Asianet News Telugu

మృత్యువుతో పోరాడి కన్నుమూసిన మెడికో ప్రియాంక.. అసలేం జరిగిందంటే?

Narender Vaitla — Sun, 09 Aug 2026 18:37:05 +0530

ఆగస్టు 3న అసలేం జరిగింది?

ప్రియాంక తన స్నేహితురాలితో కలిసి ఆగస్టు 3 రాత్రి రాజమహేంద్రవరంలోని ప్రసాద్ ఆదిత్య మాల్‌కు వెళ్లారు. సినిమా చూసిన అనంతరం స్కూటీపై బయటకు వస్తుండగా రోడ్డుపై ట్రాఫిక్ ఉండటంతో కొద్దిసేపు ఆగాల్సి వచ్చింది. అదే సమయంలో వెనుక నుంచి వచ్చిన కారు ఆమె ప్రయాణిస్తున్న స్కూటీని ఢీకొట్టింది. ఈ ప్రమాదంలో ప్రియాంకకు తీవ్ర గాయాలయ్యాయి. ఆ స‌మ‌యంలో కారులో నామవరం ప్రాంతానికి చెందిన సురవరపు దుష్యంత్, లాలాచెరువుకు చెందిన ఆండ్రూ విలియం జోసెఫ్ ఉన్నట్లు పోలీసులు గుర్తించారు. ప్రమాదం జరిగిన వెంటనే తొలుత ర్యాష్ డ్రైవింగ్‌కు సంబంధించిన సెక్షన్ల కింద కేసు నమోదు చేశారు. అయితే దర్యాప్తులో వెలుగులోకి వచ్చిన అంశాల ఆధారంగా కేసులో కీలకమైన సెక్షన్లను మార్చారు. ప్రస్తుతం ఇద్దరు నిందితులు 14 రోజుల జ్యుడీషియల్ రిమాండ్‌లో ఉన్నారు.

పరిస్థితి విషమం.. హైదరాబాద్‌కు తరలింపు

ప్రమాదంలో తీవ్రంగా గాయపడిన ప్రియాంకకు తొలుత రాజమహేంద్రవరంలో చికిత్స అందించారు. అయితే ఆమె ఆరోగ్య పరిస్థితి మరింత విషమించడంతో మెరుగైన వైద్యం కోసం హైదరాబాద్‌లోని సికింద్రాబాద్ కిమ్స్ ఆస్పత్రికి తరలించారు. అప్పటి నుంచి వైద్యులు ఆమెను కాపాడేందుకు తీవ్రంగా ప్రయత్నించారు. ప్రియాంక పరిస్థితి అత్యంత విషమంగా ఉండటంతో వైద్యులు బ్రెయిన్ డెత్ నిర్ధారణకు అవసరమైన పరీక్షలు నిర్వహించేందుకు ప్రయత్నించారు. అయితే ఆమె శరీర పరిస్థితి సహకరించకపోవడంతో కొన్ని పరీక్షలు నిర్వహించడంలో ఇబ్బందులు ఎదురైనట్లు వైద్యులు వెల్లడించారు. చివరకు ఆమె పరిస్థితి మరింత క్షీణించడంతో బ్రెయిన్‌డెడ్‌గా నిర్ధారించారు. వైద్యుల ప్రయత్నాలు ఫలించకపోవడంతో ఆదివారం మధ్యాహ్నం ఆమె మృతి చెందినట్లు ప్రకటించారు.

ప్రియాంక తండ్రి ఆవేదన

కుమార్తె మృతితో ప్రియాంక కుటుంబంలో తీవ్ర విషాదం నెలకొంది. ఈ కేసులో నిందితులపై కఠిన చర్యలు తీసుకోవాలని ఆమె తండ్రి వెంకటేష్ డిమాండ్ చేశారు. ప్ర‌మాదానికి కార‌ణ‌మైన వారిపై కఠినమైన సెక్షన్ల కింద చర్యలు తీసుకోవాలని ఆయన పోలీసులను కోరారు.

హత్యాయత్నం కేసు.. ఇప్పుడు హత్య కేసుగా మారుతుందా?

ప్రియాంకను ఢీకొట్టిన ఘటనపై ఇప్పటికే నిందితులు దుష్యంత్, ఆండ్రూ జోసెఫ్‌పై హత్యాయత్నానికి సంబంధించిన కేసు నమోదు చేసినట్లు తూర్పుగోదావరి జిల్లా ఎస్పీ కిషోర్ తెలిపారు. ప్రమాదం ఉద్దేశపూర్వకంగా జరిగిందని దర్యాప్తులో నిర్ధారణ అయితే హత్యాయత్నం కేసును హత్య కేసుగా మార్చే అవకాశం ఉందని ఆయన స్పష్టం చేశారు. కేసులో ప్రమేయం ఉన్న ప్రతి ఒక్కరినీ గుర్తించి అరెస్టు చేస్తామని, నిందితులను కస్టడీకి తీసుకునేందుకు చర్యలు చేపడుతున్నామని తెలిపారు.

ప్రియాంక స్వస్థలం గద్వాల జిల్లా అయిజ మండలం ఎక్లాస్‌పూర్. ఎంబీబీఎస్ పూర్తి చేసిన ఆమె రాజమహేంద్రవరంలో పీజీ చదువుతున్నారు. వైద్యురాలిగా మంచి భవిష్యత్తు కోసం అడుగులు వేస్తున్న సమయంలో జరిగిన ఈ విషాద ఘటన ఆమె కుటుంబాన్ని తీవ్ర విషాదంలోకి నెట్టింది. రోడ్డు ప్రమాదంలో తీవ్రంగా గాయపడి రోజుల పాటు మృత్యువుతో పోరాడిన ప్రియాంక చివరకు కన్నుమూయడంతో కుటుంబ సభ్యులు, స్నేహితులు విషాదంలో మునిగిపోయారు.

ప్రెస్ మీట్ పెట్టి మరీ జగన్ పరువుతీసిన హోమ్ మంత్రి అనిత | Anitha Vangalapudi Strong Counter to Jagan

Galam Venkata Rao — Fri, 07 Aug 2026 03:25:42 +0530

Tirumala : ఒకేరోజు రెండుసార్లు తిరుమల శ్రీవారిని దర్శించుకోవచ్చు? ఎలాగో తెలుసా?

Arun Kumar P — Sat, 08 Aug 2026 13:12:45 +0530

కలియుగ ప్రత్యక్షదైవం తిరుమల వెంకటేశ్వరస్వామిని ఏ ఆర్నేళ్లకో, ఏడాదికో ఒక్కసారి దర్శించుకుంటేనే జన్మ పావనం అయ్యిందని భక్తులు భావిస్తారు. అలాంటిది ఒకేరోజు రెండుసార్లు శ్రీవారి దర్శనం లభిస్తే..! ఇలాంటి అవకాశమే భక్తులకు కల్పిస్తోంది టిటిడి.

వెంకటేశ్వర స్వామి భక్తులకు తిరుమల తిరుపతి దేవస్థానం (టీటీడీ) ఒక శుభవార్త చెప్పింది. ఈ ఏడాదికి సంబంధించిన పుష్పయాగ సేవ టికెట్లను ఆగస్టు 21 ఉదయం 10 గంటలకు ఆన్‌లైన్‌లో విడుదల చేస్తున్నట్లు ప్రకటించింది. ఈ పుష్పయాగ సేవ నవంబర్ 16వ తేదీన తిరుమల శ్రీవారి ఆలయంలో జరగనుంది. దీనికి ఒకరోజు ముందు అంటే నవంబర్ 15న అంకురార్పణ కార్యక్రమం ఉంటుంది. ఈ ప్రత్యేక సేవలో పాల్గొని శ్రీవారిని దర్శించుకోవాలని అనుకునే భక్తులు ముందుగానే టికెట్లు బుక్ చేసుకోవాల్సి ఉంటుంది.

ప్రతి ఏటా వార్షిక బ్రహ్మోత్సవాల తర్వాత శ్రీవారి జన్మనక్షత్రమైన శ్రవణ నక్షత్రం రోజున పుష్పయాగం నిర్వహించడం ఆనవాయితీ. ప్రకృతి వైపరీత్యాలు, అంటువ్యాధులు వంటివి తొలగిపోయి, సమస్త జీవరాశులు బాగుండాలని కోరుతూ ఈ పుష్పయాగ సేవను శాస్త్రోక్తంగా నిర్వహిస్తారు.

పుష్పయాగ సేవలో పాల్గొనేందుకు ఒక్కో భక్తుడికి టికెట్ ధరను టీటీడీ రూ.700గా నిర్ణయించింది. ఈ యాగంలో మొత్తం వెయ్యి మంది భక్తులకు మాత్రమే పాల్గొనే అవకాశం కల్పించారు. ఈ టికెట్లు కేవలం ఆన్‌లైన్‌లో మాత్రమే అందుబాటులో ఉంటాయి. తిరుమల లేదా తిరుపతిలో ఆఫ్‌లైన్‌లో టికెట్ల అమ్మకం ఉండదు.

ఒక మొబైల్ నంబర్‌పై రెండు పుష్షయాగం టికెట్లు మాత్రమే బుక్ చేసుకునే వీలుంది. దంపతులు, తల్లిదండ్రులు, పిల్లలు, సోదరులు కలిసి ఈ టికెట్లను బుక్ చేసుకోవచ్చు. 12 ఏళ్లలోపు పిల్లలకు టికెట్ అవసరం లేదు. కానీ 12 ఏళ్లు దాటిన ప్రతి భక్తుడు తప్పనిసరిగా ఆధార్ లేదా ఏదైనా ఇతర గుర్తింపు కార్డు వివరాలు అందించాలి. అయితేనే ఈ యాగంలో పాల్గొనే అవకాశం కల్పిస్తారు.

ఈ పుష్పయాగ సేవలో పాల్గొనే భక్తులకు ఒకే రోజు రెండుసార్లు వెంకటేశ్వర స్వామిని దర్శించుకునే అద్భుతమైన అవకాశం ఉంది. ఉదయం సేవలకు హాజరైనప్పుడు ఒకసారి, పుష్పయాగ సేవ ముగిసిన తర్వాత మరోసారి స్వామివారి దర్శనం లభిస్తుంది. ఈ రెండు దర్శనాలు కూడా తిరుమల ఆలయంలోని జయవిజయ ద్వారం నుంచే కల్పిస్తారు. ఇలా ఒకేరోజు రెండుసార్లు శ్రీవారిని దర్శించుకునే అవకాశం చాలా అరుదుగా వస్తుంది... కాబట్టి మీకు అవకాశం దక్కాలంటే ఈ నెలలో విడుదలయ్యే పుష్పయాగం టికెట్లు పొందండి.

అయితే ఈ పుష్పయాగ సేవ టికెట్లు బుక్ చేసుకునే భక్తులకు టీటీడీ ఒక నిబంధన పెట్టింది. ఈ ఏడాది నవంబర్ 16వ తేదీకి ముందు అంటే గత 180 రోజుల్లోపు ఏదైనా ఆర్జిత సేవలో పాల్గొన్న భక్తులకు ఈ టికెట్లు బుక్ చేసుకునే అవకాశం ఉండదు. కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్ర దీపాలంకార, వసంతోత్సవం, పవిత్రోత్సవం వంటి ఆర్జిత సేవల్లో పాల్గొన్న భక్తులకు ఇది వర్తిస్తుంది. రూ.300 దర్శన టికెట్ పొందిన వారికి, వర్చువల్ సేవల్లో పాల్గొన్నవారికి లేదా లక్కీ డిప్ ద్వారా వివిధ సేవల్లో పాల్గొన్న భక్తులకు ఈ నిబంధన వర్తించదు. ఈ 180 రోజుల గడువును టికెట్ బుక్ చేసుకున్న తేదీ నుంచి కాకుండా, సేవలో పాల్గొన్న తేదీ నుంచి లెక్కిస్తారు.

ఈనెల ఆగస్టు 21 ఉదయం 10 గంటలకు టికెట్లు విడుదల కానున్న నేపథ్యంలో భక్తులు ముందుగానే టీటీడీ అధికారిక వెబ్‌సైట్ లేదా యాప్‌లో లాగిన్ అయి సిద్ధంగా ఉండాలి. టికెట్ల సంఖ్య పరిమితంగా ఉన్నందున విడుదలైన కొద్ది నిమిషాల్లోనే అమ్ముడైపోతాయి.. కాబట్టి అన్ని వివరాలు సిద్దంగా ఉంచుకుని విడుదలైన వెంటనే టికెట్లు పొందాలి. ఏమాత్రం ఆలస్యం అయినా టికెట్లు లభించవు.

తిరుమల శ్రీవారి సన్నిధిలో అర్చకుల వేదమంత్రాలు, సువాసనభరితమైన పుష్పాలతో ఈ పుష్ఫయాగం జరుగుతుంది. ఇలా శ్రీవారికి జరిగే ఈ విశేష సేవను కళ్లారా చూసే అవకాశం భక్తులకు కల్పిస్తోంది టిటిడి. ఈ సేవలో పాల్గొనడమే కాదు ఒకే రోజు రెండుసార్లు శ్రీవారి దర్శనం పొందే ఈ ప్రత్యేక అవకాశాన్ని భక్తులు సద్వినియోగం చేసుకోవచ్చు.

IMD Rain Alert : ఆకాశంలో నల్లని మేఘాలు లోడింగ్... తెలంగాణలో 10, ఏపీలో 7 జిల్లాల్లో భారీ వర్షాలు

Arun Kumar P — Thu, 06 Aug 2026 10:46:12 +0530

Heavy Rain Alert : తెలుగు రాష్ట్రాల్లో వర్షాలు కొనసాగుతున్నాయి. గత పది పదిహేను రోజులుగా జోరు వానలు కురుస్తుండగా నేడు కూడా పలు జిల్లాల్లో మంచి వానలే పడతాయని ఇరు రాష్ట్రాల వాతావరణ విభాగాలు ప్రకటించాయి.

Rain Alert : ఎల్ నినో ప్రభావం తెలుగు రాష్ట్రాలపై పెద్దగా కనిపించడంలేదు. ప్రపంచ వాతావరణ సంస్థలు భారతదేశంలో ఎల్ నినో ఎఫెక్ట్ గట్టిగానే ఉంటుందని… ఇకపై పెద్దగా వర్షాలు కురిసే అవకాశాలు లేవంటున్నాయి... కానీ ఇందుకు భిన్నంగా భారీ వర్షాలు కురుస్తున్నాయి. తెలంగాణలో అయితే జూలై సెకండాఫ్ లో కుండపోత వానలు పడ్డాయి... ఆంధ్ర ప్రదేశ్ లో కూడా పరవాలేదు. ఇక ఎగువ రాష్ట్రాల్లో కూడా భారీ వర్షాలు కురవడంతో గోదావరి, కృష్ణా నదుల్లోకి వరదనీరు చేరి ఉప్పొంగి ప్రవహిస్తున్నాయి... దీంతో జలాశయాలన్ని నిండుకుండల్లా మారాయి. వాగులు వంకలు, చెరువులు కూడా జలకళను సంతరించుకున్నాయి.

ఇలా తెలుగు రాష్ట్రాల్లో కురుస్తున్న వానలు మరికొన్నిరోజులు కొనసాగుతాయని వాతావారణ నిపుణులు ప్రకటించారు. ఇవాళ (ఆగస్ట్ 6, గురువారం) కూడా ఇరు రాష్ట్రాల్లోని కొన్ని జిల్లాల్లో భారీ వర్షాలు కురుస్తాయని... ఒకటి రెండు చోట్ల అతిభారీ వర్షాలు పడే ఛాన్సెస్ కూడా ఉన్నాయంటున్నారు. కాబట్టి తెలుగు ప్రజలు కాస్త అప్రమత్తంగా ఉండాలని వాతావరణ శాఖ హెచ్చరిస్తోంది.

హైదరాబాద్ వాతావరణ కేంద్రం ప్రకారం... నేడు (ఆగస్ట్ 6) జయశంకర్ భూపాలపల్లి, ములుగు, భద్రాద్రి కొత్తగూడెం, నిజామాబాద్, సంగారెడ్డి, మెదక్, కామారెడ్డి జిల్లాల్లో అక్కడక్కడు ఉరుములు మెరుపులతో కూడిన వర్షాలు కురుస్తాయి. ఇక అన్ని జిల్లాల్లో గంటకు 30-40 కి.మీ వేగంతో బలమైన గాలులు వీస్తాయి. రాజధాని నగరం హైదరాబాద్ లో రోజంతా ఆకాశం పాక్షికంగా మేఘాలతో నిండివుంటుంది... కొన్నిప్రాంతాల్లో తేలికపాటి వర్షాలు కురుస్తాయని ప్రకటించింది.

ఇక తెలంగాణ వెదర్ మ్యాన్ కూడా రాష్ట్రంలో నేడు భారీ వర్షాలు కురుస్తాయని ప్రకటించారు. ముఖ్యంగా తూర్పు, పశ్చిమ, మధ్య తెలంగాణ జిల్లాల్లో సాయంత్రం లేదా రాత్రి సమయాల్లో మోస్తరు నుండి భారీ వర్షాలు కురుస్తాయని హెచ్చరించారు. ముఖ్యంగా సంగారెడ్డి, వికారాబాద్, రంగారెడ్డి, మెదక్, భద్రాద్రి కొత్తగూడెం, ములుగు, సిద్దిపేట జిల్లాల్లో భారీ వర్షాలుంటాయని వెదర్ మ్యాన్ ప్రకటించారు.

పశ్చిమమధ్య బంగాళాఖాతం, దానికి ఆనుకుని ఉన్న ఆంధ్రప్రదేశ్ తీరప్రాంతంపై ఉపరితల ఆవర్తనం విస్తరించి ఉందని విపత్తు నిర్వహణ సంస్థ (APSDMA) ఎండీ ప్రఖర్ జైన్ వెల్లడించారు. దీని ప్రభావంతో ఇవాళ (06-08-2026, గురువారం) శ్రీకాకుళం, పోలవరం, కోనసీమ, తూర్పుగోదావరి, పశ్చిమగోదావరి, నెల్లూరు, తిరుపతి జిల్లాల్లో చెదురుమదురుగా జల్లులు కురిసే అవకాశాలున్నాయట. ఇలా పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందని APSDMA వెల్లడించింది.

ఇక ఏలూరు, కృష్ణా, ఎన్టీఆర్, గుంటూరు, మర్కాపురం, ప్రకాశం, కర్నూలు, నంద్యాల, అన్నమయ్య, చిత్తూరు జిల్లాల్లో ఒకటి, రెండు చోట్ల తేలికపాటి వర్షాలు పడే అవకాశం ఉందని విపత్తు సంస్థ పేర్కొంది. అయితే కేేవలం వర్షాలే కాదు పిడుగులు కూడా పడే ప్రమాదం ఉంటుంది కాబట్టి చెట్లు, పోల్స్,హోర్డింగ్స్ వద్ద నిలబడరాదని APSDMA సూచించింది. రైతులు, వ్యవసాయ కూలీలు, పశువులు కాపర్లు అప్రమత్తంగా ఉండాలని... వర్ష సమయంలో సురక్షిత ప్రాంతాల్లో తలదాచుకోవాలని విపత్తు నిర్వహణ సంస్థ సూచించింది.

August Long Weekends : ఆగస్ట్ లో ప్రతి వీక్ లాంగ్ వీకెండ్... ఏ వారం, ఎన్ని సెలవులో తెలుసా?

Arun Kumar P — Thu, 06 Aug 2026 15:04:59 +0530

ఈ ఆగస్ట్ ఇంకా నాలుగు వారాలు మిగిలివున్నాయి… అయితే అన్నింటికి అన్ని లాంగ్ వీకెండ్స్ ఉన్నాయి. ఏవారంలో ఎన్ని సెలవులు వీకెండ్ తో కలిసి వస్తున్నాయి? అనేది ఇక్కడ తెలుసుకుందాం.

August Long Weekends : సాధారణంగా ప్రతి ఏడాది ఆగస్ట్ లో భారీగా సెలవులు వస్తుంటాయి. పండగలు, ప్రత్యేక పర్వదినాలతో పాటు స్వాతంత్య్ర దినోత్సవం సందర్భంగా సెలవులు ఉంటాయి... గత కొన్నేళ్ళుగా భారీ వర్షాల కారణంగా కూడా ఆగస్ట్ లో సడన్ హాలిడేస్ వస్తున్నాయి. ఈసారి కూడా ఆగస్ట్ లో ఎక్కువరోజులు సెలవులు ఉన్నాయి.

ఈ ఆగస్ట్ సెలవుల గురించి మరింత ఆసక్తికరమైన విషయం ఏంటంటే చాలా సెలవులు వీకెండ్ తో కలిసి వస్తున్నాయి... అంటే వరుస సెలవులు కలిసివస్తున్నాయన్నమాట. ఇలా ఈ నెలలో ఇంకా నాలుగు వీకెండ్స్ మిగిలివున్నాయి... వరుస సెలవులతో అన్నీ లాంగ్ వీకెండ్స్ గా మారనున్నాయి. మరి ఏ వారాంతంతో ఏ సెలవులు కలిసివస్తున్నాయి? ఎన్నిరోజులు సెలవులు వస్తున్నాయి? అనేది తెలుసుకుంటే ఎలా ఎంజాయ్ చేయాలో ప్లాన్ చేసుకోడానికి వీలుంటుంది.

ఈ వారాంతం వరుసగా మూడ్రోజులు సెలవులున్నాయి. ఆగస్ట్ 8న రెండో శనివారం... కాబట్టి ప్రతి నెలలో మాదిరిగానే ఈరోజు అధికారికంగా సెలవు ఉంటుంది. ప్రభుత్వ, ప్రైవేట్ పాఠశాలలతో పాటు గవర్నమెంట్ ఉద్యోగులకు కచ్చితంగా సెలవు ఉంటుంది. ఇక ఐటీ, కార్పోరేట్ ఉద్యోగులకు ప్రతి వారంలో మాదిరిగానే శనివారం హాలిడే. ఇలా విద్యార్థులు, ఉద్యోగులకు ఈ శనివారం సెలవుంది.

ఇక ఆగస్ట్ 9 ఆదివారం కాబట్టి సాధారణ సెలవుంది. అయితే ఈ ఆదివారం ఆషాడమాసంలో చివరిది... అందుకే హైదరాబాద్ లో అట్టహాసంగా బోనాల వేడుకలు జరుగుతాయి. లాల్ దర్వాజ సింహవాహిని అమ్మవారి ఆలయంతో పాటు నగరంలోని అన్ని అమ్మవార్ల ఆలయాల్లో బోనాల వేడుకలు నిర్వహిస్తారు. నగర ప్రజలంతా అమ్మవారికి బోనాలు సమర్పించి కుటుంబసభ్యులు, బంధువులతో విందు జరుపుకుంటారు. కేవలం హైదరాబాద్ లోనే కాదు తెలంగాణలోని మరికొన్ని ప్రాంతాల్లో ఈ ఆదివారం బోనాల సందడి ఉంటుంది.

ఇలా బోనాల వేడుకల నేపథ్యంలో తర్వాతిరోజు అంటే ఆగస్ట్ 10 (సోమవారం) అధికారిక సెలవు ఇచ్చింది తెలంగాణ ప్రభుత్వం. అంటే తెలంగాణవ్యాప్తంగా ప్రభుత్వ, ప్రైవేట్ విద్యాసంస్థలన్నింటికి ఈరోజు సెలవు అన్నమాట. ఉద్యోగులకు కూడా ఈ సెలవు వర్తిస్తుంది. ఇలా ఈ వీకెండ్ లో వరుసగా మూడ్రోజుల సెలవులు కలిసివస్తున్నాయి.

ఓ లాంగ్ వీకెండ్ ముగస్తుందో లేదో మరోటి రెడీగా ఉంటుంది. ఆగస్ట్ 15న భారత స్వాతంత్య్ర దినోత్సవం... జాతీయ పర్వదినం సందర్భంగా విద్యాసంస్థలు, ఆఫీసులకు సెలవు ఉంటుంది. జెండా ఆవిష్కరణ, ప్రత్యేక కార్యక్రమాల అనంతరం విద్యార్థులు, ఉద్యోగులు ఇంటికి వెళ్లిపోవచ్చు. అయితే ఈసారి స్వాతంత్య్ర దినోత్సవం శనివారం వస్తోంది... కాబట్టి ఆదివారం సెలవు కలిసివస్తోంది. ఇలా ఆగస్ట్ 15, 16 (శని, ఆదివారం) రెండ్రోజులు సెలవు... వీకెండ్ కాస్త లాంగ్ వీకెండ్ గా మారింది.

ఆగస్ట్ 21,22,23న వరస సెలవులు వస్తున్నాయి... అంటే ఇదికూడా లాంగ్ వీకెండే. ఆగస్ట్ 21 (శుక్రవారం) వరలక్ష్మి వ్రతం కాబట్టి తెలుగింటి మహిళలు భక్తిశ్రద్దలతో పూజలు జరుపుకుంటారు. అందుకే మహిళా ఉద్యోగులు పూజ జరుపుకునేందుకు వీలుగా ఈరోజు ఐచ్చిక సెలవు ఇచ్చాయి తెలంగాణ, ఏపీ ప్రభుత్వాలు. అంటే అధికారిక సెలవు లేకున్నా కావాలనుకుంటే వేతనంతో కూడిన సెలవు పొందవచ్చు.

ఇక ప్రతివారం మాదిరిగానే ఐటీ, కార్పోరేట్ ఉద్యోగులకు ఆగస్ట్ 22న కూడా శనివారం సెలవు ఉంటుంది. అంతేకాదు ఇది నెలలో నాలుగో శనివారం... కాబట్టి బ్యాంకు ఉద్యోగులకు సెలవు. కొన్ని విద్యాసంస్థలకు కూడా శనివారం సెలవే. ఇలా ఉద్యోగులు, విద్యార్థులకు ఆగస్ట్ 22న సెలవు ఉంది.

ఆగస్ట్ 23 ఆదివారం.... కాబట్టి సాధారణ సెలవే. ఇలా ఆగస్ట్ 21, 22 సెలవులకు ఆదివారం కలిసిరావడంతో వీకెండ్ కాస్త లాంగ్ వీకెండ్ గా మారింది. ఇది ఆగస్ట్ లో వరుసగా వచ్చే మూడో లాంగ్ వీకెండ్. దీని తర్వాత కూడా ఇంకో లాంగ్ వీకెండ్ మిగిలివుంటుంది.

ఆగస్ట్ ఎండింగ్ లో అయితే నాలుగైదు రోజుల సెలవులు ఉన్నాయి. ఆగస్ట్ 26న (బుధవారం) ముస్లింల పవిత్ర పండగ ఈద్ మిలాదున్ నబి ఉంది... దీంతో తెలుగు విద్యార్థులు, ఉద్యోగులకు అధికారిక సెలవు ఉంది. మధ్యలో ఒక్కరోజు (ఆగస్ట్ 27, గురువారం) వర్కింగ్ డే. తర్వాత ఆగస్ట్ 28 (శుక్రవారం) శ్రావణ పూర్ణిమ లేదా రాఖీ పౌర్ణమి. హిందువులకు ఎంతో పవిత్రమైన రోజు... అన్నాచెల్లెల్ల అనుబంధాల పండగ రాఖీ కూడా ఉంటుంది. కాబట్టి ఈరోజు సెలవు ఉంది. ఇక ఆగస్ట్ 29 (శనివారం), ఆగస్ట్ 30 (ఆదివారం) సాధారణంగా వచ్చే సెలవులు. ఇలా వరుసగా ఆగస్ట్ చివర్లో వరుస సెలవులు వస్తున్నాయి... వీకెండ్ కాస్త లాంగ్ వీకెండ్ గా మారుతోంది.

చీరాల పర్యటన లో స్వయంగా చీరను నేసిన సీఎం చంద్రబాబు | CM Chandrababu Chirala tour | Asianet Telugu

Galam Venkata Rao — Sat, 08 Aug 2026 02:26:59 +0530

Andhra pradesh: ఏపీ ప్ర‌జ‌ల‌కు గుడ్ న్యూస్‌.. ఆగ‌స్టు 7న‌ ఒక్కో కుటుంబానికి రూ. 25 వేల ఆర్థిక సాయం

Narender Vaitla — Thu, 06 Aug 2026 15:55:43 +0530

Andhra pradesh: ఆంధ్రప్రదేశ్ ప్రభుత్వం చేనేత కార్మికుల సంక్షేమానికి కీలక నిర్ణయం తీసుకుంది. జాతీయ చేనేత దినోత్సవాన్ని పురస్కరించుకుని ‘నేతన్న సేవలో’ పేరుతో కొత్త పథకాన్ని ప్రారంభించనుంది. ఈ పథకం ద్వారా రూ. 25 వేల చొప్పున ఆర్థిక సాయం అందించనున్నారు.

‘నేతన్న సేవలో’ పథకం కింద రాష్ట్రంలోని 71,536 చేనేత కుటుంబాలకు ప్రభుత్వం ఆర్థిక సహాయం అందించనుంది. ఇందుకోసం మొత్తం రూ.179 కోట్ల నిధులను విడుదల చేయనున్నారు. చేనేత వృత్తిపై ఆధారపడిన కుటుంబాలకు ఆర్థికంగా తోడ్పాటు అందించడంతో పాటు, సంప్రదాయ చేనేత వృత్తిని ప్రోత్సహించడమే ఈ పథకం ప్రధాన ఉద్దేశమని ప్రభుత్వం తెలిపింది. ఎన్నికల హామీల్లో ఈ పథకం లేకపోయినా, చేనేత రంగాన్ని బలోపేతం చేయాలనే లక్ష్యంతో దీనిని అమలు చేస్తున్నట్లు వెల్లడించింది.

కొత్త పథకంతో పాటు చేనేత కార్మికులకు ఇప్పటికే ప్రభుత్వం అనేక రకాల సంక్షేమ కార్యక్రమాలను అమలు చేస్తోంది. చేనేత కుటుంబాలకు నెలకు 200 యూనిట్ల వరకు, పవర్‌లూమ్ యూనిట్లకు 500 యూనిట్ల వరకు ఉచిత విద్యుత్ అందిస్తోంది. ఈ పథకం ద్వారా 62,541 చేనేత కుటుంబాలు, 10,032 పవర్‌లూమ్ యూనిట్లు ప్రయోజనం పొందుతున్నాయి. ఇందుకోసం ప్రభుత్వం ప్రతి సంవత్సరం సుమారు రూ.150 కోట్లు ఖర్చు చేస్తోంది. అలాగే 50 ఏళ్లు పూర్తైన 85 వేల మంది చేనేత కార్మికులకు నెలకు రూ.4 వేల పింఛన్ అందిస్తూ, ఏడాదికి సుమారు రూ.420 కోట్లు వెచ్చిస్తోంది.

చేనేత రంగాన్ని ఆధునికీకరించేందుకు ప్రభుత్వం పలు అభివృద్ధి కార్యక్రమాలు చేపడుతోంది. 109 ప్రాథమిక చేనేత సహకార సంఘాలకు రూ.79 కోట్ల క్యాష్ క్రెడిట్ సౌకర్యం కల్పించింది. ఉప్పాడలో ప్రత్యేక మౌలిక సదుపాయాల అభివృద్ధి ప్రాజెక్టు, మంగళగిరిలో హ్యాండ్లూమ్ పార్కు, అమరావతి సమీపంలోని శాఖమూరులో చేనేత, హస్తకళల మ్యూజియం ఏర్పాటు చేస్తున్నారు. అలాగే విశాఖపట్నంలో రూ.4,200 కోట్ల పెట్టుబడితో సుస్థిర టెక్స్‌టైల్ రీసైక్లింగ్ యూనిట్ ఏర్పాటు చేసే ప్రణాళిక కూడా అమలులో ఉంది.

జాతీయ చేనేత దినోత్సవం (ఆగ‌స్టు 7వ తేదీ) సందర్భంగా ముఖ్యమంత్రి నారా చంద్రబాబు నాయుడు చీరాల నియోజకవర్గంలో పర్యటించనున్నారు. వేటపాలెం మండలం కొత్తపేటలో నిర్వహించే సభలో పాల్గొని ‘నేతన్న సేవలో’ పథకాన్ని ప్రారంభించి లబ్ధిదారుల ఖాతాల్లో నిధులు జమ చేయనున్నారు. అనంతరం జాండ్రపేటలో చేనేత కార్మికుల వర్క్‌షాప్‌ను సందర్శించి, లబ్ధిదారులతో నేరుగా మాట్లాడనున్నారు.

ఆదివాసీలతో కలిసి సీఎం చంద్రబాబు అదిరిపోయే స్టెప్పులు | CM Chandrababu Particepate Tribal Day

Galam Venkata Rao — Sun, 09 Aug 2026 23:00:00 +0530

Weather Update: ఉపరితల ఆవర్తనంతో ఏపీ, తెలంగాణకు భారీ వర్షాలు.. ఈ ప్రాంతాలకు ఐఎండీ అలర్ట్

Mahesh Rajamoni — Fri, 07 Aug 2026 08:41:38 +0530

Weather Update: బంగాళాఖాతంలో ఉపరితల ఆవర్తనం, నైరుతి రుతుపవనాల జోరుతో ఆంధ్రప్రదేశ్, తెలంగాణల్లో భారీ వర్షాలు కురవనున్నాయి. రెండు తెలుగు రాష్ట్రాల్లోని పలు ప్రాంతాలకు వాతావరణ శాఖ కీలక హెచ్చరికలు జారీ చేసింది.

తెలుగు రాష్ట్రాల్లో వాతావరణం రూటు మార్చింది. మళ్లీ భారీ వర్షాలు మొదలయ్యాయి. తాజాగా భారత వాతావరణ శాఖ (IMD) విడుదల చేసిన బులెటిన్ ప్రకారం.. రాబోయే కొన్ని రోజుల పాటు రెండు రాష్ట్రాల్లోనూ వాతావరణం మరింత కూల్ కానుంది. నైరుతి రుతుపవనాలు తీవ్ర రూపం దాల్చడం, వాయవ్య బంగాళాఖాతంలో ఒడిశా తీరానికి సమీపంలో ఉపరితల ఆవర్తనం ఏర్పడటంతో వానలు దంచికొట్టనున్నాయని ఐఎండీ హెచ్చరించింది. వీటి ప్రభావంతో ఏపీ, తెలంగాణలో భారీ వర్షాలు కురుస్తాయని వాతావరణ శాఖ అంచనా వేసింది.

తెలంగాణలో నైరుతి రుతుపవనాల సీజన్‌లో సాధారణంగా 402.1 మి.మీ వర్షపాతం నమోదు కావాల్సి ఉండగా, ప్రస్తుతం 379 మి.మీ వర్షపాతం మాత్రమే పడింది. అయితే ఈ లోటును భర్తీ చేసేందుకు వర్షాలు మళ్లీ యాక్టివ్ అయ్యాయి. రాబోయే మూడు రోజుల పాటు హైదరాబాద్‌తో సహా రాష్ట్ర వ్యాప్తంగా చాలా జిల్లాల్లో వానలు కురిసే అవకాశం ఉందని వాతావరణ కేంద్రం తెలిపింది.

యాదాద్రి భువనగిరి, కరీంనగర్, పెద్దపల్లి, సిరిసిల్ల, జగిత్యాల, మెదక్, సిద్దిపేట, భూపాలపల్లి, వికారాబాద్, రంగారెడ్డి, నల్గొండ జిల్లాల్లో మోస్తరు నుంచి భారీ వర్షాలు పడ్డాయి. గ్రేటర్ హైదరాబాద్ పరిధిలోనూ రాత్రి నుంచి తెల్లవారుజాము వరకు చెదురుమదురుగా జల్లులు కురిసాయి. రాబోయే రోజుల్లో 30 నుంచి 40 కిలోమీటర్ల వేగంతో ఈదురుగాలులు వీచే ఛాన్స్ ఉందని అధికారులు హెచ్చరిస్తున్నారు.

ఆంధ్రప్రదేశ్ వాతావరణం పూర్తిగా మారింది. అల్పపీడన ప్రభావంతో పాటు ఉపరితల ఆవర్తనం కారణంగా కోస్తాంధ్ర, రాయలసీమ వ్యాప్తంగా వాతావరణం పూర్తిగా కూల్ అయింది. విశాఖపట్నం వాతావరణ కేంద్రం తెలిపిన వివరాల ప్రకారం.. ఉత్తరాంధ్ర జిల్లాలైన శ్రీకాకుళం, విజయనగరం, విశాఖపట్నం, అల్లూరి సీతారామరాజు ప్రాంతాల్లో భారీ నుంచి అతిభారీ వర్షాలు కురిసే అవకాశం ఉంది.

శ్రీకాకుళం జిల్లాకు రెడ్ అలర్ట్ జారీ చేయగా.. ఏలూరు, చిత్తూరు జిల్లాలకు ఎల్లో అలర్ట్ ప్రకటించారు. అంతేకాకుండా కాకినాడ, కోనసీమ, తూర్పు గోదావరి, పశ్చిమ గోదావరి, కృష్ణా, ఎన్టీఆర్, గుంటూరు, బాపట్ల, ప్రకాశం, రాయలసీమలోని అన్ని జిల్లాల్లో ఉరుములు, మెరుపులు, పిడుగులతో కూడిన మోస్తరు వర్షాలు పడతాయని అంచనా వేసింది. ఈ నెల 14న ఉత్తర బంగాళాఖాతంలో మరో అల్పపీడనం ఏర్పడే సూచనలు ఉన్నాయని అధికారులు వెల్లడించారు.

వర్షాలు కురిసే సమయంలో సముద్రం అల్లకల్లోలంగా మారే ప్రమాదం ఉంది. గంటకు 30 నుంచి 50 కిలోమీటర్ల వేగంతో బలమైన ఈదురుగాలులు వీచే అవకాశం ఉండటంతో తీరప్రాంత మత్స్యకారులు వేటకు వెళ్లకూడదని విపత్తు నిర్వహణ సంస్థ (APSDMA) ఆదేశించింది.

అలాగే గ్రామీణ ప్రాంతాల్లో ఉన్న రైతులు, వ్యవసాయ కూలీలు, పశువుల కాపరులు పిడుగులు పడే సమయంలో చెట్ల కింద, హోర్డింగ్స్ కింద లేదా విద్యుత్ స్తంభాల వద్ద నిలబడవద్దని హెచ్చరించారు. ఉరుములు, మెరుపులు వస్తున్నప్పుడు సురక్షితమైన కాంక్రీట్ భవనాల్లోకి వెళ్లాలని సూచించారు.

ఐఎండీ అమరావతి, హైదరాబాద్ బులెటిన్ల ప్రకారం ఆగస్టు 6 నుంచి 13 వరకు తెలుగు రాష్ట్రాల్లో వాతావరణం ఇలాగే ముసురు పట్టి ఉండే అవకాశం ఉంది. తొలి ఐదు రోజులు గాలుల తీవ్రత ఎక్కువగా ఉన్నప్పటికీ, ఆ తర్వాత వారం చివరి నాటికి సాధారణ వర్షాలు మాత్రమే నమోదు కావచ్చని చెబుతున్నారు.

ఉష్ణోగ్రతల విషయానికొస్తే.. హైదరాబాద్‌లో గరిష్ఠంగా 31°C నుండి 32°C, విజయవాడలో 32°C నుండి 33°C, తిరుపతి ప్రాంతంలో 34°C నుండి 35°C వరకు నమోదు కావచ్చు. పట్టణ ప్రాంతాలైన హైదరాబాద్, విజయవాడ, విశాఖపట్నంలో హఠాత్తుగా కురిసే వర్షాల వల్ల ట్రాఫిక్ జామ్‌లు, లోతట్టు ప్రాంతాల్లో నీరు నిలిచే సమస్యలు ఉత్పన్నమయ్యే అవకాశం ఉంది కాబట్టి ప్రజలు ప్రయాణాలు ప్లాన్ చేసుకునేటప్పుడు వెదర్ అప్‌డేట్స్ చూసుకోవడం మంచిది.

Weather Update: బంగాళాఖాతంలో కొత్త అల్పపీడనం.. ఈ వారం వానలే వానలు.. పలు జిల్లాలకు ఐఎండీ బిగ్ అలర్ట్

Mahesh Rajamoni — Mon, 10 Aug 2026 08:27:21 +0530

Weather Update: బంగాళాఖాతంలో ఏర్పడిన అల్పపీడనంతో ఆంధ్రప్రదేశ్, తెలంగాణలో ఈ వారం మొత్తం పలు ప్రాంతాల్లో వర్షాలు పడనున్నాయి. మోస్తారు నుంచి భారీ వర్షాలు కురుస్తాయని భారత వాతావరణ శాఖ హెచ్చరించింది.

తెలుగు రాష్ట్రాల ప్రజలకు వాతావరణ శాఖ బిగ్ అప్‌డేట్ ఇచ్చింది. బంగాళాఖాతంలో ఏర్పడిన అల్పపీడనం, ఉపరితల ద్రోణి ప్రభావంతో ఆంధ్రప్రదేశ్, తెలంగాణల్లో మరో వారం రోజుల పాటు వర్షాలు కురిసే ఛాన్స్ ఉందని వెల్లడించింది. హైదరాబాద్ బేగంపేట, అమరావతి వాతావరణ కేంద్రాలు ఈ మేరకు స్పష్టమైన సూచనలు జారీ చేశాయి. ఇప్పటికే రెండు రాష్ట్రాల్లోని పలు జిల్లాల్లో వానలు పడుతుండగా, రానున్న రోజుల్లో కూడా తేలికపాటి నుంచి మోస్తరు వర్షాలు పడే అవకాశం ఉంది. ఆకాశం మేఘావృతమై ఉండి అడపాదడపా జల్లులు పడతాయి.

ఇదివరకే ఏర్పడిన ఉత్తర ఒడిశా, జార్ఖండ్ ప్రాంతాల్లో ఉన్న అల్పపీడనం ప్రస్తుతం ఈశాన్య మధ్యప్రదేశ్, ఛత్తీస్‌గఢ్ వైపు కదిలింది. దీనికి అనుబంధంగా ఉపరితల ఆవర్తనం సముద్ర మట్టానికి ఏకంగా 7.6 కిలోమీటర్ల ఎత్తు వరకు విస్తరించి ఉంది. దీనివల్ల తెలంగాణ వ్యాప్తంగా ఆగస్టు 9 నుంచి 16 వరకు వర్షాలు కురిసే అవకాశాలు ఉన్నాయని ఐఎండీ తెలిపింది.

ఆగస్టు 9 నుంచి 12 మధ్య గంటకు 30 నుంచి 40 కిలోమీటర్ల వేగంతో ఈదురుగాలు వీస్తాయని పేర్కొంది. హైదరాబాద్‌తో పాటు జగిత్యాల, జనగామ, కామారెడ్డి, మేడ్చల్ మల్కాజిగిరి, మంచిర్యాల, మెదక్, నల్లగొండ, పెద్దపల్లి, రంగారెడ్డి, సంగారెడ్డి, సూర్యాపేట జిల్లాల్లో ఇప్పటికే జల్లులు పడ్డాయి. ఆగస్టు 12 తర్వాత వర్షాలు ఉన్నా పెద్దగా ప్రమాదకర హెచ్చరికలేవీ లేవు.

ఆంధ్రప్రదేశ్ విషయానికి వస్తే, గురువారం రోజున ఉత్తర బంగాళాఖాతం, పశ్చిమబెంగాల్ తీరప్రాంతంలో మరో కొత్త అల్పపీడనం ఏర్పడే అవకాశం ఉందని వాతావరణ శాఖ అంచనా వేస్తోంది. దీనివల్ల సోమవారం నుంచి శనివారం వరకు కోస్తాంధ్ర, రాయలసీమల్లో వర్షాలు పడొచ్చు. ముఖ్యంగా ఉత్తర కోస్తాంధ్ర, యానాం ప్రాంతాల్లో చాలా చోట్ల ఉరుములతో కూడిన జల్లులు పడతాయని వాతావరణ శాఖ హెచ్చరించింది.

అయితే ఎల్‌నినో ప్రభావం వల్ల ఈ అల్పపీడనాలు పెద్దగా ప్రభావం చూపడం లేదని, అందుకే రాష్ట్రంలో అక్కడక్కడ మాత్రమే వానలు పడుతున్నాయని అధికారులు చెప్తున్నారు. ఆగస్టు 9 నుంచి 13 వరకు ఏపీలోని పలు చోట్ల గంటకు 40 నుంచి 50 కిలోమీటర్ల వేగంతో ఈదురుగాలులు వీచే ఛాన్స్ ఉంది. మోస్తారు నుంచి భారీ వర్షాలు పడే అవకాశాలు కూడా ఉన్నాయని అధికారులు తెలిపారు.

వాతావరణంలో మార్పుల వల్ల అత్యంత ప్రమాదకరమైన పిడుగులు పడుతున్నాయి. శ్రీకాకుళం జిల్లాకు ఆదివారం ఆరెంజ్ అలర్ట్ జారీ కాగా, మందస మండలం బుడార్శింగి పంచాయతీలోని కళింగదళ్ జలాశయం కింద పొలంలో పనిచేస్తున్న ఆరుగురిపై సాయంత్రం 5 గంటల సమయంలో పిడుగు పడింది. ఈ దుర్ఘటనలో సుముద్రి, జొరా అనే ఇద్దరు మహిళా కూలీలు అక్కడిక్కడే చనిపోయారు. మిగిలిన నలుగురు గాయపడగా హరిపురం ఆసుపత్రికి తరలించారు. వీరిలో పెర్మి అనే వ్యక్తి పరిస్థితి విషమంగా ఉంది.

మృతురాలు సుముద్రి భర్త, పెద్ద కూతురు రెండేళ్ల క్రితమే అనారోగ్యంతో చనిపోగా, ఇప్పుడు ఈమె కూడా చనిపోవడంతో 10వ తరగతి చదువుతున్న చిన్న కూతురు అనాథగా మారింది. అలాగే జొరా భర్తకు కంటిచూపు లేదు, ఆమె 18 ఏళ్ల కుమార్తె మానసిక దివ్యాంగురాలు. ఈ ఘటన ఆ కుటుంబాల్లో తీవ్ర విషాదాన్ని నింపింది.

ఈ వర్షాల కాలంలో శ్రీకాకుళం జిల్లా పలాసలో 4.4 సెంటీమీటర్లు, కడప జిల్లా దువ్వూరులో 4.2 సెం.మీ, పాతపట్నంలో 4 సెం.మీ, పార్వతీపురం మన్యం వీరఘట్టంలో 3.8 సెం.మీ వర్షపాతం నమోదైంది.

వర్షాలు, ఈదురుగాలుల తీవ్రత ఎక్కువగా ఉన్నప్పుడు లోతట్టు ప్రాంతాల్లో నీరు చేరడం, ట్రాఫిక్ సమస్యలు, కరెంట్ సరఫరా నిలిచిపోవడం వంటి ఇబ్బందులు వస్తాయి. అందుకే ప్రజలు జాగ్రత్తగా ఉండాలని అధికారులు సూచించారు. వర్షం పడుతున్నప్పుడు చెట్ల కింద గానీ, బలహీనమైన నిర్మాణాల కింద గానీ నిలబడకూడదు. పక్కా భవనాల్లోనే ఆశ్రయం పొందాలి. ఉరుములు, మెరుపులు ఉన్నప్పుడు పొలాల్లో పనిచేసే రైతులు, కూలీలు ఓపెన్ ప్లేస్‌లో ఉండకుండా సురక్షిత ప్రాంతాలకు వెళ్లాలని కోరారు. వాహనదారులు రోడ్లపై నీటి ఉధృతిని గమనించి ప్రయాణాలు ప్లాన్ చేసుకోవాలని అధికారులు సూచించారు.

Thalliki Vandanam: తల్లికి వందనం నిధులు రాలేదా? టెన్షన్ పడకండి.. మీకో గుడ్ న్యూస్ !

Mahesh Rajamoni — Sun, 09 Aug 2026 11:24:12 +0530

Thalliki Vandanam : తల్లికి వందనం డబ్బులు రానివారికి గుడ్‌న్యూస్.. అభ్యంతరాలు, కొత్త దరఖాస్తుల పరిశీలన పూర్తి చేసి ఈ నెల 30న తల్లుల ఖాతాల్లో రూ.13వేలు జమ చేయనుంది ఏపీ ప్రభుత్వం. సీఎం చంద్రబాబు సర్కారు తెలిపిన వివరాలు ఇక్కడ చూద్దాం.

ఆంధ్రప్రదేశ్ లో బడి పిల్లల తల్లులకు కూటమి ప్రభుత్వం అదిరిపోయే గుడ్‌న్యూస్ చెప్పింది. 'తల్లికి వందనం' పథకంలో మొదటి విడత కింద డబ్బులు రాని అర్హులైన తల్లుల కోసం మరో గోల్డెన్ ఆప్షన్ ఇచ్చింది. ఫస్ట్ ఫేజ్ లో ఎన్పీసీఐ లింక్ కాకపోవడం, ఆధార్ మ్యాపింగ్ ఇష్యూస్ లేదా ఇతర టెక్నికల్ రీజన్స్ వల్ల ఖాతాల్లో డబ్బులు పడకపోతే అస్సలు కంగారు పడాల్సిన పనిలేదు. అలాంటి వారితో పాటు ఈ విద్యాసంవత్సరంలో కొత్తగా స్కూళ్లు, ఇంటర్ కాలేజీల్లో జాయిన్ అయిన స్టూడెంట్లకు గుడ్ న్యూస్ అందిస్తూ, నిధుల విడుదలకు డేట్ ఫిక్స్ చేసింది. ఈ నెల 30వ తేదీన ఎలిజిబుల్ అయిన తల్లుల బ్యాంక్ అకౌంట్లలో రూ.13,000 క్రెడిట్ చేయబోతోంది.

మొదటి విడతలో ఎలిజిబిలిటీ ఉండి కూడా డబ్బులు అందని లబ్ధిదారుల లిస్ట్‌ను ముందే సచివాలయాల్లో డిస్‌ప్లే చేశారు. అభ్యంతరాలు ఉంటే వినతులు ఇవ్వడానికి ఆగస్టు 7 వరకు గడువు ఇచ్చారు. ప్రభుత్వం సేకరించిన సమాచారం ప్రకారం మొత్తం 4,470 రీ-వెరిఫికేషన్ అప్లికేషన్లు వచ్చాయి. ఇకపోతే ఈ ఇయర్ కొత్తగా బడి బాట పట్టిన పిల్లలు, ఇంటర్ లో చేరిన స్టూడెంట్స్ దరఖాస్తు చేసుకోవడానికి ఆగస్టు 25 వరకు టైమ్ ఉంది. వచ్చిన ఆప్లికేషన్లన్నీ ఆఫీసర్లు కంప్లీట్‌గా వెరిఫై చేసి, ఈ నెల 30న గ్రామ, వార్డు సచివాలయాల్లో ఫైనల్ లిస్ట్ అనౌన్స్ చేస్తారు. సరిగ్గా అదే రోజు కన్ఫర్మ్ అయిన లబ్ధిదారుల అకౌంట్లలో ప్రభుత్వం రూ.13వేలు నేరుగా జమ చేస్తుంది.

పైసలు రావాలంటే కేవలం అప్లై చేసుకుంటే సరిపోదు, మీ బ్యాంక్ అకౌంట్ కండిషన్ కరెక్ట్‌గా ఉండాలి. ఫస్ట్ విడతలో చాలామందికి డబ్బులు రాకపోవడానికి మెయిన్ రీజన్ బ్యాంక్ అకౌంట్‌కి నేషనల్ పేమెంట్స్ కార్పొరేషన్ ఆఫ్ ఇండియా లింక్ లేకపోవడమే. అందుకే మీ బ్యాంక్ బ్రాంచ్‌కి వెళ్లి ఆధార్ సీడింగ్, ఎన్పీసీఐ లింకింగ్ పక్కాగా ఉందో లేదో చెక్ చేయించుకోండి. గ్రామ, వార్డు సచివాలయాల్లో డిస్‌ప్లే చేసిన అర్హుల, అనర్హుల జాబితాలో మీ స్టేటస్ ఎలా ఉందో చూసుకుని, ఏమైనా ఇష్యూస్ ఉంటే వెంటనే సచివాలయం సిబ్బందిని సంప్రదించండి.

ఈ స్కీమ్ కింద ఒక్కో స్టూడెంట్‌కి రూ.15,000 ఆమోదించినప్పటికీ, రూ.13,000 తల్లుల ఖాతాలో పడతాయి. పథకం పూర్తి ప్రయోజనం పొందాలంటే ఈ కింది ఎలిజిబిలిటీ క్రైటీరియా తప్పకుండా ఉండాలి..

• కుటుంబానికి 10 ఎకరాలకు మించి అగ్రికల్చర్ ల్యాండ్ ఉండకూడదు.

• వైట్ రేషన్ కార్డ్ ఉండాలి.

• ఫ్యామిలీ మెంబర్స్ పేరు మీద ఎలాంటి ఫోర్ వీలర్ ఉండకూడదు.

• కరెంట్ బిల్లు నెలకు 300 యూనిట్లు దాటకుండా ఉండాలి.

• ఇన్‌కమ్ టాక్స్ చెల్లింపుదారులు అయి ఉండకూడదు.

• టౌన్స్‌లో 1,000 స్క్వేర్ ఫీట్ కంటే పెద్ద ఇల్లు కానీ, స్థలం కానీ ఉండకూడదు.

• మీ పేరు అర్హుల జాబితాలో ఉందో లేదో తెలుసుకోవడానికి Scheme Eligibility Check అధికారిక పోర్టల్ ద్వారా మీ ఆధార్ నంబర్ నమోదు చేసి వివరాలు పరిశీలించుకోవచ్చు.

చీరను నేసిన సీఎం చంద్రబాబు | CM Chandrababu Chirala tour | Asianet Telugu

Galam Venkata Rao — Sat, 08 Aug 2026 17:00:01 +0530

అంతర్జాతీయ ఆదివాసీ దినోత్సవంలో బోండా ఉమా అదిరిపోయే స్పీచ్ | Bonda Uma Powerful Speech @ Vijayawada

Galam Venkata Rao — Sun, 09 Aug 2026 22:00:01 +0530

Heavy Rain Alert : బంగాళాఖాతంలో అల్పపీడనం.. ఈ ఆంధ్రా జిల్లాలకు రెడ్ అలర్ట్, రెండ్రోజులు కుండపోత వర్షాలే

Arun Kumar P — Sat, 08 Aug 2026 07:47:53 +0530

Weather Update : బంగాళాఖాతంలో మరో అల్పపీడనం ఏర్పడబోతోందని.. దీని ప్రభావంతో ఆంధ్ర ప్రదేేశ్ లో భారీ నుండి అతిభారీ వర్షాలు కురిసే అవకాశాలున్నాయని ఏపీ విపత్తు నిర్వహణ సంస్ధ ప్రకటించింది.

IMD Rain Alert : తెలుగు రాష్ట్రాల్లో ఇప్పటికే మంచి వర్షాలు కురుస్తున్నాయి. రుతుపవనాలు యాక్టివ్ గా మారడం, వాతావరణ పరిస్థితులు అనుకూలించడంతో జూలై సెకండాఫ్ లో తెలంగాణలో అత్యంత భారీ వర్షాలు కురిశాయి. ఆగస్ట్ లో కూడా ఈ వర్షాలు కొనసాగాయి. అయితే ఇప్పుడు ఆంధ్ర ప్రదేశ్ వంతు వచ్చింది... రాబోయే రెండ్రోజులు భారీ నుండి అతిభారీ వర్షాలు కురుస్తాయని రాష్ట్ర విపత్తు నిర్వహణ సంస్థ (APSDMA) ప్రకటించింది.

ప్రస్తుతం కొనసాగుతున్న ఉపరితల ఆవర్తనం బలపడి బంగాళాఖాతంలో అల్పపీడనం ఏర్పడనుందని APSDMA అంచనా వేస్తోంది. రానున్న 24 గంటల్లో వాయువ్య బంగాళాఖాతంలో అల్పపీడనం ఏర్పడుతుందని తెలిపింది. రుతుపవనాలను ఈ అల్పపీడనం మరింత యాక్టివ్ గా మార్చనుంది. దీంతో ఆంధ్ర ప్రదేశ్ లో భారీ వర్షాలు కురుస్తాయని విపత్తు సంస్థ తెలిపింది... ఉత్తరాంధ్ర జిల్లాల్లో ఒకటి రెండుచోట్ల కుండపోత వర్షాలు ఉంటాయని హెచ్చరించింది.

బంగాళాఖాతంలో ఏర్పడిన అల్పపీడనం ప్రభావం ఉత్తరాంధ్ర జిల్లాలపై ఎక్కువగా ఉంటుందని విపత్తు సంస్థ తెలిపింది. రెండ్రోజులు (ఆగస్ట్ 8,9 తేదీల్లో) అంటే శని, ఆదివారం శ్రీకాకుళం, మన్యం, విజయనగరం, విశాఖపట్నం జిల్లాల్లో భారీ వర్షాలు కురుస్తాయని... ఒకటి రెండు చోట్ల అత్యంత భారీ వర్షాలు కురుస్తాయని హెచ్చరించింది. అక్కడక్కడా పిడుగులు పడే ప్రమాదం కూడా ఉంటుందట... అందుకే ఈ జిల్లాలకు రెడ్ అలర్ట్ జారీచేసింది. అంటే ఈ జిల్లాల ప్రజలు ఈ రెండ్రోజులు అప్రమత్తంగా ఉండాలని హెచ్చరిస్తోంది.

ఇక కోస్తాంధ్ర జిల్లాల్లో ఆకాశం మేఘావృతమై చల్లని వాతావరణం ఉంటుందని... అక్కడక్కడ పిడుగులతో కూడిన మోస్తరు వర్షాలు కురుస్తాయని APSDMA హెచ్చరించింది. ఉత్తరాంధ్ర తీరం వెంబడి గంటకు 40-50 కిలోమీటర్ల వేగంతో బలమైన గాలులు వీస్తాయని తెలిపింది. కాబట్టి ఉరుములు, మెరుపుల సమయంలో చెట్లు, ఐరన్ పోల్స్, హోర్డింగ్స్ కింద నిలబడరాదని విపత్తు సంస్థ ప్రజలకు సూచించింది. మత్స్యకారులు, తీరప్రాంత ప్రజలు తగిన జాగ్రత్తలు తీసుకోవాలని హెచ్చరించింది.

నేడు (ఆగస్ట్ 8, శనివారం) తెలంగాణలో కూడా భారీ వర్షాలు కురుస్తాయని వాతావరణ శాఖ ప్రకటించింది. ముఖ్యంగా ములుగు, భద్రాద్రి కొత్తగూడెం, ఖమ్మం జిల్లాల్లో భారీ వర్షాలు కురుస్తాయంటోంది. ఆదిలాబాద్, కొమ్రంభీం ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, ములుగు, కొత్తగూడెం, ఖమ్మం, నల్గొండ, సూర్యాపేట, జనగాం, సిద్దిపేట, యాదాద్రి భువనగిరి జిల్లాల్లో ఉరుములు మెరుపులతో కూడిన మోస్తరు వర్షాలు కురుస్తాయట. అలాగే రాష్ట్రవ్యాప్తంగా గంటకు 30-40 కిలోమీటర్ల వేగంతో గాలులు వీస్తాయని హైదరాబాద్ వాతావరణ కేంద్రం తెలిపింది.

pic.twitter.com/k7QNqrhG8s

— Meteorological Centre, Hyderabad (@metcentrehyd) August 7, 2026

School Holidays : విద్యార్థులు ఎగిరిగంతేసే న్యూస్.. ఏపీలో రెండ్రోజులు, తెలంగాణలో మూడ్రోజులు స్కూళ్లు, కాలేజీలకు సెలవులు

Arun Kumar P — Fri, 07 Aug 2026 16:20:41 +0530

వచ్చే రెండ్రోజులు (ఆగస్ట్ 8,9) అంటే శని, ఆదివారం ఆంధ్ర ప్రదేశ్ లో విద్యాసంస్థలకు సెలవులు ఉన్నాయి. అదే తెలంగాణలో అయితే ఆగస్ట్ 8,9,10 మూడ్రోజులు సెలవులున్నాయి. ఎందుకో తెలుసా?

School Holidays : తెలుగు రాష్ట్రాల విద్యార్థులు, ఉపాధ్యాయులకే కాదు ప్రభుత్వ, ప్రైవేట్ ఉద్యోగులకు తీపి కబురు అందింది. ఈ వీకెండ్‌లో పాఠశాలలు, కళాశాలలతో పాటు ప్రభుత్వ, ప్రైవేట్ ఆఫీసులకు వరుస సెలవులు రానున్నాయి. ఆంధ్రప్రదేశ్‌లో వరుసగా రెండు రోజులు, తెలంగాణలో వరుసగా మూడు రోజుల పాటు విద్యాసంస్థలు మూతపడనున్నాయి.

చదువుల ఒత్తిడి నుంచి కాస్త ఉపశమనం పొందేందుకు, కుటుంబ సభ్యులతో సరదాగా సమయం గడిపేందుకు ఈ లాంగ్ వీకెండ్ ఎంతో దోహదపడనుంది. ఇంతకీ ఈ సెలవులకు గల కారణాలు ఏమిటో, ఏయే రోజుల్లో సెలవులు ఉన్నాయో పూర్తి వివరాలు ఇప్పుడు తెలుసుకుందాం.

ఆంధ్రప్రదేశ్ లోని అన్ని ప్రభుత్వ, ప్రైవేట్ పాఠశాలలు, కళాశాలలకు ఈ వీకెండ్‌లో వరుసగా రెండు రోజుల పాటు సెలవు లభించనుంది.

ఆగస్టు 8 (రెండో శనివారం) : ప్రతి నెల రెండో శనివారం రాష్ట్రంలోని విద్యాసంస్థలకు సాధారణ సెలవు ఉంటుంది. ఇలా ఆగస్టు 8న రెండో శనివారం కావడంతో స్కూళ్లు, కాలేజీలకు సెలవు ఉంటుంది. ప్రభుత్వ ఉద్యోగులకు కూడా ఈ సెలవు వర్తిస్తుంది. ఎలాగూ ఐటీ, కార్పోరేట్ ఉద్యోగులకు ప్రతి శనివారం మాదిరిగానే ఈరోజు సెలవు ఉంటుంది.

ఆగస్టు 9 (ఆదివారం) : ఇది సాధారణ వారాంతపు సెలవు దినం. ఇలా ఏపీలోని విద్యార్థులు, ఉద్యోగులకు వచ్చే శని, ఆదివారాలు (ఆగస్ట్ 8,9) వరుసగా రెండు రోజుల పాటు లాంగ్ వీకెండ్ లభించనుంది. ఉద్యోగాలు చేసే తల్లిదండ్రులు, పిల్లలకు సెలవులే కాబట్టి ఫ్యామిలీ మొత్తం చిన్న ట్రిప్ ప్లాన్ చేసుకోవచ్చు.. సరదాగా గడపవచ్చు.

ఆంధ్రప్రదేశ్‌తో పోలిస్తే తెలంగాణ విద్యార్థులకు మరింత ఎక్కువ సమయం విశ్రాంతి లభించనుంది. ఈ వీకెంట్ లో తెలంగాణలో వరుసగా మూడు రోజుల పాటు పాఠశాలలకు సెలవులు రానున్నాయి. ఆఫీసులకు కూడా ఈ సెలవులున్నాయి... అంటే ఉద్యోగులకు లాంగ్ వీకెండే.

ఆగస్టు 8 (రెండో శనివారం) : ప్రతి నెల రెండో శనివారం ప్రభుత్వ, ప్రైవేట్ విద్యాసంస్థలకు సెలవు ఉంటుంది. ఇలా ఈ ఆగస్ట్ లో 8వ తేదీన రెండో శనివారం ఉంది... కాబట్టి విద్యాసంస్థలకు సెలవుంది.

ఆగస్టు 9 (ఆదివారం) : సాధారణ వారాంతపు ఆదివారం సెలవు.

ఆగస్టు 10 (సోమవారం) : తెలంగాణ వ్యాప్తంగా అత్యంత వైభవంగా జరిగే 'బోనాలు' వేడుకల సందర్భంగా ప్రభుత్వం ప్రత్యేక సెలవును ప్రకటించింది. ఈ ఆదివారం లాల్ దర్వాజ మహంకాళి ఆలయంతో పాటు నగరంలోని అమ్మవారి దేవాలయాల వద్ద బోనాల వేడుకలు జరుగుతాయి. రాష్ట్రవ్యాప్తంగా మరికొన్ని ప్రాంతాల్లో కూడా బోనాల పండగను జరుపుకుంటారు.

ఇలా ఆషాడమాసంలో చివరి ఆదివారం (ఆగస్ట్ 9న) బోనాల వేడుకలు జరగనుండటంతో తర్వాతిరోజు అంటే ఆగస్ట్ 10న అధికారికంగా సెలవు ప్రకటించింది తెలంగాణ ప్రభుత్వం. దీంతో తెలంగాణలోని విద్యార్థులకు ఆగస్టు 8, 9, 10 తేదీల్లో (శని, ఆది, సోమవారాలు) వరుసగా మూడు రోజులు లాంగ్ వీకెండ్ లభిస్తుంది.

భువనేశ్వరికోసం చేత్తో నేసిన చీర కొన్న సీఎం చంద్రబాబు| CM Chandrababu Visit Chirala Handloom Workshop

Galam Venkata Rao — Sat, 08 Aug 2026 02:26:06 +0530

CM Chandrababu speech:అంతర్జాతీయ ఆదివాసీ దినోత్సవంలో సీఎం చంద్రబాబు స్పీచ్| International Tribal Day

Galam Venkata Rao — Sun, 09 Aug 2026 21:00:01 +0530

ఆదివాసీ దినోత్సవంలో మంత్రి గుమ్మడి సంధ్య రాణి సూపర్ స్పీచ్ | Gummadi Sandhya Rani Powerful Speech

Galam Venkata Rao — Sun, 09 Aug 2026 22:00:01 +0530

Twin Towers: ఆంధ్రప్రదేశ్‌లో అద్భుత నిర్మాణం.. 47 అంత‌స్తుల ట్విన్ ట‌వ‌ర్స్‌. ఎక్క‌డంటే.?

Narender Vaitla — Thu, 06 Aug 2026 19:47:17 +0530

Twin Towers: ఆంధ్రప్రదేశ్ మంత్రివర్గ సమావేశంలో పలు కీలక నిర్ణయాలు తీసుకున్నారు. ముఖ్యమంత్రి చంద్రబాబు నాయుడు అధ్యక్షతన రాష్ట్ర సచివాలయంలో జరిగిన సమావేశంలో మొత్తం 34 అజెండా అంశాలపై చర్చించి ఆమోదం తెలిపారు.

రాజధాని అమరావతి అభివృద్ధికి ప్రభుత్వం మరోసారి ప్రాధాన్యం ఇచ్చింది. 47 అంతస్తుల ట్విన్ టవర్స్ నిర్మాణానికి అనుమతి ఇవ్వడంతో పాటు, కార్పొరేట్ సంస్థలు, క్వాంటమ్ టెక్నాలజీ సంస్థలకు ఈ భవనాల్లో అవకాశం కల్పించాలని నిర్ణయించింది. హైకోర్టు భవనానికి రీ-డిజైన్ ప్రతిపాదనకు కూడా గ్రీన్ సిగ్నల్ ఇచ్చింది. అలాగే ప్రముఖ 'అమరావతి ఐ' ప్రాజెక్టును వేగవంతం చేసేందుకు రీ-టెండర్లకు ఆమోదం తెలిపింది. ఈ ప్రాజెక్టును మరింత ఆకర్షణీయంగా తీర్చిదిద్దేందుకు ప్రత్యేక ప్రోత్సాహకాలు ఇవ్వాలని కూడా నిర్ణయించారు. అమరావతిలో భూ కేటాయింపులపై మంత్రుల బృందం (GoM) చేసిన సిఫార్సులకు కూడా కేబినెట్ ఆమోదం తెలిపింది.

రాష్ట్రంలో పెట్టుబడులను మరింతగా ఆకర్షించే లక్ష్యంతో ఈజ్ ఆఫ్ డూయింగ్ బిజినెస్ యాక్ట్-2026 (ఆమ్నిబస్ చట్టం) ముసాయిదాకు కేబినెట్ గ్రీన్ సిగ్నల్ ఇచ్చింది. అలాగే ఏపీ పీపీపీ పాలసీ-2026కు కూడా ఆమోదం లభించింది. పబ్లిక్-ప్రైవేట్ భాగస్వామ్య ప్రాజెక్టులకు రూ.1,500 కోట్ల వయబిలిటీ గ్యాప్ ఫండింగ్ ఏర్పాటు చేయాలని నిర్ణయించారు. పరిశ్రమలకు అనుమతుల ప్రక్రియను సులభతరం చేయడం, పెట్టుబడులకు ఉన్న అడ్డంకులను తొలగించడం ద్వారా రాష్ట్రంలో పారిశ్రామిక వృద్ధిని వేగవంతం చేయడమే ఈ విధానాల ప్రధాన లక్ష్యంగా ప్రభుత్వం పేర్కొంది.

కొత్త జిల్లాలకు అనుగుణంగా అర్బన్ డెవలప్‌మెంట్ అథారిటీల (UDA) పునర్వ్యవస్థీకరణకు కేబినెట్ ఆమోదం తెలిపింది. దీంతో యూడీఏల సంఖ్య 21 నుంచి 23కు పెరగనుంది. కొత్త జిల్లాల అవసరాలకు అనుగుణంగా 15 కొత్త జిల్లా విద్యాశాఖ అధికారి (DEO) పోస్టులు సృష్టించనున్నారు. రెండు కొత్త ప్రైవేట్ విశ్వవిద్యాలయాల ఏర్పాటుకు కూడా అనుమతి లభించింది. విజయవాడ ఆటోనగర్‌లో యూడీఎస్ హక్కుల క్రమబద్ధీకరణ, 400 హౌసింగ్ యూనిట్ల భూ సమస్య పరిష్కారం, మున్సిపల్ భూముల లీజు గడువు పెంపు, ఏదుల ముస్తూరులో భూములను APIICకు, తిమ్మసముద్రంలో భూములను CUDAకు బదిలీ చేయడం వంటి ప్రతిపాదనలకు కూడా ఆమోదం లభించింది.

కుప్పం గ్రీన్‌ఫీల్డ్ విమానాశ్రయం భూసేకరణలో డి-ఫామ్ లేని సాగుదారులకు ఎకరాకు రూ.12.44 లక్షల ప్రత్యేక పరిహారం ఇవ్వాలని కేబినెట్ నిర్ణయించింది. మోతడక ప్రాంతంలో 2,344 ఎకరాల్లో ల్యాండ్ పూలింగ్ చేపట్టేందుకు ఆమోదం తెలిపింది. భవిష్యత్తులో హైస్పీడ్ రైలు మార్గం, ఇన్నర్ రింగ్ రోడ్డుకు అవసరమైన భూముల సమీకరణకు కూడా గ్రీన్ సిగ్నల్ ఇచ్చింది. కండలేరు నుంచి పరిశ్రమల క్లస్టర్‌కు నీటి సరఫరా ప్రాజెక్టుకు అనుమతి లభించింది. అదే సమయంలో దిశ చట్టం-2019, ల్యాండ్ గ్రాబింగ్ బిల్లు-2024లను ఉపసంహరించుకుని మరింత సమర్థవంతమైన కొత్త చట్టాలను తీసుకురావాలని నిర్ణయించారు. అదనంగా పాదచారుల భద్రత పాలసీ-2026కు కూడా కేబినెట్ ఆమోదం తెలిపింది.

విజయవాడలో చంద్రబాబు డప్పులకి స్టెప్పులేసి ఆదివాసీలు | CM Chandrababu International Tribal Day

Galam Venkata Rao — Sun, 09 Aug 2026 21:33:53 +0530