాలో అత్యంత ధనవంతుడిగా నిలిచారు.

అత్యధిక బిలియనీర్లు ఉన్న ప్రపంచ దేశాల జాబితాలో భారత్ మూడో స్థానంలో ఉంది. మన దేశంలో ప్రస్తుతం మొత్తం 229 మంది బిలియనీర్లు ఉండగా, వీరి ఉమ్మడి సంపద $1 ట్రిలియన్ డాలర్లకు చేరుకుంది. రిలయన్స్ ఇండస్ట్రీస్ అధినేత ముకేశ్ అంబానీ, అదానీ గ్రూప్ అధినేత గౌతమ్ అదానీలు భారతదేశంలోనే అత్యంత ధనవంతుడిగా తన అగ్రస్థానాన్ని నిలబెట్టుకోవడానికి పోటీ పడుతున్నారు.

జర్మనీలో బిలియనీర్ల సంఖ్య గణనీయంగా పెరిగి 212కు చేరుకుంది. గత ఏడాది 171 మంది బిలియనీర్లు, $793 బిలియన్ డాలర్ల సంపద ఉండగా, ఈసారి వీరి ఉమ్మడి ఆస్తి విలువ ఏకంగా $1 ట్రిలియన్ డాలర్లకు పెరిగింది. $67.2 బిలియన్ డాలర్ల నికర సంపదతో డైటర్ ష్వార్జ్ జర్మనీలోనే అత్యంత ధనవంతుడిగా నిలిచారు.

ఫోర్బ్స్ అత్యధిక బిలియనీర్లు ఉన్న దేశాల వివరాల ప్రకారం, రష్యా ప్రపంచంలో 5వ స్థానంలో నిలిచింది. అక్కడ మొత్తం 147 మంది బిలియనీర్లు ఉండగా, వీరి మొత్తం సంపద $649 బిలియన్ డాలర్లుగా ఉంది. గత ఏడాది 140 మంది బిలియనీర్లు, $580 బిలియన్ డాలర్ల సంపద ఉండగా ఈసారి ఆ సంఖ్య పెరిగింది. $37 బిలియన్ డాలర్ల ఆస్తితో అలెక్సీ మోర్డాషోవ్, ఆయన కుటుంబంరష్యాలో ప్రథమ స్థానంలో ఉన్నారు.

• ఇటలీ: 89 మంది బిలియనీర్లతో ఇటలీ 6వ స్థానంలో ఉంది. వీరి మొత్తం సంపద $483 బిలియన్ డాలర్లు. $89.3 బిలియన్ డాలర్ల సంపదతో జియాన్‌కార్లో దేవసిని ఇటలీలో అత్యధిక ధనవంతులుగా టాప్ లో ఉన్నారు.

• కెనడా: కెనడా 82 మంది బిలియనీర్లతో 7వ స్థానంలో నిలిచింది. వీరి మొత్తం సంపద $457 బిలియన్ డాలర్లు. గత ఏడాది ఇక్కడ 76 మంది బిలియనీర్లు, $349 బిలియన్ డాలర్ల సంపద ఉండేది. $110 బిలియన్ డాలర్లతో చాంగ్‌పెంగ్ జావో కెనడాలోనే అత్యంత ధనవంతుడిగా ఉన్నారు.

• హాంగ్‌కాంగ్: 71 మంది బిలియనీర్లతో హాంగ్‌కాంగ్ 8వ స్థానంలో ఉంది. వీరి మొత్తం ఉమ్మడి సంపద $420 బిలియన్ డాలర్లు.

• బ్రెజిల్: 70 మంది బిలియనీర్లతో బ్రెజిల్ 9వ స్థానాన్ని దక్కించుకుంది. వీరి మొత్తం సంపద $265 బిలియన్ డాలర్లుగా నమోదైంది. $35.9 బిలియన్ డాలర్లతో ఎడ్వర్డో సేవరిన్ బ్రెజిల్ టాప్ రిచెస్ట్ పర్సన్‌గా నిలిచారు.

• తైవాన్: 66 మంది బిలియనీర్లతో తైవాన్ 10వ స్థానంలో నిలిచింది. వీరి ఉమ్మడి సంపద విలువ $245 బిలియన్ డాలర్లుగా ఉంది.

Stars: ఆకాశంలో కాదు... భూమి మీద నక్షత్రాలు కనిపించే ఏకైక ప్రదేశం ఇది, ఎక్కడ ఉందో తెలుసా?

ramya Sridhar — Sun, 18 Oct 2026 10:50:18 +0530

Stars: ఆకాశంలో నక్షత్రాలు చూడటానికి చాలా అందంగా ఉంటాయి. వాటిని దూరం నుంచి మాత్రమే చూడగలం. కానీ, భూమి మీద నక్షత్రాలను అది కూడా మనం దగ్గర నుంచి చూసే అవకాశం ఉందని మీకు తెలుసా?

రాత్రిపూట ఆకాశంలో మెరుస్తూ కనిపించే నక్షత్రాలు చూడటానికి చాలా అందంగా ఉంటాయి. ఒకేసారి, ఆకాశంలోని నక్షత్రాలు భూమిపైకి వస్తే ఎలా ఉంటుంది? అది కూడా సముద్ర తీరంలో మీ పాదాల కింద మెరుస్తూ కనిపిస్తే ఇంకెంత అందంగా ఉంటుంది. ఇలాంటి ప్లేస్ నిజంగానే భూమిపై ఉంది.

సాధారణంగా మనం బీచ్ కి వెళ్తే.. తెల్లటి ఇసుక, చిన్న చిన్న పెంకులు, గవ్వలు కనిపిస్తాయి. కానీ, జపాన్ లోని ఓ బీచ్ కి వెళ్తే.. మనకు ఇసుకలో నక్షత్రాలు కనిపిస్తాయి. ఆ బీచ్ ఇసుక సాధారణంగా అన్ని బీచ్ ల్లా ఉండదు. అచ్చం చిన్న చిన్న నక్షత్రాల ఆకారంలో ఆ బీచ్ లోని ఇసుక మెరుస్తూ కనిపిస్తుంది. అందుకే, ఈ బీచ్ ని స్టార్ శాండ్ అని పిలుస్తారు. జపనీస్ లో హోషిజునా అని కూడా పిలుస్తారు. అసలు, నక్షత్రాలు భూమి మీద ఎలా కనిపిస్తాయి? ఒకటి, రెండు కాదు.. ఆ బీచ్ లోని ఇసుక మొత్తం ఈ నక్షత్రాలతోనే కనిపిస్తుంది.. అదెలా సాధ్యం..? దీని వెనక సీక్రెట్ ఏంటో ఇప్పుడు తెలుసుకుందాం...

సైన్స్ ప్రకారం ఇవి ఏ రాళ్లు రప్పలు నలగడం వల్ల ఏర్పడినవి కావు. ఇవి సముద్రంలో నివసించే 'ఫోరామినిఫెరా' (Foraminifera) అనే సూక్ష్మ జీవుల అస్థిపంజర అవశేషాలు. ఈ చిన్న జీవులు చనిపోయిన తర్వాత వాటి గట్టి కెంపైన పైభాగం లేదా పెంకులు అలల తాకిడికి కొట్టుకొచ్చి తీరానికి చేరుకుంటాయి. చూడటానికి అచ్చం చిన్న నక్షత్రాల లాంటి ఆకారంలో ఉండే ఈ రేణువులు ఆ ప్రాంతంలోని నీటిని కూడా ఎమరాల్డ్ గ్రీన్ (పచ్చని) రంగులో కనిపించేలా చేస్తాయి.

ఇక స్థానికుల నమ్మకం ప్రకారం.. సముద్రంలో భారీ సర్పం తిని వదిలేసిన స్టార్ ఫిష్ పిల్లల ఎముకలే ఈ రూపంలో తీరానికి కొట్టుకొస్తాయని ఒక అందమైన నమ్మకం ప్రచారంలో ఉంది.

ఈ బీచ్ ఎక్కడుంది?

జపాన్‌లోని ఒకినావా ప్రిఫెక్చర్‌లోని యాయామా దీవులలో ఉన్న తకేటోమి ద్వీపంలోని కైజి బీచ్ (Star Sand Beach) దీనికి చాలా ప్రసిద్ధి చెందింది. ఈ అద్భుతమైన ప్రదేశాన్ని చూడటానికి ప్రపంచం నలుమూలల నుంచి టూరిస్టులు పెద్ద ఎత్తున వస్తుంటారు. అయితే ప్రకృతి అందాన్ని, ఆ వాతావరణాన్ని కాపాడుకోవడానికి టూరిస్టులు అక్కడి ఇసుకను తమతో పాటు ఇంటికి తీసుకెళ్లడాన్ని అక్కడి ప్రభుత్వం కఠినంగా నిషేధించింది. ప్రకృతి తనలో దాచుకున్న ఈ అద్భుతమైన వింత నిజంగా ఎంతో ఆశ్చర్యకరంగా ఉంది కదూ!

Andhra Village: ఈ గ్రామంలోకి చెప్పులతో అడుగు పెడితే అంతే సంగతులు.. కలెక్టర్ అయినా చెప్పులు విప్పాల్సిందే

Haritha Chappa — Sun, 18 Oct 2026 10:34:29 +0530

Andhra Village: ఆంధ్రప్రదేశ్ లోని ఒక విచిత్ర గ్రామం ఇది. ఈ ఊళ్లోకి ఎవరూ కూడా చెప్పులు వేసుకుని కనిపించరు. బయట నుంచి ఎవరు వచ్చినా ఊరి చివర చెప్పులు విప్పి వెళ్లాల్సిందే. ఆఖరికి కలెక్టరయినా చెప్పులు విప్పే గ్రామంలో అడుగుపెడతారు.

ఆంధ్రప్రదేశ్ లో ఉన్న వింత గ్రామాల్లో ఇది ఒకటి.ఈ గ్రామంలో ఎవరూ చెప్పులు వేసుకుని కనిపించరు. బయటికి నుంచి వచ్చిన వారు ఊరి చివర చెప్పులు విప్పి గ్రామంలో అడుగుపెట్టాలి. అలాంటి ఒక ఆచారాన్ని తిరుపతి జిల్లా పాకాల మండలంలోని 'వేమన ఇండ్లు' గ్రామంలో పాటిస్తున్నారు. ఈ ఊరిలో ఎవరూ కాళ్లకు చెప్పులు వేసుకోరు. బడికి పోయే చిన్న పిల్లల నుంచి కాలేజీ కుర్రాళ్ల వరకు అందరూ వందల కిలోమీటర్లు నడిచినా కాళ్లకు చెప్పులు లేకుండానే తిరుగుతారు. చివరకు బెంగళూరు లాంటి పెద్ద నగరాల్లో ఉద్యోగాలు చేసినవాళ్లు కూడా చెప్పులు ముట్టలేదు. పాలవేకరి కులానికి చెందిన 25 కుటుంబాలు నివసించే ఈ ఊరిలో, వెంకటేశ్వర స్వామిపై ఉన్న అమితమైన భక్తితోనే చెప్పులు వేసుకోవడం మానేశామని చెబుతున్నారు. ఊరు దాటి వేరే ప్రాంతాలకు వెళ్లినా వారు బయట తిండి తినరు, కనీసం నీళ్లు కూడా తాగరు. బయటి వ్యక్తులు ఎవరైనా పొరపాటున తాకితే చాలు, వెంటనే స్నానం చేసి బట్టలు మార్చుకున్న తర్వాతే ఇంట్లోకి అడుగుపెడతారు.

ఈ ఊళ్లోకి బయట నుంచి ఎవరు వచ్చినా సరే.. చివరకు ఎమ్మెల్యే, ఎమ్మార్వో లేదా జిల్లా కలెక్టర్ అయినా ఊరి సరిహద్దులోనే చెప్పులు విప్పేసి లోపలికి నడవాల్సిందే. ఈ వింత నిబంధనతో పాటు ఇక్కడ దారుణమైన వివక్ష కూడా అమలవుతోంది. గ్రామంలోకి దళితులకు అస్సలు ప్రవేశం లేదు, వారితో మాట్లాడటానికి కూడా ఊరివాళ్లు ఇష్టపడరు. పక్క ఊరి నుంచి పనిమీద ఎవరు వచ్చినా ఇళ్ల లోపలికి రానివ్వకుండా బయటే నిలబెట్టి మాట్లాడతారు. ఆడవాళ్లకు నెలసరి వచ్చినప్పుడు ఊరి బయట కట్టిన ఒక చిన్న గదిలోనే ఉంచుతారు. రాజ్యాంగం అంటరానితనాన్ని నిషేధించినా, ఇక్కడ మాత్రంఈ వివక్ష కొనసాగుతోంది.

ఇక రోగాలు, రొప్పులొచ్చినా వీరు ఆసుపత్రుల ముఖం చూడరు. విషపూరితమైన పాము కాటేసినా సరే, గ్రామంలోని పుట్ట చుట్టూ తిరిగితే తగ్గిపోతుందని నమ్ముతారు. ఊళ్లో ఎవరూ కనీసం కరోనా వ్యాక్సిన్ కూడా వేసుకోలేదు. ఆడవాళ్లు కాన్పుల కోసం కూడా ఆసుపత్రికి వెళ్లడం ఇక్కడ పూర్తిగా నిషిద్ధం. డిగ్రీలు చదివిన యువకులు ఉన్నా, బయట తిండి పడదనో, ఆచారాలు పాడవుతాయనో ఉద్యోగాలు చేయకుండా వ్యవసాయమే చూసుకుంటున్నారు. చెప్పులు వేసుకోని భక్తి పేరుతో ప్రాణాల మీదికి తెచ్చుకునే మూఢనమ్మకాలు, మనుషుల మధ్య గోడలు కట్టే వివక్ష ఇంకా కొనసాగడంపై అధికారులు తప్పకుండా చర్యలు తీసుకోవాల్సిన అవసరం ఉంది.

Fruits: తెలుగు వారికి పోర్చుగీస్ వారు పరిచయం చేసిన పండు పేరేమిటో తెలుసా?

Haritha Chappa — Sun, 18 Oct 2026 09:22:07 +0530

Fruits: తెలుగు వారికి కొన్ని పండ్లను పోర్చుగీసు వారు పరిచయం చేశారు. వారు పరిచయం చేయకపోతే మనకి ఆ పండ్ల రుచి మనకు తెలియవు. ఏ పండ్లు మనకు పోర్చుగీసు వారి వల్ల పరిచయం అయ్యాయో ఇక్కడ ఇచ్చాము.

ఈ రోజు మనం ఎంతో ఇష్టంగా తినే పండ్లో ఎన్నో ఉన్నాయి. ఆ పండ్లేవి మన దేశంలో పుట్టినవి కాదు. మన తెలుగు నేలపై పండినవి కాదు. కొన్ని వందల ఏళ్ల క్రితం విదేశాల నుంచి మన దేశానికి వచ్చాయి. వాటిలో పైనాపిల్, బొప్పాయి, జామపండు ముఖ్యమైనవి. ఈ పండ్లు భారతదేశానికి చేరుకోవడం వెనుక పోర్చుగీస్ వ్యాపారుల పాత్ర ఉంది. 16వ శతాబ్దంలో పోర్చుగీస్ వారు సముద్ర మార్గాల ద్వారా భారతదేశానికి వచ్చి వ్యాపారం చేసేవారు. ఆ సమయంలో అమెరికా ఖండానికి చెందిన పలు పంటలు, పండ్లను భారతదేశానికి తీసుకొచ్చారు. అలా అక్కడ్నించి తెలుగు రాష్ట్రాలకు కూడా చేరాయి. విదేశాల నుంచి వచ్చిన పండ్లు క్రమంగా మన దేశంలోని వేర్వేరు ప్రాంతాలకు విస్తరించాయి. ఇప్పుడు మన మార్కెట్లలో సులభంగా దొరికే ఈ పండ్లు ఒకప్పుడు భారతీయులకు కొత్తవే కావడం విశేషం.

పైనాపిల్‌ను బ్రెజిల్ నుంచి భారతదేశానికి తీసుకొచ్చినట్లు చారిత్రక ఆధారాలు చెబుతున్నాయి. 1548 ప్రాంతంలో ఈ పండు భారతదేశానికి చేరినట్లు సమాచారం. పోర్చుగీస్ వారు పాలించిన గోవా ప్రాంతంలో పైనాపిల్ సాగు వేగంగా విస్తరించింది. 16వ శతాబ్దంలోనే అక్కడి మార్కెట్లలో ఈ పండు విరివిగా లభించేది. ఆ తర్వాత దేశంలోని ఇతర ప్రాంతాలకు కూడా పైనాపిల్ సాగు విస్తరించింది. దీని తీపి రుచి, ప్రత్యేకమైన వాసన ప్రజలను ఆకట్టుకున్నాయి. ప్రస్తుతం పైనాపిల్‌ను నేరుగా తినడంతో పాటు రసాలు, స్వీట్లు, ఐస్‌క్రీములు, ఇతర ఆహార పదార్థాల తయారీలోనూ ఉపయోగిస్తున్నారు.

బొప్పాయి కూడా అమెరికా ఖండం నుంచి భారతదేశానికి చేరిన పండే. పోర్చుగీస్ వ్యాపారులు 16వ శతాబ్దంలో ఈ పండును భారతదేశానికి తీసుకొచ్చినట్లు చారిత్రక సమాచారం ఉంది. తర్వాత జామపండు కూడా 17వ శతాబ్దం ప్రారంభంలో మన దేశానికి చేరింది. ఈ మూడు పండ్లను భారతదేశానికి పరిచయం చేయడంలో పోర్చుగీస్ వారి పాత్ర ఉందని చరిత్ర చెబుతోంది. నేడు తెలుగు రాష్ట్రాల్లోనూ ఈ పండ్లు విరివిగా పండుతున్నాయి. రైతులకు ఆదాయం అందించడంతో పాటు ప్రజలకు అందుబాటు ధరల్లో లభిస్తున్నాయి. ఒకప్పుడు విదేశాల నుంచి వచ్చిన పండ్లు ఇప్పుడు మన ఆహారంలో భాగమయ్యాయి. వందల ఏళ్ల క్రితం సాగిన సముద్ర ప్రయాణాలు, వ్యాపార సంబంధాలు మన ఆహారపు అలవాట్లను ఎలా మార్చాయో ఈ పండ్ల చరిత్ర తెలియజేస్తోంది.

Mirchi Capital: మనదేశ మిరపకాయల రాజధాని ఏదో తెలుసా? ఆసియాలోనే అతి పెద్ద మార్కెట్ ఇక్కడే ఉంది

Mahesh Jujjuri — Sun, 18 Oct 2026 08:15:35 +0530

Mirchi Capital: ఆసియా ఖండంలోనే అతి పెద్ద మిర్చి మార్కెట్ మన తెలుగు రాష్ట్రంలో ఉందని మీకు తెలుసా? మన నగరానికి మిర్చి రాజధాని అనే పేరు ఉందని తెలుసా? లక్షలాది కూలీలకు ఉపాధి కల్పిస్తూ.. కోట్లలో వ్యాపారం చేస్తున్న మిర్చి నగరం ఏది?

భారతదేశంలో ఆహార రుచులలో కారానికి ఎంత ప్రాధాన్యత ఉందో ప్రత్యేకంగా చెప్పనవసరం లేదు. మన వంటకాల్లో మిరపకాయలు, ఎండు కారం లేకపోతే కూరలకు అసలు రుచి రాదు. ప్రపంచవ్యాప్తంగా విభిన్న రకాల మిరపకాయలు పండినప్పటికీ, మన దేశంలో పండే మిరపకాయల ఘాటు , ప్రత్యేకత వేరు. మరి, మన దేశంలో 'మిర్చి రాజధాని' (Chilli Capital of India) గా ఏ ప్రాంతం ప్రసిద్ధి చెందిందో మీకు తెలుసా? ఆసియాలోనే అతిపెద్ద మిర్చి మార్కెట్ ఎక్కడ ఉంది?

భారతదేశంలో ఘాటైన మిరపకాయలకు పెట్టింది పేరు ఆంధ్రప్రదేశ్‌లోని గుంటూరు నగరం. దేశవ్యాప్తంగా గుర్తింపు పొందిన ఈ నగరాన్ని అందరూ భారతదేశ మిర్చి రాజధాని అని పిలుస్తారు. ఆంధ్రప్రదేశ్ ఆహార సంస్కృతిలో కారానికి ప్రత్యేక స్థానం ఉంది, ఆ ఘాటు రుచిని ప్రపంచానికి అందించడంలో గుంటూరు కీలక పాత్ర పోషిస్తోంది. ఇక్కడి నేలలు, వాతావరణ పరిస్థితులు మేలురకం మిర్చి పంటకు బాగా అనుకూలిస్తాయి. అందుకే ప్రతి సీజన్‌లో పరిసర ప్రాంతాల రైతులు పండించిన ఎర్రటి మిర్చి రాశులతో గుంటూరు ఎరుపు రంగు పులుముకుంటుంది. ఇక్కడ ఉత్పత్తి అయ్యే మిరపకాయలకు అంతర్జాతీయ మార్కెట్‌లో విపరీతమైన డిమాండ్ ఉండటంతో రైతులు భారీ ఎత్తున మిర్చిని పండిస్తుంటారు.

గుంటూరు వ్యవసాయ మార్కెట్ యార్డ్ ఆసియా ఖండంలోనే అత్యంత పెద్ద మిర్చి మార్కెట్‌గా పేరుగాంచింది. పంట చేతికి వచ్చే సమయంలో నిత్యం వేలాది బస్తాల మిరపకాయలు ఈ యార్డుకు చేరుకుంటాయి. ఇక్కడ ప్రతిరోజూ కోట్ల రూపాయల విలువైన క్రయవిక్రయాలు జరుగుతుంటాయి. రైతులు, వ్యాపారులు, కార్మికులతో ఈ మార్కెట్ ఎప్పుడూ రద్దీగా కనిపిస్తుంది. ఆధునిక కోల్డ్ స్టోరేజ్ లు, రవాణా సౌకర్యాలు స్థానికంగా అందుబాటులో ఉండటం వల్ల క్రయవిక్రయాలు వేగంగా సాగుతాయి. మిర్చి వ్యాపారం ద్వారా ఈ ప్రాంతంలో లక్షలాది మంది కూలీలకు, చిరు వ్యాపారులకు నిరంతరం ఉపాధి లభిస్తోంది.

విదేశాలకు భారీగా ఎగుమతులు..

గుంటూరు మిర్చికి అంతర్జాతీయ మార్కెట్‌లో విపరీతమైన గిరాకీ ఉంది. ప్రత్యేకంగా 'గుంటూరు సన్నం' రకానికి భౌగోళిక గుర్తింపు కూడా దక్కింది. దట్టమైన ఎరుపు రంగు, సహజమైన ఘాటు, రంగు మారకుండా ఎక్కువ కాలం నిల్వ ఉండే గుణం వల్ల విదేశీ కొనుగోలుదారులు ఈ రకాన్ని ఎక్కువగా ఇష్టపడతారు. అమెరికా, యూరప్ దేశాలతో పాటు శ్రీలంక, బంగ్లాదేశ్ వంటి ఆసియా దేశాలకు గుంటూరు నుంచే భారీగా ఎగుమతులు జరుగుతాయి. ఆహార పదార్థాల తయారీలోనే కాకుండా, ఔషధ రంగానికి అవసరమైన క్యాప్సైసిన్ తీయడానికి, రంగుల పరిశ్రమల్లో కూడా ఈ మిరపకాయలను పెద్దఎత్తున ఉపయోగిస్తున్నారు. గుంటూరు తన ఘాటుదనంతో ప్రపంచ పటంలో భారతదేశ ఖ్యాతిని సగర్వంగా నిలబెడుతోంది.