సగర్వంగా.. టెక్నాలజీలో నలుగురు ఎన్నారై మహిళలు.. ఫోర్బ్స్ ప్రశంస
మహిళలు ఆకాశంలో సగం అనేది ఇప్పటివరకు నినాదం మాత్రమే. కానీ భారత సంతతి మహిళలు తామూ తీసిపోమని రుజువు చేస్తున్నారు. తాజాగా 2018 సంవత్సరానికి ఫోర్బ్స్ ప్రకటించిన టెక్ మొగల్స్‌లో అమెరికాలోని భారత సంతతికి చెందిన నలుగురు మహిళామణులు చోటు దక్కించుకున్న.
Followన్యూయార్క్‌: అమెరికాలో భారత సంతతికి చెందిన మహిళలు కూడా టెక్నాలజీ రంగంలో విజయపతాకం ఎగురవేస్తున్నారు. ఫోర్బ్స్ సంస్థ 2018 సంవత్సరానికి సంబంధించి రూపొందించిన ‘అమెరికాలో అగ్ర స్థాయి 50 మంది టెక్నాలజీ ప్రముఖుల’ జాబితాలో భారత సంతతికి చెందిన నలుగురు మహిళలు చోటు దక్కించుకోవటమే దీనికి నిదర్శనం. సిస్కో మాజీ చీఫ్‌ టెక్నాలజీ ఆఫీసర్‌ పద్మశ్రీ వారియర్, ఉబెర్‌ సీనియర్‌ డైరెక్టర్‌ కోమల్‌ మంగ్తాని, కన్‌ఫ్లూయంట్‌ సహ వ్యవస్థాపకురాలు నేహ నార్ఖడే, ఐడెంటిటీ మేనేజ్‌మెంట్‌ కంపెనీ ‘డ్రాబ్రిడ్జ్‌’ వ్యవస్థాపకురాలు, సీఈవో కామాక్షి శివరామకృష్ణన్‌ ఈ జాబితాలో నిలిచారు. మహిళ భవిష్యత్ కోసం వేచి చూడదని ఫోర్బ్స్ పేర్కొన్నది.
’2018 టాప్‌ 50 టెక్నాలజీ మహిళల జాబితా. ముందుచూపుతో ఆలోచించే మూడు తరాల టెక్నాలజీ నిపుణులను గుర్తించాం’ అని ఫోర్బ్స్ పేర్కొంది. ఐబీఎం సీఈవో గిన్ని రోమెట్టి, నెట్ఫ్లిక్స్ ఎగ్జిక్యూటివ్‌ అన్నే ఆరన్‌ వంటి టెక్నాలజీ దిగ్గజాలూ ఈ జాబితాలో ఉన్నారు.
మోటొరోలా, సిస్కో కంపెనీల్లో ఉన్నతస్థాయిల్లో పనిచేసిన పద్మశ్రీ వారియర్ (58). ప్రస్తుతం చైనీస్‌ ఎలక్ట్రిక్‌ స్టార్టప్‌ ఎన్‌ఐవోకు అమెరికా సీఈవోగా ఉన్నారు. 138 బిలియన్‌ డాలర్ల సిస్కో సిస్టమ్స్‌ కంపెనీ కొనుగోళ్ల ద్వారా మరింత ఎదగటంలో వారియర్ ముఖ్య పాత్ర పోషించారు. మైక్రోసాఫ్ట్, స్పాటిఫై బోర్డుల్లోనూ భాగస్వామిగా ఉన్నారు.
‘టెక్నాలజీ రంగంలో ఇతర మహిళలకు మార్గదర్శిగా వ్యవహరించేందుకు వారియర్ ఇప్పటికీ వీలు చేసుకుంటున్నారు. ట్విట్టర్‌ ద్వారా 16 లక్షల మంది ఫాలోవర్లకు అందుబాటులో ఉంటున్నారని ఫోర్బ్స్ ప్రస్తుతించింది.
గుజరాత్‌లోని ధర్మసిన్హ్‌ దేశాయ్‌ ఇనిస్టిట్యూట్‌ ఆఫ్‌ టెక్నాలజీ పూర్వ విద్యార్థి మంగ్తాని ప్రస్తుతం క్యాబ్‌ అగ్రిగేటర్‌ ఉబెర్‌లో బిజినెస్‌ ఇంటెలిజెన్స్‌ హెడ్‌. పలు స్వచ్ఛంద సంస్థలకూ సేవలందిస్తున్నారు. పుణే యూనివర్సిటీ పూర్వ విద్యార్థి నార్ఖెడె లింక్డెన్‌లో సాఫ్ట్‌వేర్‌ ఇంజనీర్‌గా పనిచేస్తున్నప్పుడే అపాచేకఫ్‌కా అనే అప్లికేషన్‌ను అభివృద్ధి చేశారు. ఇది రియల్‌టైమ్‌లో భారీగా వచ్చే డేటాను ప్రాసెస్‌ చేస్తుంది. కన్‌ఫ్లూయెంట్‌ను కూడా ఆమె స్థాపించారు. ఈ సంస్థ గోల్డ్‌మన్‌ శాక్స్, నెట్ఫ్లిక్స్, ఉబెర్‌కు సేవలందిస్తోంది.
‘ప్రజలు రోజువారీ కంప్యూటర్లు, ల్యాప్‌టాప్‌లు, స్మార్ట్‌ఫోన్లను విస్తృతంగా వాడుతున్నారు. అన్ని రకాల పరికరాల్లో ప్రకటనలను చూపే మార్గం ప్రకటనదారులకు కావాలి. ఫేస్‌బుక్, గూగుల్‌ ప్రకటనదారులకు ఇప్పటికే ఈ సేవలందిస్తున్నాయి. డ్రాబ్రిడ్జ్‌ వ్యవస్థాపకురాలు కామాక్షి శివరామకృష్ణన్‌(43) రూపంలో వాటికి ఇప్పుడు పోటీ ఎదురైంది’’ అని ఫోర్బ్స్ తెలిపింది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
