Asianet News Telugu

నిమ్మల రియాక్షన్ చూడండి | CM Chandrababu Interaction With Arnab Cyclone Victims

Galam Venkata Rao — Sat, 31 Oct 2026 12:32:31 +0530

Cyclone Murasu : ఏపీనే కాదు తెలంగాణను వదలని మురసు తుపాను.. ఇక కుండపోత వర్షాలే, ఈ జిల్లాలకు రెడ్ అలర్ట్

Arun Kumar P — Sat, 31 Oct 2026 18:13:22 +0530

మురసు తుపాను ఎఫెక్ట్ ఆంధ్ర ప్రదేశ్ పైనే కాదు తెలంగాణపైనా గట్టిగానే ఉంటుందని వాతావరణ శాఖ హెచ్చరిస్తోంది. భారీ నుండి అతిభారీ వర్షాలు తప్పవంటోంది… ఈ జిల్లాలకయితే రెడ్ అలర్ట్ జారీ చేస్తున్నారు వాతావరణ నిపుణులు.

Heavy Rains : అర్నబ్ తుపాను ఆంధ్ర ప్రదేశ్ లో ఎంతటి బీభత్సం సృష్టించిందో చూశాం. ప్రచండమైన ఈదురుగాలులతో కూడిన భారీ వర్షాలు ఊహకందని ఆస్తినష్టాన్ని సృష్టించాయి... ప్రాణనష్టం కూడా జరిగింది. ఈ ప్రకృతి విపత్తును ప్రజలు ఇంకా మరిచిపోకముందే మరో విపత్తు లోడ్ అవుతోంది. బంగాళాఖాతంలో కొత్త తుపాను ఏర్పడేందుకు అనుకూల పరిస్థితులు ఉన్నాయని… ఇదికూడా ఏపీ తీరంవైపే దూసుకురానుందని వాతావరణ నిపుణులు హెచ్చరిస్తున్నారు. అయితే ఈసారి కేవలం ఏపీపైనే కాకుండా తెలంగాణపైనా ఈ తుపాను ప్రభావం ఉంటుందట... కొన్ని జిల్లాల్లో బలమైన ఈదురుగాలులతో కూడిన కుండపోత వర్షాలు తప్పవంటూ వాతావరణ హెచ్చరికలు వెలువడతున్నాయి.

అర్నబ్ తుపాను ఇలా తీరాన్ని తాకగానే మరో అల్పపీడనం బంగాళాఖాతంలో ఏర్పడినట్లు వాతావరణ శాఖ తెలిపింది. ఇది బలపడి ఆగ్నేయ బంగాళాఖాతం, దానిని ఆనుకుని ఉన్న అండమాన్ సముద్ర ప్రాంతాల్లో వాయుగుండం మారిందని వెల్లడించింది. ఇది రాబోయే 12 గంటల్లో మరింత బలపడి తీవ్ర వాయుగుండంగా మారుతుందట.. రేపు అంటే ఆదివారం (నవంబర్ 1) సాయంత్రానికి తుపానుగా మారి తీరంవైపు దూసుకొస్తుందని ఏపీ విపత్తు నిర్వహణ సంస్థ (APSDMA) హెచ్చరిస్తోంది. సోమవారం (నవంబర్ 2) సాయంత్రానికి ఈ తుపాను ఆంధ్రప్రదేశ్ తీరం సమీపంలోకి చేరుకునే అవకాశం ఉందంటోంది. అయితే ఈ తుపాను ఎక్కడ తీరం దాటుతుంది అనేదానిపై ఇంకా క్లారిటీ లేదు.

బంగాళాఖాతంలో ఏర్పడబోయే ఈ తుపానుకు ఇండియా ప్రతిపాదించిన మురసు పేరును పెట్టనున్నారు. తుపాను ప్రభావంతో సముద్రం అల్లకల్లోలంగా మారే అవకాశాలున్నాయి కాబట్టి మత్స్యకారులు వేటకు వెళ్ళరాదని... భారీ వర్షాల నేపథ్యంలో ప్రజలు అప్రమత్తంగా ఉండాలని APSDMA ఎండీ ప్రఖర్ జైన్ హెచ్చరించారు. ముఖ్యంగా సోమ, మంగళవారాల్లో సెంట్రల్ ఆంధ్రా, రాయలసీమ జిల్లాల్లో అక్కడక్కడ భారీ వర్షాలు కురుస్తాయని... కొన్నిచోట్ల భారీ నుంచి అతిభారీ వర్షాలు కురిసే అవకాశం ఉందని హెచ్చరించారు. తీరం వెంబడి 45-65 కిమీ వేగంతో గాలులు వీచే అవకాశం ఉందంటున్నారు.

మురసు తుపాను ప్రభావం కేవలం ఆంధ్ర ప్రదేశ్ పైనే కాదు తెలంగాణపైనా గట్టిగా ఉంటుందని వాతావరణ శాఖ ప్రకటించింది. ఇప్పటికే అల్పపీడనం, వాయుగుండాల ప్రభావంతో జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హన్మకొండ, జనగాం, సిద్దిపేట, యాదాద్రి భువనగిరి జిల్లాల్లో వర్షాలు కురవనున్నాయి తెలిపింది. హైదరాబాద్, రంగారెడ్డి, మేడ్చల్ మల్కాజ్ గిరి జిల్లాల్లో కూడా తేలికపాటి నుండి మోస్తరు వర్షాలు, గంటకు 30-40 కిలో మీటర్ల వేగంతో ఈదురుగాలులు వీస్తాయంటోంది.

అయితే నవంబర్ 2 అంటే వచ్చే సోమవారం నుండి మురసు తుపాను ప్రభావంతో తెలంగాణలో భారీ వర్షాలు కురుస్తాయని వాతావరణ శాఖ వెల్లడించింది. ముఖ్యంగా ఆదిలాబాద్, కొమ్రంభీం ఆసిఫాబాద్, మంచిర్యాల, జగిత్యాల, మహబూబ్ నగర్, నాగర్ కర్నూల్, వనపర్తి, నారాయణపేట, జోగులాంబ గద్వాల జిల్లాల్లో భారీ వర్షాలు కురుస్తాయంటోంది. ఈ జిల్లాల్లో అక్కడక్కడ ఉరుములు, మెరుపులతో కూడిన వర్షాలు, 40-50 కి.మీ వేగంతో ఈదురుగాలులు వీస్తాయట. మిగిలిన జిల్లాల్లో మోస్తరు వర్షాలు కురిసే అవకాశాలున్నాయంటోంది... ఎల్లో అలర్ట్ జారీ చేసింది.

0900 यूटीसी पर आधारित तेलंगाना का 7-दिवसीय पूर्वानुमान, शाम, 1730 बजे IST पर जारी किया गया/7-day forecast, EVENING, of TELANGANA based on 0900 UTC issued at 1730 hours IST Dated : 31/10/2026 https://t.co/7CXcGaYcb6

— Meteorological Centre, Hyderabad (@metcentrehyd) October 31, 2026

మురసు సైక్లోన్ ప్రభావంతో తెలంగాణలో అత్యంత భారీ వర్షాలు కురుస్తాయని వాతావరణ నిపుణులు తెలంగాణ వెదర్ మ్యాన్ హెచ్చరిస్తున్నారు. అక్టోబర్ 30 నుండి నవంబర్ 4 వరకు రాష్ట్రంలో ఉరుములు మెరుపులతో కూడిన వర్షాలు కురుస్తాయని ప్రకటించారు... అంటే ఈ 6-7 రోజులు జోరువానలు ఉంటాయన్నమాట. ముఖ్యంగా నవంబర్ 2 నుండి 4 వరకు మహబూబాబాద్, భద్రాద్రి కొత్తగూడెం, ఖమ్మం, సూర్యాపేట, యాదాద్రి భువనగిరి, నల్గొండ జిల్లాల్లో భారీ నుండి అతిభారీ వర్షాలు కురిసే అవకాశాలున్నాయని హెచ్చరించారు. ఈ జిల్లాలకు రెడ్ అలర్ట్ జారీచేశారు తెలంగాణ వెదర్ మ్యాన్.

భారీ వర్షాలతో వరదలు సంభవించవచ్చు.. వర్షపునీటితో లోతట్టు ప్రాంతాలు జలమయం అయ్యే అవకాశాలుంటాయి… నదులు, వాగులువంకల్లో వరదనీరు చేరి ప్రమాదకరంగా ప్రవహించవచ్చు… జలాశయాలు, చెరువులు నిండుకుండల్లా మారవచ్చు… కాబట్టి ప్రజలు అప్రమత్తంగా ఉండాలని వాతావరణ నిపుణులు సూచిస్తున్నారు. ప్రభుత్వం కూడా వర్షాల నేపథ్యంలో ఎలాంటి ప్రమాదాలు జరక్కుండా ముందుజాగ్రత్త చర్యలు చేపట్టనుంది.

THUNDERSTORMS + SYSTEM RAINS in Telangana during October 30 - November 4 ️

After LONG TIME, finally we gonna witness ACTIVE RAINS in Telangana for next 6-7 days

Especially RED MARKED DISTRICTS to get MODERATE - HEAVY RAINS on November 2-4 due to the impact of DEPRESSION (OR CYCLONE) moving towards Ongole - Machilipatnam coasts on November 2/3 ⚠️️

While rest of Telangana including Hyderabad City to get LIGHT - MODERATE RAINS during next 5-6days

Plan accordingly dear people ️

— Telangana Weatherman (@balaji25_t) October 30, 2026

School Holidays : అర్నబ్ తుపాను తీరందాటినా ఆగని వర్షబీభత్సం.. ఈ జిల్లాల్లో స్కూళ్ళకి సెలవులు పొడిగిస్తారా?

Arun Kumar P — Wed, 28 Oct 2026 17:20:20 +0530

ఆంధ్ర ప్రదేశ్ లో అర్నబ్ తుపాను బీభత్సం కొనసాగుతోంది.. తెలంగాణలో కూడా భారీ వర్షాలు కురుస్తున్నాయి. ఈ నేపథ్యంలో రేపు కూడా విద్యాసంస్థలకు సెలవు ఉంటుందనే ప్రచారం సాగుతోంది.

Cyclone Arnab : తెలుగు రాష్ట్రాల్లో అర్నబ్ తుపాను బీభత్సం సృష్టిస్తోంది. ఈ తుపాను ఇప్పటికే ఆంధ్ర ప్రదేశ్ తీరాన్ని తాకింది... ఇవాళ (అక్టోబర్ 28) ఉదయం యానాం-నరసాపురం మధ్య తీరం దాటినట్లు ఏపీ విపత్తు నిర్వహణ సంస్థం (APSDMA) వెల్లడించింది. తుపాను భూమిని తాకడంతో భారీ నుండి అతిభారీ వర్షాలు, ప్రచండమైన ఈదురుగాలులతో అల్లకల్లోలం కొనసాగుతోంది... జనజీవనం అస్తవ్యస్తంగా మారింది.

బంగాళాఖాతంలో ఏర్పడిన ఈ తుపాను ప్రభావంతో రెండుమూడు రోజులుగా వర్షాలు కురుస్తున్నాయి... అయితే ఇవాళ (అక్టోబర్ 28, బుధవారం) తీరం దాటడంతో వర్షాలు, ఈదురుగాలుల తీవ్రత మరింత పెరిగింది. రేపు (అక్టోబర్ 29, గురువారం) కూడా కొన్నిచోట్ల భారీ వర్షాలు కురిసే అవకాశాలున్నాయని వాతావరణ శాఖ అంచనా వేస్తోంది. ఈ క్రమంలోనే విద్యాసంస్థలకు సెలవులు పొడిగిస్తారనే ప్రచారం జోరందుకుంది.

అర్నబ్ తుపాను ప్రభావం ఎక్కువగా ఉండే ఏపీ జిల్లాల్లో రెండు రోజులుగా విద్యాసంస్థలు మూతపడి ఉన్నాయి. ఈదురుగాలులతో కూడిన భారీ వర్షాలతో ప్రమాదాలు జరిగే ఆస్కారం ఉంటుంది... అలాగే వాగులు వంకలు ఉప్పొంగి రాకపోకలకు ఆటంకం కలిగించవచ్చు. ఈ పరిస్థితిని ముందుగానే ఊహించిన ప్రభుత్వం అక్టోబర్ 27,28 (మంగళ, బుధవారాలు) స్కూళ్లకి సెలవులిచ్చింది.

అర్నబ్ తుపాను నేపథ్యంలో అనకాపల్లి, కాకినాడ, బిఆర్ అంబేద్కర్ కొనసీమ, తూర్పు గోదావరి, పశ్చిమ గోదావరి, కృష్ణా, ఎన్టీఆర్, ఏలూరు, విజయనగరం, అల్లూరి సీతారామరాజు జిల్లాల్లో స్కూల్స్ కి సెలవులిచ్చింది ప్రభుత్వం. గుంటూరు, బాపట్ల, శ్రీకాకుళం, పార్వతీపురం మన్యం, పోలవరం జిల్లాలలో సెలవులున్నాయి. అయితే తుపాను, వర్ష తీవ్రతను బట్టి కొన్ని ప్రాంతాల్లో విద్యాసంస్థలకు సెలవులు అమలుచేశారు అధికారులు.

అర్నబ్ తుపాను తీరందాటి పలు జిల్లాల్లో అల్లకల్లోలం సృష్టిస్తోంది. కొన్నిజిల్లాల్లో ఈ వర్షాలు, ఈదురుగాలులు కొనసాగుతాయని వాతావరణ నిపుణులు హెచ్చరిస్తున్నారు. ఈ క్రమంలో అత్యంత భారీ వర్షాలు కురుస్తూ వరద పరిస్థితులు ఏర్పడే అవకాశాలున్న జిల్లాల్లో సెలవులను పొడిగించే అవకాశాలున్నాయి. అయితే ఇప్పటివరకు ప్రభుత్వం, జిల్లా కలెక్టర్ల నుండి ఎలాంటి సెలవు ప్రకటన వెలువడలేదు. స్థానిక పరిస్థితులను బట్టి ఇవాళ రాత్రి లేదా రేపు (అక్టోబర్ 29, గురువారం) ఉదయం విద్యాసంస్థల సెలవులపై ప్రకటన వెలువడవచ్చు.

కేవలం ఆంధ్ర ప్రదేశ్ పైనే కాదు తెలంగాణపై కూడా అర్నబ్ తుపాను ఎఫెక్ట్ కొనసాగుతోంది. భద్రాద్రి కొత్తగూడెం, ఖమ్మం, మహబూబాబాద్, ములుగు జిల్లాల్లో ఇవాళ (అక్టోబర్ 28) భారీ నుండి అతిభారీ వర్షాలు కురుస్తాయని వాతావరణ హెచ్చరించింది. దీంతో ముందుజాగ్రత్త చర్యగా భద్రాద్రి కొత్తగూడెం జిల్లాలోని విద్యాసంస్థలకు ఇవాళ (అక్టోబర్ 28) సెలవు ప్రకటించారు... ఈ జిల్లాలోని ప్రభుత్వ, ప్రైవేట్ విద్యాసంస్థలు, అంగన్వాడీ కేంద్రాలకు ఈ సెలవు వర్తించింది.

అయితే అర్నబ్ తుపాను తీరందాటడంతో ఏపీతో పాటు తెలంగాణలో వర్షాలు జోరందుకున్నాయి... పలు జిల్లాల్లో ఈదురుగాలులతో కూడిన బారీ వర్షాలు కురుస్తున్నాయి. ఈ వర్షాలు రెండుమూడు రోజులు కొనసాగే అవకాశాలున్నాయిని హైదరాబాద్ వాతావరణ కేంద్రం హెచ్చరిస్తోంది... కొన్ని జిల్లాలకు ఎల్లో అలర్ట్ కూడా జారీ చేసింది.

ఈ వర్ష హెచ్చరికల నేపథ్యంలో తెలంగాణలో కూడా రేపు అంటే అక్టోబర్ 29న విద్యాసంస్థలకు సెలవులుంటాయనే ప్రచారం సాగుతోంది... కానీ ఇప్పటివరకు అధికారికంగా సెలవుల ప్రకటన వెలువడలేదు. వర్ష తీవ్రత ఎక్కువగా ఉంటే రాత్రిగానీ రేపు ఉదయం గానీ సెలవుల ప్రకటన వస్తుంది... లేదంటే విద్యాసంస్థలు యదావిధిగా నడుస్తాయి.

అర్నబ్ తుపాను తీరందాటే సమయంలో కొన్నిచోట్ల గంటకు 125 నుండి 150 కిలోమీటర్ల వేగంతో ఈదురుగాలులు వీచినట్లు వాతావరణ శాఖ తెలిపింది. ముఖ్యంగా ఉత్తరాంధ్ర జిల్లాలను ఈ తుపాను షేక్ చేసింది... ఈదురుగాలులతో పాటు క్లౌడ్ బరస్ట్ అయినట్లుగా కుండపోత వర్షం కురిసింది. ఇలా విజయనగరం జిల్లాలోని గరివిడిలో అత్యధికంగా 260 మిల్లిమీటర్ల వర్షపాతం నమోదయ్యింది. ఇక అనకాపల్లి, శృంగవరపు కోట, వేపాడ, చీపురుపల్లిలో 250 మి.మీ వర్షం కురిసింది. విశాఖపట్నంలో కూడా భారీ వర్షం కురిసింది.

ప్రచండమైన ఈదురుగాలులు, భారీ వర్షాలతో తీవ్ర ఆస్తినష్టంతో పాటు ప్రాణనష్టం జరిగింది. ఆంధ్ర ప్రదేశ్ వ్యాప్తంగా చెట్లు, విద్యుత్ స్తంభాలు విరిగిపడిన ఘటనల్లో మొత్తం ఏడుగురు మరణించినట్లు తెలుస్తోంది. ఇక ఊహకందని స్థాయిలో ఆస్తినష్టం జరిగింది. గాలులు, వర్షాలకు పంటలు దెబ్బతిని రైతులు తీవ్రంగా నష్టపోయారు.

CM Chandrababu Great Words About CM Revanth Reddy | Asianet Telugu

Galam Venkata Rao — Sat, 31 Oct 2026 11:22:32 +0530

Bats Village : తలకిందులుగా వేలాడే గబ్బిలాలను పూజించే వింత గ్రామం.. ఎక్కడుందో తెలుసా?

Arun Kumar P — Tue, 27 Oct 2026 18:42:34 +0530

చెట్లు, జంతువులను పూజించడం మన భారతీయ సంస్కృతి సాంప్రదాయాల్లో భాగమే. అయితే కొన్నిచోట్ల మరీ విచిత్రమైన ఆచారాలు ఉంటాయి.. అలాంటిదే ఏపీలోని గోనుపల్లి గ్రామం. ఇక్కడ తలకిందులుగా వేలాడే గబ్బిలాలను పూజించే ఆచారం ఉంది.

సాధారణంగా గబ్బిలాలు కనిపిస్తే చాలామంది భయపడతారు. కొందరు వాటిని అపశకునంగా భావిస్తారు. కానీ ఆంధ్రప్రదేశ్‌లోని ఓ గ్రామంలో మాత్రం పరిస్థితి పూర్తిగా భిన్నం. అక్కడ గబ్బిలాలను సాధారణ జీవులుగా కాకుండా గ్రామాన్ని కాపాడే దైవస్వరూపాలుగా చూస్తారు. వాటికి ఎలాంటి హాని కలగకుండా జాగ్రత్తలు తీసుకుంటారు. తరతరాలుగా కొనసాగుతున్న ఈ నమ్మకం ఇప్పుడు అందరి దృష్టిని ఆకర్షిస్తోంది. ఇంతకీ ఆ గ్రామం ఎక్కడ ఉంది? గబ్బిలాలను అక్కడి ప్రజలు ఎందుకు పూజిస్తారు? ఆ విశేషాలు తెలుసుకుందాం.

ఆంధ్రప్రదేశ్‌ రాష్ట్రంలోని నెల్లూరు జిల్లాలో గబ్బిలాలను పూజించే గ్రామం ఉంది. గోనుపల్లి గ్రామం గబ్బిలాల సంరక్షణకు, వాటిపై స్థానికులు చూపించే గౌరవానికి ప్రత్యేకంగా నిలుస్తోంది. రాపూరు మండల పరిధిలోని ఈ గ్రామంలో గబ్బిలాలు నివసించే ప్రాంతాన్ని స్థానికులు ఎంతో పవిత్రంగా భావిస్తారు. ఇంకా చెప్పాలంటే గబ్బిలాలు దేవుళ్లుగా, వాటి నివాాన్ని దేవాలయంగా భావిస్తారన్నమాట.

చాలా ప్రాంతాల్లో గబ్బిలాలను చూసి భయపడటం లేదా వాటిని తరిమేయడానికి ప్రయత్నించడం కనిపిస్తుంది. అయితే గోనుపల్లిలో మాత్రం వాటి నివాసానికి ఆటంకం కలిగించకుండా ఉండటానికి ప్రాధాన్యం ఇస్తారు. ఈ జీవులు తమ గ్రామానికి మేలు చేస్తాయని, వాటి ఉనికి శుభప్రదమని అక్కడి ప్రజలు విశ్వసిస్తారు.

200 ఏళ్లుగా కొనసాగుతున్న నమ్మకం!

గోనుపల్లిలో గబ్బిలాలు సుమారు 200 ఏళ్లుగా నివసిస్తున్నాయని స్థానికులు చెబుతుంటారు. ఇన్ని తరాలుగా అవి గ్రామంలోనే ఉండటంతో వాటితో గ్రామస్తులకు ప్రత్యేక అనుబంధం ఏర్పడిందని తెలుస్తోంది. ఇలా గ్రామస్తులకు, గబ్బిలాలకు విడదీయరాని అనుబంధం ఏర్పడింది... అందుకే మనుషులను చూసి అవి భయపడవు, గబ్బిలాలను చూసి మనుషులు భయపడరు. కాలక్రమేణా ఆ అనుబంధం ఆరాధనగా మారింది.

తమ గ్రామాన్ని గబ్బిలాలు కాపాడుతాయని, వాటి వల్ల తమకు ఎలాంటి ఆపదలు రావని గ్రామస్థులు నమ్ముతారు. యావత్ ప్రపంచాన్ని వణికించిన కరోనా మహమ్మారి గబ్బిలాల వల్లే వ్యాపించిందని అంటారు... కానీ ఈ గోనుపల్లి గ్రామస్తుల మాత్రం ఈ మహమ్మారి నుండి తమ గ్రామాన్ని కాపాడింది గబ్బిలాలే అంటారు.

గోనుపల్లి గ్రామస్థులు గబ్బిలాలు నివసించే చెట్లను, వాటి ఆవాసాలను కాపాడుతుంటారు. ఎవరైనా గబ్బిలాలను తరమడానికి ప్రయత్నించినా, దాడి చేస్తున్నా అడ్డుకుంటారు... వీటి సంరక్షణ కోసం ఎంతకైనా సిద్దమంటారు.

ఇక్కడ గమనించాల్సిన విషయం ఏమిటంటే.. గబ్బిలాలు కేవలం స్థానిక విశ్వాసాలకు సంబంధించిన జీవులు మాత్రమే కాదు. పర్యావరణంలోనూ వీటికి ప్రత్యేక పాత్ర ఉంది. కొన్ని జాతుల గబ్బిలాలు పండ్లను తింటూ విత్తనాల వ్యాప్తికి తోడ్పడతాయి. మరికొన్ని కీటకాలను ఆహారంగా తీసుకుని వాటి సంఖ్యను నియంత్రించడంలో సహాయపడతాయి. అందువల్ల వాటి నివాస ప్రాంతాలను కాపాడటం ప్రకృతి సమతుల్యతకు కూడా ఉపయోగకరమే.

గబ్బిలాలు నిజంగా ప్రమాదకరమా?

గబ్బిలాలన్నీ ప్రమాదకరమైనవని అనుకోవడం సరికాదు. అయితే ఇతర వన్యజీవుల మాదిరిగానే వాటితోనూ జాగ్రత్తగా ఉండాలి. వాటిని చేతులతో పట్టుకోవడం, గాయపడిన గబ్బిలాలను నేరుగా తాకడం లేదా వాటి నివాస ప్రాంతాల్లో అనవసరంగా కలవరపెట్టడం చేయకూడదు. కాటు లేదా గీత పడితే వెంటనే వైద్య సలహా తీసుకోవాలి.

గబ్బిలాలను గౌరవించడం అంటే వాటిని చేతులతో తాకడం లేదా దగ్గరకు వెళ్లడం కాదు. వాటి సహజ ఆవాసాలను కాపాడుతూ, వాటికి ఇబ్బంది కలగకుండా ఉండటమే సరైన మార్గం.

ప్రకృతి, సంప్రదాయం కలిసిన ప్రత్యేక గ్రామం

జంతువులు, పక్షులు, చెట్లను పవిత్రంగా భావించే సంప్రదాయాలు భారతదేశంలోని అనేక ప్రాంతాల్లో కనిపిస్తాయి. కొన్ని గ్రామాల్లో చెట్లను గ్రామ దేవతలతో అనుసంధానిస్తే, మరికొన్ని చోట్ల ప్రత్యేక జంతువులకు దైవత్వాన్ని ఆపాదిస్తారు. గోనుపల్లిలో గబ్బిలాల పట్ల కనిపించే గౌరవం కూడా అలాంటి స్థానిక విశ్వాసాల్లో ఒకటి.

గబ్బిలాలను పూజించడం వెనుక ఉన్న నమ్మకాలు శాస్త్రీయంగా నిర్ధారించబడనప్పటికీ, వాటికి హాని చేయకుండా సంరక్షించాలనే ఆలోచన మాత్రం ప్రాధాన్యమైనది. మనుషులతో పాటు ఇతర జీవులకూ ప్రకృతిలో జీవించే హక్కు ఉందనే విషయాన్ని ఈ గ్రామం గుర్తుచేస్తోంది.

Weather Update: బంగాళాఖాతంలో కొత్త అల్పపీడనం.. తెలుగు రాష్ట్రాలకు మళ్లీ భారీ వర్షాలు

Mahesh Rajamoni — Fri, 30 Oct 2026 08:38:33 +0530

Weather Update: బంగాళాఖాతంలో మరో కొత్త అల్పపీడనం ఏర్పడింది. దీని ప్రభావంతో ఆంధ్రప్రదేశ్, తెలంగాణలో మరోసారి భారీ వర్షాలు పడనున్నాయి. తీరప్రాంత ప్రజలు అప్రమత్తంగా ఉండాలని అధికారులు హెచ్చరించారు. పూర్తి వివరాలు ఇలా ఉన్నాయి..

అర్నబ్ తుపాను సృష్టించిన విధ్వంసం నుంచి తెలుగు ప్రజలు తేరుకోకముందే, వాతావరణ శాఖ మరో బిగ్ అప్డేట్ ఇచ్చింది. బంగాళాఖాతంలో వాతావరణ పరిస్థితులు వేగంగా మారుతున్నాయి. దక్షిణ అండమాన్ సముద్రం, దాని పరిసర ప్రాంతాల్లో గురువారం ఉదయం ఒక కొత్త అల్పపీడనం ఏర్పడింది.

దీనికి అనుబంధంగా సముద్రమట్టానికి దాదాపు 7.6 కిలోమీటర్ల ఎత్తు వరకు ఉపరితల ఆవర్తనం విస్తరించి ఉన్నట్లు భారత వాతావరణ శాఖ (IMD) స్పష్టం చేసింది. ఈ పరిణామంతో రాబోయే రోజుల్లో ఏపీ, తెలంగాణల్లో వాతావరణం మరింత మారనుంది.

ప్రస్తుతం ఏర్పడిన అల్పపీడనం పశ్చిమ-వాయవ్య దిశగా పయనిస్తూ, అక్టోబర్ 31 (శనివారం) నాటికి ఆగ్నేయ బంగాళాఖాతం, అండమాన్ సముద్ర ప్రాంతాల్లో వాయుగుండంగా బలపడనుంది. ఆ తర్వాత ఇది మరింత తీవ్రమై ఏపీ తీరం వైపు దూసుకొచ్చే సూచనలు కనిపిస్తున్నాయి.

ఐఎండీ అంచనాల ప్రకారం, నవంబరు 2 లేదా 3వ తేదీ నాటికి ఇది మధ్య కోస్తాలోని మచిలీపట్నం-బాపట్ల ప్రాంతాల మధ్య తీరం దాటే అవకాశముంది. ఇది తుపానుగా మారుతుందా లేదా అనేదానిపై త్వరలోనే పూర్తి స్పష్టత రానుంది.

ఈ తాజా ముప్పు వల్ల ఏపీలోని కోస్తాంధ్ర, రాయలసీమ జిల్లాలకు తీవ్ర వర్షసూచన ఉంది. నవంబర్ 1 నుంచి వానల తీవ్రత పెరిగి, అనేక చోట్ల భారీ నుంచి అతిభారీ వర్షాలు కురిసే ఛాన్స్ ఉంది. ఇప్పటికే అర్నబ్ తుపాన్ దెబ్బకు శ్రీకాకుళం జిల్లా కంచిలిలో ఏకంగా 24.8 సెం.మీ వర్షపాతం నమోదైంది.

నాగావళి, వంశధార నదులు ఉధృతంగా ప్రవహిస్తుండడంతో పరివాహక ప్రాంతాల ప్రజలు తీవ్ర భయాందోళన చెందుతున్నారు. సీఎం చంద్రబాబు నాయుడు ఇప్పటికే వైమానిక సర్వే ద్వారా పంట నష్టాలు, ముంపు ప్రాంతాలను పరిశీలించి బాధితులకు ధైర్యం చెప్పారు. నష్ట తీవ్రతను అంచనా వేసేందుకు కేంద్ర బృందం కూడా రంగంలోకి దిగుతోంది.

మరోవైపు తెలంగాణలోనూ మిశ్రమ వాతావరణం నెలకొంది. రాబోయే మూడ్రోజులు వికారాబాద్‌, రంగారెడ్డి, నారాయణపేట, మహబూబ్‌నగర్‌, వనపర్తి, ఖమ్మం, నల్గొండ జిల్లాల్లో తేలికపాటి నుంచి మోస్తరు వర్షాలు పడే అవకాశం ఉంది. హైదరాబాద్ నగరంలో ఆకాశం మేఘావృతమై ఉంటూ సాయంత్రం వేళల్లో చల్లటి ఈదురుగాలులతో పాటు చిరుజల్లులు పడవచ్చు. మిగతా ఉత్తర తెలంగాణ జిల్లాల్లో రాత్రి పూట ఉష్ణోగ్రతలు తగ్గి చలి తీవ్రత మెల్లగా పెరుగుతోంది.

వర్షాల హెచ్చరికల నేపథ్యంలో విపత్తు నిర్వహణ శాఖ ప్రజలను అప్రమత్తం చేసింది..

• రైతన్నలు: ప్రస్తుతం పంట కోతల సమయం కాబట్టి ధాన్యం, ఇతర ఉత్పత్తులు తడవకుండా సురక్షిత ప్రాంతాలకు తరలించుకోవాలి.

• మత్స్యకారులు: సముద్రం అలజడిగా ఉండే అవకాశం ఉన్నందున వేటకు వెళ్లకూడదని హెచ్చరించారు.

• సాధారణ ప్రజలు: పొంగిపొర్లుతున్న వాగులు, వంకలు, కాలువలు దాటే సాహసం చేయవద్దని, ఉరుములు-మెరుపుల సమయంలో చెట్ల కింద లేదా విద్యుత్ స్తంభాల దగ్గర నిలబడకూడదని స్పష్టం చేశారు.

IND W vs ZIM W: మూడో వ‌న్డేలోనూ అద‌ర‌గొట్టిన అమ్మాయిలు.. 3-0తో సిరీస్ క్లీన్ స్వీప్

Narender Vaitla — Wed, 28 Oct 2026 18:54:15 +0530

భారత బౌలర్ల ధాటికి కుప్పకూలిన జింబాబ్వే

మూడో వన్డేలో తొలుత బ్యాటింగ్ చేసిన జింబాబ్వే మహిళల జట్టుకు భారత బౌలర్లు పరుగులు చేయడానికి పెద్దగా అవకాశం ఇవ్వలేదు. క్రమం తప్పకుండా వికెట్లు పడటంతో జింబాబ్వే జట్టు 131 పరుగులకే ఆలౌట్ అయింది. భారత బౌలింగ్ విభాగం సమష్టిగా రాణించడంతో ప్రత్యర్థి జట్టు తక్కువ స్కోరుకే పరిమితమైంది. వైష్ణవి శర్మ తన బౌలింగ్‌తో ప్రత్యేకంగా ఆకట్టుకోగా, సయాలి సత్ఘరే, క్రాంతి గౌడ్ కూడా కీలక వికెట్లు సాధించారు.

వైష్ణవి శర్మకు తొలి ఐదు వికెట్ల ఘనత

భారత బౌలర్లలో వైష్ణవి శర్మ అద్భుత ప్రదర్శనతో జింబాబ్వే బ్యాటింగ్‌ను దెబ్బతీసింది. ఈ మ్యాచ్‌లో ఐదు వికెట్లు పడగొట్టి తన వన్డే కెరీర్‌లో తొలి ఐదు వికెట్ల ఘనతను నమోదు చేసింది. ఆమె ప్రదర్శన జింబాబ్వేను తక్కువ స్కోరుకే కట్టడి చేయడంలో కీలక పాత్ర పోషించింది. మరోవైపు సయాలి సత్ఘరే, క్రాంతి గౌడ్ తమ వంతుగా వికెట్లు తీసి ప్రత్యర్థి ఇన్నింగ్స్‌ను త్వరగా ముగించడంలో సహకరించారు.

షఫాలీ వర్మ విధ్వంసం.. ప్రతీక రావల్ అర్ధ సెంచరీ

132 పరుగుల స్వల్ప లక్ష్యంతో బరిలోకి దిగిన భారత్‌కు ఓపెనర్లు శుభారంభం అందించారు. షఫాలీ వర్మ కేవలం 26 బంతుల్లోనే 51 పరుగులు చేసి జింబాబ్వే బౌలర్లపై విరుచుకుపడింది. ఆమె దూకుడైన బ్యాటింగ్‌తో లక్ష్య ఛేదనం వేగంగా సాగింది. మరోవైపు ప్రతీక రావల్ నిలకడగా ఆడుతూ 56 బంతుల్లో 59 పరుగులు సాధించింది. అర్ధ సెంచరీతో జట్టుకు అండగా నిలిచిన ఆమె, షఫాలీతో కలిసి భారత్ విజయాన్ని సులభతరం చేసింది.

17 ఓవర్లలోనే లక్ష్యం పూర్తి.. భారత్‌కు ఘన విజయం

షఫాలీ వర్మ, ప్రతీక రావల్ మెరుపు ఇన్నింగ్స్‌లతో భారత జట్టు 17 ఓవర్లలోనే 2 వికెట్లు కోల్పోయి 133 పరుగులు చేసింది. దీంతో మరో 8 వికెట్లు చేతిలో ఉండగానే లక్ష్యాన్ని అధిగమించి మూడో వన్డేలో విజయాన్ని అందుకుంది. జింబాబ్వే తరఫున ఒలిండర్ చారెబ్ 3 ఓవర్లలో 26 పరుగులు ఇచ్చింది. మొత్తంగా బౌలింగ్‌లో ప్రత్యర్థిని 131 పరుగులకే పరిమితం చేసి, బ్యాటింగ్‌లోనూ వేగంగా లక్ష్యాన్ని ఛేదించిన భారత్ మూడో వన్డేలోనూ ఆధిపత్యం చాటింది. ఈ విజయంతో సిరీస్‌ను విజయవంతంగా ముగించింది.

November Holidays : నవంబర్ లో ఏడు రోజులు స్కూల్స్ బంద్... ఎందుకో తెలుసా?

Arun Kumar P — Fri, 30 Oct 2026 11:18:33 +0530

అక్టోబర్ నెల ముగింపుకు చేరుకుంది… నవంబర్ లో అడుగుపెట్టబోతున్నాం. మరి వచ్చే నెలలో విద్యాసంస్థలు, ఆఫీసులకు ఎన్నిరోజులు సెలవులు వస్తున్నాయో ఇక్కడ తెలుసుకుందాం.

School Holidays : ప్రస్తుతం తెలుగు విద్యార్థులు వరుస సెలవులను ఎంజాయ్ చేస్తున్నారు. అక్టోబర్ నెలలో సగానికి పైగా హాలిడేస్ వచ్చాయి... మొదట 12-13 రోజులు దసరా సెలవులు వచ్చాయి. అవి ఇలా ముగిశాయో లేదో అర్నబ్ తుపాను కారణంగా కొన్ని జిల్లాల్లో విద్యాసంస్థలకు సెలవులు వచ్చాయి. ఇలా తెలుగు రాష్ట్రాల్లో స్కూళ్లు, కాలేజీలకు అక్టోబర్ లో ముందుగా ప్రకటించనవే కాకుండా సడన్ సెలవులు వచ్చాయి.

అయితే అక్టోబర్ నెల ముగింపుకు చేరుకుంది... రెండ్రోజుల్లో కొత్త నెల నవంబర్ లోకి అడుగుపెట్టబోతున్నాం. మరి ఈ నెలలో సెలవుల సంగంతేంటి? అక్టోబర్ స్థాయిలో కాకున్నా కాస్త విశ్రాంతి లభించేలా సెలవులుంటే బాగుంటుందని విద్యార్థులు కోరుకుంటున్నారు. మరి నవంబర్ లో విద్యాసంస్థలకు ఎన్నిరోజులు సెలవులు వస్తాయనేది ఆసక్తికరంగా మారింది.

అక్టోబర్ లో దసరా పండగ ఉంటే నవంబర్ లో దీపావళి పండగ ఉంది. అయితే దసరాకి 12-13 రోజులు సెలవు వస్తే దీపావళికి ఒక్కరోజు కూడా సెలవు లేదు. ఈసారి దీపావళి (నవంబర్ 08, ఆదివారం) వచ్చింది... అందుకే అధికారిక సెలవు సాధారణ సెలవుతో కలిసిపోయింది. అంటే విద్యార్థులకు నవంబర్ లో ఓ సెలవు మిస్ అయ్యిందన్నమాట.

ఆసక్తికర విషయం ఏంటంటే నరక చతుర్థి కూడా ఇదేరోజు ఉంది... ఈరోజు ప్రభుత్వం ఆప్షనల్ హాలిడే కూడా ప్రకటించింది. కానీ సాధారణ సెలవు ఉండటంతో ఉద్యోగులు కూడా వేతనంతో కూడిన సెలవు పొందే అవకాశాన్ని మిస్ అవుతున్నారన్నమాట.

దీపావళి సెలవు మిస్ అయినా నవంబర్ ఎండింగ్ లో ఓ పండగ సెలవు కలిసివస్తోంది. నవంబర్ 24 (మంగళవారం) కార్తీక పౌర్ణమి, గురునానక్ జయంతి ఉన్నాయి. ఈ సందర్భంగా తెలంగాణతో పాటు ఆంధ్ర ప్రదేశ్ లో విద్యాసంస్థలు, ఆఫీసులకు సెలవు ఉంది.

ఇక ఈ నవంబర్ ఆదివారం సెలవుతో ప్రారంభం అవుతుంది. నవంబర్ 1, 8, 15, 22, 29 ఆదివారాలు ఉన్నాయి... ఈ ఐదురోజులు వీకెండ్ సెలవు ఉంటుంది. ఇక నవంబర్ 14 రెండో శనివారం మరో సెలవు. మొత్తంగా ఆరురోజులు వీకెండ్ సెలవులున్నాయి.

ఇలా ఓ పండగ, ఐదు ఆదివారాలు, ఓ రెండో శనివారం కలిపి నవంబర్ లో ఏడు రోజులు సెలవులున్నాయి. ఈ రోజుల్లో స్కూళ్ళు, కాలేజీలు, ఆఫీసులు మూతపడనున్నాయి... విద్యార్థులు, ఉద్యోగులు ఈ సెలవులను ఎంజాయ్ చేయవచ్చు.

అయితే ఆంధ్ర ప్రదేశ్ లో విద్యార్థులు, ఉద్యోగులకు ఈ నవంబర్ లో మరికొన్ని ప్రత్యేక సెలవులు కలిసిరానున్నాయి. నవంబర్ 1న ఏపీలోని 13 మున్సిపల్ కార్పోరేషన్లు, 87 మున్సిపాలిటీలు, నగర పంచాయితీల్లో పోలింగ్ జరగనుంది... కాబట్టి ఓటు హక్కు వినియోగించుకునేందుకు వీలుగా ఉద్యోగులకు ప్రత్యేక సెలవు ప్రకటించారు. విద్యాసంస్థల్లో పోలింగ్ కేంద్రాలు ఏర్పాటుచేయనున్నారు కాబట్టి ఎన్నికలు జరిగే ప్రాంతాల్లో విద్యార్థులకు కూడా సెలవు ఉంటుంది. అయితే ఈరోజు ఆదివారమే కాబట్టి ప్రత్యేక సెలవు లేకున్నా సాధారణ సెలవు వర్తిస్తుంది.

ఇలా మున్సిపల్ ఎన్నికలు ముగియగానే ఎంపిటిసి, జడ్పిటిసి ఎన్నికలున్నాయి. నవంబర్ 5 (గురువారం) ఈ పోలింగ్ ఉంటుంది... కాబట్టి ఎన్నికలు జరిగే ప్రాంతాల్లో విద్యార్థులు, ఉద్యోగులకు మరో సెలవు రానుంది. పోలింగ్ కేంద్రాలు ఏర్పాటుచేసే విద్యాసంస్థలకు రెండ్రోజులు (అక్టోబర్ 4,5) సెలవుండే అవకాశాలున్నాయి.

ఎంపిటిసి, జడ్పిటిసి ఎన్నికలు ముగియగానే గ్రామ పంచాయితీ ఎన్నికల హడావిడి మొదలవుతుంది. ఈ ఎన్నికలు మూడు విడతల్లో జరగనున్నాయి.. నవంబర్ 26న మొదటి విడత, నవంబర్ 29న రెండో విడత, డిసెంబర్ 2న మూడో విడత పోలింగ్ జరగనుంది. కాబట్టి ఎన్నికలు జరిగే గ్రామాల్లో విద్యాసంస్థలకు సెలవు ఉంటుంది. ఇలా స్థానిక సంస్థల ఎన్నికల నేపథ్యంలో ఏపీ విద్యార్థులు, ఉద్యోగులకు వరుస సెలవులు రానున్నాయి.

ఏపీ ప్ర‌భుత్వం కీల‌క నిర్ణ‌యం.. అర్న‌బ్ తుపాను వేళ వారికి రూ. 5 ల‌క్ష‌ల సాయం

Narender Vaitla — Wed, 28 Oct 2026 20:15:14 +0530

మూడు రోజుల ముందుగానే అప్రమత్తం.. నిరంతర సమీక్షలు

అర్నబ్‌ తుపాను తీవ్రతను ముందుగానే అంచనా వేసి గత మూడు రోజులుగా పరిస్థితులను నిరంతరం పర్యవేక్షించినట్లు సీఎం చంద్రబాబు తెలిపారు. సచివాలయంలోని ఆర్టీజీఎస్‌ సెంటర్‌లో మీడియాతో మాట్లాడిన సీఎం.. తుపాను ప్రభావానికి అనుగుణంగా అధికారులను అప్రమత్తం చేసి, అవసరమైన చర్యలు చేపట్టామని చెప్పారు. ప్రజలకు భద్రత కల్పించడం, ప్రాణనష్టాన్ని తగ్గించడం, విపత్తు అనంతరం సాధారణ పరిస్థితులను పునరుద్ధరించడం లక్ష్యంగా ప్రభుత్వం పనిచేసిందని వివరించారు. గతంలో తుపానులు సంభవించినప్పుడు ప్రాణనష్టం ఎక్కువగా ఉండేదని గుర్తుచేశారు. ఈసారి తుపాను ప్రభావంతో ఐదుగురు ప్రాణాలు కోల్పోయారని తెలిపారు. మృతుల కుటుంబాలకు ప్రగాఢ సానుభూతి తెలియజేశారు. బాధిత కుటుంబాలను ఆదుకునేందుకు ప్రభుత్వం అవసరమైన సహాయం అందిస్తుందని స్పష్టం చేశారు.

తీరాన్ని దాటిన తుపాను.. పలు జిల్లాల్లో కొనసాగుతున్న వర్షాలు

అర్నబ్‌ తుపాను రాత్రి 11.15 గంటల సమయంలో తీరాన్ని తాకిందని చంద్రబాబు వెల్లడించారు. అనంతరం ఆంధ్రప్రదేశ్‌ నుంచి పక్క రాష్ట్రాల వైపు కదిలిందని తెలిపారు. అయినప్పటికీ తుపాను ప్రభావంతో రాష్ట్రంలోని కొన్ని జిల్లాల్లో వర్షాలు కొనసాగుతున్నాయని చెప్పారు. శ్రీకాకుళం, అల్లూరి సీతారామరాజు, పార్వతీపురం మన్యం, అనకాపల్లి జిల్లాల ప్రజలు గురువారం సాయంత్రం వరకు అప్రమత్తంగా ఉండాలని సూచించారు. వాతావరణ పరిస్థితులను దృష్టిలో ఉంచుకుని అధికారులు అవసరమైన జాగ్రత్తలు తీసుకోవాలని ఆదేశించారు. ప్రజలు కూడా అధికారుల సూచనలను పాటిస్తూ సురక్షిత ప్రాంతాల్లో ఉండాలని ప్రభుత్వం కోరుతోంది.

విద్యుత్‌ పునరుద్ధరణకు చర్యలు.. రెండు జిల్లాల్లో సహాయక చర్యలకు ఆటంకం

తుపాను కారణంగా దెబ్బతిన్న విద్యుత్‌ సరఫరాను పునరుద్ధరించేందుకు చర్యలు చేపట్టినట్లు సీఎం తెలిపారు. కోనసీమ, పశ్చిమగోదావరి జిల్లాల్లో ప్రతికూల వాతావరణం కారణంగా సహాయక చర్యలకు కొంత ఆలస్యం జరుగుతోందని వివరించారు. ఈ రెండు జిల్లాలు మినహా మిగిలిన అన్ని జిల్లాల్లో సాయంత్రానికి విద్యుత్‌ సరఫరాను పునరుద్ధరిస్తామని వెల్లడించారు. వాతావరణం అనుకూలించిన వెంటనే మిగిలిన ప్రాంతాల్లోనూ సహాయక చర్యలను వేగవంతం చేస్తామని తెలిపారు. ప్రజలకు విద్యుత్‌, ఇతర అత్యవసర సేవలు అందుబాటులోకి తీసుకురావడంపై అధికారులు ప్రత్యేక దృష్టి పెట్టాలని సూచించారు.

తుపానులో ప్రాణాలు కోల్పోయిన వారి కుటుంబాలకు రూ.5 లక్షల పరిహారం

తుపాను కారణంగా ప్రాణాలు కోల్పోయిన వారి కుటుంబాలకు ఒక్కొక్కరికి రూ.5 లక్షల ఆర్థిక సాయం అందించనున్నట్లు చంద్రబాబు ప్రకటించారు. ఇళ్లు దెబ్బతిన్న బాధితులకు రూ.10 వేల చొప్పున పరిహారం ఇవ్వనున్నట్లు తెలిపారు. తుపాను కారణంగా ఇబ్బందులు ఎదుర్కొంటూ సహాయ శిబిరాల్లో ఆశ్రయం పొందుతున్న వారికి కూడా ఆర్థిక సాయం అందిస్తామని చెప్పారు. ఒక్కొక్కరికి రూ.1,000 చొప్పున, గరిష్ఠంగా రూ.3,000 వరకు సహాయం అందించనున్నట్లు వెల్లడించారు. విపత్తు వల్ల నష్టపోయిన కుటుంబాలు తిరిగి సాధారణ జీవనం సాగించేందుకు ఈ సహాయం ఉపయోగపడుతుందని ప్రభుత్వం భావిస్తోంది.

వ్యాపారాలు, వాహనాలు, మత్స్యకారులకు ప్రత్యేక పరిహారం

తుపాను వల్ల జీవనోపాధి కోల్పోయిన చిన్న వ్యాపారులు, సూక్ష్మ, చిన్న, మధ్యతరహా పరిశ్రమలు (MSMEs), వాహన యజమానులు, మత్స్యకారులకు నష్టాన్ని బట్టి ఆర్థిక సాయం అందించనున్నట్లు సీఎం వివరించారు. ప్రభుత్వం ప్రకటించిన వివ‌రాల ప్ర‌కారం.. కిరాణా దుకాణాలు, రెస్టారెంట్లు దెబ్బతిన్న వాటికి రూ.25,000 చొప్పున సాయం. రూ.40 లక్షల లోపు టర్నోవర్‌ ఉన్న MSMEలకు రూ.50,000 పరిహారం, రూ.40 లక్షల నుంచి రూ.1.5 కోట్ల లోపు టర్నోవర్‌ ఉన్న MSMEలకు రూ.1 లక్ష సాయం, రూ.1.5 కోట్లకు పైగా టర్నోవర్‌ ఉన్న MSMEలకు రూ.1.5 లక్షల పరిహారం, దెబ్బతిన్న ద్విచక్ర వాహనాలకు రూ.3,000 సాయం, దెబ్బతిన్న త్రిచక్ర వాహనాలకు రూ.10,000 పరిహారం ఇవ్వ‌నున్నారు. అలాగే దెబ్బతిన్న ఫిషింగ్‌ బోట్లుకు రూ.9,000 సాయం, మత్స్యకారుల వలల మరమ్మతులకు రూ.5,000 సాయం, వలలు ఉండి దెబ్బతిన్న ఫిషింగ్‌ బోట్లకు రూ.25,000 పరిహారం అందించ‌నున్నారు.

AP Municipal Elections 2026 : మున్సిపల్ ఎన్నికల పోలింగ్ కు సర్వం సిద్ధం.. రేపు 7AM కే ఓటింగ్ షురూ

Arun Kumar P — Sat, 31 Oct 2026 20:56:45 +0530

ఆంధ్రప్రదేశ్‌లో మున్సిపల్ ఎన్నికల సమరం తుది అంకానికి చేరుకుంది. గత కొన్ని రోజులుగా ప్రచారంతో హోరెత్తించిన రాజకీయ పార్టీలు, అభ్యర్థుల భవితవ్యాన్ని తేల్చేందుకు ఓటర్లు సిద్ధమయ్యారు. రేపు (నవంబర్ 1) రాష్ట్రవ్యాప్తంగా మున్సిపల్ ఎన్నికల పోలింగ్ జరగనుంది. ఇందుకోసం ఎన్నికల సంఘం ఇప్పటికే అన్ని ఏర్పాట్లు పూర్తి చేసింది. పోలింగ్ కేంద్రాలకు ఎన్నికల సిబ్బంది చేరుకుని అవసరమైన ఏర్పాట్లు చేసుకుంటున్నారు.

రేపు ఉదయం 7 గంటల నుంచే పోలింగ్

ఆంధ్రప్రదేశ్‌లోని 13 మున్సిపల్ కార్పొరేషన్లు, 79 మున్సిపాలిటీలు, నగర పంచాయతీల పరిధిలో రేపు (నవంబర్ 1, ఆదివారం) పోలింగ్ నిర్వహించనున్నారు. ఉదయం 7 గంటలకు ప్రారంభమయ్యే ఓటింగ్ ప్రక్రియ సాయంత్రం 5 గంటల వరకు కొనసాగుతుంది. ఇందుకోసం రాష్ట్రవ్యాప్తంగా 11,705 పోలింగ్ కేంద్రాలను ఏర్పాటు చేశారు. మొత్తం 99 లక్షల మందికి పైగా ఓటర్లు తమ ఓటు హక్కును వినియోగించుకునే అవకాశం ఉంది. ఈ ఎన్నికల్లో వివిధ పార్టీల తరఫున, స్వతంత్ర అభ్యర్థులుగా కలిపి 6,669 మంది పోటీలో నిలిచారు.

పోలింగ్ కేంద్రాలకు చేరుకున్న ఎన్నికల సిబ్బంది

ఎన్నికల నిర్వహణ కోసం అధికారులు విస్తృత ఏర్పాట్లు చేశారు. ఇవాళ (అక్టోబర్ 31) ఉదయం నుంచే ఎన్నికల సిబ్బందికి పోలింగ్ సామగ్రి పంపిణీ ప్రారంభమైంది. బ్యాలెట్ పత్రాలు, ఓటర్ల జాబితాలు, అవసరమైన ఫారాలు, ఇతర ఎన్నికల సామగ్రిని సిబ్బందికి అందించారు. ఈ సామగ్రిని స్వీకరించిన సిబ్బంది పోలీస్ బందోబస్తు మధ్య తమకు కేటాయించిన పోలింగ్ కేంద్రాలకు చేరుకున్నారు.

మధ్యాహ్నం నుంచే చాలా పోలింగ్ కేంద్రాల్లో ఏర్పాట్ల ప్రక్రియ మొదలైంది. పోలింగ్ గదుల ఏర్పాటు, ఓటర్లకు అవసరమైన సౌకర్యాలు, ఓటర్ల గుర్తింపు పరిశీలనకు సంబంధించిన ఏర్పాట్లు చేస్తున్నారు. ఎన్నికల విధుల్లో ఉన్న సిబ్బంది రాత్రికి ఆయా పోలింగ్ కేంద్రాల వద్దే బస చేయనున్నారు. ఆదివారం ఉదయం నిర్ణీత సమయానికి పోలింగ్ ప్రారంభించేలా అధికారులు చర్యలు తీసుకుంటున్నారు.

36 వేల మందికి పైగా పోలీసులతో భద్రత

ఎన్నికల సందర్భంగా ఎలాంటి అవాంఛనీయ ఘటనలు చోటుచేసుకోకుండా పోలీసులు భారీ భద్రతా ఏర్పాట్లు చేశారు. రాష్ట్రవ్యాప్తంగా 36,351 మంది పోలీసులను ఎన్నికల విధుల్లో నియమించారు. సమస్యాత్మక ప్రాంతాలు, సున్నితమైన పోలింగ్ కేంద్రాలపై ప్రత్యేక నిఘా పెట్టారు. మొత్తం 671 కేంద్రాలను అత్యంత సమస్యాత్మకమైనవిగా, మరో 1,233 కేంద్రాలను సమస్యాత్మకమైనవిగా గుర్తించారు. ఆయా ప్రాంతాల్లో అదనపు పోలీసు బలగాలను మోహరించారు.

పోలింగ్ కేంద్రాల వద్ద సీసీ కెమెరాలు, డ్రోన్లు, వీడియో చిత్రీకరణ ద్వారా పర్యవేక్షణ చేపట్టనున్నారు. బ్యాలెట్ బాక్సులను పోలింగ్ కేంద్రాల నుంచి స్ట్రాంగ్ రూమ్‌లకు తరలించే సమయంలోనూ పటిష్టమైన భద్రత కల్పించనున్నారు. ఓటర్లు ఎలాంటి భయాందోళనలకు గురికాకుండా స్వేచ్ఛగా ఓటు హక్కును వినియోగించుకోవాలని ఎన్నికల సంఘం విజ్ఞప్తి చేసింది.

నవంబర్ 3న ఓట్ల లెక్కింపు

పోలింగ్ ముగిసిన తర్వాత బ్యాలెట్ బాక్సులను నిబంధనల ప్రకారం భద్రపరచి, సంబంధిత స్ట్రాంగ్ రూమ్‌లకు తరలించనున్నారు. అనంతరం నవంబర్ 3న ఓట్ల లెక్కింపు చేపట్టనున్నారు. కౌంటింగ్ పూర్తయిన తర్వాత ఫలితాలను ప్రకటిస్తారు. దీంతో మున్సిపల్ ఎన్నికల్లో విజయం సాధించిన అభ్యర్థులు ఎవరో తేలిపోనుంది. మేయర్, ఛైర్‌పర్సన్ పదవులతో పాటు స్థానిక సంస్థల్లో రాజకీయ పార్టీల బలాబలాలపై కూడా ఈ ఫలితాలు ప్రభావం చూపనున్నాయి.

జగన్ ఇలాకాలో టీడీపీ ప్రభంజనం.. స్థానిక ఎన్నిక‌లో సైకిల్ పార్టీ హ‌వా

Narender Vaitla — Tue, 27 Oct 2026 19:20:18 +0530

పులివెందులలో 65 ఎంపీటీసీలకు 64 ఏకగ్రీవం

జగన్‌కు రాజకీయంగా బలమైన ప్రాంతంగా పేరున్న పులివెందులలో స్థానిక ఎన్నికల ఫలితాలు ఆసక్తికరంగా మారాయి. నియోజకవర్గంలోని మొత్తం 65 ఎంపీటీసీ స్థానాలకు గాను 64 స్థానాలు ఏకగ్రీవమయ్యాయి. ఏడు జడ్పీటీసీ స్థానాల్లో మూడు ఏకగ్రీవమైనట్లు ఎన్నికల రిటర్నింగ్ అధికారి ప్రకటించారు. ఇప్పటికే పులివెందుల మున్సిపాలిటీలోనూ టీడీపీ గణనీయమైన ఆధిక్యాన్ని ప్రదర్శించింది. మొత్తం 40 వార్డులకుగాను 20 వార్డులను ఏకగ్రీవంగా కైవసం చేసుకుంది. దీంతో పులివెందులలో గ్రామీణ, పట్టణ స్థానిక సంస్థల ఎన్నికల్లో కూటమి బలం చాటుకున్నట్లయింది.

ఆరు మండలాల్లో ఎంపీటీసీ స్థానాల ఏకగ్రీవాలు

పులివెందుల నియోజకవర్గంలోని పలు మండలాల్లో కూటమి అభ్యర్థులకు ఏకగ్రీవ విజయాలు దక్కాయి. వేంపల్లి మండలంలో 18 ఎంపీటీసీ స్థానాలకు గాను 17 స్థానాలు ఏకగ్రీవమయ్యాయి. ఇందులో టీడీపీ 15 స్థానాలను దక్కించుకోగా, బీజేపీ, జనసేన ఒక్కో స్థానంలో విజయం సాధించాయి. దీంతో అల్లిరెడ్డిపల్లె ఎంపీటీసీ స్థానానికి మాత్రమే ఎన్నిక జరగనుంది. పులివెందుల మండలంలోని ఐదు ఎంపీటీసీ స్థానాలనూ టీడీపీ అభ్యర్థులు ఏకగ్రీవంగా గెలుచుకున్నారు. వేముల మండలంలో ఎనిమిది, చక్రాయపేట మండలంలో తొమ్మిది, తొండూరు మండలంలో ఎనిమిది, సింహాద్రిపురం మండలంలో ఎనిమిది ఎంపీటీసీ స్థానాలు టీడీపీ అభ్యర్థుల ఖాతాలో చేరాయి. పలు మండలాల్లో పోటీ లేకుండానే అభ్యర్థులు ఎన్నిక కావడం రాజకీయంగా ప్రాధాన్యం సంతరించుకుంది.

చిత్తూరు జిల్లాలో మూడు జడ్పీటీసీ స్థానాలు ఏకగ్రీవం

చిత్తూరు జిల్లాలోనూ కూటమి అభ్యర్థులకు అనుకూల ఫలితాలు వచ్చాయి. జిల్లాలోని మూడు జడ్పీటీసీ స్థానాలు ఏకగ్రీవమయ్యాయి. యాదమర్రి జడ్పీటీసీగా యశోద, బంగారుపాళెం జడ్పీటీసీగా సుచిత్ర జయప్రకాష్, పూతలపట్టు జడ్పీటీసీగా శైలజ తేజోమూర్తి ఏకగ్రీవంగా ఎన్నికయ్యారు. ఈ మూడు స్థానాల్లోనూ పోటీ లేకపోవడంతో అభ్యర్థుల ఎన్నిక ఏకగ్రీవంగా పూర్తయింది. స్థానిక సంస్థల్లో తమ ప్రాతినిధ్యాన్ని పెంచుకునే దిశగా కూటమికి ఈ ఫలితాలు తోడ్పడనున్నాయి.

నంద్యాల జిల్లాలో ఎనిమిది జడ్పీటీసీ స్థానాలు కూటమి ఖాతాలోకి

నంద్యాల జిల్లాలో కూడా ఏకగ్రీవాల సంఖ్య గణనీయంగా ఉంది. మొత్తం ఎనిమిది జడ్పీటీసీ స్థానాలను కూటమి అభ్యర్థులు ఏకగ్రీవంగా గెలుచుకున్నారు. బనగానపల్లె నియోజకవర్గ పరిధిలోని బనగానపల్లె, కొలిమిగుండ్ల, అవుకు, సంజామల, కోవెలకుంట్ల జడ్పీటీసీ స్థానాలు కూటమికి దక్కాయి. అలాగే డోన్ నియోజకవర్గంలోని బేతంచెర్ల, ప్యాపిలి జడ్పీటీసీ స్థానాలతో పాటు శ్రీశైలం నియోజకవర్గంలోని వెలుగోడు స్థానాన్ని కూడా కూటమి అభ్యర్థులు ఏకగ్రీవంగా కైవసం చేసుకున్నారు. రాష్ట్రవ్యాప్తంగా పరిషత్ ఎన్నికల నామినేషన్ల ఉపసంహరణ గడువు ముగియడంతో ఏకగ్రీవాలపై స్పష్టత వస్తోంది. ఒకే నామినేషన్ మిగిలిన స్థానాల్లో ఎన్నికల అధికారులు అభ్యర్థుల ఏకగ్రీవ ఎన్నికను ప్రకటిస్తున్నారు. పులివెందుల నుంచి చిత్తూరు, నంద్యాల జిల్లాల వరకు వెలువడుతున్న ఈ ఫలితాలు స్థానిక రాజకీయాల్లో చర్చనీయాంశంగా మారాయి.

Kethireddy Venkataramireddy Sensational Comments On Localbody Elections 2026 | Asianet Telugu

Galam Venkata Rao — Wed, 28 Oct 2026 09:00:01 +0530

Andhra pradesh: ఏపీ ఎన్నికల సంఘం కీల‌క నిర్ణ‌యం.. ప‌రిష‌త్ ఎన్నిక‌ల్ షెడ్యూల్‌లో మార్పులు

Narender Vaitla — Wed, 28 Oct 2026 16:51:33 +0530

Andhra pradesh: ఏపీలో ఎంపీటీసీ (MPTC), జడ్పీటీసీ (ZPTC) ఎన్నికలకు సంబంధించి రాష్ట్ర ఎన్నికల సంఘం కీలక నిర్ణయం తీసుకుంది. ముందుగా ప్రకటించిన ఎన్నికల షెడ్యూల్‌ను సవరిస్తూ పోలింగ్, ఓట్ల లెక్కింపు తేదీలను మార్చింది.

రాష్ట్రంలో ఎంపీటీసీ, జడ్పీటీసీ ఎన్నికల నిర్వహణకు సంబంధించి గతంలో ప్రకటించిన షెడ్యూల్ ప్రకారం నవంబర్ 3న పోలింగ్ జరగాల్సి ఉంది. అయితే తాజాగా ఈ తేదీని నవంబర్ 5కు మారుస్తూ రాష్ట్ర ఎన్నికల సంఘం నిర్ణయం తీసుకుంది. దీంతో ఎన్నికల్లో పోటీ చేస్తున్న అభ్యర్థులు, రాజకీయ పార్టీలు తమ ప్రచార కార్యక్రమాలను కొత్త షెడ్యూల్‌కు అనుగుణంగా సర్దుబాటు చేసుకోవాల్సి ఉంటుంది. ఎన్నికల ప్రక్రియలో భాగంగా తదుపరి కార్యక్రమాలు కూడా సవరించిన తేదీల ఆధారంగా కొనసాగనున్నాయి.

పోలింగ్ తేదీతో పాటు ఓట్ల లెక్కింపు షెడ్యూల్‌లోనూ మార్పులు జరిగాయి. మొదట ప్రకటించిన ప్రకారం నవంబర్ 5న ఓట్ల లెక్కింపు చేపట్టాల్సి ఉండగా, తాజా నిర్ణయం మేరకు నవంబర్ 7న లెక్కింపు నిర్వహించనున్నారు. పోలింగ్ పూర్తయిన తర్వాత రెండు రోజుల వ్యవధిలో ఓట్ల లెక్కింపు జరగనుంది. ఈ మార్పుతో పరిషత్ ఎన్నికల ఫలితాల ప్రకటన కూడా ముందుగా అనుకున్న తేదీ కంటే ఆలస్యం కానుంది. అభ్యర్థులు, పార్టీ శ్రేణులు కొత్త తేదీలను దృష్టిలో పెట్టుకుని తమ ఏర్పాట్లు చేసుకోవాల్సి ఉంటుంది.

ఇటీవల పట్టణ స్థానిక సంస్థల ఎన్నికల తేదీలను కూడా రాష్ట్ర ఎన్నికల సంఘం సవరించింది. తొలుత అక్టోబర్ 28న జరగాల్సిన మున్సిపాలిటీలు, కార్పొరేషన్ల పోలింగ్‌ను నవంబర్ 1కు మార్చింది. అదేవిధంగా అక్టోబర్ 30న నిర్వహించాల్సిన ఓట్ల లెక్కింపును నవంబర్ 3కు వాయిదా వేసింది. ఈ మార్పుల కారణంగా మున్సిపల్ ఎన్నికల ఓట్ల లెక్కింపు, పరిషత్ ఎన్నికల పోలింగ్ ఒకే రోజున జరిగే పరిస్థితి ఏర్పడింది. దీంతో రెండు ఎన్నికలకు అవసరమైన సిబ్బంది, పోలీసు బందోబస్తు, ఇతర ఏర్పాట్లను సమన్వయం చేయడం అధికారులకు సవాలుగా మారే అవకాశం ఉంది.

మున్సిపల్ ఎన్నికల లెక్కింపు, పరిషత్ ఎన్నికల పోలింగ్ ఒకే రోజు నిర్వహిస్తే సిబ్బంది కేటాయింపు, పోలీసు భద్రత, ఎన్నికల విధుల నిర్వహణలో సమస్యలు తలెత్తే అవకాశం ఉంది. ఒకేసారి రెండు ఎన్నికల ప్రక్రియలను నిర్వహించడం వల్ల అధికారులపై అదనపు భారం పడటంతో పాటు ఏర్పాట్ల మధ్య సమన్వయం అవసరమవుతుంది. ఈ అంశాలను పరిగణనలోకి తీసుకున్న రాష్ట్ర ఎన్నికల సంఘం పరిషత్ ఎన్నికల తేదీలను మార్చినట్లు తెలుస్తోంది. రెండు ఎన్నికల నిర్వహణ సజావుగా సాగడంతో పాటు అవసరమైన యంత్రాంగాన్ని సమర్థంగా వినియోగించుకునేందుకు తాజా షెడ్యూల్‌ను రూపొందించింది.

స్థానిక ఎన్నికలను కొనసాగించాలని సుప్రీంకోర్టు ఆదేశాలు

ఆంధ్రప్రదేశ్‌లో స్థానిక సంస్థల ఎన్నికల ప్రక్రియను ముందుకు తీసుకెళ్లాలని సుప్రీంకోర్టు మంగళవారం ఆదేశాలు జారీ చేసింది. ఎన్నికల నిర్వహణలో జాప్యం లేకుండా ప్రక్రియను పూర్తి చేయాల్సిన నేపథ్యంలో రాష్ట్ర ఎన్నికల సంఘం షెడ్యూల్‌లో మార్పులు చేపట్టింది. న్యాయస్థానం ఆదేశాలకు అనుగుణంగా ఎన్నికల ప్రక్రియను కొనసాగిస్తూనే, పట్టణ స్థానిక సంస్థలు, పరిషత్ ఎన్నికల మధ్య సమన్వయం ఉండేలా చర్యలు తీసుకుంటోంది. తాజా షెడ్యూల్ ప్రకారం నవంబర్ 1న పట్టణ స్థానిక సంస్థల పోలింగ్, నవంబర్ 3న వాటి ఓట్ల లెక్కింపు జరగనున్నాయి. అనంతరం నవంబర్ 5న ఎంపీటీసీ, జడ్పీటీసీ పోలింగ్ నిర్వహించి, నవంబర్ 7న ఓట్ల లెక్కింపు చేపట్టనున్నారు.

ఆంధ్ర‌ప్ర‌దేశ్‌లో మ‌రో అల్ప‌పీడ‌నం.. 4 రోజులు భారీ వ‌ర్షాలు. ఈ జిల్లాల‌కు అల‌ర్ట్

Narender Vaitla — Thu, 29 Oct 2026 21:26:28 +0530

Rain Alert: ఆంధ్రప్రదేశ్‌లో రానున్న నాలుగు రోజులు వర్షాలు కురిసే అవకాశం ఉందని రాష్ట్ర విపత్తుల నిర్వహణ సంస్థ వెల్లడించింది. దక్షిణ అండమాన్ సముద్రం పరిసరాల్లో ఏర్పడిన అల్పపీడనం క్రమంగా బలపడే సూచనలు ఉన్నాయని తెలిపింది.

దక్షిణ అండమాన్ సముద్రం, దాని పరిసర ప్రాంతాల్లో అల్పపీడనం ఏర్పడినట్లు రాష్ట్ర విపత్తుల నిర్వహణ సంస్థ ఎండీ ప్రఖర్ జైన్ వెల్లడించారు. ఇది రాబోయే 24 గంటల్లో పశ్చిమ వాయువ్య దిశగా కదులుతూ అండమాన్ సముద్రం, సమీప నికోబార్ దీవుల పరిసరాల్లో మరింత బలపడే అవకాశం ఉందని తెలిపారు. తొలుత సుస్పష్టమైన అల్పపీడనంగా మారి, శనివారం నాటికి ఆగ్నేయ బంగాళాఖాతం, అండమాన్ సముద్ర ప్రాంతాల్లో వాయుగుండంగా బలపడవచ్చని అంచనా వేశారు. ఈ వాతావరణ వ్యవస్థ ప్రభావంతో ఏపీలోని పలు ప్రాంతాల్లో వర్షాలు కురిసే అవకాశం ఉంది.

అల్పపీడనం ప్రభావంతో ఆదివారం, సోమవారం కోస్తాంధ్ర జిల్లాల్లో అక్కడక్కడ మోస్తరు నుంచి భారీ వర్షాలు కురిసే అవకాశం ఉందని విపత్తుల నిర్వహణ సంస్థ తెలిపింది. ముఖ్యంగా కోనసీమ, తూర్పుగోదావరి, పశ్చిమగోదావరి, పోలవరం జిల్లాల్లో కొన్ని ప్రాంతాల్లో భారీ వర్షాలు కురిసే సూచనలు ఉన్నాయి. విశాఖపట్నం, అనకాపల్లి, కాకినాడ, ఏలూరు, కృష్ణా జిల్లాల్లోనూ వర్షాలు పడవచ్చని పేర్కొంది. ప్రజలు వాతావరణ పరిస్థితులను గమనిస్తూ తగిన జాగ్రత్తలు తీసుకోవాలని సూచించింది.

శుక్రవారం (అక్టోబర్ 30) అల్లూరి సీతారామరాజు, తూర్పుగోదావరి, గుంటూరు జిల్లాల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉంది. రాష్ట్రంలోని ఇతర జిల్లాల్లో చెదురుమదురు వర్షాలు పడవచ్చని అధికారులు అంచనా వేశారు. శనివారం (అక్టోబర్ 31) విజయనగరం, కృష్ణా, నంద్యాల, అన్నమయ్య జిల్లాల్లో కొన్ని ప్రాంతాల్లో తేలికపాటి నుంచి మోస్తరు వర్షాలు కురిసే సూచనలు ఉన్నాయి. మిగిలిన జిల్లాల్లో అక్కడక్కడ వర్షాలు పడే అవకాశం ఉందని తెలిపారు.

ఆదివారం (నవంబర్ 1) కోనసీమ, తూర్పుగోదావరి, పశ్చిమగోదావరి జిల్లాల్లోని కొన్ని ప్రాంతాల్లో భారీ వర్షాలు కురిసే అవకాశం ఉంది. పోలవరం, విశాఖపట్నం, అనకాపల్లి, కాకినాడ, ఏలూరు, కృష్ణా జిల్లాల్లో అక్కడక్కడ మోస్తరు నుంచి భారీ వర్షాలు పడవచ్చు. అల్లూరి సీతారామరాజు, ఎన్టీఆర్, గుంటూరు, బాపట్ల, నెల్లూరు జిల్లాల్లో మోస్తరు వర్షాలు కురిసే అవకాశం ఉందని అధికారులు వెల్లడించారు.

సోమవారం (నవంబర్ 2) పోలవరం జిల్లాలో భారీ వర్షాలు కురిసే సూచనలు ఉన్నాయి. అల్లూరి సీతారామరాజు, విశాఖపట్నం, అనకాపల్లి, కాకినాడ, కోనసీమ, తూర్పుగోదావరి జిల్లాల్లో అక్కడక్కడ మోస్తరు వర్షాలు పడవచ్చు. శ్రీకాకుళం, విజయనగరం, పార్వతీపురం మన్యం, పశ్చిమగోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు జిల్లాల్లో పలుచోట్ల తేలికపాటి నుంచి మోస్తరు వర్షాలు కురిసే అవకాశం ఉందని ప్రఖర్ జైన్ తెలిపారు.

భారీ వర్షాల కారణంగా వంశధార, నాగావళి నదులు ఉధృతంగా ప్రవహిస్తున్న నేపథ్యంలో నదీ పరివాహక ప్రాంతాల్లోని లోతట్టు ప్రాంతాల ప్రజలు అప్రమత్తంగా ఉండాలని అధికారులు హెచ్చరించారు. నీటి ప్రవాహం ఎక్కువగా ఉన్న కాలువలు, వాగులు దాటేందుకు ప్రయత్నించవద్దని సూచించారు. నదుల్లో ఈతకు వెళ్లడం, ప్రవాహం ఎక్కువగా ఉన్న ప్రాంతాల వద్దకు వెళ్లడం వంటి ప్రమాదకర పనులకు దూరంగా ఉండాలని స్పష్టం చేశారు.

ఇదిలా ఉండగా, గురువారం సాయంత్రం 5 గంటల వరకు శ్రీకాకుళం జిల్లాలోని పలు ప్రాంతాల్లో వర్షపాతం నమోదైంది. పలాసలో అత్యధికంగా 40.7 మిల్లీమీటర్లు, కంచిలిలో 27 మి.మీ., మందసలో 24.5 మి.మీ., ఇచ్ఛాపురంలో 23.7 మి.మీ., పిన్నింటిపేటలో 17 మి.మీ. వర్షం కురిసినట్లు అధికారులు వెల్లడించారు. రానున్న రోజుల్లో వర్షాలు పెరిగే అవకాశం ఉన్నందున ప్రజలు అప్రమత్తంగా ఉండాలని సూచించారు.

Arnab Cyclone: కొనసాగుతున్న అర్నబ్ తుపాను బీభత్సం.. ఈ జిల్లాల్లో భారీ వర్షాలు

Mahesh Rajamoni — Thu, 29 Oct 2026 08:37:02 +0530

Arnab Cyclone : అర్నాబ్ తుపాను ప్రభావంతో ఆంధ్రప్రదేశ్ లో భారీ వర్షాలు కురుస్తున్నాయి. ఇంకా వర్ష ప్రభావం కొనసాగుతుండటంతో 11 జిల్లాల్లో స్కూళ్లకు సెలవు ప్రకటించారు. తెలంగాణలోని పలు ప్రాంతాల్లో వానలు పడే అవకాశం ఉందని భారత వాతావరణ శాఖ హెచ్చరించింది.

అర్నాబ్ అతి తీవ్ర తుపాను కోస్తా జిల్లాలను పూర్తిగా అతలాకుతలం చేసింది. పెను గాలులతో భారీ వృక్షాలు నేలకొరగగా, చాలా ప్రాంతాల్లో విద్యుత్ స్తంభాలు నేలకూలాయి. వివిధ ప్రాంతాల్లో జరిగిన ప్రమాదాల్లో 8 మంది ప్రాణాలు కోల్పోయారు. బుధవారం రాత్రి వరకూ గాలివాన తీవ్రంగా కొనసాగింది.

విశాఖపట్నం సహా తీర ప్రాంతాలను ఈ తుపాను తీవ్రంగా వణికించింది. నరసాపురం వద్ద ల్యాండ్‌ఫాల్ సమయంలో గంటకు 150 కిలోమీటర్ల ప్రచండ వేగంతో ఈదురుగాలులు వీచాయి. గోపాలపట్నంలో ఏకంగా 31.6 సెంటీమీటర్ల వర్షపాతం నమోదైంది. ఉప్పాడ తీరంలో సముద్ర అలల తాకితకి రోడ్డుపైకి బండరాళ్లు కొట్టుకొచ్చాయి.

ఈ తుపాను కారణంగా కోనసీమ, గోదావరి జిల్లాల్లో భారీగా పంట నష్టం వాటిల్లింది. వేలాది ఎకరాల్లో వరి, అరటి తదితర పంటలు నీట మునిగి రైతుల కష్టమంతా వృథా అయింది. కాకినాడ జిల్లాలో 7 మండలాల్లోని 29 గ్రామాల్లో ప్రజలు తీవ్ర ఇబ్బందులు పడ్డారు.

భారీ వర్షాలు, ఈదురు గాలులకు 78 ఇళ్లు ధ్వంసమయ్యాయి. వేటకు వెళ్లిన ముగ్గురు మత్స్యకారులు సముద్రంలో గల్లంతు కాగా, 68 బోట్లు దెబ్బతిన్నాయి. విద్యుత్ వ్యవస్థ చిన్నాభిన్నం కావడంతో కొన్ని గ్రామాల్లో రెండు రోజులుగా అంధకారం అలుముకుంది.

తీరం దాటిన అర్నాబ్ తుపాను క్రమంగా బలహీనపడుతోంది. మధ్యాహ్నానికి తుపానుగా, రాత్రికి తీవ్ర వాయుగుండంగా మారింది. అయినప్పటికీ దీని ప్రభావం ఇంకా కొనసాగుతుందని వాతావరణ శాఖ హెచ్చరించింది. గురువారం శ్రీకాకుళం, పార్వతీపురం మన్యం, విజయనగరం జిల్లాల్లో ఒకటి రెండు చోట్ల భారీ వర్షాలు కురిసే అవకాశం ఉంది.

గంటకు 40 నుంచి 50 కిలోమీటర్ల వేగంతో ఈదురుగాలులు వీస్తాయని APSDMA ఎండీ ప్రఖర్ జైన్ తెలిపారు. భారీ వర్షాలతో ప్లాష్ ఫ్లడ్స్ వచ్చే ప్రమాదం ఉన్నందున లోతట్టు ప్రాంత ప్రజలు అప్రమత్తంగా ఉండాలని, పొంగిపొర్లే వాగులు దాటొద్దని సూచించారు. సహాయక చర్యల్లో 16 ఎన్డీఆర్ఎఫ్, 11 ఎస్డీఆర్ఎఫ్ బృందాలు రంగంలోకి దిగాయి.

తుపాను తీవ్రత దృష్ట్యా ప్రభుత్వం అప్రమత్తమైంది. గురువారం రాష్ట్రంలోని 11 జిల్లాల్లో పాఠశాలలకు సెలవు ప్రకటించారు. విజయనగరం, విశాఖపట్నం, అల్లూరి సీతారామరాజు, ఏలూరు, పోలవరం, తూర్పు గోదావరి, పశ్చిమ గోదావరి, డాక్టర్ బీఆర్ అంబేద్కర్ కోనసీమ, కృష్ణా, అనకాపల్లి, కాకినాడ జిల్లాల్లోని స్కూళ్లకు సెలవు వర్తిస్తుందని అధికారులు వెల్లడించారు. మిగిలిన జిల్లాల్లో పాఠశాలలు యథావిధిగా పనిచేస్తాయని స్పష్టం చేశారు.

అర్నాబ్ తుపాను ప్రభావం తెలంగాణపై కూడా పడింది. రాష్ట్రంలో మరో రెండు రోజులపాటు తేలికపాటి నుంచి మోస్తరు వర్షాలు, అక్కడక్కడ ఉరుములు, మెరుపులతో కూడిన జల్లులు కురిసే అవకాశం ఉంది. గంటకు 30 నుంచి 40 కిలోమీటర్ల వేగంతో ఈదురుగాలులు వీస్తాయని హైదరాబాద్ వాతావరణ కేంద్రం తెలిపింది. ఉత్తర, తూర్పు తెలంగాణ జిల్లాలకు ఎల్లో అలర్ట్ జారీ చేశారు. వర్షాల కారణంగా పగటి ఉష్ణోగ్రతలు భారీగా పడిపోయి వాతావరణం కూల్ అయింది.

మరోవైపు, ప్రతికూల వాతావరణం వల్ల శంషాబాద్ విమానాశ్రయంలో విమాన సర్వీసులు, దక్షిణ మధ్య రైల్వే పరిధిలో పలు రైళ్లు రద్దయ్యాయి. నవంబర్ మొదటి వారంలో బంగాళాఖాతంలో మరో అల్పపీడనం ఏర్పడే అవకాశం ఉందని వాతావరణ శాఖ అంచనా వేస్తోంది. కాకినాడ, మచిలీపట్నం పోర్టుల్లో 10వ నంబర్, విశాఖ, గంగవరం, భీమునిపట్నం పోర్టుల్లో 9వ నంబర్ ప్రమాద హెచ్చరికలు కొనసాగుతున్నాయి.

Cyclone Arnab: తీరం దాటిన అతి తీవ్ర అర్నబ్ తుపాను.. ఈ ప్రాంతాల్లో అత్యంత భారీ వర్షాలు

Mahesh Rajamoni — Wed, 28 Oct 2026 08:25:57 +0530

Cyclone Arnab: అతి తీవ్ర అర్నబ్ తుపాను నరసాపురం-యానాం మధ్య తీరం దాటింది. తెలుగు రాష్ట్రాల్లో ఈదురుగాలులు, భారీ వర్షాలతో తీవ్ర నష్టం వాటిల్లింది. ప్రజలు అప్రమత్తంగా ఉండాలని భారత వాతావరణ శాఖ అలర్ట్ చేసింది.

ఉమ్మడి తెలుగు రాష్ట్రాలను అర్నబ్ అతి తీవ్ర తుపాను గజగజ వణికిస్తోంది. పశ్చిమ మధ్య బంగాళాఖాతంలో రూపుదిద్దుకున్న ఈ తీవ్ర తుపాను యానానికి దక్షిణంగా, నరసాపురానికి సమీపంలో పూర్తిగా తీరం దాటింది. తీరం దాటే సమయంలో వేగంగా కదులుతూ తీరప్రాంత గ్రామాలను అతలాకుతలం చేసింది. అర్నబ్ ప్రభావంతో ఒకవైపు విపరీతమైన ఈదురుగాలులు, మరోవైపు కుండపోత వర్షాలతో ఉమ్మడి ఆంధ్రప్రదేశ్, తెలంగాణ రాష్ట్రాల్లోని పలు ప్రాంతాలు తీవ్ర ఇబ్బందులను ఎదుర్కొంటున్నాయి.

కోనసీమ ప్రాంత ప్రజలకు అర్నబ్ దాటికి 1996 నాటి పెను తుపాను ఘోర జ్ఞాపకాలు మళ్లీ కళ్లముందు మెదిలాయి. పోలవరం, ఉప్పలగుప్తం, అల్లవరం, కాట్రేనికోన, మామిడికుదురు, మలికిపురం, సఖినేటిపల్లి మండలాలపై ఈ తుపాను తీవ్ర ప్రభావం చూపింది. సాయంత్రం కాగానే వాతావరణం ఒక్కసారిగా మారిపోయి ప్రచండ గాలులు వీచడం ప్రారంభించాయి.

సముద్రం ఉగ్రరూపం దాల్చడంతో ఉవ్వెత్తున ఎగసిపడుతున్న అలలు గోదావరి నదీ పాయల ద్వారా లోపలికి చొచ్చుకువచ్చాయి. మురుగునీటి కాలువలు పొంగిపొర్లుతున్నాయి. వందలాది కొబ్బరిచెట్లు, భారీ వృక్షాలు, హోర్డింగులు, ఇళ్ల పైకప్పులు గాలుల ధాటికి నేలమట్టమయ్యాయి. ఎప్పుడు ఏ విద్యుత్ స్తంభం విరిగిపడుతుందో అని జనాలు ప్రాణాలు గుప్పెట్లో పట్టుకుని గడుపుతున్నారు.

తుపాను విరుచుకుపడటంతో ఏపీలోని తీరప్రాంత రైతాంగం తీవ్రంగా నష్టపోయింది. రొయ్యల రైతుల ఆందోళన: కోనసీమ జిల్లాలో దాదాపు 10,800 ఎకరాల్లో రొయ్యల చెరువులు ఉండగా, పంట నష్టపోతామనే భయంతో ఆక్వా రైతులు ముందస్తుగా పట్టుబడులు పట్టారు. అయితే ఇదే ఆసరాగా భావించిన కొనుగోలుదారులు ధరలను తగ్గించడంతో కేజీకి రూ.30 నుంచి రూ.40 వరకు రైతులు కోల్పోవాల్సి వచ్చింది.

కొబ్బరి తోటలకు నష్టం: 1996 నాటి అనుభవాలను దృష్టిలో ఉంచుకుని కొబ్బరి రైతులు తోటల్లో బరువు తగ్గించేందుకు దింపులు తీయడం, రాశులను సురక్షిత ప్రాంతాలకు తరలించడం వంటి ముందస్తు చర్యలు చేపట్టారు. అయినప్పటికీ గాలుల తీవ్రతకు అనేక తోటలు నేలకూలాయి.

కాకినాడ, పశ్చిమ గోదావరి, ఉమ్మడి విశాఖ జిల్లాల్లో కుండపోత వర్షాల వల్ల రోడ్ల రవాణా దెబ్బతింది. కాకినాడ జిల్లా కాజులూరులో మౌలిక వసతులు, విద్యుత్ వ్యవస్థ పూర్తిగా నిలిచిపోయాయి. ఉప్పాడ బీచ్ రోడ్డు అలల ఉధృతికి ధ్వంసమైంది. పాలకొల్లు పరిసర ప్రాంతాల్లో పెద్ద ఎత్తున స్తంభాలు కూలిపోవడంతో చీకట్లు అలుముకున్నాయి.

విశాఖ, అనకాపల్లి, కాకినాడ, గోదావరి జిల్లాలకు అధికారులు రెడ్ అలర్ట్ ప్రకటించారు. శ్రీకాకుళం, విజయనగరం, గుంటూరు ప్రాంతాలకు ఆరెంజ్ అలర్ట్, నెల్లూరు, ప్రకాశం జిల్లాలకు ఎల్లో అలర్ట్ జారీ చేసి ప్రజలను అప్రమత్తం చేశారు.

ఆంధ్రప్రదేశ్ సరిహద్దు దాటిన ఈ తుపాను ప్రభావం తెలంగాణపైనా స్పష్టంగా కనిపిస్తోంది. వాతావరణ శాఖ హెచ్చరికల ప్రకారం అక్టోబరు 29న ములుగు, భద్రాద్రి కొత్తగూడెం, ఖమ్మం, మహబూబాబాద్ జిల్లాల్లో అత్యంత భారీ వర్షాలు కురిసే అవకాశముంది. హనుమకొండ, వరంగల్, సూర్యాపేట, నల్గొండ జిల్లాల్లోనూ ఈదురుగాలులతో కూడిన వర్ష సూచనలు ఉన్నాయి.

దీనికి తోడు తెలంగాణలో పగటి ఉష్ణోగ్రతలు తగ్గి చలి వణుకు పుట్టిస్తోంది. పటాన్‌చెరులో అత్యల్పంగా 13.2 డిగ్రీల ఉష్ణోగ్రత నమోదైంది. అత్యవసరమైతే తప్ప ప్రజలు ఇళ్ల నుంచి బయటకు రాకూడదని, వాగులు-వంకలు దాటే ప్రయత్నం చేయవద్దని అధికారులు స్పష్టం చేశారు.

రాప్తాడులో దారుణం.. పదో తరగతి విద్యార్థినిపై రంపంతో దాడి చేసిన అగంత‌కుడు

Narender Vaitla — Sat, 31 Oct 2026 14:08:47 +0530

పాఠశాలలోకి ప్రవేశించి బాలికపై విచక్షణారహితంగా దాడి

రాప్తాడు మండలంలోని జిల్లా పరిషత్ ఉన్నత పాఠశాలలో ఉదయం తరగతులు ప్రారంభమైన కొద్దిసేపటికే ఈ ఘటన చోటుచేసుకుంది. పదో తరగతి చదువుతున్న బాలిక తరగతి గదిలో ఉండగా, ఓ గుర్తుతెలియని వ్యక్తి పాఠశాల ప్రాంగణంలోకి ప్రవేశించాడు. తన వెంట తెచ్చుకున్న చెట్ల కొమ్మలు కోసే రంపంతో ఆమెపై దాడికి పాల్పడ్డాడు. ఈ దాడిలో బాలిక ముఖం, తల, వీపు భాగాల్లో తీవ్ర గాయాలయ్యాయి. బాలికపై దాడిని గమనించిన మరో విద్యార్థిని ఆమెను కాపాడేందుకు ప్రయత్నించగా, దుండగుడు ఆమెపైనా దాడి చేసినట్లు సమాచారం. దీంతో రెండో బాలికకు కూడా గాయాలయ్యాయి. ఒక్కసారిగా చోటుచేసుకున్న ఈ ఘటనతో పాఠశాలలో భీతావహ పరిస్థితులు నెలకొన్నాయి. ఏం జరుగుతుందో అర్థంకాక విద్యార్థులు భయంతో పరుగులు తీశారు. ఉపాధ్యాయులు వెంటనే స్పందించి పోలీసులకు సమాచారం అందించారు. తీవ్రంగా గాయపడిన ప్రధాన బాధితురాలిని ఆసుపత్రికి తరలించి చికిత్స అందిస్తున్నారు.

నిందితుడి కోసం పోలీసుల గాలింపు.. దాడికి కారణాలపై ఆరా

విద్యార్థినిపై దాడికి పాల్పడిన వ్యక్తి ఎవరనే విషయంపై పోలీసులు దర్యాప్తు చేస్తున్నారు. అతడికి బాధిత బాలికతో ముందుగా పరిచయం ఉందా? వ్యక్తిగత విభేదాలేమైనా ఉన్నాయా? అనే కోణాల్లో విచారణ జరుపుతున్నారు. అయితే దాడికి గల కారణాలు ఇంకా స్పష్టంగా తెలియరాలేదు. ఘటనకు సంబంధించిన పూర్తి వివరాలను సేకరిస్తున్న పోలీసులు నిందితుడిని గుర్తించి పట్టుకునేందుకు చర్యలు చేపట్టారు. పిల్లలకు రక్షణ కల్పించాల్సిన విద్యాసంస్థలోనే ఇలాంటి ఘటన జరగడంతో తల్లిదండ్రుల్లో ఆందోళన నెల‌కొంది. పాఠశాలల్లోకి బయటి వ్యక్తులు ప్రవేశించకుండా పటిష్టమైన భద్రతా ఏర్పాట్లు చేయాల్సిన అవసరాన్ని ఈ ఘటన మరోసారి గుర్తుచేస్తోంది. నిందితుడిని త్వరగా అదుపులోకి తీసుకుని, దాడి వెనుక ఉన్న కారణాలను వెలికితీయాలని స్థానికులు కోరుతున్నారు.

ఘటనపై సీఎం చంద్రబాబు ఆగ్రహం.. నిందితుడిపై కఠిన చర్యలకు ఆదేశాలు

రాప్తాడు ఘటనపై ముఖ్యమంత్రి చంద్రబాబు నాయుడు తీవ్ర ఆవేదన వ్యక్తం చేశారు. తరగతి గదిలోనే విద్యార్థినిపై దాడి జరగడాన్ని అమానుష చర్యగా అభివర్ణించారు. గాయపడిన బాలిక ఆరోగ్య పరిస్థితిపై వివరాలు తెలుసుకున్న ఆయన, బాధితురాలికి మెరుగైన వైద్యం అందించాలని అధికారులను ఆదేశించారు. బాలిక ఆరోగ్య పరిస్థితిని ఎప్పటికప్పుడు పర్యవేక్షించాలని సూచించారు. దాడికి పాల్పడిన వ్యక్తిని వెంటనే పట్టుకుని, చట్టప్రకారం కఠినంగా శిక్షించేలా చర్యలు తీసుకోవాలని పోలీసులకు స్పష్టం చేశారు.

మంత్రి నారా లోకేష్ ఈ ఘటనపై తీవ్ర దిగ్భ్రాంతి వ్యక్తం చేశారు. తరగతి గదిలో రక్తపు మడుగులో ఉన్న చిన్నారిని చూసి మనసు కలచివేసిందని ఆవేదన వ్యక్తం చేశారు. బాలికలు, మహిళల భద్రత విషయంలో ప్రభుత్వం రాజీపడబోదని, ఇలాంటి దుశ్చర్యలకు పాల్పడేవారిపై కఠిన చర్యలు తీసుకుంటామని హెచ్చరించారు.

రాష్ట్ర హోం మంత్రి వంగలపూడి అనిత అనంతపురం జిల్లా ఎస్పీతో ఫోన్‌లో మాట్లాడి ఘటన వివరాలు తెలుసుకున్నారు. బాధితురాలికి అవసరమైన వైద్య సహాయం అందించాలని, నిందితుడిని పట్టుకుని కఠినంగా శిక్షించేలా చర్యలు తీసుకోవాలని అధికారులకు సూచించారు. ఆరోగ్యశాఖ మంత్రి సత్యకుమార్ యాదవ్ సైతం బాలికకు మెరుగైన వైద్యం అందించాలని ఆదేశించారు. బాధితురాలికి ప్రభుత్వం అండగా ఉంటుందని భరోసా ఇచ్చారు.

YS Jagan Fires On Chandrababu Over Arnab Cyclone | Asianet News Telugu

Galam Venkata Rao — Thu, 29 Oct 2026 22:27:57 +0530

School Holidays: అర్నబ్ తుపాను ఎఫెక్ట్.. ఏపీలోని ఆ 11 జిల్లాల్లో స్కూళ్లకు సెలవు

Mahesh Rajamoni — Thu, 29 Oct 2026 09:04:20 +0530

School Holidays: అర్నాబ్ తుపాను ప్రభావం ఇంకా కొనసాగుతూనే ఉంది. దీంతో ఆంధ్రప్రదేశ్ లోని 11 జిల్లాల్లోని పాఠశాలలకు గురువారం ప్రభుత్వం సెలవు ప్రకటించింది. భారీ వర్షాలు, వరదల ముప్పు నేపథ్యంలో ఈ నిర్ణయం తీసుకున్నారు. ఆ వివరాలు ఇలా ఉన్నాయి..

అర్నాబ్ తీవ్ర తుపాను విరుచుకుపడటంతో ఆంధ్రప్రదేశ్ ప్రభుత్వం విద్యాసంస్థల భద్రతపై కీలక నిర్ణయం తీసుకుంది. తుపాను ధాటికి లోతట్టు ప్రాంతాలు జలమయం కావడం, రాకపోకలకు ఇబ్బందులు ఎదురవుతుండటంతో గురువారం (అక్టోబర్ 29) ఏకంగా 11 జిల్లాల్లోని పాఠశాలలకు సెలవు ప్రకటిస్తూ అధికారులు ఉత్తర్వులు జారీ చేశారు.

విజయనగరం, విశాఖపట్నం, అల్లూరి సీతారామరాజు, ఏలూరు, పోలవరం, తూర్పుగోదావరి, పశ్చిమ గోదావరి, డాక్టర్ బీఆర్ అంబేద్కర్ కోనసీమ, కృష్ణా, అనకాపల్లి, కాకినాడ జిల్లాల్లో స్కూళ్లకు సెలవు వర్తిస్తుందని స్పష్టం చేశారు. కాకినాడ జిల్లా కలెక్టర్ హరేంధర్ ప్రసాద్ విద్యార్థుల ప్రాణ భద్రత దృష్ట్యా మూడో రోజు కూడా విద్యాసంస్థలకు సెలవు పొడిగించారు. బాధితులకు ఎలాంటి ఇబ్బందులు కలగకుండా ఈ నిర్ణయం తీసుకున్నట్లు వెల్లడించారు. మిగిలిన జిల్లాల్లో మాత్రం యథావిధిగా స్కూళ్లు తెరుచుకుంటాయి.

తుపాను బలహీనపడినా వర్ష తీవ్రత తగ్గలేదని, హఠాత్తుగా వరదలు వచ్చే ముప్పు ఉందని ఆంధ్రప్రదేశ్ విపత్తుల నిర్వహణ సంస్థ (APSDMA) ఎండీ ప్రఖర్ జైన్ హెచ్చరించారు. ముఖ్యంగా పాఠశాల పిల్లలు, యువత వాగులు, వంకలు, పొంగిపొర్లే కాలువలు దాటే సాహసం చేయకూడదని విజ్ఞప్తి చేశారు.

గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉండటంతో చెట్ల కింద, పాత భవనాల వద్ద ఉండొద్దని సూచించారు. వర్షాల కారణంగా రవాణా వ్యవస్థ దెబ్బతినడంతో విద్యార్థులు ఇళ్లలోనే సురక్షితంగా ఉండాలని అధికారులు విజ్ఞప్తి చేశారు.

నరసాపురం వద్ద తీరం దాటిన అర్నాబ్ తుపాను వినాశకరమైన పరిస్థితులను సృష్టించింది. తీరం దాటే సమయంలో గంటకు 150 కిలోమీటర్ల వేగంతో వీచిన గాలులకు పెద్ద సంఖ్యలో వృక్షాలు, విద్యుత్ స్తంభాలు నేలకొరిగాయి. రాజమండ్రి, గోపాలపట్నం ప్రాంతాల్లో ఏకంగా 31.6 సెంటీమీటర్ల మేర కుండపోత వర్షం కురిసింది.

పలు చోట్ల 20 సెంటీమీటర్లకు పైగా భారీ వర్షపాతం నమోదైంది. కాకినాడ జిల్లాలో 78 ఇళ్లు పూర్తిగా ధ్వంసమవగా, సముద్రంలోకి వేటకు వెళ్లిన ముగ్గురు మత్స్యకారులు గల్లంతయ్యారు. 68 బోట్లు కొట్టుకుపోయాయి. సముద్రంలో చెలరేగిన అలల ధాటికి ఉప్పాడ వద్ద ప్రధాన రహదారిపైకి పెద్ద పెద్ద బండరాళ్లు కొట్టుకొచ్చాయి.

తుపాన్ బీభత్సానికి తీర ప్రాంత గ్రామాలు తీవ్రంగా ప్రభావితమయ్యాయి. విద్యుత్ సబ్‌స్టేషన్లు, ఫీడర్లు దెబ్బతినడంతో కోనసీమ, కాకినాడ పరిధిలోని పలు గ్రామాలు వరుసగా మూడో రోజు కూడా అంధకారంలోనే ఉండిపోయాయి. విపత్తు సహాయక చర్యల కోసం ప్రభుత్వం 16 ఎన్డీఆర్ఎఫ్ (NDRF), 11 ఎస్డీఆర్ఎఫ్ (SDRF) బృందాలను రంగంలోకి దించింది.

కాలువలు, వాగుల వద్ద రక్షణ గోడలు ఏర్పాటు చేసి లోతట్టు ప్రాంత ప్రజలను సురక్షిత ప్రాంతాలకు తరలిస్తున్నారు. పోర్టుల్లోనూ డేంజర్ సిగ్నల్స్ కొనసాగుతున్నాయి. కాకినాడ, మచిలీపట్నం పోర్టుల్లో 10వ నంబర్, విశాఖ, గంగవరం, భీమునిపట్నం పోర్టుల్లో 9వ నంబర్ ప్రమాద హెచ్చరికలు జారీ చేశారు.

తుఫాన్ వ్యవసాయ రంగాన్ని కోలుకోలేని దెబ్బతీసింది. కోనసీమ, గోదావరి జిల్లాల్లో వేలాది ఎకరాల్లో వరి, అరటి పంటలు నీట మునిగాయి. ఒక్క తూర్పుగోదావరి జిల్లాలోనే లక్షా 18 వేల ఎకరాల్లో పంట దెబ్బతిన్నట్లు ప్రాథమిక అంచనావేశారు.

మరోవైపు, తెలంగాణలోనూ అర్నాబ్ ప్రభావంతో రెయిన్ అలర్ట్ జారీ చేశారు. జయశంకర్ భూపాలపల్లి, ములుగు, మహబూబాబాద్, భద్రాద్రి కొత్తగూడెం జిల్లాలకు ఎల్లో అలర్ట్ ఇచ్చారు. వాతావరణం చల్లబడటంతో పాటు శంషాబాద్ ఎయిర్‌పోర్టులో 35 విమానాలు, దక్షిణ మధ్య రైల్వేలో 27 రైళ్లు రద్దయ్యాయి.

Weather Alert: ముంచుకొస్తున్న మ‌రో గండం.. ఈ ప్రాంతాల్లో భారీ వ‌ర్షాలు, జాగ్ర‌త్త‌గా ఉండాల్సిందే

Narender Vaitla — Sat, 31 Oct 2026 08:06:26 +0530

Weather Alert: ఆంధ్రప్రదేశ్, తెలంగాణ రాష్ట్రాలకు వాతావరణశాఖ వర్ష సూచన జారీ చేసింది. దక్షిణ అండమాన్ సముద్రం పరిసరాల్లో ఏర్పడిన అల్పపీడనం శ‌నివారం నాటికి వాయుగుండంగా బలపడే అవకాశం ఉందని అంచనా వేసింది. దీంతో భారీ వ‌ర్షాలు కురుస్తాయ‌ని అంటున్నారు.

బంగాళాఖాతంలో మరో వాతావరణ వ్యవస్థ ఏర్పడటంతో తెలుగు రాష్ట్రాల్లో వర్షాలపై ఆసక్తి నెలకొంది. దక్షిణ అండమాన్ సముద్రం, దాని పరిసర ప్రాంతాల్లో ఏర్పడిన అల్పపీడనం ప్రస్తుతం కొనసాగుతోంది. దీనికి అనుబంధంగా ఉన్న ఉపరితల ఆవర్తనం సముద్ర మట్టానికి సుమారు 5.8 కిలోమీటర్ల ఎత్తు వరకు విస్తరించినట్లు వాతావరణ శాఖ వెల్లడించింది. ఈ అల్పపీడనం పశ్చిమ వాయువ్య దిశగా కదులుతూ అక్టోబర్ 31 నాటికి ఆగ్నేయ బంగాళాఖాతం, అండమాన్ సముద్ర పరిసరాల్లో వాయుగుండంగా బలపడే అవకాశం ఉందని అంచనా వేస్తున్నారు. ఆ తర్వాతి రెండు రోజుల్లోనూ ఇదే దిశలో కదిలే సూచనలు ఉన్నట్లు వాతావరణ శాఖ పేర్కొంది. ఈ వ్యవస్థ కదలికలు, తీవ్రతను బట్టి ఏపీ తీర ప్రాంతాల్లో వర్షాల పరిస్థితి మారే అవకాశం ఉంది.

ఇటీవల అర్న‌బ్‌ తుపాను ప్రభావంతో ఇబ్బందిప‌డ్డ‌ ఆంధ్రప్రదేశ్‌లో ఇప్పుడిప్పుడే సాధారణ పరిస్థితులు నెలకొంటున్నాయి. ఈ సమయంలో బంగాళాఖాతంలో మరో అల్పపీడనం ఏర్పడటం ఆందోళన కలిగిస్తోంది. తాజా వాతావరణ వ్యవస్థ ప్రభావంతో రానున్న రోజుల్లో కోస్తాంధ్రలో వర్షాలు కురిసే అవకాశం ఉందని ఏపీ విపత్తు నిర్వహణ శాఖ తెలిపింది.

ముఖ్యంగా నవంబర్ 1, 2 తేదీల్లో కోస్తాంధ్రలోని పలు ప్రాంతాల్లో మోస్తరు నుంచి భారీ వర్షాలు పడవచ్చని అంచనా వేసింది. దక్షిణ కోస్తాంధ్రతో పాటు రాయలసీమలోనూ కొన్ని ప్రాంతాల్లో వర్షాలు కురిసే అవకాశముంది. అయితే, వర్షాల తీవ్రత, ఏయే ప్రాంతాలపై ప్రభావం ఎక్కువగా ఉంటుందనే విషయాలు వాతావరణ వ్యవస్థ తదుపరి కదలికలపై ఆధారపడి ఉంటాయి.

ఏపీలోని పలు జిల్లాలకు వాతావరణ శాఖ వర్ష సూచన జారీ చేసింది. శుక్రవారం వెల్లడించిన అంచనాల ప్రకారం మన్యం, అల్లూరి సీతారామరాజు, కోనసీమ, పశ్చిమ గోదావరి, పోలవరం, మార్కాపురం, ప్రకాశం, నెల్లూరు, నంద్యాల, వైఎస్సార్ కడప, అన్నమయ్య, చిత్తూరు, తిరుపతి జిల్లాల్లో అక్కడక్కడ మోస్తరు వర్షాలు కురిసే అవకాశం ఉంది.

తీర ప్రాంతాల్లో వాతావరణ పరిస్థితులను అధికారులు నిశితంగా పరిశీలిస్తున్నారు. సముద్రంలో వాయుగుండం బలపడితే వర్షాల విస్తృతి, తీవ్రతలో మార్పులు చోటుచేసుకోవచ్చు. రైతులు, మత్స్యకారులు, లోతట్టు ప్రాంతాల ప్రజలు స్థానిక అధికారుల సూచనలను పాటించాలని అధికారులు సూచిస్తున్నారు. వర్షాల కారణంగా రాకపోకలకు అంతరాయం కలగకుండా అవసరమైన జాగ్రత్తలు తీసుకోవాలని చెబుతున్నారు.

ఆంధ్రప్రదేశ్‌తో పాటు తెలంగాణలోనూ రానున్న మూడు రోజుల వాతావరణంపై హైదరాబాద్ వాతావరణ కేంద్రం అంచనాలు వెల్లడించింది. రాష్ట్రంలోని కొన్ని జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని తెలిపింది. వికారాబాద్, రంగారెడ్డి, నారాయణపేట, మహబూబ్‌నగర్, వనపర్తి జిల్లాల్లో వర్షాలు పడే సూచనలు ఉన్నాయి. మరోవైపు హైదరాబాద్, మేడ్చల్, యాదాద్రి, నల్గొండ, సూర్యాపేట జిల్లాల్లోనూ వర్షాలు కురిసే అవకాశముందని తెలిపారు. మిగిలిన ప్రాంతాల్లో ప్రధానంగా పొడి వాతావరణం ఉండవచ్చని తెలిపారు. స్థానిక వాతావరణ పరిస్థితులను బట్టి వర్షాల ప్రభావంలో మార్పులు ఉండొచ్చు కాబట్టి ప్రజలు తాజా హెచ్చరికలను గమనించాలని సూచించారు.

అర్నాబ్ తుపాను ప్రభావంతో ఏపీలో పంటలు, తోటలు, ఆక్వా చెరువులు, రహదారులు, నివాస ప్రాంతాలు దెబ్బతిన్నాయి. ఈ నేపథ్యంలో ముఖ్యమంత్రి చంద్రబాబు నాయుడు ప్రభావిత ప్రాంతాలను ఏరియల్ వ్యూ ద్వారా పరిశీలించారు. వరిచేలు, అరటి తోటలు, కొబ్బరి తోటలు, ఆక్వా చెరువులకు జరిగిన నష్టాన్ని సమీక్షించారు. పునరావాస కేంద్రాల్లో ఆశ్రయం పొందుతున్న బాధితులతో మాట్లాడి ప్రభుత్వం అండగా ఉంటుందని భరోసా కల్పించారు. తుపాను నష్టాన్ని అంచనా వేసేందుకు కేంద్ర బృందం కూడా ఏపీకి రానున్నట్లు సమాచారం.

మరోవైపు, బంగాళాఖాతంలో ఏర్పడిన అల్పపీడనం వాయుగుండంగా బలపడే అవకాశాల నేపథ్యంలో ప్రజలు అప్రమత్తంగా ఉండాలని విపత్తు నిర్వహణ శాఖ సూచిస్తోంది. భారీ వర్షాలు కురిసే సమయంలో అవసరం లేకుండా బయటకు వెళ్లకూడదు. లోతట్టు ప్రాంతాల్లో నివసించే వారు వాతావరణ హెచ్చరికలను గమనించాలి. ఉరుములు, మెరుపులతో కూడిన వర్షాలు పడేటప్పుడు చెట్ల కింద, విద్యుత్ స్తంభాల సమీపంలో ఉండకూడదు. వర్షాలపై వాతావరణ శాఖ జారీ చేసే తాజా సూచనలను అనుసరించడం ద్వారా ప్రమాదాలను తగ్గించుకోవచ్చు.