Asianet News Telugu

హైదరాబాద్‌లో వెస్టిండీస్ విధ్వంసం.. అల‌జ‌డి సృష్టించిన హోప్‌, ఇండియా టార్గెట్ ఎంతంటే?

Narender Vaitla — Wed, 14 Oct 2026 21:04:37 +0530

IND vs WI 4th T20: హైదరాబాద్‌లోని ఉప్పల్ స్టేడియంలో వెస్టిండీస్ బ్యాటర్లు పరుగుల వరద పారించారు. భారత బౌలర్లకు ఏమాత్రం అవకాశం ఇవ్వకుండా నిర్ణీత 20 ఓవర్లలో 3 వికెట్ల నష్టానికి 247 పరుగుల భారీ స్కోరు సాధించారు.

నాలుగో టీ20లో టాస్ తర్వాత బ్యాటింగ్‌కు దిగిన వెస్టిండీస్ ఆరంభం నుంచే దూకుడుగా ఆడింది. భారత బౌలర్లు కట్టుదిట్టంగా బంతులు వేసేందుకు ప్రయత్నించినా, విండీస్ బ్యాటర్ల దాడిని అడ్డుకోవడం కష్టమైంది. ముఖ్యంగా పవర్‌ప్లేలోనే భారీగా పరుగులు రాబట్టిన కరీబియన్ జట్టు.. ఆ తర్వాత కూడా అదే జోరును కొనసాగించింది. ఫలితంగా 20 ఓవర్లు ముగిసేసరికి మూడు వికెట్లు మాత్రమే కోల్పోయి 247 పరుగులు చేసింది. భారత్‌తో టీ20 పోరులో తమ బ్యాటింగ్ బలాన్ని మరోసారి చాటుకుంది.

వెస్టిండీస్ ఇన్నింగ్స్‌లో కెప్టెన్ షాయ్ హోప్ ప్రధాన ఆకర్షణగా నిలిచాడు. భారత బౌలర్లను సమర్థంగా ఎదుర్కొంటూ పరుగుల వేగాన్ని పెంచిన అతడు.. సెంచరీతో జట్టుకు భారీ స్కోరు అందించాడు. మొత్తం 102 పరుగులతో అద్భుత ఇన్నింగ్స్ ఆడాడు. క్రీజులో కుదురుకున్న తర్వాత బౌండరీలు, సిక్సర్లతో విరుచుకుపడుతూ భారత శిబిరంలో ఒత్తిడి పెంచాడు. గత మ్యాచ్‌లోనూ భారీ ఇన్నింగ్స్‌తో ఆకట్టుకున్న హోప్.. హైదరాబాద్‌లో మరోసారి తన బ్యాటింగ్ సత్తా చాటాడు.

హోప్‌కు తోడుగా ఇతర బ్యాటర్లు కూడా కీలక ఇన్నింగ్స్‌లు ఆడటంతో వెస్టిండీస్ స్కోరు భారీగా పెరిగింది. రూథర్‌ఫోర్డ్ 49 పరుగులతో రాణించి జట్టు స్కోరు పెరగడంలో కీలక పాత్ర పోషించాడు. షిమ్రాన్ హెట్మయర్ 33 పరుగులు చేయగా, రోవ్‌మన్ పావెల్ 24 పరుగులతో తన వంతు సహకారం అందించాడు. జ్యువెల్ ఆండ్రూ 21 పరుగులు సాధించాడు. ఇలా ఒకరిద్దరిపై ఆధారపడకుండా బ్యాటింగ్ లైనప్‌లోని పలువురు ఆటగాళ్లు వేగంగా పరుగులు సాధించడంతో టీమిండియా బౌలర్లకు ఉపశమనం లభించలేదు.

ఇన్నింగ్స్ చివరి దశలో వెస్టిండీస్ బ్యాటర్లు మరింత దూకుడుగా ఆడారు. చివరి ఓవర్‌లో వరుసగా బౌండరీలు బాదుతూ భారత బౌలర్లపై విరుచుకుపడ్డారు. ఆ ఓవర్‌లో 4, 1, 1, 1, 6, 6 పరుగులతో మొత్తం 19 పరుగులు సాధించారు. మరోవైపు అర్షదీప్ సింగ్, మయాంక్ యాదవ్, అక్షర్ పటేల్, నితీష్ కుమార్‌లకు భారీగా పరుగులు సమర్పించుకోవాల్సి వచ్చింది. భారత బౌలర్లలో ప్రిన్స్ యాదవ్ కాస్త మెరుగ్గా బౌలింగ్ చేసి వెస్టిండీస్ బ్యాటర్లను నిలువరించే ప్రయత్నం చేశాడు. ప్రిన్స్ యాదవ్, అక్షర్ పటేల్, అర్షదీప్ సింగ్ తలో వికెట్ సాధించారు.

భారత్ ముందు 248 పరుగుల లక్ష్యం..

వెస్టిండీస్ 247 పరుగులు చేయడంతో టీమిండియా విజయానికి 248 పరుగులు సాధించాల్సి ఉంది. భారీ లక్ష్యాన్ని ఛేదించాలంటే భారత టాప్ ఆర్డర్ నుంచి శుభారంభం రావడం కీలకం. పవర్‌ప్లేలో వికెట్లు కోల్పోకుండా వేగంగా పరుగులు సాధించడంతో పాటు, మధ్య ఓవర్లలోనూ రన్‌రేట్ తగ్గకుండా చూసుకోవాల్సి ఉంటుంది. ఉప్పల్ మైదానంలో వెస్టిండీస్ బ్యాటర్లు చూపించిన దూకుడు భారత జట్టుకు సవాలుగా మారింది. ఇప్పుడు టీమిండియా బ్యాటర్లు ఏ విధంగా స్పందిస్తారు? భారీ లక్ష్యాన్ని ఛేదించి సిరీస్‌పై పట్టు సాధిస్తారా? లేక వెస్టిండీస్ ఆధిపత్యాన్ని కొనసాగిస్తుందా? అన్నది ఆసక్తికరంగా మారింది.

IND vs WI 3rd T20: వెస్టిండీస్‌పై భారత్ ఘన విజయం.. సిరీస్‌లో టీమిండియా ఆధిక్యం

Narender Vaitla — Sun, 11 Oct 2026 23:08:02 +0530

అభిషేక్ శర్మ దూకుడు.. పవర్‌ప్లేలోనే పరుగుల వేట

టాస్ ఓడి మొదట బ్యాటింగ్‌కు దిగిన భారత జట్టుకు ఓపెనర్ అభిషేక్ శర్మ అద్భుతమైన ఆరంభాన్ని అందించాడు. ప్రత్యర్థి బౌలర్లపై విరుచుకుపడిన అతడు కేవలం 30 బంతుల్లోనే 69 పరుగులు సాధించాడు. మరోవైపు సంజూ శాంసన్ కేవలం 3 పరుగులకే వెనుదిరిగినా, అభిషేక్ తన దూకుడును కొనసాగిస్తూ స్కోరు బోర్డును పరుగులు పెట్టించాడు. అతడి వేగవంతమైన బ్యాటింగ్‌తో భారత్ భారీ స్కోరుకు బలమైన పునాది పడింది.

ఇషాన్ కిషన్, తిలక్ వర్మ మెరుపులు.. 223 పరుగుల స్కోరు

అభిషేక్ శర్మ తర్వాత ఇషాన్ కిషన్, తిలక్ వర్మ భారత ఇన్నింగ్స్‌ను ముందుకు నడిపించారు. ఇషాన్ కిషన్ కేవలం 18 బంతుల్లో 37 పరుగులు చేసి ప్రత్యర్థి బౌలర్లపై ఒత్తిడి పెంచాడు. తిలక్ వర్మ 16 బంతుల్లో 28 పరుగులు సాధించి జట్టు స్కోరుకు విలువైన పరుగులు జోడించాడు. నితీష్ కుమార్ రెడ్డి 14 బంతుల్లో 21 పరుగులు చేయగా, అక్షర్ పటేల్ 14 బంతుల్లో 20 పరుగులతో రాణించాడు. శ్రేయస్ అయ్యర్ 12 పరుగులు, నమన్ ధీర్ 10 పరుగులు సాధించారు. చివరి దశలో ప్రిన్స్ యాదవ్ ఆరు బంతుల్లో 13 పరుగులు చేయడంతో భారత్ స్కోరు 223 పరుగులకు చేరింది. వెస్టిండీస్ బౌలర్లలో రోస్టన్ చేజ్, షమర్ జోసెఫ్, షమర్ స్ప్రింగర్ రెండేసి వికెట్లు పడగొట్టగా, గుడాకేశ్ మోతీ, కీమో పాల్ తలో వికెట్ తీశారు.

లక్ష్యం కోసం వెస్టిండీస్ పోరాటం..

224 పరుగుల విజయలక్ష్యంతో బరిలోకి దిగిన వెస్టిండీస్ బ్యాటర్లు కూడా ధీటుగా స్పందించారు. భారత బౌలర్లను ఎదుర్కొంటూ వేగంగా పరుగులు సాధించేందుకు ప్రయత్నించారు. అయితే భారీ లక్ష్యం కావడంతో ప్రతి ఓవర్‌లోనూ రన్‌రేట్‌ను కొనసాగించాల్సిన పరిస్థితి ఏర్పడింది. భారత బౌలర్లు కీలక సమయాల్లో వికెట్లు తీస్తూ ప్రత్యర్థి జట్టు దూకుడుకు అడ్డుకట్ట వేశారు. వెస్టిండీస్ బ్యాటర్లు చివరి వరకు పోరాడినా, లక్ష్యానికి చేరువయ్యే సమయంలో అవసరమైన వేగంతో పరుగులు సాధించలేకపోయారు. దీంతో మ్యాచ్‌పై భారత్ క్రమంగా పట్టు సాధించింది.

చివర్లో అర్ష్‌దీప్ సింగ్ కీలక దెబ్బ.. భారత్‌కు 14 పరుగుల విజయం

మ్యాచ్ చివరి ఓవర్లలో వెస్టిండీస్ విజయంపై ఆశలు పెట్టుకున్న సమయంలో భారత బౌలర్లు మరింత కట్టుదిట్టంగా బౌలింగ్ చేశారు. ముఖ్యంగా అర్ష్‌దీప్ సింగ్ కీలక వికెట్ తీసి ప్రత్యర్థి జట్టు విజయావకాశాలను దెబ్బతీశాడు. షెర్ఫేన్ రూథర్‌ఫర్డ్‌ను బౌల్డ్ చేయడంతో వెస్టిండీస్‌పై ఒత్తిడి మరింత పెరిగింది. చివరి వరకు పోరాడిన ఆ జట్టు నిర్ణీత 20 ఓవర్లలో ఏడు వికెట్ల నష్టానికి 209 పరుగులే చేయగలిగింది. దీంతో టీమిండియా 14 పరుగుల తేడాతో విజయాన్ని సొంతం చేసుకుంది. బ్యాటింగ్‌లో భారీ స్కోరు సాధించడం, ఒత్తిడిలో బౌలర్లు సమర్థంగా రాణించడం భారత విజయానికి ప్రధాన కారణాలుగా నిలిచాయి.

Abhishek Sharma Weakness: అభిషేక్ శర్మ సీక్రెట్ లీక్? విండీస్ బౌలర్లు పట్టిన వీక్ పాయింట్ ఇదే

Mahesh Rajamoni — Sun, 18 Oct 2026 14:15:55 +0530

Abhishek Sharma Weakness: భారత యంగ్ ఓపెనర్ అభిషేక్ శర్మ అద్భుతమైన షాట్లతో అంతర్జాతీయ టీ20ల్లో తనదైన ముద్ర వేసినప్పటికీ, ప్రత్యర్థి జట్లు అతని వికెట్ తీసేందుకు సరికొత్త వ్యూహాలను అమలు చేస్తున్నాయి. ఈ క్రమంలోనే మరోసారి శర్మ వీక్ పాయింట్ బయటపడింది.

భారత తుఫాన్ ఓపెనర్ అభిషేక్ శర్మ స్ట్రెయిట్ డెలివరీలను ఎదుర్కోవడంలో పదేపదే తడబడుతున్న తీరు బెంగళూరులో జరిగిన కీలక సిరీస్ డిసైడర్ మ్యాచ్‌లో మరోసారి బయటపడింది. వెస్టిండీస్ బౌలర్లు అతడి బలహీనతను టార్గెట్ చేస్తూ అవుట్ చేయడంతో, అభిషేక్ శర్మ బ్యాటింగ్ కన్సిస్టెన్సీపై మరోసారి చర్చ మొదలైంది.

ఈ కీలక పోరులో భారత్‌కు మంచి ఆరంభం ఇవ్వాల్సిన అభిషేక్ శర్మ, కేవలం నాలుగు బంతులు మాత్రమే క్రీజులో నిలిచాడు. అందులో ఒక సిక్స్ బాదిన వెంటనే, తదుపరి బంతికి మళ్లీ పెద్ద షాట్ ఆడేందుకు ప్రయత్నించి అవుట్ అయ్యాడు. దీంతో అతని ఖాతాలో కేవలం ఆరు పరుగులు మాత్రమే చేరాయి.

గత టీ20 మ్యాచ్‌లో అభిషేక్‌ను అవుట్ చేసిన వెస్టిండీస్ బౌలర్ కీమో పాల్, ఈ మ్యాచ్‌లోనూ అతడిని పెవిలియన్ చేర్చాడు. సిక్స్ పడిన తదుపరి బంతికే పాల్ తన లెంగ్త్‌ను చాలా స్వల్పంగా మార్చి అభిషేక్ వికెట్ తీశాడు.

అభిషేక్ శర్మ చివరి 5 ఇన్నింగ్స్‌ల గణాంకాలు

1వ మ్యాచ్: 21 (11 బంతులు)

2వ మ్యాచ్: 20 (12 బంతులు)

3వ మ్యాచ్: 69 (30 బంతులు)

4వ మ్యాచ్: 29 (24 బంతులు)

5వ మ్యాచ్: 6 (4 బంతులు)

మొత్తం: 145 పరుగులు (సగటు: 29)

అభిషేక్ శర్మ అవుట్ అయిన తీరుపై విండీస్ దిగ్గజం, వ్యాఖ్యాత ఇయాన్ బిషప్ ఆసక్తికర వ్యాఖ్యలు చేశారు. "గత బంతి సిక్స్ పోయిన తర్వాత కీమో పాల్ చేసిన మార్పు అద్భుతం. విండీస్ బౌలర్లు అభిషేక్ బాడీకి నేరుగా వచ్చే స్ట్రెయిట్ బాల్స్‌ను లక్ష్యంగా చేసుకున్నారు. ఆఖరి బంతి ఫుల్‌గా పడటంతో పాల్ తన లెంగ్త్‌ను స్వల్పంగా మార్చుకున్నాడు, దానికి తగ్గ ఫలితం దక్కింది. అభిషేక్ శర్మలోని చిన్న బలహీనతను విండీస్ బౌలర్లు పక్కాగా వాడుకున్నారు. సిరీస్ డిసైడర్ మ్యాచ్‌లో అభిషేక్ విఫలమయ్యాడు" అని బిషప్ విశ్లేషించారు.

గత కొన్ని మ్యాచ్‌లుగా వెస్టిండీస్ బౌలర్లు అభిషేక్ బాడీకి స్ట్రెయిట్ డెలివరీలు వేస్తూ ఒత్తిడి పెంచుతున్నారు. ఈ రకమైన బౌలింగ్ తంత్రానికి అభిషేక్ వద్ద సరైన సమాధానం లేకుండా పోయింది. ఎలాంటి మ్యాచ్ నైనా కొద్ది ఓవర్లలోనే తిప్పేసే పవర్, భయం లేని ఆటతీరు అభిషేక్ సొంతం. అందుకే మేనేజ్‌మెంట్ అతనికి ఫుల్ సపోర్టు ఇస్తోంది. కానీ స్ట్రెయిట్ బాల్స్‌ను ఎదుర్కొనే మార్గం వెతుక్కుంటేనే అతనికి కన్సిస్టెన్సీ లభిస్తుంది.

2026 టీ20 ప్రపంచకప్‌లోనూ ఐసీసీ టీ20 నంబర్ 1 బ్యాటర్ అభిషేక్ శర్మ ఫామ్ లేమితో ఇబ్బంది పడ్డాడు. టోర్నీలో ఆడిన మ్యాచ్‌ల్లో అతను వరుసగా మూడు సార్లు డకౌట్ అయ్యాడు. కడుపులో ఇన్ఫెక్షన్ కావడం, బ్యాట్ స్వింగ్‌కు సహకరించని స్లో పిచ్‌లు అతడి ఆటతీరును దెబ్బతీశాయి. అప్పటికీ గడిచిన ఏడు టీ20 ఇన్నింగ్స్‌లలో అభిషేక్ వరుస సార్లు డకౌట్ కావడం టీమిండియా మేనేజ్‌మెంట్‌ను కలవరపెట్టింది.

2024 టీ20 వరల్డ్ కప్ తర్వాత భారత్ తరఫున అత్యధిక పరుగులు చేసిన బ్యాటర్‌గా, 192 పైగా స్ట్రైక్ రేట్‌తో మెరిసిన అభిషేక్ కేవలం ఒక మంచి ఇన్నింగ్స్‌కు దూరంగా ఉన్నాడని ఆ సమయంలో బ్యాటింగ్ కోచ్ సీతాంశు కొటక్ విశ్వాసం వ్యక్తం చేశారు.

అయితే ఆఫ్‌స్పిన్నర్ల మ్యాచ్‌అప్ అభిషేక్‌కు పెద్ద ప్రతిబంధకంగా మారింది. భారత్-పాకిస్తాన్ మ్యాచ్‌లో సల్మాన్ అలీ ఆగా తొలి ఓవర్లోనే అతడిని అవుట్ చేయగా, నెదర్లాండ్స్ మ్యాచ్‌లో ఆర్యన్ దత్ కూడా మొదటి ఓవర్లోనే పెవిలియన్ పంపాడు.

అభిషేక్ శర్మ బ్యాటింగ్ టెక్నిక్‌ను ప్రత్యర్థి జట్లు పూర్తిగా డికోడ్ చేశాయా అనే ప్రశ్నపై ఐపీఎల్ లో అనుభవం ఉన్న ఒక ఫ్రాంచైజీ బ్యాటింగ్ కోచ్ కీలక వివరణ ఇచ్చారు. జట్లు అభిషేక్‌ను డికోడ్ చేశాయనే వార్తలను ఆయన తీవ్రంగా ఖండించారు.

"అస్సలు లేదు. మొదటి మ్యాచ్‌లో డీప్ ఎక్స్ట్రా కవర్‌లో క్యాచ్ ఇచ్చి అవుట్ అయిన బంతి సిక్స్ పోవాల్సింది లేదా ఫీల్డర్‌కు అటూ ఇటూ పడితే ఫోర్ అయ్యేది. ఇక ఆఫ్‌స్పిన్నర్ లోపలికి వేసిన బంతికి బౌల్డ్ అవ్వడం పెద్ద బలహీనతేమీ కాదు. మిడ్-ఆన్‌లో క్యాచ్ ఇవ్వడం కూడా సాధారణ పరిణామమే" అని సదరు కోచ్ అభిప్రాయపడ్డారు.

డేటా ప్రకారం, ఆఫ్‌స్పిన్నర్లకు రెండుసార్లు అవుట్ అయినంత మాత్రాన అభిషేక్ వారిపై ఇబ్బంది పడుతున్నట్లు కాదని ఆయన స్పష్టం చేశారు. 2024 ప్రారంభం నుండి టీ20ల్లో స్పిన్‌పై కనీసం 100 బంతులు ఎదుర్కొన్న బ్యాటర్లలో అభిషేక్ శర్మ స్ట్రైక్ రేట్ 206.59గా ఉంది. ఇది టోర్నీలోనే అత్యుత్తమం. ప్రారంభ ఓవర్లలో కొద్దిగా నిలకడగా, ప్రశాంతంగా ఆడితే అభిషేక్ శర్మ తిరుగుండదని అన్నారు.

Harmanpreet Kaur: బిగ్ షాక్.. అన్ని ఫార్మాట్లకు గుడ్‌బై చెప్పిన హర్మన్‌ప్రీత్ కౌర్

Mahesh Rajamoni — Tue, 06 Oct 2026 14:19:58 +0530

Harmanpreet Kaur: భారత మహిళా క్రికెట్ జట్టు స్టార్ ప్లేయర్, కెప్టెన్ హర్మన్ ప్రీత్ కౌర్ బిగ్ షాక్ ఇచ్చారు. క్రికెట్ అన్ని ఫార్మాట్ల కెప్టెన్సీకి రాజీనామా చేశారు. టీమ్ శ్రేయస్సు కోసమే ఈ నిర్ణయమని సోషల్ మీడియాలో తెలిపారు.

భారత మహిళా క్రికెట్ జట్టు సుదీర్ఘకాల సారథి, 37 ఏళ్ల హర్మన్‌ప్రీత్ కౌర్ సంచలన నిర్ణయం తీసుకున్నారు. టెస్టులు, వన్డేలు, టీ20లు.. ఇలా అన్ని ఫార్మాట్ల కెప్టెన్సీ బాధ్యతల నుంచి తప్పుకుంటున్నట్లు మంగళవారం ప్రకటించారు. ఈ విషయాన్ని తన ఇన్‌స్టాగ్రామ్ ఖాతాలో ఒక సుదీర్ఘమైన, భావోద్వేగంతో కూడిన పోస్ట్ ద్వారా వెల్లడించారు. ఈ నిర్ణయం తీసుకోవడం తనకు ఎంతమాత్రం సులభం కాదని, ఏళ్లకు ఏళ్లు పెనవేసుకున్న జ్ఞాపకాలు, త్యాగాలు, భావోద్వేగాలు తనతోనే ఉండిపోతాయని పేర్కొన్నారు.

కెప్టెన్‌గా ఉన్న సమయంలో భారత క్రికెట్ కోసం తన సర్వస్వం ఇచ్చానని హర్మన్‌ప్రీత్ గుర్తుచేసుకున్నారు. "నేను ఈ టీమ్‌కి, భారత మహిళా క్రికెట్‌కు నా రక్తం, స్వేదం, సమయం ఇచ్చాను. చాలా సందర్భాల్లో నా వ్యక్తిగత రికార్డులను, నా ఆశయాలను, నా స్వంత గేమ్‌ను కూడా పక్కన పెట్టాల్సి వచ్చింది" అని రాసుకొచ్చారు. జట్టు ప్రయోజనాలే తనకు ముఖ్యమని భావించి, క్లిష్టమైన నిర్ణయాలు తీసుకున్నానని తెలిపారు. ఆ నిర్ణయాలు అందరికీ నచ్చకపోయినా, కొన్నింటికి వ్యక్తిగతంగా భారీ మూల్యం చెల్లించినా, జట్టును బలోపేతం చేయడానికే ప్రాధాన్యం ఇచ్చానని చెప్పారు.

గౌహతిలో జరిగిన బీసీసీఐ రివ్యూ మీటింగ్ తర్వాతే హర్మన్‌ప్రీత్ ఈ అనౌన్స్‌మెంట్ చేశారు. బీసీసీఐ కార్యదర్శి దేవజిత్ సైకియా అధ్యక్షతన జరిగిన ఈ సమీక్షా సమావేశంలో హెడ్ కోచ్ అమోల్ మజుందార్, వైస్ కెప్టెన్ స్మృతి మంధాన, హర్మన్‌ప్రీత్ పాల్గొన్నారు. గత కొన్ని నెలలుగా టీమ్ ప్రదర్శనపై చర్చించిన అనంతరం ఈ మార్పు చోటుచేసుకుంది. 2016లో టీ20 కెప్టెన్‌గా బాధ్యతలు చేపట్టిన హర్మన్, 2022లో వన్డేలకు, 2023లో అన్ని ఫార్మాట్లకు పూర్తిస్థాయి కెప్టెన్ అయ్యారు. దాదాపు దశాబ్ద కాలం పాటు భారత్‌ను ముందుండి నడిపించారు.

హర్మన్‌ప్రీత్ కెప్టెన్సీలో టీమ్ ఇండియా అనేక అద్భుత విజయాలను సాధించింది. ఆమె నాయకత్వంలోనే గతేడాది నవంబర్‌లో భారత మహిళల జట్టు తన మొదటి వన్డే వరల్డ్ కప్‌ను ముద్దాడింది. అలాగే ఇటీవల ఆసియా గేమ్స్‌లో వరుసగా రెండోసారి టీ20 గోల్డ్ మెడల్ సాధించింది. 2022 కామన్వెల్త్ గేమ్స్‌లో సిల్వర్ మెడల్ గెలుచుకుంది. నంబర్ల పరంగా చూస్తే.. 155 టీ20ల్లో 92 విజయాలు, 51 వన్డేల్లో 30 విజయాలు, 5 టెస్టుల్లో 4 విజయాలు ఆమె ఖాతాలో ఉన్నాయి. భారత్ తరఫున మూడు ఫార్మాట్లలో కలిసి 9,000 పైగా పరుగులు చేశారు.

కెప్టెన్సీ నుంచి తప్పుకున్నా, భారత్ తరఫున ప్లేయర్‌గా కొనసాగుతానని హర్మన్ స్పష్టం చేశారు. "నా బాధ్యతను పూర్తిస్థాయిలో నిర్వహించానని భావిస్తున్నా. గుండె నిండా భావోద్వేగాలు ఉన్నా, మనసులో మాత్రం ఎంతో ప్రశాంతత ఉంది. ఇప్పుడు ఈ జట్టులో మంచి టాలెంట్, నెగ్గాలనే నమ్మకం ఉన్నాయి. ఇకపై ఎలాంటి ప్రెజర్ లేకుండా కేవలం క్రికెట్‌పై ఉన్న ప్రేమ కోసమే మళ్లీ బ్యాట్ పడతా. కెప్టెన్సీ ముగిసింది కానీ నా జర్నీ ఇంకా ఉంది" అని ముగించారు. టీమ్‌మేట్స్, కోచ్‌లు, బీసీసీఐ, కుటుంబం, అభిమానులకు ఆమె ధన్యవాదాలు తెలిపారు.

IPL 2027: ముంబై ఇండియన్స్ కెప్టెన్‌గా మళ్లీ రోహిత్ శర్మ.. మరి హార్దిక్ పాండ్యా సంగతేంటి?

Mahesh Rajamoni — Wed, 14 Oct 2026 11:16:06 +0530

IPL 2027: ఐపీఎల్ 2027 ఎడిషన్ కోసం ముంబై ఇండియన్స్ జట్టులో సంచలన మార్పులు జరిగే అవకాశం ఉంది. మళ్లీ రోహిత్ శర్మకు పగ్గాలు అప్పగించే యోచనలో మేనేజ్‌మెంట్ ఉన్నట్లు తెలుస్తోంది. మరి ప్రస్తుత కెప్టెన్ హార్దిక్ పాండ్యా సంగతేంటి? టీమ్ మారబోతున్నాడా?

ఇండియన్ ప్రీమియర్ లీగ్ (ఐపీఎల్) మెగా టోర్నీకి సంబంధించి ఇప్పుడు ఒక క్రేజీ అప్‌డేట్ వైరల్ అవుతోంది. ఐపీఎల్ 2027 సీజన్‌కు ముందు ముంబై ఇండియన్స్ (MI) క్యాంప్‌లో సంచలన మార్పులు జరిగే సూచనలు కనిపిస్తున్నాయి. గత కొన్ని సీజన్లుగా జట్టు ప్రదర్శన ఆశించిన స్థాయిలో లేకపోవడంతో మేనేజ్‌మెంట్ కీలక నిర్ణయాలు తీసుకునేందుకు సిద్ధమవుతోంది. ముఖ్యంగా జట్టును ఐదు సార్లు ఛాంపియన్‌గా నిలిపిన మోస్ట్ సక్సెస్‌ఫుల్ కెప్టెన్ రోహిత్ శర్మ పేరు మరోసారి తెరపైకి వస్తోంది. అభిమానుల్లోనూ, క్రికెట్ వర్గాల్లోనూ ఈ వార్త హాట్ టాపిక్‌గా మారింది.

రోహిత్ శర్మ కెప్టెన్సీని వదిలేసిన తర్వాత నుంచి ముంబై ఇండియన్స్ ప్రదర్శన గ్రాఫ్ క్రమంగా పడిపోయింది. 2024 సీజన్‌కు ముందే గుజరాత్ టైటాన్స్ నుంచి వచ్చిన హార్దిక్ పాండ్యాకు సడన్‌గా కెప్టెన్సీ బాధ్యతలు అప్పగించారు. అయితే హార్దిక్ నాయకత్వంలో జట్టు ఫలితాలు పూర్తిగా నిరాశపరిచాయి. 2024లో ముంబై జట్టు పట్టికలో అట్టడుగు స్థానంలో నిలిచింది. 2025లో ప్లేఆఫ్స్ వరకు వెళ్లినా ట్రోఫీ మాత్రం గెలవలేకపోయింది. మరోవైపు డ్రెస్సింగ్ రూమ్ వాతావరణం, ఆటగాళ్ల మధ్య సమన్వయంపైనా అనేక ప్రశ్నలు వ్యక్తమయ్యాయి. దీంతో మేనేజ్‌మెంట్ మళ్లీ రోహిత్ అనుభవంపై నమ్మకం ఉంచాలని చూస్తోంది.

రోహిత్ శర్మ మళ్లీ కెప్టెన్సీ రేసులోకి వస్తుండటంతో హార్దిక్ పాండ్యా భవితవ్యం ప్రశ్నార్థకంగా మారింది. హార్దిక్‌ను వేరే ఫ్రాంచైజీకి ట్రేడ్ చేసే అవకాశాలు ఉన్నట్లు గుసగుసలు వినిపిస్తున్నాయి. ముఖ్యంగా కోల్‌కతా నైట్ రైడర్స్ (KKR), రాజస్థాన్ రాయల్స్ (RR) పేర్లు ప్రముఖంగా వినిపిస్తున్నాయి. అయితే ముంబై మేనేజ్‌మెంట్ హార్దిక్‌ను కేవలం సాధారణ ఆటగాడిగా జట్టులోనే అట్టిపెట్టుకోవాలని భావిస్తోందనే ప్రచారం కూడా జరుగుతోంది. మరోవైపు వయసురీత్యా రోహిత్ కెప్టెన్సీకి మళ్లీ అంగీకరిస్తాడా లేదా అనే చర్చ కూడా నడుస్తోంది. ఒకవేళ రోహిత్ కాదంటే తిలక్ వర్మ లేదా జస్ప్రీత్ బుమ్రా పేర్లు పరిశీలనలో ఉన్నాయని సమాచారం.

ఇదే సమయంలో మరో ఆసక్తికరమైన వార్త కూడా క్రికెట్ సర్కిల్స్‌లో చక్కర్లు కొడుతోంది. ముంబై, రాజస్థాన్ జట్ల మధ్య హార్దిక్ పాండ్యా మార్పిడికి సంబంధించి యశస్వి జైస్వాల్ పేరు చర్చకు వచ్చిందనే టాక్ వినిపించింది. రోహిత్ శర్మ వయసును దృష్టిలో ఉంచుకుని, భవిష్యత్తు కోసం ఒక పవర్‌ఫుల్ ఓపెనింగ్ బ్యాటర్‌ను జట్టులోకి తెచ్చుకోవాలని ముంబై భావిస్తోందని టాక్. అయితే ఈ ట్రేడ్ డీల్‌కు సంబంధించి ఇప్పటివరకు ఎలాంటి అధికారిక ప్రకటన వెలువడలేదు. రానున్న రోజుల్లో ఈ వార్తపై క్లారిటీ వచ్చే అవకాశం ఉంది.

వచ్చే ఐపీఎల్ సీజన్ కోసం అన్ని జట్లు ఇప్పటి నుంచే తమ వ్యూహాలను రచిస్తున్నాయి. ముంబై ఇండియన్స్ లాంటి పెద్ద జట్టులో ఇలాంటి మార్పులు జరగడం సర్వసాధారణమే అయినా, రోహిత్ - హార్దిక్ అంశం మాత్రం సోషల్ మీడియాలో పెద్ద రచ్చ చేస్తోంది. జట్టులో సమతుల్యతను తీసుకురావడానికి, పాత వైభవాన్ని మళ్లీ దక్కించుకోవడానికి మేనేజ్‌మెంట్ ఏ నిర్ణయం తీసుకుంటుందనేది ఆసక్తికరంగా మారింది. అభిమానులు మాత్రం రోహిత్ శర్మ మళ్లీ కెప్టెన్‌గా వస్తే చూడాలని కోరుకుంటున్నారు.

Gen Z cricketers India: రోహిత్, కోహ్లీ తర్వాత వీళ్లే కింగ్స్.. వీళ్ల సంపాదన చూస్తే దిమ్మతిరిగిపోతుంది భయ్యా!

Mahesh Rajamoni — Tue, 20 Oct 2026 14:17:30 +0530

Gen Z cricketers India: రోహిత్, కోహ్లీల శకం తర్వాత ఆ స్థానాన్ని భర్తీ చేయడానికి యంగ్ టాలెంటెడ్ ఆటగాళ్లు సిద్ధమవుతున్నారు. ఈ ఆటగాళ్లు కేవలం తమ అద్భుతమైన ఆటతీరుతోనే కాకుండా, బ్రాండ్ ఎండార్స్‌మెంట్లు, ఐపీఎల్ కాంట్రాక్టులతో కోట్లు ఆర్జిస్తున్నారు.

మన దేశంలో క్రికెట్ అనేది కేవలం ఆట మాత్రమే కాదు, ఒక సెంటిమెంట్, ఒక ఎమోషన్. కాలం మారిన కొద్దీ మన దేశానికి ఎంతో మంది దిగ్గజ ఆటగాళ్ళు దొరికారు. రోహిత్ శర్మ, విరాట్ కోహ్లీ లాంటి స్టార్ ప్లేయర్లు మనందరి గుండెల్లో నిలిచారు.

కానీ ఇప్పుడు టైం మారింది. క్రికెట్ ప్రపంచాన్ని ఇప్పుడు జెన్ జీలు టేకోవర్ చేసేసారు. ప్రతి రంగంలోనూ సత్తా చాటుతున్న ఈ జనరేషన్, క్రికెట్ పిచ్‌ మీద కూడా దుమ్ము లేపుతోంది. ఇప్పడు మన ఇండియన్ క్రికెట్‌లో జెన్ జీ ప్లేయర్లదే హవా.

వన్డేలు, టెస్టుల్లో మన జాతీయ జట్టును లీడ్ చేస్తున్న శుభ్‌మన్ గిల్ నుంచి, అతి చిన్న వయసులోనే టీమిండియాలోకి ఎంట్రీ ఇచ్చిన వైభవ్ సూర్యవంశీ దాకా అంతా ఈ జనరేషనే. అభిషేక్ శర్మ, తిలక్ వర్మ, యశస్వి జైస్వాల్ కూడా ఇదే జాబితాలో టాప్‌లో ఉన్నారు.

ఈ జెన్ జీ క్రికెటర్ల లిస్టులో ముందుండే పేరు శుభ్‌మన్ గిల్. ఈయన వయసు 27 సంవత్సరాలు. పంజాబ్ లోని ఫాజిల్కాలో పుట్టారు. ఇంత చిన్న వయసులోనే టీమిండియాను లీడ్ చేయడం మామూలు విషయం కాదు. శుభ్‌మన్ ప్రస్తుతం టెస్టులు, వన్డే ఫార్మాట్లలో కెప్టెన్‌గా వ్యవహరిస్తున్నారు.

అయితే టీ20 ఇంటర్నేషనల్స్‌లో మాత్రం ఆయన కెప్టెన్ కాదు. ఈయనను అందరూ ముద్దుగా 'ప్రిన్స్ ఆఫ్ ఇండియన్ క్రికెట్' అంటారు. ఐపీఎల్‌లో గుజరాత్ టైటాన్స్ జట్టుకు కూడా ఇతనే కెప్టెన్.

ఆస్తుల విషయానికి వస్తే, శుభ్‌మన్ గిల్ అంచనా నెట్‌వర్త్ 80 కోట్ల నుంచి 100 కోట్ల రూపాయల మధ్య ఉంది. బీసీసీఐ కాంట్రాక్ట్, ఐపీఎల్ జీతం, అలాగే బ్రాండ్ ఎండార్స్‌మెంట్ల ద్వారా ఈయన భారీగా ఆర్జిస్తున్నారు.

జెన్ జీ స్టార్లలో యశస్వి జైస్వాల్ పేరు కూడా ప్రత్యేకంగా నిలుస్తుంది. ఈయన వయసు 24 ఏళ్ళు. ఉత్తరప్రదేశ్‌లోని భదోహి జిల్లా ఈయన సొంతూరు. టీమిండియాలో ఓపెనింగ్ బ్యాట్స్‌మెన్‌గా బరిలోకి దిగే యశస్వి, తన దూకుడుతో కూడిన బ్యాటింగ్‌కు ఫేమస్.

ఈరోజు ఈ స్థాయిలో ఉండటానికి యశస్వి పడ్డ కష్టాలు అన్నీఇన్నీ కావు, ఆయన ప్రయాణం ఎన్నో పోరాటాలతో సాగింది. ఐపీఎల్‌లో ఈ యువ కిషోర్ రాజస్థాన్ రాయల్స్ టీమ్ తరఫున ఆడుతున్నారు.

2026 నాటికి యశస్వి జైస్వాల్ అంచనా నెట్‌వర్త్ సుమారు 55 కోట్ల రూపాయలుగా ఉంది. 'ది స్పోర్ట్స్ లెజెండ్' సంస్థ ఈ ఏడాది ఆగస్టు 11న విడుదల చేసిన రిపోర్ట్ ప్రకారం ఈ అంచనా సంపాదన ఇది.

ఈ జాబితాలో మూడో పేరు అభిషేక్ శర్మది. ఈయన వయసు 26 సంవత్సరాలు. గతంలో భారత్ తరఫున అండర్-19 వరల్డ్ కప్ కూడా ఆడారు. అభిషేక్ బ్యాటింగ్ చేస్తుంటే చూస్తూ ఉండిపోవాల్సిందే, అంతలా అభిమానులను ఆకట్టుకుంటారు.

అభిషేక్ లెఫ్ట్ హ్యాండ్ బ్యాట్స్‌మన్, అంతేకాదు మంచి ఆల్ రౌండర్ కూడా. టీమిండియా తరఫున ఓపెనర్‌గా వస్తుంటారు. ఐపీఎల్‌లో సన్‌రైజర్స్ హైదరాబాద్ జట్టుకు ఆడుతూ మెరుపులు మెరిపిస్తున్నారు.

మీడియా రిపోర్ట్ల ప్రకారం అభిషేక్ శర్మ నికర ఆస్తుల విలువ సుమారు 12 కోట్ల నుంచి 30 కోట్ల రూపాయల మధ్య ఉంటుందని అంచనా.

జెన్ జీ క్రికెటర్లలో మరొకరు తిలక్ వర్మ. ఈయన వయసు 23 ఏళ్ళు. 2002 నవంబర్ 8న హైదరాబాద్, తెలంగాణలోనే జన్మించారు. తిలక్ లెఫ్ట్ హ్యాండ్ బ్యాట్స్‌మనే కాకుండా, అవసరమైనప్పుడు ఆఫ్ స్పిన్ బౌలింగ్ కూడా చేయగలరు.

ఈయన బ్యాటింగ్ స్టైల్ చాలా స్పెషల్. ఒత్తిడిలో కూడా క్రీజులో నిలదొక్కుకోవడం, ఛాన్స్ దొరికితే స్పీడ్‌గా పరుగులు తీయడం ఈయన స్పెషాలిటీ. ముఖ్యంగా టీ20 ఫార్మాట్‌లో భారత్ తరఫున మిడిల్ ఆర్డర్‌లో ఆడుతున్నారు. ఐపీఎల్‌లో ముంబై ఇండియన్స్ టీమ్‌కు ప్రాతినిధ్యం వహిస్తున్నారు.

మీడియా అంచనాల ప్రకారం తిలక్ వర్మ నెట్‌వర్త్ సుమారు 20 కోట్ల రూపాయలకు పైగా ఉంటుంది. ముంబై ఇండియన్స్ ఇచ్చే సాలరీ, మ్యాచ్ ఫీజులు, బ్రాండ్ల ద్వారా ఈయన సంపాదిస్తున్నారు.

జెన్ జీ స్టార్ల లిస్టులో వైభవ్ సూర్యవంశీ పేరు ఇప్పుడు హాట్ టాపిక్. ఈ యంగ్ ప్లేయర్ వయసు కేవలం 15 ఏళ్లే. మార్చి 27, 2011న బీహార్‌లోని సమస్తిపూర్‌లో పుట్టారు. ఇంత చిన్న వయసులోనే తన అటాకింగ్ బ్యాటింగ్‌తో క్రికెట్ ప్రపంచాన్ని ఆశ్చర్యపరిచారు.

వైభవ్ లెఫ్ట్ హ్యాండ్ బ్యాట్స్‌మన్. మైదానంలో పెద్ద పెద్ద సిక్సర్లు కొట్టడంలో దిట్ట. ఐపీఎల్‌లో రాజస్థాన్ రాయల్స్ తరఫున ఆడుతున్న ఈ యంగ్ స్టార్, తన విధ్వంసకర బ్యాటింగ్‌తో ఇప్పటికే కొన్ని రికార్డులు బద్దలు కొట్టాడు.

మీడియా రిపోర్ట్ల ప్రకారం వైభవ్ సూర్యవంశీ నికర ఆస్తుల విలువ దాదాపు 2.5 కోట్ల నుంచి 7 కోట్ల రూపాయల మధ్య ఉన్నట్లు తెలుస్తోంది.

ఈ జెన్ జీ క్రికెటర్లంతా తమ కష్టాన్ని, ప్రతిభను నమ్ముకుని చాలా చిన్న వయసులోనే క్రికెట్ లో అద్భుతాలు సృష్టిస్తున్నారు. శుభ్‌మన్ కెప్టెన్సీ నుంచి యశస్వి దూకుడు, అభిషేక్ భారీ షాట్లు, తిలక్ కూర్పు, వైభవ్ ఊచకోత.. ఇవన్నీ మన ఇండియన్ క్రికెట్ ఫ్యూచర్ ఏంటో చూపిస్తున్నాయి.

India vs West Indies: భారత్ ఓటమికి అసలు కారణాలు ఇవే

Mahesh Rajamoni — Sat, 10 Oct 2026 09:33:13 +0530

India vs West Indies: రాంచీలో జరిగిన రెండో టీ20లో భారత్ పై వెస్టిండీస్ 4 వికెట్ల తేడాతో ఘన విజయం సాధించింది. 250 పరుగుల భారీ లక్ష్యాన్ని కరీబియన్ జట్టు సులభంగా ఛేదించింది. కొన్ని తప్పులే టీమిండియా కొంపముంచాయి. ఆ వివరాలు గమనిస్తే..

రాంచీలోని జేఎస్‌సీఏ ఇంటర్నేషనల్ స్టేడియం కాంప్లెక్స్‌ లో భారత్, వెస్టిండీస్ జట్ల మధ్య రెండో టీ20 మ్యాచ్ ఉత్కంఠగా సాగింది. ఈ మ్యాచ్‌లో ముందుగా బ్యాటింగ్ చేసిన టీమిండియా నిర్ణీత 20 ఓవర్లలో 5 వికెట్ల నష్టానికి 249 పరుగుల భారీ స్కోరు సాధించింది. అంతర్జాతీయ టీ20ల్లో భారత్ కు ఇది అద్భుతమైన స్కోరు. అయితే, బరిలోకి దిగిన వెస్టిండీస్ జట్టు ఏమాత్రం వెనకడుగు వేయకుండా ఆరంభం నుంచే ఎదురుదాడికి దిగింది. కరీబియన్ ఓపెనర్లు జట్టును విజయతీరాలకు చేర్చడంలో కీలక పాత్ర పోషించారు.

వెస్టిండీస్ ఛేజింగ్ ఆరంభంలో భారత యంగ్ పేసర్ మయాంక్ యాదవ్ నిప్పులు చెరిగే బంతులతో విరుచుకుపడ్డాడు. కేవలం 5 పరుగులకే విండీస్ రెండు కీలక వికెట్లు కోల్పోయి కష్టాల్లో పడింది. మయాంక్ వేగవంతమైన బంతులకు విండీస్ బ్యాటర్లు పెవిలియన్ కు క్యూ కట్టారు. ఆ సమయంలో విండీస్ కోలుకోవడం కష్టమనిపించింది. అయితే, ఆ తర్వాత వచ్చిన బ్యాటర్లు భారత బౌలింగ్ పై తీవ్ర స్థాయిలో ఎదురుదాడికి దిగి మ్యాచ్ స్వరూపాన్నే పూర్తిగా మార్చేశారు.

ఐదు పరుగులకే రెండు వికెట్లు కోల్పోయిన దశలో కెప్టెన్ షాయ్ హోప్, షెర్ఫేన్ రూథర్ ఫర్డ్ అద్భుతమైన భాగస్వామ్యాన్ని నెలకొల్పారు. షాయ్ హోప్ కేవలం 45 బంతుల్లోనే అజేయంగా 102 పరుగులు సాధించి సెంచరీతో మెరిశాడు. అతనికి తోడుగా రూథర్ ఫర్డ్ కూడా మైదానంలో నలువైపులా భారీ షాట్లతో చెలరేగిపోయాడు. భారత బౌలర్లకు ఎలాంటి అవకాశం ఇవ్వకుండా ఈ జోడీ స్టేడియం నలుమూలలా సిక్సర్లు, ఫోర్ల వర్షం కురిపించింది. ఈ ఇద్దరి జోరుతో విండీస్ స్కోరు బోర్డు పరుగులు పెట్టింది.

మొత్తం మ్యాచ్‌లో మంచు కీలక పాత్ర పోషించిందని చెప్పవచ్చు. మ్యాచ్ రెండో ఇన్నింగ్స్ సమయంలో మైదానంలో మంచు ప్రభావం ఎక్కువగా ఉండటంతో బౌలర్లు బాల్ ను సరిగ్గా పట్టుకోలేకపోయారు. భారత స్పిన్నర్లు, పేసర్లు వేసిన బంతులను విండీస్ బ్యాటర్లు సులభంగా స్టాండ్స్ లోకి పంపారు. కెప్టెన్ శ్రేయస్ అయ్యర్ మాట్లాడుతూ, ఈ వికెట్ పై బౌలింగ్ చేయడం చాలా కష్టమని, పరుగుల వరద పారడాన్ని ఆపలేకపోయామని వెల్లడించాడు. అక్షర్ పటేల్, కుల్దీప్ యాదవ్ బౌలింగ్ లో విపరీతంగా పరుగులు వచ్చాయి.

చివరి ఓవర్లలో రోమారియో షెఫర్డ్ కూడా మెరుపు ఇన్నింగ్స్ ఆడి జట్టును విజయానికి చేరువ చేశాడు. చివరికి వెస్టిండీస్ జట్టు 18.3 ఓవర్లలోనే 4 వికెట్లు కోల్పోయి 252 పరుగులు చేసి విజయం సాధించింది. అంతర్జాతీయ టీ20 చరిత్రలో ఇది అత్యధిక విజయవంతమైన ఛేదనల్లో ఒకటిగా నిలిచింది. ఈ విజయంతో వెస్టిండీస్ జట్టు ఐదు మ్యాచ్‌ల సిరీస్‌లో అద్భుతమైన కమ్‌బ్యాక్ ఇచ్చింది. భారత్ చేసిన భారీ స్కోరును కాపాడుకోలేకపోవడానికి బౌలింగ్ వైఫల్యం, మంచు ప్రభావం ప్రధాన కారణమని చెప్పాలి.

Pragyan Ojha : చీఫ్ సెలెక్టర్‌గా ప్రగ్యాన్ ఓజా.. ఈ ఐదుగురు టీమిండియా ప్లేయర్లకు వణుకు మొదలైందిగా!

Arun Kumar P — Wed, 21 Oct 2026 16:15:03 +0530

అజిత్ అగార్కర్ స్థానంలో బీసీసీఐ కొత్త చీఫ్ సెలెక్టర్‌గా ప్రగ్యాన్ ఓజా వచ్చేశాడు. ఆయన రాకతో టీమిండియాలో రెగ్యులర్‌గా ఛాన్సులు కొట్టేస్తున్న ఐదుగురు ఆటగాళ్ల గుండెల్లో రైళ్లు పరిగెడుతున్నాయి. ఆ ఇంట్రెస్టింగ్ డీటెయిల్స్ ఏంటో ఇక్కడ చూద్దాం.

టీమిండియా స్టార్ ప్లేయర్ల భవిష్యత్తును డిసైడ్ చేయడానికి మాజీ క్రికెటర్ ప్రగ్యాన్ ఓజా రెడీ అయ్యాడు. అజిత్ అగార్కర్ ఎవరినైతే ఎక్కువగా వెనకేసుకొచ్చాడో.. ఇప్పుడు ఆ ప్లేయర్లకే కొత్త తలనొప్పులు మొదలయ్యే అవకాశాలున్నాయి. ఓజా చీఫ్ సెలెక్టర్ అవ్వగానే ముఖ్యంగా ఓ ఐదుగురు ఆటగాళ్లకు వణుకు పుడుతోంది. ఈ లిస్టులో కొన్ని ఆశ్చర్యకరమైన పేర్లు కూడా ఉన్నాయి.

చీఫ్ సెలెక్టర్ కుర్చీలో కూర్చోగానే ప్రగ్యాన్ ఓజా.. వెటరన్ ఆల్ రౌండర్ రవీంద్ర జడేజాను వన్డే టీమ్ నుంచి పక్కన పెట్టేశాడు. వెస్టిండీస్‌తో వన్డే సిరీస్‌ ఆడిన జడ్డూను.. కివీస్ సిరీస్‌కు మాత్రం ఓజా ఎంపిక చేయలేదు. దీన్ని బట్టి చూస్తే 2027 వన్డే వరల్డ్ కప్ జట్టులో జడేజాకు చోటు దక్కడం కష్టమే అనిపిస్తోంది.

స్పిన్ ఆల్ రౌండర్ వాషింగ్టన్ సుందర్‌కు మాజీ చీఫ్ సెలెక్టర్ అగార్కర్ వరుసగా అవకాశాలు ఇచ్చాడు. మూడు ఫార్మాట్లలోనూ సుందర్ ఆడాడు. కానీ ఓజా రాగానే లిమిటెడ్ ఓవర్ల టీమ్ నుంచి సుందర్‌ను తప్పించాడు. కివీస్‌తో జరిగే వన్డే, టీ20 సిరీస్‌లకు సుందర్ ప్లేస్‌లో నమన్ ధీర్‌కు ఓజా ఛాన్స్ ఇచ్చాడు. ఇక సుందర్ కేవలం టెస్టులకే పరిమితం అయ్యేలా ఉన్నాడు.

టెస్టుల్లో ఓపెనర్‌గా అదరగొడుతున్న యశస్వి జైస్వాల్.. 2027 వన్డే వరల్డ్ కప్‌కు బ్యాకప్ ఓపెనర్‌గా వెళ్తాడని అంతా అనుకున్నారు. కానీ ఓజా ఎంట్రీతో న్యూజిలాండ్ వన్డే సిరీస్ నుంచి జైస్వాల్‌ను తప్పించారు. ఓజా నేతృత్వంలోని మేనేజ్‌మెంట్ ఇప్పుడు జైస్వాల్‌కు బదులుగా రుతురాజ్ గైక్వాడ్‌ను వన్డేల్లో బ్యాకప్ ఓపెనర్‌గా రెడీ చేస్తున్నట్లు కనిపిస్తోంది.

ఫాస్ట్ బౌలింగ్ ఆల్ రౌండర్ సూర్యాన్ష్ షెడ్గేకు లిమిటెడ్ ఓవర్ల టీమ్‌లో బ్యాకప్ ఆల్ రౌండర్‌గా ఛాన్సులు వస్తూ వచ్చాయి. కానీ ఓజా రాగానే షెడ్గేకు గేట్ పాస్ ఇచ్చేశాడు. అతని ప్లేస్‌లో నితీశ్ కుమార్ రెడ్డికి మూడు ఫార్మాట్లలోనూ వరుస అవకాశాలు ఇస్తున్నాడు. షెడ్గే మళ్లీ టీమిండియాలోకి రావాలంటే డొమెస్టిక్ క్రికెట్‌లో అద్భుతాలు చేయాల్సిందే.

అగార్కర్ నేతృత్వంలోని సెలెక్షన్ కమిటీ.. శ్రీలంకతో జరిగిన టెస్ట్ సిరీస్‌కు ఆఫ్ స్పిన్ ఆల్ రౌండర్ సారాన్ష్ జైన్‌ను ఎంపిక చేసింది. కానీ ఇప్పుడు ఓజా ఆధ్వర్యంలో కివీస్‌తో టెస్ట్ సిరీస్‌కు ఎంపిక చేసిన జట్టులో సారాన్ష్ జైన్ పేరు గల్లంతైంది. జైన్ మళ్లీ టీమిండియాలోకి కమ్‌బ్యాక్ ఇవ్వడం చాలా కష్టంగానే కనిపిస్తోంది.

Harmanpreet Kaur Net Worth: ఒక్కో సీజన్‌కు కోట్లలో సంపాదన.. హర్మన్‌ప్రీత్ కౌర్ నెట్‌వర్త్ ఎంత?

Mahesh Rajamoni — Tue, 06 Oct 2026 18:10:33 +0530

Harmanpreet Kaur Net Worth: భారత స్టార్ ప్లేయర్ హర్మన్ ప్రీత్ కౌర్ టీమిండియాకు ఎన్నో విజయాలు అందించారు. ఒక్కో సీజన్‌కు కోట్లలో సంపాదించే హర్మన్‌‌ప్రీత్ దగ్గర ఉన్న మొత్తం ఆస్తి ఎంత? బీసీసీఐ కాంట్రాక్ట్, డబ్ల్యూపీఎల్, బ్రాండ్లతో ఎంత సంపాదిస్తున్నారు?

భారత మహిళల క్రికెట్‌లో హర్మన్‌ప్రీత్ కౌర్‌కు ఒక ప్రత్యేకమైన గుర్తింపు ఉంది. మైదానంలో పవర్‌ఫుల్ బ్యాటర్‌‌గా, జట్టును ముందుండి నడిపించిన విజయవంతమైన కెప్టెన్‌గా ఆమె ఎన్నో మైలురాళ్లను అందుకున్నారు. క్రికెట్ మైదానంలో ప్రదర్శనలతో పాటు బ్రాండ్ ఎండార్స్‌మెంట్లు, దేశీయ లీగ్‌ల ద్వారా కూడా ఆమె భారీగానే ఆర్జిస్తున్నారు.

వివిధ మీడియా రిపోర్టులు, అంచనాల ప్రకారం హర్మన్‌ప్రీత్ కౌర్ నికర ఆస్తుల విలువ సుమారు రూ.24 కోట్ల నుంచి రూ.26 కోట్ల వరకు ఉంటుంది. డాలర్లలో చెప్పాలంటే ఇది దాదాపు 3 మిలియన్ల నుంచి 3.6 మిలియన్ డాలర్లకు సమానం. అయితే, ఆమె వ్యక్తిగత పన్ను రిటర్న్లు లేదా పెట్టుబడుల వివరాలు అధికారికంగా బహిరంగపరచలేదు కాబట్టి, ఈ సంఖ్యలను మీడియా ఆధారిత అంచనాలుగానే భావించాలి.

హర్మన్‌ప్రీత్ కౌర్ ఆదాయంలో అత్యంత కీలకమైన భాగం బీసీసీఐ నుంచి లభించే సెంట్రల్ కాంట్రాక్ట్. భారత మహిళా క్రికెటర్ల వార్షిక రిటైనర్ జాబితాలో ఆమె అత్యున్నతమైన గ్రేడ్ ఏ కేటగిరీలో కొనసాగుతున్నారు. ఈ గ్రేడ్ ఏ కాంట్రాక్ట్ ద్వారా బీసీసీఐ నుంచి ఆమెకు ప్రతి సంవత్సరం సుమారు రూ.50 లక్షల స్థిర పారితోషికం అందుతుంది.

దీనికి అదనంగా ఆమె ఆడే అంతర్జాతీయ మ్యాచ్‌లను బట్టి ఫీజులు చెల్లిస్తారు. రిపోర్టుల ప్రకారం, ఒక టెస్ట్ మ్యాచ్ ఆడితే సుమారు రూ.15 లక్షలు, వన్డే మ్యాచ్‌కు రూ.6 లక్షలు, అలాగే టీ20 అంతర్జాతీయ మ్యాచ్‌కు రూ.3 లక్షల చొప్పున ఫీజు లభిస్తుంది. ఏడాదిలో ఆడే మ్యాచ్‌ల సంఖ్య ఆధారంగా ఈ మొత్తం మారుతుంటుంది.

వుమెన్స్ ప్రీమియర్ లీగ్ ప్రారంభమైనప్పటి నుంచి హర్మన్‌ప్రీత్ కౌర్ ముంబై ఇండియన్స్ జట్టుకు ప్రాతినిధ్యం వహిస్తూ కెప్టెన్‌గా వ్యవహరిస్తున్నారు. డబ్ల్యూపీఎల్ తొలి వేలంలో ఆమెను ముంబై ఇండియన్స్ ఫ్రాంచైజీ సీజన్‌కు రూ.1.80 కోట్లకు సొంతం చేసుకుంది. రాబోయే సీజన్ల కోసం కూడా ఆమెను ముంబై ఇండియన్స్ రిటైన్ చేసింది. దీనికి తోడుగా, విదేశీ టీ20 లీగ్స్ అయిన ఆస్ట్రేలియాలోని బిగ్ బాష్ లీగ్, ఇంగ్లాండ్‌లోని 'ది హండ్రెడ్' వంటి లీగ్స్‌లో ఆడటం ద్వారా కూడా ఆమెకు అదనపు పారితోషికం అందుతోంది. బీసీసీఐ జీతం, మ్యాచ్ ఫీజులు, డబ్ల్యూపీఎల్ ఆదాయం అన్నీ కలిపి ఆమె క్రికెటింగ్ సంపాదన గణనీయంగా ఉంటుంది.

హర్మన్‌ప్రీత్ కౌర్ సాధించిన పాపులారిటీ కారణంగా అనేక ప్రముఖ కార్పొరేట్ కంపెనీలు ఆమెను బ్రాండ్ అంబాసిడర్‌గా నియమించుకున్నాయి. సీయాట్, హెచ్‌డిఎఫ్‌సి లైఫ్, ఐటిసి ఫుడ్స్, బూస్ట్, ఒమాక్స్ వంటి ప్రసిద్ధ బ్రాండ్లతో ఆమె ఒప్పందాలు కలిగి ఉన్నారు.

బ్రాండ్ ప్రచారాల ద్వారా ఆమెకు ఏటా సుమారు రూ.40 లక్షల నుంచి రూ.50 లక్షల వరకు లేదా అంతకంటే ఎక్కువ రాబడి వస్తోంది. క్రికెట్, బ్రాండ్ల ఆదాయమే కాకుండా, గతంలో ఆమె పంజాబ్ పోలీసు శాఖలో డిప్యూటీ సూపరింటెండెంట్ ఆఫ్ పోలీస్ హోదాలో కూడా సేవలు అందించారు, ఇది ఆమెకు ప్రత్యేక వేతనం, ఇతర ప్రభుత్వ ప్రయోజనాలను అందించింది.

ఆస్తుల విషయానికి వస్తే, హర్మన్‌ప్రీత్ కౌర్ పంజాబ్‌లోని తన స్వస్థలమైన మోగాలో ఒక అందమైన సొంత ఇల్లు కలిగి ఉన్నారు. విశాలమైన గదులు, ఆధునిక ఇంటీరియర్స్‌తో కూడిన ఈ నివాసం విలువ రూ.80 లక్షల నుంచి రూ.1.5 కోట్ల వరకు ఉంటుందని మీడియా రిపోర్టులు పేర్కొంటున్నాయి. అలాగే ముంబైలో కూడా ఆమెకు సుమారు రూ.2 కోట్ల నుంచి రూ.4 కోట్ల విలువైన అపార్ట్‌మెంట్ ఉన్నట్లు సమాచారం.

కాగా, 2026 అక్టోబర్ 6న హర్మన్‌ప్రీత్ కౌర్ భారత మహిళల జట్టు అన్ని ఫార్మాట్ల కెప్టెన్సీ బాధ్యతల నుంచి తప్పుకుంటున్నట్లు ఒక భావోద్వేగ ప్రకటన ద్వారా వెల్లడించారు. ఆమె సారథ్యంలోనే భారత్ 2025లో తొలిసారిగా మహిళల వన్డే వరల్డ్ కప్‌ను కైవసం చేసుకుంది. కెప్టెన్సీకి వీడ్కోలు పలికినప్పటికీ, ఒక ఆటగాడిగా భారత జట్టు తరఫున మైదానంలో తన ప్రయాణాన్ని కొనసాగిస్తానని ఆమె స్పష్టం చేశారు.

IND vs WI: బెంగళూరులో టీమిండియా గెలవాలంటే ఈ 3 మార్పులు చేయాల్సిందే !

Mahesh Rajamoni — Fri, 16 Oct 2026 14:42:59 +0530

IND vs WI 5th T20I: భారత్ వెస్టిండీస్ మధ్య శనివారం బెంగళూరులో ఐదో టీ20 డిసైడర్ మ్యాచ్ జరగనుంది. సిరీస్ గెలవడానికి టీమిండియా పలు మార్పులు చేయాల్సిందేనని క్రికెట్ నిపుణులు సూచిస్తున్నారు. ఆ వివరాలు ఇక్కడ తెలుసుకుందాం.

భారత్, వెస్టిండీస్ జట్ల మధ్య జరుగుతున్న ఐదు మ్యాచ్‌ల టీ20 సిరీస్ ఇప్పుడు అత్యంత రసవత్తరంగా మారింది. ఇరు జట్లు 2-2తో సమంగా నిలిచాయి. దీంతో శనివారం (అక్టోబర్ 17) బెంగళూరులోని ఎం చిన్నస్వామి స్టేడియంలో జరిగే ఐదో, ఆఖరి టీ20 మ్యాచ్ సిరీస్ విజేతను నిర్ణయించనుంది.

చివరిసారిగా బెంగళూరులో టీ20 ఇంటర్నేషనల్ మ్యాచ్ అఫ్గానిస్తాన్‌తో జరిగింది. అప్పట్లో అది డబుల్ సూపర్ ఓవర్ వరకు వెళ్ళి టీమిండియా అద్భుత విజయాలను సాధించింది. సుమారు రెండు సంవత్సరాల తర్వాత ఇప్పుడు మళ్లీ చిన్నస్వామి స్టేడియంలో భారత్ బరిలోకి దిగుతోంది. అయితే ఈసారి ప్రత్యర్థి వెస్టిండీస్ కావడం విశేషం. ఈ మైదానంలో టీమిండియా ఇప్పటివరకు మొత్తం 8 మ్యాచ్‌లు ఆడింది. ఇందులో 4 మ్యాచ్‌లు గెలుపొందగా, 3 మ్యాచ్‌లలో ఓటమి చవిచూసింది. ఒక మ్యాచ్ ఫలితం తేలలేదు.

హైదరాబాద్‌లో జరిగిన నాల్గవ టీ20 మ్యాచ్‌ చివరి వరకు ఉత్కంఠగా సాగింది. అయితే, భారత్ 24 పరుగుల తేడాతో ఓడిపోయింది. దీనివల్ల వెస్టిండీస్ ఆత్మవిశ్వాసం బాగా పెరిగింది. ఈ సిరీస్‌లో శ్రేయస్ అయ్యర్ భారత జట్టుకు కెప్టెన్‌గా వ్యవహరిస్తుండగా, తిలక్ వర్మ వైస్ కెప్టెన్‌గా ఉన్నారు. అంతకుముందు జరిగిన మూడు మ్యాచ్‌ల వన్డే సిరీస్‌ను భారత్ 2-1 తేడాతో గెలుచుకుంది. కానీ టీ20లో మాత్రం విండీస్ గట్టి పోటీ ఇస్తోంది. ఈ నేపథ్యంలో డిసైడర్ మ్యాచ్‌కు ముందు టీమిండియా ప్రధానంగా మూడు కీలక విషయాలపై దృష్టి పెట్టాల్సి ఉందని క్రికెట్ నిపుణులు సూచిస్తున్నారు.

కుల్దీప్ యాదవ్ ఈ సిరీస్‌లోని మొదటి రెండు టీ20 మ్యాచ్‌లు ఆడాడు. కానీ మూడు, నాల్గవ మ్యాచ్‌లలో అతనికి ప్లేయింగ్ ఎలెవన్‌లో చోటు దక్కలేదు. ఇప్పుడు ఆఖరి మ్యాచ్‌లో అతని రీఎంట్రీ హాట్ టాపిక్ గా మారింది. ఇదే టూర్‌లో జరిగిన వన్డే సిరీస్‌లో కుల్దీప్ అద్భుతమైన బౌలింగ్ చేశాడు. కేవలం 3 మ్యాచ్‌లలో 7 వికెట్లు పడగొట్టి భారత్ తరఫున అత్యధిక వికెట్లు తీసిన బౌలర్‌గా నిలిచాడు. అతను తన చివరి టీ20 ఇంటర్నేషనల్ మ్యాచ్‌ను ఫిబ్రవరి 15న పాకిస్థాన్‌పై ఆడాడు. ఇప్పటివరకు భారత్ తరఫున 54 టీ20 మ్యాచ్‌లు ఆడిన అనుభవం అతనికి ఉంది. బెంగళూరు పిచ్‌పై రిస్ట్ స్పిన్నర్ల పాత్ర చాలా కీలకం కానుంది. అందుకే కుల్దీప్ రాక జట్టుకు ఎంతో ఉపయోగపడుతుందని చెప్పవచ్చు.

ఈ సిరీస్‌లో భారత బ్యాటర్లు చాలాసార్లు మంచి ఆరంభాలనే అందుకున్నారు. కానీ మిడిల్ ఓవర్లలో మాత్రం రన్స్ చేసే వేగం తగ్గిపోతోంది. ప్రారంభంలో దక్కిన మంచి జోరును పెద్ద స్కోరుగా మలచడంలో టీమిండియా వరుసగా విఫలమవుతోంది.

చిన్నస్వామి స్టేడియంలో చిన్న బౌండరీలు, వేగవంతమైన అవుట్‌ఫీల్డ్ బ్యాటర్లకు ఎంతో అనుకూలంగా ఉంటాయి. ఇలాంటి గ్రౌండ్‌లో ఇన్నింగ్స్ మధ్య ఓవర్లలో కూడా రన్ రేట్ తగ్గకుండా చూడటం చాలా ముఖ్యం. మిడిల్ ఆర్డర్ బ్యాటర్లు కేవలం సింగిల్స్ తీయడమే కాకుండా, చెత్త బాల్స్‌ను బౌండరీలకు తరలించాలి. డిసైడర్ మ్యాచ్‌లో భారీ స్కోర్ చేయాలంటే బ్యాటర్లు మరింత దూకుడుగా ఆడాల్సిందే.

ఈ సిరీస్‌లో భారత పేస్ బౌలర్లు ఎక్కువగా వేగం, సరైన లెంత్ మీదే ఆధారపడ్డారు. అయితే బెంగళూరు పిచ్ పరిస్థితులకు తగినట్లుగా బౌలర్లు తమ వ్యూహాలను మార్చుకోవడం తప్పనిసరి.

చిన్నస్వామి స్టేడియంలో కట్టర్లు వేయడం, పిచ్‌పై బంతిని గట్టిగా దించి బౌలింగ్ చేయడం చాలా ప్రభావం చూపుతుంది. పేసర్లు స్లో బాల్స్, పేస్ వేరియేషన్లను వీలైనంత ఎక్కువగా వాడాలి. అప్పుడే బ్యాటర్లు బంతి వేగాన్ని అంచనా వేయడం కష్టమవుతుంది. సిరీస్ మొత్తం పణంగా ఉన్న ఈ తరుణంలో, బెంగళూరు కండిషన్స్‌కు తగ్గట్టుగా ప్లాన్ చేసుకోవడం విజయానికి కీలకం.

ఇరు జట్లకు ఇది డూ ఆర్ డై లాంటి మ్యాచ్. సిరీస్ విజేత ఎవరో తేల్చే ఈ పోరులో ఏ జట్టు తప్పులు చేయకుండా ఆడుతుందో ఆ జట్టుకే ట్రోఫీ దక్కుతుంది. చిన్నస్వామి స్టేడియంలో పరుగుల వర్షం కురవడం ఖాయంగా కనిపిస్తోంది. అభిమానులకు పూర్తి వినోదం లభించడం పక్కా. మరి రోహిత్ శర్మ లేని ఈ యువ జట్టు ఒత్తిడిని తట్టుకుని సిరీస్ గెలుస్తుందా లేదా అనేది శనివారం రాత్రికి తేలిపోతుంది

రాంచీలో ర‌ఫ్ఫాడించిన షాయ్ హోప్.. టీమిండియాపై వెస్టిండిస్‌ సంచ‌ల‌న విజ‌యం

Narender Vaitla — Fri, 09 Oct 2026 23:00:56 +0530

భారత్ భారీ స్కోరు..

రాంచీలోని జేఎస్‌సీఏ ఇంటర్నేషనల్ స్టేడియంలో జరిగిన ఈ మ్యాచ్‌లో తొలుత బ్యాటింగ్ చేసిన భారత జట్టు భారీ స్కోరు సాధించింది. భారత బ్యాటర్లు దూకుడుగా ఆడటంతో నిర్ణీత 20 ఓవర్లలో 5 వికెట్ల నష్టానికి 249 పరుగులు చేశారు. దీంతో వెస్టిండీస్ ముందు 250 పరుగుల విజయ లక్ష్యం నిలిచింది. భారీ లక్ష్యం కావడంతో భారత జట్టు విజయం సాధిస్తుందని అభిమానులు భావించారు. అయితే వెస్టిండీస్ బ్యాటర్లు మాత్రం ఆ అంచనాలను తలకిందులు చేస్తూ ఆరంభం నుంచే ఎదురుదాడికి దిగారు.

కెప్టెన్ షాయ్ హోప్ సెంచరీతో సరికొత్త జోరు

భారీ లక్ష్య ఛేదనలో వెస్టిండీస్ కెప్టెన్ షాయ్ హోప్ కీలక పాత్ర పోషించాడు. భారత బౌలర్లను సమర్థంగా ఎదుర్కొంటూ బౌండరీలు, సిక్సర్లతో స్కోరు బోర్డును పరుగులు పెట్టించాడు. కేవలం 45 బంతుల్లో 6 ఫోర్లు, 9 సిక్సర్లతో 102 పరుగులు సాధించాడు. అతని స్ట్రైక్ రేట్ 226.67గా నమోదైంది. చివరి వరకు క్రీజులో నిలిచి జట్టును విజయతీరాలకు చేర్చాడు. కెప్టెన్‌గా ముందుండి నడిపిస్తూ సెంచరీ సాధించడం ఈ మ్యాచ్‌లో ప్రత్యేక ఆకర్షణగా నిలిచింది.

రూథర్‌ఫోర్డ్ మెరుపులు.. పవెల్ కీలక ఇన్నింగ్స్

షాయ్ హోప్‌కు షెర్ఫేన్ రూథర్‌ఫోర్డ్ అద్భుతమైన సహకారం అందించాడు. కేవలం 37 బంతుల్లో 7 ఫోర్లు, 7 సిక్సర్లతో 84 పరుగులు చేశాడు. అతని స్ట్రైక్ రేట్ 227.03గా నమోదైంది. మరోవైపు రోవ్‌మన్ పావెల్ 13 బంతుల్లో 4 ఫోర్లు, ఒక సిక్సర్‌తో 24 పరుగులు సాధించి జట్టు స్కోరు వేగంగా పెరగడానికి తోడ్పడ్డాడు. రొమారియో షెపర్డ్ కూడా చివర్లో దూకుడుగా ఆడాడు. కేవలం 13 బంతుల్లో 3 ఫోర్లు, 3 సిక్సర్లతో 34 పరుగులు చేసి అజేయంగా నిలిచాడు. ఈ ఇన్నింగ్స్‌లతో వెస్టిండీస్ లక్ష్యాన్ని సునాయాసంగా అందుకుంది.

భారత బౌలర్లపై విండీస్ బ్యాటర్ల ఆధిపత్యం

భారీ లక్ష్యాన్ని కాపాడుకోవాల్సిన భారత బౌలర్లకు వెస్టిండీస్ బ్యాటర్లు ఏమాత్రం అవకాశం ఇవ్వలేదు. వికెట్లు పడుతున్నా పరుగుల వేగం తగ్గకుండా ఆడారు. కుల్దీప్ యాదవ్ బౌలింగ్‌లో రూథర్‌ఫోర్డ్ క్యాచ్‌ అవుట్‌గా వెనుదిరగగా, మయాంక్ యాదవ్ బౌలింగ్‌లో హెట్మయర్ డకౌట్ అయ్యాడు. రవిబిష్ణోయ్ బౌలింగ్‌లో పూరన్ కూడా ఎక్కువసేపు క్రీజులో నిలవలేకపోయాడు. అయినప్పటికీ హోప్, రూథర్‌ఫోర్డ్ భాగస్వామ్యం మ్యాచ్‌పై భారత జట్టు పట్టు సాధించకుండా చేసింది. చివర్లో షెపర్డ్ వేగంగా పరుగులు సాధించడంతో విండీస్ విజయం మరింత సులభమైంది.

18.3 ఓవర్లలోనే లక్ష్య ఛేదన.. విండీస్‌కు ఘన విజయం

వెస్టిండీస్ జట్టు 18.3 ఓవర్లలో 4 వికెట్ల నష్టానికి 252 పరుగులు చేసి విజయాన్ని నమోదు చేసింది. స్కోర్‌కార్డు ప్రకారం షాయ్ హోప్ 102, షెర్ఫేన్ రూథర్‌ఫోర్డ్ 84, రొమారియో షెపర్డ్ 34, రోవ్‌మన్ పావెల్ 24 పరుగులతో రాణించారు. భారత బౌలర్లలో మయాంక్ యాదవ్, కుల్దీప్ యాదవ్, రవిబిష్ణోయ్ వికెట్లు సాధించినా, భారీ లక్ష్యాన్ని కాపాడలేకపోయారు. 250 పరుగుల లక్ష్యాన్ని ఇంకా 9 బంతులు మిగిలి ఉండగానే ల‌క్ష్యాన్ని చేధించింది. ముఖ్యంగా షాయ్ హోప్ అజేయ సెంచరీ ఈ మ్యాచ్‌లో విజయానికి ప్రధాన కారణంగా నిలిచింది.

IPL 2027 Auction: 4 ఏళ్ల తర్వాత ఇండియాకి ఐపీఎల్ ఆక్షన్.. గోవాలో వేలం తేదీ ఫిక్స్

Mahesh Rajamoni — Sun, 18 Oct 2026 13:45:07 +0530

IPL 2027 Auction: 4 ఏళ్ల తర్వాత ఇండియాకి ఐపీఎల్ ఆక్షన్ తిరిగివచ్చింది. ఐపీఎల్ 2027 మినీ వేలంలో గోవాలో నిర్వహించనున్నట్టు భారత క్రికెట్ నియంత్రణ మండలి తెలిపింది. ఆ వివరాలు మీకోసం.

ఇండియన్ ప్రిమియర్ లీగ్ (ఐపీఎల్) అభిమానులకు ఇది నిజంగా క్రేజీ న్యూస్.. గత నాలుగేళ్లుగా విదేశీ గడ్డపై జరుగుతున్న ఐపీఎల్ ప్లేయర్ల వేలం మళ్లీ మన దేశానికి తిరిగి రానుంది. ఐపీఎల్ 2027 మినీ ఆక్షన్‌ను గోవాలోని ప్రఖ్యాత ఐటీసీ గ్రాండ్ హోటల్‌లో నిర్వహించేందుకు బీసీసీఐ ఏర్పాట్లు చేస్తోంది. దీనికి సంబంధించిన సమాచారాన్ని బోర్డు ఇప్పటికే వాట్సాప్ ద్వారా మొత్తం 10 ఫ్రాంచైజీలకు అందించింది.

తాజా సమాచారం ప్రకారం డిసెంబర్ 16న ఈ మినీ వేలం జరగనుంది. దానికి ఒక్క రోజు ముందు, అంటే డిసెంబర్ 15న ఫ్రాంచైజీ ప్రతినిధులతో బీసీసీఐ అధికారిక బ్రిఫింగ్ సమావేశం ఏర్పాటు చేసింది. వేలానికి హాజరయ్యే ప్రతినిధుల సంఖ్యను ఖరారు చేయడం, గోవాలో హోటల్ బుకింగ్స్, ప్రయాణ ఏర్పాట్లు వేగవంతం చేయడం కోసమే బీసీసీఐ ఈ వివరాలను జట్లకు ముందుగానే పంపించింది.

గత మూడేళ్లుగా ఐపీఎల్ ఆక్షన్‌ను గల్ఫ్ దేశాల్లోనే నిర్వహించారు. దుబాయ్, జెడ్డా, అబుదాబిలలో ఈ ఈవెంట్లు జరిగాయి. భారత్‌లోనే వేలం పెట్టాలని ప్రతిసారీ చూసినా, శీతాకాలంలో వచ్చే వివాహాల సీజన్ వల్ల మంచి వేదికలు దొరక్కపోవడంతోనే విదేశాలకు వేలం మారిందని ఐపీఎల్ ఛైర్మన్ అరుణ్ ధుమాల్ గతంలో వెల్లడించారు. అయితే ఈసారిది మినీ ఆక్షన్ కావడంతో, చిన్న సైజు వెన్యూ సరిపోతుందని భావించి గోవాను ఖరారు చేశారు. బీసీసీఐ కార్యదర్శి దేవజిత్ సైకియా కూడా ఈ వేలం భారత్‌లోనే ఉంటుందని స్పష్టం చేశారు.

ఈ వేలం తేదీపై మరో ఆసక్తికర చర్చ మొదలైంది. డిసెంబర్ 16నే బెంగళూరులోని చిన్నస్వామి స్టేడియంలో భారత్, శ్రీలంక మధ్య రెండో వన్డే మ్యాచ్ జరగాల్సి ఉంది. ఒకే రోజున మ్యాచ్, ఆక్షన్ రావడం వల్ల మ్యాచ్ షెడ్యూల్‌లో ఏమైనా మార్పులు ఉంటాయా అనేది చూడాలి. మరోవైపు డిసెంబర్ 13న ఢిల్లీలో జరగాల్సిన సిరీస్ తొలి వన్డే వేదికను మార్చుతున్నట్లు వార్తలు వచ్చినా, బీసీసీఐ మాత్రం దాన్ని ఖండించింది.

ఫ్రాంచైజీలు తమ జట్లలో ఉంచుకునే, వదిలేసే ఆటగాళ్ల జాబితాను నవంబర్ మధ్య నాటికి బీసీసీఐకి సమర్పించాల్సి ఉంటుంది. ఆ తర్వాత బోర్డు అధికారిక పూల్‌ను సిద్ధం చేస్తుంది. మరోవైపు ట్రేడింగ్ ద్వారా భారీ మార్పులు జరిగాయి. రిషభ్ పంత్ లక్నో సూపర్‌జెయింట్స్ నుంచి మళ్లీ తన పాత టీమ్ ఢిల్లీ క్యాపిటల్స్‌కు చేరుకోగా, లెఫ్ట్ ఆర్మ్ స్పిన్నర్ కుల్దీప్ యాదవ్ లక్నో వైపు అడుగులు వేస్తున్నాడు.

ఫాస్ట్ బౌలర్ టి నటరాజన్ డైరెక్ట్ ట్రేడ్ ద్వారా తిరిగి సన్‌రైజర్స్ హైదరాబాద్ జెర్సీ ధరించగా, జీషాన్ అన్సారీ ఢిల్లీ జట్టులోకి వచ్చాడు. ఈ మినీ ఆక్షన్‌తో జట్లన్నీ తమ ప్రధాన లోపాలను సరిదిద్దుకునేందుకు సిద్ధమవుతున్నాయి.

Hardik Pandya: హార్దిక్ పాండ్యా నెక్స్ట్ ఐపీఎల్ టీమ్ ఏది? ముంబై ఇండియన్స్ బైబై !

Mahesh Rajamoni — Thu, 15 Oct 2026 08:10:54 +0530

Hardik Pandya : ఐపీఎల్ 2027 ముందు ముంబై ఇండియన్స్ కెప్టెన్ హార్దిక్ పాండ్యా ట్రేడింగ్ రూమర్స్ శరవేగంగా వైరల్ అవుతున్నాయి. కెప్టెన్ రేసులోకి మళ్లీ రోహిత్ శర్మ ఎంట్రీతో హార్దిక్ నెక్స్ట్ టీమ్ ఏంటి? అనే చర్చ మొదలైంది. ఆ వివరాలు ఇక్కడ తెలుసుకుందాం.

ఐపీఎల్ 2027 ప్రారంభానికి ఇంకా సమయం ఉన్నప్పటికీ, ముంబై ఇండియన్స్ కెప్టెన్ హార్దిక్ పాండ్యా ట్రేడింగ్ వార్తలు ప్రస్తుతం సోషల్ మీడియాలో విపరీతంగా ట్రెండ్ అవుతున్నాయి. 2026 సీజన్ ముంబై ఇండియన్స్ జట్టుకు చాలా నిరాశాజనకంగా సాగడంతో, హార్దిక్ పాండ్యాను వేరే జట్లకు ట్రేడ్ చేయనున్నారనే ప్రచారం జోరందుకుంది. పలు ఐపీఎల్ ఫ్రాంచైజీలు ఆయనను దక్కించుకోవడానికి ఆసక్తి చూపిస్తున్నప్పటికీ, ఇప్పటివరకు ఎలాంటి అధికారిక డీల్ కుదరలేదు.

ముంబై ఇండియన్స్ మేనేజ్‌మెంట్ రాబోయే సీజన్‌లో హార్దిక్ పాండ్యాను కేవలం ఒక ఆటగాడిగా మాత్రమే జట్టులో కొనసాగించాలని యోచిస్తోంది. అదే సమయంలో మరో ప్లేయర్‌ను కెప్టెన్‌గా నియమించేందుకు ప్రణాళికలు సిద్ధం చేస్తోంది. ఈ అంతర్గత చర్చల్లో మాజీ కెప్టెన్ రోహిత్ శర్మ కూడా కీలకం కానున్నారని సమాచారం.

ముంబై ఇండియన్స్ కెప్టెన్సీని రోహిత్ శర్మకు తిరిగి అప్పగించే ఆలోచన వచ్చినప్పటికీ, ప్రస్తుతం 39 ఏళ్ల రోహిత్ మళ్లీ కెప్టెన్సీ బాధ్యతలు స్వీకరించడానికి అస్సలు ఆసక్తిగా లేరని తెలుస్తోంది. దీంతో జస్ప్రీత్ బుమ్రా, తిలక్ వర్మ పేర్లు కెప్టెన్సీ రేసులో ముందంజలో ఉన్నాయి. ప్రస్తుతం అందుతున్న సమాచారం ప్రకారం ఫ్రాంచైజీ మొగ్గు యువ బ్యాటర్ తిలక్ వర్మ వైపే ఎక్కువగా కనిపిస్తోంది.

అదే సమయంలో కోల్‌కతా నైట్ రైడర్స్ (KKR) తో ముంబై ఇండియన్స్ చర్చలు జరిపినట్లు మీడియా కథనాలు పేర్కొంటున్నాయి. ఈ డీల్‌లో భాగంగా కేకేఆర్‌కు చెందిన గ్రీన్ పేరు చర్చకు వచ్చింది. అయితే, 2027లో గ్రీన్‌కు సొంతగడ్డపై టెస్టు మ్యాచ్‌ల బిజీ షెడ్యూల్ ఉండటంతో, ఆయన ఐపీఎల్ అందుబాటుపై అనుమానాలు నెలకొన్నాయి. అందుకే ఈ ప్రతిపాదనను ముంబై ఇండియన్స్ తోసిపుచ్చింది.

కోల్‌కతా నైట్ రైడర్స్ (KKR): కేకేఆర్ చాలా కాలంగా ఒక అత్యుత్తమ భారతీయ పేస్-బౌలింగ్ ఆల్‌రౌండర్ కోసం చూస్తోంది. 5 లేదా 6వ నంబర్‌లో రింకూ సింగ్‌తో కలిసి ఫినిషర్ పాత్ర పోషించడంతో పాటు, ఈడెన్ గార్డెన్స్‌లో ప్రతి మ్యాచ్‌కు 2 నుండి 4 ఓవర్లు బౌలింగ్ చేయగల హార్దిక్ వారికి సరైన ఎంపిక. అజింక్యా రహానే అన్ని ఫార్మాట్ల నుంచి రిటైర్ అవ్వడంతో, హార్దిక్‌కు నేరుగా కెప్టెన్సీ ఇచ్చే అవకాశం కూడా ఉంటుంది. అయితే, ముంబై ఇండియన్స్ ప్రతిఫలంగా స్టార్ భారతీయ ప్లేయర్లను డిమాండ్ చేస్తుండటమే ఇక్కడ ప్రధాన సమస్యగా మారింది.

చెన్నై సూపర్ కింగ్స్ (CSK): చెన్నై జట్టు ఎప్పుడూ అనుభవజ్ఞులైన ఆల్‌రౌండర్లకు పెద్దపీట వేస్తుంది. ఎంఎస్ ధోనీ కెప్టెన్సీ అండ్ వ్యూహాల పట్ల హార్దిక్ గతంలోనే తన అభిమానాన్ని చాటుకున్నాడు. లోయర్ ఆర్డర్‌లో పవర్ హిట్టింగ్, మిడిల్ ఓవర్లలో బౌలింగ్ చేసే ప్లేయర్ చెన్నైకి అవసరం. కానీ, సీఎస్కే రీటెన్షన్ స్ట్రక్చర్‌కు భంగం వాటిల్లకుండా హార్దిక్ భారీ జీతాన్ని సర్దుబాటు చేయడం మేనేజ్‌మెంట్‌కు పెద్ద సవాలుగా మారనుంది.

ఢిల్లీ క్యాపిటల్స్: ఢిల్లీ ఫ్రాంచైజీ తమ జట్టు నాయకత్వాన్ని తరచూ మారుస్తూ వస్తోంది. ఐపీఎల్ ట్రోఫీ గెలిచిన అనుభవం ఉన్న హార్దిక్ పాండ్యా రాకతో వారి కెప్టెన్సీ సమస్యతో పాటు మిడిల్ ఆర్డర్ ఫినిషింగ్ ప్రాబ్లమ్ కూడా ఒకేసారి తీరిపోతుంది. కానీ, హార్దిక్‌ను కొనుగోలు చేయడానికి ఢిల్లీ వద్ద తగినంత పర్స్ అమౌంట్ లేదా ట్రేడ్ వ్యాల్యూ ఉండాల్సి ఉంటుంది.

గుజరాత్ టైటాన్స్ (GT): హార్దిక్ పాండ్యా ఐపీఎల్ కెరీర్‌లో కెప్టెన్‌గా అత్యుత్తమ ప్రదర్శన ఇచ్చింది గుజరాత్ టైటాన్స్ తోనే. 2022లో డెబ్యూ సీజన్‌లోనే జీటీని విజేతగా నిలిపి, 2023లో ఫైనల్‌కు తీసుకెళ్లాడు. గుజరాత్‌కు తిరిగి వెళ్తే శుభ్‌మన్ గిల్‌తో కలిసి జట్టును మళ్లీ నిర్మించే అవకాశం ఉంటుంది. అయితే నరేంద్ర మోదీ స్టేడియంలో అభిమానుల నుంచి ఆయనకు నిరసనలు వ్యక్తమయ్యే ప్రమాదం ఉంది. అంతేకాకుండా, అక్కడ గిల్ కెప్టెన్‌గా ఉన్నందున హార్దిక్ కేవలం ప్లేయర్‌గానే ఆడాల్సి ఉంటుంది.

హార్దిక్ పాండ్యా ముంబై ఇండియన్స్‌లోనే కొనసాగే అవకాశాలను కూడా కొట్టిపారేయలేమని విశ్వసనీయ వర్గాలు వెల్లడించాయి. ఫ్రాంచైజీ మేనేజ్‌మెంట్ ఇప్పటికే ఈ విషయంలో హార్దిక్‌తో చర్చలు జరిపినట్లు తెలుస్తోంది.

"హార్దిక్ పాండ్యా ట్రేడ్ కాకపోతే ఆశ్చర్యపోనవసరం లేదు. జట్టులోనే కొనసాగేలా ఆటగాడితో మాట్లాడారు" అని సంబంధిత వర్గాలు చెప్పినట్టు పలు మీడియా కథనాలు పేర్కొంటున్నాయి. ఒక ట్రేడ్ డీల్ పూర్తవ్వాలంటే రెండు వైపులా అనేక అంశాలు కలిసి రావాలని, ఇది అనుకున్నంత సులభం కాదని పేర్కొంది. ఒకవేళ సరిపడా వ్యాల్యూ ఉన్న ట్రేడ్ ఆఫర్ రాకపోతే, హార్దిక్ పాండ్యాను కేవలం ఒక మ్యాచ్ విన్నర్‌గా జస్ప్రీత్ బుమ్రా, సూర్యకుమార్ యాదవ్‌లతో కలిసి జట్టులోనే ఉంచుకోవడం ముంబై ఇండియన్స్‌కు అత్యుత్తమ ప్లాన్‌గా ఉంటుంది.

శ్రేయాస్ అయ్యర్ విధ్వంసక సెంచరీ.. వెస్టిండీస్‌పై భారత్ ఘన విజయం

Narender Vaitla — Tue, 06 Oct 2026 22:23:59 +0530

171 పరుగులు చేసిన వెస్టిండీస్

టాస్ గెలిచి తొలుత బ్యాటింగ్ చేసిన వెస్టిండీస్ నిర్ణీత ఓవర్లలో 171 పరుగులు సాధించింది. భారత బౌలర్లు కీలక సమయాల్లో వికెట్లు తీస్తూ ప్రత్యర్థిని భారీ స్కోరు చేయకుండా నియంత్రించారు. దీంతో టీమిండియా ముందు 172 పరుగుల టార్గెట్ నిలిచింది. ఈ లక్ష్యాన్ని ఛేదించేందుకు భారత ఓపెనర్లు దూకుడుగా ఇన్నింగ్స్ ప్రారంభించారు.

ఆరంభంలో వికెట్లు.. ఆ తర్వాత అయ్యర్ జోరు

భారత్‌కు ప్రారంభంలోనే స్వల్ప ఎదురుదెబ్బ తగిలింది. సంజూ శాంసన్ 11 పరుగులకే పెవిలియన్ చేరాడు. ఆ తర్వాత అభిషేక్ శర్మ 10 బంతుల్లో 21 పరుగులు చేసి ఔటయ్యాడు. రెండు వికెట్లు కోల్పోవడంతో టీమిండియా ఇబ్బందుల్లో పడ్డట్లు అనిపించింది. అయితే కెప్టెన్ శ్రేయాస్ అయ్యర్, ఇషాన్ కిషన్ కలిసి పరిస్థితిని పూర్తిగా మార్చేశారు. ముఖ్యంగా అయ్యర్ కరీబియన్ బౌలింగ్‌పై పూర్తి ఆధిపత్యం ప్రదర్శించాడు.

3️⃣rd #TeamIndia captain to score a HUNDRED in Men's T20Is

Shreyas Iyer basking in the three-figure glory

Updates ▶️ https://t.co/2czVyKWreK

#INDvWI | @mflone_ | @ShreyasIyer15 https://t.co/nw4HMIOyu6

— BCCI (@BCCI) October 6, 2026

43 బంతుల్లోనే శతకం.. 14.4 ఓవర్లలో లక్ష్యం పూర్తి

శ్రేయాస్ అయ్యర్ కేవలం 43 బంతుల్లోనే 10 ఫోర్లు, 6 సిక్సర్లతో 102 పరుగులు చేసి నాటౌట్‌గా నిలిచాడు. అతని స్ట్రైక్ రేట్ 237.21గా నమోదైంది. మరోవైపు ఇషాన్ కిషన్ 27 బంతుల్లో 5 ఫోర్లతో 37 పరుగులు చేసి కెప్టెన్‌కు అద్భుతంగా సహకరించాడు. ఇద్దరూ కలిసి మూడో వికెట్‌కు అజేయ భాగస్వామ్యాన్ని నెలకొల్పి మ్యాచ్‌ను ఏకపక్షంగా మార్చేశారు. వెస్టిండీస్ తరఫున అకీల్ హొసేన్, రోస్టన్ చేజ్ చెరో వికెట్ తీసినా భారత విజయాన్ని అడ్డుకోలేకపోయారు. చివరకు భారత్ 14.4 ఓవర్లలోనే లక్ష్యాన్ని అందుకుని సిరీస్‌లో శుభారంభం చేసింది.

ఇంటర్నేషనల్ క్రికెట్లో 35,117 బంతులు, 5850 ఓవర్లు.. కెరీర్లో ఒక్క నోబాల్ వేయని స్టార్ బౌలర్, ఎవరో తెలుసా?

Arun Kumar P — Mon, 12 Oct 2026 15:47:27 +0530

గల్లీ క్రికెట్ నుండి ఇంటర్నేషనల్ క్రికెట్ వరకు నోబాల్ అనేది సర్వసాధారణం… బౌలర్లు తరచూ నోబాల్ వేస్తుంటారు. అయితే 100 కు పైగా టెస్ట్ మ్యాచులు ఆడిన ఓ స్టార్ క్రికెటర్ ఒక్క నోబాల్ వేయకుండానే కెరీర్ ముగించాడు… అతడు ఎవరో తెలుసాా?

క్రికెట్‌లో బౌలర్‌కు వికెట్లు తీయడం ఎంత ముఖ్యమో.. ఒత్తిడిలో బౌలింగ్‌పై నియంత్రణ కోల్పోకుండా ఉండటం అంతే ముఖ్యం. ముఖ్యంగా టెస్ట్ క్రికెట్‌లో గంటల తరబడి బౌలింగ్ చేస్తూ, బ్యాటర్లను కట్టడి చేయాలంటే ఏకాగ్రత, క్రమశిక్షణ ఎంతో అవసరం. ఒక్కోసారి మ్యాచ్ కీలక దశకు చేరుకున్నప్పుడు అనుభవజ్ఞులైన బౌలర్లు సైతం ఒత్తిడికి గురవుతుంటారు. అలాంటి పరిస్థితుల్లో నోబాల్స్ వేయకుండా జాగ్రత్తపడటం కూడా ఒక సవాలే.

అయితే ఆస్ట్రేలియా దిగ్గజ ఆఫ్ స్పిన్నర్ నాథన్ లియాన్ తన సుదీర్ఘ టెస్ట్ కెరీర్‌లో చూపించిన క్రమశిక్షణ ప్రత్యేకంగా నిలుస్తోంది. వేలాది ఓవర్లు బౌలింగ్ చేసినా, ఫ్రంట్ ఫుట్ నోబాల్ వేయకుండా కొనసాగడం ఆయన కెరీర్‌లో అత్యంత ఆసక్తికరమైన అంశం. వికెట్లు తీయడంలోనే కాదు.. బౌలింగ్ చేసే విధానంలోనూ స్థిరత్వం ఎంత ముఖ్యమో ఈ రికార్డు చాటిచెబుతోంది. మరి నాథన్ లియాన్ సాధించిన ఈ ఘనత ప్రత్యేకత ఏమిటి? ఆయన టెస్ట్ కెరీర్‌లోని ఇతర కీలక రికార్డులు ఏంటి? అనేది తెలుసుకుందాం.

టెస్ట్ క్రికెట్‌లో బౌలర్లు వేల సంఖ్యలో బంతులు వేయడం సహజమే. అయితే అంతర్జాతీయ స్థాయిలో సుదీర్ఘకాలం ఆడుతూ, ప్రతి బంతి వేసేటప్పుడు ఫుట్ ప్లేస్‌మెంట్‌పై నియంత్రణ కొనసాగించడం అంత సులభం కాదు. నాథన్ లియాన్ విషయంలో ఈ అంశమే ప్రత్యేక ఆకర్షణగా నిలిచింది.

లియాన్ టెస్ట్ కెరీర్‌లో 35,117కు పైగా బంతులు వేశాడు... అంటే సుమారు 5,850 ఓవర్లకు పైగా బౌలింగ్ చేసినట్లు లెక్క. ఇంత సుదీర్ఘ ప్రయాణంలో ఒక్క ఫ్రంట్ ఫుట్ నోబాల్ కూడా వేయకపోవడం ఆయన క్రమశిక్షణను తెలియజేస్తుంది. ఇంటర్నేషన్ క్రికెట్లో 100 కు పైగా టెస్ట్ మ్యాచులాడినా ఒక్క నోబాల్ కూడా వేయని ఏకైక క్రికెటర్ గా లియాన్ నిలిచాడు.

నోబాల్ అంటే ఏమిటి?

క్రికెట్‌లో బౌలర్ బంతి వేసేటప్పుడు బౌలింగ్ క్రీజును దాటి ముందడుగు వేస్తే దాన్ని ఫ్రంట్ ఫుట్ నోబాల్‌గా పరిగణిస్తారు. ఇలాంటి బంతికి బ్యాటింగ్ జట్టుకు అదనపు పరుగు లభించడంతో పాటు బంతి కౌంట్ అవ్వదు. టీ20 వంటి ఫార్మాట్‌ లో ఫ్రీ హిట్ వంటి ప్రయోజనాలు కూడా ఉంటాయి. అందుకే బౌలర్లు తమ రన్‌అప్, క్రీజు వద్ద పాదం పడే విధానంపై ప్రత్యేక శ్రద్ధ చూపుతారు.

స్పిన్నర్లకు కూడా ఈ నియంత్రణ ఎంతో అవసరం. వారు ఎక్కువగా వేగం కంటే బంతి గమనాన్ని, టర్న్‌ను, ఫ్లైట్‌ను నమ్ముకుని బౌలింగ్ చేస్తారు. టెస్ట్ మ్యాచ్‌ల్లో ఒకే ఎండ్ నుంచి వరుసగా అనేక ఓవర్లు వేయాల్సి రావడంతో ఏకాగ్రతను కొనసాగించడం ముఖ్యం. ఇలాంటి పరిస్థితుల్లో నాథన్ లియాన్ సాధించిన నోబాల్ రికార్డు ప్రత్యేకంగా కనిపిస్తుంది. వేలాది బంతులు వేసినా ఫ్రంట్ ఫుట్ ఓవర్‌స్టెప్ లేకుండా బౌలింగ్ చేయడం ఆయన క్రమశిక్షణకు నిదర్శనం.

నాథన్ లియాన్ 2011లో శ్రీలంకతో జరిగిన టెస్ట్ మ్యాచ్ ద్వారా అంతర్జాతీయ క్రికెట్‌లోకి అడుగుపెట్టారు. ఆరంభంలోనే తన స్పిన్ బౌలింగ్‌తో ఆకట్టుకున్న ఆయన, క్రమంగా ఆస్ట్రేలియా టెస్ట్ జట్టులో కీలక ఆటగాడిగా ఎదిగారు. పిచ్ పరిస్థితులు ఎలా ఉన్నా, ప్రత్యర్థి బ్యాటర్లు ఎవరైనా తన బౌలింగ్‌లో వైవిధ్యాన్ని చూపించడం ఆయన ప్రత్యేకత.

లియాన్ ప్రధానంగా ఆఫ్ స్పిన్‌తో బ్యాటర్లను ఇబ్బంది పెట్టేవారు. బంతిని సరైన ప్రదేశంలో వేయడం, బ్యాటర్లను తప్పులు చేసేలా ప్రేరేపించడం, సుదీర్ఘ స్పెల్స్‌లో పరుగులను నియంత్రించడం ఆయన బౌలింగ్‌లో ముఖ్యమైన అంశాలు. టెస్ట్ క్రికెట్‌లో ఫాస్ట్ బౌలర్లకు ఎక్కువ ప్రాధాన్యం ఇచ్చే ఆస్ట్రేలియా జట్టులో, స్పిన్నర్‌గా సుదీర్ఘకాలం స్థానం నిలబెట్టుకోవడం ఆయన ప్రతిభను తెలియజేస్తుంది.

నాథన్ లియాన్ టెస్ట్ క్రికెట్‌లో సాధించిన అత్యంత ముఖ్యమైన ఘనతల్లో వికెట్ల సంఖ్య కూడా ఒకటి. ఆయన 143 టెస్ట్ మ్యాచ్‌ల్లో 571 వికెట్లు పడగొట్టారు. ఈ ప్రదర్శనతో ఆస్ట్రేలియా తరఫున అత్యధిక టెస్ట్ వికెట్లు తీసిన బౌలర్లలో రెండో స్థానంలో ఉన్నారు. దిగ్గజ స్పిన్నర్ షేన్ వార్న్ 708 వికెట్లతో అగ్రస్థానంలో కొనసాగుతున్నారు.

టెస్ట్ క్రికెట్‌లో 500 వికెట్ల మైలురాయిని చేరడం ఏ బౌలర్‌కైనా గొప్ప ఘనత. అందులోనూ స్పిన్నర్‌గా ఇన్ని వికెట్లు సాధించాలంటే సుదీర్ఘకాలం ఫిట్‌నెస్‌ను కాపాడుకోవడంతో పాటు, బ్యాటర్ల ఆటతీరుకు అనుగుణంగా బౌలింగ్‌లో మార్పులు చేసుకోవాలి. లియాన్ తన కెరీర్‌లో ఈ రెండు అంశాల్లోనూ నిలకడ చూపించారు.

టెస్ట్ క్రికెట్‌లో వికెట్లు తీయడం మాత్రమే కాదు, ప్రత్యర్థి జట్టు పరుగుల వేగాన్ని తగ్గించడం కూడా బౌలర్ బాధ్యత. లియాన్ ఈ విషయంలోనూ తనదైన ముద్ర వేశారు. ఆయన టెస్ట్ బౌలింగ్ సగటు సుమారు 30.21 కాగా, ఎకానమీ రేటు ఓవర్‌కు సుమారు 2.95 పరుగులుగా ఉంది. అంటే సుదీర్ఘ ఇన్నింగ్స్‌లలో కూడా ప్రత్యర్థి బ్యాటర్లకు సులభంగా పరుగులు ఇచ్చే బౌలర్‌గా ఆయన ఉండలేదు.

లియాన్ వ్యక్తిగత రికార్డుల్లో అత్యుత్తమ బౌలింగ్ ప్రదర్శన కూడా ప్రత్యేకంగా చెప్పుకోవాలి. టెస్ట్ క్రికెట్‌లో ఒక ఇన్నింగ్స్‌లో 8 వికెట్లకు 50 పరుగులు ఇవ్వడం ఆయన అత్యుత్తమ గణాంకం. 2017లో భారత్‌తో బెంగళూరులో జరిగిన టెస్ట్ మ్యాచ్‌లో ఈ ప్రదర్శన చేశారు. అదే మ్యాచ్‌లో ప్రత్యర్థి బ్యాటింగ్‌పై ఆయన చూపించిన ప్రభావం స్పష్టంగా కనిపించింది. ఒక టెస్ట్ మ్యాచ్‌లో రెండు ఇన్నింగ్స్‌లు కలిపి 13 వికెట్లు పడగొట్టడం ఆయన కెరీర్‌లో మరో ప్రధాన ఘనత. మొత్తం కెరీర్‌లో 24 సార్లు ఒక ఇన్నింగ్స్‌లో ఐదు లేదా అంతకంటే ఎక్కువ వికెట్లు తీసుకున్నారు. ఐదు సందర్భాల్లో మ్యాచ్‌లో పది లేదా అంతకంటే ఎక్కువ వికెట్లు సాధించారు.

టెస్ట్ కెరీర్లో నో నోబాల్ రికార్డు... ఎందుకంత ప్రత్యేకం?

వన్డేలు, టీ20లతో పోలిస్తే టెస్ట్ క్రికెట్‌లో బౌలర్లకు ఎక్కువ ఓవర్లు వేయాల్సి వస్తుంది. కొన్నిసార్లు ఒకే ఇన్నింగ్స్‌లో గంటల తరబడి బౌలింగ్ చేయాల్సి ఉంటుంది. అలాంటి సమయంలో శారీరక అలసటతో పాటు మానసిక ఒత్తిడిని కూడా అధిగమించాలి. నాథన్ లియాన్ రికార్డులోని అసలు ప్రత్యేకత ఇదే. 35 వేలకుపైగా బంతులు వేసిన సుదీర్ఘ ప్రయాణంలో ఫ్రంట్ ఫుట్ నోబాల్ లేకుండా కొనసాగడం సాధారణ విషయం కాదు. ఇది కేవలం అదృష్టంతో సాధ్యమయ్యే ఘనత కాదు. బౌలింగ్ యాక్షన్‌పై నియంత్రణ, క్రీజుపై అవగాహన, ప్రతి బంతిని ఒకే విధమైన క్రమశిక్షణతో వేయడం ఇందులో కీలక పాత్ర పోషిస్తాయి.

క్రికెట్‌లో రికార్డులు అంటే కేవలం పరుగులు, వికెట్లు, సెంచరీలు మాత్రమే కాదు. ఆటలో కనిపించని చిన్న చిన్న అంశాల్లోనూ గొప్పతనం దాగి ఉంటుంది. నాథన్ లియాన్ సాధించిన ఫ్రంట్ ఫుట్ నోబాల్ రికార్డు దీనికి మంచి ఉదాహరణ. 571 టెస్ట్ వికెట్లు, 24 ఐదు వికెట్ల ప్రదర్శనలు, ఒక ఇన్నింగ్స్‌లో 8 వికెట్లు, మ్యాచ్‌లో 13 వికెట్లు వంటి ఘనతలతో పాటు, వేలాది బంతులు వేసేటప్పుడు చూపించిన క్రమశిక్షణ ఆయనను ప్రత్యేకంగా నిలబెడుతోంది.

స్మృతి మంధాన చేతికి టీమిండియా పగ్గాలు.. హర్మన్‌ప్రీత్ స్థానంలో కొత్త కెప్టెన్

Narender Vaitla — Tue, 06 Oct 2026 22:50:43 +0530

Smriti mandhana: భారత మహిళల క్రికెట్‌లో కీలక మార్పు చోటుచేసుకుంది. ఇప్పటివరకు జట్టుకు సారథ్యం వహించిన హర్మన్‌ప్రీత్ కౌర్ కెప్టెన్సీ బాధ్యతల నుంచి వైదొలగడంతో.. స్టార్ ఓపెనర్ స్మృతి మంధానకు బీసీసీఐ కొత్త బాధ్యతలు అప్పగించింది.

వన్డే, టీ20 ఫార్మాట్లలో భారత మహిళల జట్టుకు ఆమె పూర్తిస్థాయి కెప్టెన్‌గా స్మృతి వ్యవహరించనున్నారు. అక్టోబర్ 6న బీసీసీఐ ఈ నిర్ణయాన్ని అధికారికంగా ప్రకటించింది. టీమిండియాకు నాయకత్వం వహించే అవకాశం దక్కడం తనకు ఎంతో ప్రత్యేకమైన గౌరవమని స్మృతి మంధాన పేర్కొన్నారు. తనపై నమ్మకం ఉంచిన బీసీసీఐ, సెలెక్టర్లు, సహచర ఆటగాళ్లకు ఆమె ధన్యవాదాలు తెలిపారు. కెప్టెన్‌గా వచ్చే బాధ్యతలపై తనకు పూర్తి అవగాహన ఉందని చెబుతూ.. భారత క్రికెట్‌ను మరింత ఉన్నత స్థాయికి తీసుకెళ్లేందుకు శక్తివంచన లేకుండా కృషి చేస్తానని స్పష్టం చేశారు. జట్టు విజయాల కోసం అందరితో కలిసి పనిచేస్తానని తెలిపారు.

కెప్టెన్సీ నుంచి తప్పుకున్న హర్మన్‌ప్రీత్ కౌర్‌కు స్మృతి మంధాన ప్రత్యేకంగా అభినందనలు తెలిపారు. ఎన్నో ఏళ్ల పాటు జట్టును ముందుండి నడిపిన హర్మన్‌ప్రీత్‌ నిబద్ధతను ప్రశంసించారు. ఆమె అందించిన సేవలు భారత మహిళా క్రికెట్‌కు ఎంతో కీలకమని పేర్కొన్నారు. సారథ్య బాధ్యతలు చేపడుతున్న సమయంలో హర్మన్‌ప్రీత్ అనుభవాన్ని గౌరవిస్తూ ముందుకు సాగుతాననే సంకేతాన్ని స్మృతి ఇచ్చారు.

స్మృతి మంధానకు కెప్టెన్సీ కొత్త కాదు. గతంలో భారత జట్టుకు 18 టీ20 అంతర్జాతీయ మ్యాచ్‌ల్లో, 4 వన్డేల్లో సారథ్యం వహించారు. అంతేకాకుండా ఉమెన్స్ ప్రీమియర్ లీగ్‌లో రాయల్ ఛాలెంజర్స్ బెంగళూరు జట్టును విజయవంతంగా నడిపించారు. 2024, 2026 సీజన్లలో ఆర్సీబీ టైటిల్ సాధించడంలో ఆమె నాయకత్వం కీలకంగా నిలిచింది. అంతర్జాతీయ స్థాయిలో ఆటగాళ్లను సమన్వయం చేయడంతో పాటు ఒత్తిడిలో నిర్ణయాలు తీసుకునే సామర్థ్యం ఆమెకు కలిసొచ్చే అంశాలుగా భావిస్తున్నారు.

కొత్త కెప్టెన్‌గా స్మృతి మంధాన నియామకాన్ని బీసీసీఐ అధ్యక్షుడు మిథున్ మన్హాస్, కార్యదర్శి దేవజిత్ సైకియా స్వాగతించారు. ఆటపై ఆమెకు ఉన్న అవగాహన, అంతర్జాతీయ అనుభవం, జట్టు పట్ల నిబద్ధత భారత మహిళల జట్టుకు ఉపయోగపడతాయని వారు పేర్కొన్నారు. డబ్ల్యూపీఎల్‌లో ఆర్సీబీని విజయవంతంగా నడిపించిన అనుభవం స్మృతికి అదనపు బలమని అభిప్రాయపడ్డారు. ఆమె నాయకత్వంలో భారత మహిళల జట్టు రాబోయే రోజుల్లో మరిన్ని విజయాలు సాధిస్తుందని బీసీసీఐ పెద్దలు ఆకాంక్షించారు.

IND vs WI: భారత జట్టు ఓటమికి 5 కారణాలు ఇవే.. వెస్టిండీస్‌తో ఉత్కంఠ పోరులో టీమిండియా చిత్తు

Mahesh Rajamoni — Thu, 15 Oct 2026 07:01:47 +0530

India vs West Indies: హైదరాబాద్ లోని రాజీవ్ గాంధీ స్టేడియంలో వెస్టిండీస్‌తో జరిగిన 4వ టీ20లో భారత్ 24 పరుగుల తేడాతో ఓటమిపాలైంది. మ్యాచ్ ఫలితాన్ని మార్చిన 5 కారణాలు ఏంటో ఇక్కడ తెలుసుకుందాం.

హైదరాబాద్‌లోని రాజీవ్ గాంధీ అంతర్జాతీయ స్టేడియంay వెస్టిండీస్‌తో జరిగిన నాల్గవ టీ20 మ్యాచ్‌లో భారత జట్టుకు నిరాశ ఎదురైంది. భారీ లక్ష్య ఛేదనలో టీమిండియా కీలక దశలో తడబడింది. ముఖ్యంగా వెస్టిండీస్ బౌలర్ కీమో పాల్ అద్భుతమైన బౌలింగ్‌తో మ్యాచ్ స్వరూపాన్నే మార్చేశారు. అతను కేవలం 4 ఓవర్లలో 41 పరుగులు ఇచ్చి 5 వికెట్లు పడగొట్టి భారత్ విజయ అవకాశాలను దెబ్బతీశాడు. వరుస ఓవర్లలో వికెట్లు కోల్పోవడం భారత్ పతనానికి ప్రధాన కారణమైంది.

248 పరుగుల భారీ లక్ష్యంతో బరిలోకి దిగిన భారత జట్టుకు ఆరంభంలో అభిషేక్ శర్మ పర్వాలేదనిపించినా, మిడిలార్డర్ బ్యాటర్లు ఆశించిన స్థాయిలో రాణించలేకపోయారు. కెప్టెన్ శ్రేయస్ అయ్యర్ 16 పరుగులు చేసి వెనుదిరిగారు. నితీష్ కుమార్ రెడ్డి (41 పరుగులు), తిలక్ వర్మ (43 పరుగులు) పోరాడినప్పటికీ, రన్ రేట్ ఒత్తిడి పెరిగిపోవడంతో భారీ షాట్లు ఆడే ప్రయత్నంలో వికెట్లు సమర్పించుకున్నారు. చివరి ఓవర్లలో వరుసగా వికెట్లు పడటంతో భారత్ లక్ష్యానికి దూరమైంది.

మొదటి ఆరు ఓవర్లలో టీమిండియా మంచి స్కోరు సాధించినా, మధ్య ఓవర్లలో వెస్టిండీస్ స్పిన్నర్లు కట్టుదిట్టమైన బౌలింగ్ తో టీమిండియాను అడ్డుకున్నారు. గుడాకేష్ మూతీ, రోస్టన్ ఛేజ్ పరుగుల ప్రవాహానికి అడ్డుకట్ట వేశారు. బ్యాటర్లకు క్రీజులో కుదురుకునే అవకాశం ఇవ్వకుండా డాట్ బాల్స్ సంఖ్యను పెంచారు. ఈ దశలో పెరిగిన అవసరమైన రన్ రేట్ యువ బ్యాటర్లపై తీవ్రమైన మానసిక ఒత్తిడిని తెచ్చింది.

మ్యాచ్ చివరి దశలో ఉత్కంఠ తారాస్థాయికి చేరింది. అర్ష్‌దీప్ సింగ్ బ్యాటింగ్ చేస్తున్న సమయంలో తీవ్రమైన గాయానికి గురయ్యాడు. షమర్ జోసెఫ్ వేసిన షార్ట్ పిచ్ బంతి అతని ఎడమ చేతి బైసెప్స్‌కు తగలడంతో నొప్పితో అల్లాడిపోయాడు. ఫిజియో మైదానానికి వచ్చి చికిత్స అందించినప్పటికీ, అతను కొనసాగలేక రిటైర్డ్ అవుట్‌గా వెనుదిరగాల్సి వచ్చింది. ఇది భారత జట్టు విజయాశాలపై తీవ్ర ప్రభావం చూపింది.

వెస్టిండీస్ జట్టు ఈ మ్యాచ్‌లో అద్భుతమైన వ్యూహాలతో బరిలోకి దిగింది. కెప్టెన్ షాయ్ హోప్ చక్కని వ్యూహాత్మక మార్పులతో బౌలర్లను సద్వినియం చేసుకున్నాడు. రోవ్‌మన్ పావెల్ లాంటి ఆటగాళ్లు అవుట్‌ఫీల్డ్‌లో అద్భుతమైన క్యాచ్‌లు అందుకుంటూ భారత బ్యాటర్లకు ఎలాంటి అవకాశం ఇవ్వలేదు. చివరి ఓవర్లలో ఒత్తిడిని జయించి విండీస్ బౌలర్లు కట్టడి చేయడంతో, భారత్ 24 పరుగుల తేడాతో ఓటమిని చవిచూడాల్సి వచ్చింది. ఈ విజయంతో ఐదు మ్యాచ్‌ల సిరీస్ 2-2తో సమమైంది.

Team India New Captain: టీమిండియాకు కొత్త కెప్టెన్, వైస్ కెప్టెన్లు.. పూర్తి వివరాలు ఇవే

Mahesh Rajamoni — Wed, 07 Oct 2026 09:30:56 +0530

Team India New Captain: భారత స్టార్ ప్లేయర్ హర్మన్‌ప్రీత్ కౌర్ కెప్టెన్సీకి గుడ్ బై చెప్పారు. ఆమె స్థానంలో స్మృతి మంధాన భారత మహిళల క్రికెట్ జట్టు కొత్త కెప్టెన్‌గా నియామకమయ్యారు. టీ20ల్లో షెఫాలీ వర్మ, వన్డేల్లో దీప్తి శర్మ వైస్ కెప్టెన్లుగా ఉంటారు.

భారత మహిళల క్రికెట్‌లో ఒక కొత్త శకం మొదలైంది. టీమిండియా ఆల్‌ఫార్మాట్ కెప్టెన్సీ బాధ్యతల నుంచి హర్మన్‌ప్రీత్ కౌర్ తప్పుకున్న కొన్ని గంటల్లోనే, కొత్త సారథిగా స్టార్ ఓపెనర్ స్మృతి మంధానను బీసీసీఐ నియమించింది. మంగళవారం సాయంత్రం గౌహతిలోని ఏసిఏ (ACA) స్టేడియంలో మహిళల సెలక్షన్ కమిటీ సమావేశం అయింది.

జింబాబ్వేతో జరగబోయే మూడు టీ20లు, మూడు వన్డేల సిరీస్‌ల కోసం భారత జట్టును ఎంపిక చేసింది. హర్మన్‌ప్రీత్‌కు సుదీర్ఘకాలంగా డిప్యూటీగా వ్యవహరించిన 30 ఏళ్ల మంధాన, సారథ్య బాధ్యతలు చేపట్టడానికి సరైన ఎంపికగా నిలిచారు. ఇకపై హర్మన్‌ప్రీత్ కేవలం ప్లేయర్ గా జట్టులో కొనసాగుతారు.

స్మృతి మంధాన నాయకత్వంలోకి వచ్చిన వేళ వైస్ కెప్టెన్ల విషయంలో కూడా సెలక్టర్లు కీలక నిర్ణయం తీసుకున్నారు. టీ20 ఫార్మాట్‌లో డాషింగ్ ఓపెనర్ షెఫాలీ వర్మను వైస్ కెప్టెన్‌గా నియమించారు. మరోవైపు, 50 ఓవర్ల వన్డే ఫార్మాట్‌లో అనుభవజ్ఞురాలైన ఆల్‌రౌండర్ దీప్తి శర్మకు వైస్ కెప్టెన్సీ బాధ్యతలు అప్పగించారు.

ఈ నిర్ణయంతో టీమిండియా నాయకత్వ బృందంలో ఇద్దరు యంగ్ అండ్ ఎక్స్‌పీరియన్స్డ్ ప్లేయర్లకు పెద్ద పీట వేసినట్లయింది. వీరిద్దరూ కొత్త కెప్టెన్ మంధానకు అండగా ఉంటూ జట్టును ముందుకు నడపనున్నారు.

స్మృతి మంధానకు అంతర్జాతీయ స్థాయిలో మాత్రమే కాకుండా ఫ్రాంచైజ్ క్రికెట్‌లోనూ అద్భుతమైన కెప్టెన్సీ అనుభవం ఉంది. ఉమెన్స్ ప్రీమియర్ లీగ్ (WPL)లో రాయల్ ఛాలెంజర్స్ బెంగళూరు (RCB) జట్టును 2024, 2026 సీజన్లలో రెండుసార్లు విజేతగా నిలిపి తన లీడర్‌షిప్ స్కిల్స్ నిరూపించుకున్నారు.

గతంలోనూ ఆమె ఇండియా తరఫున 18 టీ20లు, 4 వన్డేలకు తాత్కాలిక కెప్టెన్‌గా వ్యవహరించారు. భారత్ తరఫున అన్ని ఫార్మాట్లలో కలిపి అత్యధిక పరుగులు చేసిన రికార్డుతో పాటు ఇంటర్నేషనల్ క్రికెట్‌లో అత్యధిక సెంచరీలు చేసిన ప్లేయర్‌గా స్మృతి అగ్రస్థానంలో ఉన్నారు. ఇటీవల టీ20ల్లో అత్యధిక పరుగులు చేసిన బ్యాటర్‌గానూ రికార్డు సృష్టించారు.

జట్టు బాధ్యతలు చేపట్టిన అనంతరం స్మృతి మంధాన మాట్లాడుతూ తన సంతోషాన్ని వ్యక్తం చేశారు. "భారత జట్టుకు నాయకత్వం వహించే అవకాశం రావడం చాలా ప్రత్యేకమైన గౌరవంగా భావిస్తున్నాను. ఇప్పుడు జట్టును నడిపించే అవకాశం రావడం నేను ఎప్పటికీ మరచిపోలేను. నాపై నమ్మకం ఉంచిన బీసీసీఐ, సెలక్టర్లు, సహచరులు, అండగా నిలిచిన అందరికీ ధన్యవాదాలు. ఇన్నేళ్లుగా కెప్టెన్‌గా హర్మన్‌ప్రీత్ చేసిన సేవలు ఎంతో గొప్పవి. ఆమె జట్టును ఎంతో అంకితభావంతో నడిపించారు. ఈ రోల్ వల్ల వచ్చే బాధ్యత నాకు తెలుసు, జట్టుతో కలిసి నేర్చుకుంటూ ఇండియన్ క్రికెట్‌ను మరింత ముందుకు తీసుకెళ్లడానికి నా వంతు ఉత్తమ ప్రదర్శన ఇస్తాను" అని వెల్లడించారు.

భారత కొత్త నాయకత్వ బృందానికి మొదటి సవాలు స్వదేశంలో జింబాబ్వేతో జరగనున్న సిరీసే. మూడు టీ20ల సిరీస్ రాయ్‌పూర్‌లో అక్టోబర్ 16, 18, 20 తేదీల్లో జరగనుంది. ఆ తర్వాత వన్డే సిరీస్ వడోదరాలో అక్టోబర్ 23, 25, 28 తేదీలలో జరుగుతుంది. వచ్చే ఏడాది ప్రారంభంలో భారతదేశంలోనే జరగనున్న తొలి ఉమెన్స్ ఛాంపియన్స్ ట్రోఫీ టోర్నమెంట్ స్మృతి మంధానకు అత్యంత కీలకమైన బిగ్ అసైన్‌మెంట్ కానుంది.

టీ20 జట్టు:

స్మృతి మంధాన (కెప్టెన్), షెఫాలీ వర్మ (వైస్ కెప్టెన్), నికి ప్రసాద్, హర్మన్‌ప్రీత్ కౌర్, అనుష్క శర్మ, రిచా ఘోష్ (వికెట్ కీపర్), జి కమలిని (వికెట్ కీపర్), దీప్తి శర్మ, ప్రేమ రావత్, శ్రీ చరణి, నందని శర్మ, క్రాంతి గౌడ్, అరుంధతి రెడ్డి, జింటిమని కలితా, మిన్ను మణి.

వన్డే జట్టు:

స్మృతి మంధాన (కెప్టెన్), షెఫాలీ వర్మ, ప్రతిక రావల్, హర్మన్‌ప్రీత్ కౌర్, హర్లీన్ డియోల్, తేజల్ హసబ్నిస్, దీప్తి శర్మ (వైస్ కెప్టెన్), రిచా ఘోష్ (వికెట్ కీపర్), యస్తికా భాటియా (వికెట్ కీపర్), వైష్ణవి శర్మ, నందని శర్మ, శ్రీ చరణి, క్రాంతి గౌడ్, సయాలి సత్‌ఘరే, రేణుకా ఠాకూర్.

virat kohli: ఆ ఆశ్ర‌మానికి వెళ్లినందుకు కోహ్లికి రూ. 5 కోట్లు ఇచ్చారా.? అస‌లేం జ‌రిగిందంటే

Narender Vaitla — Wed, 07 Oct 2026 17:23:49 +0530

virat kohli: టీమిండియా స్టార్ బ్యాటర్ విరాట్ కోహ్లీ, ఆయన భార్య అనుష్క శర్మ తరచుగా ఉత్తరప్రదేశ్‌లోని బృందావన్‌కు వెళ్లి ప్రేమానంద మహారాజ్‌ను కలుస్తుంటారు. అయితే దీనిపై తాజాగా ఓ సంచలన ఆరోపణ సోషల్ మీడియాలో వైరల్‌గా మారింది.

శ్రీకృష్ణ జన్మభూమి సంఘర్ష్ న్యాస్ అధ్యక్షుడు ఫలహారి మహారాజ్ అలియాస్ దినేశ్ శర్మ చేసిన వ్యాఖ్యలతో ఈ వివాదం మొదలైంది. ఆశ్రమానికి ప్రజాదరణ పెంచుకునే ఉద్దేశంతో ప్రేమానంద మహారాజ్.. విరాట్ కోహ్లీని అక్కడికి తీసుకురావడానికి రూ.5 కోట్లు చెల్లించారని ఆయన ఆరోపించినట్లు కథనాలు వెలువడ్డాయి. దీంతో ఈ విషయం సోషల్ మీడియాలో విస్తృతంగా ప్రచారంలోకి వచ్చింది.

ఈ ఆరోపణలపై విరాట్ కోహ్లీ ప్రతినిధి బృందం స్పందించింది. రూ.5 కోట్లు చెల్లించారన్న ప్రచారంలో ఎలాంటి నిజం లేదని స్పష్టం చేసింది. కోహ్లీ తన వ్యక్తిగత విశ్వాసం, ప్రేమానంద మహారాజ్‌పై ఉన్న గౌరవంతోనే ఆశ్రమాన్ని సందర్శిస్తున్నారని తెలిపింది. ఎలాంటి ఆర్థిక లావాదేవీ జరగలేదని పేర్కొంటూ.. ఆధారాలు లేని ఆరోపణలను ప్రచారం చేయడం సరికాదని సూచించింది.

కోహ్లీ బృందం మీడియాకు కీలక సూచన చేసింది. ఇలాంటి సున్నితమైన అంశాలపై కథనాలు ప్రచురించే ముందు సంబంధిత వ్యక్తుల నుంచి వాస్తవాలను నిర్ధారించుకోవాలని కోరింది. నిరాధారమైన సమాచారంతో వ్యక్తుల ప్రతిష్ఠకు నష్టం కలిగే అవకాశం ఉందని పేర్కొంది. తప్పుడు ప్రచారం కొనసాగితే చట్టపరమైన చర్యలపై కూడా ఆలోచించాల్సి వస్తుందని హెచ్చరించినట్లు తెలుస్తోంది.

విరాట్ కోహ్లీ, అనుష్క శర్మలకు బృందావన్‌లోని ప్రేమానంద మహారాజ్ ఆశ్రమాన్ని సందర్శించడం కొత్త విషయం కాదు. 2023 జనవరిలో తమ కుమార్తె వామికతో కలిసి తొలిసారి అక్కడికి వెళ్లినట్లు తెలుస్తోంది. ఆ తర్వాత కూడా పలు సందర్భాల్లో ఈ దంపతులు ఆశ్రమాన్ని సందర్శించారు. కోహ్లీ టెస్టు క్రికెట్‌కు వీడ్కోలు ప్రకటించిన సమయంలో కూడా ప్రేమానంద మహారాజ్‌ను కలిసి ఆశీస్సులు తీసుకున్నారు.

Virat Kohli has responded to the allegations that he took ₹5 crores to visit Premanand Ashram in Mathura, UP. https://t.co/mJ6gr66fg4

— Piyush Rai (@Benarasiyaa) October 7, 2026

ఆశ్రమంలో కోహ్లీ దంపతులకు ప్రేమానంద మహారాజ్ ఆధ్యాత్మిక విషయాలపై మార్గనిర్దేశం చేసిన సందర్భాలు ఉన్నాయి. తాము చేసే వృత్తిపరమైన పనులను భగవంతుడికి సేవగా భావించాలని, జీవితంలో వినయం కొనసాగించాలని ఆయన సూచించినట్లు సమాచారం. అందుకే తమ విశ్వాసంలో భాగంగానే కోహ్లీ దంపతులు ఆశ్రమానికి వెళ్తున్నారని ఆయన ప్రతినిధులు చెబుతున్నారు.

హైదరాబాద్‌ టీ20 మ్యాచ్‌కు ముత్తూట్‌ ఫిన్‌కార్ప్‌ టైటిల్‌ స్పాన్సర్‌.. ఉప్పల్‌లో భారీ భద్రత

Narender Vaitla — Tue, 13 Oct 2026 10:11:24 +0530

IND vs WI: భారత్‌–వెస్టిండీస్‌ జట్ల మధ్య ఈ నెల 14న హైదరాబాద్‌లో జరగనున్న టీ20 మ్యాచ్‌కు క్రికెట్‌ అభిమానులు సిద్ధమవుతున్నారు. భారత క్రికెట్‌ హోమ్‌ సీజన్‌కు ముత్తూట్‌ ఫిన్‌కార్ప్‌ లిమిటెడ్‌ టైటిల్‌ స్పాన్సర్‌గా వ్యవహరిస్తోంది.

హైదరాబాద్‌లోని ఉప్పల్‌ స్టేడియంలో బుధవారం జరగనున్న భారత్‌–వెస్టిండీస్‌ టీ20 మ్యాచ్‌పై అభిమానుల్లో ఆసక్తి పెరుగుతోంది. ఇప్పటివరకు 25 వేల టికెట్లు విక్రయించినట్లు హైదరాబాద్‌ క్రికెట్‌ అసోసియేషన్‌ (హెచ్‌సీఏ) వెల్లడించింది. స్టేడియంలో సుమారు 55 వేల మంది కూర్చుని మ్యాచ్‌ను వీక్షించే సామర్థ్యం ఉంది. ఈ పోటీకి దాదాపు 40 వేల మంది ప్రేక్షకులు హాజరవుతారని అధికారులు అంచనా వేస్తున్నారు. అభిమానులకు ఇబ్బందులు కలగకుండా పార్కింగ్‌, రవాణా, భద్రతకు సంబంధించిన ఏర్పాట్లపై దృష్టి సారించారు.

మ్యాచ్‌ సందర్భంగా ఎలాంటి అవాంఛనీయ ఘటనలు జరగకుండా మల్కాజిగిరి పోలీసు కమిషనరేట్‌ ఆధ్వర్యంలో విస్తృత భద్రతా చర్యలు చేపడుతున్నారు. మొత్తం 2,200 మంది పోలీసులను విధుల్లో నియమించనున్నట్లు సీపీ సుమతి తెలిపారు. స్టేడియం పరిసరాల్లో నాలుగు ప్రత్యేక వాచ్‌ టీమ్‌లు నిఘా ఉంచనున్నాయి. మ్యాచ్‌కు వచ్చే ప్రేక్షకుల కదలికలు, వాహనాల రాకపోకలను పర్యవేక్షించడంతో పాటు ఎలాంటి సమస్య తలెత్తినా వెంటనే స్పందించేలా పోలీసు యంత్రాంగాన్ని సిద్ధం చేస్తున్నారు.

స్టేడియం పరిసర ప్రాంతాలపై నిఘా కోసం 408 సీసీ కెమెరాలు, రెండు డ్రోన్‌ కెమెరాలను వినియోగించనున్నారు. ఆన్‌లైన్‌లో నకిలీ టికెట్ల విక్రయాలపైనా పోలీసులు ప్రత్యేక దృష్టి పెట్టారు. సోషల్‌ మీడియా ద్వారా నకిలీ టికెట్లు విక్రయించే ప్రయత్నాలను గుర్తించేందుకు పర్యవేక్షణ కొనసాగిస్తున్నారు. మహిళల భద్రతకు ప్రాధాన్యం ఇస్తూ ఎనిమిది షీ టీమ్‌లను సాధారణ దుస్తుల్లో విధుల్లో ఉంచనున్నారు. ప్రేక్షకులు స్టేడియానికి చేరుకునే సమయం నుంచి మ్యాచ్‌ ముగిసిన తర్వాత తిరిగి వెళ్లే వరకు భద్రతా చర్యలు కొనసాగనున్నాయి.

మ్యాచ్‌కు వచ్చే అభిమానుల కోసం 8 వేలకుపైగా వాహనాలు నిలిపేలా పార్కింగ్‌ స్థలాలను ఏర్పాటు చేసినట్లు అధికారులు తెలిపారు. అయితే భారీ సంఖ్యలో ప్రేక్షకులు తరలివచ్చే అవకాశం ఉన్నందున వ్యక్తిగత వాహనాల కంటే ఆర్టీసీ బస్సులు, మెట్రో రైళ్లలో ప్రయాణించడానికే ప్రాధాన్యం ఇవ్వాలని పోలీసులు సూచించారు. ట్రాఫిక్‌ రద్దీని తగ్గించడంతో పాటు స్టేడియం పరిసరాల్లో వాహనాల రాకపోకలు సజావుగా సాగేందుకు ఈ చర్యలు దోహదపడనున్నాయి. ఆటగాళ్లు తొలుత బంజారాహిల్స్‌కు చేరుకుని, అక్కడి నుంచి స్టేడియానికి వస్తారని సీపీ సుమతి వెల్లడించారు. మ్యాచ్‌ ప్రారంభానికి రెండు గంటల ముందు నుంచే ప్రేక్షకులను స్టేడియంలోకి అనుమతించనున్నారు.

భారత క్రికెట్‌ హోమ్‌ సీజన్‌కు ముత్తూట్‌ ఫిన్‌కార్ప్‌ లిమిటెడ్‌ టైటిల్‌ స్పాన్సర్‌గా వ్యవహరిస్తోంది. బీసీసీఐతో కుదిరిన ఒప్పందం ప్రకారం భారత పురుషుల, మహిళల సీనియర్‌ జట్లతో పాటు ఇండియా-ఎ పురుషుల జట్టు, ఇండియా-బి పురుషుల జట్టు, ఇండియా-ఎ మహిళల జట్టు, అండర్‌-19 పురుషుల, మహిళల జట్ల మ్యాచ్‌లకూ ఈ భాగస్వామ్యం వర్తిస్తుంది. రంజీ ట్రోఫీ, ఇరానీ కప్‌, దులీప్‌ ట్రోఫీ, విజయ్‌ హజారే ట్రోఫీ, దేవధర్‌ ట్రోఫీ, సయ్యద్‌ ముస్తాక్‌ అలీ ట్రోఫీ వంటి ప్రధాన దేశవాళీ టోర్నమెంట్లూ ఇందులో ఉన్నాయి.

ముత్తూట్‌ ఫిన్‌కార్ప్‌ జాయింట్‌ మేనేజింగ్‌ డైరెక్టర్‌ థామస్‌ జార్జ్‌ ముత్తూట్‌ మాట్లాడుతూ, దేశవ్యాప్తంగా ప్రజలకు చేరువయ్యేందుకు క్రికెట్‌ ఒక గొప్ప వేదిక అని, జాతీయ, దేశీయ స్థాయిల్లో భారత క్రికెట్‌కు మద్దతు అందించడం తమ సంస్థకు సంతోషంగా ఉందని తెలిపారు. సంస్థ సీఈఓ షాజీ వర్గీస్‌ మాట్లాడుతూ, వివిధ స్థాయుల్లో క్రికెట్‌ ఆడే ఆటగాళ్లతో పాటు దేశవ్యాప్తంగా ఉన్న అభిమానులకు చేరువయ్యే అవకాశం ఈ భాగస్వామ్యం కల్పిస్తుందని పేర్కొన్నారు.

బీసీసీఐ అధ్యక్షుడు మిథున్‌ మన్హాస్‌ మాట్లాడుతూ, జాతీయ జట్ల నుంచి దేశవాళీ పోటీల వరకు భారత క్రికెట్‌ వ్యవస్థలోని విభిన్న విభాగాలకు ఈ భాగస్వామ్యం ప్రాతినిధ్యం వహిస్తుందని తెలిపారు. బీసీసీఐ గౌరవ కార్యదర్శి దేవజిత్‌ సైకియా కూడా ముత్తూట్‌ ఫిన్‌కార్ప్‌కు స్వాగతం పలుకుతూ, దేశవ్యాప్తంగా క్రికెట్‌ అభివృద్ధికి, ఆటగాళ్లకు మరిన్ని అవకాశాలు కల్పించడానికి ఈ భాగస్వామ్యం ఉపయోగపడుతుందని ఆశాభావం వ్యక్తం చేశారు. మొత్తంగా, హైదరాబాద్‌లో జరగనున్న టీ20 మ్యాచ్‌ క్రికెట్‌ అభిమానుల్లో ఉత్సాహాన్ని పెంచుతుండగా, ప్రేక్షకుల భద్రత కోసం పోలీసులు విస్తృత ఏర్పాట్లు చేస్తున్నారు.