Asianet News Telugu

Post Office Scheme: మార్కెట్ రిస్క్ అసలు లేదు.. ఈ పోస్టాఫీసు స్కీమ్ తో మీ డబ్బును డబుల్ చేసుకోండిలా!

Mahesh Rajamoni — Fri, 23 Oct 2026 11:04:30 +0530

Post Office Scheme: పోస్టాఫీసు రికరింగ్ డిపాజిట్ స్కీమ్‌లో నెలకు చిన్న మొత్తం పొదుపుతో పెద్ద మొత్తాన్ని అందుకోవచ్చు. కేవలం ఐదేళ్లలో భారీ ఫండ్ ఎలా పొందాలో పూర్తి వివరాలు ఇక్కడ తెలుసుకుందాం.

ప్రతి నెలా మీ సంపాదన లేదా జీతం నుంచి కొంత మొత్తాన్ని పక్కన పెట్టి, సురక్షితమైన ప్రదేశంలో ఇన్వెస్ట్ చేయాలని చూస్తున్నారా? అయితే పోస్ట్ ఆఫీస్ రికరింగ్ డిపాజిట్ (Post Office RD) స్కీమ్ మీకు మంచి ఆప్షన్ అవుతుంది. ఈ పథకంలో ఒకేసారి పెద్ద మొత్తంలో డబ్బు చెల్లించాల్సిన అవసరం లేదు. ప్రతి నెలా ఒక నిర్ణీత మొత్తాన్ని కడుతూ క్రమంగా మంచి ఫండ్‌ను తయారు చేసుకోవచ్చు. ఈ స్కీమ్ కాలపరిమితి ఐదేళ్లు అంటే మొత్తం 60 నెలలు ఉంటుంది. ప్రస్తుతం ఉన్న 6.7 శాతం వార్షిక వడ్డీ రేటు ప్రకారం, మీరు ప్రతి నెలా 6,000 రూపాయలు డిపాజిట్ చేస్తే, మెచ్యూరిటీ సమయంలో సుమారు 4.28 లక్షల రూపాయల వరకు పొందవచ్చు. పొదుపు మొత్తం పెంచితే మీరు కోట్ల రూపాయలు కూడా పొందవచ్చు.

ఈ పెట్టుబడి విధానంలో ఉండే గొప్ప ప్రత్యేకత ఏమిటంటే, మీరు షేర్ మార్కెట్ ఒడిదుడుకుల గురించి అసలు టెన్షన్ పడాల్సిన పనే లేదు. పోస్ట్ ఆఫీస్ ఆర్డీపై వచ్చే వడ్డీ నేరుగా ప్రభుత్వం నిర్ణయించిన రేట్ల ప్రకారమే లభిస్తుంది. కాబట్టి మీ పెట్టుబడికి పూర్తి భద్రత ఉంటుంది. అయితే, మీరు ఇన్వెస్ట్ చేయడం ప్రారంభించే ముందు ప్రస్తుత వడ్డీ రేట్లను, ఖాతాకు సంబంధించిన నిబంధనలను ఒకసారి సరిచూసుకోవడం చాలా ముఖ్యం. ఇది సామాన్య ప్రజలకు, ఉద్యోగులకు ఎంతో నమ్మకమైన ఆర్థిక పథకంగా నిలుస్తోంది.

పోస్ట్ ఆఫీస్ ఆర్డీలో ప్రతి నెలా 6,000 రూపాయలు డిపాజిట్ చేస్తే ఐదేళ్ల తర్వాత చేతికి ఎంత మొత్తం వస్తుంది అనేదానిపై స్పష్టమైన లెక్కలు ఉన్నాయి. దీని ప్రకారం ఐదేళ్ల తర్వాత అంచనా వేసిన మెచ్యూరిటీ మొత్తం సుమారు 4,28,185 రూపాయలు అవుతుంది. ఇందులో మీరు ప్రతి నెలా 6,000 రూపాయల చొప్పున 60 నెలల పాటు మొత్తం 3,60,000 రూపాయలు జమ చేస్తారు. దీనిపై మీకు దాదాపు 68,185 రూపాయల వడ్డీ లభిస్తుంది. ఈ గణన అంతా సంవత్సరానికి 6.7 శాతం వడ్డీ రేటు, త్రైమాసిక చక్రవడ్డీ ఆధారంగా లెక్కించారు. నిబంధనల ప్రకారం వాస్తవ మెచ్యూరిటీ మొత్తంలో స్వల్ప తేడాలు ఉండవచ్చు.

ఈ పథకంలో అనేక ప్రత్యేకతలు ఉన్నాయి. మొదటిది, అతి తక్కువ మొత్తంతో దీన్ని ప్రారంభించవచ్చు. పోస్ట్ ఆఫీస్ ఆర్డీలో కేవలం 100 రూపాయల కనీస మొత్తంతో కూడా ఖాతా ఓపెన్ చేయవచ్చు. రెండవది, దీని కాలపరిమితి సాధారణంగా 60 నెలలు ఉంటుంది. మూడవది, ఇందులో వడ్డీ లెక్కించే విధానం త్రైమాసిక చక్రవడ్డీ ఆధారంగా జరుగుతుంది. నాలుగో ముఖ్యమైన విషయం ఏమిటంటే లోన్ సదుపాయం. ఖాతా కనీసం 12 నెలలు విజయవంతంగా నడిచి, కొన్ని నిబంధనలు పాటిస్తే మీ జమ చేసిన మొత్తంలో 50 శాతం వరకు రుణం తీసుకునే వెసులుబాటు ఉంటుంది. ఐదవది, ఖాతాను నిర్ణీత కాలానికి ముందే క్లోజ్ చేసే ఆప్షన్ కూడా అందుబాటులో ఉంది.

సాధారణంగా మూడేళ్లు పూర్తయిన తర్వాత పోస్ట్ ఆఫీస్ ఆర్డీ ఖాతాను మెచ్యూరిటీకి ముందే ముగించుకునే అవకాశం లభిస్తుంది. ఒకవేళ మీరు మధ్యలోనే విత్‌డ్రా చేసుకోవాల్సి వస్తే, ఆ సమయంలో వర్తించే నిబంధనల ప్రకారం వడ్డీ తక్కువగా లభించే అవకాశం ఉంది. ఈ చిన్నపాటి నిబంధనలు మినహాయిస్తే, సాధారణ మధ్యతరగతి ప్రజలకు, చిన్న మదుపరులకు ఇది అద్భుతమైన అవకాశం. క్రమశిక్షణతో కూడిన పొదుపు అలవాటును పెంపొందించుకోవడానికి ఈ స్కీమ్ ఎంతో ఉపయోగపడుతుంది.

Inspiring Story: సరదాగా చేసిన వీడియోలే జీవితాన్ని మార్చేశాయి.. పచ్చళ్లతో మొదలై రూ.కోట్ల బిజినెస్

Nandini Arava — Fri, 23 Oct 2026 17:38:25 +0530

Inspiring Story: టిక్‌టాక్‌లో సరదాగా పచ్చళ్ల రీల్స్ షేర్ చేసుకునే ఇద్దరు ఫ్రెండ్స్..ఇప్పుడు ఏకంగా ఓ ఫుడ్ బ్రాండ్ స్టార్ట్ చేసి కోట్లు సంపాదిస్తున్నారు. లీయా మార్కస్, యాసమన్ భక్తియార్ అనే ఈ ఇద్దరు అమ్మాయిల సక్సెస్ స్టోరీ ఇది.

లీయా మార్కస్ (26), యాసమన్ భక్తియార్ (27) యూనివర్సిటీ ఆఫ్ సదరన్ కాలిఫోర్నియాలో చదువుకునేటప్పుడు ఫ్రెండ్స్ అయ్యారు. 2022లో చదువు పూర్తయ్యాక, 2023లో పచ్చళ్లు, స్నాక్స్‌కు సంబంధించిన టిక్‌టాక్ వీడియోలను ఒకరికొకరు షేర్ చేసుకోవడం మొదలుపెట్టారు. అప్పట్లో ఇంటర్నెట్‌లో పచ్చళ్ల కంటెంట్ బాగా ట్రెండ్ అయ్యేది.

ఆ సరదా కాస్తా ఒక బిజినెస్ ఐడియాగా మారింది. ఇంకేముంది, 2023 సమ్మర్‌లో ఇద్దరూ తమ ఉద్యోగాలకు రిజైన్ చేసి, లాస్ ఏంజిల్స్ కేంద్రంగా ఫుడ్ బ్రాండ్ స్టార్ట్ చేశారు. ఇప్పుడు ఈ కంపెనీ మార్కెట్ వాల్యూ సుమారు రూ.81 కోట్లకు చేరుకుంది.

వీళ్లిద్దరూ కలిసి 'గుడ్ గర్ల్ స్నాక్స్' అనే కంపెనీని స్థాపించారు. ఫిబ్రవరి 2024లో తమ మొదటి ప్రొడక్ట్ 'హాట్ గర్ల్' పచ్చళ్లను మార్కెట్లోకి తీసుకొచ్చారు. మొదట్లో మధ్యవర్తులు లేకుండా తమ సొంత వెబ్‌సైట్ ద్వారానే కస్టమర్లకు డైరెక్ట్‌గా అమ్మారు. టేస్ట్, ప్యాకేజింగ్ మీద ఫీడ్‌బ్యాక్ తీసుకుని ప్రొడక్ట్‌ను మరింత మెరుగుపరిచారు. పెద్ద ఇన్వెస్టర్ల దగ్గరకు వెళ్లేముందు వీళ్లు తమ ఫ్రెండ్స్, ఫ్యామిలీ నుంచే పెట్టుబడి సేకరించారు.

ఆన్‌లైన్ సేల్స్ సక్సెస్ అయ్యాక, అమెరికాలోని ఫేమస్ సూపర్ మార్కెట్లలో తమ ప్రొడక్ట్స్ అమ్మాలని వీళ్లు డిసైడ్ అయ్యారు. 2025లో ఫేమస్ 'హోల్ ఫుడ్స్ మార్కెట్', ప్రీమియం గ్రోసరీ స్టోర్ 'ఎరెవాన్' (Erewhon)లో తమ పచ్చళ్లను అమ్మేందుకు అప్రూవల్ తెచ్చుకున్నారు. దీంతో ఆఫ్‌లైన్‌లోనూ బ్రాండ్ రేంజ్ పెరిగిపోయింది.

దీనికి తోడు, సీడ్ ఫండింగ్ రౌండ్‌లో ఈ కంపెనీ 3 మిలియన్ డాలర్ల పెట్టుబడిని సాధించింది. దీంతో కంపెనీ మొత్తం వాల్యూ 8.5 మిలియన్ డాలర్లకు (మన కరెన్సీలో సుమారు రూ.81.4 నుంచి రూ.81.6 కోట్లు) చేరుకుంది.

కేవలం పచ్చళ్లతోనే ఆగిపోకుండా, ఇతర స్నాక్స్ ఐటెమ్స్‌ను కూడా మార్కెట్లోకి తేవాలని లీయా, యాసమన్ ప్లాన్ చేస్తున్నారు. సోషల్ మీడియా, కస్టమర్ రిలేషన్స్ బేస్‌గా వీళ్లు తమ బ్రాండ్‌ను పెంచుకుంటూ పోతున్నారు. ప్రస్తుతం ఈ కంపెనీ ఇన్‌స్టాగ్రామ్ పేజీకి 1,80,000 మంది ఫాలోవర్లు ఉన్నారు. కంపెనీ పెట్టుబడి, మార్కెట్ వాల్యూ డీటెయిల్స్ బయటకు వచ్చినా, తమ లాభాలు, ఆదాయం ఎంతనేది మాత్రం వీళ్లు ఇంకా అఫీషియల్‌గా ప్రకటించలేదు.

Mutual Fund SIP: కేవలం రూ. 2 వేల పెట్టుబడితో రూ. 2 కోట్లు సొంతం.. ఈ ట్రిక్ మీకు తెలుసా?

Mahesh Rajamoni — Fri, 23 Oct 2026 12:18:35 +0530

Mutual Fund SIP: ప్రతినెల కేవలం రూ. 2 వేలు మ్యూచువల్ ఫండ్ ఎస్ఐపీలో పెట్టుబడి పెట్టి కోటీశ్వరులు కావచ్చని ఆర్థిక నిపుణులు చెబుతున్నారు. ఈ పెట్టుబడి పూర్తి వివరాలు ఇక్కడ తెలుసుకుందాం.

కేవలం రెండు వేల రూపాయల నెలవారీ పొదుపుతో కోటీశ్వరుడు కావాలనే కల నిజం కావచ్చు. దీనికోసం భారీ మొత్తంలో పెట్టుబడులు పెట్టాల్సిన అవసరం లేదు. కేవలం దీర్ఘకాలిక సమయం, పెట్టుబడిలో క్రమశిక్షణ ఉంటే సరిపోతుందని ఆర్థిక నిపుణులు చెబుతున్నారు.

మ్యూచువల్ ఫండ్ ఎస్ఐపీ ద్వారా ఈ అద్భుతాన్ని సాధించవచ్చు. ఎస్ఐపీలో చక్రవడ్డీ లేదా కాంపౌండింగ్ గొప్ప ప్రయోజనం లభిస్తుంది. దీనివల్ల సమయం గడిచేకొద్దీ, మీరు పెట్టిన పెట్టుబడిపై వచ్చే లాభంపై కూడా తిరిగి రాబడులు వస్తాయి. అయితే, రెండు కోట్ల రూపాయల లక్ష్యాన్ని చేరుకోవడానికి ఎంత సమయం పడుతుందనేది మీ పెట్టుబడిపై లభించే సగటు రాబడి మీద ఆధారపడి ఉంటుంది.

మీరు ప్రతి నెలా రూ. 2,000 చొప్పున మ్యూచువల్ ఫండ్స్‌లో పెట్టుబడి పెడితే, వివిధ రకాల వార్షిక రాబడుల ఆధారంగా మీ ఫండ్ మొత్తం ఏ విధంగా పెరుగుతుందనే విషయాలు గమనిస్తే..

• నెలవారీ పెట్టుబడి: రూ. 2,000

• వార్షిక పెట్టుబడి: రూ. 24,000

• అంచనా లెక్కల విధానం: ప్రతి నెలా క్రమం తప్పకుండా పెట్టుబడి పెట్టడం, వార్షిక రాబడిని నెలవారీ ప్రాతిపదికన కాంపౌండ్ చేయడం జరుగుతుంది.

పెట్టుబడిపై వచ్చే రాబడి శాతం మారినప్పుడు, కోటి లేదా రెండు కోట్ల రూపాయల లక్ష్యం చేరుకోవడానికి పట్టే కాలం మారుతుంది. దాని పూర్తి వివరాలు క్రింది విధంగా ఉన్నాయి..

• వార్షిక రాబడి 10 శాతం ఉంటే: ఇందుకు మొత్తం 46 సంవత్సరాల సమయం పడుతుంది. ఈ కాలంలో మీరు జమ చేసే మొత్తం రూ. 11.06 లక్షలు కాగా, కాంపౌండింగ్ ద్వారా వచ్చే ప్రయోజనం రూ. 1.89 కోట్లుగా ఉంటుంది.

• వార్షిక రాబడి 12 శాతం ఉంటే: ఇందుకు మొత్తం 40 సంవత్సరాల సమయం పడుతుంది. మీ మొత్తం జమ రూ. 9.68 లక్షలు అయితే, కాంపౌండింగ్ వల్ల సమకూరే లాభం రూ. 1.90 కోట్లుగా ఉంటుంది.

• వార్షిక రాబడి 15 శాతం ఉంటే: ఇందుకు 34 సంవత్సరాల సమయం పడుతుంది. ఇందులో మీ పెట్టుబడి మొత్తం రూ. 8.20 లక్షలు కాగా, చక్రవడ్డీ ద్వారా అదనంగా రూ. 1.92 కోట్ల ప్రయోజనం లభిస్తుంది. అయితే, మీరు 18 ఏళ్ల టైం తీసుకుంటే దాదాపు కోటీ రూపాయలు అందుతుంది.

మ్యూచువల్ ఫండ్ ఎస్ఐపీ ప్రారంభ సంవత్సరాల్లో ఫండ్ వృద్ధి చాలా నెమ్మదిగా సాగుతున్నట్లు అనిపిస్తుంది. ఎందుకంటే ఆ సమయంలో మీ పెట్టుబడి మొత్తం చాలా తక్కువగా ఉంటుంది. కానీ, పెట్టుబడి కాలపరిమితి పెరుగుతున్న కొద్దీ, ముందుగా జమ అయిన డబ్బుపై వచ్చిన లాభం కూడా అదనంగా సంపాదించడం మొదలుపెడుతుంది. ఇదే కాంపౌండింగ్ అసలైన శక్తి. చిన్న మొత్తంతో ప్రారంభించినా, దీర్ఘకాలంలో ఇది పెద్ద సంపదను సృష్టిస్తుంది.

పెట్టుబడిదారులు తమ ఆదాయం పెరిగే కొద్దీ ఎస్ఐపీ మొత్తాన్ని కూడా క్రమంగా పెంచుకుంటూపోవచ్చు. ఉదాహరణకు, ప్రతి సంవత్సరం ఎస్ఐపీ మొత్తంలో 10 శాతం వృద్ధి చేసుకుంటూ వెళ్తే, దీర్ఘకాలంలో మీ ఫండ్ మరింత వేగంగా పెరుగుతుంది. అయితే, దీనివల్ల మీ పెట్టుబడి మొత్తం అసలు మొత్తం కూడా పెరుగుతుంది. సరైన ప్రణాళిక, క్రమశిక్షణతో మ్యూచువల్ ఫండ్స్‌లో పొదుపు చేస్తే కోటీశ్వరుడు కావడం సులభం అవుతుంది.

Gold Price: షాకింగ్ న్యూస్.. రూ.1లక్ష కంటే తక్కువకు పడిపోనున్న బంగారం ధరలు

Mahesh Rajamoni — Thu, 22 Oct 2026 07:03:01 +0530

Gold Price: బంగారం ధరలు మరింత తగ్గే అవకాశం ఉందని బ్యాంక్ ఆఫ్ అమెరికా అంచనా వేసింది. 2026 నాటికి ఔన్స్‌కు 3,700 డాలర్లకు పడిపోయి, రూ.లక్ష లోపునకు చేరవచ్చని రిపోర్టులు పేర్కొంటున్నాయి. ఆ వివరాలు ఇక్కడ తెలుసుకుందాం.

బంగారం ధరలకు సంబంధించి ఒక పెద్ద వార్త బయటకు వచ్చింది. త్వరలోనే బంగారం ధరలు భారీగా తగ్గే అవకాశం ఉందని ప్రముఖ సంస్థ బ్యాంక్ ఆఫ్ అమెరికా అంచనా వేసింది. బంగారం ధరలు రాబోయే కాలంలో మరింత పడిపోయే ఛాన్స్ ఉందని పేర్కొంది. గ్లోబల్ మార్కెట్‌లో గోల్డ్ రేట్లు ఇప్పటికే తగ్గుముఖం పట్టాయి. ఈ నేపథ్యంలో బంగారం రేట్లు రూ.లక్ష కంటే తక్కువ స్థాయికి పడిపోయే అవకాశం ఉందని బ్యాంక్ ఆఫ్ అమెరికా స్పష్టం చేసింది.

ప్రస్తుత మార్కెట్ పరిస్థితిని బట్టి చూస్తే, బంగారానికి ఇప్పట్లో ఊరట లభించేలా కనిపించడం లేదు. ధరలపై ఒత్తిడి అలాగే కొనసాగే అవకాశం ఉందని నిపుణులు చెబుతున్నారు. ఈ తగ్గుదల ఎందుకు వస్తోంది? దీని వెనుక ఉన్న కారణాలు ఏమిటి? అనే విషయాలను బ్యాంక్ ఆఫ్ అమెరికా తన తాజా రిపోర్టులో స్పష్టంగా వివరించింది.

ప్రస్తుతం గ్లోబల్ మార్కెట్‌లో బంగారం ధరలు 4,150 డాలర్లు ప్రతి ఔన్స్ కంటే తక్కువకు చేరుకున్నాయి. దీన్ని భారతీయ కరెన్సీలో లెక్కిస్తే సుమారు రూ.1.26 లక్షల ప్రతి 10 గ్రాములుగా ఉంది. అయితే, ఈ పతనం ఇక్కడితో ఆగిపోదని, మరింత తగ్గే అవకాశం ఉందని అంచనా వేస్తున్నారు.

బ్యాంక్ ఆఫ్ అమెరికా అంచనాల ప్రకారం, ప్రస్తుత బలహీనతల తర్వాత బంగారం ధరలు సుమారు 3,700 డాలర్లు ప్రతి ఔన్స్‌కు పడిపోవచ్చు. దీన్ని ఇండియన్ కరెన్సీలోకి మారుస్తే సుమారు రూ.1.12 లక్షల ప్రతి 10 గ్రాముల చొప్పున రావచ్చు. గత కొన్ని సంవత్సరాలుగా బంగారంలో భారీ పెరుగుదల నమోదైంది. ఆ తర్వాత ఇప్పుడు ధరలు సర్దుబాటు అవుతున్నాయి. ఈ ప్రక్రియ ఇంకా పూర్తి కాలేదని, ధరలు మరింత తగ్గే అవకాశం ఉందని బ్యాంక్ భావిస్తోంది.

జనవరి 2026లో బంగారం ధరలు రికార్డు స్థాయిలో సుమారు 5,595 డాలర్లు ప్రతి ఔన్స్‌ను తాకాయి. ఆ తర్వాతే మార్కెట్లో పతనం ప్రారంభమైంది. గతంలో జరిగిన భారీ పెరుగుదల కారణంగా ఇప్పుడు మార్కెట్ దిద్దుబాటుకు లోనవుతోందని బ్యాంక్ ఆఫ్ అమెరికా తెలిపింది.

ఈ కరెక్షన్ ప్రారంభమై సుమారు 38 వారాలు గడిచాయి. అయినప్పటికీ, గతంలో జరిగిన భారీ పెరుగుదలతో పోలిస్తే ఈ వ్యవధి ఇంకా తక్కువేనని నిపుణులు భావిస్తున్నారు. అందువల్ల, మార్కెట్లో అమ్మకాల ఒత్తిడి కొనసాగుతుందని, రాబోయే రోజుల్లో కూడా బంగారం ధరలు తగ్గే ధోరణి అలాగే ఉండవచ్చని రిపోర్టు స్పష్టం చేసింది.

బంగారం ధరలకు సంబంధించి కొన్ని కీలకమైన లెవెల్స్‌ను బ్యాంక్ ఆఫ్ అమెరికా పేర్కొంది. బేస్ కేస్ ప్రకారం, బంగారం ధరలు 4,697 డాలర్ల స్థాయిని దాటే వరకు పతనం అయ్యే ముప్పు అలాగే ఉంటుంది. అలాగే, 4,472 డాలర్ల వద్ద ఉన్న 50-వారాల మూవింగ్ యావరేజ్ కూడా చాలా ముఖ్యమైనదిగా రిపోర్టు చెప్పింది.

మార్కెట్ వ్యూహం ప్రకారం, 4,000 డాలర్ల కంటే తక్కువకు పడిపోయినప్పుడు కొద్ది కొద్దిగా బంగారం కొనుగోలు చేయవచ్చు. సుమారు 3,700 డాలర్ల వద్ద కొనుగోళ్లను పెంచవచ్చు. అలాగే 3,250 నుండి 3,500 డాలర్ల పరిధిలో మిగిలిన పెట్టుబడులు పెట్టడం గురించి ఆలోచించవచ్చని బ్యాంక్ సూచించింది. ముఖ్యంగా గోల్డ్ కోసం 3,250 డాలర్లు అత్యంత కీలకమైన స్థాయిగా ఉండనుంది. ఇది ఇండియన్ కరెన్సీలో దాదాపు రూ.98 వేలు ప్రతి 10 గ్రాముల చొప్పున ఉండవచ్చు.

బంగారం ధరల పతనానికి డాలర్ బలపడడం కూడా ఒక ముఖ్యమైన కారణమని బ్యాంక్ ఆఫ్ అమెరికా తెలిపింది. డాలర్ ఇండెక్స్ 104.59 నుండి 105 స్థాయికి చేరుకునే అవకాశం ఉందని అంచనా వేశారు. ఇప్పటికే డాలర్ ఇండెక్స్ 102.86 దాటి 18 నెలల గరిష్ఠ స్థాయికి చేరింది. డాలర్ బలపడినప్పుడు ఇతర కరెన్సీలు కలిగిన వారికి బంగారం కొనుగోలు చేయడం మరింత ఖరీదవుతుంది. ఇది నేరుగా బంగారం ధరలపై ఒత్తిడిని పెంచుతుంది.

అయితే, ఈ ఏడాది కనిష్ఠ స్థాయిలైన 3,943 డాలర్ల కంటే బంగారం కిందకు పడిపోకపోతే, భవిష్యత్తులో పరిస్థితి మారవచ్చని బ్యాంక్ అంటోంది. ఒకవేళ ట్రెండ్‌లైన్ దాటితే మార్కెట్లో మళ్లీ కోలుకునే అవకాశం ఉంటుంది. 2027 నాటికి బంగారం కొత్త రికార్డులను సృష్టించే ఛాన్స్ కూడా ఉంటుందని నిపుణులు ఆశాభావం వ్యక్తం చేస్తున్నారు.

Jio Platforms IPO: జియో ఐపీఓపై ఎందుకింత క్రేజ్? అసలు కారణాలు ఏంటో తెలుసా?

Mahesh Rajamoni — Wed, 21 Oct 2026 15:07:47 +0530

Jio Platforms IPO: భారతదేశంలోనే అతిపెద్ద రూ.30,213 కోట్ల జియో ఐపీఓ ప్రారంభంలోనే సంచలనం సృష్టిస్తోంది. కేవలం 100 ఉన్న షేర్ల కంటే ఎక్కువ బిడ్లు వచ్చాయి. మార్కెట్ విశ్లేషణల ప్రకారం ఈ ఐపీఓకు ఉన్న విపరీతమైన డిమాండ్‌కు ప్రధాన 5 కారణాలు ఏంటో తెలుసుకుందాం.

దేశంలోనే తిరుగులేని టెలికాం ఆధిపత్యం సాగిస్తోంది జియో. జియో ఐపీఓ పై ఇన్వెస్టర్లు విపరీతమైన ఆసక్తి చూపించడానికి మొదటి కారణం దాని బలమైన కస్టమర్ బేస్. దాదాపు 52.4 కోట్ల మంది చందాదారులతో దేశంలోనే అతిపెద్ద టెలికాం ఆపరేటర్‌గా జియో నిలిచింది.

దేశవ్యాప్తంగా వ్యాపించిన మొబైల్ డేటా ట్రాఫిక్‌లో సుమారు 60% భాగం జియో నెట్‌వర్క్ గుండానే వెళుతోంది. నష్టాల్లో ఉన్న స్టార్టప్‌లలో పెట్టుబడులు పెట్టడానికి భయపడే ఇన్వెస్టర్లకు, ఇప్పటికే మార్కెట్ లీడర్‌గా ఉండి స్థిరమైన క్యాష్ ఫ్లో ఉన్న కంపెనీ లభించడం పెద్ద ప్లస్ పాయింట్ అయింది.

జియో ప్లాట్‌ఫామ్స్ కేవలం కస్టమర్ల సంఖ్యలోనే కాదు, ఆర్థికంగా కూడా చాలా బలంగా ఉంది. రిపోర్టుల ప్రకారం ఆర్థిక సంవత్సరం FY26 నాటికి కంపెనీ రూ.1,46,885 కోట్ల ఆదాయం, రూ.30,049 కోట్ల నికర లాభాన్ని సాధించింది. కంపెనీ ఎబిట్డా మార్జిన్ 51.9% పైన కొనసాగుతోంది. అంటే ప్రతీ 100 రూపాయల ఆదాయంలో సగానికి పైగా నిర్వహణ లాభంగా మిగులుతోంది. ఈ విధమైన లాభదాయకత భారతీయ కార్పొరేట్ రంగంలో చాలా అరుదుగా కనిపిస్తుంది.

ఐపీఓ సాధారణ ప్రజలకు తెరుచుకోవడానికి ముందే యాంకర్ ఇన్వెస్టర్ల విభాగానికి వచ్చిన రెస్పాన్స్ మార్కెట్ మైండ్ సెట్‌ను మార్చేసింది. రూ.8,110 కోట్ల విలువైన యాంకర్ షేర్ల కోసం అంతర్జాతీయ, దేశీయ ఇన్వెస్టర్ల నుంచి రూ.2.5 లక్షల కోట్లకు పైగా డిమాండ్ నమోదైంది. అంటే లభ్యమైన షేర్ల కంటే దాదాపు 30 రెట్ల కంటే ఎక్కువ దరఖాస్తులు వచ్చాయి. గ్లోబల్ సావరిన్ ఫండ్స్, పెన్షన్ ఫండ్స్, మ్యూచువల్ ఫండ్స్ చూపించిన ఈ ఆసక్తి, సాధారణ ఇన్వెస్టర్లకు ఐపీఓ విశ్వసనీయతపై పూర్తి నమ్మకాన్ని ఇచ్చింది.

ఐపీఓ ద్వారా సమీకరించే మొత్తం రూ.30,213 కోట్లలో రూ.27,500 కోట్లను తన టెలికాం అనుబంధ సంస్థ 'రిలయన్స్ జియో ఇన్ఫోకామ్' రుణాలను చెల్లించడానికి ఉపయోగించనున్నారు. గత కొన్ని సంవత్సరాలుగా 4G, 5G నెట్‌వర్క్ మౌలిక సదుపాయాల కోసం చేసిన భారీ వ్యయాల వల్ల పేరుకుపోయిన అప్పులను ఈ డబ్బుతో తీర్చనున్నారు. అప్పు తగ్గడం వల్ల భవిష్యత్తులో వడ్డీ ఖర్చులు తగ్గి, నికర లాభాలు మరింత పెరిగే అవకాశం ఉంటుంది. బ్యాలెన్స్ షీట్ క్లీన్ అవ్వడం అనేది ఇన్వెస్టర్లను ఆకట్టుకునే మరో ప్రధాన అంశం.

జియోను ఇన్వెస్టర్లు కేవలం ఒక ఫోన్/డేటా కంపెనీగా చూడటం లేదు. దీని కింద బ్రాడ్‌బ్యాండ్, క్లౌడ్ సర్వీసెస్, డిజిటల్ యాప్‌లు, ఎంటర్‌ప్రైజ్ టెక్నాలజీ, ఏఐ ప్రాజెక్ట్‌లు ఉన్నాయి. రాబోయే రోజుల్లో ప్రతి యూజర్ నుండి వచ్చే సగటు ఆదాయం పెంచేందుకు, 5G ప్రీమియం ప్లాన్లు, ఇంటింటికీ బ్రాడ్‌బ్యాండ్ సేవలు దోహదపడతాయని విశ్లేషకులు భావిస్తున్నారు. గూగుల్, మెటా వంటి గ్లోబల్ టెక్ దిగ్గజాలు ఇప్పటికే ఇందులో వాటాదారులుగా ఉండటం కంపెనీ భవిష్యత్ డిజిటల్ సామర్థ్యానికి నిదర్శనం.

Gold Silver Rate: తగ్గినట్టే తగ్గి మళ్లీ పెరిగిన పసిడి...రూ.2లక్షలకు పడిపోతున్న వెండి

Nandini Arava — Sat, 24 Oct 2026 12:50:58 +0530

Gold Silver Rate: తగ్గుతూ వస్తున్న బంగారం ధరలు మళ్లీ పెరిగాయి. తులం ధర మరింత దిగొస్తుందని ఎదురుచూస్తున్న కొనుగోలుదారులకు తాజా పెరుగుదల నిరాశ కలిగిస్తోంది. అయితే వెండి ధర మాత్రం తగ్గింది. హైదరాబాద్‌లో 22, 24 క్యారెట్ల పసిడి ధరలు ఎంత ఉన్నాయో తెలుసా?

గత కొన్ని రోజులుగా తగ్గుతూ వచ్చిన బంగారం ధరలు మళ్లీ పెరిగాయి. ధరలు మరింత తగ్గుతాయని ఎదురుచూస్తున్న కొనుగోలుదారులకు ఈ పరిణామం కొంత నిరాశ కలిగిస్తోంది. శనివారం హైదరాబాద్‌లో 22, 24 క్యారెట్ల బంగారం ధరలు స్వల్పంగా పెరిగాయి. మరోవైపు వెండి ధర మాత్రం తగ్గింది. మరి ప్రస్తుతం పసిడి, వెండి ధరలు ఎలా ఉన్నాయో చూద్దాం.

హైదరాబాద్ మార్కెట్‌లో 10 గ్రాముల 24 క్యారెట్ల బంగారం ధర రూ.100 పెరిగి రూ.1,42,580కు చేరింది. అలాగే 10 గ్రాముల 22 క్యారెట్ల బంగారం ధర కూడా రూ.100 పెరిగి రూ.1,30,700గా నమోదైంది. ఇక ఆభరణాల తయారీలో ఉపయోగించే 18 క్యారెట్ల బంగారం ధర 10 గ్రాములకు రూ.80 పెరిగింది. దీంతో ఈ ధర రూ.1,06,940కు చేరింది.

ఇటీవల బంగారం ధరల్లో భారీ హెచ్చుతగ్గులు కనిపిస్తున్న నేపథ్యంలో కొనుగోలుదారులు మార్కెట్ పరిణామాలను నిశితంగా గమనిస్తున్నారు. ధరలు తగ్గినప్పుడు కొనుగోలు చేయాలా? లేక మరికొంతకాలం వేచి చూడాలా? అనే సందిగ్ధంలో ఉన్నారు.

బంగారం ధరలు పెరిగినప్పటికీ వెండి ధర మాత్రం తగ్గింది. హైదరాబాద్ మార్కెట్‌లో కిలో వెండి ధర రూ.2.20 లక్షలకు చేరింది. వెండి కొనాలనుకునేవారికి ఈ తగ్గుదల కొంత ఊరటనిచ్చింది.

అంతర్జాతీయ మార్కెట్‌లో బంగారం ధరల కదలికలు, డాలర్ విలువలో మార్పులు, అమెరికా ఫెడరల్ రిజర్వ్ వడ్డీ రేట్లపై అంచనాలు వంటి అంశాలు పసిడి ధరలపై ప్రభావం చూపుతాయి. అంతేకాకుండా ప్రపంచ ఆర్థిక పరిస్థితులు, భౌగోళిక రాజకీయ ఉద్రిక్తతలు, పెట్టుబడిదారుల కొనుగోళ్లు కూడా ధరల హెచ్చుతగ్గులకు కారణమవుతాయి.

అయితే, బంగారం ధరలు మళ్లీ తగ్గుతాయా లేదా మరింత పెరుగుతాయా అనేది కచ్చితంగా చెప్పలేం. ఆభరణాలు కొనుగోలు చేసేవారు రోజువారీ ధరలను పరిశీలించడంతో పాటు, జీఎస్టీ, తరుగు, మజూరీ వంటి అదనపు ఖర్చులను కూడా పరిగణనలోకి తీసుకోవాలి.

DA Hike: దీపావళి ముందే ఉద్యోగులకు గుడ్ న్యూస్.. జీతంలో భారీ జంప్ ఖాయం!

Mahesh Rajamoni — Wed, 21 Oct 2026 13:11:59 +0530

DA Hike 2026: కేంద్ర ప్రభుత్వ ఉద్యోగులు, పెన్షనర్లకు 3 శాతం డీఏ పెంపుపై కేంద్ర కేబినెట్ భేటీలో త్వరలోనే నిర్ణయం వెలువడే అవకాశం ఉంది. డీఏ 60% నుండి 63%కి పెరిగే ఛాన్స్ ఉంది. దీంతో వేతనాల్లో భారీ జంప్ వుంటుందని రిపోర్టులు పేర్కొంటున్నాయి.

కేంద్ర ప్రభుత్వ ఉద్యోగులు, పెన్షనర్లు జూలై 2026కి సంబంధించిన డీఆర్, డీఏ పెంపు కోసం ఎంతో ఆసక్తిగా ఎదురుచూస్తున్నారు. ప్రస్తుతం ఉన్న 60 శాతం డీఏను 63 శాతానికి పెంచే అవకాశం ఉందనే అంచనాలు వ్యక్తమవుతున్నాయి. బుధవారం జరగనున్న కేంద్ర కేబినెట్ సమావేశంలో దీనిపై స్పష్టత వస్తుందని అందరూ భావిస్తున్నారు. దసరా పండుగ సమయంలో రావలసిన ఈ గుడ్ న్యూస్ కొద్దిగా ఆలస్యం కావడంతో, ఇప్పుడు అందరి చూపు కేబినెట్ భేటీ పైనే ఉంది.

డెయిర్నెస్ అలవెన్స్ అనగా కేంద్ర ప్రభుత్వ ఉద్యోగులు, పెన్షనర్లకు పెరుగుతున్న ద్రవ్యోల్బణం నుంచి రక్షణ కల్పించడానికి ప్రభుత్వం అందించే జీతంలో ఒక భాగం. దీనిని బేసిక్ పే ఆధారంగా శాతాల రూపంలో లెక్కిస్తారు. ప్రస్తుతం ఇది 60 శాతంగా ఉంది. ఉదాహరణకు ఒక ఉద్యోగి బేసిక్ పే రూ.44,900 అయితే, ప్రస్తుత 60% లెక్కన రూ.26,940 వస్తోంది. ఒకవేళ డీఏ 3 శాతం పెరిగి 63 శాతానికి చేరితే, ఆ మొత్తం రూ.28,287కి పెరుగుతుంది. దీనివల్ల నెలకు రూ.1,347 అదనపు ప్రయోజనం లభిస్తుంది.

ప్రభుత్వం 3 శాతం డీఏను పెంచితే వివిధ బేసిక్ పే ఉన్న ఉద్యోగులకు ఎంత లాభం వస్తుందనే దానిపై స్పష్టత ఉంది. రూ.18,000 బేసిక్ పే ఉన్న వారికి నెలకు రూ.540, రూ.25,000 బేసిక్ పే ఉన్న వారికి రూ.750, రూ.35,000 బేసిక్ పే ఉన్న వారికి రూ.1,050, రూ.50,000 బేసిక్ పే ఉన్న వారికి రూ.1,500 వరకు అదనంగా అందే అవకాశం ఉంది. ఈ పెంపు జూలై 1, 2026 నుంచి అమలులోకి వస్తే, అర్హులైన ఉద్యోగులకు ఎరియర్స్‌ కూడా అందే ఛాన్స్ ఉంది.

ఈ డీఏ పెంపునకు ప్రధాన ప్రాతిపదిక ఆల్ ఇండియా కన్స్యూమర్ ప్రైస్ ఇండెక్స్ ఫర్ ఇండస్ట్రియల్ వర్కర్స్ (AICPI-IW) 12 నెలల సగటు డేటా. లేబర్ బ్యూరో విడుదల చేసిన గణాంకాల ప్రకారం ఆగస్టు 2026లో ఈ ఇండెక్స్ 1.2 పాయింట్లు పెరిగి 154.4కి చేరుకుంది. ఈ ద్రవ్యోల్బణ గణాంకాల ఆధారంగానే జూలై 2026కి సంబంధించి డీఏ 3 శాతం లేదా అంతకంటే ఎక్కువగా పెరిగే అవకాశం ఉందని నిపుణులు అంచనా వేస్తున్నారు. అయితే, ఇది కేవలం అంచనా మాత్రమే అధికారిక ప్రకటన వెలువడాల్సి ఉంది.

ఉద్యోగులతో పాటు కేంద్ర ప్రభుత్వ పెన్షనర్లకు కూడా డియర్నెస్ రిలీఫ్ రూపంలో ఇదే వర్తింపు లభిస్తుంది. రిటైర్మెంట్ తర్వాత పెరుగుతున్న జీవన వ్యయాలను ఎదుర్కొనేందుకు ఈ డీఆర్ వారికి ఎంతగానో సహాయపడుతుంది. ప్రభుత్వం 3 శాతం పెంచితే పెన్షనర్ల నెలవారీ పింఛనులో కూడా తగినంత పెరుగుదల కనిపిస్తుంది. అధికారిక ఉత్తర్వులు వచ్చే వరకు ఈ అంచనాలన్నీ కేవలం ప్రతిపాదనగానే ఉంటాయి.

Jio IPO: జియో ఐపీఓ సంచలనం.. భారత్‌లో ఫస్ట్ టైమ్ 10 మిలియన్లకు పైగా దరఖాస్తులతో రికార్డు

Mahesh Rajamoni — Fri, 23 Oct 2026 14:06:31 +0530

Jio IPO: జియో అదరగొట్టింది. జియో ప్లాట్‌ఫారమ్స్ రూ. 30,213 కోట్ల ఐపీఓ దేశ చరిత్రలో ఎన్నడూ లేనివిధంగా 1 కోటికి పైగా అప్లికేషన్లను సాధించి సరికొత్త రికార్డు సృష్టించింది. ఆ పూర్తి వివరాలు ఇక్కడ తెలుసుకుందాం.

భారత స్టాక్ మార్కెట్ చరిత్రలో జియో ప్లాట్‌ఫారమ్స్ ఐపీఓ సరికొత్త రికార్డును క్రియేట్ చేసింది. దేశంలోనే అతిపెద్ద ఐపీఓ అయిన జియో పబ్లిక్ ఇష్యూ మొదటిసారిగా 10 మిలియన్లకు పైగా అప్లికేషన్లను సొంతం చేసుకుంది. అక్టోబర్ 23న నాటికి ఈ చరిత్రాత్మక మైలురాయి నమోదైంది. బిడ్డింగ్‌కు మూడో, ఆఖరి రోజైన శుక్రవారం మధ్యాహ్నం 12 గంటల సమయానికి ఈ ఐపీఓ ఏకంగా 10,015,118 అప్లికేషన్లను అందుకుంది.

గతంలో ఈ రికార్డు వాగీ ఎనర్జీస్ పేరిట ఉండేది. అక్టోబర్ 2024లో వచ్చిన వాగీ ఎనర్జీస్ ఐపీఓకు 9.73 మిలియన్ల దరఖాస్తులు వచ్చాయి. ఇప్పుడు ఆ రికార్డును జియో ఐపీఓ పూర్తిగా వెనక్కి నెట్టింది. జియో పబ్లిక్ ఇష్యూకి మొదటి రోజే సుమారు 3.05 మిలియన్ల దరఖాస్తులు రాగా, రెండో రోజు ముగిసేసరికి ఆ సంఖ్య 7.5 మిలియన్లకు చేరింది. ఇక శుక్రవారం నాటికి దరఖాస్తుల సంఖ్య చరిత్రాత్మక 10 మిలియన్ల మార్క్‌ను దాటేసింది.

రూ. 30,213 కోట్ల విలువైన ఈ ఐపీఓకు అన్ని ప్రధాన ఇన్వెస్టర్ వర్గాల నుంచి బలమైన డిమాండ్ లభించింది. శుక్రవారం మధ్యాహ్నం నాటికి ఈ ఐపీఓ మొత్తం 6.89 రెట్లు సబ్‌స్క్రైబ్ అయింది. ఇందులో క్యూఐబీ పోర్షన్ ఏకంగా 14.38 రెట్లు సబ్‌స్క్రైబ్ కావడం విశేషం. ఎన్‌ఐఐ కోటా 9.38 రెట్లు, రిటైల్ ఇన్వెస్టర్ల కోటా 2.07 రెట్లు భర్తీ అయ్యాయి. అలాగే ఉద్యోగుల కోటా 2.48 రెట్లు, అర్హులైన రిలయన్స్ ఇండస్ట్రీస్ వాటాదారులకు కేటాయించిన పోర్షన్ 5.68 రెట్లు దక్కించుకున్నాయి.

జియో ఐపీఓ అక్టోబర్ 21న ప్రారంభమైంది. తొలి రోజే ఈ ఇష్యూ 3.16 రెట్లు సబ్‌స్క్రైబ్ కాగా, రెండో రోజు ముగిసే సమయానికి 5.57 రెట్లకు చేరుకుంది. అక్టోబర్ 23, శుక్రవారం ఈ ఐపీఓకు ఆఖరి రోజు కావడంతో సాయంత్రం 7 గంటల వరకు బిడ్డింగ్‌కు అవకాశం ఉంది. ఇష్యూ ముగిసేలోగా సబ్‌స్క్రిప్షన్లు, అప్లికేషన్ల సంఖ్య మరింత పెరిగే అవకాశం ఉందని మార్కెట్ నిపుణులు చెబుతున్నారు.

బిడ్డింగ్ ముగియడానికి సమయం మిగిలి ఉండటంతో ఇన్వెస్టర్లు పాలుపంచుకోవడానికి ఇంకా వీలుంది. దేశీయ డిజిటల్ భవిష్యత్తుపై నమ్మకంతో మదుపరులు ఈ మెగా ఐపీఓ వైపు భారీగా తరలివస్తున్నారు. అన్ని ప్రధాన కేటగిరీలు పూర్తిగా సబ్‌స్క్రైబ్ కావడంతో మార్కెట్ వర్గాల్లో జియో ఐపీఓ గురించే హాట్ టాపిక్ నడుస్తోంది.

Gold Price: భారీగా పడిపోయిన బంగారం, వెండి ధరలు.. కొనడానికి ఇదే కరెక్టు టైమా?

Mahesh Rajamoni — Thu, 22 Oct 2026 15:29:22 +0530

Gold And Silver Prices Drop: బంగారం ప్రియులకు అదిరిపోయే గుడ్ న్యూస్. బంగారం, వెండి ధరలు వరుసగా పడిపోతున్నాయి. మరి బంగారం, వెండి కొనడానికి ఇదే బెస్ట్ టైమా? నిపుణులు ఏం చెబుతున్నారు? ధరలు మరింత తగ్గుతాయా? పెరుగుతాయా?

కొంతకాలంగా నిరంతరం పెరుగుతూ సామాన్యులకు చుక్కలు చూపించిన బంగారం ధరలకు ఇప్పుడిప్పుడే ఊహించని బ్రేక్ పడుతోంది. పసిడి ప్రియులకు ఇది నిజంగా పెద్ద ఊరటనిచ్చే విషయమనే చెప్పాలి. హైదరాబాద్ లో ఈరోజు 24 క్యారెట్ల బంగారం ధర రూ.1,700తగ్గింది. దీంతో తులం గోల్డ్ ధర రూ.1,44,380కు చేరింది.

దేశవ్యాప్తంగా కూడా సరిగ్గా ఇదే ట్రెండ్ కనిపిస్తోంది. అంతర్జాతీయ మార్కెట్లలో జరుగుతున్న అనూహ్య మార్పులు, ధరల మార్పుల వంటి కారణాల వల్ల బంగారం ధరలు ఒక్కసారిగా కిందికి దిగివచ్చాయి. ఉత్సవాలు, పెళ్లిళ్ల సీజన్లో బంగారం కొనాలని ఎప్పటినుంచో ప్లాన్ చేసుకుంటున్న వారికి ఇది నిజంగా మంచి గోల్డెన్ ఛాన్స్ అని చెప్పొచ్చు.

అంతర్జాతీయ మార్కెట్లలో నెలకొన్న పరిస్థితులు నేరుగా బంగారం ధరలను ప్రభావితం చేశాయి. ముఖ్యంగా మిడిల్ ఈస్ట్ దేశాల్లో జరుగుతున్న గొడవలు, వాణిజ్య రవాణా సమస్యలు, సౌదీ అరేబియాలోని ఆయిల్ ప్లాంట్లపై వస్తున్న బెదిరింపుల కారణంగా ముడి చమురు ధరలు విపరీతంగా పెరిగాయి. దీనివల్ల భవిష్యత్తులో ద్రవ్యోల్బణం అదుపుతప్పుతుందనే భయం ఇన్వెస్టర్లలో మొదలైంది. మరోవైపు, అమెరికా ఫెడరల్ రిజర్వ్ రాబోయే రోజుల్లో వడ్డీ రేట్ల విషయంలో ఎలాంటి కీలక నిర్ణయం తీసుకుంటుందో అని ప్రపంచ మార్కెట్ అంతా ఉత్కంఠగా చూస్తోంది. ఈ టెన్షన్లన్నీ కలిసి నేరుగా గోల్డ్ మార్కెట్‌ను పడగొట్టాయి.

మల్టీ కమ్యూనికేషన్ ఎక్స్ఛేంజ్ అంటే ఎంసీఎక్స్‌లో గురువారం బంగారం ధరల్లో భారీ పతనం నమోదైంది. 10 గ్రాముల బంగారం ధర సుమారు 0.42 శాతం తగ్గి 1,45,898 రూపాయల వద్ద ట్రేడైంది. కేవలం బంగారం మాత్రమే కాకుండా వెండి ధర కూడా దారుణంగా పడిపోయింది. కిలో వెండి ధర 1.16 శాతం తగ్గి ఏకంగా 2,09,028 రూపాయలకు పడిపోయింది. వరుసగా రేట్లు భగ్గుమంటున్నాయని గోల్డ్ షాపింగ్‌ను వాయిదా వేసుకున్న మధ్యతరగతి ప్రజలకు ఈ ధరల తగ్గుదల కాస్త ఊరటనిస్తోంది.

హైదరాబాద్ బులియన్ మార్కెట్‌లోనూ 10 గ్రాముల 24 క్యారెట్ల బంగారం ధర రూ.1,700 తగ్గి రూ.1,44,380కు చేరితే, కిలో వెండి ధర మరో రూ.5,000 తగ్గి రూ.2.25 లక్షలకు చేరుకుంది.

ఇప్పుడు చాలామందిలో ఉన్న పెద్ద డౌట్.. "రేట్లు బాగా తగ్గాయి కదా, ఇప్పుడే బంగారం కొనేయడం మంచిదా?" అనేదే. ద్రవ్యోల్బణ భయాలు, అంతర్జాతీయ మార్కెట్ పరిస్థితుల దృష్ట్యా బంగారం ధరలు రానున్న రోజుల్లో కూడా చిన్నపాటి హెచ్చుతగ్గులకు లోనయ్యే అవకాశం ఉందని మార్కెట్ నిపుణులు అంచనా వేస్తున్నారు.

అయితే, దీపావళి, పెళ్లిళ్లు, ధన్‌తేరాస్ వంటి పండుగలు, వేడుకల కోసం బంగారం కొనాలని చూస్తున్న వారికి ప్రస్తుత ఈ ధరల తగ్గుదల ఒక చక్కటి అవకాశం కిందే లెక్క. రేట్లు తగ్గాయని ఒకేసారీ మొత్తం డబ్బులు పెట్టి షాపింగ్ చేసేయడం కంటే, కొంత తెలివిగా అడుగు వేయడం చాలా మంచిదని ఆర్థిక నిపుణులు చెబుతున్నారు.

బంగారం కొనేటప్పుడు ఆర్థిక నిపుణులు కొన్ని విలువైన సలహాలు ఇస్తున్నారు. ఒకేసారీ పెద్ద మొత్తంలో డబ్బులు వెచ్చించి గోల్డ్ కొనడానికి బదులు, విడతలవారీగా అంటే దశలవారీగా కొనుగోలు చేయడం చాలా సేఫ్. ఒకవేళ మార్కెట్లో ధరలు మళ్లీ పెరిగినా లేదా తగ్గినా ఈ పద్ధతి వల్ల రిస్క్ చాలావరకు తగ్గుతుంది.

అంతేకాదు, మీరు నగల షాపులకు వెళ్లినప్పుడు గుర్తుంచుకోవాల్సిన మరో ముఖ్యమైన విషయం ఉంది. ఎంసీఎక్స్ మార్కెట్ రేట్లకు, మనం రిటైల్ జ్యువెల్లరీ షాపుల్లో చూసే రేట్లకు వ్యత్యాసం ఉంటుంది. మీరు కొనే నగలపై అదనంగా మేకింగ్ ఛార్జీలు, 3 శాతం జీఎస్టీ వర్తిస్తాయి. కాబట్టి వీటిని కూడా ముందే బేరీజు వేసుకుని షాపింగ్ ప్లాన్ చేసుకోవడం చాలా ఉత్తమం.

Second Hand Mobile: సెకండ్‌ హ్యాండ్ ఫోన్లకు పెరుగుతున్న డిమాండ్‌.. ఈ బిజినెస్‌లో లాభాలు ఎలా ఉంటాయి?

Kavitha G — Sat, 24 Oct 2026 10:26:46 +0530

Second Hand Mobile: కొత్త ఫోన్ కొనడం కంటే మంచి కండిషన్‌లో ఉన్న పాత ఫోన్ కొనడానికే చాలామంది మొగ్గు చూపుతున్నారు. కొత్త ఫోన్ల ధరలు పెరుగుతుండటం వంటివి సెకండ్ ‌హ్యాండ్ మొబైల్ మార్కెట్‌కు ఊతమిస్తున్నాయి. మరి ఈ బిజినెస్ లో లాభాలు ఎలా ఉంటాయో చూద్దాం.

కొత్త స్మార్ట్‌ఫోన్‌ కొనాలంటే వేల రూపాయలు ఖర్చు చేయాల్సిందే. అందుకే చాలామంది తక్కువ ధరలో మంచి ఫీచర్లు ఉన్న పాత మొబైళ్ల వైపు మొగ్గు చూపుతున్నారు. దీంతో సెకండ్‌హ్యాండ్‌ ఫోన్‌లకు ఆదరణ పెరుగుతుండగా, వాటి కొనుగోళ్లు, అమ్మకాల చుట్టూ కొత్త వ్యాపార అవకాశాలు ఏర్పడుతున్నాయి. తక్కువ పెట్టుబడితో ప్రారంభించగల ఈ బిజినెస్‌లో నిజంగా ఎంత లాభం ఉంటుంది? ఏ ఫోన్లకు ఎక్కువ డిమాండ్‌ ఉంది? ఈ వ్యాపారంలోకి అడుగుపెట్టాలనుకునేవారు ఎలాంటి జాగ్రత్తలు తీసుకోవాలి? వంటి విషయాలు ఇక్కడ తెలుసుకుందాం.

సెకండ్‌హ్యాండ్‌ మొబైళ్లకు డిమాండ్‌ పెరగడానికి ప్రధాన కారణం ధర. కొత్త ఫోన్‌ కొనుగోలు చేయడానికి రూ.20 వేల నుంచి రూ.40 వేల వరకు ఖర్చు చేయాల్సి వస్తే, అదే స్థాయి ఫీచర్లు ఉన్న పాత మోడల్‌ను తక్కువ ధరకు పొందే అవకాశం ఉంటుంది. ముఖ్యంగా విద్యార్థులు, ఉద్యోగులు, తక్కువ బడ్జెట్‌లో ఫోన్‌ కొనాలనుకునేవారు, అదనంగా మరో ఫోన్‌ అవసరమైన వారు ఈ మార్కెట్‌పై ఆసక్తి చూపుతున్నారు.

మరోవైపు, కొత్త ఫోన్‌ కొనుగోలు చేసేవారు తమ పాత ఫోన్లను విక్రయించడం లేదా ఎక్స్ఛేంజ్‌ చేయడం వల్ల సెకండ్‌హ్యాండ్‌ మార్కెట్‌కు ఫోన్ల సరఫరా కూడా పెరుగుతోంది. ఓ నివేదిక ప్రకారం ఈ ఏడాది తొలి ఆరు నెలల్లో భారత్‌లో రీఫర్బిష్డ్‌ స్మార్ట్‌ఫోన్ల అమ్మకాల పరిమాణం గత ఏడాది ఇదే కాలంతో పోలిస్తే 13 శాతం పెరిగింది. కొత్త ఫోన్ల ధరలు పెరగడం, తక్కువ ధరలో ప్రీమియం ఫోన్లు పొందాలనే ఆసక్తి ఈ వృద్ధికి కారణాలుగా నివేదిక పేర్కొంది.

సెకండ్‌హ్యాండ్‌ మార్కెట్‌లో అన్ని ఫోన్లకు ఒకే స్థాయిలో డిమాండ్‌ ఉండదు. మంచి కెమెరా, పనితీరు, ఆకర్షణీయమైన డిజైన్‌, సాఫ్ట్‌వేర్‌ అప్‌డేట్లు ఇతర అంశాల ఆధారంగా ఫోన్లకు కొనుగోలుదారులు ప్రాధాన్యం ఇస్తున్నారు. ముఖ్యంగా యాపిల్‌ ఐఫోన్లలోని పాత మోడళ్లకు, శాంసంగ్‌ ప్రీమియం సిరీస్‌ ఫోన్లకు మార్కెట్‌లో మంచి డిమాండ్ ఉంది. ఈ వ్యాపారం ప్రారంభించాలనుకునేవారు తమ ప్రాంతంలో ఏ బ్రాండ్లు, ఏ ధరల ఫోన్లు ఎక్కువగా అమ్ముడవుతున్నాయో ముందుగా తెలుసుకోవాలి. తక్కువ ధరలో లభించే బడ్జెట్‌ ఫోన్లతో పాటు మంచి కండిషన్‌లో ఉన్న ప్రీమియం మోడళ్లను కూడా పరిశీలించవచ్చు.

ఈ వ్యాపారాన్ని ప్రారంభించడానికి పెద్ద షోరూమ్‌ అవసరం లేదు. మొదట కొంచెం పెట్టుబడితో ఇంటి నుంచే లేదా చిన్న షాప్ ద్వారా ప్రారంభించవచ్చు. పాత ఫోన్లను విక్రయించాలనుకునే వ్యక్తుల నుంచి నేరుగా కొనుగోలు చేయడం, ఎక్స్ఛేంజ్‌ ద్వారా వచ్చే ఫోన్లను సేకరించడం, నమ్మకమైన సరఫరాదారులతో సంబంధాలు ఏర్పరచుకోవడం ద్వారా స్టాక్‌ను సమకూర్చుకోవచ్చు. అయితే కొనుగోలు చేసిన ప్రతి ఫోన్‌ను విక్రయించే ముందు పూర్తిగా పరీక్షించడం ముఖ్యం.

బ్యాటరీ పనితీరు, డిస్‌ప్లే, టచ్‌, కెమెరా, స్పీకర్లు, మైక్రోఫోన్‌, ఛార్జింగ్‌ పోర్ట్‌, నెట్‌వర్క్‌, వై-ఫై, ఫింగర్‌ప్రింట్‌ లేదా ఫేస్‌ అన్‌లాక్‌ వంటి ఫీచర్లను పరిశీలించాలి. ఫోన్‌కు సంబంధించిన ఐఎంఈఐ నంబర్‌ను తనిఖీ చేయాలి. ఫోన్‌లోని పాత డేటాను పూర్తిగా తొలగించి విక్రయించాలి.

సెకండ్‌హ్యాండ్‌ ఫోన్‌ బిజినెస్‌లో లాభం ప్రధానంగా తక్కువ ధరకు ఫోన్‌ను కొనుగోలు చేయడం, దాని కండిషన్‌ను మెరుగుపరచడం, సరైన ధరకు విక్రయించడంపై ఆధారపడి ఉంటుంది. ఒక ఫోన్‌ను రూ.8,000కు కొనుగోలు చేస్తే, దానికి చిన్నపాటి రిపేర్లు, క్లీనింగ్,ఇతర ఖర్చలు కలిపి రూ.1000 అయితే దాని మొత్తం ఖర్చు రూ.9,000 అవుతుంది. ఆ ఫోన్‌ను రూ.10,000కు విక్రయిస్తే రూ.1000 మిగులుతుంది. అయితే లాభం అనేది ఫోన్‌ మోడల్‌, మార్కెట్‌ ధర, బ్యాటరీ పరిస్థితి, రిపేర్ ఖర్చు, అమ్మకానికి పట్టే టైం వంటి అంశాలపై ఆధారపడి ఉంటుంది.

అలాగే నార్మల్ షాపులతో పాటు ఆన్‌లైన్‌ ప్లాట్‌ఫామ్‌లు, సోషల్‌ మీడియా మార్కెట్‌ప్లేస్‌లు, స్థానిక కొనుగోలు–అమ్మకాల గ్రూపుల ద్వారా కూడా పాత ఫోన్లను విక్రయించవచ్చు. ఫోన్‌ అసలు ఫొటోలు, స్పష్టమైన వివరాలు, బ్యాటరీ పరిస్థితి, వారంటీ వంటి అంశాలను నిజాయతీగా వెల్లడిస్తే కొనుగోలుదారుల్లో నమ్మకం పెరుగుతుంది.

ఈ వ్యాపారంలో లాభాల అవకాశాలు ఉన్నప్పటికీ, రిస్కులు కూడా తక్కువేమీ కావు. పాత మొబైల్‌ బయటకు చూడటానికి బాగున్నప్పటికీ లోపల సాంకేతిక సమస్యలు ఉండే అవకాశం ఉంది. అందువల్ల కొనుగోలు చేసే ముందు డిస్‌ప్లే, టచ్‌స్క్రీన్‌, కెమెరా, స్పీకర్లు, మైక్రోఫోన్‌, ఛార్జింగ్‌ పోర్ట్‌, బ్యాటరీ, నెట్‌వర్క్‌ వంటి అంశాలను పరీక్షించాలి. కొత్త ఫోన్ల ధరలు తగ్గడం, పాత మోడళ్లకు సాఫ్ట్‌వేర్‌ అప్‌డేట్లు నిలిచిపోవడం, మార్కెట్‌లో పోటీ పెరగడం వంటి అంశాలు కూడా వ్యాపారాన్ని ప్రభావితం చేస్తాయి. కాబట్టి వేగంగా అమ్ముడయ్యే మోడళ్లను గుర్తించడం, కొనుగోలు ధరను జాగ్రత్తగా నిర్ణయించడం, ప్రతి లావాదేవీకి సంబంధించిన ఖర్చులను నమోదు చేసుకోవడం మంచిది.

Ticket Booking: ట్రైన్ టికెట్ ఎలా తీస్తే త్వరగా కన్ఫర్మ్ అవుతుంది?

Nandini Arava — Sun, 25 Oct 2026 12:21:04 +0530

Ticket Booking: రైలు టికెట్ ఆన్‌లైన్‌లో బుక్ చేయాలా లేక కౌంటర్‌లో తీసుకోవాలా? ఏది త్వరగా కన్ఫర్మ్ అవుతుందనే డౌట్ అందరికీ వస్తుంది. ఆన్‌లైన్, కౌంటర్ బుకింగ్స్‌కు సంబంధించిన ముఖ్యమైన రైల్వే రూల్స్ ఇప్పుడు తెలుసుకుందాం.

రైల్వే ప్రయాణికులు వెబ్‌సైట్, యాప్ లేదా స్టేషన్ కౌంటర్‌లో టికెట్లు బుక్ చేసుకోవచ్చు. ప్రయాణ తేదీ నాటికి సీట్లు నిండిపోతే, రెండు విధానాల్లోనూ వెయిటింగ్ లిస్ట్ టికెట్ వస్తుంది. ఆన్‌లైన్ కంటే కౌంటర్ టికెట్‌కే ముందుగా కన్ఫర్మ్ చేస్తారనే రూల్ ఏమీ లేదు. టికెట్ కన్ఫర్మ్ అవ్వడం అనేది ఆ రైలు సీట్ల కోటా, వెయిటింగ్ లిస్ట్ నంబర్, ప్రయాణించే క్లాస్, ఇతర ప్రయాణికులు తమ టికెట్లను క్యాన్సిల్ చేసుకోవడంపై ఆధారపడి ఉంటుంది. కాబట్టి కౌంటర్‌లో తీసుకుంటే కన్ఫర్మ్ అయిపోతుందని గుడ్డిగా నమ్మకండి. పండుగ సీజన్లలో రద్దీ ఎక్కువగా ఉంటుంది కాబట్టి ముందుగానే బుక్ చేసుకోవడం మంచిది. రైలు, ప్రయాణ తేదీ, గమ్యస్థానాలను ప్లాన్ చేసుకుని ఎప్పటికప్పుడు టికెట్ స్టేటస్ చెక్ చేసుకోండి. పూర్తి వివరాలకు భారతీయ రైల్వే అధికారిక వెబ్‌సైట్ చూడండి.

రైలులో కన్ఫర్మ్, ఆర్‌ఏసీ సీట్లు నిండిపోయాక ప్రయాణికులకు వెయిటింగ్ లిస్ట్ టికెట్లు ఇస్తారు. కన్ఫర్మ్ టికెట్ ఉన్నవారు తమ ప్రయాణాన్ని రద్దు చేసుకుంటే, ఆ సీట్లను రైల్వే రూల్స్ ప్రకారం తర్వాతి ప్రయాణికులకు కేటాయిస్తారు. అప్పుడు వెయిటింగ్ లిస్ట్‌లో ఉన్నవారికి సీటు దక్కుతుంది. అయితే ఎంతమంది టికెట్లు క్యాన్సిల్ చేశారు, ఏ కోటాలో సీట్లు ఖాళీ అయ్యాయి అనేదానిపై ఇది ఆధారపడి ఉంటుంది. జనరల్ (GNWL), రిమోట్ లొకేషన్ (RLWL), పూల్డ్ కోటా (PQWL) లాంటి రకాలు ఇందులో ఉంటాయి. వెయిటింగ్ లిస్ట్ నంబర్ తక్కువగా ఉంటే కన్ఫర్మ్ అయ్యే ఛాన్స్ ఎక్కువ. కానీ ఇది పక్కా గ్యారెంటీ కాదు. రైలు, రూట్, కోటాను బట్టి పరిస్థితులు మారుతాయి. కాబట్టి టికెట్ బుక్ చేశాక స్టేటస్ చెక్ చేస్తూ ఉండాలి.

ఐఆర్‌సీటీసీ వెబ్‌సైట్ లేదా యాప్ ద్వారా బుక్ చేసిన ఆన్‌లైన్ టికెట్, చార్ట్ ప్రిపేర్ అయ్యాక కూడా వెయిటింగ్ లిస్ట్‌లోనే ఉంటే ఆటోమేటిక్‌గా క్యాన్సిల్ అవుతుంది. ఫైనల్ చార్ట్‌లో ఆ ప్రయాణికుల పేర్లు ఉండవు. ఆ టికెట్ పట్టుకుని రిజర్వేషన్ బోగీలో ఎక్కడానికి వీల్లేదు. రైల్వే రూల్స్ ప్రకారం మీ డబ్బులు ఆటోమేటిక్‌గా మీ అకౌంట్‌కు తిరిగి వస్తాయి. అయితే ఒకే బుకింగ్‌లో కొందరికి కన్ఫర్మ్ అయి, మరికొందరికి వెయిటింగ్ లిస్ట్ ఉంటే రూల్స్ వేరుగా ఉంటాయి. కాబట్టి ప్రతి ప్రయాణికుడి స్టేటస్ విడివిడిగా చెక్ చేసుకోవాలి. చార్ట్ వచ్చాక కూడా ఆన్‌లైన్ టికెట్ పూర్తిగా వెయిటింగ్ లిస్ట్‌లో ఉంటే, ఆ టికెట్‌తో ప్రయాణించడం నేరం. దాన్ని వితౌట్ టికెట్‌గా పరిగణిస్తారు.

స్టేషన్ కౌంటర్‌లో తీసుకునే పేపర్ టికెట్‌కు, ఆన్‌లైన్ ఈ-టికెట్‌కు చాలా తేడా ఉంది. కౌంటర్‌లో తీసుకున్న వెయిటింగ్ లిస్ట్ టికెట్ కన్ఫర్మ్ కాకపోతే రిజర్వేషన్ బోగీలో సీటు అడిగే హక్కు మీకు ఉండదు. కానీ, ఆ కౌంటర్ టికెట్‌తో రైల్వే నిబంధనల ప్రకారం అన్‌రిజర్వ్‌డ్ (జనరల్) బోగీలో ప్రయాణించవచ్చు. అదే ఆన్‌లైన్ వెయిటింగ్ లిస్ట్ టికెట్ అయితే చార్ట్ ప్రిపేర్ అయ్యాక ఆటోమేటిక్‌గా క్యాన్సిల్ అవుతుంది కాబట్టి ప్రయాణించడానికి వీల్లేదు. ఆన్‌లైన్, కౌంటర్ టికెట్ల మధ్య ఉన్న ప్రధానమైన తేడా ఇదే. అలాగని కౌంటర్ టికెట్ త్వరగా కన్ఫర్మ్ అవుతుందని అనుకోవద్దు. టికెట్ కన్ఫర్మ్ అయ్యే ప్రాసెస్ వేరు, కన్ఫర్మ్ కాని టికెట్‌తో ప్రయాణించే రూల్స్ వేరు.

రైలు ప్రయాణం ప్లాన్ చేసుకున్నప్పుడు ముందుగానే టికెట్లు బుక్ చేసుకోవడం చాలా ముఖ్యం. పండుగ సమయాల్లో రద్దీ ఎక్కువగా ఉంటుంది కాబట్టి చివరి నిమిషం వరకు వేచి చూడకండి. మీరు అనుకున్న రైలులో సీట్లు లేకపోతే, ఆ రూట్‌లో వెళ్లే ఇతర రైళ్లు లేదా దగ్గర్లోని వేరే స్టేషన్ల నుంచి ప్రయాణించే ఆప్షన్లు వెతకండి. వెయిటింగ్ లిస్ట్ టికెట్ తీసుకుంటే దాని స్టేటస్ ఎప్పటికప్పుడు గమనిస్తూ ఉండండి. కన్ఫర్మ్ అయ్యే ఛాన్స్‌ను అంచనా వేసే యాప్స్ కేవలం అంచనాలు మాత్రమే చెబుతాయి, వాటిని పూర్తిగా నమ్మొద్దు. చార్ట్ ప్రిపేర్ అయ్యాక ఫైనల్ స్టేటస్ చూసుకుని ప్రయాణానికి సిద్ధం అవ్వండి. ఆన్‌లైన్ వెయిటింగ్ లిస్ట్ టికెట్‌తో ప్రయాణించలేమని గుర్తుంచుకోండి. ఆన్‌లైన్ లేదా కౌంటర్ అనేదాని కంటే, సీట్లు ఖాళీ అవ్వడం పైనే మీ టికెట్ కన్ఫర్మేషన్ ఆధారపడి ఉంటుంది.

Jio IPO: 100 నిమిషాల్లో ఖాళీ అయిన జియో ఐపీఓ.. అసలు ఎవరు కొంటున్నారో తెలుసా? షాకింగ్ నిజాలు

Mahesh Rajamoni — Wed, 21 Oct 2026 14:35:45 +0530

Jio IPO: రిలయన్స్ జియో ఐపీఓ కేవలం 100 నిమిషాల్లో పూర్తిగా సబ్‌స్క్రైబ్ అయింది. సంస్థాగత ఇన్వెస్టర్లు పోటీ పడగా, రిటైల్ ఇన్వెస్టర్లు జాగ్రత్తగా అడుగులు వేస్తున్నారు. జియో ఐపీఓ వెనుక ఉన్న అసలు సీక్రెట్ ఏంటో ఇక్కడ తెలుసుకుందాం.

భారతదేశ కార్పొరేట్ చరిత్రలోనే అతిపెద్ద ఐపీఓగా నిలిచిన జియో ప్లాట్‌ఫామ్స్ ఐపీఓ అక్టోబర్ 21న ప్రారంభమైంది. షేరు ధర పరిధిని రూ.1,065 నుండి రూ.1,119గా నిర్ణయించారు. కనీసం 12 షేర్లకు దరఖాస్తు చేసుకోవాల్సి ఉంటుంది. అంటే ఒక రిటైల్ ఇన్వెస్టర్ కనీసం రూ.13,428 పెట్టుబడి పెట్టాలి. అక్టోబర్ 21 ఉదయం ఐపీఓ ప్రారంభమైన కేవలం 100 నిమిషాల్లోనే, అంటే ఉదయం 11:40 గంటల సమయానికి అందుబాటులో ఉన్న షేర్ల కంటే ఎక్కువ బిడ్లు వచ్చాయి.

మొదటి రోజు ముగిసే సమయానికి ప్రజల కోసం అందుబాటులో ఉంచిన 19.75 కోట్ల షేర్లకు గాను ఇన్వెస్టర్లు దాదాపు 25 కోట్ల షేర్లకు బిడ్లు వేశారు. నేషనల్ స్టాక్ ఎక్స్ఛేంజ్ (NSE)లో మొత్తం 13.56 లక్షల దరఖాస్తులు నమోదయ్యాయి. దీంతో ఐపీఓ మొదటి రోజే 1.27 రెట్లు సబ్‌స్క్రైబ్ అయింది. సాధారణంగా పెద్ద ఐపీఓలు మొదటి రోజు నెమ్మదిగా మొదలవుతాయి. ఉదాహరణకు ఎన్ఎస్ఈ ఐపీఓ మొదటి రోజు 42% మాత్రమే నిండగా, హ్యుందాయ్ మోటార్ ఇండియా ఐపీఓ మొదటి రోజు కేవలం 18% బిడ్లు మాత్రమే సాధించింది. కానీ జియో మాత్రం మొదటి రోజే హౌస్‌ఫుల్ అయిపోయింది.

గరిష్ఠ ధర రూ.1,119 వద్ద చూస్తే ఇది భారత్‌లోనే అతిపెద్ద ఐపీఓ. జియో ప్లాట్‌ఫామ్స్ మొత్తం 27 కోట్ల కొత్త షేర్లను విక్రయిస్తోంది. దీని ద్వారా కంపెనీ రూ.30,213 కోట్లు సమీకరించనుంది. ఇది 2024లో వచ్చిన హ్యుందాయ్ మోటార్స్ (రూ.27,859 కోట్లు), 2022లో వచ్చిన ఎల్‌ఐసీ (రూ.20,557 కోట్లు) ఐపీఓల రికార్డులను తిరగరాసింది. ఇందులో మరో ముఖ్యమైన విషయం ఏమిటంటే, హ్యుందాయ్, ఎల్‌ఐసీ ఐపీఓలలో ఆఫర్ ఫర్ సేల్ (OFS) ద్వారా పాత వాటాదారులు తమ షేర్లను అమ్మేశారు.

కానీ జియో ఐపీఓలో అన్నీ కొత్తగా జారీ చేసిన షేర్లే ఉన్నాయి. ఓఎఫ్ఎస్ భాగం ఏమీ లేదు. అంటే ఈ ఐపీఓ ద్వారా వచ్చే డబ్బు రిలయన్స్ ఇండస్ట్రీస్, మెటా లేదా గూగుల్ వంటి పాత వాటాదారుల ఖాతాల్లోకి వెళ్లదు. నేరుగా జియో ప్లాట్‌ఫామ్స్ కంపెనీ ఖాతాల్లోకే వెళ్తుంది. కంపెనీ తన మూలధనాన్ని పెంచుకోవడానికి ఈ డబ్బును ఉపయోగించనుంది.

జియో ఐపీఓ 100 నిమిషాల్లో నిండిపోయినప్పటికీ, ఇందులో అందరి భాగస్వామ్యం ఒకేలా లేదు. ఈ ఐపీఓను ముందుకు నడిపింది ప్రధానంగా క్వాలిఫైడ్ ఇన్స్టిట్యూషనల్ బైయర్స్ (QIB). సంస్థాగత ఇన్వెస్టర్లకు కేటాయించిన 4.90 కోట్ల షేర్లకు గాను వారు 18.91 కోట్ల షేర్లకు బిడ్లు వేశారు. అంటే వీరి కేటగిరీ 3.86 రెట్లు సబ్‌స్క్రైబ్ అయింది.

మరోవైపు నాన్-ఇన్స్టిట్యూషనల్ ఇన్వెస్టర్లు (HNI) తమ కేటాయింపులో 41% మాత్రమే దరఖాస్తు చేశారు. ఇందులో రూ.10 లక్షల కంటే ఎక్కువ పెట్టుబడి పెట్టే విభాగం 34%, రూ.10 లక్షల కంటే తక్కువ విభాగం 54% నిండింది. ఇక రిటైల్ ఇన్వెస్టర్ల విభాగానికి వచ్చేసరికి కేటాయించిన షేర్లలో కేవలం 22% మాత్రమే బిడ్లు వచ్చాయని రాయిటర్స్ పేర్కొంది. అంటే సంస్థాగత ఇన్వెస్టర్లు భారీగా పోటీ పడటం వల్లే ఐపీఓ మొదటి రోజే నిండిపోయింది తప్ప, రిటైల్ ఇన్వెస్టర్లు ఇంకా వేచి చూసే ధోరణిలోనే ఉన్నారు.

జియో ప్లాట్‌ఫామ్స్ వద్ద భారీ స్కేల్, లాభాలు, మార్కెట్ లీడర్‌షిప్ ఉన్నాయి. జియో టెలికాం బిజినెస్‌లో 50 కోట్ల కంటే ఎక్కువ మంది కస్టమర్లు ఉన్నారు. దేశంలోని మొబైల్ డేటా ట్రాఫిక్‌లో 60% జియో నెట్‌వర్క్ నుంచే వెళ్తోంది. కస్టమర్ల పరంగా ఇది దేశంలోనే అతిపెద్ద టెలికాం ఆపరేటర్. దీంతో పాటు బ్రాడ్‌బ్యాండ్, క్లౌడ్, డిజిటల్ యాప్స్, ఆర్టిఫిషియల్ ఇంటెలిజెన్స్ (AI) రంగాలు కూడా ఉన్నాయి.

మార్చి 2026తో ముగిసిన ఆర్థిక సంవత్సరానికి జియో ప్లాట్‌ఫామ్స్ $15.5 బిలియన్ల ఆదాయం, $3.2 బిలియన్ల లాభాన్ని సాధించింది. అయితే ఈ ఆదాయం, లాభాలలో 90% కంటే ఎక్కువ భాగం టెలికాం రంగం నుంచే వచ్చింది. ఇన్వెస్టర్లు నష్టాల్లో ఉన్న టెక్నాలజీ కంపెనీలో కాకుండా, మంచి లాభాలు ఇస్తున్న టెలికాం లీడర్ కంపెనీలో పెట్టుబడి పెడుతున్నారు. భారత మార్కెట్లో జియో లాంటి భారీ కస్టమర్ బేస్, డిజిటల్ వ్యవస్థ ఉన్న మరో కంపెనీ లేదు.

ధర పరిధిలో గరిష్ఠ ధర రూ.1,119 వద్ద జియో ప్లాట్‌ఫామ్స్ వాల్యుయేషన్ దాదాపు రూ.10.3 లక్షల కోట్లు ($108.3 బిలియన్లు)గా ఉంది. షేర్లు లిస్ట్ అయిన తర్వాత రిలయన్స్ ఇండస్ట్రీస్, భారతీ ఎయిర్‌టెల్, హెచ్‌డీఎఫ్‌సీ బ్యాంక్ తర్వాత భారత్‌లోనే నాల్గో అతిపెద్ద లిస్టెడ్ కంపెనీగా జియో అవతరించే అవకాశం ఉంది. 2020లో మెటా, గూగుల్ నుంచి నిధులు సేకరించినప్పుడు ఉన్న $57-$65 బిలియన్ల వాల్యుయేషన్ కంటే ఇది చాలా ఎక్కువ.

ఐపీఓ ద్వారా సమీకరించే రూ.30,213 కోట్లలో రూ.27,500 కోట్లను తన అనుబంధ సంస్థ అయిన రిలయన్స్ జియో ఇన్ఫోకామ్ అప్పులను తీర్చడానికి ఉపయోగించనుంది. దీనివల్ల వడ్డీ భారం తగ్గి కంపెనీ బ్యాలెన్స్ షీట్ బలపడుతుంది. అయితే, భవిష్యత్తులో లాభాలను పెంచుకోవడానికి టారిఫ్ రేట్లు పెంచడం, 5జీ, బ్రాడ్‌బ్యాండ్ సేవలను మరింత విస్తరించడం కంపెనీకి కీలకంగా మారనుంది. అక్టోబర్ 28న స్టాక్ మార్కెట్లో లిస్ట్ అయిన తర్వాత జియో అసలు పనితీరు బయటపడుతుంది.

LIC: ఎల్ఐసీ అదిరిపోయే స్కీమ్.. 5 ఏళ్లు కడితే చాలు జీవితాంతం అకౌంట్‌లోకి డబ్బులు

Mahesh Rajamoni — Sun, 25 Oct 2026 08:28:06 +0530

LIC Jeevan Utsav Policy: ఎల్ఐసీ జీవన్ ఉత్సవ్ పాలసీ ద్వారా కేవలం 5 ఏళ్లు ప్రీమియం చెల్లించి జీవితాంతం వార్షిక ఆదాయం పొందవచ్చు. లైఫ్ ఇన్సూరెన్స్ కార్పొరేషన్ ఆఫ్ ఇండియా అందిస్తున్న ఈ సూపర్ పాలసీ పూర్తి వివరాలు ఇక్కడ తెలుసుకుందాం.

రిటైర్మెంట్ తర్వాత ఖర్చుల గురించి టెన్షన్ పడుతున్నారా? అయితే మీకోసమే లైఫ్ ఇన్సూరెన్స్ కార్పొరేషన్ ఆఫ్ ఇండియా (ఎల్ఐసీ) ఒక అద్భుతమైన పథకాన్ని తీసుకువచ్చింది. అదే ఎల్ఐసీ జీవన్ ఉత్సవ్ పాలసీ. ఈ స్కీమ్ ద్వారా మీరు కేవలం 5 సంవత్సరాలు మాత్రమే ప్రీమియం చెల్లించి, జీవితాంతం ఆదాయం పొందవచ్చు.

ఈ ప్లాన్ ప్రత్యేకత ఏమిటంటే, ఇది ఒక నాన్-లింక్డ్, నాన్-పార్టిసిపేటింగ్ ఇండివిజువల్ లైఫ్ ఇన్సూరెన్స్ ప్లాన్. అంటే, దీని లాభాలు స్టాక్ మార్కెట్ రిటర్న్స్‌పై ఆధారపడి ఉండవు. కాబట్టి మీ పెట్టుబడికి పూర్తి భద్రత ఉంటుంది. అంతేకాకుండా, ఈ పథకం కింద పాలసీదారులకు రిస్క్ కవర్ ప్రయోజనం కూడా లభిస్తుంది.

ఈ స్కీమ్ కింద కింద పాలసీదారులు తమ సౌలభ్యం ప్రకారం 5 సంవత్సరాల నుంచి 16 సంవత్సరాల వరకు ప్రీమియం చెల్లించే విభిన్న ఆప్షన్లను ఎంచుకోవచ్చు. ఈ ప్లాన్ కింద కనీస ప్రాథమిక హామీ మొత్తం 5 లక్షల రూపాయలుగా నిర్ణయించారు.

ఉదాహరణకు, 30 ఏళ్ల వయస్సు గల ఒక వ్యక్తి 5 లక్షల రూపాయల బేసిక్ సమ్ అష్యూర్డ్ కోరుకుంటే, 5 సంవత్సరాల ప్రీమియం ఆప్షన్‌ను ఎంచుకుంటే, ఆయన వార్షిక ప్రీమియం 1,10,150 రూపాయలు అవుతుంది. ఒకవేళ 8 సంవత్సరాల ఆప్షన్ ఎంచుకుంటే 72,600 రూపాయలు, 12 సంవత్సరాల ఆప్షన్‌కు 44,275 రూపాయలు, 16 సంవత్సరాల ఆప్షన్‌కు వార్షిక ప్రీమియం 30,025 రూపాయలు చెల్లించాల్సి ఉంటుంది.

ఈ పాలసీలోని రెగ్యులర్ ఇన్కమ్ బెనిఫిట్ ఆప్షన్ కింద, పాలసీదారులకు వార్షిక ఆదాయం ప్రాథమిక హామీ మొత్తంలో 10 శాతంగా లభిస్తుంది. 5 లక్షల రూపాయల బేసిక్ సమ్ అష్యూర్డ్ పైన ఇది సంవత్సరానికి 50 వేల రూపాయలు అవుతుంది.

ప్రీమియం చెల్లించే కాలం 5 సంవత్సరాలుగా ఉంటే, ఈ ఆదాయం పాలసీ 11వ సంవత్సరం నుంచే ప్రారంభమవుతుంది. ప్రత్యేకత ఏమిటంటే, ఈ ఆదాయం పాలసీదారుడు బతి ఉన్నంతవరకు జీవితాంతం క్రమం తప్పకుండా అందుతూనే ఉంటుంది.

ఎల్ఐసీ జీవన్ ఉత్సవ్ నిబంధనల ప్రకారం, ప్రీమియం చెల్లించే కాలపరిమితిలో ప్రతి ఏటా గ్యారెంటీడ్ అడిషన్స్ లభిస్తాయి. పాలసీ ప్రతి అర్హత గల సంవత్సరంలో బేసిక్ సమ్ అష్యూర్డ్‌లోని ప్రతి 1000 రూపాయలకు 40 రూపాయల చొప్పున అదనంగా కలుస్తాయి.

ఒకవేళ బేసిక్ సమ్ అష్యూర్డ్ 5 లక్షల రూపాయలు అయితే, ప్రతి అర్హత సంవత్సరంలో ఈ గ్యారెంటీడ్ అడిషన్స్ మొత్తం ఏకంగా 20,000 రూపాయల వరకు చేరుకుంటుంది. ఇది పాలసీదారునికి అదనపు ఆర్థిక బలాన్ని ఇస్తుంది.

ఈ ప్లాన్‌లో అదనంగా ఫ్లేక్సి ఇన్కమ్ ప్రయోజనం కూడా అందుబాటులో ఉంది. అంటే, పాలసీదారుడు తన ఆదాయాన్ని వెంటనే తీసుకోకుండా భవిష్యత్తు కోసం వాయిదా వేసుకోవడానికి అనుమతిస్తుంది. ఇలా వాయిదా వేసిన మొత్తంపై కంపెనీ నిర్ణయించిన రేటు ప్రకారం వడ్డీ లభిస్తుంది. ప్రస్తుతం ఈ వడ్డీ రేటు వార్షికంగా 5.5 శాతంగా ఉంది.

అంతేకాకుండా, పాలసీ అమలులో ఉన్న సమయంలో పాలసీదారుడు మరణిస్తే, నిబంధనల ప్రకారం నామినీకి డెత్ బెనిఫిట్స్ అందుతాయి. అత్యవసర సమయాల్లో ఈ పాలసీపై రుణం తీసుకునే సదుపాయం కూడా కల్పించారు. లోన్ మొత్తం, వడ్డీ రేటు, చెల్లింపు గడువు అన్నీ పాలసీ నిబంధనలపై ఆధారపడి ఉంటాయి.

Poonawalla Fincorp రుణ ఆఫర్లతో ఈ పండుగ సీజన్‌ను మరింత ఆనందదాయకంగా మార్చుకోండి

Narender Vaitla — Thu, 22 Oct 2026 17:44:30 +0530

పండుగల సమయంలో సాధారణంగా కుటుంబ ఖర్చులు, గృహోపకరణాల కొనుగోళ్లు, వ్యాపార సంబంధిత ఖర్చులు పెరుగుతాయి. ఈ సమయంలో ఆర్థిక సహాయం కోసం చూస్తున్న వినియోగదారుల వివిధ అవసరాలను తీర్చేందుకు Poonawalla Fincorp నాలుగు రకాల రుణాలను అందిస్తోంది. గృహోపకరణాల కొనుగోలు నుంచి బంగారంపై రుణం పొందడం, వ్యక్తిగత ఖర్చులను నిర్వహించడం, వాణిజ్య వాహనాలకు ఫైనాన్సింగ్ పొందడం వరకు వివిధ అవసరాలకు ఈ రుణాలు ఉపయోగపడతాయి.

కంపెనీ పండుగ ప్రత్యేక ఆఫర్ 2026 అక్టోబర్ 10 నుంచి నవంబర్ 15 వరకు అమల్లో ఉంటుంది. సంబంధిత రుణ పథకాలలో పాల్గొనే వినియోగదారులకు వివిధ రివార్డులు గెలుచుకునే అవకాశం ఉంటుంది. రుణ విభాగాన్ని బట్టి ఆఫర్లు, రివార్డులు మారుతూ ఉంటాయి.

రుణాల వారీగా పండుగ ప్రత్యేక ఆఫర్లు

1) కన్స్యూమర్ డ్యూరబుల్ లోన్లు (Consumer Durable Loans)

విస్తృతమైన భాగస్వామ్య రిటైల్ అవుట్‌లెట్లు, వివిధ బ్రాండ్లతో అనుసంధానం, సరళమైన దరఖాస్తు ప్రక్రియ ద్వారా వినియోగదారులు గృహోపకరణాలు, ఎలక్ట్రానిక్ వస్తువులను సులభమైన వాయిదాల పద్ధతిలో కొనుగోలు చేయవచ్చు.

ఈ రుణానికి సంబంధించిన పండుగ ఆఫర్లలో ఇవి ఉన్నాయి:

* బంపర్ బహుమతులు: రూ. 7.5 లక్షల విలువైన కారు, రూ. 1.5 లక్షల విలువైన బైక్, రూ. 50,000 విలువైన ట్రావెల్ ఓచర్.

* రోజువారీ రివార్డులు రూ. 1,000, రూ. 2,000 విలువైన ఓచర్లు.

* ప్రత్యేక రోజుల రివార్డులు రూ. 3,000 విలువైన ఓచర్లు.

గోల్డ్ లోన్లు (Gold Loans)

భారతదేశవ్యాప్తంగా 400కు పైగా శాఖలతో పాటు, టైర్-2తో పాటు టైర్-3 నగరాల్లో బలమైన ఉనికిని కలిగిన Poonawalla Fincorp, సరళమైన ప్రక్రియ ద్వారా గోల్డ్ లోన్ పొందే సదుపాయాన్ని అందిస్తోంది. వినియోగదారుల బంగారు ఆభరణాలను సురక్షితంగా భద్రపరుస్తారు.

ఈ రుణానికి సంబంధించిన పండుగ ఆఫర్లలో ఇవి ఉన్నాయి:

* రోజువారీ రివార్డులు: రూ. 1,000 విలువైన Amazon ఓచర్లు.

* ప్రత్యేక రోజుల రివార్డులు: రూ .3,000 విలువైన ఓచర్లు.

* బంపర్ బహుమతి: రూ.1.5 లక్షల విలువైన బైక్.

* శాఖ స్థాయి రివార్డు: పాల్గొనే ప్రతి శాఖ నుంచి ఒక విజేతకు రూ. 10,000.

పర్సనల్ లోన్లు (Personal Loans)

పూర్తిగా డిజిటల్, పేపర్‌లెస్ దరఖాస్తు ప్రక్రియతో పాటు వేగవంతమైన ఆమోద సదుపాయాన్ని అందిస్తూ, అర్హత కలిగిన వినియోగదారులు ఎలాంటి పూచీకత్తు లేకుండా పర్సనల్ లోన్ పొందవచ్చు. అలాగే, తిరిగి చెల్లించేందుకు అనువైన కాలపరిమితి ఎంపికలు అందుబాటులో ఉంటాయి.

ఈ రుణానికి సంబంధించిన పండుగ ఆఫర్లలో ఇవి ఉన్నాయి:

* రోజువారీ రివార్డులు: రూ. 1,000 విలువైన Amazon ఓచ‌ర్లు.

* బంపర్ బహుమతులు: రూ. 30,000 విలువైన స్మార్ట్ టీవీ, రూ. 20,000 విలువైన మొబైల్ ఫోన్, రూ. 10,000 విలువైన Amazon ఓచర్.

కమర్షియల్ వెహికల్ లోన్లు (Commercial Vehicle Loans)

కొత్త, పాత చిన్న, తేలికపాటి, భారీ వాణిజ్య వాహనాల కొనుగోలుకు ఫైనాన్సింగ్ సదుపాయాలతో పాటు దేశవ్యాప్తంగా విస్తృతమైన నెట్‌వర్క్‌ను కలిగి ఉన్న Poonawalla Fincorp, రవాణా రంగంలో ఉన్నవారు, ఫ్లీట్ యజమానులు తమ వాహనాల సంఖ్యను పెంచుకోవడానికి లేదా పాత వాహనాల స్థానంలో కొత్త వాహనాలను కొనుగోలు చేయడానికి సహాయపడుతుంది.

ఈ రుణానికి సంబంధించిన పండుగ ఆఫర్‌లో భాగంగా, వినియోగదారులు ఆఫర్ వ్యవధిలో నిర్వహించే లక్కీ డ్రాలో పాల్గొని ఓచర్లు గెలుచుకునే అవకాశం పొందవచ్చు. బహుమతులు, పాల్గొనే అర్హత ప్రమాణాలకు సంబంధించిన మరిన్ని వివరాలు కంపెనీ అధికారిక ప్రచార సమాచారంలో అందుబాటులో ఉన్నాయి.

వినియోగదారులు తెలుసుకోవాల్సిన ముఖ్యమైన విషయాలు:

ఈ పండుగ ప్రత్యేక ఆఫర్ 2026 అక్టోబర్ 10 నుంచి నవంబర్ 15 వరకు మొత్తం 37 రోజుల పాటు అందుబాటులో ఉంటుంది. నాలుగు రుణ విభాగాల్లో రివార్డులు, పాల్గొనే విధానాలు వేర్వేరుగా ఉంటాయి. ఆఫర్‌లో పాల్గొనే ముందు వినియోగదారులు సంబంధిత అర్హత ప్రమాణాలు, పాల్గొనే విధానం, నిబంధనలతో పాటు షరతులను పరిశీలించాలి.

మరిన్ని వివరాల కోసం కంపెనీ అధికారిక ప్రచార వెబ్‌సైట్‌ను సందర్శించండి:

Festive Rewards Hub | ప్రత్యేక ఆఫర్లు, రివార్డులు, గేమ్స్, రుణ ప్రయోజనాలు

నిబంధనలు షరతులు వర్తిస్తాయి. రుణ ఆమోదం, పండుగ ఆఫర్‌లో పాల్గొనడం అనేవి వర్తించే అర్హత ప్రమాణాలు, నిబంధనలకు షరతులకు లోబడి ఉంటాయి.

Gold Silver Price Crash: దివాళి ధమాకా.. 4 రోజుల్లోనే వెండి రూ. 16,000 క్రాష్.. గోల్డ్ ఎంతకు పడిపోయిందో తెలుసా?

Mahesh Rajamoni — Sun, 25 Oct 2026 13:04:07 +0530

Gold Silver Price Crash: ధన్‌తేరస్, దీపావళికి ముందే బంగారం, వెండి ధరలు భారీగా పడిపోయాయి. నాలుగు రోజుల్లోనే కేజీ వెండి రూ. 16,000 తగ్గగా, బంగారం ధర కూడా భారీగా తగ్గింది. ఆ పూర్తి వివరాలు ఇక్కడ తెలుసుకుందాం.

దీపావళి, ధన్‌తేరస్ పండుగలు దగ్గరపడుతున్న వేళ బంగారం, వెండి ప్రియులకు మార్కెట్ నుంచి ఊరట కలిగించే వార్త అందింది. బులియన్ మార్కెట్‌లో బంగారం, వెండి ధరలు దిగివస్తున్నాయి. కేవలం నాలుగు రోజుల వ్యవధిలోనే వెండి ధర భారీగా కుప్పకూలింది. మన దేశీయ మార్కెట్లలోనే కాకుండా మల్టీ కమోడిటీ ఎక్స్ఛేంజ్ (MCX) లో కూడా ఈ విలువైన లోహాల రేట్లు తీవ్రమైన ఒత్తిడికి గురై పడిపోయాయి. పండుగ షాపింగ్ చేసుకునే సామాన్యులకు ఇది ఊరటనిచ్చే అంశంగా మారింది.

ఇండియన్ బులియన్ జ్యువెలర్స్ అసోసియేషన్ (IBJA) సమాచారం ప్రకారం, దేశీయ మార్కెట్‌లో వెండి ధరలు ఊహించని విధంగా పడిపోయాయి. అక్టోబర్ 16న కిలో వెండి ధర రూ. 2,10,918 వద్ద ముగియగా, శుక్రవారం నాటికి అది రూ. 1,94,415 కి చేరింది. కేవలం నాలుగు రోజుల వ్యవధిలోనే కిలో వెండిపై ఏకంగా రూ. 16,503 తగ్గింది. దీంతో చాలా కాలం తర్వాత వెండి ధర మళ్లీ రూ. 2 లక్షల దిగువకు పడిపోయింది.

ఇక ఫ్యూచర్స్ మార్కెట్ (MCX) విషయానికి వస్తే, డిసెంబర్ 4 ఎక్స్‌పైరీతో కూడిన వెండి కాంట్రాక్ట్ రూ. 2,11,187 నుంచి రూ. 1,96,100 కి పడిపోయింది. అంటే MCX లో కూడా నాలుగు రోజుల్లో రూ. 15,087 తగ్గింది. జనవరి చివరి వారంలో నమోదైన ఆల్ టైమ్ హై రేట్ రూ. 4,20,048 తో పోలిస్తే, ప్రస్తుతం వెండి ఏకంగా రూ. 2,23,948 తగ్గడం గమనార్హం.

వెండి బాటలోనే బంగారం ధరలు కూడా పడిపోతున్నాయి. MCX లో డిసెంబర్ 4 ఎక్స్‌పైరీ కలిగిన 10 గ్రాముల బంగారం ధర రూ. 1,47,918 నుంచి రూ. 5,768 తగ్గి రూ. 1,42,150 వద్దకు చేరింది. దేశీయ మార్కెట్‌లో IBJA గణాంకాల ప్రకారం, 10 గ్రాముల బంగారంపై రూ. 4,796 తగ్గి, రూ. 1,46,426 నుంచి రూ. 1,41,630 కి పడిపోయింది.

వివిధ క్వాలిటీల బంగారం ధరలు ఇలా ఉన్నాయి (10 గ్రాములకు):

• 24 క్యారెట్ల బంగారం: రూ. 1,41,630

• 22 క్యారెట్ల బంగారం: రూ. 1,38,230

• 20 క్యారెట్ల బంగారం: రూ. 1,26,050

• 18 క్యారెట్ల బంగారం: రూ. 1,14,720

• 14 క్యారెట్ల బంగారం: రూ. 91,350

అంతర్జాతీయ మార్కెట్‌లో క్రూడ్ ఆయిల్ ధరలు పెరగడం, మిడిల్ ఈస్ట్ లో ఉద్రిక్తతలు కొనసాగడం, అమెరికా ఫెడరల్ రిజర్వ్ వడ్డీ రేట్లను దీర్ఘకాలం పాటు ఎక్కువగా ఉంచుతుందనే సంకేతాలు బంగారం, వెండి పతనానికి కారణమయ్యాయి. అంతర్జాతీయ మార్కెట్‌లో స్పాట్ గోల్డ్ 3,989.10 డాలర్ల కనిష్ఠానికి పడిపోయి, తర్వాత 4,026 డాలర్ల వద్ద రికవర్ అయింది.

వెండి అంతర్జాతీయ స్పాట్ మార్కెట్‌లో ఒకానొక దశలో ఔన్సుకు 53.8 డాలర్ల ఆల్ టైమ్ లోకి పడిపోయింది. కొటాక్ నియో ప్రతినిధి కైనాత్ చైన్‌వాలా ప్రకారం, పారిశ్రామిక వినియోగం ఎక్కువగా ఉండే వెండిపై మార్కెట్ పరిస్థితుల ప్రభావం ఎక్కువగా ఉంటుంది. స్పాట్ మార్కెట్‌లో వెండి 50 డాలర్ల దిగువకు పడిపోతే, మన మార్కెట్‌లో కిలో వెండి రూ. 1.90 లక్షల కంటే కిందకు వెళ్లే అవకాశం ఉందని అంచనా వేస్తున్నారు.

మీరు పండుగ సందర్భంగా లేదా వివాహాల కోసం జ్యువెలరీ షాపులకు వెళ్లి బంగారం, వెండి ఆభరణాలు కొనుగోలు చేసేటప్పుడు కొన్ని విషయాలు గుర్తుంచుకోవాలి. పైన పేర్కొన్న IBJA దరలు కేవలం ప్యూర్ మెటల్ రేట్లు మాత్రమే. మీరు నగల రూపంలో కొనుగోలు చేసేటప్పుడు ఆయా రాష్ట్రాలు లేదా నగరాలను బట్టి వర్తించే జీఎస్టీ, మేకింగ్ ఛార్జెస్ అదనంగా ఉంటాయి. దీనివల్ల నికర ధర కొంత పెరుగుతుంది.

గమనిక: బంగారం, వెండి లేదా ఈటీఎఫ్‌లలో పెట్టుబడి పెట్టే ముందు మీ ఆర్థిక సలహాదారుని సంప్రదించండి. ఈ వివరాలు కేవలం అవగాహన కోసం అందించిన సమాచారం మాత్రమే.

SBI Data Breach: ఎస్‌బీఐ డేటా లీక్.. డార్క్ వెబ్‌లో 3,897 మంది కస్టమర్ల వివరాలు.. రంగంలోకి ఎమర్జెన్సీ టీమ్స్

Mahesh Rajamoni — Wed, 21 Oct 2026 12:48:38 +0530

State Bank of India Data Breach: ఎస్‌బీఐ కస్టమర్ల డేటా డార్క్ వెబ్‌లో లీక్ అయినట్లు అనుమానాలు వ్యక్తమవుతున్నాయి. 3,897 మంది వ్యక్తిగత వివరాల లీక్‌పై బ్యాంక్ విచారణ ప్రారంభించింది.

దేశంలోనే అతిపెద్ద ప్రభుత్వ రంగ బ్యాంక్ అయిన స్టేట్ బ్యాంక్ ఆఫ్ ఇండియా (SBI) కస్టమర్లకు సైబర్ ముప్పు పొంచి ఉందనే వార్త తీవ్ర కలకలం రేపుతోంది. దాదాపు 3,897 మంది కస్టమర్ల వ్యక్తిగత వివరాలు డార్క్ వెబ్‌లో లీక్ అయ్యాయని అనుమానాలు వ్యక్తమవుతున్నాయి. దీనిపై బ్యాంక్ వెంటనే అలర్ట్ అయి పూర్తిస్థాయి దర్యాప్తుకు ఆదేశించింది. కస్టమర్ల సమాచారం దుర్వినియోగం కాకుండా ఉండటానికి అవసరమైన అన్ని చర్యలు తీసుకుంటున్నట్లు ప్రకటించింది.

ఈ డేటా లీక్ వ్యవహారానికి సంబంధించి అక్టోబర్ 16న ఎస్‌బీఐకి ముఖ్యమైన హెచ్చరికలు వచ్చాయి. బ్యాంక్ త్రెట్ ఇంటెలిజెన్స్ సర్వీస్ ప్రొవైడర్, డిఫెన్స్ సైబర్ ఏజెన్సీ, అలాగే ఇండియన్ కంప్యూటర్ ఎమర్జెన్సీ రెస్పాన్స్ టీమ్ (CERT-In) నుంచి ఎస్‌బీఐకి సమాచారం అందింది. డార్క్ వెబ్‌లో ఎస్‌బీఐ కస్టమర్ల సమాచారం ఉందనే అలర్ట్ రావడంతో బ్యాంక్ అధికారులు వెంటనే చర్యలు చేపట్టారు.

డార్క్ వెబ్‌లో లభ్యమైన సుమారు 3,75,000 రికార్డులను ఎస్‌బీఐ ప్రాథమికంగా పరిశీలించింది. ఈ విశ్లేషణలో 3,897 మంది ఎస్‌బీఐ కస్టమర్లకు చెందిన పర్సనల్ ఇన్ఫర్మేషన్ ఉన్నట్లు గుర్తించారు. ఇందులో కస్టమర్ల పేర్లు, జెండర్, రిజిస్టర్డ్ మొబైల్ నంబర్లు, పుట్టిన తేదీలు, ఈమెయిల్ ఐడీలు, నివాస చిరునామాలు ఉన్నాయి. వీటితో పాటు బ్రాంచ్ అండ్ కస్టమర్ ఇన్ఫర్మేషన్ ఫైల్ (CIF) ఐడెంటిఫైయర్లు, లీడ్ ఐడీలు, లోన్ ప్రాసెసింగ్‌కు సంబంధించిన మెటాడేటా కూడా ఉన్నట్లు సమాచారం.

డేటా లీక్ వార్తలు రాగానే ఎస్‌బీఐ వెంటనే సైబర్ ఇన్సిడెంట్ రెస్పాన్స్ ప్రోటోకాల్స్‌ను యాక్టివేట్ చేసింది. లీక్ ప్రభావం ఎంతవరకు ఉందో తెలుసుకోవడానికి CERT-In జాబితాలో ఉన్న ఒక స్వతంత్ర సైబర్ సెక్యూరిటీ ఏజెన్సీని నియమించింది. ఈ ఏజెన్సీ లీక్ అయిన డేటా నిజమైనదా కాదా, అసలు ఈ డేటా ఎక్కడి నుంచి బయటకు వచ్చింది, దీనివల్ల కస్టమర్లకు, బ్యాంక్‌కు ఎలాంటి ముప్పు ఉందనే అంశాలపై సమగ్రంగా దర్యాప్తు చేస్తోంది. తగిన నివారణ చర్యలు కూడా వేగంగా అమలు చేస్తున్నారు.

ఈ అనుమానిత డేటా లీక్ వల్ల బ్యాంక్ రోజువారీ కార్యకలాపాలకు లేదా ఆర్థిక పనితీరుకు ఎలాంటి నష్టం వాటిల్లలేదని ఎస్‌బీఐ స్టాక్ ఎక్స్ఛేంజ్‌ల దాఖలు చేసిన రిపోర్టులో స్పష్టం చేసింది. బ్యాంక్ కోర్ బిజినెస్ నార్మల్‌గా పనిచేస్తోందని, కస్టమర్ల సేవలకు ఎలాంటి అంతరాయం కలగలేదని పేర్కొంది. ఈ పరిస్థితిని నిరంతరం పర్యవేక్షిస్తున్నామని, దర్యాప్తు ముగిసేవరకు నిబంధనలకు అనుగుణంగా తగిన చర్యలు తీసుకుంటామని ఎస్‌బీఐ తెలిపింది.

Top 3 Wealthy Countries: ప్రపంచంలో పేదరికం లేని 3 దేశాలు.. ఇక్కడ ప్రతీ మూడో వ్యక్తి కోటీశ్వరుడే ! అసలు సీక్రెట్ ఇదే

Mahesh Rajamoni — Sun, 25 Oct 2026 14:14:39 +0530

Top 3 Wealthy Countries: ప్రపంచంలో సంపన్నమైన దేశాల లిస్టులో మోనాకో, లక్సెంబర్గ్, లీచ్టెన్‌స్టెయిన్ దేశాల పేర్లు తప్పకుండా ఉంటాయి. ఈ దేశాల్లో అసలు పేదరికమే ఉండదా? వీటి ప్రత్యేకత ఏంటి? పూర్తి వివరాలు ఇక్కడ తెలుసుకుందాం.

మన ప్రపంచంలో సంపద సృష్టి, మెరుగైన లైఫ్‌స్టైల్, ఆర్థిక భద్రత విషయంలో కొన్ని చిన్న దేశాలు సృష్టించిన ఇంపాక్ట్ మామూలుగా లేదు. సాధారణంగా పెద్ద దేశాల జీడీపీ గురించి అందరూ మాట్లాడుకుంటారు కానీ, అసలు పేదరికం అనేదే లేకుండా, అందరూ లగ్జరీగా బతికేసే దేశాలు కొన్ని ఉన్నాయని తెలుసా? అవే మోనాకో, లక్సెంబర్గ్, లీచ్టెన్‌స్టెయిన్.

ఈ బుల్లి దేశాలు తమ వైవిధ్యమైన ట్యాక్స్ పాలసీలు, హై సాలరీలు, సూపర్ సోషల్ సెక్యూరిటీ సిస్టమ్‌తో వరల్డ్ లీడర్స్‌గా నిలుస్తున్నాయి. అక్కడ జనాలు ఎలాంటి లైఫ్ లీడ్ చేస్తున్నారు, అసలు అక్కడ నిరుపేదలు ఎందుకు ఉండరో ఇప్పుడు తెలుసుకుందాం.

ఫ్రాన్స్ సమీపంలో సముద్ర తీరాన ఉండే చిన్న పారడైజ్ మోనాకో. అధికారిక లెక్కల ప్రకారం ఇక్కడ పేదరికం శాతం సున్నా. ఈ దేశపు ప్రత్యేకతలు గమనిస్తే..

• ట్యాక్స్ హేవెన్: ఇక్కడ నివసించే పౌరులకు డైరెక్ట్ ఇన్‌కమ్ ట్యాక్స్ లేదా క్యాపిటల్ గెయిన్స్ ట్యాక్స్ అసలే ఉండవు. మనం కష్టపడి సంపాదించే ప్రతీ పైసా మన జేబులోనే ఉంటుంది.

• ప్రతీ ముగ్గురిలో ఒకరు మిలియనీరే: వినడానికి వింతగా ఉన్నా ఇది నిజం. ఈ చిన్న తీరప్రాంత దేశంలో ఉండే ప్రతీ ముగ్గురిలో ఒకరు కచ్చితంగా మిలియనీర్ లేదా బిలియనీరే అయి ఉంటారు.

• స్కై-హై రియల్ ఎస్టేట్: ఇక్కడ భూమి, ఇళ్ల ధరలు ఏ స్థాయిలో ఉంటాయంటే.. సాధారణ లేదా తక్కువ ఆదాయం ఉన్నవారు నివసించడం మాట దేవుడెరుగు, కనీసం అద్దెకు ఉండే ఆలోచన కూడా చేయలేరు.

యూరోప్‌లోని లక్సెంబర్గ్ ప్రపంచంలోనే అత్యధిక తలసరి జీడీపీ ఉన్న దేశాల్లో ఫస్ట్ ప్లేస్‌లో ఉంటుంది.

• పవర్‌ఫుల్ బ్యాంకింగ్ రంగం: ఇది గ్లోబల్ ఫైనాన్షియల్ సర్వీసెస్, బ్యాంకింగ్, భారీ ఇన్వెస్ట్‌మెంట్లకు కేరాఫ్ అడ్రస్. అందుకే ఇక్కడి కంపెనీలు వర్కర్లకు ఆఫర్ చేసే జీతాలు చాలా భారీగా ఉంటాయి.

• 100% ఫ్రీ పబ్లిక్ ట్రాన్స్‌పోర్ట్: ప్రపంచంలోనే దేశవ్యాప్తంగా బస్సులు, రైళ్లు, ట్రామ్‌ల వంటి ప్రజారవాణాను ప్రజలందరికీ ఉచితంగా మార్చిన మొదటి దేశం ఇది.

• పక్కా సామాజిక భద్రత: ప్రజలకు కష్టాలు రాకుండా ప్రభుత్వం ఉచితంగా నాణ్యమైన విద్య, వైద్యం ఆఫర్ చేస్తుంది. ఉద్యోగం లేకపోతే నిరుద్యోగ భత్యాం ఇస్తూ అండగా నిలుస్తుంది.

స్విట్జర్లాండ్, ఆస్ట్రియా సరిహద్దుల మధ్య ఉండే పర్వత దేశం లీచ్టెన్‌స్టెయిన్. విస్తీర్ణంలో చాలా చిన్నది అయినప్పటికీ తీవ్రమైన పేదరికం ఇక్కడ దాదాపు కనిపించదు.

• హై-టెక్ పరిశ్రమలు: విస్తీర్ణం చిన్నదే అయినా పళ్లు/వైద్య పరికరాల తయారీ, మెషినరీ మేకింగ్ లాంటి హైటెక్ ఇండస్ట్రీస్‌లో ఇది తిరుగులేని రేంజ్‌లో ఉంది.

• కార్పొరేట్ ఫ్రెండ్లీ ట్యాక్స్: ఇక్కడ పన్నుల శాతం తక్కువగా ఉండటం వల్ల ప్రపంచవ్యాప్తంగా ఉన్న ఎన్నో విదేశీ మల్టీనేషనల్ కంపెనీలు తమ వ్యాపారాలను ఇక్కడే రిజిస్టర్ చేసుకుంటాయి.

• జీరో అప్పులు: విదేశీ అప్పులు దాదాపు సున్నాగా ఉన్న అరుదైన దేశం ఇది. తక్కువ జనాభా ఉండటం వల్ల పౌరులందరికీ వరల్డ్ క్లాస్ లైఫ్‌స్టైల్, ఆధునిక సదుపాయాలు చాలా సులువుగా అందుతాయి.

ఈ మూడు దేశాలు భౌగోళికంగా వేర్వేరు చోట్ల ఉన్నప్పటికీ, వీటి సక్సెస్ ఫార్ములా మాత్రం ఒకేలా ఉంటుంది.

• హై ప్రొడక్టివిటీ: కేవలం వ్యాపారాలు మాత్రమే కాకుండా ఫైనాన్షియల్ సర్వీసెస్, మోడ్రన్ టెక్నాలజీ ద్వారా భారీ సంపదను క్రియేట్ చేయడం.

• స్కిల్డ్ పాపులేషన్: క్వాలిటీ ఎడ్యుకేషన్, ప్రొఫెషనల్ స్కిల్స్, ట్రైనింగ్‌కు మొదటి ప్రాధాన్యం ఇవ్వడం వల్ల ప్రతీ ఒక్కరూ సులువుగా ఉపాధి పొందుతారు.

• స్ట్రాంగ్ గవర్నెన్స్: స్థిరమైన పరిపాలన, బిజినెస్ ఫ్రెండ్లీ రూల్స్, మెరుగైన ఇన్ఫ్రాస్ట్రక్చర్ ఉండటం ప్రధాన కారణం.

• స్ట్రాంగ్ సోషల్ ప్రొటెక్షన్: ప్రజల ఆరోగ్యం, విద్య, కనీస అవసరాలను ప్రభుత్వమే బాధ్యతగా చూసుకోవడంతో జనాలు పేదరికంలోకి జారుకోరు.

మోనాకో, లక్సెంబర్గ్, లీచ్టెన్‌స్టెయిన్ ఆకారాకి చిన్నవే కావొచ్చు.. కానీ అవి సృష్టించిన సంపద, అందిస్తున్న లైఫ్‌స్టైల్, అమలు చేస్తున్న ఆర్థిక విధానాలు గ్లోబల్ వైడ్‌గా అందరినీ ఆశ్చర్యపరుస్తున్నాయి. ఆదాయపు పన్ను తీసేయడం, పబ్లిక్ ట్రాన్స్‌పోర్ట్ ఉచితం చేయడం, అత్యాధునిక ఇండస్ట్రీలను ప్రోత్సహించడం వంటి విధానాల ద్వారా ఇవి ప్రపంచ పటంలో ప్రత్యేకంగా మెరుస్తున్నాయి.

Gold Silver Rate: దసరా నుంచి దిగొస్తున్న పసిడి, వెండి..ధరలు చూస్తే కొనాలనిపిస్తోందా?

Nandini Arava — Fri, 23 Oct 2026 11:05:49 +0530

Gold Silver Rate: దసరా నుంచి బంగారం తగ్గుతూ పసిడి ప్రియులకు ఊరటనిస్తున్నాయి. 4 రోజుల్లోనే తులంపై సుమారు రూ.4 వేల తగ్గింది. శుక్రవారం ఒక్కరోజే రూ.1,900 పడిపోయింది. వెండి ధర కూడా దిగొచ్చింది. మరి హైదరాబాద్‌లో తాజా ధరలు ఎంత? ఇంకా తగ్గే అవకాశం ఉందా?

బంగారం కొనాలనుకునే వారికి వరుసగా నాలుగో రోజు కూడా ధరలు తగ్గడం ఊరటనిస్తోంది. దసరా నుంచి చూస్తే తులం పసిడిపై ఏకంగా రూ.4 వేల వరకు తగ్గుదల నమోదైంది. శుక్రవారం ఒక్కరోజే బంగారం ధర రూ.1,900 పడిపోయింది. వెండి కూడా భారీగా దిగొచ్చింది. మరి హైదరాబాద్‌లో ప్రస్తుతం తులం బంగారం ధర ఎంత? వెండి రేటు ఏ స్థాయికి చేరింది? ఈ ధరలు ఇంకా తగ్గుతాయా? పూర్తి వివరాలు ఇప్పుడు తెలుసుకుందాం.

బంగారం కొనుగోలు చేయాలనుకునే వారికి ఇది నిజంగా ఊరటనిచ్చే వార్త. కొద్ది రోజుల క్రితం వరకు ఆకాశాన్నంటిన పసిడి ధరలు ఇప్పుడు వరుసగా దిగొస్తున్నాయి. దసరా పండుగ నుంచి బంగారం ధరలు తగ్గుతూ వస్తుండటంతో ఆభరణాలు కొనాలనుకునే వారు మార్కెట్‌పై ఆసక్తిగా దృష్టి సారిస్తున్నారు. గత నాలుగు రోజుల్లోనే తులం బంగారం ధర సుమారు రూ.4 వేల మేర తగ్గినట్లు మార్కెట్ గణాంకాలు సూచిస్తున్నాయి. శుక్రవారం కూడా బంగారం, వెండి ధరల్లో భారీ మార్పులు నమోదయ్యాయి. మరి ప్రధాన నగరాల్లో తాజా ధరలు ఎలా ఉన్నాయో చూద్దాం.

భారతీయులకు బంగారం అంటే కేవలం ఆభరణం మాత్రమే కాదు..కష్టకాలంలో అండగా నిలిచే పొదుపు సాధనం కూడా. అందుకే ధరలు తగ్గుతున్నాయంటే పసిడి ప్రియులు ఆసక్తిగా గమనిస్తుంటారు. ప్రస్తుతం బంగారం మార్కెట్‌లోనూ ఇదే పరిస్థితి కనిపిస్తోంది.

అంతర్జాతీయ మార్కెట్‌లో చోటుచేసుకుంటున్న పరిణామాలు, పెట్టుబడిదారుల కొనుగోళ్లు, అమ్మకాలు వంటి అంశాలు పసిడి ధరలపై ప్రభావం చూపుతున్నాయి. ఈ నేపథ్యంలో గత కొన్ని రోజులుగా బంగారం ధరలు తగ్గుముఖం పట్టాయి. దసరా నుంచి వరుసగా తగ్గుదల నమోదవడంతో తులం ధరపై సుమారు రూ.4 వేల వరకు భారం తగ్గినట్లు అందుబాటులో ఉన్న గణాంకాలు చెబుతున్నాయి.

ధరలు తగ్గుతున్న నేపథ్యంలో ఆభరణాలు కొనుగోలు చేయాలని భావిస్తున్నవారు ప్రస్తుత మార్కెట్ పరిస్థితులను పరిశీలిస్తున్నారు. అయితే, ధరలు మరింత తగ్గుతాయా లేదా మళ్లీ పెరుగుతాయా అనేది అంతర్జాతీయ మార్కెట్ పరిణామాలపై ఆధారపడి ఉంటుంది.

హైదరాబాద్‌లో 24 క్యారెట్ల స్వచ్ఛమైన బంగారం ధర 10 గ్రాములకు రూ.1,42,480గా ఉంది. అంతకుముందు రోజుతో పోలిస్తే 10 గ్రాములపై రూ.1,900 తగ్గింది. అదే సమయంలో ఆభరణాల తయారీకి సాధారణంగా ఉపయోగించే 22 క్యారెట్ల బంగారం ధర 10 గ్రాములకు రూ.1,30,600గా నమోదైంది. గత రోజుతో పోలిస్తే దీనిపై రూ.1,750 తగ్గుదల కనిపించింది. విజయవాడలోనూ ఇదే ధరలు నమోదయ్యాయి. బంగారం ధరలు తగ్గడంతో కొనుగోలుదారులకు కొంత ఊరట లభించినప్పటికీ, ఆభరణాలు కొనుగోలు చేసేటప్పుడు ఇతర ఖర్చులను కూడా పరిగణనలోకి తీసుకోవాలి. ముఖ్యంగా నగలపై తయారీ ఛార్జీలు, వర్తించే పన్నులు కలిసిన తర్వాత తుది బిల్లు మారుతుంది.

బంగారం బాటలోనే వెండి ధర కూడా తగ్గుముఖం పట్టింది. హైదరాబాద్, విజయవాడ, విశాఖపట్నంలో కిలో వెండి ధర రూ.2,25,000గా కొనసాగుతోంది. దేశ రాజధాని ఢిల్లీతో పాటు ముంబయి, బెంగళూరులో కిలో వెండి ధర రూ.2,20,000గా ఉంది. చెన్నైలో మాత్రం కిలో వెండి ధర రూ.2,25,000 వద్ద కొనసాగుతోంది. వెండిని ఆభరణాల తయారీతో పాటు పెట్టుబడుల కోసం, పారిశ్రామిక అవసరాలకు కూడా ఉపయోగిస్తారు. అందువల్ల అంతర్జాతీయ మార్కెట్‌లో డిమాండ్, సరఫరా, పెట్టుబడిదారుల కదలికలు వంటి అంశాలు వెండి ధరలపై ప్రభావం చూపుతాయి.

వరుసగా ధరలు తగ్గుతుండటంతో ఈ నెలాఖరులోగా బంగారం మరింత చౌక అవుతుందా అనే చర్చ మొదలైంది. అయితే, ధరలు కచ్చితంగా తగ్గుతాయని చెప్పలేం. అంతర్జాతీయంగా డాలర్ విలువలో మార్పులు, వడ్డీ రేట్లపై అంచనాలు, భౌగోళిక రాజకీయ పరిణామాలు, పెట్టుబడిదారుల నిర్ణయాలు పసిడి ధరల దిశను ప్రభావితం చేయవచ్చు. ముఖ్యంగా గుర్తుంచుకోవాల్సిన విషయం: బంగారం ధరలు తగ్గాయని కొనుగోలు చేసే ముందు స్థానిక నగల దుకాణంలో తాజా రేటును నిర్ధారించుకోవాలి. ఇక్కడ పేర్కొన్న ధరలు శుక్రవారం ఉదయం అందుబాటులో ఉన్న సమాచారం ఆధారంగా ఇచ్చినవి. మార్కెట్ పరిస్థితులను బట్టి రోజులోనే ధరలు మారవచ్చు.

Gold Silver Rate: పశ్చిమాసియా యుద్ధం వల్ల రెండో రోజూ కుప్పకూలిన పసిడి, వెండి

Nandini Arava — Thu, 22 Oct 2026 11:46:58 +0530

Gold Silver Rate: బంగారం కొనాలనుకునేవారికి గుడ్ న్యూస్. రెండోరోజు కూడా బంగారం, వెండి ధరలు కుప్పకూలిపోయాయి. హైదరాబాద్‌లో 24 క్యారెట్ల బంగారం ధర 10 గ్రాములపై రూ.1,700 తగ్గగా, వెండి భారీగా పడిపోయింది. మరి ఈ తగ్గుదలకు కారణమేంటి? ధరలు ఇంకా తగ్గుతాయా?

భారతీయులకు బంగారం అంటే ఎంతో ఇష్టం. పండగలు, పెళ్లిళ్లు, శుభకార్యాలు ఏవైనా పసిడి కొనుగోలుకు ప్రత్యేక ప్రాధాన్యం ఇస్తారు. అందుకే ధరలు తగ్గినప్పుడు నగలు కొనాలనుకునేవారు ఆసక్తి చూపిస్తుంటారు. అయితే కొంతకాలంగా పెరుగుతూ వచ్చిన బంగారం ధరలు ఇప్పుడు ఒక్కసారిగా తగ్గుముఖం పట్టాయి. హైదరాబాద్‌లో 24 క్యారెట్ల బంగారం ధర 10 గ్రాములపై రూ.1,700 తగ్గగా, వెండి ధర కూడా దిగివచ్చింది. మరి నేడు పసిడి, వెండి ధరలు ఎలా ఉన్నాయో చూద్దాం.

హైదరాబాద్ బులియన్ మార్కెట్‌లో బంగారం ధరలు భారీగా తగ్గాయి. 10 గ్రాముల 24 క్యారెట్ల బంగారం ధర రూ.1,700 తగ్గి రూ.1,44,380కు చేరింది. అదేవిధంగా 22 క్యారెట్ల బంగారం ధర 10 గ్రాములపై రూ.1,550 తగ్గి రూ.1,32,350గా నమోదైంది. ఇక 18 క్యారెట్ల బంగారం ధర రూ.1,270 తగ్గి రూ.1,08,290కు దిగివచ్చింది.

బంగారం ధరలతో పాటు వెండి కూడా చౌకగా మారింది. కిలో వెండి ధర మరో రూ.5,000 తగ్గి రూ.2.25 లక్షలకు చేరుకుంది. వరుసగా ధరలు పెరుగుతుండటంతో కొనుగోలును వాయిదా వేసినవారికి ఈ తగ్గుదల కొంత ఊరటనిచ్చే అవకాశం ఉంది. అయితే నగల కొనుగోలు చేసేవారు వీటికి అదనంగా 3 శాతం జీఎస్టీ, మేకింగ్ ఛార్జీలు చెల్లించాల్సి ఉంటుందని గుర్తుంచుకోవాలి.

అంతర్జాతీయ మార్కెట్లలో చోటుచేసుకుంటున్న పరిణామాలు దేశీయ బులియన్ మార్కెట్‌పై ప్రభావం చూపుతున్నాయి. ముఖ్యంగా అమెరికన్ డాలర్ విలువ బలపడటం బంగారం ధరలపై ఒత్తిడిని పెంచుతోంది. సాధారణంగా డాలర్ బలపడినప్పుడు ఇతర కరెన్సీలు ఉపయోగించే కొనుగోలుదారులకు బంగారం ఖరీదైనదిగా మారుతుంది. దీంతో అంతర్జాతీయ మార్కెట్‌లో డిమాండ్‌పై ప్రభావం పడే అవకాశం ఉంటుంది.

మరోవైపు ప్రపంచవ్యాప్తంగా నెలకొన్న భౌగోళిక రాజకీయ ఉద్రిక్తతలు, వడ్డీ రేట్లపై అంచనాలు, ద్రవ్యోల్బణ భయాలు కూడా బంగారం ధరలను ప్రభావితం చేస్తాయి. అనిశ్చిత పరిస్థితుల్లో పెట్టుబడిదారులు బంగారాన్ని సురక్షిత పెట్టుబడిగా భావిస్తుంటారు. దీంతో కొన్ని సందర్భాల్లో ధరలు పెరుగుతాయి. అయితే డాలర్ బలపడటం, లాభాల స్వీకరణ వంటి అంశాలు ధరల పెరుగుదలకు అడ్డుకట్ట వేయవచ్చు.

బంగారం ధరలు స్వల్పకాలంలో ఏ దిశగా కదులుతాయో చెప్పడం అంత సులభం కాదు. అంతర్జాతీయ మార్కెట్ పరిస్థితులు, డాలర్ విలువ, అమెరికా వడ్డీ రేట్లపై అంచనాలు, కేంద్ర బ్యాంకుల కొనుగోళ్లు, పెట్టుబడిదారుల డిమాండ్ వంటి అంశాలు రానున్న రోజుల్లో కీలకంగా మారనున్నాయి.

ప్రపంచవ్యాప్తంగా ఉద్రిక్తతలు పెరిగితే బంగారానికి డిమాండ్ పెరిగే అవకాశం ఉంటుంది. అదే సమయంలో డాలర్ మరింత బలపడినా, పెట్టుబడిదారులు లాభాల స్వీకరణకు దిగినా ధరలపై ఒత్తిడి కొనసాగవచ్చు. అందువల్ల ప్రస్తుత తగ్గుదల తర్వాత బంగారం ధరలు తప్పనిసరిగా పెరుగుతాయని భావించకూడదు.

బంగారం కొనుగోలు చేయాలనుకునేవారు రోజువారీ ధరలను పరిశీలించడంతో పాటు, తమ అవసరాలు, బడ్జెట్‌ను బట్టి నిర్ణయం తీసుకోవడం మంచిది. ఇక్కడ పేర్కొన్న ధరలు హైదరాబాద్‌కు సంబంధించినవి. నగల దుకాణాన్ని బట్టి తుది ధరలో కొంత వ్యత్యాసం ఉండవచ్చు.

Railway: ర‌న్నింగ్ ట్రైన్‌లో బ్లింకిట్ సేవ‌లు.. ఎలా ఆర్డ‌ర్ చేసుకోవాలంటే.?

Narender Vaitla — Thu, 22 Oct 2026 21:26:10 +0530

Railway: రైలు ప్రయాణంలో అవసరమైన వస్తువులు తీసుకెళ్లడం మర్చిపోయారా? ఫోన్ ఛార్జర్, మందులు, వ్యక్తిగత అవసరాలకు సంబంధించిన వస్తువులు కావాలన్నా ఇక ఆందోళన చెందాల్సిన అవసరం లేదు. క్విక్ కామర్స్ ప్లాట్‌ఫామ్ బ్లింకింట్ ఈ సేవ‌ల‌ను అందిస్తోంది.

ప్రస్తుతం రైలు ప్రయాణంలో ఆకలేస్తే స్విగ్గీ, జొమాటో వంటి యాప్‌ల ద్వారా ఆహారాన్ని ఆర్డర్ చేసుకునే సదుపాయం ఉంది. ప్రయాణికులు ముందుగానే ఆర్డర్ చేస్తే, నిర్ణీత రైల్వే స్టేషన్‌లో ఆహారాన్ని అందుకోవచ్చు. ఇప్పుడు ఇదే తరహాలో అత్యవసర వస్తువులను కూడా పొందే అవకాశం కల్పిస్తున్నారు. ప్రయాణంలో ఫోన్ ఛార్జర్ మర్చిపోయినా, వ్యక్తిగత అవసరాలకు సంబంధించిన వస్తువులు కావాలన్నా బ్లింకిట్‌ యాప్ ద్వారా ఆర్డర్ చేసుకోవచ్చు. అయితే ఈ సేవ అన్ని రైల్వే స్టేషన్లలో అందుబాటులో లేదు. కాబట్టి ఆర్డర్ చేసే ముందు మీకు అవసరమైన స్టేషన్‌లో ఈ సదుపాయం ఉందో లేదో తెలుసుకోవాలి.

దక్షిణ రైల్వేలోని సేలం డివిజన్ క్విక్ కామర్స్ సంస్థ బ్లింకిట్తో ఒప్పందం చేసుకుంది. ఈ భాగస్వామ్యం ద్వారా రైలు ప్రయాణికులకు అవసరమైన వస్తువులను అందించేందుకు చర్యలు చేపట్టారు. ప్రస్తుతం ఈ సేవను ప్రయోగాత్మకంగా ప్రారంభించారు. ఈ విధానం విజయవంతమైతే భవిష్యత్తులో మరిన్ని ప్రధాన రైల్వే స్టేషన్లకు విస్తరించే అవకాశం ఉంది. అయితే ప్రస్తుతం అన్ని ప్రాంతాల్లోనూ ఈ సదుపాయం అందుబాటులోకి రాలేదు.

బ్లింకిట్ ద్వారా ప్రయాణికులు తమ అవసరాలకు అనుగుణంగా పలు రకాల వస్తువులను ఆర్డర్ చేసుకునే అవకాశం ఉంటుంది. వాటిలో ముఖ్యమైనవి అవసరమైన మందులు, ఆరోగ్య సంరక్షణకు సంబంధించిన వస్తువులు. మొబైల్ ఛార్జర్లు: ఫోన్ ఛార్జింగ్ కోసం అవసరమైన ఛార్జర్లు, ఇతర అనుబంధ వస్తువులు. వ్యక్తిగత సంరక్షణ వస్తువులు: పరిశుభ్రతకు సంబంధించిన ఉత్పత్తులు. ఆహార పదార్థాలు: తినుబండారాలు, ఇతర ఆహార వస్తువులు. పిల్లలకు అవసరమైన వస్తువులు: చిన్నారుల సంరక్షణకు ఉపయోగపడే ఉత్పత్తులు. అయితే ఏయే వస్తువులు అందుబాటులో ఉంటాయనేది సంబంధిత స్టేషన్‌లోని స్టాక్‌పై ఆధారపడి ఉంటుంది. అలాగే మందులు సహా కొన్ని వస్తువుల లభ్యతకు ప్రత్యేక పరిమితులు ఉండవచ్చు.

రైలు ప్రయాణంలో అవసరమైన వస్తువులను ఆర్డర్ చేసుకోవడానికి సింపుల్ స్టెప్స్ ఫాలో అయితే చాలు.

* ముందుగా మీ ఫోన్‌లో Blinkit యాప్‌ను ఓపెన్ చేయాలి.

* మీరు వస్తువులను తీసుకోవాలనుకుంటున్న రైల్వే స్టేషన్‌ ప్రాంతాన్ని లొకేషన్‌గా ఎంచుకోవాలి.

* అందుబాటులో ఉన్న వస్తువుల్లో మీకు కావాల్సిన వాటిని ఎంపిక చేసి కార్ట్‌లో చేర్చాలి.

* యాప్‌లో అడిగితే రైలు నంబర్, కోచ్ లేదా బెర్త్ వివరాలను నమోదు చేయాలి.

* ఆర్డర్‌ను నిర్ధారించి, డెలివరీకి సంబంధించిన సూచనలను పరిశీలించాలి.

* రైలు సంబంధిత స్టేషన్‌కు చేరుకున్నప్పుడు, యాప్‌లో సూచించిన నిర్ణీత డెలివరీ పాయింట్‌ నుంచి వస్తువులను తీసుకోవాలి.

ఆర్డర్ చేసే ముందు స్టేషన్ లొకేషన్, వస్తువుల లభ్యత, డెలివరీ సమయం వంటి వివరాలను తప్పనిసరిగా తనిఖీ చేయాలి. రైలు ఆగే సమయానికి అనుగుణంగా వస్తువులను అందుకోవడం సాధ్యమవుతుందో లేదో కూడా నిర్ధారించుకోవాలి. ఈ సేవ ప్రస్తుతం ఎంపిక చేసిన స్టేషన్లకే పరిమితమై ఉన్నందున, అన్ని రైళ్లలో లేదా అన్ని స్టేషన్లలో డెలివరీ లభిస్తుందని భావించకూడదు.