Asianet News Telugu

Honda NX500: హోండా నుంచి క్రేజీ బైక్.. అసలు ఏంటీ ఈ-క్లచ్‌ టెక్నాలజీ? దీని ప్రయోజనాలు ఏంటి?

Mahesh Rajamoni — Sun, 17 May 2026 11:03:37 +0530

Honda NX500 : ట్రాఫిక్‌లో క్లచ్ నొక్కే బాధ లేకుండా గేర్లు మార్చుకునే విప్లవాత్మక ఈ-క్లచ్ టెక్నాలజీతో హోండా NX500 అడ్వెంచర్ బైక్ ఇండియాలో లాంచ్ అయింది. NX500 ఫీచర్లు, ధర సహా పూర్తి డిటెయిల్స్ ఇక్కడ తెలుసుకుందాం.

రైడింగ్ అంటే ఇష్టముండే వారికి, అడ్వెంచర్ లవర్స్‌కు హోండా అదిరిపోయే గుడ్ న్యూస్ చెప్పింది. బైక్ నడిపేటప్పుడు ట్రాఫిక్‌లో పదే పదే క్లచ్ నొక్కి చేతులు నొప్పులు పుడుతున్నాయా? గేర్ మార్చేటప్పుడు క్లచ్, యాక్సిలరేటర్ సింక్ అవ్వక బండి ఆగిపోతోందా? ఇకపై ఆ టెన్షన్స్ పడక్కర్లేదు.

ఎందుకంటే, జపాన్ ఆటోమేకర్ హోండా సరికొత్త విప్లవాత్మక సాంకేతికతతో తన మోస్ట్ పాపులర్ అడ్వెంచర్ టూరర్ బైక్ ‘హోండా NX500’ను సరికొత్త ఈ-క్లచ్ వేరియంట్‌లో ఇండియన్ మార్కెట్లోకి తీసుకొచ్చింది. మరి ఏంటి ఈ సరికొత్త టెక్నాలజీ? దీనివల్ల కలిగే లాభాలేంటో తెలుసా?

చాలామందికి స్కూటర్ లాంటి ఆటోమేటిక్ రైడింగ్ కావాలి, కానీ బైక్ లాంటి గేర్లు మార్చే కిక్ కూడా మిస్ అవ్వకూడదు అనుకుంటారు. సరిగ్గా ఇలాంటి వారి కోసమే హోండా ఈ-క్లచ్ టెక్నాలజీని తెచ్చింది. ఇది మ్యాన్యువల్ గేర్‌బాక్స్, ఆటోమేటిక్ క్లచ్‌ల క్రేజీ కాంబినేషన్. ఇందులో ఉండే స్మార్ట్ ఎలక్ట్రానిక్ యాక్చ్యుయేటర్లు, ఎలక్ట్రానిక్ కంట్రోల్ యూనిట్ మీరు గేర్ మార్చేటప్పుడు, బండి స్టార్ట్ చేసేటప్పుడు లేదా సిగ్నల్ దగ్గర పూర్తిగా ఆపినప్పుడు ఆటోమేటిక్‌గా క్లచ్‌ను ఆపరేట్ చేస్తాయి.

అంటే, మీరు ఎడమచేత్తో క్లచ్ లివర్‌ను అసలు తాకాల్సిన అవసరమే లేదు.. కేవలం మీ ఎడమ కాలితో గేర్లు మార్చుకుంటూ దూసుకెళ్లిపోవడమే. ఒకవేళ మీకు పాత పద్ధతిలోనే క్లచ్ నొక్కి డ్రైవ్ చేయాలనిపిస్తే.. ఎప్పుడైనా లివర్‌ను చేతితో వాడవచ్చు, వెంటనే బైక్ మ్యాన్యువల్ మోడ్‌లోకి షిఫ్ట్ అయిపోతుంది.

ఈ సరికొత్త హోండా NX500 బైక్‌లో పవర్‌ఫుల్ 471cc, లిక్విడ్-కూల్డ్, ప్యారలల్-ట్విన్ ఇంజిన్ను అమర్చారు. ఇది 8,500 rpm వద్ద 47 Hp గరిష్ఠ పవర్‌ను, అలాగే 6,500 rpm వద్ద 43 Nm టార్క్‌ను జనరేట్ చేస్తుంది. ఇందులో 6-స్పీడ్ గేర్‌బాక్స్‌ను అమర్చారు. లాంగ్ రైడ్స్‌లో అల్టిమేట్ కంఫర్ట్ కోసం ముందు వైపు USD ఫోర్క్స్, వెనుక వైపు మోనోషాక్ సస్పెన్షన్‌ ఇచ్చారు.

ఇక బ్రేకింగ్ విషయానికి వస్తే.. ఫ్రంట్‌లో ట్విన్ 296 mm డిస్క్ బ్రేకులు, రేడియల్ మౌంటెడ్ నిస్సిన్ కాలిపర్స్, బ్యాక్ సైడ్ 240 mm సింగిల్ డిస్క్ బ్రేక్ ఉన్నాయి. సేఫ్టీ కోసం డ్యూయల్ ఛానల్ ఏబీఎస్ సిస్టమ్ ఉండనే ఉంది. ఈ స్మార్ట్ ఈ-క్లచ్ సిస్టమ్ వల్ల బైక్ బరువు కేవలం 3 కిలోలు మాత్రమే పెరిగి, మొత్తం 199 కిలోలుగా మారింది.

టెక్ ప్రియుల కోసం ఈ బైక్‌లో 5 అంగుళాల పూర్తి కలర్ టీఎఫ్టీ డిస్‌ప్లేను అందించారు. ఇందులో నావిగేషన్, కాల్స్, మ్యూజిక్ కంట్రోల్ కోసం హోండా రోడ్‌సింక్ కనెక్టివిటీ ఫీచర్ కూడా ఉంది. నైట్ రైడింగ్ కోసం ఫుల్ LED లైటింగ్ సెటప్‌ను ఇచ్చారు. భద్రతను మరింత పెంచడానికి హోండా సెలెక్టబుల్ టార్క్ కంట్రోల్ ఫీచర్ ఉంది. అయితే, ఈ రేంజ్ ప్రీమియం బైక్‌లలో ఆశించే అడ్వాన్స్‌డ్ రైడింగ్ మోడ్స్, రైడ్-బై-వైర్ వంటి ఫీచర్లు ఇందులో లేవు. పాత పద్ధతిలోనే కేబుల్ ఆపరేటెడ్ థ్రోటిల్‌ను ఇందులోనూ ఇచ్చారు.

ఈ సరికొత్త టెక్నాలజీతో వచ్చిన హోండా NX500 ఎక్స్-షోరూమ్ ధరను రూ. 7,43,900 గా కంపెనీ నిర్ణయించింది. ఈ బైక్ మ్యాట్ గన్‌పౌడర్ బ్లాక్ మెటాలిక్, పెర్ల్ హోరిజోన్ వైట్ అనే రెండు అట్రాక్టివ్ కలర్స్‌లో లభిస్తోంది. దేశవ్యాప్తంగా ఉన్న హోండా బిగ్ వింగ్ డీలర్‌షిప్‌లలో దీని బుకింగ్స్ ఇప్పటికే షురూ అయ్యాయి. సిటీ ట్రాఫిక్‌లో అలసటను తగ్గించి, హైవేలపై లాంగ్ రైడ్స్ వెళ్లేటప్పుడు రైడర్‌కు అల్టిమేట్ కంట్రోల్ ఇచ్చే ఈ బైక్.. రైడింగ్ ఇష్టపడే వారికి ఒక పర్ఫెక్ట్ ఛాయిస్ అని చెప్పవచ్చు. కానీ, ధర మాత్రం ఎక్కువనే చెప్పాలి.

లైసెన్స్, రిజిస్ట్రేషన్ అవసరం లేదు.. ఛార్జింగ్ అయిపోతే ఎంచక్కా తొక్కుతూ వెళ్లిపోవచ్చు. అదిరిపోయే ఎలక్ట్రిక్ మొపెడ్

Narender Vaitla — Tue, 23 Jun 2026 08:58:18 +0530

Electric moped: పెట్రోల్ ధరలు పెరిగిన నేపథ్యంలో, లైసెన్స్, రిజిస్ట్రేషన్ అవసరం లేని ఎలక్ట్రిక్ వాహనాలకు డిమాండ్ పెరుగుతోంది. ఈ క్రమంలోనే తాజాగా కొమాకి కంపెనీ ఓ ఎలక్ట్రిక్ మోపెడ్ ను తీసుకొచ్చింది. దీనికి సంబంధించిన పూర్తి వివరాలు ఇప్పుడు చూద్దాం.

భారతదేశంలో పెట్రోల్ ధరలు పెరిగిపోతున్న తరుణంలో, ప్రత్యామ్నాయ వాహనాల కోసం చూస్తున్న వారికి Komaki XR1 ఎలక్ట్రిక్ మొపెడ్ ఒక ఆకర్షణీయమైన ఎంపికగా నిలుస్తోంది. Komaki కంపెనీ పరిచయం చేసిన ఈ సరికొత్త టూవీలర్, సైకిల్‌కు పైన, స్కూటర్‌కు కింద ఉండే ఒక ఇంటర్మీడియట్ ఈవీగా రూపొందించారు. నగరాలు, గ్రామాల్లో తక్కువ దూరాలు ప్రయాణించడానికి ఇది అత్యంత అనుకూలమైన వాహనంగా ప్రాచుర్యం పొందింది.

పెరుగుతున్న ఇంధన ధరలతో పాటు, పెద్ద ఎలక్ట్రిక్ స్కూటర్లు కొనే ఆర్థిక స్థోమత లేని వారికి Komaki XR1 ఒక బెస్ట్ ఆప్షన్ గా చెప్పొచ్చు. ఇది పూర్తిగా బ్యాటరీ విద్యుత్ శక్తితో నడుస్తుంది, తద్వారా ప్రయాణ ఖర్చులు గణనీయంగా తగ్గుతాయి. అంతేకాకుండా, దారి మధ్యలో ఎక్కడైనా బ్యాటరీ ఛార్జింగ్ అయిపోతే, ఇందులో అమర్చిన పెడల్స్‌ను ఉపయోగించి సైకిల్‌లా తొక్కవచ్చు, తద్వారా సురక్షితంగా ఇంటికి చేరుకోవచ్చు.

Komaki XR1 ఎలక్ట్రిక్ మొపెడ్ యొక్క అతి పెద్ద ప్రయోజనాల్లో ఒకటి, దీనిని నడపడానికి ఎలాంటి డ్రైవింగ్ లైసెన్స్ అవసరం లేదు. అలాగే, RTO కార్యాలయంలో నంబర్ ప్లేట్ కోసం రిజిస్ట్రేషన్ చేయించాల్సిన అవసరం కూడా లేదు. ఇది తక్కువ వేగంతో ప్రయాణించే లో-స్పీడ్ ఎలక్ట్రిక్ వాహనాల కేటగిరీ కిందకు వస్తుంది. దీనివల్ల స్కూల్, కాలేజీలకు వెళ్లే విద్యార్థులు, అలాగే ట్రాఫిక్ నిబంధనలు, చలాన్ల టెన్షన్ లేకుండా ప్రశాంతంగా ప్రయాణించాలనుకునే మహిళలు, వృద్ధులకు ఇది ఎంతగానో ఉపయోగపడుతుంది.

పనితీరు, రేంజ్

సాంకేతిక సామర్థ్యం పరంగా, Komaki XR1 మొపెడ్‌లోని బ్యాటరీని ఒక్కసారి పూర్తిగా ఛార్జ్ చేస్తే సుమారు 70 కిలోమీటర్ల నుంచి 80 కిలోమీటర్ల వరకు నాన్‌స్టాప్‌గా ప్రయాణించవచ్చు. ఇందులో అమర్చిన ఎలక్ట్రిక్ మోటార్ గరిష్టంగా గంటకు 25 కిలోమీటర్ల వేగంతో ప్రయాణించే సామర్థ్యాన్ని కలిగి ఉంటుంది. నగరాల లోపల ప్రయాణించడానికి ఈ వేగం సురక్షితమైనది, అనుకూలమైనదిగా చెప్పవచ్చు.

Komaki XR1 బ్యాటరీ పూర్తిగా ఛార్జ్ కావడానికి కేవలం 3 నుండి 4 గంటల సమయం మాత్రమే పడుతుంది. ఈ ప్రక్రియకు అయ్యే విద్యుత్ ఖర్చు కేవలం రూ. 8 నుంచి రూ. 10 మాత్రమే. ఇది రోజువారీ ప్రయాణ ఖర్చులను అత్యంత తక్కువగా ఉంచడంలో సహాయపడుతుంది.

Komaki సంస్థ ఈ మొపెడ్‌లో అన్ని రకాల అవసరమైన ఫీచర్లను అందించింది. రాత్రి వేళల్లో సురక్షితమైన ప్రయాణానికి బ్రైట్ హెడ్‌లైట్లు, టెయిల్ లైట్లు, టర్న్ ఇండికేటర్లను అమర్చారు. గుంతల రోడ్లపై కూడా సాఫీగా ప్రయాణించడానికి మంచి సస్పెన్షన్ సిస్టమ్ ఉంది. నిత్యం మార్కెట్ నుంచి కూరగాయలు లేదా ఇతర సామాన్లు తెచ్చుకోవడానికి వీలుగా ముందు భాగంలో ఒక పెద్ద బుట్టను ఏర్పాటు చేశారు. అలాగే, ఇద్దరు వ్యక్తులు ఎంతో సౌకర్యవంతంగా కూర్చోవడానికి వీలుగా రెండు విడివిడి సాఫ్ట్ కుషన్ సీట్లను కంపెనీ డిజైన్ చేసింది.

ప్రస్తుతం భారత మార్కెట్లో Komaki XR1 ఎలక్ట్రిక్ మొపెడ్ ప్రారంభ ఎక్స్-షోరూమ్ ధర రూ. 34,499 గా ఉంది. గత ఏడాది జూన్‌లో విడుదలైనప్పుడు దీని ధర రూ. 29,999 మాత్రమే ఉండేది. పెరిగిన డిమాండ్ కారణంగా కంపెనీ ఒక ఏడాదిలోనే దీని ధరను రూ. 4,500 వరకు పెంచింది. తక్కువ బడ్జెట్‌లో, ఎలాంటి నిర్వహణ ఖర్చులు లేకుండా, రోజూ ఆఫీసులకు లేదా మార్కెట్‌కు వెళ్లాలనుకునే వారికి, పాఠశాల పిల్లలకు Komaki XR1 ఒక తెలివైన, ఉత్తమ ఎంపిక అని నిపుణులు అభిప్రాయపడుతున్నారు.

ఎలక్ట్రిక్ స్కూటర్ల బ్యాట‌రీ మార్చ‌డం క‌ష్ట‌మా.? అపోహ‌లు ఏంటి.? నిజాలు ఏంటి.?

Narender Vaitla — Sun, 28 Jun 2026 08:33:15 +0530

Electric Scooter: భారత్‌లో ఎలక్ట్రిక్ వాహనాల వినియోగం వేగంగా పెరుగుతోంది. అయినా వాటి గురించి ఇప్పటికీ కొన్ని అపోహలు ప్రజల్లో ఉన్నాయి. అలాంటి కొన్ని ప్ర‌ధాన అపోహ‌లు ఏంటి.? అస‌లు నిజాలు ఏంటో ఇప్పుడు తెలుసుకుందాం.

ఎలక్ట్రిక్ స్కూటర్లపై ఎక్కువగా వినిపించే అపోహ ఇదే. ఒకసారి చార్జ్ చేస్తే కొద్ది కిలోమీటర్లు మాత్రమే వెళ్తాయని చాలా మంది అనుకుంటారు. కానీ ప్రస్తుతం వస్తున్న కొత్త మోడళ్లలో బ్యాటరీ సామర్థ్యం గణనీయంగా పెరిగింది. ఉదాహరణకు VIDA EVOOTER ఒకసారి పూర్తి చార్జ్ చేస్తే IDC ప్రమాణాల ప్రకారం 142 కిలోమీటర్ల వరకు ప్రయాణించగలదు. రోజువారీ ఉద్యోగం, వ్యాపారం లేదా నగర ప్రయాణాలకు ఈ రేంజ్ చాలామందికి సరిపోతుంది. బ్యాటరీ టెక్నాలజీ అభివృద్ధి చెందుతున్న కొద్దీ ఈ దూరం మరింత పెరుగుతోంది.

పెట్రోల్ బంక్‌లో కొన్ని నిమిషాల్లో ఇంధనం నింపేయొచ్చు కాబట్టి, ఎలక్ట్రిక్ స్కూటర్‌ను చార్జ్ చేయాలంటే చాలా సమయం పడుతుందని చాలామంది భావిస్తారు. అయితే ప్రస్తుతం ఫాస్ట్ ఛార్జింగ్ సదుపాయం అందుబాటులో ఉండటంతో ఈ సమస్య చాలా వరకు తగ్గిపోయింది. కొన్ని అడ్వాన్స్‌డ్ స్కూటీల్లో 0 నుంచి 80 శాతం వరకు బ్యాటరీ కేవలం 62 నిమిషాల్లోనే చార్జ్ అవుతుంది. అలాగే ఇందులో రిమూవబుల్ బ్యాటరీలు ఉండటంతో వాటిని ఇంటికి లేదా కార్యాలయానికి తీసుకెళ్లి సౌకర్యవంతంగా చార్జ్ చేసుకునే అవకాశం కూడా ఉంది. దీంతో ప్రత్యేకంగా ఛార్జింగ్ స్టేషన్ కోసం వెతకాల్సిన అవసరం ఉండదు.

ఎలక్ట్రిక్ స్కూటర్ల కొనుగోలు ధర ఎక్కువగా ఉంటుందని చాలా మంది వెనుకడుగు వేస్తుంటారు. కానీ కొనుగోలు ధర మాత్రమే కాకుండా మొత్తం నిర్వహణ ఖర్చును కూడా పరిగణనలోకి తీసుకోవాలి. ప్ర‌స్తుతం బేసిక్ ఎల‌క్ట్రిక్ స్కూట‌ర్ల ధ‌ర రూ.44,990 నుంచి ప్రారంభమవుతోంది. ఒకసారి కొనుగోలు చేసిన తర్వాత పెట్రోల్ ఖర్చు ఉండదు. ఇంజిన్ ఆయిల్ మార్చాల్సిన అవసరం ఉండ‌దు. సర్వీసింగ్ ఖర్చులు కూడా తక్కువగా ఉంటాయి. అదనంగా కొన్ని రాష్ట్రాల్లో ప్రభుత్వం అందించే సబ్సిడీలు కూడా వినియోగదారులకు ప్రయోజనం కలిగిస్తున్నాయి. దీర్ఘకాలంలో చూస్తే ఎలక్ట్రిక్ స్కూటర్ వినియోగం ఆర్థికంగా లాభదాయకంగా మారుతుంది.

బ్యాటరీలకు సంబంధించిన కొన్ని సంఘటనల కారణంగా ఎలక్ట్రిక్ స్కూటర్ల భద్రతపై సందేహాలు వ్యక్తమవుతున్నాయి. కానీ ప్రస్తుతం మార్కెట్లో లభిస్తున్న కొత్త మోడళ్లలో అధునాతన భద్రతా సాంకేతికతను ఉపయోగిస్తున్నారు. కొన్ని స్కూటీల్లో కంబైన్డ్ బ్రేకింగ్ సిస్టమ్, వివిధ రైడింగ్ మోడ్స్, స్మార్ట్ కంట్రోల్ ఫీచర్లు వంటి సదుపాయాలు ఉన్నాయి. ఇవి ప్రయాణాన్ని మరింత సురక్షితంగా మార్చడంలో సహాయపడతాయి. సరైన నాణ్యత ప్రమాణాలతో తయారైన వాహనాలను ఉపయోగిస్తే భద్రత విషయంలో ఆందోళన అవసరం ఉండదు.

ఎలక్ట్రిక్ స్కూటర్‌లో బ్యాటరీ మార్పిడి చాలా ఖరీదైన వ్యవహారమని కొందరు భావిస్తారు. కానీ బ్యాటరీ జీవితకాలం చాలా సంవత్సరాలు ఉంటుంది. కొన్ని సంస్థలు బ్యాటరీలకు మూడు సంవత్సరాల స్టాండర్డ్ వారంటీతో పాటు ఐదు సంవత్సరాల ఎక్స్‌టెండెడ్ వారంటీ ఎంపికను కూడా అందిస్తోంది. పైగా పెట్రోల్, ఇంజిన్ ఆయిల్, ఇతర నిర్వహణ ఖర్చుల్లో ఆదా అయ్యే మొత్తాన్ని పరిగణనలోకి తీసుకుంటే బ్యాటరీ మార్పిడి ఖర్చు పెద్ద భారం కాదని చెప్పవచ్చు.

ఎలక్ట్రిక్ వాహనాల వినియోగంలో ఒకప్పుడు ఛార్జింగ్ స్టేషన్ల కొరత పెద్ద సమస్యగా ఉండేది. అయితే ఇప్పుడు పరిస్థితి పూర్తిగా మారిపోయింది. దేశవ్యాప్తంగా ఛార్జింగ్ మౌలిక సదుపాయాలు వేగంగా విస్తరిస్తున్నాయి. ప్ర‌స్తుతం అన్ని ప్ర‌ముఖ సంస్థ‌లు ఫాస్ట్ ఛార్జింగ్ స్టేషన్లను ఏర్పాటు చేస్తున్నాయి. అదనంగా ఇంట్లోనే చార్జ్ చేసుకునే అవకాశం ఉండటంతో ఛార్జింగ్ కోసం ఎక్కువగా ఇబ్బంది పడాల్సిన అవసరం లేదు.

బైక్ ఉన్న ప్ర‌తీ ఒక్క‌రి ద‌గ్గ‌ర ఈ ప్రొడ‌క్ట్ ఉండాల్సిందే.. టైర్ల‌లో గాలి త‌గ్గిందో లేదో ఇట్టే తెలుస్తుంది

Narender Vaitla — Wed, 03 Jun 2026 07:33:51 +0530

Tyre Pressure Indicator: వాహనం సురక్షితంగా నడవాలంటే టైర్లలో సరైన గాలి చాలా ముఖ్యం. అయితే ప్రతి సారి గ్యారేజ్‌కు వెళ్లి గాలి చేయడం కష్టం. ఈ సమస్యకు SARTE టైర్ ప్రెషర్ ఇండికేటర్ వాల్వ్ క్యాప్స్ చెక్ పెడుతాయి. ఇంత‌కీవి ఎలా ప‌నిచేస్తాయంటే.

ఈ వాల్వ్ క్యాప్స్‌లో ప్రత్యేకమైన ప్రెషర్ సెన్సార్ ఉంటుంది. టైర్‌లో గాలి స్థాయిని బట్టి మూడు రంగుల్లో సూచన ఇస్తుంది.

* ఆకుపచ్చ (Green): టైర్‌లో గాలి ఒత్తిడి సరైన స్థాయిలో ఉందని అర్థం.

* పసుపు (Yellow): గాలి కొంత తగ్గింది, చెక్ చేయాల్సిన అవసరం ఉంది.

* ఎరుపు (Red): గాలి ఒత్తిడి చాలా తక్కువగా ఉంది, వెంటనే గాలి నింపాలి. ఈ విధంగా ఒక్క చూపుతోనే టైర్ పరిస్థితిని తెలుసుకోవచ్చు.

ఈ వాల్వ్ క్యాప్స్‌ను అమర్చడానికి ఎలాంటి ప్రత్యేక పరికరాలు అవసరం లేదు. టైర్ వాల్వ్ స్టెమ్‌పై సాధారణ క్యాప్‌లా తిప్పి అమర్చితే సరిపోతుంది. దీనికి ఎలాంటి టూల్స్ అవసరం లేదు. కేవ‌లం కొన్ని సెకన్లలో అమర్చవచ్చు. అవసరమైతే సులభంగా తొలగించవచ్చు. అందువల్ల ఎవరైనా స్వయంగా అమర్చుకోవచ్చు. దృఢమైన నిర్మాణం, అన్ని వాతావరణాలకు అనుకూలంగా ఉంటుంది. SARTE ఈ వాల్వ్ క్యాప్స్‌ను అధిక నాణ్యత కలిగిన మెటల్ అల్లాయ్‌తో తయారు చేశారు. దీంతో తుప్పు పట్టదు, తేమ, దుమ్ము నుంచి రక్షణ ల‌భిస్తుంది. లీకేజీని తగ్గించే డిజైన్, ఎక్కువ కాలం మన్నికగా పనిచేస్తుంది. అలాగే రేడియం గ్లో డిజైన్ ఉండటం వల్ల రాత్రి సమయంలో కూడా సులభంగా కనిపిస్తుంది.

ఈ ప్రెషర్ ఇండికేటర్ క్యాప్స్ యూనివర్సల్ ఫిట్‌తో వస్తాయి. అందువల్ల వివిధ రకాల వాహనాల్లో ఉపయోగించవచ్చు. కార్లు, బైకులు, స్కూటర్లు, మోటార్‌సైకిళ్లు, సైకిళ్లు, ట్రక్కులు ఇలా అన్నింటికీ ఉప‌యోగించ‌వ‌చ్చు. ఒక ప్యాక్‌లో 4 క్యాప్స్ లభిస్తాయి.

ఈ క్యాప్స్ కేవలం టైర్ ప్రెషర్‌ను చూపించడమే కాకుండా వాహనానికి ఆకర్షణీయమైన లుక్‌ను కూడా ఇస్తాయి. సిల్వర్ కలర్ మెటల్ ఫినిష్ కారణంగా వాహనం మరింత స్టైలిష్‌గా కనిపిస్తుంది. అదనంగా కంపెనీ 15 రోజుల రిటర్న్ పాలసీని కూడా అందిస్తోంది. ఉత్పత్తిపై ఏవైనా సమస్యలు ఉంటే రీప్లేస్‌మెంట్ లేదా రిఫండ్ పొందే అవకాశం ఉంటుంది. మొత్తానికి, టైర్లలో గాలి ఒత్తిడిని ఎప్పటికప్పుడు గమనించాలని కోరుకునే వాహనదారులకు SARTE టైర్ ప్రెషర్ ఇండికేటర్ వాల్వ్ క్యాప్స్ తక్కువ ఖర్చుతో ఉపయోగపడే స్మార్ట్ యాక్సెసరీగా చెప్పవచ్చు. ధ‌ర విష‌యానికొస్తే అమెజాన్‌లో రూ. 275కి ల‌భిస్తోంది.

బైక్‌ల‌తో పోల్చితే స్కూటీలు త‌క్కువ మైలేజ్ ఎందుకిస్తాయి.? దీనికి కార‌ణం ఏంటో తెలుసా.?

Narender Vaitla — Thu, 21 May 2026 18:30:03 +0530

Scooty vs Bike Mileage: ప్ర‌స్తుతం స్కూటీల వినియోగం పెరిగింది. యువ‌త కూడా వీటిని వాడుతున్నారు. అయితే బైక్‌ల‌తో పోల్చితే స్కూటీ కంఫ‌ర్ట్‌గా ఉన్న‌ప్ప‌టికీ.. స్కూటీలు త‌క్కువ మైలేజ్ ఇస్తాయ‌ని తెలిసిందే. ఇంత‌కీ దీనికి కార‌ణం ఏంటో ఎప్పుడైనా ఆలోచించారా.?

చాలామంది స్కూటీ, బైక్ రెండింటిలోనూ చిన్న ఇంజిన్‌లే ఉంటాయని భావిస్తారు. కానీ వాస్తవానికి వాటి డిజైన్, పవర్ ట్రాన్స్‌మిషన్ విధానం, బరువు వంటి అంశాలు మైలేజ్‌పై ప్రభావం చూపుతాయి. అందుకే సాధారణంగా ఒకే సామర్థ్యం ఉన్న బైక్‌తో పోలిస్తే స్కూటీ తక్కువ మైలేజ్ ఇస్తుంది.

బైక్‌లలో ఎక్కువగా మాన్యువల్ గేర్‌బాక్స్ ఉంటుంది. రైడర్ అవసరానికి అనుగుణంగా గేర్ మార్చుకోవచ్చు. దీంతో ఇంజిన్‌పై అనవసర ఒత్తిడి తగ్గి ఇంధన వినియోగం కూడా తక్కువగా ఉంటుంది. అదే స్కూటీల్లో CVT (కంటిన్యూస్ వేరియ‌బుల్ ట్రాన్స్‌మిష‌న్‌) అనే ఆటోమేటిక్ గేర్ వ్యవస్థ ఉంటుంది. ఇది ఎప్పటికప్పుడు ఇంజిన్‌ను పని చేయిస్తూ ఉంటుంది. ఫలితంగా ఇంజిన్ ఎక్కువ శక్తిని వినియోగించి పెట్రోల్ ఖర్చు పెరుగుతుంది. అందువల్ల స్కూటీల మైలేజ్ బైక్‌ల కంటే తక్కువగా ఉంటుంది.

స్కూటీలలో సాధారణంగా చిన్న పరిమాణం ఉన్న టైర్లు ఉపయోగిస్తారు. ఇవి రోడ్డుపై ఎక్కువ రోలింగ్ రెసిస్టెన్స్‌ను సృష్టిస్తాయి. అంటే వాహనం ముందుకు కదలడానికి ఇంజిన్ ఎక్కువ శ్రమించాల్సి వస్తుంది. బైక్‌లలో మాత్రం పెద్ద టైర్లు ఉండటం వల్ల ప్రయాణం మరింత సమర్థంగా సాగుతుంది. అలాగే బైక్‌ల సన్నని డిజైన్ గాలిని సులభంగా చీల్చుకుంటూ వెళ్లేలా చేస్తుంది. దీనివల్ల ఇంధన వినియోగం తగ్గి మైలేజ్ మెరుగుపడుతుంది.

స్కూటీల్లో ఇంజిన్ సాధారణంగా వెనుక భాగంలో ఉంటుంది. దీంతో వాహనం బరువు డిస్ట్రిబ్యూష‌న్ బైక్‌లతో పోలిస్తే భిన్నంగా ఉంటుంది. ఈ కారణంగా పవర్ డెలివరీ విధానం మారుతుంది. బైక్‌లలో ఇంజిన్ మధ్య భాగంలో ఉండటం వల్ల బరువు సమతుల్యత మెరుగ్గా ఉంటుంది. ఇంజిన్ శక్తి చక్రాలకు బాగా చేరి ఇంధన వినియోగాన్ని తగ్గించడంలో సహాయపడుతుంది.

మైలేజ్ విషయంలో రైడింగ్ పద్ధతి కూడా చాలా ముఖ్యమైనది. ట్రాఫిక్‌లో తరచూ బ్రేక్ వేయడం, ఒక్కసారిగా వేగం పెంచడం వంటి అలవాట్లు స్కూటీల్లో ఇంధన వినియోగాన్ని మరింత పెంచుతాయి. స్కూటీ మైలేజ్ పెర‌గాలంటే.. స్లోగా యాక్సిలరేట్ చేయాలి, అవసరం లేని వేగ మార్పులను తగ్గించాలి, టైర్లలో సరైన గాలి ఒత్తిడి ఉండేలా చూడాలి, క్రమం తప్పకుండా సర్వీసింగ్ చేయించాలి.

Bike: బైక్‌లో క్రూయిజ్ కంట్రోల్ వ్య‌వ‌స్థ‌.. ఇక‌పై ప్ర‌మాదాలు అస్స‌లు జ‌ర‌గ‌వు

Narender Vaitla — Fri, 05 Jun 2026 10:33:09 +0530

Bike: ద్విచక్ర వాహనాల ప్రపంచంలో సాంకేతికత వేగంగా అభివృద్ధి చెందుతోంది. ఇప్పటికే AI ఆధారిత బైక్‌లు, హైడ్రోజన్ ఇంధనంతో నడిచే వాహనాలపై పరిశోధనలు చేస్తున్న యమహా ఇప్పుడు మరో వినూత్న టెక్నాలజీని తీసుకురావడానికి సిద్ధమవుతోంది.

ప్రస్తుతం కార్లలో అడాప్టివ్ క్రూయిజ్ కంట్రోల్ (ACC) సిస్టమ్ సాధారణంగా కనిపిస్తోంది. ముందున్న వాహనానికి అనుగుణంగా కారు వేగాన్ని తగ్గించడం లేదా పెంచడం ఈ సిస్టమ్ పని. అయితే అదే సాంకేతికతను బైక్‌లలో అమలు చేయడం చాలా క్లిష్టమైన పని. ఎందుకంటే బైక్‌లు రెండు చక్రాలపై మాత్రమే ఆధారపడతాయి. రైడర్ సమతుల్యత కీలకంగా ఉంటుంది. ఈ సవాల్‌ను అధిగమించేందుకు యమహా ప్రత్యేక సాఫ్ట్‌వేర్, సెన్సార్లతో కూడిన కొత్త వ్యవస్థను అభివృద్ధి చేస్తోంది. ఇది అనుభవజ్ఞుడైన రైడర్‌లా పరిస్థితులను అంచనా వేసి స్పందించేలా రూపొందిస్తున్నారు.

యమహా అభివృద్ధి చేస్తున్న ACC (ఆటోమేటిక్ అడాప్టివ్ క్రూయిజ్ కంట్రోల్‌) వ్యవస్థలో రాడార్ సెన్సార్ కీలక పాత్ర పోషిస్తుంది. బైక్ ముందు ఉన్న వాహనం వేగం తగ్గించినప్పుడు లేదా ట్రాఫిక్ కారణంగా నెమ్మదిగా కదులుతున్నప్పుడు ఈ రాడార్ వెంటనే గుర్తిస్తుంది. ఆ సమాచారాన్ని ఎలక్ట్రానిక్ కంట్రోల్ యూనిట్ (ECU) విశ్లేషించి థ్రాటిల్‌ను ఆటోమేటిక్‌గా తగ్గిస్తుంది. దీంతో బైక్ వేగం క్రమంగా తగ్గుతుంది. ఆకస్మికంగా స్పీడ్ తగ్గకపోవడంతో రైడర్‌కు అసౌకర్యం కలగదు.

ఈ టెక్నాలజీలో మరో ముఖ్యమైన అంశం Y-AMT (య‌మ‌హా ఆటోమేటెడ్ మ్యాన్యువ‌ల్ ట్రాన్స్‌మిష‌న్‌). ముందున్న వాహనం కారణంగా వేగం తగ్గాల్సి వచ్చినప్పుడు ఈ సిస్టమ్ స్వయంగా గేర్‌లను మార్చుతుంది. దీంతో బైక్ ఇంజిన్‌పై ఒత్తిడి తగ్గుతుంది. అలాగే తక్కువ వేగంలో ప్రయాణిస్తున్నప్పుడు ఇంజిన్ ఆగిపోవడం వంటి సమస్యలు కూడా రాకుండా ఉంటుంది. రైడర్ గేర్ మార్చాల్సిన అవసరం లేకుండా ప్రయాణం మరింత సౌకర్యవంతంగా మారుతుంది.

వేగం తగ్గించడం, గేర్ మార్చడం ద్వారా పరిస్థితి అదుపులోకి రాకపోతే ఈ సిస్టమ్ నేరుగా బ్రేక్‌లను ఉపయోగిస్తుంది. ముందు, వెనుక చక్రాల బ్రేక్‌లను సమన్వయంతో ఉపయోగించి బైక్ వేగాన్ని సురక్షితంగా త‌గ్గిస్తుంది. అంతేకాదు, బ్రేకింగ్ సమయంలో బైక్ ముందుభాగం ఎక్కువగా కిందికి వంగకుండా ఉండేందుకు ఎలక్ట్రానిక్ సస్పెన్షన్‌ను కూడా ఆటోమేటిక్‌గా అడ్జెస్ట్‌ చేస్తుంది. దీంతో రైడర్‌కు ఆకస్మిక షాక్‌లు తగలకుండా బైక్ స్థిరత్వం మెరుగుపడుతుంది.

యమహా ప్రకారం ఈ టెక్నాలజీ రోడ్డు ప్రమాదాలను గణనీయంగా తగ్గించే అవకాశం ఉంది. చాలాసార్లు ముందున్న వాహనం అకస్మాత్తుగా బ్రేక్ వేస్తే రైడర్లు గందరగోళానికి గురై తప్పుగా స్పందిస్తారు. అలాంటి సందర్భాల్లో ఈ వ్యవస్థ ముందుగానే స్పందించి బైక్‌ను నియంత్రించగలదు. ప్రస్తుతం కొన్ని ప్రీమియం బైక్‌లైన BMW R 1300 GS, Ducati Multistrada V4 మోడళ్లలో ACC సిస్టమ్ అందుబాటులో ఉంది. అయితే వాటిలో అత్యవసర పరిస్థితుల్లో రైడర్ స్వయంగా బ్రేక్ వేయాల్సి ఉంటుంది. యమహా కొత్త టెక్నాలజీ మాత్రం అవసరమైతే పూర్తిగా ఆటోమేటిక్‌గా బ్రేకింగ్ చేయగలదని చెబుతోంది. ఈ టెక్నాలజీ ఉత్పత్తి దశకు చేరుకుంటే భవిష్యత్తులో బైక్ రైడింగ్ మరింత స్మార్ట్‌గా, సురక్షితంగా మారే అవకాశాలు కనిపిస్తున్నాయి.

ఎలక్ట్రిక్ స్కూటర్లకు లైసెన్స్ ఎందుకు అవసరం ఉండదు.. ఈ డౌట్ ఎప్పుడైనా వచ్చిందా.?

Narender Vaitla — Mon, 22 Jun 2026 10:36:48 +0530

Electric Scooter: భారత్‌లో ఎలక్ట్రిక్ వాహనాల వినియోగం పెరుగుతోంది. అయితే కొన్ని ఎలక్ట్రిక్ స్కూటర్లను నడపడానికి డ్రైవింగ్ లైసెన్స్ లేదా రిజిస్ట్రేషన్ అవసరం లేకపోవడం చాలా మందికి ఆశ్చర్యాన్ని కలిగిస్తుంది. మ‌రి దీనికి కార‌ణం ఏంటో ఎప్పుడైనా ఆలోచించారా

కేంద్ర ప్రభుత్వం ఎలక్ట్రిక్ స్కూటర్లను వాటి వేగం, మోటార్ సామర్థ్యం ఆధారంగా వర్గీకరించింది. కొన్ని స్కూటర్లు "లో-స్పీడ్ ఎలక్ట్రిక్ వాహనాలు" కేటగిరీలోకి వస్తాయి. సాధారణంగా గంటకు 25 కిలోమీటర్ల కంటే తక్కువ వేగంతో ప్రయాణించే ఎలక్ట్రిక్ స్కూటర్లకు డ్రైవింగ్ లైసెన్స్, ఆర్టీఓ రిజిస్ట్రేషన్ అవసరం ఉండదు. ఇలాంటి వాహనాలను తక్కువ ప్రమాదకర వాహనాలుగా ప్రభుత్వం పరిగణిస్తుంది. అందుకే వాటికి ప్రత్యేక మినహాయింపులు కల్పించింది

దేశంలో ఎలక్ట్రిక్ వాహనాల వినియోగాన్ని పెంచడం ప్రభుత్వ ప్రధాన లక్ష్యం. కాలుష్యాన్ని తగ్గించడం, ఇంధన వినియోగాన్ని నియంత్రించడం కోసం ఈవీలను ప్రోత్సహిస్తోంది. లో-స్పీడ్ స్కూటర్లు సాధారణంగా కాలనీలు, పట్టణ ప్రాంతాలు, చిన్న దూరాల ప్రయాణాలకు ఉపయోగపడతాయి. వీటి వేగం తక్కువగా ఉండటంతో ప్రమాదాల అవకాశం కూడా తక్కువగా ఉంటుందని ప్రభుత్వం భావిస్తోంది. అందుకే ప్రజలు సులభంగా ఈ వాహనాలను ఉపయోగించేందుకు లైసెన్స్ నిబంధనలను సడలించింది.

డ్రైవింగ్ లైసెన్స్ అవసరం లేదని చెప్పడం వల్ల ట్రాఫిక్ నిబంధనలు పాటించాల్సిన అవసరం లేదని కాదు. ఎలక్ట్రిక్ స్కూటర్ అయినా, ఇతర వాహనం అయినా రోడ్డు భద్రతా నియమాలు అందరికీ ఒకేలా వర్తిస్తాయి. ప్రయాణ సమయంలో హెల్మెట్ ధరించడం, ట్రాఫిక్ సిగ్నల్స్ పాటించడం, అతివేగంగా నడపకపోవడం, రోడ్డు భద్రతా నిబంధనలను పాటించ‌డం వంటివి క‌చ్చితంగా పాటించాల్సిందే.

అన్ని ఎలక్ట్రిక్ స్కూటర్లకు ఈ మినహాయింపు వర్తించదు. గంటకు 25 కిలోమీటర్ల కంటే ఎక్కువ వేగంతో వెళ్లే హై-స్పీడ్ ఎలక్ట్రిక్ స్కూటర్లు సాధారణ మోటార్ వాహనాల కిందకు వస్తాయి. అలాంటి స్కూటర్లకు డ్రైవింగ్ లైసెన్స్, ఆర్టీఓ రిజిస్ట్రేషన్, వాహన బీమా, నంబర్ ప్లేట్ తప్పనిసరిగా ఉండాలి. లేకపోతే చట్టపరమైన చర్యలు ఎదుర్కోవాల్సి ఉంటుంది.

ప్రభుత్వం తీసుకొచ్చిన ఈ సడలింపు వల్ల విద్యార్థులు, ఉద్యోగులు, చిన్న పట్టణాల్లో నివసించే ప్రజలు ఎక్కువగా లాభపడుతున్నారు. లైసెన్స్ పొందడానికి సమయం, ఖర్చు పెట్టాల్సిన అవసరం లేకుండా తక్కువ ధరలో ఎలక్ట్రిక్ స్కూటర్ కొనుగోలు చేసి ఉపయోగించగలుగుతున్నారు. అదే సమయంలో పర్యావరణహిత రవాణాను ప్రోత్సహించడంలో కూడా ఈ విధానం కీలకంగా మారింది. అయితే లైసెన్స్ మినహాయింపు ఉన్నా, భద్రత విషయంలో మాత్రం ఎలాంటి రాజీ పడకూడదని నిపుణులు సూచిస్తున్నారు.

పెట్రోల్ ధ‌ర‌లు ఎంతైనా పెర‌గ‌ని.. 176 కి.మీల మైలేజ్ ఇచ్చే ఈ ఎలక్ట్రిక్ స్కూటీ ధ‌ర ల‌క్ష‌లోపే

Narender Vaitla — Tue, 23 Jun 2026 17:34:03 +0530

Ola S1 X 3kWh: పెరుగుతున్న పెట్రోల్ ధరల నేపథ్యంలో Ola S1 X 3kWh ఎలక్ట్రిక్ స్కూటర్ ప్రజలకు మంచి ఛాయిస్ గా మారింది. దీని ఎక్స్-షోరూమ్ ధర రూ. 97,381గా ఉంది. ఈ స్కూటీకి సంబంధించిన పూర్తి వివరాలు ఇప్పుడు తెలుసుకుందాం.

పెరుగుతున్న పెట్రోల్ ధరల నేపథ్యంలో Ola S1 X 3kWh ఎలక్ట్రిక్ స్కూటర్ ప్రజలకు ఆకర్షణీయమైన ఎంపికగా నిలుస్తోంది. దీని ఎక్స్-షోరూమ్ ధర రూ. 97,381. ఇది ఒక్క ఛార్జ్‌పై 176 కిలోమీటర్ల IDC రేంజ్‌ను, 123 kmph గరిష్ట వేగాన్ని అందిస్తుంది. డిజిటల్ డిస్‌ప్లే, నావిగేషన్, క్రూయిజ్ కంట్రోల్ వంటి స్మార్ట్ ఫీచర్లతో కూడిన ఈ స్కూటర్, పెరుగుతున్న ఇంధన ఖర్చుల నుంచి ఉపశమనం పొందాలనుకునే వారికి సరైన బడ్జెట్-ఫ్రెండ్లీ ఎంపికగా చెప్పొచ్చు.

పెట్రోల్ ధరలు నిరంతరం పెరుగుతున్నందున, ఎలక్ట్రిక్ స్కూటర్లు ఇప్పుడు ప్రజలకు మొదటి ఎంపికగా మారుతున్నాయి. మీరు ప్రతిరోజూ ఆఫీసు, కాలేజీ లేదా నగరం లోపల ప్రయాణిస్తున్నట్లయితే, Ola S1 X 3kWh మీకు మంచి ఛాయిస్ గా చెప్పొచ్చు. ఈ స్కూటర్ భారీ రేంజ్, శక్తివంతమైన వేగం, బడ్జెట్-ఫ్రెండ్లీ ధరతో వస్తుంది.

Ola S1 X 3kWh ఎక్స్-షోరూమ్ ధర రూ. 97,381. ఈ ధరకు లభించే ఫీచర్లు, రేంజ్ దాని సెగ్మెంట్‌లో దీన్ని ప్రత్యేకంగా నిలుపుతాయి. తక్కువ ఖర్చుతో ఎలక్ట్రిక్ స్కూటర్‌ను కొనుగోలు చేయాలనుకునే కస్టమర్‌లకు ఈ మోడల్ ఆకర్షణీయమైన ఎంపికగా ఉంటుంది.

కంపెనీ ప్రకారం, Ola S1 X 3kWh ఒకసారి పూర్తి ఛార్జ్ అయిన తర్వాత 176 కిలోమీటర్ల వరకు IDC రేంజ్‌ను అందిస్తుంది. రోజువారీ ఆఫీసుకు వెళ్లే వారికి లేదా ఎక్కువ దూరం ప్రయాణించే వారు తరచుగా ఛార్జింగ్ చేయాల్సిన పని ఉండదు. ఈ ఎలక్ట్రిక్ స్కూటర్‌లో 3kWh లిథియం-అయాన్ బ్యాటరీని అమర్చారు. రోజువారీ వినియోగాన్ని దృష్టిలో ఉంచుకొని రూపొందించిన ఈ బ్యాటరీ నగరం లోపల ప్రయాణించే వినియోగదారులకు అనుకూలంగా ఉంటుంది.

Ola S1 X 3kWh ప్రత్యేకతలలో దాని గరిష్ట వేగం కూడా ఒకటి. ఈ స్కూటీ 123 కిలోమీటర్ల వేగంతో దూసుకెళ్తుంది. ఎక్కువ వేగం ఇష్టపడే యువకులకు ఈ ఫీచర్ ప్రత్యేక ఆకర్షణగా చెప్పొచ్చు. మీ రోజువారీ ప్రయాణం 30 నుంచి 50 కిలోమీటర్ల మధ్య ఉన్నట్లయితే, ఈ స్కూటర్ మీకు మంచి ఎంపికగా ఉంటుంది.

ఆఫీసుతో పాటు కాలేజీకి వెళ్లే వారికి ఈ స్కూటర్ అద్భుతమైన ప్రయాణ అనుభవాన్ని అందిస్తుంది. దీని విస్తృతమైన రేంజ్, తక్కువ నిర్వహణ ఖర్చులతో, Ola S1 X 3kWh దైనందిన ప్రయాణాలను సౌకర్యవంతంగా చేస్తుంది. పెట్రోల్ ఖర్చులు ఆదా చేయడమే కాకుండా, పర్యావరణ పరిరక్షణకు కూడా ఇది సహాయపడుతుంది.

అదిరిపోయే ఆధునిక ఫీచర్లు

Ola S1 X లో డిజిటల్ డిస్‌ప్లే, నావిగేషన్ సపోర్ట్, క్రూయిజ్ కంట్రోల్, రైడింగ్ మోడ్‌లు, స్మార్ట్ కనెక్టివిటీ వంటి అనేక ఆధునిక ఫీచర్లు ఉన్నాయి. ఈ సౌకర్యాలు రైడింగ్‌ను మరింత సులభతరంతో పాటు సౌకర్యవంతంగా చేస్తాయి. నిరంతరం పెరుగుతున్న పెట్రోల్ ఖర్చులతో ఇబ్బంది పడుతున్న వారికి Ola S1 X ఒక అద్భుతమైన ప్రత్యామ్నాయంగా నిలుస్తోంది.

EV scooter: ఫోన్ కంటే తక్కువ ధరలో స్కూటీ.. 150 కిలోమీటర్ల మైలేజ్, లైసెన్స్, రిజిస్ట్రేషన్ అవసరం లేదు

Narender Vaitla — Fri, 19 Jun 2026 14:57:48 +0530

EV scooter: భారత్‌లో ఎలక్ట్రిక్ వాహనాల వినియోగం వేగంగా పెరుగుతోంది. ముఖ్యంగా చిన్న పట్టణాలు, గ్రామీణ ప్రాంతాల్లో తక్కువ ధరలో లభించే ఎలక్ట్రిక్ స్కూటర్లకు మంచి డిమాండ్ ఉంది. అలాంటి కొన్ని ప్రముఖ ఎలక్ట్రిక్ స్కూటర్ల వివరాలు ఇప్పుడు తెలుసుకుందాం.

మోటార్ వెహికల్ యాక్ట్ 1988 ప్రకారం 250W లోపు మోటార్ సామర్థ్యం, గంటకు 25 కిలోమీటర్లలోపు గరిష్ట వేగం ఉన్న ఎలక్ట్రిక్ స్కూటర్లకు రిజిస్ట్రేషన్, డ్రైవింగ్ లైసెన్స్ అవసరం ఉండదు. దీంతో విద్యార్థులు, వృద్ధులు, గ్రామీణ ప్రాంతాల ప్రజలు వీటిని ఎక్కువగా కొనుగోలు చేస్తున్నారు.

ఆంపియర్ రియో ఎలైట్ ధర సుమారు రూ.42,999 నుంచి ప్రారంభమవుతుంది. ఇందులో 250W BLDC హబ్ మోటార్, గరిష్ట వేగం 25 కిమీ/గంట, ఒక్కసారి చార్జ్ చేస్తే 55–60 కిమీ రేంజ్, 5 నుంచి 6 గంటల్లో పూర్తి చార్జ్, బ్యాటరీపై 2 ఏళ్ల వారంటీ, స్పీడోమీటర్, ప్యాసింజర్ ఫుట్‌రెస్ట్, ఛార్జింగ్ పోర్ట్ వంటి ప్రాథమిక ఫీచర్లు ఇందులో ఉన్నాయి.

ఒకినావా R30 ధర సుమారు రూ.58,992 గా ఉంది. ఇందులో 250W BLDC మోటార్, గరిష్ట వేగం 25 కిమీ/గంట, ఒక్కసారి చార్జ్‌తో 60 కిమీ రేంజ్, 4 నుంచి 5 గంటల్లో చార్జ్ అవుతుంది. ఇందులో LED లైట్లు, DRL, యాంటీ-థెఫ్ట్ అలారం, సెంట్రల్ లాకింగ్ వంటి ఆధునిక ఫీచర్లు ఉన్నాయి.

లోహియా ఓమా స్టార్ ప్రారంభ ధర సుమారు రూ.40,850 గా ఉంది. ఈ స్కూటీలో 250W మోటార్, 70 కిమీ వరకు రేంజ్, 4.5 నుంచి 5 గంటల ఛార్జింగ్ సమయం పడుతుంది. అలాగే టర్న్ ఇండికేటర్లు, బ్యాటరీ స్టేటస్ ఇండికేటర్, బేసిక్ లైటింగ్ సిస్టమ్ వంటి ఫీచర్లు ఉన్నాయి.తక్కువ బడ్జెట్‌లో ఎక్కువ రేంజ్ కోరుకునేవారికి ఇది మంచి ఆప్షన్ గా చెప్పవచ్చు.

కొమాకి XGT KM ధర సుమారు రూ.42,500. ఇతర లో-స్పీడ్ స్కూటర్లతో పోలిస్తే ఇది కొంచెం భిన్నంగా ఉంటుంది. ఇందులో 130 నుంచి 150 కిమీ వరకు రేంజ్, గరిష్ట వేగం 60 కిమీ/గంట వరకు, LED లైటింగ్, డిస్క్ బ్రేకులు, ట్యూబ్‌లెస్ టైర్లు వంటి ఫీచర్లు ఉన్నాయి. అయితే దీని వేగం 25 కిమీ/గంట కంటే ఎక్కువగా ఉండే అవకాశం ఉన్నందున, కొనుగోలు చేసే ముందు లైసెన్స్, రిజిస్ట్రేషన్ నిబంధనలను తప్పనిసరిగా పరిశీలించాలి.

గమనిక: వాహనాల ధరలు నగరం, డీలర్, ఆఫర్లను బట్టి మారవచ్చు. కొనుగోలు ముందు అధికారిక డీలర్ వద్ద తాజా వివరాలు తెలుసుకోవడం మంచిది.

Hero Super Splendor: తక్కువ ధరలోనే లీటరుకు 72km మైలేజీ ఇచ్చే హీరో కొత్త సూపర్ బైక్ ఇది.. ఫీచర్లు చూస్తే మైండ్ బ్లాకే!

Mahesh Rajamoni — Wed, 27 May 2026 19:12:44 +0530

Hero Super Splendor XTEC 2.0: లీటరుకు 72 కిమీ మైలేజ్, అదిరిపోయే బ్లూటూత్ ఫీచర్లతో హీరో సూపర్ స్ప్లెండర్ XTEC 2.0 మార్కెట్లోకి వచ్చేసింది. అద్భుతమైన ఫీచర్లు ఉన్న ఈ హీరో బైకు ధర, ఇతర పూర్తి వివరాలు ఇక్కడ తెలుసుకుందాం.

1990ల కాలం నాటి నుంచి ఇండియన్ మిడిల్ క్లాస్ గుండెల్లో ‘స్ప్లెండర్’ అంటే ఒక ఎమోషన్. నమ్మకానికి మరో పేరైన హీరో మోటోకార్ప్, మార్కెట్లోకి సరికొత్త అవతారంలో హీరో సూపర్ స్ప్లెండర్ XTEC 2.0 (Hero Super Splendor XTEC 2.0) మోడల్‌ను లాంచ్ చేసింది.

నేటి జనరేషన్ యువకులకు నచ్చేలా అల్ట్రా మోడ్రన్ ఫీచర్లు, అదిరిపోయే లుక్స్‌తో ఈ బైక్‌ను డిజైన్ చేశారు. దీని ఢిల్లీ ఎక్స్-షోరూమ్ ధరను రూ. 86,500 గా కంపెనీ అనౌన్స్ చేసింది. ఈ సరికొత్త బైక్ ఫీచర్లు చూస్తే మాత్రం ఎవరైనా ఫిదా అవ్వాల్సిందే.

డిజైన్ పరంగా హీరో ఈసారి గట్టిగానే ప్లాన్ చేసింది. ఓల్డ్ మోడల్స్‌తో పోలిస్తే ఇందులో రిఫ్రెష్డ్ డ్యూయల్-టోన్ గ్రాఫిక్స్, స్టైలిష్ 3D ఎంబ్‌లమ్, స్పోర్టీ రిమ్ టేపులు యాడ్ చేశారు. దీనివల్ల బైక్‌కు ఒక ప్రీమియం, మాస్ లుక్ వచ్చింది.

అంతేకాదు, లాంగ్ రైడ్స్ వెళ్ళినప్పుడు కూడా సూపర్ కంఫర్ట్ ఇచ్చేలా ‘డ్యూయల్-టెక్స్చర్డ్ స్టిచ్డ్ సీటు’ను ఇందులో అమర్చారు. రోడ్డుపై వెళ్తుంటే అందరి చూపు దీనివైపే పడటం గ్యారెంటీ మరి.

ఈ రోజుల్లో బండి కొనాలంటే మొదట చూసేది మైలేజ్. ఈ విషయంలో సూపర్ స్ప్లెండర్ XTEC 2.0 కింగ్ అని చెప్పొచ్చు. ఇందులో ఉన్న 124.7 సీసీ సింగిల్ సిలిండర్ ఎయిర్ కూల్డ్ ఇంజిన్.. 10.7 bhp పవర్, 10.6 Nm టాప్ టార్క్‌ను జనరేట్ చేస్తుంది.

అడ్వాన్స్డ్ ప్రోగ్రామ్డ్ ఫ్యూయల్ ఇంజెక్షన్ (APFI) టెక్నాలజీతో పాటు హీరో సిగ్నేచర్ i3S (ఐడల్ స్టాప్-స్టార్ట్) సిస్టమ్ వల్ల ఈ బైక్ లీటరుకు ఏకంగా 72 కిలోమీటర్ల మైలేజ్ ఇస్తుందని కంపెనీ చెబుతోంది.

టెక్నాలజీ విషయానికి వస్తే ఈ బైక్ నెక్స్ట్ లెవెల్ అని చెప్పాలి. ఇందులో బ్లూటూత్ కనెక్టివిటీ ఉన్న ఫుల్లీ డిజిటల్ ఇన్‌స్ట్రుమెంట్ క్లస్టర్‌ను సెట్ చేశారు. ప్రయాణంలో ఉన్నప్పుడు మీ ఫోన్‌కు వచ్చే ఇన్‌కమింగ్ కాల్స్, ఎస్ఎంఎస్ నోటిఫికేషన్లు, మిస్డ్ కాల్ అలర్ట్లతో పాటు ఫోన్ బ్యాటరీ స్టేటస్‌ను కూడా బైక్ స్క్రీన్‌పైనే చూసుకోవచ్చు.

వీటితో పాటు రియల్ టైమ్ మైలేజ్ ఇండికేటర్, లో-ఫ్యూయల్ అలర్ట్ కూడా ఉన్నాయి. అలాగే జర్నీలో మొబైల్ ఛార్జింగ్ అయిపోతే టెన్షన్ పడకుండా USB టైప్-సి ఛార్జింగ్ పోర్ట్ కూడా ఇచ్చారు.

రైడర్ల సేఫ్టీ కోసం హీరో మోటోకార్ప్ ఈ వేరియంట్‌లో అదిరిపోయే అప్‌డేట్స్ ఇచ్చింది. సూపర్ స్ప్లెండర్ సిరీస్‌లోనే ఫస్ట్ టైమ్ ఇందులో హజార్డ్ లైట్లను ప్రవేశపెట్టారు. దట్టమైన పొగమంచు లేదా వర్షం పడేటప్పుడు ఈ లైట్లు ఎంతగానో యూజ్ అవుతాయి.

బెస్ట్ బ్రేకింగ్ కోసం ఫ్రంట్ డిస్క్ బ్రేక్, ట్రాఫిక్‌లో ఈజీగా బండిని ఆఫ్ చేయడానికి హ్యాండిల్‌బార్‌పైనే ఇంజిన్ కిల్ స్విచ్ ఇచ్చారు. స్మూత్ రైడింగ్ కోసం ముందు వైపు టెలిస్కోపిక్ సస్పెన్షన్ ఉంది.

ఈ సరికొత్త బైక్ మొత్తం ఐదు సూపర్ స్టైలిష్ కలర్ ఆప్షన్లలో దొరుకుతుంది. గ్లోసీ బ్లాక్, క్యాండీ బ్లేజింగ్ రెడ్, మ్యాట్ యాక్సిస్ గ్రే, మ్యాట్ నెక్సస్ బ్లూ, మ్యాట్ చెస్ట్‌నట్ బ్రౌన్ రంగులలో ఇది అందుబాటులో ఉంది. దేశవ్యాప్తంగా ఉన్న హీరో మోటోకార్ప్ షోరూమ్స్‌లో ఈ సరికొత్త XTEC 2.0 బైక్స్ సేల్స్‌కు రెడీగా ఉన్నాయి. స్టైల్, మైలేజ్, తక్కువ బడ్జెట్‌లో మంచి బైక్ కావాలనుకునే వారికి ఇది పర్ఫెక్ట్ ఛాయిస్.

మాటలతో కంట్రోల్ చేసే ఎలక్ట్రిక్ స్కూటర్.. రోడ్డుపై గుంతలు ఉంటే ముందే హెచ్చరిస్తుంది

Narender Vaitla — Wed, 17 Jun 2026 10:04:48 +0530

Ather: ఎలక్ట్రిక్ టూ వీలర్ తయారీ సంస్థ అథ‌ర్ ఎన‌ర్జీ త‌న ప్రముఖ స్కూటర్ మోడళ్లైన Ather Rizta, Ather 450 Series కోసం కొత్త AtherStack 7 సాఫ్ట్‌వేర్ అప్‌డేట్‌ను విడుదల చేసింది. ఈ అప్‌డేట్‌తో వాయిస్ కమాండ్ త పాటు మరెన్నో కొత్త ఫీచర్లు వచ్చాయి.

కొత్త వాయిస్ కమాండ్ ఫీచర్ ద్వారా రైడర్ తన మాట‌ల‌తో స్కూటర్‌కు ఆదేశాలు ఇవ్వవచ్చు. నావిగేషన్ ప్రారంభించడం, ఫోన్ కాల్స్ చేయడం, మ్యూజిక్ ప్లే చేయడం వంటి పనుల కోసం స్క్రీన్‌ను పదే పదే తాకాల్సిన అవసరం ఉండదు. సాధారణ సంభాషణ భాషను అర్థం చేసుకునేలా ఈ వ్యవస్థను రూపొందించారు. దీంతో ప్రయాణం చేస్తున్నప్పుడు రోడ్డు మీదే దృష్టి నిలుపుకోవచ్చు. ముఖ్యంగా నగరాల్లో రోజూ ప్రయాణించే వారికి ఇది చాలా ఉపయోగపడుతుంది.

ఈ అప్‌డేట్‌ను OTA (Over-The-Air) విధానంలో అందిస్తున్నారు. అంటే స్కూటర్ యజమానులు సర్వీస్ సెంటర్‌కు వెళ్లాల్సిన అవసరం లేదు. ఇంటర్నెట్ ద్వారా స్కూటర్ సాఫ్ట్‌వేర్ దానంత‌ట‌దే అప్‌డేట్ అవుతుంది. దీంతో ఇప్పటికే ఈ మోడళ్లను ఉపయోగిస్తున్న కస్టమర్లు కూడా కొత్త ఫీచర్లను సులభంగా పొందవచ్చు.

AtherStack 7లో అత్యంత ఆసక్తికరమైన ఫీచర్ Pothole Alerts. స్కూటర్‌లో అమర్చిన సెన్సర్లు రోడ్డుపై ఉన్న గుంతలను గుర్తించి ముందుగానే రైడర్‌కు సమాచారం ఇస్తాయి. హెచ్చరిక కేవలం డిస్‌ప్లేలో మాత్రమే కాకుండా వాయిస్ అలర్ట్ రూపంలో కూడా వస్తుంది. దీంతో ఆకస్మికంగా గుంతలు ఎదురై ప్రమాదాలు జరిగే అవకాశాలు తగ్గుతాయి.

కొత్తగా తీసుకొచ్చిన క్రాష్ అల‌ర్ట్స్‌ ఫీచర్ కూడా ప్రత్యేక ఆకర్షణగా నిలుస్తోంది. స్కూటర్‌కు తీవ్రమైన ప్రమాదం జరిగితే రైడర్ లైవ్ లొకేషన్‌ను అత్యవసర కాంటాక్ట్‌ నంబర్లకు పంపే సామర్థ్యం దీనికి ఉంది. అంతేకాదు, చిన్న షాక్‌లకు, తీవ్రమైన ప్రమాదాలకు మధ్య తేడాను కూడా ఈ వ్యవస్థ గుర్తించగలదని కంపెనీ తెలిపింది. అవసరమైతే స్కూటర్ స్క్రీన్‌పై ఎమర్జెన్సీ కాంటాక్ట్ వివరాలు కూడా చూపిస్తుంది.

స్కూటర్ భద్రత కోసం పార్క్‌సేఫ్‌, లాక్ సేఫ్ ఫీచ‌ర్ల‌ను కూడా యాడ్ చేశారు. స్కూటర్‌ను టోయింగ్ చేసే అవకాశం ఉన్న ప్రదేశంలో పార్క్ చేస్తే పార్క్‌సేఫ్‌ హెచ్చరిస్తుంది. ఎవరైనా స్కూటర్‌ను అనుమానాస్పదంగా తాకినా లేదా దొంగతనం చేయడానికి ప్రయత్నించినా లాక్‌సేఫ్‌ వెంటనే యజమాని మొబైల్‌కు అలర్ట్ పంపుతుంది. అథ‌ర్ యాప్ ద్వారా స్కూటర్‌ను రిమోట్‌గా లాక్ చేయడం లేదా పనిచేయకుండా నిలిపివేయడం కూడా సాధ్యమవుతుంది. అలాగే జరుగుతున్న ఛార్జింగ్ ప్రక్రియను కూడా దూరం నుంచే ఆపేయవచ్చు. ఈ కొత్త ఫీచర్లతో Ather స్కూటర్లు మరింత స్మార్ట్‌గా, భద్రంగా మారనున్నాయని కంపెనీ చెబుతోంది

ఎలక్ట్రిక్ స్కూటర్ కొనే ప్లాన్‌లో ఉన్నారా.? ఈ విష‌యాలు తెలుసుకోక‌పోతే ఇబ్బందులు త‌ప్ప‌వు

Narender Vaitla — Sun, 17 May 2026 21:33:50 +0530

Electric Scooter Tips: ప్ర‌స్తుతం ఎల‌క్ట్రిక్ స్కూట‌ర్ల‌కు డిమాండ్ పెరుగుతోంది. తక్కువ ఖర్చుతో ప్రయాణం చేసే వీలు ఉండ‌డంతో ఎక్కువ మంది ఆస‌క్తి చూపిస్తున్నారు. అయితే సరైన సమాచారం లేకుండా తొందరపడి కొనుగోలు చేస్తే తర్వాత ఇబ్బందులు ఎదురయ్యే అవకాశం ఉంటుంది

ఎలక్ట్రిక్ స్కూటర్‌లో అత్యంత ముఖ్యమైన భాగం బ్యాటరీ. అందుకే మంచి నాణ్యత ఉన్న లిథియమ్-అయాన్ బ్యాటరీ ఉన్న మోడళ్లను ఎంపిక చేసుకోవడం మంచిది. ఇవి ఎక్కువకాలం పనిచేయడమే కాకుండా భద్రత పరంగా కూడా మెరుగ్గా ఉంటాయి. అలాగే స్కూటర్ ఇచ్చే రేంజ్‌ను కూడా పరిశీలించాలి. కంపెనీలు చెప్పే ARAI లేదా IDC రేంజ్ వివరాలు చూసి, మీ రోజువారీ ప్రయాణానికి కాస్త ఎక్కువ రేంజ్ ఉన్న వాహనాన్ని తీసుకోవడం మంచిది. బ్యాటరీపై కనీసం 3 నుంచి 5 సంవత్సరాల వారంటీ ఉండటం కూడా ముఖ్యమైన విషయం.

స్కూటర్ మోటార్ పవర్ కూడా చాలా కీలకం. నగరంలో చిన్న దూరాల కోసం ఉపయోగిస్తే సాధారణ పవర్ సరిపోతుంది. కానీ ఇద్దరు కలిసి ప్రయాణించడం లేదా ఎత్తైన రోడ్లపై వెళ్లాల్సి వస్తే ఎక్కువ పవర్ ఉన్న మోటార్ అవసరం అవుతుంది. కేవలం ప్రకటనలు చూసి కొనకుండా తప్పనిసరిగా టెస్ట్ రైడ్ చేయాలి. అప్పుడే స్కూటర్ స్పీడ్, పికప్, బ్యాలెన్స్ ఎలా ఉందో అర్థమవుతుంది. ప్రయాణంలో సౌకర్యంగా ఉందా లేదా అన్నది కూడా ముందే తెలుసుకోవచ్చు.

ఎలక్ట్రిక్ స్కూటర్ కొనేటప్పుడు దాని బాడీ బలంగా ఉందా లేదా చూసుకోవాలి. మంచి సస్పెన్షన్, నాణ్యమైన బ్రేకింగ్ సిస్టమ్ ఉండటం చాలా అవసరం. ముఖ్యంగా డిస్క్ బ్రేకులు ఉన్న మోడళ్లు భద్రత పరంగా మెరుగ్గా ఉంటాయి. అదనంగా LED లైట్స్, డిజిటల్ మీటర్, యాంటీ-థెఫ్ట్ ఫీచర్లు వంటి సదుపాయాలు ఉంటే ప్రయాణం మరింత సౌకర్యంగా ఉంటుంది. రాత్రి ప్రయాణాల్లో కూడా ఇవి ఉపయోగపడతాయి.

కొన్ని స్కూటర్లు పూర్తిగా ఛార్జ్ కావడానికి ఎక్కువ సమయం తీసుకుంటాయి. అందుకే తక్కువ సమయంలో ఛార్జ్ అయ్యే మోడళ్లను ఎంపిక చేసుకోవడం మంచిది. బ్యాటరీ రిమూవబుల్‌గా ఉంటే ఇంట్లోనే సులభంగా ఛార్జ్ చేసుకోవచ్చు. అపార్ట్‌మెంట్‌లలో నివసించే వారికి ఇది మరింత ఉపయోగకరంగా ఉంటుంది. రోజూ ఉపయోగించే ముందు ఛార్జింగ్ సౌకర్యం ఎలా ఉందో తెలుసుకోవాలి.

స్కూటర్ కొనేటప్పుడు కేవలం ధర మాత్రమే కాదు, తర్వాత వచ్చే ఖర్చులను కూడా ఆలోచించాలి. మీ నగరంలో కంపెనీ సర్వీస్ సెంటర్ ఉందా లేదా తెలుసుకోవాలి. స్పేర్ పార్ట్స్ సులభంగా దొరుకుతున్నాయా అన్నది కూడా పరిశీలించాలి. నిర్వహణ ఖర్చు, వారంటీ, బ్యాటరీ మార్పిడి ఖర్చు వంటి అంశాలు కూడా భవిష్యత్తులో ప్రభావం చూపుతాయి. అందుకే నమ్మకమైన బ్రాండ్‌ను ఎంపిక చేసుకుంటే ఎక్కువకాలం ఇబ్బందులు లేకుండా వాహనాన్ని ఉపయోగించుకోవచ్చు.

TVS iQube: ఓలా, ఏథ‌ర్‌ బ‌లాదూర్‌.. 10 ల‌క్ష‌ల మంది కొన్న ఎల‌క్ట్రిక్ స్కూట‌ర్‌లో క‌ళ్లు చెదిరే ఫీచ‌ర్లు

Narender Vaitla — Sun, 14 Jun 2026 14:54:31 +0530

TVS iQube: భారత్‌లో ఎలక్ట్రిక్ వాహనాల (EV) వినియోగం రోజురోజుకూ పెరుగుతోంది. ఈ నేపథ్యంలో టీవీఎస్ మోటార్ కంపెనీ భారీ రికార్డు సృష్టించింది. దేశంలో మొత్తం 10 లక్షల ఎలక్ట్రిక్ టూ వీలర్ల అమ్మకాలు సాధించి కొత్త మైలురాయిని చేరుకుంది.

టీవీఎస్ మోటార్ 2020 జనవరిలో తన తొలి ఎలక్ట్రిక్ స్కూటర్ టీవీఎస్ ఐక్యూబ్‌ను మార్కెట్లోకి తీసుకొచ్చింది. ప్రారంభంలో ఈ స్కూటర్ కొద్ది నగరాల్లో మాత్రమే అందుబాటులో ఉండటంతో అమ్మకాలు పెద్దగా జరగలేదు. అయితే క్రమంగా దేశవ్యాప్తంగా విక్రయాలను విస్తరించడంతో వినియోగదారుల స్పందన పెరిగింది. ఎలక్ట్రిక్ వాహనాల రంగంలో అడుగుపెట్టినప్పుడు టీవీఎస్ మార్కెట్ వాటా కేవలం 1 శాతం మాత్రమే ఉండేది. మొదటి లక్ష ఎలక్ట్రిక్ వాహనాల అమ్మకాలు చేరుకోవడానికి దాదాపు మూడు సంవత్సరాలు పట్టింది. కానీ ఆ తర్వాత అమ్మకాల వేగం గణనీయంగా పెరిగింది. తదుపరి లక్ష యూనిట్లు కేవలం 10 నెలల్లోనే అమ్ముడుపోయాయి.

2023, 2024 సంవత్సరాల్లో సరఫరా వ్యవస్థకు సంబంధించిన కొన్ని సమస్యల కారణంగా ఎలక్ట్రిక్ వాహనాల పరిశ్రమ వృద్ధి కొంత మందగించింది. అయినప్పటికీ టీవీఎస్ తన ప్రగతిని ఆపలేదు. 2025 ఏప్రిల్ నాటికి కంపెనీ 3 లక్షల ఎలక్ట్రిక్ వాహనాల అమ్మకాల మైలురాయిని దాటింది. కంపెనీపై వినియోగదారుల విశ్వాసం పెరగడం, దేశవ్యాప్తంగా డీలర్ నెట్‌వర్క్ విస్తరించడం వల్ల అమ్మకాలు వేగంగా పెరిగాయి. సేవల నాణ్యత, విశ్వసనీయత కూడా వినియోగదారులను ఆకర్షించాయి.

2025 అక్టోబర్ నుంచి డిసెంబర్ మధ్య కాలంలో టీవీఎస్ అద్భుతమైన వృద్ధిని నమోదు చేసింది. కేవలం మూడు నెలల్లోనే 7 లక్షల నుంచి 8 లక్షల యూనిట్ల అమ్మకాల స్థాయికి చేరుకుంది. ఈ సమయంలో కంపెనీ కొత్త ఎలక్ట్రిక్ వాహనాల ప్లాట్‌ఫామ్‌ను, కొత్త ఉత్పత్తులను పరిచయం చేసింది. దీంతో మార్కెట్లో డిమాండ్ మరింత పెరిగింది. ఎలక్ట్రిక్ వాహనాల రంగంలో టీవీఎస్ కీలక ప్లేయ‌ర్‌గా మారింది.

2026లో టీవీఎస్ మరో చరిత్ర సృష్టించింది. మొత్తం 10 లక్షల ఎలక్ట్రిక్ వాహనాల అమ్మకాలను పూర్తి చేసింది. 2026 మే నెలలో ఒక్క నెలలోనే 51,605 ఎలక్ట్రిక్ స్కూటర్లను విక్రయించింది. ఇది కంపెనీ చరిత్రలోనే అత్యధిక నెలవారీ అమ్మకాల రికార్డు. అలాగే భారత ఎలక్ట్రిక్ టూ-వీలర్ మార్కెట్లో నమోదైన రెండో అతిపెద్ద నెలవారీ విక్రయాలుగా నిలిచింది. 2020లో కేవలం 1 శాతం మార్కెట్ వాటా ఉన్న టీవీఎస్, 2023 నాటికి 20 శాతానికి పైగా మార్కెట్ వాటాను సాధించింది. 2025లో 3.15 లక్షలకు పైగా ఎలక్ట్రిక్ వాహనాలను విక్రయించి దేశంలోనే అతిపెద్ద ఈవీ తయారీ సంస్థగా అవతరించింది. ప్రస్తుతం బజాజ్, ఏథర్, ఓలా వంటి కంపెనీలకు గట్టి పోటీ ఇస్తోంది.

2026లో ఇప్పటివరకు టీవీఎస్ 2.19 లక్షలకు పైగా ఎలక్ట్రిక్ స్కూటర్లను విక్రయించింది. ఇదే వేగం కొనసాగితే, ముఖ్యంగా పండుగల సీజన్‌లో డిమాండ్ పెరిగితే ఈ ఏడాది ఒక్కటే 5 లక్షల ఈవీ అమ్మకాల రికార్డు సాధించే అవకాశం ఉందని మార్కెట్ వర్గాలు అంచనా వేస్తున్నాయి. ప్రస్తుతం భారత్‌లో మొత్తం ద్విచక్ర వాహనాల మార్కెట్లో ఎలక్ట్రిక్ టూ-వీలర్ల వాటా సుమారు 10 శాతం మాత్రమే ఉంది. అంటే ఈ రంగంలో ఇంకా భారీ వృద్ధి అవకాశాలు ఉన్నాయి. పెరుగుతున్న పెట్రోల్ ధరలు, అంతర్జాతీయ ఉద్రిక్తతలు, ఇంధన వ్యయాలపై ఆందోళనలు ప్రజలను ఎలక్ట్రిక్ వాహనాల వైపు మళ్లిస్తున్నాయి. దీర్ఘకాలంలో తక్కువ ఖర్చుతో ప్రయాణం చేయాలనుకునే వారికి ఎలక్ట్రిక్ స్కూటర్లు ఉత్తమ ప్రత్యామ్నాయంగా మారుతున్నాయి.

ఈ ఎలక్ట్రిక్ స్కూటర్ ఫీచర్ల విషయానికొస్తే ఇందులో 2.2 kWh లిథియం-అయాన్ బ్యాటరీ, 4.4 kW BLDC హబ్ మోటార్, 33 Nm మోటార్ టార్క్, 140 Nm వీల్ టార్క్ ఉన్నాయి. గంటకు గరిష్ఠంగా 75 కిలోమీటర్ల వేగంతో ప్రయాణించగలదు. ఒకసారి పూర్తి ఛార్జ్‌తో 94 కిలోమీటర్ల వరకు రేంజ్ ఇస్తుందని కంపెనీ పేర్కొంది. 0-80 శాతం ఛార్జింగ్‌కు కేవలం 2 గంటల 50 నిమిషాలు పడుతుంది. పుష్ బటన్ స్టార్ట్, ఆటోమేటిక్ ట్రాన్స్‌మిషన్, రివర్స్ అసిస్ట్, రీజెనరేటివ్ బ్రేకింగ్, ఈకో-పవర్ రైడింగ్ మోడ్‌లు అందుబాటులో ఉన్నాయి.

5 ఇంచెస్ TFT డిజిటల్ డిస్‌ప్లే, బ్లూటూత్, ఇంటర్నెట్ కనెక్టివిటీ, టర్న్-బై-టర్న్ నావిగేషన్, కాల్-ఎస్‌ఎంఎస్ అలర్ట్స్, OTA అప్‌డేట్స్, టెలిమాటిక్స్ వంటి స్మార్ట్ ఫీచర్లు ఉన్నాయి. LED హెడ్‌లైట్, DRLs, USB ఛార్జింగ్ పోర్ట్, మొబైల్ యాప్ సపోర్ట్, వెహికల్ ట్రాకింగ్, జియోఫెన్సింగ్, యాంటీ-థెఫ్ట్ అలర్ట్, ఫాల్ అలర్ట్ వంటి భద్రతా ఫీచర్లు కూడా ఉన్నాయి. 30 లీటర్ల అండర్‌సీట్ స్టోరేజ్, టెలిస్కోపిక్ ఫ్రంట్ సస్పెన్షన్, హైడ్రాలిక్ ట్విన్ ట్యూబ్ రియర్ సస్పెన్షన్, 220 మి.మీ డిస్క్ ఫ్రంట్ బ్రేక్, ట్యూబ్‌లెస్ టైర్లు, 157 మి.మీ గ్రౌండ్ క్లియరెన్స్, 110 కిలోల కర్బ్ వెయిట్‌తో ఈ స్కూటర్ రోజువారీ ప్రయాణాలకు అనువుగా రూపొందించారు.